رواية نبض دافي الفصل السادس 6 - بقلم Nabá baqer

نبض _ دافي

Nabà _ baqer

البارت السادس ......🔥🔥

موتنسون النجمه 🌟⭐⭐✨ صوتو قبل لا تقرون ..

________________________________

واهجر كل ما يؤذيك،*، ولا تلتفت 💜💙

..............

ياسر ...

هسه اجه الوقت اللي استلم بيه القلم ...

السلام عليكم ...

طبعاً انتم اتعرفون اسمي وبقية تفاصيل حياتي ماكو داعي ارجع اعيد بس راح اكمل وياكم من اليوم الضهر من جنت واگف بـباب المحل وفاتت نفسها البنيه اللي ملاحظها صالي فتره جانت تطلع وترجع ويه اخوها اعتقد طالبه جامعيه ...

بس اليوم الغريب بالموظوع لاحظتها راجعه لوحدها
ومبين عليهاا الخوف ...

جانت تمشي سريع ولونها مخطوف ..

بقيت اباوع وراها خاف احد لا حگها ماكو احد
الفرع جان فارغ ...

ابتعدت شويه عن المحل وشفت بالفروع هم جانت فارغه الساعه وحده الظهر وكلها ببيوتها ماعدا كم طفل يلعب بالافروع ....

استغربت اكثر حالتها
اشبيها لعد ليش تمشي سريع وشكلهاا موطبيعي ..

رجعت لمحلي ونسيت السالفه ولتهيت ارتب بالغراض لان اليوم جنت متسوگ وبعدها اجو شباب يشترون وبقو واگفين يمي يشاقون ويسولفون وهم ساعدوني شويه ....

صحيح احنه منطقه شعبيه بس جورتنه حلوه ناس تساعد ناس ...وكلهاا تعرف الثانيه بس اكو فقره وحده موحلوه .. وهي التدخل بخصوصيات الغير

يعني يشوفون رجال شايل علاگه بيده ..
..هاااا يبو فلان الله يساعدك اليوم امحمل شكله جيبك مليان ...

لو يشوفون عائله طالعه ..

هااا ام افلان شلونج خيه شنو طالعه الله وياج ..

ادري انتم شعليكم ..هاي ماعدا تجمعات الشباب اللي تصير بالليل ويگعدون يحشون بعراض الناس ...

افلانه ام بنطرون وذيج موراحه وهاي مامبقيه واحد ما مرقمته ... يلعبون بكيفهم بعراض العالم عبالك السمعه شي بسيط ويگعدون يشوهون بيها ....

هي بس هاي السلبيات الموجوده ولو موشويه بس هذا الشي بكل مكان وخاصتاً بالاماكن الشعبيه ...

المهم لليل بقيت اشتغل لحد ما دزت علي شمس اجي اتعشه ...گعدنه نتعشه واني بالي موصافي الف شغله بيه ...

من بابه صحة ابوي بالنازل يوم عن يوم گاعد يذبل گدامي واني مابيدي شي عليه لو سالفة رجليه تاكل وتشرب وياي صعبه تشوف الانسان اللي جنت تعتبره سند وجبل وقدوه الك بكل شي ..

صعبه تشوفه واگع عاجز ومابيدك تخفف من عجزه
الحمدلله على كل شي ...

هاي شغله ...

الشغله الثانيه افكر بدراستي اريد اكملها الى متى ابقه گاعد رابط نفسي بالاسواق واصدقائي كلهم صار عدهم شهايد و وظايف واني عايش على اسوق يادوب امطلع مصرفنه وعلاج ابوي ....

لازم ارجع اقدم من جديد بس ما أدري راح يقبلوني لو لا ...
والله ما اعتقد يقبلوني بالحكومي الا مسائي بفلوس

اوف ونوب هاي مشكله اكبر منين راح ادبر ال٣ملاين بالسنه ...حلهاا يارب
حلهاا و وجهني للطريق الصحيح ...

كملنا عشه گمت رتبت نومة ابوي وانطيته علاجه وغطيته وطلعت مالي خلگ ارجع افتح المحل خليت ورحت لغرفتي مددت على الفراش وايدي جوه راسي والثانيه ارسم بيها بالهوا ارسم حلمي اللي صار اصعب من الصعب ....

