رواية مياس قلب الشهم الفصل السابع والثلاثون 37 - بقلم لبنى الموسوي

#مياس_قلب_الشهم

للكاتبه #لبنى_الموسوي

گامت سمر من يمنه ع السريع .. رحت گعدت يم منال لان هي الوحيده الراح تحل الموضوع

مياس.. منال

منال.. ها

مياس.. سمر محتاجتچ لازم تروحيلها

منال.. ليش يعني لان يوسف خطب ؟!!

مياس.. فتحت عيوني : انتي تعرفين

منال.. طبعا
وتستاهل هي الضيعته من ايدها

مياس.. لتقسين گلبچ
ترى والله متستاهل كل هذا بلأخص منچ انتي

منال.. شسوي يا مياس
وروح اخويه الصار والبعده ديصير مو سهل عليه بس شبيدي اذا هي اختارت هالشي

مياس.. لا ما اختارت انجبرت منال انجبرت
دگومي روحي فرحيها بطبتچ عليها وبعدين نكمل الحچي

منال.. امري لله

راحت تشوفها واني ظليت اسمع كلامهم ديحچون عن خطوبة يوسف من تبارك
ثواني وسمعنه منال عاطت : يبووووووووو

طفروا شهم وايهاب وجهاد ع السريع .. شمرت نونه بالگاع وركضت وراهم
دخلت للغرفه وچان اشوف سمر واگعه بالگاع والدم يطفر من ايدها لأن گاطعه الوريد

جهاد.. لا يااااااا الله
ولچ هاي شسويتيييييييي

منال.. ولك خويه الحگلي
بنيتي حبيبتي راح تروح منييييي

شهم.. شلتها ع السريع : جهاد اركض افتحلي الباب
ايهاب المفتاااااااااااااح

ايهاب.. اي خويه اي

ركضت بيها للسياره ماكو ثواني غرگت الدنيا بدمها .. فتحلي الباب جهاد صعدتها وصعدت منال وياها

شهم.. ايهاب ظل هنا بس جهاد يجي ويانه

ايهاب.. ماشي خويه بس عليك الله طمني اول متوصلون

شغل شهم السياره وفتحله ايهاب الباب .. بس طلعوا ركضت للبيت اخذت نونه ورحت الغرفتي

خليتها بسريرها وظليت الوب .. اروح واجي بتوتر حايره شسوي من جهه خايفه على سمر ومن جهه ثانيه مسطوره من المصيبه الصارت قبل شويه

مياس.. ااااخ يا سمر
شلون تسوين بروحچ هيچ .. اني مو حچيت وياچ وگتلچ تحملي شويه فتره وينتهي كلشي

بس والله حقها منا الضغط النفسي الدتعيش بي بسبب اهلها
ومنا عرفت يوسف يريد يخطب تبارك

عززززززززه تبارك شلون .. يبووو بس لا يزوجها ابوها اليوسف لان شهم گال علاقتهم زينه ببعض

هسه اني شسوي الطم على راسي
شلون اذا صار شي السمر ؟؟
نزلت دموعي بسرعه : لا اسم الله عليها دخيلك ربي كلشي ولا مصيبه جديده لأن گلبنه خلص

زين اذا يوسف سواها وخطب تبارك شتسوي سمر
وتبارك المسكينه شراح يصير بيها ساعتها صخام الصخمني

احسن شي اخابر يوسف بلكت الله من يعرف منتحره ينكسر خاطره عليها ويتراجع عن قراره

ركضت ادور على مبايلي
من گد ما مسطوره حتى متيهه وين مخليته
ظليت افتر على نفسي لحد ما لمحته ع الچربايه بس دايخه مچنت اشوفه

شلته ع السريع .. طلعت الرقم وايدي ترجف
ما فكرت شلون ابدي ويا وشراح اگله بس عندي المهم يعرف وخلص

خابرته قريب متخلص المكالمه رفضني .. ظليت اباوع للشاشه منتظره اتصاله شو هذا ما اتصل معقوله عرف رقمي وحسباله سمر ؟!!

رجعت خابرته مرتين بالمره الثالثه يلا رد

يوسف.. الو نعم

مياس.. يوسف

يوسف.. اي
تفضلي منو حضرتچ ؟؟

مياس.. اني مياس

يوسف.. ها مياس خير ان شاء الله
خو ماكو شي

مياس.. يوسف سمر انتحرت

يوسف.. شنوووووو
شدتحچين مياس ؟!!!!

