رواية نقطة لقاء الفصل الحادي والعشرون 21 - بقلم الكاتبة دينا _ الكاتبة نور

روان
صعدت بالسياره واني الا شويه اريد اكوم اكتله هذا الحيوان النذل .. عيطت بوجهه حيل وگلت

_ وين ماخذني أن شاء الله

ابتسم بوجهي وكال : تعرفين بعدين

تفلت بوجهه وكمت اعيط واحجي : انت وابوك نفس الصنف انتوا مو زلم انتوا حيوانات الله ياخذكم ونخلص منكم شوكت نرتاح منكم

فراس : انجبي لج وصمي حلكج

روان : لا والله انت الي صم حلكك وامشي رجعني

فراس : ههههههَ بهاي السهوله عندج ؟

روان : وغصبا عليك

فراس : اكول اسكتي مرح يفيد لسانج هذا بشي
والله العظيم كولي لاختج الجبيره اذا ما اجتني تعرف شراح اسويلج زين خوش .. " ضحك وبدا يباوعلي بنظرات معرفت شنية بس يهددني "

روان : هذا حجيك خلي لنفسك بنان متجي ولا توصلك يا اخي انساها هي متزوجه عوفها روح شوف دربك عوفونااااا الله ياخذك وياخذ امثالك يا نذل

ما احس غير لزم ايدي وعصرهاا قويه ومادري شلون مسيطر يسوق ويمسلت

فراس : وربج اذا موصلتي الكلام هذا لبنان راح تصيرين انتي الضحية فخلي تسمع كلام وتجي ولو انتي هم مقاصره ما شاء الله عليج بس تبقئ بنان غير

روان : اني ؟؟ هههههههههَ لك بابا انت ليش تضحكني وشنو تريد بنان تجيك شدتحجي انتَ

فراس : باع تذكرين من كلتلج اني فراس ديري بالج من عندي .. ترى والله راح ابدي اشتغل واشوفكم انتي وخواتج اللعب على اصوله

روان : اكل تبن تففف عليك لك انت شنو من انسان وجه القرد حيوان الله ياخذك وما اكول لبنان وشتسوي سوي روح لان مراح تكدر وببساطه لان زوجها ضابط وربك اذا سويت شي مراح يعوفك بحالك ويجيبك لو جنت باخر الدنيا لو فوك القمر يوصلك مثل ما راح يلكا ابوك العار يا كو**

باوعلي وابتسم ورجع لاف السياره كأنما واثق

صك على اسنانه وبدا يحجي : كلتلج اذا هذا الكلام توصلي الاختج وخلي تسمع كلامي احسللها لأن راح توكعين انتي الضحيه .. اني فراس لتنسين روان وربج العب بيكم طوبه لو وين ما جنتوا وعلى سالفة رجلها لو بي حظ خل يلكا جمال يلا يلكاني

ابتسمت بوجهه : راح يلكه ابوك .. راح يلكاه ويسحله سحل يا خايس

شفته يباوعلي ويبتسم كأنما مخطط لشي

روان : حيوان لتباوع هيج لا افكس عيونك نزلني هنا بسرعه ما اتحمل اشوف خلقتك اكثر بعد

فراس : راح ارجعج ومثل ما كلت تروحين لبنان مثل الحبابه وتكوليلها كل الي كلته .. واذا ما قبلت حتى اشوف دربي

باوعتله بحقد : مراح تجيك لو تموت

شو ما اشوف غير لزم ايدي بقوه وقرب وجهه عند وجهي وبيده الثاني تلمس وجهي وگال

_ مو مشكله اذا ما اجت انتي موجوده مقاصره

وقرب وجهه اكثر يريد يبوسني وجان اتفل بوجهه وبقيت ادفع بيده وگلت

_ وخررر حيوان شكد نعال لعد انت

وخر من يمي وگال

_ لعد انجبي لا اسوي شي اخليج تتندمين طول حياتج ومثل مكتلج كولي الاختج سمعي كلام فراس

رجعني يم المدرسه جانت بداية حله والبنات يطلعون وكفني بمكان بعيد شويه عن باب المدرسه نزلت واني عصبية امشي صاح وراي " مو تنسين الحجي هذا كله يوصل لبنان بالحرف الواحد ومثل ما كلت اذا ميوصل ومتجي حتى اتصرف "

انداريت وعطت عليه : تحلمممم

عفته وضليت أمشي ما انكر جنت خايفه واني افكر ببنان .. شلون هذا ليروح يسوي شي الجلب
منين طلع ادور مو جان مختفي الله ياخذه هو وأبو
جان تفكيري انوا اصعد ويا حتى أعرف جمال وين بس مينطي بأبوه ولا جاب طاري جمال اصلا
راسي كام يوجعني واني افكر بخواتي .. ليروح يسوي شي والله اخلي يندم .. ما اعرف شسوي وحرت حيل وكنت ارجف .. من اتعصب تلقائيا ايدي تكوم ترجف وبالذات شفت فراس .. ذكرني بكلشي صار بهذيج الليلة
وهسه جاي يهدد .. شراح اسوي ياربي

وكفت يم باب المدرسه انتظر ياسر يجي حتى بس اروح ارجع بس والله اني قررت ما اكول لبنان مثلاً شنو يكدر يسوي ميكدر ولا ايشي بس هو حتى يهددنا

