رواية نبض دافي الفصل الخامس 5 - بقلم Nabá baqer

نبض _دافي

Nabà _ baqer

البارت الرابع .........🔆🔆🔆

•~~~~~~~~~~~~~~~•

لهذا رحمت نفسي من الأحراج وگعدت بالمطبخ ...
تعشيت وگمت لملمت المطبخ وحظرت الجاي
وگعدت انتظرهم يكملون وبس سمعتهم خلصو
طلعت الم السفره صار بوجهي مهيمن يريد يدخل للمطبخ رحت يمنه اريد اسويله طريق راح يمنه

رحت يسرا رجع راح يسرا ...

احتاريت منين افوت وگفت ورفعت راسي وباوعت بعيونه ..وهو جان يمه يمه يباوعلي بنظرات تخبل ورافع حاجبه ومادري حسيت نظراته خبيثه و وراهاا شي ...

تقدم علي واني  كــ رد فعل رجعت خطوه وره ..بعدهاا صار يتقدم واني ارجع وعيوني معلگه بعيونه ومگادره ابعدهن كأن اكو قوه تجذبني الهن

حسيت بشي وراي تلمست و لفت راسي طلع الكرسي وهو تقدم اكثر ودفعني گعدت ع الكرسي ورفعت راسي عليه وهو انحنا لمستواي وصار وجه بوجهي

واني خوف على فرحه امتزاج صار عندي بالمشاعر قربه وعطره ونفسه اللي يلفح بوجهي ذوبني وخلاني اغمض عيوني واسلم نفسي لهاي الدگات الي صار يعزفهاا قلبي ...

...اذا بعد جبتي اسم واحد غيري على لسانج راح ينگص وحظري نفسج الخميس خطبتناا والمهر والخميس الوراه العرس وبعد تسع اشهر ابني يترس حظنج ...

فتحت عيوني واني سمع كلامه وحجيت واني بعدني مخدره من قربه ..شنوو ..شنوو گلت ..

...ابتسم وتقرب مني اكثر وخشمي طخ بخشمه وعادلي الكلام واني حتى ريگي صرت مااعرف شلون ابلعه ..بعدته بأيدي وگمت واني راسي يفتر واحوالي تبهذلت اختل توازني وردت اطيح بس ايده سبقتني ولزمني من خصري وقربني عليه وهمس بأذني ...

...هيجي قربي يدوخ ويخليج تفقدين توازنج ...

..احس الحراره صارت الف ومتت من الخجل نزلت راسي وبتعدت منه وهو طلع وعيونه اللي اموت بيهن علي ويضحك ومبين مرتاح وفرحان ...

واني احس الكون موسايع فرحتي وصارت اكبر واكبر من تحقق اللي گاله وصرت خطيبته وبعدها مرته ..وصدگ بأول اسبوع حبلت وره تسع اشهر اجانه منير ترست حظني بيه وصرت أم وهو صار أب
بس ولايوم قل حبه بقلبي لو حبي بقلبه ..وهيانه صارلنه ٦سنين زواج وبعدناا نفسناا ماتغيرناا بس لوما تشدده وخنگته جان صارت حياتنه بعد احلاا

رجعني من ذكرياتي للواقع صوت الأذان ..گمت رجعت الألبوم وتوظيت وفرشت سجادتي وتوجهت لربي ...

بعدها نزلت وبديناا نحظر للعشا اني ونبض وعيوني على الباب ...

...اگلج نبض موجنه عمي ومهيمن اتأخرو من الضهر طلو وهساا بالسبعه وهمه ماكو ...

...جاوبتني نبض وهي تثرم وتاكل بالخيار ..لا هيه هاي الگعدات تطول وتلگينهم هسا على جيه ...

اجيت اجاوبهاا وسمعت صوتهم يسلمون بالأستقبال عفت كلشي من ايدي ورحت شفت حبيبي تعبان سلمت على عمو ورحت لمهيمن ...

..الله يساعدك حبيبي ..

..الله يساعدج يالعمر ..

..حبيبي گوم اسبح امحظرتلك الحمام وصلي بين ميكمل العشاا ..

