رواية نقطة لقاء الفصل التاسع عشر 19 - بقلم الكاتبة دينا _ الكاتبة نور

"‏وددت أن أعود طفلة
لأن الرُكب المخدوشة
تلتئم أسرع من القلوب
المنكسرة "

‏_______________________________

ياسر
من فتحنا باب المخزن .. جانت بمثابة صدمة الي
بس جان جرح ثاني لروان
الموقف جان اصعب منه ماكو
هي متحملت رأسا وكعت .. بدت تبچي

روان : ياسر هاي جثة امي هناا

ياسر : اصبري دقيقه هسه نتصرف

عاطت وهي تبجي : يمهههه

توترت حيل من صرختها معرفت شسوي طلعت تلفوني رأسا خابرت على فهد وسولفتله كلشي وخابرت على همام هم

كومتها وطببتها جوا بالبيت وكعدتها وجانت تبجي
بالمختصر جانت منهاره

ياسر : كافي كافي لتبجين باعي نفسج استغفر الله هسه شسوي

كامت تحجي وهي تبجي : لتسوي شي .. ياسر اني اتمنى الموت صرت شفت اشياء متنشاف .. هنا امي ماتت وهناك انحبسنا هذا البيت جان عذاب وهسه مره ثانيه شفت امي اني راح اموت مدا اتحمل كلشي وتدري شنو خل أزيدك .. كله صوجي اني ، اني كله من ورايه كلتلهم ننهزم ونروح لبيت خالتي ورحنا ولكانا هناك

حطت ايدها ع وجها وكملت : ليش اني عايشه ليش ما اموتتتت والله تعبت

بهاللحظه متحملت اشوفها بهيج حاله
هي متطيقني ولا تحجي وياي واذا تحجي وياي لازم نتعارك لو نتناكر .. حسيت انوا فضفضتلي أو حجتلي شي بداخلها بلحظتها كلبي نغزني على حالتها .. بدون وعي حضنتها وضليت اهديها ..

ياسر : كافي لتبجين .. ادري الشي صعب هذا لكن لازم تحاولين تنسين حتى لو مراح تكدرين ع الأقل تناسيه

ماعرف شكلج لأن اني ما مريت بهيج شي بس لازم تصيرين قويه صبري نفسج هذا قضاء الله وقدره ما بيدنا شي حتى نغير من الي صار بس راح ناخذ حقكم

لزمت أيدها وكلتلها " ولتنسين اني وياج "

هي ضلت تبجي واني ضليت حاير ماعرف شسوي بهيج حاله تذكرت هي جتي علمود غراض

ياسر : بسرعه جيبي الغراض اللي ترديهم الج والرزان حتى هاهيه نطلع بعد

كمت جبتلها مي لحد ما هدأت وراحت جابتهم ب جنطه

ياسر : خلصتي كلشي نروح ؟

هزت راسها ورجعت تبجي : ماعرف شلون راح انسى كلشي ما اكدر انسى امي كل ثانيه تجي كدامي اشوفها حتى بأحلامي ما اكدر انسى اي شي صارلي كل زاويه من هالبيت تذكرني بشي صار

باوعتلها بحزن ماعرف شسوي أو شكوللها .. اللي شافته مو هين وتعذبوا كلش هواي حتى ما اعرف اواسيها

ياسر : من اليوم ورايح راح تبدين حياة جديده
تنسين الماضي واللي صار انتي هسه بين اهلج وناسج الحقيقين .. يلا امشي نطلع

طلعت اني وهي جانت وراي .. احس بيها تتلفت وكلسع تندار

ركبنا بالسياره وكلتلها : نروح لمطعم شي حتى ترتاحين و تاكلين .. احتمال فهد راح يسوي اليوم اول يوم فاتحه بس انتوا تردوها بيتنا هذاك

روان : منكدر نطب هذا البيت بعد مستحيل نسوي الفاتحه هنا بعد اللي شفته

هزيت راسي واني اباوعلها رجعت تبجي بس متريد تبين جانت دايره وجهها ع الشباك

مَ كدرت افتح موضوع وياها نفسيتها كلش تعبانه
وصلنا للمطعم نزلت ورحت من يمها فتحتلها الباب

ياسر : يلا عمي تفضلي

روان : ماريد

ياسر : دنزلي نزلي

محجت شي نزلت ودخلنا للمطعم رحنا لطاوله هي ضلت كاعده وعيونها مدمعه وتريد تبجي

جابولنا بالبدايه مي وبعدها جابولنا اكل وكعدت اني هم حتى ما الي نفس اكل مدري شلون اكلت

ياسر : اكلي يمعوده ليصير بيج شي

روان : ما اريد شنو كومه

ياسر : جا تضلين هيج تموتين عمي ع الأقل لكمة ميصير هيج

اكلت شوي وبعدها كالت ماريد رحت دفعت الحساب وطلعنا وهم كامت تبجي بالسياره

على غفله كالت : ياسر حزوع

باوعتلها بصدمه : شنو تزوعين

روان : شنو ازوع شبيك وكف السياره بس خل انزل
وكفت السياره بسرعه وهي حطت ايدها ع حلكها نزلت تركض
رحت جبتلها كلينس ومي غسلتلها وهي بس تبجي

ياسر : ولج گافي اول مره اشوفج بهالحاله حتى اول ما اجيتي مو هيج .. عمي ماتحمل اشوفج هيج

روان : لتحجي وياي كلمه عوفني

ضلت تبجي بس متكدر تمشي مثل الدايخه
لزمتها وديتها وهي بالكوه تمشي وهي تريد تدفعني متكدر واني أشد عليها شني هاللواكه .. واني باقي مثل الصنم

