رواية مياس قلب الشهم الفصل الثاني عشر 12 - بقلم لبنى الموسوي

#مياس_قلب_الشهم

للكاتبه #لبنى_الموسوي

طب مهيب گامت منال باركتله وطلعت من الغرفه

سد الباب وراها وطگ القفل ،،، دار وجها عاين عليه بابتسامه متت خوف منها

مهيب.. نورتي غرفتچ حياتي

حرام اذا گدرت انطق حرف .. صافنه بوجها وقطرة دم ما ظلت بيه

مهيب.. ههههه هاي شبيچ يمعوده ليصيرلچ شي من الخوف

مياس.. هااا لا ما خايفه اني

مهيب.. كلش واضح

مياس.. صدگني ما خايفه

تحرك باتجاهي گمت من گعدتي ع السريع ورجعت ليوره

مياس.. مهيب بطني توجعني

مهيب.. ههههههه من الخوف حبي من الخوف

مياس.. خلي ننام عفيه

مهيب.. صدگ تحچين ؟؟!!

مياس.. اي لان نعست كلش

ابتسم وهز براسه ... مشى باتجاهي وصل يمي حاوطني بأيده

مهيب.. حياتي تذكرين من اجيت ابلغكم بموعد العرس وظلينه وحدنه بلاستقبال

مياس.. اي شنو يعني

مهيب.. شفتي بوقتها شلون انتهينه ثنيناتنه بحيث ما حسينه على نفسنه شدنسوي ولا عرفنه شصار

مياس.. بس هالمره غير

مهيب.. لا مو غير انتي بس سلميني روحچ وذوبي بين اديه مثل هذاك اليوم ومعليچ بالباقي

مياس.. مهيب والله خايفه

مهيب.. لتخافين يگلب مهيب

مياس.. عفية اجلها احس روحي ممستعدة هسه

مهيب.. مياس !

صفنت بوجها ... والله مو بيدي خايفه كلش لدرجة الدمعه بطرف عيني وگوه لازمه نفسي گدامه

مهيب.. ها حياتي راح تظلين ساكته

مياس.. جوعانه

مهيب.. هههههه دتتحججين ترى

مياس.. هاي شبيك والله جوعانه كلشي ما اكلت من الظهر لهسه

مهيب.. صدگ شو هذوله ما جابولنه عشه شنو فلمهم !!

مياس.. حقهم تعبوا اليوم كلش

مهيب.. هسه شلون ؟؟! .. زين عندي فكره عشيني وبعدين اعشيچ

مياس.. شلون يعني

مهيب.. اني جوعان عليچ فخلي اكلچ وراها بيچ خير وتتدللين اطيب اكل يجي يمچ

مياس.. فتحت عيوني علي : مهييييب شنو هالحچي

مهيب.. هههه شنو حياتي

مياس.. يلا جوعانه فضني اريد اكل

مهيب.. بروح امچ جوعانه

يبوووو چنت اريد اشرد منه تالي حلفني بروح امي ولزمني من ايدي التوجعني

مهيب.. يلا جاوبي اذا گلتي وروح امي جوعانه هسه اطلع اجيبلچ العشه

مياس.. لا مو جوعانه
لا جوعانه بس مو كلش
لا لا اصلا ما اشتهي اي شي
مهيب .... شلون بيه خايفه والله

مهيب.. هههههه اذا اليوم اظل وراچ للصبح راح نبقى على هالحاله ... خل اشتغل وحدي احسن

شالني من خاصرتي رفعني لمستوى .. عاين بعيوني مبتسم

مهيب.. هسه عادي نتدمر من حمرتچ لان ماكو احد نخجل منه

مياس.. ههههه يا ريت ترجع هذيچ الايام ولا هالخوف الما اعرف شنو نهايته

مهيب.. كل خير حياتي كل خير .. يلا غمضي عيونچ الحلوه

غمضت بسرعه خوف على توتر بس تدريجيًا صارت هالمخاوف تتلاشى

مهيب.. نزلني وعيونه مبتسمه : ها حبي راح الخوف

هزيتله براسي بلا ما احچي .. نزع سترته ديفتح بدگم القميص غمضت سريع

مياس.. هاي شدتسوي والله عيب

مهيب.. هههههه خرب ببليسچ على هالطلعه ،، لعد والصار قبل شويه مو عيب

مياس.. شوف اني راح ادير وجهي وانت بدل

مهيب.. هههه حياتي اني ما اريد ابدل

مياس.. لعد شتريد

مهيب.. اريد انزع

مياس.. عززززززه

مهيب.. اااااف خلص صبري شو تعااااااااي

ليلة عمري ما انسى تفاصليها وعلى الرغم من أنها تتسمى ليلة العمر لكل بنية بس ليلتي كانت من اسوء الليالي

