رواية نقطة لقاء الفصل الرابع 4 - بقلم الكاتبة دينا _ الكاتبة نور

بنان

جنت ابجي من خوفتي بس لازم ميطلع صوت
شفته كسر الباب الخارجي بقت على هاي الباب هاذهوه اكيد اني انتهيت

يربي ساعدني شسوي هسه بروحي
دموعي تنزل بهدوء وصافنه .. الضابط فهد شوكت يجي هو كال اني قريب وينه

انكسر الباب الداخلي وشفت هو ملثم بس اني جنت خاتله بمكان صغير حيل بحيث اختنكت ومستحيل حيشوفني

حطيت ايدي على حلكي واني ارجف وابجي لزمت تلفون دزيتله رساله

" تأخرت حيل "

يعني شافها seen صارت
ماحس غير صوت كسر مزهريه وعيطه
فهد : بناااااان وينججج

طلعت واني ابجي من خوفتي حضنته بدون وعي شوي وخرت

بنان : وينك ليش تأخرت هو جان كتلني
حسيته شوي ابتعد عندي وكال

فهد : لتخافين كافي اني هنا جيت
بنان : درت وجهي شفت الحرامي بالكاع سابح بدمه
شهكت والمنظر جان يخوف اني اخاف من هاي المناظر وهذا واكع والكاع كلها دم

بنان : هذا شنو انت كتلته

فهد : كتلته بالمزهريه اول شي حتى يطول يلا يكعد وحتى مراح يتأذى ويضل صاحي حتى ناخذه للمركز وهسه خابرت صديقي حيجي وياه كم واحد تمام
بنان

ضليت اباوع عليه واني مصدومه ما تحرك نظري اول مرة اشوف هيج شي كدامي حسيت الهوا اختفى من يمي الا هالشي ماريده يصير الوقت غلط ياربي ضليت اجر النفس بصعوبه وتجيني شهكات مو طبيعيه حسيت راح تطلع روحي وعيوني دمعت .. صارت الدنيا سوده بوجهي ومحسيت بعدها على اي شيء

فهد

الي جان صادم أكثر انوا هي ماعرف شصار بيها اختنكت وصار وجها ازرك وكعت بين أيدي تحاول تأخذ هوا بس متكدر ضليت أصيح بأسمها واضرب ضربات خفيفه على وجهها احسها مو واعيه مو يمي جبت مي ورشيت عليها نفس الشي اخر شي مكدرت لازم اخذها للمستشفى لان فقدت وعيها

شلتها بين أيدي وركضت للسياره .. سقت السياره بسرعه حتى الحك اوصل .. اني وعدت امها ميصير بيها شي لازم هي تصير قويه

.....................................

ريم

ورا العزيمه صفى البيت وما ضل احد وحتى فهد جان طالع يوصل " مؤمل " وضليت اني وحدي اخر شي ضجت ورحت اكل من كيك العزيمه وشربت عصير وفضيتها ورحت نمت ..

....................................
كاعد كبالها على واحد من الكراسي الموجوده بالردهه
جانت نايمه وحاطيلها اوكسجين

شكلها بريء .. جانت لابسه حجاب بس شعرها المفتوح طالع منه
جانت الدكتوره تشدلها المغذي واخر شي من دتطلع كلتلها

فهد : دكتوره بلا زحمه شبيها وليش هيج صارت ؟

الدكتوره : معقوله متعرف.. البنيه بيها قلب أقل موقف ممكن يأدي للوفاة .. حالتها جداً حرجه واتمنى تكونون لطيفين وياها اي شي يبذل مجهود الها ويتعبها راح تكون نتائجه مُضِرة للقلب .. هي مو بَس بيها قلب عدها فتحه بالقلب

فهد : ها ؟ بيها قلب ؟

الدكتوره : نعم .. اني راح اكتب مجموعة علاجات تكدر تخفف من هاي الأعراض بس مراح تكدر تغير من حالتها هواي

فهد : خوش

الدكتوره : انت زوجها ؟

فهد باوع بتردد : ا .. اي زوجتي

الدكتوره : تمام هذي وصفة العلاج

مسح جبينه وكال : تمام .. شوكت تكعد وشوكت نطلع

الدكتوره : ليش مستعجل .. هي هالربع ساعه تكعد لانو تبدي مفعول الابره الي بالمغذي ومن تكعد نكدر نشوف حالتها يلا نحدد تطلع او لا

طلع فهد وراح حتى يجيب العلاجات اللي سجلتهن الدكتوره و بنان لحد الان بدت شوي شوي تصحى

@@@@@@

ياسر

بويه شجاني تخبلت شو هاي مدتروح من بالي .. عيونهاا العسلي حركتني حرك .. لو كفشتها .. شوف ياسر انت لتجذب على روحك هي عجبتك ودخلت مزاجك .. اييي اصلا حتى هي احسها مو مثل البنات بس تجنن تفاصيل وجها حتى اسلوبها .. ياسرر تحجي صدك وينك وين الحب .. عفت الكليه جيت على المدرسهه.. شنسوي بعد القلب وما يهوى .. اصلا اني حلو غصبا عليها هي راح تحبني تحبني