صعدتها وضليت واكف يمها : خاف ترجعين تزوعين

روان : لا عادي خلنرجع .. الريحة ضلت بخشمي ل هيج مكدرت اتقبل الاكل ولا اي شي ومعدتي توجعني و صار الي صار

ضليت اباوع عليها وهي مدنجه راسها وتبچي سديت بابها ورحت صعدت

ورجعنا للبيت .. خلال الطريق كله هي تبجي ضليت ساكت محچيت وياها شي يمكن ترتاح اذا تبجي
حقها تبجي حتئ لو مو امها الحقيقه بس هيه الي ربتها الي وعت عليها وماتت بصورة محلوه
وصلنه للبيت ونزلنه

اول مشافتها بنان جتي تركض عليها

بنان : شبيها اختي ياسر شصار ؟؟؟

حجيت واني اباوعلها : لكينا جثة امكم بالمخزن .. ما اكدر هسه اني ما الحك بعد هاي الجنطه والغراض وهسه فهد وهمام راحوا واحتمال حسن هم راح يجي وراح اروحلهم حتى نكمل إجراءات وكلشي .. ديربالج عليها بنان

وبنان فوك متكعد تصبر اختها كعدت هيه الثانيه كعدت وكابلت روان ويبجن ويدكن ويلطمن وريم حارت بيهم ونزلت رزان ممفتهمه الموضوع وزوزو عرفت وكعدت تبجي ..

طلعت ورجعت مره ثانيه خابرت على فهد

ياسر : ها عمي وين انت منو وياك

سمعت صوت هوسه مو طبيعيه يمه

فهد : هو ببيتهم القديم كلهم يمي اجوي ..

ياسر : خوش اني جاي لعد

فهد : اي

سديت الاتصال من عنده واني افكر بطركاعتي
جانت مبينة مكسورة من صدك .. هي محمله كل اللوم على نفسها كل تفكيرها انوا هي السبب اوفف من تفكيرج يا روان .. وضعها كلش متدهور وبس تبجي واني حسيت وضعي اضرب من عدها

________________________________

بنان
جان الخبر من ياسر أشبه بموتنا
حسيت روحي بغير عالم واني اشوف روان تبجي
شافوها مره ثانيه وهم بالبيت !!

صرت اعيط وابجي بدون وعي لمجرد تخيلت اللي كالوه

التموا وجوي هم ريم و مريم وخاله رحاب يحاولون يسكتون بينا وماكو دقايق ونزلت رزان

رزان : شبيكم تبجون شصار

معرفت شنو ارد عليها وهي منا حالتها النفسيه تعبانه
ضليت صافنه بوجهها وبس ابجي

ردت عليها مريم بحزن : لكوا جثة امكم

من سمعت مريم هيج كالت هي رأساً تخربطت وكعت بالكاع

معرفت اشيل روحي لو اشيل رزان
تبهذلت أحوالنا وروان كلش منتهيه وبس تبجي وريم يمها ابد ما تركتها هي وخاله رحاب وخطيه زوزو كامت تبجي على بجينا

كمت ورحت غسلتلها .. كعدت رزان بس من كعدت بس ضلت تبجي ما سكتت بس ما اذت نفسها .. جانت بس تبجي بهدوء وضعها يخوفني .. حضنتها وضلينا نبجي سوا لحد ما صار العصر واجوي الولد وعمي

اول ما دخل طب عمي وراه فهد وهمام وياسر بس حسن ميكدر جان ماخذ اجازه زمنيه وما تأخر راح الهم لهناك ورجع لدوامه ..

اول مشافنا عمي طلبني ب اعتباري اني الجبيره
أخذني ع صفحه وبدا يحجي وياي

محمد : عمو بنان انتوا وين تردون الفاتحه تصير ؟ اللي سمعته من ياسر كال روان طلبت هنا .. متريد بهذاك البيت

بنان : عمو رأيي من رأي اختي اني هذاك البيت ما اطبله لو مدري شيصير بعد بس احنه نعتذر لانو صح هي متقرب الكم بس منكدر بهذاك البيت نسوي الفاتحه

محمد : لا عمو شنو هالحجي هذا تدرين بينا نحطكم بعيوننا ومهما يكون هاي امكم اللي ربتكم والها فضل جبير بوكت ما احنه جان المفروض نربيكم بس هيه الربتكم .. عندج رقم خالتج لو اي احد حتى تتصلين ويعرفون كرايب امج ويجون هنا أن شاء الله اليوم اول يوم راح يصير

بنان : اني مسجلته مره بورقه صغيره بس اشوفه واتأكد هم

محمد : تمام بويه بسرعه

رحت ركضت للغرفه ودورت بين جنطي وغراضي همزين لكيت الورقه شلتها ودكيت ع خالتي همزين هو رقمها شالته وحجيتلها كلشي وانطيتها العنوان وكلتلها كولي لكرايب امي هم والفاتحه راح تصير بيت عمي واني ابجي وضلت وهيه هم تبجي

طب فهد ولكاني ابجي

بنان : دفنتوها ؟

فهد : اي لعد شلون

بجيت بحركة كلبي : ما ارتاحت بحياتها ابد حتى بموتتها غريبه ومحد دفنها من اهلها ..

