ضحكوا الكل وفروحوا المؤمل
بس محد انتبه الريم
الانسانه اللي حبت من كل گلبها بس چان حُبها خفي
محد يدري بي غير بنان وجان بالنسبه الها سر مستحيل تكوله لأحد .. حبته بينها وبين نفسها
تأذت ليالي واشتاقت ايام
حبت من صدك ومن كل كلبها بس انخذلت
طول هل كم سنه وهي تحبه لكن هو ميدري
حب من طرف واحد ..
" لم تعد الشخص الذي عرفهُ قلبي مُنذ اول نظره "
__________________
ريم
صدمتي مراح اكدر اسولفها وما اكدر احجيها
غصة وكفت بصدري واني اشوف اهلي يضحكون وفرحنيله .. عيوني انملت دموع صرت ما اشوف اي احد غيره كدامي .. تذكرت مواقفنه البسيطه اللي بنيت عليها آمال مستحيله
كلها راحت ! حتى كتاباتي عنه !!
جنت أسهر الليل واني افكر بي
ابجي لان اشتاقيت اشوفه حتى لو من بعيد
نظره وحده كافيه كلش
صورته الي جانت مرافقتني بكل وقت .. حتى وهي انشكت بس بنظري اجمل الصور
كلبي تهشم وانكسر .. صرت احس داخلي ينزف دم وماكدر اسوي اي شي
ما حسيت غير روان تكولي : يلا ريم امشي نطلع متشوفين كلهم راحوا للدوامات تأخرنا ياسر ينتظرنا برا
شلت جنطتي واني امشي على كيف
الا شويه واني انفضح وكلشي يبين
عاطت روان وهي واكفة بالباب : شبيج ريم امشي سريع حنتأخر
طلعت وراها .. گجثة ميت .. كرهت حياتي صرت اشوف نفسي لا شيء
معقوله حيصير الغيري .. يعني هاهيه راح يتزوج ويعوفني ..
كلبي انعصر وردت ابجي وعيوني غوركت
انتبهت علية روان و اشرتلي ب أيدها بمعنى " شبيج"
درت وجهي واني متمالكه نفسي بالكوه حتى متنزل دموعي كدام ياسر و يحس اكو فد شي
............................................
بنان
نزلت جوه لكيت خاله دتنظف فرحت ساعدتها شويه ورحت كعدت
طول الليل مانمت وجنت افكر شنو الي راح يصير شنو راح يسوي فراس المشكله ما اكدر اكول لحد
قاطعتني من صفنتي مريم
_ متكليلي شكد تصفنين انتي بيج شي
بنان : لا مابيه شي
مريم : اكيد
بنان : اييي
مريم : بنان اريد اكلج شي
بنان : اي كولي
مريم : اني حامل
بنان : ياااا صدكك
مريم : اي والله صارلي فتره لعبان نفس و دوخه حسيت نفسي حامل سويت تحليل طلع اي
بنان : مبروك حبيبتي والله فرحتلج حيلل
مريم : حياتي بنان يوم الآلج
بنان : كلتي الحسن اكيد حيفرح
مريم : لا بعد
بهل اثناء اجت زوزو
زوزو : هاي شنو شو تتبسبسن شعدجن
بسرعه طفرت بفرح وكلت
_ مريم حامل
ومريم خزرتني وزوزو بدت تهلهل وتبجي
بنان بهمس : شنو مردتي احد يعرف
مريم بضحك : لا عادي بس زوزو شويه فضيحه
زوزو كامت تعيط : ولج رحاب وينج وينج ابنج حيصير اب للمره ثانيه
اجت خاله رحاب فرحانه هم وتهلهل وكاموا يباركون المريم وفرحانين الها
ضحكت رحاب وكالت : يمه مريم كلتي لـ حسن
مريم : لا خاله انتضره يرجع يلا اكول اله
رحاب : ليش يمه ها اها هسه اخابره واكوله
مريم: لا لا أريد اني اكوله
بنان بضحكه : اي خاله خطيه خلي هي تكوله
زوزو : اي والله حسن طلع مو هين ابن الاوادم
رحاب : يستاهل يستاهل حسن
ابتسمت الهم شلون يضحكون وفرحانين
زوزو : اي وانتي بنان
بنان : ها بيبي شنو
زوزو : اي شوكت تصيرين حامل
ضحكت بتوتر : ههههههَ مادري الله كريم
باوعتلي صفح كأنما ممقتنعه : اخخخ منج بنان .. نروح دكتوره رحاب لازم بنان تروح دكتوره متضل هيج
رأسا نطيت : ها لا لا بيبي ماريد ماريد ماروح دكتوره اني مو كتلج هذيج المره
مريم : خلص زوزو عادي مصار شي البنية متريد
زوزو : ما شاء الله حزب ست مريم ويه بنان والله يا بنان صبري اني الج
ضحكت رحاب : خاله على كيفج هي البنية شنو قابل بيدها والدكتوره مو غصب تروحلها متريد ف براحتها بعدين مريم و بنان من زمان صديقات وشحلاتهن
باوعت واني خجلانه زوزو ابد متكدر تسكت ولازم تفتح الموضوع هذا
________________________________
روان
اول مصعدنه بسياره استاذ ياسر سوه عركه دنصعد ليوره اني وريم وطفر ياسر
ياسر : هلا هلا هاي شنو وحده منجن تكعد لكدام سايق مال خلفوجن اني لو شنو مو زين من عندي داوصلكم
روان : لا مسوي فضل
ياسر : اي مسوي فضل ولازم تحمدون ربكم هم واحد ديوصلكم وهم صاك الف بنيه تتمنئ يوصلها
روان : سوده عليه لعد شكد ذوقهن سخيف هل الف بنيه الي تحجي عنهن
ريم : هوه وينهن
ياسر : عود حجت البومه وانتي اسكتي ام كفشه طركاعه والله انتن مو مال نعمه رافساتها رفس يلا وحده منجن تصعد ويفضل روان بس لا لا ما اريد تزعلن يوم روان تصعد بصدر يوم ريم
