رواية من متى و الغصـن يختـار الطيـور..!! الفصل الثامن عشر 18 - بقلم Nis2reen~<

19))من متى والغصن يختار الطيور؟!!
،

ودايم قصة العاشق .. قديمه !
مثل كل الفصول / اللي على مر الزمن تنعاد!

عزانا .. والدموع جداد بأن ( الشمس وحده )
ويَ كثر المشارق "
،،،،
،،
،
،

لمياء من وراء الباب و بصوت حاد/وش درانا انك صادق... ؟!
روبين تأيدها/ايه وش درانا..
سعود توهق/احلف لكم بالله اني متزوج وزوجتي بالبيت وتعبانه... اظن بتولد.. دقيت ع الاسعاف بس بيتأخرون. انا ابيكم تجون عندها وتساعدونها ع الاقل لين توصل الاسعاف انا ماعندي خبره في هالامور
لمياء بتردد/شوف انا وصديقتي بنروح بس بشرط
سعود وهو مستعجل/وشو هالشرط؟ تكفون استعجلوا
روبين وهي تنغزها/يالهبله من جدك تصدقينه؟!!
لمياء/اسكتي خليني اكلمه.. يا اخ سعود
سعود وهو يناظر ساعته وباين انه مرتبك/سسمي
لمياء/انتا راح تظل بالشارع وما راح تدخل البيت معانا وقبل كذا لازم نسمع ونشوف زوجتك عند الباب علشان نطمن انك ماتكذب علينا
سعود/اوكي.. موافق بس تعالوا
لمياء/لحظات ..نلبس اغطيتنا ونجي
،
دخلت لمياء وهي مستعجله وبدأت تلبس البالطو والحجاب كامل/يلا يا روبي خلصي
روبين لبست وهي تحلطم/يعني لازم نروح في داهيه علشان حضرتك بتنقذي احد..
لمياء/يا روبي الناس للناس.. ولا تنسي احنا في غربه وهذول من ناسنا واهلنا..
روبين وهي خايفه/طيب افرضي انو بيكذب علينا ايش راح نـ...
لمياء سكرت فم روبي وبيدها وقاطعتها/اششش دوشتيني يا بنت اسكتي.. ماراح يصيبنا شي باذن الله ،بس تعالي.. انا شرطت انه ما بيدخل معانا.. وقبل كذا راح نتأكد اذا في البيت زوجه او لا... هيّا تعااالي
روبي راحت معها/الله يستر من هالمشوار
/
/
/

عند باب بيت سعود وقفت لمياء وهي تنادي/يا هوووه فيه احد
صوت انثوي يبدو عليه التعب مع صرخات ألم قويه/ايووه انا هنا تعالي اااا
دخلت لمياء وروبي ضلت عند الباب علشان تتأكد مثلما قالت لها لمياء..
لمياء تفاجأت بوحده حامل و جالسه بنص كنبة الصاله وباين انها حيييل تعبانه، لمياء اتجهت لها مسرعه/الله يولدك بالسلامه انا اختك لمياء
الحامل وهي يادوب تتنفس/انا ندى
لمياء/لحظه انادي صديقتي تركتها عند الباب.. بصراحه ماكنا مصدقين زوجك.. لان ما قد شفناك معه
ندى بكت من الألم/ااااه تعبااانه حييل
لمياء/لا تخافين انا وصديقتي روبي جنبك.. مابعد صرنا طبيبات لكن مشروع طبيبات باذن الله و راح نساعدك. رووووبي
روبي جات وهي متوجسه من الخوف/ايش صااير
لمياء وشكلها متفاجأه من الموقف/هذي ندى زوجة سعود.. زي منتي شايفه حالة ولاده
روبي ارتبكت من الولاده لان حالة ندى يرثالها/لمياء ليش هي تتألم هالقد
لمياء/بالله هذا سؤال وحده بتصير طبيبه.. تعالي ساعديني نوديها غرفه ونجهزها للولاده
روبين خاافت/ولاده!!!!
لمياء وهي تكشف على ندى/ايووه موية الجنين نزلت معاد يمدي توصل المستشفى..
روبين/طيب فيه حوض صغير بلاستك
ندى وهي تعض شفايفها من الألم/ايوه.. تلاقينه في المطبخ عند الغساله.. وادوات الصيدليه في درج الحمام
لمياء/حلو بسرعه روبي اغلي المقص وجهزي المعقمات واغلي كمية مويه وفيها ملح.. بسررعه
روبي رحمة ندى وهي تصرخ/طيب طييب
لمياء في داخلها خوف بس تحاول تتماسك علشان تساعد وتثبت جدارتها لنفسها قبل الناس/تعالي معاي نمشي شوي لين نوصل الغرفه هذيك
ندى وهي تبكي/ما اقدر
لمياء/لازم تحاولين انا معك.. مابقى غير شوي وتنتهي معاناتك وتحضنين النونو بيدك.. اقرأي سورة الزلزله واذكري ربك وباذن الله تخلصين
ندى حاولت تقوم معها وراحوا..
/
/
/
/
/

