رواية مياس قلب الشهم الفصل السابع والعشرون 27 - بقلم لبنى الموسوي

#مياس_قلب_الشهم

للكاتبه #لبنى_الموسوي

بارت مفاجئ لعيونكم بس هاي الوداعيه وارجع الكم ان شاء الله بعد فتره بسيطه بس لتنسون الوالده من دعواتكم الطيبه

__________________________

مرت ساعات صعبه واني انتظر روحي ترجعلي لان راحت ويا نهى

اعاين عليهم كلهم بقلق مثل حالتي واكثر

امها تسبح بلاستغفار ودموعها تجري
خواتها وحده لازمه ايد الثانيه ويبچن
يوسف واگف بالزاويه ومنطينه ظهره
مياس تروح وتجي بقلق وعيونها حمر دم
منال گاعده يم امي تصبر بيها

صافن عليهم وبداخلي صراع من الخوف والقلق فجأه انفتحت الباب وطلعت الدكتوره

شهم.. ركضت الها : ها دكتوره بشري

الدكتوره.. دنگت راسها : البقيه بحياتكم ان شاء الله

شهم.. شنو يعني !!!!!

ام يوسف.. يمه بنيتييييييييييييي
صخام الصخمني راحت بنيتي ولكم يا عاللللللللللللم

سهى.. لا عفيه دكتوره .. لتگولين اختي ماتت

الدكتوره.. البقيه بحياتكم مره الثانيه
والحمد لله على سلامة الصغيره تتربى بعز ابوها ان شاء الله

مياس.. هي گالت البقيه بحياتكم لو اني مدري شصار بيه ... اعاين على شهم مصدوم وصافن عليهم باستغراب تذكرت نفسي بموت مهيب صار ويايه نفس هالشي

انگلبت المستشفى بصياح امها وخواتها وبدل ما منال والحجيه يهدأوهم زادوا بالصياح وياهم

واگفه اعاين على شهم ودموعي تجري لان ادري بي هو اكثر واحد انكسر بروحتها .. نزيت من مكاني من عاط بالدكتوره بصوت عالي

شهم.. انتو هنا شنو شغلكككككككككككككم
مرتي طبت وياكم على رجلها تالي تطلعلي بالتابوت .. شلون يعني شلووووون

الدكتوره.. خويه اني بلغتك قبل العمليه
نهى چانت حالتها الصحيه تعبانه حيل وهل نتيجه متوقعه بنسبه چبيره

هذا الكلام اني بلغته الها من اول ما راجعتني وهاي البنيه الواگفه تشهد على كلامي ... واشرت عليه

شهم.. درت وجهي صفنت على مياس : شلون يعني ؟!!
بس اني سألت نهى وسألت مياس واجيت البيتچ سألتچ الچ هم .. محد بيكم گال غير كلشي تمام شو هسه الحچي انگلب

الدكتوره.. من اجيت بوقتها زوجي نصحني ما اگلك لان ان عرفت وان ما عرفت ماكو شي راح يتغير

الطفل چان كامل وبعد منگدر نسوي اي شي الها حتى ننقذها

هي مراجعه اكثر من دكتوره ومحد منهن قبلت تستلم حالتها والكل طلبوا منها تنزل الطفل بس هي الله يسلمها عاندت وفضلت الحمل على حياتها

شهم.. گمت ادگ على راسي : اخ يا ربي اخ
اخ ولكم گلبي خلص بعد ما بيه اتحمل اكثر

يوسف.. كافي شهم ارحم حالك شويه
امر ربك الحمد لله على كل حال

شهم.. ولك شرحم حالي !!
ولك چان هي فكرت ترحمني من هل عذاب قبل لا تسوي هالعمله السوده وتمشي وتعوفني

مياس.. اعاين علي تخبل فجأه .. گام يصيح بعلو صوته بنص المستشفى خله العالم تلتم علينه
يوسف يجر بي بس ماكو فاقد ميحس على نفسه

