رواية نادره الفصل الثالث عشر 13 - بقلم sasso

تنويه: بعض الحكايات حقيقيه ١٠٠٪ مع أختلاف الأشخاص و الأحداث
..(محمد)..

لقد مر على زواج أمي شهر و منذ وقتها و أنا في حال غير الحال ، مشاكل مع "سهام" لا تنتهي ، أغضب بشده ، أصرخ دون سبب في الجميع ، علاقتي مع اخوتي متوتره ، و عملى لا يزال كما هو من سئ لأسوء .

فتحتُ عيني على صوت هاتفي ، انها "سهام" تتصل بي منذ أيام و لا أعاود الاتصال بها ، شئ ما ثقيل على قلبي يجعلني اود الصراخ في الجميع ، تناولت الهاتف في يدي أخيرا و اجبتها ، جاءني صوتها الملهوف

سهام: ايوا يا محمد ، انت فين ، بتصل بيك من يومين مبتردش عليا

تنفست بتعب شديد

محمد: انا هنا يا سهام ، معلش مكنتش قادر اتكلم

سهام: طب انت كويس ، صوتك مش عاجبني ، لتكون تقلت في السجاير

ابتسمت لم تتغير كما هي منذ أن عهدتها

محمد: لا أنا كويس متقلقيش

سهام: متأكد ، طيب خليني أشوفك النهارده ، انت متغير بقالك فتره

محمد: مش قادر يا سهام ، مش قادر اتكلم حد و لا اتكلم مع حد ، حتى الشغل مبروحوش

سهام: طب فهمني مالك

محمد: مش عارف ، قلبي مقبوض و تعبان

صمتت قليلا ثم أكملت كلماتها

سهام: طيب اضغط على نفسك عشان خاطري و انزل نقعد في أي حته هنتكلم و الله و هتفك خالص ، اسمع كلامي

أغمضت عيني و تنفست بهدوء

سهام: يلا يا محمد ، قوم اتوضى و صلي كدا و انا هستناك في الكافيه الي اتقابلنا فيه اول مره فاكره

ابتسمت و أنا أتذكر تلك المره

محمد: ماشي يا سهام ، بالراحة و انت سايقه انا كويس

سمعت صوت تنفسها و الذي يدل على ابتسامتها

سهام: متقلقش عليا ، يلا قوم و انا هستناك هناك

محمد: ماشي

أغلقت الهاتف و أغمضت عيني اتنفس بهدوء ، حياتي ثقيله جدا ، كل شئ اسود في عيناي ، بالكاد أستطيع أن أعتني " بمها" هذه الصغيره ليس لها ذنب ، وقفت و ذهبت لدوره المياه حتى اتوضأ و لكن داهمني صوت "سما" من غرفتها ، أسمع شهقاتها انها تبكي ، غيرت وجهتي و وقفت أمام الباب أطرقه حتى أذنت لي بالدخول ، دخلت و إذا بها على السرير بأنف أحمر و عينان دامعتان ، اقتربت منها

محمد: مالك يا سما

بدأت تبكي بشده و تتكلم و انا لا أفهم ما تقوله

سما: حمزه .. اتخانقنا خناقه كبيره

محمد: ليه أيه الي حصل

سما: كان بيتكلم عن تجهيزات البيت و فجأه اتخانقنا

محمد: طب اهدي حبيبتي انا هكلمه و اشوفه

سما: الموضوع كبر يا محمد ، دا عاوز يفسخ الخطوبه

نظرت لها بتمعن

محمد: يفسخ الخطوبه ، ليه يعني ، أيه الي حصل بدأ كله

بدأت تبكي

محمد: انت متأكده انك معملتيش حاجه

سما: لا معملتش ، هو بقاله فتره متغير ، بيتخانق علطول و ساعات بحس انه نافر مني

عقدت حاجباي

محمد: لا يا حبيبتي مفيش الكلام دا انا هتكلم معاهد ، أكيد في سوء تفاهم

اومأت و بكت بشده

محمد: خلاص يا سما ، نامي انت عينك حمرا من كتر العياط ، انت بتعيطي من امتى

سما: من امبارح

محمد: ياخربيت عقلك ، يا بت هاتقعي مننا انت وشك أصفر ، بطلى عياط

اومأت ، اقتربت منها و احتضنتها

محمد: متشغليش بالك بحاجه ، أوعدك الموضوع هيتصلح

اومأت و تحركت لدوره المياه حتى تغسل وجهها ، وقفتُ اناظرها حتى رجعت للغرفه مره أخرى

محمد: أنا هنزل أشوف سهام و أرجع تاني ، اتصلي بيا في أي وقت ماشي

اومأت لي

سما: ماشي ، مها هتبات النهارده عند عزه

محمد: لا هجيبها و انا جاي ، متشغليش بالك بحاجه ، المهم انت ارتاحي ، هطلبلك أكل كليه لحسن تقعي

اومأت لي و ابتسمت

سما: ربنا ما يحرمني منك يا محمد

ابتسمت و احتضنتها

محمد: ولا منك يا سمسم

قبلت رأسها و ذهبت لدوره المياه اتوضأ ، توضأت و حركتي ثقيله كمن يجر وراءه كتله من الحديد ، خرجت و استقبلت القبله ، شخص داخلى يرفض أن يخضع لله و يصلى و شخص آخر يقاومه ، تنفست و بدأت أصلي ، ركعه ثم الثانيه حتى سجدت و حاولت الدعاء ولكن لا شئ على لساني ، فقط كل ما في رأسي اخوتي و أمي ، لسبب ما دب القلق قلبي

محمد: يا رب احفظ اخواتي و بارك في عمر ماما

انتهيت من صلاتي و كانت اول مره أدعو بتلك الدعوه ، لقد خرجت هكذا دون وعي ، دخلت غرفتي ارتديت ملابسي و خرجت بعد أن طلبت الطعام "لسما" و اطمئننت عليها ، دقائق حتى وصلت هدفي و قد كانت تنتظرني كما قالت ، حينما رأتني هبت لتقف بسرعه و نظرت لي

