رواية منطقه13 الفصل الثالث والخمسون 53 - بقلم مريم السعدي

رجعنا. ومرت كم يوم، حمزه رجع التحق وبلشت امتحانات مليكة. كعدنا الصبح لقيناها محضرة صدريتي تكويها وصافنة بابتسامة. عليها أنا وأحمد بس نتأملها. لبست وطلعت خجلانة. باوعتلنا. همست: مبينة جبيرة هواي عالمدرسة، مو؟ أحمد: أصلاً عبالك طالبة متوسطة. شلون صارت على طولج. فكت الكفة. قالتها وتباوع عالصدرية. أكلت وتباوع للساعة وأحمد يوصي: تطبين أول شي تدورين اسمج وين. هويتك ومحفظتج بيدك لتخافين. مليكة: لالا مسيطرة إن شاء الله.

أحمد: يلا قومي. قامت تلف بالحجاب وتباوع لروحها بالمراية، تنهدت وباوعتلي: حلوة؟ أنا: تخبلين. هزت راسها وهمست: ادعيلي. أنا: إن شاء الله. وطلعوا. بقيت بالبيت أرتب وأركب وبالي يمها. للتاسعة والنصف. كان بيومها عندي أوف. دق تلفوني، من أباوع أبو ضِل. ترددت أرد، تركته، كملت دكتين ودز رسالة: ردي عندي حجاية وياج. رجع دق كم دقة، ما رديت. بعد ما دق، طبت مليكة هي وأحمد يضحكون وصوتهم عالي يسولفون. أنا: ها بشري؟

كلش زينة وتضحك، تحكي وتسولف على أبسط تفصيل، ومرتبكة، وتضحك. أحمد فات نام وهي طلعت تقرأ بالأدب بهمة. يوم وراء يوم امتحاناتهم شارفت تنتهي. حمزه خفر. وسلام متصل بعد، حتى والدته ما اتصلت. إبراهيم عرفت من قاسم سيتزوج وأخذ الصالة عالغرفة سواها سويت، محد اعترض وهو كيفه يتصرف وأمه ماشية وياه. نزل حمزه خطية أول يومين يقضيها نايم. بس يسبح يطب ينام، يومين يلا يطلع يعوض نوم. كملت مليكة امتحانات وأحمد رجع للناصرية،

كومة وصاها وهي ترد: "باي أعرف ميخالف". راح. كنت أسوي بالعشا وتسولف وياي هي. تلفون حمزه دق. رحت ركض عليه، ما أردت يكعد، جبته شفت مكتوب: "ابن الخال". سويته صامت. ما عرفت نسيم لو سلام. وكملت شغلي. مرة مرتين أربع مرات. ورسايل تندز. ما فتحتها، أخاف يصير مراي. كنت آكل والباب اندقت. مليكة باوعت من الشباك وهمست: سيارة سلام هاي. قلبي رجف، طفيت الطاوة، حمزه كعد فرك وجهه. همس: أسون. أنا: ها يابه. حمزه: تعالي شوي. رحتله،

باوعلي عاقد حاجبه: منو هاي بالباب؟ أنا: يمكن سلام. عبس حلكه ودار وجهه، وكف جر تيشرته همس: بي ريحة هذا. أخذته منه جبت الثاني لبسه وغسل وجهه، وصل للدرج، رجعت الباب تندك قوي. صاح من عالدرج: أي أيييي شنو مداااهمة؟ جاوبه سلام: أي مداهمة، افتح يلللله. "قزرقط" همس حمزه ووصل للباب فتحها. كنت أباوع عليهم. دار وجهه. سلام نتر: شنو زعلان بعد؟ حمزه: لا تغلط ترى راسي مسطور. سلام: لا يابه هه صدق عود. حمزه: شرايد؟ عليمن جاي؟

عمتك ذيج وينها روح فوت. وحمزه اتجه للدرج. نتر سلام: تعال تعال جاي عليك أغبر. وكف حمزه واندار عليه: تعال اصعد فوق تعال. صعد وراه، طبوا للهول. صاح حمزه: خطار يمي. أنا ومليكة بالغرفة، الله وحده صافنة بوجه اللخ. بقينا نتصنت. سلام بلش حكي: أي شبيك يابه لابس جينكو، النوب حتى بالواجب ما يحاجيني. حمزه: ما يعجبني. سلام: ولا يعجبك طبك طب. بقى حمزه ساكت. وسلام جر نفس: أحكي غرد، نسوان توقع بيننا، كان استحيت.

حمزه: والله ذوله النسوان اختي يعني أهم شي بحياتي يعني أمانتي. وأنت ما شاء الله عليك هنتها وهنتني. سلام: ترى ما حكيت شي. باوعله حمزه رافع تك حاجب واندار تكتف ودار وجهه جر نفس. قال: شوف أبو ضِل، أنا صح جبتها عدكم وكتله لخالي خليها عدكم أمانة بس مو معناه خادمة. سلام: أنا اعتبرتها خدامة هاي شبيييك؟ حمزه: خل أكمل.

