رواية من حضرتك عشان قلبي تذله الفصل الثامن والأربعون 48 - بقلم ام عوض

ام زين عند روزا من الصبح وقاعدة وهي قدامها صحن وزبدية وتفرغ التمر من النوا وهي تقول :التمر زيين للمَرة الحامل يا بنيتي فيه فوائد وااجد وبعد الولادة بعد ياكلونهاا مرةة طييب الحين انا بجهز هذول لتس واحطهم بالثلاجة وانتي الزمي علييهم طيب يا عمري
روزا ابتسمت :ان شاء الله يا خالة بس اكلهم متى يعني في وقت محدد؟
ام زين :اييه له وقت محدد تاكلينه في صبح اول ما تصحين على الريق بكيفتس هو تاكلينه مع القهوة او لوحده اهمشي تاكلينه على الريق
روزا ابتسمت :طيب
ام زين ابتسمت :انتبهي لنفستس ولا تاكلين كل شيء من يد الكل في ناس عيونهاا حسوودة تناظر وما تسمي بالله الله يكفينا خيرهم وشرهم
روزا ضحكت :ان شاء الله
ام زين : ولا رحتي بيت امتس حطي من كحل الحجر يبعد العين والحسد عنتس
روزا :ان شاء الله يا خالة
ام زين :ايه قلتي لامتس
روزا :ايه قلتلها وفرحت واجد
ام زين:زين يا بنتي
دخل زين وهو يقول :هلاا والله بالغاليةة
ام زين:بلا غالية بلا بطيييخ
زين :افاا لييه
ام زين:جيت ولقيت البيت كله فوق و تحت
زين مستغرب:طيب شدخلني؟
ام زين :وش الي شدخلك ما تقوول روزا المسكينة حامل اقوم ارتب عنهاا يا الي ما تستحي على وجهك
زين ناظر روزا بدهشة
و روزا ابتسمت له وهي ترفع له حاجبها بنذالة
زين :الحين صار شغل روزا علي انا لانها حامل
ام زين :اييه مو الي فبطنها ولدك المفروض تراعيها وتهتم فيهاا ويا ويلك سواد ليلك لو قامت تسوي شيء بالبيت
زين راح وقعد جنب امه :اشوفك انتي وابوي سحبتو علي من يوم تزوجت وصارت روزا اغلى مني
ام زين :كلكم غاليين يا يمه بس راعيها هالفترة بسس
زين :ابشري يمه توصين روزا وهي بعيونيي
ام زين ابتسمت:الله يحفظكم لبعض يا رب
زينو روزا :امين
زين مد يده عشان ياخذ تمره :الله تمر
بس قبل ياخذ ام زين ضربت يده :وجعوووه يا زيين لا تلمسهم
زين:لييه
ام زين :هاذا حق روزا
زين يمثل انه يبكي :خلاااص يا يممه انا برووح انتو ما عاد تحبووني
ام زين تضربه بكوعها بخفة:اعقل يا ولد اعقللل من الي يقوول بعد كم شهر بيصير عندك ولد ان شاء الله وانت للحينك بزرر والله ما اقوول الا الله يعيين روزا عليك ما تدري تداريك انت ولا ولدكم
زين للحين يمثل انه يبكي :يمااااه ابغى ارجع بزرر
وام زين تنهدت منه و روزا تضحك على زين الي يمزح واجد ويضيف جو حلوو للقعدة وصحيح مرات ينرفز الا انه ينحب بشكل كبيير

هيام حطت يدها بقلبها :احلفييي
جويريا :والله
جود:وانا اقوول وينه عميي طلع جاي عندكم يخطب عمتس
جويريا :شفتوو بس الصرااحة يا بناات والله انهم يليقون لبعضض يعني صدق ليه قبل ما فكرنا نزووجهم لبعض انا افتك منها ومنه عمي بعد بيكون عنده احد يهتم فييه
هيام :طيب وشقالت موافقة هي ولا لا
جويريا :مدري عااد عنان الزفت قال ما بيقولها بس والله بزن فوق راااسه لين يرضى بكييفه هوو انا ما صدقت  على الله خطبوهاا وهو ما يبغى يقولها
