رواية نقطة لقاء الفصل التاسع وثلاثون 39 - بقلم الكاتبة دينا _ الكاتبة نور

مازِلت اتعافي من أشياء لَم أخبِر عنها أحد .

>>>>>>>>>>>>>>>>>>>>

جان يطلع ايهم من الحمام شافني ابجي بسرعه اجه گال

_ شكووو رزان شبيج تبجينن

اجه ايهم يمي وهو يسألني بتكرار .. دموعي تنزل وابجي بهستيريا الكلام الي سمعته رجعلي كلشي

ايديه حاوطت وجهي وهو يسألني بقلق : رزان احجي شبيج لتخبليني !

شلت الموبايل وأيدي ترجف واشهك ودموعي تنزل انطيته اله : يحجي علية

جر التليفون من ايدي وبدا يقرا المحادثه فتح عيونه بغضب وگال : هذا ايمن ؟؟؟

رزان : ايمن

ايهم : شمدريج هو ؟

بجيت حيل وكلتله : والله اني متأكده هو لان ماكو احد غيره هيج يحجي وياي

وخر التليفون وذبه على صفحه وحظني حيل واني ابجي واكول : يطعن بشرفي الحجي مدا اتحمله اني اريد اموت واخلص انتَ ليش تزوجتني مراح ترتاح وياي ولا اني راح اخلص من حجيهم

ايهم : وأنتِ ليش هيج قاهره روحج ؟ علمود واحد تافه ونگس مثل ايمن ، بعدين ترا اني حبيتج وتزوجتج معلية بعد بيهم وانتِ كُلشي مابيج و شيحجون خليهم يحجون همه والحايط ولما تسمعين حجيهم طببي من هاي الاذن وطلعيه من الثانيه لتخلين احد يأثر عليج وتفكيرج يصير سلبي رزان .. ماريدج تتأذين بسبب حچي وتذكري اني وياج بكل ثانيه واعرفج انتِ شنو تمام وايمن راح اشوف شغلي وياه

رزان : ليش يحجي هيج والله اني كلشي مابيه ومسويت هيج وانتَ تعرف موو

ايهم : رزان شبيج قابل ما ادري هسه صارلي ساعه احجي شنو بس والله اعرف شغلي وياه بسيطه اله اتوبه

انمدت ايديه ومسح دموعي وگال : ماريد اشوف دموعج تفاحتي

حظنته حيل ودموعي رجعت تنزل وگلت : تعبت

ايهم : بابا لتبچين صارلي ساعه احچي وين راح الحچيته

رزان : تمام

ايهم : لتهزج أقل حجاية من بيت محمود دشوفيهم الغلط من ساسهم لراسهم ويجون يحجون عليجن

رزان : ماعدهم احد غيرنا يذبون كلامهم السم عليه صرت متأكده كل ميجون لازم تصير مشكله

ايهم : واذا يجون بعد تجنبوهم ابقوا شوية يمهم دقائق وكومن

نزلت دموعي : اوف تعبت حيل وهذا اجاني منا مديعوفني

ايهم : بسيطه اني اعلمه اعرف شسويله وشلون اتوبه

دقايق محسيت غير اني نمت على ايديه وهو يمسح على شعري بهدوء

_____________

بنان
كعدت الصبح فهد مچان موجود يمي
تلفتت بخوف مموجود بالغرفه
صفنت لكيت أغراضه مبعثره .. ياااا راح للشغل هذا ليش ماكعدني اسوي ريوك

شلت التليفون بعصبية ودكيت عليه فتح الخط وهو يضحك گال

_ افتقدتيني

_ اكيد .. انتَ بالشغل ؟

_ اي

_ ليش لعد ما كعدتني اسويلك اكل

_ شفتج نايمه عادي نزلت جوه امي جانت كاعده فسوتلي

_ اوفففف ليش مكعدتني

_ ديلا كافي حتبجين قابل شصار

_ اييييي صدك فهد

_ عيونه

_ سالمه عيونك .. من تجي جيبلي برتقال

_ شنو

_ من تجيييي جيبلي برتقال

_ شتسوين بيها

_ اشتهيت

ضحك وگال : تدللين

_ هاي شبيك تضحك

_ ولا شي يلا حبيبي ارجعي نامي شعندج كاعده

_ هاي فوك ما اسأل عليك

_ هوه انتِ علمود البرتقال خابرتيني

_ ها هيج بنضرك؟

_ راح تطنكررر

_ يلا باي

سديته بسرعه من عنده وهو ضل يدك يدك ما فتحته

ابتسمت وكلت : بسيطه يا فهيد فوك ما ادك وخايفه عليك تكولي علمود البرتقال !