ليش هيج حياتنا مو مثل باقي الناس والعالم

لزمني وضل يهديني يحجي وياي : بنان اذا تضلين هيج لعد شحال خواتج هسه

بنان : ما اكدر ما اكدر لتكولي صيري قويه ما اكدر

فهد : اهخخخ ماكدر اعوفج واطلع .. ابويه واخواني كلهم طلعوا حينصبون جادر وفاتحه لازم اساعدهم

بجيت واني اكوله : روح اني هنا

فهد : ما اكدر اعوفج .. اهخخ بنان

بنان : مو كتلك روح

دخلت خاله علينا وفهد طلع .. وضلت تحجي وياي وتكولي انتي الجبيرة لتسوين بنفسج هيج وخواتج يتخبلون وحالتهم النفسيه وضلت تحجي وياي واني مادري كل ماتحجي ازيد واضل ابجي واصرخ

خلال ساعه صار البيت عباره عن سواد ومنسمع غير صوت البجي بدت العالم تجي بس خالتي جمانه ما اجتي اجوي بس عمي محمود و ايمن

روان جان وضعها بالنازل اول مره اشوفها بهيج ضعف ورزان بالزايد بدوا يجون ناس وكرايب وعالم .. إلى أن اجتي خالتي احلام .. اول ما دخلت بدت تعيط وتبجي وجتي وهي تبجي وكعدت يمنا وضلت تحجي وتكول "اختي مظلومه طول عمرها حتى بموتتها محد ميعرف "

بدوا يجون عمام امي ولدهم وبنات عماتها وخوالهم واجوي اشكال ناس كرايبها مع العلم مشايفتهم ولا اعرفهم .. دخل فهد للمطبخ ع خالتي وكاللها صيحلي بنان بس خل تلبس صايه وحجاب وتجي

رحت مثل مطلبت خالتي لكيت رجال جبير وياه فهد

فهد : هذا ابو سالم ابن عمها لامج ..

سلمت عليه وكلي البقية بحياتكم ... ضل يحجي علينا ويكول ليش مندري وليش صارت الفاتحه هنا وليش مو يمنا

جاوبته : هي أمنا اللي ربتنا طول هالسنين منكدر بعد ندخل لهذاك البيت القديم ونسوي الفاتحه هناك بالنسبه النا صار جحيم .. ما عدنا احد غير هنا نسوي الفاتحه وهذوله هم اهلنا مو ناس غربه وهي أمنا اللي ربتنا ماكو شي غريب

مجان راضي ومن وجهه عصبي وطلع وگأنما ضايج
هسه تذكروا امي ؟؟؟ من ماتت هيج صارت عزيزه ؟

ضليت ابجي حجى فهد : معليج بأي احد يحجي وروحي ضلي يم خواتج .. انتي اختهم الجبيره ومصدر الامان الهم وناس تطب وناس تطلع واكيد حالتهم تعبانه

هزيت راسي وبدت دموعي تنزل : شوف مراضين فاتحة امي هنا ويمنا .. يريدون يمهم .. طول هالسنين ناسينه هسه من ماتت الهام صارت عزيزه

فهد : وهذا جمال دندور عليه وسئلنه اهل المطنقه يكول مشفناه ولا كلشي بس حلكاه وياخذ جزائه

بنان : اللي تشوفه صح سويه

فهد : ديري بالج ع نفسج خوش

هزيت راسي ورجعت هناك بدن يجن بنات خالات امي ومدري منو ناس اول مره اشوفهم بدوا يعرفون عن نفسهم ويسلمون ع خواتي ويعزون وخاله رحاب ومريم وريم خطيه ضلوا يطبخون وهم اجوي كرايب خاله رحاب .. يعني هم كرايب ماما سراب واني اباوع وابجي منظر يكسر كلبي وكل دقيقه تجي ع بالي امي .. من جانت تكعدني للمدرسه ومن جانت تمشطلي واني صغيره .. كل ذكرياتي مرت علية مكدرت انسى

خالتي احلام ضلت تبجي وتدك وتلطم وهي تكول " راحت الحنينه ماكدرت اضمها من الظالم "

ورزان كلش وضعها وخطيه يمهم ريم مقصرت ابد وهي يمهم واني كلسع يجون ناس ويضلون يحققون ويكولون شلون ماتت .. ضليت اسكت ماعرف شجاوبهم واني بس ابجي وهذوله يسألون بيه
بدوا ناس تطب وناس تطلع لحد مصار الليل

كالت خالتي : يمه بنان عادي نضل هنا هي فاتحة اختي بس احس خجلانه احجي ويه خالتكم رحاب ويعني اني محد اجه وياي كوثر عدها مدرسه و مهدي ما اجه بشغل وبس يوسف اجه وياي عادي نضل

بنان : خاله اكيد تضلين شلون لعد ٣ ايام لازم انتي هنا غير انتي اخت ماما الهام شلون تروحين وناس تجي عليمن لعد اصلا مبحاجة تكولين خالة رحاب متكول لو تشوفيها يا خاله تحطيها ع الجرح يطيب عدها حنية مو طبيعيه

احلام : الله يحفظها الكم .. اوف يا الهام .. لج بنان ما كدرت احميها ولا كدرت اسوي شي جمال طب يتهدد بسلاحه شكد حاول ويا ابني يوسف بس ماكو دخل اخذهم وطلعهم ومن رجعوا كتلها الميخاف الله

رجعنا نبجي واحنه نتذكرها ضلت تسولفلي عن طفولتهم سوا وشلون جانوا مثل التؤام
بس الايام فرقتهم ...

_____________________________

روان
حالنا اشبه بالميتين حرفياً
كل اللي صار وهذيج الليله كلسع تجي بالي وارجع ابجي

جسمي حسيته مكسر وراسي صداع مو طبيعي رزان جانت متعرف شتسوي بس تبجي
ماما الهام حتى لو ماتت .. بس هي راح تضل بقلوبنا ومننساها

هي الي ربتنا وضحت بكلشي علمودنا
بس جان كله بسببي .. هي ماتت بسببي اني
كل ميجي هالتفكير بدماغي اريد اكوم واذبح نفسي
كله بسببي اني اللي اقترحت ننهزم مناك ونروح لخالتي لو باقين !! بس مجنت اريد رزان تزوج
كل ما اضل افكر اطب بمتاهه اطلع من متاهه وراسي يموتني وارجع ابجي واني اتذكر امي صار الليل وبعدها ناس موجوده وناس بقت وناس راحت
كومتني ريم رحنا للمطبخ حتى اغسل
ورجعنا كلتلي

