تحميل رواية «مراهقة والاربعيني» PDF

مساء الخير حبايبي 😘😘

تعرفون مشتاقتلكم هوايةة بس ظروفي متسمح باستمرار اتواصل وياكم ع العموم

(اشكركم هواية ع تفاعلكم الحلو والذوق الجميل ب التعليقات الحلوة كنتوا متفهمين ولبقين مع الرواية والاشخاص على الرغم من وجود كثير سلبيات 😍😍)

حبيت اطمئن عليكم ولآن مشتاقتلكم

ع العموم عندي صديقة بلشت مشروعهة الضخم 😂😂بمناسبة الحظر الدائم واتمنى ادعموهة بلاشتراك بقناتهة وتطرحون المواضيع اللي تهمكم او اللي تريدون استفسارات عنهة او اي شي ملهم بلنسبة الكم تا تنزلة بقناتهة وتستفادون منها .

اوك حبايبي فدوا ادعموهة شكد متكدرون لانو صديقتي من الطفولة واحبهة كولش واريدهة تتونس لانو دائما تجيني ضايجة من كعدة البيت وحتى انتوا هم متضوجون..

اسم القناة /قناة فايولا الرسمية

اتمنى الدعم لا تفشلوني كدامهة

#الاشتراك

#المراهقة_و_الأربعيني

،،،،،،، بقلم زينب ماجد ،،،،،،،

الحلقة_50

-ها يول شو صفنتي ؟

-لا ولا شي ..

-لتضوجين والله عدي شغل جان احتفلت وياج

-لا مو مهم .. عادي .. كضب ايدي وعصرها بأيدو وابتسم .. اخذني مطعم اتغدينا وطلبنا حلا وشراب بارد ... وبعدها رجعنا للبيت .. وصلني الباب وكال

:- لا تشغلين بالج اذا اتأخرت .. واذا صارلي مجال اخابرج

-تمام .. لوحتلو .. باي

... دخلت للبيت تلكتني ام فگر (ام سعد)

-وين صرتي يا خايبه يلا تهيريلنا يگلون عگب باجر عيد وباجر تصعد الحجاج ..

-اي واني شخصني بيهم ؟

-انظف بيتنا نعدلو عجل هيج يضل خايس

-مو يوميه دنظف خايس شنو ..

-تنظيف شعبي ما هيج تمّسح من فوگ

-هزيت ايدي وفتت .. بعدني مانزعه جنطتي وتلكتني بالشغل فتت العمتي تقرأ قرأن .. تركتها وصعدت لغرفتي .. بدلت وتمددت نمت .. ما صحيت الا بعد المغرب ..

... نزلت ام سعد گالبه الخلقه كن ادردم .. هيام موجوده .. كتلها شبيها هاي ادحكلي من وره خشمها

-ضحكت .. ولج هاي لو تكضبج الا ما تخلي بيج عظم صاحي بختج بصراع الا لو ما هو جان سحلتج

-ليش بلا

-ما كايلتلج على شغل العيد تاركتها وصاعده نايمه وتكاونت هي والحجي تكلو شوفها سفلتني ومشت ولا ردت وهو يگلها تجفي شرها ما بينه حيل صراع وطلايبو .. وترد تعض بأصبعها تكلو دحك حتى عشا ما تنزل تسوي وگاضيها مكاون من وراج

-والله مال صدك اضرب وما اسوي وعشا دشوف شلون تحوص وتسويلها مشكله تلكتني من الباب تصيح الحجاج راح يصعدون ..

-دگفي وياي نفض العشا ما بينا حيل طلايبها يول رجلج تعبان

-هو هم هيج .. وكفنا فضينا العشا وخلصنا وكعدنا ع الجاي جان تكلي هيام

:- صدك ليليان عقدتو

الحجيه:- يا صدك نسيت اسألج ع العقد

-هم زين واحد منكم تذكر .. اي عقدت

-يلا يوم هي بقت على هاي ..

-حبيبتي يجعلها مبروك ان شاءالله ولا يفرقكم ويبعد عنكم كل عين ما تصلي ع النبي ..

-ابتسمتلها .. شكرا

-زواجة الدهر يمه ان شاءالله تترسين حظنو جهال ويحفظكم من عيون ابنادم

-مشكوره حجيه ..

... ام سعد ما دحكتلي طالعه روحها بس تنافخ .. والحجي وي نائل وولد عمهم بالاستقبال ع المشفر يدحكون لعبات رياضيه ..

.. صعدت لكيت صراع مخابر 3 مرات من المغرب .. خابرتو ما رد .. عفتو ودخلت تحممت و وبعدها ع الموبايل كعدت لحد ما غفيت .. صحيت على صوتو وهو يكعددني

جايبلي كيكه وياه وشموع وحلويات .. وفستان حمل .. حظنتو .. مشكور حبيبي

-قليل بحقج حياتي والله .. بس شسوي هذا الطلع بيدي وجبتو ان شاءالله تفرحين بي

-حبيبي كلشي يجي منك حلو المهم ذكرتني .. وحظنتو من صدرو .. باس راسي

:- جربي الفستان دشوف يكفيلج لأن انه كتلو خلي راهي البنيه جاي تاخذ سمن خاف من تتگدم بيامها ما يكفيها . .. قيسي دشوف حتى اذا بي نقص ارجعو باجر ..

-تمام هسه اقيسو .. ردت اطلع .. صاح

:- وين

- اروح اقيسو

-عجل تستحين مني ..

-صرااااااع

-روحي روحي يابه دنشوف تالي وي مستحاج ..

-رحت للحمام لبستو يجنن ما كأنو مال حمل كيثغ حلو .. وياه بدي وردي فاتح ..

رحتلو ..

:- يخبل عليج گاعد توب .. تلبسي بالهنا عمري .. بس هسه حظريلي الاكل حيل جوعان هاي وكفتي من صبح لسه بالقران

- هسه دقايق .. رحت بدلت وسويتلو عشا .. وكعد ياكل .. واني كعدت اشكي من ظهري ..

-اووف يابه والله ظهري يوجعني اااخ اموتني

-دحكي عمري تريدين تنامين نامي .. سوالف ظهري وجعني وما بيه حيل وهلتلعوص حافظهن اظري حبله ومالج خلكي .. نامي بويه ما رايد غير سلامتج ..

.. اندرت دحكتلو .. مدنك ياكل ومبتسم .. اندارلي

:- اي وكولي حظي هذا هم عرس .. عجل دحكي حظي لا عرسي وياج مثل العالم ولا العقد كابلتيني .. سنه افتر وراج ع العرس وبالعقد كاعده تسمعيني مجذب ؟

-اخذتني حاصل فاصل هسه اني حاجيه شي بس گلت ظهري

-ههههههه وربج حافظهن فاحجيلجياهن گبل لا ادگيلي اليتيمه

.... ضحكت واتمددت ادحك اخبار وياه ..

-صراع محد خابرك على امي ليش ماكو خبر عنها .. والله كلبي عليها .. خاف بيها شي

-لتخافين عمري ما بيها بس التواصل مكطوع من اسمع خبر اكلج ..

... سكتت

لثاني يوم الصبح انجبرت اتشكل وي ام سعد ع الشغل وعمتي تكلي عاونيها يمه هي هم مرة جبيره صبري عليها بنيتي .

وجبرتنا اني وحلا نگوم نشتغل وتأمر روحن وتعالن .. جرت الكاونترات وطلعت الغراض البطنهن كلهن وفسخت الطباخ يبوووه سوتها هوسه..

انوب جابتلي درج .. وتكلي صعدي جلفي السيراميك .. كتلها ما بيه والله شنو اخاف .. ماكو الا تصعدي وتصيح البيت جايف و البيت خايس ..

.. ادحك منا منا .. حلا تختلت حتى ما تصعد هي .. عاد صعدت احسنلي من صياحها .. تايت ومزيل دهون واجلف .. احس ظهري طك ...

وحلا ما سلمت .. جرتها ام سعد الا تجلفين بطن الكاونتر .. كربتنا كربه من هاي الزينه وحلا كل ما تطلع ام سعد تغمها وتكول نومت الشغل بروسنا .. وترد تحجي على مرت نائل فلتت من الشغل واني اضحك وياها واجلف ..

ابس تفككنا من التعب .. سمعنا صوت سيارة صراع فاتت .. گلنا اجا الفرج ..

ردنا ننزل .. فاتت ام سعد والله التترك الشغل منجن الا بعودة الماسحه وعلى راسها .. دشوف منو التتختل بيجن .. انتن امهات ابيوت .. امدا البيوت التحونها انت يل خايبات.. وطلعت بعصبيه ..

فات صراع السويج و السلاح والموبايل بيدو .. صحت صراااااااااااع وتباجيت .. الحكلي متتتتتت ..

هو وسع عيونو وصرخ .. ول يابه شعندج صاعده خرب بغيرتج نزززلي

-ام سعد ما تقبل .. صيح بيها

حلا :- اخ بابا متت تكسرت والله صيح بيها كل هشغل نومتو بروسنا اني وليليان ..

شو هذا شاف بنتو وصرخ عمت عيني .. يابه انتي تشتغلي ومد ايدو البنتو وسحبها يبوس براسها ويكول الا بنيتي بويه ما تتحمل هاي ..

كضبت الدرج وتخصرت . عجل اني شنو بنت البطه السوده .. باس راسها هاي فرحت تركت الجلف وركضت ..

- عينيييي صرصوع ابو الصرصعه .. شو كتلت روحك على بتك وكعدت تمطك وتبوس بيها واني هينا شنو فزاعة خظره ؟

-ول يابه شعندي غيرج احبل اجيب .. هسه انتي مچلبه بالدرج نزلي يول راح تكعين .. ومدلي ايدو

... كضبت ايدو ونزلت .. بوسني براسي وبخدي مثل حلا يلاااا

- دحك الغيره بويه ههههههههه .. يولو بوستج تعمل مصايب وانه كوه جارعج انتي والبطنج ..

-بوس بوس يلا .. اني كلتها وفاتت السعلوه خرب بيومها حتى بوسه ما حصلت بس الكراب وراها ..

ابتعد صراع وكال .. صعدي يابه انتي حامل

-وين ابو حرب والشغل ..

-يابه هاي حبلى .

-ما حبلنا وكفنا مثلها عجل نترك البيت هيج .. بس دحك بروح ميتينك .. شوف هاي الصفحه مثل هاي الما مغسوله وتشوف السيراميك

وهذا شلون مهووس بالنظافه .. صاح اي واله دحك الفرق .. عجل شكد مخيساتنا يول ..

ابدل واصعد انه اجلف نبقى وره ذن ناكل وحل .. فات بغرفة الحجيه وراد تبديل .. جبتلو تراك وصعد هو ع الدرج ويجلف حيل ..

خرب بحظي ردتو عون طلع فرعون .. وكف هو اشتغل وراح يخلصها عليها معاير وانه اشتغلت بمكانج .

ومو بس هاي حشد البيت كلو يكوم يشتغل .. ويصيح ع الحجي افتح نقط الكهرباء الما تشتغل خل نبدلهن .. فات نائل

كالو:- حدر هينا يول .. لا تكول حرمتك ما موجوده وتعزل روحك .. تكضب مكانها وتشتغل .. يلااا

دحك انه مرتي حبلى وگمت اشتغلت بمكانه .. كوم يخوي النسوان بعد ما بيهن خير .. شغل ايدك الله يزيدك..

يحجيها بضحك واحنه كلنا نضحك وياه .. ويجلف بهمه .. معدل ما مثلي اخوط بروحي .. صفحه ساعه بيها وهو بدقيقه يخلص متر ..

نائل هم ضل يضحك وكال خل انزل الثريات اجلفهن .. والحجيه دزت على مواد الكليجه وكعدت تفت .

وحلا لزمتها ام سعد المحجل وكالتلها دشوف وين تشردين هسه تجلفينو من فوك لجوه اريد اشوفو يلمع ..

واني دزتني ع الطباخ اجلف العيون والحدايد مالتو .. دخلت لصراع واكف يجلف .. ادخك بطولو .. قبانو لهطول شكد اعشقو وشكد اعشق التراكسود من يلبسو يصير يجنن على طولو ..

... وكفت اجلف واحجي .. هي لو كل الزلم هيج حلوه جان ماتت العالم .. اندار بساع

-هااا يول تتحارشين .. مو كوه كاضب روحي ...

-اشتغل مو يمك ...

-تتأمرين ولج فوك ما شغلتلج هلحشد كلو لجل ما تشتغلين واتعبين وهم تأمرين ..

-هههههههه .. نزل من الدرج .. والتفتلي

-يول بس بوسه وحده والله مشتاق..

-ههههههههه ردت اتقرب ابوسو .. جان تفوت ام سعد ..

-انتم ما تتخلون سوا بمكان واحد تكضةها بوس وما تشتغلون

صراع:- وانتي الله جاعلج گطاعت ارزاق كل شويه وچافته علينه .. هسه دخليها ترهم يا بويه هي وحده ..

حجاها وهو يمشي ويضحك .. وكاللها خلصت الفوك .. كالتلو عاوني نرد الكاونتر ..

...گلبنا البيت على البطانه .. كلو تنظيف وصراع كل شغله يلزمونياها .. يزاغل ويسوي نفسو يدزني على شغله ويشمرها براس غيري

ما خله واحد بالبيت ما شغلو علي ابن هيام ومحمد ابن سعد و نائل وحلا والحجي وام سعد وحرم هم كالو اطلع اغسل سياراتنا بابا ..

وحتى الحجي يزت بهلتايت وبفرجه ويغسل اخذو الواهس ..

واني گالي روحي كابلي امي ع الكليجه ظهرها طك .. كعدت وياها اسوي بالقوالب ..

وهم يفرشون بالبيت مدنك هو ونائل يعدلون بالزوليا ذاك يكلو جر وهذا يكلو اسحب ..

جان صراع يصيح .. طاح حظجن يمصكوعات هو هذا الشغل الذابحاتنا بيه ويوميه مكاون

فلا بيجن خير .. اشتغل خويه اشتغل .. نسوان تالي وكت .. منا وهيج نرد من شغلنا ونشتغل بمكانجن بس فكنا من السانجن رحمه لوالديجن

نائل:- اي بالقران عمي اشتغل بنكالي بس لا تزن وترن براسي اكره روحي ومحمد

عاد اني صحتلو :- علوااا اشتغل بمكاني واني اني اطلع اشتغل بمكانك .. الا بيومين اجيبلك سياره ..

شو هذا صراع عقد حواجبو وهجم .. ويصيح :- سياره من شيب الخلفج .. بنت الاواااااااادم ..

... كمزت وره الحجيه لا لا لا يمه يمه والله راح ينعنعني فدوه كضبي ما علقصد والله يمااااا ..

والعائله خربانين ضحك ويصيحون يلفطيره لو بس تكضبين السانج ..

-كوا... هينا يول وتشتغليلي وتجيبين سياره هااا ..

-والله ما قصدي والله حبيبي .. يمه ضميني شبيج .. قصدي شريف والله .. ابوگ واجيب ما مثل البالك شبيك..

-اليبوك شريف مووو بنت الشريف .. يول ليش ما تكرميني بسكوتج مو ذبحتيني ..

واندار يضحك .. واني اضحك رجعت لمكاني .. يبوووه يحجيه هذا ابنج ولا ينحمل

الحجيه :- انوووب ابني الما ينحمل يم الفواين .. عمت عيني عليك يمه صراع من عين باجر اطلع اعايد واخطبلك مره ..

صراع :- اي يمه اتفوتين الجنه من وراي تراني طاكني العوز .. كلش مجفجف .. كل ما وازتني ادنيا فرشت سجادتي وصليتلي ركعتين واگل لأبليس هش ولي المره حبلى

-او ييمه سوده عليه صريع يمه .. من باجر اخطبلك مره ولا تبجي بعد طولي

ليليان:- دروحي زوجي من كاضبج .. دشوف منو تتحمل مزاج وعصبية ابنج مثلي

صراع:- ها يول وتتنازلين عني ؟

-وبصوفك وبلبنك .. روح كلشي ما اريد منك

مدنك يشيل وي نائل .. اني كتلو هيج وعقد حواجبو :- صوف ولبن ؟ يعني حيوان ..

اااااااااخ بويه كضبوها هاي يحكها جلدها على جالتها ... وهجم

.. اني دحكتو اجاني .. وفزيت وره الحجيه .. لا لا لا يمه يمه .. كضبني ابنج فدوه .. يماااي

يريد يسحبني ونائل غص من الضحك ويسحب بي والحجيه تصدلي ..

صراع:- ول منو الحيوان .. حيوانه

نائل:- يولو هي ليليان حلاتها بجفصاتها ابو حرب دعوفها ..

-ما انت حبيبي ما انت شبيك . زلة السان يا عمري جان تكضبني الحجيه و تزتني عليه .. وتكلو خذها يمه وشد السانها لا تجفص الامّر منها ..

كضبني هو بثنين اديه من دفعتها .. شلت اديه استسلم اني اعلن الاستسلام .. اااا ممم .. وصميت حلكي بعد ما افتحو ..

الحجي يضحك بعلو صوتو .. جان يلتفتلهم صراع ويكلهم .. يابه رحمه لوالديكم ما تغمضون .. عمي اليغمض انطي الف .. بس خل احصلها

كلهم ضجو بالضحك .. والحجي يكلو خذها فوك فوك لا جدامنا ..

... عدل حجابي وهو يضحك .. باس راسي .. جان تكلو الحجيه

:- ها مو كضبو وتهجم وتكتل .. تالي بوسه براسها

-يمه هاي مو اي مره .. هاي ام مسلم .. انه اطكها .. تنكسر ايدي لو طكيت ام وليدي ..

بساع نبتو ام سعد .. الله يرحم ايام زمان .. يلمكروده .. انطتك ولد وانطيتها چفن ..

.. بعدني منو ..وسوا نفسو يدنك ياخذ من التمر العاجنتو الحجيه للكليجه وما رد عليها ..

خزرها نائل .. وهمسلها .. يمه وكتج مو نضحك وشحلاتنا ادورين سوالف عتگ..

بقيت الف كليجه (معمول) وي الحجيه ونشوي وصراع طلع هو ونائل للحديقه ينظموها ..

كملنا .. دزلنا الحجي كباب وبيبسي وكعدنا نتعشى .. كال الصراع :- بويه ضحايه اخوتكم جهزتوهن ..

ردو نائل:- اي يابه جهزتهن 3 خرفان من ان شاءالله بعد صلاة العيد نذبح ..

الحجي:- نوزعهن لو نعزم ؟

صراع :- نوزعهم يابه للفقره اثوب ..

... فرحت هم زين ما يعزمون .. شكد اكره العزايم .. هم ياشخصون بالاستقبال واحنا يطيح حظنا بالخدمه ..

كملنا البيت فرشوا طلع بالباكيت .. وخلصنا الكليجه وضمينا لليجينا خطار نقدملو ..

وصعدنا لغرفنا ونائل و الحجي و صراع كعدو بالاستقبال يسولفون .. فتت سبحت لو حسيت اوجاع الدنيا كلها طلعت بجسمي ..

ظهري ما اگدر احركو متت .. اريد انام من الوجع انذبحت .. دخل صراع كن سابح .. ويدحكلي ها يول ليلة عيد

- صراااع الف متر ابتعد لا تخليني الم الدنيا عليك

-احترك شيب اهلهم .. ولج عيد الله باجر .. عيدي وياي

- لا عيد ولا سعيد .. وخر اكلك .. مت مت بوياااي طلكني هيج الشغل يتعب

-ولج مريتي ولما حشدت امة محمد كلها تشتغل بمكانج وكعدت بس على الكليجه حرام عليج طكت حوصلتي ..

-اكلك روووح متتتتتت

-خايبه مريتي حني علي

-رووووح

-ولج لا بليلة عرسي معيد ولا بالعيد معيد .. عجل شوكت اعيد .. دحكيلي وكابليني ..

-كعدت والتفتتلو .. منو كالك عيد .. بس كلي منو هذا الكالك عيد

-ول كلها انطت عيد بالقران

-واني شخصني بيكم .. مره مسيحيه لا يمكم ولا كربكم .. وخررررر خليني انام .. من يصير غيد المسيح كعدني ..

-لا لا لا حدج لهين بويه الا الطائفيه انه ما اقبل بيها .. حدري لهين وكلا للطائفيه ..

... مااااا اريد .. وخرررر ..

-ولج دكلج كلا للطائفيه حدررري ..

-عوووووفني .. والله الم الناس .. يماااااااا

-هو انه يايوم ما مفضوح وياج .. عاد خل انفضح على شي يسوى .. حدرررري .

-لا اسمع اسمع .. جريت ايدو .. ابنك تحرك سكت بسا وكال :- صدك !!!

-لا جذب . بعدتو وجريت البطانيه وتلفلفت

-اااخ انه تجذبين علي . ول مرتي .. ولج كعدي عايدني يولو مو مرتي انتي

ولج مررررتي .. اهمداج يمرتي .. نامي ..

... لافه راسي واضحك واون من ظهري .. لحد ما غفيت وهو كن نام ..

فزيت عليه .. وهو نايم ويكلي ليليان مااي

-اووو صراع نعسانه .. واجر بالغطا

-يول بس ماي انشحطت .. حسيتو نايم وفاز من حلمو .. كمت اخذت كلاص ماي وانطيتو ..