أنا بيوم اللي عفتها عدكم كان عندي أسبابي، عمتك وكفت هالوكفة إلا تزوجها، وواحد الدنيا زايعته على مرتاح متزوج وعنده 3 جهال ومطلك. دراستها حاربتها بيها. خبلتها للبنيه، عفتها عدكم ارتاحت رغم رقيه أفندي ما كعدت. قصرت وي المرحومة كلي؟ همس سلام: لا حشاها. حمزه: قصرت وي بنتك طلع منها شي؟ سلام: لا. جاوب وباوع للسقف يجر نفس الجكارة. حمزه: أي لعد ليش هالاهانة ليييش؟ تدري أنا اللي قنعتها بيك وهي رفضتك؟

تدري كعدت أعدد بخصالك الحميدة؟ طلعتك شريف عفيف ابن المؤمن لو لا؟ قبلت لأن أنا وقاسم وأبو الخال قنعناها ويمكن تأثير ضل. يحكي حمزه وسلام مبعد عينه عنه ويهز راسه بموافقة. حمزه: حتى من ردت تدرس ضل كتلي براتب ما قبلنا. وأنت اللي حددت وأنت ميت مرة كتلي صح لو لا؟ سلام: صح. حمزه: ترى احنا ما متعاجزين من أختنا سلام بس تعرف الصوج بيمن؟ الصوج بيه أنا. أنا اللي جبتها بيدي لبيتكم وقللت من قيمتها. عبالي تتفهمون.

سلام: كافي عاد حمزه، سويتها بلا ملح ترى. حمزه: أي لعد شنو يابه أقولك أنت ششايف روحك؟ سلام: حمزه، تجاوزت هواي. حمزه: والله يا أبو ضِل احنا أكثر من أخوة رابين سوى. وأعتقد ميانتنا تخولني بهالتجاوز. "استغفر الله" نتر سلام. وكف حمزه همس: دقيقة هسه أجي. سلام: وين داروح؟ حمزه: أي دوكف. طب للغرفة وطلع بيده جزدان الفلوس. كعد عالقنفه جر نفس. همس: كم شهر مشيت راتب؟ سلام رفع راسه راساً. عقد حاجبه.

وحمزه جر نفس الجكارة وفتح الجزدان مضيق عينه، حسب حسب حسب وسلام صافن عليه بغضب. قال: ست شهور مو؟ سلام: كافي حمزززه، صاح: هاي شعليه بهاي؟ هذا تعبها. حمزه: ما تريد يابه ما تريد، تقول "خسيت". احساس مو حلو، ما أزيد الفلوس ولا أصرفهم. إذا ما ياخذها أذبها بالزبل. وكف سلام: صيحها أحاجيها. حمزه: ليش يابه هي كوة؟ نست المغثة، أرد النوب أكعدها كبالك؟ مخبللل عاقل؟ بعد ما توصل بابا. سلام: حمزه لا تتشاقى هالشقة، ضل محتاجة إلها ترى.

حمزه: أي كان قدرت لعد، عقج وجهه بلعبان نفس: شوفلها خدامة، اختي عدها دراسة، مو خلك إسراء أم الكوفيهات ولا أختها، اختي شبعانة ضيم أبو ضِل من كفخه لكفخه وأنت الخاتمة. ضيعت كل تعبها. أباوع سلام عيونه جمرت على حمزه. حمزه خلى الجزدان يم تلفونه همس: أخذه وياك. سلام: ما أخذه، شأسوي بي؟ تعبها هاي. حمزه: انطي لفقيرة، انطي لأحد محتاج، ما أعرف. ودار وجهه. سلام نتر: أنا ردت أوصللها إنه مو حلوة حجايتها. حمزه: حجايتيش؟

ترى غثوها وكالتها، لا عبالك ميتة بدباديبك. سلام جر نفس: سمعت كلشي بس مو حلوة حجايتها تثبت على روحها شي غلط، خل تلبسهم مو تجيب لروحها حجاية على هيج كالت. حمزه: هسه شتريد؟ سلام: حمزه جاي عليك أنا. حمزه: أي هاهي، أخذها للفلوس وكأنما كلشي ما صار. شالها سلام وخلاها بجيبه بجزدانها. حمزه: ارتاحيت؟ سلام: أي. حمزه: ديلة حروح أنا يعني صفت؟ سلام: أي، شعدي قابل. حمزه: الله يهديك وليدي. سلام: أبقى تعشى.

حمزه: لا ما أريد، ضل تنتظرني ما تجي يمنا. سلام: أمم الله وياك، لا لا شيجيبني، هذا زواجه الخميس وعندي هواي عطلات جوه. حمزه: بيها الخير من تحتاج شي كلي، كاعد أسبوع. سلام: خوش. حمزه: فيماللا. طلع. أسينات: روحي ارتاحت رغم رجفة قلبي، تعبت من نقاشهم حيل، المهم تصالحوا. تعشينا وحمزه رجع نام. مليكة: بعدني عالشباك أنتظر إشارة لخ وهدأت الحركة. مرت الأيام، تأجل عرس إبراهيم وأنا مستمرة بدراستي وأسينات خطية تعاونني.