سهام: قلقتني عليك يا محمد

ابتسمت لها

محمد: انا كويس ، متقلقيش

سهام: متأكد

محمد: مخنوق يا سهام بس

نظرت لي و صمتت ، تنفست بهدوء

محمد: انا عارف أني بقالي فتره بتعصب بسرعه ، مش هخبي عليكي يا سهام ، من ساعه كتب كتاب ماما و انا مش طبيعي ، حاسس بخنقه و تعب و اجهاد ، معرفش دا سببه إيه

سهام: طيب حد دايقك او في عندك مشكله ، قولى يمكن اعرف أساعدك

محمد: الشركه زي ما هي انت عارفه وضعها ، انا و اخواتي متجمعناش من يومها ، و لما بنتكلم لازم ننهي المكالمه بخناقه ، دي مش طبيعتنا

سهام: طيب بص متفكرش في حاجه خالص ، خلينا نغير جو دلوقتي متتكلمش ، ولا تفكر في حاجه ، ان شاء الله هتبقى كويس

اومأت لها و ابتسمت

محمد: متزعليش مني يا سهام ، و الله انا بحبك ، بس ساعات بيخرج مني حاجات كدا انا نفسي مبكونش فاهمها

ابتسمت

سهام: و انا كمان بحبك يا محمد و هستحملك لحد ما يجمعنا بيت واحد و هفضل مستحملاك لحد آخر يوم في عمري

نظرت لها و ابتسمت ، لقد افصحت عن مشاعرها

محمد: الي انا سمعته دا بجد

اومأت بابتسامه

سهام: بجد ، انت و مها من ساعه ما دخلت حياتي تاني و هي متغيره بقا ليها لون غريب عمري ما دقته و لا حسيته ، و بصراحه يعني انت لازم تتحب

ابتسمت

محمد: أهو الكلام دا ينسيني كل حاجه تعباني في الدنيا كلها

ابتسمت لي و ناظرت عيناها اللاتي تلمعان ، يجب أن أقف على أرجلى لأجلها و لأجل الصغيره ، حينما ارتدت خاتمي أصبحت مسؤوليتي ، و لن أخذلها ابدا ، يكفيني لمعه عيناها التي أراها الآن
__________________________________

..(محمود)..

منذ أن حلمت "ابتهال" حلمها الغريب التي لم تفصح عنه و هي كل ليله تحلم أشياءً غريبه ، لم تفصح لي عن أي منهم أبدا ، إلا حلم اليوم ، افصحت عنه

محمود: طيب سمي الله و احكي

كانت ملامحها مبعثره من أثر النوم ، جلست بجانبي على كرسي الصاله و قد أغلقت صوت التلفاز لأسمعها بانتباه

ابتهال: انا بقالي كتير أوي بحلم احلام وحشه ، بس النهارده كان اوحشهم

نظرت لها و مسحت على شعرها بهدوء

محمود: احكي حبيبتي

ابتهال: حلمت إني انا و انت و سما و محمد و أسماء و طنط نادره في شقه ، و الشقه دي كانت ضلمه و فيها نور بسيط ابيض ، و احنا كنا خايفين أوي ، كل ما نتحرك من اوضه ندخل أوضه تانيه و الأوض مبتخلصش ، زي أكن الشقه ملهاش أول من آخر ، كل أوضه كان فيها حاجه مختلفه ، اوضه كان فيها أطياف سمرا كتير بتمنعنا نخرج من الأوضه ، كل ما حد يقرب من الباب تهجم عليه ، لحد ما طنط نادره قربت منهم و بعدتهم بايديها ، بصت لنا و ابتسمت و قالت متخافوش ، الاوضه الي بعدها كان في أرنب ابيض شكله وحش أوي أوي بيبص لنا و كل ما عينيه تيجي في عين حد فينا عينه تحمر ، قربت طنط نادره و شالته و رمته بعيد و بصت لينا و ابتسمت و قالت متخافوش ، كل مره كانت بتلمس حاجه منهم و تبعدها جسمها يتعب و وشها يصفر ، لحد ما دخلنا أوضه مليانه تعابين و عقارب ، كان هدفهم انهم يقرصو حد فينا ، قربت طنط نادره تاني و بعدتهم بأيديها ، لحد ما خرجنا من الشقه ، بمجرد ما خرجنا لقيت طنط نادره وقعت على الأرض و مبتتنفسش تحاول نصحي فيها مبتصحاش ، وصحيت على كدا

ظللت أناظرها بتركيز و لا أستطيع أن أتخيل ماذا تقول ، تفاصيل كثيره و مخيفه ، و الأهم أمي هي المشترك في كل هذا ، بدأت تبكي

ابتهال: انا خايفه عليها أوي يا محمود

احتضنتها و مررت يدي على ظهرها

محمود: متخافيش ، هتلاقيه حلم عادي

نفت برأسها

ابتهال: لا مش عادي ، العقارب و التعابين و الأطياف السوده دي مش طبيعيه

محمود: طيب اهدى ، انا هتصلك بيها دلوقتي أهو و هنطمن عليها

تناولت هاتفي و اتصلت على أمي ، لحظات حتى سمعت صوتها

نادره: ألو

محمود: ألو ، ايوا يا ماما ازيك

نادره: الحمد لله حبيبي انت عامل إيه

محمود: كويس و الله

نادره: أخبار ابتهال أيه

محمود: كويسه ، هي سمعاكي أهي

اقتربت مني و أجابت بصوت مهزوز

ابتهال: ازيك يا طنط

نادره: ازيك يا حبيبتي عامله أيه

ابتهال: انا كويسه ، انت كويسه ؟

نادره: اه ، مال صوتك في أيه

ابتهال: مفيش انا مهزوزه شويه بس

نادره: ليه حبيبتي انت تعبانه ، الحمل تاعبك ولا حاجه ؟

ابتهال: لا انا كويسه متقلقيش

نادره: طيب يا حبيبتي ، خدي بالك من نفسك ، حد بالك منها يا محمود ، هي خلاص هتقفل الرابع

محمود: حاضر يا ماما هي في عنيا متقلقيش

نادره: ماشي حبيبي ، انتو مش محتاجين حاجه

محمود: لا شكرا يا ماما

نادره: سلام

أغلقت الهاتف و نظرت "لابتهال"

محمود: ها ارتحتي ؟ هي كويسه أهي

نظرت لي بهدوء و اومأت

ابتهال: طب ممكن نشوف حد يفسر الحلم ، عشان خاطري

محمود: عنيا حاضر ، ادخلى اغسلي وشك و صلي يلا ، هعملك قطار بسرعه قبل ما أنزل صلاه الجمعه

اومأت و تحركت بهدوء لدوره المياه ، نظرت لها و رأسي يكاد ينفجر ، تفاصيل الحلم المخيفه جعلتني أخاف أكثر ، كنت أعلم أن "ابتهال" تحلم كثيرا ولكني لم اتوقع ان تكون أحلامها هكذا
___________________________________

..(أسماء)..

