رواية نبض دافي الفصل السابع 7 - بقلم Nabá baqer

نـبـض _ دافـي

Nabà _ baqer

الـبـارت الـسـابـع ........

_ علمو أولادكم أن ألحب حلال
وأن ألحب أخلاق...
وأن الأنثى امانه وليست للاهانه...
علموهم أن الأنثى وطن .. والوطن لا يخان 💜🌿

_______________________

طلعت من الدوام واني بعد ماتحمل مظايقات التافه هذا تعبت منه ومن لزگته
شكم مره صار ارزله واسمعه كلام بالعظم
وهو ولا كأنما عبالك فاقد الاحساس كلش ...

حتى صباح انتبه علي وسئلني ولغمطتها عليه بحجة دوام وتعب وظايجه من هاي السالفه ...

انوب البطران يريدني ابطل حتى اگعد بالبيت ويموتوني فد مره هو اني دوام وعود اطلع نص نهار بره ومن ارجع يكرهوني بعيشتي ولا صباح

من رجع لليوم وهو بس يرزل ويحچي ماخله شي ماحچه عليه ....

حتى على حذائي لان بيها كرستال من گدام گام يحچي عليها ....
والله شنو لابستها حتى اجذبين النظر
وگعد ساعه ينطيني محاظرات بالدين لحد ما شبعت وگمت اتريع ....

بس همزين امي ماقبلت عليه وسكتته عني بس شلفايده اخذني الطريق كله يحچي ويرزل
والرجعه هم ..بالله هسه انته شعندك بسوالف البنات

حظي هذا خله مهيمن يكسر حسين ويگعده بالبيت
ويبقي امري بيد اية الله الشيخ صباح الجاروبي

استغفر الله حتى كرهني بالدين وشكو واحد يحچي بالدين صرت ما أطيق اشوفه ...

......يلاااا خاتون فوتي

...السلام عليكم ..

..هلاا عليكم السلام الله يساعدكم ..

ويساعدج ماما ...بست امي ورحت لغرفتي بدلت وطلعت شفت سوسن گاعده تغدي بسراج ومنير گاعد يمها رحت بستهم وحاولت العب منير ماكو

من يوم كتلته وهو صاير انطوائي ويخاف من ظله وحتى باب الشارع بعد يخاف يوصله ....

كلنه داير مدايره ونحاول انشيل الخوفه من قلبه ونرجعه مثل قبل ..

...اگول ام السوس شنو حسين راح يفتح الجبس

....لا

..وشبيج تحچينها من وره خشمج عابت ههه عيبت عليها وهي ظحكت الفطيره اسوي روحها ماتهتم لحسين وهي تغسل بملابسه وتكويها وتنبه امي على علاجه ماعدها قلب ..عفتها ورحت صبيت غدا وگعدنا تغدينا وبعدها صبيت چاي لصباح واني غسلت المواعين ورحت صعدت لغرفة حسين

فتحت الباب مدين راسي ظلمه هندس امطفي الاضويه كلهاا ومنا الدنيا مغيمه ومايجي ضوا من الشباك فصايره بحر من الظلام ....

دخلت وسديت الباب وفتحت الاضويه وهو فز شكله جان نايم ...

شال ايده من عينه وباوعلي
واني ماهتميتله بعدني شايله بداخلي عليه ...لملمت الغراض وشلت ملابسه الوصخه ورتبت ادويته

وقبل لا اطلع سئلته واني ما اباوعله

...محتاج شي بعد ...انتظرته ايجاوبني ماكو درت وجهي عليه لگيته يباوعلي وعيونه امغرغره من الدمع ...

ردت اروح احظنه وامسح دمعته قبل لا تنزل بس اذكرت مهيمن وتحذيره النه

..ممنوع احد يصعد يمه لو يحچي وياه وتعاملكم وياه بس على گد الحاجه ...واللي اعرف بيه مامطبق الگلته مايلوم الا نفسه ..

اعرف مهيمن قسه هوايه وياه بس همين اعرف لان يريد مصلحته ولان هو اخوه الچبير واجبه يعلمه الصح من الخطأ ويعاقبه على كتلته لابنه ...

بس انشالله مايطول هذا العقاب لان حسين حاله ابد ماعاجبني وگاعد يوم عن يوم يضعف ويذبل ...