طول عمري جنت احلم اصير محلل مختبري ويصير عندي مختبري الخاص واسميه مختبر الياسر

هههه شوف تاليها الدنياا خوش فرتني وبدال مختبر الياسر صار عندي اسواق الياسر ههه

دولاب الدنياا تفر بينا بكيفها
يوم تصعدنا فوگ يم النجوم
ويوم تنزلنا جوه الارض
وتگلنا گوم يابني
أدم اذا تگدر تگوم

وبس اللي عنده اصرار وأيمان برب العالمين هو اللي يگدر يلاوياا ويرجع يصير فوگ بس كلشي يرادله ايمان واني الحمدلله ايماني قوي بربي ...

ومتأكد راح يغير حياتي بيوم ...

گمت على حيلي ورحت لمحفظتي طلعت منها مصرف  لشموسه تشتري ملابس شتويه وطلعت على صفحه فلوس علاج ابوي هم لازم باچر اجدده

ومصرف للبيت وبقت عندي ١٠ الاف
بالله تكفيني هاي اروح بيها باچر للتربيه لو لا ..

تكفي  انشالله تكفي اروح عبريه بكيه احسن من التكاسي لان بس ابو التكسي يريدله فد ٧ الاف هاي بس الروحه والجيه شلون قابل ارجع مشي ماترهم

احسن شي اطلع من الشارع بكيه اصرفلي الفين ،
٣ الاف ولا العشره كلها تروح بس كراوي ...

حطيتها بالمحفظه ورحت طلعت بنطرون كابوي بس صاير مسحگ عود هذا الجديد يلا قابل وين رايح اني ...
وقميص اسود وقمصله جوزيه وحذاء اسود جلد مال باله احسن من الجديد ولو هو اخو الجديد ويمكن احلا بعد ...

حظرتهن ورحت طفيت الضوا ونمت .....

......................

نبض ....

رجعت الدنيا ظهر والشوارع فارغه تصوصي بس اني امشي بالشارع ميته خوف يامن يوصلني للبيت
بألف ياعلي يالّه وصلت وتنفست براحه ...

وياراحه ماتمت دخلت لگيت الدنيا مگلوبه عدنه بيت عمي كلهم جاين قافلين بيتهم وجاين وامي بعدها على گعدتها وتنود ...

وسوسن اوف ياحبيبتي الله يساعد گلبج شلون واگفه ومتحمله ابنج بالمستشفى وماتعرفين عنه شي وفوگاها ممنوع ترحيله ....

شحچي عليكم ياأخوتي مادري بس كلها بصفحه وذاك المختفي من البارحه بصفحه كلها تخابر عليه وادور وهو مختفي فص ملح وذاب ...

دخلت ع السريع لغرفتي بدلت ملابسي وطلعت للمطبخ لگيت جيش مال نسوان واگفات ونصهن بس يحشن سوالف بدون شغل ....

هسه ادگولون منين هذا الجيش اني اگلكم ....

عمي الله يحفضه عنده ٦ ولد وكلهم امزوجهم ومخلفين ماعدا بناته الـ2 زينب وفاطمه زينب مزوجه وهم زوجها بعد اظرب من اخوتي خاف اخوتي يخلونه انروح للسوگ اطلع للدوام هذاك ماكو لا سوگ ولا صالون وحتى اهلها بالعرك تجي ساعه وترجع لعيالها ميقبل اتبات ...

( مع الاسف هاي حياة بنت عمي الحقيقيه وهم اسمها زينب ..مو اگلكم بيها من الواقع مصدگوني 😒😒😒😒😒)

المهم تعتبر هاي البنيه منسيه من القاموس لان بالمناسبات القويه كلش يالله انشوفها ...

والثانيه العله فزاعة الخظره افطيم البله أم المصايب النقيض لاختها هذيج ماكو افقر منها وهاي ماكو اوكح منها ... وهم جانت ضمن الجيش الواگف وطبعاً مجانت تشتغل بس ادگص غيبه ببنات العشيره ...

رحت عليهن صحت بصوت بس موكلش عالي گتلهن

...بناات عفيه المطبخ خنگه وصغير الماعدها شغل خل تروح تگعد بالگعده حتى تصير مساحه ناخذ راحتنه بيها....

عااد هنه صدگ طشن وبقت بس ساره مرت علي جانت اتنظف بالخظره وسوسن واگفه ع الطباخ ودموعها تصب وهدى مرت احمد اصب طرشي بكاسات ....

رحت اني طلعت مواعين من الكاونتر واجيت للطباخ يم سوسن حطيتهن ع الميز ورحت حظنتها وهي حظنتني جنها ماصدگت لگتلها حظن تذب ادموعها بيه ...

....اششششش كافي حبيبتي كافي مابيه شي والله هسه سمعت صباح يگول بس كسر بأيده وراسه مخيطينه ومسويله مفراس ومابيه شي والله

يلاا كافي ...

