شيئ بداخلي كان يطالبني بالبقاء، شيء بداخلي كان يطالبني بالمغادرة، وبين هذين الشيئين وقفت زمناً طويلاً، لا أعرف ما أفعله، كآخر جندي بقي حيًا في مدينته المستعمرة
نهوة الدليم
ايه مراد
...........
الي اتذكر هذاك اليًوم انو كنتو طالبه بكلية التربيه
فكنا عاملين سفره انا وصديقاتي وكل وحده كن جابت اكله
حتى نتذوق من طبخ بعض وبنفس
الوقت كلنا نغير الجو لان الامتحانات على وشك انو تبدا
فعادي جنت كاعده وتتشابه ونضحك جانت عدنا حديقه
نكعد بيها وقبل كل واحد بكيفه محد يجي
يكول ليش هيج مسويه انتي و ممنوع لا عادي
فماخذين راحتنا
لمينا كل السفره وبقى صحن دولمة ما عرفت
انطي لمنو خليته بايدي لان طالب ويانا خطيه
جان يجي من غير محافظات فكلت اقدمه اله اكيد من
زمان ما ماكل اكل بيت
دورت شكد علي ما لكيته ما حسيت غير واحد وراي
التفت جان شاب اول مره اشوفه
يمكن ويانا بس اني الي ما منتبه
... عفوا اخويه تفضل
... عادي اخذ صحن الدولمة الي بايديج
... ابتسمت شون عرف دولمه لان اصلا جنت
مخليته بحافظه ولا يبين
اكيد تفضل بالعافيه عليك
جان ياخذ الحافظة ويروح وانا بقيت واكفه على ريحة عطره
ملت المكان الي جان واكف بي
التفت الى صديقتي
... اسم الله عليكي اش بيكي هسه كنتي
فرحانه عين وصابتكي
... غشعتي شقد حلو
... ههههه فارس
... اسمه فارس
... اي شنو ما شايفته ترى يتردد كثير للمرحله مالتنا
.. لا اول مره اشوفه ليش ويانا بنفس المرحله
... لا مو ويانا مرحله اخيره وازيدك بيت من
غير محافظه مو من هنا
بقيت اليوم كله صافنه واتذكر كلماته ولهجته
اخذ روحي وياها اخذ كلبي قبل ما ياخذ صحن الدولمة
رجعت للبيت مصخنه وراسا رحت لغرفتي
واليوم كله ماما وبابا محتارين بيه صحونه بارده
وجاره واني اكول شبيه كل ما اذكره كل جسمي
يبرد كانو بروده امشي بدمي
وكل فكري يمه و بس اسرح اتذكره
ضربت على راسي شبيه هيج تخربطت احوالي و اول مره
اشوفه و بس كم كلمة بينا وهيك صار وياي
كعدت ثاني يوم متحمسه اريد اروح
لبست تنوره تحت الركبه ورجلي طالعه
وقميص ابيض لان زي موحد بس بدون اشار
لان ما كان وقتها موجود بس نادرا وماما اصلا ما كانت
محجبه
طلعت بالسياره ويه بابًا حتى يوصلني اريد اصل الكلية
وهو مستغرب يكلي البارحه جنتي مريضه شبساع
طبتي
هو حتى اني ما اعرف شنو مرضي وليش هيج صار وياي
كانو سحر
وصلت الكلية ادور شبر شبر ماكو هو ولا اي لمحه
منه
كعدت ويه صديقتي بنفس مكانا المعتاد على المصطبات
ما حسيت غير هو يجي من هناك استغربت
سويت روحي ولا شفته لان خفت ما يكون اصلا
اني باله يجوز ما يعرف بيه هم بس اخذ صحن دولمة
وهو اكيد يعرفني زين
تقرب مني واني رفعت راسي واكف مقابيلي
صديقتي ترخصت واحس هسه راح يغمي عليه
من الخجل
.. السلام عليكم
... هلا اخويه وعليكم السلام
... ههههه اخوج سهله مرضيه منج هاي الكلمة
هاج الحافظه مالتج تسلمين وعاشت ايدج على الدولمة
... بالف عافيه ان شيء الله
... اسماء هاي مجموعة ملازم اخذيها تحتاجيها
مدام الامتحانات هم قربت بيها ضروريات و مختصرات
اول مره اعرف اسمي هيج حلووو اسماء
بقيت واكفه اباوع اله يمكن اخذتلي صفنه وهو
انتبه عليه
... هههه صاير شي
... آسفه راح بالي اغير مكان اعذرني
... عادي ولا يهمج هاج اخذيهم
... بس انت مو من مرحلتنا شلون جبتهم
... حلووو يعني تعرفين اني بغير مرحله