عادل: يعني مش معقول كدا ، كدا كتير بصراحه

ظللت أجلس على السرير و اتنفس بهدوء و أراه يصرخ أمامي

عادل: انت ساكته ليه ردي عليا

سمعت صراخ "عُمير" ، اتجهت له لأسكته

عادل: سيبي الولد و ركزي معايا

نظرت له

أسماء: نعم يا عادل

عادل: يا برودك يا أسماء ، أيه مالك بقالك فتره مش مظبوطه في أيه

أسماء: مفيش حاجه يا عادل

عادل: لا في ، في إن حضرتك مش طايقه ألمسك في إيه

أسماء: تعبانه يا عادل

عادل: شهر ! تعبانه لمده شهر ؟

أسماء: اه تعبانه ، هو مش من حقي اتعب

عادل: لا لا من حقك طبعا ، و تتحرق حقوقي انا صح

نظرت له ، اشعر بالنفور منه بطريقه غريبه ، حتى أنا أتعجب مما يحدث

عادل: انا كلمتك أكتر من مره بهدوء و انت ردورك بقت بارده ، انت متعرفيش ان الي بتعمليه دا حرام

أسماء: عاوز أيه يا عادل

صرخ في وجهي بعصبيه

عادل: مش عاوز مش عاوز

ابتعد و ارتدي ملابسه و خرج من البيت بعد أن صفع الباب بقوه ، تنفست و بدأت أبكي بلا توقف ، لم أمنع "عادل" عني يوما و لكني نافره منه بشده ، لا أريده ، عن.ما يقترب مني افعل أشياءً غير منطقيه ، إما أن أهرب منه أو أمثل التعب ، ينقذني "عُمير" ، هناك شئ ما غريب ، لا أجد من أتكلم معه ، لقد بلغ حده معي ، أعترف أنني أصبح بارده في ردودي معه .

بدأت انظف البيت و أنا أشعر بالتعب ، هذه المره انا متعبه حقا ، هناك حِمل على كتفاي ، ظهري يؤلمني و كتفاي يؤلمانني ، هناك شئ غير مفهوم يحدث معي ، دخلت المطبخ و بدأت أطبخ ، انهيت كل شئ حتى الساعه الرابعه عصرا ، "عادل" لم يعد للمنزل ، نظرت لنفسي في المرآه ، يجب أن أكسر ما أشعر به ، هو زوجي و ما أفعله ليس صحيحا ، سأكسره الليله سأفعل ، دخلت غرفتي تجهزت و تعطرت سأتغلب على أي مشاعر نفور الليله ، جلستُ انتظره حتى الساعه السابعه مساء ولكن لم يأتي ، تناولت الهاتف و اتصلت به

عادل: نعم يا أسماء

أسماء: انت اتأخرت ليه

سمعته يتنفس و اطلق زفيرا طويلا

عادل: يفرق معاكي ، انا برا

أسماء: ممكن ترجع البيت نتكلم

عادل: عشان نتشاكل تاني

أسماء: لا مش هنتشاكل ، عشان خاطري تعالى

صمت قليلا

أسماء: عادل

عادل: نعم

أسماء: تعالى بيتك عشان خاطري ، هنتكلم و نحل كل حاجه بهدوء

عادل: ماشي

أغلقت الهاتف و شرعت اطمئن على المنزل ، اعطره و أتفقد "عُمير" انه نائم ، أسخن الطعام و أتفقد ملابسي ، في غضون ثلاثون دقيقه كان قد وصل و دخل المنزل ، وقف يناظرني بهدوء و على ملامحه الضيق ، اقتربت منه و احتضنته

أسماء: أنا أسفه ، تعالي

سحبته من يده و جلست مقابله

أسماء: انا اسفه

عادل: يعني لازم أصرخ و اتعصب يا أسماء

أسماء: لا و الله ، انا حاسه اني مش طبيعيه

أغمض عينه

عادل: يادي الكلمه الي مبتسيبيهاش ، انا تعبانه انا مش طبيعيه

أسماء: لا يا عادل دا بجد ، بقالي فتره مش طايقه لمستك ليا ، معرفش ليه

فتح عيناه و ناظرني

عادل: الي يسمعك يقول انك مغصوبه عليا مش بقالنا ٣ سنين و نص متجوزين

أسماء: يا عادل أرجوك افهمني ، أنا بحس بنفور غريب لما بتقرب ، مبيبقاش مني ، في حاجه جوايا هي الي بتبعدني

عادل: طيب نمشي معاكي للآخر جواكي ازاي يا أسماء

أسماء: صدقني ، بلاقيني عملت حاجات و قلت حاجات أنا مش واعيه بيها

نظر لي بهدوء و على ملامحه الضيق

أسماء: صدقني يا عادل ، عادل انا بقالي فتره بحس ان وانا نايمه في حاجات بتحصلي

عادل: أيه الي بيحصلك

صمت قليلا

أسماء: كإن في حد جنبي جنبي أوي

تغيرت ملامحه للجد قليلا و بدأ يركز معي

عادل:جنبك اوي ازاي يعني

نظرت له بخجل

أسماء: جنبي يا عادل ، أفهم بقا

نظر لي بهدوء

أسماء: زي ما بقولك كدا ، ببقى حاسه بحاجه هي مش موجوده ، بس حاساها و الله العظيم بتكلم بجد

عادل: انت متأكده من الي بتقوليه

أسماء: و انا ههزر في حاجه زي كدا ، الاحساس كل كل يوم عندي من ساعه كتب كتاب ماما ، و لو تلاحظ دي نفس الفتره الي بعدت عنك فيها