...لج نبض يا مابيه شي موشفت صورته لج راسه صايره بيه نفخه بنفسجيه وعيونه اذب دم وسنه مكسور وايده هذا كله ودگولين مابيه شي ...

...ايي مابيه هاي النفخه اللي براسه گالو دم جامد مجمع ابراسه وطبيعي ينزل من عيونه لان كله محصور بگصته هسه يجيبوه وسويله كمادات حاره وهو راح يرجع مثل قبل واذا على ايده وسنه فيرجعن ويطيبن وكلها اصير اسوالف بس انتي بطلي بچي وقوي نفسج موبس علمودج لخاطرنه كلنه شوفي مهيمن من البارحه لليوم هو يرگض بيه بالاطباء حتى ماشايفينه ولا گاعد وهم تلگينه گلبه محترگ على ابنه حاله من حالج ..

وامي شون حالتها والله خايفه لا يصير بيها سكر من وره ولدها عاد من اشوفج ماتبچين وقويه هي هم تسكت ويرتاح بالها وتطمن ...

وخو بابا الله يساعده شون بعده واگف على حيله من وره الهبطه ونوب هو روحه بمنير يموت عليه حبيبي

انشالله ..والله اني هم خايفه عليهم  خالتي وخالي   ظغطهم من البارحه مانزل كل شويه ماخذين  حباية ظغط ...

مسحت ادموعها ودعت ربهاا بگلبها  كون يطلع حچي نبض صدگ وتطلع هاي الجغده بس دم جامد مو شي ثاني ورجعن كملن شغلهن وصبن الغدا ....

،،،،،،،،،،،،،،،،،،،،،،،،،،،،،،،،،،،

سوسن ....

گلبي مثل النار على ابني وعلى رجلي ثنينهم ماشايفتهم من البارحه لليوم بس عرفت من صباح مهيمن الليل كله مانيامه وباقي سهران يم راس منير حبيبي وبدون اكل والصبح رايد يروح للحمام و واگع متخربط عدهم وشادله مغذي ....

وهاي اني باقيه هنا بس اسمع واكل بنفسي من القهر عساها بحظك وبختك ياحسين والله بعد حالفه مايطخ الساني اللسانك ولا اعترف بيك ولا بهلگد ...

يامجرم ياسفاح ...

بقيت اشتغل وعيني ع الباب شوكت يجون شوكت يطلعو مو گال صباح العصر يطلع شو صارت بـ 5 وهو بعدهاا ....
اووف ياربي فدووه مشي الوقت بسرعه خليني اكحل عيني بشوفة ابني يارب فدواتك ...

حالي صار
حاله حال الجرس التحرگ يارايحه للباب شايفته يا راجعه للساعه نوب الوقت اليوم على حظي يمشي على كيف اريده يتحرك ماكو لطشت الساعه ع الـ5

هسه صالي شكم مره اروح وارجع وهي بعدها بالـ5
يمعوده دتحركي يم الغيره امشي شبيج اتليصتي على حظي ....

كل هذا انتظاري ولهفتي وخوفي بصفحه وهذن الگاعدات وبس لوك لوك ويحشن بعباد الله بصفحه

هسه غير افتهم شعدهن جايات لا فايده لانفع بس يدورلهن سالفه يحشن بيهاا ...

انوب صطرني صطر راسي احسه صار اكبر من خزان باب الشرچي( الشرقي )  ....

ايي ياااااللله صوت الباب ....

سمعت صوت الباب وطلعت اركض يممممه ابني يمه حبيبي عساها بيه ولا بيك يبعد امك ....

يمه شصاير بيك يمه ...

اخذته من ايد سجاد اخوي وحطيته بحظني وگعدت بالگاع واني دموعي ينزلن عشره عشره وابوس بيه واشمه وارجع احظنه ونوب اوخره من حظني ابوسه واشمه وارجع احظنه .....

اتخبلت عليه احس اريد اظمه جوه روحي وماريده يتأذه بعد ...

***************

نبض ....

جابوه حبيب عمته وامه خطيه اتلگته من الباب اخذته من ايد اخوها وگعدت اتبوس وتحظن بيه ودموعها مغرگات وجهاا ....

منظرها يفت الگلب فت كلنه بچينه على حالها وحال هذا الطفل ..بالله شذنبه يطلع بيه مراجله ..

