رواية مياس قلب الشهم الفصل الثالث عشر 13 - بقلم لبنى الموسوي

#مياس_قلب_الشهم

للكاتبه #لبنى_الموسوي

وبعد شهر بالضبط چنت نايمه ... نص الليل گعدت على الم ببطني كلش قوي

حاولت الزم نفسي واكل الوجع حتى ليگعد مهيب بس ما گدرت

سچاچين تضرب بيه .. عطت بصوت طالع من كل گلبي فز مهيب مخروع على صرختي

مهيب.. الله الله هاي شبيچ

مياس.. دا اموت مهيب دا اموت ااااخ

مهيب.. حياتي شنو شدتحسين ؟؟ شو ارفعي راسچ حاچيني

مياس.. بطني دتتگطع .. ألم مينحمل سوي شي الله يخليك

گام من يمي يروح ويجي ميعرف شلون يتصرف ... صحت بي لان الوجع دمرني وما بيه اتحمل اكثر

مياس.. صيح مناااااااال

مهيب.. اي اي هسه

راح يصيحلها واني ظليت الوب بنفسي مثل الطير المذبوح ....

ما اعرف شلون اوصف الشي الچنت احس بي
فجأه دموعي گامت تنزل بحرگه ... طبت منال تركض

منال.. يا يا شبيچ مياس ؟!!

مياس.. فدوه ساعديني راح اموت بعد ما اتحممممممل

مهيب.. سوي شي خويه مدتشوفين حالها

مياس.. اخذوني للمستشفى الله يخليكم .. بعد ما عندي طاقه احمل هالوجع

مهيب.. منال روحي لبسي حجابچ وتعالي بسرعه

منال.. اي رايحه ... بس انت ساعدها تغير ملابسها بين ما اجيك

راحت تركض وظل مهيب يساعدني اغير ملابسي بس اني منتهيه بحيث لو بيدي اطلع بهذا وضعي بس المهم اخلص وارتاح

اخذوني للمستشفى ع السريع .. طبينه اني ومنال وظل مهيب ينتظر برى

فحصتني الدكتوره وراها اجت الممرضه انطتني ابره شويه ارتاحيت عليها

منال.. ها دكتوره شبيها ؟؟

الدكتوره.. البنيه متزوجه جديد ؟؟

منال.. اي صارلها شهر شنو حامل ؟

الدكتوره.. لا عيني عدها التهابات حاده وبوجودها مستحيل يصير حمل

منال.. يااا شلون سالفه هاي ،،،، وهسه شلون دكتوره ؟؟

الدكتوره.. راح اكتبلها علاج بس لازم تلتزم بي حتى تروح الالتهابات نهائيا
هو عباره عن ٣ كورسات يتكررن بعد كل عاده
راح افهمچ عليهن حتى تساعدينها لان مبين عليها بعدها صغيره ومتعرف لهل سوالف

منال.. الله ينطيج العافيه دكتوره

راحت منال ويا الدكتوره شويه ورجعتلي .. طلعنه بس شافنه مهيب اجه يركض

مهيب.. ها منال شبيها ؟؟

منال.. لتخاف خويه الشغله بسيطه ... مجرد التهابات بس تاخذ العلاج بانتظام تروح ان شاء الله

مهيب.. وهاي الالتهابات هيچ تسوي .. والله گلبي راح من شفتها بهالحاله گلت راح يصيرلها شي

منال.. اي مو التهاب حاد كلش ،، هذا العلاج جيبه باچر وانطينيا الي حتى اني اتابعها بي

مهيب.. ماشي خويه

رجعنا للبيت .. رحت لغرفتي دا ابدل دخل مهيب

مهيب.. هههه اوگفي بشرفچ

مياس.. فتحت عيوني علي ولبست ع السريع : عيب عليك والله

مهيب.. هاي ليش لبستني !!