صمت قليلا و ناظرني بهدوء

عادل: طيب ممكن نكون محسودين ولا حاجه ، عادي بتحصل كتير ، احنا ياما اتحسدنا

نظرت له

أسماء: وحياتي عندك ، متزعلش مني ، بص انا هتغلب على الأحساس دا بس و حياتي ما تزعل

اومأ و اقترب مني يحتضنني

عادل: حاضر ، متزعليش مني لما اتعصبت

أسماء: لا دا حقك ، أنا الي زودتها

قبل يدي ثم رأسي

عادل: على عيني و راسي يا مسكر

ابتسمت ، سحبت يده للمطبخ و أعطيت له الطعام ، بدأ يأكل بهدوء و داخلى يغلى ، تنفست بهدوء مقرره أن اتغلب على ما أشعره الليله

عادل: تسلم ايدك

أسماء: بألف هنا

جلسنا أمام التلفاز قليلا ، أصابعه تتغلغل في شعري ، و رأسي على كتفه ، انتفضت حين سمعت صراخ "عُمير" ، تحركت له اهدئه يبكي باستماته و كأن شخصا ما قد ضربه او أذاه ، ظللت اهدئه حتى نام مره أخرى ، جلست على السرير و جلس "عادل" بجانبي يبتسم ، ابتسمت و احتضنته
___________________________________

..(عادل)..

استيقظت على صوت المنبه الساعه السابعه صباحا ، جسدي يؤلمني كل شبر فيه مؤلم ، أشعر و كأن أحدا ما قد ضربني حتى تكسرت عظامي ، نظرت يميني و اذا هي نائمه بجانبي ، ابتسمت و حركات يدي ألمس شعرها ، أقسم أن كل عظمه في عظامي كانت كالمكسوره ، أبعدت الغطاء عني و تحركت بتعب شديد ، حتى وصلت للحمام ، خلعت ملابسي حتى أستحم ، سلطت الماء على جسدي و لكن جسدي يؤلمني بشده ، قطرات الماء تؤلمني ، استغرقت وقتا طويلا حتى انظف نفسي ، نظرت الي ذراعي و إذا بها كدمات بنفسجيه ، عقدت حاجباي لم تكن موجوده أمس ، ضغطت عليها و اذا هي تؤلمني بشده ، بحثت عن كدمات أخرى في جسدي ، هناك المزيد !! في أرجلى و ذراعي و بطني ، ما الذي يحدث .

خرجت من دوره المياه و بدأت أتحرك بتعب شديد للغرفه ، وجدتها تهدئ"عُمير" حتي ينام و على صدرها و زراعيها كدمات هي الآخرى ، نظرت لي و شهقت

أسماء: يالهوي ، أيه دا

اقتربت مني تلمس جسدي و تضغط على كدماتي فأتألم

أسماء: أيه الي حصل يا عادل ، طلعت الكدمات دي ازاي

عادل: مش عارف ، لقيت جسمي واجعني الصبح و فوجئت بالكدمات دي

أسماء: يالهوي يا عادل في جسمك كله ، صدرك و ضهرك و دراعك

عادل: مش عارف يا أسماء ، انت كمان عندك

إبتعدت عني و نظرت لنفسها في المرآه و شهقت

أسماء: يالهوي ، أيه دا جم منين دول

عادل: واجعينك

أسماء: لا ، هم لون بس

عادل: متأكده

ضغطت على كدماتها و لم تتألم

أسماء: أهو انا مش تعبانه أصلا ، انت عامل كدا ليه

عادل: مش عارف ، انا مش قادر اتحرك

أسماء: خلاص نام ارتاح ، انا هجيب لك كريم أحطه للكدمات دي ، لازم نشوف دكتور يا عادل

أسماء: ماشي ، أقف على رجلى بس

جلست على السرير و هرعت بسرعه لتحضر مرهم للكدمات ، بدأت تضعه على كل مكان به كدمات ، أحضرت لي ملابس و ساعدتني على ارتداء الملابس

أسماء: بس واحده واحده ، نام و ارتاح ، هشوفلك دكتور يا عادل

اومأت بتعب شديد ، لم تكن تلك الكدمات في جسدي حتى البارحه ، احاول التذكر ما الذي حدث أمس ليحدث كل هذا ، لا شئ غريب قضيت ليلتي مع "أسماء" و نمت ، لا شئ غريب
___________________________________

..(حمزه)..

اجلس أمام "محمد" و "محمود" و "سما"

محمود: طب صلى على النبي كدا و فهمني أيه المشكله

حمزه: عليه الصلاه و السلام ، سما عنيده يا محمود ، أقولها يمين تقولى شمال

محمد: طيب وضحلى كدا موقف

حمزه: يعني مثلا نجيب السيراميك أيه يا سما ، اتفقنا على لاتيه ، و انا بشتري تروح في لحظه مغيره رأيها لا انا عاوزه ابيض

سما: يا حمزه ما انا قلتلك وقتها اني كنت محتاره

محمود: سما ، اهدي خليني أتكلم مع خطيبك

حمزه: دا غير الشغل الي مش راضي يجي ابدا دا ، ابعتلها في شغل كل شويه تطلعلي فيه مشكله شكل

محمد: طيب انت مدايق من الشغل

حمزه: لا ، بس قلتلها تبطل تدور و هخليها في المزرعه عندنا في الصعيد ، إلا لا و ألف لا

نظر "محمد" "لسما"

محمد: حصل يا سما

سما: حصل و قلته ماشي بس انا زهقانه و عاوزه أشتغل ، متعودتش أبقى في البيت

حمزه: و هل أنا عارضتك ، انا عاملك كل الي انت عاوزاه ، عاوزه أيه تاني

محمود: اهدى بس كدا يا حمزه و متعليش صوتك

حمزه: يا محمود انا مش على صوتي بس سما مستفزه بصراحه

سما: مستفزه في إيه هو انا اتكلمت ؟

صرخ "محمد" بها

محمد: وبعدين يا سما بقا ، مش في رجاله قاعده بتتكلم ، اهدي

سما: يعني انا بردو الي غلطانه

محمود: اهدي يا محمد اهدى يا سما في أيه ، بسم الله الرحمن الرحيم

حمزه: بص يا محمود من الآخر كدا ، انا بحب سما اه بحبها ، عاوزها مراتي اه عاوزها ، بس كدا مينفعش

