رواية مينا الفصل الثاني 2 - بقلم Chra

#مينا 2

رجع علي من السفر عزمتنا مرت عمي على العشا مجانت مبقية احد من اهلها ماعزمتهم والاكل كله أمي وياها فيروز طبخوها واني نظفتلها البيت مفتهمت شنو يعني عازمتنا واحنا الشغل كله علينا بناتها اجوي حالهم حال المدعوين ردت اشوف علي جان نايم الكل يحجي بالخطوبة وترتيباتها واني كاعدة كأنه متخصني الشغلة فيروز اكثر وحدة فرحانه شفت علي دخل علينا وسلم حسيت سلامه عادي امه لزمته حتى يكعد بصفي ردت اكوم واعوفه مادري على شنو شايف نفسه كل دقيقة يتأفف باوعتله بدون مااخجل من فوك ليجوا ياربي شلون ورطة أبد محلو لا اسلوب لاشخصية شنو هذا كل كلامه عن الدراسة وبس شردت بتفكيري لايكون اخلص حياتي وياه بس يحجيلي عن الدراسة

مينا احجي وياج وين صافنه

وياك اسمعكم شتكولون باوعت ماكو احد غيرنا يمتى كامو واني محسيت بنفسي اشكد فشله

واضح على العموم ردت اتناقش وياج بموضوع يخص حياتنا اما الخطوبة والزواج هاي امي تتكفل بيها اني ماعرف بهالأمور هاي هديتج اتمنى تحافظين عليها وتبدين تتعلمين منها لان تفيدج كلش

فتحته جان قاموس لو بيدي اكوم اضربه على راسه جاوبته تسلم تعبت نفسك عدنا بالبيت اكثر من واحد كمت وعفته رجعنا للبيت وطول الطريق امي وفيروز يتناقشون علمود يروحون للسوك ويا مرت عمي لاول مرة مشاركتهم رغم اني اموت بشي اسمه سوك كلما اريد اكول لأبويا ماريد اتزوج اشوفهم فرحانين اسكت مرت الايام واحنا ننتقل من سوك لأخر مرت عمي تروح للمحلات الراقية وتريد تشتري بربع السعر فشلتنا بأكثر من مكان والذهب لو ممشتريها احسن اخر شي قررت تأجرلنا بدلات بحجه مصاريف زايدة ومنلبسها غير مرة اني اعترضت

حبيبتي انتي تلبسي وتذبي استفادي من فلوسها بغير شي

شفت امي تأشرلي اسكت مكدرت جاوبتها عمه اذا متريدون تشتروها اني اشتريها بفلوسي

شنو هالحجي ام مصطفى هاي اهانه النا وانتي منين الج فلوس حمدي ربج تتزوجين وتسافرين للخارج غيرج يتمنون بس رجال ترى عيب

ميخالف ام حيدر اللي تردينه هو اللي يصير ماعليج بمينا خلي نخلص ونرجع بسرعه حتى يرتاحون علمود باجر

رجعنا للبيت حتى فيروز مجانت راضية بس محجت تستحي أمي رزلتني وحجت لأبويا وهو عاتبني دخلت لغرفتي وذبيت الاكياس بالارض خابرت فينوس حجيتلها اللي صار وهي تضحك عليه مخبلة انتي ليش تضحكين

اتمنى اشوف شكلج وانتي معصبة الله يعين علي عليج مراح يخلص من لسانج من هسة قصفتي أمه

لاتاكلين همه يمكن مراح نحجي طول اليوم كلمتين اتوقع كلامه بس عن الدراسة واني اتمنى يظل ساكت

مينا حبيبتي لاتكبرين الموضوع ميستاهل احتمال من تروحين يمه يتغير منو يشوفج ويكعد يحجي عن الدراسة شتكولين نفركش الخطوبة وازوجج ايهم خطية مقهور كلش عليج ياظالمه

اني اتمنى هسة كدامي حتى اكسر راسج حيوانه انتي واخوج زين باجر تعالي من وكت حتى تجين ويايه للصالون لان بنات عمي يجون ويانا احتمال يجلطوني اخذج كأسعافات اوليه

هههههههه متجوزين من سوالفج بعيني تدللين ساعه 6 اني يمج اذا تردين اصيرلج ديك وأصحيج همينه بصوتي الحلو

الصبح كمت رحت للحمام وغسلت بدلت ملابسي ورحنا ويا بابا اني وفيروز جنت اشوفه اشكد فرحان وهو يحجي ويا عمي بالتليفون قبل لاننزل باسنا اني وفيروز من راسنا كملنا المكياج والتسريحه مقبلت بنات عمي يتدخلون بشي سويته على ذوقي الحفلة جانت عبارة عن أستعراض ومديح زوجه عمي وبناتها احنا هيجي وجبنا وسوينا هيجي والغراض من فلان مكان والتجهيزات طبعا كله جذب ردت بس يخلص الحفلة وارجع للبيت ولا كلمه محجيت ويا علي ومن يحجي جنت اسوي نفسي مااسمع رحنا اني وهو وفيروز وحيدر للمطعم كعدنا كل اثنين بطاولة

مينا احسج مو مرتاحه اذا اكو شي احجيلي اني تفكيري يختلف مو مثل الشباب اللي عايشين اهنا متخلفين

شنو تقصد علي ممكن توضح كلامك جنت احجي واهز برجلي من القهر فوك سوالفهم هو وامه عنده عين يعاتبني ويتهمني