من بعيد شفت السياره جتي والشارع مخبوص والبنات طالعات رحت ركض للسياره وصعدت

حجى وهو يباوعلي : يا ستار شبيج شو تركضين منو راكض وراج

روان : ماكو شي خلنرجع للبيت

ياسر : يعجبج مثل البارحه نروح نتخم

روان : يا نتخم امشي نرجع تعبانه

ياسر : على كيفج عمي شبيج انهديتي بية

روان : اي ديلا نرجع

شغل سياره ورجعنا للبيت بالطريق رجع علك هذيج الأغنية " تورط " ورجع يغني وياها وصدك ضوجني اكثر ويركص ولا يمه ويباوعلي ويغني اني افكر بفراس الاغبر وهذا يركص يمي .. بس جوه ونسه أما اني جنت بغير عالم وضايعه ما بين فراس و بنان

باوعتله وهو يغني شكله يضحك وهو مندمج

" تورط .. تورط كلبي في حبك تورط "
" تخربط .. تخربط نومي في ليلي تخربط "

وراها حجى وهو يضحك : اي والله كلبي تورط

لزمت راسي : ياسر طفي الاغاني ترى كلش مو وكتهن ودايخههههه

ياسر : لا هيج احلى

درت وجهي بعصبية للجامه وهو ولا يمه ويغني

____________________________

بنان
طول اليوم واني خايفه وما اعرف شسوي ضليت يم ريم بالغرفه وجتي مريم بس متعرف شنو السالفه وفرح تكمز فوكانا

فرح : ريم ريم كومي كومييييي

ريم : وين

فرح : بالحديقههه بالمرجوحههه

مريم : ماما فرح مو وكتج

فرح : ما ما اليد اطلع

مريم : ولج يمه كعدي راحه

فرح حجيها مخربط حيل مرات تحجي مثلنا وعدل مرات يتخربط وحرف متنطقهن

بنان : يلا لعد أني وياج نطلع حتى ننتضر ياسر يجيب روان

فرح : ايييييي ياسر شوكت يدي ؟ ( يجي )

بنان : هو هسه راح يجي وي روان

فرح : ما اهب روان حكيرا

بنان : مو تحبج

فرح : اني ما اهبها انتِ تحبيها

بنان ضحكت : اي اكيد احبها غير اختي

فرح : لتهبيها (لتحبيها)

بنان : خوش ما احبها

اخذتها وطلعنا برا ونسولف

فرح : لعد عمو فهد سوكت يدي ؟

بنان : والله ما ادري يا فروحه هو مثل كل مره يجي

فرح : اكولج بنان

بنان : اي كولي

فرح : انتي ليش ميصير نونو مثل ماما

بنان : هههههه ليش شتسوين مو ماما رح تجيبلج نونو

فرح : لا لا اني اريد نونو منج حتى يصير ابن عمو فهد والعب ويا ويصير عندي أخو هم والعب ويا

بنان : لا اني ما اجيب نونو كولي لماما تجيب هواااي

فرح : ما ما اريد نونو منج

بنان : ماكو نونو بحح

ضحكت على كلامي وكالت : ما ما معلية اريد نونووووو

سديت حلكها لان صارت تعيط : كافي كافي ولج اجيبلج بس سكتي عيب

فرح : هيييييييي

كامت تضحك وخاله رحاب صاحتلها وراحت طبت
ضليت كاعده بالحديقه عالمرجوحه واباوع للسما بعز الظهر

" لشوكت راح نضل هيج ؟ "

بهاي الأثناء دخلو ياسر وروان
ياسر يوزعلنا ابتسامات و روان كالبة خلقتها وضايجه

حجى ياسر : يابه الله بالخير

بنان : الله بالنور استاذ ياسر شرفت ونورت

ياسر : بيج ست بنان

راح صعد فوك وجتي علية روان

بنان : شلون المدرسة اليوم

هزت راسها : تمام زينه

بنان : ليش احسج ضايجه

روان : اي غير ريم ماهيه

بنان : هيه هم ضايجه لان مداومت اليوم وياج

روان : راح اصعد وهاي عود كولي لخاله رحاب شويه تستعجل لان حرفياً ميتة جوع وميته حر

بنان : تدللين

................................................

ريم
گاعده بالغرفه
احس نفسي مخنوگه والبچية بكلبي
منمت زين .. ضليت بس ابجي
ليلة كامله واني كل ثانيه اتذكر لحظه مِن ذكرياتي
جانوا قبل شوية يمي مريم وبنان
باوعت لكيت رزان نايمه
البنية مو مثل ما هيه كلش متغيره وخايفه عليها
مسحت دموعي واني اباوع للساعه .. شوكت تجي روان
ورا كم دقيقة اندفرت الباب وفات ياسر

رأسا عيطت عليه : اطلعععع لك مو وحدي رزان هنا

ياسر : قابل مطلعه راسها متشوفيها مغطيه راسها ونايمه
البنية خطيه .. جيت اسلم عليج صخولتي افتقدتج صراحةً

ريم : انجب ياسر مابية حيل بعد احجي بس ترى اني هم مفتقدتك وامشي اطلع هسه اني اجي

ياسر : دسمعي اني هسه طالع جيت اكول كلمتين وهاهيه

ريم : شنية يا ستار

ياسر : اليوم بالليل خلي نطلع برا بالحديقة وهاي لان ذيج المره مجنت موجود

ريم : ليش عيني

ياسر : مو هاي حتى يعني ويه روان وافتهمتي علية

ريم : اي ديلا اطلع افتهمت

ياسر : يمهه فديت الصخله اني علئ گلب اخوها

انطاني بوسه بالهوه وطلع .. حركته المعتاده

كمت بتعب وطلعت ورقة من اوراقي
وكفت واني اكتب عالسريع وابجي
دموعي تنزل عالورقه واني ولا همني اكتب بسرعه وكأنما اكو احد لاحكني ..