وخصوصاً هو ايده اليمنه مكسوره ورجله اليسره هم

لهذا يحتاج دائماً مساعده لان هو يمناوي وميعرف يسوي اي شي باليسره وبس امي وصباح همه اللي يداروه ويهتمون بحتياجاته ...

ابوي ومهيمن شايلين ايدهم منه وحتى مايسئلون عنه گدامه بس ادري بيهم يعرفون اخباره من نسوانهم ...

هسا تگولون منو نسوانهم هههه
اني اگلكم ..
مهيمن يعرف اخباره من سوسن اللي هي اصلاً تعرفهن مني ومن امي ..

وابوي يعرف من امي ههههه هاا عرفتو منو نسوانهم

وست سوسن هاي الفطيره اللي حلفت بعد ماتعتبر حسين اخوها ولا تهتمله ..يوميه اشوفها تغسل ملابسه وتحظرله الاكل وتنطيه الامي ...

ومن اسئلها تگلي اسويها لا الله لان انتي تجين تعبانه من الدوام وخالتي مابيها على الشغل والوگفه

اني عاد اغلس وما اعلق زياده عسى وان يجي يوم وتتصافه الانفوس وتنزاح غيمة الزعل ...

بعد ما نزلت حطيت ملابسه بالغساله واني هم عندي كم قطعه وصخه ورحت لملمت كل الملابس الوصخه وحطيتهن وفريت الغساله ...

ورحت لغرفتي اتمدد بين ما تكمل فرتها وارجع اشطفهن واجففهن ..بس شو ماحسيت على نفسي غير اني غافيه وسوسن جاي ادگعد بيه ...

فزيت اركض ..

لج الغساله نسيتهاا ردت اطلع وهاي لزمتني وهي تظحك ....

...صح النووم عيني جان بعد وقت كملتها وشريتهن ومطرت الدنياا ودخلتهن جوه وشريتهن بغرفتج ..

باوعت هااي صدگ شارتهن هناا للج خررب بيج سوسن واني اگول الرطوبه صاعده ...

شيليهن مناا يلااا الغرفه صايره خنگه ...

...اسفه عزيزتي تحمليهن بين ما يسكت المطر وارجع اطلعهن بره ولا خلفة الله عليج ....

...وولج سوسنووو شو طالع السانج وصايره تجاوزين ...امشي روحي يلاا اني زعلت وبعد لا تحچين وياي ...

...حجت وهي تفتح كنتوري وطلعت فستان صوف يجي لطش ع الجسم لونه سمائي وياه جواريب ع شكل بوت لونهن ابيض ...

..ماروح عيني ويلا تعاي لبسي هذن اكو نسوان بره اجن وامج ادگول صيحيهاا خل تجي بسرعه ..

...نسووان ؟ منو ذن ؟ واني شكو اروح لا وفوگاها امطلعتلي  هيج لبس ..

اجت حطتهن بأيدي وگال مادري والله هي گالتلي اصيحج وما على الرسول الا البلاغ ..يلاا استعجلي وحطي شي لوجهج. وذن حواجبج سويلهن چاره خليهن ينزلن شويه ...

عافتني وطلعت واني بقيت متصفصفه نسوان شنو حواجبي شنو ؟ اووف منج سوسن ومن الدرامه مالتج ..

طلعت ركض للمغسله غسلت وجهي ورجعت هم ركض لان باارده انوب وجهي غسلته بمي بارد احسه جرش ...

لبست الفستان وصار قالب ويه جسمي اني جسمي شكله كمثري يعني الورك اكبر من الصدر بس اوازنه بالحماله والكتافيات حتى يصير شكله حلو

ولبست الجواريب صارن حلوات وياه وحطيت مسكاره ومرطب وسويت شعري ظفيرة السنبله صفح وخليتها راخيه ورشيت عطر وطلعت للاستقبال

فتحت الباب ودخلت
گلت السلام عليكم ..اجاني صوت مره ناعم ردت السلام باوعت شفتها مره متوسطه بالعمر حلوه بيضه وناعمه لا بسه جبه لونها نيلي وربطه رصاصي ويمها بنيه صغيره تطلع بعمري سافره مامحجبه
حلوه ومعانيها ناعمه ابتسمتلي ورجعتلها الابتسامه

رحت سلمت عليهن وردت اگعد يم امي بس المره ماقبلت وگعدتني يمهاا وكلشويه اتباوعلي وتبتسم وترجع تكمل سوالفها ويه امي لحد ماطلعن واني مثل الاطرش بالزفه كولشي مامفتهمه من جيتهن ومن وجودي بنصهن ...