شبيك حبيبي ..

-مدري حلم كضبني موتني

-شنو هو ..

-ما يصير احجي ..

-لا دكول .. ماكو شي حبيبي

-ما يصير .. شرب ماي وانطاني من احجي لازم يتحقق ...

شغل بالي .. دحجي يا صراع .. شبي عمري

-حبيبتي كن بالحلم اني وانتي ..

-اي

-شنو اي .. اني وانتي وي بعض وكلا للطائفيه وسحبني بقوه لحظنو .. صرخت عااااااا هااااي من كل عقلك صرااااع ... غشاااش .. وخررر

-دتعاااي غير راسي قفل عليج بالحرام ما اعوفج ..

-لا صراااع لاااااااا .. هههههههه

...... للصبح كعدت ب7 .. هو ما موجود .. رحت سبحت وعدلت نفسي ونزلت عايدت الحجيه وحرب وحلا وام سعد..

والولد والحجي بالجامع من الجامع يطلعون لعمومتهم يعايدون ..

شويه وخابر الحجي كال راح يجيكم نائل ياخذكم عزيمة العيد عد بيت عمهم عزام ..

لبست وتعدلت ورتبت نفسي .. واجا نائل وساعه يصيح ويتكاون وي حلا لأن ممخلصه ويكلها راح اقفل الباب عليج واخذهم واروح واشوف شلون اطلعين ..

نزلت بساع وتعدل على المرايا الفوك واحنا حركناها يلا ويلا بس نريد نسكتو .. لان صار عصبي ..

... عاد كملت العروس وطلعنا .. وصلنا هناك .. نائل كال بوجهجن جوا الاستقبال كلها زلم فوتن ..

فتنا اني و حلا والحجيه وام سعد وحرب ويانه .. ولكينه لخه صاير وووو هوسه .. حتى خليصان قائد الميدان .. مترأسه الميدان تكول بيت الخلفوها هي تستقبل بالناس ..

وكضبونا مباوس .. عيدج مبارك و ايامج سعيده .. دشوف هاي سعيده وين بيتها .. راح حلكي من المباوس شكل بي شرجي ..

صارة صلاة الظهر .. طلعو يصلون وفات صراع و وابن عمو اسليمان يسلمون على عماتهم ويعايدوهم..

انتبهلي وغمز ويكول:- حدري هينا يول و عايديني وكلا للطائفيه .. ويضحك..

- تقربت اعايدو واهمس بأذنو والله طيحت حظي بالطائفيه مالتك

-افاااا الا الطائفيه يول ما اقبل بيها ..

.... كاضب ايدي ويسلم ويضحك ويبوس منا ومنا بحجة المعايده ..

اجتو حلا طايره تعايدو شو هذا .. صاح اخ بنيتي وحظنها ويبوس بيها ويعايد .. ونزل الحرب يكلو انت ولو معايدك بس ع الواهس حدر .. وباسو ..

حلا:- يلا بابا حرك ايدك .. عيديه

-بويا .. بدينا باللغف .. اي شكد عيديتكم ..

-والله بابا خير ومدت ايدو ..

-فتح محفظتو .. كضب 25 راد يطلعها . رد وطلع 100 دولار وانطاها وباسها بخدها وهي حظنتو وتكلو الله لا يحرمني منك ..

واني وحرب انطانا كل واحد 25 ..

ما كلش اهتم للفلوس .. بس ما اعرف ليش حزت بداخلي .. مو ضجت .. بس ليش يعني

.. هو انتبه وبساع همسلي .. عروس وانطيتها خطيه تريد .. انتي باجر اخذج لبغداد وياي وشتردي بي امري .. ماشي ..

.. حسيتو ديقنعني حتى ما اضوج .. كلتلو لا حبيبي ما محتاجه فلوس اصلا وين اصرفهم شو بس كاعده بالبيت .. عادي ..

طبطب على كتفي ومشا يتوضى ويصلي .. صلو ورحت كعدت يم الحجيه .. لان هيام كالت امشي كعدي راح نصب ..

ما هلتني اشتغل وياهم تگلهم حامل وصراع خايف ع الطفل لأن هي ما قويه وظهرها خفيف خطيه .. وخلت العالم وين ما اكوم كعدي انتي مو حبلى روحي ..

ف استقريت يم عمتي .. واسم مرت عمهم تكول صراع متغير كلش مو ذاك الاول .. والثانيه تردها اي دحكتو فرحان طاير كن مرتاح ولا على بالو واحنه عبالنه مهدد ويريدون يكتلو ..

ردتهظ الحجيه :- العشك وما يعملو .. نسيتو ابوه من عشك نسى اهلو وناسو ونسى حتى عيال بيتو ولا دحكلنا ..

بس فرق وليدي تغير للاحسن ما عشك وعادى الوادم .. بالعكس ارتاحت نفسيتو وسعد عائلتو ..

اخت اخلاص كاعده ... كاعده .. نبتهم بضحكه وتهز بيدها .. صدك لو كالو الحب اعمى .. الا اشاف بيها .. جنها بگه امبلله هلكدها ..

وتضحك بوجهي .. شلون عليهن حقاره .. ما اعرف شردها .. درت وجهي منها ...

وردتها .. ما اكول غير الله يرحمج خيه وجدان شبعتي ضيم من تالي تجي الغربه تتهنى باللي تمنيتي ..

... صبو الاكل .. اني كضبت المبايل ودزيت مسج الصراع ع الفايبر دشوف عندو نت ..

طلع عندو .. رمشت . بساع انتبه للرساله شافتها ..

-ها يول جاي اتغدا...

-عوافي ..

-تردين شي

-لا بس نسوان عمك اكرهن

-هههههه معليج بيهن .. اكمل غدا واجيج ..

... انتبهت للحجيه تندسني تكلي اكلي .. كلتلها لا مو دا اراسل صراع ع الفايبر ..

اخلاص مدنكه تحط الاكل .. جرت نفس وكامت من وره خشمها ادحك وطلعت ..

كملنا غدا .. اتصل صراع .. وبعث مسج حظري روحج دنروح .. تعبان دخت ..

.. كمت غسلت بسرعه وتحظرت .. هو فات كاللها ها يمه يلا .. كالتلو عمتو .. وين خل نشرب جاي ..

صراع:- عود بالبيت يشربون عمه من 6 كاعده ارد اغفالي ساعه واطلع لجماعتي اعايد ..

الحجيه:- اخذ ليليان يمه واحنه نرد وي الحجي ..

... طلعنا اني وياه ورجعنا للبيت .. انطاني مفاتيح البيت وفتحت الباب ودخلت .. وهو يفوت بالسياره ..

ركنها بالكراج وفات . البيت هدووووء فارغ ومفروش وبارد .. دخل الصاله صاح :- بويااااي شلون راحه هاي ماكو احد ..

تقربت يمو ولفيت اديه على خصرو وادحكلو :- شيصير لو كل يوم هيج بس اني وياك بالبيت

-الا حتى الجنه ما اريدها ..

-حظنتو ..

-ان شاءالله نكمل بيتنا وننتقل .. ونخلص من كل المشاكل صدكيني ..

-دحكتلو ..كضب حنجي وبوسني .....

.... رحنا بغرفة سعد .. وبقينا .. غفيت كن ما دريت وهم نايم على بطني ورايح بسابع نومه.. للمغرب سمعتو .. يخابر بأمو ويكلها يمه نزل المغرب شو ما جيتو ؟

دكلو .. بيت عمك صالح عزمونا على عشا عدهم ورحنا نكمل ونجي .. سد الموبايل زتو وراه وتقرب خلاني على ايدو .. :- مو تروح لجماعتك ؟

-ما بيه خليني نايم تعبان..

-حطيت راسي بصدرو ورجعت اغفى .. حجه

-تدرين ؟

-شنو ..

-من اصير يمج اتذكر الله بأية (وخلقنا لكم من انفسكم ازواجا لتسكنوا اليها) .. احس روحي تهوّد وترتاح يمج .. ولا احس بشي غير براحه وسكينه لدرجة اطلك العالم واضل هينا مكابلج.. فلا اكوم ..

دحكلي ..گبل سنه ما اعرفج ولا شايفج وهسه كن انتي النفس اليصعد وينزل عندي .. سبحان الله شلون يخلق محبة ويحطها بكلوب العالم ما اعرف ..

فعلا (وجعلنا بينهم مودة ورحمه ) من يوم التم زواجي وياج .. وكلبي ما ينطيني ائذيج بشعره ..

دحكلي ... هيج الله حط محبتج بگلبي وخلاج زوجه الي رغم كل الفوارق البيناتنا .. بيئه و دين و عمر .. صدك سبحان الله ..

شايفه لما الانسان يتعب ويمر بمصايب وامتحانات وبعدين ينجح وينطو هديه .. احس الله جازاني بيج بعد.ما حملني هموم الدنيا وجرعتها ..

يعرفني ما احب المره الملعبه وتتحايل .. شكوكي واشك بأضافري ... وجابج علي ما تعرفين روحج من خيالج ..اعشكج واعشك كلشي يجي منج خير وشر

.. ابتسمت .. بستو ورجعت دفنت راسي بحظنو وغفيت ...

... شكد احس اني بأمان من اصير يمو .. اغفى واكوم ما احس بكلشي وادخل بنوم عميق .. حتى لو متغير المكان .. مجرد ما هو موجود.. اغفى وما ادري ..

احس ان هو موجود ما يحتاج اشغل بالي بشيء .. يا خوفي يجي اليوم اللي انام وما الكاه وائمن روحي ..

كثيغ يمر على بالي هذا الموقف بسبب التهديدات اللي عليه .. اتخيل واضل ابجي وبعدها ادعي الرب يحفظو ..

......نايمين وحسيت الباب تريد تنفتح .. هو رفع راسو .. صاح منو ..

نائل:- ها العفو ما عبالي احد بالغرفه ..

صراع:- كعدي يولي خل اكوم امشي .. عيب فشله منا اهلي ..

-اي كايمه .. كمت لميت وطلعت .. الحجيه جايه و حرب يمها .. كتلها هااا .. جيتو

-اي

-عجل حلا وين

-عد خوالها بقت ..

-هااا .. صعدت للغرفه اخذت ملابس لصراع ومنشفه وحظرتلو الحمام الجوا .. ورحتلو .. مشى يسبح واني لملمت الغرفه خاف يدخل نائل ..

لثاني يوم خواتهم كلهم اجو .. بنات ام سعد هن وجهالهن . من شفتهن كرهت روحي .. اخر مره وياهن من تعاركت وياهن وغلطن عليه واخذني صراع .. بعدها ما شفتهن..

مشيت اليوم كوا وياهن .. يجزعن يسخرن وروحي وتعاي تكول مشتغلتلهم بنگالي .. وجهالهن مدرسه هاجمين البيت ..

صراع من الصبح اخذ حرب وطلع يفررو يعايدون وهم يونسو مناك ويشتريلو .

... اجا صراع بليل كال حظري غراضج باجر نطلع لبغداد انه وياج .. هم اونسج وهم اكضي الشغل العندي حتى ان شاءالله اسبوع وننتقل لبغداد..

... اني هم حظرت ملابس وشنحتاج الي والو .. كال لا تكثرين مناك اشتريلج .. اخذيلج ملبس يوم واحد..

.. ثالث يوم العيد نزلت لابسه الجبه والحجاب و جنطه صغيره بيدي و الجنطه الجبيره فوك صراع كال نزلي انه انزلها وبقى يرتب بنفسو ..

تلكتني شيماء :- وين رايحه ؟

-لبغداد اني وصراع

-وشكو

-هيج ع العيد ..

-هااا ..

دارت ومشت لغرفة امها .. رحت لغرفة الحجيه دشوف طلباتها شتحب اجيبلها مناك اذا طلعت هي وحرب ..

واسمع الحجي وي صراع يكلو:- بويه ذاك مرتو عد اهلها وانته تاخذ حرمتك وتمشي عجل ياهو الالنا ..

صراع:- حجي البنات خواتي موجودات .. وامي يمها حرب و هيام وصيتها تجيها .. حلال بناتك يجن يرتاحن وحرام على نسوانه تطلع العيد ؟

-بويه خواتك خطار .. بلله ذيج تروح لهلها بس مريتك ما عدها اهل وتروح لهم والعيد مو عيدها يخلص العيد واخذها

-يابه سالفة ما عدها اهل ما اقبلها لا تحجيها.. انه اهلها ما يحتاج تروح اهل وتطلع .. وعيدها وياي ما وي غيري ..

فتح باب الغرفه وصاح يلا ليليان .. وفات باس راسه امو ووصاها ادير بالها .. وتاخذ حذرها هي وهيام .. وطلعنا ..

اخذنا منا لبغداد .. الطريق كلو يشاقيني ويضاحكني .. وصلني الشقه .. كال اطلعين لو ترتاحين ..

-لا ارتاح تعب ظهري من كعدت السياره عادي العصر نطلع ؟

-عجل خذي راحتج انه اروح بشغله اكملها وارجعلج .. تمام ..

-تمام .. تركني رتبت الشقه ومسحت وتحممت .. ورجعت تمددت .. توني غفيت .. جا هو جابلي غدا .. صاج كص لحم وفنگر و بيبسي ..

رتبتهم بصينيه ورحت هو كاعد بالكاع وامدد رجلي .. جنت لابسه ثوب ربع ردن والطول وي الركبه .. لون اسود وبيه قلوب حمر من يم الصدر مخصر ومن جو ذاب روحو ..

.. هو كصني بنظره من فوك لجوه .. واخذ الصينيه من ايدي ويكول :- من اروح فدوه لهطول هاذ ..

دحكتلو اضحك .. جان يقشمرني :- مو عليج بويا انه هاي ام السان حنان الفتلاوي ..

اندرت .. حنونه ترعد بالتلفزيون .. هزيت راسي .. وكعدت .. تشبهني بيها مو ؟

-لا ياب تروحلج فدوه بس تشتركن بصفه

-اللي هي ؟

-تحجن هواي وحجي بلا معنى بس دوخه .. حجاها ومد ايدو يضحك عود ما مهتم

-عجل من يجي الليل خل المعنى يفيدك ..

-لا يول بليل شنو .. انه اريد الحجي هسه ..

-لا هسه ولا طسه ابد ..

-شو كومي ..

.. وانطاني ايدو وكعدني على رجليه وهو امدد

-وشنو الفائده من هيج اريد اكل جوعانه

-منو كاضبج .. اكلي بس خليج يمي تضايقني المسافات اللي تصير بيناتنا ..

بقيت اكل من الصاج واخلي ياكل وراي وهو متمتع ع الاخير نسى نفسو وعمو ومرتاح يضحك ..

الى ان اخذ الاكل من ايدي .. حطو بالصينيه بعدها ليغاد .. واخذني الو ..

.. ب 5 كمت رتبت نفسي ومكيجت .. وهو متمدد ع السرير .. ويدحك بيه ..

صراع :- شرايج ما نطلع ونضل هينا وي بعض

-اوو صراع شنو نلحك نضل مع بعض بس اريد اتونس شويه ..

-ضحك وكام من السرير وتقرب باس راسه ويدحكلي بالمرايا .. بس مكياج ما اريد ..

-بس شويه والله ما احط جثير

-اذا بس هيج تمام .. اما الحمره متخلين

-ماشي .. دحكت وجهي كانو مصاص دماء بلا حمره .. يلا من اطلع احطها .

فتحت الجنطه ابدل .. اني جايبه فستان وجايبه بنطرون وقميص .. لبست البنطرون والقميص وكمت اجرجر بالقميص حيل واعرضو وانزل بي بلكت يقبل اطلع بلا جبه ..

طلعت .. هو كاعد يگلب بالاخبار .. صراااع

-هااا

-شرايك بلبسي ؟

-يخبل

- لا يعني ينطلع بي لو لا ؟

-انه كتلج يخبل يعني ما ينطلع بي

-ليش محتشم والله بس دخك فدوه حتى البنطرون ما كلش مبين ..

-وهيج اطلعين .. ؟

-وشبيها

-لبسي الجبه حبيبتي

-ليش ما بي شي

-سؤال شنو الفرق هلبس عن الجبه ؟

-ماكو فرق بس هذا احلى

-وذاك استر .. لبسي الاستر بويه وستري نفسج ..

-صراع ما هيج.....

-الامر ما يتناقش ليليان نفذي ..

-ضجت .. عجل روح ما رايد اطلع ..

-براحتج

-نرفزني اكثر بهلكلمه .. اندرتلو .. ما دحكلي .. بدلت وكعدت .. فات هو سبح ولبس وتأنق واني احس الروحه راح تروح عليه و ما حابه اطلع بالجبه ..

كمل .. اندارلي :- ها ام الفواين اطلعين لو لا ؟

-ما رديت .. ولا اندرتلو

-اخر چنص .. اذا ما رديتي تطلع .. اطلعين ؟

-امت اناني وكت اللي تريد تحطني على رجلك وانتي عمري وانتي حياتي .. ومن تخلص غايتك تمشي البراسك ..

مشى خطوات واجه تمدد يمي .. راد يبوسني .. ابتعدت . راد يكضب وجهي ..

-ما اسويلج شي بس حدري احجي وياج

-وخررر مكياجي لا يخرب ابتعد

-يولي هي مال دروب انتي حاطه الروحه ابالج وخايفه حتى على مكياجج بس خلي ابالج .. ما تمشيني ولا تعتقدين بزعجل تكسريني وتفرضين علي ..

احبج واحترمج وكلت شابه ومن حقها وسمحتلج بالمكياج رغم ما اقبل بي .. نفس الشغله احترميني وكولي رجلي ما يحب البس هيج لبس .. البس اليعجبو ونمشي حياتنا ..

تمام ..

-وشنو الفرق

-ما اقبل بويه .. هلطول مخلوق بس لعيوني .. تلبسين شيء يجذب عيون غيري ما اقبل ..

-دحكتلو

-دكومي يا بويه خل اطلعج اونسج شوفي الدنيا هي توكف ع اللبس .. دكومي اتهيريلي بساع ..

-بقيت حايره اكوم لو لا .. كضبني من خشمي ويجر بي :- اي اي كوووومي ام خشم اليابس تنازلي وكومي ..

-اييييييي اكووم اكوووم بس وخر خربت مكياجي ..

-ديلا ام الطحين ..

-هاي منو

-على حنان الفتلاوي يابه ما عليج بس فضيها رحمه لمحمد ..

... ركضت بدلت ولبست بسرعه وهو يمي يرش عطر .. عقجت وجهي .. لعبت نفسي ..

هوو ع الواهس يدحكلي ويعقج بوجهو يقلد عليه .. ليش حطيت حطر

-نسيت والله هاج اخذي علج .. هسه ترتاحين..

-سحبت علج من عندو .. تعلج عيني ابو العلوج

-لا بس يوميه اشتري ابو الربع اعلج بعد الاكل و النوم حتى ريحة حلكي تصير طيبه .. شوي وازتو

-اخذت .. صدك استقرت معدتي .. وطلعنا .. اهذني اول شي مول يجنن .. بقت عيني شايهه ادحك ..

وهو حاط ايدو بأيدو ويمشي .. صعدني لطابق خاص بشغلات نسائيه .. ملابس نوم مكياج حجابات واشكال الوان ..

دخلت محل افتر دك موبايلو ..

:- دحكي شنو يعجبج اختاري لبين ما ارد وارجع

-بقيت اقتر وادور .. جانو واكفات اثنين بنات يبيعون بالمحل ويرتبون .. وكفن بصف بحض ويحجن ..

وتكولها :- باوعي شوفي هذا ..

.. دحكت عليمن يحجن .. لكيت المجنون مالي واكف برا المحل ويخابر ويصيح عجل يابه نريد نشوفك . وصوتوو عود منصي .. بس صروع سماعتو عطلانه

وهاي تردلها :- هذا من جماعة عجل يابه انتي بس باوع الايفون الساعه الذهبيه وج عيني تلكينه طاك

-دروحي طبقي بلكت يطگكنا وياه ..

.... اني تقربت يمهم وكلتلهم العفو دتحجون على ذاك الرجال

اندارلي اثنينهن :- وانتي شكو

-يا ما تستحن ذاك رجلي .. والله لو بنات اصل متسون هيج بس انتن بلا اخلاق ..

بس حجيت اجه ابو المحل :- العفو اكو شي ..

-لا ماكو بس من تختار عاملات اختارهن محترمات مو عيونهن زايغه ويردن واحد يطبقنه ويطككهن ..

اجه صراع شافني احجي وي الولد عقد حواجبو :- شديصير

-ماكو شي تركتو .. وطلعت هن يحجن و الولد تعذر من صراع وصراع تعذر منو ..

واجاني :- يولو من كل عقلج انتي

-وشتريد اسمعهن يتغزلن بيك واسكت ؟

-ضحك .. وانتي ليش تفضحين نفسج .. خليهن يولن

-والله عاد ما كدرت اسكت وطلعت باللي كدرت عليه

-ههههههه بويه من الغيره بويه ..

سحب ايدي ونزلنا من هذا الطابق .. وبقينا نفتر واشتريت اللي يعجبني واخذت لحلا و الحجيه وحرب وحتى ام سعد كال صراع اخذيلها وبيضي الگلوب .. ما گلت لا ..

