ناراحيدرة الفصل الأربعون 40 - بقلم Namarq

رواية : نــاراحيــدرة

////بقلم نمارق رحيم ////

بارت _39

⭐⭐⭐⭐⭐⭐⭐⭐⭐

سالار :- دا تعترف بلسانك! لك شنو تضحك على اختي انت؟؟ قبل ما تتزوجها انطيتني علم گلت شهر واطلگها، مو هذا كلامك؟؟ لعد شنو حامل؟؟

هز راسه بعصبية :انا ما مجبور ابرر لأي شخص، كلتلها اسمعي مني قبل ما تقررين بس هيه عاندت وما سمعت ..لذلك خل ترتاح اي رقية حامل و مني، زين ؟

-چنت هواي مخدوعة بيك وضنيتك صدك وفي وگد وعدك وما تخوني اثاري طلعت غلطانة !

ضحك وگال.. انا روحي خاينهاا انتي منو ؟

- الله ياخذني، يا حسافة الحب الحبيتك بي شكد چنت غبيه بحيث اركض وراك مثل العميه، وافقت،،، وقبلت،،، ورضيت،،، بكلشي لك جانت عيوووني تشوفك بنظرها ملاك بس انت طلعت شيطان وتلعب على الحبلين

تنهدت وباوعلته بإنكسار.. انتهى كلشي وياك ياحيدرة.. طلكني!!

ابتسم وكال :- تدللين بس يكون بعلمك ياسالار، من اطلك ناردين انت اطلك طيبة،

سالار :- طيبة مالها دخل بمشاكلكم حيدرة

- سالار شعليه ويطلكها لا تصير نذل حرام عليك يكفي الي سويته بيه !

- هه السويته بيج ؟ ليش يابه شمسوي انا ؟

اسمعي بعمري ما مبرر لاحد ولا منطي سبب ولا جواب، الي يصير غبي وما يفهمني ادور ظهري واكمل شغلي، ما اضيع وقت حتئ ابرر واصحح تفكيرج

باوع لسالار :- من تجهز اوراق الطلاك بذيج الساعه اطلكها .

-حيدررررة

-مع السلامة

دار ظهرة النه ومسح علئ شعرة بحركة تنرفز ومشئ

قبل مايطلع كتله، :- والنعم منك ابن عمي .روح وكون ربي يطلع حركه دموعيــ ..سكتت ماكدرت ادعي عليه

ابتسم وطلع من البيت ..

وگعت من طولي عيوني غوشت من البچي ماحسيت علئ شيء..

اجا سالار شالني للقنفه ونبراس تذب عليه مي گعدت ورجع تركيزي ورجعت دموعي تنزل علئ خدي بحرگه گلب، مثل النار

لميت رجليه لصدري حچيت بقهر واني اشهگ :- شگد چنت مخدوعة بي!!

- بعديش، ناردين بعد ماتفتحين حلگچ بكلمة، يطلك وغصبا عليه وطيبة مااطلكها عباله لزمني من ايد التوجعني، اسمعي من هلحضه انسي حيدرة وطلعي من عقلج وربج كل السوا بيج يولي، اصلاً اني مامستغرب ادري علاقتج فاشله وماكدرتي تكسبي الج،

صرت اضرب وابجي حيل، اجا حضنني من راسي يحاول يهدئ بيه..

- ولج بسس كافي اسكتي اخوچ بعده حزام ظهرچ موجود ..مايستاهلج لاتوكعين دمعتج الغالية عليه صدگي ماعرف قيمتج وهو الخسرران

تركتهم ورحت اركض دخلت لغرفتي وسديت الباب، ساعتين ابچي وبس اشهك ماحچي شيء

سمعت صوت الأذان كمت توضيت وصليت واني ابجي واشكي لربي علئ الصار بيه، ماحسيت علئ نفسي من غفيت علئ المصلاية

حسيت علئ ايد ابوي انخلت علئ گلبي،كاعد يم راسي و يبچي، يگلي سودة عليه الله اخذني وعفتچن بدنيتچن لوحدچن

قوي نفسج ولا تضعفين ولا تستسلمين ولا تلتجئين لغير طريق قوي أيمانچ بربچ والكاتبة الله يصير

فزيت من الحلم وعيني صارت علئ الساعة بـ6 الصبح

لزمت گلبي وسجدت علئ التربة بخوف رحت ضميت المصلاية وگعدت علئ الچرباية واردد كلام ابوي الكاله إلية

معقولة يا ربي الك حكمة بيها؟ مادافهم ليش بابا اجا إليه دمعت عيوني أكيد من نمت على السجادة چان هو يشوفني واني ابجي

تنهدت وترحمت اله ..