مرتين هابرت ضل من تلفون بيتها، ساعتين ضبط تسولف وي أسينات وويايه. فتحنا كاميرا وتضحك وتسولف وتفتر بالبيت مالتهم وتدرس ويانا. وتشوف لأسينات وتعلم بيها أسينات. بكل حرف تنطقه قلبي يدق وأتذكر نظرة عيونه على شفايفي. من أنطق الحرف يبلع ريقه. عابس: ركز. مليكة: مركز واللا كد ما بيا قوا. عابس: شسمه. مليكة: ووو. عابس: عفية. يجر نفس مبتسم ويكولي: عيدها يللا نسيتها.

أغمض وأسافر ألقى روحي حاضنة الكتاب وغافية. وحضن الذكريات الدافئ. بذر فتح داخل قلبي وطلع ورد، شلون أقدر أنساه، شلون أقدر أعيش دونه. ما عايشة أنا والله ما عايشة. حلم وواقع وياه بخيالي. وهو شنو ما يتذكر سوالفنا؟ وتعدي الأيام. وأسينات تمتحن الامتحانات النهائية. وأنا أنتظر النتيجة، كان الامتحان أصعب بهواي من التمهيدي. حمزه بقى يرتب وضع البيت هو وقاسم، كم مرة أجه أبوهم وسلام ونسمع ضحكهم. تصالحوا أم قاسم وأبو سلام.

بهالأيام حمزه دا يبات جوه علمود عرس أخوه وتحضيراته وترتيباته. أسينات: بآخر يوم امتحان لي، كنت أطلع وحمزه صاحلي. حمزه: سونه. أسينات: ها عيني عبالي نايم؟ حمزه: لا لا كاعد، ها رايحة؟ أسينات: أي ادعيلي، آخر يوم اليوم وأنا حأخلص. حمزه: يا الله أقولك شايلة فلوس عندك؟ أسينات: أي أي عندي. حمزه: منين لك؟ أسينات: مو خليلو طاني وما صرفتهن. حمزه: ها زين هو اليوم ينزل دروحي لعد الله وياج. أسينات: باي.

طلعت أمشي سريع وتفاصيل المادة تفتر براسي. سيارة ثقلت بصفي وأنا ما اهتميت، سرعت مشيتي أريد أطلع عالشارع. الخط راح يجي من صوت المحرك. عرفتها سيارة سلام. مثل الثولة التفتت مخروعة. نزل الجام، بقيت أباوعله، نزل نظارته الشمسية. أسينات: هلو. قلتها ونصيت. ما رد عليه وطلع بسرعة من يمي. وسرعت مشيتي كارهة روحي. شكو سلمتي؟ شكو لغيتي؟ حد ما رجعت أعصابي ترجف، حكيت لمليكة غممتني وأنا غممت روحي. باجر حنة إبراهيم.

ومرت أبويه حتى ما صاحت عليه. وأنا مو كلش أريد أنزل بالذات أصيل ما أريد أشوف جهرتها لا هي ولا رقيه. بقينا أنا ومليكة نتفرج عالعرس من الشباك المطل عالحديقة ونقلد: باع هذا وباع ذاك. كنت أشوف خليل يضوي بينهم ضحكته العالية وتصنيفه وتحشيشه يخرب ضحك. لابس قميص زيتوني وبنطرون أبيض كتان وحذاء سبورت زيتوني وقيطانه أبيض. هالقد شيك وأنيق. وقاسم رغم سمارة وعيونه الحادة السودة وحاجبه الثخين، بس طوله يرد الروح.

وحمزه حبيب أخته وسندها لابس قاط بلا رباط لونه بيج، مكحل سمارة هالقد يشبه أبويه. إبراهيم كان حلو بس أنا أحسه خنثى. أحسه ناعم بالنسبة لهم. وطب سلام. لابس قاط كامل. أسود. والقميص رصاصي والرباط رصاصي وأسود. ما أدري شصار بيه. كلها تركص، خليل يقلب الشارع بالركص، يخبل ركصه. إلا سلام. أحمد أجه بنهاية الحفلة وهم جره حمزه وقاسم. رقصوا ويضحكون. مليكة كانت تباوع وتتنهد تبتسم وباوعتلي. مليكة: باعي أسينات. أسينات: ها.

مليكة: باعي مكان بابا وعمي هناك فارغ. التفتت على تأشيرتها، كراسي اثنين بصدر الحفلة فارغة، عبالك صدق مكان أبو العريس. بالصدفة افتر أبو سلام وكعد على واحد منهم يباوع للولد مكيف. مليكة: تخيلي فرحتهم لو عايشين، ولو أخوج ما يستاهل بس الولد مكيفين. أسينات: أي. مليكة: تتوقعين بابا عايش؟ أسينات: مليكة، جريت نفس، لا أسينات مرتاح يم أمج. هزت راسها عيونها دمعت.

