قالت لي....
الحبّ بالحبّ .. والدعوة بالدعوة .. والبادئ أجمل .
فأجبتها..
الدعوة بِوِدّ .. والحبّ يمتدّ.. والبادئ أصدق .
نهوة الدليم
ايه مراد
........
*** حساب الانستا تلكونه بالصفحه الي حابه
تضيفني 💘
اتذكر مرت ايام رمضان كلها وبابا كان عدنا
كلش فرحت لان ما خلانا وكضيت كل رمضان وياهم
اخر عشر ايام طلعنا للسوك حتى ناخذ التحلايه مال عيد
وبابا اخذ النا ملابس
وجان هو وماما يختارون لاخوتي هم لان راح
نروح عليهم بالعيد
واني بس اباوع اغار بس بنفس الوقت اعرف بابا
كلش يحبني
ماما اخذت لاختي هم على ذوقها واخذت لمرت
بابا واني بس اباوع شون ماما ما تغار
والله اني من يمي شبعت قهر
وهم لاحضو عليه بس محد حجى وياي
رجعنا على البيت واني كعدت اعزل بملابسي
جان تجي ماما تكعد يمي
... ماما امنه اليوم تصرفاتج ما عجبتني
... ليش ماما شنو سويت اني
.... كلشي بالدنيا اله حدود وحتى الغيره
الها حدود الى يمتى ترى ابوج لاحظ تصرفاتج بس ما
حب يزعلج امنه بنتي غلط الي تسوينه
... اي اغار شنو اسوي يعني هو
لو يريدني ما اغار جان ما اخذ الهم ملابس خلي
من يروح ياخذ الهم من هناك وانتي شون
كاعده تختارين
... عيب هذا الكلام هذولي اخوتج شنو هذا
اسلوبج وياهم ميصير
على الاقل لخاطر ابوج ترى اني شايفه
تصرفاتج الغلط بس ما اريد ازعلج اكول خطيه
بعدها ما مستوعبه بس جبيره انتي الى يمتى
تضلين بهذا عقلج كافي انتي مو طفله
وهل تصرفات
جان تروح ماما يربي شبيهم اهلي وياي
هسه شنو سويت قابل كلت الهم لا تاخذون
شو بالسوك حتى ما حجيت
جنت احلم احلام غريبه مره العب
لو لابسه ملابسي مال عيد وعدي ياخذ
العيديه مني
فزيت ماما تكعد بيه حتى نروح
... ماما حبابه بارده ما اريد اروح
خليني نايمه
... كومي ابوج ينتظرنا يلا بساع بدلي
وامشي
كمت غسلت الجوو ثلج مو مال اطلع و صوت المطر
برى يبووو
غسلت وجهي بزور يلا لان ماكو مي حار
وبدلت
طلعنا الدنيا بعدها ضلمه بابا يريد يصلي
صلاة العيد هناك
واني الطريق كله نايمه لان بالليل
تاخرت يلا كدرت انام لان موعد النوم تغير عليه
بابًا كال مبقى شي نوصل ماما كعدتني
عدلت شعري وكعدت زين هو هم اخذه الوهس
ونام
وصلنا نزلنا واني كلبي يدك سريع وماما
وبابا ثنينهم يباوعون عليه يردون
يعرفون شنو ردة فعلي
كلش جنت خايفه مع العلم ماكو شي يستاهل
نزلنا وبابا دك هورن الهم
طلعت مراة من البيت اكيد هاي مرته لبابا
سلمت على ماما و سلمت عليه هم
جان ستقبالها النا كلش حلو وحتى هي لهجتها
تختلف عنا كلش
دخلنا جوى بالاستقبال بابًا كال
اروح على بيت ابو سلام حتى يروح ويه ابو
و اعمامي على الصلاة واخذ حامد اخويه هم ويا
متوقعت عندي اخ هيج جبير و كلش خشن يمكن
بطول بابا لا والله اطول منه هم
جانو يحجون ماما ومرت بابا عاد ماما سالتها
وين هديه
هي كالت تستحي تجي هسه اصيحها
وصدك اجت سلمت علينا واني اباوع الها من فوك الى