كمت فتحت الباب لان قافلته، باوعت لسالار مخلي كرسي يم الباب وكاعد مكتف ايدي لصدرة ونايم

ابتسمت ورحت كعدته، فز وكال :- هاا هاا وين رايحة

- مارايحة لمكان جنت نايمة، ليش نايم انت اهنا ومو بغرفتك ؟

- فكرت خاف تشردين لو ترحين تنتحرين ادري بيج مكتئبة وما تفكرين صح، فاكلت احرص غرقتج خفت عليج

- اسفة البارحة صيحت عليك بس اني احبك

- عادي امسحها بوجهج روحي لغرفتج بس ها مو تشردين والله اخيج نعسان وعندي شغل مابيه حيل ادور عليج بعد اخوج صيري عاقلة

هزيت راسي "اي" راح دخل الكرسي للمطبخ ودخل لغرفته ينام

رحت للهول نبراس متمددة وبدون غطا رحت گعدتها خطية قفلت الباب وماخليتها تنام بغرفتنه

راحت تركض للغرفة وهي تكول :- اشاااه خرب شغلي الصوبه تجمدت

طلعت بره لكيت دبه نفط اخذتها وطلعت الصوبة من المنور، اجت اتكلي :- لحضة اني اشغلها لاا تحركينه واني بعدني شباب

شغلتها بالغرفة ونمنه ..والصوبة مشتغلة

....جنت بين الصاحية والنايمة شميت ريحة حرك و دخان، فزيت مخروعة باوعت الزوليه سودة وداتحترك ،والصوبة مشتغله

صرخت واجا سالار يركض طفاها وطلعها بره وبقئ يغلط وكل هذا ونبراس نايمة وماتحس بشيء ولا شمت حتئ الريحة ..

سالار :- بعد حتئ النومة طلعتيها من بطن عيني رايح للمخبز بلكت مفتح اجيب صمون ابقي انتي اهنا بالمطبخ وابتعدي 3 مترات عن الطباخ

طلع ورحت فتحت الثلاجة فارغة صارله البيت متروك اشهر، وبين فترة وفترة نجي ..

ربع ساعة واجا نزع قمصلته وراح خلئ الصوبة جايب فلافل حارة وگيمر عرب

گعدت أكل وياا وهو يسولف ..

- رح أروح لحيدرة بعد شوي

سمعت اسمه وغصيت بلگمتي انطاني مي وطبطب علئ ظهري..

- لا ما تروح ليش رايح

- ما رايح علئ صخام وجهي رايد احچي وياا لأخر مره وافهم منه وشنو يقرر مصير علاقتكم

- ليش هيچ صار برأيك أني أستاهل ؟

- شوفي قراراتج الغبية وين وصلتج ؟ اريد افهم منه اريد يسولفلي كلشي يمكن فهمنا غلط لأن الي صار يوگف العقل ابد ما توقعت منه هيچ موقف حتئ كلامة متغير

- يا غلط هو گال بلسانه حامل مني

- خليني اتزقنب افضل إلي

تركت الاكل وگمت ..

- سدي وياج الباب بدربج لان باردة عوزني بس اتمرض

رحت صعدت نمت طاكة روحي الظهر كالت نبراس تريد ترجع لان ملابسها وكتبها كلها اهناك وسالار كال بالاول نروح لنور لان ماراحو لصباحيه عرسها، ويمكن منتظرتنه

كلتلهم روحو انتو اني مااروح...ابقئ لوحدي
وصدك راحو ..بقيت افتر بالبيت همزين موبايلي جبته وياي ..

رحت كعدت يم الصوبة اتدفئ، سمعت صوت موبايلي كل ضني هذا سالار دايتصل ف جاوبت ..

-الوو هاا گلبي يمته تجي

حيدرة:- هلا بناري..