ساعة خلصت وأبو سلام حنى لإبراهيم، كان طاير والهلاهل جوه ترجف، حفلة نسوان أجوي من بيت العروس. كاعدين نتفرج. وحسينا الباب تندك. فزت أسينات تفتحها متوقعة أحمد لو حمزه، تلبس الحجاب وتباوعلي يعني لبسي. خليت الحجاب وفتحت الباب. وانصدم. برقيه وبنت خالتها أصيل. أسينات باوعتلهم وبلعت ريقها. وأنا ابتسمت أباوع لرقيه لابسة لبس بعد شوي تتصلخ، وبنت خالتها هم. باوعتلها أصيل لأسينات، قالت: هاااا مو كتلك أنتي اللي تخسرين؟

أسينات جرت عينها. وأنا متبسمرة عيني على رقيه ومكياجها وشعرها، شو كلش طويل. تقربت بس الله يدري شكد داخلي مهزوز. وكفت كبالها. قالت: هااا ههه شلونج ههه. أصيل أقدم لك بنت عمي المهزومة اللي سحلت سمعة أخوتي. حجاية كملت وأنا ما تحملت. راسًا جريتها من شعرها وسحلتها، عاطت وكمت أجر بشعرها. محد يسمع صباحنا. وأنا أصيح: منووو المهزومة بنت الـ... منو مو أمك؟ طردتني بنت الـ... أم الـ... روحي شوفي رجلك كم وحدة عنده. وأغلط ويصيحون.

وأنا أحرز يمنة ويسرة بشعرها، شو وكع بيدي، طلعت باروكة تلزكها ومخلية، قامت تهرب وجريتها من ثوبها انشك ووكعت بالكع، جواريبها انسلتت. مثل المخبلة، مثل الغيرانة ميتة غيرة. وكعدت على خوانيكها، أسينات تجر بيه ما تقدر، أصيل تجر بيه ما تقدر. خنكتها ولغمتطت مكياجها. الرموش وكعت والعدسة تحركت، خفت عبالي عينها انقلعت. وخرت راسًا. عدلت العدسة وتركف. مخبله. دتريد تنزل تنهزم وتباوعلي ترجف. وآني شي بيه تكسر وبرد.

قفلت أسينات الباب ترجف صافنة عليه. انتجت وطكتها بضحكة من قلبها، وآني هم ضحكت. لج عبالي عينها انقلعت، شو مدري شلون صارت طلعت عدسات. تهز راسها وأضحك. جرت نفس وباوعتلي. ارتاحيتي؟ أي كلش. خال تكول لأحد؟ ختكول هي الصعدت، احنا منزلنا دفاعًا عن النفس. تنهدت براحة ورجعت أسينات تباوع من الشباك سارحة. ترى أنتِ تحبيه. باوعتلي ودمعت عينها. هو ما شايفني مليكة، شايفني مربية لبنته. أي صح.

تمددت أنام تعبت أعصابي حسيت بيها بليل اجت أخذت تلفوني من الشحن. وطلعت. عرفت حتخابره. لحقتها بهدوء. شفتها تدوس بالدكم مترددة. ودكت اتصال خلته على أذنها وغمضت حيل. أسينات: رد راسًا، لأن كم مرة أصير أخابر من رقمها وأضرب بلوك وأرجع أفتح أخابر وأرجع أضرب بلوك. ألو. احجوا. لمن مخابرين لعد. وسكتت. كليشة كل يوم. بقى ساكت. ودكت ساعتنا تعلن وصول ساعة ١٢، كل ساعة ضبط تدق هيج نظامها. بقيت أذني استمع، خرخشة صوته وضل يمه تطنطن.

غمضت ثنينهم، مشتاقة لهم. شجابني، شورطني. همس: غبية مو شخصتك. فكيت عيني بلعت ريق. انتبهي على الأصوات اللي يمك. ما حجيت بلعت ريقي. ساعتكم غلط بالمناسبة. سديته راسًا وأضرب بكصتي. خرب خرب، شلون نسيت شلون دكت الساعة من أجه بيتنا. بحيت وأعض بأصابعي، مليكة همست: ليش البجي؟ سمعتي صوته ها هي. وج عرفني. شلون؟ من الساعة. عبست حلكها، باوعتلها وباوعتلي. نص بغداد عندها منها، حضري وتعالي آني وإياك تخابري كرامة ما عندج.

شلون فهميني ما أقدر. اضغطي على روحك ولا ترجعين تحسين هالاحساس. هزت راسها وترجف. كوة نامت بيومها. أسبوع وطلعت نتائجي. ناجحة. جانت أحلى فرحة، أحمد جابلي سيشوار هدية وخطبة حمزة عزمنا على عشا. جنت أنتظر مباركته، جنت أتخيل يعرف كل شي عني. بس. خاب ظني وتعبت من الانتظار وبديت أيأس. الأيام تركض. حمودي أخذ محل سر قفليه بالناصرية. وبديت ألح عليه تزوج وتأهل، وحمزة يباوعله يشجعه وهو ينتر. شيلوني من راسكم.

زين أخذ وحدة من الناصرية. حمزة: بربك أييي، وأخذلي أختها ولك يكولك يخبلن. انجب ما عندك غيرة. يا به مو عليها على أختها، أنت شعليك ما باوع على مرتك آني. مليكة: على من تحجون؟ حمزة: على مرت أحمد المستقبلية. مليكة: باوعت لأحمد خربان ضحك، باوعت لأسينات. ترى احنا بينا خيط. حمزة: هههههه أي بعرضي. أحمد: مليكة شناوية هسه؟ علوش. ما تدرسين سادس ما دام نجحتي. لا تعبت عزة ما أريد. حمزة: دورلها وظيفة. صفنت باوعت لأحمد.