ريم : ترتاحين شويه فوك بالغرفه .. جوه هوسه

روان : اريد اروح يم بنان هم

ريم : بنان يم خالتكم احلام .. ورزان هم قبل شويه صعدتها للغرفه كالت اريد هدوء ماكدر اضل

صعدت فوك للغرفه .. جانت الدنيا لليل وساعه 10
واني تعبانه وهلاك مو طبيعي كلسع ابجي وكلسع امي تجي على بالي
الى أن اجتي بنان مثل عادتها

بنان : روان رزان تردون شي ؟ محتاجين شي

روان : لا منريد .. رزان نايمه من زمان بس حبابه بنان لازم نشوف حل وضعها ابد مو تمام وكلسع تفز وتهلوس

بنان : أن شاء الله بس تخلص الفاتحه نشوف وين نوديها

روان : خالتي بقت

بنان : اي بقت رح تنام بغرفة بيبي .. و يوسف هو وي الولد يمكن بغرفة ياسر وهمام

هزيت راسي وبنان طلعت وراحت

اول يوم فاتحه .. مكدرت انام .. ضلت ذكريات تجي بدماغي وكلسع ابجي نزلت جوا ادور على ريم
جانت بوقتها الساعه 12 هيج دنيا ليل
نزلت ادور عليها ماهيه مدري وينها يجوز يم خاله رحاب لو شو وين وجان اشوف يوسف كدامي

يوسف : شلونج روان .. البقية بحياتكم

روان : هلا يوسف .. حياتك الباقيه

يوسف : شلونكم انتوا خواتج

روان : شوفة عينك

نزل رأسه وضل يحجي : والله العظيم من جنتوا يمنا واجه جمال .. حاولت اوخره وما اخلي يدخل البيت بس مكدرت لان وحدي محد جان وياي

روان : مهدي ارتاح ؟؟؟

يوسف : اصلا ما اله عين يجي بعد اللي سواه

روان : لتبرر لاخوك اصلا هو يكرهنا وتلكي هسه فرحان

محجى شي وضل ساكت لانو اللي كلته صح

يوسف : لعد انتي هنا رح ترجعين للدوام ؟

استغربت شمدري اني مبطلني جمال ؟ هو رأسا جاوبني

يوسف : خالتي الهام الله يرحمها كالت لامي واني عرفت من امي

روان : اي ان شاء الله .. ورا متخلص الفاتحه نرجع اني واختي

بهالثواني اجه ياسر وشكله مدري شبي وعاگد حواجبه وضايج مبين

ياسر : شنو شعندك هنا

جاوبه يوسف : والله ماعندي اخذت من خاطر روان وحجيت وياها وبس

ياسر : اي تفضل اصعد فوك الوقت مو مناسب تحجون بي هسه ووحدكم هنا

صعد يوسف محجى شي وياسر اجه يمي وكام يحجي بعصبية

ياسر : شعندج ويه هذا بنص الليل

روان : شنو نص الليل شبيك ياسر هو غير ابن خالتي واجه أخذ من خاطري

ياسر : ها ووحدكم

روان : حرام عليه وحلال عليك هسه اني وياك هم وحدنا شنو الفرق .. اني مو فارغه لهيج اشياء سخيفه تعبانه كلش ونزلت ادور على ريم مو جايه اتعارك

ياسر : اكو فرق اني ابن عمج وخالتج هوه ميقربج

روان : بس اني تربيت وياه و وعيت هوه ابن خالتي مو انت

لزمني من ايدي وضل يباوع بعيني وگال

ياسر : متحجين ويا بعد خوش

روان : يابه شنو هي بكيفك

انداريت ورجعت صعدت .. والله هاي حلوه ؟؟؟

.................................................

بنان
مر ثاني يوم وهم نفس الناس الي اجوي البارحه والبيت عباره عن بجي

وضع ميتسولف اني عبالك عايشه بحلم ضليت ابجي ابجي واحس نار بصدري .. مشفت امي اوففف والله هالحسره بگلبي

صعدت فوك للغرفه بعد ما اتحمل اي شي وضليت ابجي

حسيت الباب انفتحت .. رفعت راسي شفته فهد
اجه يمي وكعد كبالي

فهد : " لتخليني اشوف دموعج .. اني تعبان ويتعبوني بالزايد "

مسحت دموعي وكتله : مدا اتحمل احس بكلبي غصه محد يعرف بيها شنو .. محد حيفتهم اللي اني بي امي ماتت وأني ما شفتها

فهد : وعد اخذج الها

هزيت راسي واني اباوعله

بنان : شكد تعبتك وياي ماعرف شلون اجازيك انت وعمي حيل تعبتوا ويانه وكفتوا ويانه

فهد : لتفكرين هسه بأي شي .. من صعدت خالتج شافتني كلتلي صيحلي بنان اريدها .. تريدج جوا
دا اريد انزل بس انتبهت عليه صافن عليه

هم تعب ويانه وهم عنده شغل وأخذ اجازه 3 ايام علمودنا وضل هنا

نزلت على خالتي جانت رايدتني وجاين ناس مادري كرايبها وخطيه بهالايام مريم مرت حسن هم كلش تعبت ويانه فرح ما خلتها بالفاتحه ودتها يم بيت اهلها و خاله رحاب ماعرف شكد اوصفها ولا ريم كلهم ما قصروا ويانه

سألت روان : وين رزان ؟

روان : لج بنان مادري شبيها حبابه صعدي شوفيها اليوم منزلت واحجي وياها مادري متجاوبني لو بس تهز راسها
مو رزان !!!