مياس.. اي والله

يوسف.. شوكت
شلون
خو ما صارلها شي
جاوبي يمعووووده

مياس.. دانطيني فرصه احچي

يوسف.. احچي بسرررعه

مياس.. قبل شويه گطعت وريدها واخذها شهم وجهاد للمستشفى ومنال راحت وياهم

يوسف.. يلا راح اسد الخط اروحلهم

مياس.. لحظه يوسف لحظه

يوسف.. ها ها

مياس.. لتگول الاحد اني گتلك عفيه

يوسف.. اي ميخالف

سد الخط مني .. شلت نونه ع السريع وطلعت للصاله لگيت الحجيه تدگ وتطلم وايهاب يهدي بيها بهلاثناء دگ موبايلها

الحجيه.. مياس جيبي موبايلي بسرعه اخاف هم اتصلوا

مياس.. اي خاله

ركضت دا اجيب الموبايل تفاجأت بيوسف يتصل !! انطيتهيا واني خايفه ليعرفون گتله وشيخلصني بعد

الحجيه.. ها خاله
شبيه يعني ولك سمر تسودنت وموتت نفسها
ما ادري والله ما ادري هاك ايهاب احچي ويا

ايهاب.. ها يوسف
اي صح حاولت تنتحر
خابر شهم اذا تريد بس اكيد تلگاهم بالطوارئ
ان شاء الله عود طمنه اذا رحتلهم
الله وياك

خليت ايدي على گلبي براحه : الحمد لله من اتصل بيهم حتى يضيع السالفه
هيچ صار يعرف منهم مو مني .. الف رحمه على والديك يوسف طلعت مو قليل

ظليت گاعده وياهم لا ساعه ولا ساعتين وماكو اي خبر منهم

تنحست نونه فگمت انومها حتى يمر الوقت بلكت يجون او يخابرونه على الاقل حتى نطمأن عليها

هستوني نومتها بسريرها دا اطلع من الغرفه سمعت جهازي يدگ رسائل .. ركضت اسوي صامت لتگعد وشينومها بعد

باوعت للجهاز تبارك مراسلتني ع الوتساب كالعاده

حرت بيني وبين نفسي اگلها لو لا ؟!!
اخير شي قررت احچي ... لازم تعرف قبل لا يوصل الخبر الابوها بلكت تگدر تتصرف

ردت اراسلها بعدين غيرت رأيي : اكيد المكالمه احسن
خابرتها رفضتني شويه ورجعت اتصلت على البرنامج

تبارك.. الو

مياس.. هلو حبي شلونچ

تبارك.. هلا ميوسه
اسفه رفضتچ بس چنت گاعده يم اهلي وهسه دخلت الغرفتي حتى ناخذ راحتنه بالحچي

مياس.. اي زين سويتي

تبارك.. وينچ طول اليوم مختفيه چنت ناويه اراسلچ قبل لا انام

مياس..اسكتي ولچ البارحه الليل كله نركض اني وشهم بالمستشفيات

تبارك.. ياااااا
شكو يا ستار

مياس.. نونه نشمرت
بس لتخافين صارت زينه الحمد لله

تبارك.. سوده عليه حبيبتي
الله عليچ خو ما بيها شي

مياس.. لا اسم الله يمعوده
اگول تبارك

تبارك.. گولي

مياس..اكو شي صاير وياچ بالجديد

تبارك.. اي

مياس.. تفاجأت من ردها : وشنو هو ؟؟

تبارك.. غير شفت جهاد قبل كم يوم بس ما گتلچ ههههه

مياس.. عابتلچ
واني صدگت عبالي صدگ شي مهم

تبارك.. يااا
ليش اني عند شي اهم من جهاد

مياس.. وين شفتي ؟؟

تبارك.. بالكليه
ما ادري شچان يسوي بس اتصور جاي علمود سمر

مياس.. اي وصلت الفكره

تبارك.. يا فكره ؟؟

مياس.. مو مهم
تبارك اريد اگلچ شي

تبارك.. خير يا طير

مياس.. اليوم افتهمت من شهم يوسف يريد يخطبچ

تبارك.. شنو عيني شنوووو
شنو يوسف ؟
شنو يخطبني ؟
شدتحچين مياس ؟!!!

