تحميل رواية مرهم علي الجرح بقلم تقي محمد pdf

صحيت الصباح بي صوت زول بنادي فيني فتحت عيوني لقيت دي توسل قلت ليها توسل😯

قالت لي مشتاقين قومي من قبيل منتظراكي تصحي لكن نومك تقيل

قلت ليها ليه ما قلتي لي جايه

قالت لي اتصلت في تلفونك كان مقفول وقلت اعملها ليك مفاجأه

قلت ليها احلى مفاجأه والله

قالت لي يلا قومي منتظراك تحت

قلت ليها تمام

مشيت استحميت واتسوكته😅

ونزلت تحت لقيتهم مجتمعين كلهم قعدت معاهم كانوا فاتحين موضوع العرس بعدها كلوا زول مشى بي اتجاه وطبعا تبيان كانت في غرفتها

بقينا انا وتوسل نتونس ،فجاه كدا اتزكرت موضوع نسمه سألت توسل قلت ليها في بت هنا في حينا دا اسمها نسمه قالت لي لالا!!

اتفاجأت طبعا كيف توسل ما بتعرف نسمه وهي ساكنه معانا في نفس الحي والغريب هي قالت انها طولت ساكنه هنا؟! ، قلت يمكن توسل ما كانت حاضراهم لمن جو المهم ما فكرت في الموضوع كتير اتونسنا انا وتوسل وطلعنا مع بعض اشتقت والله للطلعه معاها

رجعنا البيت لقيت تالين واقفه لينا جمب الباب قالت لينا مشيتوا وين توسل قالت ليها طلعنا مشوار ، مالك في شنو قالت ليها منتظره حضرت سيادتها واشرت علي

قلت ليها خير في شنو قالت لي تلفونك وين عليك الله افتحي تلفونك دا عشان حازم كل مره يتصل علي ويقول دايرك

قلت ليها تماام

مشت طوالي تاني ما اتكلمت

توسل قالت لي انتي تلفونك مالو انا لي كم يوم اتصل ليك تلفونك مغلق حكيت ليها انو تلفوني وقع وشاشتوا انكسرت قالت لي ليه ما كلمتي حازم يشتري ليك واحد

قلت ليها انا ما عايزه اضغط عليهو قالت لي انتي يابت هبله كيف تضغطي عليهو في النهايه هو خطيبك وقريبا ح يبقى زوجك تضغطي عليهو دي شنو كمان اتصلي عليهو ووريهو لو ما دايره توريهو انا بوريهو قلت ليها يا توسل ياخ قالت لي اسكتي بس

دخلنا وهي اتصلت على حازم واتكلمت معاهو وورتو انو تلفوني انكسر قال ليها اديني مزن اتكلم معاي وشاكلني لشنو ما اوريهو و و و

المهم رسل لي توسل قروش في حسابها وقال ليها سوقيها واشتروا تلفون

قالت لي هسي الوقت إتأخر بكره نمشي نشتري التلفون

المهم اليوم مره بي تفاصيلوا

🌺🌺🌺

صباح اليوم التاني مشينا انا وتوسل اشترينا التلفون ومرت الايام سريع وجاء يوم نضافة الخدار مشينا انا وتوسل وتالين ومعانا كم بت جبنا عدة الاشتراك وبقينا شغالين نضافه في البيت وقفنا بالنهار قلنا نتم العصر عملنا ماسكات واتمسحنا العصر قسمنا الشغل انا وتوسل مسكنا الحوش وتالين والبنات البرندات والغرف طبعا البيت كبير شديد بدينا نكنس لمن انتهينا توسل قالت لي دقيقه امشي اجيب حاجه نكب فيها الوسخ قلت ليها تمام هي مشت وانا مسكت تلفوني فتحت الفيسبوك والواتس اثناء ما شغاله كدا

في زول مدى لي اكياس قدام وشي عرفت انو دي توسل قلت ليها يا توسل ياخ زحي ..بس ماف زول ردا علي رفعت راسي لقيت دا حازم!! قلت ليهو حازم!! متين جيت قال لي قبل شويه وما كلمتك عشان عاملها ليك مفاجأه

قلت ليهو واحلى مفاجأه ياخ البيت كان ما عندوا اي طعم بعد سافرتوا انت وتوسل بس هسي رجع طعموا

قال لي تاني ما مسافر زاتو الا وانتي معاي...

🌺🌺🌺

اتكلمنا مع بعض مسافه وكان جايب لي حاجات من السعوديه لكن قال لي مفاجأه المهم مشيت كملت باقي نضافه وبالليل بدينا نضافة الخدار الحريم الكبار كانن شغالات ينضفن في الخدار اما نحن كنا شغالين نرتب ونجيب الحاجات وبرضو نفرم في عجين الطعميه اشتغلنا وكل شويه حازم يجي يقول لي اخواتو مرتي اوعى تشغلوها كتير ولمن يجي يلقاني شايله حاجه بشيلها مني لمن خجلني...