بجيت ع حالها : ياربي شلون هسه لعد

صعدت عليها فوك واني ابجي .. دخلت يمها لكيتها صافنه .. حجيت وياها متجاوبني .. جبتلها اكل متاكل

ضعفت حيل وتغيرت ابد مو رزان اللي اعرفها ماعرف اتصرف وكلسع احد يجي واني بصفتي الجبيره لازم اكون موجوده

_______________________________

روان

مرت ايام الفاتحه واليوم الثالث والاخير
مرت الايام بسرعه بس كلشي جان ثكيل ع گلبي
خلصت الفاتحه بالليل وشالوا الجادر و الولد نظفوا الشارع ونظفنا البيت جانت خالتي ويانه وساعدتنا ع اللي تكدر عليه .. زوزو حبت خاله احلام وضلت تاخذ وتنطي وياها بالنسبه لرزان وضعها اسوء يوم بعد يوم يصير اسوء وكلنا منعرف شنسوي الها .. حجيت ويه بنان كالتلي انوا نكول لفهد نوديها طبيب نفسي
وافقتها الرأي لان صدك لازم نوديها دكتور

ريم ابد معافتنا وحدنا دائما وياي وويه رزان وكلهم ويانه
بالليل لمت غراضها خالتي ودعتنا وكالت لبنان

احلام : اني رقمي يمج اي شي تردي بس خابري علية واجي

بنان : تسلمين خاله متقصرين

دخل يوسف هم سلم وهاي وشال غراض امه .. ضل يباوعلي والحظ الحلو جان ياسر موجود
اباوع عليه يريد يأكله وجهه صار احمر وكلسع يمسح وجهه ويستغفر وبهل اثناء يوسف گال

_ روان عادي احجي وياج شويه

اباوع علئ ياسر خازرني وخازر يوسف فكتله

_ اوك تمام

رحنه علئ صفحه وكتبلي رقمه وسجلته بتليفون مال ماما لما رحت اني وياسر جبته وي الغراض فسجلت رقمه

يوسف : اذا تحتاجين فد يوم شي خابريني

روان : شكرا اعرفك متقصر

ودعتنا خالتي وراحت ودخلنا جوا وياسر بقئ خازرني اول مره اشوفه يخنزر وصاير اعصاب

فهد اخذ بنان وراحوا واحنه اني و ريم ماعدنا شي صعدت للغرفه وبديت احضر جنطتي لباجر راح اداوم وياها وملابسي بس رزان كالت بنان ما اخليها تداوم لحد ما تصير زينه يلا ...

بنان
جنت مثل كل مره كاعده بالغرفه بالليل
دخل فهد وضل يباوعلي صفح

بنان : هاي شنو شو تباوعلي صفح

فهد : ها خطيه متعرفين ؟

بنان : لا والله كولي شسويت ؟

فهد : شلون ميانه وي ابن خالتج الجذبي ما شاء الله وسلام حامي

بنان : عزه اليسمعك يكول هاي كاعده وتضحك وسوالف .. هو غير طب وسلم علينا شنو ما ارد السلام وبعدين ترى راحو

فهد : اي اي يفيدج هذا الكلام

بنان : صدك يعني ردت احاجيك بخصوص موضوع

فهد : اي هسه حفوت اسبح من اطلع نحجي

بنان : اي .. اني راح انزل جوا يمهم كاعدين وهم اشوف رزان بغرفة ريم

فهد : خوش

رحت لغرفة ريم گـ العاده لكيتها كاعده وصافنه
تقربت عليها وكعدت يمها وبديت اسولف وياها

بنان : حبيبتي رزان موزين هيج تسوين بنفسج
كلنا تأذينا بس الله ويانه ومينسانه وميضيع حق احد
اعرف اللي عشتيه واعرف اللي شفتيه لكن انتي دمرتي نفسيتج كلها .. انتي مدتاكلين اي شي الا بالكوه نفسج مو مهتمه بيها هملتي صحتج .. وين رزان القديمه الي سوالفها متخلص

رزان لازم تراجعين نفسج اللي دتسوي غلط انتي رح تخبلين نفسج بهالاشياء الدتسويهم .. عود زين انتي تسوين هيج بروحج

ما انطتني أي ردة فعل ورجعت غطت راسها وعافتني
ما اعرف بعد شنو اسوي وياها بالي وتفكيري كله بيها

