رواية مياس قلب الشهم الفصل الخامس عشر 15 - بقلم لبنى الموسوي

#مياس_قلب_الشهم

للكاتبه #لبنى_الموسوي

هذا جزء صغير من بارت باچر هستوني يلا خلصته كـ مفاجئه للغوالي وان شاء الله التكمله بنفس الوقت كالعاده

_______________

شهرين اني النوم ما شايفه بعيوني مرابط على جبهات القتال حتى نواجه الخطر المحدق بالعراق من قبل اعداء الاسلام او ما يسموهم بالدوله الأسلاميه وهي بالحقيقه الا أسلاميه

خلصت فترة التحاقي طلعت من الفجر حتى ارجع للبيت ارتاح واذب تعب هالشهرين من جسمي بس مچنت اعرف المصايب المنتظرتني هناك

وصلت اول الصبح ... دا افتح الباب سمعت صوت جهاد يغلط ويسب ما اعرف على منو

طبيت ع السريع وچان انصدم بجهاد لازم مياس من شعرها ويسحل بيها اما هي فما عرفتها على منظر وجها والاثار الموجوده علي

ما تحملت الدا اشوفه گدامي ... شمرت جنطتي ع السريع وسحبت جهاد بيدي حطيت بي بوكس غيرت معالم وجها بلا ما اعرف السبب

بس شفته گدامي حسيت روحي ردتلي لان وحده يگدر ينقذني منهم ... ضرب جهاد وگام يغلط ويصيح علي بكل صوته

شهم.. حيواااااان ...
شلون تتجرأ وتمد ايدك على مرت خالك فهمنيييييي
من يوم يومك نذل وراح تبقى نذل متصيرلك چاره لا والله
للأسف ما عرفت اربيك ،،، للأسف والله للأسف

جهاد.. خالي افهم شمسويه هال×××× وبعدين احچي عليه

بس گال هيچ ركض شهم علي وخنگه بيده

شهم.. ولك حسك ما اريد اسمعه يا نگس
يضرب على حلگه ويصيح : حسك هذا ما اريد اسمعععععه

جهاد.. بس خالي

شهم.. اششششش
دار وجها عليه بعصبيه : فوتي ذبي الحجاب على راسچ والحگيني للاستقبال

طبينه سوه ركضوا كلهم يستقبلون شهم ... حط ايده گدامهم يمنعهم منه

شهم.. الصار بهذا البيت طول فترة غيابي مراح اعدي الكم .. راح تتحاسبون علي واحد واحد بس اصبرولي

شلت حجابي من الگاع خليته على راسي .. اشر بيده حتى امشي گدامه

طبيت للاستقبال وطب ورايه مباشرتا .. سد الباب ودار وجها عليه

شهم.. شصار مياس سولفي ؟؟

بس سألني نزلت دموعي بحرگه .. بگد ما چنت منتظرته يرجع وينقذني بگد ما احتاريت شحچيله وشلون افهمه شعانيت من ظلم بغيابه

شهم.. احچي لتظلين ساكته

مياس.. شهگت من البچي : ليش رحت وعفتني محد رحمني من بعدك

شهم.. تقرب مني حط ايده على راسي : اش بابا كافي لتبچين .... هاي اني رجعت واوعدچ راح اخذ حقچ من كل واحد ظلمچ بس بلاول سولفيلي شصار

وگفت اسولفله بكلشي صار .... ما ضميت حرف علي حتى الشي الصار بيني وبين عماد گتله علي بلا خجل لان لازم يعرف ويخلصني من هالسالفه الزادت عن حدها

واگف اسمعها واغلي من القهر ... مره من عماد مره من مهيب الما عرف يتصرف وخله عصبيته وغيرته تتحكم بي وتسيطر علي لحد ما اعصابي طفرت مني

فتحت الباب وعطت بكل صوتي : جهاااااااااااااااااااد

جهاد.. ها خالي ها

شهم.. خلي مهيب يجيني فورا

جهاد.. خالي مهيب لزمته الشرطه الصبح لان اعتدى على بيت اهل عماد والعالم قدمت شكوى علي

شهم.. شدتحچي !!!!

جهاد.. والله خالي هذا الصار لذالك اني ما تحملت وطلعت اعصابي على هاي الواگفه يمك

شهم.. بلا لغوه زايده ... شوفليا بيا مركز بسرعه خلي اروح احل الموضوع قبل لا يكبر

جهاد.. صار خالي

شهم.. تعالي ويايه مياس

استغربت من صاحني ... صفنت بوجها بلا ما اتحرك من مكاني لحد ما نززني صوته

شهم.. لتظلين صافنه ... تحركييييي

مشيت قبله وصلت للصاله اشرلي بيده حتى اوگف ... وگفت اعاين عليهم كلهم صافنين علي باستغراب

شهم.. بس اريد افتهم ... انتو تعرفون الله لو لا ؟!!