بعدها اخذني لأبو نؤاس .. حدايق تجنن وعوائل كوومه واطفال يلعبون ويركضون ومجموعات ادك وتركص ..

ادحك البنات اشكال الوان اللبس لابسات .. شنو المكياج التسريحات .. يصفنن .. اتعجب بصراع كل ذول ما يلفتون نظرو ويدحكلهم وصافن بيه واني وياهم يمكن اطلع مهربه باكستانيه ..

بس يلا .. هم الرياجيل اشكال الوان واني غيني متشوف غيرو .. يمكن هو هم هيج .. كلمن يرضى بخبزتو .

شفت ابو الشعر بنات يشتغل بالاله والحلاوه تلف بلا ما ادري وكفت ادحك شلون ينجمع الشعر بنات ع العوده ..

خلصها وكطعها .. انطاه صراع الف واخذها .. ضحكت .. هاي اليه

اخذتها فرحانه يمكن الغراض والشغلات اللي بالمول كلها ما فرحت بيها بكد ما فرحت لما اشتريت الشعر بنات ..

وداني كعدني ع النهر وبقيت اكل بيها .. بس شو هاي هواي اكل بيها وبعدها .. :-اكلك شو هاي متخلص انحمست حمس من الحلا وبعدها وين اوديها

:- شمريها ..

- بقيت ادور باكتاري وين اشمر .. اشرلي على لافته مكتوب عليها (حافظ على نظافة بغداد) وجواها حاويه ..

رحت طريتها بالحاويه ورجعت لكيتو رايح مشتريلي بطل ماي .. شربت .. وبقينه كاعدين نسولف اني وياه

انوب رجعنا نمشي بالحدائق ونفتر .. كعدني على مرجوحه منفرده هو واكف واني اتمرجح وهو يشاقيني ويكلي انتي راح تصيرين ام ما اصدك ..

انوب اجه ورايا كاضب السلسله ويسولف ..

- ما شفت الراحه بصغري ومن كبرت .. كمت ادور عليها بكل مكان .. اشكال سويت و وعملت وما ارتاحيت ..

كلت استقر واتزوج .. ارتاح .. وهم ما ارتاحيت .. كمت اعوفها واسافر في سبيل ارتاح وما شفت الراحه .. كلت الزواج ما بي راحه .. وعزفت عن الزواج وما ردت مره من ماتت ..وهم ما ارتاحيت ..

لحد يومي هذا يلا ادركت ان الراحه هي انسان تشوف الدنيا بعيونو .. انسان من تشوفو تبطل تفكر بغير شي .. ويبقى كلبك يدك يدك ميعرف شيسوي تضمو تحظنو لو بودك تاكلو للي تحبو وتخلي بداخلك وتصيح هذا اليه ..

هذا شعوري وياج .. هسه انه ارتاحيت .وششفت الراحه

.... يحجي واني كأنو يغنيلي .. اتمرجح واضحك ..

بقينا نفتر لحد ما حس ان الحديقه صارت بيها ناس مو زينه بليل كال يلا .. بعد مو زين نبقى خل نرجع

-اساسا اني هم تعبت ..

صعدني بالسياره وما رجعني وداني مطعم تعشينا وطلعنا نفتر بمنطقة المنصور وليل والهوى طيب ويأشر ويعلمني ع الاماكن ..

لحد ما تعبت وهو يفتر بالسياره ل12 بليل .. غفيت .. ما دريت من رجعنا للشقه غير وهو يندهني ويكولي ..

- كملي نومتج فوك عمري يلا وصلنا بس اركن السياره ..

-اخذت المفاتيح وصعدت .. فتحت نزعت الجبه والحذاء وشمرت نفسي ع السرير وكملت نومتي ما دريت

.. كعدت بليييل هو نايم .. دحكت مدخل الغراض اللي اشتريناها ومطفي الضوا وبس التلفزيون منصى وهو غافي وبيدو الريموت ..

اخذت الريموت منو غطيت وبستو من خدو .. وتنهد واني ادحكلو .. شهرين تم على زواجنا .. عمري كلو مشفت دلال مثل الدللال الشفتو بهلشهرين منو ..

جنت من اغلط لو اجفص ما يرحم .. احس تغير وياي ولا كأنو ذاك الجنت اعملها تحتي لو صرخ ..

صرت ائمنلو وما اشوف من الدنيا غيرو على الدلال الشفتو منو .. لا امي ولا ابوي دللوني بكدو ومثل اهتمامو ..

يحس .. يتنازل يتشاقى يضحك .. والاهم يتلافى ويعدي كل الاخطاء بس حتى نكون مع بعض ومنتزاعل

لو مهما تمر بيها مواقف . هلرجال اعشقو ..

.... ثاني يوم العصر .. اخذني للدكتوره بالكراده هم واصفينها الو على ان هي مضبوطه ..

اخذني وحجزلي وكعدنا .. شاف المكان كثرت بيه النسوان طلع وكف برا ..

ادحكلو .. سحب باكيت الجكاير وقدم لرجال واكف يمو .. وجرلو الجكاره .. وكام يدخن ويسولف .. احس شحلاة طولو واني اشوفو ..

بودي اصرخ واكولهم يا عالم هذا مالتي لوحدي بس اليه واغار عليه من الهوى ..

اجه دوري .. ودخلت .. نمت ع السرير وتقربت الدكتوره تفر بالجهاز على بطني ..

-اول طفل .. تحجي وادحك بالشاشه

-اي

-صارلج شكد متزوجه

-سنه

-هااا ..

-تدرين ابطنج توم ؟

-لا ... بيا توم ؟

-اي شهرين اعمارهم وصحتهم الحمدلله بخير بس كلمعتاد الافضل تقللين حركه درج .. لسلامتهم ..

-تمام . انطتني كلينكس وگمت .. كتبت التقرير وطلعتو من الطابعه كبستو وانطتنياه .

طلعت فرحانه طايره من الفرحه .. والدمعه بعيوني .. ادحكلو واضحك ..

:- ها يول تضحكين وعيونج تلمع شكالتلج الدكتوره

-بيا توم

-بصلاة محمد عليج صدك ! دكولي والقران

-اي والله بيا توم ..

حظني بالعمار .. اللهم صل على محمد اويلي يابه .. فدواتك ربي الحمدلله و الشكر ..

بعدها ابتعد وحس على نفسو .. والعيون مدمعه من الفرحه ويحمد بالله ويكولي ولج صدك ..

اخذني طاير ميعرف شيسوي من الفرحه .. خابر الحجيه وبشرها وخابر الحجي .. وكل شويه يبوس بأيدي وهو يسوق ..

ويييي اخر اهتمام واخر دلال .. شتحبين وشتشتهين ام مسلم ..

لثالث يوم من الصبح رجعنا للرمادي .. والفرحه ما سايعتنا ... ورحت للحجيه طايره اسولفلها ومندمجه احجي احجي احجي ..

وهي تكلي اي يمه الله يسعدكم بس صعدي .. ولج اخذي الغراض وامشي .. اخر شي زكحت بيا .. كاااافي ..

صفنت بوجها ليش !!

-وين المايحبج بالبيت كن اخلاص لام سعد لبناتها لنور والبارحه الحجي طالع نازل يتحمد لان صراع عندو توم ..

والله اخاف عليكم من العيون تكتلكم صعدي كافي لا تحجين اي شي بنيتي الله يسعدكم ..

... صفنت .. شنو حتى بالفرح ممنوع هينا لازم بالسكته .. شلت الغراض وزعت اللي جايبتو وحتى اخلاص انطيتها من غراضي عيب بس هي تصفن

.. وصعدت ..بس شو انتبهت حتى محد باركلي ع التوم ؟ يلا هو واحد توم عادي ..

بقيت ايام .. ونفسيتي مرتاحه .. وصراع موصي عليه البيت محد يثكل عليه لأن توم ويحتاجلهم راحه .. وحتى الحجي خابصهم بيا ..

الى ما بعد 5 ايام من السفره .. نايمه وصراع يمي

.... فزيت الفجر.. الم ابطني واحس شي عليه .. دحكت الغرفه ظلمه والصبح يادوبو طالع ضواه شمس ماكو ..

ردت افتح التيبلام حتى اشوف نفسي .. مفتح الضوا .. صراع نايم على بطنو وايدو جوا المخدا وغاط بنومو .. استندت عليه وتلمست الميز يمو واخذت الموبايل ...

تحرك هو ويمط بنفسو :- ها حياتي شتردين .. حجاها وهو غافي ..

-ما اعرف بطني توجعني واحس ... دا احجي شغلت اللايت واشوف بمكاني دم .. هو فتح عيونو منزعج من ضوا اللايت .. دحك الدم طفر من مكانو ..

:- شنو هذا شصاير بيج يولو

-ما اعرف شو دا انزف .. لييش

-بدلي ع السررريع خل اخذج مستشفى .. يول دتسقطين

-كمت ابجي بمكاني .. وخايفه يعني شنو راح اسقط .. واشيل بالبطانيه وادحك فراشي

- يابه لا تبجين وتهيري بساااع .. يلااااااا.....يتبع

☆☆☆☆☆☆

عزفت على الحان المشاعر واطربتكم .. ضحكتو وفرحتو وياهم .. اكيد .. لهنا وخلينا نكول ستوب وندخل بالجد

من سلسلة ضحايا داعش برواية المراهقة و الاربعيني .. غدا اول ضحيه تسقط..

برأيكم منو أول ضحيه ؟

#زينب_ماجد

#مراهقة_و_الأربعيني

،،،،،،،،، بقلم زينب ماجد ،،،،،،،،،،

الحلقة_51

-لا تبجين يابه بس بدلي بسااااع يلا .. چك دشداشتو وسحب الجنطه السودا من فوك وكام يسحب فلوس ..

اني رحت للحمام تنظفت و لبست ثوب واجيت لبست جبه وشمرت الحجاب .. احس ظهري راح يطك من الالم ..

كضبتي خصري وابجي من الالم .. اجا يمي وكضب ايدي ..

:-شدتحسي

-دا انوجع حيل .. احجي والدموع تنزل بحراره على خدي من الوجع .. مشاني وصلني الدرج .. شالني ونزل يركض الدرج ..

كعدني ع التخم : بس انطي خبر لامي ..

تركني وراح للحجيه طلعت بساع وعلى صوتها طلع الحجي وام سعد وحرب كعد ..

يستفسرن ويسألن واني ما افهم غير الوجع .. اخذني صراع وخلاني بالسياره وكاللها

-يمه اتصل بهيام ما ترد خابريها خلي نائل يجيبها وراي..

-اخذني بالسياره وهو يكلي .. صبري بويه والله راح نصل .. واني ابجي ما ادري يمكن الوجع خف بس من الخوف ابجي ..

حيل فرحت من حبلت وخاصه من عرفت توم .. ليش يموتون اريدهم ..

صف السياره اباب المشتشفى وكال كعدي هينا بس اركن السياره ..

.. بقيت انتظرو وابجي .. دقايق واجه .. فوتني للمستشفى .. گص باص ومشاني ..

سأل ابو الاستعلامات ودلاه .. مشينا .. وصلني صالة الولادة .. كالو تدخل وحدها ممنوع احد وياها ..

اني وين ادبرها وحدي .. اندرتلو ادحك والعيون دموع عشره عشره .. لا تعوفني

-ولج ما يقبلون والله فوتي ماكو شي ..

-لا ما افوت .. انتظر هيام

-ول يابه شتنتظرين يولو دفوتي

-كاضبه بردن دشداشتو وابجي وارجف اخاف ادخل وحدي

-ول يلفاهيه .. كضب الموبايل وخابر هيام ويكلها شسوي ما تفوت .. استعجلي بعد اخوج هاي كلشي ما ادبر ..

مرت دكتوره لابسه صدريه بيضه .. كالت :- اخويه بلا زحمه ميصير توكف هنا .. هذة صالة ولاده وجوه نسوان تولد تصرخ ممنوع الرجال يوكف ..

-خويه فدوه بس شوفيها .. حبلى بتوم وجاي تنزف ..

-تعاي امشي وياي

-ول امشي وياها بويه بس لا تخافين امشييي .. اندارلها ويكلها شتردين بعين بالقران انطي بس داريها واخذي بيدج لا تهديها ما تعرف شي صغيره ..

-قابل راح ناكلج يا امي فوووتي .. اخذتني ومشت وهو ضل بره .. احس كلبي تركتو بره الخوف ذبحني ارجف مدري ليش وابجي ..

مشتني للاستشاريه .. دكتورات كاعدات .. اخذتني وحده .. وبقت تسأل شكد عليجواخر موعد لشهريتج و سونارج وين و اخر مقاربه وووو اسئله كوه اعرف اجاوب عليهن احس الساني ذاك اختفى ما كن يطلع

-امشي افحصج دا اشوف

-بقيت مصفصفه بوجهه وابجي .. اني انذبح ولا فحص يمه اموووت انجن منو

صاحت بيا .. دمشي يا امي امشي .. مشتني .. للفحص النسائي .. هلكد بجيت .. متت حتى هيج ضاجت مني ..

كالت كومي عنق الرحم مغلق ماكو شي يمكن سقطتي .. اخذي سونار وتعاي حتى اذا تحتاجين كورتاج . نسويلج .

....مشيت ابجي وحالتي حاله من كالتلي يمكن سقط فد مره نفسيتي ادمرت .. طلعتلو ابجي .

-هاااا ولج كولي شكالتلج

-يمكن سقطت

-يمكن ؟؟ لو سقط

-لا تكول سوي سونار حتى نتأكد ..

-وين هذا السونار .. بقى يدحك منا منا .. سأل رجال يشتغل بالمستشفى واكف .. دلاه ..

اخذني ومشينا .. كالو السونار يفتح ب8 والساعه 7 وربع ..

كال كعدي نتاني ليما يفتح تصبرين وجع لو اروح اجيبلج مسكن ..

- لا اكعد .. كن راح الوجع .. كعدني وراح يتصل .. اسمع يكلو زوجتي بالمستشفى ما اكدر اجي

اندرت .. هيام ونائل اجو ..

هيام:- هااا ولج شكالولج

-تكول يمكن سقط .. بقيت اسولفلها ونائل راح يم صراع .. انوبه كعدو ينتظرون ..

وصراع مدنك راسو وايدو على كصتو والرجل تهز من التوتر ..

هيام:- لا تضوج خويه كول يا الله

.. هز راسو اي ..

فتح السونار اني اول وحده فتت .. فتنا اني وهيام شافت السونار كالت لا بعدهم موجودين بس نبظهم حيل ضعيف وعلى وجه الاسقاط ..

فرحت حيل .. كتلها اكو امل يعيشون ؟

-اي طبعا .. بس حسب خوفج انتي عليهم لازم تحافظين بشكل جيد ..

-شلون ؟

-اخذي تقرير السونار للاستشاريه النسائيه وهي راح تعلمج ..

انطتني السونار .. وطلعت لصراع اضحك .. هو ضايج حيل .. ونائل واكف يمو .. شافني اضحك

-يا الله بس كون زينين

هيام:- ابحمدلله ما بيهم شي بس نبضهم ضعيف ويحتاجلها راحه تامه هسه نروح للدكتوره تكتبلها علاج ونطلع

-الحمدلله رب العالمين والحمد والشكر الك ربي .. ولج ارتاحي يول والله ما اريد شي بس ثبتيهم ابطنج لا كل شوي تراكضين ع الدرج .. ما يصير

-لا ماكو درج منا وغاد .. ترجع بنوت مثل قبل تنام يم الحجيه لا غرفتها ولا اي شي بس تنام .. ماشي ليونه ؟

-هزيت راسي .. هذا الحجي نحجي واحنه نمشي .. وصراع يكول لا تمشين حيل ما طاير بهداي ..

اخذت السونار ورجعت لصالة الولاده .. منعو هيام تفوت كالت... فوتي لتخافين بعد ماكو فحص بس تقرا السونار وتكتبلج علاج ونروح فوتي ..

عاد مشيت ما خفت ..

كتبتلي ابر مثبتات وحبوب وفولكسد وكومة علاج .. وكالت ممنوع الحركه الا للضروره .. تنامين ومخاد جوه رجلج .. ومنعت الدرج و الجماع ..

طلعت الهم .. وكتلهم هاهيه دكول الدكتوره بس ارتاحي وكتبتلي هذا العلاج .. صراع فرح حيل ..

ورجعنا للبيت .. دخلت الغرفة الحجيه وكلها تصيح هااا شو اجيتو بسرعه ..

كلنالهم زينين .. الحجيه فرحت حيل هي والحجي ويصلون ع النبي ويتحمدون

صراع:- ام علي بعد اخوج نزليلها فراش هينا . ويمه عينج عليها وحطيلج عودة ماسحه يمج بس تشيل راسها طكيها ورجعيها

-امرك تم ييمه .

-بقيت اباوعلو واضحك .. فرشتلي هيام ونزلت حلا :- هاي شصاير

صراع:- بويه الدنيا اطش وترش وانتي اخر العالم .. عينج عليها يابه لبين ما يثبت الحمل اخوانج البطنها تراهم ..

حلا:- هو شصاير

-تركها وطلع .. وهيام بقت تحجيلها وتوصي بيها عليه .. راح جاب صراع 3 دجاجات ذبحهن وكاللهم جريان دم لله .. طبخوهن واكلوهن بس امبادهن اشووهن الليليان خل تعوض ..

وصعد فوك نام .. واني هم غفيت بغرفة الحجيه .. بس كأن تعودت بغرفتي فوك هدوووء ما احس انام ولا ادري ..

هينا كلساع افز والباب يا طاب يا طيب .. حسيت بأول نعمه فقدتها وهي غرفتي .. جنه واني ما ادري ..

غير التوم مال نور يبوه من يبجون سوا يكرهوني بالعالم .. ابقى اجيب بالمخده واحطها فوك راسي

.. لورا الغدا يلا هدو وكدرت انام براحه .. شوي وحسيت احد كاعد يم راسي .. طلع صراع

دحكت محد موجود بس هو .. دحست روحي بحظنو .. ضحك هو .. وباس راس ولمني الو

:- ان شاءالله ما متوجعه ؟

-لا زين

-العلاج جبتو الج اخذي وابر حاجي هيام عليهن ونبهي الموبايل على موعد العلاج مو تنسين .. انه وصيت امي ..

-خايف عليه لو ع التوم ..

-انتي من ضلعي وهم من روحي واحسبي على منو اخاف ؟

-اممم .. وضميت راسي .. دحكتو جاي يلعب .. شنو هم انت كمت تلعب كلان .

-غير من وره حرب فاتح القريه مالتو بمبايلي وكل ساع يجيني اشعار هجمو وانهجمو وافوت عليها لحد ما اخذني الواهس بيها ..

-اني عندي المزرعه السعيده تقريبا تشبهه

-شلون تشبهه بيها حرب وهجوم ؟

-لا يعني ما اعرف شلون ..

-بيه كلان ؟

-يعني شنو

-كروب وناس تحجي ؟

-اجيت اكول اي واجفصها .. لا ما داخله .. اعرفو ما يقبل كروب وبي ولد .. بس شسوي اني داخله اطلب مساعدات بس صروع ميمشي عندو هلحجي .. فسكتت وهو سكت وبقى ع الموبايل ..

-انطرحي بويه دشوف لا تكعدي ..

-بس جوعانه

-محد جابلج اكل

-لا جابت هيام ومشتهيت .

-سالفة ما اشتهيت بطليها ليليان ابطنج توم اذا ما هم نقصهم شي واتأذو انتي تتأذين جبري روحج واكلي حتى لو نص كرصه

-ليش هو الأنسان الطبيعي شكد ياكل ؟

-يعني غير گرصتين 3 ..

-لا حبيبي هذا الأنسان المفجوع مو الطبيعي

-طاح حظج اي والله .. يعني انه مفجوع

-ههههه شگلك بس غير الصدك هي هاي الحقيقه

-لا اله الا الله .. ولج يوم مسويتني بعير يوم مطي يوم حيوان يوم مفجوع .. ااااااالله اكبر انه شلون وي جفصاتج .. ياهي منهن اتحملها ؟

-هههههههههه

... گام مني وكال انطرحي اروح ابعثلج وحده تسويلج اكل ..

.. شويه واجت حلا جابتلي المعلاك .. اكلت شويه منو .. وضميتو لحرب يحبو خطيه دوم من اكل يسوي لفه ..

.... بقيت نايمه بس ع الموبايل گومتي فقط للحمام ..

لليل كن فرش حرب الو والحجيه تمددت على تختها .. :- اكلج يوم عجل صراع وينو

-بغرفتو فوك نايم عجل وين

- ما ينام هينا

-عيفي الرجال بحالو وانطمري .. يجي يمج شيسوي .. ناااامي

-بقيت صافنه .. شنو هاي هو فوك واني جوه .. تعودت عليه .. جاي احجي وي روحي .. راسلني ع الفايبر

-يولو الغرفه تبچّي بلياچ

-كتبتلو واني هم جاي ابجيييييي

-الحجيه نامت ؟

-لا بعدهي

-من تنام هي وحرب انطيني خبر ..

-تمام .. بقيت اسولف وياه ع الفايبر ونحجي .. بنص الكلام كتلو نامو .

-جيت

.... دحكت روحي لابسه كلابيه و الشعر كبايه .. عاد نزلت شعري بساع وكمت امشط بي بيدي ...

