رواية من حضرتك عشان قلبي تذله الفصل الثامن عشر 18 - بقلم ام عوض

دخل عنان لغرفة جويريا
وهي اول ما شافته لفت وجهها عنه وهي تقول :خير جاي
عنان:عفوآ؟ جاي لغرفتي ولا ما تبين
جويريا قامت وراحت عند السرير :ما قلنا شيء بس استغربت اليوم المفروض عند حنان
عنان :وين مسوية نفستس ما تدرين
جويريا فعلآ تدري بس تسوي نفسها مو مهتمة :ايه ما ادري وش؟
عنان ضحك :حاولت افهمتس بس ما قدرت
جويريا تقعد فوق السرير :وما بتقدر
عنان :خلاص اعترفي انتس طحتي في شباكي وحبيتيني
جويريا :ما ادري ليه الثقة هاذي
عنان :دام كذا ليه غرتي علي من جيهان
جويريا قامت معصبة  من سيرتها :كم مرة اقولك ما غرتت انت من وين تفهمم؟؟
عنان:طيب خلاص سكتنا وشفيتس عصبتي
جويريا :ولا عاد تذكر لي اسمهاا والحين اذلف برااا مابي اشوف وجهك
عنان :وين اروح
جويريا بعصبية:روح عند الي ما تتسمى
عنان ناظر فيها شوي وبعدها قال :طيب ابشري ما طلبتي
اخذ مخدته ولحافه وطلع
وجويريا توهقت ما توقعته منجد يطلع قعدت فوق السرير وهي تقول يا ربيي الحيين وين راح ينام؟ لا يكون عند جيهانو لا لا اكيد مو عندهاا
قامت من مكانها وراحت عند الشباك تطل لو صدق
شافته نزل تحت بالحوش وحط مخدته ولحافه وتسطح
ارتاحت انه لا راح عند حنان ولا جيهان بس للحين خايفة انه جيهان تطلع له وهي تدري جيهان تبيها من الله
بس المشكلة كرامتها ما تسمح لها تنزل وتخليه يرجع وهي الي طردته برا الغرفة
مشيت لفة بالغرفة وهي خايفة ومحتارة وش تسوي سمعت صوت باب وراحت عند الشباك تشوف من الي طلع وهي تدعي انها مو جيهان  وفعلآ ما كانت هي شافت خلود طلعت وشافت اخوها بالحوش ومستغربة ورجعت لغرفتها مرة ثانية و واضح عليها نعساانة ومالها خلق
جويريا وقفت بمكانها وهي تقول :انا لازم ارجعه الغرفةة دام جيهان موجودة بالبيت مستحيل اخليه يبقى لوحده. واندري في جيهان القردة تبيها من الله
نزلت تحت بسرعة و وقفت عند عنان وهي تقول :قم اطلع معي فوق بسرعة
عنان رفع حاجبه بدهشة:وليه؟
جويريا :مالك دخل قم بسرعةة
عنان :انا نايم هناا اليوم اطلعي انتي ونامي لوحدتس
جويريا سحبت منه البطانية :مو بكيفك بتطلع معي يعني بتطلع
عنان رجع بطانيته :ما بتعقلين انتيي يعني تطرديني وبعدين تجي ترجعيني الغرفة غصب عني
جويريا وقفت بمكانها وهي تدري انه ما بيطلع معها فوق وهي تموت ولا تخليه ينام هنا وجيهان بالبيت
قربت منه وتسطحت جنبه :زيين دامك ما بتطلع انا بنام عندك
عنان مبتسم ابتسامته :لهدرجة تغارين علي؟
جويريا تنرفزت وكانت تبي تتكلم
بس هو قال بسرعة:خلاص خلاص نامي ولا ترجعي تعصبي المهم خلينا ننام
جويريا تدفه شوية :روح شوية هناك ضيقت علي
عنان تحرك شوية وفسح لها مجال :هااه ناميي
جويريا غمضت عيونها وهي صاحية ومتطمنة الحين وفرحانه بداخلها  انه جيهان ما بتجي وتقعد معه
وعنان قعد يتأملها وهو بداخله يقول معقولة هاذي البزرة جابت راسي وين الزين عنها جابت راسي بعنادها بعد انشهد تطيح الطير من السما