ابتعد عني دموعي ما اسيطر عليها اكو وجع مينحمل اريد اسيطر على جسمي ما اگدر فجأة صرت ارتعش بوضوح ومهيب يمي يحاول يهديني

مهيب.. والله مو قصدي وداعتچ بگلبي ما حسيت ع نفسي ،، اسف يروحي اسف ..
يرفع راسي بأيده بس ما اتجاوب ويا : مياس شو عاينيلي ،،، حياتي احچي الله يخليچ شدتحسين ؟؟

مياس.. مهيب موجوعه كلش

مهيب.. سوده عليه ،،، تعالي خلي اوديچ للحمام اسبحي بالماي الدافي تتحسنين شويه

ديگومني حتى اغسل صارت عيني على رجلي !

مياس : شصار مهيب باوع حالتي

شاف الچربايه ورجلي لو هو تخبل .. فتح عينه عليه شويه وگام يفتر على نفسه قابض ايده من العصبيه

مهيب.. هاي شسويت اني ... الله ياخذني ان شاء الله الله ياخذني

خفت كلش من الدا اشوفه گدامي ... رجعت گعدت ع الچربايه وگمت اشهگ بالبچي

راح للميز ع السريع جاب الكلنس وبده يمسح برجلي بس الدم مستمر ينزل يمسح بي ثواني ويرجع مثل ما هو

مهيب.. مياس گومي دتنزفين عايني الدم مديوگف

مياس.. اشهگ واگول : شسوي گولي شسوي

مهيب.. لحظه انتظري

ركض فتح الكنتور طلع تراك اله لبسه ع السريع وطلع ملابس الي هم

مهيب.. تگدرين تلبسين لو البسچ اني

مياس.. اني البس بس شراح تسوي

مهيب.. اروح اصيح وحده من البنات حتى تساعدچ .. يلا لبسي بسرعه هسه ارجعلچ ما اتأخر

راح يركض .. گمت اريد البس ماكو الوجع شلني شل ما اگدر حتى اوگف على رجلي

حاولت البس شلون مچان فشله اذا اجت منال وشافت وضعي هيچ

صعدت لغرفتي وحدي لان نهى ظلت يم امها وخواتها ... نمت قبل لا تجي من تعب وهوسة العرس طول اليوم

