#مياس_قلب_الشهم
للكاتبه #لبنى_الموسوي
غير كُون اليركّض مگضـِي نهآره ،
ينـام ليله !
غير كُون اليتعَب من الدنيآ والناس الغريبه
تصحّله نـاس تردله حيله 💔
غير كُون إبنـادم من يطيح حمله
يگابله إبنـادم يشيله ؟
شمـالها الوآدم على الوآدم ثگيله !!
__________
اخذت سميحه فلوس وراحت للعطار .. اول ما طلعت تذكرت مهيب لازم ارجع اخابره واگوله بالصار
دا اطلع موبايلي من الجنطه اندگ الجرس .. صفنت معقوله سميحه نست شي ورجعت
رحت للباب فتحتها جفلت بمكاني من شفت عماد گدامي .. دا اسد الباب بوجها حط رجله بالنص ودفعها عليه
ركضت للصاله سمعته سد الباب .. شلت الجنطه اريد اخابر مهيب ما لحگت جرها من ايدي وشمرها حيل
وگف گدامي يتقدم وارجع ليوره لحد ما حصرني بالزاويه ...
فتح ايده حطها ع الحايط صرت اني بين ايدي قرب وجها من وجهي وغمض عيونه
مياس.. احچي وارجف : عماد عوفني ... الله يخليك عوفني
عماد.. توسلي بعد
مياس.. نزلت دموعي بحرگه : ابوس ايدك عوفني حرام عليك تسوي هيچ اني مره متزوجه
عماد.. خزرني بعصبيه وعاط بكل صوته : واني حبيتچ من قبل لا تتزوجين لو نسيتي حيوانننننه
شلون تفضلين هالساقط عليه شنو الشي اليمزه عني ؟؟!!
جاوبيييييييييي لتظلين ساكته
احس رجلي گامت ترجف بحيث گوه واگفه على طولي ... لزمت بالحايط حتى لا اوگع وحاولت امتص عصبيته عسى ولعل يرحمني ويعوفني بحالي
مياس.. عماد ابويه وافق على مهيب اني شعليه ؟!! بعدين كلشي بالدنيا قسمه ونصيب واني مو نصيبك
عماد.. لتچذبين ولچ
مياس.. صدگني الدنيا متوگف على احد اكيد راح تلگه الاحسن مني .. انساني عماد الله يخليك انساني
حط گصته على گصتي ... لزمني من زندي ورجع غمض عيونه
عماد.. بس اني ما اريد غيرچ
مياس اريدچ .... كلشي بيه يريدچ
ارحميني وحسي بيه عاد
مياس.. وخرت راسي منه : عماد ميصير اصحى على نفسك والله حرام الدتسوي
عماد.. راح ترجعيلي وراح تتطلگين من مهيب وتتزوجيني غصباً ما عليچ وهسه تشوفين
خفت من كلامه كلش وعرفت نيته شنو من قبل لا يحچيها ... دنگت منه ردت اشرد رجع ايدي ليوره وقيدني منها
عماد.. وين حياتي
صيحت بكل صوتي بلكت احد يسمعني .. سد حلگي بايده ع السريع وحط شفته على اذني
عماد.. بصوت متقطع : ا ري دچ .... تفهمين شنو يعني اريدچ لو لا ؟؟
جر شالي من راسي وسد حلگي بي بحركه سريع ... بدت دموعي تنزل لان ما عندي غيرها بعد ما كتم صوتي
اعاينله بنظرات توسل ... ارجع بخطواتي وهو يتقدم اكثر لحد ما لزمني
قيد ايدي بأيده ليوره ولزگ جسمه على جسمي ... لزم وجهي بأيده الثانيه يمسح دموعي ويمررها على شفتي
عماد.. لتبچين حياتي مجبور اسوي هيچ حتى ارجعچ الي
هسه راح انام وياچ .... هم اطفي ناري بيچ وهم اخلي مهيب يطلكچ بعد ميعرف الصار
واوعدچ بس يطلكچ اتزوجچ اني
تدرين بيه شگد احبچ مستحيل اتخلى عنچ ولا تتوقعين اشيلچ من بالي وانساچ
دفن راسه برگبتي يبوس بيها حيل .. نشليت بمكاني لا اگدر اصيح لان ساد حلگي ولا اگدر ادفعه وهو مقيد ايدي بأيده
لعبت نفسي كلش واني احس بلمساته الجريئه على جسمي .. رفعت رجلي ضربته بالمنطقه الحساسه رجع ليوره متوجع
