رواية نقطة لقاء الفصل الثالث والعشرون 23 - بقلم الكاتبة دينا _ الكاتبة نور

يُصاب الإنسان بإنسان آخر ...

___________

بنان : فهد !

دخل عصبي وميشوف ايشي .. جان يباوع بصدمه وجهه احمر ونار

بجيت ورحت حضنته من خوفتي جنت استنجد بي
كأنما هو بر الأمان وطوق النجاة الوحيد اللي بقى الي .. حتى يساعدني وميخلي فراس يتقربلنا مرة ثانية

عاط بوجهي عيطة لحد الان ما انساها

" شعندج هناا ؟؟"

بنان : فهد انطيني مجال افهمك

بجيت واني احجي ويا .. هو مباوع بوجهي ركض كبل اخذ شالي ولبسنيا وهو يعت بية واني ابجي واتوسل احجيلة .. مجان مهتم الي ابد جان بملابس الدوام حتى

سحبني حيل من ايدي احجي ويا ولا كأنما يسمعني
حتى ما انتبه لجرح ايدي والدم الي ترس ملابسي
صعدني بسيارة ويسحب بية حيل .. وداني للبيت اللي اول مرة جابني بيه .. جانت بدايتنا هناك وكلشي هناك بدا

نزل من السيارة واتجه علية يريد ينزلني ، جلبت ب

_ ايده واني ابجي : عليك الله اسمعني اني مو دا احجي وياك فهد

باوعلي لكن نظراته مجانت عادية تمنيت انوا اني ميتة ولا شفت هل منظر ، عيونه حُمر وملامحه متغيره من الأعصاب ...

_ گال بهدوء : اشششش ولا نفس اسمع منج !

بجيت مرة ثانيه .. دخلنا للبيت ودفعني حيل بالصاله
حسيته هنا راح ينفجر بية راح يضربني شراح يسوي بية ماعرف جنت اباوع بخوف عليه واني ابجي شعور اللوم والندم ياكلني اكل شافني بغير منظر هناك وفسرها بغير نظرة اكيد .. كله صوجي لو حاجية من البداية مجان صار كل هذا ياربي دخيلك
بدا يحجي ويكول كلماته ..

مجانت بس كلمات خناجر وتطعن بگلبي ، بس والله العظيم اني ردت اكوله ورحت لفراس حتى احمي خواتي مو علمود اي شي مجان بعقلي غير خواتي وماعرف شلون رحت !

كام يحجي ويعيط .. عيونه حمر وجهه احمر : ليش بنان هيج تسوين بية اني لكيتها من وحده مو اثنين والله ما استاهل كل هذا .. كله بسببي اني .. اخذتج وساعدتج بس مجانت مساعدة عقدت عليج حتى تأخذين راحتج ومتصير كدامنا أمور معقده وغير اشياء ومدام اهلي يعرفون ويمهم انتي امنت عليج ووثقت بيج وانطيتج كامل الحرية ولا يوم حاسبتج على شي سويتي .. جانت كل يوم توصلني رسائل من رقم غريب وما اصدكها واني اشتغل وأدور ع ابوجن الحيوان .. وما اهتم ابد لهيج أمور واكول تفاهات مستحيل اكو هيج شي اكيد واحد ديضحك علية لو يحاول يوكعني

.. اليوم وصلتني رسالة مكتوب بيها " تعال لهذا العنوان *** شوف مرتك شدتسوي هنا " اني ما اتحملت كلت الا اروح واعرف شنو الي ديصير عفت كل شغلي وطلعت واني متأكد مجنت افكر بيج لا جنت افكر اكول هذا منو اللي يحاول يسوي هيج ويريد يوكعني لو احتمال فخ ؟ من وصلتت للشقه وشفتج بهذاك المنظر وبدون حجاب وبهاي حالتج .. تعرفين شنو الصدمه هي هاي الصدمه انتي حتى ما جنتي ع بالي هلكد ما جنت واثق بيج ومتأكد انتي مو هناك .. جنت بحلم مو بواقع

بنان جنت اشوف بيج الدنيا من فرحتي واني اكول بگلبي لكيتها هي هاي الجنت أتمناها سويت كلشي وخليتج علئ راحتج حتئ ومجبرتج ع شي ولا جربتج تحبيني .. وبالاخير انتي هم طعنتيني مثل ما طعنتني الاولى