فات .. فتح البطانيه وتمدد ومدلي ايدو .. نمت ... اي هيج تمام اگدر انام .. غفيت براحه .. وبس صوت المبردة تشتغل .. طرطرطر ادوخ بس تنوم ..

.. بقيت يومين على هذه الحاله .. بس نايمه هو راح التحق 3 ايام ما شفتو بس مخابرات ..

... كعدت الصبح على صوت هوسه .. ورجلين تتراكض .. كمت كلت شكو ..

دحكت نائل و سعد شايلين الحجي للمستشفى .. السكر معلك عندو والضغط ما ينزل .. ويصيح ولكم يابه لحكو ابوكم راح امووووت ..

شالو وانخبصو بي .. للظهر جا صراع .. گالتلو امو .. طلع بسرعه لحگهم بلا ما يكعد يتغدى لو يرتاح .

للمغرب جابو الحجي بس كلش تعبان . ما عرفنا شبي غير ضغط وسكر يكولون ..

نومو بغرفتو واني هم طلعت اطمش عليهم .. صراع يگلو حجي ماخذ شي اعترف .. يگلهم بويه بس علاجي ما خذتو البارحه و تعبت .. وكام يون

كسر خاطري خطيه ..

نومو وغطو على تختو وطفو الضوا .. دحكلي صراع وصاح

:- يولو انتي مو ممنوعه من الحركه شكو تتمشين ..

-لا جيت اطمش

-خلصنا .. فاركي لفراشج بساع ..

-تمام .. اندرت اريد اطلع .. لفت انتباهي حبايه زركه جبيره بالباب ..

اخذتها وگمت العب بيها بيدي .. وكعدت اطمش ع التلفزيون وهي بيدي فات صراع ومد السجاده يمي عيصلي

واني الحبايه اشمر للهوى وارجعه الايدي .. دحك :- شنو هذي بيدج يولو

-حبايه

-يزتيها يول ما زينه عليج بيها جراثيم ..

واخذها مني .. شو هذا دحكلها وعقد حواجبو .. وكام يگلب بيها .. :-وين لكيتيها هاي ؟

- بالگاع

فات نائل .. صاحلو صراع :- ناااااائل حدر بعد اخوك ..

تقرب يمو كلش ويكلو هاي حبة فياگره مووو ؟ لو انه غلطان ؟!!

-اي هاي فياگره ليش .. ويبتسم ..

-ابتسم صراع وكالو :- الك ؟

-لا يا خوي شسالفه هههههه شسوي بيها

-عجل عرفت الحجي شبي .. اااخ يابه ولا يكعد راحه

.... اني بقيت افكر عود شنو هي هاي الحبايه الجنت العب بيها وشنو فياگرا

.. وكف صراع يصلي واني على موبايلي .. وكعد ع التخت يسولف ويايه ..

صاحو لصراع على عشا .. كتلو الله عليك خل اكوم اتعشى وياكم مليت وحدي هينا منعزله و نايمه جني وحده بيها جدري

-كومي بس بهداوه امشي وكعدي يمي لا تتحركين

-ماشي .. كمت .. اخذني يمو و كعدني خلت نور الجاي بصفي وكالت ليليان بس صبي

.. الصينيه ملتمين عليها نائل و الصراع و الحجيه وحرب واني ونور وعلي كال ما اريد كاعد ع التخم وراي ..

والحجي طلع ويكلهم :- انه جوعان من الصبح وليهسه متوليني بالمغذي ما يلزم گلبي اريد لگمه..

ومددو نائل ع التخم كدامنا واحطتلو نور اكل .. اني دحكتو تذكرت الحبايه .. اندرت لصراع ..

:- صدك صراع سؤالى

-كولي يابه .. حجاها وهو يمد ايدو للأكل

-عود شنو فياگراا ..

-اندارلي مبتسم اكلي حبيبتي .. واشوف نائل مختنك يريد يضحك وحاير يلوك اللگمه

-لا صدك عود شنو هي .. كفخني علي من وراي

علي:- غير تسكت ميرندا ..

-انجب انته معليك عيطه .. اني جاي احجي وي رجلي

صراع:- والله صخمتي راس رجلج يا بويه سكتي

الحجيه:- خايبه سكتي

-يمه شنو شبيكم عليه هي حبة انطيتها الصراع وردت اعرف شنو هاي ..

نائل غص ودارو وجهو ويكح والجاي من خشمو يطلع وصراع مختنك يريد يطلع الكلمه ويحجي وياي ويضحك ..

:- ول يابه لا يروح بالكم هههههههههههههه لكتها بالكاع وحطتها بيدي ما انطتها الي هههههههههههه

ادحكلهم يضحكووون .. صدك خرت شنو هاي الحبايه الداخو بيها .. :- لا حبيبي مو الك يمكن مالت الحجي مووو ؟

شو هذا نائل انفجر من الضحك وراح للمغسله يزوع و صراع بعد الاكل من كدامو ويضحك ونور صارت بنزرقيه من الضحك وعلي متمدد وراي ..

بس اني اطرش بالزفه واطمش عليه .. عود شبيهم ؟

الحجيه :- ولج هذا مقوي جنسي

-عود شنو يعني ؟

- خايبه امداج يلفاهيه ولج معناها ***********

-ياااااااا كمت بسرعه .. هاي شلون تحجي هيج عزززززا كدامهم وهاي هيج معناها .. امدايه امدايه .. والله غبيه اني ..

.. تمددت بفراشي بعد ما طلعت وهم يضحكون ونائل يصيح :- ول ام چفصه ياب ما كعدتلها يوم الا و طرتلها سالفه بكبر راسها ..

وعلي العيطه يكلو هاي بقره بس حطلها تراجي وسرحها وي الهوايش .. تصير البقره السعيده

يمي گلاص بلاستك طريتو ع الباب وصحت عليييييييي ... صرااااااع صيح بي ما تسمعو ..

وذاك يكلو :- خالو مجذب ؟

... سحبت الفون وتمددت .. طالعه روحي يصنفون عليه .. حسيت نفسي غبيه بينهم ..

بقيت گاعده هينا .. شوي واجت الحجيه مسويتلي لفه .. وصاحت على نور تجيبلي الجاي حتى اكل واخذ علاجي ..

كعدن كلهن يمي لأن الولد كاعدين يم الحجي متمدد واستلموها حجي ع السياسه لو على الدوري الاسباني وحجيهم مصايح من يردون يحجون يدوخون الراس اليسمعهم يكول مكاون بس عدهم لا هذا نقاش عادي بيناتهم

.. نور فتحت سالفه وي ام سعد كالتلها اشك بروحي حامل

ام سعد :- صدك والله ؟ خايبه هيج ويصير عد نايل ولد ال اطشلو جكليت

نور:- والله شهريتي تأخرت صار شهر و 5 ايام ماكو ..

-من عين باجر اطلع الصبح واجيبلج من هاذ مال الحبالى ..

الحجيه:- ان شاءالله ييمه يستاهل نايل يفرح ابو گلب الطيب هاذ

ليليان - ويييي ونترس هلبيت جهال الا يهجون من عدنا

بساع صاحن ام سعد والحجيه :- تف عوذا من السانج يوللي .. صمي هلسان

-ول دادا شحجيت .. كلما احجي مسكتيني ليييش ..

الحجيه:- من كون حجيج ييمه ما بي خير .. كولي الله يزيدهم عين البارده عليهم بساع ويييي وهججتينا ..

-اصلا راح اسكت ما احجي بعد ... صدك ضجت بس شنو كل حجايه مفشليني واني والله ما الي قصد .. يحسسوني انو اني ثوله ..

غفو جهال نور .. كالت اصعد انومهم .. وام سعد كالت انه اكوم ادحك الحجي واكعد يمو .. والحجيه غفت .. وبس حرب ع الكارتون ..

فات علي كتلو :- انت ليش ما تروح لامك

-كاعد ابيتج ؟

-عندك بسامير للمزرعه ؟

-حيل صار شهر ما فايتلها كلو على الكلان احلى

-ما تحبها كلها هجوم ومكاون هاي طبخ و حيوانات حلوه ..

-مو اكلج بقره . مكانج بالمزرعه

-دكل وحل وانطيني ..

-باعلي وفتح وياي سيره على حنين بنت سعد

-ول صار كومه ما شايفها ولا حاجي وياها ..

-ما عدها موبايل

-لا بس من جدتها تراسلني وبعدها اختفت وحيل خايف عليها ..

-هي عود ليش ما تجي هينا

-محمد ما يخليها يمكن شاك بينا .. وهي اساسا عايشه وي خ الها تجيهم يومين بالاسبوع .. بعد شوكت اشوفها ؟

-هسه اللي تريدو شنو ؟

-يعني بما انو اني واعوذ بالله من كلمة اني بعتلج 10 بسامير تثبيت بدينار واحد ..

-اوووووو بدت المعاير

-عجل شلون دحكي هينا تره ماكو شي ابلاش ..

-هسه المطلوب شنو ؟؟؟

- تخابريها من موبايل الحجيه

-اي

-وتكليلها انه حلا

-وليش ما تكول لحلا

-ما اريدها وجهه الطركه ..

-تكع براسي علي اذا نكرتها حلا

-ومنو راح يشك بيج .. وشنو مصلحتج وي حنين وشعندج .. لتخافين محد يشك .. نكريها وبس

-شرط تنطيني 100 مسمار عريض

-دروحي هو لو عندي تلكيني يمج ..

-ههههههه .. نحجي همس .. كام على كيفو سحب الموبايل من موبايل جدتو .. وخابر على جدة حنين ..

وانطانياه .. خابرت وحجيت وياها وكتلها انه حلا بت صراع اريد بت عمي حنين بس احجي وياها ..

اجت حنين لگف الموبايل وطلع .. بقيت كاعده .. دخل صراع .. :- ها ليون مشتهيه شيء ..

:- لا هسه تعشيت

-بالعافيه

على صوتو العطلانه سماعتو .. كعدت الحجيه .. وفتح وياه صراع سالفة الشيله لبغداد ويكلها يمه بعد ما ائمن . اريد اخذكم هناك .. بس شلون بليليان

الحجيه:- والله ييمه ما اعرف تتحمل طريق بغداد لا ما ادري .. لازم نخبر دكتوره ونسألها

ديحجون .. وفات علي وبيدو الموبايل ويكلي ليليان خابرت....... وانصدم بيهم كاعدين ..

اندارلو صراع ... علي تراجع بسرعه وسد الباب

-حدر خالو شتريد كول

-لا خالو ما رايد مع السلامه رايح لبيتنا .. حجاها وهو بالهول

اتفتلي صراع :- شبي علي يخابر منو ؟

- ما اعرف

-موبايلي امي بيدو ؟

-ما اعرف ... مدري شبيه الثول جاتلني صار وجهي ياخذ وينطي الوان ..

هذا ذيب ما يفوت شي .. لكفها وهي طايره .. راح للهول جاب موبايل الحجيه .. شاف رقم غريب ..

-رقم منو هاذ .. مخابرو علي صار اكثر من 20 دقيقه ؟

-ما اعرف

-اذا عرفت تعرفين شي متلومين غير نفسج .. ولو وجهج يحاجيني ويكلي اكو شي بس السانج هذا الفالتو هسه انعكد ..

دشوف منو هذا .. داس اتصال .. وخابر .. طلعتلو حنين :- ها علي هم زين بعدو الموبايل بيدي مو كتلك راح ارجعو .. شتريد

-منو انتي

-قفلتو بوجهو بسرعه .

.. دحكلي :- منو هاي ليليان

-صراع اني شعرفني شبيك ما ادري ..

-علي شاب وبعدو طايش ليليان لا تتورطين بسوالفو

... دنكت

صراع:- يا خبر اليوم بفلوس باجر بلاش .. الا ما اعرف هلسز اللي ردت منو وسدتو بوجهي ..

من حجت كالتلو ردت ارجع الموبايل .. يعني مو مبايلها ... ساعه واخابر واسأل واشوف ..

وبقى يدور بالموبايل .. واني قطرة دم مبقت بوجهي ارجف رجف ما طبيعي ..

هو دحكلي مرتبكه حيل :- نامي انتي .. وتركني وطلع

-يااا عزززا انوب عافني بنار هسه ... بقيت الوب بمكاني ..

الحجيه:- اكو شيء ليليان ؟

-اااا لا شمدريني ما اعرف

راسلت علي .. كتلو هيج وهيج ..

كالي لا تخافين انه ما خايف باجر احجي وي خالي بس انه ارتبكت وطلعت ..

-ول انت تطلع منها واني الاكع صراع لو عرف اني اسوي هيج يذبحني وصل ..

-ول يابه شسالفه مخبره داعش خو ما مخبره داعش كتلج خليها علي ..

جاي احجي .. فات صراع .. ارتبكت اكثر .. اريد اطلع واحذف المحادثه دست الهوم طلعت من كلشي اريد ارجع .. سحبو مني

فتح اخر تطبيق .. قرأ الرسايل ..

-مفتحلي مگو... ابيتي وتوفقين بين هذا وذاك وتخبرين ليليان ؟ ادور على بت اخوي ؟

-لا بس

-سسسسس ولا كلمه .. علي شنو علي طايش وتجيبي وتخلي يخابرها وهلسوالف الجايفه .

-دنكت ودموعي تجري خوف وفشله بالموقف ..

-بختج باللي ابطنج والا جان عرفت تصرفي وياج .. حط الموبايل بجيبو وطلع ..

خليت راسي ع المخده وبقيت ابجي .. الحجيه هم انفتحت رزايل عليه ..

شويه وفات علي للغرفه .. جا من بيت اهلو .. كاللها جده وين خالو

.. فات صراع

قبل لا يحجي صراع كالو علي :- خالو الغلط غلطي انه كتلها هيج وهيج سوي ليليان ما الها شغل هي بس ساعتدني ما بقصدها لا تجيب ولا تودي بس حسب الصداقه البيناتنا سوت هيج تريد تلوم لومني انه

-لك انت ليش ما تجوز من سوالفك علييييييي ... انت وياها اكسر روسكم ..

-تمون خالو انته بحسبة ابوي اذا مو انت ابوي وحكك علي .. بس هي ما الها شغل بالقران

-انت كل الهامك ليليان ما هامك صخام وجهك هذا ..

-خالو انه بمشاعري ما غلطان .. ولا جاي ابررلك ليش حبيت ومنو احب .. انه سبب مشكله بينك وبين ليليان وانه ما احب تتأذى بسببي لأن ما الها ذنب فاذا عندك لو لومني الي .

-عليييييي انتبه لسوالفك ابني وبطل طيش واستر على امك واكعد .. سعد لو عرف باللي عرفتو يسويها وجبيره وانك التتأذى

انت مو صغير ابنيييي اعقل ..

-بقى مدنك وما رد ..

-بنت خالك هاي تفتهم يول

-خالو انه مسوي وياها شي غلط .. واعرف حدودي .. لو اريد البنيه طالبه واتعنى وامشي اطلع واجيبلها مبايل واخذ راحتي واسوي كلشي بس انه تربيتك .. ما غلطت ولا راح اغلط وياها وانه رايدها حلال بس منتظر اخلص دراستي واخذها

والصار مجرد سلام لان صار شهر ما تواصلت ولا سمعت خبر .. هذا كل الصار وبكيفك.. من رخصتك تصبح على خير

حجاها و طلع ... الحجيه بس صافنه عليهم .. و صراع متعجب .. اندار .. هذا شوكت لحك يكبر ويعشك ويگ ف بوجهي ويكلي احب ؟

- يمه انه ادري بالسالفه كايلتلي هيام بس صدك ييمه هو ما ممتقرب منها .. بس يحبها

... اخذ نفس ودحكلي .. اني كاعده بمكاني لا اخذ ولا انطي .

-ها ام الفواين ؟ ما طلع صوتج

-حجاها مترهي .. وانفجرت ابجي .. والله ما قصدي اسوي من وراك .. وامسح بدموعي .. انفتحو شلال .. كعد يمي .. باس راسي

-كفي يلا ما زين عليج والصار ما اريدو ينعاد .. وبقى يمي كاعد والحجيه تشاقينه ..

لثاني يوم .. اجا صراع من الشغل .. كن ضايج .. بس ما اعرف شبي .. دنك باس راسي وكعد كبالي ..

احجي وياه ونظراتو الي ما اعرف شلونها .. حسيتو بيها استعطاف وشفقه .. ما نام .. بقى مكابلني ويشرب جكاير ..

سألتو :- صراع شبيك اكو شيء ؟

-طفى الجكاره وجا يمي وحظني .. اخذ نفس واني على صدرو .. يصعد وينزل وياي ..

:- يول والله اعشكج واعشك التراب التمشين عليه .. خلي ابالج شغله لو العالم كلو تخلى عنج حرام بالحرم والله ما اتخلى عنج .. ولو عفتج بيوم هذا شاربي زيني

- ليش تكول هيج حبيبي صاير شي .. اخذ نفس وما كدر يحجي .. باس راسي وكال ماكو شي بس هيج احب اعبرلج عن حبي مايصير ؟

ابتسمت .. ما اعرف حسيت اكو شي .. بقى يروح ويجي .. يكعد ويدحكلي بنظرة استعطاف وشفقه وجكارتو ما نزلت من ايدو

وهو ما كل الوقت يدخن ع المزاج .. او لما يضوج كلش .. وهذا يعني انو اكو شي قوي صراع ضامو

عني

لليل .. جاي اطلع للحمام وهم كاعدين بالهول .. جان اسمعو يكوللهم .. :- شكللها يمه والله تكسر خاطري ما اتحمل اشوفها تنهار كبالي وتبجي اموت وحتى حالتها مو مال نكللها

والحجيه تردو :- عجل يمه تضم عليها خطيه ..

... طلعت .. دحكت بوجهو وكلبي يرجف واخاف اسألو شصاير .. شنو هذا اللي راح انهار من وراه ..

كوه طلعت مني .. شضام عليه ..

بقى صافن بوجهي .. كام مشاني وكعدني ع التخم .. واحس بلعومي اشتعل نار من العبره اريد اعرف شكو ..

ادحك نور و الحجيه يبجون وحلا واكفه تبجي .. تعجبت .. حلا ادحكلي وتبجي .. شصاير ..

.... كول صراع شكو

-شوفي ليليان .. انه اهلج وامج وابوج وذوله اهلج وهذا بيتج وثقي بالله ......

-صراع امي بيها شي احجي الله عليك ..

-سكت .. وهز راسو اي .. الله يرحمها .. ان لله وانا اليه راجعون ..

صرخت .... لاااااااااا .. صراع لاااا امي الله عليك لااا مالي غيرها اهل والله لااااااااااا

صراع وينها لاااا ياااااااااااااا رب ... كمت اصرخ بخبال واصيح اميييييييييي ... ماااااما .. صراع اريد اشوفها لاااا شلون ماتت فهمني

فرفحت روحي يردوني اكعد واني كمت اشيل بروحي واشمر .. لحد ما قفلني صراع بأديه واني ابجي وهو يكول ..

يول والله ما اخليج تحتاجين لبشر .. الله يرحمها ترحميلها .. واني اصرخ بيدو .. حتى ام سعد دحكتها تبجي وياهم عليا ..

بقيت كاعده بالهولوواصرخ وكلهم ملتمين .. بس شلون ماتت

-هي ومرت ابوج رايدات يشردن وكاطعين روسهن الدواعش صار شهر تقريبا والبارحه يلا يحيى خابر خالج وگلو ..

بقيت ابجي من كل كلبي .. امي يكطعووون راسها ليييييش شنو سوت شنو ذنبها حرااام عليهم والله ما سوت شييييييي

اخ مامااااااا .. ليش انتي وبابا عفتوني ماااااامااا .. ليش يتمتوني لييييش .. ابجي واصرخ . فقدت وابجي ..

رفعني صراع واخذني للغرفه مددني ويكلي بس ارتاحي يول لخاطر البطنج خطيه . واني اصرخ ..

بقيت بحظنو ابجي فوك الساعتين وحلا مكابلتني وتبجي

... تقربت ومسكت ايدي واني ابجي .. و گالتلي

-اني اكثر انسانه يمكن تفهمج هسه بهلوضع .. اعرف شگد صعب موت الأم .. جربت هلشعور واني بصف ثالث ابتدائي ..

وكتها جنت افتهم كلشي .. ومحتاجتها كلش .. محتاجه تقريني وانجح مثل الطالبات .. لو تضفرلي وتسويلي تسريحات مثل البنات .. لو من ابجي واتوجع تجي يمي تحس بيه واداويني ..

صعب تخسرين امج اعرف والله صعب .. وتبجي

ماتت واني لليوم اتمناها وحاقده على ابوي بسببها .. واكول جان شخسر لو متنازل وماخذها للدكتور ما جان امي لليوم يمي .. شيصير لو ما متكبر عليها .. ليش جان ما يحبها ويضربها .. يطردها ويمنعني منها .. ولو رجعها اشوفها تتوسل بي وما يدحكلها ..

كلشي اتذكر واكول ليش ابوي هيج وياها ؟

صراع:- باباتي انه جنت مبقيها على ذمتي لخاطرج

حلا:- بس ما حبيتها لخاطري بابا .. عمرك ما حبيت امي انت .. تكرهه وتكره حتى خالتي اخلاص لأن تشبهه ... تحجي وتبجي بحركه وتمسح بدموعها ..