ركضت افتح الباب ما لحگت ... جرني من شعري وسحبني اله بقوه
عماد.. اليوم ماكو مهرب مني حبيبتي .. قافل عليچ قفله بس عد الله خبرها فـ لتحاولين احسنلچ
اخذني من ايدي للصاله ودفعني ع القنفه حيل ... ديفتح بحزام بنطرونه انتهيت من الخوف : خلص مياس اقري الفاتحه على روحچ بعد
اندگ جرس الباب بشكل سريع ومتواصل .. صفن عليه رجع لبس حزامه وتفاجأت من جر السلاح وحطه على گصتي
عماد.. اسمعي لچ هذا اكيد رجلچ ماكو غيره .. اذا تنفستي بحرف افرغ المسدس براسه گدامچ
هزيتله راسي بخوف .. فتح الشال من حلگي وانطانيا
مياس.. البسي الحجاب وغطي رگبتچ زين
الجرس ما سكت ولا ثانيه .. لبست الحجاب سريع ومسحت دموعي
گعد عماد ع القنفه مخنزر عليه ... رحت اركض فتحت الباب عاينت المهيب اعصابه طافره بعيونه بس شافني دفعني حيل وسد الباب
مهيب.. شدتسوين هناااااااااااااااا
حاولت الزم نفسي گدامه لان لو شك بشي معناها يموت على ايد عماد النذل
مياس.. اختي احترگت واجيت وديتها للمستشفى .. بعدين اني خابرتك كومه بس ما جاوبتني
مهيب.. انتي شدتح..... بعده ما مكمل كلامه تفاجأ من شاف عماد گاعد بالصاله
دار وجها عليه فاتح عيونه ... لزمت ايده سريع حتى اهدي
مياس.. هستوه اجه والله ... امشي خلي نروح بسرعه ،،، مهيب امشي مو دا احچي وياك
صافن على عماد وميسمعني اصلا ... فجأه ركض علي حط بي بوكس نيمه بمكانه
تلازم ويا بس هو اقوى من عماد لذالك سيطر علي ... يسب ويغلط ويفشر فقد تماما ميعرف شيسوي بعد
اعاين لعماد صار مينشاف من الدم ... واگفه بمكاني اكمز من الخوف واتوسل بي حتى يعوفه بس ميسمعني ابد
تكوم عماد بالگاع .. وگف مهيب يدفر بي بكل قوته لحد ما تعب وصار گوه يجر النفس
دار وجها عليه بعصبيه جرني من ايدي اخذت جنطتي وطلعنه من البيت ... فتح باب السياره ودفعني عليها حيل
مهيب.. اصعدييييييي
صعدت بس الخوف الچنت احس بي ما اگدر اوصفه بكلمات ... صعبه اشرح الموت البطيئ لأن الچان ديصير ويايه هو الموت البطيئ بعينه
ساق سريع كلش ... اعاين علي منتهي من العصبيه تمنيته يحچي ولو كلمه وحده بس ما حچه للأسف
وصلنه للبيت ظليت گاعده بالسياره اخاف انزل ... فتح الباب جرني من ايدي حيل وشمرني ع الگاع
ما استغربت تصرفه اصلاً حتلو يذبحني هم اعذره ... شلون خوفي على اختي عماني عن قذارة سميحه وحيلها لهل درجه !!!!
شالني من الگاع بعصبيه ... دخلنه للبيت اعاين الكل بالصاله گاعدين ينتظروني اكيد ظل بالهم لان طلعت وما انطيتهم خبر مچنت اعرف الدنيا احترگت ورايه
الحجيه.. بيا بار لگيت مرتك يمهيب !!
جهاد.. وين چنتي ولچ ساقطه ؟؟
ايهاب.. شنو السالفه احچي شي مهيب ليش ساكت ؟!
الحجيه.. شيحچي يمه ... خلي ساكت احسن الله اليعلم وين لگاها لهل بنت الشوارع دعاين الشكله وفهمك كفايه
ما اهتميت لهل كلام بگد ما اهتميت لمهيب .. ليش ساكت !! يا ترى شنو حيسوي ورى سكوته هذا
منال.. مياس انتي احچي ... شصار يمعوده وين رحتي ؟؟
نهى.. جاوبي مياس دافعي عن نفسچ لتظلين ساكته
تقرب جهاد من عدنه... وگف گدام مهيب بعصبيه
جهاد.. وين لگيت مرتك احچي بسرعه !!!