مياس.. اي تبارك وهذا الحچي گاله گدام الكل حتى جهاد

تبارك.. عزه العزاني اذا صدگ
ولچ شلون بيه بس يتقدملي ابويه يوافق لان يموت علي

مياس.. هو ليش گتلچ حتى نتصرف قبل لا توصل السالفه الابوچ

تبارك.. اختنگ صوتها فجأه : بعد ما اگدر احچي راح اسد الخط

مياس.. لا تبارك
ما لحگت اكمل كلامي من سدت الخط بوجهي

رجعت اتصلت اكثر من مره ما جاوبت اخير شي فصل النت من جهازها .. خابرتها ع الخط هم ما ردت

گمت اغلي من القهر والتوتر منا افكر بيها منا بسمر الما اعرف شلون حالها هسه

عاينت الساعه راح تصير ال١٢ وماكو اي خبر منهم .. اخذت موبايلي وخابرت شهم اربع مكالمات يلا رد عليه

اخذتها للمستشفى .. بس وصلنه ركضت اشيلها شفت السياره غرگانه بالدم
اول ما دخلنه ركضوا جابوا السديه واخذوها مني

دخلوها للطوارئ وراحت منال وياهم .. دخت كلش كمشت بالحايط وتچيت ظهري علي احاول استوعب الصار والي بعد راح يصير بهذا البيت

دگ جهازي تفاجأت بيوسف يتصل : اكيد عرف ما طول خابرني بمثل هالوقت المتأخر

شهم.. ها يوسف

يوسف.. بيا مستشفى انتو شهم ؟؟

شهم.. بالطوارئ مالت ××××

يوسف.. جايك ما اتأخر

سديت الخط وگعدت ع الكرسي .. دنگت راسي على ملابسي ما بيهن شبر نظيف من الدم مالت سمر

حسيت على جهاد گعد يمي نسيته ويانه تقريباً .. رفعت وجهي لگيته مدنگ ولازم راسه بيده
لزمته من چتفه عصرته حيل

شهم.. خليك قوي

جهاد.. خالي شلون سوت بنفسها هالشكل الغبيه ؟!!

شلون ينطيها گلبها تموت روحها بس اريد اعرف
ما فكرت شراح تگول الرب العالمين اذا ماتت وهي منتحره ،؟؟

زين ما فكرت بأمي شيصير بيها
اني
انتو

يعني لو تغلط ونسامحها بنفس الوقت لو تردلنه العقاب بعقاب اقسى وتنتحر ؟!!!

شهم.. الشغله مو شغلة زعل ومسامحه جهاد
الشغله اكبر من هالشي اكيد

جهاد.. شلون يعني خالي

شهم.. حالياً ما اعرف
بس اكيد راح اعرف كلشي من تگوم بالسلامه ان شاء الله

جهاد.. ان شاء الله يا رب
اذا صارلها شي امي تتخبل والله

شهم.. لتحچي هالحچي
كلشي ميصيرلها خليك متفائل شويه

يوسف.. ها شهم شمسويه بروحها هالثوله

شهم.. گاطعه وريدها

يوسف.. من كل عقلها هاي ؟!!!

انفتحت الباب وطلعت الممرض .. گام جهاد قبلنه يركض

- المريضه محتاجه دم باقصى سرعه

جهاد.. اني انطيها .. دمي ودمها متطابق

شهم.. انت تعبان وعندك هبوط وينك وين التبرع

جهاد.. لا خالو كلشي ما بيه

يوسف.. اخويه اني -O اگدر اتبرعلها لان فصليتي الواهب العام وسليم من الامراض الساريه

- تعال ويايه للدكتور ع السريع

دخل يوسف وتأخر بالطلعه عرفته راح يتبرعلها .. قريب الساعه يلا رجع باوعتله من بعيد دايخ گوه يمشي ركضت لزمته

شهم.. شنو هذا حالك ؟!!!
شگد اخذوا منك دم

يوسف.. بطلين

شهم.. طبعا
انت شايف شگد نزفت .. هاك عاين الهدومي وراح تعرف هاي من غير سيارتي والبيت