وحتئ طارت نومتي كمت بعصبية ونزلت جوا

____

روان
كعدنا اني و ريم الصبح بالصاله ماكو احد

ريم : الله لو يضلون منهمدين ولا الهوسه

روان : لج هاي رزان صايرة تنام هواي اي عيني طبعا وياها ايهم

ريم : اوف .. لج تعاي صدكككك

روان : خيرج

ريم : افكر اصبغ شعري ازرك

روان : عزا بعينج مو صبغتي بنفسجي ورجعتي سحبتي اللون وهيه تريدين ترجعين صبغي

ريم : كبر حطمتي واهسي

روان : احسن والله هل مره اذا صبغي امج تنجلط

ريم : ايييييي سمعت متصالحينننن أنتِ والمووووهنديس

روان : بعد عِيني المووهنديس جا ليش ما نتصالح بيها موطه ام الككو

ريم : بس ترا اني جنت فاعلة خير

روان : كُلش خير لدرجه كُل مشوفيني تكليلي طلكي

ريم : ايي غيرر لازم وصدك ترا انتِ طلعتي مو هينه

روان : ليش

ريم : طلعتي روح الوليد علئ كولت زوزو ولج سحسلتي خليتي يبتلي علئ عمره ضربج

روان : احسن حتئ ليعيدها

ريم : عفيه يبعد خيتج

شو منشوف غير ياسر طب علينا وگال : هيهيهيهيهي لك هلا

ابتسمت اله وگلت : هلا بيك

ريم : رجعت حليمه العادتها القديمه مو جنت زعلان ومطنكر خلصانين منك

ياسر : دروحي لج

ريم : شعندك اجبت اصلا خربت كعدتنا

ياسر : لا والله ؟

ريم : اييييي مو صدك روان

روان : لا

ريم : خاينه

ياسر : فديتج عمي فديت كفشتج اني

روان : اسكت يمعود لحد يفوت

ريم : اوكعود واسكوت

ياسر : اي شكو شصار مصار

روان : كلشي ماكو

ياسر : بعد احسن

طبت بنان وگالت : هاي شنووو كاعدددااتتت ؟

روان : اييييي من زمان

باوعت على بنان خزرتني لان ياسر كاعد يمنا

جتي وكعدت بصفي: ايييييي شلونكم انتَ ياسر اخبارك

ياسر : اوف زفت الزفت

بنان : خيرك

ياسر : عمي منايم زين

ريم : هذا النوم كله وين راح

ياسر : شمدريني

باوعت لبنان وكلت : اكول ياسر جوعان انتة ؟

ياسر : شمدريج عمي

روان : هيج احساس

ياسر : فديت الي يحس بيه

ريم : يا بتفكر يا بتحس مفيك توئف بالنص

باوعت لبنان خازرتني واني استفز بيها : حسوي ريوك لعدد

همست بنان الي وگالت : بسيطه روان

جاوبتها بهمس وگلت : هسه علئ شنو بسيطه قابل بسته شبيج بابا هوه ريوك

خزرتني وگالت : ادبسززز اني اعلمج

روان : ايي ايي

بنان
ياسر التهى بتليفونه يلعب وريم كاعده وصافنه

كلتلها بهمس : شبيج صافنه

ريم : مادري والله وضعي تعبان بسبب الحب اوف

بنان : لتتأففين الحُب راح يجي اليوم

شهكت بصوت عالي وعاطت : كولي والله

التفت النا ياسر ب استغراب وگال : شبيج انكرصتي

ريم : معليك سوالف حريم

ياسر : امداج

بنان : ولج فضحتيناااااا

ريم : عليج الله صدك ؟

بنان : اي والله هو خابر فهد كله حضروا نفسكم باجر نجي بس مكال على شنو

ريم : صوووووخام

بنان : بابا شبيييج شنو صخام جايين زياره بعد شتردين

ريم : لج انتي ليش غبية هيج يجوز حيخطبني ؟ مثلا مثلا عفية هالمره اخاف انطي امل لروحي وانخذل اوفففففف

بنان : ما ادريي بس هوه گال حنجي واني تعرفين لازم اوصلج الاخبار

ريم : فديتجج بنون تعاي امعطج

ضحكت وگلت : شكراا ما اريدد

ريم : حقج متريدين فهد مكفي وموفي من جميع النواحي

بنان : شو ولي من يمي انتِ و روان طايحات حظ

ريم : اووي عيني اووي هسه شكلنه

دخلت روان هي والصينيه ووراها خاله رحاب
وحطتها واجه ياسر كعد كبالها ودك سوالف ومناكر بيناتهم

فاتت اخر شي زوزو تمشي عالعكاز : امممم كاعدين القَوم

روان : من زمان بيبي جنه دننتضرج تعاي تعاي سويت ريوك

رحاب : ياااا لعد اني شسويت قبل شوية

روان : احممم خالههه شبيج مو اني سويته

رحاب : اي اي انتِ

زوزو : ديلا شوية اتدنى انتَ ماخذ المكان كله

ياسر : انيييي شعليهههه

روان : هوه انتَ منو غيرك لعد

ياسر : اويلي عليك عمي اني شكد مكرود

ريم : طالع على اخيتك

_________

همام
الظهر بعد ما طلعت من المكتب
اجتي على بالي الفاهيه و اجاني دافع قوي حتى اروحلها

رحت عادي للمستشفى ف دا امشي وصلت كلش قريب للمستشفى لمحتها من بعيد تمشي وبصفها سيارة تمشي على كيف

لحكتها وهاي السيارة مدتعوفها والشارع چان فارغ هم صرت بصف السيارة

نزلت الجامه ودكيت هورن وگلت : امشي ولي منا لا انزللك حيوان

- انتَ شدخلك جيت صفح

همام : شدخلني ؟ اني ابن عمهااا يا كو**

رأسا صعد جامته ومشفت غير طارت السيارة والتراب وراه يتطاير ... وهاي واكفه تبجي

طبكت السيارة ونزلت رحتلها وگلت : هذا الحيوان شچان يحجي وياج ؟

تبجي وگالت : هـاا

همام : شنو هـاا شجان يحجي وياج ؟

مَي : مادري هو لحكني صارلي هواي امشي ويمشي وراي حتى كلتله راح اكول لابوية هسه اخابره يجي عليك

لزمتني الضحكه على شكلها وگلت : الفااااهيه الثولهه هو هيج تحجين وياا ركعي راجدي صخام بعينه تفلي عليه عيطي لمي الاوادم هاي فلحتي بيها اكول لابوية عليك

هي زادت بجي وگالت : يعني شعيط ها مدتشوف الشارع فارغ

همام : تطلع ناس من جوا الكاع بس لتسكتين لهيج نماذج

مَي : هـاا

همام: اهوووو رجعنا لـ هـا وهـا

مَي : عفيهه انتَ شبيك ويايي

همام : مابية شي خويه

شو ماشوف غير دارت وجها بدون سابق انذار وگالت : يلا باي

واني بالغلط لزمت أيدها وگلت : دقيقه اوكفي

عيونها توجهت على أيدي .. رأسا وخرتها وگالت

_ هـا ؟

همام : استغفر الله .. كلت دقيقه ابقي

هي تمسح بدموعها گالت : شتريد اذا عالقضية ف احجي وية بابا

همام : لا القضية منتهية أن شاء الله بس هاي ردت اكلج اوصلج ؟

مَي : هـاا

همام : اوووصلللج ؟؟ هاي الدنيا مو أمان ومشفتي هذا الارعن قبل شوية لاحكج

مَي : شكراً هياته للمستشفئ ميحتاج

همام : اي حتئ لو اوصلج

مَي : لا ميحتاج

عافتني وراحت واني ضليت واكف يم سيارتي اباوع عليها جان تندار عليه وكامت تأشرلي عود " تعال "
رحتلها بسرعه وگلت

