رواية مياس قلب الشهم الفصل التاسع 9 - بقلم لبنى الموسوي

#مياس_قلب_الشهم

للكاتبه #لبنى_الموسوي

وگفت يم الكاونتر اكل باظافري من التوتر ربع ساعه ونزيت من مكاني لمن سمعت ابويه ديغلط على احد بصوت عالي كلش

لزمت گلبي بس لا تعاركوا رحت للممر ع السريع وگفت بالزاويه اسمع .... اي والله ديغلط عليهم بس شو شهم ماله صوت معقوله يسمع ابويه يغلط علي ويظل ساكت !!!! لا ممعقول الادري بي هو عصبي كلش ،،، لعد شديصير يا ربي ؟!!

رجعت للمطبخ شويه وصار هدوء ،،، اكلني الخوف واني انتظر اي خبر يطمني قبل لا يصيرلي شي

سمعتهم سلموا ديرحون بس العجيب ابويه طلع وياهم وما رجع للبيت

رحت اركض لغرفتي اخذت موبايلي وطلعت رقم شهم ع السريع قبل لا تجي سميحه .... دزيتله رساله

مياس.. شصار ؟!!!

ظليت اعاين للشاشه ... يارب يرد يارب يرد يارب يرد

ثواني واشتغل ضوه الموبايل ... اي الف الحمد لله والشكر من جاوب فتحت الرساله وانصدمت منها

شهم.. الف مبروك عروستنا

شنو الف مبروك عروستنا شبي هذا ؟!! سمعت صوت اخواني شمرت الموبايل ع السريع من ايدي .. طبتلي سميحه

سميحه.. وين ابوچ ؟؟

مياس.. ما ادري ليش مموجود بالبيت

سميحه.. لا ،،، امشي لمي هوسة الخطار بسرعه

مياس.. صار

طلعت من يمها واول ما طبيت للصاله اشتميت عطر شهم گبل غمضت عيني

مياس.. شلون تالي وياك ؟!! عفيه كافي اطلع من گلبي وراسي حرام عليك خليني اشوف حياتي مو راح اتخبل

عاينت للمواعين اكو ماعون كيك ممسوح اكيد هذا مالت شهم لان هو طلبها مني بنفسه

رتبت الصاله وغسلت المواعين ... من التفكير تبللت ملابسي لان عقلي مو ويايه رحت للغرفه حتى اغيرهن لا استبرد

صار موبايلي گدامي ردت ارجع اقره رسالته اتأكد منها خاف يتراولي فتحت الموبايل شفت اكو رساله جديده

فتحتها ع السريع معقوله منه ،،، وفعلا چانت رساله منه كاتب بيها :

شهم.. بالمناسبه بنيتي عاشت ايدچ ع الكيك كلش طيب ... شكرا

الابتسامه صارت بگلبي قبل وجهي بحيث حسيت روحي طايره من الفرح شويه وانتبهت لنفسي

-لا مياس خلص لهنا وكافي اصحي على نفسچ ترى تعبتيني وياچ ... فتحت الرسائل وسويتله رد

مياس.. الف عافيه

اخذت ملابس الي ولاخواني ورحت اغسللهم حتى التهي بين ميجي ابويه واعرف منه شنو صار

طلعتهم وغسلت وراهم دا اطلع من الحمام صار ابويه گدامي ،،،، تفاجأت من ابتسم بوجهي

اشرف.. نعيما

مياس.. الله ينعم عليك بابا

اشرف.. نشفي وتعالي للصاله اريد احچي وياچ

مياس.. صار

رحت للغرفه طبيت سريع وسديت الباب ،، صفنت على شكلي بالمرايه : شبي ابويه ليش ضحك بوجهي ؟!!!

