رواية مينا الفصل الثالث 3 - بقلم Chra

🌷🌼🌻
#مينا 3

اريد ابني يارب رجعلي ياه سالم والله ميسويها اعرفه عصبي شوية بس مو حرامي كومي فيروز خابري بيت عمج خلي يجي يلحك ابوج واخوج يارب سترك

شكوله ماما واني امسح دموعي خايفة اول مرة يصير بينا هيجي الجوارين كلهم برا واحنا بالمطبخ نسمعهم شنو يحجون علينا ماكدر خلي مينا تخابر

ردت اكوم سمعت صوت الباب أمي وفيروز صارو يرجفون تقربت كلت منو جاوبني عمي

فتحي الباب لابارك الله بيج وبأهلج وين ابوج

دخل مثل الاعصار يسب ويغلط وراه زوجته وحيدر وعلي جاوبته بابا راح ويا مصطفى أمي وكفت ترحب بيهم وهي تمسح دموعها وتطلب منه يروح يشوف شنو صار حتى نتطمن عليهم

الله لايبارك بمصطفى ولد واحد معرفتو تربوه فضحتونا بين الناس ياريته ميت ولا هالسوايه

ابو حيدر استهدي بالله انت بمقام ابوه شنو هالحجي ابني ممسوي شي اكو غلط بالموضوع

ام مصطفى ياغلط بعدج تتدارين على اخطاء ابنكم سالفته صارت على كل لسان على العموم احنا جينا حتى نبلغكم بناتكم منريدهم الحمدالله بس خطوبة ومصار شي رسمي والخساير الله يعوضنا جيبولنا الغراض والذهب اللي اشتريناهم

خيه كعدو ارتاحو البنات شعليهم بهالموضوع علي حيدر احجولكم كلمه سنين وانت تنتظر فيروز مو حيدر شلون تتخلى عنها ومصطفى مثل أخوكم وانت اكثر واحد تعرفه وتعرف اخلاقه

محجه شي نزل راسه وعلي نفس الشي كأنه مو يمه الموضوع بيد أمه رحت جبت الذهب من غرفة امي والاكياس خليتهم بأيدها وطلعت الحلقة من ايد فيروز اللي واكفه مثل الصنم ومو حاسة بنفسها خلصت المسرحية تسلمون على وكفتكم ويانا

عندج عين تحجين مينا خاتون هم زين ابني متورط بيج واخذج وياه الله يحبنا الحمدالله احنا ناس نخاف الله مو مثل غيرنا حراميه ولايستحون يالله ابو حيدر خلي نطلع لايجينا شبهات من وراهم

مقصرتي خيه الله وياكم وانت ابو حيدر متصورتك تعوف اخوك بهالظروف

بابا رجع وشافهم عباله جايين يسألون علينا خطية متوقع ينصدم منهم

خير ياجماعه شبيكم هم زين اجيت حتى نشوف حل لمصطفى

اني ماجيت أساعدك اتفو على تربيتك شنو مخلف عار انت لا أخوية ولاأعرفك ولاتحاول تخابرني

عمي اني بنتك ماريدها بعد واخوية علي همينة ميريد مينا

كمل حيدر كلامه اني رأسا باوعت على فيروز شفتها اتخربطت ولونها اتغير ركضت عليها شلتها أنطيتها مي ضلت تنتحب وهمه راحو بلا ميهتمون لشي

مينا أني بحلم لو واقع حيدر رخصني هيجي

كومي صيري قوية الله يخليج أني أصغركم ماعرف الزم منو بيكم عمي ذب الحجي وراح أبويه أخذ فلوس وراح للشرطة وأمي تبجي .أجتي وحدة من جوارينا بالليل كالت ام مصطفى خية عوفو المنطقة بيت القصاب عدهم اولاد شقاوجية وسرسرية ماعدهم أخلاق أخاف يهجمون عليكم وانتو بس باقين نسوان يسوون بيكم شي همه من الله يريدون مشاكل روحو غير مكان

عيني وين نروح وين نودي وجهنا اللي يعرفونا يخابرون ويحجون علينا مضل أحد ويانا مع العلم لا أني ولا ابو مصطفى ممقصرين وياهم بشي بس شوفي وكت الشدة الكل تدير ضهرها وينهم الاقارب وينهم الاصدقاء ماكو واللي يجي يذب حجي ويروح متكوليلي وين نروح أني والبنات.