_ ها تردين اوصلج

ضربت كصتها عالخفيف : لااا نسيت أكلك شكرا ساعدتني ووخرت هذا الي لحكني

همام : هسه علمود شكراً صحتيلي ؟

مي : هـاا

همام : هـاا

مي : شبييييك مو كلت شكراً غير تكولي العفو

همام : العفوو

حجت ب ارتباك : اوكف همام

همام : نعم

مَي : هسه انتَ شبيك معبس بوجهي شكراً مرة لُخ

همام : ميحتاج تشكريني أنتِ شسويت اني قابل

هي اندارت وراحت دتمشي وجان تعثر وتوكع رحتلها ركض كومتها وگلت

_ هاي شبيج غير تنتبهين

اشو اباوع عليها كامت تبجي وتنفض بملابسها گلت

_ شبيج تبجين هسه شصار

مَي : هـاا

همام : وسم شبيج يوجعج شي

اباوع عليها تبجي وگالت : مابيه شي

همام : غير تنتبهين

مَي : هـاا علئ شنو انتبه ؟

همام : علئ طوليي الحلوو شبيج مَي اقصد تنتبهين علئ نفسج مو تتعثرين

مَي : هـاا ايي

همام : امشي اوصلج

مَي : ميحتاج

همام : امشي امشي

دنمشي تريد تصعد جان تندار عليه وتخنزر وگالت

_ ما اصعد وياك شعندي صاعده وياك اعرفك تعرفني واصلا وكفتنه غلط وميحتاج هسه اني حروح واصلا بدال هل حجي جان واصله اني

اباوع عليها نهدت بيه گلت : وهسه شحجيت وياج صوجي اني گلت خلي اوصل هل بنيه لسوي مصيبه النفسها ثانيه هذا الي يسوي خير يصير هيج بحاله

مَي : هـاا

متحملت عطت بيها : شبيج هـاا مكافيي كلشي حجيت وگلت هـاا مو بزعتينيييي

مَي : هـاا هسه شبيك تعيط شحجيت اني

همام : لا سلامتج كلشي محجيتي اني بس ابالي شلون سوج ممرضه اذا كاضيتها هـاا وهـاا مو بهاوتج حجلطين المرضئ بزايد

مَي : هـاا هاي شبيك تحجي هيج ويايه

اخذت نفس وگلت : هسه متريدين اوصلج ؟

مَي : هـاا

همام : متريديييييييين اوصلججججج ؟؟

مَي : لا ما اريد

همام : يلا لعد روحي

مَي : هـاا

همام : روووحييي وليي

مَي : اووي شبيك عصبي هيج رحت رحت

همام : كل هذا وتكول ليش عصبيي روحي خويه وحدج ساعة سودهه كلت اوصلج واجي احجي وياج

خزرتني وكامت تنفض بملابسها وراحت وتمشي بهاوه وعلئ كيف شنو من بنيه هاي شحجي وياها هـا و هـاا

___________

غرفه البنات
كاعدين كلنا بالغرفه متجمعين نسولف

ورزان كامت تبجي وگالت : والله عرفته هذا ايمن

روان : وكلتي لـ ايهم ؟

رزان : اكيد كلتله وهو كال بسيطه

روان : اي عفية خل يلعب بي طوبه

ريم : اصلا بيت شرشبيل ميمشون الا بالاهاين

روان : اي والله

بنان : صدككك تدرون شنو اليوم حيجون بيت مؤمل

روان شهكت وگالت : كووولي والله

بنان : شبيجن اي والله حيجون فهد كلي

ريم : اوي حيجي الماعنده احساس مدري شوكت يحس

روان : يول خاف جاي يخطبج يمههه

ريم : شداكول ترا معنده احساس ماتوقع يخطبني لحد يخلي بگلبي امل وانخذل بسببه هو مطييي ميحسسسس

بنان : لتخافين يحس

روان : اكص ايدي اذا ما تزوجتو

ريم : كصيها مو اني اعرف حظي زين

روان : لتخافين حتزوجين انتي هم مثل البصفج التبجي وتعوفني وحدي بالاخير

رزان : عزاااا اني شوكت عايفتج شو حتى كعدت يمج ونفس البيت

روان : لا حياتي عفتيني و شنو تزووووجتي بالجنسيه شمكتوب عزباء مثلا ؟ لا مكتوب مُتزوجه وهااييي ريم والله احس راح تعوفيني مثل هاي وانتي رزان خليفيدج ايهم

بنان : عزا بعينجن راسيييي دخت كافيي

كالت ريم وهي تعيط : لا عيني لا ما اتزوج خليني بس احبه ولو ميحس بس هيج احسن ما اريد اخون العهد

رزان : صدك البيت وصخ لو نظيف

ريم : اي صدك شو ممنتبهه وامي ومحد يدري .. عزاااا لازم نعدله

بنان : وشلون هسه

ريم : غير ننظف ننزل

روان :انتن نزلن شعلية أني قابل شستفاد جاين علمودي لا همه جاين علئ ريم

ريم : امشن ننظف عليكم الله

بنان : امشي يلا روان ويانه

رزان : هاي متجي اصلا

روان : طبعا مابية حيل روحن انتن

رزان : تجيننن

روان : ماااا اجي روحننن

ريم راحت وجرت روان من أيدها : امشييييي يعني امشي

روان : شبيج ابقى هنا احضرلج هديماتج لازم تكشخين لان اكيد هسه امه واخته يجون ويشوفوج

ريم : يااا يشوفوني حتموتيني امشييي

نزلنا كلنا جوا وبدينا ننظف وزوزو مصدومه : ياااا گبت النداره عدجن

ريم : اي بيبي كله بفضلي كمت الح عليهن

زوزو : اي بس البيت مو وصخ

جتي روان شايله سطل مي وطشته

زوزو : يااااع يااااااع شوف روان يا سطل حبيبة نظيف

رزان : بيبي عدنا حملة تنظيف بيت وصخ نظيف نريد ننظفه

بنان ضحكت ضحكه قويه : شوف هاي عطوبها

روان : ما اسمحلج ست بنااان

البيت انترس مي روان تجيب وتجب ورزان وبنان راحن يعدلن الصاله بقن ريم وروان ينشفن بالماسحه