جود :بس ليه عمي ما قالنا حنا كنا نروح ونخطبها
جويريا :انتي الحين ذا الي همتس خلي ذا الشغل للرجال مالنا شغل
هيام :بس والله فرحت لعمي  حرمته الله يرحمها توفت وقتها اذكر كنا صغاار بعدها ما تزوج ان شاء الله توافق خالة مريم
جويريا :تكفين ادعي تواافق
جود :وينها نور على اساس مجتمعين عشانها وللحينها ما جتت
جويريا :علمي علمتس والله جايين نشوفها هي وللحينها ما بينت
هيام:يالله شوي وتلقونها  وصلت

عنان وصل البيت وهو كل فكره في سالفة ابو فيصل وأساسا ما يبي يقول لامه بس بنفس الوقت ما يبي انه يوقف قدام نصيبها نزل من سيارته وقبل يدخل قال :طرييق يا ولدد
جاه صوت ام عنان:ادخل يمه ادخلل
دخل عنان وراح باس راسه امه :
ام عنان قالت بفرحك لانه مروق:هاه وش قلت
عنان :الحين معليتس مني يا يمه انا جاي ابي اقولتس على سالفة
ام عنان:تكلم يولديي
عنان :في صبح كان ابو فيصل عندنا
ام عنان استغربت :اييه و وشهو يقول
عنان صد نظره:خطبنس مني
ام عنان :وشهو؟؟ صاحي ذاا
عنان:ايه صاحي يا يمه جا وخطبتس منيي
ام عنان :و انت وش قلت له
عنان :وش قلت له يعني يا يمه اكيد قلت له اشوف امي
ام عنان سكتت وهي الزواج مو فبالها ابدد
عنان:هاه وش تبين ارد له
ام عنان :والله ما ادري يا يمه انا اصلا ما فكرت حتى اني اتزوج بعد ابوك الله يرحمه وصدمتني والله
عنان :شوفي يمه انا ما اجبرتس على شيء انتي اذا وافقتي ف انا موافق واذا رديتيه انا رادته شوري من شورتس
ام عنان قعدت تفكر للحظات :عطني كم يوم افكر
عنان:خذي وقتس يا يمه
وقبل يقوم عنان وقفته ام عنان :طيب وشصار على الي قلته لك البارح
عنان وقف:وش؟
ام عنان :يا يمه وش تكلمت معك امس ب سالفة سلطانة
عنان سكت وبعدها  تنهد  :  يمه للحين ما قررت خلني افكر
ام عنان:بس يولديي ما يصير لازم تستعجل وش ذا السالفة عشان تاخذ كل ذا الوقت لتفكير ايه ولا لاا  وخلااص
عنان : انا جاي اقولتس عن ابو فيصل و انتي جاية تقولين لي عن ذي السالفة
ام عنان :بس اسمع هااه لين يوم الخميس ترد لي خبرر ما يصير تطوول كذاا
عنان يقوم :ان شاء الله يمه ان شاء الله
قام و طلع عنان فوق
وام عنان لفت وجهها وهي تقول :من وين طلع لي سالفه ابو فيصل الحيين

نور توها توصل وقعدت تسلم عليهم
جويريا :بدري يا حبيبتي تو الناس كان قربتي المغرب وجيتي مو احسنن
نور :بدري من عمرك يا قلب نوور بس سوري جدد امس ثقلت بالاكل وفي صبح لاعت كبدي يعني معذوورة
جود :يا قلبي انتي والحين اشلون صرتي
نور:معليتس صرت زينة الحمدلله
جويريا :وليش لاعت كبدتس عسى ما شر لا يكون حامل
نور تقعد :لااا من قال اني حامل ابد يا روحي اقولتس ثقلت بالأكل عاد من زمان ما اكلت زي كذا لاني هناك اسوي دايت
جويريا تصب لها قهوة:حركات والله
نور :وشهو من حركات يا عيني مافي شيء
ولفت لياسر الي قاعد يلعب جنب هيام :يا عييون خالته كبر بسم الله علييه ما عرفته اول ما دخلت
هيام ضحكت :ايه الاولاد الي بعمره يكبرون ما شاء الله
شالته نور وضمته بحضنها وتنهدت بعدها بفرحة وهي تقول :بنات صدق مو مصدقةة