... لا مو هيج قصدي صديقتي البارحه هي كالت
اني ما اعرفك اصلا
.... ديلا هسه عرفتيني ادرسي زين لان بالعطله
العرس
باوعت مستغربه عرس شنو
... عرسنا نحن
نصدمت من طريقة كلامة و الجراءة الي عنده شون هيج
يحجي وياي شنو اصلا حاسب نفسه
هو مشى واني غبيه بقيت صافنه بالملازم
رحت ركض للمكتبه ما كدرت ادخل اي محاضره
قلبت بيها ماكو اي شي بس ملازم
كلت يجوز كلام شي بس ماكو اي شي
فتحت العلبه مال دولمة
ابتسمت بيها حلقه لبستها على قياسي
بقيت لابستها وصافنه بيها اخذني الوهس باوعت على الوقت
تاخر اكيد هسه بابا اجى
طلعت ركض وحتى نسيت الحلقه انزعها ما شفت غير كدامي
واكف
... حلوه الحلقه الى ايدج واصير احلى اذا البسها
الج بايدي وبحلال
تركته ورجعت على البيت ويه بابا واني
الطريق كله اصفن حتى بابا لاحظ
لان قبلها جنت الطريق كله احجي واشرح لبابا
اليوم بالتفصيل بس كلشي غير بيه حتى كلام ما احجي
وبس اسمه على بالي
حتى بابا خربطت وكلتله فارس
بس ضحكت وكلت اله انت فارس احلامي جان يضحك
وما عرف قصدي على فارس الي سلب مو بس كلب
بنته لا كلشي سلب مني
.... اي ماما حبابه كملي وراها شنو صار انتي وبابا
وراها بدت الامتحانات وجنت اشوفه من بعيد ولا يوم تقرب مني او حجينه
سويه بس نظرات واني الحلقه ما نزعتها من ايدي
اتذكر اخر امتحان بابا كلتله لا يمر عليه لان صديقات نودع بعض
و خاف بابا يطول فكلت ارجع مشي ودعنا بعض
بس دورت فارس ما شفته جنت كله خطوه اخر نفسي
اكول هسه يجي بس ما شفته ولا شفت طيفه
رجعت بالطريق زعلانه اخر امتحان وما شفته ليش
شنو مانعه خفت لا صاير ويا شي
بس التفت على صوته رجع بيه الروح
... اسف ما شفتج بالكلية بس ولله غصبا عليه
صارت عندي مشكله
... خير ان شاء الله ماكو شي
... ابتسم لا تخافين شيهانه كلبي ماكو شي
بخير دام عيونج منوره حياتي
... شنو شيهانه ماما اول مره اسمع بيها
... ماما امنه هاي انثى صقر الشاهين وتصف المرا بالشيهانه
لجمالها ورقتها وقوتها
... اي ماما كملي حبابه
... فسالته خير شنو اكو
... شوفي عيني شيهانه اني هسه راجع لاهلي
واكيد سمعتي وعرفتي اني من غير محافظه
وما اكدر اروح واعوفج هيج خاف تروحين مني
وما مجبوره تنتظريني بس
اكلج احبج وداعة اهلي واريدج توعديني
تبقين الي بين بس ما اخلص هاي السنه
و راح اسولف لاهلي عليج
... اسفه بس شنو تحجي اني بعدني صغيره
مرحله اولى فدوه عوفني و روح لا تخرب عليه حياتي
اني مو مال زواج
... لا شيهانه انتي ما شاء الله لا صغيره ولا شي
و اعرف علي نظرات عيونج مستحيل تجذب
انتي مثلي تحبيني لا تخليني اروح و كلبي على نار
خاف ارجع ما الكاج طمنيني باي كلمة
... لا عيوني ما جذب هي هم تنتظرك ترجع
معرف شون حجيت ويا هذا الكلام ودرت وجهي
ورجعت لاهلي وبقيت ساعه
تايه بالافرع لان عقلي مو براسي
ساعه اكول غلط الي سويته وبعدين ارجع اكول لا هو يحبني
واني احبه
وصلت على البيت ماما تلكتني بالباب
سلمت عليها ودخلت لغرفتي جان تجي وراي
.... احجيلي اسماء كلشي وهسه
اوضاعج ما عاجبتني
ما حسيت بنفسي غير ابجي لان وعدت ماما
ما ادور هيج سوالف حب بس اهتم بدراستي
شفت ماما ضربت على وجها
... كولي شمسويه احجي ليش تبجين واني
اكول مو على بعضج احجي
... ماما حبيبتي فدوه بس افهمج والله ما مسويه اي شي
والله
... لعد شبيج كل هاي المدة
.... ماما والله مو بيدي حبيته والله