جوى بكدي ماما كالت بس شو تبين اكبر
حتى اطول مني و اسمن شبيه اني لعد مثل ما يكول عدي
جني عوده وصدك هنا كلهم خشنين بس اني و ماما
هيج ناعمين
سوو النا ريوك واني بس ساكته ما متعلمه اختلط
ويه اي احد ولا اعرف احجي
ومرت بابًا تكول ليش ضايجه وماما تجاوبها
منايمه زين
مر الوقت تريكنا وماما كالت كومي
غسلي ويه اختج المواعين
واني اباوع الها هو وين اعرفها و اروح اغسل وياها
... لا ام زين خليها ملابسها لا تتنكع
هديه بعد ما بدلت ملابس العيد
هي تغسلهم
واني صدك كيفت لان شلت هم شنو احجي وياها
شو اني كلمتين ما اعرف احجي
طلعت يم الباب بالطارمه الارض كلها طين
بس المطر واكف بقيت واكفه باوعت على كل البيوت
يعني اكيد هاي كلها كرابة بابا هنا
شفت زلم كومه يمرون واني واكفه
وهم يرحون ويجون يباوعون عليه يربي
شبيهم هذولي
جان تجي هديه من باب المطبخ هم يطل على الحوش
جان صوتها كلش ناعم عكس شكلها الخشن
قابل مثل صوتي عدي يكول من احجي يفز من صوتي
لو يصيح يكول اذني راحت نصي صوتج
.... تعالي ادخلي جوى لان ما نطلع نحن
والناس كلها تدحك عليج
... ليش ما تطلعون قابل شنو
وشعليه منهم اصلا خلي يباوعون
... ابويه هسع يجي من الجامع واذا شافج هينا
والله يزعل عليج
... اصلا راح افوت شنو حتى الطلعه حرام
دخلت للاستقبال شنو السالفه ليش
ميصير شو اني بالموصل عادي اطلع
يم الباب واروح لجوارينا و بنت جيرانا تجي عندي
نبقى ساعه بالباب واكفين نحجي
صدك شويه واجى بابا واني ما صدكت طلعت
راسا باب الاستقبال اخذ عيديه
لان جنت نايمه اول ما اجينا وما اخذت
دخل بابا للاستقبال واني مديت ايدي
حتى بدون ما اسلم
... يلا بابا العيديه وها خليها ثكيله
... هههه تدللين هاج وهذا محبس هم الج
صدك جان بابا يطلع محبس ذهب ويلبسه الي
كلش حلو بسته وحضنته وهو صاح هديه
واني كلش ضجت
وهي هم نطاها مثلي فلوس ومحبس
رجعت كعدت يم ماما وهي كالتلي بصوت ناصي
عدلي وجهج عيب شبيج طنكرتي
جان بابا يكول فوتو ولدي ماكو احد
معرفت منو جان يدخل شاب منو هذا
بابا كال لماما هذا سلام
والثاني دخل هذا اعرفه نسر
شبيه يربي كل ما اشوفه اضحك والله عيب هسه
شيكول
ماما سلمت عليهم وهم طلعو كالو نسبقك عمي
انت جيب الاهل والحكنا
وصدك بابا تريك هو و حامد وطلعنا
الي عرفته بيت عمو ابو سلام نفسه بيت جدو
يعني جدي وجدتي ساكنين عدهم
باوعت لماما هي هم متوتره وخايفه
واني اكثر منها هسه لو باقين بيت بابا احسن
بس عازمينا ميصير
جان بابًا يجي للاستقبال رحت من يمهم
خفت لا يحجون شي سويه
طلعت على الطارمه واني واكفه اباوع جان حامد
يباوع عليه
وراسا دخلت المطبخ نسيت ميصير اطلع
وبيت بابا عالي يعني الكل يشوفني اذا وكفت
طلعنا سويه كلنا واني ماسكة ايد ماما
وصلنا بيت جدو جانو نسوان ثنين واكفين
يستقبلونا وياهم بنات يطلعون بكدي لو اكبر
سلمو علينا ودخلنا جوى