روان : ما اريد اصعد ريم انتي صعدي
ياسر : هاي لو يوسف كلج جان ركضتي صعدتي
خزرته وتتأففت
صعدت ريم كعدت بصدر واني كعدت ليوره وريم اباوع عليها مالها خلك وضايجه ومدلغمه وياسر كلسع يباوع عليه من الجامه ويسوي حركات بعينه ويغمز لحد مطلع اغنيه وكام يغني وياها ويباوع بعيني
ياسر : " تكلم تكلم كول انا حبك تكلم "
"تعلم تعلم غازل وحبني تعلم "
روان خزرته وگلت : اذا ممكن يعني سد الاغاني
ياسر : والله انتي مو مال اغاني رومانسيه وحب انتي مال طيحان حظ
روان : ما اتوقع كلتلك تعال طلع اغاني من الصبح
ياسر : طبعا هاي لو يوسف مطلع چان فرحتي
روان : اهوووو انت شلزكت شحچي يوسف و يوسف
ياسر : اي ضلي هيج ضلي
ريم : اهوووو كافي تتناكرون وانت استاذ ياسر شتحس مطلع اغاني من الصبح ولا ديغني وفرحان شهل المزاج الحلو الي اجاك فجئه
ياسر : اهمداي اذا اطلعلكم بعد هوه صوجي المفروض اعرف امتن بووم نفسيات
وصلنه للمدرسه ونزلنه اني وريم وكعدنه علئ مكان بساحه بين ميدك الجرس ونفوت للصفوف
روان : شو احسج ضايجه بيج شي
ريم : تعبانه روان خانكتني العبره احس مخنوكه مداتحمل
روان : شبيج احجي شكو
اباوع عليها نزلن دموعها وكامت تبجي
روان : شبيج ريم عفيه لتخوفيني شكو شصاير
ريم : روان اني احب
روان : علمود تحبين دتبجين ترا عادي مابيه شي شكو تبجين
ريم : مو هيج لا الي احبه ميحبني وحيخطب هم
روان : مؤمل مو ؟
ريم بشهكه : اي
روان : ما ادري شكلج بس انتي شلون حبيتي
ريم : شبيج روان شنو شلون حبيته هاهيه حبيته بعد
روان : تحسسيني بس هوه بالعالم الي ميريدج عوفيي لتأذين نفسج
ريم : وگلبي شلون بي
روان : انسي
ريم : شلون انسئ ما اكدر احبه
روان : لو يحبج جان اجه خطبج اعترفلج بس شفتي هوه اصلا ممهتملج فمثل مهوه سوا سوي انتي
ريم : اووف يروان اووف
روان : لا اووف ولا بطيخ يلا امشي مسحي دموعج وخلي نصبح بوجهه ست فاديه
______________________________
ياسر
كالعاده عمي رحت لدوامي للجامعه صخامي الي ميخلص
صبحت بوجه احمد الي حتى ممغسل وجهه
ياسر : لككك ها
احمد : هلاا بعد عيني
ياسر : اي .. أكلك شنو ممغسل وجهك
احمد : لا مابية حيل مو زين داومت
ياسر : خرب بيك حتئ وانت ممغسل حلوو
احمد : هوه اني من يومي صاك
ياسر : انجب لكك .. اييي شوكت المحاظرة ولو مابية حيل بس اريد اخلص دوام بسرعه وارجع
احمد : خيرك
باوعتله وكلت : غير ارجع انهمد " اصلا اريد ارجع علمود روان "
احمد : والله اخي انت مو خالي ماصاير مثل قبل ياسر الاعرفه
ياسر : الدنيا عمي الدنيا تغير .. واني تغيرت بس لجذب وتهول اصلا اني ياسر ياسر بس لان كتلك احب كمت تريد تسويني حزين بالكوه
كمز احمد من مكانه : أكلك اسكت اسكت
ضليت اتلفت : شبيك شبيك عمي شنهي انرعصت
احمد : خاب اسكت اجتي هذيج هذيج
ياسر : صرت ببغاء تعيد الحجايه ؟ وينها متكلي مداشوف
احمد : حقك تشوف بس الي بالك
ياسر : انجب انجب بعد عمك انجبببببب
احمد : يمعود هذيج
ياسر "باوعت حسيت شكلها شايفه من قبل "
احمد : اهخخخ ولك ياسر الحكني
ياسر : يبووووووو يا ناس يا عالم لحكووووو صديقي تخربط
احمد " سديت حلك ياسر " : خره بيك حيوان مو هيج شوف كامت تباوع علينا وتضحك اوف ياسر منك شلون راح ابتلي بيك
ياسر : أكلك هي شسمها شنو عود تستحي تكول اسمها ؟
احمد : خصوصيه معليك
ياسر : اوفففف الزمن شكد غدار .. بس حبيبتك شايفها من قبل مادري وين بس شايفها
احمد : لا بربك وين
ياسر : لتخاف بس مادري وين شايفها اصبرلي خل استرجع ذاكرتي
ضليت احاول اتذكر هالبنية وين شايفها وين وين
عطت بسرعه ونفس اللحظه تذكرتها: لككك احمد هاي اخت مؤمل
احمد : جذااااب
ياسر : وحق الله
احمد : صرت اخاف احبها
ياسر : ليش
احمد : يمعود جا غير اخوها ضابط لا اروح بيها
ياسر : الحب تضحيات عمي .. ضحي ضحي هو انت مابيك خير تضحي تحجي وياها كلمه
احمد : خاب انجب والله لا اروح واحجي وياها
ياسر : السبع يطلع دم والفاهي يطلع زاهي هيهيهيهيهي
احمد : لا لا ماريد اروح يلا غير يوم
ياسر : راح تخليني اكمز انت شنو شتنتضر واذا اخت مؤمل خاف الذاكره خانتني ومو اخت مؤمل لو ترتاح الا تروح من ايدك وتزوج
احمد : والله اكسر راس الياخذها
ياسر : يلا بيك خير كوم
احمد : انجب ياسر بعدين لتلح
ياسر : لا هاهيه ربحنا دكوم عمي كوم نروح نستفتح بوجه عادولي الورده
.....................................................
