رواية مياس قلب الشهم الفصل العاشر 10 - بقلم لبنى الموسوي

#مياس_قلب_الشهم

للكاتبه #لبنى_الموسوي

اشرف.. مياس بابا اخو مهيب خابرني باچر مشية الزلم

فتحت عيوني علي ممصدگه كلامه فرحه على خوف على صدمه ... عاينت السميحه مصدومه مثلي وصافنه على ابويه

سميحه.. شنو يعني وافقوا ؟؟

اشرف.. اتصور واضح كلامي جهزوا البيت باچر بالخمسه المشيه

رحت اركض لغرفتي لگيت اخواني گاعدين يلعبون حضنتهم حيل والابتسامه على وجهي

مصطفى.. ميوسه بابا هم ضرب ماما بعد

مياس.. لا حبيبي بالعكس گاعدين يضحكون هسه لتفكر بالموضوع بعد

مصطفى.. وانتي ليش تضحكين

مياس.. فرحانه ادعيلي الله يتمم فرحتي

مصطفى.. شگول يعني

مياس.. شيل ايدك خلي ندعي سوه ... رفع ايده يقلدني وگام يردد ورايه هو ومياده :
يا رب تمم فرحة اختي مياس وابعد عنها شر السعلوه

قاطعني مصطفى بسؤاله :

مصطفى.. اوگفي مياس شنو هي السعلوه

مباس.. هههه هاي وحده تخوف انت متعرفها حبيبي

مصطفى.. همزين ما اعرفها حتى لا اخاف

حضنتهم واني اضحك ،،، فدوه للبرائه الله يحفظكم ويبعد عنكم ضيم الايام الشفتها بحياتي

بعد ما التموا اقاربنه حتى يرحون للمشيه مالت مهيب ،،، اخذناهم بأكثر من سياره لان اعداهم هواي وهالشي طبعا بتدبير من الحجيه لان مترتاح إلا تسوي الشي البراسها مع اني حاولت وياها لان ادري بوضع مياس واهلها بس محاولاتي بائت بالفشل

طلعنه اني وايهاب ويوسف ومهيب وصلناهم ورجعنه للبيت ننتظر منهم مكالمه

الطريق كله اوصي بأمي ونهى ومنال حتى يعدي هاليوم على خير لان چنت خايف من مرت ابوها كلش ادري بيها مترتاح اذا ما خربتها وگعدت على تلتهه

ساعه وكسور خابرتني نهى گالت تعالوا علينه خلصنه

تحركنه الهم رمشت لنهى طلعولنه ،،، عاينت الأمي وجهه ميتفسر ،،، يا ستار يا رب

صعدن بالسياره الطريق كله هدوء محد منهن حچت كلمه ولا اني سألتهن ... طبينه للبيت ركنت السياره دخلت لگيت الكل بالصاله

شهم.. ها يمه شصار احچيلي

الحجيه.. انت تعرف بالبنيه چانت تبيع كلنس بالشارع

تفاجأت من كلام امي ،،،، اكيد مرت ابوها الحيه رادت تخربها بهل طريقه ماكو غير تفسير

الحجيه.. احچي شو صفنت

مهيب.. اي يدري يمه واني هم ادري وقابل بهالشي

الحجيه.. اسكت انت گاعده احچي ويا اخوك الچبير ما اريد اسمع حس الك

مهيب.. اني الراح اتزوجها مو اخويه ،،، لذالك اذا عندچ شي هايني گدامچ وحاچيني

الحجيه.. من شوكت تراددني مهيب هاي الما مرجيه منك يمه

مهيب.. يوم الله يخليچ شتردين بس فهميني صارلچ چم يوم تطلعين حجج من جوه الگاع حتى تخربيها وهسه لگيتي هالسالفه حجه ما صدگتي اجتچ من الله

شهم.. مهيييييييب ... صوتك ما اسمعه يعله على امك تفهم لو لا

مهيب.. شهم مدتسمع

شهم.. اسمع بس اسكت انت عوف الموضوع عليه

ازهار.. عمه ترى حقها امكم شنو ماخذيلكم بنيه من الشارع وتريدون تجيبوها چنه لهل بيت وين صايره ما ظل علينه بعد بس بنات الشوارع

شهم.. عمه شهل حچي لخاطر الكائنات شنو بنات الشوارع ترى مياس اشرف من الشرف نفسه ما اسمح لأي احد بيكم يمسها بكلمه وحده

ام يوسف.. اي عيني ام محمد كلام شهم صح واگفه تگولين عليها بت شارع لو ما العوز ما انجبرت على هالشغل بس غير هذا وكتنه من يوم يومه اغبر

الحجيه.. المهم من الاخير زواج من هاي البنيه ماكو واذا ركبت راسك يا مهيب لا انت ابني ولا اعرفك وما ارضى عنك ليوم الدين