محمود: انا بردو مفهمتش كدا دا الي هو أيه يا حمزه ، انا لحد دلوقتي مش شايف مشكله جوهريه عشان نحلها

محمد: بص يا حمزه انت شاب و لسه داخل على جواز ، احنا كلنا بيجيلنا وقت بنتعب و نتخنق و بالذات في فتره التجهيزات دي ، بص افصلو عن بعض يومين تلاته كدا يهدى الموضوع و ان شاء الله هترجعو كويسين

اومأت و نظرت "لسما" لا تزال تخطف عيني حينما أراها

حمزه: ماشي يا محمد

محمود: بلاش تأخد قرارات متسرعه في وقت غضب او ضغط

ظلت تناظرني بهدوء و عيناها تتجولان بيني و بين اخوتها الإثنين حتى انتهت الجلسه ، نظرت لها و هي خافضه عينيها تفرك أصابعها

حمزه: انا همشي

نظرت لي بهدوء و أومأت ، وقفت ترافقني لباب المنزل ، وجهها الصامت يجعلني أفكر فيما قررته أكثر من مره لم أعهدها هكذا

حمزه: لو احتجتي حاجه كلميني

سما: شكرا

نظرت لها و هي تكلمني بهدوء و عيناها مخفضتان

حمزه: استحمليني شويه انا مضغوط الفتره دي ، و انت بردو ملهاش لازمه تنشيف الدماغ

اومأت في هدوء و لم ترد ، أعلم أنها غير مقتنعه لما أقول ، قد أبدو أحمقا الآن ، منذ قليل كنت أصرخ معترضا و اريد فسخ الخطبه و الآن أحاول ان ألاطفها

حمزه: اوعي تعمليلي بلوك

نظرت لى و صمتت ، عملت ان مهما فعلت الآن لن يجدي نفعا هي غاضبه ، إبتعدت عن المنزل و ركبت السياره اعود للقاهرة ، و انا في منتصف الطريق داهمني اتصال أمي

ماجده: انت فين يا حمزه ، انا و ابوك قدام الباب

حمزه: انا جاي في الطريق يا أمي كنت بشوف سما ، هتلاقي مفتاح تحت الجزامه دا الكالون الجديد غيرته و انتو في الصعيد

ماجده: طيب يا حبيبي ، كيفها سما زينه هي

حمزه: لا ، متخانقين خناقه كبيره

ماجده: ليه كدا ، أيه الي حصل

حمزه: معرفش يا أمي ، انا بقالي فتره بتعصب منها على اتفه حاجه و كل شويه خناق ، انا كنت رايح النهارده أخد الشبكه

ماجده: يادي الوقعه الطين ، ليه أيه الي حصل

حمزه: خناقاتنا عبيطه و لكن كبرت في راسي من يومين ، لولا اخواتها كان زماني فاسخ الخطوبه

ماجده: ليه كدا يا حبيبي

حمزه: معرفش لما بكلمها بتخنق ، بعدت عنها فتره و كل ما نتقابل او اقول لها على حاجه ، الطبيعي بتاعها ألاقيها يا اتعصبت يا أنا اتعصبت

ماجده: و دا شعور جديد ؟

حمزه: بقاله شهر معايا ، بس انا عمري ما حسيت كدا معاها ، عمرى ما مليت منها و من عنادها و عصبيتها

ماجده: طيب ارجع بالسلامه و حد بالك من الطريق زين و نرجع نتكلم

حمزه: طيب
___________________________________

..(نادره)..

لقد مر على زواجي من "طاهر" شهر و بضعه أيام ، أشعر بالسعادة و السلام ، جاءت "رودينا" البيت و بدأت تستعد لاختباراتها ، استقبل الضيوف كل فتره للتهنئه بزواجنا ، حياتي مستقره و جميله ، أطبخ و أنظف اهتم بتفاصيل "رودينا" و أستقبل "طاهر" بكل حب و ابتسامه آخر اليوم ، كنت جالسه مع "طاهر" و "رودينا" نتكلم عن مواضيع مختلفه

رودينا: ايوا انت متعرفيش عندنا القصر الي جنب *****، دا معروف انه مهجور من زمان يا نونه

نادره: و الله أنا أسمع عنه بيقولو ان في حاجات كدا بسم الله الرحمن الرحيم

طاهر: لا لو على بسم الله الرحمن الرحيم ، فهم في كل حته متقلقيش

نادره: طول ما الواحد محصن نفسه و بيصلي مفيش حاجه هتيجي نحيته ان شاء الله

رودينا: لا بس بجد دا أنا أسمع حكايات مرعبه هناك ، فجأه يولع لوحده و فجأه يتطفى ، دا حقيقي بجد

طاهر: حقيقي ، مش الجن اتذكر في القرآن يبقى حقيقي

نادره: بس ربنا قال أيه "وما هم بضارين به من أحد إلا بإذن الله"

رودينا: طب ما كدا ربنا عاوزنا نتئذي ، يعني لو حد فعلا اتلبس ، كدا هو بيتعذب

طاهر: دا اختبار من اختبارات ربنا يا رودينا ، و بعدين احنا ايه هيدخلنا في المواضيع دي ربنا يعفينا

نادره: لا يا طاهر خليها تفهم ، بصي حبيبتي في ناس مؤذيه مبترضاش بقضاء ربنا ، بتطر تستعين بالجن عشان يعملولهم طلباتهم و دا كفر صريح بالله ، ربنا بيسمح بحاجه شبه كدا ليه ، زي المرض ، هو ربنا يحب يشوف عبده تعبان أكيد لا ، بس ربنا بيخليه يتعب يرفعه درجات أو يقلل من ذنوبه ، و كل ما الابتلاء كان شديد كل ما الحسنات زادت

رودينا: طب و الي بيموتو بسبب الجن دول أيه

نادره: بيكون ابتلاءهم كدا ، بس متتخيليش بقا جزاءهم عن ربنا أيه ، ياه دا كفايا صبرهم على السحر و تعبه

اومأت لي و صمتت قليلا

رودينا: هو انا ممكن استأذنكم في حاجه

طاهر: اتفضلي

رودينا: واحده صاحبتي مامتها بتتعالج بقتلها فتره من السرطان و حد اقترح عليها ان شيخ يقرأ يمكن تكون مسحوره ، و صاحبتي هتحضر الجلسه مع مامتها ، ممكن أحضر معاها

