رواية مياس قلب الشهم الفصل السادس والثلاثون 36 - بقلم لبنى الموسوي

للكاتبه

ملاحضه قبل كلشي : الف شكر للي عذروني وكتبولي سلامة عيونچ اهم من البارت وربي كلش احبكم واقدرلكم هذا الحب

اما الديتهجمون بكلام يسم البدن الي يگول تتحججين والي يگول اذا هيج حالتچ توقفي عن الكتابه احسن .. ترى عادي والله لأن الامام علي سلام الله علي ما سلم من السنتكم اجي اني اسلم من شرها
بلاول والاخير اظل اني بشر معرضه الانواع المواقف التجبرني ابتعد شويه

مع ذالك اني اكثر كاتبه ملتزمه وما مقصره الحمد لله ومع اني نزلت الكم بارتين البارحه رجعت كتبت اليوم رغم المرض

بعز ظروفي الصعبه وبعز مرضي ميهون عليه اخليكم تنتظرون واضغط على نفسي في سبيل ارضيكم وما اشلع گلبكم وهالشي الخاطر متابعيني اليحبوني ويقدروني مو الخاطر الجلادين الواگفين الي ع الموقف الواحد

_____________________

حسيت على نفسي اختنگت كلش من هذا الاحساس الخطأ .. تعوذت من الشيطان اخذت ملابس من الكنتور ورحت بدلت بالحمام

رجعت لگيته متكشف ضحكت ويا نفسي : سبحان الله اگول بنته عليمن طالعه متحب الغطه

تقربت منه على كيف غطيته بهدوء ورحت فحصت حرارة نونه الحمد لله چانت طبيعيه .. گعدت ع الطبله اعاين على شهم وهو نايم

انتبهت على موبايله ديلمض .. گمت تقربت منه شفت دتجي رسائل على الوتساب
اشتغل الفضول او الاصح اشتغلت الغيره

تجرأت شلت الموبايل على كيف .. بس رفعت الشاشه انفتح تعجبت لان ما خاله رمز بس المهم فتح حتى اشوف شديصير هنا

دخلت على البرنامج وانصدمت لمن شفته ديحچي ويا بنيه كاتب عليها ام رامي

عاينت اليوسف هو الچان ديراسله قبل شويه لأن محادثته اول شي .. دخلت على اسم البنيه صعدت ليفوگ شويه وبديت اقرا بالمحادثه شامي عامي

💬️ رد شهم رد

💬 ⁦️ عفيه جاوب ابنك ديموووووت

كلشي بيه گام ينفض من شفت هاي العباره ( ابنك ديموت ) ... باوعت للمكالمات لا تعد ولا تحصى وهواي رسائل بعدها

نزلت بالمحادثه لحد ما شفته مجاوبها لمن چنه بالمستشفى

💬 شبي رامي ؟!!!

💬 وينك شهم راح يروح الولد من ايدي
خلص الجهاز وما اگدر اطلع اشتري بهل لليل شسوي هسه جاوبني عفيه

💬 اني بالمستشفى ويا بنتي
راح اشوفلچ يوسف اذا گاعد ادزه واذا لا اجيچ اني بأي طريقه

💬 شبيها نهاوي

💬 ارتفعت حرارتها ونشمرت

💬 سوده عليه ما عدها غير العافيه

💬 الله يعافيچ

انتهت المحادثه لهنا .. طلعت منها ع السريع رحت المحادثته ويا يوسف بلكت افتهم شي

شفته مخابره بوقت الچنه بالمستشفى بس العجيب اني چنت گاعده يمه وما سمعته يحچي ويا : اكيد اتصل بي حتى يگعده لا اكثر

💬 يوسف رامي تخربط وامه ماعدها جهاز احتياط اله عفيه روحلهم بسرعه لان اني بالمستشفى ويا نهى

