رواية مياس قلب الشهم الفصل الحادي عشر 11 - بقلم لبنى الموسوي

#مياس_قلب_الشهم

للكاتبه #لبنى_الموسوي

فد يوم اتفقنا نروح نختار غرفة النوم سوه ،، استأذنت من ابويه لان اول مره اطلع ويا وما عارض طلعتنه

خابرني بلاربعه ونص چنت مبدله ومنتظرته گلي اني بالباب طلعيلي

لبست حجابي وگفت اعدل بروحي گدام المرايه ،،، اخذت جنطتي وخليت موبايلي بيها

طلعت من الباب مبتسمه لان راح نلتقي وچانت كلمة صدمه قليله على الشي الشفته گدامي

هذا هو نفسه الولد اليتحارش بيه دائما شعنده گاعد بسيارة مهيب !!!!

اجاني مهيب يسلم عليه بس اني بغير عالم لان صافنه ع الولد ... رفع راسه شافني وانصدم مثل صدمتي واكثر

نزل من السياره توجه النه حتى نسى يسد الباب ورى ... وگف گدامي فاتح عيونه عليه ويعاينلي باستغراب

مهيب.. شبيكم ؟!!

مياس.. هذا منو مهيب ؟؟؟

مهيب.. هذا جهاد ابن اختي وصديقي بنفس الوقت مسولفلچ هواي عنه
جهاد هاي هي خطيبتي مياس

هو گال هيچ لو اني حسيت نفسي انتهيت ... ردت اموت بمكاني من الصدمه بحيث احس حتى گلبي گام يوجعني

جهاد.. شتحچي مهيب هاي هي خطيبتك ؟!!

مهيب.. اي شبيك مستغرب اكو شي ؟!!!

دار ظهره علينه يفرك وجهه بثنين ادي حيل ،،، ظل مهيب صافن ورجع يسأله

مهيب.. جهاد شصار احچي يمعود شبيك ؟!!

جهاد.. خلي نرجع للبيت تعبت كلش اجل الموضوع على غير يوم

مهيب.. ليش شدتحس ؟!

جهاد.. ما ادري بس جسمي نحلان يمكن استبراد

مهيب.. زين لعد خلي ارجعك للبيت ونروح اني ومياس وحدنه

جهاد.. لا مهيب اجل السالفه ،،، اصلا عمي گال ع الاسبوع الجاي تعالوا لان يجيبون غرف جديده يعني بي صالح التأخير

مهيب.. ها مياس شتگولين

مياس.. عادي نأجل ماكو مشكله

مهيب.. زين لعد طبي للبيت اوصل جهاد واجيچ عندي موضوع وياچ

مياس.. ماشي

درت وجهي طبيت دا اسد الباب عاينت الجهاد يباوع عليه بعصبيه حسيته يريد ينفجر بوجهي من القهر

اشرف.. ها بابا شو رجعتي !!

مياس.. تأجلت السالفه ع الاسبوع الجاي

عفتهم ورحت للغرفه .... گعدت ع المندر اعاين لجسمي يرجف من فوگ ليجوه

مياس.. شنو يعني هذا الولد نفسه جهاد ابن منال ،،، زين شلووون ؟!!
شجابه عليه وليش اني من دون كل البنات سوه ويايه هيچ
هسه شراح يصير يا ربي اكيد راح يحچيله كلشي واذا حچاله مستحيل نستمر اكيد مهيب يتركني ما بيها مجال

نزلت دموعي بحرگه ،، ما اعرف على حظي الاغبر لو على مهيب لان تعلقت بي كلش لو ع الموقف النحطيت بي

اخذت ملابسي ورحت للحمام ،،،، وگفت جوه الماي ساعه كامله ابچي بحرگه لحد ما نشفت عيوني

طلعت امشط اعاين بالمرايه وجهي منتهي وعيوني صايره دم من گد ما باچيه ،، مشطت شعري ورحت سويت عشه سريع حتى اخلص

صبيتلهم ورجعت للغرفه حتى ما گدرت اكل شي ،،، گعدت ع المندر لازمه الموبايل بيدي الترجف وعيوني تراقب الشاشه انتظر اتصال من مهيب ... ظليت على هالحاله ساعتين بس مصار الچنت انتظره

بالتسعه اجوني اخواني للعشره يلا گدرت اخليهم ينامون اول ما ناموا قررت اخابره لان ما بيه اصبر اكثر

لزمت الموبايل خابرت مغلق !!!

يالخوف الحسيت بي بساعتها بحيث گلبي دگاته صارت بعيوني وكل جسمي خدر حتى بعد ما اگدر اتحرك او ارفع ايدي ع الاقل

بالگوه استجمعت نفسي حتى اخابر نهى اسأل عنه بس ما جاوبت !!! منال نفس الشي !!!