اتفاجئت باوعت علئ الرقم هذا حيدرة رديت بعصبية شتريد ليش متصل ؟

- انتي وحدة حقيرة تدرين ؟

- بس مو احقر منك ولا بنذالتك وغدرك وخيانتك

- رح ادفعين تمن كلامج غالي .

-لك شنو من بشر أنت لا أحساس لا ضمير شترريد مني !

-رايدچ

-كمية التناقض بيك ما تنوصف شگد معقد ومريض روح عالج نفسك افضل

عاط بيه.. لسانچ اكصه اذا عدتي هالحچي !

-جرب تمد ايدك وشوف شلون اكطعها

ضحك..اويلي صايرة قوية يلا اشوف شلون تصفه وياچ

بس اسمعي وخليها حلقة بأذنچ يا ناري ياصحوة جمر مرخوصلچ تچويني طلاك ماكو طلعيها من راسج واذا معاندة ومصره فأكيد لا تنسين نفس اليوم رح اخوج ينفصل عن اليحبها فا لاتفكرين بأنانية وفكري صح

- مو بكيفك !
- تمام يابة ومع السلامة

داحچي سده بوجهي..

اجا سالار ويا نبراس جايبه كتبها وكتبي ونص من ملابسنه ماكدرت تاخذهم كلهم لان ماكو وقت وسالار كال رح نروح لاربيل ماكدر اترك شغلي وبعد نور تبقئ يم زوجها

ثاني يوم راح للجامعة وطلب النا اجازة لمدة شهر وما اعرف شلون وافقوا ورح نرجع بوقت الامتحانات لان بعدلها شهر تقريباً

مر اسبوع واحنا گاعدات بالشقة وسالار يروح لشغله من الصبح ومصطفى بالمدرسة ..

سألته ليش ما انتظرتوا نور تخلص مدرستها وتالي يتزوجون؟ تالي طلع رائد مقنعه وكايله انقلها بمدرسة ببغداد ..

نوب انقلب كلشي جانت نور باربيل واحنه ببغداد هسه صار العكس

حيدرة انقطعت اخباره بس الي عرفته من طيبة صاير عنده شغل هواي متكاثر عليه وما فارغ لاحد

اما حسن .. اجا هنا يقنع بيه ارجع وياهم لانو بنت عمه بس جنت قافلة وما رحت ما ارجع لبيته دام خانني بي وما احترمني ..

اشتاقيت لرغد هواي وكل ما اشتاقلها ابچي بحركة گلب اطلع الصور الكاصتها الها وابتسم من اشوف ضحكتها ..

كل يوم احس اتندم علئ الحب القدمته اله وبدون مقابل وفعلاً هو "ما يستـاهل"

مر شهر كامل كاعدة بالشقة و ساكتة صار وقت اول امتحان، رجعنه سالار لبغداد وصلنه للجامعة ..امتحنت و كلشي ما جاوبت

اجا عليه من خلصت الامتحان واحتار وين يودينه و وين نبقئ ..

تالي رائد اتصل وگال خل يجن عندي يبقن اسبوعين طول فترة الامتحانات واخليلهن خط يوصلهن ويجيبهن من الكلية

عارض بالبداية بس تالي وافق ماعنده خيار ثاني، لان جان مشغول ومايكدر يبقئ اهنا لازم يرجع لاربيل ..

راح و احنة بقينه يم نور ..خطية صار ينام بالهول و احنه انام بغرفه نومهم لان ماكو غرفه لخ بس وحدة بالشقة ..

و نور مامهتمه بالعكس فرحانة ومتونسه انام يمها شكلها بعدها ما متصافين هي ورائد

ثاني يوم اجا السايق وصلني لجامعتي دخلت للقاعه الامتحان والتوتر والخوف يخليني انسئ كلشي والكم معلومة تتبخر وارتبك وتالي اطلع كلشي مامجاوبة والنفسية زفت

...

رائد :- اي شلونك ؟

حيدرة:- إنسان عايش بس لشغلة شلوني مثلاً

- دريت مرتك ناردين واختها عندي؟

- ما ينظم عليه شيء

- انت على شنو ساكت وما تحاچيها ؟

- ابتعد عنها افضل

- هو ما عم عليك شيء غير الافضل مالتك، طاح حظي صارلي مگابلك شهر وعايف مرتي وجهه التيس

- الصداقة اولى من الحُب ؟

- لاا بربك يعني معاند بعد ما تريدها

- آي افضل الها تبتعد عني ما اريدها تتأذه بسببي

- لا تچذب وبعدين انت تدري كلش زين هي تحبك يا اخي حس حتئ كلياتي نشفن من وراك

- و انا ما احبها

- چؤ چؤ الجذاب الله وين يذبه بعد گلبي؟

- بالنار وفعلاً ذبني بالنار دين

- خاب رحمة للكعبة انت ما تدوخ علئ اقل بيناتنه احچي عادي هسه مو وقت غموضك واللغازك

- سد الموضوع

دخلت رقية وهي تگول..