💬 شبيك نهى شهم

💬 ما بيها شي لتخاف صخنت شويه وهسه صارت تمام

💬 ماشي هسه رايحلهم بس ابدل

💬 رحم الله والديك خويي

💬 و والديك حبيبي

عاينت الشهم مراسله بعد ما رجعنه للبيت يطمأن ع الولد وهسه يلا جاوبه يوسف

💬 ليظل بالك شهم اخذته للمستشفى صار زين وجبتلهم كم جهاز احتياط حتى لتتكرر هالحاله

💬 بس تدري الحمد لله من لحگت علي چان ديودع خطيه

💬 الحمد لله على سلامته

💬 شلون صارت نونه

فجأه رجع راسل لان شافه متصل بالنت

💬 ليش متجاوب شهم مو متصل ؟ خو ما بيها شي نهى ؟!!

طلعت من البرنامج ورجعت الموبايل ع الميز .. رحت گعدت ع الطبله اعاين علي وجسمي يرجف من القهر

مياس.. شنو يعني انت متزوج شهم ؟!!

زين شلون ؟! شوكت ؟! ليش ؟!!!

فوگاها نهى الله يرحمها چانت اموته نفسها من الغيره عليك .. المسكينه متدري بيك متزوج وعندك ولد چماله

والله يا شهم لو تطلع فعلا متزوج فلا اعاين الخلقتك بعد .. اصلا شترجه من الزلم كلهم نفس الطينه ××××

هاي شبيچ مياس ؟!! غبيه انتي
على اساس هو مهتملچ وكاتل نفسه على حبچ حتى تهددي متعاينين الخلقته بعد
والله يا الله

ظليت الوب طول الليل .. اروح واجي بالغرفه وكل شويه اعاينله بحقد
گوه لزمت نفسي عنه چان بس يعجبني اگعده واعرف منه السالفه حتى تخمد النار البيه

گعدت نونه تبچي عاينت على شهم ولا حس على صوتها
سويتلها حليب وقست حرارتها .. نص ساعه يلا رجعت نامت

سمعت اذان الفجر طلعت توضيت ورجعت اصلي بلكت ارتاح شويه .. هستوني دا الم السجاده حسيت علي گعد درت وجهي شفته لازم الموبايل ويفرك براسه

مياس.. فارت اعصابي من ورى : سوده عليه خايف على حبيبة الگلب وابنها بحيث بعده ما فتح عيونه ركض يراسلها

ظليت واگفه بمكاني صافنه علي شلون ديكتب واحس روحي دخنت من القهر .. شويه وعاين عليه رفع حاجبه مستغرب صفنتي

شهم.. صباح الخير

مياس.. صباح النور

شهم.. شلون صارت نونه

مياس.. زينه

شهم.. شبيچ ؟!!!

مياس.. گوم صلي احسن من هذا الشيطان البيدك

ضحك وهز راسه بلا ميجاوبني .. شمر الموبايل ع الميز وطلع للمغاسل
ركضت شلته اشوف شكاتبلها قبل ليرجع

فتحت الجهاز ممراسلها !!! عاينت مجاوب يوسف بس

💬 شلون ارد عليك غير چنت نايم
عموما رحم الله والديك خويي ما قصرت واذا على نهاوي ليظل ببالك صارت زينه الحمد لله

طلعت من البرنامج رحت للاستوديو بلكت اشوف شي هناك .. عاينت ع الصور ماكو صور شخصيه بس اله هو ويوسف والمهيب ونونه

سمعت صوت گحته شمرت الجهاز ع السريع بعدني ممبتعده من الميز دخل .. سويت روحي دا اسحب كلنس حتى ليشك بيه

شهم.. مياس

مياس.. نعم

شهم.. اني گعدت بلليل لو لا

مياس.. لا نمت والنومه نومه لحد الاذان
ليش دتسأل ؟؟

شهم.. مو جايتني رسائل ومفتوحات
شلون انفتحن لعد ؟!!