مياس.. شلون يا ربي اخابر شهم لو فشله .. لا لازم اخابره ما بيها مجال بعد لان راح اموت من خوفي

خابرته وحاله حال البقيه هم ما رد ،،، هنا اني انتهيت صدگ لان حسيت خلص كلشي انتهى وخسرت مهيب للأبد

شمرت الموبايل وخليت وجهي بالمخده بچيت لما گلت بس حتى ما انتبهت للوقت شلون مر

رفعت راسي عاينت الساعه ب١٢ رحت للكنتور طلعت السجل افرغ همي بي ويا كل كلمه اكتبها تنزل دمعه مني حتى الورقه انعدمت ... فجأه سمعت موبايلي دگ

ركضت علي بلهفه عاينت شهم ديتصل بيه جاوبته ع السريع

طلع مهيب ويا جهاد راحوا لمياس حتى يختارون غرفة نوم

اقل الساعه مبدل دا اطلع للشغل شفتهم طبوا بس ثنينهم وجهم مگلوب ع البطانه

شهم.. شو رجعتوا بسرعه خير ؟؟

مهيب.. الافندي تعب واجل الموضوع

جهاد.. مهيب

مهيب.. شرايد

جهاد.. عوف هالبنيه لتتزوجها

مهيب.. شنوووو ؟!!!

جهاد.. عوف مياس

مهيب . لتخبلني جهاد من شفتها وانت مدري شصار بيك ،،، الطريق كله احاول افهم منك السالفه ظليت مصر ماكو شي تالي من نوصل للبيت تگولي لتتزوجها زين ليش اريد افتهم

جهاد.. متفيدك صدگني متفيدك

شهم.. صافن عليهم مصدوم من الشي الدا اسمعه بس ما تدخلت ردت اشوف لوين يوصل الموضوع

مهيب.. لو تحچي شي بي حظ لو تكرمنه بسكوتك جهاد

جهاد.. مهيب متتزوجها يعني متتزوجها تسمع لو لا

مهيب.. دكل ×××× مو اني امشي بكيفك ،،، قنعني اول بعدين نعثل براسي

جهاد.. مهيب لتزهگني ولك هاي چانت تشتغل بالشوارع تعرف شنو يعني بالشوارع ،،، يعني يوميه واگفه بين الف رجال وحاچيه ويا الفين ××××

مهيب.. احترم نفسك جهاد هاي مرتي ما اسمحلك تحچي عليها بهالطريقه ،، بعدين انت شعرفك بشغلها ؟!!

جهاد.. ما حچيت إلا الحقيقه واعرفها من زمان لان چنت اشوفها من توگف تبيع بالتقاطع

مهيب.. القاضي راضي انت شدخلك متگولي

جهاد.. مو بكيفك السالفه ... انت مجبور تحترم الناس العايشين وياك

مهيب.. يا اخي انت شدخلك اني الراح اتزوجها لو حضرتك ؟!! ... كافي سد الموضوع دوختني ترى

جهاد.. يابه بالقرأن متتزوجها لهاي ال×××× وهسه تشوف

هو گال هيچ وما شفت إلا مهيب هجم علي وتضاربوا بيناتهم

ركضت احاول امنعهم بس ما گدرتهم ،، واحدهم تحول وحش وهجم ع الفريسه شيفكها من حلگه بعد

اصيح اريد ماكو لا يسمعوني ولا شايفيني گدامهم من الاساس

التموا اهلي متفاجأين من وضعهم لان اول مره يصير بينهم هيچ شي وهم واحدهم يحب الثاني مثل روحه واكثر كأنهم توأم

عجزت امنعهم واني اشوفهم واحد دمه الثاني من الضرب ،، خليت بوكس بوجه جهاد وگع ليوره صارتلي فرصه ادفع مهيب عنه

شهم.. كااااااااافييييييي .... ×××× مو واگف بيناتكم احترموني شويه

جهاد.. خالي حاچي خلي يعوفها الله يخليك

شهم.. ليش جهاد احچي شتعرف عنها ؟!!

جهاد.. دا اگولكم تبيع بالشوارع يا عالم شنو محد بيكم يستوعب الكلام ... يحچي ويدگ على راسه

شهم.. وانت تريد تقنعني هذا حالك وعصبيتك وايدك النمدت على مهيب لأول مره بحياتك كله بس لأن البنيه چانت تبيع كلنس ؟!!!