محد نطق بحرف واحد .. شويه ورادت تحچي نهى سكتها بأيده

الحجيه.. ها يمه چنك تقصدني بكلامك من هاي سكتت مرتك

شهم.. البي شوكه تنغزه يمه

الحجيه.. خلف الله عليك يبن بطني

شهم.. ليش يمه بس فهميني
شعالت وياچ هالمسكينه ؟؟
فد يوم غثتچ بكلمه
علت صوتها عليچ
نترت بوجهچ
حاچيتيها وما سمعت كلامچ
ردتلچ طلب
كسرتلچ قرار
احچي شسوت من هذني حتى احاسبها گدامچ بهل لحظه

الحجيه.. طلعت بلا شور اخوك اكو اكبر من هاي ؟؟

شهم.. وانتي اخويه ؟؟

الحجيه.. يعني شتقصد ؟؟

شهم.. الاقصده عدها رجل ويحاسبها
لا انتي ولا جهاد ال×××× الكم حق تحاسبوها بوجوده

بسببكم انتو تخبل الولد
وبسببكم انتو خليتوا يتهور ويضيع نفسه
وبسببكم انتو راح ينخرب بيته

حاچوني شتگولون الرب العالمين باچر لمن توگفون بين ادي بعد ما تهمتوا البنيه بشرفها

يمه تعرفين شنو يعني تهمتوها بشرفها ؟!!!

يعني رمي المحصنات الله ذاكره بالقرأن المگابلته وگاعده ٢٤ ساعه

الحجيه.. اني ما گلت هيچ

شهم.. لا گلتييييي ... لمن تگولين عنها ×××× معناها گلتي يمه

الحجيه.. لعد هي ما خجلت لمن لبست رجلها گرون وطلعت بلا علمه

شهم.. چان سكتي يمه ،،، چان تچفيتي الشر وخليتيهم يحلون مشكلتهم بيناتهم بلا متوصل لهل مواصيل
انتي منا وجهاد منا والصار ويا المسكينه من عماد النذل مناك شيصير مهيب بس اريد افتهم ؟؟!!

ليش يمه هانت عليچ كسرة وليدچ ؟؟ هان عليچ وجع گلبه وعذابه بمرته

چبيره كلش بحقه من توگفون بوجها وتگولون عن مرته ×××× وهو يتفرج

هسه زين من دمرتوا حياته بهل شكل ؟؟ زين من زرعتوا الحقد بگلبه على الانسانه الحبها وسوه المستحيل حتى ياخذها

الحجيه.. يمه اني ما تقصدت هالشي بس والله ما تحملت سوايتها
تطلع بلا متگول وبعدين نعرف قرابتهم راد يعتدي عليها وين صايره

شهم.. طلعت وغلطت ... طفله يمه عقلها مو براسها ومتعرف تضبط نفسها عن مشاعرها وصعب عليها تميز بين الصح والغلط

بس عملة هذاك النگس بيدها ؟؟ الها ذنب بالموضوع حاچيني حجيه

يعني بدل منوگف وياها وناخذ بيدها حتى نخلصها من قذارتهم ندفعها الهم بيدنه ؟!!
ليش فهميني الله يقبل رسوله يقبل احچي يمه لتظلين ساكته اريد اسمع

الحجيه.. شحچي يمه هو انت خليت شي ينحچه بعد

شهم.. غلطت وياچ بكلامي ؟؟ اذا غلطان گولي حتى اعتذرلچ

الحجيه.. محشوم من الغلط وليدي

شهم.. وهسه يمه اني راح احاسبهم واحد واحد بس انتي شلون احاسبچ فهميني ؟؟؟!