روان : عزا خرب بيج ريم كسرتيلي ظهري يمهههه

ريم : وانتي شسويتي بس نكعتينه مي وهاهي

نزل ياسر يصوفر : العببببب هاي شكوو اليوم العالمي للنظافه .. مدا اصدك رواني تنظف معجزه معجزه

زوزو : بس لتحشر خشمك احنه بخير

ياسر : لا بالعكس من احشر خشمي انتوا بخير

ريم : اهووو راح يتفلسف

حجت روان بهمس : هههههههَ خليه يتفلسف فديته

هو نزل كبل اجه كعد يم زوزو : اكلج زوزو تخطبيلي روان

زوزو : لا

ياسر : ليششش

زوزو. : انتَ مخبل هي عاقله مترهمون

ياسر : لا نرهم انتي سأليها وشوفي عمييي نفس الدقيقه تدزلج الموافقه

زوزو : لتخاف روان الك ب ايدي اخطبها الك

ياسر : فديت زوزو

زوزو : ولي لك مصلحجي

ياسر : شبيج مدتشوفين كفشتهاا شحلاتها

زوزو : تجنن مدام بت اياد وسراب

ياسر : اهخخ ترا مبقى شي واتخرج وهي نجحت بعد يعني هاي ترا شسمه اتزوووج مو تكولون

زوزو : ابوك وين يقبل

ياسر : عمي يقنعه فهد عود

زوزو : نشوف الله كريم شلون تصفى وياك

ريم دتنشف بالكاع وتضحك : دتسمعين شديكول

روان : شنو

ريم : شبيج ديحجي ويا زوزو عليج

روان : عزاااا يحجي علية؟

ريم : يريد يخطبج

روان : شو مسمعت

ريم : ملتهيه غير لعد سمعي بس يخطبج لتوافقين

روان : ليش

ريم : ها تردين تخونين العهد فوكاها تحجي علية

روان : لا عيني الموضوع هذا يختلف عن هذا حبيبج الميحس بيج

ريم : اوف تردين تخونيني

بهل دقايق فات ايهم : هـا ولكم

زوزو : هلا يمه هلا شلونك وليدي

اجه ايهم باس راسها وگال : زين بشوفتج

باوعلهم ياسر وهو يهز ايده : والله زين شنو اني ابن البطه السوده

زوزو : اسكت انتَ اي ايهم عيني شلونك

ايهم : تمام زين .. رزان وينها

روان : هسه اصيحها

جتي رزان گالت : ها ايهم جيت

ايهم : اي تعاي وراي فوك

صعدت رزان وأيهم وجتي بنان : خلصتوا
ريم من زمان والله .. شو فهد تأخر

بنان : هسه قبل شوية خابرته كال بالطريق

ريم : حروح ابدل

روان : امشي اختارلج هديمات بيهن حَظ

ريم : امشي عينيييي

_______

بنان
رحت لخاله رحاب ومريم وبيبي كلتلهم حيجون خطار فهد كال ف بدوا يتحضرون اني صعدت للغرفه بدلت وخلصت وكعدت امشط بشعري ..

دخل فهد للغرفه بهالثواني كمت ركض عليه حضنته

بنان : تأخرت

فهد : اي الطريق ازدحام صدك تعاي كوليلي

بنان : ايي ؟

فهد : شنو شهل جمال

ابتسمت اله وگلت : مو بجمالك

ضحك وكال : ادريي

بنان : فهددد شبيك

فهد : اووي شبي فهااااد

بنان : مغرور

فهد : من زمان

بنان : زين تدري بنفسك

فهد : ايي

بنان : شوف روح بدل وهاي .. صدك مؤمل حيجي

فهد : اي كلي فد شوية .. حتى مستغرب معقولة هيج زيارة اني اعرف بي ميجيب امه و اخته كل مرة يجي هو وحده

بنان : والله مادري .. أكلك اني حلوة طالعه

فهد : تخبلين بدون متكوليلي چا غير أنتِ مرت الفهد

ضحكت بخجل وگلت : مشتاقتلك

فهد : ايبااااخ مشتاقتلي

بنان : اي والله من صبح لهسه انتظرك .. مكانك خالي حيل

تقرب علية حيل وباسني بمكان شامتي وگال : اني هم مشتاقلج درابين گلبي

ابتسمت وكلتله : الله اشتاقيت لدرابين گلبي مكلتها الي اليوم

ضحك وكلي : بهيج راح تخليني ابطل من شغلي واكابلج واكعد

بنان : لاا عيني

فهد : لعد باعي اريد اكلج شي

بنان : شنو

فهد : اتوقع مؤمل جاي يخطب ريم

بنان : اهاا ، شمدريك

فهد : والله فكرت ملكيت غيرها يعني حسب تحليلاتي

بنان : مادري صدك صدك

فهد : كولي

بنان : عود باوع لتلبس اسود

فهد : خيييير ترا يم الزلم مطالع كبال نسوان

بنان : معلية الا اذب كل هدومك السود بسيطه بعدين شنو جبتلي برتقال ؟

فهد : حتى اعرف شسوي بيج ديري بالج خوشش والبرتقال جبتلج جوا لتخافين

بنان : امممم

فهد : حلبس اسود

بنان : همممم صدك اني شعلية بيك .. حنزل اصبلك اكل قبل ليجون وهاي

ضحك وگال : خوش بس اعصابج .. اكلي برتقال يهدأ الأعصاب

باوعتله صفح وگلت : اضحك اضحك

فهد : مو اجي افكس عيونج

بنان : تفكسهن ؟

فهد : وابوسهن هم

بنان : عساس ما بايسهن

ضحك وگال : هـاا ظاهر مليتي تعاي اجرب غير اماكن ابوس ؟

بنان : فهدددد

فهد : فهااااد شبي فهااادد

عفته ونزلت جوا وحضرتله اكل

___________

روان
صعدت ريم فوك تبدل واني بقيت بالمطبخ اغسل ايدي

سمعت صوت ياسر وراي گال : ها عمي

انداريت عليه وگلت : هـا ياسر شتريد

ياسر : اريدج

روان : شوف شوف صاير متستحي

نفظت ايدي واشمشم بيها گلت : ايعععع

ضحك وگال : شبيج

روان : ايدي

ياسر : شبيها

روان : مدتروح الريحه مال منظفات

ياسر : تجنن ريحتها .. اكلج رواني

روان : عيون روانك

ياسر : احمممم قررت اني ترا

روان : خيرك

ياسر : قررت ورا تخرجي نتزوج

روان : مااااا

ياسر : هو شنو ماا ؟ ترا هاهيه حتى راح احجي ويه فهد وابوية

روان : لا عفية ياسررر

ياسر: شبيج ضجتي لازم تردين تزوجين يوسف

روان : عووففف هذا عوفف يوسف بس الوقت مو مناسب واني بعد طالبة سادس منا وهيج ف شلون رح ادبر كل هذا