🌺🌺🌺

صباح اليوم التاني من الصباح صحينا وبدينا ترتيب العزومه كانت فطور عشان كدا صحينا من الساعه اربعه ،، الرجال ضبحوا وجابوا طباخ زي الساعه ٧ كدا بدينا

نرص في الاكل في الصحاني وصينيه طالعه وصينيه داخله انتهينا مع ازان الضهر وبعد داك كان في ناس كتيره توسل قالت لي خلينا نمشي الكوفير لي تبيان لانو الوقت اتأخر خلي باقي البنات يشتغلوا مشينا جهزنا نفسنا عشان نمشي لي تبيان طلعنا لاقانا حازم قال لينا ماشين وين قلنا ليهو ماشين لي تبيان في الكوفير قال لينا طيب ارح اوصلكم ركبنا معاهو وصلنا ومدى لي كيس قال لي دي المفاجأه الاولى ما تفتحيها الا تدخلي قلت ليهو تمام شلتوا ودخلنا توسل قالت لي افتحيها نشوف فتحت الكيس لقيت صندوق هدايا فتحتو لقيت فستان بالون الكحلي منفوش وفيهو لمعه بالفضي توسل قالت لي واو اخوي طلع ما هيين بعرف يختار ، عارفه دا مع لونك ح تطلعي نجفه

بالجد الفستان كان رهييب شديد لقيت معاهو قعب بالون الفضي وطرحه بالفضي

دخلنا لي تبيان قالت لينا ما بدري ليه اتأخرتوا حكينا ليها بي كمية الناس الجو و الترتيبات ووو المهم قعدنا معاها جات الكوفيره عملت ليها ماسكات ونحن عملنا معاها قالت لينا دايرين تطفوا نورتي توسل قالت ليها غايتو كان في زول بطفئ نورتك فهي مزن قلت ليها يازوله انا ما سمحه لي الدرجه دي

المهم بعد غسلنا وشنا عملنا حمام مغربي وصلينا العصر وكوينا شعرنا بعد انتهينا بدينا نتمكيج

🌺🌺🌺

انا الراويه

في بيت عمر بعد العقد الاغاني اشتغلت والناس فرحانه الا هي كانت موجوعه على اولادها وهو كان السبب هو القتل اولادها شافتو وهو جاي فرحان من العقد دخل البيت تبعتوا كان ماشي وهي ماشه وراهو لحدي ما انتبه ليها اتلفت قال ليها رجاء؟

قالت ليهو انت القتلت اولادي صح احسن تعترف

قال ليها انتي جنيتي ولا شنو

قالت ليهو زي ما عملت في اخوك زمان ولا ناسي اخوك ماف زول قتلوا غيرك قايلني ما عارفه انا سمعتك لمن كنت بتتكلم اليوم داك بالتلفون وقلت لي جماعتك يكتلوهو كلو عشان تورث قروشوا وهسي داير تعمل في بتو نفس العملتوا زمان صح

عمر كان مصدوم قال لي رجاء انتي بتخرفي ولا شنو ماف كلام من الانتي بتقولي فيهو دا

رجاء قالت ليهو لو فضلت تلف دشلميت مره الحقيقه ح تظهر ح تظهر وكون متأكد انو انا ح اقيف في وشك لحدي الحقيقه ما تظهر ..

اتلفتت عشان تمشي عمر شال حديده وضربها بيها في راسها صرخت ووقعت في الارض وراسها كان بينزف هو انصدم شديد وما عرف يتصرف شالها سريع وطلع بالباب الخلفي ختاها في الحديقه وفات خلاها اول ما مشى في زول جاء وراهو وقف جمب رجاء

عند عمر

_يالله كلو بي سبب غبائي اصلا كان مفترض تموت بس ما بالطريقه دي هسي ح اعمل شنو لو الشرطه جات اكيد لو كشفوا البصمات ح يلقوا بصماتي انا لازم اطلع سريع من هنا قبل ما يعرفوا بي اختفاء رجاء وقبل الشرطه ما تجي...

الفصل

عمر طلع صادفتو سلمى قالت ليهو عمر وين ماشي؟

قال ليها عندي مشوار ضروري طالع وجاي احتمال اتأخر

قالت ليهو اجي تتأخر كيف يعني والعرس.. بتك جايبنها من الكوفير بعد شويه على الاقل ارجاها

عمر:ما بقدر ياسلمى مستعجل وبعدين بتي عقدت ليها تاني في شنو؟ زحي لي انا اتأخرت

سلمى:وي الراجل دا جنه ولا شنو كيف بتو ما داير يشوفها

عمر طلع ركب عربيتو وطلع بس وقفتوا عربية الشرطه ونزلوهو من العربيه وساقوهو من دون زول ما يحس بيهو

🌺🌺🌺

عند تبيان جهزوا وكانوا منتظرين العريس بعد مسافه تلفون تبيان رن وكان دا راجلها جاء داخل وتوسل ومزن طلعوا لقوا حازم منتظرهم ركبوا معاهو

قال ليهم بسم الله ماشاء الله

بعدها تبيان وراجلها جو ركبوا في العربيه قدامهم واتحركوا لي الصاله وهناك الحفله كانت شغاله لمن وصلوا دخلوا العروس بي اغنية علي الشيخ