جــدّه*
صحت على صوت آذان الفجر اللي عطر كل الأجواء...
قامت وهي تحس بخموول فضيع.وصداع. ناظرت حولها وتلاقي نفسها ببيت جدها اللي مهجور من وفاة جدها من كم سنه وصلت البارح متأخره ومرهقه ونامت..
حست بغربه وهي تقوم من نومها وحيده في بلدها!!
استغفرت ربها وتعوذت من الشيطان وقامت تتوضأ وتصلي..
..
بعد الصلاة اخذت جوالها تبي تتصل وتفاجأت بالكم الهائل من المكالمات والرسائل!!
فتحت الواتساب وتشوف اول محادثه لـ زينه وانصدددمت منها!!!
[عمري ما شكّيت فيك....
كنت دوم اتهم أمي انها ظالمتك..
صدمتيني يا لوجين..
اخوي ما يستاهل اللي سويتيه فيه..
حرااام عليك ليش تستغلين ظروفه وتهربين!!
خليتيني اكرهك.. ]
لوجين نزلت دموعها من قهرها...ظلموها و فهموها غلط!!
ومع ذلك ماتقدر ترد عليها...اغلقت الواتساب..
وطنشت بقية المحادثات والمكالمات اللي كلها من عند اعمامها ومعهم زينه..
قررت تغير رقمها افضل شي،وتذكرت من بيساعدها في هالظروف صاحباتها مسافرات للبعثه ومحد هنا تعتمد عليه غير ابوها اللي ماتبي تورطه مع عمها ،
وابتسمت وهي تلاقي الشخص المناسب..
/
/
/
/

في كندا.. *
و بالتحديد عند لمياء وروبين...
روبين واقفه عند الباب وتنتظر على نار ومغمضه عيونها/ايش صااار!!
صوت صرخات عاااليه وثم صوت بيبي...
روبين استااانست وسوت وضعية اللاعب اللي جايب هدف/ولدددت يا لموش؟
لمياء من داخل الغرفه/ايووه تعاالي بسرعه
روبين،خافت/لييش مو لازم
لمياء رفعت صوتها/تعاااالي يا بنت
روبين فتحت الباب ودخلت وهي خايفه/الحمدلله ع السلامه
ندى ببتسامه ذابله/الله يسلمك
لمياء كانت تمسح المولود بعدما انتهت من ندى/بسم الله ما شاء الله
روبين وهي للحين خايفه/نسيت اسأل ...ولد والا بنت!!
لمياء وهي تحمله وتعطيه أمه/ولد بسم الله عليه..
**صوت اسعاف برا..
روبين/وصلوا الاسعاف
لمياء/هههه ما عاد نبيهم بس دخليهم علشان معاملة تبليغ الولاده
روبين/اوكي
ندى وهي تناظر ولدها بدموع/مشكورات يا بنات... مدري وش كنت بسوي من دونكم
لمياء/عيب عليك احنا اهل وهذا واجبنا...
روبين بحماس/الباب ينطق.. بروح اشوف الاسعاف وابشر سعود علشان اخذ البشاره ههههه
/
/
/

/
بغرفة العنايه المركزه..*
شبه جالس.. وموصوله انابيب تنفس في انفه ومغذيات بيده متصله بعمود جانب سريره.. كان صاحي لكن سااكت ..ومانطق بكلمه وحده..
بو مشعل/يا ولدي شفيك ساكت!! ليش ماتكلمت من امس
عمر يناظره بنظرات الأخ اللي خايف على اخوه/خوفتنا عليك يا رجل.. بس الحمدلله ،ربي رحمته واسعه والا انت كنت رايح فيها..
بو مشعل انقهر من سكوت ولده/انا طالع...اهلك بيجون يزورونك بعد ربع ساعه
طلع وتركه..
مشعل بألم التفت على عمر واخيراً نطق/وين عزيز ما شفته؟
عمر ضاق صدره وصد وبعينه جواب السؤال/...
مشعل خاف وحاول يتحرك ماقدر/عمر انطق وين عزيز ليه ما شفته من فتحت عيوني!!
عمر بحزن/لا تتحرك يا مشعل جروحك توها طريه..
مشعل عصب ومايبي يسمع ان عزيز صابه مكروه/خلك مني اللحين وقول وين عزيز؟..وين مسافر وتاركني بهالحاله اكيد ما دري بي صح
عمر تنهد/مشعل اهدأ.. الزعل مب زين لك..
مشعل يتصنع الهدوء/طييب هديت، وين عزيز؟
عمر وهو ما يبي يقوله/عزيز صار له حادث قوي شوي..وانضرب في راسه ونزف ودخل حالة غيبوبه و محد يدري اذا بيقوم منها او لا
مشعل وكأن قلبه أنصاب من نصه/وشوو!!.. انت تمزح اكيد،لا تتفاول عليه
عمر حاول يضبط مشاعره/مشعل لا تصعّب الامور علي ،والله العظيم ما امزح..
مشعل سكت مذهول من الصدمه/..!!!!!
عمر خاف عليه وقرب منه ومسك يده/مشعل فيك شي؟!! تكلم مشعـ...
مشعل قاطعه/ودني له
عمر/وانت بهالحاله!!
مشعل بإصرار/قلت لك.. ودني له بسررعه
عمر/اذا سمحلك الدكتور ابشر.. لا تنسى ان رجلك فيها كسر ويدك كانت مصابه برصاصه. غير العمليات اللي سووها لك..
مشعل حاول يقوم من نفسه وما قدر ضرب بيده السليمه السرير بعصبيه وصد مقهور والدمعه تنزل من عينه/...
عمر رحم حاله وحاول يهديه/مشعل.. اذكر الله. انت كنت بحاله ما يعلم بها غير ربك.. والحمدلله اللي نجاك.. دعواتك لعزيز ينقذه ربي ويقومه من هالغيبوبه ..
مشعل دموعه العزيزه نزلت على عزيز وبيحت مكنونه ..وحاول يصدها لكن حزنه عليه اكبر من انه يكف دمعه..
بعد ربع ساعه
دخلت ام مشعل ومعها زينه/السلام عليكم
عمر/وعليكم السلام... شلونك خالتي؟
ام مشعل/بخير وانا امك..
عمر/الحمدلله على سلامة مشعل
ام مشعل/الله يسلمك ويحفظك
عمر/يلا يا جماعه انا استاذن..
**طلع وتركهم..