- عادي ارجع للبيت ؟

- ليش بوية

- ماادري بس حيل تعبانة و دايخة وربي

- حقج تعبتي فوگ طاقتچ، اي مسموحلج ترحين و الحارس البره خلي يوديج للسايق لحتئ يوصلج ..

- كلش شكرا .

- روحي الله وياج

...

ناردين

بعدما طلعت من الامتحان من وكت والسايق يجي بعد نص ساعة فا كعدت بالحديقة اكل وساكتة حسيت على وحدة وكفت يمي ..

رفعت راسي و اتفاجئت، :- رقيـة !!

- قصدج الست رقية .

-خيرر شنو تردين ليش جايه لكليتي؟؟

- اجي لمكان الي يعجبني، واليوم اجيت خصوصاً الج و رايدة اكلچ شيء واسمعيني كلش زين

سكتت رايده اسمعها شنو تگول..

رقية :- شوفي ابتعدي عن حيدرة و لاا تخليني اتصرف وياج غير تصرف تندمين عليه بكد شعر راسچ لچ عبالچ اسكت عشت طول عمري احب حيدرة وتالي تاخذي مني يتزوجج انتي الرخيصة

-عفت الرخيص للرخيص وتركتكم .

- كلامي لاا تنسي والله اذا شفتج راجعه للبيت بذيج الساعه اعتبري نفسج ميته، لاا تستاهنين بيه تراني كلشي اسوي .

- روحي ماما تغطي خاف عليج باردة ونامي الظاهر حميتي زايد و استقري الاستقرار حلو .

- ابتعددي منه داگولچ

- ديلا حسستيني مدري منو حيدرة، توم كروز وداتتعاركين عليه

- حيدرة زوجي والي ابطني ابنه ومن اولد اعتبري نفسج لاشيء بگلبه

هزيت ايدي وابتسمتلها بسخريه وگعدت شافت برودي وماتت من القهر عبالها رح ابجي والطم..

رجعت اكل و دموعي صبن لاا ارادياً، قبل ما يجي السايق ب5 دقايق اجا ولد من قسمنه شافني ابچي انطاني كلينكس وكعد يمي يسئلني شبيه

-مابيه شيء والله

-هاا لعد ليش كل هلدموع كولي محتاجة شيء خادم اني

-لا بس بجيت بسبب الامتحان

ضحك وگال.. يلا يمعودة كلنا هيج كم واحد مجاوب والباقي كله رسوب ميه بالميه اخذيها من شاربي

ابتسمت تالي سمعت صوت السايق وهوو راح ركبت ومر علئ جامعة نبراس وتالي وصلنه للبيت دخلنه بعدني ما مغيره ملابسي اندك الباب قووووي ..

رائد ما موجود طلعت اني فتحته وجان يصير بوجهي حيدرة عصبي دفعني على الحايط ولزمني من ايديه..

حيدرة :- هذااا منووو الي چنتي كاعدة وياا احچيي لچ حقيررررة كاعدة يمه ويخلي ايده على چتفچ وانتي ميته ضحك

-عوووفني اولاً

نترت ودفعته من صدره رفعت اصبعي بتهديد وگلتله.. مرة الثانية اتصل على الشرطة اذا عدتها منو الي سمحلك تدخل وتدفعني بهالشكل ؟؟ ومنو هذا الي تهمتني بي گاعدة يمه ؟؟؟

-وصلوا علي موبايلي صور الج انتي وزميلج گاعدين تتمضحكون

-انت كلتلها زميلي.. وروح حاسب الي دزلك الصور رايد يشوه سمعتي لو حتى سمعتي صارت ما تهمك

فرك راسه وگال وهو يزفر نفس.. رفعتي ضغطي تدرين؟..چؤؤ رح ترجعين لبيتي..

