رواية مينا الفصل التاسع عشر 19 - بقلم Chra

#مينا19

ليش يا أبني ليش ذبحت أختك  ضحينا بيها علمودك الله ياخذني شسويت بيج بنتي شيلها ناخذها للمستشفى.

شكو  فيروز صاير بيج شي لو زهرة شبيها اختج يمتى نرتاح من سوالفها

كله من أخوك خالد اختي ماتت

جنت اختار قاط لعرسي ويا خالد مينا  كل دقيقة تمر بالي متخليني انساها صبح ترسلي صباح خير احبك بالليل نوم العوافي تصبح على خير احبك روتين يومي من يوم طلاكنا اشكد حاولت تعوفني اهنتها حجيت عليها ماكو متحس اجذب على نفسي اموت عليها هي اول واخر حب بحياتي بس القدر جان ضدنا او يمكن طبعي انه متقبلت حجي حيدر حتى لو كذب سمعت خالد يحجي ويه مرته اشبيها مينا  لزمته جاوبني اشبيها

ماعرف مصطفى ضاربها ودتنزف

وينها هسة هي  خالد كلشي ولا مينا افتهمت لاتلعب باعصابي أحجي الصدك

اشبيك اتخبلت ورا اسبوع زواجك انسى كافي ترا ضاربيها من وراك الله يخليك عوفها

تركني وراح اني الدنيا ظلمت بعيني رجعت للفندق بجيت على حالها وحالي رجال طول بعرض كاعد يبجي ليش متطلعين من بالي مينا شعليه بيج اني رغم من كل شي بعدني احبج اموت عليج رجع خالد سألته جاوبني مجرد شجار بين مينا واخوه رجعنا لبيتنا شفت غرفتي متغيرة الاثاث وحتى الجدران صابغينه ولا ذكرى مبقين لمينا نزلت للصالة اللي تكعد بيها حبوبة واني اجر نفسي منو مسوي هيجي بغرفتي ليش تتصرفون من كيفكم مهتميت لوجود وشوق وهمه كاعدات بيناتهم سمعت صوت امها اللي اكرهه من كل قلبي

شبيك عيني غير عرسان جدد تريد بنتي تنزف على فضلة الساحرة المفروض انت متقبلها لبنت عمك اللي تصونك وتصون بيتك وتراعي غيابك

احس كل كلمه تطلع منها بسامير هاي منين عرفت سالفة مينا باوعت على حبوبة بعتب نزلت راسها عرفت هي مبلغتها أحذرج أخر تحذير أي شي يخص حياتي وحياة بنتج اذا تدخلتي بيها تشوفيها كاعدة يمج مفهوم وحجي منا ومنا ماريد اسمعها

روح حبيبي ارتاح كومي خيريه صبي غدا لأخوج وانت ابني على كيفك متسوى اللي تسوي بنفسك اخوانك رادو يفرحون بيك جددو الصبغ وابوك الله يطول بعمره أخذلك اثاث جديد هاي الزواجه مو مثل اللي قبلها هاي بنتنا شوق  بنت شيوخ افتهمت واللي راح راح خلينا بهسة باجر الزفه أنشالله اريد كل اهل المنطقة تحجي بعرسكم

عفتهم يحجون على تفاصيل الزواج اللي أحسه غصب عني ماعندي اي احساس هي مابيها شي من ناحية الجمال كلش حلوة يمكن غيري يشوفها احلى من مينا بس الكلب ومايعشق

فتحت عيوني نايمه بغرفة أهلي بعد ماطلعوني من المستشفى صار عندي شلل مؤقت الأصابة براسي مأثرة على رجلي رغم مؤقت بس كلمة عاجز كلش صعبة واني اشوف أهلي محتارين بيا أمي وابويه مينامون طول الليل يتناوبون على خدمتي خايفين لايصير بيا شي ومصطفى رفضت احجي ويا سمعت صوت فينوس وهي تحجي وياأمي ترحب بيها دخلت للغرفة باوعتلي درت وجهي وكعت على رجليه وهي تبوس بيها

سامحيني مينا مجان قصدي غصبا عني والله من تعرفين راح تعذريني انتي تعرفين ماعندي اعز منج ياريت اللي بيج بيا

ضحكت واني ابجي شنو كلتي عيدي مسمعت زين فينوس ليش هيجي سويتي هاي أخرة الأخوة والصداقة بيناتنا لو العالم كلها مثلج جانت الدنيا منتهية من زمان

غصبني والله العظيم وحق القرآن هددني حيدر جان الشخص اللي احجي وياه بالتليفون مجنت اعرف من رجعتي من شهر العسل عرفت ردته يعوفني جان مسجل مكالماتنا وهددني ينطيها بيد أهلي وانتي تعرفين أهلي شلون امي تنتظر الزلة مني وأيهم راسا يذبحني وابويه يظل ساكت بيناتهم عيالج سهلة عليه لا والله