مهيب.. لا يا الله لا يا محمممممد ،،، انتي شنو لخاطر ربچ هي السالفه عناد وبس

شهم.. مهيب وتالي وياك امشي ولي من گدامي خليني اتفاهم وياها

الحجيه.. ماكو تفاهم العندي گلته سد الموضوع شهم

جريتها من ايدها وبست راسها حتى اهديها

شهم.. تعالي ويايه بس نحچي واذا ما اقتنعتي بكلامي الچ التردي

مهيب.. شنو يعني الها التريده !!! شهم اني اتزوجها يعني اتزوجها لو مدري شيصير

شهم.. دكافي يمعود مو طلعتها الروحي ... امشي يوم لغرفتچ ضروري تسمعيني

طبينه الغرفة امي گعدتها گبالي وگعدت يم رجلها واني لازم ايدها

شهم.. ام شهم انتي تحبيني لو لا

الحجيه.. طبعا احبك يمه شعندي غيرك ،،، غير انت ابو بيتي واول فرحتي

شهم.. ومهيب

الحجيه.. شبي هل أرعن

شهم.. هههه تحبي

الحجيه.. يا يمه شهل اسأله

شهم.. دجاوبي وراح تعرفين المقصد من كلامي

الحجيه.. عاد هذا بزر الگعده وحدك تدري معزته شگدها بگلبي

شهم.. زين لعد يمه واذا اگولچ لخاطري اني ومهيب توافقين

الحجيه.. بس يمه

شهم.. لتكملين يوم ،،، بس اسمعيني
اولا البنيه اني اعرفها قبل مهيب
بهالرگبه وضربت على رگبتي .... اني اضمنها الچ بنيه شريفه وطيبه والنعم من اصلها وتربيتها
معدنها ذهب صافي بلا شوائب واخلاقها ينضرب المثل بيها
ثانيا ابنچ يحبها وشاريها حرام توگفين بوجها وتحرمي من فرحته بيها
وافقي واذا فد يوم شفتي العيبه طلعت منها اني اتحمل المسؤوليه عنها وعن مهيب بنفس الوقت

الحجيه.. والناس شتگول علينه

شهم.. يگولون اليگولوا ... حجيه ترى الناس النبي محمد ما سلم من لسانهم تردين احنه نسلم
ممسوين شي عيب ولا حرام والبنيه ما عليها اي كلمه مو زينه رغم شغلها التحچين عنه

الحجيه.. والله يمه ما ادري شگولك بس كلش صعبه

شهم.. مو صعبه حجيه بس گولي يا الله واتركي الباقي على ربچ

الحجيه.. يلا يمه شسوي مجبوره اوافق لان المصگوع البره مسحور بيها يعني شكله قافل ع السالفه ومابي مجال

شهم.. ضحكت وبست راسها ،،، الله لا يحرمنه منچ يا كل الطيب

طلعت قبلها شفت مهيب واگف بباب الغرفه وعيونه حمر من العصبيه

شهم.. شبيك ولك تحچي صدگ

مهيب.. بشر شهم شسويت وياها

شهم.. فوت بوس راسها واعتذر منها بلاول

مهيب.. صار والنبي محمد حتى رجلها ابوسها بس ريح گلبي الله يخليك

شهم.. ما احچي شي اذا ما اشوفك تعتذر منها وتسامحك

مشه گدامي راحلها وطبيت ورى ،،،، دنگ عليها باس ايدها وراسها

مهيب.. اعتذر يوم والله مو قصدي اعلي صوتي عليچ سامحيني

الحجيه.. اي يمهيب بعدها مياستك ما اجت لهل بيت صيحت عليه علمودها من تجي شراح تسوي بيه الله اليستر
بس هو ابو المثل گالها : يامن تعب يامن شگه يامن على الحاضر لگه

صفن عليه وهو فاتح عيونه ،، ابتسمت بوجها وهزيتله راسي

مهيب.. شفهم من كلامچ يوم يعني وافقتي ؟؟؟

الحجيه.. ليش اني اگد اكسر بخاطرك

حضنها بفرح ... يعتذر منها وهي تتدلل علي

مهيب.. والله يمه راح تحبيها ومستحيل نزعلچ لا اني ولا هي هسه تشوفين

الحجيه.. الله يسعدك يمه وان شاء الله تطلع تستاهلك

مهيب.. ان شاء الله يوم ان شاء الله

طلع يمشي سريع وگف بنص الصاله وصاح بكل صوته

مهيب.. باركوووولييييييييييييييييييييي

نهى.. گلللللللللللللللللللللللللللللللوووش

منال.. الف الصلاة والسلام عليك يا حبيب الله محمد صلوااااات گللللللللللللللللللللوش

شهم.. ههههه خبال اي والله تسودنت العالم

بهلاثناء طب جهاد ما ادري وين چان صايع هل ولد

جهاد.. شنو هالهلاهل منو تزوج

مهيب.. اني يثول يوم الالك ان شاء الله

جهاد.. ههههه الف مبروك ضلع وراك ان شاء الله ما اتأخر

شهم.. وهذا يا مخبل يزوجك

جهاد.. انت خالي

شهم.. تعال ولك ... ركضت ورى طفر القنفات حسباله يگدر يفلت مني رحتله من الجهه الثانيه حضنته بحركه فجائيه

جهاد.. هههه خالي مو قصدي يعني اقصد انت تزوجني شعندي غيرك

شهم.. حچي يفيدك گ×××

يوسف.. ههههه عوفه الخاطري شهم

شهم.. هاي الخاطر يوسف وإلا بس الله اليعلم شچنت ضاملك

جهاد.. رحم الله والديك ابو يعقوب نردلكياها بالعركات

يوسف.. ههههه انت مشكله ازليه لا يوجد لها حل

جهاد.. دگعد راحه قباني

شهم.. بشرفك يوسف عوفني علي خلي اربي شويه

منال.. شلون بهذا الولد راح يخلبني والله

جهاد.. اسم الله عليچ يمه ان شاء الله بهذاك الرجال ولا بيچ

شهم.. عليمن ولك

جهاد.. بس لا اخذت على نفسك خالي ترى والله ما اقصدك

مهيب.. ههههههههههه اني ادري يقصدمن

شهم.. طمطمله انت بس اني اعلمك جهادو بسيطه

ظل البيت هوسه وما فارغ إلا تالي الليل

خابرت اقاربنه ع المشيه وحاولت اختصر العدد لان بيتهم صغير ووضعهم تعبان ما حبيت احرجهم ويانه