-هههه تحلم ما اروح..
-وتالي وياج ناردين
-شتريد انت بالضبط؟؟؟
-اخذج لبيتي..
-البيت الي خنتني بي ما ادخله..
-يا خيانة شبيج بابا

رن موبايله المتصل ( رائد) ..فتح سبيكر

- هاا يعيال شلونكم بشرو تصالحتو لو بعدكم ؟

حيدرة :- وعلي دريت بيك انت ورا الصور

- غير فقدت السيطرة يخوي اكلك رجعها ما تقبل تالي سويت هاي الخطه حتئ تصالحون شلوني بالفكرة الخنفشارية ؟

- اكل تبن حسابي وياك بعدين ارويد

- المهم روحوو للبيت وصالحها علئ طريقتك الرومانصية يا رومانصي اعرفنك كفو هههههههههههه

-اعرفنك حيوان..

سده بوجهه .. وبقئ يسب ويغلط

-كافي مهزلة واطلع برااااا

-اسف جنت ماخذها حجه حتى اجي احجي وياج !

-وانا ما اريد احچي وياك !

-سمعيني انتي ماخليتيني اكلج الحقيقة..

-ما اريد اسمع..

-ناردين كلمة وحدة واطلع اسمعيني بس !

-بدون بس ولا هم يحزنون اطلع برااااا

ابتسم وگال.. تتذكرين قبل كم سنة بهيج فترة من اجيتي اعترفتي الي بحبج ردتي بس اسمعج..

-اي شنو الي ذكرك !؟

كتف ايديه لصدرة وگال.. نفس الشيء انعاد بـَس هسه انتي الي ما جاي اتسمعيني..

-ما فهمت؟؟ وين تريد توصل

-لگلبچ..

-اطلع برا كافي لا تزيد بالكلام..

-ليش ما تخليني اوضحلچ شنو صار !

-حيدرة لو تحلف بميه نبي انت واحد غدار وعدتني ما تتقربلها تالي ماوفيت بوعدك انت واحد بلا ضمير وحلفت بعد ما اثق بيك للموت

-هيج شايفتني واحد خاين ؟

-اااي

-تمام هاي المره الثانية حاولت اكلج بس انتي ما راضية تنطيني مجال وتسمعين مني..

-اي لأنك جذاب وعندك الف وجهة

-تمام وكلشي كلتي صححح انا خاين وجذاب، بالچ على نفسچ يا نفسي..

طلع ورگع الباب رجليه صارن خيوط تمددت على الارض وميتة بچي شگد ما اتظاهر امامه انو ما مهتمة واني قوية انهار .. ما دا اگدر احافظ على قوتي ..

مر كم يوم نفسيتي للاسوء وروحي تايهة.. كل يوم اگعد بليل اكتب بدفتر مذكراتي اخر احداث الي صارت.. اكتب مشاعري بأعصاب تلفانه.. ودموعي تبلل الورقة..

بيوم چنت گاعدة متمددة..

سمعت صوت موبايلي اجالي اشعار ورسالة، شفتها من حيدرة وكاتب
( ناردين رغد مريضة حييل وماكدر اطلع تعاليلي لبيتي وهذا العنوان ....)

داز العنوان بالضبط استغربت ليش راسلني خوب يروح يوديها للمستشفى ! وره شوي دز مسج ثاني (ناردين فدوا لگلبچ تعالي للبيت لا تفكرين بشيء ثاني ، ما اعرف شنو اسوي عندي مهمة ولازم اطلع ورغد مريضة اذا تحبيها تعالي جاي تصرخ بأسمچ وما اعرف شلون اسكتها هي متعلقة بيج وتريدج استعجلي رح تموت بأيديه)

انكسر خاطري وگلبي وجعني خفت لا صدك مريضة وهو ما يعرف شيسوي للطفلة لعد اروح بسرعة لايصير شيء علئ رغودة لاسامح الله

ما جنت مفكرة بس برغد بحيث ما بلغت احد انو رح اطلع .. لبست قمصلة بأستعجال وطلعت من الشقة اخذت تكسي ودليته على العنوان البيت خليته يوصلني براس الشارع ويروح وانطيته الكروة ونزلت

وكفت باوعت علئ البيت نفسه الجابني اله من نقذني من العصابة دكيت الباب والدنيا تجمد من البرودة حركت اليدة وتفاجئت الباب مفتوح يمكن حيدرة فتحه اليه حتى ما ابقى واكفة بالشارع !