..اي گايم ..يااايابه احس راسي صار هاكبره من صياحهم ودوختهم ماجنه فصل عبالك داخل بمعركه

...الله يساعدك ..عاد فضت لو بعدهاا ..

جاوبني وهو يصعد واني وراه ..فضت بس شنو كسرو  ضهر الرجال بفصل باطل ..ناس ماعدها مخافة الله ..

فتح باب الغرفه ودخل واني بعدني افتر وراه باوع للأضويه والفرشه وعينه راحت على قميص النوم

وحجه وهو يسحبني لحظني ..اشنااويه عليه ..

جاوبته واني امثل البرائه ..مناويه على شي اصلاً اني حبابه وفقيره ..

حظني وحجه بصوت مختلف بيه بحه ..حبابه وفقيره و وكيحه وليلتنه حمرا انشالله ..

وفعلاً هاي الليله جانت من احلاا الليالي اللي خزنهاا دماغي واني بحظن حبيبي وابو زعاطيطي ....

....................         .................

ثاني يوم ....

نبض ..گعدت بدلت ملابسي لبست نفسه نفوفي الأسود بس هاي المره لبست الشال والجنطه والحذاء لون ماروني وگلاده نازله حلوه على شكل بومه نحاسيه وبيهاا كرستال ملون

وحطيت معطر بالورد عطره حلو وهم تمويه عود حاطه عطر ...وطلعت لگيت امي بس هي گاعده

سألتهاا عن ابوي والبقيه گالت ...

ابوج واخوج طلعو هساا لشغلهم ومرة اخوج بعدهاا مگاعده وحسين تلگينه مگابل المرايه ويعدل بكفشته ....

....اااممم شعجب سوسن مگاعده كل يوم تلگينهاا تطگطگ من عيطة الديج ...

...نبع الحنان انطتني نظره قاتله وسكتتني بــ مالج دخل بيهاا شوكت ماتريد تگعد تگعد ...هلااا  هلاا بهل صباح تعال بيبي بحظني تعال ...

...يممممه سرااجو شعده نايم جوه ليش مانام يم اهله ...

اگول نبض يمه انتي مناويه ترحين لدوامج ..حتى اذا ماترحين تگومين تطلعين الزوالي تغسليهن لان اريد افرش لبيت ....

...لااا يمه گايمه ..هي مال زوالي بهل زلگ ..طفرت من يم امي قبل لاتكربني بالفرش وصعدت دكيت الباب على حسين ....

...يلااااا حسسسسين استعجل الخط صارله سااعه متنگع براا ...

اجيت يم گلب الرهيف ..طلع الأخ والكشخه فوول
شكله متواعد ابو الشباب ...

...يلااا يمممه احنه طالعين ...

..الله وياكم يمه يبراكم ويحفظكم ابو خيمة الزرگه

...امشي ست نبض ..راسج بالگاع وتعاي مناا لاتبقين وراي ...

...اووف اووف من بابه يگلي صيري قويه ومن بابه يصيح راسج نزلي ..مافتهمت عليه والله ...

مشيت بصفه وراسي بالگاع وكلشويه اعثر اريد اوكع
الشوارع كلهاا محفره ومليانه خيسه وزبل ومحد بحالهاا بس بوقت الانتخابات يطلعون ونشوف جهرتهم الزفتيه (طلتهم البهيه ) ....

توصخت ملابسي ونوب اني لابسه اسود تحول لونه صار املح من التراب ..

...اوگفي هناا بين ماجيب جگاير واجي ...

حجه حسين ودخل للاسواق واني بقيت واگفه بالباب رفعت راسي قريت الأسم
~• اسواق الياسر ~• 

رجعت نزلت راسي فاتو من يمي جهال لابسين ملابس مدرسه ويحوگلون بجنطهم خطيه قهروني بالگوه شايلين الجنطه ...ذكروني بنفسي من جنت بالمدرسه هم جان كتفي ينشلع من الجنطه ...