جود:وش الي مو مصدقته
نور:ما اصدق كل وحدة فينا تزوجت وراحت بيت زوجها والحين كل وحدة معها ورعها احس كني بحلم  ما قد تخيلت شيء زي كذا
جويريا :ليه وش كنتي متوقعة نعنس يعني
نور:لاا مو قصدي كذا بس احس كل شيء صار فجأة واحس مرو الشهور بسرعةة
هيام :كل وحدة تاخذ نصيبها وبالوقت والمكان الي كاتبه ربي يا روحي
نور :وانتي صادقة والله
هيام ابتسمت لها وبعدها قالت:اقولتس نور بسم الله عليتس متغيرة
نور :صدق؟
جود :ايه صدق كلامها اول ما جيتي ما عرفتس
نور استحت:شكرآ لكم
جويريا تطقطق عليها:قلك استحت
نور ضربتها بخفة:ما تتوبين انتي
جويريا ضحكت
نور ناظرت حولها:صح وينها اسيلو ما شفتهاا لها وحشةة
جود:راحت الجامعة
نور:اييه صح نسيت عندها جامعة كيفها اخبارها اسيلو ان شاء الله مو متعبتس بهبالها
جود ضحكت :وش اقولتس انا معندي بنت وحدة عندي ثلاث بنات
هيام رفعت حاجبها :الأولى والثانية  عرفناهم بس من الثالثة؟
جود :الهنوف
جويريا :لا تقولين هاذي بعد بزره
جو :كلهم بزارين يا عيني لو تشوفين الهنوف واسيل لو اجتمعو مع بعض يقومو القيامة والله طفشونيي عااد
نور :لحظة مو الهنوف نفسها خطيبة زين صح؟
جود:ايه ايه نفسها
جويريا :واخت رجلي انا تزوجت  زين بعد ما تركته وانحاشت
نور: ايه ايه صح والله نسييت
هيام:وانتي كل شيء نسيتي
نور ضحكت:والله نسيت صدق انا يالله يالله حافظة الاسامي
جود:لا بكرة بتنسينا حنا بعد
نور:وش انساكم انسى نفسي ولا انسااكم
جويريا :نسيت اقولتس يا نور سمعت عن  زواج اخت رجلتس
نور:ايه يوم الخميس ان شاء الله الزواج  وكلكم معزومين لازم تحضروون
هيام:معليتس يا عيني كلنا حاضرين ان شاء الله

الهنوف قاعدة بالمطبخ  وتفرد العجين بس مو راضية. تضبط معها تفرده ويرجع يتكور
تنهدت بعصبية :وبعديين معك
وسكتت وهي تستوعب انها معصبة من وشهو من عجينة 
قامت من مكانها وهي تحط العجانة على جنب ومشيت لغرفتها  وراحت عند السرير وهي تصحي محمد :محمممد يا محمممد قمم
محمد فتح عيونه بكسل :هاه
الهنوف :قم تعالي معي المطبخ
محمد استغرب:لييه؟
الهنوف :تعال وساعدني اسوي المنتوو مابي عمي يجي والغدا مو جاهزز
محمد :الحين انا ما داومت لاني تعبان تبيني اقوم واساعدتس
الهنوف:تكفى
محمد تنهد :طيب قاييم
الهنوف قامت من عنده بفرحة :انا رايحة وانت تعال الحقني
محمد قام ولبس دشداشته لحق الهنوف للمطبخ وهو يقول :ايه وش الي مو عارفة تسوينه
الهنوف :شف العجينة مو راضية تضبط
محمد ناظر للعجينة:ليش ما تزبط معها يا عجينة هااه
الهنوف:محممد بلا هباال صدق اتكلم
محمد :وش الي ما تضبط افرديها بالعجانة سهلة ترا
الهنوف :خذ جرب وشوف
محمد اخذ العجانة منها وبدا يفرد فيها بس نفس السالفة معه :افف  انتي وش حاطة بالعجينة  قاسيةة مررة
الهنوف :ما حطيت شيء غير طحين وملح وموية
محمد :ثاني مرة خليها طرية شوية اشذا لو جبتي واحد معضل ما عرف يفرد هاذي
الهنوف:سوي وانت ساكت وانا بقوم اشوف اللحمة