ونام هو
بعد ما تأملها لوقت طويل
وهي فتحت عيونها يوم ما حست بحركته شافته نايم وغطسان بالنوم
ناظرت فيه نظرة طويلة وهي تقول معقولة بديت احبه لذا وش فيه ينحب؟ انسان ذكوري ويغث وش الي عاجبني فييه عشان احبه يعع بسس
صحيت على نفسها هي وش تقول
وقالت بسرعة لا انا احب؟ ولا مو حيا الله اي احد لذا التيس مستحيل
ولفت وجهها لجهة الثانية وهي تقول انا اموت ولا احبه واندري في فطرتهم

في صباح يوم الثاني
ابو محمد قاعد في مجلس ابو فيصل
و وليد جنبه
ابو محمد بطبعه ما يحب المقدمات والتسليك خاصة وهو ما يطيق ابو فيصل  :مابي اطول عليك يا ابو فيصل وانا قد طلبت القرب منك وراجع طالب القرب منك مرة ثانية  وجاي اخطب بنت اخوك اسيل لولدي وليد
ابو فيصل ما صدق انه بيتخلص من اسيل :يا هلا والله  ياا هلااا هاذي ساعة المباركة والسعد والله انه القرب منك ما جانا منه الا كل خير وابشر ما طلبت شيء وهي لولدك و ولدك لها
ابو محمد :زين والمهر الي تطلبونه نحن ندفعه
ابو فيصل :الي يجي منك كل خير لو تدفع ريال واحد
ابو محمد عارف كلمته كل من خطب بنات خواته قال نفس الكلام لهم فقال:بندفع المهر وان شاء الله يكون قد مقامكم
ابو فيصل  سكت شوي وبعدها قال :متى بتجيب الشيخ؟ 
ابو محمد تنهد من ابو فيصل  واستعجاله وقال :بالوقت الي بغيته يا ابو فيصل بالوقت الي بغيته
ابو فيصل :لو تجي بكرى احسن ليه نبطي وانت تدري ابوهم توه متوفي وما يصير نسوي زواج وحفلة وشوشة
ابو محمد :ابشر جاي بكرى مع الشيخ ان شاء الله
ابو فيصل :زين وعاد ولدك وليد ما شاء الله عليه وين نلقى احسن منه والله يا ابو محمد فرحتني يوم انك اخترت لولدك من عندي
ابو محمد ابتسم وهو بداخله وده يقوم يصفقه
وابو فيصل قام وهو يقول :عن اذنكم شوي وراجع
وطلع برا وهو ينادي بفرح :يا اسييل وينتس يا اسييل
اسيل طلعت من المطبخ وجنبها هيام رافعة حاجبها
ابو فيصل :والله زين حظتس مثل جود خطبس وليد
اسيل سكتت لانها تعرف قبل وما تكلمت
ابو فيصل :استانسي يا دلخةة بتروحين فبيته وعنده فلووس و بكرى بيجي ياخذتس
اسيل انفجعت:بكرى؟؟ بس مرة مستعجلين ليه العجلةة
ابو فيصل :انطمي بس مثلتس مثل خواتس وش فرق يعني، يالله يالله بس انا راجع المجلس جيت اقولتس مو اخذ رايتس
ولف يمشي وهو يقول ما يحمدون ربهم
هيام :وشفيتس انفجعتي وش توقعتي يعني اكيد ما ينتظرتس اسبوع او اسبوعين حنا وشفتي كيف رمانا من اول يوم
اسيل :مدري توقعت اسبوع اقل شي مو اول يوم يخطبوني وثاني يوم اروح عندهم وانصدم بكل  شي مرة وحدة يا هيام هاذي زواج والمفروض اتجهز نفسيآ لها
هيام شافتها فرصة وهي جاهلة عن الزواج ولا تدرريي عن شيء والمفروض هي الي تقولها وتعلمها سحبتها معها للغرفة وقفلت الباب
اسيل استغربت :اشفي ليه جبتيني هنا
هيام : اسمعيني انتي على ابواب الزواج ولازم تدرين كيف تتصرفين اول يوم وعن ليلتتس الاولى عشان لا تفشلينا عند الرجاال