بنان
كاعده وجان تليفوني يدك وجان الكه اسمه " فهد " صفنت شويه بالأسم وجاوبته
فهد : الله بالخير
بنان : هلا اكو شي
فهد : ليش لازم يكون اكو شي حتئ اتصل بمرتي "
بنان : مرتك ؟
فهد : هاا عفوا ست بنان نسيت انتي متقبلين اقصد " مرتي الجذبيه "
بنان : ها
فهد : شبيج حتئ مسميج بتليفوني "مرتيي الجذبيه " حتئ ترتاح الدوده مالتج
بنان : حضرتك تقلد
فهد : حضرتك ؟ هاي حلوه مال حضرتك بويه السانج صاير زفر وتجفصين هواي ملاحظه !!
بنان : فهد ليش دائما تفهم كلامي غلط مو هيج قصدي
فهد : والله مو اني الي دافهم غلط انتي السانج فالت
بنان : ايي شلونك
فهد : زين شعجب متصلتي اليوم كل مره تتصلين انتي
بنان : اهاا عرفت ليش تصلت انت علمود متصلت عليك اني اليوم
فهد : اي والله حسيت صاير شي كلت مو من عوايدها متتصل بيچ شي
بنان : لا مابيه
فهد : اكيد
بنان : اي
فهد : محتاجه شي
بنان : لا سلامتك
فهد : تمام مع السلام مريتي الجدبية
بنان : باييي
سديته منه وكمت رحت يم رزان شفته كاعده وحدها وصافنه
بنان : شلونج رزان اليوم
رزان : شتشوفين
بنان : رزان ميصير تضلين هيج
رزان : شتريدين اغني لو اركص ؟
بنان : مكتلج غني وركصي بس ميصير هيج تبقين تأذيني حيل رزان عفيه لضلين هيج مداكدر اتحمل اشوفج هيج
اباوع عليها دمعت ونزلت دموعها وسكتت مجاوبتني فجئه كلتلي
رزان : ترا اني وامير مطلكنه لحد الآن
بنان : يا امير
رزان : شنو يا امير الي عقدنه اني وياه وكال اطلكج وبعدنه مطلكنه
بنان : تحچين صدك
رزان : شتشوفين انتي شكل شكل وحده داتضحك عليج مثلا
بنان : مو هيج قصدي
رزان : لا هيج قصدج كلجن ممهتمات لا انتي ولا روان بجيتوا علئ ماما شويه ورها نسيتوها ولا كأنوا قبل كم يوم نقتلت ! وندفنت ولحد الآن ملكيتوا جمال ولا كلشي ولا تحاسب ومكملين حياتكم ولا كأنوا اكو شي
بنان : انتي شبيج مو معناها نضحك ونسولف معناها مزعلانين انتي متعرفين شنو بيه وشنو بگلبي من قهر وضيم بس ما ابين ليش لان اريد اقويجن مو معناها مدابجي ولا هاي معناها محزنانه علئ موتها
رزان : اطلعي برا اريد انام تعبانه
بنان : رزان
رزان : داكلج اريد انام
بنان : براحتج
رزان : طفي ضوه وراج وسدي الباب
اباوع عليها غطت نفسها بالبطانيه وغمضت عينها .. اوف يرزان الله يجبر گلبج وگلبنه ..
______________________________
ريم
كاعدين بالفرصه اني وروان اني حايره بزماني وروان كلسع تباوع عليه وتغمني كاعدين بأمان الله مالنه شغل بحد بس طبعا الطلايب ورانه ورانه شو منشوف غير اجني العوبات علينه صارلنه فتره مشايفيهن
سجئ : هلا شلونجن مشتاقين
ريم : قبل متبلشين اعتقد شفتي شصار اخر مره وشلون نفصلتوا وشغلة ثاني مالنه خلك مشاكلجن عود بعدين نتفرغلكم هسه ولن من يمنه
سجئ : اهووو شبيجن بنات فوك منسلم
روان : اذا السلام منكم منريده وروحي من يمي ترا طاكه روحي هسه اطلع ضيم گلبي بيج وامسح الساحه بيج انتي وهاي الزوج الي بصفج
مروة : ماكو غيرج زوج احترمي نفسج
سجئ : اشش مروة كافي عوفي روان خطيه بضيمها بس تدرين حياتي روان لو اني بمكانج هوه مستحيل اصير بس لو بمكانج ما اطلع ولا اشوف نفسي لحد
روان : عفوا ؟
سجئ : ختيه متدري ولو حقج حياتي بعد الي سوته امج حقج تغشمين روحج
ريم : شدتمسلتين انتي ولي من يمنه سجئ
روان : شنو قصدج
سجئ : هو شنو شنو قصدي كل المدرسه تدري والمنطقة تعرف انو امج العار انهزمت ويا صاحبها وابوج لزمها وشبعها كتل وخله طلقه براسها وماتت
روان احسن هل كلمات الي كالتها صدمه بنسبه الي وبقت ترن براسي معقوله المرآه الي ضحت علمودنه هيج يطلعون عنها كلام ويشوهون سمعتها حتئ وهيه ماتت .. وماتت ظلم ومالها ذنب بسبب انسان حقير ونذل وحتئ ميعرفون شنو الحقيقه كبل طلعوا هل حجي عنها ..