ثاني يوم العصر اجتمعوا الكل ببيتنه للخمسه رحنه لبيت مياس

وصلنه لفرعهم تلگانه ابوها وجدها وعمامها هم چانو حاضرين

طبينه وفتح عمي الشيخ الكلام بالقرأن الكريم وراها طلب ايدها من ابوها الرجال وافق بلا اي مقدمات

سلمنه ورجعنه للبيت ،، بيومها گلبي ارتاح كلش وحمدت ربي وشكرته الف مره لان الامر تم بدون اشكالات وصارت مياس المهيب

بلليلة المشيه ابويه خابر جدي وعمامي حتى يكونون حاضرين ويا وفعلا ثاني يوم اجونه من الصبح

اني ما شايفتهم بس مره وحده بفاتحة امي بحيث حتى شكلهم ناسيته

طبوا جدي وعمامي تفاجأوا من شافوني لان كبرانه وصارلهم سنين ما شايفيني

گعدت يمهم بلاول مستحيه لان ممتعوده عليهم بس بعدين حسيت وياهم بالحنان الچنت افتقده كل حياتي

صار العصر طبينه اني وسميحه للغرفه لان اجت المشيه

اعاين ع سميحه تلوب رايحه جايه خفت من منظرها الله اليستر شدتفكر والشنو تخطط

اقل الساعه اجه ابويه للغرفه مبتسم وباركلي

اشرف.. الف مبروك بنيتي

ما صدگت كلامه شنو يعني معقوله السالفه خلصت بلا مشاكل والله متفاجأه

سميحه.. شنو يعني صارتله

اشرف.. اي طبعا

طلعت ويا ابويه گعدت يم جدي وعمامي لان باچر يرجعون للرمادي وبيومها تونست كلش وياهم لان حسيت بلمة الاهل

تعشينه وظلينه سهرانين ل١٢ سوالف وضحك وذكريات ايام زمان لحد ما حسيت بنفسي طفيت وبعد ما بيه اقاوم

استأذنت منهم رحت للغرفه تمددت بين اخواني وحضنتهم بيدي

صار موبايلي گدامي شلته دا اوقته حتى اگعد الفجر اسويلهم ريوگ قبل لا يطلعون تفاجأت من شفت الدنيا محروگه عليه مكالمات ورسائل

مياس.. عزه عزه هاي شنو الارقام منو هذوله ياااااا

فتحت الرسائل اول رساله من شهم چانت بالسته يعني اول ما طلعوا من يمنه كاتبلي بيها :

شهم.. مبروك بنيتي

ابتسمت ويا نفسي على كلامه ،، نزلت للرساله الثانيه من رقم مهيب

مهيب.. ادري بيچ مشغوله لذالك ما رديتي على مكالماتي بس يا ريت تتصلين بيه من تفرغين انتظرچ

عاينت بعد اكو رسالتين منو هالارقام ؟!!

نهى.. حبيبتي ميوس خابرتچ حتى اباركلچ الف مبروك شايفه كل الخير انتي ومهيب

منال.. الف مبروك چنتنه الحلوه ان شاء الله تنورين بيتنه عن قريب

ضحكت ويا نفسي ،،، فدوه شلون ناس واحدهم اطيب من الثاني

مياس.. شگد عيب مياس حارگين الدنيا بلاتصالات عليچ وانتي مثل الثوله متدرين الدنيا طشت لو رشت

اول ما رديت على شهم قبل الكل بعدين رديت على نهى ومنال اخير شي مهيب

هستوني دا انام سمعت موبايلي دگ رساله سحبته شفت مياس مجاوبتني

مياس.. الله يبارك بيك وشكرا الك على كلشي فضلك فلا انسى

نهى.. ها منو حبي

دگ موبايلها رساله ،، ابتسمت وجاوبتها

شهم.. نفس الشخص الراسلچ هسه

فتحت الرساله وچانت نايمه بحضني شفت مياس كاتبتلها : الله يبارك بيچ حياتي وكلش اعتذر ع الرد المتأخر بس موبايلي مچان يمي

نهى.. فدوه ولك شگد محبوبه هالبنيه

لزمت موبايلها ترد عليها ،، دزيتلها رساله اني هم

بعد ما راسلتهم ،، خليت موبايلي يم راسي دا انام لان نعسانه دگ الجهاز

رفعته شفت نهى وراها گبل اجتني رساله من شهم

نهى.. لا عادي حياتي بس حبيت اباركلچ واتمنالچ السعاده على راحتچ ورده

شهم.. ماكو بنيه تشكر ابوها السويته وياچ احسه واجب يعني ممتفضل عليچ بشي باباتي

فرحت كلش بكلامهم ،،، عاينت الرسالتي المهيب الاعتذرت بيها عن عدم ردي بس ما گدرت اتصل بي لان خجلانه وممتعوده علي