" تتبادل الأعوَام فِيما بينها
قلبي وقلبكَ والنوايا والقدَر
مثل البِحار مع الغيوم تبادلت ما بَينها
رغم المَسافات - المَطر
تتغير الاشياء كُل دَقيقة
تَزداد ، تنقُص ، تختَفي ، تُبقي الأثر "

سمعت صوت .. عرفت هاي روان صعدت مسحت دموعي رحت ضميت الورقه بسرعه بالصندوق وكعدت عالتليفون .. اول ما طبت شمرت جنطتها وجتي حظنتني وتضرب بية

روان : حقيره شوكت تصيرين زينه تبهذلت اليوم من دونج

ريم : باجر لتخافين اداوم وغصبا عالكل

ضربتي راجدي وكالت

روان : ريم لتعوفيني

ريم : اهخخخ جلبه ايدج ثكيله .. بعدين شعندي اعوفج غير أني وياج نفس البيت

روان : لا هيج بس لتعوفيني

ورجعت ضربتي

ريم : خاب دطيري راح ابجي واني منا شابعه بجي شلون اعوفج خية أنتِ الحب والحرب

روان : يا بعدهم

وخرت رزان البطانيه من راسها وكالت : غزلكم صطرني هسه شنو هذا غزل لو عركه اسمع راجديات و غزل

روان : وانتي شكو مغطيه راسج كعدي مثل الاوادم وباوعي علينا راضين

رزان : مادري اني عاجبني هيج
رجعت غطت راسها ونامت

باوعت روان بوجه ريم : شلون راح تصفى

ريم : مادري

______________________________

بنان
ورا ما اجوي روان وياسر دخل همام

زوزو : انت شو مادري شلونك صاير

ضحك وكاللها : ليش شبية

زوزو : مادري والله

همام : شكل القضايا مأثره عليه هههههَ

زوزو : يمه انتبه لنفسك خوش

همام : يابه مو تدللين زوزو

ابتسمت لزوزو صح تتناكر وياهم هواي بس تحبهم وتخاف عليهم

رحت صبيت الغدا ويه مريم وخاله رحاب وجوي كلهم نزلوا يتغدون وكالعاده ضحكهم الي ميخلص
من بين الكل ضليت صافنه وبدت عيوني تدمع .. تذكرت ماما الهام .. الله يرحمها
مَ اكلت ضليت كاعده .. افتقدت من بينهم رزان

كمت جان تصيح خاله رحاب : ولج يمه انتي شماكله ودتكومين

بنان : خاله اريد اروح لاختي اشوفها

رحاب : اوف من هالرزان

رحت صعدت فوك على رزان طبيت للغرفه لكيت بصفها صينية اكل روان ودتها الها .. ممأكول منها شي وهي كاعده وصافنه .. نظراتها ثابته والدمعه تلالي بعيونها .. رزان اختي اعرفها حيل .. انسانه عاطفيه بس الموقف الي صار اثر عليها ههواي

كعدت بصفها وحجيت : رزون يلا اكلي حبيبتي

ردت علية ببرود : ما اريد

بنان : شلون رزان راح تضلين هيج أنتِ ؟؟؟ والله كلبي نار عليج لتعانديني

رزان : بنان كتلج ما اريد اكل ماريددد

بنان : لا هالمره غصب عنج

رزان : ضلي لحي مراح اكل

بنان : الح وراح تاكلين

رزان : بنان حبابه عوفيني والله مو وكتها

بنان : لااا وكتها

غطت راسها عني ومتقبل تحجي كمت اعيط عليها

الى متى راح تضلين هيج رزان خبلتي نفسج وراح تخبلينا هم عالاقل اكلي لكمة شوفي شصاير بحالج ليش تخليني اعيط عليج وانتي جبيرة وعاقله المفروض تسمعين من عندي مو بهالطريقه احجي وياج
مَ اهتمت الي ومسوت اي شيء

كمت واني مقهورة رحت للغرفه وضليت ابجي
ابجي ع حالي ومنا فراس يهددني
لو ابجي على رزان
لو على شنو
تعبت حيل شلت مسؤولية جبيرة كُلش مجنت متوقعه رح توصل المواصيل لهنا !

_______________________________

روان

كاعدين كلنا بالصاله ورا الغدا ونسولف .. فجأه دك تلفوني .. شلته لكيت " يوسف " ديتصل علية
خفت لا خالتي صاير بيها شي رأسا كمت ورحت بغرفة زوزو احجي لأن اقرب شي

فتحت الخط واجاني صوته

يوسف : هلو روان شلونكم

روان : هلا يوسف تمام انتوا شلونكم

يوسف : الحمد لله زينين بس حبيت اخابر واسأل عليكم

روان : تسأل عليك العافيه .. شلونها خالتي

يوسف : والله شوية وضعها مخربط ومو تمام تبجي وضغطها يصعد واضل اركض بيها بالمستشفيات