خلص النهار واني احوص اريد بس اعرف شنو نظام ذن النسوان ..ماكو ماحصلت نتيجه ..

لحد ما صار العشا ولتمينه كلنه بس حسين اتعشه بغرفته حاولت وياه امي يطلع ماقبل ...

المهم ..مدينه ادينه وگلنه باسم الله بعد توني احط اللگمه الثانيه بحلگي وجان امي أدگول لأبوي ...

...  اگلك ابو مهيمن اليوم العصر اجن نسوان بالبدايه اني ماعرفتهن بس من گعدنه وعرفني عليهن

طلعت امه لأسامه صديق ابنك حسين وجايه وياها اخته الصغيره ...

گلهاا ابوي ..ايي وخير وماگللج شيردن ...

جاوبته امي ..

..   اصبر ياعيني غير جايتك بالسالفه .. ايي هنه من عرفني بنفسهن اني رحبت بيهن  وضيفناهن وسالفه منا وسالفه مناك عاد بعدين الامايه حجت ...

...  والله ياأم مهيمن الگعده وياج ماتنمل  اني من زمان سامعه بيكم وحابه اتعرف عليكم ..وحتى حبيتكم من گد ما يمدح بيكم اسامه ابني

واليوم اني اجيت وعندي يمج طلب وكلي عشم ماترديني خايبه ....

...  والله ياحبيبه واني بعد شاهد علي ربي حبيتج ونفتحلج گلبي وحسيتج اختي ..وان جان على طلب اذا اگدرله تشلعين عيوني وتاخذيهن ...

...  سالمه عيونج ياطيبه والله اجيت وعاگده النيه ورايده بنيتج بنيه الي وزوجه وشريكة حياة لأبني اسامه ...

واني مثل ماگتلج ماعندي بس أسامه چبيري وهاي روان بنتي الصغيره بس ذول الاثنين صارو عندي والله ماكتبلي بعد ...

والحمدلله اني وبوهم ماقصرنا وياهم بيوم ربيناهم احسن تربيه وعلمناهم واسامه صار مهندس وروان صيدله ...

واحنه عدنه خير من الله ابوهم عنده شركة استيراد وتصدير واني مديرة مدرسه ...

وشتطلبون احنه حاظرين حتى لو بيت لوحدهاا هم يجرالهاا ...

....  هاا ابومهيمن شتگول ...

..  أمي تحچي واني احس اعصابي فلتت لا يربي كلشي ولا يوافقون عليه ...ماريده ..ماريده

يعني هذا مايفتهم ماعنده عقل كم مره راد يتقربلي بحچه أو بدون حجه واني ارزله وابهذل احواله
وكل مره اگول هاي هيه بعد لوعنده كرامه يبتعد عني وميشوفني خلقته ....

انوب طلع داز امه ...باوعت لسوسن شفتها تباوعلي انطيتهاا نظرة زعل وگمت وهمه بقو يتناقشون

..  يااربي چنهم راح يوافقون ..مدامهم اتناقشو يعني مقتنعين بالفكره ...اووويلي علييه اوويلي ...

شحچي عليك ياا حسين لو ماسوالفك التعبانه اني اشوف هيج شكول ...

انوب صديقه ياربي صديقه اذا اخوي عندي هيج سوالف ومكاسير لعد صديقه شنو قابل نبي منزهه
اكيد نفس السوالف والطيحان حظ ...

ماااارريده لااا ماريده ..كلشي ولا اخذ واحد عنده سوالف بنات ..

بقيت افتر بغرفتي واني افرك بأدي وادعي ربي كون مايوافقون ...

اجتي سوسن وماتحملت اسكت بعد .

.... ليشششش مااگتيلي ليش جان ماطلعت ولا شوفتهم خلقتي ...ليش ظميتي علي من سئلتج
وماگتيلي جايات يخطبن ..هااي عود واني معتبرتج اختي ..بس اضاهر طلعت غلطانه ..
تردين بس ازوج وتخلصين مني موووو
احچي ليش سااكته !!!!!