الحجيه.. عوفه بيبي ،،، يا حيف ع الشوارب البوجها اذا تلبسه گرون ويظل ساكتلها
طلع مهيب من صمته وعاط بيهم بصوت عالي كلش
مهيب.. لحد يتدخللللللللل ... چانت ببيت اهلها واني سمحتلها بعد مالكم حق تحاسبوها تسمعوني لو لااااااا
جهاد.. ليش تچذب مهيب ،،، مو خابرت للبيت تسأل عليها وتفاجأت من عرفت بيها طالعه وما منطيتك خبر
مهيب.. انت شعليك ابن ال××××
جهاد.. لتتجاوز ولك ،،، اذا عاجبك تتشطر فتشطر على ال×××× الواگفه يمك
الحجيه.. بالعافيه عليك مهيب اذا مرتك صارت ×××× .... مع الأسف عليك يبن بطني مع كل الاسف
اعاين علي شكله تغير من العصبيه ... دفع جهاد من گدامه وتوجه لأمه ع السريع
مهيب.. شتردين فهميني ؟!! ترديني اكتلها خلص حتى ترتاحين ... احچي ليش سااااااااااكته
كلنه انصدمنه من صيح بوجهه ... ظلت صافنه علي وما حچت اي شي
فجأه ركض مهيب عليه .. ضربني بأيده على وجهي حيل
وگعت بالگاع من قوة الضربه ... دا اريد اگوم دفرني برجله بكل قوته على خاصرتي
لويت نفسي من الألم .. هستوني ردت احچي وادافع عن نفسي لزمني گطعني تگطع حتى حجابي فلت من راسي وما اهتم لوجود ايهاب وجهاد بنفس المكان
ايهاب ومنال ونهى يجرون بي تلاثهم وما گدورا علي ... تحول شخص ثاني ما اعرفه نهائياً مو هذاك مهيب الحنين
سواني جنازه من الكتل لحد ما حسيت بنفسي انتهيت بين ادي
جرتني منال بالگوه منه واخذتني الغرفتي ... استندت عليها لان ما بيه شي سالم حتى اگدر استند علي
گعدتني ع الچربايه ،، احس كل عظامي توجعني من الضرب بس هالوجع لا شيئ يم الوجع الچنت احسه بگلبي
منال.. احچي مياس شصار ؟؟ جاوبي حتى اگدر ادافع عنچ گدامهم ...
مياس تسمعيني ؟؟ لازم تگولين شي لان الحچي الصار عليچ مينلبس علي ثوب
فجأه اختنگت ... گمت اشهگ من گلبي تحاول تسكت بيه ماكو
شويه وطبت نهى تركض ،، گعدت يمي ورجعت تسألني نفس سؤال منال بس استمريت بالبچي وما گدرت احچي اي كلمه
نهى.. كافي تبچين احچي ولچ حتى تخلصين منهم ومن اتهاماتهم
بهلاثناء طب مهيب للغرفه وعاط بيهن بعلو صوته
مهيب.. اطلعن برررررررررى
منال.. خويه حلفتك بروح ابوك لتأذيها
مهيب.. بسرعه اطلعي .... اطلعيييييي
لزمت ايدها من الخوف حتى لتعوفني بس ما گدرت لان مهيب چانت اعصابه مثل النار حرارتها وصلت يمنه وحرگتنه هم
بس طلعن سد الباب وراهن قفلها وشمر المفتاح .. تقدم عليه وعيونه طالعه ليبره من العصبيه
خفت منه كلش ... گمت من مكاني يتقدم وارجع ليوره لحد ما نضربت بالحايط
مياس.. مهيب بس اسمعني الله يخليك
جرني من ايدي حيل وهو صاك على سنونه ... يعاين عليه بحقد للحظه حسيت گلبي راح يوگف من هالنظرات
مهيب.. احچي ولچ شسوالچ ؟؟
مياس.. والله ما سوالي شي وداعتك عندي خابرتني سميحه كالت اختچ محترگه
اتصلت بيك حتى انطيك خبر بس انت ما جاوبتني
انثولت من خوفي عليها وطلعت بلا ما اگول لاحد
وصلت هناك لگيت مياده منتهيه من البچي وايدها رايحه
اخذتها ويا سميحه للمستشفى .. عالجوها ورجعنه دا اخابرك اجه عماد هذا كل الصار
مهيب.. بت الكلب بكيفچ تطلعين شنو السالفه تايهتلچ لو حضرتچ متعلمه ع الشوارع
نزلت دموعي من كلامه ... دنگت ابچي تفاجأت من عاط بيه بقوه
مهيب.. هاي شنووووووووو
مياس.. رفعت راسي متفاجأه وخايفه بنفس الوقت : شنو ؟؟!!