اعرف خبيت عليج بس خفت اكلج واصلا ما اعرف
شنو الي صار وياي على غفله
... منو هو وشنو الي صار وياكم بساع يلا
امسحي ادموعج وفهميني
.... ماما والله كلشي ما بينا ولا احجي ويا
بس كلي احبج وراح يخطبني بس يكمل هاي السنه
... ومن وين هو
... من الانبار
.... تعزيتي شوداج على واحد من هناك حياتهم
غير عن حياتنا عفتي كل الجامعه
ليش احجيلي
... ماما والله مو بيدي
... الله كريم كومي غسلي وابوج كال
شبيها اسماء متغيره امسحي وجهج لا يشوفج باجيه
وبعد ما خلص موضوعج
طلعت غسلت وجهي لان كل وضعي تخربط
مرت ايام عطله نص السنه واني بالي كله يمه
وماما بس اصفن تباوع عليه والموضوع ما رجعت فتحته
واني كل الفتره اكل بنفسي
معقوله كلامها صح واني كان اختياري غلط
زين ليش اني احبه هو خلي يضحي علمودي
واني اضحي علموده
جنت صغيره وحسبالي الدنيا كلها بالحب بس
عرفت لازم بالاول يكون بينكم توافق بكلشي
لان لابد يوم تعرفين انو هو ما كان المناسب
او لو ماخذه واحد من نفس حياتج وطبعج جان ارتاحيتي اكثر
رحت الصبح من وقت وعيوني ما تفتح من النعاس
لان الليل كله افكر شلبس وشون اروح
وصلني بابًا وراح
دخلت الكلية ادور بكل زاويه ريحه منه بس هم
ما شفته وصلت يم صديقاتي وبدينا وحده
تعبر الثانيه عن اشتياقها ونصحك
واني بالي مو يمهم ابد ادوره هو اشتاقيت اله
ليش ماكو شنو الي مانعه يجي ويعرف راح انتظره
رحت ويه صديقتي للمكان الي دوم هو كان يكعد
ويه اصدقائه لمحته من بعيد
وشون متغير وصار بعيني كتله من الجمال
وبقيت صافنه وصديقتي تكلي عيب اصدقائه ويا
هسه يلاحظون علينا
يمكن حس بوجودي رجعت اني وصديقتي
جان يوكفني بصوته
واني كالعاده اخذتلي دقايق اتامل اسمي بصوته
راحت صديقتي واني التفت اله
... هاااا شيهانه مبين عيونج دورني
... لا بس كنا نتمشى اني وصديقتي
وليش ادورك اصلا
... ههههه الحلقه الي بايدج كافيه حتى تبين ليش
المهم اشتاقيت الج وجثير هم
... شنو ليش هيج كلامك بدون اي خطوط
حمر تحجي كلشي على بالك
... هذا اني فوك ما اعبر الج عن حبي شتردين
ابقى مثلج بس اخذلي صفنات
... خجلت كلش من كلامه هذا مبين منتبه عليه
بس يحجي وياي اصفن
... هذا اخذنا صفنه جديده اي مو كافي
شنو جوابج لا تعلكيني بدفا شمسج اذا راح تغيب بيوم
كوليلي
... لا راح تبقى شمسي دفيك
... ما اعرف بهذا الكلام اعرف بالصريح
كولي موافقه بيه لًو لا
... ابتسمت اي موافقه
وعفته ورجعت على صديقتي كملنا الدوام
واني بس اباوع للحلقه وميتة فرح
حبيته بدون اي اسباب وبدون اي تفكير
نطيته كل الحب الي بداخلي بشهر يمكن لو شهرين
صار كلشي بحياتي هو ما توقعت بيوم احبه
اكثر من هذاك اليوم وكل يوم جان حبه يزيد سنه
مثل ما كالت صديقتي يمكن مجنونه اني وحبيته بجنون
لان محد يحب هيج حب وبوقت قليل
مرت ايام الدوام بساع ولا حسيت بيها كنا
نلتقي مرات بالحديقه ونحجي وهو يحجي على اهله
واتفقنا بس يخلص امتحاناته يجي يخطبني
بس ما وافقت اروح لاهله بالانبار لان وحيدة ماما
ما كدرت اتخيل ابتعد عنها وعن بابًا وهم
اصلا ما يعوفوني ولا راح يوافقون اذا عرفو غير محافظه
وافق انو يسكن يم اهلي بس رفض انو يتعين
كال اروح واجي واسس شغل الي بالموصل
لان يشتغل ويه اهلي شغل خاص يكول ما احب الالتزام
واني وافقت ما اعترضت بالاخير ثنينا نقدم تنازلات
حتى تستمر حياتنا
ودعته اخر يوم ونطيته عنوان بيتنا حتى بالعطله