@@@@

بنان : شنو شصاير وين اني

فهد : تخربطتي بالبيت وجبتج للمستشفى

سكتت ومحجيت شي جنت تعبانه كلش حتى عيوني بالكوه افتحهن

سأل فهد : ليش مكلتيلي ؟

بنان : نسيت

فهد : هيج موضوع مستحيل ينسي

بنان : ينسي هذا موضوع بسيط كدام الديصير

فهد : مو بسيط .. المفروض تكوليلي ليش ضميتي عليه هذا موضوع حساس جان المفروض اجيبلج علاج معين لو شي مثلا لو هسه صار بيج شي اني شسوي .. اقصد شراح اكول لأمج وهي موصيتني عليج

بديت ابجي وكلت بقهر : نسيت شلون الواحد مينسى ترى الي صار وياي مو قليل تمام لتجي وتذب اللوم عليه

فهد : لتعلين صوتجج

بنان : مااا معليته

فهد : بنااان

بنان : نعمم

فهد : شليتيني شل

كال كلماته الاخيره وطلع بسرعه من الغرفه شفت عالميز بصفي اكو علاكة علاجات ومن ضمنها حبوب مرسوم عليها قلب ..

عرفت جان طالع وجايبلي ادويه .. صار يتصدق عليه يربي وين جنت اني وهسه وين صرت مستحيل اقبل يجيبلي علاج ومبين غالي دائما علاج هيج امراض يكون غالي

@@@

حسن : تأخرتي بيت اهلج

مريم : وين تأخرت هو يوم واحد وخبصتني تعاي وتعاي

حسن : منكدر على فراكك

مريم : اييي حتى امي وابويه مشبعت منهم مثل المخبله جيت منا رحت منا

حسن : تمام وعد اوديج 3 ايام يمهم
ط
مريم : لا والله سويت فضل ؟ اصلا اروح اسبوع

حسن : هم تمام واصلا اني رجعتج يعني علمود العزيمه وانتِ ماكو وامي وريم ميكدرون وحدهم وهواي ناس جانوا جايين

مريم : ياااا وبالنهايه جينه متأخرين .. شوف الحظ

حسن : اي هاذهوه

مريم : عزه فرح وينها

حسن : شبيج انخرعتي يم ياسر

هسه خل نبقى وحدنا لو متكدرين الا فرح يمج

مريم : اي وين اكدر بدونها

@@@

بنان

دخل عليه الضابط فهد وكال

فهد : الدكتوره تكول اذا تحس نفسها زينه تكدر تطلع وترجع للبيت

بنان : اي عادي اني بخير .. يلا نطلع مدام خلص المغذي

فهد : متأكده ؟

بنان : داجذب عليك قابل اكيد متأكده

فهد : لسانج طولان بالنهايه لتنسين كدامج ضابط

ابتسمت بنان وكالت : ليش هو اني شكلت عادي كلامي

كلبت وجها وكالت : عندي موضوع وياك سيادة الضابط

ابتسم فهد وكال : ترى اتشاقه وياج عمي خما عبالج صدك .. غردي شنو موضوعج ست بنان

بنان : العلاج .. تكدر ترجعه للصيدليه

فهد : ليش شنو السبب ؟؟

بنان : اني ما اكدر أخذ علاج من شخص مصارلي اعرفه 3 ايام هواي الي سويته وجبتلي جهاز .. مو كافي ؟

فهد : اول شي اللي سويته اي شخص بمكاني راح يسوي .. اني ماريدج تتحسسين من اسوي هاي الاشياء ولا تضوجين تمام ويلا كافي خل نطلع وهذا علاجج وياج ياويلج اذا اعرف مماخذته
ترا اني فهدد مو حي الله

بنان : واني بنااان

فهد : تفضلي عيني ست بنان

بنان : اااا .. العفو بس هم راح نرجع للبيت

فهد : اكيد

حجيت بأرتباك: الدم وهذاك الحرامي هم بعدهم ؟

ضحك بوجهي وكال : لا عمي خابرت صاحبي واجه وياه كم واحد القوا القبض عليه وهسه ديحققون وياه ولتخافين البيت من نرجع اني انضفه انتِ عليج الصافي لا نروح نرجع وترجعين تتخربطين عليه

ابتسمت ودرت وجهي .. حسيته بده يذب ميانه وياي أو ينسيني ماعرف بس هذا الانسان غريب ساعه شخصيه حاده وفارضه نفسها .. ساعه يضحك مو مهتم لأي شي

الله يهدي

@@@

ياسر

تعاي تعاي نزلت لعبه حلوه بتلفوني مال بزونات نلعبها

فرح : ايييي اني عب العاب ( احب )