مياس.. عزه شنو هاي ؟!! صاير فد نوب انت

ضحك وهز راسه عرفته تعمد يتشاقى ويايه حتى يخجلني

مهيب.. حضني وهو مبتسم : شسويتي بيه ولچ خفت عليچ كلش

مياس.. ههههه والله مو بيدي حاولت اكل الوجع واسكت علمودك بس ما تحملت .. خو شفت بعينك شصار بيه

مهيب.. سلامتچ يروحي ... وهسه شلون صرتي ؟؟

مياس.. لا الحمد لله والشكر كلشي مدا احس بعد ... هاي الابره فادتني

مهيب.. الحمد لله

مياس.. يلا ارجع نام باچر لازم تروح للمعارض من الصبح خلص شهر العسل بعد

مهيب.. هلو هلوووو ... مگعدتني بنص الليل وعايف نومتي الحلوه من وراچ وبهذلتينه بالمستشفيات تالي تگوليلي ارجع نام بكل سهوله !!!

مياس.. صفنت علي ،، لعد شگولك شبيك مهيب ؟؟!

مهيب.. ع الاقل اريد كروه

مياس.. ياااااا هههههه شدتحچي حياتي كروة شنو ؟؟!!

مهيب.. هسه اني اگولچ كروة شنو

لزمني من خصري جرني لحضنه حيل وگام يبوس برگبتي ... ضحكت على سوالفه حاولت ابعده ما گدرت بعد فقد شيصحي

مياس.. ههههههه ولك مهيب والله مو وكتك شو دوخر

مهيب.. حط ايده على حلگي .. اششششش

سحبني من ايدي .... نيمني ع الچربايه وووو ( يلا عيني بلا مطرود مره ورجال حاشرين خشمكم بيناتهم شكو ؟؟ شلون يعني الواحد مياخذ راحته بغرفته والله حلوه هاي 😁😁)

گعدت الصبح على صوت المنبه .. اگعد بي وماكو حقه اذا للخمسه الفجر يلا نام

مياس.. مهيب شلون تالي وياك !! گوم عاد مو شلعت گلبي

مهيب.. اني مصخن حياتي

مياس.. انهبطت بس گال هيچ ... حطيت ايدي على گصته نززني من فتح عيونه ولزمني بسرعه : ههههه يمه هاي شبيك خرعتني ؟!!

مهيب.. ليش تتحارشين بيه ولچ

مياس.. ياااااااا ... غير انت گلت مصخن واني الثوله صدگتك شمدريني بيك حيال ماكو تكك

مهيب.. ههههه حچي يفيدچ حياتي

شمرني ع الچربايه ونام عليه .. دفعته حيل قيد ايدي ولزم رجلي برجله حتى لا اتحرك

مياس.. مهيييييب

مهيب.. ها يروحه المهيب

مياس.. شتريد ؟!!

مهيب.. اتريگ بيچ

مياس.. والله راح اصيح بصوت الم عليك البيت كله .... كافي عاد تعبتني

ضحك حيل  ،،،، باسني من خدي وگام

مهيب.. اتشاقى وياچ لسبب واحد تأخرت ولازم اطلع للشغل وإلا ماكو شي يمنعني عنچ حتى الصياح التحچين عنه

مياس.. ههههه الله يهديك ،، دفوت اغسل بين ما اسويلك الريوگ ملابسك بالحمام تلگاهن

مهيب.. اي عاشت ايدچ حبي

سويتله الريوگ ... تريگ ع السريع وطلع لأن تأخر كلش

ما گدرت ارجع انام .. گعدت انضف بغرفتي لحد ما سمعت اصواتهم گعدوا

لبست حجابي وطلعت لگيت الحجيه بالصاله تقره دعاء

مياس.. صباح الخير خاله

الحجيه.. هلا

ما ادري ليش ما طايقتني لهل درجه .. عفتها ورحت للمطبخ شفت منال دتسوي بالچاي

مياس.. صباح الخير

منال.. صباح السعاده حبيبتي ،، شلون صرتي بشري ؟؟

مياس.. لا الحمد لله هواي احسن .. تعبتچ ويايه

منال.. تعبچ راحه حياتي

مياس.. منو اكو من الولد بالبيت

منال.. جهاد بس ... وهسه راح يطلع

مياس.. زين بيش اساعدچ بعد لازم اشتغل ميصير اظل هيچ

منال.. هههه خلي نتريگ وتتدللين

دنحچي طب جهاد تفاجأ من شافني يم امه

جهاد.. صباح الخير يوم

منال.. صباح النور وليدي .. تعال ريوگك جاهز

جهاد.. نسدت نفسي ما اريد بعد

منال.. ليش ؟!!