هزيت راسي حيل واني ابجي : وحق الله مو مثل ما انت متصور والله العظيم مو هيج فهد والله

لزمني من جتفي حيل يهز بية ويعيط بوجهي : شنو لعدد هااا شنو شتفسرين غير هذا بنان لحد الان اني محترم نفسي وما ماد ايدي عليج لتجذبين بعد علية لان مراح تفيد اي جذبة

بنان : والله العظيم احلفلك بالقران مو هيج فهد هذا فراس والله فراس هو جان اباله كل هذا ومخطط لكلشي حتى يسوي هيج وتشوفني بغير نظرة فهد اسمعني احلف بالقران مو مثل ما متصور فهد اني بناااان

رفع راسه وباوعلي بنظرة حزن جان منزل راسه ويسمعني ومينطي اي ردة فعل
انجبرت احجيله كلشي من البداية لحد هسه اذا ما صدكني اني انتهي والله ما اعتبر نفسي عايشة

فهد : فراس اخوكم؟

بنان : مو اخوي لتكول اخوية لتكووول اخوية هذا حيوان الله ياخذه مثل ما هجم حياتي وكلبها علية
فهد تدري شجااننن يسوي بية واني ساكته

هذا جان يتحرش بيه واخر مرة فضحته رزان بس جذبوني وكال جمال انتن جذابات ومستمر يلحكني حتى واني اجيت يمك هنا هو يتصل علية ويهدد بية ولا يوم ارتاحيت بحياتي بسببه جان كابوس بالنسبة إلي فراس مو انسان فهد والله مو انسان وحق الله هددني

فهد : ليش مكتيلي هااا ليش ضميتي عليه مو يصخم يهددج جان اجيتيي گلتيلي

بنان : والله جان يهددني وكالي اني كبال مدرسة اختج واذا متجين هسه اخذها وتعرفين شسوي بيها تخبلت وما تحملت واني اسمع هيج كلام وبالاخص خواتي والله افديهم بروحي رحت واني ارجف وابجي بنص الطريق والله العظيم ما سوا الي شي بس ضربني وحتى شوف هاك شوف ايدي كلها دم هو جرحني

فهد : ليش ضميتي عليه يهددج وهاي ليش مكتيليي وهسه تريدين اصدكج لو كايلتلي من البدايه جان صدكتج بس اني تجيني رساله واجي اشوفج بهل وضع تريديني اصدكج هسه

عيطت بحركة گلبي : والقران وحق الله علمود خواتي والله مردت اروحله بس فراس ما عافني من اني و صغيرة ولحد هسه مديعوفني شسوي بعد أموت روحي اني اصلا جيتي للدنيا غلط .. حتى يدري بيك شوكت تجي بس طلع يركض وانت جيت دكيت الباب

فهد : نزلتي من عيني بنان حيلل

بنان : فهدد عفيه والله مداجذب

فهد : اني شچنت اگلج مو كلت لچذبين كلشي ولا احد يجذب عليه ويضم عليه هااا مو كايلج هيج اني انتي مو دائما تكليلي انتَ "سندي " ليش لعد مكلتيلي من البدايه

فهد : مراح اصدكج .. صعب افرق بين الحقيقة والجذب .. اني جان يحكمني گلبي مجنت متوقع هيج يطلع منج وكل هذا يطلع منج انتِ لأن اكثر انسانه انطيتها الثقه بحياتي .. اشكرج بويه على كُلشي سويتي بية ..

بنان : فهد انت مدتصدكني والله العظيم احلفلك بالقران مداجذب عليك وكل كلمة صح والله اني مو جذابة والله العظيم ردت احجيلك كلشي الصبح بس لكيتك رايح للشغل واجاني التهديد وماعرفت شسوي

فهد : مراح يفيد كل هذا الكلام وفري لنفسج .. اقرب وقت اخذج ونتطلك سيد ونفض المهزله الي دتصير

بنان : عليك الله لا

فهد : ليش لا هسه فهد صار عزيز ؟

بنان : لتعوفني فهد والله اعرف غلطت وما حجيتلك بس مو هيج تجازيني

فهد : والله ضحكتيني .. تعرفين كُلش زين انتي شسويتي وشجازيتيني ؟ جنتي تكوليلي هلكد ما ساعدتني ماعرف شلون اجازيك .. جازيتيني بالخيانة .. متفرقين اي شي عن زينه بس تأذيت بسببج اكثر .. الحقاره والسم يمشي بيج
الله ياخذ فهد ويرتاح ..