فزيت على صوت الباب يندگ حيل .. عاينت نهى ماكو ظل بالي ركضت فتحتها

انصدمت بمهيب وجها ميتفسر ومبين الخوف بملامحه ... بس شافني صاح

مهيب.. شهم الحگلي

شهم.. شكو ولك

مهيب.. اريدك تصيح مرتك ما گدرت اصيحها لا هي ولا منال لان گاعدات يم النسوان

شهم.. مهيب احچي شصار ؟ ليش تريدهن ؟؟

مهيب.. مو شسمه ... والله ما ادري شگولك

شهم.. بس لا اذيتها

مهيب.. دنگ راسه ... اي ودتنزف كلش هواي

شهم.. خرب غيرتك مهيب ... اني شوصيتك قبل ساعه متگولي شجاك

مهيب.. مو وكتك شهم ساعدني الله يخليك البنيه وضعها مو زين

شهم.. دفوت روحلها هسه ادزلكم نهى

نزلنه سوه هو راح لغرفته واني رحت للاستقبال اصيح نهى

دگيت الباب صاحو تفضل .. طبيت لگيتهن گاعدات وگدامهن طشت حب يسولفن ويكرزن

نهى.. شنو هاي شهم بعدك ما نايم

شهم.. تعالي رايدچ بشغله

ازهار.. ههههه يمصخم عيب مو گدامنه

قسمه.. حقه الرجال اذا مرته متحس لابسته وهو جده مستلگ

ام يوسف.. جوزن عن وليدي لتتحارشن بي گوه

اني بيا حال وهذني گاعدات يصنفن ... عطت على نهى بلا ما احس على نفسي

شهم.. فضيني يمعودددده

نهى.. اي جايه

طلعت ... شويه واجت ورايه جريتها من ايدها على كتر حتى ليسمعونه

نهى.. اخ حياتي اذيتني شبيك

شهم.. نهى مياس دتنزف

نهى.. يا صخام الصخمني والله گلبي چان حاسني حيصير شي

شهم.. دروحيلها ع السريع اني انتظرچ بالصاله شوفيها وتعالي طمنيني

نهى.. رايحه رايحه

گعدت ع اعصابي بالي يمها شويه واجتني نهى تركض

شهم.. ها شنو

نهى.. لازم ناخذها للمستشفى البنيه منتهيه من النزف

شهم.. صاعد اجيب مفتاح السياره واجيكم .. انتي هم لبسي حجابچ ع السريع

لبست بالگوه عاينت الملابسي بسرعه تدمرن من الدم

اجاني مهيب يركض .. بس شفته بچيت بحرگه

مهيب.. يا عمري الله لا يسامحني ع الشي السويته بيچ
حضني يمسح على راسي .. اصبري هسه راح تجيچ نهى

ظليت ابچي لحد ما حسيت على نهى طبت للغرفه .. گام من يمي ع السريع وراح يم الباب

نهى.. سوده عليه حبيبتي شدتحسين

مياس.. موجوعه هواي نهى عايني الدم مديوگف .... وبچيت بحرگه

نهى.. بس شافت الدم ضربت على وجهه .. عزه العزاني ولچ گومي لازم ناخذچ للمستشفى
مهيب ساعدها خل تلبس بسرررعه

طلعت من الغرفه تركض .. اجه مهيب فتح الكنتور وطلعلي ملابس

مهيب.. حياتي عندچ احتياطات نسائيه لان الدم راح يدمر كل ملابسچ

مياس.. بالگوه اجاوبه من الوجع .. اخ اي عندي بس ما ادري وين نهى هي الرتبت الغراض

مهيب.. يربي هاي شلون سالفه .. هسه اني شلون اسألها والله فشله
زين عايني هاچ هاي الملابس واني راح اطلع بره من تجي خليها تساعدچ وسأليها عنهن فد نوب

مياس.. اي ماشي

رجعت نهى مبدله ولابسه حجابها .. راح مهيب ساعدتني بالتبديل بس الألم كلما جاله يزيد اكثر واكثر

سندتني گوه امشي ... اول ما طلعت صار شهم گدامي طبيت بملابسي من الخجل

نهى.. يلا عفيه استعجلو شويه

شهم.. مهيب امشي نروح بسيارتي

طلعنه للمستشفى دقايق ووصلنه لان شهم چان يسوق كلش سريع

طبينه للردهه النسائيه اني ونهى .. راحت تحاچي الدكتوره شويه واجت تفحصني

لزمت ايد نهى وشبعت بچي ع الألم الحسيت بي

نهى.. تحملي حياتي هسه حتخلص

الدكتوره.. مجروحه جرح كلش قوي ... ادري شجا رجلها هي هيچ السالفه ؟؟

نهى.. بعد صارت دكتوره .. هسه شنو ؟؟

الدكتوره.. راح اخيطها ولازم ميتقربلها اقل شي اسبوع .. اقل شي هذا تفهميني ماما

نهى.. اي دكتوره افتهمت

راحت الدكتوره .. اعاين على نهى ودموعي تجري

مياس.. شنو يعني تخيطني ؟!!

نهى.. يگلبي لتخافين والله ميوجع هسه تشوفين

مياس.. حبابه فهميني والقرأن راح اموت من الخوف

نهى.. بس اصبري ولتسألين هيچ احسن صدگيني

رجعت الدكتوره .. گومتني وگعدتني على كرسي مدري مال شنو

شدت رجلي وما اعرف شنو سوت لان خلت گدامي حاجز .. بديت احس بالألم يزيد لزمت ايد نهى وشبعت بچي

نهى.. خلص خلص ما ظل شي حبي هانت

مياس.. كافي عفيه والله بعد ما اتحمل

الدكتوره.. خلصنه ماما .. ما عندچ غير العافيه

نهى.. الله يعافيچ دكتوره

راحت نهى ويا الدكتوره شويه ورجعت بيدها الراچيته ..