جهاد.. اي خالي وهذا السبب كلش كافي حتى يعوفها ... شيگولون علينه العالم من يعرفون متزوجله وحده مثل هاي

مهيب.. لك گوه لازم نفسي عنك لتخليني اجي اعدمك العافيه

جهاد.. تعال شو راويني مراجلك لو بس فالح تتزوج من بنات الشوارع

چان كلام جهاد مستفز لدرجة اني من يمي ردت انهي من الضرب بس لزمت نفسي عنه بالگوه .. تقربت منه اريد احچي ويا ما حسيت إلا مهيب دفره ببطنه اندفع عليه حتى اني ردت اوگع

تلازموا مره ثانيه بس هالمره اقوى من القبلها ... اني وايهاب عليهم وما گدرنه نفكهم

منال تصيح
امي تبچي وتدعي على مياس
سمر خبصت الدنيا بالعياط
بس هم ولا يمهم ..

شفت الوضع مينسكت عنه صعدت اركض جبت سلاحي نزلت بس سحبت الاقسام الكل سكت صار الوضع لو تنشمر ابره بالگاع تنسمع من بعد الهوسه

شهم.. بالله العظيم هسه كل واحد انيم براسه طلقه واريح البيت من شركم
هجعوا شويه لتخلون اعصابي تتطلع عليكم خلي نفتهم السالفه بهدوء لا چنكم چلاب بس بيكم عوي

مهيب.. شهم انت سمعت شحچه لو لا

شهم.. واگف يمكم وكلشي سمعت بس مع ذالك سوايتكم ما تتسولف ... والله عيب على شواربكم

مهيب.. تصرف ويا لعد وسكته لان لو ظل يشمر بالحچي ميخلص هاليوم على خير

جهاد.. وشتسوي بلا

شهم.. هم رجعنننننننه ... تسكتون لو اشعل شيب الخلفوكم لسابع ضهر

ايهاب.. شبيكم تخبلتو على ساعه ،، گعدو شو فهمونه السالفه وليرحم والديكم

جهاد.. ماكو سالفه خالي كل الموضوع البنيه متصلح تصير مره المهيب يقبل ميقبل هاي هي الحقيقه ومجبور يتقبلها غصبا ما على راسه

مهيب.. جهاااااااااد ،،، احترم نفسك زودتها كلش راح اگوملك بال××××

شهم.. كااااااافيييييي ... شو انچبوا شويه ،،، يلا گعدو هنا وما اريد اسمع حسكم إلا اذا اني سألتكم

ساعتين اريد اتفاهم وياهم ماكو يرحون يرجعون على نفس الحچي هذا يصيح ميتزوجها وهذاك يجاوبه مو بكيفك

اخير شي رجعو يتعاركون و واحدهم يغلط ع الثاني ... وگفت بنصهم دفعت كل واحد بصفحه

شهم.. لهنا وكافي راح اتصرف وياكم تصرف لا يعجبكم ولا يعجبني

جهاد.. اسمع مهيب اخير مره راح احچي افتح مخك زين حتى لا تندم بعدين
خلي عقلك براسك وعوف هاي البنيه والك عليه من باچر ازوجك اغاتها
لا والله تريد تركب راسك وتسويها شغلة عناد ساعتها متلوم إلا نفسك وهاي اني گتلك

حچه هيچ وخله وطلع ... ظل مهيب يصيح علي بس ما جاوبه اخير شي شال موبايله ورگعه ورى تفلش

مهيب.. شهم شوفلك حل ويا جهاد قبل لا اكتله بيدي

الحجيه.. يا يمه شلون بينه بعدها ما اجت هالحوبه للبيت تخاربوا الاخوان من تجي شراح يصير بس الله اليستر

انخبص البيت بسبب هالموضوع حتى محد منهم تعشه ،،، نشغل بالنه على جهاد صارت الـ ١٢وهو ما راجع نخابر علي مغلق

منال.. خويه شلون ؟؟ وين راح ابني شيغمض عيني وجهاد مو بالبيت

مهيب.. لتخافين منال عرج ميطبه ديتدلل علينه فوگ سواد وجها

شهم.. مهييييييب .. بسك عاد

مهيب.. انطيني جهازك اريد اخابر

الحجيه.. بس لا تخابر المگموعه مالتك

مهيب.. يمه الله يخليچ لتحچين عليها

الحجيه.. دافعلها بعد وانسى اخوك يالمسودن

مهيب.. شهم شبيك مو دا احچي ... انطيني جهازك بسرعه

شهم.. طلعت جهازي من جيبي تفاجأت بمياس مخابره اربع مرات بس من الهوسه ما سمعتها ..... : تعال ويايه مهيب