زينه اتجهت لاخوها وباست راسه ومسكت يده وباستها/سلامات ياتاج راسي،لا باس عليك
مشعل بصوت مبحوح بعد البكي على عزيز/الله يسلمك زينه
ام مشعل باست راسه وخده ويدينه وهي تبكي/الحمدلله ع سلامتك يا ضناي..
مشعل ببتسامه ذابله/الله يسلمك يمه.. انا بخير لا تبكين
ام مشعل/فديت رووحك يا عمري انت..ان مابكيت لاجلك اجل ابكي على من؟!!
مشعل ابتسم لها والتفت على زينه/شلونك زينه؟
زينه/بخير يالغالي لا تشغل بالك
مشعل لاحظ ان زوجته مو معهم وهو اللي كان يتمنى يشوفها اول وحده توقف جنبه وتتحمدله بالسلامه/وين"لوجين" ماشوفها معكم!!
زينه ماتبي تضايقه/لا تشيل همها هي بخير، انت بس بشرني عن صحتك انت،كيف تحس اللحين
مشعل شك انو حصل شي/ليه احس انك تهربين من الجواب
زينه ارتبكت/مين؟ أنا؟! ..لاا
ام مشعل بلا مبالاه/ولين متى بنخبي عنه يعني
زينه خايفه على صحة اخوها/يماااه بعدين يمااه
مشعل وهو يخز اخته/قوولي يمه ليه لوجين ما جات معكم
ام مشعل وهي تمثل دور المصدومه/زوجتك استغلت طيحتك وظنت انك متت وارتاحت منك و هربت من كم يوم،وللحين مختفيه محد يدري وينها!!
مشعل هالخبر نزل عليه مثل الصاعقه والتفت على زينه وكأنه يسألها/يعني قصدكم ان لوجين هربت!
زينه دمعت/للأسف ياخوي هربت واخذت اغراضها معها، استغفلتنا كلنا. ومن ضمنهم انا.. ماكنت اصدق انها تخون!!!
مشعل سكت من الصدمه و صد بوجهه للجهه الثانيه وهو يحس سكاكين الخيانه مغروسه بظهره، خصوصا ان زينه اللي تحب لوجين ودووم تدافع عنها ،تقول انها استغفلتها بعد/...
ام مشعل ببتسامة نصر/لا تخاف ويضيق صدرك بدال قليلة الشرف لوجين الف وحده تمناك

**زينه محد قالها عن حمل لوجين... لأن بومشعل وام مشعل تكتموا ع الخبر.. وقرروا ما يقولونه لأحد.. ويظل سر..

ام مشعل/بكره تطيب يا ولدي وترجع لنا و نسويلك احتفال طول بعرض يليق بك ياشيخ الشيوخ كلها
مشعل كان ساكت من هول الصدمات اللي سمعها اليوم ما كان منتبه لحكيها.. ،
اشتد راسه وهو يحس وكأن عرق بيتفجر فيه وحرارته ارتفعت وبدأت اطرافه ترتعش بدون ما يحس فيها وبدأ تنفسه يضيق ويرخي راسه على المخده/
زينه لاحظت الجهاز اللي موصل فيها تخطيط القلب يتسارع فيه النبضات ويصدر صوت تصفير وطلعت ركض/دكتوووووررر ..
ام مشعل خافت واتجهت لولدها/مشعل.. مشششعل وش فيك؟..رد علي.. انا أمك
مشعل كان مفتح عيونه بس ما يحس باللي حوله..!!
/
/
/
/