نهى.. استندي عليه خلي نطلع

مياس.. يعني خلصنه

نهى.. اي حبي كلشي خلص وان شاء الله بعد متحسين بوجع

گومتني لبستني حجابي وسندتني بس شنو اموت وجع ويا كل خطوه لحد الباب ما تحملت بعد صرخت حيل

مياس.. اااااخ نهى دا اتأذه كلش بعد ما اتحمل امشي

نهى.. يعمري شلون هسه .. شو تعالي اگعدي هنا خلي اجيبلچ كرسي متحرك وارجعلچ

راحت جابتلي كرسي واجت .. گعدتني بي هي والعامله بس طلعت صارو مهيب وشهم گدامي

مهيب.. ها نهى شصار ؟؟

نهى.. خير ان شاء الله خلي نوصل للبيت وافهمك .. هذا علاجها لازم تاخذه

شهم.. انطينيا اني اجيبه من صيدلية الطوارئ

انطا للعامله ٥ الاف ورجعنه للبيت .. همزين محد حس علينه لان الكل نايمين ويا رجعتنه

طببوني للغرفه هي ومهيب .. راحت نهى ع السريع غيرت فرش الچربايه ونضفت المكان

نهى.. ظل يم مرتك هسه شويه وارجعلكم

عافتنه وطلعت .. گعد مهيب يمي بس عيونه چانت تشرح الشي الديحس بي

مياس.. لتضوج

مهيب.. اسف

مياس.. مصار شي حبي قابل تقصدت تأذيني

مهيب.. لا والله ما متقصد اصلا ما اعرف شصار وشلون هيچ سويت بيچ .. وداعتچ بگلبي چنت فاقد كلش وروح ابويه مو بيدي

مياس.. خليت ايدي على حلگه حتى اسكته .. كافي تحلف حياتي مصدگتك

مهيب.. ضايج من روحي كلش مياس

مياس.. تالي وياك كافي انسى

بهلاثناء اندگت الباب وطبت نهى للغرفه

نهى.. مهيب روح الشهم يريدك واني ابقى يم مرتك

مهيب.. ماشي خيتي

بعد ما رجعنه من المستشفى راحت نهى ويا مياس لغرفتها واني ظليت انتظرها بالصاله .. شويه واجتني

شهم.. ها نهى شگالو هناك ظل بالي

نهى.. خطيه مأذيها كلش

هزيت راسي ودرت وجهي عنها ..

شهم.. دروحي صيحي للافندي

راحت تصيحه شويه واجاني مدنگ وجها

شهم.. هاي سوايه منك مهيب

مهيب.. والله خويه مو بيدي ما ادري شلون صار هالشي

شهم.. ع العموم البنيه متأذيه كلش حتى اكلت خياطات من ورى حضرت جنابك ... الدكتوره گالت ميصير تتقربلها منا الاسبوع واحتمال اكثر تفهمني لو لا

مهيب.. اي خويه فهمت

شهم.. ما اوصيك بعد ... ما اريد الصار يتكرر مره ثانيه
خطيه يول بعدها صغيره متتحمل خبالك

مهيب.. شهم وروح ابويه ما متعمد شبيك نزلت عليه

شهم.. ههههه تعال ولك .. سحبته الصدري وحضنته
مو قصدي اضوجك .. بس هاي مياس يعني بنيتي ،،، ما اتحمل اشوفها تتأذه گدامي

مهيب.. واني احبها شهم يعني مستحيل قاصد اذيتها بس ما اعرف شلون صار هالشي

شهم.. عموما خلي هالموضوع عبره الك حتى ليتكرر الصار اليوم مره ثانيه

مهيب.. ان شاء الله

شهم.. يلا روح لمرتك وصيحلي مرتي خلي انام تعبت كلش

مهيب.. تصبح على خير

شهم.. وانت من اهل الخير حبيبي

ظلت نهى گاعده يمي بس ما حچت اي شي حتى لتخجلني .. رجع مهيب شافته طلعت من الغرفه بسرعه

طب وسد الباب ورى .. وگف ع المرايه يدور بالمجرات يسد ويفتح بيهن بعصبيه

مهيب.. وين صارررررن

مياس.. شبيك حبيبي شمضيع

مهيب.. ماكو شي .. انتي شلون صرتي خو ما بعدچ موجوعه

مياس.. لا كلشي ما احس لتخلي ببالك

مهيب.. خو الحمد لله

مياس.. انت مو گلت ما اصدگ اليوم تنامين بحضني .. يلا وينك تعال راويني حضنك الحلو

متعمده حچيت هيچ حتى اخفف عنه لان ادري بي دياكل بنفسه .. ابتسم بحزن وراح للكنتور يدرو بالرفوف

مياس.. هسه غير اعرف شدتدور ؟؟!