رجع بابا تعبان كلش مخلانا لا نسأل ولا نستفسر شنو صار على مصطفى

حضروا جناطكم بسرعةوأشكد ذهب وفلوس عدنا بالبيت ناخذها ونروح مهدديني بالبنات ميكعدون راحة بيت القصاب وميقبلون يتنازلون على القضية

وين نروح بهالليل يارجال واني ياهو اخابره يغلط ويفشر علينا صرنا بلا سند وعون

خلينه هسة نطلع من البيت والله كريم.

مكمل بابا كلامه هجمو علينا بيت القصاب هو ولده بالسلاح يعيطون ويصيحون حرامية أشعدكم باقين بالبيت هسة تطلعون بالشارع وتتنازلون ألنا على البيت يالله أبنكم حرامي يطلع من القضية كل الجوارين يباوعون من بعيد علينا ولا واحد بيهم أتقرب أو حجه شي بس يضحكون ويباوعون واني وأمي وفيروز بس نبجي خطية أبويه يترجاهم خلي نكعد نلكي حل ماكو يصيحون ويضربون طلقات بالهوا وأحنا نرجف وأني بكلبي أكول الله ياخذك مصطفى أشسويت بينا من ورا زينب الساقطة ونزواتك وياها دخلو للبيت وفتشو شكو فلوس وذهب عدنا أخذوها والسيارة مبقت عدنا شي بالبيت.

أخذو كل فلوسنا بس عوفونا الله يخليكم فضحتونا بالمنطقة عوفو بناتي بحالهم أتوسل بيكم رحمو شيباتي صارلي سنوات عايش وياكم ولا يوم شفتو من عندي عيبه .

كسرني توسلات ابويا الهم ولا كأنه يسمعون شي راحوا بعد ماأخذوا كل شي بقينة وحدنا خابرت أيهم صديق مصطفى واخو فينوس الله يخليك ألحكنا حجيتله اللي صار بينا .

أنتي بخير مينا الحمدالله كل فكري يمج أوف مصطفى اشسويت بنفسك وبعائلتك لاتنقهرين هسة اجيكم.أعشق مينا وأحبها بس اعرف هي محجوزة لابن عمها مستحيل تصير اليه. شفتها كلبي طلع من مكانه نظرات الخوف بعيونها تمنيت احظنها وأسندها بيدي

أني بخير أيهم . فعلا ١٠ دقايق هو وأبوه وصلو لبيتنا حجو ويا بابا كالوله لاتبقون بالبيت عوفو كل شي وتعالو ويانا بيتنا بيتكم أحنا وافقنا انروح نبات يمهم بس الليلة لحد مانعرف شنو مصيرنا ومصير مصطفى باجر. طبينا لبيتهم أجتي ام أيهم كالبه خلقتها بالكوة رحبت بينا كعدنا كتلها لعد وين فينوس خالة

مجنت راضيه أستضيفهم ببيتنا خايفة على أيهم لايتورط بسببهم بس ميقتنع عنيد يموت على مصطفى .جاوبتها فينوس نايمة .

أستغربت فينوس ويايه من الروضة ولا يوم مفترقين أشلون تعوفني وتنام واني هاي حالتي وأدري هي يومية سهرانة لحد ساعة ٢ بالليل سكتت أنداريت شفت أيهم يباوعلي بحسرة أني أعرف يحبني بس ميريد يخون مصطفى وأني ماحبه أحسه مثل مصطفى بس فينوس تكولي يموت عليج بابا جان يحجي وياه وهو عينه عليه

أبني أيهم كولي الصدك مصطفى ليش جان رايح يبوك بيت القصاب اني بشنو قصرت حتى هيجي يسوي بينا هاي أخر تعبي أبني يطلع حرامي واني مربي أجيال ومعرفت أربي أبني.

أيهم وجهه ينطي ألوان معرف شيجاوب متصور ابوية يسأله فكال وهو يتمتم

عمو باجر نروح نسأل مصطفى أحسن أني هم ماعرف حالي حالكم .

متحملت سكوته واني اعرف كلش زين هو يدري الموضوع كتله لاتجذب تعرف كلش زين أشجان يسوي مصطفى يم زينب ليش متحجي الصدك أنت تدري مصطفى مو حرامي ومجان رايح يبوك

سكتي مينا انتي بعدج صغيرة متعرفين شي

يأشرلي بعينه حتى أسكت أني كلت ماأسكت كافي من الظهر الناس اكلو وجهنا وأخويا الله يعلم بحاله بابا عمو اريد احجي.