من جهه ثانيه..
في جده..
جالس ابو لوجين يدير اعماله بنفسه كعادته و يراجع اوراق عمل بين يديه.. ،
رن جواله ورد وهو مستغرب ان اخوه متصل/هلا فيصل
بو مشعل بصوته الكبير/لا هلا ولا مسهلا يا ماجد.
ماجد ما استغرب اسلوب اخوه معه/خير ياخوي وش صاير هالمره بعد!!
بومشعل/اللي صاير انت تعرفه زين.. لا تتغيشم
ماجد مو فاهم شي/يا بومشعل تكلم بوضوح.. انا مدري انت وش تتكلم عنه!!
بومشعل/طيب خل عنك الاستعباط وقول لي ليه ما كلمتنا اول ما وصلتك بنتك وهي هربانه!!
ماجد وقف على حيله ورسوم الغضب باينه في ملامحه/وش قصدك يا فيصل..
بو مشعل/بنتك استغلت ظروف زوجها الصحيه و هربت من كم يوم من الديره ..و...
ماجد رفع صوته بحده وقاطعه/فيصل بنتي كانت عندكم امانه وين وديتوها.. وش سويتوا بها..
بو مشعل/بنتك ماتربت.. لو انها متربيه ما سودت وجيهنا وهربت
ماجد عصب اكثر/وقف عند حدك.. ولا تطعن في عرضي تره عرضك بعد، ولا تخلي سواد القلب وحقدك يعميك وتظلم بنتي.. اقسم بالله ان صار لبنتي مكروه ما راح اسامح اي احد فيكم
بومشعل ببتسامه خبيثه/اصلا بنتك بالنسبه لي مهدور دمها من اليوم اللي هربت فيه.. حبيت احط عندك خبر بس
ماجد خاف ولكن مابين/مشعل تكلم وين اخفيتوا بنتي... بنتي لو بتهرب ..هربت من شهووور.. مب اللحين..اذا انت عارف شي ومخبيه.. تكلم لا تنسيك قسوتك انها بنت اخوك
بو مشعل بلا مبالاه/وش ابي ببنت اخو فاشله ما تعرف لا ذمه ولا شرف!!
ماجد احترقت اعصابه وتنرفز/وين بنتي يا فيصل،لا تسوي نفسك ماتدري وينها.. انا عارفك ززين يا فيصل
بو مشعل/انا حذرتك وبسس.. سلاام عندي اشغال..
،
،
/
/
/
/
طلع من مكتبه مستعجل وما يكلم احد.. كل اللي يحس به.. حرقه في قلبه وتأنيب ضمير يعذبه... بنته حبيبته عانت بسببه وتعذبت والسبب كله من سلبيته..واللحين ما يدري وين ارضها من سماها..!!
هذا كل اللي كان يفكر فيه ماجد...
وصل بيته وهو تايه الفكر وشارد... جلس في الصاله في نص البيت ..كان يحاول يتصل في "لوجين" ولكن جوالها مغلق.. رمى جواله على الطاوله وهو معصب/وين وديتها يا فيصل وييين!!
ام لوجين اقبلت وهي مستغربه صوت ماجد اللي يكلم نفسه بصوت عالي/ماجد ..ايش فيك؟
ماجد تردد انه يقولها عينه في الارض وتلمع وسااكت/..
ام لوجين ماقدرت تتحمل وخافت من سكوته،راحت وجلست جنبه/ماجد تكلم وش اللي صاير لا تغلي قلبي
ماجد بصوت باين فيه الضيقه/اليوم كلمني فيصل اخوي..
ام لوجين خافت لان عمره ما كلمه فيصل الا يصير مصيبه/ايوه ايش قالك هالمره
ماجد/يقول انو لوجين هربت من عندهم..ومو لاقينها!!
ام لوجين ماعلقت وكأنه انكب عليها مويه بااارده/... !!!
ماجد بحزن/هالمره عمها بيهدر دمها.. انا احاول اتصل فيها وجوالها مقفول!! اتعبتني
ام لوجين وهي مو مصدقه/بنتي لوجين ماضاعت ..حبيبتي.. ضي عيوني موجوده بمكان حولي هنا..اكيد مو بعيده
ماجد/المشكله وين راااحت
ام لوجين بدموع الأم/اكيد هي بمكان مافيه احد وتبكي مقهوره لحالها، آآآهـ يا قلبي عليها... يا ترى جوعانه والا شبعانه، يا ترى كيف صحتها اللحين،اكيد موجوعه.
ماجد عوره قلبه على بنته اللي حس انها حيل تعذبت بسببه. وقام يبي يطلع..
ام لوجين اتجهت له وهي تترجاه/ماااجد الله يخليك دور بنتنا.. لا تتخلى عنها، كفايه اللي صار لها،كفايه سلبيه، لازم تلاقيها وتعوضها عن كل هالألم اللي تسببنا فيه لها
ماجد مد يده ومسح دموع عينها/اكيد بدورها لكن بالأول بتجه للشرطه،
ام لوجين استغربت/ليش؟!!!
ماجد بحزم/لازم ابلغهم عن تهديد فيصل واهله لبنتي بالقتل.. هالمره ماراح ألملم الموضوع واشتري رضاهم... راح اتبع هوى بنتي وبس.. انا عطيتهم بنتي واهانوها وضيعوها واتهموها بشرفها.
ام لوجين استغربت/كيف يتهمونها بشرفها وولدهم ما لمس بنتي وما قرب منها
ماجد خاف/وش قصدك انه ما لمسها
ام لوجين/اللي اقصده ان مشعل ولوجين مابينهم علاقه زوجيه طبيعيه نفس الناسً،
ماجد استغرب/اجل ليش كل هالتهم والقذف بحق بنتي!! وليش مشعل يتعامل معها كأخت كل هالفتره
ام لوجين ضاق صدرها وهي صعبه تشرح له.. وبنفس الوقت ماكان عندها علم باللي جد في موضوع لوجين ..
/
/
/
/
/
/
/
نعود للجنوب..
وبالتحديد في المستشفى..
بعدما انتهت فترة الزياره وخرجوا من عنده في الليل اصحابه واقاربه...
كان شبه مستلقي على سريره في غرفة التنويم بعدما اخرجوه من العنايه المركزه..
كانت نظراته توحي بشي واحد بس ألم طعنات الغدر و الخيانه، اكثر من رميات الرصاص في جسمه..
نسى اللي حاول قتله وضل يفكر في "لوجين"..
تذكر مواقفه اللي جمعته مع "لوجين" و كلامها وابتسامتها البريئه اللي تحولت في مخيلته الى ابتسامات غادره وخبيثه!!
تذكر اخر مكالمه سمعها للوجين وهي تكلم بالجوال وهي تنفي حبها له.. وتتمنى الهروب !! تأكد له انها كانت تنتظر الفرصه المناسبه علشان تهرب.. وما اهتمت فيه اذا مات او عاش!!
حس وكأن شحنات غضب وحقد ونيران كراهيه اشتعلت بقلبه الموجوع..
فتح جواله و اتجه لرقمها واتصل فيها ولكن جوالها خارج الخدمه!! واتجه لرقمها بالواتساب وشاف اخر خروج البارحهه ،معناته هي بخير ومافيها الا العافيه، ولفت نظره البرسونال كاتبه في الحاله[ بعض الوجع م تسعفہ نبرة البوح... موت المشاعر بعض الاحيان راحہ !♡]
سكّر مشعل الجوال وهو يكبت غضبه بداخله...
/
/
/
/