بلا وعي تهسترت بس سمعت هل كلام وفقدت وكبل جريتها من شعرها جرر وضرب وراجديات مخليت عظم صاحي بيها احير منين اضرب بيها
روان : انتي شلون تحجين هيج علئ امي شلون ولج امي اشرف منكم كلكم حيوانه
اسمع هواي اصوات يمي طالبات يحاولون يجروني منها ماكو فقدت اضرب بيها لحد ما ريم جرتني حيل
ريم : عفيه روان عوفيها عليج الله روان كافيي اصحي شجاج
اجني المعلمات علينه والطالبات ملتمات وجان وقت حله من الدوام اباوع بوجهه سجئ كله دم وشعرها مكفش ومخرمش وجهاا ابتسمت بشماته المعلمات اخذوهاا واني اخذت جنطتي وطلعنه ولحكتني ريم
ريم : ولج روان هاي شسويتي بالبنيه
هنا نفجرت بالبچي واشهك متحملت وحضنتني ريم
_سمعتيها شكالت ريم سمعتيها سمعتي الناس شنو يحجون علئ امي سمعتيهم وتريديني اسكت
ريم : عفيه روان كافي عفيه لسوين هيج
روان : تعبت ريم تعبت فوك ما ضيم الي بي اني اجي اسمع هيج كلام علئ امي والله تعبت
وكفنه علئ صفحه وطلعت بطل المي وغسلت الروان بهل اثناء اجه ياسر
باوعلنا باستغراب وكال : هاي شنو شبيكم
ريم : عركه
ياسر : استغفر الله ربي انتن شلون بيكم ها شلووون
ريم : لا ياسر هالمره حقنا نتعارك ترى مو عركه تافهه مثل ممتوقع
روان : كمت ومشيت وشلت جنطتي وداروح لسياره وصعدت بعدها جتي ريم وياسر شكله عصبي الظاهر ريم حجتله كلشي .. صعدوا بالسياره
حجى ياسر : روان معليج بيهم شيحجون خلي يحجون المهم احنه نعرف شنو امكم بعد شنسوي بكلام الناس .. اذا نضل على حجي الناس جان احنه من زمان متخبلين
روان : حجيهم قوي وديستهزؤون
ياسر : يطبهم مرض فوك مرض لتهتمون و استمتعوا بحياتكم شيحجون شيخرطون معليكم بأي احد هي الحياة وحده وراح نعيشها مره
روان : صفنت على ياسر تفكيره يضحكني حلو مهتم بنفسه ويفكر بالمستقبل وميهتم لاي احد اهمشي يعيش حياته ويتونس .. بس اني ما اكدر هيج ما اهتم جان الحجي قوي لدرجة ومتحملت طلعت حركة كلبي بيها وكتلتها
ريم : يلا كافي سدوا الموضوع تعبانه كلش ياسر بسرعه رجعنا للبيت
ياسر : سايق عدج حضرة جنابج
ريم : لا مو سايق يمعود بس رجعنااا
________________________________
دخل مؤمل على فهد : صباح الخير ضلعيييي
فهد : هلا بالخايس شلونك ؟
مؤمل : دمار
فهد : انفجار
مؤمل : ديلا كافي كافي اي شكو ماكو
فهد : والله كل الاخبار عندك مو راح تعرس عود ؟
مؤمل : لكك اسكت لتذكرني انت الثاني اني واكع بين نارين
فهد : قهرتني عليك والله
مؤمل : انجب ولتصنف
فهد : اخرط بسرعه وروح وراي شغل بكد شعر راسك
مؤمل : اي اني هم مو بس انت .. شوف اسمع
فهد: اي اشوف واسمع
مؤمل : امي تريد تخطبلي بت خالتي .. بس اني ماريدها وهي تريدها الا هاي مادري شافت بيها جنها ام علي عمتي
فهد : اي وهسه يعني
مؤمل : شنو هسه يعني اني هسه اريد انتحر
فهد : انتحر
مؤمل : الحياة متنراد يا اخي
فهد : اي هي يعني اذا حلوه شكو بيها تزوج ترى حلو الزواج
غمز مؤمل : ها انت هيج تكول
فهد : اجذب عليك قابل
مؤمل : لا وين .. بس ماريدها
فهد : اي خلص كول لامك ماريدها شكو دتطولون الموضوع
مؤمل : لكك هي هناا يعني ماكدر افتح حلكي واصخم امي عاجبتها ومقرره وهسه اذا اكول لا تلكيها بالطوارئ
فهد : يابه تزوج وانطم
مؤمل : الله باع شلون عنده سهله لتخليني اكوملك فهد اني منا ضايج
فهد : اكول خاف عندك وحده ؟؟
مؤمل : تريد الصدك
فهد : اكيد
مؤمل : اي يعني هاي شسمه اعرف وحده وخوش بنية ونعم منها ومن شاربها الاشكر وصراحه دخلت مزاجي مره اجوي علينا للبيت وشفتها
فهد : كرايبك
مؤمل : الا الروح بالروح
فهد : حاجي امك
مؤمل : رجعنا لنقطة الصفر مو كتلك قافله واذا اكول لا يصعد سكرها
فهد : يا طلابة الي متخلص روحي روححح خل اخلص هذني وانت من تخلص صيحلي هادي وتعالو هنا نتناقش بموضوع جمال
مؤمل : تمام
_____________________________
روان كاعدين بسياره محد حجه شي وكلسع ياسر يباوع عليه من المرايه .. اباوع علئ الطريق مو نفس طريق البيت
روان : هذا مو طريق البيت وي رايحين
باوع علئ ياسر ندار علينه وگال
_ حخطفج