_______________________________

نزلت جوا لكيت روان كاعده يم ريم وديسولفون وحسن ومريم هم كاعدين وهمام وياسر وكلهم

زوزو : يمه بنان وين فهد

بنان : فوك بيبي

زوزو : لعد وين رزونه

بنان : نايمه

نغزتني روان : رحتيلها ؟

بنان : اي حجيت وياها ميفيد

روان : حتى اني احجي وياها كأنما متسمعني

ريم : مقهوره عليها كلش تعبانه وجهها اصفر ومتاكل ابد

بنان : كلش والله حتى اني مقهوره .. روان راح تداومين باجر ؟

روان : اي راح اداوم

بنان : تمام اريدج زينه مو مثل قبل يادوب تنجحين لا صيري شاطره واحسن من قبل

ريم : هي ما دامها وياي عادي .. نقرا سوا لو بابا يقرينا هم يعرف

حجى ياسر : اي من باجر راح يشتغل خط استاذ ياسر ودي جيب ودي جيب

ريم : غصباً عليكك

ياسر : شفت يابه مسويني فلبيني جوا ايدهم بابا في وديني مدرسه بابا في رجعني بيت

محمد : مو فلبيني بس همه شعدهم غيرك غير انت اخوهم

حسن : لعد منو يوديهم غيرك غير انت اخوهم

ريم : فديتك حسوني

حسن : اخيتي الغاليه

باوع ياسر لهمام : احمم

همام : اي انت أخو روان

ياسر : اي اخوها وحبيبها وصديقها و زوجها وأبو جهالها

همام : اكبر بوخه انت بالاول أخطب يلا احجي هالحجي والله تضحكني

ياسر : ميحتاج بس اتخرج هي هالسنهههه اخخ بس هالسنه اتخرج واصخمم واخطبها

همام : واثق انت كلش يجوز متقبل بيك ؟

ياسر : معليك اني ضامن كلشي ما اريد رأيك

نزل فهد : هاي شنو مجتمعين بدوني

زوزو : شنهي هي مجتمعين بدونك غير انت ماك

بنان
ضحك فهد .. واجه كعد يمي ولزك بجسمي

بنان " همستله" : وخر شوي

فهد : ليش اوخر

بنان : لزكتت بية

ابتسم ب استفزاز : اييي واذا ؟

بنان : فهدد عفيه

فهد : اي صدك شنو موضوعج ؟

بنان : بخصوص رزان

فهد : شبيها

بنان : مو كلتلك مادري شبيها اريد نوديها طبيب نفسي

فهد : طبيب نفسي ؟؟؟

بنان : اي فهد هي مجاي تكعد ويانه ولا جاي تاكل ومن نحجي وياها متحجي ويانه ماعرف شبيها وأغلب وقتها تنام بس هم روان تكول مو هواي يعني وتكعد تهلوس بالليل وتحجي .. المشكله هي تهلوس كله بأمي

نزل رأسه وهو يفكر وضل يباوعلي

بنان : وين نوديها ؟

فهد : دقيقه بنان

باوعت للكل جان ديسولفون كل واحد ملتهي ف لهيج ضلينا نحجي اني وفهد

كال فهد : بويه بيت عمي شوكت يرجعون من السفر
التفت محمد بصدمه وهو يباوع لبنان و روان

بنان : عدنه بيت عم بعد ؟

روان : كل يوم نكتشف شي جديد

محمد : عمو خلي احجيلكم

روان : ماريد اني حصعد

بنان : تعاي رواننن

رجعت كعدت روان

فهد : مكلنا شي غلط وعدكم عم بعد وين المشكله ست روان؟

روان : ليش ما درينا من البدايه

فهد : ليش هو اكو وقت ومجال حتى نكدر نحجي بهذا الموضوع

محمد : اسمعوا خل احجي شبيكم كبروتوا سالفه

همس همام لياسر : هاي متتحمل لازم تتعارك

ياسر : تروحلها فدوه عميييي فديت عركاتها

محمد : عمو اسمعوني ما دامكم هنا بعد رزان وينها

بنان : رزان فوك

محمد: خلي تنزل

بنان : ها مو نايمه

هز راسه وكال : تمام عود كولوها انتوا .. عدكم بعد عم 3

نط ياسر : اي واسمه زياد و عنده ابن اسمه ايهم

محمد : ياسر انجب شويه احترام

ياسر : هو شكلت اني فوك ما اختصر الوقت الك

محمد : اسكتتت .. اخويه زياد الي هو عمكم من زمان عايش بالخارج .. ب المانيا ، توفت زوجته هنا بعدها سافر بس مكان يجي ونتواصل ويا بالتلفون واستقر هناك وشغله كله .. لكن قبل فتره خابرني وكال أن شاء الله الفتره الجايه احتمال نرجع للعراق ونستقر بالعراق هم

حسن: و ايهم يرجع وياه ؟

محمد : اي هو كلي

همام : بس شعجب بما انوا طبيب نفسي ومكون نفسه هناك ليش يرجع هنا

محمد : ما اعرف بس هو زياد كال راح نرجع كرهنا حياة الغربه .. صارله سنين هناك والله حتى احنه مشتاقين اله شوكت يرجع واني احسبله يوم يوم

روان وبنان افتهموا الموضوع زين

روان : عرفت قصد فهد ؟ هو راح يرجع عمهم وهاي وبهيج يريد يعالج رزان يمه صح ؟

بنان : اي هوه هيج منكن

ريم : بابا لعد اذا يرجع هو وين يبقى ؟

محمد : حاجاني عن مخططاته وكال انوا بس يرجع يشتري بيت بس اني ما اقتنعت ردته فتره يبقى يمنه لحد ما يدبر وضعه زين وخلي يشتري بيت بس ما اقتنع برأيي و الله كريم .. وشذكرك بالموضوع فهد