همام : خبلت البنيه مخبلللل انت بعدها صغيره مو زين شاشات على عيونها وامها متقبل

ياسر : يابه دروح واذا تعاي عمي تعاي فروحتي
لزمت تلفون فرح وصلت تلعب بي

صفن ياسر

همام : ها ياسر بشر وين توصلت

ياسر : بكيفي وين ماريد اتوصل أتوصل لو حتى بأحلامي لاحكني

همام : تخيل بعد چبدي تخيل .. بس لا تحب

ياسر : يعني مااااا ضل واحد مكال انت تحب

شسالفتكم بالله وياي .. يجوز عندي هموم .. يجوز متعارك

همام بضحكه : متعارك ويه الحب

ضحك ياسر : الحب .. اني وين وانتَ وين هماممممم خير بروحك

يلا عيني فروحه مشطي للبزونه

@@@

بنان

كاعده عالقنفه اشوفه يمسح بالكاع يعني متحملت كله هو مبتلي بية

بنان : خل اكوم اساعدك

فهد : ابد اني كلت انظف هاذهوه

بنان : بس ميصير انت اليوم تعبت وياي حيل من البارحه اليوم انت وياي يوم كامل اكيد هسه اهلك ضل بالهم ميصير هيج

فهد : اول شي عادي اهلي كلتلهم عندي شغل واني اصلا ضابط ميكدرون يكولولي ابقى لان هذا شغلي وانتِ انتي ما أكدر اعوفج وانتِ بهيج حاله ورجاءا يعني كافي تفكرين

بنان : خاف يجي حرامي ثاني

ضحك علية : انتِ شلون بيج اني .. اشوف اليجي شلون بالله اكسر رجله وثاني شي احتمال ابقى يمج بالليل

بنان : وشغلك

فهد : اني شغلي مو ليلي وعادي بهيج حاله ماكدر اعوفج وحدج خاف تتخربطين كلشي يصير ماعندي ثقه اني ف افضل ابقى

باوعتله صفح : حتبقى اليوم ؟

هز رأسه : اي ابقى والصبح اروح للشغل وبهيج نتواصل من التلفون اني منزل بي بس واتساب يعني انتي بعد براحتج هو تليفونج

بنان : افضالك صارت هواي علية وتعبتك وياي حيل
فهد : ابد .. سبق وكتلج انتِ امانتي وبركبتي ارجعج لأمج صدكيني بس اصبري لهاي الفتره

بنان : أن شاء الله

@@@@

ياسر : اكلك هاي فرح نامت يمي

همام : اي نامت غير انت وهاي اللعبه مالتك لهتها يجوز امها تريدها وديها

ياسر : يي هو حوديها

همام : اكلك ضوجهه

ياسر : لو فهد هنا جان لعبنا عليه وتلهينا

همام : يلهيك براجدي بدفره بوكس على خشمك انت تحب احد يضربك

ياسر : انجب لك مو هيج قصدي اني يعني من اشوفه يتنرفز مثلا من اركص واعلك اغاني هيج افتهمت يا غبي

همام : هااااا اييي ايي ودي البنيه يمعوددددد اريد انام هنه جربايتين وكاعدين وساكتين

ياسر : شسالفتك يمه فديتج فروحتي تعاي بعد عنج نروح يم ماما

@@@@@

بنان

دك تلفون هذا الضابط الغريب الاطوار فتح خط
فهد : الو .. ها اي هلو .. تمام زين .. خير مما اكو شي .. لعد من رخصتج اني عندي شغل ومو فاضي لأي أحد حالياً

.. في امان الله

داريد اكوم اشرب مي صاح علية

فهد : خير وين ؟

بنان : شلووون ما اشرب مي

فهد : لا مو هيج قصدي عبالي تردين تشتغلين

بنان : ترى والله عادي ليش انت هيج مكبر الموضوع اني جنت هناك يم اهلي كلشي اسوي وعادي يعني

فهد : يمي ماكو شي اسمه شغل لتنسين انتِ بأمانتي

بنان : والله ما نسيت دتحسسني اني معوقه

فهد : شنو هالحجي

بنان : اي والله يعني داحس روحي معوقه اي شي اريد اسوي متقبل خل اشرب مي احسن

ابتسملي ورجع نزل رأسه يلعب بتلفونه وممهتم

من رجعت كال : تردين تنامين هنا لو بالغرفه

بنان : عادي بأي مكان

فهد : اني حبقى هنا يعني بما انوا قريب من الطرمه وهيج ولتخافين والاحسن الج حتى تاخذين راحتج نامي بالغرفه

بنان : تمام .. محتاج شي ؟

فهد : ابد سلامتج

بنان : خاف جوعان

فهد : تردين تشتغلين ها

بنان : لا مو اشتغل بس يعني اكل البرا احسه ميشبع ف اذا تريد فد شي اني موجوده .. يلا اني رايحه تصبح على خير