دخلو للأسواق وطلعت بنيه منه ناعمه وشگره  مسويه ثنين ضفاير ولابسه صدريه قصيره لونهاا نيلي شكلهاا متوسطه  وجنطتهاا على كتفهاا تمشي وعيونهاا على المحل صعدت بخطهاا وعينهاا بعدهاا ع المحل .....

وبعدهاا طلع حسين جگارته بحلگه وباله مويمه وحتى مانتبه اذا جنت امشي وياه لولأ صعدنه بالخط ورحنه للكليه نزلنه وكلمن راح لجامعته
وهو حاله مختلف عن الصبح اول ماطلعنه ....

.................

كملت دوامي واني البرد اكل عظامي ولازم اشتري قمصله مومال ابقه اداوم بطرگ القميص ...

صعدت بالخط وكتفت ادي بحظني وحطيت راسي على الجام واجت صورة هذا الولد گدام عيوني ...

شنو من جسم وكشخطه العطر وحده بحث اخر
لاونوب الوگفه والجگاره بحلگه ويباوع بطرف عينه

اكلني اكل بعيونه ..وحسيته واحد موراحه وملعب

ويييي واني شكوو بيه الله يبعدناا عن هيج نماذج

...شنوو رسل صافنه وظاربتهاا دقله وعوزج بس جگاره ....

...نور جوزي مني راسي صاير هاگده من الدوام ومالي خلگج  ...

شگد دوخه ومايخلن شي مايدخلن بيه مكافي علي هذا المسقط ابو الخط  عينه نگسه وناشبلي بالرايحه والجايه يذب حجي ومخلي بنات الخط كلهن يبسمرن بيه عبالهن عندي شي وياه ...

وصلني الخط لباب بيتناا سحبت الواير الحاطينه بالباب ودخلت كالعاده مواعين الريوگ بعدهاا بالگاع والفراشات شمره ..ذبيت جنطتي وصرفنت ارداناتي رحت شلت الصينيه حطيتهاا بالمطبخ ورجعت لميت الفراش الجنه گاعدين عليه الصبح من تريگنه وصفطته ع البوفيه بالغرفه ورجعت طلعت رحت شغلت الماطور وشكلت الصونده بالبوري وجبت الماسحه وگعدت اشطف بالگاع كملت ونشفتها بالوصله رحت طفيت الماطور ورجعت للمطبخ غسلت المواعين وفتحت الثلاجه طلعت منهاا طماطه وطلعت بتيته من السله وگعدت گشرتها وسلگتها والطماطه گليتها طلعت طرشي وزيتون فرغت بكاسات بين ماابدل ملابسي وارجع اگلي البتيته ....

رحت لغرفتنه اني وابوي لملمتهاا وفتحت الشباك حتى تتهوا وهمزين شباكنا يطلع ع الشارع يعني اعرف كل اخبار المنطقه واني گاعده بغرفتي ...

بدلت ملابسي وطلعت لغرفة ياسر لگيت كنتوره مفتوح على حيله والملابس مطشره بكل مكان
لملمتهاا وعزلت الملابس الوصخه عن النضيفه
طلعت الوصخات بالغساله وفريتها و رجعت للمطبخ
گليت البتيته ....

حطيت الاكل بالصينيه ورحت فرشت حصيره بالحوش وحطيت الأكل والخبز وطلعت لياسر للمحد دگيت الباب الداخليه وصحت ...

...يلااا ياسر تعال اتغده وجيب وياك لبن ..

...اجيتج

...دخل ياسر وهو يدفع بكرسي ابويه ...

..الله يساعدك يابه ..

...ويساعدج يابه .. عفيه بيج بنيتي الله يرحم امج طالعه عليهاا معدله وأم بيت ..

..جاوبنا اني وياسر ..الله يرحمهاا  وبدينا ناكل والسكوت جان سيد الگعده ..وعيونه كلنه دمعت على طاري  امي الله يرحمها ...

ابوي ماأكل لگمه وگال ودوني لغرفتي وداه ياسر ورجع ...

..نام ..

اي نام ..اليوم بالگوه اقتنع يطلع يگعد يمي بالمحل
غير شويه من نفسيته بس هساا من اذكر امي رجع تعب ونطيته حبايه تحت اللسان ..