دار وجها عليه واتقرب مني .. سحب ايدي طلع سوار ومحبس ذهب لبسهن الي وهو مدنگ

مهيب.. ما چنت اتمنى البسهن الچ واحنه بمثل هيچ وضع بس شسوي يمكن حظي اوحظچ ما اعرف المهم اعتذر منچ كلش

مياس.. مهيب اذا تحبني صدگ كافي .. والقرأن ما بيه شي ولتخاف ما زعلانه منك ... اصلا ما اگدر ازعل منك حتلو متقصد اذيتي

مهيب.. بس اني ما متقصد

مياس.. گتلك حتلو .. يلا گوم طفي الضوه تعبت كلش

طفه الضوه وتمدد يمي .. سحبني الحضنه باس راسي وحط ايده على ايدي

مهيب.. احبچ

مياس.. اموت عليك

مهيب.. يلا نامي تعبتي اليوم

مياس.. اي والله كلش وانت ما تعبت ؟؟

مهيب.. هههه طبعا تعبت بس وياچ نسيت كل تعبي

مياس.. امممم يعني شتقصد انت تحبني اكثر ؟؟

مهيب.. طبعا

مياس.. لا اني احبك اكثر

مهيب.. لا اني

مياس.. لا اني

مهيب.. گتلچ اني

مياس.. ههههه اني يعني اني

مهيب.. لا اني ،، اليوم للصبح

مياس.. هههههه كافي يمعود استسلمت

مهيب.. حتى تتأكدين حبي الچ ماله مثيل

يحچي ووجها قريب على وجهي كلش بحيث دا احس بانفاسه .. قربت راسي منه وطخيت خشمي بخشمه

مياس.. هنيالي بهيچ حب لعد

مهيب.. يصير ابوسچ

مياس.. هههه لعد ليش ميصير

مهيب.. لتخافين ما اسويلچ شي بس ابوسچ

مياس.. هسه اني شگتلك قابل .. تعال گولي خاف دتتدلل عليه حتى اني ابوسك

مهيب.. ههههه تسويها

مياس.. طبعا اسويها

مهيب.. يلا

رفعت راسي من ايده خليت شفتي على شفتي .. حسيت علي ذاب بسرعه
بادلني الحركات بلهفه شويه وصارت لمساته جريئه على جسمي عرفته فقد مثل العاده

مياس.. مهيب اصحى

مهيب.. فتح عيونه .. ها شنو ؟!!

مياس.. ههههه وتالي وياك

مهيب.. هههه بعد لتتقربين مني ولچ لان مدا اگدر اسيطر على نفسي

مياس.. هو هم هيچ ههههه

مهيب.. يلا خلي ننام احسن

مياس.. اي احسن

رجع سحبني الحضنه .. باس راسي وظل يمسح على شعري ما اعرف شلون غفيت

گعدت الصبح على صوت الهلاهل .. عاينت المهيب نايم ما حس على شي

ردت اگوم بس متشنجه من وجع الخياط .. رجعت خليت راسي على ايده فتح عيونه مبتسم

مهيب.. صباح الحب

مياس.. صباح الخير حياتي

مهيب.. شلون صرتي

مياس.. الحمد لله احسن

مهيب.. تگدرين تگومين نتريگ وياهم لو اجيبلچ الريوگ لهنا

مياس.. لا نتريگ وياهم بس خلي اغير ملابسي

مهيب.. ماشي رايح اغسل ع السريع وارجعلچ

مياس.. اوك حبي

مهيب.. صدگ حياتي الحمام بصف غرفتنه خاف متندلي

مياس.. هههه شكرا

مهيب.. يتدلل الحلو مالتي

اخذ ملابسه وراح يغسل .. بالگوه گمت ذبيت حجاب على راسي وطلعت اغسل

همزين الغرفه معزوله عن الصاله يعني محد يشوفني

طبيت للمغاسل وطلعت غسلت وجهي .. رجعت للغرفه فتحت الكنتور محتاره شلبس ولازم لبس مال حجاب لان اخوان مهيب بالبيت