ماحچت ويااي شي بس باوعتلي بعتب وطلعت وعافتني بناري بقيت الليل كله واني فكره اجيبني وثانيه اتوديني ...ماعرف شوكت نمت هاي اذا نمت اصلاً لأن احس نفسي حتى واني غافيه افكر واحلامي كلهاا صارت كوابيس بيه ...

ساعه احلم جن مزوجته ويدخل علي وبيده وحده
لو ساعه احلم جن يخابر بالبنات ومن ما أقبل يكتلني ويرجع يسولف وياهن اگبالي ...

واشكال الاحلام شفت ومرت علي هاي الليله سوده ومصخمه لحد ما طلع الضوا وگمت صليت الصبح وكملت بدلت ملابس شلون ماكان حتى مجان عندي خلگ انسق ..

وطلعت شفت حسين گدامي جان يغسل يم المغسله باوعتله بضوجه وتعب وعبرته ورحت لصباح دگيت عليه باب غرفته حتى يگعد يوصلني ورحت انتظره بالمطبخ ....

....

حسين ...

اسبوعين صالي واني على نومه وحده ادي مكسوره ورجلي هم
وعيني جانت طافيه ماشوف بيهاا بس البارحه واليوم احسن شويه شويه رجعت طبيعيه ..

كسرني تكسر مهيمن بيومهاا اجاني فجأه بدون ما أحسب احسابه طاح علي وصار يضرب ويغلط ويسب واني عفته براحته مارفعت ايد

ولا دافعت عن نفسي ...شدافع شحجي بيااوجه
وجهي مصخم گدامه ...

بقه يضرب بيه واسمع صياح صباح وهو يحاول يدفعه مني وامي والبنات عياطهن ارتفع ...

كل هذا واني جنت مستسلم جوه ايده وتمنيته يموتني بساعتها ويخلصني بس ماصارت ...

وره مدري شگد فتحت عيوني لگيت نفسي بالمستشفى وايدي مچبسه ورجلي هم ...

وراسي جان يوجعني وجع فضيع وبس عين وحده اگدر اشوف بيهاا ...

ردت ارفع روحي وضلوعي كلهاا طگطگت شاغت روحي من الوجع گمت اصيح اريد مسكن اي شي يخلصني من الوجع جسمي كله يوون علي منين ما أتحرك اتأذه ....

اجاني صباح يركض و وراه ممرضه ضربتني ابره وبعد ما دريت بالدنياا لحد الليل گعدت ومادري بيه هذا ياليل منهن مال اليوم باجر مادري ...

شفت صباح گاعد يم راسي ويكنك ونيت عاف موبايله اجه يم راسي ..

... هااا شلون صرت بعده جسمك يوجع ...

هزيت راسي بتعب وراهاا اجه الدكتور اخذ الطبله ومدري شكتب وگال ادگدرون اطلعو ماعليه شي بعد

بس كون مايتحرك على الكسر ولا يتعبه
يقصد على كسر ايدي ورجلي ..

طلعنه وشفت ابن عمي جان منتظرنه يم سيارته بس شافنه اجه يركض سندني وحطني بالسياره ورحنه للبيت .....

وصلنه مجان احد موجود بس أمي والبنات رادو يگعدوني بالاستقبال ماقبلت ....

ردت بغرفتي حتى لا اشوف احد ولا ينجبرون على شوفتي ...

لان بعدهاا كلمة مهيمن ترن بأذني من گال ...

...  بعد لا انته اخوي ولا اني اخوك ..ومن هساعه  ما اريد شوفتك گدامي ..

بقيت بغرفتي وبس امي وصباح همه اللي ابتلو بيه وتعبو علمودي ....

لا ابوي ولا مهيمن ولا سوسن محد بيهم اجه وشافني. لو اطمن علي ...بس نبض سلمت علي ابرود اول ما أجيت  وكم مره صعدت نظفت غرفتي ونزلت بدون لا تباوعلي ولا تحچي وياي ...

اكيد بعدها شايله بخاطرها مني وكارهتني ومهتزه صورتي بعينهاا ...

اليوم موعد فتح الچبس ولازم اروح للمستشفى ايفتحونه ويشوفون اذا طايب الكسر لو لا ...

گعدت الصبح بيه ومابيه نزلت الدرج رحت للحمام حاولت اسبح بأيد وحده وبدون ما يلوح ايدي ورجلي المي .. مادبرتهاا لان اني يمناوي ويمنتي هي المكسوره واليسوره عوبه على گولة امي مابيها خير

لغمطت نفسي شلون ماكان وطلعت وگفت يم المغسله باوعت الزراگ البوجهي خاف وتقريباً رايح ولحيتي عليانه يرادلهاا زيان وشعري هم ...