شال سويج السياره وسحبني من ايدي حيل حسيتها
انكسرت جان لازمها من الجرح حيل يعصر بيها واني ابجي

بنان : والله العظيم مدا اجذب والله داحجي صدك حرام عليك هيج تسوي بيه

وكف كبالي وكأنما عنده بعد حجي يريد يحجي

فهد : ليش من بديت احبج هيج سويتي بنان

نزلت دموعي وضليت اشهك وابجي : والله مسويت شي هو هددني

سكت وضل يباوعلي كأنما متقزز مني .. نظراته خلتني اشيل روحي واركعها صعدنا بسيارة وطول الطريق هو ساكت .. اباوع لايده الشرايين مبينة وعيونه حمره بالكوة يفتحها واني ابجي واحلفله بس ميحجي وياي رجعنا للبيت وهو نفس حالته طبك السيارة واندارلي ..

حجى وهو صاك ع اسنانه : مراح نبين لأحد كلشييي تنزلين صمين حلگج وامسحي دموعج هاي ونزلي وانتي ساكته

رجع نزل وركع الباب السيارة .. مسحت دموعي ونزلت

طبينا جوا الكل مستغرب عبالهم فهد بالشغل محجينا شي خاله جانت ملتهيه بطبخ الغده وبالصاله بيت عمو زياد وايهم و زوزو هم يمهم

_ صعد فوك للغرفه طب واندارلي ب اشمئزاز وكال : ماوصيج منا ورايح أخذي راحتج فهد مموجود هنا بكيفج وين متولين ولي

حجيت من بين دموعي : وين تروح فهد

فهد : هامج ؟

بنان : عليك الله لتباوعلي هيج ولا تحجي وياي هيج والله اموت الف موته والله اعرف خطئي محجيت من البداية بس مو معناها متصدكني فهد لتكسر خاطري حرام عليك اني يتيمة

فهد : الصار ما يتصلح بعد انتي ضميتي عليه واجي الكاج بشقه وهيج حالتج انغريت بيج وبشكلج هذا انتوا كلكم نفس الشي .. زينه شفتها وية واحد وهسه انتِ هم

بنان : حرام عليك فهدد ليش تبليني خاينتك واني حجيتلك كلشي

فهد : انتي ضميتي عليه اتوقع گلشي منج يجوز تجذبين علية .. اي ثقة ناطيها الج انمحت اليوم

كلماته اثرن بية هواي حسيت نفسي تخبلت كمت اعيط واضرب بي ..

بنان : ليش فهد ليش والقران حرام عليك تظلمني نسيت كلشي بهل سهولة متعرفني انت وصارلي اشهر هنا .. تتوقعها من بنان هيج تسوي من وراك لك اني رحت مجبورة علمود خواتي والله العظيم علمود خواتي وبس

بهل أثناء حسيت اجتني النوبة
انكطع نفسي وصرت بالكوه اسحب نفسي
عيوني غوشت ماصرت اشوف اي شيء كدامي
جان هو أول واحد يركض حتى يجيبلي الدوا

واكف هسه بطوله كدامي ويباوع علية ومسوه شي
حسيت روحي تطلع ما اكدر اشيل روحي ولا اكدر اتنفس وكلبي دكاته تتسارع كمت ااشر اله بس يجيبلي الدوا واكف كبالي مثل الصنم وميتحرك كلبي حسيته يطلع من مكانه عيطت بصوت مبحوح ودموع تنزل

بنان : جيب الدوا !

من كلتله راح يمشي بخطوات بطيئه واني بالكوه مفتحه عيوني ودموعي تنزل

جابلياه وشمره علية وطلع .. ما نطانياه هو مثل كل مرة

.. شلته رأسا جان مي يم راسي مال الليل شربته .. وضليت كاعده وابجي واحجي بهدوء

والله العظيم مو ذنبي .. هو هددني والله هو هددني واني رحت حتى مياخذ روان

ضليت بالكاع ودموعي تنزل واردد نفس الكلمه : والله رحت علمود خواتي اني ما خنته .. حسيت بدوخه ونعس فضيع و نمت ع الكاع

جانت الكاع ثلج من السبلت .. لميت رجلي لصدري ودموعي تنزل ونفس الكلمه أكررها بهدوء

__________________________________

روان
جنه كاعدين اني وريم بالصف وضايجين حيل والدرس عربي وقصايد واني اضوج من هيج وحده تباوع بوجهه الثانيه وحر مو طبيعي دك الجرس وطلعنا للبيت ساعة 12 الظهر