كلهاا التمت فوگ راسها ونوب الحوش صار لخه نسوان وزلم .....
ناس تبچي لبچي سوسن وناس بعدها تسئل شمسوي حتى يكتله هيج وناس تسئل عن حسين وليش مختفي ..ووووو صدگ صايره لخه ....

همزين اني جنت صاعده على اول بايه من الدرج و واگفه اباوع عليهم ....

مهيمن حبيبي حالته حاله جان گاعد وحاط ايده على راسه وحاله مبهذل وعيونه حمر وايده بيها زراگ مال كانونه سوده علي جانو حاطيله مغذي لان متخربط عليهم من قلة النوم والاكل ...

صباح جان يلوب يروح ويرجع ما عاجبه الوظع اخر شي نزل شال منير من حظن سوسن وراح وداه بفراشه اللي حظرناه اله بالاستقبال ورجع عاط بينه
حتى ندخل جوه هههههه صار امطافرهن بفلس كلها تخاف منه حتى اني مادري شلون دخلت للمطبخ ...

اجت سوسن لازمتها هدى وتمشي بيها گعدتها ع الكرسي رحت جبتلها مي شربت وغسلت وجها وفتحت حجابها شويه تتهوه لان صارت حمره واختنگت من البچي ...

بعدني جاي اهدي بيها ودخل علينه الاعصار الهايج
اقصد صباح ..

....صوووووووتجن لا اجي ابتلي بيجن شبيجن ماتستحن ما تستحرمن صوجن طالع والاستقبال مليان زلم  والله الأسمع صوتها طالع لا اجي افرك حلگها فرك ...

وحظرن الچاي يلااا بسسرعه ....

راحت فاطمه ترگض حطت القوري ع النار ...شعجب منها من الشيطان

وره شويه اجه اخذه وراح وراها خلصنهاا چاي مي چاي مي ...متتتتنه متتتنه من التعب همزين باچر ماعندي شي وما أروح ..

لحد ما خلصنه ورحت انام اني منتهيه رجلي امورمات من الوگفه والتعب وحتى معدتي توجعني لان كلشي ما أكلت التهيت بالشغل ونسيت اكل ...

طلعت سويتلي لفة جبن اكلتها  ورجعت نمت نومة اهل الكهف .....

----------------------------

ثاني يوم ......

شمس ....

گعدت الصبح والبرد يصل بالعظم لبست بدي وفوگاه القميص والصدريه وكالون وجواريب ثخينه  وسويت شعري مثل كل مره ضفاير ثنين ولفيت شال ثخين على رگبتي

طلعت من غرفتي شفت ياسر هم گاعد ومبدل

صباح الخير ..شنو عندك طلعه ؟؟؟

...صباح النور اي والله رايح عندي كم شغله اخلصهن
وارجع ...بعدين باوعلي من فوگ لجوه ..

..اگلج عندي بعد بجامه وبلوز بالكنتور روحي لبسيهن خاف ذن اللي لابستهن شويه ..

...تستهزء حظرتك ...بعدين البرد كافر لا دين له
يلاا اني رايحه
مشيت لحد الباب وذكرت بابا شون بيه رجعت دخلت لگيت ياسر گاعد يتريگ
...سئلته اگلك ياسر وبابا شون بيه منو يبقه يمه .. 

جاوبني

....روحي لدوامج ولا تهتمين وصيت عمو ابو خالد هو راح يجي يگعد يمه لحد ما أرجع ....

احسن زين سويت وانته هم حاول لا تتأخر لان تعرف بابا يتحسس يطلب شي من احد غريب ...

يلاا اني رايحه هسه سلاام

...طلعت للخط صعدت وگعدت بمكاني يم الشباك وطلعت كتابي وبديت اراجع لأمتحاني وهذن من الصبح لغوتهن مشتغله مابقن سالفه عوجه ماحچن بيهاا ...بقيت اقره واحاول اغلس عن سخافتهن لان اكو كم وحده يبسمرن علي لان ما انطيهن وجه ...

استمريت شويه  اقره وشويه اباوع من الجامه هذا الحچي احنه چنه واگفين ننتظر سراب بنيه ويانه وهم من نفس الشله التعبانه منتظرينها تطلع ...

تقريباً بالعشر دقايق احنه منتظرين ابابهم واخيراً طلعت البرنسيسه تارسه وجها مكياج والعلج تفر بيه بحلگها والشال لابسته ع النص ....

صعدت و ابو الخط حرك السياره ...

واني رجعت كملت مراجعتي بعدها رفعت راسي وصار گدامي نفسه الولد ابو جگاره چان نازل من تكسي وداخل للفرع يمشي بس حاله چان تعبان وليشوفه يگول چنه طالع من الگبر بكفاله ...