بقيت محتار شلون ازين ...بهالاثناء طلعت نبض وجان وجها تعبان ومبين عليهاا السهر باوعتلي حتى بدون مصبح علي وراحت ...

اتنرفزت ورجعت كرهت نفسي من بعد مابديت انسه
وخصوصاً اني وعدت ربي بالتوبه عن كلشي يعصيه
وح مشي بطريق مستقيم ..

شمرت الخاولي بقوه ورحت اتكأ على المحجر وصعدت لغرفتي گعدت على سريري واني اريد بس طريقه حتى اصحح كل الهدمته وارجع صورتي بعيون اهلي ...

سحبت تليفوني وخابرت على أُسامه صديقي گتله يجي ياخذني للمستشفى بسيارته ..وهو هم مگال شي الولد وره ساعه صعدلي صباح ضايج ..

.. حسين شنو معناها مخابر على الولد يجي ياخذك ليش انته مگطم ماعندك اخوان ياخذوك ...

..والنعم منك صبوحي ماقصرت وياي بس هذا هم اعتبره اخوي واني وياه واحد يمون على الثاني وخابرته لان عنده سياره وهم حتى اريحك مني اليوم ..ماكافيك صالك اسبوعين انته مبتلي بيه ...

..عود حجه ابو حلك الازرگ (مبتلي بيه وهو يقلد حسين ) ... لا مبتلي ولا شي بس انته كول بطلت تحسبنه إخوانك ... وصـآير تعتمـد على آلغريب بحيآتك

.. لا وعيونك مو هيج ...
راد يكمل كلامه بس صباح قاطعه ..
هسه يلا مو وقته هذا الكلام گوم اسندك الولد ينتظرك جوه ..

سنده ونزله وراح هو اسامه حتى يفتح الجبس وللوحده الضهر ياله كملو ورجعو .

تعبتك وياي ابو اسد ..

.. شو انجب حبيبي وبلا سخافتك تعبتك شنو لك بابا انته صاحبي واخوي واليوم اوگفلك اني باجر احتاجك وتوكفلي .. هيج لو مو هيج ؟حجه وهو يباوعله بعيون متسأله ..

جاوبه حسين وهو يبتسم ..والنعم منك حبيبي اي هيج
واكثر .. وانشالله الله لا يحوجك لا الي ولا الاي بشر

.. امين .. يلا حبيبي اني اشيل الزحمه محتاج شي بعد

سلامتك .. شنو راح تروح للدوام

...  جاوبه اسامه وهو يباوع بساعته ..لا ماتسوه اروح
بعد بوجهي للبيت اااا اكول حسين

شنو اسامه شبيك كمت اتمتمت

.. هاا لا لا ماكو شي يلاا اودعناكم
طلع اسامه وهو جان بنفسه يسأل عن جواب نبض بس جان مستحي يفتح الموضوع وهمه مصارهم بس البارحه من اجت امه وطلبتها....

اما حسين فتمدد بفراشه وهو يفكر شلون لازم يصلح أخطائه بس قبلها لازم يداوم حتى يخلص موظوع نبض ويه نمارق...وبعدها يرجع ويطلب السماح من اخوه واهله ...

.
.
.
.
.
.
.
.
.
.
.
.
.
.

بعد اسبوع من محاولات الإقناع ويه نبض حتى توافق على اسامه وافقت بس كون تخلص من ملحتهم بس بينها  وبين نفسها مجانت موافقه و لا مقتنعه ...

والخوف جان اله النصيب الأكبر من احساسها
تخاف لا تاليتها تتحول من بنت سعيده عايشه حياتها براحه بنص أخوتها لزوجه تعيسه مخانه ...

هو هذا اللي جانت خايفه منه واللي جان واكف حاجز بينها وبين أن تحس بالفرح...

تحدد موعد الخطبه والعقد بيوم واحد وهو يوم الخميس كوداً أن هذا اليوم العراقين كلهم يتباركون بيه ويخلونه يوم أفراحهم ومناسباتهم...

اجت امه لاسامه واخته اخذن نبض للسوق وجهزنها  جهاز كامل وجان كله من ذوق امه بطلب من نبض لان مجان عدها نفس تختار اي شي حالها حال باقي العرايس ...