فلتت الخاولي من راسي ،،، مشطت شعري بسرعه ورحت للصاله لگيت ابويه گاعد ويا سميحه

مياس.. نعم بابا

اشرف.. اگعدي بنيتي

گعدت گدامه ،،، اجت مياده تركض گعدت بحضني ... بستها ورجعت اعاين الابويه بس اريده يحچي

اشرف.. بابا تذكرين هذا الرائد الساعدچ مره

مياس.. ما فهمت كلامه : شنو يعني رائد ؟؟

اشرف.. ههههه هذا الوصلچ لهنا من چنتي طالعه الضهر وحاصروچ ولد الحرام

مياس.. اي ذكرته ،،، شبي ؟؟

اشرف.. خطبچ الاخو

سميحه.. هلو هلو شنو هالقوانه الجديده بعد

اشرف.. اشش لتتدخلين انتي

سميحه.. شنو يعني لا اتدخل !!! بعدين شفهم من كلامك موافق علي لعد واسماعيل ؟؟

اشرف.. عود حسبالچ تمشي عليه سوالفچ بت عبود افندي ،، خابرتي عماد وخليتي يتصل عليه والعالم گاعده وبكل صلافه يهددني ويگول اسماعيل امرده برجلي بس تفكر تزوجها اله
تردون تخلون راسكم براسي موووو؟!!!
بسيطه من عيوني هاي اني راح انطيها لهذا الولد خلي اشوف شلون يمرد شهم حتى ساعتها يلعب بعداد عمره وهو ما حاس

فاتحه حلگي على كلام ابويه ،،، هذا هو لو گاعده احلم وما ادري بروحي

ظل ابويه يحچي عليها وهي ترادده بس بالي مو يمهم لحد ما سمعته صاحني

اشرف.. مياس

مياس.. ها بابا

اشرف.. شگلتي بنيتي توافقين حتى ارجعلهم خبر ؟

مياس.. دنگت وجاوبته بالگوه ،،، اي

اشرف.. شايفه الخير حبيبتي الله يسعدچ ان شاء الله

سميحه.. شنو يعني اشرف سويتها صدگ

اشرف.. اي لعد دا العب وياچ واحسبي حسابچ يوم الاربعاء يجون اهل الولد يطلبون ايدها منچ
الحاضر والغايب عشره بعشره وغيرها لتحچين اي شي

سميحه.. بسيطه اشرف بسيطه

گمت من يمهم رجعت للغرفه ممصدگه ابويه وافق لا وفوگاها حط راسه براس سميحه والله مدا اصدگ الصار

فرحه على خوف على توتر ... مگدرت افسر المشاعر الاجتاحتني بوقتها

من جهه فرحانه لان ابويه وافق على مهيب وعاف صديقه
ومن جهه ثانيه خايفه من الزواج لاني ممتقبله فكرته من الاساس وبلأخص زواجي من اخو شهم بالتحديد

اخذت مهيب ورحنه لبيت مياس حتى اطلبها اله من ابوها

دگيت الباب ومن فتحها انصدم كلش بشوفتي گدامه

شهم.. السلام عليكم ابو مصطفى

اشرف.. وعليكم السلام

شهم.. عندي موضوع وياك لو تسمحلي

اشرف.. اي اكيد ،،، كل الهلا تفضلوا

سوالنه طريق ... طبينه شويه وجاب الكيك ابتسمت من شفته وتعمدت اكله كله علمود افرحها

شهم.. ابو مصطفى احنه نعرفكم حق المعرفه لان جيرانه واهل منطقتنا لذالك يشرفني اطلب منك ايد بنتك لأخويه مهيب

اشرف.. والله ما ادري شگولك
طبعا النه الشرف بنسبكم الطيب بس اتمنى تعذرني لاني انطيت كلمه لغير عالم عليها

شهم.. ومنو هذا التفضله حضرتك على اخويه ؟!!

اشرف.. المقاول اسماعيل تعرفه اكيد

شهم.. اسماعيل !!! بس يا ابو مصطفى هذا رجال چبير وحسب ما اعرف بي متزوج ،،،، شلون تنطي بنتك وهي بهالعمر الواحد بعمره

اشرف.. هو صح چبير بس اعرفه خوش ادمي واكيد راح يسعدها

شهم.. واخويه شبي مو خوش ادمي مثلا !!