يلاك معاي نمشي المكان

البيهو كان ريدنا ابتدأ

بي الابتسام واحلى سلام غنوات هوانا نرددا

🌺🌺🌺

دخلوا العرسان وبدت الاغاني واثناء ما الحفله شغاله والناس فرحانه جات الشرطه دخلوا الصاله ووقفوا الاغاني واعتقلوا العريس

الناس كانوا مصدونين من الحاصل وبسألوا في شنو واحد من رجال الشرطه قال ليهم نحن عايزين العريس في كلمتين وطلعوا ساقوهو الناس اتفرتقوا بعد الحصل وسلمى وبناتها وحازم وسليمان راجل رجاء ومعاهم كم زول كدا من اهل البيت ومزن طلعوا مشوا القسم وهنا يادوب فقدوا رجاء

سلمى :حازم انت ما شفت رجاء

حازم:لالا والله يمكن ركبت مع عمو سليمان في العربيه ورا

المهم وصلوا القسم وشافوا عمر برضو هناك وهنا الامور اتعقدت شديد ماف زول كان فاهم حاجه

سلمى:عمر!! انت هنا ؟ وليه ماسكنك الشرطه في شنو يا عمر

عمر ماردا عليها الشرطي جاء ساقوا وقال ليهم بعد شويه في محكمه

سلمى :محكمه!! محكمة شنو؟ يا جماعه دا كلام شنو دا

الشرطي فات سليمان قال لي سلمى خلينا نشوف محامي سريع لانو ماف وقت

حازم قال ليهم انا عارف محامي شاطر ح إتصل ليهو

سلمى قالت ليهو اسرع بس

🌺🌺🌺

عند عمر جاء الشرطي وقال ليهو في ضيف دايرك وطلع

بعد مسافه جا زول لابس كمامه وطاقيه طويله مقطيه ملامحو وقعد جمب عمر...

عمر عاين ليهو مسافه وابتسم

=ابتسامتك تخوف يا عمو

عمر: ايوا عارف

= لكن في حاجات كتيره ما عارفها

عمر:منتظر اعرفها منك

=من عيوني انتظر المحكمه وشوف بعينك ولا ح تحتاج لي محامي اصلا

عمر :عاين ليهو مسافه وقال ليهو نشوف

الشاب طلع وبعد مسافه المحامي جاء وبقى يسأل في عمر وهو يجاوب ليهو... في النهايه عمر قال ليهو لو طلعت من هنا اكتب المبلغ الانت عايزو بديك ليهو..

المحامي قال ليهو ان شاء الله

بعد مسافه الشرطي جاء وساق عمر وطلعوا على المحكمه

في المحكمه كانوا كلهم قاعدين جابوا عمر وخالد راجل تبيان دخلوهم الاتنين ووراهم جاء الشاب القبيل جاء لي عمر دخلوا وقعدوا القاضي بقى يتكلم

_عمر آسر محمود متهم بي قتل السيد فارس آسر محمود و متهم بي محاولة اقتيال الشاب محمد سليمان ومتهم ايضا بتهمت قتل السيده رجاء طارق اخت زوجتك سلمى طارق هنا الناس كلهم انصدموا رجاء؟!

سليمان كان اكتر زول مصدوم في البدايه اولادوا وهسب مرتوا كيف؟!

_ومتهم بجريمة التعامل مع اكبر تاجر مخدرات وهو خالد(راجل تبيان)

=سيدي ان التهمه الموجه الى موكلي ما هي الا اكاذيب...

*سيدي اسمح لي (الشاب)

طلع فلاشه وركبها في الشاشه اشتغل فيديو وهنا كانت الصدمه

الفيديو كان كالاتي

عمر كان واقف وبتكلم في التلفون وجات لقطات وهو بتكلم مع خالد راجل تبيان قال ليهو دايرين مني كم

خالد قال ليهو عشرين مليار دي بس حقت البضاعه الاولى وظهر لقطه تانيه وهو بقول لي اسماعيل وصلت وين ..تمام اقتل فارس بس بعد ما تعرف مكان الاوراق!! وتجي لقطه ليهو وهو واقف جمب جثة فارس

عمر:حتى لو ما لقيت الورق عندك ح القاهو بس احسن حاجه انو الورق دا بقى ماف ليهو مالك ولا وريث بتك وفي قبضتي وابتسم اخر لقطه كانت ليهو لمن كان شايل رجاء وخلاها في الحديقه الخلفيه وهرب

*سيدي هذا المجرم قام بقتل اخوهو وزوجته بدم بارد كما رأيت في الفيديو

عمر:لا يا حضرة القاضي الزول دا كزاب انا ما عملت حاجه الفيديو دا كلو تلفيق

*اصبر حبه يا عمر وشوف الشاهد الجاي دا

دخل المحكمه راجل كبير ضخم

عمر(في نفسوا) :دا اسماعيل !! معقوله جاي يعترف!