... السلام عليكم

..هلا وعليكم السلام هلا بيج خيه تفضلي ليش واكفه بالباب...

..لا ام مهيمن فدوه لعمرج مستعجله اريد اروح لان ابو أسامه هسه جيته من الشغل واريد الحك اغديه
خيه انشالله الخميس الصبح يجي أسامه و روان لنبض حتى يوصلهن للصالون....

جاوبتها ام نبض وهي عين عليها وعين على بتها اللي واكفه وماده البوز مترين ومبين عليها راح تبجي
اي خيه هاي انشالله مثل ما كلتي...هسه ماتتفضلين جوه عاد اكلاص مي شربيلج...

... لا وآلله خيه مستعجله واعتبريه وصل قابل شنو ام مهيمن جاي اجربج اني انتي ام الكرم يلا عيني مع السلامه
...فدوه لعمرج خيه الله وياج ... اتتظرت السياره تحرك ولتفتت لبتها...شبيج يمه وجهج يكطع العافيه وعيونج تريد تبجي حتى المره شكلها منتبه عليج ... ليش يمه وحده الغيرج هسه تلكينها طايره من الفرح

جاوبتها نبض وهي تدخل وهي محمله السوك بيدها

_ يمه تعرفين كلش زين شبيه وتدرين اني امنيتي ابطل كلشي بس واكفه بعيني كلمتكم المنطينها للناس...

لهذا فدوه بعد لحد يسألني شبيج لو يطلب مني اضحك وامثل الفرح ...

بعد ما كملت كلامها دخلت لغرفتها وشمرت الكياس بالأرض وكعدت تبجي دخلت عليها سوسن وسدت الباب وراها وكعدت يمها وهي تلزم ايدها وسالتها

... نبوضه خيتي فتحيلي قلبج وصدقيني القول انتي اكو احد بقلبج حتى هيج رافضه الزيجه هاي لو بس لأن خايفه خاف يطلع نسونجي مثل حسين ....

نبض انتفضت رافضه كلامها وحجت بصوت شبه عالي
لججججج سوووسن شبيج انتي صدك تحجين يعني كل هذا وانتي بعدج متعرفيني اني شنو كل عقلج اني من هذن اللي يحبن ويتحبن ويسون علاقات
لج ياسوسن يااااااا نااااس ياعااالم اني خااايفه خاف يطلع نسونجي وسكير ويضيع عمري وشبابي واني اندب حظي وابجي عليه ...

.. نبض صوتج يمعوده لا يسمعون اخوانج وتعاي كعدي وخليني اسألج ... كعدت نبض وهي تمسح بدموعها ويرجعن ينزلن وكملت سوسن كلامها... نبض انتي الولد مو وياج بالجامعه هم سمعتي عنه حجي مو زين لو عنده علاقات غراميه ويه البنات ....

نبض صفنت اتفكر بعدها هزت راسها بالرفض وسوسن رجعت كملت زين هم يوم شفتي شكله مو طبيعي يعني اقصد شارب لو متعاطي... رجعت نبض هزت راسها بالرفض ... زين هو شلون يصير شكله وصفيلي اياه

عقدت حواجبها نبض وحجت شلون يعني اوصفه هو يعني حاله من حال باقي الشباب مهتم بنفسه وعلاضته
وهيج نفس ذبة حسين  ...

... هممم يعني ماعنده كرش ؟

... لا ولج منيله الكرش أصلا اني اللي عندي الكرش وهو لا

اي بعد شبيج يحظي كالبتها عزه وعوزج بس مله يكعد يقرالج وانتي اتلطمين... دفكيها وشيلي الحمار النايم ابراسج وفرحي حالج حال البنات... ولا تخلين هاي الوساوس اتاثر على حياتج مدامه الولد ماعليه شي وانتي بنفسج شهدتي عليه خلاص بعد عوفيها على ربج وكومي فرحي وجهزي امورج مابقه شي عكب باجر الحفله بس قبلها شوفيني ششتريتي( وكامت تفتح بالعلاليك ونبض كامت طلعت ملابس حتى تبدل وطردت سوسن بره وقررت تاخذ بحجيها وتلعن الشيطان وتتوكل على الله وتحاول تعيش تفاصيل هاي الخطبه ) .... يتبع