اشرف.. لا العفو ما قصدت هالشي والنعم منك ومن اخوك بس السالفه وما بيها صارت كلمه ويا الرجال وصعب اتراجع عنها

شهم.. زين انت سألت البنيه عن رأيها ؟؟

اشرف.. لا بعدني بس اكيد تقبل ومتردني

شهم.. هذا حچي ابو مصطفى ؟!! ترى هذا زواج وعشرة عمر مو يوم ويومين
ابد مو صحيح تقرر قرار مثل هذا علمود علاقات شخصيه وتتجاهل رأي بنتك

اشرف.. منو گلك اني متجاهلها اكيد راح اسألها واخذ رأيها قبل كلشي

شهم.. زين لعد خيرها بين مهيب واسماعيل واحچيلها عن وضع الطرفين خلي نشوف تختارمن تالي

اشرف.. وليش اخيرها يعني

شهم.. لعد شتريد تخليها گدام الامر الواقع حتى تقبل باسماعيل لان ماعدها غير حل

اشرف.. وشبي اسماعيل حتى تگول عنه امر واقع ؟؟!!

شهم.. بشرفك مقتنع انت بهالكلام ؟!! اريد افهم اكو مقارنه بينه وبين مهيب لو بس لانه صديقك تنحاز الطرفه

راد يحچي دگ موبايله ومن كلامه عرفت المتصل عماد

اشرف.. ها عماد ،، اي صح ... بنتي وحر بيها متجي تحاسبني حضرتك .. مو تايهتلك السالفه من دنعل ابوك لابو غيرتك يا قندره يا ابن القندره ... عجل راح ازوجها واشوف شتريد تسوي ساقط واذا بيك حظ صير رجال ونفذ كلامك مو بس بيك تحچي ××××

عاينت المهيب يعاينلي باستغراب وياشر بيده هزيتله راسي بابتسامه

كمل المكالمه بس ممنتبه النفسه الضاهر نسى احنه هنا واخذته العصبيه .. مسح وجها بيده وعاينلي

اشرف.. اعتذر عن السمعتوا بويه بس هذا فد واحد تافه وسربوت لزگ يريد يتزوج بنتي عجزت واني ارده بلا فائده

شهم.. مصار شي ابو مصطفى معذور

اشرف.. عموما فكرت بكلامك وفعلا انت الصح لذالك اني من يمي موافق بس اسأل البنيه واردلكم خبر ان شاء الله

ابتسمت ومديت ايدي بجيبي طلعلته الرقم

شهم.. بالخير ان شاء الله ،،، هذا رقمي وانتظر اتصالك

اشرف.. ان شاء الله خير

استأذنه وطلعت ركبت بالسياره واول ما صعد مهيب سألني

مهيب.. شصار جوه

شهم.. هههه والله هذا عماد طلع غبي بشكل يفوق التصور ،،، عموما رحم الله امه وابو سهل علينه السالفه

مهيب.. ههههه شلون والله ما فهمت

شهم.. هذا عرف اسماعيل خطبها من خالته فخابر ابوها حتى يهدده بس ابو مصطفى سواها ويا شغلة عناد لذالك وافق عليك بسرعه

مهيب.. هههه يا غبييي ،،، بس يلا المهم النه الصافي

بهلاثناء اجتني رساله فتحتها وابتسمت مياس ظل بالها ... دزيتلها الف مبروك عروستنا حتى تفتهم

مهيب.. شبيك تضحك

شهم.. زوجتك المستقبليه تسأل شصار

مهيب.. هههه وشگلتلها

شهم.. باركتلها شگول يعني

لزمت الموبايل رجعت دزيتلها رساله تشكرت منها علمود الكيك وتحركنه للمعارض

لليل رحت للجم ويا يوسف ... خابرني ابوها وگال الاربعاء دز اهلك اذا تحب ،،، وافقت فوراً