فهد : هيج جان بالي فدشي وهمزين انوا عرفت وهاهيه

هز راسه وزوزو جانت تدري لان محمد سولفلها من مخابر زياد وكلشي تعرف

ريم : روان نصعد الغرفه اني هذا وقتي اصعد ليفوك ؟

روان : اي خوش يلا

همه وديروحون ما حسوا غير ياسر وراهم

ياسر : احممم شنو حتنامون ؟

ريم : لاااا وخر

خزرها ياسر : اي ست روان مو على بعضج خير ؟

ضحكت ريم عرفت ياسر يريد يحجي ويه روان

روان : اي شويه تعبانه من رخصتك

ياسر : متعبين من تضلين واكفه وتسولفين ويه يوسف بس تتعبين من تحجين ويه ياسر

روان : تريد تتعارك .. عاجبك نتعارك ؟؟

ياسر : اي والله عادي نتعارك واذا ؟

روان : مو فارغه الك بس باجر يجوز اكدر أما هسه لا .. يلا باييييي

ياسر : هوه مو صوجج صوجي اني اجيت احجي وياج

روان : عفوا ما اعتقد اجيت واتوسل بيك حتئ تجي تحجي ويايه

ياسر : انتي ليش هيج شايفه نفسج

روان : كيفي عندك اعتراض

ياسر : لا والله هوه اصلا اكو احلئ من شوفت النفس وخاصة اذا منج

جرتها ريم واندارت لياسر وهي تأشر اله بمعنى " اثكل

ياسر عفتهم ورحت الغرفتي وكفت كدام المرايه احجي وي نفسي وگلت

_ شبي حظك يا ياسر يعني لا بالحب ولا بالحياة ولا بالدراسه چا بيش تفلح بعد

باوعت من المرايه ولكيت ورايه همام يضحك وكال

_ فالح بدراسه خويه غير انت مهندس شتريد بعد ؟

ياسر : تعبان بعد عمك

همام : ليش خويه شبيك خيرك

ياسر : مادري هذا يوسف همزين راح ابد ما ارتاحيت اله

همام : ليش بالعكس خوش ولد

عاط ياسر : اسكت انت اسكت متعرف شي

همام : ليش ماعرف هو شكو ؟

ياسر : سالفه

همام : دحجي لك لا اصمطك براجدي

ياسر : مادري ممرتاحله .. شفته يحجي ويه طركاعتي

ضحك همام وكال : مخبل انت يعني واذا حجى وياها انت مو تحجي وياها احنه مو نحجي وياهم هو ابن خالتهم هم

ياسر : موو ابن خالتهم هاي خالتهم على عيني وعلى راسي بس هذا يوسف مو ابن خالتهم لك اسكت اسكت راح انفجر

همام : هسه شصار متكلييي

ياسر : انجب انجببببب لا انهد بيك قسم بالله

همام : اي هاذهوه سكتنه عمي

سكت همام وضل ياسر ينافخ وعصبي

همام : خويه انت غيور عليها زياده عن اللزوم

ياسر : مراح تفهمني ياخويه "بس تقع في الحب" بذاك الوكت تفهم اخوك الكو** ولوو انت اصلا منو تباوع بوجهك

همام : هوه مو صوجك صوج اليحجي وياك اي والله دولي وين اكو بجمالي اني تروحلي فدوه

_______________________________

بنان
دخلت للغرفه وحالتي حاله ..

بنان : فهد لازم اختي تتعالج والله ما اتحمل اشوفها هيج

فهد : شبيج بويه ليش هلكد خايفه أن شاء الله كل الخير بعدين اني أكلج .. ايهم خوش طبيب نفسي ناجح وهوه مضل شي ويجون واكيد حيكدر يعالج رزان وهم مو غريب ابن عمها

بنان : خايفه متتعالج رزان

فهد : تفائلي بويه تفائلي ليش ضلين بومه

بنان : ها هسه صرت بومه ؟

فهد : احلى بومه بنظري

بنان : اي اي وانت غرا .. مكدرت اكمل بعد ما انتبهت ردت اكوله غراب

فهد : عرفت شنو ردتي تكولين

بنان : العفو مو قصدي والله اسفه

فهد : غراب اني مو ؟

بنان : والله والله مو قصدي

فهد : اريد اعرف التالي ويه جفصاتج انتي انتبعي للسانج ضبي شويه

بنان : هسه شصار قابل شكتلك هوه اكو احلئ من الغراب اشوو يخبل ويجننن واني احبه

فهد : اذا بهيج حاله انتي تحبين الغرابان راضي اصيرلج غراب

انداريت من الفشله ورحت اريد انام

فهد : شكو تنامين ؟

بنان : النوم صار حرام

فهد : لا حلال بس هيج بكيفي ما اريد تنامين

بنان : تعبانه شلون ما انام

فهد : لاا خليني شويه اتأمل ابداع الخالق

بنان : استغفر الله شلون هسههه رجعنا

غطيت راسي وهو يكول : اي اي نامي شعلية بيج

الظاهر ضاج

.....................................................

ريم

طول ايام الفاتحه التهيت ويه روان ورزان والتهيت
لاحظت هالفتره اهتمام ياسر بروان يزيد .. دائما من تكعد يمنا يضل يباوعلها لو انتبه يصفن عليها وأشر اله حتى متنتبه بس هو ولا يمي

اباوع للكل واحد حب الثاني .. اجه ع بالي مؤمل
هسه وينه وين اختفى هالفتره ماهوه ولا يجي
حسيت اشتاقيتله .. من جانب اريد انساه بس ما اكدر هو بعقلي بكل وقت ...

ضليت كاعده شفت روان هم كاعده

ريم : ها شنو كاعده

روان: ما اجاني نوم

ريم : ليش

روان : مادري

ريم : اني هم مثلج ما اجاني نوم

روان : ليش احسج تحبين

ريم : اني ؟؟

روان : اي انتي لعد اني

ريم : هههههَ متوهمه أنتِ

روان : ليش متوهمه ؟ والله يعني احس بيج تحبين اول شي تسهرين مرات تصفنين وعيونج تلمع .. هاي اللمعه بالعين شيسموها لعد ؟

ريم : هاي شنو روان فتحتي تحقيق

روان : مادري دا احجي شكوكي وبس

ريم : لتحجيها ماكو شي من عدها صحيح
انتبهنا ع رزان هم كعدت بس ضاله نفس الشي حجينه وياها متجاوبنه وصافنه

______________________________

بنان
جنت مغطيه راسي واحاول انام بس ورا دقايق سمعت فهد يخابر ويضحك بصوت عالي

كلت بگلبي: ويامن جاي تضحك .. عزا بس لا بنية
بسيطه بسيطه

وخرت الغطا من راسي وعيطت : فهد صوووووتك
باوعتله خزرني واني هم خزرته

ضحك فهد بتوتر : صدك بيها الخير .. جا شبيك افرح يوللل .. بس حجي

كلت بكلبي : عزا هذا ديحجي ويه ولد .. اجاك الموت يا تارك الصلاة

رجعت غطيت راسي وهو أنهى الاتصال
مسمعت اي شي كلت اكيد غلس ورا شويه داوخر البطانيه من وجهي جان الكاه واكف كبالي ومكتف ايديه ويباوعلي صفح ومخنزر