طلعت گلبيه بيضه وبيها شغل اصفر ،،، وگفت گدام المرايه اشوفها عليه ... كلش حلوه

غيرتها ومشطت شعري رفعته عالي ... بعده مرتب من تسريحة البارحه لان اني طلبت من ام الصالون تسريحه بسيطه وبلا ماشات لان لعبت نفسي منهن بالعقد مالتي

خليت مكياج كلش خفيف ما اعرف اخلي غيره ... دا اجيب حجابي البسه طب مهيب للغرفه

بس شافني گدامه گام يصوفر خجلني كلش بهالحركه

مياس.. نعيما

مهيب.. ينعم عليك

مياس.. يلا نطلع ؟

مهيب.. اي بس انشف شعري ثواني

مياس.. اوك

وكف ع المرايه ينشف واني ورى اعدل بحجابي .. يعاين عليه ويغمز خبلني بسوالفه

مياس.. كافي والله دتخجلني

مهيب.. انتي هم كافي

مياس.. شنو كافي

مهيب.. كافي تصيرين حلوه تدرين بيه ضعيف يم جمالچ

مياس.. ههههه دكمل شعرك خلي نطلع مو متت جوع من غده البارحه

مهيب.. ذكرتيني خلي ارزلهم على هالعمله

مياس.. هههه لا عيب عوفهم

مهيب.. ههههه ديلا امشي خلصت

لزمني من ايدي وطلعنه سوه .. چانو مجتمعين بالصاله يتريگون والدنيا مخبوصه بالنسوان ..... بس شافونه هلهلن وجرن صلوات

اجتني نهى تركض شاورتني

نهى.. شلون صرتي حبي بالي يمچ

مياس.. الحمد لله حياتي احسن ان شاء الله

نهى.. لعد تعالي خلي ابوسچ ... بوستني وهي تگول : الف مبروك گليبي الله يسعدكم ويرزقكم الذريه الصالحه

مياس.. حبيبتي تسلمين

نهى.. الف مبروك خويه

مهيب.. الله يبارك بيچ خيتي تعبناچ ويانه

نهى.. تستاهلون التعب

گام شهم لمهيب .. بوسه وباركله بعدين باركلي وهو مبتسم

شهم.. الف مبروك بنيتي

مياس.. دنگت خجلانه منه على الشي الصار البارحه .. الله يبارك بيك

شفته انطا المهيب ورقه .. ونهى انطتني علبه مالت ذهب

نهى.. فتحيها حياتي

مياس.. فتحتها مداليه بيها اية الكرسي .. حبيبتي شكرا كلش حلوه

نهى.. تلبسيها بالعافيه يروحي ،،، هذا ذوق شهم

مياس.. عاينتله مبتسمه .. شكرا

شهم.. تتدللين بابا

رحنه للحجيه بوسنه راسها وباركتلنه .. انطت المهيب والي فلوس وطشت على راسنه چكليت

منال.. الف مبروك يالحلوين الله يديمكم ويديم حبكم طول العمر

مهيب.. الله يبارك بيچ يالطيبه

مياس.. شكرا حبيبتي

بدن النسوان يباركن وما گدرنه نگعد ع السفره إلا بعد نص ساعه

سمعت الجرس اندگ .. راح شهم يفتح الباب شويه ورجع

شهم.. اهل العروس اجو سوو طريق

گمت ع السريع اعاين للباب بلهفه لحد ما شفت ابويه طب

نسيت كل الوجع بشوفته .. رحتله اركض بست ايده وحضنته

اشرف.. وحشه البيت البارحه بدونچ بنيتي

مياس.. شتاقيتلك انت واخواني وينهم ليش ما اجو وياكم

اشرف.. فشله من العالم خليناهم يم الجيران

عاينت السميحه بوستها لخاطر ابويه حتى لتنق براسه وتسويله مشاكل وهي بالچذب ما گالت كلمة المبروك

انطت سميحه الريوگ لمنال وگعدوا بالصاله ويانه

طلع ابويه محبس ذهب لبسه الي وباس راسي

اشرف.. الف مبروك يروح ابوچ

مياس.. الله يبارك بيك بابا

انقهرت بداخلي لان ادري بي ما عنده بس مع ذالك حب يفرحني بهالشي

گعدو ربع ساعه واستأذنو يرحون ... ظلينه ساعتين گاعدين يمهم وكل شويه مهلهلين صرعو الدنيا