رجعت للبيت لگيت مهيب وجهاد راجعين قبلي

شهم.. السلام عليكم

الكل.. وعليكم السلام

الحجيه.. ها يمه شصار وياكم هذا مهيب اللئيم ميقبل يحچي

شهم.. ههههه يتدلل عليچ يمه ،،، عموما الاربعاء حضروا نفسكم تروحون مشيه للبنيه وشيگولولكم وافقوا ما اريد مشاكل

الحجيه.. وليش عيني هم فگر هم يتشرطون واحنه نقبل

منال.. يمه عيب شنو هالحچي والله ميصير

الحجيه.. چا انه شگلت غير هي هاي الحقيقه

شهم.. استغفر الله رب العالمين واتوب اليه ،، يمه الله يخليچ عوفي هالسوالف الولد شاريها وهي شاريته الباقي كله مو مهم

الحجيه.. اني ادري منين طلعتلي صفح ولافت على ابني واكلت عقله ،، زين يمه شهم شلون نروح نمشي عليها واحنه لا شايفيها ولا نعرف عنها اي شي

شهم.. حجيه ادري ابنچ الراح يتزوجها لو انتي ؟!!
المهم مهيب شايفها وعاجبته هذا الشي كلش كافي
على العموم شتريدين تعرفين اني اگولچ

الحجيه.. اسمها .. عمرها .. دراستها .. اصلها .. فصلها .. شكلها حلوه عوره 

مهيب.. هههههه لا يمه على بختچ عوره شنو !!

الحجيه.. چا غير ذوقك يعني مابي ضمان

شهم.. ههههه شراح يخلصها من هالسالفه اجت واخذت بزر الگعده حبيب گلب امه الها الله تخلص من ضيم سميحه تجي لضيم سهامه

الحجيه.. هسه صرت ضيم خلف الله عليك يبن بطني !!! بعدين منو هاي سميحه

شهم.. رحتلها اضحك بست راسها واني اگول : لا يمه انتي الخير والبركه
اسمعي يمه البنيه اسمها مياس عمرها ١٤ دراسه ممكمله وحلوه بعد شتردين
واذا على سميحه فهي مرت ابوها وهاي وحده ما تنگحم الاريده منچ شتحچي لتدريلها بال لان تكره مياس وراح تحاول تخرب عليها بكل الطرق

الحجيه.. واني مجبوره اتحمل طميسه هاي ... والله اذا غثتني اچفص بنص معدتها ازوعها حليب امها الشربته واذا شاربه حليب قواطي السالفه تصير اسهل

شهم.. ههههههههههههه لك مهيب ما اتصور سالفتك راح تصير مناك سميحه ومنا سهامه

مهيب.. ههههه يمه فدوه لطولچ تحملي هي ساعه ويخلص الموضوع

الحجيه.. من كون انت تريد تجيبها الي شلون تريده يخلص يعني

نهى.. ههههه مهيب ولا يهمك اني ومنال موجودات خليها علينه

شهم.. وشتريدين تسوين عيني قابل تسدين حلگ امي

نهى.. هههه اذا اضطر الامر ليش لا

شالت امي العصه وگامتلها وين اليوجعك

الحجيه.. ولچ نهيوه اني تربطين حلگي دتعاليلي خلي اربيچ

نهى.. ههههه اخ لا يمه والله قصدت اربط سميحه مو انتي

شهم.. هههههه گومي سويلي عشه لان لو ظليتي هنا تتكسرين ومتگدرين تتحركين بعد خطوه وحده

تعشيت وصعدت فوگ انام ثاني يوم رحت لشغلي بس تفاجأت من ما شفت مياس بمكانها

ظل بالي ليكون صارلها شي اخذت موبايلي ودزيتلها مسج ،،، اقل الدقيقه خابرتني رفضتها ورجعت اتصلت بيها