انتفض "طاهر" و تحدث بعصبيه

طاهر: لأ طبعا ، أيه يا رودينا الي بتقوليه دا

رودينا: دا قرآن يا بوب و الله انا شفت له فيديو وهو شغال على حالات كتير مبيقولش غير قرآن

طاهر: و هو انت بتتفرجي عليه كمان ، و انت أيه عرفك انه مش بيقول حاجه تانيه في النص ، لا يعني لا

رودينا: طيب خلاص انا كنت بستأذن ، مش محتاج كل دا ، انا ممكن أجيبلك الفيديو تشوفه و الله قرآن

طاهر: رودينا و بعدين

نادره: روحي يا رودينا شوفي وراكي أيه ، يلا حبيبتي

إبتعدت "رودينا" و ناظرته بهدوء

نادره: أيه مالك اتعصبت فجأه كدا ليه

طاهر: نادره الموضوع دا بالذات لا

نادره: طب فهمني في أيه

نظر لي بهدوء و سحبني لغرفتنا

طاهر: انا حضرت جلسات صرف جن كتير و عارف توابعها أيه

عقدتُ حاجباي

نادره: حضرت ازاي

طاهر: انا كنت فضولى شويه و انا شاب صغير ، كان عندنا أمام جامع بيشتغل في الموضوع دا لوجه الله ، و قررت اروح معاهد مره ، و الموضوع صعب جدا يا نادره مش سهل

جلست بجانبه باهتمام

نادره: صعب ازاي يعني ، انت كنت موجود و شفت كل حاجه

طاهر: اه و قعدت بعدها أيام جسمي مكسر و تعبان و فين و فين لما قدرت اتخطى الي شفته

نادره: شفت أيه

طاهر: شفت الي شفته بقا يا نادره خلاص ، المهم متفتحيش الموضوع دا تاني بالذات مع رودينا ، رودينا طلعالي حشريه و فضوليه بلاش

نادره: حاضر ، عنيا

لمس وجههي

طاهر: انت وشك أصفر ليه ، انت تعبانه ؟

لمست وجنتاي

نادره: مجهده شويه بس ، انا كويسه متقلقش

طاهر: خدي بالك من نفسك ، متتعبيش نفسك أوي

ابتسمت و اومأت

نادره: عنيا حاضر
___________________________________

..(نفيسه)..

الحمد لله أكلت "نادره" الطعام ، أنتظر خبر مرضها او موتها بفارغ الصبر ، مر شهر ولكن لا خبر ، ماذا يحدث ، لم يخطء الشيخ "داوود" قبلا ، أزوره كل أسبوع لأطمئن ولكنه يقول كما يقول دائما ، السحر في أجسادهم سيظهر في الوقت المناسب ، ولكن فاض بي الكيل ، لن أسمح لها ان تتزوج و تعيش مستقره و انا في حياتي اتعفن ، أتظن أن بجمالها ستعيش أفضل مني ، تزوجت "وائل" أخي لتعيش أفضل حياه فينا ، ولكنه مات ، ظللت أراقبها و استمتع بذلها و ألمها على ابنائها ، ولكن لا فائده كانت تعمل و تربح و تربي أولادها ، و انا أُضرب و أُعنف حتى تطلقت من هذا الوحش ، و الآن تتزوج مره أخرى ، لماذا ؟ ماذا فيها أفضل مني ؟ .

خرجت من منزلى متجهه لبيت الشيخ "داوود" ، انتظر دوري حتى جاء

داوود: اهلا بست نفيسه

نفيسه: أرجوك قولى حاجه جديده

داوود: السحر ماشي في جسم اولاد أخوكي حلو أوي ، واحده اسمها سما بينها و بين فسخ خطوبتها حبه صغيرين ، و واحده اسمها أسماء الجن رن جوزهت علقه محترمه من كام يوم ، واحد اسمه محمد الدنيا بايظه معاه خالص ، شغله و بنته و خطيبته كلهم بايظين ، و واحد اسمه محمود دا تقيل شويه السحر مش جايب معاه نتيجه ، محصن نفسه كويس بس هجيبهولك

قاطعته بسرعه

نفيسه: و نادره امهم

داوود: اما نادره بقا هي تقيله هي كمان بس بدأت تتعب ، شويه شويه

نفيسه: لا انا مش عاوزاها شويه شويه ، انا عاوزه أشوف كل حاجه دلوقتي ، مش عاوزه استني

داوود: يا ست نفيسه الموضوع مبيمشيش كدا

نفيسه: اتصرف يا شيخ داوود

نظر لي بهدوء

داوود: انا ممكن اعملها سحر تاني ، بس دا مش هيكون قليل

نفيسه: هدفعلك بس استني عليا أجمع فلوس

داوود: لا يا ست نفيسه انت عارفه لازم الدفع وقتي

نظرت له

نفيسه: يا شيخ داوود عشان خاطري لو ليا خاطر عندك ، دا انا زبونتك من زمان

داوود: ماشي يا ست نفيسه ، بس السحر دا عاوز شغل مختلف شويه

نفيسه: اطلب و انا أنفذ ، هعملك كل الي انت عاوزه

ابتسم لي الشيخ داوود

داوود: متأكده ؟ اصله لازم يكون بالتراضي

نظرت له مستفهمه حتى فهمت ما يقصد

نفسيه: نعم يا شيخ داوود ؟ لا طبعا ، انا ست محترمه

داوود: خلاص براحتك ، يبقى تستني لحد ما السحر يشتغل ، او تجيبي حق الجديد غير دا مينفعش

خرجت من عنده و أنا أشعر بالغضب ، كيف يطلب مني شيئا كهذا ، هدفي من ممارسه السحر أن أحقق ما لم يتحقق لي ، لست بسيده زانيه ، خرجت بسرعه و أنا أفكر في السحر الذي فعلته لها و أدعو أن يتحقق بسرعه
___________________________________

..(ابتهال)..