لزمني من ايدي حيل وسحبني للمرايه ... دفعني عليها اعاين لرگبتي صايره خريطه تذكرت عماد الحقير لهل سبب گلي غطي رگبتچ من اجه مهيب
مياس.. شهگت بچي : مهيب والله ... ما احس إلا الراشدي اجاني طاير
بعدني ما حاچيه خنگني من رگبتي ورفعني المستوى
مهيب.. ما سوالچ شي موووو ؟؟
احچي ×××× ... شصار بيناتكم ؟!!
باسچ ؟
لزم جسمچ
شافه
نام وياچ ؟؟
احچييييييييي
أأشر على ايده اريده يعوفني اختنگت بعد حتى ما اگدر اتنفس ... بس هو مو يمي اصلا ولا حس على نفسه شديسوي
فجأه فلت ايده وگعت بالگاع ... دنگ يمي رفع راسي يعاينلي بغضب
مهيب.. جاوبي مياس نمتي ويا ؟؟
مياس.. اشهگ واگله : لا والله لا لا لا
مهيب.. نهد عليه بالضرب وهو يصيح : چذابه ولچ چذابه چذاااااااابببببه
ضربني ضرب عمري كله ما شايفته حتى من سميحه ... لدرجة حسيت روحي راح تطلع خلص
دا اسمع الباب تندگ واكو صياح بس ما اگدر اركز شديصير لان انتهيت بأدي ع الاخير
ربع ساعه يضرب بيه مثل المخبل يلا ميتعب او ينكسر خاطره عليه ع الاقل ... فجأه انكسرت الباب وطبو كلهم
ركضو جهاد وايهاب يجرون بي .... بالكوه يلا گدرو يوخرونه عني
جهاد.. كافي ولك خلي تولي ... اصحى على روحك مو راح تموت بين أديك
ايهاب.. شبيك مهيب تخبلت لا هيچ ميصير الدتسوي
حضنتني نهى حيل ... صح اني فاصله عنهم بس حسيت عليها دتبچي بحرگه
مهيب.. اطلعو برى رجائاً
جهاد.. اطلع انت اول حتى نطلع وياك
ايهاب.. يجر بأيد مهيب ويصيح : يلا امشي شو تحرك يمعود
مهيب.. دفعهم حيل وفلش الغرفه گدامهم : لحد يتدخل اطلعو اطلعو اطلعوووووووووو
جهاد.. امشي خالي خلي نطلع هذا تخبل ميفيد الحچي ويا
عافونه وراحو ... ركض رگع الباب وراهم بكل قوته
دار وجها عليه ... اعاينله ودموعي تجري مثل الشلال ،،،، رجع دفرني ببطني حيل
مهيب.. لزمني من شعري رفع وجهي علي وجر فچي بأيده : اسمعي ×××× هسه راح اعوفچ واطلع بس احسبي حسابچ من باچر ترجعين للخيسه الاجيتي منها و ورقة طلاگچ توصلچ ع القندره
هد شعري وطلع من الغرفه ... وگعت بالگاع شبعت بچي لحد ما طبت عليه منال وراها نهى
منال.. سوده عليه عمري شو گومي
گومني من الگاع بالگوه لان مدا اگدر اتجاوب وياهن ... راحت نهى جابت ديتول وگطن وبدت تنضف الدم من وجهي وجسمي
يحچن ويايه بس اني صافنه ورايحه لغير عالم : شنو يعني خلص مهيب تخلى عني وراح يعوفني للأبد ... معقوله خسرته بغبائي؟!