أحمد: ثالث حمزة منو يوظفها. حمزة: أقول لخالي يشوفلها. مليكة: وأقوم أطلع من البيت وأروح للشغل. أحمد: لعد تضلين محبوسة. أخاف آني. ولشوكت شي ثاني. خط من الباب للباب. أسينات: مليكة كافي ترى صار سنتين ما تعلمتي. إذا خط أي أوك. حمزة: هسه أشوف خالي فد شي بسيط. بس أنتِ خلي بالك على السادس ترى المتوسطة راتبهم قليل وما ينطون تعيين، هم متخرجين جامعات وبلا تعيين. أحمد: عود الله كريم هسه. يله عيني أقوم أنام باجر ورايه طريق.

وباوع لحمزة: وأروح أصادق مرتك المستقبلية. عوفها لاااك. أسينات: استمرت علاقتي بضل. بيوم اللي ينزل ما نخابر، وبيوم اللي يلتحق نخابر ونسولف ساعات. أشتغل والكاميرا مفتوحة، هي ترتب بغرفتها وأغراضها وآني أرتب ببيتنا. ما رجعت تجيب سيرة إنه تعالي يمنا، ولا آني الكمت أسأل. سيرة سلام انغلقت. لحد ما فد مرة. د أبدل وخابرت كاميرا. رديت وآني أشيل بشعري. هلو ضلولة، راح بابا اشتاقينالج اليوم. وأجاني صوته. أسينات مو؟

خنست سديت الكام ساكتة. ألو. ألو هله أبو ضل. هله بيك، جر نفس. آني عبالي مو وياك، توقعت صديقتها وشفت المكالمة أربع ساعات انصدمت فد أشوف منو. آني همست. اممم أعتذر إذا أزعجتك، وترى ما شفت راسًا درت شاشة الفون. بقيت ساكتة. تنهد قال: شتحجي وياك أربع ساعات وآني أقول همزين ما تسأل وتلح. ما جاوبته بقيت ساكتة. ألو. نعم. تنهد همس: ها هي مع السلامة. هلو. سده وذبيت الجهاز، مليكة صفنت عليه. هسه يحير شيسوي بيها.

خليه يطير أعلى ما بخيره يركبه، ابن الزفرة. لا لا لا تحجين على أمه خطية. بدأ العام الدراسي الجديد وضلولة صارت ٢، وآني هم ٢ جامعة. ومستمرة ضلولة كل يومين تتصل تشوفلي هدومها وترتيب أغراضها، أعلمها شلون تسوي شغلات تخبها. وأم سلام وياها تسلم وتهلي خطية مكيفة. ما انقطعت عنها أبد. وداومت. حمزة ملتحق. وأحمد بالناصرية. ومليكة رجعت بقت وحدها، قفلت الباب ورايه وطلعت. مليكة: رجعت نمت وراها بذاك اليوم. وآني أغفى.

واندكت الباب اللي على الدرج. تفاجأت، كوم صار محد وصل، وقفت يم الباب. تلفون أسينات دق سمعت صوته. الغبيه ناسيته. د أشوف منو، شفته قاسم. ورجع دق الباب، لبست الحجاب وفتحت الباب. ردت أوجه خوفي، ردت أشوف بعينه اعتذار، ردت أشوف شلون عايش. فتحتها. فتح عينه ورجع خطوة، ارتبك التفت يمنة ويسرى على الدرج. همس: بس ردت أسينات. باوعتله التفت باوع بعيني، باوعت لسلاحه وبسطاله ونصيت. مو هنا. ها داومت، تلفونها د أخابر دق سمعته.

التفتت ناسيته. هز راسه وفات لغرفته. سديت الباب ما طبقتها، بقيت أباوع من الزرف، شفته طب بدل ونزل بالفانيلا والبجامة. يمكن توه جاي نازل. نزل الدرج وبقى باب غرفته مفتوح. فتحت الباب شفته نزل وحجه ويا أمه. يوم جوعان كلش. أي يوم هسه أسويلك. مشيت بالممر وطبيت لغرفته أول مرة أطب. التفتت، غرفة حديثة تركية بسيطة بس مرتبة. معلق على الزاوية سلاحه ومشمورة بدلته بالسلة. يم الزاوية ريحة مال حذاء بالغرفة تكتل.

مشيت للزاوية لزمت سلاحه وتذكرت نبض قلبي. عابسي. فلتبتسم دنياك لأجلي. أتلمس بالسلاح بالجلدة مالته، وأتذكر من لزمته وفز. شتسوين ولج. ابتسمت غمضت، اشتاقيت حتى لريحة الرصاص من ينظفون الأسلحة الفجرية. شميته والباب انسدت فزيت. جان بالغرفة هو، شوكت صعد ما دزى صوت، خطوة ما سمعت. ارتجى على الباب وجر نفس، مميل راسه يباوعلي بتعب. بقيت صافنة منحرجة حيل، شبرر شكول. مشه باتجاهي أربع خطوات، نصيت راسي وأعدل بالحجاب.