دخلت واني اصيح حيدررة وووينك ماكو جواب! كلت يمكن فوك صعدت بالطابق الثاني وبالي يم رغد

باوعت علئ الـ6 غرف كل غرفة افتحها واكول وينك حيدرة حيدرة فتحت غرفة شفت بيها رغد نايمة ومطفي الكلوب !! استغربت

لعد هو مو كالي مريضة !!! شدايصير ياربي تالي فتحت نفس الغرفة الي نمت بيها من قبل

فتحت الباب واني اگول :- حيــدرا ويـ ..توقفت ماتحركت من مكاني من الصدمة

اباوع عليه نايم علئ الچرباية وبدون قطعة ملابس، وهيه نايمة بحضنه وتطبع بوساتها وحمرتها علئ صدرة

بقيت فاتحة عيوني بوسعهن من الصدمة واكفة ولازمة يده الباب داشوف ابشع منظر بحياتي انبلع لساني

انتبهت عليه باوعتلي بٳبتسامة، وگامت اجت يمي واخذت روب خلته علئ جسمها، وكفت يمي ردت احچي دفعتني من الغرفه وسدت الباب

سكتت اباوعلها وعيوني مغوركة ..

رقية :- ها هسه صدكتي و شفتي بعيونج ؟

-انتيي وحدة جذااااااابة هذا هذا حيدرة !
-لعد شنو عبالج ما رح ينام وياي لخاطرج ولخاطر عيونج ؟؟
-لچ كككككككلبببببةةة
-شششش سدي حلكج لااااا تصرخيين

داحجي جرتني حيل من ايدي واني اصرخ نزلتني من الدرج وكفتني بالصالة المفتوحة..

دفعت ايدي منها..عووووفيني ارررريد اروحله وخرررري

-انتي وحدة بلا كرامة لج تزوجني وحملت منه ويحبني بعد انتي شكو لازكة بي خلي لنفسج قيمة واتطلكي لج شفتي بعينج نايم وياي وراضي ليش لازكة عوفي هو مو الج اقتنعي..

تعصبت وهجمت عليها خنكتها من ركبتها بأيديه الاثنين كااافي لا تحجييين يا كلبة ماا اررريد اسمع صووتج يا قذرررة..

دفعتني وظلت تجر نفس بقوة لان اختنكت بقت تحجي تعصبني وتنرفزني بالزايد واني ابجي بحركة گلب واحس غصا ببعلومي ما دا تكدر تطلع .

- هو ما معتبرج زوجة اله مجرد خدامة تخدمينه وتخدمين اخواته وامه، شافج تحبي واستغل هل شيء لمصلحته، عبالج هو بس وياي يخونج ؟ لج الف وحدة ينام وياها بعد هو ضابط والبنات سالحات نفسهن عليه، و عرف يلعبها صح وياج طلع نفسه ملاك بس هو وبس بس الحقيقة مو هيج

واني احبة من عمري كلة ومستعدة كلشي اسوي ،واني بس ابتعدي واطلعي من حياته ناردين

عوووفي حيدرة عووفي وابتعدي، هوو مو الچ مو الچ افتهميي ولا بحياته حبچ

.. بقيت استمع الها واجمع كلامها وعيوني حمر والحقد والكرهه سود الدنيا بوجهي وجانت اكو سله فواكة قريبة عليه اباوعلها واهز راسي بصبر

بداخل كل انسان موجود الابيض ،،،، والاسود

النور و الضلام

النقاء والتلوث .....الصفاء والبهاء

كلما چنت ابيض رح تكون قريب ... للأسود

كلما چنت نقي وصافي ،،،،، رح تتلوث

تگول اني ماممكن ٲذي نمله ،،،لكن !!بغمضه عين رح تتلوث ايدك بالدم

لوثتني وانتهى يا حيدرة ..

صرخت من كل كلبي بصوت هز البيت.. لچ اسكتتتتتتتتتتتتتتتتي

سحبت سچين ودچيتها ببطنها بقوة ...

يتبع .....|||

⭐⭐⭐⭐⭐⭐⭐⭐⭐⭐⭐

صوتو .

#نمارق_رحيم