اقصد اذا اكو بحياتج شخص اني انسحب لان الزواج بالنسبة اليه استقرار واني ماريد دوخه ووجع راس اريد مرتي تمشي على مرامي وانتي اشوفج عكسي بكل شي اذا ناوية تكملين ويايه لازم تصيرين مثلي والا مراح نتفق واني اكون ضيعت اجازتي وتعبي وفلوسي على الفاضي

صبرني يارب جاوبته الحمدالله ماعندي شي ولا راح يكون صح انت مو عايش اهنا من زمان بس اهلي ربوني وتعبو عليه اهواية مستحيل اكسرهم و
واني اشوفك انت اللي متريد تكمل و الزواج اخذ وعطاء من الطرفين كل مايحجي بموضوع أراءنا مختلفة وصلنا للبيت انطاني رقمه قبل لا افتح باب الصالة شكيت الورقة وذبيته بسلة الزبالة سمعت فيروز ورايه وهي تحجي لأمي عن سهرتنا البايخة بالنسبة أليه بينما هي طايرة من الفرح

وانتي مينا اشوفج ساكته لايكون طولتي لسانج ويا علي وفضحتينا

ماما صدك تحجين يعني متعرفين بنتج تردين هسة تتطمنين ابشرج اسبوع ويعوفها منو يتحملها العوبة

العوبة ام الرياجيل أفتهمت مصطفى لو افهمك اكثر كام راد يضربني والله بس تقترب مني اصيح بابا عليك

كافي مينا وانت مصطفى اكعد ابني شلون تضربها فرضا باجر خطيبها يجي يشوفها شيكول علينا

ربيها قبل لا اذبحها الحيوانه اني الج مينا اذا ملعبت بيج طوبة من يسافر علي فلا اني مصطفى مخبلة امشي ولي من وجهي

بدلت وامي كعدت ترتب الغراض وتخليها بأكياسها حتى الصبح يرجعوها حمدت ربي مشتريتها جانت تبقى عندي كذكرى سيئة رجعت للدوام بين يوم ويوم بيت عمي يجون لبيتنا لو للعشا لو للغدا جنت اتهرب من علي وماكعد وحدي وياه حتى الحلقة مالبسها قبل من جنت اسمع مدح زوجه عمي افرح كلش هسة مااطيق اسمع صوتها من اللي شفته منها ومن بناتها مصطفى حرك البيت حرك اقل كلمه نحجي اني وفيروز يمد ايده علينا وامي واكفه بصفه ابوية جان عنده قطعة أرض مخليها للزمن حتى منحتاج أحد سوا مشاكل أهواية بالبيت حتى يبدل سيارة بابا أمي زعلت منه لحد ماخلته يرضى ويبيعها ومن أهنا مصطفى طلع عن حده يجي للبيت متأخر وميقبل احد يعاتبه لو يسأله يوميا اشوفه يوصل زينب للمدرسة فينوس كلما جانت تشوفهم تجر حسرة واني اضحكها وبداخلي اتمنى املخ زينب وهي بكل فرصة تجي تذب جم كلمه حتى تغثنا واني اسكت حتى لا مصطفى يسوي مشكله من وراها بالبيت واضوج اهلي بعد فترة صحيت الصبح من وكت ردت اسوي لاهلي فطور شفت مصطفى كاشخ ومبدل ريحه عطره واصل يمي وهو يتسحب مثل الحرامي واني وراه جنت طلع من البيت وراح حسيت كلبي مقبوض مكدرت الزم شي بقيت بالحديقة واكفه انتظره يرجع اهلي فطرو بابا راح للمحل واني عيني على الباب بعد ساعات رجع مصطفى للبيت شكله مبهذل وجهه كلة دم امي لطمت على وجهها وهي تصيح خطية شوية وكلبها يوكف

ولك أشبيك منو سوا بيك هيج

أريد فلوس وذهباتج راح أهرب أني واكع بمصيبة .

أحنا نكول شكو شصاير يعيط ويحجي علينة يكول ماعليكم مني ركض لغرفته وعافنا اجه بابا بعده كوة يتنفس كال لأمي

ولج أنهجم بيتنا مصطفى جابلنا العار

يبجي وينتحب وأحنا واكفين منعرف شنو سالفة ومصطفى بغرفته يحضر ملابسه واوراقة الرسمية يريد ينهزم أمي كامت تضرب بنفسها وتسأل شمسوي أبني

أبنج رايح لبيت القصاب يريد يبوكهم وهمه مجانو بالبيت بس بنتهم الصغيرة وحدها فمصطفى هجم عليها رايد يبوك الفلوس وذهباتهم هيه مصيحه أبنهم الجبير جاي للبيت فجأة لازم مصطفى أبيتهم وهسة يريدون دم أبنج والشرطة راح تجي تأخذ أبنج الحرامي ياربي أني اصوم وأصلي ربيتهم على الحلال ليش هيجي دتسوي بينا مصطفى كلشي سوينالك مخزر بعينك تروح تبوك بيوت الناس ياربي تاخذ روحي اليوم ماأتحمل العار .

أني وأختي نبجي ونبوس بأيد ورجل بابا وأمي تضرب على ايدها وصدرها مصارت نصف ساعة الشرطة طوقت المنطقة وأخذو مصطفى للتحقيق وكل المنطقة عرفت بالسالفة.