روان : الله يساعدكم

يوسف : الباقين شلونهم خواتج بنان و رزان

روان : زينين

يوسف : محتاجين شي ؟؟

روان : لا والله سلامتك

يوسف : الله يسلمج .. في امان الله

روان : باي

انداريت لكيت ياسر واكف وراي وخازرني وعصبي صاير

ياسر : انتوا شلون راح تجلطوني شعندججج ويه هذا ؟

روان : يمة شدعواك شبيك ياسر اني كتلك قبل انوا هو ابن خالتي وعادي اتصل علينا حتى يطمئن ما سوا شي غلط بعدين مو عيب تجي وتتسمع علية ها ؟؟

ياسر : لتجاوبين سؤالي بسؤال .. هذا يوسف متخابري بعد لو مدري شيصير سمعتي ؟؟

روان : انت شلون راح تخبلني ياسر انت شعليك مثل ما انت ابن خالتي وابن عمي هو هم ابن خالتي عوفه يا اخي الولد كافي خيره شره مو زين من عنده يخابر ويسأل علينا شبيك هيج ضايج استغفر الله لتخليني اتعارك وياك ولو انت متتحمل الا تتعارك

ياسر : اي يلا تعاركي اريد اشوف النهاية وية يوسف وين ومن شوكت ابن خالتج صار هاا ؟

روان : يا اخي انت شلون وياك داكول الولد محجى شي بس سلم شبيك حاط عقلك ويا

وخر ياسر خلي اروح

ابتعد وكام يعيط ويحجي : بسيطه اني اعلمكم ما اطلع اني ياسر

ضحكت وهزيت ايدي مخبل مو صاحي والله

_____________________________

بنان
گاعده بالغرفه جنت وحدي العصر ساعه 4
دك تليفوني شفته فراس .. انقبض گلبي .. هذا ياربي هم ديدك عليةة شلون

ضليت خايفه وارجف اباوع لايدي ترجف وسن يطك بين كلبي يدك سريع
فتحت الخط ..

اجاني صوته يضحك : لك هلا

حجيت وصوتي بي بجية : لا هلا ولا مرحبا شنوو شرايد

فراس : روان كلتلج

بنان : على شنو ؟

فراس : تؤ تؤ هاي روان رايدلها جرة إذن

بنان : شبيها اختي .. فراس اياني اياك تسوي شي لوحده من خواتي

فراس : هههههههَ خفت منج .. سمعيني لج نبهي روان مثل مكتلج مابية حيل احجي خل تحجيلج هي .. باجر الصبح اريدج تجين لمكان * اعرف رجلج ال يروح لشغله الصبح خوشش ؟؟؟

بنان : لتحجي على زوجي حيوان حقيرررر الله شالك شوكت اخلصصص منك ما اجيك لو تموت لووو تموت

فراس : لا حياتي راح تجين وراسج قبل رجليج بس بالاول روحي لاختج خلي تكُلج

انسد الخط
ايدي زادت الرجفه من الخوف
راسي عرك وجهي عبارة عن مي احس صخنت
كلبي يدك سريع مادري شصار بية .. بَس لا سوه شي بروان والله اموت نفسي

بالكوه شلت رجلي ورحت لغرفة ريم على روان
دخلت شفتها كاعده دتقرا هي و ريم

بنان : ا ا ريم من رخصتج اريد روان بموضوع

ريم : لا بنون عادي شنو من رخصتي مابيناتنه رسميات ايع

كامت روان وراي ورحت لغرفتي اخذتها وجريته من ايدها

روان : شبيج بنان شصاير

بنان : هسه تحجيلي .. شسوالج فراس ؟؟

" حجت بـ ارتباك " : شنو ؟ فراس شبي

بنان : روان لتسوين نفسج غشيمه اني اعرفج زين هسه تحجيلي شنو وشصار ؟

روان : شبيج بنان مصار شي

عطت بوجهه : ولج لتضحكين عليه احجي شكالج وشسوا

روان : وانتي شمدريج

بنان : بلا نقاش احجيلي

روان : أخذني من المدرسه ورجعني

بنان : وشلون تروحين ويااا ؟؟

روان : فكرت اجرجر حجي من عنده علمود جمال

بنان : ولج اهخخخ انتي متكعدين راحه .. لج خابرني يتهدد ويكول خلي روان تحجيلج شسوههه ؟

روان : لتخافين ما سوا شي بس صار يهددني ويكول بنان تجي واذا متجي كوليلها خواتج راح يصيرون الضحية

بجيت بحركة واني احجي : لج هسه شلون شنسوي

روان : متروحين لو تكولين لفهد

بنان : لج اسكتي ماكدر اكول لفهد لان اذا اكوله فراس راح يسوي بيكم شي هو هددني

روان : دخلي يطيررر كولي الفهد

بنان : شبيجج هددني بيكم ما اكدرر اذا مهمج نفسج رزان شلون اذا سوالها شي

روان : والحل لازم نلكا حل

بنان : مادري والله مادري خايفه حيل

روان : انجبي لج شنو خايفه ياكل قندره متروحين وشيسوي خلي يسوي احنه مو وحدنه مثل قبل ورانه ظهر وبيت عم

بنان : راسي راح ينفجر شلون روان هذا مراح يعوفنا بحالنه

روان : ايععع لتفكرين بي لتصيرين ضعيفه لان اريد اكتلج لج بابا شيسوي خلي يسوي ما اهتم اله ابد ومره ثانيه اذا يدك لتفتحين خط