أريد أطلع وأرجع لبيتنا، شطلعني. وواجهت روحي أذبحه إذا كاس شعرة مني، أذبحه أشرب من دمه. رفعت راسي وأتنفس بقوة. عقد حاجبه وضيق نظره. لزم السلاح من أيدي وداره عليه، خلاه بصدره وجر معصمي وحدد لزمته بأطراف أصابعه فوق هدومي برقة خلاها. على الانطلاق. أول كلمة قالها: ارتاحي ضربيني وارتاحي، ريحي قلبك وبردي، اضربي إذا هذا يريحك. دمعت عيونه ويباوع بعيني يمنة ويسرى. كل اللي صار مني ويقدم فوهة السلاحه أكثر لصدره.

من ورايه طبيتي بعالم أسود، أسووود. رجال ما يتحمله مو عاد طفلة. بلعت ريق. غمض قوي ونتر: احجييي ششفتي من ضيم من ورايه. ميل راسه يحجي. بلعت ريقي، هزيت راسي راحت بعد وآني مرتاحة ما محروق قلبي أصلًا نسيت. جنت أحجي بثقة مهزوزة. تفاجأت بكونه تعبان أكثر مني. غمض عينه براحة وارتفع صدره يتنهد، حك حاجبه. هديت السلاح أريد أطلع. خليج حجايتين وهذا هو. وقفت، افتر وقف قبالي. شلونج؟ زينة هزيت راسي والله زينة، نسيت كل شي آني. هز راسه.

وأنتَ مو بس ذنبك، أمك غلطت أكثر ظلمتني أكثر. هز راسه يباوع بعيني بحيرة. مليكة؟ نعم. بلع ريق. مليكة تحسين بيه؟ شديصير؟ قالها بتوسل ويأشر على صدره. نصبت راسي ما عليه بيك وطلعت ركض لبيتنا، قفلت الباب أربع قفلات من خوفي. غمضت وكعدت بالكاع. ما أريد أي أحد أفكر بي غيره، ما أريد ما أريدد. التهيت لهيت روحي بالكوة. أعرف قصده وإذا فك خلقه أذبحه.

اجت أسينات ما حجيتلها. راحت غسلت بدلته. ورجعت خابرتها ضل، سولفت وياها ساعة ونص ودرستها كتب وكملت سدته. وهيج مضت أيامنا. حمزة. ما نزل هالاسبوع. كله لخميس ونزل. بقى يسولف وياها بهدوء الليل كله، عفتهم. حمزة: بعدك تحجي ويا ضل؟ أي ما أقدر أعوفها. بعد كل اللي صار، شكد قلبك فطير أسونتي. حمزة فدوة حاجي يجيبها مو تصالحتوا. جر نفس وابتسم، خلى كذلته ورا أذني همس: اشتاقيتيلها؟ والله العظيم أي. خليكم على الفون قلبي ما يترهم.

أوك يعني صعبة عليك؟ ما أريد أنزل من قيمتك وأقوله جيبها. هزيت راسي وتنهدت. سولفيلي شكو ماكو بالجامعة، صايرة سكوتية. كل شي ماكو، الولد اللي ذيج المرة حجيتلك عنه بعد ما وصل من حاجته صديقتي. زين. وها هي. والولد اللي يباوع وين ما تروحين وتعارك ويا أبو الخط لأن تأخرتي. ما أدري ما أشوفه. أحسن. وتنهد: أحسن أصلاً مو من جامعتك هو. شلون عرفت؟ سألت عنه مو عنده سيارة أفيليون. أي. أي مو من جامعتك جاي ضيف.

قالها وعقج وجهه: اممم وأنتِ؟ شكو آني شبيه؟ تنهد وابتسم: تدرين خالي رد فتح موضوعك. عزة شكتله. كتله إلا ابنك يجي يتقدم. ويتوسل يله. أختي عزيزة عليه. ابتسمت إله ونصيت. إذا رجع تقدم توافقين؟ ما عليه أنتَ أعرف، نام يله. تعالي فركي رجلي ولج. أهو مو صار ساعة أفركها تعبت أيدي. أنطيك عشرة على الساعة. هههه خوش صفقة. دار وجهه ونام همس: غطيني وطفّي الضوه. أوك. د أطب لغرفتي همس: أسونة. ها عيني. الله لا يحرمني منك قلبي.

ابتسمت فدوة لحلكك. طبت مليكة فاتحة خلقها وفرت بأيدها. شبيه لج. شنو هذا أخوك ويع رومانسي وعاطفي ولاجن جان على الساتر. هو هذا حمزة. معودة جان يطب ويطلع يحضني وبابا يطير. همزين أحمد ما عنده على السوالف جان كفخته. هههه. أسينات: نمت والصبح حسيت على جقجقة حمزة. وريحة الجاي. يدندن. أغنية. زرع بيه العشق خوف يعني أبطل ما أشوف. طبت أضحك: منيه هاي اللي زرعت خوف بيك؟ ضحكت: تتريكين؟ أي هل أسوي بيض. لا لا جبت جبن. واندقت الباب.

أسونة البدلة. تعال لاااك. هذا بعده ما رايح. بال١١ أطلع تعال. خليل أصعد حمزة فوق. هله هله كمل فوج سلام. دقوا الباب صاح: فوتوا. طبوا كلهم وخليل جاب كرسي وياه خلصت كراسينا. بوست خليل صار شهر ما شايفته. وصاح: أسونة قلب اليوم حضريلي روحك ولم أصابعه الخمسة باسها وشمرها، نتر حمزة. هههيي اكعد راحة عوف أختك. سوالف الـ... بعيدة عنها عيبب. يول غير هي صديقتها صارت مو سونة. تدلل خطية حمزة خل أروح. قالت: لااا عيب بابا تجيك حجاية.