..سكتت ودنگت لميت المواعين وطاحت دمعتي ع الگاع ..رفعني ياسر لحظنه ..اشششش كافي شموسه ادعيلهاا بالرحمه لاتبجين ..

..ياااسر محتاجتهاا تعبت واني اواسي نفسي محتاجتهاا هواي ومداينسد هذا الفراغ اللي عافته ..

...مخالف حبيبتي ترحميلهاا  واحنا يمج بس تحتاجين شي گليلي وانشالله ما أقصر وياج ..

..الله يخليكم اليه ومايحرمني منكم انته وبابا ..

ويخليج النه ..يلاا اني طالع للمحل ..روحي ارتاحي ودرسي والعشاا اليوم اني وصيت حيدر يسوي كيلو كباب بدون شحم ..

..انشالله ..طلع هو واني رحت غسلت المواعين ودخلت للغرفه على كيف لايفز ابوي وتروح نومته

طلعت جنطتي ورحت بالحوش حظرت جدولي وبديت ادرس لمتحاني باچر ....

بس قبل لا ابدي احفظ امتحان الكيمياء خلوني اعرفكم عن نفسي ...

اني رسل صادق عمري ١٧ سنه طالبة  ثالث متوسط المفروض خامس اعدادي بس من جنت بالأبتدائي رسبت سنه و من صرت بالمتوسطه رسبت بالثالث وعدته هاي السنه .....
اهلي يسموني شمس لان شگره وبيضه وابوي يشبهني بالشمس لهذا مشو علي هذا الأسم بس بالمدرسه اسمي رسل ...

عايشه ببيت على گدنه بمنطقه شعبيه اني واخوي ياسر الكبير اكبر مني ب٥سنين وابوي ...

امي توفت قبل ٣سنين بحادث سياره جانت رايحه تجيب صمون وضربتها سياره ماتت بساعتها لان الضربه صايره براسها ...

موتهاا دمرني واثر على حياتي وخله مني انسانه وحيده وانطوائيه و وحده فضيعه سيطرت علي ...

وصارت حياتي مرهونه لرعاية ابوي المقعد واخوي حبيبي وصديقي مااعتبرته اخوي اكثر مما هو ابوي

احتواني وصارلي كل الدنياا  واني هتميت بيه وبكل اموره  وانشالله ما أقصر وياه لحد ميلگه بنت الحلال اللي تستاهله وتستاهل طيبة قلبه وحنيته ....

ياسر موبس شايل قلب طيب لا شايل جمال وهيبه بس حرامات هذا الجمال ممهتم بيه وهامل نفسه ودافن روحه بمحله ...ولو هو مصدر رزقنه الوحيد

بس هوايه انقهر عليه خصوصاً هو ظحه بمستقبله حتى يعيشناا وعاف جامعته واختار حبسة المحل في سبيل منحتاج لأحد ولا نمد ادينه لأحد ..

من بعد ما جنه عايشين ومستورين بوجود امي وابوي ...راحت امي واحوالنه ادمرت وابوي تمرض وصار عنده مشاكل بالقلب وظغط وسكر وصار طريح الفراش وبقه ياسر يفتر بيه من طبيب لطبيب بهذا الوقت ياسر جان خامس علمي صح صغير بس جان عنده احساس بالمسؤليه وبعد وفاة امي و وگعة ابوي صار هو المسؤل ...وشويه شويه ابوي رجع وگف على رجليه وصحته تحسنت ...اصر على ياسر يرجع يكمل مدرسته لان هو ترك بفترة الأزمه المرينه بيهاا ...اني جنت بالثاني متوسط ونجحت منه بصعوبه لوما درجاتي جانت عاليه بالكورس الأول وهي اللي سعفتني ومساعدة المدرسات جان مانجحت ولا طلعت منه ...

رجع لدراسته ونجح وراح سادس واني رحت ثالث
وتقريباً حياتنه بدت تستقيم وترجع لوظعهاا ...