يوم جديد في مدينة جدّه.... ،
في حي النهضه..
احد أرقى احياء جده.. منزل جد لوجين...
جالسه لوجين تنتظر اللي اتصلت عليها تزورها.. الوقت طويل.. وهي من امس ما ذاقت اكل ولا مويه..ومالها نفس.. كل اللي تفكر فيه "مشعل" وحياته.. تتساءل يا ترى وش صار عليه؟. نجى بحياته والا صار فيه شي لا سمح الله..!!
تساؤلاتها اتعبتها حييل فوق تعبها.. نست تاكل وتشرب! "
نست نفسها وهي تحس بإحساس التايهه في درب ماله نهايه وماله عناوين ومافيه احد ينقذها!!
شعور قاتل بالوحده..
**افزعها صوت جرس البيت**
فزت واقفه واختل توازنها لكنها قدرت توقف وتثبت نفسها واتجهت للباب وهي تترقب تشوف اللي يرن الجرس..
وصلت الباب بعد جهد وهي تتنفس بصعوبه/..
من وراء الباب/لوجيين افتحي الباب هذي أناا
لوجين فتحت الباب وهي تتبسم بذبول/أمي
ام لوجين ضمتها وهي مرعوبه ومبسوطه بنفس الوقت/لولو حبيبتي....ليش جيتي هنا؟. ايش فيك نحفانه ووجهك صاير اصفر..
لوجين يادوب تشيل نفسها/مافيني حاجه صدقيني انا بخير
ام لوجين مسكتها لانها لاحظتها مو طبيعيه/تعالي نجلس ونستريح والله شكلك منتي بخير يا بنتي..
لوجين راحت معها وجلست وارتاحت/كيفك يا أمي وكيف ابوي واخوي.. وحشتوني مرره
ام لوجين وهي تتفحص ملامح بنتها/كلنا بخير لا تخافي، متى جيتي واخذتي المفاتيح وكيف جيتي اصلاً عمك اتصل في ابوكِ وقال انك هربانه وقال في حقك كلام كبير ما ينقال، وخوفني عليك..
لوجين استرخت على الكرسي بضعف/اللحين انا صرت هربانه وصاروا يتكلمون في عرضي بعد!! آآه يا أمي
ام لوجين/ايش القصه يا بنتي ابوكِ نفسيته تعبانه علشانك وحاسس بالذنب، وانا كنت مرعوبه لحد ما اتصلتي فيا..
لوجين حاولت تركز/ابوي مابيه يعرف عن مكاني ابدااا ع الاقل هذا الوقت.. انتي عارفه عمي ايش ممكن يسوي علشان يوصل للي بباله.. ابيه يتأكد ان ابوي مالو دخل في اللي صار..خليني هنا لين يقوم مشعل بالسلامه وقتها راح يجي وارجع لهم وانا رافعه راسي..
ام لوجين/بس ابوكِ حاب انو يساعدك و..
لوجين وقفت باستنكار/لا يا أ....
طاحت فجأه واغمي عليها بين احضان أمها وصوت صرخاتها/لووولووو...
/
/
/