أهووو حيعممها مثل ذاك ما أريد ما أريد شنو هاي بس هذا الجبن عندك ويصيح وتعالوا النوب الملاص الصغير، آني الجبير أنفضه. أسونة فدوة. من جوه كلاص الجبن على الميز بوكي وصعدي. حمزة وقاسم صاحوا: وييين تنزلل هيي؟ هاي شبيكم؟ التفت يضحك: شكو ههه يأكلوها جوه. حمزة: سونة سوي بيض حبيبي. أوك. سويت مكيفة. بيهم أسري والتفت ألقاه هلصان. وأرجع أسوي تسع بيضات وطارت. حمزة قال: لج كافي ترى احنا ما نشبع طالما نسولف وناكل تعالي كعدي.

وبقينا يسولفون ويصنفون وخليل يحجي مكانه أخطر من قاسم وقاسم يسولف. وحمزة. هم يحجي همس: هالاسبوع بقطاع سلام أنزل، فوجنا كله انضم الهم. خوش تسخت ويا سلام تاخذ راحتك. قاسم آني نازل البي واجبي وأدرس نفس الوقت، مو أستغل رتبة ابن خالي. خليل: هلوووو أبو الوطنية أقولكم عيني. حضّروا روحكم أريد أعرس. قاسم: يا الله، يله ووين تكعد؟ أجّر لي يم بيت خالي مشتمل يم عمار، والله يسهل بس هاللي تصير. اسينات: هههه الله شون حلو.

حمزه: لج شوفيلي وحده اني هم أريد أعرس. اسينات: خرب لك، مو تدلل. خليل: (همس) ششش سونه. قربت راسي: ها؟ مليكه شونها؟ قاسم دفره من جوه الميز. ضحك نصه، حك حنكه. اسينات: زينه، تريد تشتغل. قاسم: شتشتغل وين؟ اسينات: ابتسمت واخوتي حمزه وخليل يباوعوله ضامين الضحكه. ما أدري، أحمد كال أشوفلها أي شغله بسيطة. قاسم: هذا المجمع مال عيادات البارحه شفت إعلان مال موظفات مطلوبين بي. حمزه: وين هذا راس الفرع؟

أي أي الجديد، أروح أسأللها إذا يردون. بعد الخير، وما مدّت إيده وهزله حاجبه. كال: بسيطة. سكتوا ويدخنون، حكوا بأمهم شوي وسكتوا، وتفاجأت إنه يعرفون بنسيم متزوج وعنده جهال ومغلسين، وكاموا يشكون من رقيه لبسها وطبتها وطلعتها واختلاطها بنات خالتها. خليل نتر: إذا الرجال الشهر نصه بأربيل، شتريد يابه تحبس روحها؟ حمزه: زين ليش ما راجعت بعد على طبيب؟ كلتلها رحمك تعب من الإسقاطات ومن عده ما يصير، وكعدت وسوّت. يوو سالفتهم مكيسه،

كال حمزه: أقلها طفل تلتهي بي تكرص بالبيت. بقوا كاعدين مليكه ما طلعت. للـ ١١ وتسحبوا كلمن لمكان، تسالموا وتواعدوا شهر اللّخ إنه يروحون يخطبون لخليل. حمزه بدل ويوصي مثل كل مرة: أسونه كلبي من ترجعين، شتحتاجين هذا خلف البقال، أخذي منه، أني تسوّكت لحم ودجاج وأحمد جايب أربع سمجات من الناصرية يعني ما محتاجين شي، وإذا احتجتي أخذي من الدخل، بس فدوه لا تطلعين هواي. إن شاء الله لا بس جامعة والله.

فدوه لكلبك، تلفون يمك حتى نتخابر، مو تعوفي يدك يظل بالي. لا لا راسًا أرد. حبيبة كلبي، باسني وطلع نزل الدرج نصه ورد صعد يبتسم. ها؟ نسيت تلفوني عالشحن. نزل مرة لخ، طب لأمه ودعته مثل كل مرة وطلع بالشارع، يمشي بالفرع شافتني واكفه عالدرج ابتسم شال إيده باي. أشرتله وطبيت. حمزه: وصلت بيت خالي وطلعت وي سلام التحقنا. جانت أول مرة ألتحق بفوّج. سنطة المنطقة، رغم كثرة الأوكار الإرهابية بيها، أربع أيام بقيت. وبليل خابرت اسينات.

اسينات: هلو حمزه. هله حبيبه شونج؟ زينه، باوع خل أكولك. كولي دا أسمع. باوع بنيه ويانا بالقسم. أممم. أي كالت: أخويه مكمل جامعه ومعيد ويريد شسمه يتزوج، أهلج ينطوج؟ أدز أهلي كلش عجبتيني وأمي شافت صورتج كالت عليج حلوه. وأنتي ليش ما متصوره؟ خرب يومج. لا والله صور مال عقود مال جامعه، الإضبارات مو أخوها عدنا يشتغل بنفس جامعتنا، فالإضبارات ماخذها يدققها. هاا أوك. أي فـ كلتلها أخوتي من ينزلون ما أعرف أني. عفيه عليج.