رجعت موبايلي يم راسي غفيت بسرعه وما اعرف شگد نمت لحد ما نزيت على صوت اتصال ،، عاينت مهيب ديتصل

بالگوه جاوبته منا خجلانه منا نعسانه باختصار چنت حايره شلون احچي ويا

مياس.. الوو

مهيب.. ها مياس شلونچ

مياس.. الحمد لله

مهيب.. اسف گعدتچ مبين چنتي نايمه

مياس.. هستوني نمت

مهيب.. ماشي لعد كملي نومتچ نحچي باچر

مياس.. لا عادي احچي اسمعك

مهيب.. مو مهم رجعي نامي نوم العافيه

مياس.. الله يعافيك

مهيب.. بس قبل لتروحين ،، الف مبروك

مياس.. مبروك علينه

مهيب.. هههه تصبحين على خير

مياس.. وانت بخير

سديت الخط منه ،،، صدقه لله شلون مؤدب بعد منو اخو

رجعت نمت وهالمره الحمد لله محد گعدني بس المنبه الفجر هههه

گعدت سويتلهم ريوگ تريگوا وسلموا علينه

قبل لا يرحون جدي باس راسي وانطاني ١٠٠ الف وعمامي كل واحد ٢٥

استغربت من تصرفهم ،، مال شنو هالفلوس !!! بس بنفس الوقت فرحت بيهن كلش

ودعناهم وقبل لا اروح للغرفه ابويه صاحني

اشرف.. مياس تعالي بنيتي

مياس.. نعم بابا

اشرف.. لتخلين سميحه تعرف بهل فلوس حتى لا تاخذهن منچ

مياس.. هههه ماشي بابا

رحت للغرفه ضميتهن دا اطلع دگ جهازي ،، عاينت منال اخت شهم

مياس.. الو

منال.. ها حبي شلونچ

مياس.. الحمد لله حبيبتي انتو شلونكم

منال.. نسأل عنچ

مياس.. تسأل عنكم العافيه

منال.. حياتي اذا ما عندچ شي باچر نمرلچ العصر حتى تشترين الذهب ويوم الاثنين يصير العقد شتگولين

مياس..براحتكم حياتي

منال.. بالخير لعد .. يلا اخذي راحتچ حبيبتي

مياس.. الله وياچ

سديت الخط طلعت الابويه بلغته بكلام منال ما اعترض وطلب من سميحه تروح ويانه

صار الليل نيمت اخواني صارت عيني ع الكنتور تذكرت السجل

طلعته وكتبت الصار ويايه بهذا اليوم كبدايه لمفكراتي بلا خوف من سميحه

خلصت سديت السجل ضميته بالكنتور رجعت تمددت دگ جهازي مهيب ... جاوبته بتردد

مياس.. الووو

مهيب.. مساء الخجل

مياس.. هههه مساء النور

مهيب.. دوم الضحكه ان شاء الله

مياس.. شكرا الك

مهيب.. مياس نعسانه لو شنو

مياس.. لا منعسانه

مهيب.. يعني عادي نحچي شويه

مياس.. اي عادي

مهيب.. خابرتچ منال

مياس.. اي

مهيب.. يعني باچر اشوفچ

خجلت من كلامه وما گدرت اجاوبه ،، هو هم سكت ودخلنه بحالة هدوء تام

مياس.. بعدك ويايه

مهيب.. لعد وين اروح اذا مو وياچ

مياس.. هههه لعد احچي ليش ساكت

مهيب.. اخاف احچي وتاخذين عليه نظره مو حلوه

مياس . ليش شتريد تحچي يعني ؟؟

مهيب.. احبچ مثلا

فتحت عيوني من گال احبچ ،، شنو معقوله يحبني صدگ لذالك خطبني

مهيب.. شو سكتي

مياس.. ما اعرف شحچي

مهيب.. مراح تسأليني من شوكت

مياس.. اعتبرني سألتك

مهيب.. من اول ما شفتچ اكو شي بيچ شدني الچ بلاول ما عرفت افسر احساسي بس بعدين اكتشفته حب

صفنت على كلامه على هالحاله يعني ما خطبني شفقه مثل ما تصورت

مهيب.. هههه اگولچ احچي كلمه خو ما اظل احچي ويا روحي

مياس.. هههه شحچي والله ما اعرف

مهيب.. تدرين شگد اموت على برائتچ

لزمت گلبي بيدي ،، ومن هنا بدأ طيحان الحظ

ظلينه نحچي ساعتين ،،، حاولت اسلم مشاعري اله وافكر بعقلي قبل گلبي والحمد لله والشكر نجحت بهالشي وبديت ويا صفحه جديده

ثاني يوم العصر بدلنه اني وسميحه وگعدنه ننتظرهم للخمسه سمعت الجرس

فتحت الباب شفت مهيب بس عاينلي ابتسم

مهيب.. شلونه الحلو

مياس.. هههه زينه انت شلونك

مهيب.. بشوفتچ صرت كلش زين ،،، يلا جاهزين ؟؟

مياس.. اي بس اصيح مرت ابويه واجيكم

طبيت صحت سميحه وطلعنه لگيت منال بالصدر ونهى ليوره

اول ما صعدت بوستني نهى ولبست سميحه طرت فرح من تصرفها وعرفت شهم محشيها زين عليها

صارت گعدتي ورى مهيب مباشرتاً ،، الطريق كله يعاينلي بالمرايه مبتسم واني ما اعرف وين اودي وجهي من الخجل