يوسف.. ادري
اصلا اني اندليتكم من اثر الدم المالي المستشفى

جهاد.. راح اجيبلك عصير واجي

يوسف.. لا ما اريد

شهم.. معليك بي روح جيبله وتعال ع السريع

ظلينه گاعدين بالساعه تقريباً لحد ما طلعت منال منتهيه من البچي .. خفت من شكلها كلش تلگيتها بسرعه

شهم.. ها خويه خو ماكو شي

منال.. لا نقذوها على اخر لحظه

شهم.. الف الحمد لله والشكر
لعد شنو هذا حالچ .. گولي يا الله خيتي

بس گتلها هيچ شهگت بحرگه .. بست راسها واني امسح بدموعها الحاره

شهم.. لتبچين خويه
هاي سمر وگامت بالسلامه احمدي ربچ وشكري بدل هالدموع المالهن داعي

منال.. الف الحمد لله والشكر
يوسف شلون صرت

باوعتله مدنگ مو ويانه لدرجة ما سمع منال من سألته .. صحته مرتين ما رد اخير شي هزيته من چتفه حتى يحس

يوسف.. ها شهم

شهم.. شبيك يوسف ؟؟
تعبت لان تبرعت دم

يوسف.. لا لا

شهم.. لعد شبيك دايخ ومدا تركز

يوسف.. ما بيه شي
هسه شلونها ؟؟ صارت زينه

منال.. اي الحمد لله بس للصبح يلا يطلعوها منا

يوسف.. اي عادي المهم تگوم بالسلامه

جهاد.. هاك يوسف اشرب
دار وجها على منال : ها يوم بشري شلونها سمر

منال.. لتخاف وليدي راح الشر ان شاء الله

جهاد.. الحمد لله والشكر
شوكت يطلعوها ؟؟

منال.. الصبح

جهاد.. تعالي اگعدي ارتاحي هنا ليش واگفه

شهم.. جهاد روح ويا يوسف وصله للبيت لان تعبان

يوسف.. لا ما اروح

شهم.. شعندك گاعد هنا ؟؟ هاي سمر وگامت بالسلامه كلها كم ساعه ونطلع من المستشفى
گوم روح للبيت ارتاحلك شويه حتى يتحسن وضعك

يوسف.. من كل عقلك اعوفكم واروح
هه اسكت بابا اسكت

شهم.. يوسف ليش تعاند
كلشي ما عدنه مجرد انتظار علمود تستقر حالتها ونگدر نطلعها

يوسف.. لتعب نفسك شهم
ما اروح يعني ما اروح

شهم.. على راحتك انت جايب التعب النفسك على شنو اضوج روحي وياك

قريب ال١٢ رحت ويا جهاد للمغاسل .. دخلت غسلت شويه لان لعبت نفسي من الدم وريحته

اسمع جهازي يدگ بس ما اگدر اجاوب بالمكالمه الرابعه يلا طلعت من المغاسل .. اخذت موبايلي من جيبي شفت مياس دتتصل

شهم.. الو

مياس.. ها شهم وين صرتوا والله گلبنه خلص

شهم.. هسه چنت اريد اتصل بيكم
من الهوسه نسينه نخابركم .. طمنيهم ماكو شي ليظل بالهم

مياس.. يعني شنو صارت زينه

شهم.. اي الحمد لله

مياس.. الف الحمد لله
منو يمكم ؟؟

شهم.. يوسف اجانه

مياس.. وبعده موجود

شهم.. اي
يلا تردين شي قبل لا اروح

مياس.. شوكت تجون

شهم.. الصبح

مياس.. ماشي الله وياك

ظلينه ننتظر للصبح .. تكسفت احوالي حتى ما گدرت اصلي واني غرگان بالدم

للتسعه اجه الدكتور كتبلها خروج .. دخلت منال ويا الممرضه شويه وطلعت هي وسمر ركض جهاد باتجاهم

جهاد.. هاي شسويتي سمر

منال.. عوفها يمه مو وكتها

جهاد.. سمر حاچيني ليش سويتي هالشكل

اباوع عليها مدنگه ومجاوبت بحرف واحد
جريت جهاد من گدامها اشرلته براسي حتى يسكت والحمد لله سمع مني