اخير شي وگع ع الكرسي ودنگ يبچي .. گعد يوسف يمه يصبر بي شويه وانهاروا سويه

ظلوا على الصياح والبچي قريب النص ساعه لحد ما انخبصت المستشفى باقاربهم

بالگوه اخوان نهى قنعوا النسوان ورجعوهن للبيت .. عاينت على شهم گام حتى يروح ويا الزلم علمود يستلمون جثة نهى

صفنت عليهم كلهم التهوا بالمصيبه ونسوا الطفله محد بيهم تذكرها .. ركضت ع السريع حتى الحگ بي

وصلت يمه مسحت دموعي اخاف يضعف اكثر بسببهن .. صحته حيل التفت عليه والانكسار واضح بعيونه الحمر

شهم.. نعم

مياس.. الطفله شنو نسيتها

شهم.. ما ادري

مياس.. شنو متدري لازم نستلمها منهم

شهم.. جهاد

جهاد.. نعم خالو

شهم.. ظل ويا مياس
استلم الطفله ورجعهم للبيت

جهاد.. اي صار

الكل راحوا بقينه بس اني وجهاد .. التفت عليه اشرلي ع الكرسي حتى اگعد وعافني وراح

شويه ورجع بيده الطفله .. ركضت علي اخذتها من ايده بس عاينتلها شبعت بچي

جهاد.. كافي مياس لتبچين مو زين ع الطفله

مياس.. رفعت راسي علي : جهاد معقوله نهى راحت وعافتنه .. والله مدا اصدگ

جهاد.. فرك عيونه : الله يرحمها برحمته الواسعه
يلا امشي ارجعكم للبيت حتى الحگ ع الدفنه

مياس.. شلون نرجع والطفله ؟!!

جهاد.. شبيها الطفله ؟؟

مياس.. اخاف تخترع من الصياح

جهاد.. محد بالبيت بس مرت خالي ايهاب الكل راحوا الاهل نهى

رجعت ويا بس طبيت للبيت تلگتني رنا تبچي بحرگه

رنا.. ولچ صدگ ماتتتتت

مياس.. دنگت ابچي : اي رنا اي

گامت تدگ وتلطم نست حتى جهالها المفرفحين يم رجلها .. الطفله بيدي فحطت من البچي احتاريت اسكتها لو اسكت رنا وجهالها لو امسح دموعي الملت عيوني بحيث ما اشوف گدامي بعد

مياس.. رنا فدوه كافي
عايني الجهال اخترعوا وهاي الطفله مدتسكت
ساعديني الله يخليچ ساعديني

رنا.. ركضت اخذتها من حضني : سوده عليه حبيبتي ... اكيد دتبچي لان جوعانه
ولچ مياس هسه  شنسوي ؟؟!
منين نجيبلها حليب والزلم كلها ملتهيه

مياس.. اطلع اشتريلها اني

رنا.. وين اكو صيدليه قريبه تفتح الصبح

مياس.. لعد شلون ؟؟

رنا.. هاچ الزميها وعينچ على جهالي شويه وارجعلچ

مياس.. وين رايحه

رنا.. ادبرلها حليب تموت اذا ظلت هيچ

خليتها بحضني وگعدت بالصاله .. اعاين عليها وابچي بخنگه لمن اتذكر نهى راحت وعافت بتها قبل لا تشتم ريحتها التحلم بيها طول العمر

ظليت على هالحاله قريب الساعه .. اجت رنا واخيرا
گمتلها ع السريع

مياس.. ها بشري لگيتي صيدليه

رنا.. اي بالگوه
هسه راح احللها الحليب وارجعلچ ما اتأخر

راحت للمطبخ واني ظليت افتر بيها حتى تسكت .. شويه ورجعت مسويتلها ممه بالگوه گدرنه نشربها لان بعدها متعرف تاخذها

رنا.. مياس لازم اروح لبيت اهل نهى .. تگدرين تخلين الطفله وجهالي يمچ منا لما ارجع

رنا.. اي عادي بس علميني ع الممه شلون اسويها وكل شگد انطيهيا

علمتني وراحت بسرعه .. بقيت طول اليوم محتاره بيهم كلهم يبچون واني منا مخنوگه ودموعي متنشف على نهى للمغرب يلا سمعت جهاد يصيح يا الله