جهاد.. بدون ليش ،، يلا مع السلامه

عرفته يقصدني : عشتووو فوگاها هم هو الغلطان وهم يشيل خشمه عليه

نزعت حجابي لان محد ظل بالبيت ... سويت الريوگ ويا منال دنتريگ نزلت نهى

نهى.. صباح الخير

منال.. صباح النور شو اليوم متأخره بالنوم شعجب ؟!!

نهى.. راحت عليه النومه هسه يلا حسيت

راحت غسلت واجت تتريگ ويانه ... بالي يم شهم اريد اسألها بس استحي صارلي شهر ما اعرف اي شي عنه

دا اعاين عليها وافكر شلون اگدر اسأل علي ... تفاجأت بالحجيه من هاجمتني بلا سبب

الحجيه.. عيني يالمحنايه نشفت الحنه مالتچ لو بعد

مياس.. ويايه ؟؟

الحجيه.. لعد اكو غيرچ محنايه بهالبيت

رنا.. لا خاله خلي الخاتونه نايمه بالعسل ليش تزعجيها

مياس.. شنو خاله ؟؟ شتريدين اني حاضره بس گولي

الحجيه.. صارلچ شهر گاعده مثل الخاتونات والناس تخدم بيچ ... صار الوقت تخلين ايدچ بالشغل حالچ حال البنات

منال.. يمه اني مچنت اخليها لان عروس .. بعدين البنيه اليوم اول ما طبت للمطبخ رادت تشتغل فـ لتخافين مراح تقصر وياچ ان شاء الله

الحجيه.. خلي نشوف ولو ما اتصور بيها حظ شكلها ما فالحه غير بالنوم

ضجت كلش .. گمت من السفره رحت للمطبخ شويه وطبت ورايه نهى

اعاين عليها مثل الضايجه حتى ما حچت شي من اول ما گعدت

مياس.. حبي بيچ شي ؟؟

نهى.. لا حياتي كلشي مابيه

مياس.. يمعوده دشوفي وجهچ بالمرايه قبل لتجاوبيني هيچ

منال.. ها مياسه خو ما ضجتي من امي ؟؟ والله هي كلش طيبه بس مشكلتها متتوالف ويا الناس بسرعه يعني يحتاجلها فتره وتتعود عليچ واكيد راح تحبچ مثلنه

مياس.. لا حبي ليظل ببالچ ما ضجت بس تعالي شوفي نهى مدري شبيها

نهى.. هههه هاي شبيچ والله ماكو شي

منال.. ههههه عيني بعدچ متعرفيها لنهى ،، كلما يلتحق شهم شهر وينگلب مودها لحد ميرجع يلا تصحصح

مياس.. ليش هو شگد راح يظل بعد ؟!!

منال.. مو سوه يجوز شهر يجوز شهرين حسب الاوضاع يمهم

مياس.. نهى دتتصلين بي انتي ؟؟

نهى.. لا وين كل اسبوع يلا اسمع صوته ... دقيقه وحده ويسد الخط

مياس.. يمه الله يساعدچ شلون متحمله

منال.. ههههه شوف الثانيه يا الله

مياس.. شبيچ ؟!!

منال.. ولچ هاي عقلها صغير اذا تحچين وياها هالشكل هسه تگعد تبچي ومحد يگدر يسكتها بعد

عاينت النهى دمعت صدگ .. گمت حضنتها حتى اواسيها شو هاي انهدت بالبچي

منال.. هاچ شفتي بعينچ

مياس.. حياتي ليش دتبچين ؟؟ اول وتالي يرجع وتشبعين منه

نهى.. تكأبت والله ... فوگاها الخوف ماكلني علي لان الاوضاع يمهم كلش مو زينه

مياس.. الله يحفظه لتحچين هيچ تفائلي بالخير .. كلها ايام وتشوفي گدامچ بس اصبري شويه

نهى.. مسحت دموعها : ان شاء الله

منال.. گومن نشتغل لا تجينه سهامه بالعوچيه تدرن بيها ما تتشاقى بهل سوالف

نهى.. ههههه اي والله

مياس.. واخيرا شفنه ضحكتچ الحلوه

نهى.. حبيبتي فدوه لگلبچ الطيب

بلشنه بالشغل للعشره ونص يلا خلصت كلشي ... دخلت للحمام غسلت وطلعت امشط شعري اندگت الباب