شهم.. لزمي بيه خالو خلي اوصلچ للسياره

يوسف.. اذا دايخه ومتگدر تمشي نجيبلها كرسي متحرك

شهم.. بيچ تمشين لو لا ؟؟

هزت براسها اي بدون متحچي .. سندتها بس بالگوه وصلتها للكراج لان دايخه وتمشي بطيء

شهم.. جاي بسيارتك يوسف

يوسف.. اي

شهم.. لعد الحگنه للبيت

يوسف.. لا ارجع البيتنه

شهم.. لك هي ابن ال ..... حلال
الليل كله اتوسل بيك روح وما روح وانت ظليت معاند وقافل ع الموضوع
هسه لمن اگلك تعال ويانه تگول اروح لبيتنه

ماكو روحه يلا امشي گدامي اشووو

يوسف.. شهم

شهم.. اششش والله ازعل عليك

يوسف.. ماشي يلا روح لتخليهم ينتظروك

شهم.. دروح گدامي خلي اشوف

يوسف.. رايح

شهم.. جهاااد

جهاد.. ها خالي

شهم.. انزل سوق بمكان يوسف

يوسف.. شنو السالفه

شهم.. يلا لتعطلونه بسرعه

جهاد.. انطيني السويچ يوسف

يوسف.. تفضل

طلعوا گدامنه تحركوا يلا شغلت السياره .. الطريق كله اعاين السمر شلون منتهيه حتى بشرتها رايح لونها من التعب

منال.. زين سويت خليت جهاد يروح ويا يوسف
تبرع بطلين دم زين منه ظل واگف على رجله

شهم.. اي خطيه تعب بوقتها بس الصبح تحسن شويه

وصلنه للبيت استقبلونه كلهم .. عيوني تدور على مياس ماكو
عفتهم ورحت لغرفتها دگيت الباب ما ردت
فتحتها وتفاجأت من شفتها گاعده تلعب ويا اخوانها

بعد ما خابرت شهم ظليت گاعده ما اجاني نوم من التفكير

راسلت تبارك ماكو
خابرتها مغلق
ظل بالي يمها كلش لدرجة تندمت حچيتلها بالصار لان خفت لتسوي بروحها شي مثل سمر عاد هاي طباگات البنات كلشي يطلع منهن

ل٣ الفجر نمت على روحي .. حسيت ويا الاذان نونه گعدت تبچي جوعانه
سويتلها ممه ورجعت نومتها

صليت وظليت گاعده ما گدرت ارجع انام .. بالسبعه ونص دگ جهازي ابويه ديتصل
تذكرت اخواني يريد يخليهم يمي اليوم

لبست حجابي وطلعت ع السريع .. سلم عليه وانطانياهم من الباب وراح

اول ما دخلت صارت الحجيه گدامي .. بس شافتهم گلبت وجها بلا متحچي شي

اخذتهم الغرفتي وظليت گاعده يمهم حتى ما طلعت تريگت علمود ليضوجون من وجودهم وياهم

مياس.. طلعت نساتل شهم الجابهن الي واكلناهن حتى نسد جوعانه : والله اجه وكتهن الحمد لله من ضميتهن هنا

مصطفى.. شنو هن ؟؟

مياس.. ههههه هذني ... وهزيتله بالنستله

مصطفى.. منو يجيبلچ

مياس.. عمو

مصطفى.. هذا النام يمنه

مياس.. هههه اي

مصطفى.. خلي يجيبلي وياچ

مياس.. مو تتدلل بس يجي اگله يجيبلك

شويه وگعدت نونه .. ظلوا يلعبون وياها بالساعه لحد ما رجعت تنام

حسيت عليهم ضاجوا .. اضطريت اگوم العب وياهم حتى ليملون
ما سمعت الباب اندگ لو لا على ساعه تفاجأت بشهم واگف گبالي

دخلت بنص هدومي من الخجل لأن چنه نلعب ركيضان اركض ويلزموني
عاينتله ابتسم خجلني بالزايد دنگت راسي

تقرب سلم عليهم وراح يبوس نونه بهدوء حتى ليگعدها .. رفعت راسي اعاين علي شصاير بي خو هدومه مينشافن من الدم