محمد :واللحمة مو جاهزة للحين بعد يا الله انتي لييه دخلتي المطبخ اللحم يجهزونه قبل يجهزون العجيينة بوااجد
الهنوف :نسيت انه جود مو بالبيت ولهيت بالتلفيزون وما حسيت على نفسي
محمد :ما شاء الله
الهنوف ابتسمت :اقوول محمد شرايك نخلي المنتو على جنب دامها مو زابصة وتسوي لنا مرقوق الي سويته لي ذاك يوم
محمد ضحك:احلفي واصدقتس
الهنوف :والله
محمد :اقول سوي بسرعةة والعجينة هاذي واللحم نرميهم يعني؟ ابشري اسوي لتس من عيوني بس مب الحين
الهنوف ضحكت :صدق اشتهيتهاا
محمد ضحك وهو يفرد العجين الي ترجع زي ما كانت

صار اليل والبنات للحينهم فبيت عمهم
فيصل دق الباب وكلهم غطو نفسهم بسرعة
جود:تفضل
فيصل :وليد برا يحتريكم
جود : الحين طالعين
فيصل:طيب
وراح فيصل ولفت جود لاسيل :اسيلوو وليد ما دق عليتس
اسيل تمسك جوالها :لا ما "وسكتت يوم شافت اصلا جوالها مقفل وابتسمت وهي تضحك بفشلة" مقفل جوالي
جود تاخذ عبايتها :شكلو الرجال يحترينا من اول قومي بسرعة وهاتي رضوعة اجوان
هيام:اف احس للحين  ما شبعت منكم
جود ابتسمت:يا روحي انتي نعوضها ان شاء الله يوم الخميس نتلاقى
هيام :ان شاء الله يا عيوني
نور:بس هااه كلكم تجوون
جويريا :معليتس جايين جايين اصلا مافي زواجات تصير هالفترة وما صدقنا على الله وما نجي
جود تسلم عليهم :يالله استودعتكم الله يا بنات
ودعو بعض وطلعو جود واسيل
بقو نور وجويريا وهيام
نور قعدت تلعب مع شموخ وياسر وهي تقول :يمه يا بناات جبتو وراعين حلوين لدرجة معرف العب مع من منهم
جويريا وهيام قالو بنفس الوقت :قوولي ماا شاء الله
نور مسكت قلبها  بخوف:بسم الله فجعتووني
هيام ضحكت:قولي ما شاء الله اسم الله على عيالنا العين حقق
نور للحين ماسكة قلبها : طيب بشويش بغيت انجلط من وراكم
جويريا تشيل بنتها :اسم الله عليتس ما على قلبتس شر ان شاء الله بس قولي ما شاء الله ثاني مرة
نور :اصلا ثاني مرة ما بقول شيء عنهم بغيتو تذبحوني
هيام ضحكت:لا تزعلين يعيوني ما بتفهمينا الحين بس لو جبتي ورع بعدين بتفهمينا
نور :ايه بخاف عليه بس مو زي كذا
جويريا :الصراحة انا اتخيل اذا جبتي ورعان بناتس يكونو كذاا دلوعين وحساسيين
نور :ايه حقهم يكونو دلوعين امهم نور مو حيا الله
جويريا كانت بترد بس دق جوال نور وقامت ترد
ورجعت وهي تقول :يالله بنات مع السلامة معاذ برا
هيام قامت تسلم عليها :نشوفتس يوم الخميس باذن الله
نور ابتسمت :ان شاء الله
و لبست نور عبايتها و ودعو بعض وطلعت وركبت السيارة وهي تقول :اشفيك جيت بدري قلت لك اني بقعد مع خواتي اليوم لين اخر اليل امداك تشتاق
معاذ :احلفي يا شيخة الحين وش اصلا اول مرة اجي اخذتس بذا الوقت تبين تقعدين لين الفجر
نور :اف وش اسوي ما شبعت منهم مشتااقة لهم وااجد
معاذ :وانا مزهرية بالبيت عشان ما تشتاقين لي
نور :انت اشوفك كل يوم اما خواتي لا
معاذ :لااه يا شيخةة
نور ضحكت:والله
معاذ :ايه هين يا نور
نور :صاير تزعل بسرعة هاه
معاذ :وانا يهون علي ازعل بس ذا كلام يزعل الحجر