ياسر : والله وياي مفيش مستحيل نتزوج وروحي كملي

روان : بكل مرة تكولي الموضوع هذا وتنرفزني ياسر ما اريد هسه اصلا ششفت من حياتي

ياسر : شفتيني

روان : عزااا

بدا شوي شوي يتقرب علية واني خازرته وادفع بي گلت : مخبلللل شبيك ياسررر

ياسر : شبي ياسر شبيييي

روان : وخر مخبل لحد يجي

ياسر : شو دقيقه خل ابوسج

دفعته حيل وكلت : مخبل سرسري شنو هل تصرفات صاير حيل مو قانوني وجنت اكول ياسر مؤدب بعدين شتبوس بية متروسه ريحه مال منظفات

ياسر : لا عمي انتِ كلج بيج ريحة ورد طركاعتي أنتِ

ابتسمت اله وگلت : والله انتَ فد حباب بس لو تبطل سوالفك السرسرية اني بخير يلا امشي اطلع ولي

ياسر : ليش هيج انتِ حلوه روان

روان : شنوو

ياسر : كُلشي بيج حلوو رواني

روان : اممم

ضحك وگال : كلتلج كلمتين ومعتي شجاج عمي

دفعته وگلت : وخرر ياسررر متستحي انتَ

اجه يتقرب مرا لخ گلت : اني اني حطلع يلا بايييي

ياسر : اهخخخخ يا روان وراج وراج والزمن طويل

انسحبت بهدوء من يمه وطللعت و گلبي يدك بسرعه ..

________________

رزان
جان ايهم كاعد كبالي ويلعب بتليفونه وعيونه بكصته

رزان : ايهم

ايهم : ها

رزان : شبيك

ابتسم ابتسامة تسليك وگال : ولا شي

رزان : والله بيك شي

ايهم : اي بية بس صبريلي والله لا العب بي طوبة هذا ايمن

رزان : ايهم عوفه شنسويله خليه بكيفه شيحجي خلي يحجي لتروح تصير سالفه

ايهم : واني عاجبني اسويها سالفه

رزان : ايهمممم

ايهم : تعاي رزان

رحت يمه وكعدت بصفه حضني وضل يحجي وگال : ما اقبل اي احد يمسج بكلمه وحده والله لا اكلب عاليها واطيها واعلمه منو ايهم

حضنته أكثر وگلت : اخاف عليك والله

ابتسم وگلت : لتخافين علية

رزان : سد الموضوع هذا ، دريت حيجون بيت مؤمل علساس

ايهم : اي عرفت من ياسر

رزان : عزا شبسرعه كلك

ايهم : متعرفين ياسر قابل

رزان : لا شلون

ايهم : شو بلا باوعي علية

باوعت عليه وضل صافن بوجهي وگال : احس صايرة عندج هالات سود

ضحكت وكلت : حتى بهاي مركز

ايهم : اني مركز بـ أدَق تفاصيلج وكافي تبجيننن شوفي عيونج شلون ذبنالات

رزان : تمام .. امشي ننزل جوا يمهم

ايهم : انزلي واجي وراج

________________

ريم
جنه كاعدين بالصاله واندكت الباب عرفنا بيت مؤمل جوي

الزلم جانوا بالصاله والبنات كلنا تجمعنا بالهول
همام فتح الباب وامي تلكت النسوان

گلبي كام يدك سريع وكبل رحت طيران للشباك باوعت عليهم شفت شكد نسوان جايات وزلم هواي وهو جان كاشخ اي عيني اكشخ شكو عليك

حسيت على بنان وراي گالت : ها عيني شعندج هنا

ريم : ها معندي شي واكفه

ضحكت وگالت : اي اي واكفه تعاي نسلم طبن النسوان

رحت هناك وكفنا بالسره نسلم

كالت روان : وين جنتي

ريم : هنا

سلمت واني مصدومه يمه شو هذوله هواي يلا اهمشي كشخت

كعدنا كلنا وبدن دك سوالف امي وام مؤمل واللي عرفته اثنين من خالاته جايات واثنين من عماته

كالت مريم بهمس : وحده منكم تجيب الكيك والعصاير بالمطبخ

ريم : كومي روان انتِ

روان : قابل اني العروسه

ريم : شو انتي واثقه حيخطبني ؟

روان : لج بابا مبينين

كالت رزان : رح ننفضح

خنزرت عليهن وكلت : كمتتت

كمت بغضب للمطبخ واني ادردم : هسه منو يكول علية ومنو يكول رح انخطب .. ريم لتنطين امل لنفسج وبعدين تبجين تالي الليل ويكولون خطب بنت خالته

شلت الصينيه على كيفي ورحت وديتها الهم وبديت اقدم للنسوان واسمع اشكال المدح

كالت وحده منهن : صلوات عالنبي هم جمال وهم نداره

كالت امي : لا ولج خية متعرفيها كاضيتها نوم والله ولا تشتغل لج اكل متعرف تسوووي

ضحكت ام مؤمل : عادي مثل اسيل نفس الشي كلهن هيجي بس تتزوج بعد تتعلم

باوعت لـ امي وخنزرت عليها وانوب لأسيل الي تضحك

كعدت بفشلة واني اسمع امي تحجي علية وتكول : تمبل مال نوم بس لا بالدراسه ريم شاطره

كالت وهي مكمله كلامها بضحكه : والله يا ام فهد احنه اجيناكم بفد موضوع واتمنى متردونا

كالت امي : يا عيني كولي

- احنه اجينا نطلب ايد بنتكم ريم

ضحكت زوزو : المن داده

- لـ ابني مؤمل بما انوا هو رايدها والبنية شايفتها متنعاب ماطول اخت الفهد وما شاء الله عليها

فتحت عيوني بصدمه محسيت على ايشي تفكيري جان عباره عن : شنو معقوله ؟ مؤمل خطبني

حسيت على كرصه قوية جيت اكول اووووي بس تداركت الوضع روان همستلي : ركضي بسرعه فوك
كمت واني صافنه بصدمه وامشي على كيفي بعدين صعدت ركض لغرفتي

شنو مؤمل خطبني يعني .. يعني صدك
نزلت دموعي مثل الشلال واني فرحانه يعني صدك خطبني

ثواني ودخلت روان تضحك : هااااا اني شكلت

كمت احجي واني ابجي : لج خطبني صدك !