مياس.. شهم
رفع راسه من سرير نونه : تريد تغسل ؟؟

شهم.. اي

مياس.. لعد ظل يمهم اروح اجهزلك الحمام واجي

شهم.. ماكو داعي اني اجهزه

مياس.. لا انت تعبان
بعدين هو شيرادله الحمام .. دقيقه وكلشي يصير جاهز

لبست حجابي وطلعت للصاله .. لگيت الكل هناك بس سمر ماكو
سلمت على يوسف وحاچيت منال اطمأن عن سمر

مياس.. ها منال شلون صارت سمر ؟؟

منال.. الحمد لله
دخلت الغرفتها تنام

مياس.. يا عود ردت اشوفها
يلا من تگعد

صعدت فوگ جهزت الحمام وطلعت .. وصلت يم غرفة شهم صفنت ويا روحي

مياس..ادخل احضرله ملابس لو لا ؟؟
اوي شكو بيها خلي اجهزله كلشي فد نوب حتى بوجها يدخل يغسل

فتحت الباب ودخلت
طلعلته الملابس بس تأخرت شويه لأن ما اعرف منال شلون مرتبه كنتوره

رحت علگتهن بالحمام واخذتلي صفنه عليهن اخاف اكو نقص .. شويه وتذكرت المنشفه ناسيتها رجعت للغرفه ع السريع ويا ريتني ما دخلت

چان شهم موجود بيها والمصيبه نازع حتى الفانيله الداخليه ظال بس بالبنطرون

اول ما فتحت الباب دار وجها عليه .. شهگت حيل من الصدمه
گبل سحب قميصه دار يلبس بي وهو يگول

شهم.. شجاچ يمعوده غير تدگين الباب

مياس.. اسفه والله ما ادري بيك هنا
اجيت اخذلك المنشفه للحمام
صفنت ثواني : يااا شهم شلون صعدت الجهال وين خليتهم ؟؟

شهم.. يم منال ليظل بالچ
هسه شنو يعني اروح اغسل الملابس جاهزه ؟
ترى لعبت نفسي من ريحة الدم البيه

مياس.. اي بس اخذ المنشفه نسيته

شهم.. ماشي
عاشت ايدچ

مياس.. تتدلل

طلعت وسديت الباب .. احس روحي صخنت من الموقف الصار
ما اعرف شنو هالحظ العندي دائماً يوگعني بمواقف غبيه

نزلت جوه شفت نونه بحضن يوسف ديلعبها
باوعت الاخواني گاعدين يم منال

اخذتهم ورحت للمطبخ سويتلهم ريوگ خطيه من الصبح ع النساتل باقين

ظليت گاعده بالصاله بس بالي مو يمهم
براسي چانت الف فكره وفكره...
شي افكر بتبارك
شي بسمر ويوسف
شي بوضعي ويا شهم والرساله الشفتها بجهازه

حسيت على صوت شهم ديحجي ويا يوسف ما اعرف شوكت نزل لان صافنه عنهم .. شويه وگال المنال

شهم.. خويه ملابسي بالحمام الفوگ غسليهن زين لان كلهن دم

منال.. گول المرتك اني شعليه

شهم.. شبيچ منال !!

منال.. شنو شبيه ؟!!
غير انت متزوج وهاي مرتك گاعده گبالك ليش اني اغسل ملابسك يعني

شهم.. صدگ تحچين !!!

منال.. اي والله

مياس.. ماكو مشكله اني اغسلهن

سكت ما جاوب شي بس حسيته ضاج كلش من تصرف منال

گمت للمطبخ واخذت اخواني ويايه حتى اسوي الغده
بعدني ممشغله الطباخ دخل عليه شهم

شهم.. شدتسوين

مياس.. غده

شهم.. لتعبين نفسچ وصيت كباب ومعلاگ من بره علمود يوسف وسمر

مياس.. اوك

شهم.. اخوانچ ليش مبهذلتهم هالشكل
وين مترحين ساحلتهم وراچ

مياس.. مو يستغربون بدوني

شهم.. انطيهم العاب من مالت نهاوي حتى يلتهون بيهن وينسوچ

مياس.. ان شاء الله

اخذتهم ورحت للغرفه .. طلعتلهم العاب نونه صدگ كيفوا عليهن وما تحركوا من مكانهم بعد

خليتهم يلعبون وطلعت للصاله .. گعدت يمهم اسمع الحچي
شي جر شي لحد ما فتحت الحجيه موضوع خطوبة يوسف

الحجيه.. اي يوسف ليش ضام على خالتك موضوع الخطوبه

يوسف.. يا خطوبه !!