*اسماعيل دا زراع عمر وشريكوا في جرايمو اتفضل يا إسماعيل

إسماعيل:ايوا يا حضرة القاضي انا ساعدت عمر في كل حاجه حتى انا القتلت فارس ومرتو..

قاطعوا صوت صريخ كانت دي مزن وفجأه اغمى عليها جروا عليها وطلعوها بره جات عربية الاسعاف وودوها المستشفى توسل طلعت معاها والباقين اطروا يجوا راجعين الشاب كان طالع بس القاضي وقفوا

القاضي:واصل يا إسماعيل..

اسماعيل:وبرضوا انا فجرت بيت محمد سليمان في برطانيا

القاضي:شنو الخلاك تعترف بي عمايلك دي ؟

إسماعيل :الذنب انا مريت بموقف خلاني اتعظ وعايز اكفر عن زنوبي عشان كدا انا إعترفتا وما ندمان على كل كلمه ح اقولها

القاضي:علاقة خالد بي عمر شنو

إسماعيل:خالد تاجر مخدرات وهو كان صاحب عمر شديد وفي يوم شركة عمر اتعرضت لي الافلاس وعشان ما يخسر شغلوا طلب المساعده من خالد وخالد وافق انو يساعدوا بس بشرط انو عمر يشتغل معاهو...

القاضي:شنو سبب افلاس الشركه

إسماعيل:الديون كانت مديونه شديد لي درجة انو ما قدرنا نصرف لي الموظفين المرتبات الشهريه

كان مع كل كلمه يقولها اسماعيل يصدم بيها الجماعه ما كانو متوقعين عمر يطلع بي القذاره دي واكتر زوله كانت مضرره تبيان

المحامي حق عمر كلو ما يحاول يتدخل يسكتوا الشاب

القاضي قال ليهو :نكتفي بي الكلام دا ح يكون في محكمه بكره للنطق بالحكم.. الساعه سبعه صباحا

اول ما المحكمه انتهت الشاب طلع سريع

تبيان كانت بتبكي وسلمى نفس الشي اما سليمان كان في حاله تانيه بعد مسافه الشاب جاء ليهم قال ليهم ما تخافوا رجاء عايشه ومحمد عايش وموده كمان سليمان قال ليهو انت بتتكلم جد؟ قال ليهو ايواا

سلمى قالت ليهو وديني لي اختي عليك الله وديني ليها

قال ليها م ح تقدروا تشوفوها هسي الا بكره إن شاء الله

ومشى خلاهم

🌺🌺🌺

عند مزن

الدكتور جاء طالع لاقتوا توسل قالت ليهو يا دكتور مزن كويسه صح

الدكتور قال ليها للاسف!!...

الفصل

الدكتور قال لي توسل للاسف المريضه دخلت في غيبوبه وهي مسبقا كانت مصابه بانهيار عصبي ف وضعها حرج جدا

توسل:ياربي

الدكتور مشى بعد مسافه جاء الولد داك قال لي توسل مزن وين؟

توسل بقت تعاين ليهو قالت ليهو كلو بي سببك انت السبب في حالتها دي قاعد تتبلى على ابوي بالمنطق كدا في زول بقتل اخوهو.. وبعدين خالتي كيف تقول قتلها ؟! مشكلتوا معاها شنو عشان يقتلها

قال ليها بي برود ونظرات تهديد: مزن وين؟

توسل خافت واشرت ليهو على الباب

عاين لقاها دي غرفة العنايه المركزه!!

قال ليها مزن هنا؟!

قالت ليهو اي

مشى تجاه الباب شاف الدكاتره والممرضين جوا وعينو وقعت عليها كانت ممده ومركبين فيها كمية اجهزه عاين لي جهاز النبضات كان مستقر بعد مسافه الدكتور جاء سألوا عن حالتها قال ليهو انو هي دخلت في غيبوبه اتجاوزت مرحلت الخطر لكن لسه باقي تصحى

بعد مسافه جاء سليمان وحازم اما سلمى وبناتها اصلا ما كانوا بطيقوا مزن عشان كدا ما جو...

صباح اليوم التاني

كلهم كانوا متوترين ومنتظرين رد الدكتور على حالة مزن بس في زول كان اكترهم توتر كان يمشي ويجي سليمان قال ليهو ياولدي انت كويس؟! شايفك تمشي وتجي مزن بتبقى ليك؟

قال ليهو يا عم دي وصيه لازم احافظ عليها..

الدكتور جاء طالع مشوا عليهو

قال ليهم حالتها مستقره ح ننقلها لي غرفه عاديه

فعلا نقلوا مزن لي غرفه عاديه

بعدها مشوا المحكمه الا الشاب طلع معاهم وجاء راجع اتصل تلفون

_الوو ... يا مرحب كيفك؟ ... دايرك تمشي قدامي المحكمه عندي شغل بسيط اتمو واجي لاحقك... تسلم... مع السلامه

مشى لي الدكتور قال ليهو انا عايز انقل المريضه لي مستشفى تاني دايرك تكتب لي التحويل

قال ليهو انت منو وبتقرب المريضه بي شنو وعايز تنقلها لي وين؟

قال ليهو انا زوجها!! وعايز انقلها لي مستشفى كير ودا الاثبات

الدكتور كتب ليهو التحويل نقلوها بي اسعاف للمستشفى وهناك تاني كتب ليها تحويل وحولها لي مستشفى تاني دخلوها غرفه وكشفوا عليها الدكتور جاهو وقال ليهو هي كويسه جدا بس طبعا زي ما عارف هي داخله في غيبوبه وكان عندها انهيار عصبي شديد نتوقع الاحسن ان شاء الله

الدكتور مشى وهو دخل طلع الطاقيه والكمامه ليتضح انو عهد!!