وصلنه نزلت اجتني منال بوستني لان ما گدرت تبوسني بالسياره وهم لبست سميحه ههههه

طبينه لمحلات الذهب بس مهيب ظل بره واگف ما طب ويانه وگال اخذوا راحتكم اني انتظر هنا

منال.. تردين تخم لو مفرد حبي

مياس.. بكيفكم

نهى.. المفرد اثگل نصيحه مني

مياس.. ههههه عادي ماكو فرق

نهى.. تفرجي لعد حتى تقررين

عاينت الذهب شي احلى من شي ،، ظليت بين المحتاره بين الخجلانه ما گدرت اختار لحد ما منال حاچتني

منال.. هههه هاي شبيچ صافنه اختاري براحتچ لتخجلين من شي واذا ما عجبچ نروح لغير مكان بس گولي

سميحه.. اني اختارلها عوفوها هاي فاهيه

نهى.. لا عيني لا ،، هي العروس وهي التختار محد ليتدخل

ضحكت عليها ،، عاينت المنال وحچيت

مياس.. لا بالعكس الذهب كله حلو هنا بس ما اعرف شختار

نهى.. شنو رأيچ نرشحلچ چم شغله وانتي تاخذين اليعجبچ

مياس.. اي ماشي

جابولي ١٠ گلادات ،، بيناتهم چانت وحده كلش نازكه فختاريتها بسرعه

مياس.. هاي

منال.. كلش حلوه عاش ذوقچ

نهى.. بعد شوفي المحابس

منال.. شنو رأيچ بهذا

مياس.. يجنن

ظلينه نختار ،، اشترولي محبسين وسوار وگلاده وتراچي وحجل وياهن

طلعنه من المجمع لگيت مهيب گاعد ع الصبه ويگلب بموبايله بس شافنه ابتسم

منال.. ها خويه خو ما تأخرنه عليك

مهيب.. فدوه الكم خيتي

منال.. اممممم متأكد النه

ابتسمت ودنگت خجلانه لان چانت تعاينلي وتضحك يعني تقصدني

رجعنه للبيت فرحانه كلش بالذهب ،، اجه ابويه وراوتهيا سميحه بس احسها تريد تطگ من القهر

للعشره گاعده اكتب بالسجل خابرني مهيب

مياس.. الوو

مهيب.. ها حبيبي شلونچ

مياس.. هههه زينه وانت

مهيب.. كلش زين

ظلينه نحچي بس برسميه لان ثنينه خجولين لحد ما صار يوم العقد

اجت منال قبل يوم انطتنه فلوس الصالون والحفله وگالت نسوي العقد بينانه والعرس بالقاعه

الصبح دگت عليه نهى حتى اطلعلهم يودوني للصالون بس سميحه ظلت بالبيت تحضر لحفلة العقد

طلعني ابويه الهم بس تفاجأت من شفت شهم هو الراح يودينه

سلم على ابويه نزلت نهى بوستني وصعدت ليوره

اجه شهم للسياره واول ما صعد سمعته سلم عليه

شهم.. ها بابا شلونچ

مياس.. الحمد لله

شهم.. نهى بس تخلصون خابريني اذا گدرت اجيكم كان بها ما گدرت ادزلكم واحد من الولد

نهى.. صار حبي

وصلنه للصالون اشتغلوني بلاول حفافه وشيره بعدين بلشو بالتسريحه والمكياج

كملت واني ما شايفه نفسي بالمرايه ،، عاينت النهى هلهلت بس شافتني

نهى.. بعد روحي گمر گمر محروسه بعلي يروحي

مياس.. حبيبتي تسلميلي

نهى.. تعالي شوفي نفسچ بالمرايه

وگفت اعاين تفاجأت ،،، منو هاي !!! وين اني

نهى.. ههههه ها اكيد ما عرفتي نفسچ

مياس.. هههه اي والله

نهى.. لعد مهيب شراح يگول اليوم ،، الله ربه كل هالجمال اله وحده

خجلت من كلامها ودنگت بلا ما اجاوبها ،،،،، خابرت شهم شويه ورمشلها يعني اجه

نهى.. حبي تعالي اذب عليچ العبايه والربطه لان مهيب وصاني متطلعين من الصالون بدونهن

مياس.. اي عادي حياتي جيبيهن

راحت جابتهن ذبتهن عليه ،، طلعت واني ما اشوف شي گدامي مدري شلون صعدت بالسياره ونهى ساعدتني

شهم.. هههه هاي شمسوين بالمگروده

نهى.. لعد ان شاء الله تريد نطلعها بالمكياج غير اخوك يذبحنه الف مره وصاني العبايه والربطه - الربطه والعبايه

شهم.. هههه بيها الخير ان شاء الله

وصلت لگيتهم كلهم مجتمعين بس طبيت رگعوا الهلاهل

طببتني منال للغرفه لبستني سيت نوم ابيض بس محتشم ،،، خلت القرأن والشمعه بيدي ومدري شسوت بضهري ههههه

اخذتني يم باب الاستقبال گعدتني ع الكرسي وخلت جوه رجلي قدح بي ماي و ورق

شويه وبده واحد يحچي عرفته ديعقد النه سمعت صوت ابويه ومهيب يرددون ورى اخير شي سألني على موافقتي بس من الخوف متقبل الكلمه تطلع مني