بنان : شلون يعني ها مترديني اخاف عليكم لج هددني بيكم يسويلكم شي

روان : سدي الموضوع ولتفتحي وانسي اصلا هذا بوخه ميسوي شي راح اروح اكمل قرايه باجر عدنا امتحان

بنان : تمام روحي انتبهي لدراستج زين

روان : تدلل ست بنان

بنان : هاي مال ست بنان ياسر يكولها

روان : ياسر ؟؟ مسامعته يكولها واصلا معلية بي هو بس خابصنه ب عمي وعمي

بنان : دروحي اقري

روان : اي اي اقرا ليش لا وانتي انتظري حبيب القلب يجي

بنان : ولييي روان

______________________________

بنان
رجعت العصر نزلت جوا لكيتهم كاعدين وعمو راجع
و زوزو تقسم وتعد وتصف

محمد : اني شعلية هو يكول زعلانات

زوزو : اهخخخخ هالولد هذا مادري عليمن طالع يمشي ورا كلام مرته الحية ام راسين
وما اجوي فوكاها هنه المتجاوزات والله هاي حلوه منهن وهاي ليان اهخخخ فوك ما غلطت وتجاوزت زعلانه ويه امها شنو هاي

محمد : شنسوي بعد

زوزو : ما اتحمل هيج شوف لك محمد هسه تخابرلي محمود يجيب بيته كله ويجيني شوكت ميريد اريد هذني الحيايه اطلع بيهن الحجي البكلبي حتى بالفاتحه ما اجوي ولا قدرونه والناس كلها اجوي

محمد : يمه يمعوده شتسوين بيهم اكيد راح تصير مشكلة جديده عوفيهم هاهيه

زوزو : شنو عود انت خايف من المشاكل لا والله اريد اعلمهن شلون يصير الاحترام

محمد : احممم يمه الله كريم سدي الموضوع

زوزو : اني معلية باجر اريدهن جايات هنا

محمد : هاذهوه يجون

همس همام لياسر : زوزو تحجي طك بطك

همام : اي ولك هذا الشي اليعجبني بيها

ياسر : اي انت شلونك القضايا مالاتك

همام : اووو وين انت من زمان حليتهن وراحن بس هم اجني قضايا جديده .. اي وانت شلونك ويه الحبيبة

ياسر : مادري شكول

همام : احجي خويه اسمعك

ياسر : شوف يعني اني حالياً مقهور

همام : ليش خيرك

ياسر : لك هذا يوسف اريد هيج اكضه اطلع ضيم كلبي بي مديعوفنا بحالنا

همام : يابه شبيك انت حاط عقلك ويه الولد شمسويلك شو اخلاق ويمشي بصف الحايط انسان مسالم

ياسر : انجب انجب لك سمعته ديخابر روان

همام : شحجو .. تعال تعال انت شنو تتسمع عليها ؟

ياسر : اسكت خل امسلت

همام : اي مسلت

ياسر : سمعتها تكوله سلامتك .. لكككك تكوله سلامتك

ضحك همام : خايب شبيك راح تموت نفسك

ياسر : اي يعني شتريدني اسوي مثلاً ؟

همام : دتباوع عليك شوية يعني لتبين عصبيتك لان تضحك الاوادم

ياسر : حمام يا اما تكول خيراً أو تصمت

همام : اصمت

ياسر : تففف عليك ايوالله وجه واحد يشكيلك انت اريد اعرف منية هاي الي راح تطيح بيك يا ثوله

همام : احترم نفسك راح ابدي اطلع لساني

ياسر : اسكت عمي اسكت لتدوخني لو مسائلني احسن

ضحك همام : تهي بهي راح اكول لزوزو عليك اذا تضوجني بعد وتاخذلك كتله من العكاز مالتها يفطر ظهرك فطر

ياسر : اهوووو

______________________________

بنان
كعدت العصر بغرفتي وفهد ماكو واني ضايجه حيل بسبب فراس والدمعه بعيوني

دكيت عليه حتى اشوفه وين صار
اجاني صوته بعيد ومكطع .. صوت طلقات يمه

_ ها بنان شلونج

بنان : فهد انت وينك شو اليوم متأخر

فهد : صار عدنا شغل .. بعدين اخابرج اني خوش

بنان : اوكف فهد شوكت ترجع

فهد : بالليل

انكطع الاتصال عنه .. حسيت نفسي قلقه عليه حيل جيت ابجي من الخوف

بنان : الووو فهد .. وينك

مَ اجاني صوته .. خفت حيل عليه وصرت ابجي وادك وماكو

كعدت ابجي حيل واني افكر بي وينه ياربي وين راح شلون يخليني هيج وميجاوبني

كعدت ابجي ورجع تليفوني دك
شلته بلهفه واني امسح بدموعي
رأسا فتحت خط وبديت اعيط وصوتي مبين بس باجيه

بنان : وينك انت شلون تخليني هيج ومتجاوبني

رد علية : يابوي جنتي تبجين ؟

بنان : وانت شعليك بجيت لو لا .. هسه انت زين

ضحك وكال : فديتتتتت الي يبجي والله مو كتلج عندي شغل تدرين هسه بالكوة صار عندي مجال ودكيت عليج حتى تعرفين و راح ارجع بالليل كتلج .. لتخافين " درابين گلبي " اني هذا شغلي