فهد : وأنتِ من اهلوا

حجى بكلبه ورا مراحت : شليتيني شل وربي

ثاني يوم الصبح

فهد راح لشغله وضلت بنان بالبيت

@@@@

رحاب : لج ريم كومي كعدي كافي نوم ادري شنو انتِ متشبعين نوم

ريم تغطي راسهاا : يمه عوفيني عفيه اريد انام البارحه منمت بالليل

رحاب : شلون بيج اني

ريم : يمه عوفينييييي اررررريدددد انااااام

رحاب : ضلي اني كعدتج بعد معليه

ريم

ورا ما كعدتني امي مضلت نومه حتى طارت ضليت اتكلب اريد انام ماكدر اخر شي طلعت تلفوني وكعدت العب بي اليوم جمعه وضوجه حيل مداعرف شسوي احسن شي اكعد اقرا وحتى بالليل اخلص معندي شي

@@@

ياسر : شنو رأيكم اليوم اعزم الجميع بالمطعم عالعشا وعلى حسابي

همام : هو انت حافي شنو على حسابك منين حتجيب الفلوس

ياسر غمز لابوه : منك والنعم

محمد : ادري هي على حسابي اصلا من زمان

فرح : انييي هم اليد اسي وياتم ( اني هم اريد اجي وياكم )

حسن : اي بس من هسه شوف لك ياسر مو مدري وين توديها وين تجيبها اخر شي نتيهك ونتيه بنتنا

مريم : اي هذيج المره بمدينة الالعاب راح مدري وين وداها للدوده مدري القطار وضاعوا واحد يدور عالثاني

ياسر : اهووو لتفتحون دفاتر عتكيه فروحه يمي من هسه

حسن : خوشش

همام : لعد بيا مطعم

ياسر : بمطعم **

همام : اضرببب بويه انقطيت

محمد : من زمان ويه ياسر ماكو شي مستحيل اوفف منك مفصول من الكليه وجاي تطربك على راسي اني باجر اروح واحاجي العميد وأشوف شلون تضل دايح
فتح ياسر تلفونه بدون اهتمام

سمعوا صوت زوزو تعيط بالغرفه مالتها والكل راح يركض

ياسر : عزهه زوزو شكو

مريم : تكول اكو فاره بالغرفه

زوزو : اي اي والله اني شفت فاره منا لكم طلعووووني وين منيميني بمخزن ولج رحااااااب
جتي رحاب تركض وطلعتها هي ومريم و زوزو تعد وتصف تخاف من الفار والبريعصي والصراصر حيل

نزلت ريم من فوك تركض هي وشعرها مكفش وحالتها حاله : عزه يمه شصاير كولو شكووو

همام : فارة بغرفة زوزو

ريم : وينها زوزو حروحلها وكفت كلبي

كال ياسر وهو يتأفأف : راحت هسه وين نلكاها فارة زوزو

همام : هم صدك وين نلكاها بعد اكيد طلعت

حسن : عبالي صار شي زوزو وسوالفهااا

فرح : عاتي اني ما اكاف من الفالات اسلا اني اتلهُم ( عادي اني ما اخاف من الفارات اصلا اني اكتلهم )

حسن : تعاي بابا نروح ناكل احسن من هاي الافلام الكوميديه

محمد وهو حاط ايده ع كلبه : والله امي عليها سوالف

ياسر باوعلهم وطكها بضحكه : دباعو شكولاتكم عبالك مدري شصاير شني سلامات اللهه بالخيررر شبيكم يمعودين فاره سوت عدكم صدمه دمشوا يابه امشوا اصلا زوزو كالت ذيج المره جيبولي فراش بعد انام بالهول احسن من غرفتي كلها فار وصراصر

محمد : امشي لك كاعد تتمضحك علينه .. امشي كدامي اني اعلمك الا اروح للعميد ولا اخليك بهاي الحاله تتمضحك وراك طن محاظرات

ياسر : اوففف هم رجعناا

...................................

روان حاطه ايدها ع راسها بتفكير : تعتقدين وين هسه بنان

رزان : وين مادري اكيد بيت هذاك الضابط

روان : يجوز ضايج منها وهيج على اعصابه خالها يمه

رزان : احسه شخصيه ورزن .. احس اسمه هيبه

روان : شو انجبي واذا تلكي هسه شابعها ضرب وذالها ذل مي حتى مينطيها .. كلشي توقعي

رزان : لا شبيج تفائلي .. الله تخيلي يحبون بعض

روان ضربت رزان بالكتاب : الله باااااع الخيال الواسع من صدك الله على عقلج هذا مال هسه اطلعه ابوسه وارجعه

رزان : دباع البومه اليمي شبيج بابا تفائلييي

روان : ياريت مثل ما تتخيلين

رزان : اقري اقري ست نهاد حتموتنا اذا ممحظرينننن

روان : اقري اقري انتِ اني حاطه عقلي وياها ما اقره يعني ما اقره وشتسوي ختسوي مو بحالها كلش