الحجيه.. خطوبتك غير
مو تريد تخطب تبارك لو اني متوهمه

يوسف.. ليش منو گلكم ؟؟
دار وجها على شهم : انت ولك

شهم.. هههه اي يمعود وعساني لا حچيت

الحجيه.. ليش عيني بس لا ناوي تخلينه اخر من يعلم

يوسف.. لا خاله السالفه وما بيها مو وكتها هسه
هيچ مجرد حچي صار بيني وبين شهم بس اويلي منه ما گدر إلا ما يحچيلكم

الحجيه.. ليش مو وكتها

يوسف.. شنو ليش خاله
نهى مصارلها سنه من ماتت تريدني اخطب !!

الحجيه.. اي حتى تحجز البنيه لان حلوه وما مضمون تظل الك منا لهذاك الوكت
اخطبها هسه وعود اجل زواجك بعد السنه

شهم.. حچي امي صح يوسف
افتح الموضوع ويا ابوها حتى يصير عنده علم ع الاقل

منال.. ترى الزواج قسمه ونصيب
يعني لو هي نصيبه تصير اله حتى لو بعد عشر سنين فمالها داعي هالسوالف

يوسف.. الله كريم سدوا الموضوع هسه

اختنگت كلش من حچيهم : كارثه اذا يوسف حچه ويا ابو تبارك لأن راح يخرب كلشي ساعتها

گمت من يمهم الغرفتي .. اخذت جهازي راسلت تبارك ماعدها نت
خابرتها مرتين يلا ردت

مياس.. الوو

تمارا.. هلو مياس اني تمارا

مياس.. ها تمارا خير وين تبارك لعد

تمارا.. يمعوده مدري شجالها
گعدت الصبح لگيتها منتهيه من البچي حاولت وياها حتى افهم الموضوع بس ماكو
اخير شي تخربطت واخذوها للمستشفى

مياس.. شتحچين تمارا ؟!!

تمارا.. اي والله
اكثر من مره سألتها السالفه متعلقه بجهاد ما جاوبتني

مياس هي قريبه منچ كلش .. عفيه احچيلي اذا تعرفين علتها

مياس.. لا شمعرفني .. متشوفيني تفاجأت من سمعت الخبر منچ

تمار.. اووووف
لساني وگع واني اگلها عوفي جهاد يولي ميفيدچ بس ماكو تحچين ويا الحايط يسمعچ وهي لا

مياس.. فدوه اذا رجعت للبيت طمنيني عنها

تمارا.. ميخالف حبيبتي

مياس.. سلميلي ع الكل

تمارا.. يوصل
وانتي هم سلمي

سديت الخط وگلبي يفور عليها .. طلعت كملت شغل البيت واني افكر بتبارك منا لما صار الظهر
جاب شهم الغده صبيته ورحت السمر

طبيت عليها چانت گاعده بس تبچي .. خليت الصينيه ع الميز وتقربت منها حضنتها

مياس.. ليش سويتي بروحچ هالشكل
ما جاوبت واستمرت بالبچي : حاچيني سمر اريد اعرف كل هذا علمود يوسف ؟!!

سمر.. كلشي مياس كلشي
يوسف
واهلي
وروحي
اصلا ما ادري ليش نقذوني لو خاليني اموت ارحم من هالعيشه

مياس.. حرام عليچ تحچين هيچ
ما فكرتي شتگولين الرب العالمين لمن سويتي بروحچ هالشكل ؟؟

حسبالچ اذا انتحرتي راح ترتاحين ؟؟
زين امج خطيه ما فكرتي بيها
اخوچ
خالچ
كل اليحبوچ

حقچ ما شفتي شصار بيهم لمن شافوچ بهل حاله خو امچ اجت تتخبل إلا شويه

سمر.. تعبت مياس والله تعبت .. وكامت تشهگ

مياس.. والله كلشي ينحل بس اصبري شويه

سمر.. شلون ينحل ويوسف راح يتزوج
شلون مياس شلووون

انفتحت الباب بهلاثناء .. درت وجهي شفت شهم صافن على سمر
تقرب منها مسحت دموعها ع السريع