تفاجأت من شفت جهاد گدامي هستوه گاعد من النوم يفرك بعيونه

جهاد.. كافي يمعودين متگولون العالم نايمه

منال.. تعال بارك الخالك وعوف الحچي الماصخ

راح غسل ورجع حضن مهيب يباركله

جهاد.. الف مبروك ضلعي

مهيب.. الله يبارك بيك ضلع

جهاد.. عاينلي بطرف عينه .. مبروك

مياس.. شكرا

شهم.. تعال تريگ حتى تطلع للمعارض وخلي ببالك يوميه انت تطلع من الصبح للظهر والعصر على ايهاب

جهاد.. وليش عود ؟!!

شهم.. شنو ليش اني راح التحق ومهيب عريس يرادله شهر يلا يرجع لشغله

جهاد.. اي ماشي خالي فهمت

اشرت المهيب حتى نرجع للغرفه لان ما اتحمل اگعد ويا بمكان واحد

استأذنه منهم ورجعنه لغرفتنه .. مدري شصار بيه من شفته وحتى هو مبين علي ضايج من وجودي يمهم

مهيب.. وين صافنه حياتي

مياس.. ولا شي حبيبي بس بعدني نعسانه

مهيب.. تعالي نامي

مياس.. لا متسوه الظهر فدنوب

مهيب.. براحتچ

ثاني يوم التحق شهم .. صراحه ضجت كلش من راح لان احسه هو كل اهلي بهذا البيت وبغيابه اكو شي ناقصني

مر اكثر من اسبوع وطول هالفتره مهيب يحاول يبتعد عني شگد ميگدر

صرت زينه وخلصت من الوجع الحمد لله .. فد يوم خابرنه ابويه عزمنه على الغده اني ومهيب

فرحت كلش لان شتاقيتله هو واخواني .. گعدنه من النوم متأخرين يا دوب تريگنه وطلعنه

بالطريق شفت أسواق تذكرت مصطفى ومياده

مياس.. حبي اوگف شويه

مهيب.. ليش حياتي ؟

مياس.. اريد انزل اشتري شغلات لاخواني

مهيب.. هههه عيب ولچ لعد اني شنو شغلي هنا

مياس.. هههه اسفه مو قصدي

نزل شويه ورجع بيده علاگه چبيره .. فتح الباب وانطانياها

مهيب.. هذا كافي

مياس.. ههههه حيييييل صدگ تحچي ؟؟ هذا هواي كلش

مهيب.. خطيه خليهم يفرحون

مياس.. شلت ايده بستها ،، عاشت ايدك عمري

مهيب.. ههههه هاي شسويتي

مياس.. ابتسمتله ... يلا خلي نتحرك تأخرنه

وصلنه فتح الباب ابويه .. حضنته وسلمت علي طبيت للبيت بس شافوني اخواني اجو يركضون لحضني

مياس.. يمه فدوه لريحتكم الحلوه شتاقيتلكم كلش والله العظيم

مصطفى.. اني هم شتاقيتلچ وبلليل ابچي عليچ ... ارجعي حبابه

مياس.. ههههه حبيبي ما اگدر ارجع بس راح اجيكم دائما اوعدك

مياده.. واني شتاقيتيلي لو بس مصطفى

مياس.. حضنتها حيل .. طبعا شتاقيتلچ يروح اختچ
هاكم هاي الحاجيات كلها الكم

مصطفى.. الله ،، امشي للغرفه مياده خل نتقاسمهن

مياس.. هههه يلا ركضووووو

اخذها وراحو يركضون فرحانين بيهن .. طلعت سميحه من المطبخ سلمت عليها من ورى خشمي

دنجهز بالغده اني وياها انصدمت من سمعتها تگول

سميحه.. ها شو ما سولفتي شي على ليلة عرسچ .. بشري لگاچ بنيه لا

درت وجهي عليها بعصبيه .. ردت اجاوبها بعدين تراجعت المثلها متستاهل حتى حرف واحد

خلصنه الغده وگعدنه ساعتين ويا ابويه بعدين استأذنه ورجعنه للبيت

مهيب.. حياتي نزلي اني ساعه وارجعلچ

مياس.. وين تروح حبي

مهيب.. اچيك الحسابات بالمعارض لان شغل جهاد مو مضبوط

مياس.. ها ماشي عمري على راحتك

مهيب.. احبچ

مياس.. هههه واني احبك

طبيت للبيت غيرت ملابسي وگعدت وياهم شويه ... احس الحجيه وسمر ومرت ايهاب كلش ميوالفني بس نهى ومنال يفرحن بيه لمن اگعد يمهم