@@@@
ريم

كل شي صعب بس الا الحب ...
الي يحب يشوف بحبيبه الحياة
اني اصلا مداعرف بنفسي ليش وشلون حبيت مؤمل
مجرد عزايم بسيطه بس أثرت بيه هواي مجرد شوفه لوجه كلبي يدك سريع من اشوفه الدموع تجمع بعيني

اختل بغرفتي فوك واشوفه من شباكي حتى المحه شوي

صعب كلش صعب هالشعور .. بالذات اذا من طرف
حالياً اني مركزه على دراستي اغلب وقتي كله دراسه بس ميروح من بالي وكأنما شبح يرافقني بأي مكان ومهما صار

ياسر كال راح اعزمكم خل اشوف عزيمته هاي شلون حتصير بهيج حاله بس عائلتنه حتسد المطعم بس شنسوي اهمشي الونسه ومدام بيت حسن ويانه حنتونس ويه فروحه بس هاي عدنا زوزو شلون نأخذها مادري

@@@

طب فراس للبيت وكله ريحه وغايب عن البيت صار يومين

طلعت الهام بوجها : لك انت وينك صارلك يومين هاا

دفع ايد امه وكال : وخري يوم مو وكتج وخريي

الهام : لك شنو مو وكتي اني امك شبيك تخبلت
طلعن روان ورزان

روان : خير خير

فراس : انتن لتدخلن ولن يلااا

روان : تعال لك اشوف شلون ترفع صوتك على امي

فراس : مصدكه نفسج حيل .. لتنسين هاي مو امج خوش انتن جابوكم من الشااااارع

الهام : انجب لك شنو هذا الحجي

فراس : مو هذا الصدك مووو هااااي الحقيقه هنه تاليهن بالشارع مثل ما جبناهن

الهام : فراس تجاوزت حدودك

فراس : يا حدود هاي ههههه

دفعته روان وكالت : مو بكيفك تلفي وتطرد خوش

ضربها فراس راجدي : انجبي لج ولي من خلقتي احسن

روان : واذا ما اولي شراح تسوي ها ؟

فراس : تشوفين شي ميعجبج ..يلا عيني انتي رزان أخذي احتج وروحن طبن يلااا

دفعته روان وحجت بحركة : انجب لك دتضحك علينا انت حقير وجلب

دفعها من أيدها قوي ورجعها ليورا : تردين أجيب جمال

الهام تبجي : لك يمه عوفهن دخيلك ربي بيتي انهجم
روان : جيبه جيبه

فراس : حالكم بالنهايه مثل حال بنان لا وحده تندك وياي خوش وهاي اني حذرت

روان : شنو تحذر هو انت منو يا جلب نذللل انت واحد حرام بيك لكمة وكلشي حرام عليك

فراس : يااااابه .. يااااابه

طلع جمال جان نايم بالغرفه: اني شلون بيجن ماااا تعرفن تسكتن

فراس : يابه شوفلك حل ويه هذني

روان : انجب لك حقير

رزان كامت تبجي وتسحب روان بس روان مُصِره
اخر شي جمال ما تحمل لسان روان وتعصب وهو عنده كلشي ولا فراس ابنه وضل يصيح على روان و ضربها علئ حلگها

رزان

ماشوف غير دم صار ينزل من حلكها من قوه الضربة عضت على لسانها

وضربها وضل يضرب بيها لحد مصار وجهها كله ينزف وهي مستمره مقاومه وتضل تدفع وتحجي وتعيط وهي كل ما تعيط هو يزيد اخر شي بالغلط لوا أيدها وطكها فهي متحملت عاطت

عيطتها زرفت كلبي ضليت ابجي رحالها وهي هم متحملت بجت شكد تكابر ومتنزل دمعه بس مبجت على أحد هي بجت من الوجع

فراس راح صعد وهو جمال عاف كلشي وطلع

راحت الهام تبجي : امشي رزان نروح نوديها للمستوصف ونشوف شبيها يمه اسم الله

رحت كبل ويه امي واخذنا روان كال الدكتور اريد اشعه وهم اخذناها وهي تلوب من الوجع سوينه الها اشعه طلع عدها كسر ورحنه هم چبسناها الها ورجعنه

جانت شويه حالتها تثير الشكوك وجها بيه لاصق جروح من يم الحاجب وشوي زراك من الضرب والباقي داويناه واخر شي جبنه مسكنات للوجع ورجعنا هم ماكو احد بالبيت خطيه راحت كبل راحت كبل نامت

ضليت اباوع عليها بجيت على حالنا ما بيدنا شي نسوي
وامي هم متكدر تسوي شي تحت حكم جمال

................................