ياخذوني بيت جدو لگبرها واكعد ابجي واتكاون وياها واكولها .. ليييش .. ليش موتي روحج على ابوي ليش ما عشتي لخاطري ..

عشتي وانتي تتمنين رضا ابوي .. وما فكرتي بيه وكلتي اعيش لبتي تحتاجني .. ما گلتي بتي راح تتأذه وراي ما گلتي شلون تعيش بدوني ..

.. تحجي وتمسح بدموعها وتبجي والحجيه تهدي بيها .. اني دموعي تجري وادحك بوجها ..

- شفت وجه امي بخالتي اخلاص وجنت افضلها ع الكل لأن بس يمها احس امي موجوده واعرف ابويه ما منعني من خالتي خلاص لأن شفت بيها امي ..

حاول يعوضني بفلوس بدلال .. بس ما عوضني امي .. ولهذا جان يسمح اروح يمها رغم هو يكرهه .. اعرف ضميره يأنبه بيه ..

... تحجي وصراع مدنك يستمعلها ..

-اني ما عندي شي وياج ليليان حتى اكرهج بس كل عمري واني اخطط خالتي تتزوج ابوي وتصيرلي ام وحتى اتوسل بجده تقنعو ..

بس من اجيتي انتي خربتي كلشي وكرهتج حيل لهذا السبب .. تأملت فترة ويطلكج بابا وتروحين منا وگلت ممعقوله ابوي يتزوج ويحب بنيه بگد بنتو ..

بس من يوم الطبخ وياج السمج بولادة عمه نازك وهو عمر ابويه ما ساعد امي بحاجه لو شال عنها .. خفت يحسبج زوجه ويبقيج وجنت مستعده اسوي كلشي حتى يطردج ..

لفيت عليج سالفة الذهب وتواصلج ويه اخوج الارهابي واعرف ابوي ما يسامح ويطردج .. بس ما طردج والاكثر من هيج سامحج بدون ما يعرف الحقيقه وصدكج ..

حيل كرهتج وكرهت حتى انزل للبيت في سبيل ما اشوف ابوي عيونو تحاوطج وين ما جنتي وعيونج تراقبو حتى لما يحجي ..

وكتها انتي ما بس خربتي زواج خالتي اخلاص الجنت اتمناها عينا تصيرلي ام .. انتي اخذتي اكثر شي جانت تتمناه امي .. گلب ابوي وحبو

ضربني لخاطرج .. وطرد جده ام سعد لخاطرج .. ويتكاون كل واحد يوصلج واسمع الناس تكول صراع تولع بوحده بكد بنتو.. كرهتح وكرهت حتى وجودج بالبيت بس لأن انتي اخذتي ابوي ..

... اخذ ايدها صراع وحجه :- اعرف صرتي جبيره بابا واكدر احجيلج وتفهمين .. صح انتي فقدتي امج وانتي صغيره .. بس بابا انه ما جنت اكره امج بدون سبب

انه ما عشت طفولتي مثل البشر حتى احب .. عشت ابيت ابوي القصر عيشة فقير متسول ينام بلايه عشا ..

انج تفقدين امج اسهل من تشوفين مرت ابوج تضربج وتطفي العطاب بجسمج وابوج يخاف يحجي ويسكتها ..

تعيشين وتشوفين امج تنكتل بلايه سبب وعليشه الفقر بنص الخير ..

بليلة عرسي وي امج .. كلتلها امي خط احمر يا وجدان من تتعدي احركج .. وامج صفت وي ام سعد على امي بس التحق ارجع الكا الحجي متكاون وي امي وما ادري امي مكتوله لو لا ما تشكي واشوف ملابسها محد يغسللها وصافه وي خالتها ..

كرهتها من يوم الشفتها تجر اذن علي ابن عمتج وهو ابن اخوها وتطردو وتمنعو يلعب وياج وهو طفل .. كرهتها لأن حسيت متزوج نفس المره الدمرت طفولتي وظلمت امي ..

اكره كل مره مكايده وملعبه .. وكرهت امج لهسبب وما بقيتها بس لخاطرج .. كل مره جنت اتنازل وما اطلكها بس الخاطرج ..

.. شيبت وانه ارفض اتزوج وكرهت النسوان بس من لعب والمكايد الشفتو من جدتج ام سعد وامج واهلها ..

انه انسان بويه اتمنى ارتاح والكالي مره ما عدها حيله وعلى مايي والله جابلي ليليان ما تعرف الطين من العجين .. صح صغيره واستصعبتها بس الله القاسم بويه ما بيدي ..

.. انه ما كتلت امج يابه .. امج دليتها حدودها وما راعتها وهي الخلتني اكرهه بتصرفاتها ..جنتي صغيره وما واعيه على المشاكل .. بس هاي جدتج وخل تحجيلج على كل السوالف وشوفي ليش انه ما جنت اريدها ...

... بقت مدنكه وتحك بزوليه بأضافرها وما ترد..

-كل هذا بگلبج ضامتو عليه حلا ؟

-انه ما اكرهك بابا .. اني بس جنت اتمنى تصير عندي ام ..

-ما كلشي نتمناه يصير ونحصلو .. انه هم جنت اتمنى يصير عندي اب .. وكبرت ووعيت وقويت .. المصايب بابا لازم تخليج اقوى مو اقسى ..

قربو منها وباسها .. وحرب وكع عليهم وهم يبوس بيه ..

.. اني مدنكه ودموعي بعيني .. طبطب على ايدي وكال :- كولي يا الله .. والله ما اخليج تحتاجين امج انه اهلج والله لا تهتمين ..... يتبع

☆☆☆☆☆☆

سقطت اول ضحيه .. من التالي .. ؟

#زينب_ماجد

#مراهقة_و_الأربعيني

،،،،،،،، بقلم زينب ماجد ،،،،،،،،،،

الحلقة_ 52

يحجون واني دموعي تصب .. طبطب على ايدي وگال :- يولو لا تهتمين والله ما ما اخليج تحتاجين لأمج ولا لأي بشر .. ارتاحي يابه ..

هزيت راسي .. واتمدد .. هلكد الله شمر عليه دموع .. شكد صار مشايفتها .. ولا سامعه صوتها .. وكل الفتره الفاتت اني كل توقعاتي محبوسه بالموصل ابد ما جا على بالي دتموت ..

.. صراع ما تركني .. توضى وجا يم راسي يقرأ ( يس و القرأن الحكيم ) هو يرتل واني ابجي ..

صدق واخذني بحظنو :- ول يابه والله مو زين عليج هلبچي .. يولي ادعيلها ترتاح تسكن روحها .. شو هي دنيا وكلها هموم خل ترتاح منها ومن ظلم حياتها الشافتها وهاي انه قريت يس لروحها حتى تسكن ..

.. اخذ راسي وحطني على رجلو .. وبقى يحجي وياي عن دينو وعن رجل اسمو (ابو طالب) ويشرحلي شكد ان هو كان ساند نبيو وحامي والنبي حزن جثير بموتو وسمى العام اللي مات بيه عام الحزن ومن بعد موتو الرسول ما استسلم او ضعف . صار اقوى و اشد ...

هو يحجي واني اسمع ويحجيلي قصص .. صافنه اسمع و الدمعه بعيني حتى حلا وحرب كعدوا يستمعوله وهو يقص القصص ..

اشر لحلا اطفي الضوا .. وبقى يمسد على راسي .. غفيت و الدمعه بعيوني ..

كعدت بليل .. ظلمه بس ضوا خفيف من الكراج .. وصراع متمدد نايم على ظهرو يمي وحرب على ايدو الثانيه

.. گمت فتحت الباب وطلعت .. خليت راسي بين رجليه وابجي بحركه واني اتخيل راس امي مقطوع ..

شنو ذنبها وليش قطعو راسها .. ليش ماكو احد يحمينا وياخذ حقنا ليش دم ماما هيج يروح ..

بودي لو اكضب يحيى اشرب من مدمو اش كن حصل لما انتمى لداعش وخرب حياتنا ..

بقيت مدنكه واتخيل امي راحت يم ابويه .. على صوتي بالبجي .. بابا ليش تعوفوني مفكرتو شلون اعيش ومنو الي .. تكسرون جناحي ليش .. بابا رجعو اخذوني وياكم خل ارتاح يمكم تعبت

-ما كافي

-التفتت مرعوبه .. و الدموع بعيني .. صراع ما اگدر .. قبرها وين اريد اروح ..

-دافنها يحيى هي ومرت ابوج بالموصل

-بقيت ادحكلو والدموع يجرون .. اريد اروح للكنيسه .. اريد افتح قلبي ليسوع .. اريد اشكي لأمي القديسه ..

-اخذج والله بس صيري زينه انه اخذج .. هسه بس ديريلي بالج على اطفالج ابطنج .. تره ذول سندج وعائلتج من بعد اهلج .. لا تضيعيهم وقوي نفسج لخاطرهم

... تقرب يمي فتحلي ايدو .. ارتاحي ..

-صعدني بغرفتنا .. ما اريد اضل هينا

-اخاف تستفردين بروحج وتكضيها بجي

-صراع هذه امي اللي راحت

-والبطنج جهالج ليليان ...مسحي دموعج وكولي يا الله وغسلي ورجعي لفراشج ..

... اخذني لفراشي وبقى يمي لحد ما رجعني نومني .. لهناك سمعتو مبدل ويكل لأمو ..

:- عينج عليها يمه لا اطلعين من الغرفه وتخليها تبجي كابليها لحد ما ارجع .. وجبريها ع الأكل حتى تاخذ علاجها

.. طلع وبقت الحجيه مكابلتني وكلساع تصيح كومي اكلي يمه .. لو كطعتي الاكل يردون اهلج اقلها كسبي وليداتج يمه .

بس ما بيدي حلكي طبگ ما اشتهي العسل .. بس العيون مدمعه كل الوقت . مكافي شهر ميتين واني ما ادري بيهم

لا وعيدت وفرحت وهم ميتين .. اتخايل روسهم مقطوعه وافرفح ابقى ابجي بصوت عالي . .

شويه وفاتت هيام هي وبناتها .. كعدت تواسي بيه وما تركوني مكابلاتني حتى ما ابجي .. وتسولف هواي وتضحك وي بناتها حتى تغير جو ..

فاتت نور حطتلي اكل .. ما كلت حاولت هيام .. ما كدرت اخلي لكمه بحلكي .. احسو مر ما اطيق اتجرع اي شيء من القهر ..

ونور هم كابلتي .. وخايبه اكلي والياكل بضرسو ينفع نفسو مره مريضه انتي ..وبقت خطيه كاعده هم تواسي بيه ..

حتى ام سعد اتصيح ولج يلفاهيه اكلي كلنا ماتو اهلنا ما متنا .. دحكتلها دمعت .. حتى اليكرهني صار يشفق عليه عجل شكد حالتي تكسر الخاطر ..

بس كل هاي بسبب صراع .. يمكن لو ما هو مهتم .. محد يهتم .. بس ذبحهم كلساع يخابر .. ها شلون صارت .. اكلت لا ..

فكلها تفوت تطلع اتصيح اكلي وتهتم بيه .. حلا سوتلي تشكيلة فواكه .. وكعدت يمي وحجي وسوالف .. اخذت منها فراوله وخليت بحلكي ...

بس احس ماكو طعم .. القهر ذابحني .. اتمنى اختليلي بمكان .. بس اطلع قهري وابجي .. بس كلهم مكابلين .. بس تنزل دمعتي صاحو هااا شكلنا يول البطنج ..

وبقو على هلرنه .. وصراع ما فارگنی ..

3 ايام حالتي ما صحت زادت .. كن حيلي باد .. جسمي نحل .. القهر على امي و باجي لما اتخيلهم وهو يقطعون راسهم انذبح .. وياكل بيه الهم شويه شويه ..

بليل و صراع نايم يمي .. كعدت احس دم عندي يجري ووجع بظهري ذبحني ..

كمت من ايدو .. حس فز بساع .. هااا

-صراع عدموت من الوجع ... ااااخ .. وكمت ابجي ..

طفر شغل الضوا .. شاف ثوبي مدمر دم .. صرخ ... خرب بيومج لج رااااح تسقطين .. وركض لفوك يبدل

والحجيه صحت وحرب وحلا ...واني ابجي من ظهري .. مشتني حلا للحمام و الحجيه طلعتلي ثوب ..

وصلت الباب الحمام .. لو احس صار عندي وجع يذبح .. ما اعرف اذا اقوى من الولاده اللي يحجون عنها او اكثر.. موت

كمت اصرخ من الالم .. طلع الحجي :- ها ولج سكطتي

... اريد اتمالك نفسي من الالم .. كمت بس اصرخ لحكولي راح اموت .. نزل صراع ..

زكح من كل عقلكم ما بدلتولهااااا .. ثوبها وين

حلا:- هذا بابا بس هي مجاي تقبل تمشي من الالم ..

اخذ الثوب وراد يدخلني للحمام .. بس اني ما اكدر اتحرك جسمي تبنج من الوجع ..

نزلت نور و نائل فوك .. جرتني كوه للحمام واني اصرخ .. غسلتلي وجكت الثوب بسرعه وبدلته وتصيح كولي يا الله ..

لفتني و طلعتني تجر بيه .. واني اكلهم ما اكدر امشي راح اموووت ...

صراع:- ولج بس امشي يابه

الحجي:- ابو حرب يابه انت وين طالع بهليل والدنيا كلها دواعش

-يا دواعش حجي المره جاي تموت

-يابه انت ما رايد روحك تطلع بهلساعه ...انطر يطر الفجر واطلع

نائل:- ابو حرب فعلا مو مال تطلع هلوكت

-عجل انطرها تمووووت واكعد هينا مثل النسوان اكابلها ليما يطر الفجر .. ما توخرووون من دربي

.

تركهم وسحبني ... طلع نائل وياه وصاح نور تعاي ويانه . وحلا صعدي يم الجهال لا يكعدون ..

يجرون بيه كوه من الالم .. بعمري كلو ما كن شفت هيج الم ابدددد .. احس شي يريد ينزل عندي بس من الالم مقلصه روحي ..

مدري شلون خلص الطريق واني ممنتبهه .. وصلوني الباب المستشفى .. نزل صراع تلكاني و نائل ركض جاب كرسي متحرك ..

كعدوني ومشو بيا .. على البجي مالتي التمو الاطباء .. وكالو دتسقط .. سحبوني و نوموني على سديه .. ويمشون بيه ..

اخذولي فحص و وتحاليل ... كالو التوم اثنينهم ميتين .. اي نبض ماكو ..

حولوني عملية كورتاج .. وسوولي .. بعدها ما دريت بالدنيا ..

بعدها حسيت كعدت ابجي وصراع كاضب ايدي ونائل ونور ويايا واني اصرخ ارررريد امي تعببببت اريد امي ودوني لأمي ..

صراع حيل ضايج ع التوم واكف يهدي بيه ... لحد ما انطوني ابرة مسكن ورجعو نوموني ..

... بعدها ما اعرف شكد .. فتحت عيني .. لكيت صراع كاعد وايده كصتو ومدنك ..

-وكعو مووو ماتو التوم صراااع

-الله موجود يابه .. يعوضنا ان شاءالله .. الحمد لله على سلامتج .. وباس راسي ..

بقت دموعي تصب .. هم اهلي وهم اطفالي .. كمت ابجي بصوت عالي .. وهم يمي .. يسكتون بيه ..

انتكست حالتي اكثر من وكعو التوم .. احس خسرت كولشي .. عيوني ما كمت افتحهن من القهر بس مغمضه وابجي ..

ساعه وكالو خل تطلع ما عليها ضرر بعد .. كعدوني على كرسي متحرك وطلعوني من المستشفى ..

اني ابجي .. وصراع كن هموم الدنيا بيه .. اتذكر فرحتو من كتلو حامل لو من كتلو توم شلون جان طاير ..

حتى فرحتو قتلتها .. اني ليش هلكد منحوسه والله مكاتبلي افرح بشي ..

دخلت البيت .. الحجي طالعه روحو و الحجيه هم ضايجه حيل . اول مشافوني استلموني

عوبه وما بيج خير وفاهيه .. تعرفين نفسج مريضه ورحتي كطعتي الاكل وموتيهم .. غبيه ما يصير براسج خير شنو اول وحده يموتون اهلها ..

اني كاعده ع التخم .. كلمه ما تطلع مني بس الدموع تجري .. دخل سيارتو صراع وطبكها واجه فات ..

سمع حجيهم .. زكح بيهم :- من كل عقلك حجي جاي تحاسبها على سكتطتهم .. خالق ايد رجل .. الله حطهم ابطنها وهو اخذهم لو كلت شنو تثبتهم لو تكف بوجه قضاء الله وقدرو ...

الله ما كاتبلنا هلتوم وهو احكم من عدنا والبيها كافيها رحمه الوالديكم كلمه زايده ما اريد اسمعها .. الماتو اهلها وجهالها .. مو اعز عدكم منها حتى تحاسبوها .

يحجي والعيون كوه فاتحها من التعب .. اندارلي .. كومي يابه .. سحب ايدي وصعدني لغرفتي ..

فاتت هيام بدلتلي ونظفتلي ومددتني .. جا هو .. كومي شربي علاجج

-هم سقطو اشرب بعد.ليش .. وبجيت

-عجل تموتين روحج وراهم لو سقطو هذا علاجج لا يصير عدج مضاعفات نزف .. كومي بويه كولي يا الله واشربي ..

... بقيت بغرفتي ابد ما طلعت .. احس كلهم كرهوني من سقطت .. خاصه كلمة ام سعد .. شافت الكل اهتم بيها گوت راس و گامت تتعاير لحد ما سكطتهم ..

... حسيت فعلا اني موتتهم من قطعت الاكل .. بس ما بيدي والله القهر ذبحني على امي واني اتخيل راسها مكطوع واني ما شايفتها صار شهووور .

كلها تخلت عني . الا صراع احتواني مثل الطفله .. هلرجال شكد ما احجي بي ما اجازي ع السواه وياي واحتواءه الي و اسمح لاي بشر يضايقني ..

اسمو حاطني على صدرو ويمسد بشعري ولو بجيت . بقى يرتل قران حتى اهدئ ويكولي الله بذكر الله تطمئن القلوب ... حتى حبيت القران كد ما يرتل ويتلو على راسي بصوتو .

ويواسي بيا اني اهلج اني كلشي بالدنيا وما اخليج تحتاجين احد ويا ويل اهلو اليصل يمج اكطع واذبح واصلخ .. ولا تنقهرين .. العمر كدامنا ويصيرون عدنا عشره مو توم ..

ومرات حتى يغير جو عليه يكوم يفشر بضحك ويكول اسويلج غيرهم بس صيري زينه تره مو حاله شعلتي شيب الخلفونا يلا همي نفسج كولي هالرجال خلصت روحو ما كافي صوم .

.. يومين واني بالغرفه .. التحق هو رجعت ابجي بوحشة الغرفه ... حالتي عتسوء ما عتتحس كلما جالي جسمي يثكل وما بيه اشيل لا ايد ولا رجل ..

من راح صراع .. محد صار يهتم بيا .. ام سعد تحشد نور تكولها :- قابل هي جايبه .. كلها ياله سقاط وتتعاير بروسنا وتريدج تخدميها ..

اني ما طالبه من احد يخدمني .. وحتى اكل من يدزوه ما اكل .. صراع يجبرني ع الحليب و البسكت كوا اكمل باكيت حليب بأجبار منو .. من راح ما اشتهي فما اكل ...

فمحد كام يجي لو يشوفني .. بس الحجيه ما بيها حيل تصعد .. ادزلي لفات اكل بيد حرب وتخابر وتسأل عليه ..

بس ما اشتهي اكل لفات .. فبقت تسوء حالتي اكثر واكثر .. ما انام بس اون من الوجع .. احس عيوني نار .. جسمي من كل مكان يون وجع .. حلكي مررر

وهم يسمعون حجي .. وكلما تفوت نور من بابي تسمع كلام .. ما الله يخلصني من هلبيت واخلص .. لها براس نور . خدامه لهذا وذاك ..

هواي مرات اسمع نائل يتعارك وياها لان تشكي هواي .. بس شسوي ما بيه اكوم .. حتى تغسيل ما اطلع .. فد مره سائت حالتي

رغم صراع يخابر كل شويه اخذتي علاجج اكلتي شربتي .. من اكلو لا .. يخابر امو ادزلي اكل وترزلني ع العلاج ﻻان ما اخذو

مره اكثر من يومين كلشي محاطه بحلكي .. كعدت ابجي من الالم .. شفت صراع يخابر رديت ابجي .. هو يصيح شبيج واني بس ابجي من الالم واكلو جسمي يوجعني راح امووت ..

ما كدرت احجي وياه .. قفلتو واريد الحمام وما اكدر اكوم .. كوه سحبت نفسي كمت .. مشيت خطوتين .. وتخربطت .. اغمى عليه ..

ما اعرف كم ساعه وكعدت .. بمكاني واكعه .. بقيت ابجي بحركه على كسافة حالتي .. حيل حسيت بالضعف .. الى ان تعبت وصارت بس دموع تجري بلا صوت .. وبعدني بمكاني ..