شهم.. جبتيلها اكل

مياس.. اي
هذاك ع الميز

شهم.. اطلعي خلينه وحدنه بلا زحمه عليچ

مياس.. ماشي

طلعت مياس وسدت الباب .. جبت الاكل خليته گدام سمر حتى اجبرها تاكل

شهم.. اكلي

سمر.. ما اشتهي خالو

شهم.. مو بمزاجچ
تاكلي وكله هم

سمر.. والله ما اشتهي
بعدين ايدي توجعني ما اگدر احركها

شهم.. اني اوكلچ

رفعت راسها صفنت بوجهي
گعدت يمها اسويلها لگم بالگوه يلا وكلتها شويه لأن متشتهي

شلت الصينيه خليتها ع الميز ورجعتلها .. گعدت گبالها احاول افهم منها ليش انتحرت لان اكو شي چبير ورى عملتها هاي ولازم اعرفه

شهم.. سمر احچيلي ليش حاولتي تنتحرين

سمر.. ما ادري

شهم.. هذا حچي ؟!!

سمر.. تعبت من كلشي

شهم.. كلشي شنو يعني

سمر .. من نفسي
ومن معاملتكم الجافه الي
ومن اهانات جهاد المتخلص
كل هذا دمر نفسيتي مو بس تعبني

شهم.. هذا الحچي عوفي
اكو شي اكبر من كل هذا واريد اسمعه منچ حالاً

سمر.. شنو خالو
قابل شكو يعني
ما عندي حچي غير الگلته الك

شهم.. معقوله بعدچ تفكرين بعماد الكلب ؟!

سمر.. لا خالو شنو هذا القذر حتى افكر بي

شهم.. سمر تدرين بيه لمن اريد اعرف شي اعرفه لو شما چان فـ لتلفين وتدورين واحچيلي الصراحه احسن

سمر.. والله خالو هو هذا السبب ما عندي غيره صدگني

شهم.. ماشي اني راح اتصرف

طلعت من يمها للصاله شفتهم دياكلون بس مياس ماكو وياهم .. رحت للمطبخ لگيتها گاعده تاكل ع الميز هي واخوانها

شهم.. ليش ما گعدتي وياهم

مياس.. لا هنا احسن
اكلت سمر

شهم.. اي
عود طلعي الصينيه من يمها نسيتها

مياس.. هسه رايحه

شهم.. كملي اكلچ

مياس.. شبعت الحمد لله

شهم.. مياس اريد اسألچ سؤال بس اتمنى تجاوبيني بصراحه

مياس.. اسأل

شهم.. سمر شبيها ؟؟
من دخلت عليكم للغرفه چانت دتبچي .. اكيد حچتلچ همها واريد اعرفه منچ هسه

مياس.. لا كلشي ما حچتلي
بس چانت موجوعه وضايجه بنفس الوقت من هذا الوضع

شهم.. لا مياس حاچيتلچ
لتچذبين احسن

مياس.. صدگني ما حچت شي غير الگلته الك

شهم.. ماشي مياس ماشي

عافني وطلع ضايج
ظليت صافنه ورى .. مستحيل اگله تحب يوسف اخاف يفهم السالفه غلط وتوگع بيها المسكينه

خلصوا الاكل شلت المواعين غسلتهن ورنا نظفت المطبخ .. للثنتين وديتلهم الچاي چانوا كلهم بالصاله بس جهاد بغرفته

اخذتله چايه ورحت دگيت الباب .. صاح تفضل دخلت لگيته ديخابر اشرلي حتى اسكت

جهاد.. اي ميخالف بس سوي الگتلك علي
مثل متحب اشوفك باچر لان اليوم تعبان ما بيه اطلع
مع السلامه

مياس.. هذا الچاي

جهاد.. اي عاشت ايدچ

درت وجهي دا اطلع مدري شلون تجرأت افتح ويا الموضوع .. سديت الباب ورجعت باتجاهه
صفن بوجهي متفاجأ من تصرفي هذا

جهاد.. شكو ؟!!

مياس.. جهاد لتخلي يوسف يخطب تبارك

جهاد.. رفع حاجبه مستغرب : وليش عود. ؟!

مياس.. لان هي تحبك ومتريد تتزوج احد غيرك

بعدي هستوني مكمله كلامي حسيت الباب انفتح
درت وجهي بخوف شفت شهم واگف ومخنزر علينه بعصبيه ....

يتبع..