بلليل اجه ابويه تعشينه وخلصت هوسة المطبخ ،،، رحت اوديلهم الچاي سمعته يحاچيني

اشرف.. وين رايحه مياس

مياس.. انيم اخواني تريد شي بابا

اشرف.. بعد لتطلعين للشغل

سميحه.. وليش يمه

اشرف.. ليش يعني خلص البنيه راح تتزوج مالها داعي وگفتها بالشوارع كلها كم يوم وتروح لبيت رجلها

فرحت كلش من سمعت كلام ابويه واخيرا خلصت من الشارع وضيمه

گتله صار واخذت اخواني انيمهم ،،، اول شي ما قبلوا ينامون فگعدت العب وياهم لحد ما خليتهم ينعسون وناموا

تمددت افكر بكلشي ،،،، اكو خوف مو طبيعي بداخلي ما اعرف شنو سببه او يمكن اعرف بس ما اريد اعترف بي النفسي

ما حسيت على نفسي شلون نمت لحد ما سمعت صوت جهازي يدگ يم راسي

فزيت مخروعه لان شفت الساعه سبعه ونص بعدين تذكرت ماكو شغل من اليوم

مياس.. ههههه والله عليچ سوالف مياس مسويتلچ رعب سميحه
بس شنو اني سمعت جهازي دگ لو يتهيألي ؟!!
اي يمكن دگ !!
هاي شبيچ دلزمي الجهاز وراح تعرفين ثول اي والله

شلت موبايلي جايتني رساله فتحتها من شهم

شهم.. شو ماكو بمكانچ خير ان شاء الله ؟!! اذا محد يمچ رمشيلي حتى اخابرچ

مياس.. يمه فدوه لحبيبي ظل باله عليه

فتحت عيوني على نفسي ... عززززززه هاي شبيچ مياس !!!

استغفر الله ربي استغفر الله

لالا  لهنا وكافي لازم اخلي حد لهل مهزله لان حيل زادت عن حدها

اصحي كافي حتى حرام عليچ راح تتزوجين اخو وگلبچ يمه

يعني واذا ساعدچ ابتله على عمره لو شنو

واحد متزوج واكبر منچ ويعتبرچ مثل بنته وفوگ كل هذا خطبچ الاخو

يا ربي فدوه الاسمك شبي حظي يعني ما لگيت بهالدنيا غيره 

نفضت الافكار من راسي خابرته رفضني ورجع اتصل

مياس.. الو

شهم.. صباح الخير

مياس.. صباح النور

شهم.. خو ما بيچ شي ظل بالي يمچ

مياس.. لا ليظل بالك بس ابويه گلي بعد لتطلعين للشغل لان راح تتزوجين

شهم.. بعد احسن اصلا اني چنت اريد احچي ويا بهذا الموضوع بعد ميجون اهلي الكم

مياس.. يلا اخذ راحتك

شهم.. ماشي مع السلامه ،، لحظه مياس بعدچ ويايه ؟؟

مياس.. اي گول

شهم.. الاربعاء يجوكم عندچ علم

مياس.. اي گللنه ابويه

شهم.. خير ان شاء الله ،، اترخص

مياس.. الله وياك

سديت التلفون منه دموعي جرت عشره عشره

گلبي يوجعني وعقلي يوجعني شسوي الروحي حتى ارتاح وشسوي النفسي حتى انسى والله تعبت تعبت

گمت اشتغل حتى التهي وابطل تفكير شويه وگعدوا سميحه واخواني

سميحه.. ها ولچ اليوم مرتاحه

مياس.. الريوگ جاهز اصبلكم ؟؟

سميحه.. عود فرحانه بي والله ما ارتاح اذا ما اخربها عليچ

عفتها ورحت للمطبخ ،،، خفت كلش من كلامها بس شريد اسوي اخليها على رب العالمين والله كريم

مشت الايام بهدوء وبعد ما گعدت بالبيت ما عرفت اي شي عن شهم او مهيب

صار يوم الثلاثاء گعدت من الصبح نفضت البيت من فوگ ليجوه ما بقيت لا بردات لا مراوح لا شبابيك ... اني طبيعتي كلش احب شغل البيت بس مچنت الحگ بسبب وگفتي بالشوارع واذا على سميحه لو تبقى عليها فالوصاخه توصل الراس الشارع 