مياس.. هااا
شمدرني
اني رحت للحمام اكثر من مره
يجوز انت بهلاثناء گاعد وفاتح الجهاز بلا متحس على روحك لان تعبان

شهم.. يجوز

فرش السجاده و وگف يصلي : خليت ايدي على گلبي إلا شويه چان نلگفتي مياس الثوله وتالي وياچ ؟!! سيطري على غيرتچ قبل لا تروحين بالرجلين من وراها

رحت گعدت يم راس نونه اعاين عليها حتى ارتاح لان بوجها كل سعادتي وراحتي .. حسيت على شهم صار يمي دنگ عليها وباسها بهدوء

شهم.. متنامين

مياس.. لا

شهم.. ليش ؟! ما تعبتي بس فهميني

مياس.. ما ظل شي بس تگعد منال انطيهيا وانام شويه

شهم.. خو هسه اني گعدت .. خلي ابقى يمها وانتي نامي

مياس.. انت عندك الاهم

شهم.. رفع حاجبه : مثل شنو !!!

مياس.. يعني اقصد شغلك
مو عندك شغل من الصبح ولازم تگعد بالسبعه

شهم.. بس شغلي مو اهم من بنتي

مياس.. روح نام شهم

شهم.. ماشي على راحتچ

طلع وسد الباب ورى .. اختنگت كلش نزعت الشال اهفي النفسي بي

درت وجهي شفته نسى موبايله ركضت قفلت الباب وادعي كون ميتذكره منا لما اعرف القصه حتى ارتاح

اول ما فتحت الوتساب .. رحت على محادثتها وگمت ارجع للاقدم بلكت افهم شي بس للأسف كلشي ماكو مجرد حچي عادي

ظليت ادور بالجهاز لحد ما مليت .. رجعته المكانه وتمددت افكر ساعات لحد ما حسيت ع الباب تندگ

ذبيت الحجاب على راسي لان عرفته اجه ياخذ الموبايل .. فتحت الباب چان مبدل ديطلع

شهم.. نمتي

مياس.. لا

شهم.. بس تگعد منال انطيها نهى ونامي مو زين تظلين هيچ

مياس.. ان شاء الله

شهم.. اجيت اخذ موبايلي نسيته يمچ

مياس.. اي انتبهت
رحت جبته اله انطيتهيا ابتسم ودار وجها : شهممم

شهم.. نعم

مياس.. متتريگ

شهم.. لا بالدوام اكل

مياس.. ليش اني گاعده
هسه اسويلك ع السريع ما اتأخر

شهم.. مو ما اريد ازحمچ

مياس.. ماكو اي زحمه

طلعت اسويله ريوگ حسيت علي لحگني للمطبخ .. گعد ع الميز لزم جهازه وعيوني تراقبه بس مچان يكتب مجرد يتصفح

مياس.. عوف الموبايل واكل

شهم.. تعالي تريگي ويايه

مياس.. لا شكراً ما اشتهي
من انام واگعد عود اكل

شهم.. براحتچ

عفته ورجعت للغرفه .. ظليت گاعده لحد ما حسيت عليهم گعدوا
طلعت حچيت ويا منال وفهمتها بالصار حتى اخلي نونه يمها وانام شويه

نمت من التسعه ل١١ ونص گعدت على صوت الموبايل .. تفاجأت من شفت ابويه ديتصل

مياس.. ها بابا

اشرف.. شلونچ بنيتي

مياس.. الحمد لله
انت واخواني شلونكم

اشرف.. على الله
اگول بابا باچر الحجيه ام رضا مموجوده بالبيت
اگدر اخلي اخوانچ يمچ ؟؟