يجي على اهلي
اتذكر كان يوم استلام النتائج رحت على الكلية
ما توقعت يجي بس اجى
وشفته
ونطاني موعد اهله راح يجون يخطبوني
فرحت كلش واخيرا راح اصير اله
رجعت على البيت وحجيت ويه ماما
اعرف مكان عاجبها بس تعرف احبه ؤما رادت تكسر خاطري
كالت الله كريم ابوج يتفق ويه الجماعه
بس يجون
وصار اليوم الي يجون اهله نحن بالموصل
عدنا النسوان اول شي تجي اشوف العروس وبعدين
اذا عجبوها يجي العريس واصير النظره الشرعيه
واذا البنت ما عجبتهم بعتذرون
رتبت نفسي حسبالي اهله وامه وخواته راح يجون
سمعت صوت ماما تصيحني طلعت يمها على المطبخ
لان جانت تحضر خاف يجون هواي لان كلت الها ولد عشاير
فبابا كال على الاغلب هواي ناس تجي
جان ماما عيونها اريد اطلع من راسها اعرف وجه
ماما هذا من تعصب باوعت الها واعرف شي خرب
... شكو ماما شبيج
... الاخ بوحده جاي شنو انتي منطي اله حتى
نستر عليج لو انتي ناقصه واهله ما يجون
بقيت مصدومه واهله هو كلي اهله كلهم راح يجون
رجعت لغرفتي واني افتح شعري ونزعت الفستان
واضح من البدايه شون حياتنا راح تكون
دموعي نزلت من القهر شنو موقفي كدام ماما وبابا
على الاقل ابو اخوانه خلي امه متجي
هذا الشي مو قلل مني هسه شون بابا راح يثق بي ليش
فارس ليش
عرفت راح استحيت حتى اطلع اشوف بابا
شون اباوع بوجه
صاحتني ماما كالت ابوج بريدج
طلعت على الاستقبال وخاطري
مكسور اباوع على الضيافه والاشياء الي حضرناها
ماما الليل كله تحضر وبابا يجيب يكول
ما نريد نفشلج كدام اهله ونحن ما نعرف طباعهم
لعد انت شون نطاك كلبك هيج تخجلني مقابيل اهلي
كعدت مقابيل بابا
... اسماء بنتي الولد اهله ما قابلين واني
كلتها الج واياج بيوم تجين و تكوليلي انت ما نطيتني اله
لو تكولين ليش وافقت علي
الولد ابن عشاير وابو شيخ ونحن كل عمرنا بعيدين
عن هيج سوالف وبنفس الوقت اهله
ما يرضون بس الولد زين ويحبج راح انطيج اسبوع
تفكرين واني كتله ما ارضى اذا مو احد من عشيرتك وياي
لان بنتي مًو قليله انطيها الك هيج
هذا الاسبوع فكري ونطيني قرارج قبلها بيوم واني
ويه الي تختارينه بس ما اريد بيوم تلوميني لو تلومين
امج لان انتي مو صغيره وتفتهمين
كمت من يم بابًا هو زيد عليه السالفه
اني طول الفتره الي حبيته جنت اخاف من اختلاف حياتنا
و اخاف بيوم اتندم اتزوجته ويكون فات وقت الندم
وهسه عرفت اهله ما راضين
بس هم نحن نحب بعض وكلبي فاز على عقلي
ورضيت بي بنفس اللحضه اني وافقت بس
ما كلت لبابا كانو سحر وصابني بعمري
مجنت هيج جنت اميز الغلط من الصح
اعرف وين مصلحتي اعرف شنو الي ياذيني
وقتها اتذكر ماما كالت صلي استخاره او خليها
يم رب العالمين هي تنحل
توضيت والليل كله جنت كاعده على السجاده ابجي
خفت اصلي ويكون شر اليه ويبتعد جنت ادعي اذا شر الله
يحوله لصالحي لان مستحيل اكدر اعيش بدونه واني
تخيلت كل حياتي ويا وحتى تخيلت كم طفل اجيب اله
وصار ليله الي بابًا يريد الجواب نطيته لماما انو
موافقه وهي هزت راسها ما عاجبها
بس والله ما كدرت اتخيل حياتي بدونه
يمكن غلط الي سويته
وانتي بنتي امنه اياج بيوم توكعين بالخطا الي
امج وكعت بي اياج بيوم ترفضين شخص
اني او ابوج اختارينا الج
وتعرفين الي تحبينه راح تعانين
خلي تجربتج درس الج ولا تغلطين مثلي
يتبع .......
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!