اسيل قعدت بحماس وهي من زماان ودها تدري عن ذي السالفة  :ايه اقعدي وقوليلي جاني فضول وش كانت تقولكم جود بالغرفة لوحدكم وما تدخلني
هيام قعدت تشرح لها وتفهمها لأنها ما تدري عن ذا الاشياء وهي للحين عقلها بزر واحسن من انها تنصدم من اول يوم
اسيل بوجه متقرف :يعع تكفين لاااا
هيام :انطمي وش تتوقعين يعني
اسيل قامت وهي للحين مو مستوعبة :يعني الحين يسوون حفلة وعشا ويعزمون الناس ويرقصون كل ذاا عشان اثنين بيتفااصخون ؟؟؟
هيام ضربتها بخفة :خليتيني اندم اني قلت لتس المهم انتس تدرينه من بدري  وما تنصدميين "وقامت" انا رايحة اشوف الطبخة لا تنحرقق
وطلعت واسيل تقول وع اكيد ما بخليه يقرب مني خيير؟

صحيت جويريا من النوم وانفجعت يوم شافت ام عنان بوجهها
ام عنان من الفجعة هي بعد صرخت ومن صرختهم صحي عنان وهو :اشفييي وشصايير
جويريا مسكت قلبهاا :كذا تفجعييني يا خالةة بغيت انجلطط
ام عنان :والله انا الي بغيت انجلطط وش جايبكم اثنينهم بالحوش مو عيب عليكم تنامون بالحوش قدام خلق ربيي
عنان:يمه الله يهديتس وين الخلق و وينا حنا
جويريا :بعدين رجلي مو شخص غرييب عشان تقولين عيب
ام عنان :قومو قوموو بسس الي استحو ماتوو
قام عنان وقامت جويريا بعد وهي بيدها اللحاف والمخدة وهمست لعنان :امك حسستني انها دخلت علينا وحنا مفصخين
عنان ضحك وقال:ليت كان كذا
. جويريا  ضربته بخفة ومشت عنه واخذت المخدة واللحاف للغرفة وغسلت وجهها ونزلت مرة ثانية
شاف جيهان توها قاعدة مع ام عنان
ام عنان يوم شافتها كشت عليها:مالتت عليتس يا الي ما تستحيين على وجهتس
جويريا تنهدت بقلة صبر:يا خاالة  زوجيي والله زوجيي بعدين اسألتس بالله شفتيني مفصخين جنب بعض ولا كيف نايمين في امان الله اشفيهاا؟ "وناظرت لجيهان" احسن من بعض النااس ولد عمها وتقعد عنده وكنه رجلهاا
ام عنان :انطمي بس وتدافع بعدد "وصرخت بصوت عالي" خلوود وين الفطوور بسرعةة
جا لهم صوت خلود :جااية يممه انتظري شويي
قعدت جويريا وفجاة لاحظت انه حنان مو موجودة رفعت حاجبها بإستغراب:الا اقولتس خالة وينها حنان؟ ما اشوفها من امس
ام عنان:مدري عنها منقبرة بغرفتها الظاهر ما تبي تقابل وجيهنا
جويريا سكتت شوي وهي تقول اخر فترة بس قاعدة بغرفتها هي
قامت وهي تقول:انا رايحة اشوفها
ام عنان ناظرتها نظرة استغراب :شبلاها ذي نزل عليها الحنية من صباح الله خير
جويريا وهي طالعة قابلت عنان نازل رايح لدوامه
عنان:وين طالعة غرفتس؟
جويريا : عند حنان
عنان يمسك راسه :تكفين لو رايحة تتمشكلين لا تروحين
جويريا :يا ربي دايم المشكلجية هي انا مو؟ اذلف اذلف بس للدكان وافطر هناك بعدد مو انزل واشوفك تفطر مع امك وجيهاان يا ويلك وقسمم
عنان ضحك:ابشري ما طلبتي
نزل عنان وهي طلعت لغرفة حنان ترددت في انها تدق الباب او لا اخر شي سمت بالله ودقت وهي تقول خطية صح ضرتي بس هي مسكينة معندها احد مثلي مثلها وام عنان الله يكفينا خيرها وشرها ما تسأل عنها لو غابت شهر