لعد من جيتج جم مرة ليش مطلعتيلي ليش خبيتي نفسج لو جنتي مفهمتني السالفة جنت احلها ومنوصل لهالنتيجة شوفيني معاقة عاجزة ارتاحيتي فوك كل المصايب اللي صارت بيا وطلكت أحمد تزوج شوق كل اللي صار بجهة وهذا الالم بجهة ثانية حبيبي ينام بحضن غيري صارله شهرين واني انام على الابر والمهدئات وانتي نايمه وضميرج مرتاح مو وين حيدر اكيد تعرفين

والله ماعرف وينه اخر مرة دزيتله صورج وهو اختفى ماعرف عنه شي والله لو اعرف اكولج سامحيني مينا أمي عرفت بالسالفة حبستني بالبيت حتى لا أكشف نفسي

روحي فينوس ماكو حجي بيناتنا وجودج هسة ميغير شي كفيتي وفيتي ياصديقة عمري رغم اللي سويتي بيا مااتمنالج التعاسة مثلي الله يجازيج راحت مسحت دموعي واني اتذكر من طلعوني من العمليات ودوني على العناية وعيت واني اسمع صوت الدكتور وهو يحجي ويا أمي يكوللها راح نقدم بلاغ على هالحادثة هاي قضية قتل مينسكت عنها وامي تجاوبه وتكول وكعت بالحمام وتبجي خايفة عليه وعلى مصطفى لايتورط بقضية تكررت الطعنات بعد اسابيع خبروني فقدت رجلي وأحمد تزوج طلعت دفتر مذكراتي واني اكتب يومياتي التعيسة على السرير

خير من الصبح شبيج تصيحين يافتاح ياعليم التاس تصحى على صوت وشي حلو واني اصحى على صياحج شكو ست شوق

سلامتك استاذ احمد ليش كعدت ارجع نام واتخيل مينا حبيبة القلب بحضنك واتكلب بالفراش يمين وشمال واني طز بيا وباللي خلفوني

عفية عليج احلى شي بيج تعرفين قدرج عندي الف مرة كتلج لاتجيبين اسم احد على لسانج انتي مريضة الله يشفيج روحي تعالجي احسن

وليش حضرتك متروح تتعالج انت مريض مو اني

ضربتها راشدي خليتها تفر فر بمكانها عيديها مرة ثانية وادفنج بمكانج عوبة ولي من وجهي

تسلم يجي منك أكثر ابن عمي حزام ظهري فوك ماحرمني من حقوقي تضربني همينه صوجي سكتت عنك بس منا وجاي مراح اسكت راح احجي كلشي لحبوبة نشوف يا اني يا مينا

مشايف احد بحقارتج تدرين ماكو مثلج من اول يوم خليتيني اخذ فكرة محلوة عنج لسانج طويل معروف من زمان بس جرئتج الزايدة اني اللي جنت اموت بالنسوان خليتيني اكره حتى أسمهم

حقك متحبني لان ماعندي حركات ناقصة مثل بعض الناس حتى السحر اله مدة بس اللي هي مسويتها متخلص دائمي احب ابلغك اني حامل

أنصدمت جنت واكف كعدت بمكاني واني فاتح حلكي ماكدر اجاوبها

هههههه والله عرفت هيجي يصير بيك بس عرفتني حامل انشليت لو أجيبه للدنيا متأكدة راح تدخل بالغيبوبة على العموم عجبك الموضوع او لا هذا الواقع منكدر نغيره الطفل اللي تمنيته من مينا ومكدرت تجيبه ببطني أشرتله على بطني وراح يصير شيخ ابن الشيخ مادام بعدك مصدوم ومو بوعيك خليني ابلغك حبيبة القلب صايرة عاجزة متكدر تمشي خطية يالله خليني اروح اكل شي الشيخ ابني جوعان

كانه واحد ضربني وعاني انتظري شنو قصدج بعاجزة شوق تعالي وين تروحين مني اليوم فكرت فيروز هالايام اهواية تروح يم اهلها وحتى صايرة منطوية وساكته متحجي مبين عليها حزينة شلون ملاحظت هالشي خالد طلعت تليفوني خابرته وينك

خير احمد صاير شي اني يم اهل فيروز

بدون لف ودوران شبيها مينا

منخلص من هالسيرة انت متزوج

انجب افتهمت مو انت تذكرني احجي وفضها مع الاسف عليك اخر شخص تصورته يخدعني انت حزام ظهري

مريضة وهسة اني بالمطار نودعها رايحة تتعالج بتركيا كذبت علمودك حتى متحس بالذنب وانت تعرف اني اشكد اعزك واقدرك ميحتاج تحجي عليه