صباح يوم جديد في كنداا* *
كانوا البنات صاحيات بدرري على غير العاده قبل دواماتهم
لمياء واقفه بالمطبخ وتغلف الفطور وتحطه في حافظات الاكل..
نزلت روبين ومعها شنطتها وملازمها واغراض لمياء وحطتها على الطاوله/لمووش،خلللصت
لمياء/اجل تعالي شيلي معي الفطور والحليب مانبي نتأخر على ندى
روبين وهي تعدل نقابها/يلا انا جايه..
،،اخذوا فطورهم معهم واتجهوا لبيت ندى جارتهم اللي،قبالهم.. رنوا الجرس...
طلع سعود بهاللحظات وكان لابس رسمي وبيطلع/ياهلا بالجيران الطيبين..
لمياء وهي تصد عنه/السلام عليكم..
سعود/وعليكم السلام.. ليش تكلفون على انفسكم يا بنات ...انتم كذا تحرجوني
لمياء/ما فيه كلافه ولا شي.. ندى بحسبة اختنا ..لازم ترتاااح بعد الولاده.. وانا وروبين اتفقنا يوميا نسوي اكلها ونجيبه..
سعود وهو منزل راسه ويصد للجهه الثانيه وما يطالعهم/والله يا بنات اني عاجز عن شكركم ومدري كيف ارد معروفكم .. احرجتوني
لمياء فرحت انه تفهم وضعهم واحترمهم بعدما عرفهم/مانبي منك الا انك تكون سندنا واخونا في هالغربه.. اخوي يتردد علي بين فتره والثانيه واخو صديقتي اضطر يروح مدينه ثانيه..
سعود/انتم اثبتوا لي انكم كفو وغيرتوا فكرتي عنكم.. كنت غبي لين جربت اتعامل معكم.. لكن من اللحين انتم خواتي.. تفضلوا مابي ااخركم عن دواماتكم
لمياء دخلت/مشكور..
دخلت وراها روبين/..
سعود طلع واتجه لسيارته وهو مبسووط/والله كأن ربي،بيعطيني درس و خلاني احتاج لهالبنات علشان اعرف اتخلى عن سوء ظنوني. وما اعطي احكام مسبقه على ناس ماعرفهم..
/
/
/
/
/
السعوديه_ الجنوب
قصر بو مشعل*
بعد حوار ومناقشه...
ام مشعل ببتسامه/من جدك يابومشعل... يعني تقدر تسويها
بومشعل وهو يشرب فنجان قهوته/ايه اقدر ..الشغله سهله مايبيلها
ام مشعل/والله بتسوي في ولدك خير بعدما تفكه من هالبنت..
بو مشعل ببتسامه خبيثه/مثلما،ربطته فيها غصب اقدر افكه منها، وورقة الوكاله معي وقعها مع بقية الاوراق يعني اقدر اصدر له اي شي باسمه.. وكاتب العدل صديقي ما راح يطول السالفه علينا.
ام مشعل/ماتخاف يزعل!!
بومشعل/ماراح نقوله اللحين... ع الاقل الآن تعبان وفي حالة صدمه.. ويبي له مده علشان يستعيد عافيته ونشاطه.. وقتها،راح اقوله.. بعدين ما اظنه يبيها بعدما هربت.
ام مشعل/فديت ولدي،قولتك كم يبي له علشان يطيب
بومشعل/والله يبي له مده ماهي قليله حسب ماقال الدكتور..
ام مشعل بخبث/طيب ليش ما نقول له عن حمل لوجين.. يمكن يطلقها من نفسه وخليه يعافها مره وحده
بو مشعل بنظرات حاده/يا ويلك ان دري احد بسالفة حملها..لا البنات ولا مشعل..
ام مشعل/بس هي سقطت
بومشعل عقد حواجبه/هالموضوع ان دري به ولدي مات من قهره.. مابي اخسر ولدي علشان وحده ما راعت الحلال من الحرام.
ام مشعل/اي والله اخاف يروح ولدي فيها...
/
/
/
/
/
جده*،*
رجعت ام لوجين مع بنتها من المستشفى وكان صدرها ضايق.. وصلتها لغرفة النوم وخلتها تستريح وكانت ملتزمه الصمت ونظراتها للوجين ما تنتفسر..!
لوجين لاحظت نظرات أمها بتقتلها/ايش بك يا أمي
ام لوجين وهي تتأمل وجه بنتها/من متى انتي تخبين عني؟
لوجين/اخبي عنك ايش يا أمي؟
ام لوجين بنص عين/انك حامل
لوجين سكتت وصدت وجاها خرس مؤقت/..
ام لوجين/من متى رجعت علاقتك مع مشعل طبيعيه
لوجين تذكرت الذكريات الأليمه/ما رجعت طبيعيه،يا أمي
ام لوجين معصبه/مافهمت.. اجل كيف حملتي؟!!والا كلامهم عنك صحيح؟!! انطططقي<<<كانت واثقه في بنتها بس تحاول تستنطقها،وتقول اللي بقلبها
لوجين استحت تقول لها، حطت يدها على راسها تضغط عليه/انا تعبانه،يا أمي ممكن تخليني انام شوي
ام لوجين عقدت حواجبها/مو قبل تقولين لي ليش هربانه من زوجك
لوجين انهارت بكي وجلست امها تضمها بحنان وتسكتها/يا بنتي ايش صاير لك بالضبط.. ليش تبين تعذبين قلب أمك معك
لوجين وهي تحس ببرد وضياع/ضميني يا أمي ضميني برداانه..
ام لوجين ضلت عند بنتها لين نامت وغطتها... وطلعت وتركتها وهي تفكر شلون تنقذ بنتها من هالمشكله.. واضح ان لوجين تعبت حييل من حياتها،هناك والدليل جسمها اللي صار انحف من قبل..وتتساءل بداخلها(يا ترى اقول لـ ماجد عن مكان لوجين والا بعدين.... محتاااره)
/
/
/
/