رحت مشيت لابو الاسواق اريد اشتري مي

صاحتني ريم : ولج وين رايحه

ريم : اي وياج عصير

هزين راسي ورحت امشي .. هذا طريق نفسه جنه اني ورزان نروح منه ونرجع منه

شكد جانت ايامنه حلوة وية خواتي وبوجود امي رغم الظروف الصعبه .. اشتاقيت لايامي وية رزان القديمه

فزيت ع صوت ياسر : أنتِ شعندج هنا

روان : عزا وين اروح وتلحكني بعد

ياسر : احممم ترى داحجي مثل الاوادم وياج احجي مثل الاوادم وياي

روان : وخر خل اشتري

ياسر : زلمه موش بنية

روان : وخر وخر

ياسر : شو جيبي الفلوس

روان : يا فلوس هي خمسمية

سحبها من ايدي وكال : روحي اصعدي بالسيارة يم ريم واني اجيب شتريدن

سحبتها منه بعصبية : لا اني اجيب

وهو يسحب ويكول : لا والله الا اني اجيب

هو يسحب واني اسحب وهي بالنهاية خمسمية
وعياطنا بشارع هو يكول اني اجيب واني اكول اني وكل واحد يصيح ياروحي

اخر شي جريتها قوي جان تنشك الخمسمية

روان : يااااسرررر

ابتسم وكال : نعم طركاعتي

روان : لك .. لك انشكت الخمسمية

ياسر : اروح فدوة للخمسمية شو تفضلي اصعدي بالسيارة بدون هالسوالف الي ما الها داعي ومي بالبيت موجود ويلا انجبن وكافي عاد

روان : عزااااا ببساطه هيج عندك والله ما اتحرك منا الا تنطيني هسه خمسمية واروح اشتري من المحل مووو انتتت

ياسر : لا والله واثقه كلش من نفسج امشي عمي امشي كدامي يلا للسيارة تنتظرج حتى تنوريها

روان : كلتتت ما اتحرك

ياسر : صبرك ربي النهاية ويه عنادج شلون ؟

روان : مادري .. اريددد خمسمية

ياسر :والله يالله قابل راح اخليج والله اني اعاند وانتي تعاندين ماعندي مشكلة اجيب فراش وانام بالكاع هنا وما اتحرك الا تتحركين

روان : هاي شنو اهووو شبيك انت شاخط

ياسر : هيهيهيهي من زمان عمي كدامي يلا

روان : اهوووو كدامي و كدامي

ياسر : اخذيلج راجدي

روان : أخذ ليش لا

ياسر : هيج كدام الناس والعالم ؟

روان : لا مو هنا لان عيب هيبتك تروح بس نوصل للبيت والخمسمية اطلعها من عينك اصبرلي

ياسر : شطلعت هاي ياهو ال اكضه احاجي يكول اصبرلي شو دروحي صعدي

روان : ترى اني زعلانه متصالحنا

ياسر : نتصالح نتصالح لتخافين اصعدييي

رحنا للسيارة كل واحد عصبي فتحتها قوي جان دوري ليورة اكعد كامت ريم تعيط : الله ليوفقكم الله لينطيكم هيج تعوفوني وحدي والدنيا حارة وماكو تبريد بالسيارة والباب مقفووووول مكدرت انزل شحجي عليكم شكول

ياسر : هوب هوب منين تطفين

ريم : معليككككك اباوع عليكم تتتعاركون عالفلوس خزيتونا انتوا جهال خما جهال ولج زوزو لحكيلي

ياسر : وسمممم وجعععع

ريم : بكلبك امشي بسرعه بسرعه واعلك هوا متت وانصمطت وانسلكت وهااا روان ساكته متحجين شبيج لسانج انبلع

روان : مالي خلك احجي ابد راح انام بالسياره بعد شوية

ياسر : الله شنو هل احترامات اللي تجنن شلون محترمه اخوها هاي لو بت عمي مسوية سيارتي جرباية شطلعت هاي عيشة هم راح انتحر واخلص من الكُل

روان : اي اي اخلص اخلص شعلينا احنه

ريم : كااافيي عفيهه كافي رجعوني

___________________________

روان
اول ما طبينا للبيت تفاجأت بنان مو مثل كل مرة تنتظرنا

وماهيه جان الكل مجتمع وكاعدين حتى مريم وفرح الا هي .. سلمت عليهم وكبل رحت صعدت لغرفتها
شمرت جنطتي بالباب وطبيت لغرفتها