مياس.. تفضل

نهى.. نعيما حبي

مياس.. الله ينعم عليچ حياتي .. تفضلي

نهى.. خو ما مشغوله

مياس.. لا كلشي ما عندي تعالي ليش واگفه بالباب

نهى.. تصعدين ويايه فوگ بين ما انضف غرفتي نسولف شويه لأن ضوجه

مياس.. يلا هسه بس انشف شعري واجي وراچ

نهى.. ماشي حياتي

نشفت سريع وصعدت وراها .. طبعا طول الفتره العشتها يمهم انتبهت على هواي امور بس استحي اسأل عنها واهم شغله لفتت انتباهي نهى وشهم ما عدهم اطفال

دگيت الباب ودخلت عليها ،،، شفتها تنضف غرفتها بملل

مياس.. شبيچ حبي شو بعدچ ضايجه شحچينه قبل شويه

نهى.. تعالي اگعدي خلي اسولفلچ بلكت ارتاح

عاينت لغرفتها ممفروشه : زين اني وين اگعد مستحيل ع الچربايه ... قاطعت تفكيري نهى

نهى.. اگعدي شبيچ صفنتي

مياس.. ههههه وين

نهى.. اشرتلي ع الچربايه : هنا

مياس.. ههههه لا يمعوده افرشي شي بالگاع نگعد احسن

نهى.. امشي ولچ لتخليني ازعل عليچ

گعدت بطرف الچربايه .. عاينت للميز علي صورتهم مال العرس شلتها

مياس.. طالعه كلش حلوه

نهى.. حياتي انتي .. اكيد مو احلى منچ

عيوني اخذتني الشهم .. كلش اشتاقيتله واستفقدته لعد هي شلون الله يساعد گلبها

مياس.. صارلكم شگد متزوجين ؟

نهى.. عشر سنوات

مياس.. انصدمت كلش : والله تحچين صدگ

نهى.. ههههه اي ليش استغربتي ؟

مياس.. مو مبين عليچ صغيره ،، شگد چان عمرچ من تزوجتي ؟؟

نهى.. بعمرچ ١٤ سنه وهسه عمري ٢٤

مياس.. دنگت منها : اني الضروف جبرتني اتزوج بهيچ عمر انتي ليش ؟!!

نهى.. لان حبيته

مياس.. رفعتلها راسي مصدومه : صدگ

نهى.. اي

مياس.. وهو هم چان يحبچ ؟

نهى.. ولا معبرني الله وكيلچ

مياس.. هههه شوقتيني كلش ... بيها مجال تسولفيلي قصتكم

نهى.. اي طبعا
شوفي حبي اني بت خالته الشهم .. امي وامه علاقتهن كلش قويه من دون باقي خواتهن لذالك چنه ٢٤ ساعه سوه يجونه ونجيهم يعزمونه ونعزمهم
من طفولتي واني متعلقه بشهم كلش لان چان يشتريلي دائما ويطلعني اني وخواتي للالعاب والحدايق بس چنت اشوفه مثل اخويه يوسف لأن طفله وما اعرف مشاعر الحب
كبرت شويه وبدت نظرتي اله تتغير .. صرت احب كلشي بي
صوته
ضحكته
عيونه من اعانده ويخزرني
عصبيته
رجولته
بحيث ادمنت على وجوده بحياتي .. ما اتحمل يمر يوم وما اشوفه بي
كتمت هالحب بگلبي لحد ما صار شي ما چنت حاسبتله حساب گلب كل موازيني

مياس.. شصار ؟؟

نهى.. من چان عمري ١٣ سنه فد يوم رجعت من المدرسه لگيت خالتي ام شهم يمنه
سلمت عليها ورحت ابدل .. طلعت من غرفتي سمعت اسم شهم من بين كلامهم
صار عندي فضول اعرف شديحچون .. وگفت قريب منهم وانصدمت من عرفت خالتي تريد تزوجه
تخبلت بوقتها .. شنو يتزوج اني احبه كلش شلون اخلي ياخذ غيري

مياس.. يمه الله يساعدچ ،،، تالي شصار بعدين ؟؟؟

نهى.. رجعت الغرفتي اكل بنفسي ،،، بيومها من القلق حتى ما گدرت اتغده وياهم
حبست روحي بالغرفه وصرت افكر لازم اتصرف ميصير اظل ساكته هيچ لان اذا سكتت معناها اخسره