**مرت ايام ع الاحداث السابقه.. "
كانت ام لوجين تتردد على بنتها وبدون احد يعرف حتى ابوها... ،
مشعل تقرر انه يطلع بعد كم يوم..
وعزيز ما زال تحت الغيبوبه..والاطباء مو متأكدين من صحته... ،
طبعاً حسين اختفى... ومحد يعرف له طريق..
،
،
،
،
في مكان آخر في جدّه:;
طلع جابر من الفندق اللي هو نازل فيه كان هربان من الديره ومن الشبهات هناك.. حاب يحتفل بانه انتصر ومحى كل دليل ضده.. حتى لو أنه ما انقتل مشعل يكفيه انه ضرّه!!

**اتجه بسيارته نحو حي المروه وهو يكلم نفسه( ياترئ وش صار لعيال علي.. من زمااان ما جيتهم!!)
ناظر ساعته تشير للثالثه عصراً..
وقف عند البيت المطلوب لابس تيشرت بولو اخضر وبنطلون جينز..ونزل من السياره،واتجه لباب البيت.. رن الجرس وانتظرهم يفتحون/...
لحظات ويفتح ولد صغير عمره6سنوات الباب/نعم
جابر ناظر في الولد بابتسامه ونزل لمستواه/كيفك عمو
الولد استغرب وما رد عليه/..
جابر وهو يمسح على راسه/انت مؤيد صح؟
صوت جاي من ورا الولد/مؤوويد حبيبي مين عند الباب؟!
جابر رفع راسه لمصدر الصوت ويشوف بنت اول مره يشوفها هنا!!!.. بالعاده يشوف زوجة اخوه وتتلثم بعد..
البنت تفاجأت منه، كانت لابسه بنطلون سكري وبلوزه كت ورديه ورجعت بسرعه وراء الباب وطلت عليه بطرحه/مين؟
جابر بابتسامة خبث بعدما شافها/انا جابر ال عاصم
البنت بلهجة تريقه حجازيه/واخيررااً شفنا احد من بيت ال عاصم!!. ايش جاب لجاب؟!!
جابر بوقاحه/انتي اول مره اشوفك هنا.. من انتي؟
البنت/ايش دخلك مين اكون..صدق اللي استحوا ماتوا..
صوت من وراها يناديها/هنادي.. مع مين تتكلمي؟
جابر تعلق الاسم بباله(هنادي!!)
هنادي لفت ودخلت لأختها وهي لاويه بوزها/هذا اخو اللي ما يتسمى "علي"..
نسرين ارتبكت/اخو علي!!..خليه يدخل
هنادي/ما راح يدخل وماعندنا رجال ..ناسيه ان ابوكِ اتوفى الله يرحمه!!
نسرين ضاق صدرها/الله يرحمه، ايوه صحيح..
هنادي/روحي شوفي ايش يبغى واطرديه ترى سيرتهم تقرفني.. كفايه اللي سواه "علي" فيكِ
نسرين بطيبة قلب/يمكن علي حن لأولاده
هنادي/هههه حنّ!!.. وليش مايجي بنفسه.. ليه دوم يرسل اخوه!! .يا شيخه اتهدي قال حن قال ههه
نسرين/انا طالعه اشوف ايش يبغى..
هنادي/انتبهي منو، باين ان جابر هذا عيونو زايغه.. تغطي وخليك محتشمه لانو بصراحه نظراته تخوف..
نسرين تركتها وراحت تلبس وتطلع لجابر..
،،
،