منال.. يلا حبي ردي بسرعه

نهى.. جاوبي ولچ خلي نهلهل موتينه

مياس.. م اا موافقه

ويا ما گلتها هلهلن كل النسوان والدنيا نخبصت بالصاله

رجعت للغرفه ويا منال ونهى چانو مشتريلي بدله تجنن طويله عدله ع الجسم ومن ورى ذيل السمچه ... لونها بيج بي لمعه صفره بلون الذهب وحذاء كعب عالي لون ابيض بالگوه گدرت امشي بي لان ممتعلمه

طلعت وياهن للصاله وهن صرعن الدنيا بالهلاهل

بوست امه حسيتها ضايجه ومفرحانه بلاول استغربت بس من تذكرت كلام سميحه بداخلي گلت حقها تضوج

گعدت واشتغلت الاغاني شويه واجت مله تقره مواليد طبعا كل هذا تدبيرهم احنه كلشي ما سوينه

ساعه وصاحت منال : ينسوان لبسن العريس راح يطب يلبس العروس الذهب

هي گالت هيچ واني دگات گلبي وصلت لباب البيت يمكن حتى مهيب سمعها ههههه

طب مدنگ ووجها احمر مبين علي حتى خجلان اكثر مني ،، گعد بصفي بلا ميعاينلي

منال.. يا خويه شبيك دبوس راسها صخم اجيت وگعدت

مهيب.. ههههه يمعوده متشوفين النسوان صايره لحم والله استحي

نهى.. لتستحي مهيب صارت حلالك بعد محد يگولكم تلت التلاته كم

مهيب.. ههه عود حچت فيفي عبده

نهى.. گللللللللللللللللللللللوووووش

اسمعهم واضحك هذا كله هو ما شايفني بعد ،، دار وجها عليه حسيته انصدم من شافني

مهيب.. وين مياس !!!

مياس.. هاااا شنو

نزل عليه الثول من سألني بس جاوبته ضحك هز راسه ودنگ

جابت منال الذهب اول ما لزم الگلاده ديلبسها الي طخت ايده برگبتي رجفت بشكل واضح حتى استحيت منهم

مهيب.. هههه شبيچ حياتي اهدي شويه ممسويلچ شي

نهى.. ههههه هسه غلس إلا تخجلها

منال.. هههه دهاك لبسها التراچي

لبسني التراچي والسوار والمحابس اخير شي الحلقات

لزم ايدي دخل الحلقه بهدوء يمكن طول عشر ثواني بيها وهو يعاينلي بابتسامه

منال.. خويه النسوان ديعاينن فضها مو وكت سوالفك

مهيب.. ههههه شمسوي غير البسها على كيف اخاف تتأذه

نهى.. خاف تتأذه وتزعل ،، احترم ذكاء المقابل من تچذب

ضحكت عليهم ،، انطتني منال الحلقه مدلي ايدها اريد البسهيا ماكو ايدي ترجف

لزم ايدي خلاها على ايده

مهيب.. شو لزميها حتى تسيطرين

بالگوه لزمتها من الخجل الاحس بي ،، لبسته الحلقه وطگنها هلاهل لمن گالن بس

ربع ساعه جابو الكيك والببسي قطعناها وطلع مهيب ،، ظلن النسوان هلاهل على هوسات على رگص لحد ما صار الليل

بالسبعه الكل راحوا ،، رحت للغرفه اغير ملابسي وامسح المكياج قبل لا يجي ابويه لان استحي منه يشوفني بهالمنظر

ما لحگت ،،،، طب عليه ابويه وبس شافني ابتسم

اشرف.. الف مبروك بنيتي

مياس.. خجلت ودنگت منه ،، الله يبارك بيك بابا

اشرف.. خطيبچ ينتظر بلاستقبال روحيله

هو گال هيچ واني طبيت بملابسي من الخجل ،، حس عليه وطلع بسرعه من يمي

عاينت الروحي بالمرايه ،، هسه اني شلون اطبله بهالحاله والله استحي مو كافي الخجل الحسيت بي بالحفله

رحت للاستقبال وگفت بالباب اخذ خيره خمس دقايق يلا گدرت اطب علي بس احس جسمي كله يرجف حتى رجلي گوه شايلتني

چان گاعد يهز برجله متوتر وشابك ايد بأيد بس شافني وگف على حيله

مياس.. هلا بيك

مهيب.. وبيچ اكثر حياتي

سديت الباب ... تقربت يمه گعدت وهو ظل واگف يعاين عليه

مياس.. تفضل ليش واگف

گعد يمي بلا ميحچي شي ... ظلينه ساكتين والتوتر مبين على ملامحنا شويه وگال:

مهيب.. مياس

مياس.. نعم

مهيب.. تدرين بروحچ اليوم طالعه ملكه

ابتسمت اله ورجعت دنگت ،،، رفع وجهي لزم خدي بچف ايده يمسح علي

مهيب.. كافي خجل لازم نكسر هالحاجز بيناتنا

عاينت علي ما عرفت شجاوبه لزمت چفه الموجود على خدي بأيديه وابتسمتله

تقرب مني غمض وهو يگول :

مهيب.. احبچ مياس

غمضت ويا ... حط شفته على شفتي بهدوء وسحبها اله ،، ما عرفت شأسوي ولا گدرت ابادله بالحركات بس حسيت بشعور حلو احتاريت شاوصفه بوقتها