يعني شون استقبل أمها وحدي؟ أخجل، ومليكه تكول شحجي، يعني بالعاده أم البنيه تستقبل وأني ما أعرف شسوي حتى كلتلها لا تجون ما عدنا أحد. لا كلبي أني أجيب مرت خالي ونستقبلهم، ولا تحيرين. كوليلها الخميس خلي يتفضلون حتى الولد هم خلي يجي أتعرف علي، كوليلها أخويه كال هيج. أوك، أنت الخميس تنزل؟ الأربعاء قمري الأربعاء. زين ماشي، يعني أكولها الخميس؟ خاف عيب عبالهم ذابحه روحي. حبيبي من تجي تسأل كوليلها: الخميس تفضلوا أخويه كال.

ها ها خوش أوك. ديله لا تفكرين نامي، سلمي على مليكه. أوك وصل. سلام: ويامن دتحجي؟ عبالي نايم طلع كاعد. هلا بابن خالي، أي كاعد آآآخ. شبيك شو تتحسر؟ ههه ماكو شي، والله إن شاء الله كل خير. شبيك شو حاير؟ اشرب اشرب ويايه جبير هذا الكوب. ما أحب جايك مر، دافع البله تكول ويسكي. سلام: اللي يسمعك يكول ضراب للأخير. ههه أووف. شبيك ووجع؟ خنكتني، عود جيت أسولف. ماكو شي، خايف على أختي. شبيها يا ستار؟ كالها منصي عينه:

ما بيها، جاييها ناس وحاير سوده بوجهي حتى ما تعرف شون تستقبل، تكولي شكول؟ لا أم عدها تعلمها ولا أخت جبيرة، بس ولد وأني عزلت روحها بعد شكد حاولت أتوصل لحل ما قبلت تكولي ختولي. بقه صافن بوجهي. شبيك صافن؟ تره الموضوع انسد مالتك سلام، أحجي أخذ راحتك. ابن عمك مو رايدها؟ أحمد شفتيتلي أحمد؟ كلبه بيد وحده أرملة مدوخته بـ ١٢ دوخه. يعني ما بينهم شي؟ هاي شبيك خو لو يريدها جان من وكت أبويه، بس ماله نفس بيها شتفهّم أخته؟

أمم ومنو متقدم؟ ولد معيد بالجامعه أختها وياها، وأني أستغفر الله ربي اختنكت. شبيك يول؟ عادي هي البنيه خطار عد أهلها. يول منو يرضى بوحده ما يصير عدها جهال؟ منو هاي اسينات؟ لا بشرفك. أي والله لعد مو كلت لخالي عبالي كلك. لا والله حتى أمي ما تدري. خالي كلبه حنين. أي كلب سمجه، شون عرفتوا ما يصير عدها؟ من صغرها شايلين تك مبيض والثاني ضامر خامل. أوو والله قهرتني.

هاي قسمتها، هسه جايبها ناس زين، تجي تكوللها تموت قهر، أحجي وي الولد على صفحه راح يطفر، ما راح تكول ليش طفر. أي والله حيرة، زين هي ما تدري؟ لا ناسيه، طفلة جانت وعمليه ببطنها شمدريها شنو. أمم، الله يساعدها. كون أنطيها من راحتي وخليني متعلعل أني، بس دا أريدها تتخرج وتتوظف ما تحتاج أحد، خاف يصير علينا شي وإحنا ٣ بالساتر. سكت صافن علي، عيونه حومرت. تنهد: أني موصي خالي بيها، كايله خاف يصير علينا شي بس عينك عليها.

سلام: تنهدت بتعب، محد مرتاح بحياته، خليها ما تدري تره تأذيها، ومن تتخرج وتتوظف نوعًا ما ما تحتاج أحد، أسهل شوي. أي هو أحمد يدري بالسالغة، كايله أبويه، وما فاتح موضوع على إنه أني ابن عمها أريدها أبد، ومرة حجينا عالزواج والخوات كال محاسب روحي عدي وحده، عدي خوات ثنين. وأني والله لو مليكه شوي أصغر مني إلا آخذها وأأمن عليها، بس هو ما يفكر هيج أبد. براحته.

أي لا عليج جابره، إحنا موجودين ٣ لا واحد واثنين وإبراهيم ولو خارج قوس بس يتسمى أخوها. أمم اذيتني والله النوبه تحب الجهال وتعرف شون تجيبهم. أي خطيه هي ما تكره أحد تره. ما تدري، جوز أحد يقبلها باللي هي بيها، جوز الولد المتقدم تعجبه ويعوف سالفة الجهال. منو هذا؟ هاي شبيك؟ هو واحد المن متزوج غير علمود الجهال. ما أعرف شكولك والله، دكوم نعل شرفك، عود جيت أغير جو كمت نفضت بنطروني وتمشيت. شوي لمحت أضويه من بعيد.

وكف حمزه ونزل للوادي بتسرسح. وأني طبيت للمعسكر. توني. أطب. وأسمع صياح حمزه. يووولد قناااص. انتبهووا. طلعت راسًا منصي صحت: حممممزززه اررجع. يولد قناا