صار الليل تعبن مني ويأسن احچيلهن شي ... عافني وطلعن ظليت على صفنتي ما احس غير بس دموعي تچوي خدي بحرارتها
جابتلي نهى العشه .. هزيتلها براسي يعني ما اريد ،،، حاولت ويايه اكثر من مره اخير شي دفعت الصينيه حيل
مياس.. ما اريد سم ... اريد اموووووووت
نهى.. حضنتي حيل : واخيراً حچيتي والله گلبي وگع من خوفي عليچ
مياس.. نهى عوفيني وحدي
نهى.. بس
مياس.. الله يخليچ
نهى.. صار حبي على راحتچ ما اضغط عليچ بس شوكت متحتاجيني اني موجوده
مياس.. شكرا
اخذت الاكل وطلعت ،، استندت على طرف الچربايه رحت للكنتور اخذت ملابس حتى اغسل
طبيت للحمام فتحت الماي و وگفت جوا ابچي .... چان الم گلبي اقوى من الم الضرب لذالك ما حسيت بأي شي
لزمت الليفه گمت افرك جسمي مثل المخبله بكل قوتي ... لو بيدي اصلخ جلدي حتى اخلص من قذارة عماد ولمساته الحقيره
مياس.. خلص مياس توصختي وصرتي فعلا وحده ×××× مثل ميگولن عنچ .... ولچ لو تجلفين منا للصبح راح تظلين قذره وتستاهلين كلشي صارلچ وراح يصير
ساعه كامله بالحمام الوم بنفسي وابچي على حظي لحد ما تعبت
لبست ملابسي بلا ما انشف حتى ... رحت لغرفتي وگفت گدام المرايه اباوع النفسي صايره فلم
دا امشط شعري عاينت القرأن ع الميز ... بحياتي كلها ما قاريه قرأن بس اسمعه بالتلفزيون دائما
عشت عمري متشرده بالشوارع مذلوله لليسوه والميسوه ... محد علمني لا ع الصلاة لا ع الحجاب چنت عايشه بس حتى تستفيد سميحه مني هذا دوري بأختصار لذالك حقهم يگولون عليه بت شوارع لأن اني فعلاً بت شارع
ذبيت حجاب على راسي وفرشت السجاده ع القبله ... طبعا اندلها منين لان چنت اشوف مهيب من يصلي گدامي
فتحت القرأن ع لا تعين گعدت اقره ودموعي تجري بحرگه ... كلمات عجيبه كل كلمه منه تعصر گلبي عصر
ساعه كامله اقره لحدما عيوني تعبت من الدموع ... لميت السجاده بس تفاجأت من حسيت براحه مو طبيعيه فجأه
طلعت موبايلي من جنطتي ... انصدمت من گد المكالمات البي لان نسيته صامت من الليل
مهيب ٤٤ مكالمه
نهى ٢٠ مكالمه
منال٢٣ مكالمه
هاي من غير الرسائل يسألون وينچ وشصار وياچ
شغلت الواي فاي كنك الجهاز وگامت تجيني الاشعارات ... انتبهت اكو اشعار بالوتساب من رقم غريب فتحته وانصدمت بعماد
عماد.. حياتي فدوه الچ الضرب الاكلته المهم رجلچ الغبي فهم السالفه بلا ما اتعب نفسي راح انتظر طلاگچ يوم يوم حتى اجتمع بيچ ويخلص ضيم الانتظار وقهره
مياس.. بچيت بحرگه : الله ياخذك يا حقير يا قذر يا نگسسسسسس
سويتله حظر ع السريع من كل البرامج وحتى من الرقم ... رجعت للوتساب صار اسم مهيب گدامي
دخلت ع المحادثه لگيته متصل .. طرت من الفرح وراسلته بلكت هدأ ويقبل يسمعني
مياس.. مهيب وروح امي وداعتك بگلبي ما صار شي
كل الموضوع هذا الكلب راد يعتدي عليه بس انت نقذتني منه على اخير لحظه
عاينت قره الرسائل .. كيفت حسبالي راح يجاوب بس تفاجأت من حظرني
طلعت من المحادثه رحت لبقية البرامج ماكو حاظرني من كل مكان
رجعت للوتساب دخلت على الاسماء طلعت رقم شهم متأمله اگدر احصله لان خلاصي على ايده وحده ماكو شخص بالدنيا يفهمني بگده ... عاينت اخير ظهور قبل شهرين يعني من التحق
مياس.. وينك شهم مو دائما تگولي انتي بنتي تعال وشوف بنتك شصار بيها من بعدك
مسحت دموعي واستغفرت ربي ... دخلت ع الفيس شفت منشور مهيب اول شي يعني ما حاظرني