بنان : بسمم الله

فهد : بسم الله مو. ؟؟

بنان شبيك جنك جني واكف كبالي شلون الواحد مينام اليوم ساعه تحجي ويه صديقاتك ساعه واكف كبالي

فهد : لتخلين لساني يطلع بعدج مشايفه لساني .. هاي الكلمه اذا عدتيها مال صديقاتك متلومين الا نفسج خوش

بنان : ايييي كافي سد الموضوع بس يعني شتريدني افسرها اذا انت بنص الليل وكاعد تضحك بالتلفون هاا

تقرب يمي وابتسم ابتسامته الاستفززززازيه : ها لازم غرتي ؟

فتحت عيوني بصدمه : اني اغار ؟؟؟ خاف حلمان

فهد : لاا بس يعني دا اشوف الغيره واضحه

بنان : غلطان مغيرانه

فهد : اي ضلي مصرة ع قرارج

تقرب أكثر انفاسه لامست وجهي
جان شعري مخربط وكله واكع ع وجهي

رجع خصلات شعري ليورا وكال : وصوتج مره ثانيه ما اسمعه من اخابر .. خوش ؟؟؟

ابتعدت بسرعه وكلتله : اوك بس وخر

فهد : ها نسيتي تحطين ثوم الظاهر

بنان : اي نسيت يلا روح نام ترى كافي شبعت كلام بتلفونك وضحك

فهد : اي خل اكلج بما انوا انتي مصرة ع رأيج
ترى جنت أحاجي مؤمل وعلساس امه تريد تخطبله وهو ميريد .. جنه نتشاقه بخصوص هالموضوع و عزمونا على خطبته وبس !! اني ما احب ابرر بس كلمتج اللي كلتيها ما اريدها تنعاد خوش

ضليت صافنه عليه بصدمه حسيت كلبي أذاني ع ريم

تذكرت من جانت تسولفلي وشلون حبته .. مواقفهم قليله بس حبته بيهن أكثر .. شلون راح تتقبل الشي هذا شلون راح تعرف .. شنية ردة فعلها .. اكوللها لو لا

باوعت لفهد واني متردده : هو راح يخطب ؟؟ يعني يحبها للبنية

خزرني وكال : هوب هوب وانتي شعليج ؟

بنان : بس دكول حباب احجييي

فهد : لا هو ميريدها بس امه تريدها .. امه مريضه ميكدر يرفض الها طلب ليروح يصير بيها شي
ضليت صافنه

عكد حواجبه ورجع تقرب الوجهي ونفاسه علئ صارن علئ وجهي : هاا اشوفج مهتمه ليششش؟

دفعته وكلت : لا بس مجرد سؤال

جان بالي اروح اكول لريم بس راح يحس علية ويعرف اكو شي ف سكتت

بنان : وانت راح تاخذنه للخطوبه

فهد : اي نروح كلنا عود

بنان : شوكت نكول للبيت

فهد : باجر الصبح اكوللهم

بنان : اها يلا تصبح على خير

فهد : وانتي من اهل الخير

رجعت اتكلب واني افكر بريم المسكينه .. ياربي شلون راح تعرف هالبنية متتحمل هالشي صعب .. اوف يا ريم

ضليت ساكته سمعت تلفوني دك بس جنت خالته هزاز

شلته لكيته فراس .. بدت تنزل دموعي واني اشوف اسمه مالي الشاشه فتحت خط اريد اشوف والتالي ويا

رحت للحمام واني ابجي وارجف

بنان : خير شرايد بنص الليل؟

ضحك جان مبين شارب : هههههههَ اعصابج حبيبتي

بنان : شوكت تختفي انت الله ياخذك حيوان دمرتني

فراس : ما اختفي .. بأحلامج يا حلوه

بنان : شرايد كول يلا .. مو صوجك صوجي اني الي فتحت خط عليك بنص الليل

فراس : شوفي لج كافي مسلتي هواي .. باجر اريدج تجين لهذا العنوان اريد التقي بيج بدون محد يدري خوش **

زادت دموعي واني ابجي : ما اجي شبيك انت من كل عقلك فراس ابعد عنا وعوفنا

فراس : لا حبيبتي راح تجين غصبا عليج واذا متجين راح تشوفين شي ميعجبج واني فراس لتنسين وحق ربج اسوي شي اخليج تندمين لان ما اجيتي

سديت الاتصال بوجهه واني كلي خوف
ضليت ابجي بسكوت كله صوجي فتحت البلوك عبالي بطل يسويلي شي لان امي ماتت بس طلع حيوان وانگس من الحيوان
رجعت تغطيت بس مكدرت انام وتنزل دموعي وحايره وخايفه يسوي شي او يأذي احد

____________________________

فهد
كعدت الصبح مثل كل مره دوامي الصبح جنت مقرر بس انزل همه كلهم يكعدون هيج وكت عدهم دوامات حتى اكوللهم الخبر .. خبر مؤمل وخطوبته
نزلت لكيتهم مثل كل مره كاعدين وديتريكون كلهم

فهد : هااا كاعدين ؟؟؟

ياسر : تفضل تفضل عمي اكل

فهد : لا ما اريد اكل هناك عود

ريم : دتعال فهد شنو صارلك كم مره متاكل قبل لتطلع ميصير

همام : صح كلام ريم

فهد : لا عيني ما اريد اكل بس قبل لا اطلع اريد اكوللكم شي

محمد : خيرك

ضحك فهد : لتخافون ماكو شي .. بس مؤمل حيخطب

نهاية البارت
يتبع ..

( لاتنسوا التصويت )

إن شاء الله يعجبكم البارت + احبكم طركاعاتي 🙃♡

إلى اللقاء يا أعز العابرين في قلبي ♡.

تعالووو انستا هذا حسابنا 7.nldn

الكاتبات دينا & نور