جان منظرها يكسر الگلب باوعت عليها نايمه بالكاع
علاكه دوا يمها والغرفة ثلج

تقدمت عليها وضعها مو طبيعي أيدها ممدوده وكلها دم وجهها عليه آثار دموع

كمت اكعدها شوية شوية : بنان .. بنان ايدي شبيج
بدت تفتح عيونها وتباوع .. نزلت دموعها وهي تباوعلي

انصدمت منها اكيد صاير وياها شي

عيطت بوجهها : شبيج بنان شكو

ونفس الشي محجت اي شي وبس دموعها تنزل

روان : تحجين بنان لو شلون

حجت بصوت متقطع : فـهـد

روان : شبي مو شفته جوا

بنان : روان ماكدر احجي

ضلت تبجي بجي وجهها صار احمر وعيونها حمر

روان : شبيج بنان احجي شصارلج

بنان : فراس هددني

روان : غضب شكال هذا

بنان : لج هددني بيج جان واكف كبال مدرستج وكالي لو تجين لو اخذ روان من المدرسة وتعرفين شسويلها

روان : أن شاء الله رحتي ؟؟

بجت حيل وحطت أيدها ع وجهها: رحت رحت تردين يسوي بيج شي هااا

روان : لج بنااان شلوون تروحين وشسوالج

ضلت تبجي : مسوا شي بس ضربني

الله ياخذه لج روان اني متت هسه اني متت

روان : لج احجي شسوا

ضلت بس تبجي كدامي ومعرفت شسوي

روان : شبي فهد لعد

بنان : فهد شافني بالشقه هو ورا مطلع فراس اجه
فراس لاعب لعبه صح لج فهد روان تعرفين شكالي متعرفين موقفي والله العظيم ما خنته والله ما خنته
حظنتها وبدت دموعي تنزل

بنان بكل هذا ضحت علمودنا بس جان الخطأ من عدها واني نصحتها وكلتلها كولي لفهد بس مكالت لحد ما صارت المصيبة اباوعلها متكدر تتحرك بس تبجي

حجت من بين كلماتها : هو ضربني الله ياخذه هاج شوفي ايدي كلها دم والله متت كون ميتة ولا شايفه نظرات فهد الي كلها خيبه

روان : لعد ضربج فهد

بنان : لا مامد ايده عليه بس نظراته روان انتِ مشفتي نظراته الي وحجيه عليه

حظنتها و اهدّي بيها وماكو نفس الشي كومتها وخليتها تنام ع جرباية باوعتلها إلى أن غفت وطلعت من الغرفة

رحت لغرفة ريم واني عيوني تدمع كلشي ولا بنان تنظلم حرام عليه بس بنفس وقت بنان غلطت لان مكالت اله

طبيت شفت رزان كاعده وريم يمها

ريم : انتي وينج روان

روان : جنت يم بنان

ريم : يمه تأخرتي توقعت جوا

باوعت لرزان : وانتي رزان ليش منازله جوا عيب

رزان : واذا عيب شسويلهم مثلاً اني اريد هنا

روان : ضلي بومه

رزان : حلوه حياة البومه عاجبتني

روان : اي اي ضلي عاجبتج

ريم : اششش يمعودات باعو هسه الكل ينزل راح ابدل وانزل امي تريدني خوش وانتن التؤام تنزلن اثنينجن وغصبا عليكم وصيحو بنان وياكم ما شفت البنية اليوم خوش

روان : مو مريضة ونايمه

ريم : شبيهاا

روان : فلاونزه يمكن

ريم : خطيه يلا تمام وانتي لج رزان تنزلين غصباً عليج هالمرة وياي شنو ننزل وحدنا فشله من عمي وايهم

ابتسمت رزان وكالت : مادري

ريم : روان شوفي رزان ابتسمت

روان : واو معجزه

دارت وجهها رزان : مو وجه واحد يحجي وياكم

ريم : ديلا عيني اني حنزل وتعالن وراي

____________________________

ياسر : راح اشتاقلك عمي

فهد : اخلص منكم

همام : شنو تخلص منا لكك

فهد : يابه هو شغل قابل باقي هناك طول عمري هي كلها 10 ايام عدنا هناك شغل وراح اروح