مياس.. طبعا بابا بدون سؤال

اشرف.. خوش لعد خلي جهازچ يمچ حتى بس اتصل تطلعيلي

مياس.. ان شاء الله

اشرف.. يلا محتاجه شي

مياس.. لا سلامتك
الله وياك

گمت ع السريع لأن بالي يم نونه .. غسلت ورحت للصاله لگيتها نايمه بحضن الحجيه

مياس.. صباح الخير خاله

الحجيه.. گولي مساء الخير يا صباح هذا

مياس.. انطينياها عنچ

الحجيه.. ولي عوفيها نايمه الفرخه
بعدين شلون هملتيها لحد ما نشمرت .. لو صاير بيها شي شتگولين النفسچ ساعتها
ولو حقچ هو انتي جاهله وينچ وين تربية الجهال

منال.. طلعت من المطبخ : ها يمه بدينه

الحجيه.. اسكتي انتي لتدافعيلها

منال.. يوم الله عليچ كافي
والله المسكينه للصبح سهرانه وياها وممقصره ابد
قضاء الله وقدره شي ويريد يصير شبيدها يعني

رنا.. لا عيني لو دايره بالها ع الطفله زين مچان تمرضت و ولصلت الهل مرحله

منال.. رنا لتتدخلين رجائاً

رنا.. هسه اني شگلت قابل ؟؟
لو اليحجي الحق يطلع مو خوش عدكم

عفتهم ورحت للمطبخ .. سويت لفه اكلتها حتى اسند طولي
وگفت اشتغل شفت منال دخلت من الباب تدردم لأن سمعتها تتعارك ويا رنا والحجيه

مياس.. منال لتضوجين نفسچ ترى تعودت عليهم

منال.. يمعوده ميصير والله ميصير
امي ماكو .. قافله على الموضوع
ورنا خو تريدلها حجه حتى تحجي عليچ وليش مدا اعرف

مياس.. ههههه هاي شبيچ شو ضايجه اكثر مني

منال.. شوف هاي تضحك
انتي شبيچ ولچ فطيره لو ثوله

مياس.. لا اني...
دا احچي سمعت صوت شهم يصيح يا الله ما اعرف ليش جاي من وكت ركضت لبست حجابي

منال.. اگول مياس
ترى هذا الي بالصاله يصير رجلچ مو رجلي

مياس.. اي شنو يعني

منال.. اجت جرت الحجاب مني حيل : يعني ذبي هذا الصخام من راسچ

مياس.. ياااااااا ... منال هاي شبيچ !!!

منال.. لتصيرين ثوله ولچ
اكسبي شهم الصالحچ .. صدگيني بس تكسبي كل الموجودين بره يسدون حلگهم عنچ للأبد

مياس.. شلون يعني ؟!!

سدت الباب ورجعتلي تركض .. جرتني من ايدي للميز گعدتني وظلت واگفه گدامي

منال.. اسألچ سؤال بس جاوبيني بصراحه بلا لف ودوران

مياس.. اي اسألي

منال.. عندچ مشاعر اتجاه شهم لو لا

مياس.. يا شنو هالسؤال

منال.. گتلچ بلا لف ودوران
ومع ذالك اگص ايدي منا واشرت على چتفها .. اذا ما طلعتي تحبي لان مستحيل اكو وحده تقاوم اخويه

مياس.. هههههه لا يابه شنو هالثقه الزايده

منال.. هاي الحقيقيه حبيبتي
شوفي عيني يأما تحچيلي كلشي حتى اگدر اساعدچ
يأما من عين باچر ازوجه والف وحده تتمنى وانتي تعرفين هالشي كلش زين

مياس.. گمزت من مكاني مثل الثوله : تزوجي شنو

منال.. هههههه هااا والله عرفت
اعترفي حبيبتي ترى ما بيها شي هو رجلچ يعني لا عيب ولا حرام لمن تحبي

مياس.. دنگت خجلانه منها : هسه شتردين مني مدا افهم

منال.. اريد اعرف بمشاعرچ حتى اگدر اوگف وياچ واوصلچ للشي الاتمنى اني قبل الكل

مياس.. ليش شتتمنين انتي ؟؟

منال.. اتمنى تحبين شهم وشهم يحبچ
لان لا هو يلگه احسن منچ ولا انتي تلگين احسن منه

بعدين نهى الله يرحمها وصتني قبل لتموت حتى اقربكم من بعض .. ما حبت تروح وتعوف شهم يتعذب بعدها وبنفس الوقت رادت بتها تعيش بين اب وام حقيقين مو على الورق مثل هسه على ساعه واحد منكم يعوف الثاني اذا لگه نصيبه