نور سندت راسها بكتفه :نعتذر يا حبيبي مب قاصدين شفت عشانك انت انا تركت خواتي واهلي وديرتي مو كافيك كذا
ابتسم معاذ :كافيني يا عيوني كافيني

جويريا وهيام بقو لوحدهم
وهيام لابسة عبايتها وتضبضب اغراض ياسر بالشنطة عشان سعود اتصل وقال جاي بالطريق
لبست وجهزت وراحت قعدت
جويريا ابتسمت :يا محلا اليوم شكثر كان لذيذ
هيام ضحكت:وانتي صادقة من زمان ما تجمعنا كلنا سوا
جويريا حطت يدها فوق يد هيام :عساني ما انحرم من مبسم الزين هاذا
هيام :امين يا قلبي ويا عساني ما انحرم منكم
جويريا :امين يا قلبي امين "وسكتت للحظات وقالت" هيام
هيام :هلا عيوني
جويريا :انتي وسعود اشلون علاقتكم مع بعض؟
هيام سكتت وبعدها ابتسمت وقالت:اشلون يعني زينة الحمدلله
جويريا :لا ما اقصد كذا بس احس مستحيل تتقبلون بعض  ولا كنه صار شيء وانتي قليل تتكلمين عنه  قوليلي الصدق يا عيوني. ،انتي مستانسة معه؟
هيام سكتت
جويريا :علميني اذا ما يحترمتس ويضربتس
هيام قالت بسرعة :لا لا ما يضربني ولا يزعلني
جويريا :طيب اشفي ليه احس فيتس شيء
هيام :مدري اشلون اقولتس يا جويريا بس حنا مو مثل كل المتزوجين علاقتنا غريبة مع بعض يحترمني ولا عمره رفع صوته علي بس بيننا رسمية مافي شيء يجمعنا فبعض احس يصديني مرات قاصد وما يقعد معي واجد واحس تعبت من حالتناا هاذي لانه ما يحبني ولا يعتبرني زوجة له اصلا
جويريا :وانتي تحبينه؟
هيام تنهدت :اكذب لو قلت لتس لا
جويريا :لا تزعلين يا قلب اختس بس افهميه بعدين فكري شوي مو سهل عليه يتقبلتس بكل سهولة اعطيه شوية وقت وحسسيه بحبتس له وحاَلي تفهمينه انكم ازواج وبينكم عمر طويل مو معقولة تعيشونها كذاا وبعدين بينكم ياسر بعد اشلون تبونه يكبر وهو يشوف علاقتهم كذا رسمية بدون اي حب
هيام ناظرت لياسر وسكتت
وقطع عليهم بهاللحظة صوت رنة من جوال هيام
وقامت  وهي تقول :يالله استودعتس الله يا جوير
جويريا تبوسها:انتبهي لنفستس
هيام :ان شاء الله
توادعو وطلعت هيام لسعود الي استقبل ياسر ب لهفة وفرحة وهيام تناظره وهي مبتسمةة وبداخلهاا ودها تكون علاقتهم حلوة مع بعض وتحبه ويحبها بالنهاية كل وحدة تتمنى واحد يحبها وما ترضى تقعد مع واحد ما يحبها ويكون صعب عليها بكل الحالات ومرات كثييرة تقول من اهتماماته فيها  انه يحبها بس ترجع تقول لا ما يحبهاا وهي فعلا في حييرة من امرهاا

جويريا شالت بنتها وطلعت برا وهي تدعي انها ما تشوف فيصل ولين وصلت المجلس ما شافته
دخلت المجلس وشافت عمها قاعد لوحده
راحت وقعدت عنده وهي تقول :اشلونك عمي عساك طيب
ابو فيصل الي فرح لانها جت له :الحمدلله يا يبه بخير وانتي وشلونتس اخبارتس عساتس طيبة ،واخبارها بنتس
جويريا :الحمدلله بخير يا عمي "وسكتت شوي مترددة من الي بتقوله" عمي بقولك على شيء
ابو فيصل :تفضلي تفضلي يا بنتي
جويريا :ا انت خطبت ام رجلي؟
ابو فيصل سكت وبعدها قال :ايه خطبتها
جويريا :كنت بقولك يا عمي يعني لو رفضت ارجع اخطبها مرة ثانية
ابو فيصل :ليه هي رفضت؟