جا لها صوت حنان وهي تقول :ادخل حبيبي ثامر ادخل
تحسبه ثامر
دخلت وهي تشوفها متسطحة و واضح عليها تعبانة
وحنان استغربت ليه جاية عندها والاكثر هي مالها خلق لها لانها تعبانة
جويريا قالت بصوت هادئ غير عن عوايدها :انتي بخير؟ تعبانة فيتس شي؟
حنان :بخير الحمدلله
جويريا قربت منها وقعدت بطرف السرير :متأكدة؟؟ انادي لتس ام عمار تجي تشوف وشفيتس ؟
حنان سكتت وهي مستغربة من تعاملها :لا ما يحتاج آلم بسيط فبطني ويروح
جويريا قامت وقالت :ايه مو بكيفتس بتجي ام عمار وتشوفتس تخيلي شي خطير لا سمح الله بعدين ما بتندمين انتس سمعتي كلامي؟
حنان دخل الشك بقلبها :طيب سوي الي يعجبتس

وطلعت جويريا  برا الغرفة ونزلت تحت ونادت ثامر من برا وقالتله روح عند ام عمار وخلها تجي قولها ضروري
وهو راح عشان يناديها
رجعت دخلت لداخل
وام عنان تناظرها ب نص عين :وش قلتي لثامر ما سمعت زين؟
جويريا بملل :قلت له ينادي لأم عمار لأنه حنان تعبانة
ام عنان تناظر لجيهان :هاذي فيها شيء صدقوني
جويريا طلعت مرة ثانية لغرفة. حنان وهي مطنشة ام عنان
جيهان:صدق خالة فيها شيء مو طبيعي خذوها للشيخ يقرا عليها ذي مو طبيعية صدقيني
ام عنان :وانتي صادقة  والله
خلود جت وجابت الفطور:هاه تفضلو احلى فطور لكم
ام عنان :واخيرآ ما بغيتيي
خلود:يمه انا وحدي بالمطبخ وتبيني الحق علي الوقت حرام عليتس اسمعي مني وجيبي خدامة والله احسن لناا
ام عنان:انطمي بس هاذا الناقص اجيب خدامة لبيتي وعندي بنت بالبيت وحرمتين
خلود:يمه انت قد شفتي جويريا او حنان تساعدني بالبيت؟؟ حنان من يوم حملت بطلت، وجويريا الله يحفظهاا من يوم جت ما لمست باب المطبخ حتى ، بس غسلت الحوش مرة وسحبت
ام عنان :ادري يمه الله يعينتس يروحي
خلود بفرحة :طيب بتجيبين لي خدامة؟
ام عنان :لو عرستي بعدين افكر اجيب  كلي كلي يمه وانطمي
خلود سكتت منقهرة

معاذ اول ما صحي من النوم على طول لبس وتوجه لبيت ابو فيصل وهو يدعي انها توافق ترجع له
دق الباب وجا له صوت نور :ميين
معاذ :ابغى نور نادوها
نور تضرب يد بيد :تفضلل ،معك نور بشحمهاا ولحمهاا ، وش بغييت؟؟؟
معاذ :تكفين يا نور عييني ، بلاهاا وارجعي بيتس ورجلتس
نور:للحين تحسبني امزح معك يعني؟
معاذ :الله يهديتس تسوين كذا من ضحك ومزووح ارجعي و والله ما يتكرر الي صار والله اني احبتسس وابيتس
نور:طيب بسييطة، ادفع المهر وتجي تاخذني من اول وجدييد
معاذ :معندي يا نور الا نص المبلغغ والله وابوي رافض يساعدنيي تكفيين لا تفشليني عند خلق ربي وارجعييي
نور:لا ولا عاد تجيي تقنع فيني لاني حلفت ما ارجع وانا كلمتي وحدة ان قلتها ما اراجع فيها
ولفت ومشت وخلته

الهنوف صحيت من النوم واخيرآ توضت وصلت وبعدها راحت تصحي محمد بس ما لقته بمكانه استغربت وين يروح يعني وما مرت ثانية وحدة والا تشوفه جاي من وراها
الهنوف:وين كنت؟
محمد:هناك كنت اصلي