صارت هوسه وسلام وصوت البوس
واني ماسكة ملابس ماما خفت لا اضيعها واني
ما اعرف احد كان عدهم هواي نسوان كاعده بالصاله
ماما تقربت من وحده جبيره عرفت هاي جدتي
والله صدك تخوف
واني هم رحت وياها سلمت عليها بست ايدها
وهي باستني
وكالت تعالي شيخة ابوها اكعدي يمي
كعدت وماما يمي وهاي جدتي بس تبوس بيه
وتسال على زين تكول وينه
واني اكول بادخلي توها شتغلت المحبه عدهم
شو قبل ولا يسالون علينا
مر الوقت وكومة نسوان و اشوف البنات يقدمون
جاي و كهوه وحلويات وكليجه
واني كاعده مرت بابًا كالت روحي يم البنات بس
ما اعرفهم شروح عدهم وهاي جدتي
ملت وجهي بالبوس واني امسح
وماما تكلي لا تشوفج كافي تمسحين البوس
ما حسينا غير وحده تهلهل تدخل اني فزيت
من يمي شسالفه عرس
باوعت وحده لابسه عبايه ومشكلتها واسفلها كلها طين
والاشار واكع على عيونها وهي تهلهل
اني من يمي متت ضحك على شكلها حسبالي وحده مخبله
جان يكولون هاي عمه فاطمه جايه من تكريت
لان نحن واهل بابا عود تصالحنا وجينا عدهم
اني ماما تكلي كافي امنه تخبلتي
ومسكتني الضحكة ودموعي تنزل من الضحك
جان تكول لحد يكول ايو منهم مرت اخوي اني اعرفها
ولو اصلا مبين نحن هيج مختلفين عنهم
جان تحظن ماما وتبوس بيها وبعدين
حظنتني وتهلهل على راسي
شسالفه قابل زوجت حتى كل هل هلاهل
جان تكعد وتكلي تعالي اكعدي على رجلي
واني اباوع صفح هو صح ناعمه بس مو لهل درجه حسبالها
اني طفله تريد اكعد على رجلها
جان ماما سوت الي مكان وكعدت يمها زين حتى اخلص
من البوس
وهي تكول وين الجقليت خلي نطش فوك
مرت اخوي
اباوع ماما هي بيضه وخدودها من الخجل صارو
حمر وهي تكول الله يسلمج ما يحتاج والله
جانت وحده من بنات عمي توزع جاي للنسوان هم
عاد جدتي كالت الها اخذي امنه
وياكم ليش هيج مخليها بوحدها بينا
... لا جده مرتاحه هنا يم ماما
... حبيبه هاي بنات عمج واختج روحي
تعرفي عليهم صيرو خوات شبيج كاعده هنا
ماما كالتلي روحي وياهم
اني استحي والله مو بيدي ما اكدر اتاقلم بساع خاصه
ويه ناس مشايفتهم بحياتي
رحت ويه هاي بنت عمي جده جانت تكول عليها
سميه
ودتني وياها للمطبخ
.... ردت اصيحج من ساعه بس كلت خاف تستحين
... هههه والله معرف احد بيكم لهيج بقيت
يم ماما
... هاي بنت عمي صبر خطيبه سلام اخويه
... اي اعرفه سلام شفته الصبح
... وهاي اخلاص اختي اصغر مني
... تشابهون كلش
... وعندي بعد اخت انتصار مزوجه ابن عمي اخو صبر
... مجنت اعرف عندي هلكد ولاد عم استغربت
... وبعد صكر اخويه و ولاد عمو ابو صبر ثنين
... اي نسر شفته بس مشفت البقيه
اخلاص... هي انتي شنو نسر تتقشمرين عود
... كرصت روحي اني شكلت تعودت على نسر
اسفه مو قصدي بس اسمه غريب
... اخلاص هشش شبيج كومي جيبي الصحون من يم النسوان
يلا بساع لا جدتي تحجي علينا
... آسفه سميه مو قصدي والله
... لا عادي حبيبتي شكو بيها