روان : اهووو حيكعد يطبق علينه سوالف الافلام والمسلسلات
ياسر : كلمه منچ ما اسمع
روان : وين رايحين
ياسر : عجبني افركم عندج اعتراض
روان : وين تفرنه
ياسر : شي ميخصج
ريم : اهوو ياسر مو وكتك رجعنه للبيت
ياسر : تريدين ترجعين للبيت
ريم : ايي
ياسر : ادللي
اباوع علئ ياسر غير طريقنه ورجعنه للبيت
ياسر : يلا ست ريم انزلي
نزلت ريم من السياره دانزل اني هم سد سياره
روان : هيوو افتح خلي انزل
ياسر : ماكووو
فتح شباك وكام يحجي وي ريم
_ يلا وليي فوتي للبيت واذا احد كلج وي روان وياسر كولي روان رادت تشتري شي وراحت هيه وياسر خوش
ريم بأبتسامه : خوش خوش الله وياك خويه
روان : ولج ريم بسيطه وين عايفتني تعاي
ياسر : شنو وين عايفتج قابل كدامج بعبع لتخافين ما اكل لحم حيايه اني
باوعت عليه يباوعلي ويبتسم بخباثه ومشه بالسياره ..
عطت بعصبيه : ياسرررر وين رايحينن
ياسر : بس تحچين عدل اجاوبج
روان : ياسر وين مولين
ياسر : اذا تبقين هيج ما اجاوبج
اخذت نفس بصبر وگلت : استاذ ياسر اذا ممكن من جنابك الحلو تكلي وين رايحين
ياسر : لا لا هاي مو خوش اسلوب احس مجبوره
گلت بهدوء : ياسر وين رايحين
ياسر : هاي هم مبينه جذب
عطت : ياسرررررررر كافيي وينن مولينن يلا
ياسر : هوب هوب هوب هدي عمي هسه يعني وين راحين نفتر شويه ونرجع واوكلج موطه ونرجع ها اها
روان : شكرا ما اريد
ياسر : موطه ام الكاكو هاا
روان : اممممم اوك
__________________________
بنان
صعدت لغرفة فتت سبحت وصليت وقريت قرآن الماما ودعيت
ورحت تمددت ودك تليفوني وطلعلي رقم فراس ترددت اجاوب لان اعرفه راح يكعد يهدد بس بقه يدك وما اجاوب لحد مدز رساله وكاتب بيها تردين لو شوفين شي ميعجبج خفت فجاوبته
فراس : مره ثانيه من اول ما اتصل تردين
بنان : شتريد متفهمني شتريد
فراس : اريدج
بنان : شنو تريدني شبيك شبيك عوفني بحالي والله تعبت
فراس : شلون اعوفج تريديني اخلي فهد يتهنئ بيج وخليج تعيشين حياة زوجيه سعيده بس والله هنياله عليج وعلئ ترافة جسمج
بنان بجي : عفيه فراس الله يخليك عوفني بحالي الله يخليك
فراس : مال اعوفج هذا شي انسي عندج خيارين لو تجين للشقه الكتلج عليها لو
قاطعته وعطت بي وگلت
_ ما اجي ما اجي مراح اسمع كلامك ولا حقبل تهديداتك الي وهسه اكول ال فهد
اني گلت هيچ وفراس طكها بضحكه
فراس : والله ضحكيني انتي سمعي لا فهد ولا غيره يوكف بوجهي واني ما اعوفج اله اخذ حاجتي منج وانتي من اني وصغير عيني عليج وما اعوفج بحالج وفي حال گلتي ال فهد عليه اعوفج انتي بس عندج روان ورزان حيكونون بدالج تحبين يعيشون الي عشتي واكثر ؟
بنان : عفيه لا كلشي ولا روان ورزان عفيه لسوي هيج
فراس : تجين للشقه باجر لو لا ؟
بنان : لا لسوي هيج عفيه ما اكدر
بهل اثناء واني احچي وي فراس وجان يفوت فهد للغرفه كبل سديت الخط وتوترت وهوه بقه يباوع عليه وعاكد حواجبه
فهد : شبيچ هيج فزيتي
جاوبته بتوتر : لا ماكو شي
فهد : ويامن چنتي تحچين
بنان : مجنت احچي ويا احد متوهم
فهد بعصبيه : شنو ضحكين عليه انتي اول مفتت كبل سديتي الخط وتوترتي شوفي حتئ صار وجهج اصفر
بنان : شبيك فهد ليش العصبيه جنت احجي وي خالتي احلام
فهد : لعد شكوو گلتي مجنت احجي وي احد
بنان : خفت متقبل
فهد : وليش ما اقبل ؟
بنان : ما ادري
فهد : شو جيبي الموبايل اشوف
هنا لما گال هيج وكف گلبي منكن بهل لحظه بس احد يطخني يغمئ عليه ف گلت
_ شبيك فهد شنو متثق بيني
اباوع عليه حط ايده علوجهه وكام يستغفر وگال
فهد : مره ثانيه لما اسئلج لچذبين عليه ومو شغلة ما اثق اني اثق بيج اكثر من نفسي واكثر هم واعرف مسوين شي يخرب هل ثقه بس اكره ما اكره احد يچذب عليه وترا عادي احچي وي خالتج بأي وقت ما مانعج اني
بهاي كلماته احس موتني علئ بطيئ ودمعت .. ياريت لو اكدر اكول اله بس ما اكدر اخاف من فراس يسوي شي بخواتي
فهد : شبيچ دمعتي بويه هسه شحجيت وياج
بنان : لا ماكو شي شو اليوم من وكت
فهد : هوه خلصت شغلي واجيت يلا حفوت اسبح حتئ ننزل نتغده
بنان : تمام
............................................