مشى قعد جمبها مرر يدو على راسها ووشها قال ليها مشتاقين مزونتي انتي ما اشتقتي لي .. وعد مني ارجع ليك حقك وعد مني كل دمعه نزلت من عينك ح تنزل دم منو وما ح ارتاح الا وهو محكوم ليهو بالاعدام!! .. تتزكري لمن كنت بوعدك كتير زمان وانفذ وعدي الدوره دي برضو ح انفذ وعدي ليك بس انتي ابقي كويسه يا مزن..

قاطعوا صوت طرق في الباب قال اتفضل دخلت بت والبت دي كانت نسمه!!

قال ليها جيتي في وقتك خليك معاها ماشي المحكمه

قالت ليهو تماام

نسمه قعدت معاها وهو طلع مشى المحكمه لمن وصل لقى دور عمر جاء حكموا لي خالد بي السجن مدى الحياة على الجرائم الارتكبها...

_عمر آسر محمود بعد النظر الى التهمه الموجه اليك والنظر الى الادله التي قدمها محاميك!

عهد في اللحظه دي عاين للمحامي واستغرب والمحامي ابتسم ليهو

القاضى :قررت المحكمه بعد الاطلاع على الادله والاتهامات المقدمه من الطرفين بالحكم التالي وفق المواد المزكوره فأن المتهم عمر آسر محمود حكم عليه بالشنق حتى للموت...

🌺🌺🌺

وقل له مهما يطول الظلم🌌 تشرق شمس الصباح 🌤على القلوب وتدحر الألم الدفين❤️‍🩹

الفصل

بعد المحكمه سلمى وبناتها وحازم طلعوا مدمرين نفسيا يعني خلاص ابوهم ح يموت لكن دا حد من حدود الله وجب اي انسان يسعى في ارهاب الناس وسفك الدماء البشريه وجب عليه الموت.. وكل هذا كان دافعه الحسد والغيره وصلت به لقتل اخوهو عشان القروش وما كان متوقع انو في ناس ح تحفر وراهو وتعرف جرايمو ولمن عرف انو محمد سليمان عرف موضوعو قرر يقتلو بس ربنا كريم والحقيقه كان لابد تظهر عشان كدا اطفوا نار الحسد قبل تشتعل وتحرق وتحرقكم معاها..

عهد طلع سريع ومشى المستشفى..

اما الباقين مشوا المستشفى وما لقوا مزن الدكتور قال ليهم جا زوجها ونقلها لي مستشفى تانيه

حازم: كيف يعني زوجها يادكتور هي ما متزوجه

_لأ هي متزوجه

اتلفت لقى دا الشاب (عهد) كان لابس الطاقيه والكمامه عشان كدا ما عرفو

حازم مشى عليهو وكان داير يضربوا بس عهد مسكو ونزل ليهو يدو قال ليهو احترم المؤسسه يا اخينا لكن لو مصر تضربني تعال بره😏

حازم قال ليهو وين مزن؟

قال ليهو زي ما سمعت الدكتور قال ليك ساقها زوجها انت دخلك شنو..

حازم: وزوجها منو؟!

قال ليهو انا زوجها طلع الكمامه قال ليهو انا زوجها

سليمان: محمد!!

ومشى ضم ولدو عليهو مسافه وسلمى برضو قالت ليهو حمد لله على سلامتك يا ولدي قال ليها الله يسلمك

اما تبيان وتوسل كانوا بعاينوا ليهو بي حقد شديد

سليمان قال ليهو اختك وين يا محمد وامك وين ؟ وكيف طلعت من الانفجار داك ؟ واختك كويسه برضو صح؟

قال ليهو اي موده كويسه ما حصل ليها حاجه واساسا نحن ما كنا في البيت لمن حصل الانفجار بس ...

عوده الى الماضى

🌺🌺🌺

كان قاعد جمب البحر وسارح لبعيد وفي يدو سجاره

فجأه

_احم احم

are you speak Arabic?!

عهد اتلفت لقى بت واقفه ابتسم ليها ابتسامه منكسره

قعدت جمبو

عهد: ميمي!! 🥺

_حبيبي ياروحي مالك منكسر وعيونك مليانه دموع كدا

عهد: مابعرف انتي رايك شنو اكيد انتي بتعرفي اخوكي

_اكيد واكتر من روحي كمان... اكيد زعلان من مزن

عهد عاين ليها وابتسم ابتسامه منكسره

عهد: ما قلتي لي متين جيتي

_جيت هسي ياداب الطياره نزلتني وصلت بيتك لقيتك طالع طوالي تبعتك كنت دايره اعملها ليك مفاجأه بس انت فاجأتني قول يا محمد مالك ياخ؟!