گمزت خليت الحجاب على راسي وصحت : تفضل .. طبوا جهاد وايهاب شويه وشفت شهم دخل وراهم بس حالته چانت متنوصف

بعد ما استلموا اخوان نهى جثتها من المستشفى اخذناها للوادي حتى ندفنها

وگفنه يم المغيسل ننتظر النسوان يطلعن بس احس رجلي گوه شايلتني والغصه بصدري بكبر هوى الله الما اگدر اتنفسه بهاي اللحظات

شويه وطلعوها .. شلت التابوت على چتفي ويا اخوانها ونعادت عليه مأسات استشهاد مهيب بنفس الشعور وبذات الوجع

وصلنه للمقبره عاينت الگبر مهيب ونزلت دموعي : شلونك خويه ان شاء الله مرتاح
هاي بت خالتك سنه واجت يمك تأنس وحشتك

گعدت يم گبره ابچي بحرگه واحس حيلي كله راح بروحة اغلى ثنين بحياتي .. مرتي ووليدي

جهزوا گبرها .. لزمت بجهاد وگمت بالگوه
نزلتها بأيدي وظليت يمها احچي بصوت ناصي واني اعاتبها

شهم.. ها نهى هاي تاليتها انطاچ كلبچ ترحين وتعوفيني 

ليش ولچ مو انتي اكثر وحده تعرف بيه شگد متوجع من استشهاد مهيب لحد الأن

والعباس ابو فاضل بعده جرحي اخضر ليش رجعتي لچمتي بايدچ .. منو ظل الي بعد ما عفتوني ثنينكم

البارحه چنت منومچ بحضني واليوم انزلچ بايدي لحضن التراب .. شحصلتي من عنادچ غير كسرت گلبي ويتم بنتچ الما لحگتي تفرحين بيها

بهلاثناء سمعت يوسف يحچي ويايه بصوت مخنوگ

يوسف.. گول يا الله حبيبي .. ادعيلها افضل الكلام والبچي ميرجع الميت

مدلي ايده لزمت بيها وطلعت من الگبر .. نزل الدفان حط خدها ع التراب وبده يلقنها

شهم.. اعاين عليها ودموعي تجري : خلص راح اودعچ للأبد يا عشرة عمري وبنيت گلبي
لهل درجه هنت عليچ وعفتيني بنص الطريق ..

بس فهميني شلون راح اگدر اكمل حياتي الصعبه بدون شوفة عيونچ الحلوه التخفف عني كل تعب

خلصت الدفنه ظليت يمها قريب النص ساعه اقرالها قرأن لما حسيت على يوسف ديگومني

يوسف.. گوم خويه لازم ننصب الچادر ما ظل وقت

گمت ويا بلا ما احچي شي .. نصبنه الفاتحه ووگفت بيها على اعصابي للمغرب يلا فضت الهوسه

يوسف.. تعال ويايه لبيتنه احسن ما تظل وحدك

شهم.. لا خويه لا .. گلبي خلصان مو حمل النسوان وبچيهن

يوسف.. على راحتك بس شتحتاج اني موجود

ايهاب.. واحنه وين رحنه يمعود

يوسف.. والنعم منكم متقصرون

سلم يوسف وراح .. رجعت ويا جهاد وايهاب الطريق كله لازم راسي احسه يريد ينفجر من كلشي صار

اول ما دخلت للبيت صارت مياس بوجهي خاله الطفله بحضنها .. تقربت منهن شلتها اعاين على شكلها تشبه نهى كلش

مياس.. البقيه بحياتك

هزيتلها راسي .. ردت اصعد فوگ ما گدرت فجأه دخت
تمددت بسرعه ع القنفات اجاني جهاد يركض

جهاد.. خالي شبيك

شهم.. دايخ كلش

ايهاب.. مياس جيبي جهاز الضغط بسرعه خلي اقيسله

مياس.. صعدت الغرفته وگلبي رايح من الخوف علي .. فتحت الباب صارت صورة نهى گدامي ع الميز نزلت دموعي ونسيت كلشي