روان : اي اي هو هذا الي ميحس ؟ خطبج لج وأنتِ كاعده تنوحين لج اركصي صخمي

ريم : ماكدر احس مدا استوعب

جتي علية روان حضنتني : هلگد تحبي ولج الحية الصفره

ريم : لعد المن اكتب واصخم وعبارات ودفتر مسويتله ومكبره راسه

روان : شمدريني وها عود فكي البلوك شوفي شدازلج شكايل يجوز مراسلج

ريم : لاااا يمة هسه يكول هاي خفيفه

روان : اي والله هم صدك نسيت

ريم : اي هسه شسوي

روان : انتضريهم يروحون وخلي نشوف شيكولون

ريم : يمهههه يمهه اهخخخ گلبي

روان : يمههه شبي گلبج

ريم : من الحُب حتخربط

روان : امداج تعاي نشغل اغاني

ريم : تردين تفضحينااا مثل يسورتج أقل شي وجايب الديجي ويتمركص

روان : هم صدك خلي يطلعن ونشوف شغلنا

______________

بنان
سمعت الكلام كله وكاعده فرحانه لريم

كالت خاله رحاب : والله نتشرف بيكم احنه ونخليكم فوك راسنا بس لازم نشوف رأيها وقرارها ورأي ابوها وعمها و اخوتها

ام مؤمل : أخذوا راحتكم بالتفكير حبيبتي والله منلكى احسن من ريم وهي بالذات ابني شايفها وهاويها والله

زوزو : يا عيني شلون وليد مؤمل والله احبه خوش ولد هو وفهد من زمان سوية

- اي والله هو وفهد اخوه

ضلوا يسولفون سوالف واني ومريم ورزان صافنات
مرت ساعتين تقريبا وصارت هوسه برا ف عرفنا طلعوا

باوعت على فهد واكف يم مؤمل ومخنزر عليه ومبين يدردم ضحكت على شكلهم ومؤمل يغمز ويضحك وهنه النسوان هم كامن سلمنا عليهم مره ثانيه وودعناهم

طلعوا وطبوا الولد كعدوا

كال ياسر : وين الحية الصفره بالله هاي مال زواج وجايبيلها زلم ومتعبين روحهم وهي اقوى شي عدها صابغه شعرها بنفسجي

كفخه فهد وگال : انجب ليش متستاهل ريم ؟

ياسر : اي والله زعطوطه مو مال زواج حتى لزمتني الضحكه بالصاله

همام : مادام زعطوطه يعني روان هم زعطوطه شكو كاتل نفسك عليها لعد ؟

ياسر : بس لو لتحشر نفسك اني شغلتي وحد

همام : شو انجب صدك فهد أن شاء الله تريد تنطيها لمؤمل

فهد : ليش شبي مؤمل .. بنان وين ريم

بنان : ها ريم فوك

كال عمو محمد : صيحيها خلي نحجي وياها

كال فهد : لا بوية خاف هاي تستحي عود اني احجي وياها

ياسر : عود شمعنى انتَ واني شنو

فهد : اني الاخ الجبير

همام : عادي نفس الشي بس بكيفك

زياد : خلو فهد يحجي وياها وها اها

كال فهد : اي هاهيه

ياسر : اوي خايف على مشاعرها الخجوله هي فوك مووو بسيطه

نب ياسر وكوم اصعد فوك

باوع فهد بضحكه : مخبل

_______

روان
كاعده وبلكوة سكتت ريم كل ثانيه وتبجي

روان : لج اسكتيييي كافي عزا بعينج حتبجيني

ريم : مادري احس الصدمه بية لحد الان .. يمهه جايب زلم هواي هم

روان: اعتقد حتى فهد ميكدر يفشله ف كدر يلعبها صح حبيبج الميحس بيج

ريم : انجبي يحس بية

روان : لعد منو طول اليوم يكول ميحس ومدري شنو وتجيبين وتحجين عليه .. اصلا ادري حتوافقين وتزوجين وتعوفيني

ريم : انجبي ما اعوفج

روان : بس احسج راح توافقين

ريم : عقلي متشوش هسه ف ماكدر انطيج جواب

روان : اهوووو

اندفعت الباب وفات ياسر وگال : هيهيهيهيهي هذا ياهو الخطبوه اليوم

روان : انيييي

ياسر : دنجبي " يقلد " .. ريم خطبوها عشيرة اليوم

حجت ريم وهي تمثل الصدمه : اني ؟ منو خطبني

ياسر : خطبج مؤمل

اباوع على ريم بالكوه حابسه الضحكه

ريم : يا مؤمل ؟ ياهوااا ؟

ياسر : ياعيني متعرفين مؤمل أخو فهد الي من غير ام

ريم : اهااا اي عرفته .. هذا شعجب خطبني

ياسر : والله عمي اني هم داكول هذا شعنده خطبج هو ضابط ورتبه وهاي وكذا يجي يخطب وحده مثلج حية صفره

ريم : انجببب

متحملت واني اباوع على شكل ريم وطكيتها بضحكه شعلوها

عاط ياسر : بعد بعد ماكو ضحكة أعلى

روان : هسه شسويت

كال ياسر. : عيني فهد يكول رح احجي وياها خاف تحرجوها من تحجون وياها ياعيني يخاف على مشاعرج الجياشه