مر أسبوع على حلمي الأخير ، لم أحلم بعدها أحلام ابدا ، ولكني كل يوم أشعر بالخوف أكثر على حماتي ، هناك شئ ما يجعل قلبي يقبض حينما افكر فيها ، اليوم حماتي قد عزمتنا على الغداء في بيتها الجديد ، جميع أولادها معا ، تجهزت و خرجت لأرى "محمود" ينتظرني و عيناه مغمضتان ، رأسه على ظهر الكرسي يريحها

ابتهال: انا جاهزه

فتح عيني و ابتسم حينما رآني

محمود: أيه الحلاوه دي

ابتسمت و مسحت على ملابسي

ابتهال: حلو ؟

محمود: قمر ، أهو أحلى حاجه فيه أنه مبين بطنك الصغننه دي

ضحكت و لمست بطني ليظهر انتفاخها الطفيف

ابتهال: بس مش متخني صح

محمود: ولو متخنك ، انت حلوه بكل أحوالك

ضحكت و اقتربت منه أقبله

محمود: لسه بتحلمي أحلام وحشه

نفيت برأسي ، ابتسم لي

محمود: الحمد لله ، داومي على سوره البقره دائما و هتبقى زي الفل

ابتسمت و اومأت له ، أمسك يدي و توجهنا للباب لاركب السياره و نتجه الي بيتها الجديد ، ترجلتُ من السياره و بدأت امشي بجانبه ، رأيت سياره "محمد" و "عادل" يبدو أنهم سبقونا هناك ، دخلت المصعد و لحظات حتى كنت امام بيت شقتها .

طاهر: اهلا أهلا اتفضلو

دخلت و اومأت له ، احتضن "طاهر" "محمود" و دخلت لأرى الفتيات ، الجميع مع حماتي في المطبخ يساعدنها ، ما إن رأتني ابتسمت و اقتربت مني تحتضنني

نادره: حبيبه قلبي ، وحشتيني يا ابتهال

ابتهال: و انت كمان يا طنط

ابتعدت لأرى وجهها

ابتهال: مالك يا طنط انت تعبانه

سهام: انا حسيت بكدا بردو بس هي مش مصدقه

سما: شفتي يا ماما حتى ابتهال قالت انك تعبانه

نادره: انا كويسه ، شويه اجهاد بس مش أكتر

دب الرعب في قلبي و تذكرت الحلم

ابتهال: اجهاد مالك يعني ، حاسه بايه

نادره: انا كويسه حبيبتي ، يلا ارتاحي انا جايه أريحكو النهارده مش اتعبكو معايا

سهام: ازاي يا طنط ، تعبك راحه

دخلت أسماء المطبخ و "عُمير" في يدها

أسماء: ماما معلش معندكيش هنا كريم التهابات ، لحسن نسيت الكريم بتاعه في البيت

لاحظتني و ابتسمت

أسماء: أهلا يا ابتهال معلش حبيبتي عُمير مخليني بلف حولين نفسي

ابتهال: لا يا حبيبتي براحتك

اقتربت حماتي

نادره: استني اخلي طاهر يتصل بالصيدليه ، عاوزه حاجه تانيه

أسماء: لا شكرا

إبتعدت حماتي و لاحظت كم فقدت من وزنها ، لا أعرف هل أبالغ أم أنها حقا متعبه ، نظرت للفتيات

ابتهال: هي طنط خاسه أوي و لا انا غلطانه

أسماء: هي وشها أصفر و خاسه فعلا

سما: يعني مش أنا الوحيده الي حاسه بكدا ؟

سهام: متلقوقهاش يا بنات ، يمكن مجهده شويه فعلا

نظرتُ لهن و قد أدركت انني لست الوحيده التي أرى هذا
___________________________________

..(طاهر)..

أمامي الشباب يتحدثون " محمد" "محمود" "عادل" "حمزه" ، "سامي" و زوجته سيأتيان بعد قليل ، و "رودينا" ستنتهي جامعتها و تلحق بنا خلال ساعات

طاهر: منورين يا رجاله

محمود: دا نورك يا طاهر و الله ، أخبارك ايه

طاهر: كويس و الله الحمد لله

محمد: أيه يا عادل مالك متفكك من بعضك كدا ليه

نظرت "لعادل" و الذي قد ظهر عليه أنه متألم

عادل: لا انا كويس ، جسمي واجعني بس

حمزه: ألف سلامه يا عادل

نظرت "لحمزه"

طاهر: تعالى هنا ، انت أيه الي حصل مع سما دا ، هو عشان اتشغلت شويه تبقى عاوز تفسخ الخطوبه ، احنا فينا من كدا يا حمزه

اعتدل "حمزه" في جلسته

حمزه: لا و الله يا طاهر ، بس انا كنت مضغوط شويه بس

طاهر: و هم الرجاله لما بيتضغطو بيهربو ، لا أنا أفكر مليون مره بقا ، سما دي بنتي

رفع "حمزه" عيناه لعيناي و صمت الجميع

حمزه: لا و الله يا طاهر ، احنا كان بقالنا فتره بنتخانق على كل حاجه و أي حاجه ، بس الدنيا هديت دلوقتي

طاهر: و انا أيه يضمنلى بقا يا حمزه ، معلش يعني احنا رجاله زي بعض ، بعد ما تتجاوز البنت تتغط في مسؤولياتك تقوم هارب ، دا أيه دا ان شاء الله

صمت قليلا و لكن تدخل "محمود"

محمود: بالراحة يا طاهر ، هم خلاص اتصافو ، و بعدين سما هي كمان كانت مدايقه

نظرت "لمحمود" و صمت

محمد: مش كدا يا حمزه و لا أيه

اومأ بهدوء ، استقمت و نظرت له

طاهر: قوم معايا عاوز أكلمك شويه

استقام معي و خرج للشرفه ، وقف بالكاد أرى وجهه

طاهر: أرفع راسك ، انا لو بشد عليك بشد عشان هتبقى جوز بنتي

رفع رأسه و نظر لي

طاهر: انا عارف ان وضعي حساس شويه ، بس أنا بتعامل بعشم معاهم ، هم ولادي زي ما ولادي ولاد نادره ، وانت ابني بس لازم اتطمن على البنت الأول

حمزه: مش هكدب عليك يا طاهر ، احنا بقالنا فتره بنتشاكل على تفاهات ، لون سيراميك ، لا هي مردتش عليا ، او أنا مكلمتهاش في اليوم ، حاجات يعني كنا بنعديها قبل كدا ، و بصراحه الاندفاعه الي حصلت دي كانت غصب عني