بنان : حباب عود لتتأخر

فهد : أن شاء الله

سديته من عنده واني امسح بدموعي وجهي احمر وحالتي حاله وادعيله

نزلت جوا لكيتهم كاعدين بالصاله ومريم هم هناك
رحت كعدت يمها

مريم : ها بنان شو مو على بعضج

بنان : ليش شنو

مريم : وجهج احمر انتي باجية؟

بنان : لا مباجيه بس عندي حساسيه

مريم: الحساسيه كلش تضوج

بنان : صدك مريم انتي كلتي لحسن ؟

ضحكت وكالت : لج مكلتله البارحه رجع كبل نام ملحكت

بنان : ههههههَ لعد اليوم كوليله وسويله مفاجأه

مريم : أن شاء الله والله كلش متحمسه بس شغله حيل مضوجني بنان يروح الصبح ويرجع بالليل وما افتهم شي من حسن

بنان : خلي يغير ع غير دائرة

مريم : اوفف أن شاء الله

بنان : لتتأففين يمعوده اضحكي جا غير انتي حام
ل
ضحكت وكالت : اي حامل بنان تخيلي انتي هم تصيرين حامل ونصير حوامل ثنينا غير زوزو تطير من الفرح هههههههَ

نزلت راسي بفشلة ضحكت حتى ما ابين شي
الموضوع هذا كلش غلط وديفشلني حيل وماريد احد يفتحه وياي بعد ...

ريم
كاعدين اني وروان نفر ب اذانه منعرف شنسوي وعدنا موضوع بالرياضيات ما مفتهمي زين

روان : هسه هذا شلون ينحل

ريم : مادري والله مو نفس ما اتوقع احس اكو خطوات ناقصه

روان : لعد حروح لبنان اشوفها وين تجي تقرينه
ريم : علوا شرحها يجنن

راحت روان وردت رجعت

ريم : شنو بشري

روان : دتسوي عشا ويه خاله هسه منو يقرينا واني اريد اخلص بسرعه ماضل لليل لو اموت

ريم : اي والله حتى اني اريد اطلع اغير من جوي برا مثل ذيج المره نكعد ونلعب

روان : الله احب العب

ريم : واني هم لعد نروح لبابا يقرينا

روان : امشي يلا

شلنا كتبنا ودفاترنا واقلامنا شكددد وننزل من الدرج وكلسع واكعه مساحه لو قلم وياسر الحقير يتمضك علينا

وروان تضحك شعرها مفتوح متحب تلمه و كيرلي وهو يصيحلها ام كفشه

كعدنا يم بابا ديباوع ع الكتاب وشاف الموضوع ضل صافن

ريم : ها بابا سلامات

محمد : ماعرف هالموضوع شلون ادرسه واصلا ناسي

ريم : بابا لعد احنه جينا عليك عليمن نروح لعد مدنفتهم الموضوع

روان : عمو طويل حيل شلون نقرا

صاح ياسر : ريم جيبي الكتاب خل اشوف
رحت وديتله الكتاب

ياسر : عمي فد بسيط يمي تعالو اشرحلكم

محمد : خاف لتكعد تلوص الهم مثل مجنت تحل

ياسر : لا لا لتخاف بهالركبه وشوف اذا ما جابوا ١٠٠

محمد : اي نشوف عود

رحنا اني و روان كالت : ماروح يم ياسر انتي افتهمي الموضوع واشرحيلي

ريم : انجبي روان حبابه اثنينا سوا

روان : ماريد يم ياسر ينرفزني

ريم : يابه انتي علموده غير علمود الموضوع خلي نخلص من وكت مو اتفقنا

روان : هفففف اي اي والله هاهيه

رحنا لياسر كاعد ويضحك

باوعتله يغمز ويتمضحك جتي من يمه هذا

روان
كعدنا كباله وهو أخذ وضعية الاستاذ وبدا يشرح بس ما انكر شرحه موزين بالعكس وافتهمت عليه وكما بس اشوف المسأله احلها بمخي
هو كلسع يشرح ويباوعلي بطرف عينه واني ادير وجهي
الى أن خلص شرح

روان : هسه شنو خلصنه

ياسر : شنو لا عيني لا متخلصون بعد خل انطيكم مسائل وحلوها

ريم : لا لا والله هاهيه افتهمت ماريد احل

ياسر : غصبا عليكم عمي تحلون يعني تحلون
كعد جاب اوراق ويكتب واحنه نحل صاير استاذ براسنا يمكن يضحك علينا بس تدريسه حلوو يعنيي

اخر شي خلصنا وهلكنا متوقعت هيج نضل وجابوا العشه

باوعلي ياسر وكال : لمي الكفشه مالتج

روان : وانت شعليك

ياسر : لا بالله ! يعني هيج حلو عود

روان : ياخي لتدخل لتدخل اني بكيفي امشي ريم نروح نضم الكتب

اباوعله يبتسم من جوا ليجوه ويضحك علينا

حجت ريم : معليج معليج بهذا الكائن مادري شبي هذا ياسر هالايام

روان : ضايج لان احجي وية يوسف

ريم : ابن خالتج

روان : اي بس والله حجي عادي يسأل علينا ويروح وهو مادري شبي ويا متخبل منة يمكن اذا تفتحين دماغه تلكين يوسف بنصه