الهنوف :طيب قم خذني عند جمان لا تكون لوحدها
محمد :طيب الحقيني للسيارة وانا جاي
الهنوف:لا بنطلع مع بعض
محمد :وليه؟
الهنوف :اخاف
محمد راح واخذ المفتاح من مكانه وهو يقول :تخافين ب عز الصبح و نحشتي  باخر اليل حلو والله
الهنوف :بسرعة بس
طلعو وركبو السيارة متوجهين للمستشفى
لحظات طويلة لين وصلو نزلو وراحو لغرفة. جمان شافوها لابسة ملابسها وقايمة من مكانها
الهنوف راحت عندها بسرعة :مجنونة انتي لي قمتي من مكانتس للحين ما التأم جرحتس
جمان:خلاص سجلت خروجي من المستشفى
الهنوف:كيف وانتي للحين ما صرتي زينة
جمان: تكفين كيف اصير زينة وانا قاعدة بين اربعة جدران جاني عقدة نفسية والله
الهنوف ما حبت تضغط عليها :طيب يروحي براحتس

زين صحي من النوم وهو يلمس راسه يحس صار احسن من امس كان مصدع بس شويي بعد ما روزا سوت له مساج راح الصداع ونام مرتاح
لف لها شافتها نايمة للحين ما صحيت ابتسم لها وهو يتذكر كيف تعصب يوم هو ينرفزها هو كذا الشخص الي يحبه يحب يتنرفز ويعصبه
تحركت من مكانها وفتحت عيونها من ضوء الشمس
لفت عند زين وقالت:انت للحين ما رحت الدكان
زين مسك راسه:ايه للحين احس راسي مصدع تعالي سويلي مساج
روزا:لا يا رجال صدقت اني بسويلك كل يوم
زين:يالله ولا ما بروح الدوام
زورا تقوم:طيب لا تروح وابوك بيعصب عليك انت مب انا
زين:يالله تكفين سوي لي مساج
روزا تنهدت وراحت عنده وهي تقول:اخر مرة اسويلك انت ما تنعطي وجه قسم بالله
زين يبتسم :يالله سوي وبعدين اجيب لتس هدية
روزا تحمست :وشهو؟
زين:لا ما اقولتس انتي سوي لي مساج وابشري كل فترة اجيب لتس هدية
روزا ابتسمت :ابشر ما طلبت كل يوم اسويلك

وصلت ام عمار وطلعت عند حنان وقعدت تشوف وشفيها تعبانة
جويريا :اشفيها؟ هي بخير؟
ام عمار قامت من عند حنان وناظرت لجويريا :وانتي وش ورااتس تبين تطمنين عليها
جويريا :ما وراي شي من طيب قلبي
ام عمار :مافيها شيء تعبانة شوي لأنها ضعيفة. وقد صار معها وقت كانت حامل في ثامر
جويريا :اهاه طيب شكرآ لتس
ام عمار لفت :انا نازلة عند مريم
جويريا تذكرت حاجة و وقفتها وهي تقول :لحظة لحظة انتظري شوي
ام عمار:وش عندس
جويريا بهمس:انتي تدرين صح انه اختي هيام حامل؟
ام عمار:ايه
جويريا :ابيتس بكرى تجين معي نروح سوا عند اختي وتشوفينها حملها
ام عمار :ابشري ما طلبتي
جويريا ابتسمت :زين وحقتس يوصلتس
ام عمار نزلت تحت
وجويريا لفت عشان تمشي بس وقفها صوت حنان وهي تقول :جويريا
جويريا لفت لها:هلا
حنان زبطت قعدتها :انتي صدق خفتي علي من طيبة قلبتس؟ ولا وراتس شي؟؟
جويريا ابتسمت :صحيح انه تلاقينا بظروف ما خلتس تشوفين جانبي الزين بس صدقيني اني مو زي ما حاطتني فبالتس
حنان ردت لها الابتسامة وهي فعلآ بداخلها مبسوطة انه اهتمت فيها وخافت عليها لأنه لا ام عنان ولا جيهان ولا خلود اهتمو فيها ولا سألو وينها من امس
وهي يتيمة مثل جويريا لا عندها ام ولا اب ولا خوات عشان يخافون عليها