مياس.. وشسويتي ؟؟

نهى.. بلليل اجانه شهم ويا يوسف .. استغليت الفرصه وگتله يدرسني لان هو متعود على هالشي
اخذت كتبي ورحت يمه بلاستقبال
اعاين ليوسف گاعد وما بي مجال يتحرك احتاريت شلون احچي ويا بوجود اخويه
خلص شرح وانطاني الدفتر حتى احل التمرين ميدري بالي مو يم الدراسه اصلا
لزمت القلم واني صافنه علي ديحچي ويا يوسف ويضحك ... اجتني فكره اعترف اله بيها بدون ما احچي

مياس.. ههههه شلون يعني گولي ولچ بسرعه

نهى.. كتبت جوه التمرين بمكان الحل
احبك شهم ... ورسمتله گلب حب ههههه

مياس.. عزززززززه .. وبعد كملي كملي

نهى.. انطيته الدفتر وگتله خلصت جاوبني باستغراب : شبسرعه !!
اخذ الدفتر شاف الكلام رفع راسه مصدوم بوجهي
دنگت خجلانه منه سمعته گال اليوسف اريد نرگيله
هو ويوسف ميدخنون بس مرات يشربون نرگيله ع المزاج
طلع يوسف چان اسمع شهم يعيط بيه هذيچ العيطه بحيث متت بمكاني من الخوف

مياس.. يا يمه دا اتخيله شلون عاط من يمي خفت والله

نهى.. هههههه اسكتي وخليها
صفنت بوجها والدمعه بعيني گلي شنو هلاستهتار والكلام الفارغ متستحين مو عيب عليچ

ظل يرزل يرزل يرزل لحد ما خلاني ابچي من القهر
عاط بيه : كافي تبچين خلي عقلچ براسچ وانتبهي على دراستچ
هالخرابيط عوفيهن تسمعيني لو لا ... بعدچ طفله وينچ وين الحب

مسحت دموعي ورفعت راسي علي بحقد : كملت كلامك
جاوبني : اي
گتله : هاي مو خرابيط اني احبك وابقى احبك واليوم سمعت امك تريد تزوجك من هسه اگولك اذا تتزوج غيري اموت نفسي وذنبي برگبتك

شو هذا طگها بضحكه وهز ايده .. خنزرت علي : شبيك ليش تضحك اكو شي يضحك
جاوبني : بابا عيب عيييييييييب تفتهمين شنو عيب لو لا

مياس.. يبوووو هذا شيقنعه يمكن يشوفچ طفله لذالك ما اخذ كلامچ بجديه

نهى.. اي صح
اخذت كتبي منه وگمت بعصبيه : اسمع شهم اني مو طفله ولا دا اتشاقى وياك
اني احبك واريدك استوعب هالشي احسنلك
وارجع واگولك اذا تزوجت غيري اموت نفسي والله

طلعت من يمه قبل ليجاوب .. رحت لغرفتي وشبعت بچي

من يومها بعد ما شفته قريب الشهر .. فد يوم اجانه بلليل ركضت اسلم علي لان شتاقيتله كلش .. شو هذا بالگوه جاوبني وفوگاها گالب وجها عليه

رجعت لغرفتي كتبتله رساله بالورقه : شهم ليش هيچ تعاملني كل هذا بس لان گتلك احبك
شوف اني صح صغيره ويمكن عبالك دا اراهق وهالحچي كله جاي من فراغ
بس اني احبك صدگ وما اگدر اتخيل نفسي اصير لغيرك ولا انت تصير لغيري افهمني الله يخليك گلبي ديوجعني من تصرفاتك ليش تأذيني هالشكل

ما اعرف شلون طلع مني كل هالكلام واني بهالعمر يمكن لان احبه صدگ... المهم رجعت للاستقبال بحجة اوديلهم ماي
شفته داير وجها يلعب اتاري ويا يوسف .... خليت الورقه بجيبه وطلعت بسرعه