جويريا قالت بسرعة :لا لا ما رفضت بس اقول ك احتماال اذا رفضت يعنيي اقولك ارجع اخطبها لاني الصراحة ماخذة همك يا عمي وانت و ولدك لوحدكم لازم يكون في عندكم حرمة تداريكم وتسويلكم وتشبل لكم تدري عاد البيت من دون مَرة ما يصير بيت
ابو فيصل ابتسم من كل قلبه لانه جويريا قاعدة تفكر فيه ومسك براسها بحنية :شكرآ لتس لانتس فكرتي فيني
جويريا سكتت للحظة وهي تبلع ريقها ما عمره عمها مسح براسها او حبهم وقالهم كلمة طيبة وهاذا الشيء جديد عليها مررة بس بنفس الوقت الي سواه فيهم للحين بقلبها ومستحيل تنساا الي صار معهاا والي مرته هي وخواته بسببه
فضلت انها تسكت وتبتسم
وابو فيصل الي فرح مرة بجية جويريا له بالمجلس والاكثر اهتمامها فيه
دق جوال ابو فيصل وتعذر منها وقام
وهي قعدت بمكانها تحس تغير اشياء واجد بقلبها من مسحة يده براسها ذكرها بابوها نزلت دمعة من عينها ومسحته بسرعة
رجع ابو فيصل وهو يقول :هاذا رجلتس عنان يقولتس هو برا يحتريس
جويريا عقدت حواجبها :طيب ليه ما اتصل فيني
"وقعدت تدور حولها على جوالها واستوعبت انها نسته  بالغرفة "يووه نسيته بالغرفة شكلي
ابو فيصل ابتسم ومد يده :هاتي شموخ وانتي روحي البسي عبايتس
جويريا عطته وقالت : شكرآ لك
وراحت تلبس عبايتها وشالت شنطة بنتها وبعدها مرت المجلس واخذت بنتها و ودعت عمها
وقبل هي تطلع تلاقت مع فيصل عند الباب كان طالع ف هي انتظرت شوي لين هو يطلع وبعدين هي تطلع
بعد ما طلع طلعت هي  لعنان الي صارله كثير يدق عليها وهي ما ترد واصلا كان معصب لانها ما ردت ويوم شاف فيصل عصب اكثر
ركبت جويريا السيارة وهي تحط الشنطة ورا  :اسفة تاخرت عليك
عنان بصراخ :ليييه تاخرتي صار لي ساعة ادقق وما تردييين فاضي لتس اناا احترييتس هناا
جويريا استغربت منه :خير شبلاك تصارخ هدي نسيت الجوال بالغرفة وما سمعته
عنان : وكمان تراددينيي بعدين ليييه طلع معتس فيصل ما قلت لتس ما يطيح عينتسس فيه ولا تقعدين معه ما تفهميين انتيي
جويريا :اجل قولها من الاخر معصب لانك شفت فيصل بعدين شدخلني اذا هو خرج قبلي اوقفه واقوله لا تخرج قبلي لانه رجلي ما يحب كذاا،، صاحي انتت؟
عنان :والحين تقلبين الاموور عليي موو
جويريا :خلااص عناان كل مرة تجي اشوف خواتي ترجعني البييت بالهوااش كرهت اطلع من البيييتت بسببك
من أصواتهم العالية بدت شموخ تبكي
عنان :هاه استانستي الحيين بكيتي البنت
جويريا :انا بكيتها ولا انتت، تدري وش انا الغلطتانة الي ارد عليك اسكتت انت وانا اسكتت وبلاها مشااكل
سكت عنان معصب لين ما وصلو البيت
وجويريا نزلت وقفلت الباب بقووة
عنان بصوت عالي : بشوويس كسرتيي البااب
جويريا رجعت فتحت الباب وشالت شنطة بنتها ورجعت قفلته بقوة بنذالة
وعنان مسح جبينه  وهو يتنهد بقلة صبر منهاا
طلعت جويريا لغرفتها وهي متنرفزة من عنان وعصبيته الي بدون سبب مقنع
وعنان قعد بالسيارة للدقايق وبعدها نزل وقفل السياره ودخل البيت
ام عنان سمعت صوت الباب يوم دخلت جويريا ف عرفت الحين عنان بيدخل ف طلعت وهي تنتظره