رحت لغرفته وهو راح يغسل شويه واجاني

شهم.. سد الباب وراك

مهيب.. خير

شهم.. مياس متصله اكثر من مره معناها ظل بالها اكيد .. الاريده منك متبينلها اي شي منا لما افهم سالفة جهاد

مهيب.. بدون متوصيني شهم ،،، قابل اگولها ابن اختي يگول عليچ بت شوارع وين صايره هاي

شهم.. المهم لتخليها تشك بشي دبر السالفه بمعرفتك

مهيب.. ان شاء الله دنطيني الجهاز خلي اخابر

شهم.. تفضل

انطيته الموبايل وصعدت لغرفتي گبل لان تعبت من القال وقيل طول اليوم

بدلت ملابسي ونمت على وجهي حتى ما حسيت على نهى من طبت للغرفه

جاوبت على اتصال شهم بس تفاجأت من سمعت صوت مهيب ... عاينت الموبايلي هذا مو رقمه شديصير

مهيب.. تسمعيني مياس

مياس.. مهيب هاي انت !!

مهيب.. اي حياتي

مياس.. وينك لخاطر الله مو گلبي وگف من خوفي عليك

مهيب.. اسم الله على گلبچ عمري ،، اسف جهازي وگع مني وتفلش بعدين صارتلي شغله لذالك ما گدرت اجيچ مثل ما وعدتچ

مياس.. شصار ؟؟

مهيب.. مو يمچ السالفه انسي ،، المهم مشتاقلچ كلش

صفنت ويا نفسي .... متأكده متلاغي ويا جهاد بس ما اتصور گايله كلشي وإلا مچان ردة فعله تكون بهل برود

خفت كلش من خسارتي اله ولأول مره عرفت بنفسي احبه وتأكدت من حبي اكثر لمن تخيلته راح يعوفني وشفت شصار بيه بمجرد فكرت بهل شي

مهيب.. مياس وينچ ؟؟

مياس.. تجمعت دموعي بعيني وگتله : احبك مهيب

مهيب.. شگلتي ؟!!

مياس.. سمعتني

مهيب.. عيدي الله عليچ لان مدا اصدگ السمعته منچ

مياس.. احبك

هو اني گلت هيچ واسمعه يعيط هذيچ العيطه الزينه بحيث شمرت الموبايل من ايدي لان اذني راحت

خربت ضحك علي ... رجعت شلت الموبايل شو هذا بعده يصيح

مياس.. مهيب شبيك تخبلت ليسمعون اهلك

مهيب.. ولچ خلي يسمعون ... خلي العالم كلها تسمع مياس گالت لمهيب احبك واخيرا
لچ احبچ والله احبچ وميت بحبچ

مياس.. هههه حياتي والله اني هم احبك بس على كيفك ويا روحك

مهيب.. شگلتي ... انتي شنو ؟؟

مياس.. ههههه احبك

مهيب.. استلگوووووووووووووو

مياس.. ههههه ولك كافي تصيح مو فضحتنه

مهيب.. حياتي عيديها بشرفچ

مياس.. كافي مهيب استلهست

مهيب.. بداعتي

مياس.. هههههه عمي احبك واموت عليك بعد

مهيب.. الله اكبررررررررررررر

مياس.. ههههههه لا والله تخبلت ما بيك مجال

مهيب.. طبعا تخبلت ... ولچ متدرين صارلي شگد منتظر اسمع هالكلمه منچ بس ردتچ تحچيها من گلبچ بلا ما اطلبها اني

مياس.. وهسه اني من كل گلبي دا احچيها ،،، احبك مهيب

مهيب.. يروحلچ فدوه مهيب وعشيرته نفر نفر

مياس.. ههههه العالم شعليهم بخبالك

مهيب.. حياتي تعبان كلش بس اريد انام بس على صوتچ

مياس.. والرصيد ؟؟

مهيب.. فدوتچ

مياس.. لا والله هههههه هذا لو چان رصيدك مو مخابرني من جهاز اخوك وتگولي فدوتچ

مهيب.. اي فدوتچ مو بس الرصيد حتى اخويه

مياس.. هههههه لا كلشي ولا شهم خط احمر هذا

مهيب.. ديلا اوعدچ اعوضه برصيد بس خليچ ويايه حتى اگدر انام

مياس.. ماشي حبي مثل متريد

ظلينه نحچي ساعه لحد ما طفينه ثنيناتنه ... ما اعرف منو غفى قبل منو بس المهم الخط ظل مفتوح للصبح ههههه

گعدت على صوت موبايل نهى يدگ منبه ... گمت بدلت ونزلت اتريگ دا اطلع تذكرت موبايلي ظل يم مهيب البارحه