... انفتح الباب .. صراع .. فز من شافني بساع جا شالني من الكاع ويكولي :- اشبيج يولي ليش بالكاع ..

نومني للسرير .. وشال وجهي :- ليش هلكد باجيه .. ول يابه شصاير بيج .. ما ماخذه علاجج ليليان

... بس ابجي .. كضب جسمي .. صاح يايابه .. وج مشتعله ناااار ليش ..

شالني وللحمام غسل وجهي واديه بماي بارد .. شاف حالتي ما استقرت .. كال عباتج وين خل اخذج هاي حرارتج مو طبيعيه ...

خلاني بالغرفه طلعلي جبه وحجاب .. ونزل يصيح ويعيط ... :- اطلع واوصي بيكم عليها متخربطه ووواكعه ومحد داري عنهاااااا .. ما حجيت ما وصيت لو بس من تردون صحتو صخام تعال صخام روح ..

لو متت شتسون بيها .. يتيمه اعتبروها صدقه وصعدو شوفو حالهااا وامسحو على راسها .. ويصيح وبصوت عالي

اني وكفت كوا اجر خطواتي ... جت نور لبستني و تمشي بيا .. نزلتني .. واحس على لحظه اوكع الدنيا تفر بيا و جسمي يون الم ..

اخذني عيصعدني .. اتخربطت من جديد بأيدو .. وما حسيت غير واني بالمستشفى يمشي بيا .. فحصوني واخذو تحاليل وكاللهم حالتي .. وعلكولي مغذي

كالولا البنت عدها حمة مالطة .. ضربوني ابره و كتبولي علاج ورجعني للبيت ..

كعدني ع التخت .. وحجه :- هذا علاجج غصب عنج تاخذي زور كوا تتحملي لبين ما اطيبين مفهوووم ...

دخلت نور انطتو صينية وبيه كاسة شوربة عدس ..

نور: اني اوكلها ابو حرب

-مشكوره بعد اخوج روحي لجهالج

-بقى يوكل بيا غصب .. وانطاني علاجي ودثرني ونومني .. ارتاحيت .. خلصت من الالم ..

ما حسيت والا ثاني يوم .. هو يكعدني ع العلاج .. و بقى يمي ..

للعصر كال :- شرايج تنزلين جوا شويه ؟

-ما اعرف جسمي مكسر

-من النوم يابه .. يثكل جسمج وما يطيبج .. كومي اتمشي شويه كعدي و الاهل سالفه روايه تنسين اوجاعج شويه شويه واطيبين .. يلا بويه كومي

-سندت ايدي عليه .. وكومني ..

-تكدرين تمشين بيج حيل ؟

-اي اكدر

-مشيت وهو يشجع .. :- يلا عفيه عفيه شويه تقوي

نزلنا جوا .. جاي سعد صاح :- هااا شلونها المصلاويه

.. ابتسمتلو ... سلم عليه صراع :- هلا بأبو محمد وينك ما تنشاف

-شسوي بهلمولده .. الا نسأل عنك اعذرني ما كدرت اجي .. كالو وكعو التوم

-معذور بعد اخوك .. الحمد لله على كل حال

-دوامك شلونه .. الاخبار مو زينه

-صدك مو زينه .. كل ما جالو داعش يتمرد والبارحه جا كتاب نقلي للمقر ..

-اااخ وين نقلوك

-والله على اطراف بغداد

هو حجه وزكح الحجي :- ياااااااابه وين منطي وجهك بطل يابه بطل ..

-شسوي يابه هاي بعد اجا كتابي شلون ابطل

-يابه ذول ينادون قادمون يا بغداد كل همهم بغداد وانت رايح تتكاتل على اطرافها مووووت هذا ابني بطل

-عجل يابه هاذ الجيش كلو مكاتل و حرب ودفاع بطلت گبل حتی اجي هسه من تالي ابطل

الحجيه:- ولك يمه تعبتني والله شليت گلبي انته .. بايع روحك .. لا تفكر بنفسك فكر بأيتامك .. بتك وابنك ومرتك وين يرحون بعدك .. يتيهون والله يا يمه بطل فدوه الطولك

-يمه الله موجود .. لا تهمين بالمكتوب مالو مهرب

صرخت:- انت تريد تخبلني ولك جلطتني صراع يمه .. روحه ماكو والله لو طلعت هلباب ....

-يمممممه ابتليت حجيتلكم الف مره كلتلكم ما ابطل .. حلال حرام يا يمه حتى الله ما يقبل ابطل حرام شرعا اترك وضيفتي بهلوضع

الارض عرض يمه بس الناقص والماعندو شرف يترك عرضو ويشرد .. ما ابطل ولا راح ابطل افهموها ولا ادوخوني تراني بالقران دايخ وروحي كوا جارعها .

بقو يتراددون وياه .. ما سمع تركهم وطلع ..

اندارلي الحجي :- يابه انتي قنعي مو رجلج هاذ ما خايفه عليه اطراف بغداد نار ما ترد احد ..

و رد عليه يصرخ واني دربي كوا افسرو من الدوخه البراسي .. كتلو بليل احجي وياه بلكت يقنع

.. شويه وصعدت كن عظامي بقت ترجف ... رجعتي السخونه كن جسمي اشتعل نار واحس جمر بعيوني ..

بقيت نايمه بفراشي واصيح اااخ ماما راح اموت ..

فات صراع يفتح بالكنتور سمعني اون . جا فتح الغطا .. تلمس وجهي جسمي

-رديتي صخنتي ...

-انطاني علاج وشربني

-ارتاحي شويه وتفك

...وطلع اخذ منشفه وسبح ورجع يعدل بنفسو ويتعطر .. واني احس روحي خست .. صار ايام ما سابحه وجسمي ثكيل احس عجزت 100 سنه من القهر و الحاله الجنت بيها.

تقرب :- ليش تبجين يول كافي حتى عيونج غوركن كافي ... سكت و رد حجى .. زين بس احجيلي ليش تبجين

-اريد اسبح

-بس

-ما بيه حيل اكوم صراع احس كرهت روحي

-لا على كلشي مرخصه دموعج .. سبح كليلي وانه اخذج .. كومي

-لا ما اريد

-دكومي يا عمري كومي ..

كومني من السرير غصب شيلني ومشاني للحمام .. كعدني على الحجر فتح المي وساواه حار ودافي وكال

- يلا .

-لا اني اسبح

-لا تخافين يابه والله ما اشوف .. لا تستحين ... يحجي بصوت ناصي .. وينزع بيه ..

كام .. حطي اديج بالماي بس اروح اجيبلج ..

... راح جابلي ملابس واجا حط صابو بالليفه وشمر مي وكعد يجلف بيه .. واني لامه روحي .. اخجل منو بس ابد ما خجلني لو ضحك لو غازل يعرفني اتوتر ..

سحب رجلي .. ويكولي ول يابه كم مره كايلج انه مرايتج لا تخجلين مني جعليني كلشي ما شفت .. ويليف برجليا ..

كملني ولبسني وخلا الخاولي عليه وكال طلعي كدامي عيب كاف نائل لو واحد يجي صعبه ..

... تركتو ومشيت للغرفه .. شويه وفات وراي .. هو يغير ملابسو ولبس كلابيه مال بيت .. واني بالخاولي انشف شعري

-صراع من يمك المشط

-اي .. اخذو .. هاج

... دحك صفنت ما بيه امشط ..

-جيبي .. اخذ و يمشط بشعري .. ولج شو هذا مچبن شنو سيم

- لا بس لان صار هواي مسابحه وانته غسلتلي بس بشامبو ما خليتلي مكيف ..

-عجل غير تكليلي انه شمدريني بسوالفجن شامبو ومكيف وجيب وودي مو شعر ..

يحجي ويمشط ويعت بشعري .. يمكن خلصو بيدو .. كمل وشدو .. اتلمس .. شو هاي صفح .. انت مقتنع بتمشيطك هذا

-والله شمدريني .. احد كايلج امشط مرا گبل .. بس صدك شو هاي عوجه ليش .. ويعدل بيها

-سحبتها وعدلتها واشرتلو يكعد .. كعد .. حطيت نفسي بحظنو .. وضميت راسي بصدرو ... تعبتك مو

- لو كل تعب هيج انه بالجنه .. وضحك ..

-صراااع

-دحكي عمري .. الزواج ماهو فندق شوكت ما سائت الخدمه اتركو واشوف غيرو .. الزواج بيت ومسكن لو خرب شي بالبيت تصلحو حتى ترتاح ..

لو خربتي .. اعلمج .. من اتعبين اسندج .. هو الزواج اخذ وعطا وتضحيه وتنازل وحب

فلا تتوقعين اتعب منج .. بالعكس اتمناج تكومين وترجعيلي بخبالاتج وجفصاتج .. كل همي تصيرين زينه بالقران .. تعبي فداج

-حظنتو قوي وبستو ..لا تروح للدوام بعد

-لا تشغلين بالج بهلامو اطمني وخليج مرتاحه ماكو شي الحجي مكبرها..

- سكتت و بقيت نايمه .. طلع فلم لعادل امام وكعد يدحك ويشاركني بيه ويسأل حتى ابقى منتبه واشوف الفيلم وياه ..

لحد ما غفيت بحظنو بلا ما ادري .. وهو هم غفى .. نايمه على ايدو واحسو يتحرك قوي ..

فزيت التلفزيون مشتغل .. ادحك عليه .. عركان ويحرك براسو كن يتحلم .. ندهتو .. فز بقوه ..

وصاح :- هاااا ..

-شبيك

-فرك راسو .. انطيني ماي

-مديت . صبيت ماي بكلاص وانطيتو .. شبيك

-ياربي خير

-جنت تتحلم

-نايم على وضوء ما متحلم هاي رؤيا .. مسح وجهو .. انه ما اتحلم جثير نادرا اشوف رؤيا ولو شفت يتحقق الاشوف ومجرب نفسي ..

-اشفت

-كن امج جت لبيتي معصبه ومخوزره بعيونها علي .. وبقت مخزره اخر شي شلعت ورده من حديقة بيتي ورجعت طلعت

-وشنو تفسيرو

-ما اعرف .. يارب خير .. ردي نامي .. لا تشغلين بالج ..

-رجعت .. بس هو ابد ما ارتاح بقى متوتر ويفكر ..

.. نمت .. لثاني يوم كعدت وهو مفتح الشبابيك و والباب ومشغل قرأن بالغرفه ..

.. كعدت .. فاات هو

-ها صح النوم

-صباح الخير

-صباح النور

-شكو

-اهوي الغرفه .. مريضه ونايمه بيها تتجمع الامراض و الفايروسات ففتحت حتى تدخل شمس .

شلون صرتي

-شوي احسن

-اي استمري بعلاجج تصيرين ورد .. بس اكلج .. هليومين اطلعكم لبغداد تكدرين

- يومين

-اي ليليان بعد ما ائمن هينا والوضع كلما جالو يسوء .. اطلعكم البغداد ائمن عليكم

-براحتك

-عجل اذا بيج حيل لملمي الحاجات التحتاجينها البملابس حتى نطلع بأقرب وكت

-شوكت

-اذا اراد الله باجر

-ماشي ..

-يلا كومي نزلي حتى تتريكين حلا جاي تسوي الريوك حتى تاخذين علاجج

-تمام .. نزلت كعدنا ب الهول .. سمعتو يحجي ويا حلا بالمطبخ .. كمت تمشيت يمهم وهو يكولها :- يلا بابا همي نفسج

-بابا غير يجي حرب بعثتو يشتري جبن

فاتت الحجيه:- اكلك يمه صراع

-ها يمه

- ام وسام خابرتني على زواج حلا البارحه الجماعه مستعجلين يكولون ناخذ البت گبل لا تسقط المنطقه واطول السالفه

-كلش مو وكتها يمه .. وانه رايد اطلعكم لبغداد يا عرس هسه .. بس طلعو

-يمه صار الهم هواي يا يمه من انخطبو .. خل يلملموها شلون ما جان وانطي البت الرجلها

-هسه الله كريم خل نتريك وبعدين نحجي .. الحجي وينو ..

-طلع هو ونايل للمعرض من الصبح

-ديلا ... اندار الحلا .. شبقى بابا .. هن بيضات

-بابا مكمله كلشي بس غير حرب تأخر

-وين تاخر .. وطلع يشوف حرب .. عشر دقايق وحرب ماكو .. رد رجع

-بنتي اخوج وين دزيتي من يا اسواق

-بابا عذا اللي براس الركن

.. اندار لنور :- خويه هاي ما تكدر ع السريع سويج سيارتي ع الميز بغرفتي بعد اخوج بساااع دشوف هلولد وين صار .

ركضت جابتو .. اخذ السويج وحرك سيارتو وطلع .. طول ربع ساعه وخابر ع الحجيه .. :- يمه حرب ما رجع ..

-لا والله ييمه ماكو .. وينو هلولد ما لكيتو

-لا تخبليني يمه ابني ماكو شنو انشكت الكاع وبلعتو

صاحت الحجيه :- ولج انتي وين دزيتي الولد

-جده والله بس على جبن بعثتو من الاسواق هاي مو كل مره هو اليروح .. وين صار جده شو اتأخر فدوه خاف صار بي شي

الحجيه:- عوذا من السانج يولي . لا تفاولينو ..

... رد خابر صراع :- ولج يمه ابني ماكوووووو وين راااااااح ..

الحجيه :- عزا بعينج نوريه .. يمه حرب ةينو .. وليدي گطعة گلبة هاذ يمه ..

سدت الخط ولبست عبايتها وطلعت .. اني دموعي كامت تجري خوف . وحلا يمي اطكطك بأصابيعها وتبجي وتكول اخويا وين راح .. صوجي اني بعثو والله اذا صار بي شي ما اسامح نفسي ..

كضبت اديها .. لا تكولين هيج .. هسه يرجع .. غمضت عيني وابجي واكول يسوع لا تتركو .. رجع حرب بخير ..

نور و ام سعد انخبصو وبالباب واكفين .. طلعنا وكفنا وننتظر بالباب .. فات الحجيه وادك على راسها

-تعزيت وتصخمت الوليد ماكوووو ماكووو وتبجي وتنحب وتنعى .. وتصيح ولج حلوه جده حباية الضغط راح يكف كلبي .. ولكم يمه وليدي ما هوه

فات نائل و الحجي .. وصرخ هااااا ما رجع

ام سعد :- الولد ما بين حجي ماكو ..

والحجيه تبجي واني وحلا كاعدين يمها .. نائل بسرعه رجع للسياره والحجي طلع وراه .

ساعه و دخلو بيت عمهم صالح .. الحجي يصرخ بصفحه و الحجيه امهم كابلت عمتي واخلاص حظنت حلا ويبجووون ..

وصوت البجي ارتفع .. اجت الجيران والتمت كلها بالكراج .. ونبجي عيونه ما سكتت والكل دكاتو رجف وخوف ..

التمت الناس وعمامهم اجو والتمو .. وانسبينا سبي وحرب ما بين .. لل9 بليل وناس تطلع وناس ترجع .. عمتي تخربطت وشالوها للمستشفى ..

وصراع صاعد ضغطو وواكع برا بس ما جاا .. ل11 بليل رجعو الحجيه .. وصراع ما شفتو ..

واحنه كلوبنه ناااااااار .. تعبنا واعصابنا تلفت .. طفل ما يعرف يسوي لنفسو لفه ... يمر يوم كامل وما بين وين راح ..

ب2 بليل جابو صراع منتهي .. كلمه ما يحجي .. كاعد وايدو على راسو .. وكل شويه يكوم .. ويكلهم ما اكعد و ابني مفقود ..

اطلع ادور الرمادي شارع واطلعو .. وهم يكضبو كوه ويلتمون عليه ويحجون وياه .. ادحكلو من بعين .. لوجه احممممر واسمر كلش تحسو دخن من كد النار بي عيونو حمررررر

واحنه بين اليدعي و اليصلي واليبجي واليحجي والصافن والبيت ل3 وما خلا ..

لل5 و نص الصبح بعد الصلاة .. كن سياره شحطت من الباب ..

اهتزت الكاع من مطافرهم ومراكضهم .. كل احنه فزعنا .. طلعنا بس كونيه مال بتيته مدمره و كن بيها شي بالباب والشارع فارغ ..

عيني بصراع ما نزلت .. حط راسو ع الباب وكن واحد فقد ... فتح عمهم الكونيه وصرخنااا.......يتبع

☆☆☆☆☆☆☆☆

سقطوا اولاد صراع .. التوم و 💔

#زينب_ماجد

#مراهقة_و_الأربعيني

،،،،،،،،، بقلم زينب ماجد ،،،،،،،،،

الحلقة_53

دحگنا الكونيه وصرخنا .. حرب مذبوح والمنظر صعب تفسرو .. كمت اصرخ بخبال و ابجي .. كرفصت وايديه على اذاناتي وابجييي ..

.. دحكت صراع وكع على اركبو وخلى راسو ع الكونيا وبلا صوت ولا حس .. يردون يسحبو لو يسحبون الجثه منو . ماكو

الجيران كلها طلعت .. على الصريخ وحتى النسوان دخلت علينا بملابس النوم بس مغطايات بعبي ..

وكل واحد يصرخ بصفحه ... ودموعي تجري وعيني على صراع .. شالو ولد عمو و واخذو الجثه .. نائل حظن صراع بثنين اديه ويبجي بصوت عالي .. جتافو تهتز كد ما يبجي بقوه ..

وصراع جثه هامده ما يتحرك .. على جتف نائل .. و وكع تخربط .. صرخت امو و الحجي وكلها التمت على صراع ..

اريد بس اكرب واشوفو ما كدرت كلها ناس .. بس دموعي تجري وصريخي يطلع بلا ما احس و ضايع وي الصريخ اللي بالبيت ..

الحجيه

حلا

اخلاص

ام وجدان

كلها تصرخ وتلطم على وجهه بصفحه ..

لحظات والبيت خلا من الرياجيل .. اللي نقلو الجثه و اللي نقل صراع للمستشفى .. وبقو بس كرايبهم وعمومتهم الكبار واكفين بالباب

الفجر توا طر والجو كأنو مغرب والباب مفتوح طلاقتين على حيلو .. صاحو عمامهم :- يابه نسوانه فوتو جوا الرياجيل خل تكعد بالكراج ليما ننصب الچادر ..

كلها فاتت للبيت .. كل واحد كاعدلو بزويا ويبجي .. والناس ولا تكول فجر تتوافد فوج فوج يدخلون ..

نور و بنات عم صراع ما كعدو .. كالو خل نفض البيت كبل لا تكثر الوادم ..

فرغو الهول من القنفات وطلعوها للشارع للرياجيل .. انفرش الهول زوالي وراحو لغرفة سعد فرغوها وغرفة ام سعد شالو التخت صعدو وفرشوها .

... اني كاعده يم الحجيه وهي تصرخ .. حاطه راسي بين رجليه ومدنكه ابجي .. والسخونه احس راح تشلع عيوني من كد الحراره .

البارحه ما خذت علاج ولا ضربت ابر .. رجعتلي الحمى شلت حالي .. اريد افسر بعد متت .. تقربت هيام وحجت

:- ليليان مو مال كعده .. يول غرفتج قفلي وسدي الباب لا تخليها مفتوحه .. امن حلالك ولا تخون جارك .. فاتحه هاي كووومي

.. هزيت راسي اي .. بيه ما بيه كمت .. وي ما كمت افتريت وتخربطت محسيت غير واني على تخت الحجيه وهيام تزت ماي على وجهي ..

-ها شلون صرتي

-هزيت راسي

- ابرج وين ؟

-كوا حجيت ... بالغرفه

صعدت جابتلي العلاج ومفتاح الغرفه .. ضربتني ابره ودثرتني وكالت نامي مالج شغل انتي مريضه ..

بقيت اغفي والحراره تاكل بجسمي .. واسمع صوت الحدايد مال الفاتحه وهم ينصبون الجادر برا .. والبيت گام ياخذ ما ينطي

بقيت نايمه .. انتبهت على مرا فاتت للغرفه وتحجي :- خايبه ياهي هاي النايمه

وحده ردتها :- مرت ابو حرب

-يااا هاي المصلاويه .. عجل بالفاتحه ونايمه والله نسوان تالي وكت

-لا خطيه امها ذابحيها داعش وسقطت التوم مالتها كبل اسبوع و هسه مريضه بحمة مالطه ..

-يااا عمت عيني خطيه .. امها بالموصل

-اي والله هيام سولفتلنا عليها متنا قهر .. الله لا ينطيهم مرا يذبحوها طفل يذبحونا محد خلصان منهم هلدواعش الله ينتقم منهم ان شاءالله ..

... حاولت اكعد .. كامت وحده منهم

-ها حبيبه تكعدين

-بس اريد موبايلي اخابر صراع گلبي نار عليه ..

كمت على كيفي و مشيت للهول .. كلو نسوان .. فتت للمطبخ .. ام علي وين مبايلج اريد اخابر صراع

-بيا حال هو المكرود وتخابرينو عمت عيني عليك خويه انهد حيلو ..

-وينو هسه هو ؟

-بالمستشفى وي جثة حرب

-غصت ابلعومي من كالتلي هيج .. حرب صار جثه .. دموعي جرت وهي بجت ونور واكفه ودموعها جرن .. وبنات عمهم يصبرن علينا

هيام:- امشي كعدي يم الحجيه ما زين عليج روحي حبيبه .