بنان
نزلت بعدها جوا ساعدتهم بالغدا وصبينا الاكل بهالوقت دخلت ريم
اول ما شفتها تذكرت السالفه .. يا ربي ساعدها خطيه متتحمل .. شكلها تعبان وحجابها مخربط وضعها ابد مو طبيعي عرفت شبيها انتضرت تفوت روان بس ماهيه
بنان : ريم لعد وين روان
باوعتلي : روان اخذها ياسر يشترون شي
بنان : يشترون شي ؟
ريم : اي هي روان رادت حاجه وأخذها
نزل فهد : شنو اخذها وين
ريم : مادري اني صاعده انام
زوزو : عفية بيت كاضيه بس نوم حتى مريم الحامل مو مثلكم
بهل لحظه زوزو جفصت بس همزين محد انتبه
صاحت رحاب : شنووو الاكل هذا لعد المن سويته
بنان : عادي هسه يجون همام وعمو و ياسر و روان
فهد : راح ادك على هذا الحيوان افتهم ريمه ابد متنطي كلمه
بنان : اي حباب اريد اختي
فهد : لتكولين حباب عيني
بنان : اوك يلا دك
فهد : اوك هم لتكوليها
بنان : خوش يلا دككك
ابتسم وكال : اي هيج احسن
دك على ياسر واللي افتهمنا على أساس محتاجه روان دفاتر ورايحين مكتبه فهد كال اله استعجل
اجه همام : هاي شنو شو صاير تجمع
زوزو : اي والله انت المعقد الك وحشه
همام : الج ونه زوزو
زوزو : مال الغسل انجب ولك يلا ولي عود هاي انزل تتغدا المسكينه رحاب مسويه هالغدا تنتضر الجيش يكتمل
فهد : اي والله
اخر شي زوزو ضلت تلح جوعانه وجوعانه وصبوا غدا واكلنا وياسر وروان ما اجوي .. ولا رزان الي تنزل وعايفيني وحدي حتى ريم نامت ومريم نايمه على كولة زوزو بيت كاضيها نوم وفرح جتي يمي كعدت تاكل وهمام هم نزل واجه
كملنا اكل ورحت غسلت المواعين وكمت رحت لرزان للغرفه
نفس ما هي كل ما اشوفها كلبي ينقبض احجي وياها ولا يمي متقبل تنزل والأكل نجيبه الها يمها
زين شلون ممطلكها يعني هي على ذمة احد
كمت رحت لفهد لكيته كاعد يخابر
اول ما شافني اختصر المكالمه وسده
الظاهر عرفني اريد اكول اله شي
ضليت خايفه شلون افتح الموضوع ومرتبكه حيل والموضوع كلش حساس
فهد : من الاخير شتردين ؟
بنان : والله فهد موضوع كلش يعني مادري شلون افتحه وياك
فهد : كولي بويه عادي
بنان : رزان
فهد : مو كلتلج راح يجون بيت عمي و..
قاطعته بنص الكلام : لااا مو هذا الموضوع .. رزان ممطلكها امير
فهد : اني مو كلتلج " مسح ع راسه بتعب " نسيت اكلج
بنان : شنوو
فهد : ثواني
راح للكنتور شفته مادري شديدور
بنان : فهد شنو جاي تدور
فهد : صبر صبر
شفته اندارلي وبيده ورقه
فهد : اني نسيت اكلج لكيت هالورقه بالبيت مالتكم
بنان : ورقة شنو
فهد : اقري
باوعت بصدمه : ورقة طلاك هاي .. طلكهااا
فهد : اي مطلكها
بنان : الف الحمد لله والشكر لعد اروح اكوللها بس تكعد من النوم
فهد : تمام
______________________________
ريم
اول موصلت فتت للغرفه صاحوني اكل مجان عندي نفس للاكل كبل خليت راسي ونمت اتهرب من الواقع .. كعدت المغرب رحت توضيت وصليت
ودعيت وگلت اذا هوه خير الي ان شاء الله يكون من نصيبي .. واذا شر الله يجبر بگلبي واكدر انساه
ورها فتحت المجر طلعت علبه حاطه بيها صورة اله والدفتر جنت اكتب بي عنه كعدت اباوع بالدفتر واكلب بي واقره شجنت اكتب وي كل كلمه تنزل دموعي وكل ما اباوع علئ صورته ابجي واشهك نهاريت هناه ادركت شنو شعور الحب من طرف اصعب شعور هوه "الحب" وخاصة اذا جان من طرف موت علئ البطيئ من هلكد ما بچيت كمت ازوع واحس راسي يوجعني ودنيا تفتر بيه ..