دگيت الباب علي ما حس ،، طبيت لگيت الموبايل جوه راسه ورايح بسابع نومه

سحبته منه شفت الخط مفتوح ويا مياس

شهم.. هههههه  لا يا الله راح الرصيد من ورى هالزوج ... خبال اي والله

سديت الخط وطلعت للعشره اجاني جهاد للمعارض

جهاد.. السلام عليكم

شهم.. وين چنت ولك

جهاد.. يم صديقي

شهم.. طايح الحظ هاي سوايه تسويها حضرت جنابك .. تدري شصار بأمك لو متدري

جهاد.. ادري خالي ولتخاف خابرتها بالوحده لان اعرف بيها مراح تنام اذا ما سمعت صوتي

شهم.. اگعد شو

جهاد.. اسف خالو على الشي الصار البارحه ادري بروحي غلطان بس اتمنى تسامحني

شهم.. احچيلي جهاد ليش اخذت مثل هالموقف على مياس شنو سالفتك

جهاد.. خالي والله ماكو شي ،،، كل الموضوع ما تحملت مهيب يتزوج وحده مثلها بس اكتشفت نفسي غلطان لذالك اجيت اعتذر منك ومنه

شهم.. وليش غيرت رأيك فجأه

جهاد.. ما غيرت رأيي بس ما دام مهيب رايدها مجبور اسكت واتقبل حتى لا اخسره

شهم.. رفعتله حاجبي لان ممصدگ كلامه : متأكد ؟؟

جهاد.. اي خالو متأكد

شهم.. على العموم هسه هو على جيه ويصير خير ان شاء الله

ربع ساعه طب مهيب للمعارض بس شاف جهاد دار وجها يريد يروح صحت علي

شهم.. مهيييب .. تعال هنا

مهيب.. خير خويه

شهم.. اگعد

مهيب.. ويا جهاد مالي گعده بعد

شهم.. دا اگولك اگعددد

جهاد.. اسف مهيب حقك على راسي

مهيب.. بعديش

گامله حضنه حيل وهو يكرر كلمة الاسف .. شويه وبادله مهيب الحضن

مهيب.. اعتذارك مقبول ضلعي ،، مصار شي تعودنه على خبالك

جهاد.. الله يسعدك ويتمملك على خير ان شاء الله

مهيب.. رحم الله والديك .. يوم الألك

شهم.. يلا اذا خلصتوا مجاملات خلونه نشوف شغلنه

جهاد.. هههه بس لو اعرف شتحب من الشغل چان ارتاحيت

شهم.. الشغل حياة ميفهمها الفارغ

مهيب.. بيك هههههه

جهاد.. ههههه خو انت كيفت

مهيب.. اقل شي هذا حبيبي

مشت الايام وعده الموضوع على خير بس مع ذالك ما گدرت اتطمن لمجرد وجود جهاد بحياتي بعد كلشي صار .... شلت هم شلون اعيش ويا ببيت واحد واخلي عيوني بعيونه ويا ترى هو شلون راح يگدر يواجهني

بعد اسبوع طلعنه اني ومهيب نختار غرفه وهمزين جهاد ما اجه ويانه

مرت الايام هادئه ما بيها غير الحب اليكبر يوم عن يوم بيني وبين مهيب

اما سميحه من يوم النخطبت سكتت عني لان ابويه شد وياها ... مچنت اعرف السبب بس اهم شي ارتاحيت الحمد لله

جهزت لزواجي ويا نهى ومنال ،،، خطيه كلش ساعدني لان مچنت اعرف اختار وهن ذوقهن حلو وعدهن خبره بهالسوالف مو مثلي