لليل هلكت كلش بحيث اول ما خليت راسي ع المخده نمت من گد التعب ... ثاني يوم چان موعد مشية النسوان

گعدت الصبح سويت الغده وتغدينه للثنتين گمت اخذتلي جوله ثانيه ع البيت قبل لا يجون العالم .... خلصت ورحت للحمام غسلت

طلعت نشفت و وگفت بالمطبخ ارتب الفواكه بالصحون سمعت صوت هورنات قريب علينه

رحت اركض للشباك اعاين سيارت ٤ و اول وحده چانت سيارة شهم

شفت النسوان بدت تنزل ،،، حييييل يا يمه هذني شگد وين راح نگعدهن ؟!!!

سميحه.. ها شو واگفه هنا

مياس.. ابويه وين ؟؟

سميحه.. طلع گال هسه النسوان يجن مو مال اظل بالبيت

مياس.. زين لعد هاي وينهم اجو فتحيلهم الباب اني رايحه اغير ملابسي

سميحه.. اي ليش لا تأمرين امر

عفتها وركضت للغرفه ... فتحت الكنتور حايره شلبس يا الله حتى ملابس مثل العالم والناس ما عندي

عاينت عندي قميص سمائي وبنطرون كابوي ازرگ .... اي يلا هذني ينطلع بيهن شويه

لبستهن وگفت گدام المرايه اعاين النفسي ... اي هيچ زينه بس شعري شراح اسوي بي ؟؟

ظليت امشط وارفع وانزل بي بالربع ساعه لحد ما اجت سميحه تصيح عليه

سميحه.. شدتسوين هي ×××× النسوان صارلهن ساعه گاعدات ينتظرن طلتچ البهيه

مياس.. اي يمعوده بلا فشارچ جايه فد لحظه

فتحت المجر شفت ماشات اختي مياده اخذتهن ،،، شلت اطراف شعري من الجوانب قرصته بالماشات والباقي ظل مهدود

مياس.. يلا مياس هيچ ما بيچ شي كافي العالم دتنتظر

طلعت اسمع اصواتهم يحچون تبسمرت بالممر خجلانه اطب عليهم

مياس.. يا ربي والله استحي هسه شلون اطبلهم

سمعت وحده بيهن تسأل : يلا وين العروس خلي تجي نشوفها

سميحه.. اي اي هسه جايه

طلعت سميحه من يمهم شافتني گبالها خزرتني وهي تأشر بيدها حتى اطب

غمضت عيوني واني اردد ايات من القرأن لحد ما تشجعت وطبيت عليهم

واگفه گدامهم مثل الصنم خجلانه ما اعرف شنو المفروض اسوي لان محد علمني وهم يتفحصوني بعيونهم لحد ما گامتلي وحده منهم

منال.. صلوات صلوات مثل الگمر عيني بارده عليچ تعالي حبييتي خلي نبوسچ

عرفت لازم ابوسهم يعني رحت بوستها وبعدين بوست النسوان الكبار لحد ما تعبت على گد ما بوست بيهن ههههه

گعدت بصف سميحه افرك بيدي من الخجل وعيوني بالگاع ندستني سميحه بيده

سميحه.. ولچ گومي جيبي التقديم الهن المن گعدتي

مياس . اي اي

رحت للمطبخ جبت الفواكه قدمتلهن ورجعت گعدت بمكاني .... حچت وحده من النسوان الكبار

الحجيه.. اي يمه شسمچ انتي

مياس.. مياس

الحجيه.. اني ام العريس

مياس.. هلا بيچ خاله

الحجيه.. وبيچ اكثر

نهى.. فدوه چنها لعابه تخبل

مياس.. ابتسمت الها ،، شكرا حبيبتي

منال.. خلي نعرفچ علينه بلأول اني اخت العريس وهاي امه .. خالته .. خالته الثانيه .. الثالثه... عمته ... وهاي هم عمته ... وهاي بعد عمته ... وهم عمته ... وهذني بنات خالته الچبيره .. وهذني بنات عمته .. هاي مرت اخو ايهاب ... وهاي مرت اخو شهم