وخر مني وهو لازم وجهي بايده چنه ثنيناتنه شبه المنتهين وعيونه الناعسه تشرح هالشي

حط گصته على گصتي يتنفس سريع ... عاينت علي ضحكت لان حمرتي كلها بشفايفه صايره

مهيب.. گال بصوت هادئ كلش : ليش تضحكين ؟؟

وخرت ايده من وجهي ... لزمت موبايله فتحت الكاميرا وانطيتها اله

مياس.. هاك شوف

بس عاين الورحه خرب ضحك اني هم ما تحملت وضحكت على ضحكته

مهيب.. زين لحظه شنو رأيچ انتي هم تعاينين الروحچ

مياس.. شلون يعني ؟!!

مهيب.. هاچ شوفي وتعرفين

عاينت بالموبايل عزه شفتي صايره خريطه ،، اضحك علي وما ادري بروحي شمصخم بيه

مهيب.. ها مراح تضحكين

رفعت راسي اله وبس عاينتله طگيتها بضحكه من الفطاريه مالتي

مهيب.. ههههه دعوفي الضحك وحاچيني شراح نسوي اخاف احد يجي على ساعه

مياس.. بلكت يمشي الحال بالكلنس هاك الزم

مهيب.. اااااخ شلون ميمشي الحال بي غير هو سبب سعادتي ،،،، وغمزلي

مياس.. ههههه دلحگ امسح ليجي ابويه والله عيب

ظلينه نمسح بالحمره طبعا ما راحت ميه بالميه بس ارحم من قبل

سحبني الحضنه خله راسي على صدره وايده محاوطه خصري .... ظل يعرفني عن نفسه وبنفس الوقت سألني عن حياتي

مهيب.. يلا خلي نتعرف شتگولي

مياس.. اي موافقه

مهيب.. راح ابدي اني ،،،، اسمي حبيبچ وعمري ٣ اشهر بس

مياس.. هههه دحچي صدگ هاي شبيك

مهيب.. والله هذا الصدگ اني ما حسيت بطعم الحياة إلا من عرفتچ يعني انتي تاريخ ميلادي

مياس.. لا الله عليك احچي جد لان حابه اتعرف عليك ،،، عقدنه وما نعرف شي عن بعضنا

مهيب.. هههههه اوك تأمرين ،، اسمي حبيبچ هاي ما اغيرها تعذريني

مياس.. هههه ماشي يلا كمل الباقي

مهيب.. عمري ٢٤ سنه خريج اداره واقتصاد قسم المحاسبه ابويه توفى من چان عمري ١١ سنه لذالك اخويه شهم هو رباني

مياس.. الله يرحمه شلون مات خطيه

مهيب.. بانفجار قريب على مكان شغلهم هو وزوج اختي منال لان يشتغلون سوه

مياس.. ياااااااا خطيه يعني منال رجلها ميت

مهيب.. اي راح وعاف ثنين جهال برگبتها ولد وبنيه ،،، اهل زوجها رادو ياخذوهم منها بس من عرفو متريد تتزوج قبلو يعوفوهم الها

مياس.. وشلون ربتهم خطيه صعبه بلا اب

مهيب.. شهم رباهم ويايه لان هو چان چبير البيت بوقتها فصار الرجال مالتنه واخذ مكان ابويه

مياس.. ليش هو شهم شگد عمره ؟

مهيب.. من توفى ابويه چان عمره ٢٣ وهسه عمره ٣٦

مياس.. وبعد

مهيب.. عندي ثنين اخوان ،، شهم تعرفي وايهاب متزوج وعنده ثنين ولد
منال اختي الوحيده وصديقتي بنفس الوقت
اما صديقي المقرب فهو جهاد ابن اختي هذا روحي من الدنيا فتحت عيني علي ولأن اني ويا نفس العمر فبكلشي چنه سوه حتى الكليه اختاريناها نفس الشي حتى لنفترق

مياس.. الله يخليهم الك

مهيب.. شكرا حبيبي ويخليچ الي

يحچي وهو حاضني ما وخرني من صدره ... ظل يسألني عن حياتي حچيتله كلشي عني حسيته ضاج كلش بس حاول ميبينلي هالشي

اخذنه الكلام فجأه عاين لساعته وشهگ

مهيب.. شنو هااااي ... ولچ الساعه صارت ب١١ لازم اگوم

مياس.. عزه شگد عيب التهينه بالحچي وما سويتلك عشه

مهيب . يا عشه يمعوده لعبانه نفسي من الكيك مالت الحفله اكلت هواي لان شهم جاب وحده مخصوص للاقارب ٣ طوابق

مياس.. هههه الف عافيه

مهيب.. حبي سويلي طريق اطلع بس كون ابوچ ميشوفني لان وضع وجهي يفشل

مياس.. هههه تعال غسل

مهيب.. المغسله قريبه

مياس.. اي هنا بأول الممر

مهيب.. زين لعد شوفيلي خو محد اكو

طلعت شفتهم بالصاله اشرتله يطلع راح للمغسله ع السريع

غسل وغلست ورى لان حالي امر من حاله .. رفعت راسي من المغسله شفته ساند روحه ع الحايط متچتف ويعاينلي بابتسامه

مياس.. ها شنو بيه شي بعد ؟؟!