وبعد مرور اربع اشهر على خطوبتنا چنت گاعده بغرفتي اكتب بالسجل سمعت الجرس يندگ

ما اهتميت وظليت على گعدتي بس اتفاجأت كلش لمن سمعت صوت مهيب يحچي ويا ابويه

مياس.. هذا مهيب !! شعنده اجه شو ما انطاني خبر

طلعت اركض بس شافني ابتسم ورجع كمل كلامه

مهيب.. اي عمي مثل ما گتلك

اشرف.. زين دتفضل جوه ترى ممقبوله منك كل ما تجي من الباب وتروح

مهيب.. لازم اروح لان عندي شغل مهم بس اجيت انطيكم خبر

بس شافني ابويه واگفه استأذن من مهيب وراح عنه

مياس.. شلونك

مهيب.. زين بشوفتچ حياتي

مياس.. طب الخاطري

مهيب.. ههههه شلون ما اطب وانت گلتي الخاطري

اخذته للاستقبال طبينه وسديت الباب ورايه

مياس.. شو ما گتلي راح اجي

مهيب.. المفروض تسأليني ع الشي الأهم

مياس.. شنو هو ؟

مهيب.. ليش اجيت

مياس.. هههه ليش اجيت

مهيب.. نهاية الاسبوع زواجنه حجزت القاعه اني وشهم

مياس.. تفاجأت كلش وخفت بنفس الوقت : صدگ تحچي مهيب

مهيب.. اي ليش مو خلصتي كلشي

مياس.. اي خلصت بس ... ما ادري شگولك والله

مهيب.. ههههه بس لا خايفه

مياس.. هههه لازم اخاف ترى الشغله مو لعبه

جرني لجسمه حيل ولزم خاصرتي بأيده

مهيب.. شنو رأيچ نتدرب هسه حتى تصير السالفه سهله بيوم العرس

مياس.. فتحت عيوني علي : شتقصد

مهيب.. هههه هسه اگولچ شقصد

راح للباب طگ القفل ورجعلي مبتسم

مياس.. هاي ليش قفلتها شتريد تسوي

جرني من ايدي دفن راسه برگبتي يبوس بيها ... احس بانفاسه الحاره وكلشي بيه يرجف إلا شويه يغمى عليه من الموقف

عاينلي بنضرات ذبلانه حط ايده على شفتي هو يگول :

مهيب.. صارلي اربع اشهر ما ضايگهن مو حرام

خجلت ودنگت منه ... رفع راسي وتقرب مني اخذ شفتي بشفته بس العجيب اني تفاعلت ويا مو مثل اول مره

ما اعرف شصار بيناتنه لان رحت لغير عالم ... صحيت لمن بعد عني يدگم بقميصه ويگول

مهيب.. حياتي لازم اروح

عاينت الدگم قميصه مفتوحات رجعت اعاين الروحي قميصي هم نفس الشي ... فتحت عيوني صافنه بوجها

مهيب.. ههههه لتعاينين هيچ ما ادري شصار

درت وجهي منه خجلانه من الشي الصار بيناتنه ... عدلت ملابسي حسيت ايده على چتفي

مهيب.. احبچ مياس ... شيجيب الخميس ما بيه اصبر بعد

سكتت لان المستحه ماكلني .. شفته سحب موبايله والسويچ من الميز ... باس راسي وطلع

رحت لغرفتي متفاجأه كلش شلون هيچ تيهت روحي ويا !!!! لهل درجه حبيته وما حاسه على نفسي

خفت بشكل مو طبيعي لان العرس بعدله ايام بسيطه .... نص ساعه وخابرني مهيب

مياس.. ها حبيبي وصلت

مهيب.. اي حياتي ... اسف ع الشي الصار قبل شويه

مياس.. ما صار شي لتعتذر

مهيب.. اعشقچ يروحي

مياس.. واني هم اعشقك

مر الاسبوع بشكل سريع كلش ... صارت نهى تجيني كل يوم حتى نخلص ترتيبات الزفه

حفيت وسويت شيره ومساج بس ما لعبت بشعري لان مهيب حلفني اخلي مثل ما هو يحبه على طبيعته

انطيت جهاز العرس النهى وشهم هم اخذوهن للبيت لان ما طبيت البيتهم من خطوبتي لحد يوم زواجي

صار يوم العرس گعدت الصبح على صوت نهى .... تريگت ع السريع وجهزت نفسي

حضرت غراضي وخليت السجل وياهن لان ما أمن علي إلا يمي ... رحنه للصالون من الصبح لحد بلاربعه العصر يلا خلصنه بس چان شغل الصالون كلش مرتب بحيث طلعت احلى من العقد بهواي

نهى.. ما شاء الله تبارك الرحمن فيما خلق .. ولچ ميوس شطالعه گمر ١٤

مياس.. شكرا حبي وانتي هم طالعه تخبلين كلش لايگلچ المكياج

نهى.. تسلمين يروحي ،، يلا راح اخابرهم يجون علينه

خابرت شويه واجانه شهم وصلنه للقاعه طبيت لغرفة التبديل بوجهي لان ما غيرت ملابسي بالصالون

سمر ونهى هن الساعدني بتبديل البدلات ومنال وگفت تستقبل المعازيم ويا الحجيه وبنات خالاتهم وعماتهم ع التوزيع

اول بدله لبستها چانت بنفسجيه فاتح وراها ماروني واخير شي الوردي

على الرغم من المغثه مالت سميحه لان مترتاح إلا تنغص فرحتي بس تونست كلش

صح بالبدايه چنت مستحيه بعدين البنات گومني ارگص ورگصن ويايه فشويه شويه نشال الخجل مني نوعاً ما