بس گالت مرت شهم درت وجهي عليها ... عاينت الها مبتسمه بوجهي فدوه ناعمه وتجنن مبين عليها حبابه

سميحه.. كل الهلا عيوني واني مرت ابوها

الحجيه.. اي عيني خلي ندخل بالمفيد

سميحه.. اي ليش لا

الحجيه.. شگد تريد العروس حاضر وغايب

سميحه.. عشره بعشره احنه عالم قنوعين وفقره يعني نمد رجلنه على گد غطانه
حتى العروس تبيع كلنس بالتقاطع يوميه يعني لتخافون مراح تشيل خشمها عليكم

هي گالت هيچ واني الدمعه طفرت من عيني .... الله ليوفقچ سميحه ... الله ينتقم منچ بجاه كلمن عنده جاه يم رب العالمين

الحجيه.. شنو تبيع كلنس بالتقاطع ؟!!

سميحه.. اي شنو ابنچ ما گللكم قبل لا يدزكم تخطبوها

عاينت للنسوان كلهن صافنات عليه وكل وحده نظرتها شكل منهم من شفق عليه ومنهم من يعاين بنظرة استهزاء ومنهم اشمئزاز

شفت امه رادت تگوم لزمتها اخته من ايدها حتى تمنعها

منال.. شكو بيها الفقر مو عيب احنه شارين اخلاقها وشرفها مو غير شي

سميحه.. لا هي من جهة اخلاق فاخلاق والله صح كم مره تعرضت للتحرش لان تشتغل بالشارع بس ظلت محافضه على نفسها لتخافون يعني البنيه صاغ سليم

منال.. اي عيني عوفي هالسوالف احنه موافقين بعد عدكم شي ثاني

نهى.. ليش هي خلت شي ينگال بعد

سميحه.. شتقصدين ؟!!

نهى.. كلشي ما اقصد

ام يوسف.. خاله مياس تردين شي بعد عندچ شروط

مياس.. احچي وياهم واني مدنگه حتى استحي اعاين بعيونهم ... لا خاله كلشي ما اريد

نهى.. حبيبتي ميوسه انطينه رقمچ حتى ننفق وياچ على بقية التفاصيل

سميحه.. تتفقون وياها شنو لعد اني شنو گاعده هنا خراعة خضره مثلا ؟؟؟

نهى.. غير هي العروس لذالك القرار الاول والاخير الها بكلشي

گمت طبيت للغرفه اجيب ورقه وقلم حتى انطيهم رقمي ... امسح بدموعي وما اعرف منين تنزل

كتبته ورحت غسلت حتى لا يبين عليه باچيه ... طبيت انطيته المرت شهم

مياس.. تفضلي

نهى.. شكرا حبي

مياس.. العفو

منال.. نهى خابري شهم يجون علينه

سمعتها خابرته ... ربع ساعه ورمشلها يعني اجو

الحجيه.. يلا احنه نستأذن

منال... نظل وياكم ع الاتصال ان شاء الله

گامت منال بوستني حتى يرحون وراها مرت شهم

نهى.. فدوه لله يهنياله مهيب بيچ

مياس.. حبيبتي شكرا الچ

صفنت بوجها شگد حبابه مثل رجلها صدگ الطيبون للطيبات

طلعن النسوان وگفت اسلم عليهن بدون ما ابوسهن اول ما سديت الباب جرتني سميحه من ايدي

سميحه.. هذا منين يعرفچ ولچ بحيث اهله ما هتموا لأي شي يخصچ لان يدرون بأبنهم يريدچ وقابل بيچ بكل عيوبچ