راحت السالفه لا رد ولا سوه اي شغله ينطيني امل بيها

مرت سنه على هالحاله صح ضجت كلش بس المهم ما خطب هذا الشي الوحيد الچان مريحني

طول هالسنه لزگتله الله وكيلچ كلما اشوفه احبك ما احبك وهو يدفع بيه ويرجع ليوره بس بلا فائده هههههه بين قوسين الكرامه نسحلت بالطين

فد يوم چان عرس ابن خالتنه .. اني ستغليت الفرصه
رتبت روحي وقريب متطلع الزفه مكيجت من خواتي بلا متشوفني امي لان متقبل

طلعنه للزفه الشارع متروس بالزلم .. عيوني تدور علي لحد ما لمحته من بعيد واگف ويا ولد خالتي

ظليت بمكاني صافنه علي .. بس رفع راسه وشافني گباله  خزرني حيل

فرحت من هالشي : اكيد ضاج لان شافني بالمكياج .. تعمدت اروح يم ابن خالتي الثانيه
وگفت يمه اسولف واضحك على لا شيئ بس المهم اريده يشوفني

شويه واجه جرني من ايدي حيل وهو يصيح : هاي شدتسوين ولچ
جاوبته : شمسويه
گلي: شنو هذا وجهچ بعدين ليش واگفه ويا فقار تتمضحكين بنص الشارع مو عيب عليچ

جريت ايدي منه : لا مو عيب حاله من حالك انت ابن خالتي وهو هم ابن خالتي لو حلال عليك وحرام علي

صار عصبي ودفعني ع سيارته حيل : امشي اصعدي لا امردچ هنا

صعدت ويا بس ميته خوف منه لان چان الشرار يتطافر من عيونه

تحركنه وحدنه ما صعد احد ويانه .. بنص الزفه شفته غير طريقه وعافهم
خفت كلش من تصرفه بس ما گدرت احچي شي

تفاجأت من وصلنه لبيتهم .. فتح باب سيارته وعاط بيه : انزلييييييي

اول ما نزلت جرني من ايدي وطببني للبيت .. چان فارغ لان الكل ملتهين بزفة ابن خالتي

عاينتله بخوف : شبيك شهم
خزرني وهو يصيح : شبيه موووو ؟!!
نزلت دموعي بسرعه : اسفه والله بعد ما اعيدها

تقرب مني وسحبني اله ... انصدمت كلش من حركته
رفع راسي اله وهو يگول : احبچ مخبله

متتدرين شصار بيه بوقتها ... ما اعرف ابچي من الخوف لو من الفرح

هد ايدي بسرعه وگلي امشي ارجعچ لبيتكم

طلعت ويا ... الطريق كله ما حچه بحرف
وصلنه لگيت اخواني راجعين قبلنه

عشت ليلة ورديه بعد ما سمعت هالكلمه منه .. حسيت نفسي ملكة زماني شهم وحبني شريد من هالدنيا بعد

اسبوع مر على اعترافه الي بلا ما اشوفه .. فد يوم طلعت من غرفتي على صوته شفته گاعد ويا امي بالصاله بس شافني ابتسم

صاحتني امي حتى اگعد وياهم .... عرفت اكو شي
گعدت وچان انصدم من عرفت بي ديخطبني من امي

اسمع امي تگوله : بس نهى مريضه وانت تعرف بمرضها .. جاوبها اعرف كلشي لان امي سولفتلي ومع ذالك راضي ورايدها

چنت ادري بنفسي مريضه بس مچنت اعرف شيأثر مرضي على زواجي

مياس.. سوده عليه شبيچ حياتي شنو مرضچ ؟؟

نهى.. القلب .. امي فهمتني بعد ما خطبني شهم انو مرضي يأثر حتى علاقتي الزوجيه بشهم والأهم من كل هذا يمنعني اصير ام حالي حال كل البنات

انقهرت عليها كلش من عرفت هالشي منها ... صح اني مثلها ما اعرف خطورة هالمرض بس ستحيت اسألها عنه حتى لا تتحسس

نهى.. تدرين شگد انصدمت من عرفت بمرضي داخلي چنت اگول شلون شهم قبل يتزوجني وهو يدري بيه ناقصه وراح يعيش طول حياته ناقص مثلي لان راح ينحرم من الاطفال

فد يوم قررت اتركه حتى لا اظلمه ويايه .. من واجهته رفض وسد الموضوع بسرعه
حاولت ويا گلي اني راضي بيچ مثل ما انتي ومستحيل اگدر اتزوج غيرچ

تزوجنه اول ايام من چان يتقربلي اتخربط كلش بس ع العلاج ارجع اتحسن

مرت ٤ سنوات على زواجنه حالتي تدهورت اكثر .. صار ميگدر يتقربلي نهائيا لان حتى العلاج ميفيدني بعد اذا تخربطت

مياس.. فتحت عيوني باستغراب : شنو يعني هسه ميتقربلچ ؟؟!!