وعنان دخل وقابل امه وهو ولا وده يقابل احد
ام عنان قربت منه وهي تقول بإبتسامة :هلا يمه
عنان :اهلين يمه، للحين صاحية؟
ام عنان :ايه ما جاني نوم يا يمه
عنان :خير يمه تشتكين من شيء مرضانة؟
ام عنان :لا لا مافيني شيء بس كنت بسالك يا يمه وش قلت موافق تتزوج سلطانة
عنان نسي عصبيته بهاللحظة وسكت
ام عنان :تكلم يا ولدي لا تجلطنيي
عنان اليوم كله كان يفكر بس ما وصل لأي قرار ناظر للدرج وهو يفكر بالعواقب و وش الي بيتغير اذا تزوج الثالثة
وام عنان تناظر فيه وهي تبي تسمع كلمة موافق منه ب لهفة
عنان رجع ناظر لامه وقال بجدية. وحدة : موافق
ام عنان ما صدقت ومن قوة الصدمة بغو عيونها يطلعو من مكانهم :جدد ياا يمهه يعني خلاص موااافق تتزوجها؟؟؟
عنان :ايه يا يمه واذا ما عليه امر مابي لا جوير تدري ولا حنان
ام عنان :والله ما بيدروون يا يممه ابشرر ما طلبتت روح يا يمه الله يسعددك زي ما اسعدتني
عنان :انا طالع انام
ام عنان :روح روح يا يمه
طلع عنان فوق وهو ما بين الخوف من حريمه وما بين الفرحة وما ينكر انه مستانس ومتلهف لين يتزوج وبنفس الوقت خايف من انه حنان ولا جويريا تتركه لانه يحبهم ويبيهم ومو مستعد يخسر اي وحدة فيهم
والحين وصل لقراره ومستحيل يتراجع عنها وهو داري بنفسه انه اذا تمم بشي ما يرجع بكلمته وما ينكر انه كلامه مع امه غيرت نفسيته
دخل  لغرفة جويريا شافها تحط اغراض شموخ ويوم شافته دخل صدت بوجهها عنه وهي ما تبي تشوفه ولا تسمع صوته
عنان دخل وقفل الباب وراه و راح عند جويريا
واول ما جويريا حست بخطراته عندها مشيت عند الدولاب وقعدت تطلع ملابس لشموخ
عنان ما استسلم وراح عندها وهو يقول :جويير
جويريا لفت له بعصبية :خيير وشتبيي نسيت تحط ملح  وجييت تزووده
عنان :لا تطوليها وهي قصيرة
جويريا :لا والله؟ تصارخ وتهاوش وتجي اخر اليل تقول ما اطولها لا مو بكيفك حبيبي انا مب آلة فرخ العصبية عشان كل ما تنرفزت من احد تجي عندي تهاوش وتعصب تفهم ولا لاا
عنان :افهم يا عيوني افهم وش تبين بعد
جويريا :تذلف من وجهيي
عنان :جوييرياا خلااص يا عيوني ترا ما يهون علي زعلتس انتي قولي وش تبين وانا اجيب لتس تبين ذهب ابشري من عيوني
جويريا ناظرته بجدية:عناان ما ابي منك شيء ماابي منك شيء غير انك تحبني وتفهمني وتقدرنيي والاهم من كل ذاا تحترمنيي مو على كل صغيرة وكبيرة تجي تهاوشنيي وتعصبب انا قد قلتت لك قببل  وبرجع اقولك مرة ثانية انااا مب حنان ولا خلوود ولا اي وحدة منهم عشان تعصب علي واسكتت مثلهم واتحممل لا يا عنان لااا للصبر حدود وانا بدا صبري يخلص منك مرة مرتين سكتت بس انت زودتهاا
عنان مسك يدها :ابشري من عيوني
جويريا :كل مرة تقول ابشر ومن عيونيي خل عيونك لك دام كله حكاوي ولا نشوف شيء
عنان :افا بس والله انتي عيونيي يا جويريا والله  احببتس عدد رمش العين وزياادة
جويريا لفت وجهها عنه وهي تدري و واثقة انه مستحييل يناام وهي ما رضيت وعشان ما يعيدها تبي تثقل عليه وما ترضى بالساهل
هه
نهاية البارت