عهد: مزن...

_كنت متأكده البت دي تكون ورا الموضوع

عهد: مزن مشت خلتني يا ميمي ليه عملت كدا انا بحبها شديد

_يا اخوي...

عهد: خلتني بعد ما اتعلقت بيها هي كسرتني ياموده!

موده: ما عاش من يكسرك يا اخوي يلا قوم خلينا نمشي هسي وبكره نشوف حل للموضوع دا.....

رجعوا البيت والصباح بدري جهزوا عشان يمشوا

جات ليزا

عهد قال ليها "Oh Lisa, you've come just in time, we're going out, take the keys, the house is in your care."

( "يا ليزا، لقد وصلتِ في الوقت المناسب، سنخرج، خذي المفاتيح، المنزل في رعايتك.")

طلعوا ركبوا تكسي للمطار قبل يركبوا سمعوا الانفجار ..

لمن عهد عرف انو دا البيت حقو طوالي خطر في بالو عمر وفكر انو هو برضو يمكن عندو يد في اختفاء مزن اتصل على ديفد بالتلفون في البدايه ديفد اتفاجأ لمن عرف انو محمد حي بس محمد قال ليهو عايزك تخفي الموضوع وتزيع انو انا اتوفيت...

لمن اتحركوا جو السودان موده اتصل على امها ، امها اتفاجأت وقعدت تبكي موده طمنتها عليهم وقالت ليها امي نحن دايرنك في موضوع مهم بس ما تكلمي زول وفعلا رجاء اتفقت معاهم انو تعتبرهم ماتو وتتهم عمر بي كدا عشان الحقيقه تظهر ، رجاء لمن سمعت صوت محمد نست زعلها منو كلو وقررت تساعدهم بس ما كانت معترفه بي مزن زوجه لي محمد

🌺🌺🌺

محمد:ودي كل القصه يا ابوي

توسل:ابوي ما قاتل ابوي مستحيل يكون قاتل😭😭 انت كزاب😭

سلمى: لأ هو ما كزاب كلامو صح وكان لابد للحقيقه تظهر يا توسل وكمان انا ساعدتو طمعي وحبي للقروش خلاني اساعدوا يقتل اخوهو كلو بي سببي انا مفترض اموت😭😭

كان في توتر شديد ودموع وانكسارات شديده

سليمان :طيب يا محمد امك نحن شفنا عمر ضربها بي حديده في راسها شنو الحصل؟ ولا الفيديو مفبرك؟

محمد:لأ الفيديو ما مفبرك هو فعلا ضرب امي بس انا لحقتها سريع ومشينا المستشفى الدكتور قال انو الضربه قويه بس ما اثرت على المخ والحمد لله اتعافت وهسي هي في المستشفى في غرفه عاديه

كلهم اصروا عليهو انو يمشوا ليها وفعلا وداهم ليها ومشي غرفه مزن الكانت في نفس المستشفى

مشى قعد جمبها نسمه قالت ليهو المحكمه حكمة بي شنو؟

قال ليها بالاعدام

عاينت لي مزن وقالت ليهو مسكينه عانت شديد في حياتها لا اهل يسندوها ولا عم قام بالواجب

عاين ليها عهد وقال ليها بس عندها زوج بحبها وبموت اذا هي ماتت

قالت ليهو بعيد الشر يا اخوي..

قال ليها امشي غسلي وشك من المكياج وشوفي ابوي بره منتظرك

هي طلعت وهو فضل قاعد مع مزن

كان بعاين ليها ويتمعن في ملامحها فجأه شاف يدها تتحرك وقف على حيلو مندهش وقال ليها مزن!!

فتحت عيونها وعاينت لي محمد مسافه وغمضت تاني محمد جرى نادى الدكتور وجاء...

الدكتور كشف عليها وقال ليهو الحمد لله كونها تصحى من الغيبوبه دي حاجه حلوه شديد ودا بدل على انها قويه صحتها كويسه ح اكتب ليها على شوية ادويه تديهم ليها وإن شاء الله ربنا يتم الشفاء الدكتور كتب الأدويه واداها محمد وطلع...

محمد قعد يعاين لي مزن مسافه وسلم عليها في راسها وطلع اتصل تلفون قال موده تعالي سريع مزن صحت...

فعلا بعد دقائق جات ومعاها ابوها وحازم دخلوا قعدوا مع مزن مع انو هي لسه كانت غايبه عن الوعي لكن اتجاوزة مرحلت الغيبوبه ..محمد طلع جاب الأدويه وجاء لقى مزن صحت وكانت قاعده على حيلها اول ما شافت محمد صرخت عهد!

الفصل

عهد!!