مياس صحصحيلي .. اخويه گضه كل عمره محروم وما شاف شي من حياته
يعني بلمسه وحده منچ او يجوز كلمه كافيه تگلب موازينه وتخلي يحبچ ويتمم زواجه وياچ

زواجكم اذا تم راح تكسبين امي لان ما عدها شي بالدنيا اهم من شهم
وبنفس الوقت تسكتين رنا الدتنتظرچ تطلعين من هذا البيت بفارغ الصبر

بعدين تعالي گليلي انتي من كل عقلچ امي راح تسكت الشهم ومتزوجه ؟!!

لا والله فلا تسكت هسه كلها سنه اذا مو اقل وتلح علي لحد ما يتزوج
ساعتها يروح منچ شهم وبنته سوه لان مستحيل تظلين على ذمته بشكل وهمي واكو مره غيرچ بحياته

ها شو صافنه عليه احچيلچ شي ؟؟

مياس.. حسيت نفسي اريد ابچي إلا شويه من كلامها .. دنگت راسي محتاره
اعترفلها لو لا ؟؟

واذا اعترفتلها يا ترى راح يفيد هالشي ويا شهم
راح اگدر اكسبه مثل متگول لو يظل يباوعلي مثل بنته وميگدر يشوفني غير بهل صوره

منال.. مياااااااس

مياس.. ها

منال.. والله العظيم تحبي
وداعة جهالي مو بس تحبي غرگانه بحبه هم بس تكابرين

مياس.. اي احبه بس شنو الفائده ؟؟
منال شهم يصيحلي بنيتي معقوله يگدر يتقرب مني وهو يحسبني مثل بنته

منال.. خايبه دكلي تبن انتي ويا
بنته هي يا الله ههههه

مياس.. شبيچ تضحكين

منال.. ولچ ماما انتي مرررررررتتته
تعرفين شنو يعني مرته لو لا

خلي عنچ هالحچي وسوي مثل ما اگلچ وعتبيني اذا ما وگع واجاچ برجلي وهو الممنون

مياس.. اي شسوي يعني مدا افهم

منال.. اول خطوه بعد لتلبسين الحجاب گدامه نهائياً

مياس.. يا والله استحي

منال.. مياس شلون تالي وياچ
لعد شلون نوگعه اذا تستحين .. لو اگلچ انتي ميفيد الحجي وياچ ظلي هيچ وخلي امي تزوجه اريح الراسي

مياس.. لا لا يلا راح انزعه والقرأن

منال.. عفيه صيري حبابه واسمعي الكلام
وبعد شغله .. لبسچ من هو موجود خففي

مياس.. فتحت عيوني عليها : عززززه شلون يعني اخففه ؟!!

منال.. يعني لتلبسين لبس حجاب
لبسي نص ردن
ربع ردن
بلا ردن ههههه

مياس.. يا يمه ولچ والله صعبه

منال.. لعد ظلي بهاي الدشداشه وخلي حجابچ على راسچ ماكو داعي تنزعي

مياس.. اوووي هاي شبيچ
يلا ميخالف راح اسوي مثل ما گلتيلي بس لتزعلين

منال.. عايني ميوس هسه نفذي الخطه رقم واحد والباقي اعلمچ علي بعدين

مياس.. عزه بيها باقي بعد

منال.. طبعا بيها اشكال والوان .. وغمزتلي

مياس.. صخنت وداعة نونه

منال.. صخني بين ايده مو يمي هههه

مياس.. ههههه والله يا منال عليچ سوالف

منال.. راح افتح الباب واكيد شهم يجي للمطبخ
ديري بالج تلبسين الحجاب اغمس راسچ بنص گدر المرگه اذا سويتيها