اعاين عليها واتذكر البارحه هيچ وقت چانت يمي دنسوي عشه سوه .. صحيت على نفسي لمن تذكرت شهم متخربط

اخذت الجهاز ونزلت اركض .. انطيته لايهاب يقيسله وبقيت صافنه بوجها شلون القهر ماخذ كل حيله والتعب مبين على ملامحه الذابله

ايهاب.. شهم گوم ع السريع خلي اخذك للمستشفى

مياس.. ليش شبي !!!

ايهاب.. ضغطه مفول صاعد للـ ٢٠

جهاد.. صدگ تحچي ؟!!
خالي گوم بسرعه ليصيرلك شي

شهم.. كلشي ميصيرلي بس جيبولي حباية ضغط هسه ينزل

جهاد.. مو وكت عنادك لخاطر الله

مياس.. شهم عفيه گوم

شهم.. اترجاكم لتلحون .. ما بيه اتحرك خطوه منا
ما بيه والله ما بيه

ايهاب.. ماشي على راحتك
بس راح انطيك العلاج ساعه وارجع اقيسه اذا ما نزل ساعتها اخذك للمستشفى غصبا عنك

شهم.. ان شاء الله

ايهاب.. جهاد روح لغرفة امي جيبله حباية ضغط
وانتي مياس سويله نومي بصره ينزل ضغطه

رحت للمطبخ وگفت بالنص افتر على روحي ما ادري شسوي : يا ربي احفظه البنته لان مالها غيره بعد ما راحت امها وعافتها

خليت القوري ع النار ورجعت للصاله .. شفته متمدد وايده على راسه
تقربت منه اعاين علي شكله يخوف من گد ما صاير احمر دم

رفعت وجهي بوجه جهاد خايفه من منظره اشرلي براسه حتى يطمني .. سمعت الطفله گامت تبچي ردت اروحلها شالها ايهاب

مياس.. انطينياها عنك

ايهاب.. لا عوفيها
روحي شوفي الحامض صار حتى ننطي الشهم

مياس.. لا بعده هستوني خليته ع النار

ايهاب.. شو هاي مدتسكت

عاينت الشهم گام يفرك براسه من صوت بچيها .. اخذتها من ايهاب ع السريع اهز بيها حتى تسكت

جهاد.. اخاف جوعانه

مياس.. لا هستوني انطيتها حليب
بس هو طفل النفاس هيچ يظل فتره طويله بي لجه مال بچي

شهم.. احد منكم يسكتها راسي راح ينفجررررررر

ايهاب.. لتصيح خويه مو زين عليك
جهاد اخذ الطفله لغرفتك بين ما تجيك مياس

جهاد.. صار خالو

اخذها مني وراح لغرفته .. ركضت للمطبخ انتظرت ربع ساعه لحد ما صبيتله الحامض ورجعت انطيهيا حتى اروح للطفله

مياس.. شهم گوم اشرب هذا

شهم.. ما اريد

ايهاب.. گوم يمعود لتشلع گلبي

مياس.. هاك ابو مجتبي الزم مني لازم اروح للصغيره
بس عفيه اجبره يشربه لان مبين من وجها ضغطه بعده عالي

ايهاب.. اي ناوشينيا

انطيته اله ورحت الغرفة جهاد دگيت الباب ودخلت بسرعه لان سمعتها تبچي

جهاد.. هاي ليش مدتسكت اذكر جهال خالي ايهاب ما چانوا هيچ بهل عمر
معقوله تحس بامها ماتت ؟؟

دمعت عيوني من كلامه .. اخذتها منه وظليت يمه اهز بيها بلكت تسكت حتى اگدر اطلع للصاله