وابوي رجع لشغله بس وظعه بعده موعلى گده وجان يظم علينه تعبه وبيوم جنه راجعين من الدوام وندگ عليناا الباب بس مودگه عبالك غاره وظربتناا نريد نشوف طريقناا ماكو بين المسافه من الغرفه للبات شبخه بس صارت بعد محافظه ..طلع ياسر يرگض وهو يدگم بقميصه ويلبس نعاله طلع الصبي اللي يشتغل عند ابوي بمحل السمكره ...

....شكووو علييي شبيك شصاير ..

..يااسر اركض عمي صادق طاحت عليه السياره وهو جان نايم حواها يصلحهاا ...

..شنوووووووو ياسر عاط وطفر ركض للمحل لگه ابوي متمدد جوه السياره والناس ملتمه تريد تشيله وخايفين لايسحبونه وتنمرد رجليه لو راسه ....

ركض اجر رافعه رفعت السياره من فوگاه وشالته الاسعاف جان قاطع النفس بسرعه دخلوه للعمليات
دخل الهاا وطلع بعد اربع ساعات وهو خاسر رجليه
وصار مقعد لطول العمر ....

بسنه وحده خسرنه كلشي بدايتهاا جانت امي ونهايتهاا جانن رجلين ابوي ...رجعت اوظاعنه ادهورت والمحل صاحبه اخذه من وگع ابوي لان جان مأجره ...وصرنه بعازة الألف وقرر ياسر يترك دراسته ويطلع يشتغل عماله حتى على الأقل يجيب دوه ابوي ....

واني همين قررت اترك وبعد مااداوم وبلاهاا المدرسه ومصارفهاا ...وهذا اللي صار ..

وره هذا الحادث بأسبوع گعد ياسر من الخمسه راح للمسطر واني گعدت وطلعت بالحوش صوت العصافير ولون السما النيلي ونسمة الهوى يخلناا نحس الدنياا شگد حلوه برغم صعوباتهاا والمر اللي تظوگنه اياه بس لو واحد يگعد يتأملهاا ولو لدقيقه راح يكتشفهاا من جديد ويشوف هي حلوه بس احنه اللي امررينهاا ومخلينهاا تصير ظلام بعيوناا مع العلم هي كلهاا نور  ....

نور بس يحتاجله بصيره حتى نشوفه مو بصر ..
البصر موجود واغلب عباد ربي عدهم بصر بس مو كلهم عدهم بصيره ويشوفون الدنياا من منظار ثاني

فتحتت البوري ومديت الصونده ورشيت سنادين الزرع المتوزعه بالحوش احنه بيتنه بسيط لدرجه

عباره عن حديقه وبعدين ندخل لباب هذا الباب يتوجه بكليدور ضيق يطلعنا لحوش كبير واسع گاعه صبه مو كاشي وموزع داير مدايره سنادين زرع و ورد والحوش بيه ٣ غرف ومطبخ وحمام وتواليت

وحده الي وحده لياسر وحده جانت الأهلي بس بعد ماتوفت امي ومرض ابوي صرت اني انام بيها حتى ادير بالي على ابوي ماگدر ابقيه لوحده خاف يحتاج شي بالليل ومحد يمه ..لهذا نقلت غراضي يمه

وغرفتي بقت فارغه ومسدود بابهاا ودرج يطلعناا للسطح حاطين بيه غراضنه الزايده وحبل للملابس  ....

على صوت طگطگتي جان ابوي فاز من نومته وخطيه صايح علي واني ماسمعته ...كملت سديت البوري ودخلت للغرفه شفته فاتح عيونه ...

....هااا يابه گعدت سوده علي كله من وراي گعدتك

...لايابه سوده على عدوج لاتدعين على نفسج اصلاً اني عيوني ماتاخذ نوم ..بس گليلي يابه ليش بعدج ما امبدله ملابسج ..واخوج وينه گعدتيه خاف يفوته الوقت على مدرسته ...

..اجيت سندته علي وگعدته واني امتمت وماعرف شلون اظم عليه لان ياسر نبهني مانكله على شي مانريد انأذيه فوق اذيته ...