... مشيت كعدت .. الحجيه منوميها هم واكعه خطيه انتهت على حرب .. وحلا تصيح كلو مني اني الكلتلو روح .. اني الكتلت اخويا .. لو ما دازتو ما جان ذبحو

... اني مثل الفرصه اجتني هلفاتحه شكو قهر بكلبي بجيتو .. كلبي على امي ينزف قهر .. خليت راسي بين رجليا وابجي وبس صوت القران طالع و البجي .. بجيت لحد ما خويت

دحكت الساعه ب3 الظهر .. كالو الرياجيل راحو للدفنه .. يدفنون .. كعدت الحجيه .. صاحت :- ولج يمه هيام واخوج ما دريتي عنو

- وياهم يمه راح يدفن ابنو ..

-عمت عيني عليك ابو حرب يمه شحال كلبك هسه .. من يوم الجبتك ييمه وانت معلول .. اللهي دخيلك تكف وي وليدي وتصبرو ربي ما ضل بي حيل ويتحمل .. وتبجي واحنه نبجي وياها

.... لليل و الفاتحه كايمه و الدفانه ما جو .. فضو عشا وخلصو .. والحجيه كل شويه يصعد ضغطها ودوها للمضمد مره ورجعوها ..

رحت وكفت يمهن بالمطبخ .. البيت شوي فضى الناس خفت بس كرايبهم .. دك موبايل هيام ..

نائل .. ردت :- الو

-هلا ام علي بعد اخوج احنا كربنا نصل للبيت وابو حرب حيل تعبان ضغطو 20 ما جاي ينزل .. ما اريد ولا واحد يكف بوجهو ويبجي وحظرولو الحمام خل يبرد وينزل ضغطو ..

- عمت عيني عليه .. يلا يلا راح اوصيهم واحظرلو ..

.. مشت هيام وخبرت البيت ... والحجيه كامت تنحب .

:- دفنو گطعة كلبي .. جده حرب ليش تركتني .. جده انت ايدي وانت رجلي ما تغفى عيني لا ما اغطيك واداريك بليل اليوم منو يادريك باللحد جده .. يبو خد الحلو اليوم بالتراب يمه..

وتنعى وتبجي و النسوان تبجي وياها ..

.. نص ساعه وسمعنا صوت السيارات صفت وكفنا كلنا جو الدفانه .. بس ما دخلو ضلو بالجادر .. لهناك يلا فات صراع و نائل و سعد وياه .. ويصيحو غرفة الحجيه فرغوها منو هينا ..

ادحك عليه .. الظهر محني و العيون مغمضه .. دشداشتو سودا و الغترا بيضه ملفوفه على رگبتو وحالو من جد يقهر ..

نزلو دموعي واني ادحكو .. فات لغرفة الحجيه كعدو ع التخت وهو مدنك ما نطق ولا رفع راسو ..

فاتت الحجيه .. باست راسو وتكلو الله يصبرك وليدي .. اعرفك سبع ييمه ومؤمن وهذا قدر الله ويومو من الساعه الجابتو امو ..

هو ولا كلمه رد .. رفع راسو بتعب .. صدت عينو بعيني .. حجه وصوتو مبحوح و التعب ذابو والعيون كوا مفتحها :- شفتي ليليان هذا الطيف مال امج .. شلعت وليدي من نص بيتي ومشت ..

-بقت دموعي تجري تذكرت حلمو قبل يومين .. تقربت كضبت ايدو .. ما حجه بعد .. اشرلي نائل انو اكف بجي كدامو ..

مسحت دموعي .. صاح سعد .. صراع كوم خويه للحمام كوم .. اذكر الله هذا نصيبو شتسوي الله يرحمو ..

رجع شال راسو لنائل وكالو :- قيس اكضبو ... اااخ الا اثرمو بالله وابرد نار وليدي الموجره بيا ..

نائل:- رايحين عمامي على بيت اهلو .. متبريه العشيره منو صار اسبوع وانظم لداعش .. وكايللهم جدهم وين ما تكضبوه اكتلو .. احنا ما علينا منو

.. تقربت هيام .. باست راس صراع .. البقيه بحياتك خويه كول يا الله وكوم وياي للحمام لا تبقى هيج .. طير بالجنه وليدك .. اشاف من الدنيا ابوه حتى هو يشوف خلو يرتاح ..

كوموه للحمام كوا .. فات يغسل غسل الميت .. ونائل كعد يسولفنا حالو .. ... يكول دمعتو ما نزلت .. كلبو جمر و ضغطو ما جاي ينزل .. لو بس تنزل دموعه احسن ..

حاولنا وياه دموعه جفت .. دحك الهيام .. لو بس تشوفين حالو من نزلنا ابنو للكبر .. هيام تموتين ما تكولين ذاك الجبل لا ما يهزو ريح .. فقد على كبر ابنو ..

... هو يحجي وهيام تبجيييي . واني ابجي .. وهو يمسح بالدموع ويحجي ..

خلص سبح راد ياخذو نائل لغرفة الحجيه ما قبل .. كالو اريد اصلي

وطلع للغرفه كوا يمشي بخطوات بطيئه من التعب ..

البيت مكتض بكرابتهم البايتين هينا .. منين ما تصد ناس

شويه و ضعدت لغرفتي .. فتت ما انتبهلي مغمض ويصلي .. كعدت ع التخت

شويه وخلص صلاة وكعد يسبح .. بس تحس حيلو مهدود .. حركتو بطيئه من التعب .. والعيون كوه مفتحه ..

متمدده وادحكلو .. يسبح بالسبحه و صافن .. ويرد انا لله وانا اليه راجعون .. وهو يردد كامت دموعو تنزل وهو صافن .. الدمعه من عينو للكاع ..

ترك المسبحه و نزل سجد وطلع صوتو بالبجي .. كامت اهتافو تهتز كد ما يبجي بقوه ويحجي ربو ويشكيلو حزنو ..

ردت اكوم اكلو يكفي .. بس تركتو يفرغ همو لله .. بقى بالخمس دقايق وهو ما كام ويحجي وي الرب بالسجود ..

خفت عليه ما كدرت .. تقربت وخليت ايدي على ظهرو .. حس .. نهى السجود وكام ..

ما حجه وياي ولا ابد .. كام .. كضبتو .. لخاطري لا تضعف .. لتسوي بنفسك هيج ..

ما رد .. بس بعد ايدي وكام .. مشى للكنتور اخذ غترا و طلع للجادر ..

حاولت انام .. مكدرت .. نزلت يمهم فارشين للنسوان بغرفة سعد و الاستقبال ونسوان كاعده بالهول ..

واخلاص لسه تبجي كاتله روحها اللي تكول امو ..

شويه وفات نائل وابن عمهم سليمان و صراع بيدهم.. تعبان و خشمو طك.دم ورايد يتخربط ..

نومو على تخت الحجيه .. هو كاعد خلا ايدو على راسو ... ومغمض .. بقو يمو ويحجون وياه ما يجاوب بس كاضب راسو ..

تركوه واندارلي نائل :- دلكي راسو وحاولي تخلي ياخذ علاج

تقربت يمو وكعدت ع السرير .. مديت ايدي لراسو .. حجه :- مصخنه انتي

-ما اعرف جسمي يوجعني .. وبقيت افرك براسو وهو مغمض .. صراع تاخذ علاجك .. ما رد

كوم حتى اخذ علاجي وياك .. ما رد .. كلت يمكن نام .. تركت راسو .. فتح دحك للسكف ورد غمض عرفتو ما نايم بس القعر ثكل على عيونو وما عاد يفتح

... حطيت مخده يم السرير .. سمعت حلا حظنت ابوها وتبجي بقوه وتكلو صوجي بابا راح بسببي واخلاص واكفه وتبجي وهو ما رد بعدو مغمض

.. فاتت الحجيه باست راسو وكالتلهن خلنو يرتاح لا كلساع وحده ناحبه يمو .. ابعدن عنو ..

فتح عينو :- ها يمه

-ها يمه ابو حرب الله يصبر گليبك ييمه .. ودنكت باست راسها .. كضب ايدها وخلاها على راسو

. كعدت وخلت راسو بحظنها وتقرأ قرأن .. وتمسد براسو

... اني بمكاني متمدده .. وحلا خلت مخدتها يم راسي وتمددت .. واجه علي هم مد روحو بالطرف وخلاه جوه راسو مخده نام عليها هو ومحمد

هيام هم مدت بالنص وبناتها .. وجا نائل كملها شافلو دحسه وحصر روحو وهو ضعيف حط ايدو جوا راسو ونام ..غرفه صارة كومة بشر .. كلها نامت من التعب ..

هستوني غفيت واجا سعد بصوتو العابالك يحجي بسماعه

:- نائل انه ادور عليك وانت نايم عينا كوم يخوي بالجادر

نائل:- سعد واليرحم والديك بس ساعه انام والقران هاي كعدتي من البارحه ما نايم وصراخ الدفنه براسي راح يطك من الوجع

-عجل و الجادر ياهو الينام بي .. انه اريد اخذ عائلتي الفجر اجي

- مو ولد عمنا بالجادر يا سعد بس ساعه كتلك ..

كعد صراع من رجل امه :- نامي بمكانج يمه .. انه كايم للجادر سعد خلي ينام ...

-لا يخوي شصار انه اكف بس حسبالي هو يكف عنا ..

...ما رد صراع گام وضل يعبر من النايمين ويتعثر . كوا مفتح .. وطلع .. رديت نمت

لهناك فزيت .. طلعت من الغرفه البيت مطفى كن الكل نام .. فتت للمطبخ .. لكيت صراع ساند عكسو للطبله ومخلي اديه على راسو والجكاره بيدو ..

تقربت مديت اديه من ركبت و حظنتو وخليت راسي عليه .. شال راسو دحكني .. ما حجه .. شال ايدو راد يحط الجكاره بحلكو ..

سحبتها من ايدو و زتيتها بالسنك :- مو زينه على صحتك .. بقى يفرك بوجهو ..

-اسويلك جاي

-لا روحي نامي

-مجاي ارتاح ونام وانت ما مرتاح .. اسويلك جاي هم يعدل راسك وهم يفتح صوتك مبحوح .

تركتو ورحت شغلت النار جوا الجاي .. سحبت الكرسي .. كضبت ايدو وهو مدنك مغمض .. فتح .. تنهد ..

-شفتي حوبتج بيه شسوت ..

-لتكول هيج .. هذا قدرو

-بيوم الاخذتج امج كضبت جتافي .. وكالتلي ابوس ايدك بنتي امانة الله عندك لا تظلمها والله مظلومه ..

.. خذيتج وما رديتج الها .. ظلمت وضربت وقسيت وحرت شسويت ببنيه لا حول ولاوقوه ..

- هو يحجي ودموعي تجري .. طفيت الطباخ ورجعت.. كضبت ايدو .. بس اني سامحتك لا تكول هيج ..

- بس امج ما سامحت .. انه جاي احس بنارها الساعه من خذيتج واذيتج وما رديتج الها .. دارت الدنيا واخذو وليدي اذوه وما رجعوه ..

حجاها ونزلت دموعه وسحب اديه مني بسرعه .. عصر عيونه و بعد الدموع من خدو ..

-لتفكر هلتفكير صراع الله يخليك ..

-اكو شغله انه ضامها عنج وما كايلج بيها

-شنو

-من تعاركت ام سعد وياج وطردتج لبيت هيام واجتج امج رادت تاخذج وانه رفضت وكلتلها الا تعزلين من يحيى ..

وراها بعشرين يوم .. خابرتني وكالتلي عزلت بيتي عن بيت يحيى .. اريد بنتي

وكتها رفضت وكتلها بتج انسيها حرمتي ما الها طلعه من البيت .. ضلت تتوسل .. وما نطيتج ولا كتلج بالموضوع بوكتها چنه مزاعلين خفت تمشين عني وما ترجعيلي .. ...وخفت اخليها تتواصلين وياها وتقنعج وانه حتى ما ماخذج مره واثبتج ابيتي ..

وكلما تخابر انه كمت ارفض وما ارد .. لحد ما انهجمت الموصل .. وانكطعت اخبارها..

حرمتج منها وحرمتها منج .. وهاي جزاتي لاكيتها

-بقيت صافنه بوجهو .. شكد جنت اتمناها تسال عني حتى حقدت عليها ابعض المرات لان راحت وما فكرت بيا .. وهي طلعت ذابحه روحها بس حتى تردني

ما كدرت احجي انصدمت وهو شايل عيونو يدور اجابه بعيوني ودموعي تصب ..

بلعتها رغم مرارتها .. وابتسمتلو وكتلو .. لا تهتم ولا تفكر .. انت سويت الصح .. لو راجتلها يمكن هسه اني مقطوع راسي وياها لو .... اختنكت ما كدرت اعبر لو احجي .. حطيت اديه على وجهي وكمت ابجي ..

-ظالم واستاهل مو

-هزيت راسي لا .. وحنجرتي نار من العبره وابجي بسكوت حتى ما يطلع صوتنا .. حطيت راسي بصدرو وكمت ابجي حيل ..

... هو تنهد و يمسح على راسي .. فات احد .. شلت راسي منو ع السريع .. المطبخ مطفى وعيوني كلها دموع .. اريد افسر منو اللي فات

بس من الطول و الضخامه عرفتها اخلاص .. كمت وخليت شكر قليل و صبيتلو جاي ..

واخلاص كعدت تسألو ع الدفنه .. كال الها دفنتو بالقطعه مالت الحجي يم امو .. بقت تبجي ..

حطيتلو الجاي . هو اخذ الاستكانه وطلع برا .. صحتو وطلع يمو

-دخلي يول الزلم كلها برا نايمه ..

- عجل انت ليش ما تنام

-وهو المشتعل بنار يعرف النوم .. فوتي بويا نامي تراهم ساعتين ويكعدون ..

-اصعد يمي بالغرفه

-اختنك خليني كاعد هينا ..

اندار ومشى .. وكعد بالباب بنفس المكان الكعد بيه لما جان يدحك جثة ابنو وحاط اديه على راسو ..

.. صعدت لغرفتي .. حاولت انام .. الكالو ياكل براسي وافكر بأمي وابجي وارجع اتذكر شوكت بيا فتره هي رادتني ..

عصرت ذاكرتي وتذكرت جنت زعلانه منو لما رجع ام سعد وضربني ع الجبه اللبستها .. فعلا جنت زعلانه منو مدت شهر ولو كايلي بوكتها على امي اروح وما ارجع ع الشفته منو بوكتها

... بيها صالح ما كالي بس شيصبر كلبي احس خسرني شوفة امي شكد جنت زعلانه منها رغم خوفي وقلقي عليها .. تالي هيج طلعت

مدري شوكت نمت واني افكر وابجي .. كعدت .. الساعه 9 الصبح .. فزيت بسرعه ..

كمت نزلت .. وعقلي ياخذ وينطي وبعدني افكر بكلامو .. وكفت وي البنات بالمطبخ ع الجاي و السنك . بيه ما بيه اساعد ناسهم ما ترحم بالكال و الكلت

شويه وسمعت صراع وراي ويكولي :- هااا كعدتي

-اي نمت فوك . ما نمت انته

-النوم ما جاي يمر عيوني .. تعبت وما عندي طاقه اكف بعد

-اشرب فاليوم

-مو مال فاليوم .. الجادر مليان ويادلو وكفه .. بس صبيلي جاي ..

... جانت حنين يمي تساعدني .. هو دحك عينها برا .. اندار لكى علي واكف يشتغل وي الولد..

رجع دحك عليها وهي سارحه .. حجه :- فوتي جوا بنتي لا تگفين هينا

... انطيتو الجاي وابتسمت .. حتى وهو تعبان سوالفو ما يبطلها مركز بكلشي وما يفوتو شي ..

اخذ الجاي مني :- لا تضحكين ليليان .. من يشوفونج يسوها عليج جبيره

-لا والله مو بحال ضحك .. بس اضحك عليك ..

-خلف الله عليج .. اخذ الجاي واندار ..

-مو قصدي صراااع .. تعال .. هز راسو وهو يمشي ما رجع .. حجت اخلاص وراي :- شبي

اندرت الها .. لا هيج بيني وبينو

-الرجال تعبان وانتي تحظنين بي بليل و بالنهار تعلين كلبو .. تره ما ناقصج

-مو بحالج ما بيه ارد عليج .. بطرانه انتي... تركتها ومشيت ..

رد صراع خلا الاستكان .. فاتت حلا العيون وارمه خطيه .. فتحلها اديه .. واجت بحظنو تبجي .. وتلوم بنفسها على اخوها ..

مسح دموعها وكاللها :- صيري قويه بابا هذا يومو بعد الله يرحمو لا تحملين نفسج الذنب .. بقى يحجي وياها ويواسيها وهو تعبان ..

واني واخلاص واكفين ندحك ..

بقينا اليوم كلو .. خدمه بالفاتحه بس صراع تعب كلش من لما شاف ابنو مذبوح ما كام ينام ولا النوم يمر عينو لو شكد ما يحاول ..

ايام وهو ما نايم .. انطوه مهدئات ومنعوه من المنبهات الجاي و الكهوه .. ودستة علاج .. وهو موومثل اول حالو يقهر .

كمل الفاتحه ومن الصبح طلع لأبنو يزوره .. ورجع ضغطو صاعد و حالتو حاله ... لا يحجي ولا يبتسم وطول الوكت تعبان ما ينام على المهدئات ..

اسبوع خلصت الاجازه مال الفاتحه .. حظر ملابسو وكال باجر اطلع .. بجيت نحت .. لا تروح .. ما رد ..

داوم ب مكافحة الارهاب ..

مر 20 يوم وهو ما نازل .. وكل 5 ايام اكثر يخابر شلونكم شلون الصحه ويسدو .. ابد ما عندو مجال ويكول لا تخابروني انه اخابركم ..

الا ما يوم اتصل ع الحجي بليل هيج ساعه تريد تصير ب8 .. احنه بالمطبخ .. اني من اسمع صراع متصل اروح اركض بلكت احضل اسمع كلمه من صوته لان حيل اشتاقيتلو

.. ادحك بالحجي بس يكلو .. اي يابه هاي هي .. احسبها تم .. اركز اريد الكفلي كلمه .. ماكو

سد الخط منو الحجي وصاح على نائل ورد خابر سعد .. ودخلو للأستقبال .. رحت وراه

-عمو شبي صراع

-ما بي شي بنتي بس على فلوس و امور احنه نحلها .. دخل سعد واجتمعو ... اليكول اجتماع مغلق .. بقيت جوا ما نزلت ..

... شويه والموبايل كدامي واتصل صراع .. جنه العيد فزيت وكتلها يمه صراع يتصل وركضت للمطبخ رديت .

هو كال الو واني صحت اااخ يابه شكد مشتاقتلك

-عوفي الاشتياق هسه بس ركزيلي وياي مستعجل

-شكو شصاير

-دحكي شكو شي عدنا فوك ذهب فلوس سندات نزليها للحجي بقي جوا ايدج مبلغ بسيط

-ليش مفهمت

-مو وكت تفهمين ليليان

-بالي يمك صراع

-ليليان مشغول ما اكدر ارد انه من اشوف وكت اخابرج واحاجيج هسه بس نزلي الكتلج عليه خل يحولهم الحجي للحساب اللي بعمان

-داعش راح تدخل

-ليليان كوني حذره .. حوالي تنامين بغرفة الحجيه .. ونامي مستره لا تلبسين كصيف ومكشف الوضع خطر ووصي ام علي تجي يمكم ..

-يعني سقطت منطقتنا .

-لا بعدها بس مهدده .. كولي لامي ادير بالها على حلا

-ماشي عمري .. قفلتو منو ورحت لميت الذهب و الفلوس والسندات مالتو اللي بالجنطه السودا ومن بينهم لكيت الصليب مالتي بنفس الجنطه جنت مضيعتو

اخذتو وخليتو بصدري و نزلت الكال عليهن للحجي. حولنا الجوانا و الورانا العمان

اسمع حجيهم وخوفهم من داعش .. اني من يمي خفت . المنطقه مهدده و الخوف اكل الكلوب واحنه نسمع

هذا انقتل وهذا انسلب وهذا اللي انقطع براسو وكامو يمثلون بالجثث وما يرحمون احد وتمردهم طغى ع المناطق ..

الجيش ينسحب و داعش تتمرد وجثير ناس قتلى راحت وانكصت روسها وبكيفهم يطعنون هذا رافضي وهذا مرتد وهذا كافر ..

... نمنا والخوف بگلوبنا كل ساعه افز واتخيل واحد لابس دشداشه كصيرا و ملتحي ومسلح وسلاحو بوجهي . ليل ما نمتو من الكوابيس ..

لثاني يوم والكل بالبيت ما طلع لا نائل و لا الحجي .. بس ع الاخبار .. واحنه النسوان كاتلنه الخوف

واني حتى كالون لبست .. سترت روحي من فوك لجوا خاف نطلع نشرد على ساعه حتى بس البس واركض ..

... خابر صراع بليل كالو حجي اطلع من من الرمادي باجر ادك ساعة الصفر .. لم اهلنا وروحو لبغداد ..