مياس.. ههههه لا ما البس بس ادعيلي كون الله يقويني ويوخر الخجل مني

منال.. لا خجل ولا بطيخ
صيري حوك احسن مياخذنه منچ النسوان

بس گالت هيج تذكرت هاي المره الراسلها البارحه .. انگلب مودي وراحت الضحكه من وجهي بنفس الثانيه

منال.. فتحت الباب واجتني : شبيج ضجتي على ساعه

مياس.. لاهيچ
تدرين تذكرت نهى الله يرحمها هي وصتني اتمم زواجي من شهم وهذا هو الشي الثاني الما گدرت اگلچ علي بوقتها

منال.. اي عرفت لان وصتني الي هم
الله يرحمها شگد چانت تحبچ وتحب شهم

مياس.. مو بگد حبي الها

منال.. يلا سدي الموضوع ليجي شهم

وگفت امسح بالكاونتر وفكري يم كلام منال : زين اذا طلع شهم متزوج شلون ؟؟

لا يمه الله ليگولها لأن لو صدگ يطلع عنده مره وطفل مستحيل اتقبله بحياتي هو اني من مراسله اغار هالدور وحده تشاركني بي

لا مياس شبيچ انتي تعرفين بي شگد چان يحب نهى معقوله يتزوج عليها
لا لا ميسويها

زين لعد شنو هاي تگله ابنك راح يموت منين اجه ابنه اذا ممتزوجها

اووووف يا ربي ساعدني راح اموت من التفكير والغيره .. سمعت صوت خطواته قريبه درت وجهي ع السريع لان استحي اخلي عيني بعينه

- دخلت للمطبخ شفت مياس بلا حجاب درت وجهي بسرعه وگحيت حتى تحس بوجودي

منال.. ادخل خويه ماكو احد

شهم.. شبيچ منال مو مياس واگفه

منال.. شهم هاي مرتك

شهم.. درت وجهي عليها باستغراب : شنو هذا الحچي منال !!!

منال.. شبيك مستغرب ترى حتلو زواجكم شكلي حرام تلبس منك حجاب
ما صايره والله بس يمك

باوعت المياس صافنه علينه عرفت منال فاتحه الموضوع وياها لذالك ما استغربت الموقف مثلي

طلعت من المطبخ بلا ما اجاوبها .. صعدت الغرفتي دايخ من الشي الصار : شنو هدفچ منال
ليش دتسوين هالشكل بأيش دتفكرين بس فهميني ؟!!

وگفت اصلي قريب الساعه يلا نزلت لگيتهم صابين الغده .. هستوني دا اگعد سمعت جهاد يصيح على سمر

جهاد.. وين جاييييه

سمر.. شبيك جهاد

جهاد.. ولي من خلقتي لتگعدين ع السفره بوجودي

مياس.. جهاد شنو هالحچي ؟!!

جهاد.. ليش شبي الحجي !!

شهم.. جهاااااااااد

جهاد.. خالي سمر اذا گعدت وروح ابويه اعوف البيت واطلع

شهم.. شجاك ولك ترى طوختها

سمر.. عوفه خالو راجعه الغرفتي

مياس.. ركضت تبچي انمرد گلبي عليها : ليش جهاد والله خطيه

جهاد.. سدي الموضوع خل نتزقنب

عفت الاكل ورحت وراها .. دخلت للغرفه لگيتها شامره نفسها ع الچربايه وتشهگ بحرگه

مياس.. سمر

سمر.. مياس روحي اكلي وعوفيني الله يخليچ

مياس.. گومي ناكل بالمطبخ وحدنه

سمر.. ما اشتهي والله ما اشتهي

مياس.. بس سمر

سمر.. مياس فدوه اروحلچ اتركيني هسه

مياس.. ماشي على راحتچ

طلعت من يمها لان شفتها محتاجه تظل وحدها .. گعدت اتغده بالگوه
انسدت شهيتي بعد كلشي صار