نهى.. اي صارلنه سنيين على هالحاله ومع ذالك صابر عليه ... لا فد يوم خاني ولا حسسني بنقصي بس للأسف هذا الواقع اني اظل نص مره 

گلبي انفطر عليها وبنفس الوقت تفاجأت بشهم : شنو هالرجال معقوله اكو مثله بهالدنيا لو الله خالقه استثناء من البشريه

وين اكو واحد يصبر مثل صبره والاهم من هذا وين اكو رجال يحب مثل حبه

نهى.. ها استغربتي مو ؟؟

مياس.. لا حبي عادي ترى كل الناس معرضين للأمراض .. لتخلين مرضچ يسيطر عليچ ولتظلين تتحسسين منه ما دام شهم يحبچ وراضي بيچ مثل ما انتي كلشي يهون

نهى.. الى متى مياس والله دا اموت يوميه واني افكر بي
صح اني ممقصره ويا واحاول اعوضه بأي طريقه بس مع ذالك يظل النقص موجود بيه
هو هم بشر ومن حقه يشوف حياته مثل اي رجال غيره بس مو بيدي اغار علي كلش ... والله لو ادري بنفسي اتحمل وميصيرلي شي چان زوجته حتى اخلصه من هالعذاب

مياس.. شو سكتي .. تزوجي شنو انتي مخبله !!!
ولچ يحبچ افتهمي هالسالفه ،،، شهم اكبر من انو يفكر بشهواته على حساب حبه الچ
انتي بالنسبه اله اهم من هاي التفاهات
ترى هالسوالف بسهوله يحصلها البشر بس الحب الصادق والگلب النقي اذا خسرنا صعب يتعوض بعد

نهى.. بچت بحرگه وحضنتني حيل : واني هم احبه مياس والله احبه حتى اكثر من نفسي

مياس.. شو عاينيلي .... مسحت دموعها بيدي : ما دام تحبي لتأذين روحچ لخاطره لان هو ميقبل يشوفچ بهالحاله ولا يقبل تفكرين بمثل هالتفكير

بهلاثناء دگ موبايلها عاينت مكتوب حبيبي ضحكت

مياس.. شفتي گلبه حسه واتصل بيچ ،، يلا اني نازله خلصي وتعالي ورايه
ها صدگ سلميلي علي هواي

نهى.. يوصل حبي شكرا على وقتچ

مياس.. شنو هالحچي حياتي احنه خوات واكثر .. ديلا جاوبي بسرعه ليفصل الخط

طلعت من الغرفه مقهوره عليها حيل : والله خطيه متستاهل هالعذاب لا هي ولا شهم

نزلت للصاله استلمتني الحجيه بس شافتني

الحجيه.. وين چنتي خاتون

مياس.. ويا نهى بغرفتها

الحجيه.. مو وكت طگ الفچ ،، فوتي جهزي الاكل رجلچ على جيه

مياس.. صار

طبيت للمطبخ وگفت اجهز بالمواعين حسيت احد حضني من وره .. درت وجهي شفته مهيب

مياس.. ابتسمتله : الله يساعدك گلبي

مهيب.. ويساعدچ حياتي .. شلونچ ؟

مياس.. الحمد لله ،، يلا فوت غير ملابسك حتى نتغده

مهيب.. تعالي اتغده بيچ ،، وغمزلي

مياس.. ههههه حلووو حتى امك تذبحني خاف هي عايزه

مهيب.. ها اشتغلت المعارك

مياس.. والله مالي شغل بيها ،، هي ما اعرف ليش شاده ويايه و واگفتلي ع الكلمه

مهيب.. تحمليها الخاطري

مياس.. اكيد حبي بدون متوصيني ،، ديلا روح بدل

اجت سمر من الجامعه .. صبينه الغده اني ومنال دنتغده نزلت نهى تضحك

فرحت كلش من شفت مودها تغير .. گعدت بصفي شاورتها

مياس.. ها حبي شگلچ شهم حتى شرگتي حلگچ هيچ

نهى.. الو منه بس كافيه تعدل مزاجي هههه

مياس.. هههه الله يديمكم يا رب

نهى.. ويديمكم يعمري

كملنه الغده وهوسته .. رحت لغرفتي لگيت مهيب متمدد يگلب بجهازه ،،، نمت على ايده اعاين ويا