مياس.. جهاد هاك الزمها اروح اجيبلها حفاضه اخاف تحتاج تبديل

جهاد.. اي والله صدگ
يلا روحي ع السريع لتتأخرين

خليتها بحضنه ورحت فوگ .. نزلت السله مالت غراضها لان احتاجهن يمي

طبيت للغرفه اخذتها منه ردت ابدللها عاينت علي افتهم
طلع بسرعه وسد الباب ورى

غيرتلها وظليت اهز بيها لحد ما نامت .. نزلتها ع كيف وطلعت اشوف شهم

عاينت علي متمدد نفس وضعه .. تقربت من ايهاب حاچيته ع كيف

مياس.. ها شفت ضغطه ؟؟

ايهاب.. اي بعده صاعد .. بس مدا اگدر علي معاند ميقبل اخذه للمستشفى

مياس.. وهسه شنسوي

ايهاب.. ما ادري والله
اگول وين جهالي

مياس.. بغرفتهم ديلعبون بالگوه سكتتهم يردون رنا

ايهاب.. رايح اشوفهم خليچ يم شهم

مياس.. ان شاء الله

ظليت اكثر من ساعه گاعده يم جهاد ونعاين علي بخوف لحد ما صدمنه من گام فجأه

جهاد.. وين خالي

شهم.. لغرفتي تعال ساعدني ما اگدر امشي

جهاد.. ظل هنا ماكو احد بالبيت
او اذا تريد تعال تمدد بغرفتي

شهم.. لا اصعد احسن

مياس.. مو شلون
هنا على الاقل عينه عليك ...
هز براسه وراح بلا ميجاوبني

صعد لغرفته وعيني ظلت علي خايفه لا يصيرله شي من القهر .. شويه ونزل جهاد

مياس.. ليش نزلت ؟؟

جهاد.. يريد يظل وحده

مياس.. ميصير تعوفه جهاد

جهاد.. شسويله يا مياس
متعرفين بي من يعاند خليني ساكت احسن

مياس.. هسه شراح نسوي

جهاد.. انتي اخذي راحتچ
راح اظل بالصاله انتظر شويه وارجع اصعدله

رفعت راسي شفت ايهاب طلع من غرفة الجهال صحته ع السريع

مياس.. ابو مجتبي

ايهاب.. ها مياس

مياس.. شهم صعد الغرفته وما خله جهاد يظل يمه
شنسوي الله يخليك شوفلك حل

ايهاب.. اتركي محتاج يظل وحده حتى يفرغ گلبه
نص ساعه واخذيله گلاص حامض ثاني بلكت ينزل ضغطه

مياس.. اي ميخالف

گعدت بالصاله اعاين لغرفته من بعيد واكل بظافيري .. وعيت على صوت جهاد يحاچيني

جهاد.. بطلي هاي العاده مو زين

مياس.. ها شنو

جهاد.. اظافيرچ

مياس.. شبيهن ؟!!

جهاد.. لتاكليهن مو صحيح هالشي

مياس.. اي ادري
اگول ابو مجتبي محد راح يجي من النسوان

ايهاب.. لا يظلون طول الفاتحه هناك

مياس.. وجهالك شلون

ايهاب.. صعبه عليچ تخليهم يمچ

مياس.. لا مو قصة صعبه بس حيل متعلقين بأمهم بحيث بالگوه سكتتهم اليوم

ايهاب.. يلا لعد باچر اوديهم لبيت جدهم هناك يلتهون ويا جهال خوالهم وينسون السالفه

مياس.. على راحتك
جهاد اگدر اروح الغرفتك اشوف الطفله

جهاد.. اي طبعا

گمت من يمه .. فتحت الباب شفتها نايمه : صدقه لهل وجه البريئ حسبالك ملاك ونايم

سديت الباب على كيف حتى لتگعد ورجعت للصاله .. ظليت انتظر تصير نص ساعه على اعصابي بس اريد اصعد واطمأن علي

جهاد.. گومي وديله الحامض وشوفي شلونه

ما صدگت جهاد گلي هيچ .. ركضت للمطبخ صبيتله بالگلاص وصعدت ع السريع

دگيت الباب اكثر من مره ما جاوب .. خفت علي كلش فتحتها بسرعه وچان اتخبل من......

يتبع..