محمد مشى عليها وضماها شديد وقال ليها مزونتي انا حي معليش حبيبتي على كل حاجه حصلت ليك بي سببي انا اسف

مزن:عهد انت حي!! عهد😭😭

محمد: خلاص يا مزن ما تبكي ما ياهو انا واقف قدامك

مزن: عهد عمي قتل ابوي يا عهد عمي قتلوا😭😭💔 قتل ابوي وأمي وهم ماليهم زنب ياعهد كلو عشان القروش يتمني ياعهد انا كنت لمن اشوف صحباتي مع اهلهم ابكي وامشي اشكي ليهو وهو القتلهم

مزن كانت بتبكي بحرقه وعهد كان ضاميها عليهو ويهدي فيها لحدي ما جات الممرضه وادتها حقنه مهدئه

بعدها مزن نامت طوالي وكلهم طلعوا بره خلوها ترتاح

🌺🌺🌺

كم اود ان اصرخ واخبر العالم ان هناك جرحاً بداخلي لايزال ينزف جرحاً لن تضمده السنين ،، وقلبا يئس من الحياة فهل الى سلامٍ من سبيل❤️‍🩹

🌺🌺🌺

بعد مرور سنه

عهد: No, don't put that here, put it there, geez, this stupid worker... everything I have to tell you guys 😒

(لا لاتضع هذه هنا ضعها هناك عاملٌ غبي اأخبرك كل شئٍ انا 😒)

مزن:براحه عليهو يا عهد

عهد: ياخ بطئ وما شغال زي الناس هسي الضيوف بجو

مزن:لسه الزمن بدري لكن

عهد:مزن نحن في برطانيا ما في السودان هنا الناس بالتزموا بالمواعيد

🌺🌺🌺

تايهيين تعالوا احكي ليكم الحصل شنو مزن صحت من الغيبوبه وعرفت انو عمها دخل السجن وسلمى طلبت السماح من مزن وسافرت الحج تكفر عن زنوبها وعمر نفزوا فيهو الحكم كان اليوم داك يوم قاسي بس يستحق ولكل ظالم ان يشرب من نفس الكأس التي أذاقها للناس عهد ومزن رجعوا برطانيا وعلاقتهم اتحسنت عهد كان بساعد مزن لحدي ما حالتها النفسيه استقرت ووقفتوا معاها كانت بالدنيا في الاخير هو الوحيد الكان ليها السند الحقيقي ووقف معاها وجابوا احلى بنوته سموها وسن كانت حلوه شديد شايله لون مزن وصحتها وملامح ابوها...

حازم اتزوج وسافر السعوديه وتوسل سافرت لي راجلها وتبيان وتالين سافروا مع امهم الحج وقعدوا مع حازم مرت الايام ومزن وعهد افتتحوا مستشفى جديده وياهو افتتاحها اليوم وكان الحضور ناس كتيره إضافه لي رجاء وسليمان وموده افتتحوا المستشفى والناس كانت تبارك والاعلانات شغاله مزن كانت المزيعه طبعا

كانت بتتكلم وكلهم واقفين يعاينوا ليها ...

موده جات وقفت جم عهد وقالت ليهو ما شاء الله مزن طلعت مبدعه في مجالها

قال ليها كيف يا زوله مزن بصمه حلوه في اي حاجه

رجاء قالت ليهو خلصوا سريع يا محمد دايرين نمشي

موده قالت ليهو امي شكلها ما عجبها الاحتفال

رجاء قالت ليها ما عجبني ولا شي

المهم تم الافتتاح ومزن وعهد الاتنين قصوا الشريط مع بعض كانوا ثنائي منسجم وحلوين شديد مع بعض

🌺🌺🌺

وفي اليوم التاني مزن وعهد طلعوا كل زول لي شغلوا طبعا رجعوا برطانيا ومعاهم رجاء وسليمان وموده

،، خلت وسن معاهم ومشوا الشغل...

مزن جاها اتصال في الشغل ردت كان دا مدير الشركات حقات ابوها في السودان قال ليها كيف يا مزن ؟

مزن:تماام الحمد لله انت كيف يا علي والشغل ماشي كيف

علي: والله يا مزن انا اتصلت فيك بي خصوص الشغل في حاجه لازم تعرفيها

مزن: في شنو... اتكلم

علي: الشركه ح تتعرض للأفلاس في اي وقت

مزن:كيف وليه؟!!

علي: فيها ديون كتيره من زمن عمر ودايرين مننا قروش كتيره

مزن: قروش؟! طيب المبلغ كم؟

علي: لو حسبناها بالدولار قريب اتنين مليار وسبعمئه الف

مزن: نعم؟!! وانا اجيب قروش زي دي من وين ؟

علي:والله حاولت قدر الامكان احل المشكله لكن ابت تتحلى

مزن:طيب تماام بحاول الم المبلغ

قفلت منو وبقت متوتره دي شركة ابوها وما عايزه تخسرها

مزن: ياربي ح اعمل شنو😣 احسن حل اعرض بيتنا في السودان للبيع ما حا القى طريقه والقروش كتيره

🌺🌺🌺

مزن طلعت واتلاقت مع عهد في الشارع قال ليها اركبي نوصلك يا مدام ركبت معاهو وكان لسه تفكيرها مشغول عهد لاحظ ليها قال ليها مالك صاره وشك... افردي نشوف ضحكتك الحلوه

مزن: والله يا محمد انا ما فاضيه ليك

وقف العربيه وقال ليها لا بالجد انتي ما كويسه من قلتي لي محمد في شنو يا مزن؟

مزن: ماف حاجه

عهد: ما تدسي علي انا بعرفك من نبرت صوتك

مزن:مشاكل بس في الشركه حقت ابوي

عهد: مشاكل شنو

مزن: الشركه مديونه قروش من زمن عمي عمر وهسي مطالبين الشركه بيها لو ما دفعنا القروش الشركه ح تفلس ويمكن تتقفل!!