مينا تريد تكبر السالفة صيحت عليها سكتي مينا لاتحجين ولاتكبرين المواضيع متعرفين شي سكتي وأنتظري شراح يصير

أنت تسكت أني مو جبانة بابا مصطفى عنده علاقة ويا زينب وجان رايح لبيتهم علمودها وجانت وحدها من الساعه ٧ صبح هو في بيتهم لحد ضهر والبقية أنتو أفتهموها

والله لوما أحترم عمي وأبويه جان كتلتج زعطوطة شنو هالحجي متستحين .

أنهجم بيتنا دخلنا بسالفة شرف ياريت جان موضوع السرقة تنحل اويلي عليكم بناتي راح تصيرون ممسحة بيد ولدهم وين أودي وجهي بيكم .

ام ايهم : عيني جيتكم الليله على عيني بس أحنا هم نخاف عدنا بنية فياريت تعوفونا باجر احنا ناس على كد حالنا مانكدر على بيت القصاب واعذروني

أختي أنتي معذوره ونشكركم على وكفتكم ويانا هالليله .

كمنا نمنا اني واختي وماما بغرفة بالليل حسيت بجسم لزك بيا ويحضني ويبوس براسي اني خفت عبالي أيهم كلت اليوم اني انتهيت راح يغتصبني وماكدر افتح حلكي شوية شوية فتحت عيني شفت فينوس ارتاحيت رجعت باستني كالتلي.

سامحيني أنتي متعرفين أشسوت بيه امي اليوم ردت اجيكم ضربتني وقفلت عليه غرفتي هسه أيهم فتحلي الباب

حضنتها وبجينا سوه بسكوت ضحكت كتلها خوفتيني عبالي أيهم دخل بالفراش يمي ويبوس بيه.

لا هو ينام عليج بعدين يبدي يبوس ويتحسس بجسمج والباقي تعرفيها😍😘

صدوك أدبسز كمنا نضحك ونبجي

شتسوون لو جنتي وافقتي تتزوجين أيهم جنتي هسة نايمه بحضنه ومرتاحة واهلج يرتاحون يمنه.

ماعرف باجر نشوف تعرفین ايهم مثل اخويه متصورت موقف بيت عمي وحيدر وعلي والله اني مو يمي بس فيروز خطية

الحمدالله الله كشفهم عديمي الرجولة ناس متستحي

نامت يمي الصبح كعدنا رحنا لبيتنا لمينا هدومنا .
أبويه خابر على عمتي عايشة بالخليج كاللها راح أدز عليج البنات وام مصطفى يبقون يمكم عدنا شوية ظروف بالبيت بس تنحل ارجعهم للعراق أحتمال شغلة أسبوع أسبوعين هي بدون مايكمل أبويه الحجي صاحت لا أعرفكم ولا تعرفوني تريد تفضحني يم عيالي وزوجي يدرون بيكم يالحرامية كومه غلطت علينا وسدت التلفون.عرفنا عمي مخابرها ومفهمهاسالفه مصطفى كعدو ابويه وامي يبجون وفيروز تحضر الملابس كتله باب شيل راسك ماعليك من أحد والله مصطفى مظلوم وراح يبين للكل انت شلون مربينا .

أبجي عليكم بابا مينا اخاف ياخذوكم مثل ماخذو السيارة والفلوس .

ماكو حل فاضل الا نعوف هاي المحافظه

صدك جذب ماما وين نروح وأحنا اهلنا وكرايبنا اهنا ماعدنا احد بالمحافظات كانما ذكرت ابويا بشي طلع للحديقه بعد ساعه جنا حاضرين.

بنتي شتريدين من ألاهل والأصدقاء اللي من عرفو مشكلتنا سدو بابهم بوجهنا.

لعد وين نروح ماما فيروز جاوبيني احجيلج شي لاتظلين ساكته

شحجي وشكول ميفيد وين ماتردون خلي نروح المهم نبتعد من اهنا

خلص لكيت حل يا بنات راح نروح لناحية او قضاء خارج محافظتنا جنا أني وأمكم ندرس بالمدرسة مالتهم أنروح يمهم هذوله عشائر خوش ناس وشيوخ راح يحافظون علينا .

عيني أشذكرك بيهم هسة ٢٥ سنةمشايفينهم اصلا ولا يتذكرونه ابو مصطفى دخيلك الكي غير مكان

لا ام مصطفى العشائر ميتغيرون مو مثلنا اهل المدينة كل دقيقه بوجه هذوله الناس للموت وياك راح نروح ونتوكل على الله.