چان ناشر صورته وكاتب فوگاها : لقد عشت معك شعور اول مره من كل شيئ ... ليتك تستحق ذالك 💔
مياس.. نزلت دموعي ع الشاشه : ولك والله احبك شلون ينطيك گلبك تتخلى عني وانت تدري كلش زين ما عندي غيرك بهالدنيا
عبرت المنشور بلا ما اعلق حتى لا يحظرني ... ظليت اتصفح الفيس بملل لحد ما صارت الساعه ١٢
لبست حجابي وطلعت للصاله لگيت الكل نايمين ... صعدت الغرفة نهى : لازم اخابر شهم قبل لا يفوت الأوان هو وحده بس يگدر يحل هالموضوع
نهى.. تفضل
مياس.. تسمحيلي ادخل
نهى.. گامت ع السريع : طبعا حبي تعالي
مياس.. اريد اخابر رجلچ اگدر احصله لو لا ؟؟
نهى.. لا عمري صعبه تحصلي ... اصلا اني بالعاده انتظره هو يخابرني مو اني
مياس.. شلون لعد لازم احچي ويا بأي طريقه
نهى.. والله ما اردي شگولچ بس هو صارلي چم يوم ممخابر بلكت باچر يتصل بيه وتحاچي
مياس.. دنگت راسي : نهى مهيب راح يطلگني
نهى.. ضربت على صدرها حيل : عزه العزاني ان شاء الله ... الله يخليچ گولي غيرها
گبل نزلت دموعي من القهر ... گامت من مكانها ع السريع وحضنتني
نهى.. فدوه لتبچين ... تعالي گعدي احچيلي بلكت ترتاحين
احنه هم من حقنه عليچ نعرف الصار وياچ
تدرين من ما لگيناچ بالبيت شصار من حچي عليچ
وين رحتي ؟؟ وليش مهيب ضربچ بهالشكل ؟!!
جاوبي مياس الله يخليچ .. بس لا
مياس.. لا نهى لا والله لا ... وگمت ابچي بحرگه
اني مو من هالنوع صدگيني ،، صح هو لمني من الشارع وصح ما عندي اهل مثل كل البنات استند عليهم بس اني مو ساقطه وروح امي مو ساقطه
نهى.. حضنتني بسرعه : يروحي والله ما قصدت هالشي بس اريد اعرف شصار وياچ حتى اگدر ادافع عنچ گدامهم
مياس.. كله من سميحه الله لا يوفقها بجاه القرأن
نهى.. مرت ابوچ ؟!!! شبيها سولفي
گعدت اسولفلها عليها من اول ما تزوجت ابويه وشلون تعرفت على شهم ونقذني منها هو ومهيب لحد سالفة البارحه
نهى.. يا يمه ،،،، فدوه مياس شدتحچين معقوله حرگت بتها علمود تنفذ خطتها
مياس.. لا نهى مياده صدگ احترگت لان مصطفى سولفلي شلون جرت الماي على روحها بس سميحه الكلبه استغلت الموقف حتى تسوي البالها هي وعماد القذر لان متلگه فرصه احسن منها بعد
نهى.. هسه شگولچ اني والله ما اعرف ،،، يعني معقوله مهيب شك بيچ من شاف رگبتچ بهالشكل
مياس.. ماكو غير تفسير لعد ... على الرغم هو يعرف بعماد وقذارته
نهى.. ليش طلعتي بدون متگوليلي ليش مياس ليش
مياس.. بچيت ودنگت راسي ،،، والله ما ادري نعمى على عيني من خوفي على اختي
نهى.. كافي يعمري لتبچين ... الله لا يوفقها ان شاء الله ،،،، هو هذا هدفها چان تخرب بيتچ وتزوجچ لابن اختها الساقط
مياس.. هسه اني شسوي بروحي نهى بس جاوبيني ؟؟ والله لو اموت احسنلي من هالعذاب
نهى.. اسم الله على عمرچ من الموت حياتي انتي.. لتحچين هيچ اكيد الموضوع ينحل بس المسأله تحتاج وقت شويه
بلكت الله شهم يخابرني باچر ... وحده يگدر يهدي مهيب وينتهي هالمهزله
مياس.. يلا حبي دوختچ اخذي راحتچ
نهى.. ظلي يمي اني مو نعسانه هسه
مياس.. لا انزل بلكت يجي مهيب واشرحله السالفه قبل لا تكبر
نهى.. ان شاء الله حبي ،،، الله يهدي عليچ
مياس.. تصبحين ع خير
نهى.. وانتي من اهل الخير حياتي
نزلت بيأس لان ادري انسدت بوجهي بعد كلشي صار ... وصلت يم باب غرفتي سمعت موبايلي ديدگ
طبيت اركض ... شفت مهيب ديتصل طرت فرح
مياس.. الووو
مهيب.. وين چنتي ؟؟!