عهد: والحل شنو؟

مزن: دايره اعرض بيت ابوي للبيع وعندي قروش ح ازيد عليها وادفعها ليهم والباقي لمن الله يفتحها

عهد: هي كم القروش؟

مزن: اتنين مليار وسبعمئه بالدولار

عهد:كتيره والله...انتي ما تفكري كتير لمن نصل البيت نشوف حل ان شاء الله

دور العربيه ووقف قدام محل هدايه قال ليها انتظريني ما بتأخر عليك ماشي اشتري هديه لي واحد صحبي الليله عيد ميلادو

مزن:طيب تماام

هو نزل وهي فتحت الفيس بوك رسلت صور البيت وكتبت عليهو للبيع طوالي في زول دخل ليها قال ليها انا عايز البيت بكم

رسلت ليهو المبلغ قال ليها تمام لحدي بعدين كدا المبلغ بكون عندك جاهز..

عهد جاء ودور العربيه واتحركوا على البيت قال ليها اها عملتي شنو؟

قالت ليهو عرضت البيت للبيع ودخل لي واحد واشتراهو قال لي بعدين ح يرسل لي القروش

قال ليها ما زعلانه على بيتكم؟

مزن:اكيد زعلانه لكن ح اعمل شنو لازم الم القروش وإلا الشركه ح تخسر...

قال ليها طيب ما دام لقيتي مشتري افردي وشك شويه يلا يا مزن

مزن:بس لسه فاضل باقي قروش ما عارفه ح اجيبهم من وين

عهد: انا ح اديك ليهم

مزن: لا اكيد ما ح اقبل

عهد: انتي غبيه انا زوجك ولو ما وقفت معاك في محنه زي دي ح يقيف معاك منو؟... انزلي وصلنا

نزلوا بعد ساعه من وصولهم الزول رسل ليها القروش رسلت ليهو رقم المحامي وقالت ليهو دا ح يعمل ليك الاجراءات كلها قال ليها تماام

وبقت متواصله مع المحامي لحدي ما عرفت انو سيد البيت استلمو بعداك رسلت القروش وعهد رسل ليها الباقي...

🌺🌺🌺

صباح اليوم التاني مزن صحت بدري لقت عهد مافي مشت استحمت واتسوكت ومشت عايزه تنزلت تحت بس باب الغرفه ابى يفتح حاولت كذا مره ابى يفتح عاينت كدا لقت وسن نايمه

مزن: عهد دا جنه ولا شنو كيف يقفلنا بي بره

مشت فتشت تلفونها ما لقتوا

مزن :ياربي وين ختيت التلفون

مشت على الباب وبقت تدق فيهو وسن صحت

مزن: ياخ يا وسن ما وقتك ابوكي دا قافلنا تعالي

شالتها وبقت تسكت فيها

الباب فتح لقتوا عهد دخل وقفل الباب وراهو

عهد: يا صباح الورد على سكاكري

مزن: عهد انت ملاحظ انك كنت قافلنا بي المفتاح

عهد: اي عارف يلا غمضي عندي ليك مفاجأه

مزن: مفاجأة شنو

عهد:غمضي وجيبي وسن

شال منها وسن وغمض ليها عيونها ونزلوا تحت فتح ليها عيونها لقت البيت مزين بطريقه حلوه وفي تورته كبيره مكتوب فيها ٢٩ وحلويات وهدايه كميه

مزن: عهد🥺

عهد😁😁😁

موده ورجاء وسليمان جو وقالوا ليها كله سنه وانتي طيبه وادوها الهدايه وعهد برضو هديتوا كانت كبيره قال ليها افتحي الصندوق فتحتوا لقت طقم لي فستان ومعاهو اكسسوارات كتيره وقوائش دهب وكان في صندوق صغير فتحتوا لقت العقد بتاع البيت اتفاجأة

وقالت لي عهد دا كيف انا بعت البيت؟

قال ليها وانا المشتري ورجعتوا تاني بي اسمك❤️

موده يلا يا جماعه جاهزين للصوره

وقفوا كلهم واتصوروا احلى صوره مع بعض...

🌺🌺🌺

في الختام الطمع نهايتوا وخيمه والحب النقي دائما بنتصر والجزو المليان من الكوب يمكن يكون افضل بي كتير من الكوب المليان...

خلاصة القول انظر لما عندك وليس لما عند الاخرين

ابقوا عافيه