بالليل ساعه 8

ياسر : يلاا عيني جاهزين
وين بعد همام

نزل همام من درج يلبس ساعته : جيت جيت

حسن : منو حيسوق

ياسر : شوفو عيني خل نقسم

اني راح اسوق السياره وأخذ وياي همام الحبيب وريم ومريم وفرح

مريم : لعد ما دام هيج خلي اروح ويه عمتي و زوزو

زوزو صارت عصبيه : لج شني زوزو الا اجوزكم من هذا الاسم كمل عيني ياسر

ياسر : اي واخلي فروحه يم ريم

فرح كالت لريم : هييي حتي وياج ( حجي وياج)

ياسر هسه اني سيارتي بيها ريم وهمام وفرح ومريم تريد تروح هناك لعد يابه تجي وياي نونسك الا نركصك نرجعك شباب هم وغمزله

محمد : صاير صلف بس ماكدر ميكفي هناك راح اجي وياكم

حسن : اني راح اسوق السياره الثانيه وراح أخذ وياي زوزو وامي ومريم هاهيه اتفقنا

راحوا ركبوا السيارت وراحوا للمطعم

سيارة ياسر عالك اغاني وكاعد يركص وسياقته مو قانونيه وسريعه وهمام المعقد هم كذلك على واهس ياسر يركص وريم تصور سنابات و فرح كاعده يم جدها

فرح : جدو اني احبك ( جدو اني احبك )

محمد : واني هم احبج كومه .. شتردين تاكلين

فرح : بيتسا (بيتزا)

محمد : لا نجيب كباب طيب

فرح : عاتي اني عب كلشي ( عادي اني احب كلشي )

.............................

زوزو : اي ولكم اني ليش ما رحت يم ياسر يونسني شنو هاي هنا عبالك كاعدين بفاتحه

حسن عالك قرآن

حسن : اي زوزو غير نريد نطب الجنه

زوزو : تهي بهي والله اني اشك انتَ راح تطب للجنه
حسن : استغفر الله زوزو بيش طالبتنه

مريم تحجي بصوت ناصي : ههههه تحب تسمع اغاني

حسن يقلد : لا استغفر الله شنو اغاني اسمعوا قرآن اسمعواا

رحاب بالكوه لازمه نفسها لتضحك عالوضع الصاير
و زوزو ضاجت حيل تريد بس تاكل وجاعت

@@@

وصلوا للمطعم والكل نزل

هم انقسموا والمكان ميكفي فراحوا مطعم عائلي هو جبير

وطبكوا طاولات اثنين يلا كفتهم كلهم

طلبوا عشا وكعدت زوزو تباوع
جاب الكرسون المقبلات بالبدايه هي انطلقت تاكل ورا ما خلصتهن كالت : شو مدا تاكلون دكلوا شبيكم صافنين

ياسر : زوزو بعده مجاي العشا

زوزو : عزااا لعد هاي شنو دا اكل اني

همام : دتاكلين مقبلات

زوزو : هاي شني مقلبات بس والله طيبه

ضحك ياسر : اكيد طيبه حجيه جايبج بمطعم خمس نجوم قطينه الوالد حتى نطلع

حسن : بس ناقص فهد حرامات

همام : خابرته كتله تعال كال لا عندي شغل

محمد : اي حتى اني خابرته وكال عندي شغل

ياسر يهمس لابوه : بويه شوف نعمة الله مطشرة شبيك لازك على امي

محمد : رايدلك تربيه من جد وجديد اني شمخلف ولد لو سرسرية

فرح : وينه فهد ليس ماهوا

مريم : عمو فهد عنده شغل

فرح : ليس عنده شغل

مريم : لان عنده شغل

طكها بضحكه ياسر : هذا هم تعبير فروحه عمو فهد عنده هواي شغل والمدير يكتله اذا يجي ف هو باجر راح يجينه خوش

فرح : ايي هيييي

همام : ريم كضيتي العشا كله تصوير د اكلي حتى الكباب اجه

ريم : شبيك بابا خل اصور ستوريات الله ممصدكه اني بمطعم حالياً

همام : بويه بيج شي ياهو الاهم تصوير لو الاكل

ريم : بالنسبه الي التصوير

همام : خباااال

ريم : انجب ماريد اتعارك بالمطعم اريد تكون عندي قيافه

همام : قيافه بالتلفون ؟ اكلي الله يحفظج

ريم : هماااام عوفنيي

حسن : ها حياتي

مريم : ها عمري

حسن : شلون الاكل

مريم : زين اكيد طيب

حسن : مو اطيب من اكلج

مريم : جتك الرومانسيه بالمطعم

حسن : بكيفي مرتي وشوكت ما اتغزل براحتي

مريم : عيب صوتك نصي ليسمع ياسر ويلزمها علينه جنه زوزو النسخه الثانيه

حسن : اي اي يلا حبي اكلي

مريم : دا اكل عيوني

وراها خلصوا اكل ودفع ياسر الفلوس ورجعوا للبيت

...............................................