جانت تغسل المواعين وبنفس الوقت تعزل وتحط
النسوان يربي شكد اكلو شنو ما يشبعون هذولي
اول مره اشوف هلكد نسوان
... هاي النسوان الي جوى كلهم اقاربكم
... اي كلهم نسوان ولاد عم ابويه وجيرانا
كلها الكرايب يلتمون بالعيد عدنا
... الله يساعدكم شكد هوسه دخت والله
... هههه ما متعوده علمود هيج والا نحن عدنا
عادي كل مناسبه هيج نسوان تجي
اخلاص... طبعا وين شايفين ناس هناك محد يروحلهم
اصلا محد يعرفهم شو كلها ستغربت من
جت امج حسبالنا مطلكها ابوج
لان الكل يعرف هو بس عد ام حامد حتى ما يمركم
لو ما انتو الاطفال جان من زمان طرد امج
.... لحظات حسيت دخت ما تحملت كل الكلام الي
كالته اول مره بحياتي شخص هيج يحجي
وياي بقيت صافنه عليها لحظات اريد استوعب
هي شون هيج تحجي ويه ماما ما حسيت غير
دموعي تنزل هي شون هيج تحجي على ماما وتكول
بابا ولا يحبها
اصلا لو مو همه جان بابا ولا فكر يتزوج على ماما
سميه ... حبيبتي امنه كافي شبيج ما قصدها
شي والله اسكتي فدوه
... وخري حبابه اريد اروح لماما عوفيني
.... فدوه والله اذا جدتي شافتج اصير مشكله
لخاطري كافي تبجين
اخلاص... اي شوفي دموعها مال جذب مبين
اصلا حتى بس اسوي مشكله ليش
شنو كلت قابل جذب كلها تكول امج لزكت بعمي الا خذته
ومحد من اهله راضي
... سمية حبابه وخري ما اكول لماما والله
وهيان دموعي هم مسحتها بس وخري فدوه
جان تعوفني مسحت دموعي ورحت يم ماما
كعدت
... ماما حبيبي شبيج ليش هيج عيونج
... ماما اني ما احبهم ولا اريد ابقى هنا
هم ما يحبونا اصلا نحن ليش جينا
.... هش حبيبتي بعدين نحجي ماما راح نرجع
معليج باحد روح امج
بقيت يم ماما وهي تهدي بيه
جان مرت بابًا تكول اروح على البيت
كلت لماما خلي تكول الها اريد ارجع على البيت
هناك
شافتني مره بابًا زعلانه اخذتني وياها
رجعت على البيت هي معرف شنو كان عدها شغل
وهم جانت جايه تاخذ مواعين العزيمه
بدلت وكعدت بالغرفه وغطيت نفسي
اني شنو جابني هنا اصلا لو باقيه بيت خالو احسن
على الاقل اني وعدي نتونس سويه
.... امنه بنتي رايحه اني على بيت ابو سلام
تعالي قفلي الباب وراي
طلعت هي شافتني زعلانه بس محجت وياي
خلتني على راحتي
قفلت الباب وراها ورجعت على الغرفه
هاي شون هيج تحجي وياي معقوله صدك بابا ما يريدنا
بس هم كلامها صحيح بابا بالاشهر يبقى عدهم
ونحن يبقى بس اسبوع
بس لا هو شغله هنا
مسحت دموعي ليش ماما قبلت ترجع لو مراجعه
جان هسه حتى اني ما موجوده
مر هواي وقت سمعت صوت الاذان كمت صليت
وافتريت بالمطبخ والاستقبال خفت اطلع للطارمه هم بلا شي
ما عاجبهم مو عاد يسولي ياها قصه
كعدت بالصاله اتامل كلشي بيها من الضوجه
سمعت صوت واحد فتح الباب ويضحك بصوت عالي
ما نتبهت اول شي من صوته خفت دخلت للغرفه
جان يصيح منو هنا
اني راسا قفلت الباب متت خوف يربي منو هذا
من الخوف ولا انتبهت على صوته
جان يصيح يكول منو بالغرفه عمتي ام حامد