بقت عيني عليه ونسيت ام الكتاب والامتحان لحد ما ابتعدنه عنه وبطلت اشوفه بعدت نظري من الجام وشفت سراب چانت عيونها عليه واكو نظرات مكر بعيونها ماهتميتلها رجعت حطيت راسي لكتابي بس بالي چان مو يمه باقي يفكر بأبو جگاره ليش هيج جان شكله ...

وبقيت اجيب واودي بأفكاري لحد ماوصلنه للمدرسه شلت جنطتي ونزلت وقررت اتجاهل هاي الافكار واركز بدراستي وبس .....

----------------------------

حسين ....

يومين اني ماشايف النوم بعيني ولا ظايگ طعم الزاد كاره روحي والدنياا كلهاا طلعت من عيني ...

شايفين هذا الاحساس مال بعد مايهمك لوشمايصير وياك بعد تحس نفسك ماتتأثر ولا تهتز بيك شعرايه

تحس بفراغ من كلشي هذا احساسي هسه ...

صح اني كلي اخطاء وصح اني استاهل الحرك بس ماريد احد من أهلي يتأذه لو يصيبه شي بسببي

موعاد اني بأيدي اموت ابن اخوي واول فرحته

كل هذا اللي سويته بس حتى اجيب حق اختي ماجنت افكر بصح وخطأ المهم جان عندي اوگع هاي الساقطه واخذ حق نبض من عينهاا ....

بس خوش رب العالمين وگعني اللي وصرت ابدال لا اجيب حق اختي نزلت من عينهاا ...

وابدال لا اصحح هذا الشي لا رحت ودميت ابن اخوي وبهذلت احواله ...

والله اليعلم هسه شلونه وشلون حال اهله ....

اوووف يااربي والله گلبي ماكلني عليه اريد بس اعرف شلونه خوما متأذي ...

بعد ماتحمل ابقى هناا اصلاً الى متى ابقه شارد لو شما مر وقت لازم ارجع للبيت ...

وشمايسون بيه قليل بحقي ...

گمت اخذت غراضي وطلعت من الشقه واني اجر بروحي جر احس نفسي راح اوگع وخطواتي موثابته

هاي يمكن لان مماكل ...يلاا مومهم

المهم هسه كون اوصل الأهلي واطمن بالي ...

وگفت ع الشارع اشرت لتكسي صعدت ونطيته العنوان مشت السياره مديت ايدي بجيبي همزين لگيت عندي كروه ...

وصلني لراس الفرع حاسبته ونزلت وكل خطوه اخطياه ايروح من عمري سنه ...

لحد ماوصلت لبيتنه باوعت يمنه يسره صرت اتلفت كل عقلي ادور على لافتة نعي وفاته ...

ماشفت شي ارتاحيت وحمدت ربي يعني ماميت

دگيت الباب واني اردد الداخلي
"اجاك الموت ياتارك الصلاه " 

اي والله صدگ اني تارك الصلاه والا ملتفت لديني لو لربي ...بس لا اني نويت اتغير ومن اليوم راح التزم بصلاتي واتجه لربي واترك كل امكسراتي بس قبلها اكو شغلتين لازم اسويهن

الاولى اطلب السماح من اهلي واصحح كل السويته والثانيه ...هاي عوفوها لبعدين ...

بين ما ايدي مشغوله بدگ الباب وبالي بالتفكير

انفتح الباب وصار صباح بوجهي ..
اني اتفاجئت بجيته وهو اتفاجئه بيه سوالي طريق دخلت وهو وراي وثنينه ساكتين

وصلت للحوش شفت اهلي گاعد يتريگون ردت اروح اسلم على امي وابوي طاگ گلبي عليهم

ماحسيت غير اجاني بوكس بعيني وتكومت بالگاع وصار الظرب ينزل علي من كل مكان ....يتبع

هلوووووو كيفكم ..

لا تتعودون على هيج تنزيل تره بس لأن الظروف جاره عدل وياي لهذا دانزل يوميه اعتقد باجر تاخذلها صفنه على روحها وترجع تعكس مره ثانيه 🤔😂 ...

وارجع اختفي من جديد...

ادعوا كون تبقه ظروفي هيج حبابه حتى اشبعكم بارتات 😆😊 ....

اتفظلوا وياي لا حد تستحي ودكول ماريد ترا كلها باكيت بسكت ابو الربع وكوب جاي مال الصبح امحميته 😂😂😂😂😂😂😂