مياس.. شنو هذا حبي

مهيب.. فيس

مياس.. شيسوون بي

مهيب.. هيچ موقع للتواصل بين الناس سواء تعرفيهم او لا

مياس.. اريد منه حباب

مهيب.. ههههه شتسوين بي

مياس.. ضوجه اريد نت بجهازي وتفعلي كل البرامج مثل نهى وسمر

مهيب.. صار تتدللين بلليل من ارجع ذكريني افعلهن واعلمچ عليهن

مياس.. بسته من خده : شكرا حياتي

مهيب.. بعد وحده منا ... ويأشر على خده الثاني

مياس.. هههه تتدلل

مهيب.. اشر على شفته : ومنا بعد

مياس.. ههههه مهيب كافي

مهيب.. هههه ليش حياتي ؟؟

مياس.. گاعده من الصبح ونعسانه كلش

مهيب.. لعد بلليل

مياس.. ههههه تتدلل

مر شهر ثاني على زواجنه .. چانت الايام صعبه ويا الحجيه احسها واگفتلي ع الزله وتنتظر مني الخطأ حتى تلزمه عليه بس احاول شگد ما اگدر اماشيها وابتعد عن المشاكل وياها

فد يوم چانت الساعه بالعشره الصبح دگ جهازي سميحه استغربت كلش من اتصالها

مياس.. الو

سميحه.. ولچ مياس الحگيلي

مياس.. شكو شبيچ ؟!!

سميحه.. اختچ احترگت بالماي الحار واخاف اخابر ابوچ ساعديني عفيه

تحچي واسمع صوت مياده يمها مفرفحه من البچي .. سديت الخط البس واخابر بمهيب بس ميجاوب

مياس.. جاوب حباب جاوب بسررررررعه

خابرته قريب العشر مكالمات ما رد .. اخذت فلوس من الكنتور وطلعت من البيت حتى بدون ما اگول الاحد لان عقلي مو براسي چان

ركبت تكسي ... اول ما وصلت فتحتلي الباب سميحه

مياس.. شبيها مياده ؟؟؟!!

سميحه.. تبچي وتصيح : طبي شوفيها شحالها

دخلت لگيت ايدها مهلوطه و وجهه منتهي من البچي

راح گلبي من شفتها بهالحاله... شلتها ع السريع وطلعت وگفت تكسي

اخذتها اني وسميحه للمستشفى نضفوها الها والحمد لله عدت سلامات لان مچان الحرگ كلش قوي

صارت رجعتنه للبيت قريب الوحده ... راحت سميحه تسوي الغده واني نيمت مياده بالگوه لان تبچي من الألم سوده عليه

عاينت لمصطفى هم نام وياها لان تعب من گد ما بچه على اخته

طلعت من الغرفه رحت لسميحه چانت واگفه بالمطبخ

مياس.. شلون صار هالشي غير تنتبهين

سميحه.. چنت اسويلهم الريوگ خليت الماي الحار ع الصوبه بس رحت للمطبخ ثواني وسمعتها عاطت ما ادري شوداها اله

مياس.. يلا الحمد لله عدت سلامات ،، ديري بالچ عليهم بعد منا وجاي

سميحه.. رايحه اجيب معجون مخلصين .. ديري بالج عليها اخاف تگعد

مياس.. ماشي

اخذت فلوس وراحت للعطار .. اول ما طلعت تذكرت مهيب لازم ارجع اخابره واگوله بالصار

دا اطلع موبايلي من الجنطه اندگ الجرس .. صفنت معقوله سميحه نست شي ورجعت

رحت للباب فتحتها وجفلت بمكاني من شفت عماد گدامي .. دا اسد الباب بوجها حط رجله بالنص ودفعها عليه.....

يتبع..