مياس.. يم نهى فوگ
مهيب.. وينه هذا الساقط
مياس.. منو ؟!!!
مهيب.. ال××× عماد
مياس.. واني شعرفني
مهيب.. اسمعي لچ من الضهر لحد الأن ادور علي فص ملح وذاب ،،، متأكد تعرفين مكانه فاحچي وينه احسن الي والچ
مياس.. مهيب الله يخليك لتحچي ويايه بهل طريقه ... وداعتك عندي انت
بعدني ممكمله كلامي سد الخط بوجهي ... رجعت خابرته ع سريع طلعلي : الجهاز مغلق او خارج منطقة التغطيه
بچيت بضيم وقهر بچي مال سنه لگدام لحد ما انسطر راسي ... صارت الثنتين يأست من جيته بعد ونمت على روحي من التعب
گعدت الصبح شفت الساعه بثمانيه ... لبست حجابي وطلعت اغسل
رحت للصاله چانو هستوهم گاعدين ... انتبهت الجهاد داير ظهره عليه وديحچي بالتلفون بس عصبي ويصيح ما عرفت شبي
ما اهتميت للموضوع ... سلمت ما ردت الحجيه بس منال ونهى
اشرتلي منال حتى اروح للمطبخ فهمت عليها .. رحت شويه واجت ورايه
منال.. هاي شسويتي مياس بشرفچ هاي عمله منچ تدرين شصاير بالدنيا لو لا
مياس.. بخوف : لا شصار ؟!!
منال.. رجلچ متخبل ومتعارك ويا اهل الولد وهسه رايحين مشتكين والشرطه دتدور علي بكل مكان
مياس.. وانتي شعرفچ بالموضوع ؟!!
منال.. نهى وجهاد سولفولي ،،،، هسه مو مهم فهميني شراح نسوي مهيب شكله تخبل والمصيبه شهم مو هنا حتى يلزمه
مياس.. نزلت دموعي المتقبل تنشف من البارحه لليوم : والله ما ادري منال والله العظيم اني مظلومه اترجاچ صدگيني
منال.. مو مهم اني اصدگچ المهم مهيب يصدگ حتى تنحل السالفه بسرعه
مياس.. شيصدگني هههههه
منال.. شبيچ تخبلتي
مياس.. رحت اركض حضنتها حيل ،،، لا بس راح اموت منال والله احس روحي دتطلع ع البطيئ
منال.. سوده عليه .... اصبري خلي تنحل سالفة مهيب ويا الشرطه بعدين نشوف حل الموضوعچ
حاضنتها وابچي بنشيج عالي ... طب جهاد بعصبيه سحبني حيل من حضنها
جهاد.. تعال لچ ساقطه
منال.. جرتني من ايده ع السريع : عوفها جهاد شدتسوي !!!
جهاد.. لتتدخلين يووووم
رجع جرني من ايدها طلعني من المطبخ وهي تصيح ورى وتدعي علي بس ولا كأنه يسمعها
لازمني من ايدي يسحل بيه واني ادفع بنفسي حتى افلت منه لان ما ادري بي ناوي على شنو
جهاد.. امشي ×××× من وراچ مهيب تورط ويا العالم ... دقيقه وحده متظلين بهل بيت ارجعي للشارع منين ما اجيتي
منال.. عوفها جهاد عيب عليك ولك هاي مرت خالك شلون تشمرها بالشارع وهو ما موجود
جهاد.. مرت خالي بت شوارع لذالك لازم ترجع للشوارع وتريحنه منها ومن شرها
فلتت منه بالگوه .. ركض عليه جرني من حجابي ،،، وگع بالگاع لزم شعري سحلني منه وهو يسب ويغلط اشكال الوان
وصلني للباب على هالحاله مد ايده ع اليده يريد يفتحها انفتح الباب من وحده
رفعت راسي وانصدمت من شفت شهم گدامي ......
يتبع..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!