..هاااا أأأ ياابه ياسر گال ماروح اليوم ..أأأيگول ماعدهم شي مهم  ومايروح واني هم ماعندي شي اليوم والبنات اتفقن مايداومن وغبت  ...

...شموسه يابه باوعيلي واحجي انتي اخوج ليش ماراحتو لمدارسكم  يابه لا اظمين علي ..ترا اني ابوج واعرفج من عيونج اذا  ظميتي علي ..

...يابه ما ظامه عليك شي اني  و ياسر ماعدنه شي ومارحنه واذا على ياسر  نايم هياته اذا تريد اگعده ألك ...

..لايابه عوفيه خليه يرتاح ادري بيج مااظين علي شي ..موصح شموسه ..

..صح يابه أأأ اني رايحه اسوي الريوگ ..
اوگفي شموس يابه لاتحسبين احسابي اني ماريد
رجعت على ابوي وگعدت يمه ولزمت ايده ...

يابه اذا انته ماتريد اني هم ماريد ...اللگمه ماتفوت بحلگي إلا لخاطرك الهوى ماتنفسه لو مانته موجود بدنيتاا ...ياابه لاتسوي هيج وتأذي بروحك اتقوا لخاطرنه حتى احنه هم نتقوا ...تراا انته الشمعه الوحيده البقت منوره حياتنه ..وأأأذا ...

«غصيت بالكلمه وما اگدر اگولهاا بس لازم اظغط على نفسي واكمل بلكي ينتبه لصحته ويرجعلناا وترجع تتلون حياتنه بيه »...

وأأأذا لاسامح الله وطفت حياتنه راح تطفه وتظلم وتنتهي وياهاا ...دنگد على ايده وبستهاا ودموعي بللت كفه وهو مسح على راسي ورفعه وحجه بعيون تلمع من الدموع ...

...كافي يابه شموسه مسحي ادموعج هاي الدموع  تحرگني وتزيد ناري ..گومي رفعي راسج وشوفيني ظحكتج خلي شمسي تظوي وتظوي هاي الدنياا ...

يلاا يابه جيبي ريوگج وظمي لأخوج وياج ...

انشالله يابه ..گمت رحت للمطبخ سويت بيض سلگ وحليب حار  وخبز واجيت تريگنه وشربت ابوي دواه
وطلعت افتريت بالبيت واني احس نفسي ظايعه مامتعوده اگعد بالبيت هيج وقت البارحه جنت واگفه بالاصطفاف وست زينه ترزل بينه هههه خرب عفت كلشي واذكرت رزالة ست زينه ..

مر الوقت بصعوبه الغدا طبخته والخظره نظفتها والبيت كله تنظف والساعه بعدها بــ ١١الصبح

رحت طلعت جنطتي وطلعت كتبي وبديت اخظر بدروسي واحفظ وعبالك راح ارجع ادوام ..بس وين احنه مومال مدارس وتعليم ومستقبل احنه مال تعب ودموع ..الحمدلله على كلشي ..اللهم لااعتراض على حكمك ...

أذن الضهر گمت ساعدت ابوي يتوضا وحطيتله المخاديد بحظنه وفرشت عليهن السجاده والسبحه والتربه وبده يصلي واني رحت توظيت وگفت اصلي يمه ...كملت لميت سجادتي وسجادة ابوي ورحت صبيت الغدا مرگة تبسي وتمن وخظره وخبز ...
غديت ابوي وتغديت ونطيته دواه وكعد لزم القرءان وصار يقرا واني طلعت برا نظفت المطبخ وگعدت انتظر ياسر صارت بــ ١اندك الباب طلعت فتحته دخل ياسر وملابسه متلفه سمنت وتراب ودم !!!!!

باوعت لأيده وعطت بكل صوتي ...

...ييييييييمه ياااسر ايدك ..شبيهاا ايدك ...

...اششششش نصي صوتج فضحتيناا شبيج اول مره تشوفين دم ..تعاي ساعديني انزع قميصي يبس علي من الوصخ ...

حجيت واني ابجي واشهگ ..«ياابس من دمك مومن الوصخ» ..