هاي انتو
... انت منو شون تدخل اطلع برى
... امنه
... انت منو من وين تعرفني
... افتحي الباب اني صكر
وصدك فتحته شويه هذا نفسه صكر واكف بالباب
... شعندج هنا بوحدج الناس كلها هناك شنو عاجبج هيج
كاعده بوحدج
... اي عاجبني احسن من هناك واصلا ولا بعد
اجي بيتكم واخلي بابًا يرجعني
... خير يابويه شصاير حتى شايطه علينا هيج
... مصاير شي ارجع لبيتنا احسن وانت
شون تدخل هيج حتى بدون ما دك الباب شنو ما تستحي
بلكي احد بلا ملابس
... استحي شويه شنو هل الفاظ احد ما علمج تحجين
عدل
وثاني شي البيت اني مفتوح حتى ناخذ الي نحتاجه هنا
ونجيب غراض و محسبالي جنج قنفذ كاعده هنا
... لا تصيح عليه ويلا اطلع لكي
الك غير مكان راح اقفل الباب وبعد لا تفتحه
... شنو بكيفج تتامرين عليه كومي اوصلج لبيتنا
يلا بساع لا دوخين راسي هسه يجون
خطار هنا هم لان ميكفي بيتنا
... والله ولا اتحرك هسه تكلبها للدنيا
كاعده هنا يعني كاعده سوي الي تريده وبيتكم ولا ادخل
بي ابد
... خير صاير شي احد سمعج شي
... اي روح اسال اختك شوف شون
تستقبل الضيوف
جان يطلع واني تندمت ياريت لو محاجيه هيج شون
اكول اله هسه يكولون فساده
اي اصلا ولا يهمني خلي يكولون
رجعت الغرفه كلت انام ولو بطني توجعني من الجوع
لان حتى ما اكلت بالريوك
جان يدك الباب عرفته صكر ما فتحه من ورى الباب حجيت ويا
... منو شتريد
... كومي اوصلج للبيت يلا لا تصعبيها عليه
الخطار راح تجي تتغدى وسالفة اخلاص
وياج بعدين نحلها
... لا ما اريد تحلها واصلا راح ابقى هنا وما اطلع
خلي الخطار تجي شعليه
... يا بويه شكد عنيده الباب ما اريده
ينفتح فهمتي لا تصعبيها عليه
... حباب عود جيبلي اكل وياك والله متت جوع
... هههه تدللين خل يحضرونه اجيبلج صينيه
جنت متمدده بفرشتي و الجو ثلج
تغطيت جنت تعبانه بس حطيت راسي نمت
جنت بين الصاحيه و النايمه سمعت اسمي
فزيت صكر واكف فوك راسي عدلت كعدتي
هااا شنو صاير
.... هاج اكلي ونامي الغرفه اقفليها
ليش مخليتها مفتوحه
تذكرت اني قبل ما انام ما قفلتها شكد غبيه
جان جايبلي دليمه اعرفها ماما دوم تسويها لبابا يموت عليها
بقيت صافنه ماكو معلقه زين شون اكل
بقيت مكابله الصحن ما اريد اوسخها لايدي
و اخاف اطلع صكر يرزلني
سمعت صوت الباب يدك
... هاج هذا عصير اشربي ويه الاكل
... زين حباب جيبلي معلقه هم شون اكله هيج
... اكلي بايدج هسه وين الكي معلقه
... مو بعدين شون اغسل شوف بالمطبخ اكيد اكو
جان يروح شويه وجابلي معلقه
واني كعدت اكل ولا كانو جايه زعلانه منهم
شكد انسى بساع و على كولة بابا ينضحك عليه
بكلمتين بس والله بعدها حجاية اخلاص باذني
يتبع .......
فضلا وليس امرا حساب البنت جديد
اتمنى الكل يضيفها
راح تكتب قصتها بعد ١٠٠ متابع اتمنى تساعدوها
وشكرا الكم
هذا حسابها Roor90
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!