ضحكت ريم وكالت : بويههه شمسوي بي يوسف امشي ننزل ناكل

روان : دقيقه أصيح رزان بلكي تجي

ريم : تمام اني انتظركم جوا

روان : خوش

رحت ع رزان نفس ما هيه ومتقبل تجي
رحت نزلت جوا ورا ريم جانوا ديتعشون

______________________________

بنان
جنه كاعدين نتعشه منشوف غير فهد طب وحالته حاله ملابسه تراب وشكله تعبان كلش

سلم علينا واشرلي يريدني
ركضت ورا رأسا واني أسأله

بنان : شصار فهد وانت ليش هيج ليش ملابسك هيج فهدد شبيك جاوبني لتجاهلني

طب للغرفه وطبيت وراه

اندارلي وكال : مو كتلج جان عندي شغل

بنان : وشنو هذا الشغل اني سمعت يمك طلقات عفيةة احجيلي

فهد : بنان اني ضابط وتعرفين شغلي زين شنو
بعدين انتي ليش هلكد ضايجه علية شنو تحبيني ؟

رجعت ليوره واني اباوعله : انت ليش هيج واثق احبك ؟

ابتسملي ودار وجهه يريد ينزع بلوزه درت وجهي اريد اطلع

صاحلي : وين وين

حجيت واني دايره ظهري : شنو وين غير اريد اطلع
فهد : لا لا شكو تطلعين عادي ترى اني حلالج لتستحين " وضحك ضحكته التوترني "

بنان : والله بطران انت

دا اريد اطلع حسيته صار وراي
انداريت اريد اعيط عليه حتى يوخر .. بس هو عرف يلعبها صَح

حصرني بالزاويه ومبتسم بوجهي وكال

فهد : اعترفي أنتِ تحبيني

بنان : شنو منو اني ؟

فهد : لتستحين عيناي

بنان : وخر فهد

حجى وهو يقلد : فهااااااد وخررر .. لا ما اوخر شتسوين ؟

بنان : اعيط والم البيت عليك

فهد : ايييي وشراح يسوولج

بنان : اروح يمهم اني

فهد : اي راح يكولون رجال ومرته وراح ياخذون نظره عليج ويعني بالنهاية تنلاف عليج ف ديري بالج تفكرين تسوين هيج

بلعت ريكي بخوف واني اسمعه انفاسي بدت تتسارع وهو ميوخر ..

دفعته قوي وكتله : فهد لتتقرب من يمي بعد بهل قرب

فهد : وليش يابه

بنان : اني بكل مرة اضل اعيد واكول زواجنا شكلي زواجنا شكلي كم مرة اكول لتنسى فهد

فهد : واني عاجبني اخلي زواجنا حقيقي شنو المشكله

بنان : فهدد وخر

فهد : صدكتي ههههههَ

بنان : شنو

فهد : بويه مو صدك هالحجي اني اتشاقه وياج بس ردت اعرف ردة فعلج

بنان : لتجرب مره ثانيه اوك

فهد : خوششششش

بنان : اووووك

فهد : دروحي روحي نزلي .. فهااااااد وخرررر وخررر اهمداج اي والله

__________________________

مريم
مريم : حسن

حسن : عيون حسن

مريم : سالمه عيونك حبيبي

حسن : ها مريم شعجب اليوم دلال ؟

مريم : عادي اصلا اني يوميه مدللتك لتنكر

حسن : هم صدك .. يلا شعندج من البدايه

مريم : امممم مادري انت شتتوقع

حسن : شنو شتوقع

مريم : امممممم شبيك حسن

حسن : شنو شبية هو شكووو غير اعرف

لزمت ايده وحطيتها ع بطني

مريم : اممممممممممم وهسه

طفر من مكانه وكال : شنوو

مريم : حسن الطم

حسن : انتي حامل ؟

مريم : اي اييييي حامل واخيراااا افتهمت

صار يباوعلي ويضحك
باسني من راسي وهو مبتسم

_ حيصير عدنا طفل من شوكت تعرفين واني ماعرف

مريم : من اول بارحه

حسن : وليش ما اعرف

مريم : والله حبيت اسويها الك مفاجأه بس انت ملتهي بالشغل

حسن : اهخخخ وين فروحه

مريم : هههههه فرح يم ياسر

حسن : هذا الولد هم مبتلي ببنتنا خلي نخلي مربي اطفال يصلح لهيج اشياء هو عقله بكد عقلهم هسه بس نجيب الطفل الجديد بخير وسلامه هم نحطه يم ياسر

مريم : لا يمه ولك هو مخبل ليروح يخبلهم بالزايد

حسن : اييييي نرجع لموضوع الطفل شنسمي

مريم : من هسه ترى بكيفي اني اسمي

حسن : شنو بكيفج انتي سميتي فرح لعد واني شنو ما اسمي طفل ؟

مريم : معلية اني بكيفي

حسن : لا اني اسمي

مريم : لااااا حسن لتعاند اني يعني اني

حسن : شلون شغله هاي كلتتت اني

_____________________________

بنان
نزلت جوا لكيت الكُل كاعد بالحديقه حتى رزان جايه بس مريم وحسن ماكو

صاح فهد : راح تلعبون

ريم : اي يلا تعالوا انتوا هم العبوا

فهد : اي نلعب ليش لا

ياسر : اول شي نلعب بدون بطل وهاي خوش واحد يختار ثاني ونفضها

ريم : انت مصر تخرب اللعبه

ياسر : كيفي ديلا خانُم تعاي

رحنا كعدنا احنه البنات وحد و الولد كبالنا

كال ياسر : يلا عمي هسه منو ومنو بالاول

ريم : اني وروان

ياسر : لا اني وروان

ريم : انجب معليك اني وروان وهاهيه

ياسر : كلت اني

ريم : فهد شووووفه

فهد : ياسررر

ياسر : اهووووو يلااا

ريم سالت : جراه أو صراحه

روان : جرأه

ريم : روحيي جوا ل زوزو و كوليلها عوفي المسلسلات روحي صلي اقري قران ترا دنيا قصيره مو مال هل سوالف