...ااااخ ااخ  على كيفج ولج ااااخ خررب ...

ياسر شبيك ليش ايدك ملفوفه وقميصك صاير لونه احمر ...

..مصاير شي عادي تصير هاي الشغلات لان بعدني مامتعود على الشغله بس اخذلي شهر بيهاا اصير اسطه ...

راح يسبح واني رحت حميتله الغدا وبعدها الخوفه بيه من ايده كلهاا ملفوفه وصايره قطعه مال دم وقميصه جان لابسه ابيض صاير احمر من دمه هذا مومال شغله بسيطه ... 

رحت للغرفه حظرتله ملابس وطلعت لأبوي من سمعت صوته يصيحني ...

...نعم بابا صحتني ...

...ادرري گولو هذااا المطي يررريد شييي يحتااج شي اجيتو وشمرتوني هناااا ..فوووگ ماالله عااابني واخذ رجلي انتم هم فوگاهاا لاطشيني هنااا وصرتو ماتحسبولي احسااب ...

..على كيفك يابه فدوه موزين على صحتك على شنوو كل هذاا ليش هيج منفعل وانته موزين عليك

......گليللي اخووج شبيه الصبح من سألتج چذبتي وكلتي ماكو شي وهسااا والله والله يارسل اذا ماحجيتي الصدك لا بوج بعد ولا انتي بنتي ..گولي ليش صرختي مساعه ...

...أأأأ يابه ياسر ايده ملفوفه وبيها شويه دم من شفتهاا خفت وعطت بس مابيهاا شي هيج جرح صغير ....

...جرح صغير مووو ولج شنو شفتنوني انشليت وگمتو اضحكون علي ..امشي صيحيه بسرعه ...

..طلعت ركض لكيته توه طالع من الحمام ...

..نعيماً ..امشي بابا يريدك وصاير اعصاب وخايفه عليه لايصعد ضغطه ...

..رفع حاجبه وسئلني بستفسار وهو ينشف بشعره

...بس لا عرف

..لااا ابد ماگتله بس كتله انجرح بأيده جرح صغير بس ماكتله عن شغلك والمدرسه ...

هزز راسه وراح دخل للغرفه يم ابوي واني رحت بسرعه جبت غدا ورحت يمهم ...

دخلت للغرفه لگيت ياسر كاعد بالگاع وراسه منزله ويسولف لابوي وابوي جان يستمعله وعيونه تريد اذب دمعهاا وايده عاصرهاا عصر شراينه كلهاا تريد اطگ ...

...حطيت الصينيه وگعد اسمع شصاير وياه ..

...يااابه جنه نحفر بالحايط حتى نطبگه سيراميك ومادري والدرين زلك  و دخل بأيدي وحفرها ..وخيطولياهاا وهاي كدامك اني مابيه شي ..لاتخاف علي يابه ابنك سبع ...

...ابوي صار يضرب على رجليه بكل حركة قلب ويحجي والدموع تتطافر من عيونه وتوگع بحظنه

..ااااخ ولكم  اااخ من الوقت هاي تاليتي ولكم اني اللي فنيت عمري حتى ادرسكم وارفع راسي بيكم تاليهاا الدنياا خوش تغدرني وتخليني اتگرم و ولدي يعوفون حلمهم ومستقبلهم بس حتى يعيلوني ..

..ليشششش هيييج يااااربي ليششش اختباارك صعب وحقق هذااا كونك صعببب ..
امشي گوم گوم صيحلي عمامك وتجي وياهم ..وهاي سالفة العماله تنساهاا لا وربي اغضب عليك لحد يوم الدين ...

..صار يابه مثل ماتريد ..ياسر باس راس ابوي وطلع راح لعمامي اللي حالهم مثل حالنه هم ناس على گدهم وعدهم كوومه لحم برگابهم ..

بعد ربع ساعه اجو وكعدو ويه ابوي وياسر واني كلشي مافتهمت منهم بقيت بس اسوي جاي وجيبي مي ...