ريم : حقه اني ريمته شلون يعرفني هذا الأخ الزين مو مثلك يا مخبل

لزمها من شعرها وگال : هاي ياهوا المخبل

ريم : ماكو غيرك انت

صرت بنصهم وگلت : هاي شبيكم يمعودين هي خطبه وانتَ شنو اجيت لحتى تتعارك وية اختك

ريم : شفتي روان شفتي هذا الي تحبيه

ياسر : انجبي اكوملج

روان : عزا كافي شبيكم

أندار علية كال : حظووووظ بسيطه هي بقت علية والله بس اتخرجج اهخخخ الا اتزوج

ضحكت وگلت : تمام انفعلت زايد انتَ

ياسر : اي اي عود هاي حطي الفكره براسج لان نتزوج نتزوج الدنيا راح يتزوجون واني بعدني والله هاي حلوة

روان : اوك تمام يلا كافي

ريم : اهمداااااك حاط عينك علية

ياسر : احساسي فهد ينطيج هو حتى يحب مؤمل أكثر مني فـ هذا احساسي أما اني لا راح أعارض هاي القسمه واكول لا متزوجين الا اتزوج اني

ريم : لا شو الا اتزوج قبلك

ياسر : ها يعني تردين مؤمل يعني تريدين تزوجين ؟

ريم : لااا لاا

طكيتها بضحكه مرة ثانيه واثنينهم التفتوا وريم تعرفني على شنو اضحك

ياسر : انتي شبيج كلسع وتتمضحكين

روان : سلامتك

_______

بالليل
بنان
كعدت بقلق وفهد والولد بالصاله استحيت احجي اكله اريد اروح للصيدليه

دزيت رساله لروان كلتلها تعالي اريدج
جتي علية خلال ثواني

روان : ها بنان شبيج

بنان : باععي روان اريد اروح للصيدليه

روان : ليش شبيج مريضه

بنان : لا لا

روان : لعد شنو شبيج گلبج يوجعج نقص علاج ؟

بنان : لج لا لا مو هيج بس باعي استحي اكول لفهد فـ عادي تكولين لياسر يودينا

روان : ليش تستحين منه بعدين شنو شتردين من الصيدليه

بنان : اختبار حمل

روان : ها شنوووو انتِ حامل

بنان : ما ادري ما ادري حاسه هيج

روان : اهخخخ واصيرر خاله بوييههه

بنان : المهم حبابه بس شوفي ياسر

روان : سبحان مغير الاحوال مو متقبلين احجي ويا وعيب وعيب

بنان : انجبي هاي شغلة ضرورية بس اجيبها وهم اعرف شلون اتصرف وياج بعد

هزت أيدها وراحت نزلت
ضليت كاعده واعصر ب ايدي من الارتباك وخايفههه

كم دقيقه وجتي علية : يلا بدلي حروح ابدل حتى اجي وياج هم لكيته بالهول محد يمه كال انتضركمم

بنان : خوش

رحت بدلت لبست صايه عسريع وروان بدلت وجتي
وياي

نزلنا جوا شافتنا خاله رحاب : ها وين حتروحن

بنان : هسه ياسر راح ياخذنا للصيدليه نجيب دوا

رحاب : ليش رايحين خو انطو اسم الدوا ويجيبه

بنان : لا خاله مو هاي شسمه يعني اني اعرف علاجي ولازم اشوفه بعيني

روان : اي خاله واني ميصير اعوف اختي وحدها

رحاب : تمام يمه على راحتكم

طلعنا برا لكينا ياسر ينتضرنا بالسيارة صعدنا

بالسيارة كال : هلا بيجن عمي بنان صدك جان انطيتيني الدوا اجيبلج عليه ليش جايه ومتعبه نفسج

بنان : لا لا عندي علاج اريد اجيبه اني اعرفه

ياسر : خوش

شغل سيارته واخذنا للصيدليه

لما وصلنا نزل ورانا ياسر

كالت روان : وين حتجي ؟

ياسر : اي ؟ ليش

روان : لا ابقى انتضرنا هنا هسه نجي

ياسر : خلي اجي ليش تروحن وحدجن

روان : شغله خاصه موهنديس ياسر انتضرررر هنااا

جتي وياي روان وهي تضحك گالت : يمههه مينضم عليه شي شنو هذا لا وملكينا غير ياسر

بنان : انچبي

فتنا للصيدليه واشترينا اختبار الحمل وطلعنا ورجعنا للبيت
من صعدنا بالسيارة ياسر جان موجود وعالك اغنية

كالت روان بضحكة : انتَ ما ناوي تبدل هاي الاغنيه

ضحك وگال : ما ابدلهاااا عمييي الاغنيه هاي مزروعه بگلبي " كمل يغني" تورط كلبي في حبك تورررط .. تخررررربط تخربط نومي في ليلي تخربط "

وروان تتمضحك خزرتها وهمست يمها : ثكل شوية ثكل

روان : ايي شبيجج

رجعنا للبيت بسلام واني فرحانه وهالشي سويته هم مو بس لاني مستحيه من فهد جنت شاكه اني حامل واذا صدك طلعت حامل حتى اسويها اله مفاجأه

_____________

متجمعين بغرفة الولد
گال ايهم بعد ما سولف الهم كُل شي : واني مضبط كلشي بس هسه يدز ونروح انتوا جاهزين ؟

فهد : عد عيناك ابن عمي بس تكول وينكم تلكانه كبالك

كام ياسر : دقت طبول الحربببب

كفخه همام : اكعد انت وانچب خوش خلينا نشوف دربنا زين

رجعله الكفخه ياسر : وانت شدخلك بيه

فهد : استغفر الله شلون راح اكتلكم انتوا .. ايهم انت شلون بديت تحجي وياه وهاي

ايهم : يمعود متت من الصبح حولت رقمه بجهازي ومن الصبح لهسه احجي وياه وقشمرت عليه عساس اني رزان بس مو مكالمه بس رسايل وضحكت عليه .. خل يدزززز حتخبل والله لا اجرم بيه

ورا شوية اجه اشعار لتليفونه تجمعنا كلنه يم ايهم

فهد : الموقع هذا

ايهم : خوش يلا شباب اريد فزعتكم ولو اني وحدي رح اشوه خلقته والله العظيم ماعرف ابن عمي ابن خالي وخلي يصبرلي

كاموا كلهم وصعدوا بالسيارة وأيهم يسوق

ياسر
لما صعدنا بالسيارة واحد يعيط والثاني يتعارك ويه روحه همام صافن عالشباك عبالك ديباوع عالبحر وحسن بعده مجاي من شغله ف اضطرينا نروح وحدنا