بالمدرسه

ريم : سلامتج يا عمري
روان : يبعدي

ريم : شلون هيج صار بيج وجهج اصفر مو روان

روان : والله هذا الجرح بكصتي تعاركت اني والخبله رزان وخرمشتني وطلع دم وأيدي يوم الخميس

وكعت عليها من الدرج شسوي هاذهوه بس ماعرف شلون راح اكتب

ريم : اي لعد أخذي اجازه مرضيه اسبوع

روان : الچبس مينشال لمدة شهر ولازم اضل كاعده شهر وتروح كل الامتحانات عليه

رزان : يعني هو انتي اذا تمتحنين قابل حتجاوبين أجليه وخل تحسب درجة الشهر الاول لان حالتج موزينه وايدج مدتشوفين

روان : تمام حروح عود أحاجي المديره بنهاية الدوام

@@@@@@@@@
ياسر

بدلتت وتعطرت وعدلت شعري الجميل

لك فديتك ياسر شكد حلو انت قاهر النساء هاي ام كفشه متحبك بسيطه والله يلا هسه ساعه 11 ونص ننتظر لل 12 شكو علينه

رحاب : ولك يااااااسر تعال جيبلي خبز اليوم مسويه دولمه

ياسر : هاك ياسر استلم راحت الكشخه

يمههههه اني رايح اجيب ريم من ارجع اجيب خبز وياي

رحاب : خوش

@@@@

روان حاجت المديره وقبلت وانطتها ورقة اجازه وكلشي تمام

بالحلة كالعاده ريم وروان يطلعون بالبدايه وينتظرون رزان تطلع بالاخير
دنطلع واجتي مروة انطخت بروان عود بالغلط

روان : علكيفجج شبيج مدتشوفين

مروة : اوووي يا عيني هاي ليش هيج ايدج والله قهرتيني

روان تجاهلتها وريم ردت : مو شغلج يلا حبيبتي هذيج سجى شوفيها مصموطه بالشمس تنتظرج فوك النص ساعه روحيلها جيتي مكان خطأ

مروة شاورت روان بدون متنتبه ريم

مروة : ههههه هاي ايدج الضربتيني بيها شوفي شلون انكسرت هاي حوبتي

روان اندارت : قدر مو معناه حوبه تمام يلا ولي من خلقتي ترا روحي طالعه ومنايمه ادور انتي عليه

راحت مروة تضحك يم سجى ويتهامسون

اجه ياسر بالسياره ودك هورن تعرفه ريم
ريم : روان اجه ياسر لتروحين بس حروح اكله ابقى يم روان بين متطلع اختها

هزت راسها بقبول

ريم دكت جامة ياسر : نزل جامتك

نزل جامه وكال : يلا صعدي حجيه

ريم : ماكدر اريد ابقى يم روان بين متطلع رزان تمام هسه دقائق حباب

ياسر : هي وينها ؟

ريم : هذيج عليك الله بس شوي ابقى مو هواي

ياسر : ليش هيج شبيها أيدها ليش هيج وجهها

ريم : تكول واكعه وأيدي مكسوره

ياسر : اذا هي جنها سلاحف النينجا من تتعارك تلكيها متعاركه بالبيت وهيج صايره

ريم : دوخر حجيت هواي ضيعت وقتي

ياسر : هو ياهو يوخر اني لو انتي ..

طلعت رزان وراحت على روان

رزان : خما تأخرت هاي ام الفيزيا تضل تشرح كومه متخلي لا مسأله ولا شرح وحتى دخت ومنا حاره
ريم : اي اعرفها بآخر درس فوكاها يمههه

رزان : اي يلا شنسوي يلا ريم حبيبتي احنه حنروح ولزمت روان وراحوا وريم راحت صعدت بسيارة ياسر

ياسر : ها تأخرتي

ريم : رجاءا مابية حيل احجي ومنا حاره

ياسر : هذا تبريد يلا

ريم : شلون انقهرت

ياسر : خير ليش

ريم : روان اخذت اجازه شهر مدري نص شهر مادري هي اجازه مرضيه لحد ما تشيل چبس ايدها

ياسر : چبس ليز

ريم : انجب لتقلد

ياسر : اي كملي

ريم : اي وبعد متجي ومادري شلون راح اضل وحدي هالفتره

ياسر : اختها يمج

ريم : لا روان وياي من زمان رزان عدها صديقات
ياسر : اي تمام

ومن بعدها ساد الهدوء بالسياره لحد ما رجعوا للبيت وياسر اكيد جاب خبز بما انوا دولمه

@@@@@

زوزو : ها ولج فرحه تعاي داحجي وياج

فرح : بيبي تي ليس سعلج ابيص ( بيبي انتي ليش شعرج ابيض )

زوزو : لان حجيه

فرح : اليد يسيل سعلي متل سعلج ( اريد يصير شعري مثل شعرج )

زوزو : لا خلي شلون حلو شعرج صغيروني وكصير وشكد حلو

فرح : اي خلي هيس ( هيج )