نط ياسر : لاااااا ديري بالج ترا العكاز يمها وتكسر رجلج

همس همام : انت شعليك تحدي هذا

ياسر : اروح بمكانها عادي اروح فدوه الها

همام : خاب انجب

راحت روان تضحك يم زوزو

زوزو : شو دتضحكين بوجهي

روان : بيبي روحي صلي اقري قران متفيدج المسلسلات

زوزو : ياااااع واني اكول هذني عاقلات خبلوجن هذوله

شالت عكازتها تخوف روان بيها : والله اذا هذا الحجي ينعاد اني اعلمكم منية زهره ششايفيني كافره مو هياتني اصلي واصوم انتوا تشوفوني اباوع عالمسلسل وتضلون تمسلتون

ضحكت روان : معلية بيبي والله معلية صوج ريم

زوزو : ولجججج ريممممم

نزل محمد من فوك سريع وراه رحاب

زوزو : خير يمه شبيك هيج وجهك لونه مخطوف

محمد : يمه زياد بالمطار دينتظرنا هو وأيهم وين فهد بسرعه عدلو البيت وكلشي راح نجيبهم ونجي

هلهلت زوزو بفرح وكامت تبجي : يا يمه يا وليدي راح يرجع كرة عيوني يمه رحاب وانتن العوبات تعالو عدلو البيت عبالك صاير انفجار بي

دخلت بنان خايفه هي ورزان

رزان : شكو خاله

رحاب : خاله راح يجي عمكم زياد وأيهم ابنه من السفر

رزان : هاا ؟؟

بنان : يجون هنا ؟

طبت ريم تركض : يمه صدكك حيجون بيت عمي زياد

رحاب : يمه وحده وحده اول شي اكيد يجون هنا لان ماعدهم أحد غيرنا بيت جمانه ابعد و اي راح يجون

ريم : ولدج كلهم راحوا للمطار

زوزو : شلون لعد غير يستقبلوهم ولد العم

كمنا نعدل بالبيت ونشيل بالغراض ونحط سويناه يلمع لمع

مرت گم ساعه كاعدين ننتظر الولد يجون وتأخروا حيل

__________________________

بسيارة فهد

ياسر : علكو اغنية صخام شنو رايحين نستقبل عمييي وابنه شنو هالنفسيه انتوا راح اتخبل

صاح محمد : ياسر والله اذا فشلتني اسكت

فهد : حسن جبت تليفوني

حسن : لا جابه حمام

همام : ليش انتوا تخلوني اطلع عن طوري حمام لتصيحولي دخيل الله كله صوجك ياسر القندره اصبرلي

ياسر : هيهيههيهي شصبرلك بابا راح يجي عمي وابنه
اليوم اذا متطلعولي اغاني اهوس عليكم هنا

فهد : اسكت ياسر راح تخليني اسوي حادث من وراك شبيك بيك صرع بس تكمز جنك طفل مو خبلتنا اكعد رااااحه

ياسر : عمي كعدتتت

حسن : عفية بالعاقل

ياسر : سمعت راح تصير اب

حسن : مو وكتك ياسر انجب

ياسر
ضلت السيارة تدك بينا لحد ما وصلنا للمطار واحنه نريد بس ننزل على عمي زياد وايهم نشوفهم .. عمي محمود و ايمن هم جايين ورانه هم

بعد معاناة وعركات ويه سيادة الضابط معلك اغاني ولا شي وضلينا كاعدين وساكتين نزلنا
ابويه خابر عمي ودلوه ع المكان الي همه واكفين بي همه

لمحتهم من بعيد عطت من الصدمه : هذووووله

همام : وسمممم بس لو تبطل سوالفك شويه اثكل رحمه لدينك

ياسر : انجب يابه هذولاك شوفهم

محمد : شفتهم شفتهم

رحنا الهم من بعيد واجوي ورانه عمي
للاسف جان لقاء حزين دام سنوات عدة
ابوية جان مشتاق لاخوه حيل بحيث شفتهم حاظنين بعض ويبجون .. ايهم يضحك ويسلم علينا واحد واحد طبعاً اني بالمقدمه واكفلهم .. بدينا نعرف عن نفسنا واحد واحد ونضحك وفرحانين

طشيت عليهم جكليت وكمت اهلهل

صاح فهد : ياسررررر شكلنا قبل شوية

ياسر : شبيكم يحظي اعتبروها هلهولة زوزو

زياد : منية هاي زوزو

محمد: هذوله المعوقين يصيحولها زوزو لان لو صاحين ميصيحون لبيبيتهم هيجي

ضحك زياد ويمسح دموعه : والله فرحت بشوفتكم
مدا اصدك اني بالعراق

ايهم : الحمدلله شفتكم صارلي شكد مشايفكم يابويه

ضحك فهد : والله مشتاقيلكم

ياسر : حتبقون واكفين امشوا امشوا

نهاية البارت
يتبع ..

(لاتنسوا التصويت)

أن شاء الله يعجبكم البارت طركاتي ♡ .

إلى اللقاء يا أعز العابرين في قلبي ♡.

7.nldn حسابنا بالأنستا

الكاتبات دينا & نور