مهيب.. انتي حلوه كلش تدرين

مياس.. هههه شكرا حسبالي اكو شي بوجهي

مهيب.. اكو اشياء مو شي

مياس.. شلون يعني

تقرب مني يتلمس وجهي باصابيعه

مهيب.. مثلا هالعيون الحلوه الماكو منها ،، هالخدود الـ الله خالقهن للعض بس .. والشفايف التسكر اكبر واحد

مياس.. جاوبته بخجل ،، مهيب شنو هاي شدتسوي

مهيب.. شنو حبيبي شمسوي

مياس.. اخاف احد يجي وخر ايدك عن شفتي

مهيب.. تدرين دتضرب انفاسچ على ايدي واحس بيها احچي بعد حبابه

مياس.. رجعت ليوره اضحك واهز براسي ،، هسه شنو نظل واگفين هنا

مهيب.. هههههه لا راح اروح بس اخذ موبايلي وسويچ السياره عفتهن بلاستقبال

مياس.. طبيت ويا عاينت لمكانه چان اكو شي مغلف : مهيب شنو هذا

مهيب.. شنو حبيبي

مياس.. هذا

مهيب.. ها همزين ذكرتيني ،، دخت بيچ ونسيت الهديه

مياس.. هدية شنو

مهيب.. فتحيها وشوفي

فتحتها وتفاجأت من شفته شال مشجر

مياس.. هذا شنو ؟؟

مهيب.. تقبلين تلبسي لخاطري

مياس.. ههههه طبعا البسه اصلا احب الحجاب ما اتقيد منه ومتعوده علي بالشارع اذا تذكر

دنگ عليه باسني من خدي بابتسامه

مهيب.. فدوه لگلبچ حياتي ... يلا مع السلامه سلميلي على ابوچ استحي اسلم علي

مياس.. هههه يوصل ان شاء الله

طلع وسديت الباب ورى ،،، رحت للغرفه گبل قبل لا يشوفوني لان خجلانه من وجود مهيب يمي كل هالفتره

عاينت بالمرايه لروحي ،،،  لزمت شفتي وتذكرت بوسته قشعرت بسرعه

اخذت ملابسي وطبيت للحمام ساعه كامله افتح بالتسريحه بالگوه خلصتها

غسلت وطلعت لگيت اخواني گاعدين بالغرفه يلعبون

مصطفى.. وينچ نعسنه كلش

مياس.. حياتي اسفه تأخرت عليكم هسه بس امشط اجي انيمكم

مشطت سريع لان كسروا خاطري متعودين عليه مينامون إلا على ايدي واليوم تأخرو بسببي ،، نيمتهم وطلعت السجل كتبت كلشي مريت بي اليوم والاهم كتبت احساسي ومشاعري التحركت المهيب واخيرا

ب١ نعست ضميت السجل ورجعت انام اتصل مهيب ،، ابتسمت بس شفت اسمه

مياس.. الوو

مهيب.. شلونك يا حلو

مياس.. ههههه زينه

مهيب.. شتاقيتلچ

مياس.. لحگت تشتاق قبل ساعتين چنه سوه

مهيب.. شتاقيتلچ واني ضايع بين ايديچ ترديني هسه ما اشتاقلچ

مياس.. هههه واني هم

مهيب.. شنو انتي هم

مياس.. مثلك

مهيب . احچيها لتصيرين لئيمه

مياس.. شتاقيتلك

مهيب.. اويلي الله

مياس.. ههههه شبيك

مهيب.. احبچ حياتي وروح ابويه اموت عليچ

مياس.. شكرا تحبك العافيه

مهيب.. انتي العافيه لذالك لازم تحبيني

مياس.. ههههه شلونهم اهلك

مهيب.. فرحانين بخطوبتنه وسوولي حفله اول ما رجعت بالگوه هسه فلتت منهم حتى اخابرچ

مياس.. ههه خطيه فرحانين بيك

مهيب.. وفرحانين بيچ هم خصوصا منال ونهى

ظلينه شهرين على المكالمات ابد ما اجه مهيب لبيتنه ومن اسأله ليش متجي يگول هيچ احسن

چم مره اجاني من الباب ،، مره جابلي موبايل حديث وخط جديد ومرتين اجه ينطيني مصرف ورصيد چنت اخجل اخذ منه بس يجبرني عليهن ويگول انتي صرتي مسؤليتي من يوم ما عقدت عليچ

بهل شهرين تعلقت بي كلش ،، صرت احب صوته وغزله بيه طول الليل خصوصا من يگولي احبچ بگد حبي الامي لان هالجمله تبينلي صدق حبه الي

تعلمت على وجوده بحياتي وصرت اني اخابره مرات لان فجأه احس نفسي شتاقيتله بس ولا مره گتله احبك وهو هم ما طلب يسمعها مني ما اعرف ليش

فد يوم اتفقنا نروح نختار غرفة النوم سوه ،، استأذنت من ابويه لان اول مره اطلع ويا وما عارض طلعتنه

خابرني بلاربعه ونص چنت مبدله ومنتظرته گلي اني بالباب طلعيلي

لبست حجابي وكفت اعدل بروحي گدام المرايه ،،، اخذت جنطتي وخليت موبايلي بيها

طلعت من الباب مبتسمه لان راح نلتقي وچانت كلمة صدمه قليله على الشي الشفته گدامي....

يتبع..