ظللت أسمعه بهدوء

حمزه: كل ما ننزل في حته يا يحصل حاجه يا نتشاكل ، يا عربيه كانت تخبطنا ، يا ندب خناقه محترمه ، يا نمسك الحاجه الي شارينها تنكسر في أيدينا ، حاجات كدا مش مفهومه

طاهر: الكلام دا من امتى

حمزه: بقاله يجي شهر أهو ، و الله انا بحبها و يعز عليا زعلها بس حقيقي يومها انا اتملكني حاجه غريبه اني لازم أفسخ الخطوبة ، و و الله ندمت بعدها على التهور دا و أخدت وقت كتير عشان أصالحها

اومأت و رتبت على كتفه

طاهر: خدها نصيحه مني يا ابني انا راجل ٥٠ سنه ، عشت كتير و شفت كتير ، التهور في الحياه الزوجيه وحش و غلط ، أوعى تاخد قرار متهور لمجرد انك تعبت ، الحاجه الي بتتكسر مبتتصلحش ، و في الآخر انت الي هتندم

اومأ لي و ابتسم

حمزه: حاضر

رجعت معه و لاحظت "عادل" اقتربت منه و همست له بأن يأتي معي للشرفه

عادل: ايوا يا طاهر

طاهر: مالك ، انت مش على بعضك ، عندك برد ولا أيه

صمت قليلا و انا أرى التردد في عينيه

طاهر: في حاجه

عادل: انا مش عارف اذا لازم أقولك ولا لا

عقدتُ حاجباي

طاهر: لا كدا بقا انا لازم أعرف في أيه

عادل: انا بقالي أسبوع كل يوم بصحى جسمي مكسر أكنى واحد علقه

طاهر: ما يمكن برد

عادل: لا مش برد ، عشان اول يوم حصل لي فيه كدا و أنا جسمي مليان كدمات بتوجع أكني مضروب بجد

عقدتُ حاجباي في تركيز

عادل: بص انا دماغي هتنفجر ، أسماء كانت رافضاني نهائي ولما قربتلها دا الي حصل ، غير انها قالت انها حاسه ان في حد جنبها

طاهر: اه ، انت محصن نفسك يا عادل

عادل: الي بقدر عليه

طاهر: طيب شغل سوره البقره في البيت و متناموش غير على طهاره

عادل: ماشي ، بس دا أيه دا ، اصله مش طبيعي بردو

طاهر: دا جن يا عادل ، و شكله كدا معاكم من زمان ، شغل سوره البقره لو مرتحش عرفني أشوفلك حد يقرأ على البيت

نظر لى

عادل: أيه دا يا طاهر ، احنا فين و الجن فين ، احنا في حالنا

طاهر: كلنا في حالنا يا عادل ، المهم انت حصن نفسك انت أسماء و أوعى تنام من غير طهاره أوعى

اومأ و خرج ، مرحبا مرحبا ، لولا فضولى في هذه المواضيع لما كنت فهمت ما يحدث
___________________________________

..(نادره)..

إنها السابعه مساءً ، أطمعت أطفالي و أزواجهم و الآن نجلس نتكلم بهدوء ، أشعر بالتعب قليلا لابد أنه بسبب اجهاد اليوم ، عينا "ابتهال" تراقبني

نادره: ابتهال

نظرت لي

ابتهال: نعم

نادره: انت من ساعه ما جيتي و انت عينك عليا ، في حاجه

ابتهال: بصراحه يا طنط انا خايفه عليكي

ابتسمت

نادره: خايفه عليا من أيه يا حبيبتي

ابتهال: أصلي حلمت حلم وحش كدا و بصراحه من يومها و انا خايفه

اقتربت أمسح على ظهرها

نادره: للدرجادي ، انا كويسه أهو و الله

اقتربت "سما"

سما: ماما ، احكيلي اخبار الحياه بعد الجواز أيه

نظرت لها و ضحكت

نادره: شفتي بنتي الهبله ، أهو محدش هيجنني قدها

ابتسمت "ابتهال" و عبست"سما"

سما: كدا يا ماما ، دا بدل ما تفيدي بنتك حبيبتك

ضحكنا جميعا

أسماء: بس يا سما لمي نفسك ، هتقولك أيه يعني

اقتربت"سهام" و جلست بجانبي تضع يدها على جبهتي

سهام: طنط انت كويسه

ابتسمت

نادره: لا حول ولا قوه الا بالله ، ايوا حبيبتي انا كويسه ، هيكون مالي يعني ، ما انا بضحك و أهزر أهو

سهام: أصل وشك بهتان أوي عن الصبح ، طب استني أقيسلك الضغط

نادره: يا حبيبتي انا كويسه مفياش حاجه

دخلت "رودينا" و هي تحمل "مها"

رودينا: نونه أنا هنزل أجيب لمها حاجه حلوه ماشي

نادره: طيب قولى لبابا الأول

سهام: استني يا رودينا خدي فلوس

أمسكت ذراعها

نادره: بس يا هبله انت فلوس أيه

نظرت "رودينا"

نادره: تحت المفرش الي على الكومودينو في الأوضه هتلتفي فلوس خدي منها الي تحتاجيه

ظللت أتكلم مع الفتيات حتى حان ميعاد الرحيل

سما: استنو نتصور الأول

وقفت بجانب "حمزه" و هي تمسك هاتفها لتصور سيلفي ، وقف الجميع بجانب أزواجهم ، لحظه شعرت بالدوار و لم اتحرك بعد ، جاء "طاهر" يمد يده لي و همس

طاهر: انت كويسه

اومأت و وقفت بجانبه

سما: يلا كله يقول بطيخ

صوره ، إثنان ، ثلاثه ، الأصوات حولى تبتعد شيئا فشيئا ، الرؤيه أصبحت غير واضحه ، تنفسي ثقيل ، يد "طاهر" على خصري ، الدوار يزداد ، أملت بجسدي عليه

طاهر: انت كويسه

أمسكت ذراعه و أغمضت عيني اتنفس بهدوء

محمود: ماما انت كويسه

فتحت عيني نظرت لهم ثم لم أرى إلا السواد
.

.

.

.