بس اسمع صوتهم وهمه يحجون وساعه تعلاا الاصوات وساعه تنصه لحد مطلعو وبعدها عرفت ابوي امطالب بحصته من ورثه وهمه ماعدهم هسه بس گالو راح اندبرلك مبلغ وبعدين انكمله من يصير عدناا ...

ثاني يوم اجو وجابو  ٥ ملايين سلموها لأبوي وابوي سلمهاا لياسر وگله افتح بيها اسواق واشتغل وكمل دراستك ...كلشي ولاتعوف مستقبلك اللي جنت اني وامك الله يرحمهاا نتمناا انحققه الك ....

بقى محتار ياسر بموضوع الأسواق شلون وين يفتحه وحتى لو فتحه شلون يأمن يعوفناا لوحدناا هاي الدنيا ما تتأمن وكلشي يصير ...

لهذا اقترحت عليه يطلعله محل من الحديقه ويسويه هم يشتغل وهم يمنه ومايروح بعيد ..

وصدگ راح جاب خلفه وعمال وبناا المحل وعوز فلوس وراح لعمامي وهم رجعو انطوه ٣ ملايين اتسوگ بيهن وفتحه للمحل ورجع يدرس واني رجعت لمدرستي والحمدلله امورنا بدت تتعدل و وظعنا صار احسن من قبل ...

ومرت عليناا السنه واجت نهايتها و ياسر نجح ومعدله جان ٦٣ وكسور واني طلعت بدرسين الرياضيات والانگليزي ..

رجعت امتحنت ورجعت وكعت بالرياضيات وانطو دور ثالث بس ابوي ماقبل وگلي عيدي وعدت الثالث وصديقاتي راحن خامس اعدادي واني بعدني ثالث متوسط ...

وياسر قدم وطلع قبوله محافظات وهم اجه عائق جديد بحياته واحنه السبب هم فكر بينا شلون يعوفنا ويروح لهذا ترك وعاف الجامعه وبقاا يشتغل بالأسواق ...وهساا سولفتلكم قصتنا فخلوني اكمل دراستي ..

................

بعد ما رحنه كل واحد لجامعته اني دخلت اول محاظره وجانت حالها حال كل يوم ملل بملل ...

كملت طلعت للسنتر اجت وحده من البنات
وگفت اگبالي وحجت بشماته ...

...اگول عيوني ست نبض البارحه اخوج گلبهاا هرجه وصار علينا سبع السبمبع واختي وبالك عني ..وإلا اخذ حقهاا واذبح واصلخ وهسه ««ههه»» خوش راح ياخذ حقج وبالأحمر ..ظحكت بأستهزاء ومشت وعافتني مستغربه كلامهاا ...

....هاي شبيهاا ..شنو حق شنو احمر ..شبيهاا شاربه نفط .. شمرت اللفكس وگعدت ع المصطبه وحاولت اقره ..كل ما اقره سطر واركز ارجع افصل ويجي. كلامهاا ابالي ..اخير شي گلت

..على شنو امدوخه نفسي خوب اسئل حسين وهو يفهمني ..طبگت الملزمه وشلت جنطتي وغراضي ورحت لجامعته ..رحت لقسمه ملگيته بقيت افتر ماكو فص ملح وذاب ..بقيت اتلفت وعيوني احولت من گد ماتفتر ادوره ...

باوعت بساعتي شفت بعد گدامي ربع ساعه للمحاظره گلت خليني اتمشى بالحديقه بلكي الگاه

طلعت اتمشى على كيفي وعيوني تفتر ادوره
لفت نظري كفشه طالعه من فوگ جذع نخله مائل
لونها نفس لون كفشة حسين هم بني وبالشمس ينطي لون جوكليتي ...رحت عليه واني اقدم رجل وارجع رجل حيل خايفه ومتوتره ...

...بالله طلع مو هو!!! شگول شسوي اني هساا ..درت داير مداير الجذع وصرت گدامه وشفت شي خلاني انزل راسي ودموعي صارت تنزل بدون سيطره واركض بدون وعي أو وجهه لحد ملگيت نفسي اني بــ باب الجامعه وجان راح اموت  ....يتبع