جريت ايدي منها حيل واني اعاين عليها بعصبيه

مياس.. شنو معنى سوالفچ هاي تردين تخربيها مو ؟؟؟ متخرب لو تموتين وگول مياس گالت

ركضت للغرفه طبيت وقفلت الباب ظلت تدگ بيها حيل تغلط وتفشر ولا كأني اسمعها

مياس.. خلص سميحه لهنا وكافيييي ،،، راح اطلع من هذا البيت واخلص منچ ومن تحكمچ بيه بعد ميحقلچ تمدين ايدچ عليه تسمعيني لو لااااااا

سميحه.. بسيطه ولچ بسيطه هسه اراويچ سميحه شتسوي بيچ

گعدت ع المندر شبعت بچي لو بيدي اضرب نفسي سچينه واخلص من هالدنيا الگشره

مياس.. هسه شراح يگولون عليه ؟؟ اصلا امه شكلها ما وافقت يعني السالفه راح تخرب من صدگ ... يا ربي شسوي بروحي والله تعبت تعبت

بچيت لحد ما طگ راسي ... سمعت صوت ابويه اجه گمت غيرت ملابسي وطلعت اسلم علي

اشرف.. شبيچ چنتي تبچين !!

مياس.. اي بابا

اشرف.. ليش ؟؟

مياس.. من وره مرتك تصور تگول الاهل العريس مياس  تبيع كلنس بالتقاطع وصح اتعرضت اكثر من مره للتحرش بس گدرت تحافظ على روحها

اشرف.. صدگ هالحچي ؟!!!

سميحه.. عمه بعينها الچذابه

مياس.. بابا اذا متصدگ خابر الولد وشوف اهله شگلوله حتى تتأكد من كلامي

شفت ابويه صار بركان طفر على سميحه وملخها گدامي اني واخواني

اول مره بحياته يمد ايده عليها بحيث حتى هي تفاجأت

عاينتلها انتهت بيده واخواني گاموا يتصارخون من الهبطه ،،، اخذتهم ورحت اركض للغرفه خطيه يشوفون امهم بهالحاله

شويه وصار هدوء ... خليتهم بالغرفه وطلعت اشوف شصار لگيت سميحه گاعده تبچي ومنتهيه من الكتل وابويه يشرب چگاير باول الممر

بس شافتني گدامها گامت تريد تضربني

سميحه.. اني ولچ يصير بيه هيچ من وراچ تعاليلي

ركض ابويه لزمها من شعرها قبل لا تضربني وگام يصيح عليها بكل صوته

اشرف.. ايدچ تنكسر اذا تلوح مياس تسمعيني لو لااااا ... فوگ عملتچ هاي عين ال××××

رجعت تبچي بحرگه وتصيح على ابويه

سميحه.. ما افوتها الك اشرف وهسه تشوف اذا ما ادفعك ثمن هالشي ما اطلع اني سميحه

اشرف.. طززززززز سوي اليعجبچ بت ال××××

بهلاثناء دگ موبايل ابويه ... طلعه من جيبه عاين للشاشه وهو يمسح بعرگ گصته

فتح الخط وانصدمت من گال :

اشرف.. ها شهم

خليت ايدي على گلبي ليش خابر بهالسرعه معقوله خربت السالفه ،، اي اكيد خربت ماكو غير تفسير لهل شي

اشرف.. لا بويه شنو السالفه مو هيچ ،، هاااا يلا ماشي براحتكم بيها الخير ان شاء الله .. الله وياك عيوني

يا ربي شنو براحتكم شگله يعني ... اكيد گال بطلنه لان امه ضاجت كلش يعني مستحيل تقبل بيه چنه الها بعد الشي العرفته عني

سد الخط منه وراح للمطبخ بلا ميحچي شي

وگفت بمكاني افور من القلق والتوتر لحد ما شفته رجع گعد بالصاله وطلع جكارته يورثها

ظليت ادعي بداخلي بس اريده يحچي ويريحني لان رجلي بادت من الخوف لحد ما سمعته يگول :

اشرف.. مياس بابا اخو مهيب خابرني يگول باچر مشية الزلم ....

يتبع..