رزان
كعدت من النوم اسمع صوت بجي وتشهك بس علئ كيف باوعت لكيت ريم موته نفسها من البچي ويعونها صب دم وراحت الحمام زوع خفت عليها كبل كمت يمها
رزان : ريم ريم شبيج هاي شنو
ريم : رزان دايخه احس حوكع صيحي فهد احد راسي موتني
رزان : هسه هسه
ريم : قبل مصيحي اكو علبه ضميها وبعدين روحي صيحي
رزان
رحت بسرعه شفت العلبه ضيمتها وركضت الغرفة فهد وبنان دكيتها فتحلي فهد
فهد : شكو رزان صاير شي
رزان : عفيه بس تعال شوف ريم ما ادري شبيها بس ازوع وراسها يوجعها
فهد ركض للغرفه هوه وبنان
بنان
فتنه للغرفه لكينه ريم فاقده الوعي فهد تخبل راح شالها وبقه يرش عليها مي اله شويه صحت بس كلسع تفتح عينها وسدها وتكول راسي وراسي يوجعني حيموتني
فهد رئسا كال لبسوها بسرعه اي شي وشال خلي اخذها مو مال تبقه هيج
لبسناها صايه وشالها ونزل فهد اخذها
جان عمو وخاله كاعدين
محمد : هاي شنو شبيها ريم
فهد : غير تخربطت
رحاب لطمت عصدرها : يمها بنيتي
فهد : شبيكم مابيها شي هسه حوديها للمستشفئ واشوف
محمد : اصبر خلي اجي وياكم
فهد : وين تجي هسه قابل شكد حنطول يلا اني رايح
طلع فهد هوه وريم وخاله بقت تبجي
صعدت فوك يم رزان وكلتلها
بنان : ريم شبيها ليش هيج صار وياها
رزان : والله كعدت لكيتها تبجي وتشهك ورها راحت زوعت بعدين كالت راسي وراسي صيحي فهد
بنان : بس هيج
رزان : ايي
بنان : اووف هاي هم مشلوعة گلب
رزان : ليش شبيها
بنان : مابيها شي صدك رزان
رزان : ها
بنان : هاي ورقة طلاكج
جرته مني شافتها ومحجت شي عفتها ورحت طلعت
______________________________
روان
اني وياسر اول شي رحنه جاب لفات وكعدنه ورها فرني بسياره وطلع اغاني ساجده وكام يركص
ورها راح جاب موطات الي واله
بعدين هم فترينه شويه ورجعنه للبيت قبل مننزل گال
_ هم كولي ياسر مقصر وميفرج
روان : تراا مو اني كتلك فرني
ياسر : اهخخ يا ياسر هوه اني اعرف حضي سوي زين وضب بالشط
روان : هسه شتريد تريد هلهوله
ياسر : اريد بوسه
فتحت عيني وكتله : صدك انت ادبسزز وخررر صوجي اطلع وياك
عفتها وطبيت جوا ولحكني
ياسر : تعاي رواني تعاي لزعلين ولج طركاعه
وجان تطلع بوجهي بنان
بنان : عاش من شافج
روان : هااا
بنان : وجعااا مكافي طربكه وين جنتي
وجان يدخل ياسر
ياسر : يا هلا بمرت اخويه شلونج
بنان : وين جنت ماخذ اختي ها
ياسر : خطفتها وهسه انقهرت عليها ورجعتها
بنان : ياسرر
ياسر : اهوو بنان مجنتي هيج اول ما اجيتي بس الصوج مو صوجج صوج ذاك الاغبر اكيد عاشرتي وصرتي نفسه كئيبه
بنان : هاا فهد تعال سمعت شديكول ياسر عليك
كبل طفر ياسر وگال
_ فهودي يا جكليته حامض حلو باكيته هوه وين اكو مثل فهد
بنان هنا اني وروان كلبناها ضحك
ياسر : اهوووو بنان شبيجج والله الجذب بهل عائله وراثه
روان : من عندك وشيل ايدك
ياسر : مقبولة منج رواني
روان : مو روانك
ياسر : روانييي
روان : لاا
ياسر : غصبن معليج رواني الي وبس
بنان : ولكم كافي
روان : اهوو اصعد يم ريم اشرفلي
بنان : ريم تخربطت ودها فهد للمستشفئ
ريم : صدكك
بنان : اي والله تخربطت
ياسر : ليشش شبيها
بنان : راسها يوجعها وتخربطت
ياسر : خلي اروحلهم لعد
بنان : ميحتاج فهد هناك يكول هسه منطول
ياسر : تمام
______________________________
ريم
وصلنه للمستشفئ شدولي مغذي الدكتور يكول عدها فقر دم حاد وتعبانه فلهذا كاعد فهد يمي نتظر مغذي بخلص حتئ نروح
فهد : كعدي حروح اجيب الدوه واجي
ريم : تمام
ديطلع وجان المح ذاك الشخص واكف يم فهد
مؤمل : هاا شو هنا خيرك
فهد : لا بس ريم تخربطت وجبتها
مؤمل : تخربطت ليش شبيها
فهد : طلع عدها فقر دم
مؤمل : وهسه شلونها
فهد : زينه انت شعندك
مؤمل : والله امي السكر ارتفع عدها فجبتها
فهد : سلامتها متشوف شر ان شاء الله
مؤمل : الله يسلمك
فهد : بس حروح اجيب هل دوه الريم واجي
مؤمل : اي هياتني واكف هنا
فهد : ايي
ريم