لليل هي حابسه نفسها بالغرفه ما طلعت ابد .. عاينت الكل بالصاله رحت للغرفه احاول وياها بلكت تقبل تطلع تگعد ويانه

دگيت الباب ما جاوبتني .. دخلت عليها لكيتها نايمه ودايره وجها عني

مياس.. سمر گاعده

سمر.. اي

مياس.. اگدر احچي وياچ

سمر.. تفضلي
عدلت گعدتها وانقهرت بيني وبين نفسي من شفت عيونها رايحه من البچي

مياس.. گومي اطلعي ويانه بالصاله

سمر.. ليش اطلع مياس ؟!!
متشوفين شلون الكل كارهني وما طايق وجودي بهذا البيت

مياس.. شلچ بهذا الحچي الماصخ

سمر.. هاي الحقيقه مياس
كلهم ماطايقيني ولا راح يسامحوني

جهاد
خالي
يوسف
بيبيتي
ولچ حتى امي من يومها ما حجت ويايه بحرف واحد

ادري شلون يعني بشر وغلط يا عالم
بشر
بشر
مو ملاك حتى يتصرفون ويايه هيچ

مياس.. والله يسامحوچ بس انتي هم لازم تنطين من نفسچ شويه

يعني ليش دتحبسين روحچ هنا طول النهار
اطلعي يمهم .. اختلطي بيهم حتى ينسون الصار ويتعودون على وجودچ مثل قبل

انتي بحبستچ الروحچ دتذكريهم دائماً انو اكو شي مو طبيعي .. شلون ترديهم ينسون اذا انتي نفسچ مدا تگدرين تنسي

مديتلها ايدي : ديلا گومي وتحملي شويه والله كلشي ينحل ويا الايام

گامت ويايه .. طلعنه سوه للصاله
كالعاده جهاد سممها بالحچي بس اني ظليت لازمه ايدها حتى لتگوم وتعوفنه

شهم.. حجيه عرفتي بالخبر الجديد
ولو شلون تعرفي اذا هو حصري الأبنچ وبس

الحجيه.. هههه خير سمعنه يالغالي

شهم.. يوسف راح يخطب

انصدمت كلش من سمعت كلامه .. درت وجهي على سمر اصفرت بسرعه وعيونها لمعت بالدموع وهي صافنه على شهم

الحجيه.. واخيرااااا
ومنو هاي سعيدة الحظ الگدرت تحرك مشاعر ابن اختي

شهم.. تبارك بت عمي

مياس.. شنو تبارك !!!!!!

شهم.. شنو شبيچ ؟!!

مياس.. ها لا ما بيه شي
بس ممتوقعه يعني شجابه عليها

شهم.. عادي معرفه سطحيه مجرد اعجاب من بعيد اضافه الصداقته ويا ابوها

گامت سمر من يمنه ع السريع .. رحت گعدت يم منال لان هي الوحيده الراح تحل الموضوع

مياس.. منال

منال.. ها

مياس.. سمر محتاجتچ لازم تروحيلها

منال.. ليش يعني لان يوسف خطب ؟!!

مياس.. فتحت عيوني : انتي تعرفين

منال.. طبعا
وتستاهل هي الضيعته من ايدها

مياس.. لتقسين گلبچ
ترى والله متستاهل كل هذا بلأخص منچ انتي

منال.. شسوي يا مياس
وروح اخويه الصار والبعده ديصير مو سهل عليه بس شبيدي اذا هي اختارت هالشي

مياس.. لا ما اختارت انجبرت منال انجبرت
دگومي روحي فرحيها بطبتچ عليها وبعدين نكمل الحچي

منال.. امري لله

راحت تشوفها واني ظليت اسمع كلامهم ديحچون عن خطوبة يوسف من تبارك
ثواني وسمعنه منال عاطت : يبووووووووو...

يتبع..