مريم : تعاي ماما فرح هاي ليش ما ماكله

فرح : ماما ماليد ( ماريد )

مريم : شلون بيج اني ليش هيج مدا تاكلين

فرح : اليد ياسر يدي حتى اكل ويا

رحاب : ولج ياسر ميجي هسه طالع يم اصدقائه روحي يم ريم فوك دتاكل بغرفتها

صعدت فرح يم ريم فوك

ريم

جنت كاعده بالغرفه سمعت دكات عالباب متقطعه .. عرفتها هاي فرح صحت تعايي فوتيي
فاتت وكالت

فرح : مممم عمه ليمه

ريم : مممم شكووو عيوني كولي كولي

فرح : مممم .. اليد حلوياتتت

ضحكت ريم وكالت : يبوي عرفتج شرايده علمودهن سمعت ما تغديتي

فرح : يلا يلا انطينياهن حتى اتلهن هناا عمود ميسوفني بابا

اتلهن .. اكلهم ، ميسوفني .. ميشوفني

ريم : ليش عيني ميشوفج بابا

فرح : مو ميتبل اتل حلويات يكول اسناني توسوس

ريم : تتسوس صح كلام بابا بس تعاي خل ناكل اني وياج شكو بيهاا هي شويه

فرح : ايييييي اريدددد

@@@@@

الهام : خما ايدج دتوجعج هواي

روان : هي مكسوره اكيد تأذي

رزان : يمه هي منايمه من الوجع اصلا

الهام : والله مادري شكول على جمال اوف والله تعبني وتعبت ويا

روان : جان غلطج

الهام : غلطي ؟

روان : اي انتِ جبتينا يمج وتعاركتي ويا علمودنه .. لو رايحين ميتم يمكن احسن من هاي العيشه كلها ذل ب ذل

الهام : هو هذا هم حظي .. اني ممتندمه لان اخذتكم ابد

متندمه لان تزوجت واحد مثل جمال وعندي ابن مثل فراس

لو بنان ولد جان صارت ارجل منه .. بس بالنهايه من لحمي ودمي وطالع من بطني ومراح اكدر اسوي شي

روان : يمه بنان

الهام : شبيها

رزان : تقصد انوا مدك عليج الضابط فهد ؟

الهام : لا والله مدك .. بغير وكت اني ادك عليه

روان : اني اخذت اجازه مرضيه مدة اسبوعين علمود ايدي

حجيت ويه المدرسات وكالوا نحسبلج درجة الشهر الفائت وبعدين نشوف شلون تصفى

الهام : تمام لعد أخذي حبوبج حتى تنامين

رزان : حجيب مي واجي

روان : يمه اصلا ماكو نوم لو هسه شما اسوي ميجي نوم

....................................

فهد : حققت وياهم ؟

مؤمل : تم كلشي وتكفل بيهم حيدر

فهد : الملفات لازم تتحول للمحكمه حتى نعرف شنو مصيره

مؤمل : والله فهد هذا المتهم شوي يعني عنده أحد يكدر يطلعه لان شفت جايين وياه زلم كبار ولابسين فوك وكاشخين تتوقع هذوله ابنهم يضل بالسجن
فهد : اكيد لا هسه نشوف شراح يصير

دك تلفون فهد بأسم " بنان " كال لمؤمل

فهد : تكدر تطلع

غمز مؤمل : خيرك فهد هالايام صايره عندك خصوصيات

فهد : اطلع احسنلك

مؤمل : هو اصلا حطلع لان نقيب محسن رايدني.. مو وجه واحد يضل يمك

فهد : بس ادك عليك تعال خوش

طلع مؤمل وفتح فهد خط على بنان

بنان : مرحبا

فهد : مراحب عيوني .. ايييي شكو ماكو
بنان : ماكو

فهد : اي ليش دكيتي يا ست

بنان : مادري ماكو احد واني وحدي

فهد : بس هالفتره .. تحملي هالفتره وراها كلشي يرجع طبيعي

بنان : لعد اني جوعانه وماكو اكل بالثلاجه

فهد : اني خلص دوامي من ساعه وهسه راح ارجع واجيب اكل

بنان : تمام يلا باي

فهد : بايات

................................

زوزو كاعده تبجي ويمها رحاب تبجي و محمد دمع بس يحاول ميبجي

زوزو : شلون اذا اني بكل دقيقه تفوت اتذكرهم ما انساهم ابد

محمد : اني صارلي سنين ما ناسيهم عايشين بدماغي

رحاب تمسح دموعها : كافي سدوا الموضوع هذا يقهر ويفتح الجروح

زوزو : اوف يا رحاب اوف مينسون هذوله شلون جان عدهم بنات يخبلن آية من الجمال ..

نهاية البارت
يتبع ..

لاتنسوا التصويت

إلى اللقاء يا أعز العابرين في قلبي ♡.

الكاتبات دينا & نور