الحجيه.. كلامك كافي .. وهاي اني اعتذر منها گدام الكل على كلشي صار

مياس.. فتحت عيوني من عاينتلي وگالت اعتذر ،، درت وجهي على شهم صافنه بوجها ابتسم الي وهز راسه

الحجيه.. اسفه بنيتي حقچ على راسي من فوگ

مياس.. رحت عليها بست راسها .. لا خاله لتعتذرين اني الاعتذر منچ لان طلعت بدون علمچ وعلم مهيب

الحجيه.. معذوره يمه

شهم.. مياس عالن وياچ نهى ومنال ؟؟

نهى.. هههههههه حبيبتي اعتذر منچ اني هم اخاف اكلي رزاله بلا سبب

مياس.. هههههه لا بالعكس خطيه محد وگف ويايه غيرهن

شهم.. ورنا ؟؟

رنا.. شبيه اني ما فتحت حلگي بكلمه ؟؟

شهم.. سألتچ شي ؟؟ دا اسأل مياس

مياس.. لا ما تدخلت ابد

شهم.. وايهاب ؟؟

مياس.. لا خطيه ما سمعت منه كلمه مو زينه

شهم.. خير ان شاء الله

طلعت موبايلي خابرت جهاد حتى احل موضوع مهيب واحاسبهم ثنينهم على عملتهم الما تتسولف

شهم.. ها جهاد وين صرت ؟؟

جهاد.. اي خالي هسه يلا وصلتله بمركز ××××

شهم.. ماشي خليك يمك شويه وجايك مسافة الطريق

جهاد.. صار

شهم.. راح اطلع تگعدون بالصاله مثل الشطار ما اريد مشاكل .. ما اريد صياح .. ما اريد لغوه زايده
تسمعوني لو لا ؟؟

منال.. ههههه نسمعك استاذ تتدلل

طلعت ركبت سيارتي ورحت للمركز .. منين ما ادير وجهي معارفي حتى استحيت منهم : شگول عليك مهيب من خليتني بهل موقف

شهم.. ها جهاد منو الضابط المسؤول عنه عرفته ؟؟

جهاد.. اي اسمه محمد خضر

شهم.. اويلي الله
هسه شحچي ويا هذا واني اعرفه والله فشله

حچيت ويا الشرطي الواگف بالباب وانطيته اسمي .. ثواني ودخلني علي

محمد.. كل الهلا بالرائد الشهم وينك من زمان يمعود

شهم.. هههه حبيبي ابو جاسم والله هاي رجعتي تدري بيه شغلي صعب كلش

محمد.. اي والله .. الله يكون بعونك

شهم.. وعونك بطل ،، عندي يمك طلب او رجاء

محمد.. انت تأمر مو بس تطلب

شهم.. اكو شخص لزمتوا الصبح لان مشتكين علي متهجم على بيت ناس

محمد.. قاطعني بسرعه : منو مهيب ؟؟

شهم.. اي هو

محمد.. شبي تعرفه ؟؟ خبلنه بس يصيح ضارب الدنيا بعرض الحايط ولا بعينه احد

نزلت راسي منه ... اشتعلت غيرتك مهيب على هل دگه

محمد.. شنو تعرفه ما گتلي ؟؟

شهم.. اي اخويه

محمد.. لا والله تحچي صدگ

شهم.. للأسف

محمد.. والله مو خوش سالفة ورطته چبيره كلش لان مفلش بيت العالم على روسهم وما اتصور يرجعون عن الشكوى

شهم.. هسه نحلها اني وياك بس بلأول تسمحلي اتدخل ؟؟

محمد.. طبعا طبعا اخذ راحتك بدون سؤال

بعد ما طلع شهم ظلينه وحده تعاين بوجه الثانيه حرف ما حچينه صرنه صدگ شطار وعقال مثل ما طلب شهم منه هههههه

شويه ورجعت ريما العادتها القديمه هههه

الحجيه.. اليوم شنتغده خاتونات شو چنچن ما صدگتن شهم گاللچن گعدن فرشت بالگاع وبلطتن هم

منال.. هههه يمه انتي متتعبين من المشاكل

الحجيه.. شالت العصا وشمرتها عليها : گومي بت المصگوعه اشتغلي لا اراويچ الما تتعب شتسوي بيچ

نهى.. لا يمه نعرفچ گدها وگدود ميحتاج تعلمينه عليچ

الحجيه.. انتي الثانيه تسكتين لا اگوملچ انتف شعرچ الاحمر هذا
ترى ساكتتلچ علمود مريضه لتسودنيني عليچ ينهيوه

نهى.. ههههه دخيلك ربي خلي اگوم لان السالفه صارت صدگ

رحنه للمطبخ دا اريد اشتغل جرتني منال من ايدي وگعدتني ع الكرسي

منال.. لا حبي تعال اگعدي هنا واحنه نشتغل تعبانه انتي ارتاحي

صدگ اني چانت عظامي تون عليه من الألم ... گعدت بلا ما احچي شي لان ما بيه احرك حتى ايدي

صارت الساعه ب١١ خلصوا شغل طلعنه للصاله ... گعدنه يم الحجيه نتفرج تلفزيون

نص ساعه وطب شهم تفجأت من شفت مهيب ويا بس شحاله .....

يتبع...