كلو لا تبقى وخابر اللي تكدر عليه من عمامي وكلو اطلع .. وصلني خبر من جماعتي اللعسكريين اللي بالمنطقه ان اجتهم الاوامر ينسحبون خلال 48 ساعه ..

... تراكضنا اللم وانلملم .. اني طلعت حظرت جنطه وخليت بيها ملابس الي ولصراع وشيجي بيدي من غراضي ..

نزلت و سعد يصيح ويكول ما اطلع هذا صراع بكيفو يمشينا ما نبقى .. كلش اذا اضطريت اطلع لنسابتي بحديثه .. ما اطلع الانبار ..

قنعو راد وام سعد تبجي وتتوسل بي يمه ذول ما يعرفون الله وليدي لا تضل .. ما سمع منها و ودعهم وطلع ..

وهي فرفحت وراه وتبجي .. هيام جابت غراضها واجت اتصلت عليها الحجيه ..

جان الحجي يكول .. هيام تمشي ويانه

الحجيه:- عجل شلون نتركها هينا الدواعش يكتلون ابنها وياخذون بناتها ..

-بس السياره ما تكفي لان انه ما اسوق بالليل ما اشوف بس بسيارة نايل راح نطلع .. خابري على واحد من حموينج خل يجون يطلعوج ويانه لبغداد هم هم اهلهم لجهالج

-يابه هم من مات رجلي لليوم مدحكين بوجهي حتى هسه يجون ويطلعوني .. ناس على ناس نكعد بالسياره بس خل نشرد برواحنا

-جان يكلها لا والله يابه نحنا جثيرين وانتي ولدج كبار ما صغار وين نحطهم ..

علي:- روحي جدي ما بلازم انه اخذ امي واطلع بيها لبغداد .. امشي ولا تفكر

هيام:- ولك يمه شيطلعنا ووين نلكه سياره

-عجل شتردين يمه نتوسل ونبوس بالادين حتى ينقذونا وياخذونه وياهم .. ما اروح ولا وحده منج لو من خواتي تطلع

الحجيه مشت للحجي تحجي وياه .. ونائل ما ادخل ولا اجعلو سمع .. ورأيهم ان السياره ما تكفي ..

نائل و الحجي ونور حامل والتوم مالتهم و ام سعد و حلا و الحجيه و اني بسياره هونداي .. صدك متكفي بس وضع مو مال واحد ياخذ راحتو لازم حتى لو نكعد واحد ع اللاخ المهم نطلع ..

هيام بقت تبجي وعلي يكلها اصلا صوجج جبتينا هينا .. ويصيح خل نمشي للبيت وهي تتوسل بي

جان يكولها الحجي :- بويه هسه وكت معاير نسوان خابري على عيالج خل واحد من ولد عمج يطلع ويانه بس خابري ..

هيام :- يابه انت يا يوم وكفتلي لو سندتني بحياتك .. اطلع انه عكب ابو حرب بس الله اليه ..

شكد قهرتني وهي تبجي .. كاضبه موبايلي .. وادك على صراع وهم يحجون ويتراددون .. حركته حرك بالاتصال ..

يمكن 25 مكالمه .. رد عليه طالعه روحو ويصيح :- هاااااااا شرايددددده الف مره كايل لا تتصلون انتم انه اتصل حركتي عشيرتي شكووو

-بس اسمعني شبيك ... سولفتله الحجي باختصار ..

-وام علي وين هسه ؟

-هاي جدامي

-انطيني امي ..

-صحت حجيه وهي خطيه تتوسل بالحجي .. هاج صراع وياج ..

فزت بساع واخذتو رحت وراه .. وصاه تنطي سويج سيارة الحجي لعلي هو يسوق وهي تكعد بالصدر ادلي طريق بغداد وتمشي ..

وكال للحجيه .. انطيني علي .. خابر علي .. وانطاه رقم الشيخ مالتهم وكالو شيصير وياك تتصل بشيخ ريگان وتحجي وياه يسهلك امر واخذ امك وخواتك وجدتك واطلع بسيارة جدك ..

وكام يدلي بالطريق .. وكالو انطي الجهاز للحجي .. شال الجهاز وخلا بيدي ويأشرلي من وره خشمه عود ودي للحجي ..

اخذتو وكتلو عمو هذا صراع وياك ..

اخذ الاتصال .. ويكلو .. يابه سويج شيارتك تنطي لعلي

الحجي:- هاذ احط سيارتي بيدو

زكح بي صراع :- وكت جاااااهل يابه ما ضل وكت انطي انه خسارهااااا بس انطي

بس كالو .. هاي تم .. رجعت اخذت الاتصال كتلو ها صراع

-ها عيني يلا ديري بالج على روحج

-اكولك .. اريد اطلع وي هيام والحجيه مو وي نائل ..

-اخذ تنهيده .. روحي بس ديربي بالج على نفسج .. اخذ نفس قوي ... ليلياان

-هاا

-لا اله الا الله محمد رسول الله

-الرب يحفظك .. نهيتو منو ..

وخليت الجنطه بسيارة الحجي .. صاح نائل ليليان هينا صعدي

-لا كلت لصراع راح امشي وي هيام

هيام:- يولي خطر عليج ويانا امشي امي وي نائل

-لا اريد وياكم ..

-ابتسمت وحظنتني . اصعدي .. الغربه احسن من المنك وبيك ..

وصعدنا بسيارة وطلعنا ... جان شهر 11 من سنة 2014 ..

نفس هيج ايام دخلت البيت الحجي دحام وخلت الحياة صراع ... مرت سنه على دخولي الأنبار ..

طلعوني غصب من الموصل .. وجابوني لهين .. واليوم هم طلعنا غصب لبغداد.. ولسه شكد راح انغصب وارضى بامر واقع ..

الجو باد واظلم .. وماكو غير صوت علي وامو يتصايحون ويتكاونون .. ادحك الطريق اظلم .. كأنو طريق الموت

الخوف اللي تمالك گلوبنا ما ينوصف ذاك اليوم .. الحجيه عبرت عن خوفها بالدعاء وتنخى جدها الرسول ..

وهيام تعبر عن خوفها بالمكاون وي ابنها وعلي يعبر عنو بصياحو .. و اني وبنات هيام بسكوتنا ..

بس العيون تراقب الطريق و الحجيه تكلو امشي منا وامشي منا .. وتصيح على هيام تسكت حتى علي يشوف دربو ..

فجأه !!

جان تكول الحجيه :- هاذ مو طريق بغداد ..

علي:- جده والقران كتيلي منا اطلع شنو مو طريق بغداد

-لا جده انه كتلك مناك

-جده لا تكفريني والله كتيلي منا هسه احنه وييييين ..

-سكت وبقت ادحك بالطريق ..

وگلوبنا جفت من الخوف وعلي ينعل ويفشر ويغلط ويضرب بالستيرن .. ونمشي ونريد طريق نرجع ..

اخابر بصراع .. شبكه ماكو .. صفر ..

شلت راسي من الفون .. وما اشوف الا مسلحين كبالنا قاطعين الطريق .. لابسين دشاديش و الغتر سود ملفوفه على وجوهم ..

علي صفر الوجه ادحك عيونو ما تفسر .. الحجيه تصيح .. ديخيلك ربي وهيام دموعها جرت وحظنت بناتها ..

واني انتهيت لما وصلنا الهم وكالو صف عندك......يتبع

☆☆☆☆☆☆

#زينب_ماجد

يله اشبعوا قرايه اليوم للصبح ابجوا ع العموم النشر حيكون مثل السابق 3 ايام نشر ويوم استراحه

اعذروني لأن مقصرة وياكم بس خلصت امتحانات البارحة وفتحت الحساب واني مو الكاتبة بس اسعى الى نشر القصص الي تفيدكم انتوا حاولوا مو بس تقرون هم افهموا منهة وحاولوا انو توعون نفسكم من خلال القصص وشكرآ لتفاعلكم😘

... كونه شكبرها و صراع محتقن واعصاب ويزكح .. ومحمد ما نعرف وينو ، كل اللي اللي نعرفو ابنهم المتعدي عليه متأذي

و الزلم و العكل صارت بفلس برا ، نحن بس ندحك من جوا و الحجيه تدعي :- يا ستار استر اللهي دخيلك

و ام سعد تزلغ بوجهه وتصيح :- تصخم راسك يا سعد

واخلاص يمها تهدي بيها وتكولها :- كولي يا الله خاله هو وين راح محمد

فات صراع ع السريع صعد فوك ، صعدت وراه بسرعه

:- صراع شراح يصير

- هيريني ع السريييع

-اكولك بيت سعد هناك هم هادين علينا شكو نحن شعلينا

- هدومي وين الشماغ الاحمر وينووووو ، استعجلييي

- بقيت ادور وياه واطلعلو ، وهو دك عندو اتصال بقى يصيح ويغلط بالموبايل واني حايره شو الشماغ الاحمر ماكو وين راح

قفل الجهاز بعصبيه و زگح بيا :- ول سلاباتي وينهااااااااا

- الشماغ الاحمر ماكو ، عادي جوزي ؟

شو هذا طر الدشداشه بوجهي وفتح الباب وصاح :- اخلاااااااااص ، اخااااااااص ، وينج

.. ثواني و اجت ركض .. زكح بيها ع الشماغ كالتلو :- شلتو من ع الحبل كويتو وضميتو بكنتوري لحظه و هو يمك

.. اني وكفت متضايقه ، هو راح يبدل ، اجت مصفطه الشماغ وانطتو ع السريع جرو ولفو على راسو ..

اني اندرت الها :- منو سمحلج تمدين ايدج على ملابسو ممنوع تشيلين ملابسو من الحبل مفهوووم مالج علاقه بي

-وانتي شكو اهو رجلي مثل ما هو رجلج شنو مسجله عليه حكر باسمج

-اي الي وانتي ماااا..... قاطعنا وهو يدفعنا ويفوت من بيناتنا بقوه وطلع الغرفه

... مشت وغمتني عاد رجعتلها الغمه وكلتلها :- غمه وطمه تغمج واطمج واتخلصني منج

نزلت جوا ، الدنيا مخبوصه و الحجي يصيح ، وضاربين سعد و ومحمد ما هو ، و صراع ونائل طلعو بسياراتهم

للعصر بيت سعد اجو عدنا وعموتهم وولدهم اليشمغ لفو على وجوهم و الاسلاح بأيديهم وسدو الفرع بسياراتهم

و الكلوب خايفه ودكاتها ترجف ، توقعنا يا ساعه يهدون علينا ، و الحجي يصيح :- ولدي راح ينذبحون ولدي

و عمامهم يخابرون على الولد وكلها واكفه زلم ونسوان ، خبصه و هوسه للضالين

اني انشغل بالي على صراع ، و بقت عيني تناطر الباب

لورا المغرب فات صراع و ابن عمو اسليمان و سعد وياهم .. راحو للاستقبال ، ردت اروح اسمع بس تشكلنا بالمطبخ عشا وجاي

لهناك كومه معكلين اجو ، فات صراع اخذنا حاصل فاصل ع الاكل و الجاي واوامر ما تخلص وكل حجيو ويا هيام يوصي بيها

و نحن بالمطبخ ملتمين اللي ع الجاي و اللي تلكط خظره واللي تثرم و اللي تطبخ و اللي ع السنك غير الواكفات من بنات عمهم

اني واكفه ع الجاي ممفتهمه السالفه شنو ، بس عكال طالع عكال راجع ، وناس هوسه ، اريد افتهم شصار بس وكفة الجاي مانعتني افتهم ..

فتحت الشباك نور ، دحكت وياها حجت :- الهي بس كون تنحل دخيلك ، لا زلمنا تروح بيها

-هو شصاير

-يول محمد مدري ويا منو مبتلش مره متزوجه يمكن مدري لا ، بس سالفة شرف واهو ضارب واحد منهم و شارد ، وهاي وكعت براس زلمنا لا انوب يصير جتل ودم ونتعزا

-ادحك بيهم كلها عكل :- ادري شنو هسالفه هاي سلاح ودم و زلمنا الوكعت بيها شنو ماكو قانون روحو اشتكو ودورو على المعتدي نحن وزلمنا شعلينا نتهدد

والله اكره هالعكل هاي المانعه للذكاء ، لو بس يعوفوها يصير براسنا خير ...

كلهن اللي بالمطبخ ضحكن ويكولون :- اي والله

- والله شنو هالتخلف ونحن بعدنا فصول وطك و جتل ، شوف العالم وين وصلت

بقينا نسولف ونشتغل لحد لفوك ١٢ رجلينا تبندت .. عاد طشينا النسوان لغرفنا ، صعدت اريد انام بس ما تاخذ عيني نوم وصراع جوا لا ما يفوت كبال عيني واقفل الباب واحط المفتاح جو راسي ما يهدى بالي

بقيت عين كاعده وعين تغفي لبين ما صعد الساعه ب ٢ وفوك فات هو يبدل اني قفلت الباب ورجعت نمت

بعد ما حسيت ، لثاني يوم على نفس المنوال و الشغل ، لليل واكفه ع السنك ، جان اسمع صوت صراع من الهول يصيح :- ليلياااااااااان

عفت البيدي ع السريع وركضت الحجي كاعد و نائل و سعد و ولد عمومتهم جوا بالاستقبال

صراع الشرار تطافر من عيونا على كد عصبيتو ، دحك بيا كال :- حدري لهين دشوف

ادحك كلهم يدحكون بيا كتلو :-- شنو ؟

- كبل لا اسال تحلفين قسم يمين ما تجذبين وتكولين الصدك

-بدون ما تحلفني اني اكولك ما اجذب

ادحك الحجي صاير نار كن يغلي ويطفى من العصبيه ، حجه صراع :- البارحه من جنتي بالمطبخ شنو حجيتي

-ما اتذكر ، نحن نشتغل ونحجي جثير ، شحاجيه ؟

حجه بعصبيه :-ول بخصوص العكل و الزلم اللي اجت

.. ع السريع افتهمت بس كتلو :- ليش شنو وصلك ؟

وكف الحجي بعصبيه وكال :- يكولون مرت ابنك العود تهين عگلنا وتكول عنو مانع للذكاء وانو نحن متخلفين صحيح هالحجي ؟

ادحك بيهم واحدهم كأنو يريد ياكلني وكلها تطمش عليا ، اني حجيتها بشقه بس هم منفعلين وما يتشاقون شجاوب ؟

تلعثمت وبقيت امتمت كتلو :- عمو والله ما عالقصد اني حجيتها بضحك

نائل :- يعني مضبوط هالحجي

بعدو ديحجي جابني الحجي جف دار فكي كلو كدام الكل وزكح بيا :- تضحكين علينا يا البلا اصل نحن وعكلنا وعشايرنا نشرفج يا بلا تربيه

.. جنت اتوقع من صراع يدافعلي ، بس دحكت بيه مدمعه لكيتو متشفي بالجف الاكلتو ويدحك بعصبيه ويتنافخ

مسكت خدي و الدمعه بعيني وخجلانه انهانيت كدام الكل وموقف صعب وهم مستمرين يرزلون ، اشرلي صراع اصعد ..

ع السريع اندرت اصعد ، اخلاص كاضبه المحجر تضحك ، فتت منها وصعدت ابجي

طلعت و دموعي موكفن ، اني ما قصدي اهين احد والله بس ردت اكول لو يستخدمون القانون وهيج سوالف ما قصدي اهين ، بس اخلاص كلبتها ضدي

لنص الليل ما سكتت فحطت بجي وكلها بكوم ومنظر صراع من ما دافعلي كدامهم و تشفى بيه بكوم ثاني ، احس كسرني

خلص الهوسه جوا و صعد هو ، فات اني دافنه راسي بالمخده واشهك ، حجه :- وتبجين هم يول ؟ والله يابه يطلعلج

كعدت بهمه وحاجيتو بعصبيه :- انت بالذات ما تحجي بعد تنسى عندك مرا اسمها ليليان ، بدل ما تكف وياي واني حرمتك كعدت تتشفى بيا من ابوك هاني كدام الكل

-من ايدج ، انه كم مره كايل وازني كلامج كبل لا تحجين ، يول والله لو كايلتها كبالي وبيناتنا ، افهم عقلج واضحك وياج

بس الكلام واصل لعمامي وبنص المضيف ينكال مرت ابو حرب تهين بعگلنا ، ول خليتيني هلكدي وهم يگلون :- هاي اللي بايع لحمك وهاجر بنت عمك لاجلها تهين بأهلك و عشيرتك

وعمي يكلي لو تعز عشيرتك اطلكها من عين باجر ، وانه مصدك اكلهم يلفقون عليها اهي بنت اصول ما يطلع منها الشين ، تاليتج هيج تسودين وجهي كبالهم

يول الامه مكلوبه و ما ندري نموت نعدل و يفصلونه يكتلونه و الدنيا كايمه كاعده وانتي تطلع منج هيج كلمه و ابيتي ، ول حطيتيني بنص هدومي ينعل يومج

انه متأكد من حجيتي الكل ضحك بوجهج ، بس وحدتهن بكلبها الف شيطان وتتربصلج ع الكلمه تجين هيج تنطيهن الفرصه وتهينيني كبال العشيره

والله يعمي حل بيج ويطبج طوب

.. جر المخده ولف راسو ونام ، واني مستمره ابجي و احجي :- كلو من مرتك هاي الحاطها على گلبي الله ياخذكم واخلص ، اني شلي بيكم انهان كدام الكل وانت تتشفى بيه

احجي واشهك بقوه وابجي

-دنامي يول كافي والله راسي يوجعني

-معلييييك

-جر البطانيه لفوك راسو ونام ، اني بقيت مستمره لنص الليل بقيت اكح و الشهكه ذبحتني تطلع من كل صدري

كف الغطا وكال :- ول ابويه لهسه تبجين

گام جاب ماي وانطاني :- اشربي وارتاحي كافي

-ما اريد وخر يلا

- ول يابه والله علعلتيني بس كليلي انتي شوكت تعقلين ، تراني الف شغله بمخي بالقران راسي يوجعني كافي دخت

اشهك واكلو :- معليك ، بيا ، يلا

- براحتج يابه ، ارجع انام

رد تمدد و حط ايدو على وجهه

واني مستمره الا ما زكح بصوت عالي :- كااااااافي

انرعصت وجفلت وراحت الشهكه

كعد واندار :- انطمري لشوف يلااااااااا انطمررري

نمت ع السريع ، تمدد وسحبني بعصبيه وخلاني على ايدو وكال :- قسما بالله لو سمعتج تبجين لا اكوم انهيج هسه ، يلااااا نامي

غمضت عيوني ع السريع ونمنا ....... تمت

☆☆☆☆☆

مشهد قصير من احداث الجزء الثالث ، ناقة ال18 مليون 😁 ، اشكركم جدا على محبتكم و متابعتكم ..

لكل يسألون عن المراهقة والاربعيني

طبعا جاوبتكم قبل بس مدتقتنعون بلكلام قصة فيفيان وصراع هواية احداث بيهة لذلك نريد نوصل لنهايتهم تا نسردها الكم ونريد نشوف نهايتهم حلوة او لا يعني بما انو هي قصة واقعية ولحد الان تجري احداثها احنه انريد نسردلكم المختصر ونقدم لكم الأفضل اكيد احنه نريد نشوفكم النهاية السعيدة لذلك اني وانتوا بأنتظارها ومن تكون فيفيان جاهزة لسرد قصتها اني وانتوا جاهزين او نقرأها مثل ما تعرفون اكيد هي هم عندها أشغال وظروف وهم عندها حياتها للي تمارسها

ف اعذروني منين اجيبلكم المراهقة والاربعيني

بلاضافة لسوء الأوضاع والنت اليوم رجع وهم ضعيف كولش هسة مداكدر انشر القصص اللي وعدتكم بيها

اكيد ليليان تستاهل انو ننتظر قصتها نت نستمتع بيها اكثر اني هم ترة اريد اعرف شنو النهاية حالي حالكم

وشوفي همتكم بلقصص اللي حنشرهة

وحاولوا تستافدون من عبرة القصص اوكي حبايب

واذكركم بلقصص

#حكم شهاب

#ابي والغزلان

#عيناك فيروز

#الاخوات الخمسة

&نونة❤❤

مساء الخير حبايبي 😘😘

تعرفون مشتاقتلكم هوايةة بس ظروفي متسمح باستمرار اتواصل وياكم ع العموم

(اشكركم هواية ع تفاعلكم الحلو والذوق الجميل ب التعليقات الحلوة كنتوا متفهمين ولبقين مع الرواية والاشخاص على الرغم من وجود كثير سلبيات 😍😍)

حبيت اطمئن عليكم ولآن مشتاقتلكم

ع العموم عندي صديقة بلشت مشروعهة الضخم 😂😂بمناسبة الحظر الدائم واتمنى ادعموهة بلاشتراك بقناتهة وتطرحون المواضيع اللي تهمكم او اللي تريدون استفسارات عنهة او اي شي ملهم بلنسبة الكم تا تنزلة بقناتهة وتستفادون منها .

اوك حبايبي فدوا ادعموهة شكد متكدرون لانو صديقتي من الطفولة واحبهة كولش واريدهة تتونس لانو دائما تجيني ضايجة من كعدة البيت وحتى انتوا هم متضوجون..

اسم القناة /قناة فايولا الرسمية

https://youtu.be/FP-1Q99ciX8

اتمنى الدعم لا تفشلوني كدامهة

#الاشتراك