/
/
/
/

طالع ابو مشعل من المحگمه.. وبصحبته اخوه "ابو علي" ..
بو مشعل كان حييل مبسووط باللي سواه..
بوعلي وهو متردد/ماتشوف انك تسرعت يا فيصل..
بومشعل/الا سويت الصح.. لكن ما راح ارتاح لين ألاقي البنت.. ابوها يقول انها ما جته..!!
بو علي/وانت مصدقه؟ اكيد جته لكنه يخبي
بو مشعل/ماظنتي انه بيخبي علي.. هالمره ماجد نبرته مو الاوليه.. حسيت انه صادق
بو علي/وكيف تتأكد!!
بو مشعل/الايام راح تكشف لنا.. يعني ماراح تتخبى كثير اكيد بتظهر بيوم من الأيام.. وساعتها يا ويلها
بوعلي/كفوو..
رن جوال بو مشعل وكان رقم زينه/الوه
زينه بالجوال وكانت مستعجله وخايفه/ابوي انت وينك؟
بومشعل/خير وش فيك يا بنت؟
زينه/الشرطه جايين البيت يدورون عليك
بو مشعل/وشوو!!!
/
/
/
/
/
/
الليل.. *
رجعت الساعه 11ونصف...!
كانت متضايقه لأنها تخلي بنتها لحالها في بيت جدها.. بس مضطره..
جلست في الصاله تبي ترتاح.. وعقبها تروح لغرفتها...
بهالأثناء نزل ابو لوجين من فوق وهو مستغرب/هددى!!
هدى خافت/هلا ماجد
ماجد/من وين جايه هالوقت؟!!
هدى خافت/كـ.. كنت عند اختي
ماجد بنظرات شك/كل يوم تروحين لها !!..صار دوام مو زياره.. لك فتره تروحين وماترجعين،غير متأخره!!
هدى ترددت/ايش قصدك يعني.. اكذب عليك؟!!!
ماجد/لا العفوو.. بس مستغرب
هدى قامت وهي مستعجله/انا رايحه غرفتي ارتاح..
ماجد/هدى انتي تخبين شي عني
هدى/لا ..ليش اخبي يعني
ماجد/ما ادري عنگ
هدى/عن اذنك انا مرهقه وحابه انام.. سلام
ماجد وهو مستغرب تصرفاتها وكلامها/سلام..
،
،
،
،
،
،
في بيت جدها..
جالسه لوحدها وتحاول تنام وماتقدر.. ودها تتصل وتعرف اخباره.. وتقول في خاطرها"اكيد مشعل مابعد صحى من غيبوبته.. او يمكن صار فيه شي..والا كان اتصل فيني ودور علي.. اكيد بيفقدني"
نازعتها نفسها تتصل عليه من رقمها الجديد اللي توها مطلعته.. ودقت رقمه بدون تردد.. وانتظرته يرد...
على الطرف الثاني رد مشعل بصوته الرسمي/الو
لوجين ماصدددقت انه رد عليها معناته هو صار بخير ومبين من صوته انه بصحه ممتازه،ما قدرت تتكلم وفهمت انه مطنشها وما فكر فيها وبالأصح"عايفها"
رجع مشعل ينادي/ألووه.. نعم ألووه..
وسكر الخط..
لوجين تركت الجوال وابعدت عنه وكأنها خايفه وهي شبه منهاره/لا يا مشعل لااا.. ليش تصدقهم لييششش
اخذت اللحاف وراحت بنص السرير وتتلحف وهي تحس ببرد قااارص.. وتردد/اكيد ما بعد دري بي...اكيد اكيد للحين بالمستشفى!!
،
،
،
،
،
،
،
اليوم الثاني،،
كان يجهز نفسه بيطلع من مكتبه.. وتفاجأ بالسكرتير يدخل عليه/استاز ماجد..
ماجد وهو يترك كرسيه بيطلع/نعم يا عماد.. الدوام خلص.. وش فيه
السكرتير/هاد ظرف من المحكمه جانا بالبريد اليوم ونسيت ادخله مع الاوراق... وشفته وانا ارتب مكتبي قبل امشي
ماجد استغرب/يا عماد.. انتبه ثاني مره..
السكرتير/ان شاء الله..
ماجد اخذ الظرف وهو متعجب/وش تبي فينا المحكمه.. عماد تفضل تقدر تروح..
طلع السكرتير..
ماجد فتح الظرف وعنده فضول يعرف وش داخله.!!!
قرأ المكتوب وهو مصدووم من اللي قرأه ومقهور.. لهالدرجه تووصل معهم..!!
جلس من ضيقه وهو يفتح ازارير ثوبه من فوق...
،
،
،
،
،
،
،
يتبع..