بلليل چنت كاعده بالغرفه اتمكيج رجع مهيب من برى

مهيب.. شدتسوي الحلوه

مياس.. اشخبط بوجهي

مهيب.. هو وجهچ يخبل على شنو دتشخبطين بي

مياس.. شسوي من ضوجتي

مهيب.. مياس

مياس.. ها حبيبي

مهيب.. شتاقيتلچ مو كافي

مياس.. هههه هو كافي بس اخاف اتأذه مثل اول مره

مهيب.. اذا تأذيتي صحيني حتى ابعد عنچ

مياس.. هههه انت شيصحيك لخاطر الله .. هذاك اليوم اصيح اريد حتى اظافري نبتتها بيك وانت ولا يمك

مهيب.. ههههه هاي اني هيچ وما ادري بروحي

مياس.. اگولك هسه اجيك

مهيب.. وين

مياس.. هسه بس انتظر شويه

طلعت ع السريع لان ادري حقه بس خايفه مو بيدي اخاف يتكرر ألم ليلة العرس

صعدت لغرفة نهى لأول مره .. دگيت الباب لگيتها ترتب بكنتورها

مياس.. شلونچ حبي

نهى.. هلا عمري نورتي تعالي تفضلي

مياس.. والله خجلانه منچ بس شنو .. هذا .. شيسمونه

نهى.. هههه شبيچ حبي لتخجلين احنه خوات احچي اي شي تردين تحچي ولتشيلين هم

مياس.. مهيب يريد يتقربلي وخايفه كلش خاف ارجع اتأذه

نهى.. لا حبي لتخافين بعد السالفه صارت سهله صعوبتها بس بهذيچ الليله اذا تنفض كلشي ينفض وياها

مياس.. يعني ماكو وجع

نهى.. هههه لا گلبي ماكو

مياس.. شكرا حياتي

نهى.. تأمرين امر

نزلت اركض .. طبيت لگيته ينتظرني وصافن ع الباب

مهيب.. وين رحتي ؟!!

مياس.. هيچ شغله مو يمك

مهيب.. دتعالي بحضني ماكو داعي تشردين بطلت كلشي ما اريد منچ

مياس.. هههه لا والله مو هيچ افتهمت غلط

مهيب.. تالي وياچ تعالي لحضني ولچ

درت وجهي قفلت الباب .. رحت يمه نمت بحضنه وايدي على وجها

مياس.. تگدر تتقرب مني

مهيب.. شنو ؟؟

مياس.. رحت سألت نهى گالت عادي تتقرب مني

مهيب.. صدگ ؟؟ يعني مراح تتأذين

مياس.. لا

بس گتله لا .. ما صدگ سحبني أله وباسني بلهفه ... بادلته المشاعر صح چنت خايفه بس حاولت ابعد التفكير عن بالي

كمل مني ... تأذيت شويه بس ميتسمى وجع مقارنتاً بوجع ليلة العرس

مهيب.. ها حياتي خو ما اذيتچ

مياس.. لا حبيبي

مهيب.. تدرين هسه يلا حسيت بنفسي عريس من صدگ ههههههه

مياس.. هههه احبك

مهيب.. شمني من رگبتي حيل وهو يگول : لچ اشهگچ اني مو بس احبج

مر شهر على زواجنا ... عشت ويا مهيب اجمل ايام حياتي

كل الايام حلوه بلا مشاكل بلا خوف من شي .. ما اختلط بيهم لان كله بغرفتي مگضيتها بس وقت الاكل اشوفهم

چانت منال متخليني اطلع تگولي بعدچ عروس گعدي يم رجلچ لاحگه على الشغل خلي يخلص شهر عسلكم

مهيب طول هالفتره يمي ما عافني ابد حتى طلعاته قليله ساعه ويرجع مو اكثر

وبعد شهر بالضبط چنت نايمه ... نص الليل گعدت على الم ببطني كلش قوي

حاولت الزم نفسي واكل الوجع حتى ليگعد مهيب بس ما گدرت

سچاچين تضرب بيه .. عطت بصوت طالع من كل گلبي فز مهيب مخروع على صرختي .....

يتبع..