طلعت جويريا برا الغرفة وراحت غرفتها وفتحت شنطتها وطلعت فلوس عشان تعطي حق ام عمار
ونزلت تحت قعدت معهم
ام عنان تناظر جويريا :ايه والله حنا بعد استغربنا يا ام عماار جويريا بلحمها وشحمها نادت عليتس لضرتها
جويريا تنهدت بملل من نفس الموضوع
ام عمار :معليتس يا ام عنان واضح من طيب قلبها بعدين انا بحياتي كلها ما قد سمعت وحدة تناديني لضرتها
ام عنان :وانتي صادقة صعبة الضرة
ام عمار: الا اقولتس، ولدتس ما يفكر ياخذ الثالثة لأنه الي اخذ الثانية بياخذ مو بعيدة عنه لثالثة
ام عنان ناظرت لجيهان وقالت بإبتسامة :اخذ الاولى والثانية من اختياره ان شاء الله الثاالثة تكون من اختياري  انااا
جويريا فهمت عليها ومن نظرتها وشتقصد
لفت ام عنان لجيهان:انتي يروحي ما قد خطبتس احد؟
جيهان ما صدقت انهم سألوها :لااا خطبوني كثيير يا خالة كل ما رحت بيت احد ما يمر والا اليوم الثاني جايين بيتنا
ام عمار تناظرها بنص عين مو مصدقتها :وليه ما تزوجتي للحين؟
جيهان:النصيب يا ام عمار النصييب ما رضي
ام عنان تزبط قعدتها:عاد ما الوم لا كثرو الخطابة انتي شحلاتس يا زينتس ما ينلامون والله  لو يخطبونتس كثير
جيهان استحت وبعدت شعرها من وجهها بدلع
جويريا اخذت فنجان الشاي وهي تقول :عادي يا خالة لا تستغربين البضاعة لا رخصت زادت عليها الزباين
وشربت رشفة من الشاي بكل برود
ام عمار حطت يدها بفمها من الصدمة
وجيهان اختفت ابتسامتها وام عنان ناظرتها بصدمة
جويريا رجعت فنجان الشاي لمكانها وناظرتهم وقالت:اشبكم تناظروني مو صدق كلامي؟
قامت جيهان من مكانها متضايقة وتبكي
وام عنان قامت بعد ورفعت اصبعها لجويريا قبل تمشي :الخيزرانة تحتريتس طييب
وراحت ورا جيهان وهي تقول يا بنتي لا تزعلين هاذي وحدة راسها يابس وبزرة
ام عمار تضربها بخفة :زعلتي البنت يا ملسونة
جويريا :تستاهل
ام عمار قربت منها :اسمعي مني انتبهي لرجلتس حسب الي فهمته من مريم تبي تخطبها لولدها
جويريا :ادري فهمت عليها بس هين والله ما اخليهاا تزوجه
ام عمار :كفو عليتس ما يوقف بوجه مريم الا وحدة تشبهها
جويريا :يع لا تشبهيني فيها عجوزة النار
ام عمار :اسمعي مني لا يغرتس شكلها البريئ تراها داهية اسألي حنان عنها ،اخخ يا حسرتي عليتس يا حنان مسكينة حاولت تخرب بيتها اكثر من مرة، بس ربي ستر والحين هي وراتس انتيي
جويريا رفعت حاجبها بدهشة:صدق؟
ام عمار:اييه
جويريا اخذت فنجان الشاي من الصينية :والله مو بهينة يعني
ام عمار :انتبهي يا بنت ابوتس انتبهي
جويريا :منتبهة يا روحي و والله ما تزوج ولدها لجيهان القردة هاذي

نهاية البارت
بنات في احد يعرف سبب مشكلة في تيك توك مو قادرة ادخل حسابي هو بندوه ولا وش بزبط؟
اقدر ادخل من جوال ثاني غير جوالي بس مقدر من جوالي مدري ليه
اقدر اسوي حساب جديد بس مقدر ادخل حساب موجود حاولت مررة كثير بس راضي يدخل اذا في احد تعرف سبب المشكلة تقول ولا تبخل علينا 😭💔

يالله مع السلامة 🥺❤️