صاحت المله خلي تغير البدله البيضه حتى نسويلها الجلوه بس نهى ما قبلت لان مهيب يريد يجي يلبسني الذهب ونقطع الكيك سوه

اعاين عليها تروح وتجي تتصل علي والاحلى من هاي اسمعها ترزله گدامي لان تأخر ههههه

شويه واجه طالع يجنن بالنيلي ... طب للقاعه اعاين على جها ميتفسر من الخجل مثل العاده

وصل يمي رفعني اله وباس راسي ،، گعدنه وانخبصت الدنيا بلهلاهل تقرب مني يشاورني

مهيب.. حياتي شطالعه هذا الجمال كله الي اليوم ؟؟

مياس.. جاوبته بخجل .. اي الك

مهيب.. اويلي الله ممصدگ لحد الأن اليوم راح تنامين بحضني

مياس.. كافي والله دتخجلني

نهى.. يلا عيني لبس الذهب المرتك ع السريع المله مستعجله

لبسني الذهب وراها قطعنه الكيك وبت خالته تكفلت بالتصوير شويه وطلع

غيرت البدله البيضه وكملت المله عاينت للنسوان تعبن وگعدن يسولفن لان الحفله طولت اربع ساعات هههههه

نهى.. منال وين صارو مو ملينه

سميحه.. عاد غير يفضوها مو حتى الجهال تنحسو

منال.. هاي شبيكم خابرني ايهاب گلي بالطريق ديجون

ربع ساعه واجت الزفه .. طب مهيب گعد يمي بدن عماته وخالاته يهوسن اله شويه وطب ابويه يسلمني اله ... بس شفته نزلت دموعي

اشرف.. باسني من راسي : لتبچين يروح ابوچ الله يسعدچ ويوفقچ بحياتچ الزوجيه

مياس.. حضنته حيل : راح اشتاقلك بابا

اشرف.. دير بالك عليها عمي بعد ما اوصيك

مهيب.. ببطن عيني هاي الغاليه ميحتاج توصيني

اشرف.. الله يسعدكم ان شاء الله

مهيب.. مشكور عمي 

راح ابويه لبسوني وطلعنه ... صعدت بالسياره گوه لان ما اشوف گدامي ،، رفعت راسي شفت شهم اليزفنه بسيارته وامه گاعده يمه بالصدر

شهم.. يووووووولد راح نتحرك

يوسف.. انطلق حبيبي بس ما اوصيك اليوم للصبببببح

مهيب.. اشتعلت روحك يوسف

يوسف.. بالخدمه حبيبي هههههه

اسمعهم وخربانه ضحك ،،، اشتغلت الهورنات والاغاني تحركت الزفه وعلگوها علگ بس احلى ما بالموضوع شهم وجماعته صدگ لو گالوا العرسان ثنين والمجانين الفين هههههه

كل شويه يكسرون على سيارتنه وشهم يغلط عليهم ويضحك وهو يگول : بس خلي ازفهم واني الكم ×××× بسيطه

مهيب.. ههههه شهم دير بالك لتسوي حادث يمعود

شهم.. لتخاف حبيبي اخوك جاكي بالسياقه

فجأه كسر يوسف على سيارتنه طلعت ليگدام من البريك مال شهم

مهيب.. الله الله حياتي خو ما تأذيتي

مياس.. هههه هذوله صدگ يحچون

الحجيه.. طيح الله حظك يوسف اجينه نموت من وراك

شهم.. لك يوووووسف اني الك بس خل نوصل للبيت

يوسف.. تعال اخذ مرتك راح تموت ويايه هههههه

شهم.. يومك قبل يومها يلاغبر

ظلو على هالحاله ساعات بس چانت الزفه تونس كلش بحيث ما حسيت بالوقت ولا المسافه لمن طلعوا على حدود بغداد

صورنه بلاستوديو واصدقاء مهيب نزلوا اكثر من مره يرگصوا لل١٢ شهم دار السياره عرفوا الناس معناها خلصت الزفه

وصلنه للبيت وقبل لا اطب جابوا طلي ذبحه شهم جوه رجلي ،، روحي راحت من المنظر وتفاجأت من شفت شهم يذبحه بايده لان ممتوقعه يگدر يسويها ع الطيب العنده ههههه

بعد ما خلصت الزفه على خير طلعنه اني ومهيب نسلم على جماعتنه ونتشكرهم على وگفتهم الحلوه