وأيهم كلسع ويعيط وفهد يدليه عالمكان

عطت عليهم : انتوا شبيكم سلبيين حيل طلعولنا اغاني حتى يصير عدنا حماس من نضربه

ايهم : شوف هذا البطران يمكن راح احطك واكتلك بدل ايمن

ياسر : شدعواك عمي هو اني شكلت ؟

فهد : تسوي فضل تضربه ترجعله عقله تصخمه شو شتسويله

ايهم : اهخخخخ شوف هذا طلع صفح كبالي

همام : اصبر ميطير راسله فهد كله اني بالطريق عود عساس الدكتور ايهم ابن زيودي

فهد : هو شداسوي اني

ياسر : اهخخ كئبتوني حيل صراحةً شنو هاي اغاني ماكو اوف

فهد : راح اكفخك

ياسر : مو وياك ترا ؟

فهد : هم اكفخك انلصم

تقريب النص ساعه وصلنا للمكان
ما چان عام كلش
لمحنا ايمن من بعيد واكف

كال ايهم : جايك

نزلنا من السيارة واحد ورا اللاخ
اباوع على همام متجتف واكف

ياسر : وين احنه بالمدرسه

همام : معليك خلي نضراتك حاده وانت تباوعله
مشوا كدامنا فهد وأيهم .. ايهم اول ما شافه ما سيطر على روحي وهجم على ايمن كتله بوكسات وببطنه وراجديات حار شسوا

أندار النا فهد وگال : شوفو شغلكم اخواني

ياسر : تدلل بعد عمي

هجمنا اربعتنا على ايمن وهو يريد يحجي مننطي مجال

صرخ بوجهه ايهم : انت الي جبتها لروحك تحجي بشرف مرتي يا چلب يا نذل والله لا اجنزك اليوم اكسرك ما اخلي بيك عظم صاحي

ايمن گال : مووو انيييي

فهد : اها مو انتَ لعد شعدك جاي هناا

اخر شي كال والدمايه تجري منه : هو اخذها مني اني الي ردتها قبله .. انتوا ما نطيتوها الية

ايهم : ولأن قبلت انتَ كمت تشوه سمعتها

ركعه بوكس فلش خشمه

ياسر : انت تعرف ويامن اندكيت ايمنن ومجرب قبل هالمرة

همام كال : يلا يلا عالاقل خلي اضرب راجدي

فهد : بس مو قوي دشوف وجهه مينشاف خطيهه شلون يروح شيكول لبابا وماما

ضحكنا اني وهمام : ودادا

اخر شي ايهم كضه بيه التوبه احنه كملناها فوكاه
وهو صار يتوسل بينا نهده

كال فهد : يلا كافي بعد عوفوه خلينا نرجع .. يا ويلك تجيب سيرة بنت عمي على لسانك حيوان

وأيهم مستمر يضرب بي و ما عافه ابد إلى أن فهد سحبه وگال : كافي ايهم

ياسر : يستاهل دقيقه خل اضربه بعد

همام : انجب اوكف

كام من ايمن يلهث ويهدده : والله العظيم اذا مرة ثانيه سويت شي لو حجيت حجاية على مرتي اندمك

عفناه يتلوى بنص الشارع
صعدنا بالسيارة وهالمره فهد يسوق

كال ايهم : طلعت قهري بي الجلب

فهد : ما قصرت دكتورنا

همست لحمام : ترا اني هم طلعت ضيم حبي بي

همام : كفو خيتي يسرى متقصرين

رفعت ايدي اريد اضربه عاط فهد : كافييي عاددد

_____________

بنان
فهد والولد طلعوا ورزان تلوب وخايفه بس مكالت من شنو طلعت من غرفة البنات وجيت لغرفتي

جربت اختبار الحمل وعيوني تدمع وارجف
اباوع عليه و ايدي ترجف مثل السعفه
خطين موجودات .. يعني اني حامل !

ضحكت ومن بين ضحكتي دموعي تجري
فرحت حيل وصرت اتلمس بطني .. اكو روح بداخلي وقطعه مني .. ومن فهد

كمت ابجي بالزايد واني افكر من نفس الحظه اذا بنية أو ولد .. ميهمني ايشي المُهم يجي فهد و اكوله

ضليت كاعده انتضره لل 12 بالليل وهو تأخر حيل
واني بالي كله يم اللي داخل بطني .. اني حامل !

وكلسع ابتسم وعيوني تدمع .. صار عندي حماس اعرف شنو ردة فعل فهد لما يعرف .. باوعت للساعه وعيوني على ميل الثواني وهو يتحرك ، وينك فهد تعال

ورا دقايق انفتحت باب الغرفه وفات فهد

كمت بسرعه عليه وكلتله بخوف : وين جنت فهد

فهد : وية الولد طالعين

ابتسمت اله وگلت : والله خفت عليك لان تأخرت هواي

باوعلي وكال : لتخافين وين اروح قابل .. تدرين ما تمُر ثانيه علية اذا ما اشتاقلج بيها

شمر سويج السيارة واني فرحانه والابتسامه شاكه خدي

كالي وهو مبتسم : اشوفج فرحانه خيرر شنو الي صاير ؟

جاوبته : هيج

فهد : لعد اني راح افوت اسبح

بنان : اوك على راحتك

درت وجهي بضحكه انتضر اللحظه الي رح يعرف بيها اني حامل وشنو موقفه

وكفت عالمرايا اعدل شكلي وخليت مكياج
خلال وكفتي سمعت صوت اشعارات وحده ورا الثانيه من تليفونه

استغربت واجاني فضول قوي اشوف خاف فدشي مهم

جريت التليفون وفتحته شفت جايته رساله مكتوب بيها

" فهد وينك رد مشتاقتلك هواي "

الثانيه " فهد وينك جاوب "

ايدي خدرت وذبيت تليفونه مني بصدمه : شنو هاي منية !

نهاية البارت
يتبع ..

(لاتنسوا التصويت)

أن شاء الله يعجبكم البارت + بال 5000 كلمة 💖

7.nldn حسابنا الأنستا

إلى اللقاء يا أعز العابرين في قلبي ♡.

الكاتبات دينا & نور