راح فهد يجيب الدوه اباوع عليه فجئه اجت عيني بعينه
مؤمل : سلامتج متشوفين شر
جاوبته بتعب وعيوني مدمعه : الله يسلمك
ابتسملي "
كلتله بعيون مدمعه وكلها عتب : علخير سمعت بيك حتخطب تتهنون
اباوع عليه توتر وگال
مؤمل : بعد مو اكيد الشغله
ريم : يعني اكو امل تخطب
مؤمل : ها
ريم : معقوله مكاعد تحس بيه
مؤمل : مفتهمت ؟
ريم : احسن
مؤمل : ريم انت تحبيني
ريم رفعت عيني اله وباوعت بصدمه وگلت : شنو
مؤمل : اي واضح هذا شي انتي تحبيني وهاي حالتج لان حخطب مو
ريم : شلون عرفت
مؤمل : عيونچ تحجي
حاولت الزم دموعي بس مكدرت هزيت راسي
مؤمل : لهل درجه تحبيني ؟
سكتت مجاوبته ودموعي تنزل
باوع عليه وگال : يصير خير يابه
بهل اثناء اجه فهد جاب الدوه ومؤمل راح انتظرنه يخلص المغذي وطلعنه فهد جابلي لفه مجنت اشتهي ومالي نفس بس جبرني ورها رجعنه للبيت
وصلنه
لكينه الكل بالصاله كاعد اول مفتنه الكل طفر علينه شلونا شلون صارت وفهد يكللهم مابيها شي بس فقر دم وبقوا يتسفسرون
ياسر : ديلا كبرتوا السالفه لتخافون العار ميصير بي شي
همام : انجب ولك عوفها بيا حال هيه
فهد : ياسر خليني محترمك وضب السانك بعدين عود
ياسر : اهوو فوك مدارفع معنوياتها والله يالله
محمد : باجر مداومين لحد مصيرين زينه
ريم : بابا مابيه شي
محمد : صيري زينه وداومي عود
ريم : لا بابا والله شوفني كلشي مابية اكدر امشي وحطيت مغذي وهاي اني زينه
محمد : ماكو هيج حجي ما اخليج تداومين مو صح فهد مو زين
فهد : اي اكيد اني اللي ما اقبل اصلا
ريم : شنو هاي كلكم علية
ياسر :. اويييييييي باع اللواكه
ريم : انت انجب
همام : شوف هذا يقلد والبنية مريضه ياسر شوي اكعد راحه
ياسر : حمام انجب رجاءا عمي رجاءاااااا
جتي روان وحضنت ريم : ولج ريم شلونج هسه
واجتي بعدها مريم : والله البيت بدونج ميسوى
ريم : هاي شبيكم ترى ما متت رح تضحكوني غصب عني احجي وياهم بنان
ضحكت بنان : يلا خطيه خلي ترتاح المستشفى دوخة راس
ياسر : يلااا يا جماعه كافي كششش عاااااع
فهد : وجعع اسكت شبيك شنهي ديجي
ياسر : خاب انت منو يمك
فهد : لتخليني اجيك اطيح حضك
ياسر : هو اني شكلت تهي بهي
زوزو : ولكممم اسكتوا شهل صوت دخيلك ربي مسلسلي نصها فاتتت
همام : لتخافين متفوتج وتنعاد باجر هم الصبح بس ريم مريضه
زوزو : هسه ريمه تصير زينها وتكوم جنها الغزال .. بعدين هي كالت اني زينه بعد شكو لتخلوني اقسم خل اشوف المسلسل
همام : شوفي شوفي ديربالج لتروح عليج ثانيه
زوزو : انت يالمعقد بس لو تسكت اني بخير مو تجي تخرط براسي خل اشووووف
ريم
كعدنه شويه ورها كل واحد راح الغرفته لف راسه ونام
______________________________
روان
كعدت الصبح بدلت اليوم ماكو ويايه ريم لكيتها نايمه هيه ورزان شعليهن نايمات بسابع نومه واني الي حداوم
صبحت علئ وجهه استاذ ياسر بس اشو اليوم حسيته ضايج مو مثل كل مره يشاقه ويضحك
المهم داومت اعتيادي صبحت كالعاده بوجهه ست فاديه وسجئ ومروة مشفتهن مداومات وحتئ ولا وحده من المعلمات حجن ويايه بشي بخصوص عركة البارحة مرت الدروس طبيعي لحد الدرس الرابع
اجت المعاونه صاحت اسمي كالت اجه ولي امرج
بقيت صافنه كلت منو الي جاي ياخذني كمت رحت وياها للآداره وچان الكه احقر انسان" فراس " اباوع عليه اشوفه يباوعلي ويبتسم بخبث
المديره : ماما هذا اخوج يريد ياخذج
منكن چان غباء مني بذيج اللحظه لما كلتلي المديره تروحين وياه وقبلت بس ردت اروح حتئ بلكي اجر منه حجي عن جمال
طلعنه وفراس لزمني مني ايدي يعت بيها دفعته
روان : شبيك ايدي وخر لتلزمني
فراس : كلمه ما اسمع منچ تعاي ..
نهاية البارت
يتبع ..
(لاتنسوا التصويت)
إن شاء الله يعجبكم البارت طركاعاتي ♡ .
إلى اللقاء يا أعز العابرين في قلبي ♡.
7.nldn حسابنا الانستا
الكاتبات دينا & نور
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!