الكل راحو طبيت للصاله بلا ما اعاين لان متروسه نسوان زرق ورق من المكياج ههههه

رحت للاستقبال گعدت وحدي انتظر مهيب شويه واجاني

مهيب.. ها خويه گول

شهم.. خويه ما اوصيك على مياس بعد ... دير بالك عليها خصوصا بهاي الليله فاهم قصدي مو ؟؟

مهيب.. اي خويه فاهم بعيوني ان شاء الله

شهم.. تسلم عيونك حبيبي ،، تعال اگعد شويه خلي البنات يمها بالغرفه اخاف تحتاج منهن شي

گعد يمي واجوي جهاد وايهاب ظلينه قريب النص ساعه نسولف بعدين تعبت كلش طلعت اصيح نهى حتى اصعد انام

طبيت گعدوني بالصاله يهوسون والولد كلهم ظلوا بره ،، اعاين بوجوهم مستغربه لان احس نفسي وحيده لا ام لا اخت لا عمه لا خاله فعلا بهذا اليوم حسيت بمعنى اليتم الحقيقي

اعاين البيت متروس بالنسوان الاعرفهن والما اعرفهن وشكلهن راح يباتن لان تأخر الوقت مو مال يرحن لبيوتهن

شويه وطب مهيب گعد يمي هوسن وهلهلن النه بعدين گام راح ما اعرف وين

نهى.. يلا حبي گومي اوديچ الغرفتچ كافي تعبتي

مياس.. اي والله انسطرت مو بس تعبت

نهى.. هههه حقچ والله

اخذتني للغرفه ... فتحت الباب وضحكت بوجهي

نهى.. تفضلي يا احلى عروس

عاينت للغرفه تجنن صح اني الختاريتها بنفسي بس هسه بالفرش والترتيب دا اشوفها احلى بهواي ... اصلا ممصدگه صارتلي غرفه وحدي وبيها اثاث

نهى.. ها حبي صافنه عجبتچ الغرفه لا ؟؟

مياس.. اي طبعا عجبتني كلش حلوه

نهى.. هههه بعد روحي صارت احلى بوجودچ

منال.. ها نهاوي كلشي تمام

نهى.. اي بس شنو تحچين لو اني احچي

منال.. عادي ماكو فرق

نهى.. يلا لعد الشغله يمچ ظلت ههههه

گعدت منال يمي ولزمت ايدي حيل ،، عاينت عليها مستغربه تصرفها ومچنت متوقعه راح اسمع منها هالكلام

منال.. حبيبتي تعرفين شي عن الزواج انتي لا

دنگت مستحيه منهم وما گدرت اگولها ليش عندي احد يعلمني شو بس سميحه واذا عليها بس تريد تخلص مني بأي طريقه

منال.. اممم مبين متعرفين ... اسمعي لعد حبيبتي ولتستحين من الكلام الراح اگوله اعتبريني مثل اختچ الچبيره

گعدت تشرحلي حسيت نفسي صخنت اعاين على نهى الادب سز واگفه وتضحك عليه

مياس.. عزه شنو هالحچي بطلت رجعوني السميحه احسن

منال.. ههههه ماكو رجعه بعد هيهات

نهى.. هذا اخوچ غير فطير ادري بالخطوبه شچان يسوي شو البنيه مستغربه وكلشي متعرف غير يشتغل يعلمها شويه 

منال.. هههه اخويه عاقل عيني

نهى.. خل نشوف العاقل شراح يسوي اليوم ،، وغمزتلي

مياس.. لا نهى الله عليچ والله دتخوفيني

نهى.. لتخافين حياتي ترى الشغله كلش حلوه صعوبتها بس بهل ليله هههههه

منال.. طيح الله حظچ امشي ولي لرجلچ خلي اعرف احچي ويا البنيه قبل ليجي مهيب

نهى.. هههه رايحه اتمنالچ ليلة سعيده حياتي

شهم.. نهى وينچ يمعوده

منال.. امشي رجلچ ديصيح لطشتي خو ما لطشتي

نهى.. خو انتي بس تردين تزحلگيني حسبالك گاعده على گلبچ هههه ... يلا ميوس شدي حيلچ كبد ،،،،، حچت هيچ وطلعت من الغرفه تضحك

مياس.. ههههه هاي شبيها ؟!!

منال.. ههههه عوفيها خبله ،،، هسه شنو كلشي تمام

مياس.. اي بس خايفه

منال.. عوفي الخوف وسلمي روحچ لرجلچ حتى كلشي ينتهي ع خير

طب مهيب گامت منال باركتله وطلعت من الغرفه

سد الباب وراها وطگ القفل ،،، دار وجها عاين عليه بابتسامه متت خوف منها .....

يتبع..