محمد : وحدك تروح

فهد : لا وي جماعتي

ياسر : اكول انت اليوم مادري شلونك

فهد : شبية

ياسر : مادري ممرتاحلك مسوي مصيبة خاف

فهد : لا هاي خاف انت اللي مسوي مصيبة وجاي علية

ياسر : الحمدالله صفحتي بيضاء اللون مابيها مصايب ولا شي

ايهم : هذا منو ابو المصايب

همام : هو اكو غير ياسر

ياسر : اكول حمام انت شبيك هيج شاد وياي شمسويلك اني ؟ حاط دوبك ويايه

همام : دروحي لج يسرئ روحي

ياسر : اهوووووو ايهم اريدك ترتاح خليت الاسم بحلكه الزفررر

ايهم : اني شعليه

ياسر : لا سلامتك معليك انتَ

همام : وجععع

ياسر : انجب

همام : اسكت

ياسر : ما اسكت

همام : لا والله

ايهم : هايشنو

فهد : كاااافي

ياسر : وانت الثاني شبيك هيج واحنه شكلنا

همام : ارعن

ياسر : معقد

همام : شلون راح اكوملك

ياسر : ههههاييييي خفت خفت يمه تعاليلي

همام : انجب ويلا كافي عاد

ايهم : لحيتووو و مسلتوا هواي

فهد : اهوووو شلون راح تخلوني اكوم واني روحي طالعه

ياسر : يابه دكومممم

شو بس كلت هيج هذا فهد كام

ياسر : هيووو سيادة الضابط صاير حساس تعاللل

فهد : لا حروح احضر غراضي

ياسر : هزيت راسي ب استغراب هذا فهد اليوم مادري شبي والله عائله شاخطهه

انداريت ل ايهم يلعب بتلفونه وعايش بغير عالم : الله بالخير دكتورنا

ايهم : الله بالنور مُهندسنا

ياسر : اييييي شلونك شكو ماكو

ايهم : سكته

ياسر : صدك عساس اشتريت عياده

ايهم : اييي فهدد دلني عليها

ياسر : تمام بالخير عليك خويه شوكت تداوم بيها

ايهم : باجر

ياسر : وشبسرعه

ايهم : عندي حالة طارئه

ياسر : ايي عمي حالة طارئه .. خاف اني هاي الحالة

ايهم : تريدني اعالجك من الخبال هذا

ياسر : لا احب خبالي لتتقرب خوششش

ايهم : مو تدلل

همام : اول واحد لازم يتعالج هو ياسر

ياسر : دنجب اصلا جذب همام لازم يتعالج لان فد معقد إلى درجه

ايهم : اخذكم اثنينكم شتكولون

ياسر : ماروح اذا ويه همام تكب العيطه

همام : اذا اروح ويه ياسر اتخبل

ياسر : الحمد لله شعور متبادل

همام : الف الحمد لله

ايهم : هسه شنو

ياسر : انجبوا كلكم

___________________________

بنان

محسيت ع نفسي بعد ما روان طلعت كعدت وراها
جنت احس روحي بحلم .. كلشي اتوقع الا فهد ميصدكني كمت الوم بروحي وابجي كله صوجي محجيت والله كله صوجي

انفتحت الباب ودخل حتى مباوع علية
شفته طلع جنطه جبيرة وبدا يطلع ملابسه ويحطهم بالجنطه .. كمت واني ابجي ورحت يمه

بنان : وين راح تروح

"جاوبني وهو داير وجهه " فهد : مو شغلج

بنان : شلون مو شغلي فهد وين راح تروح

فهد : كلت معليج روحي رجعي كعدي بمكانج ماريد اسمع صوتج ولا اشوفج كدامي

بجيت احس روحي تفرفح من يحجي هيج : حرام عليك هيج تسوي بية انت الوحيد اللي ساعدتني لتكسرني هسه !

فهد : مابية حيل أخذ وانطي وياج بالكلام عندي شغل من ارجع كبل اخذج للسيد ونتطلك كل واحد يشوف حياته و الله يوفقج

مسحت دموعي واني ابجي : اني بررت هواي وحلفتلك وانت متصدكني شنو تريد اكثر من هذا بعد .. اني بنان فهد .. بنان اللي نقذتها من الوحوش وجبتها هنا حتى تساعدها وتحميها .. فهد باوعلي

أندار علية ونظراته مليانه عتب : ماكدر اباوع لوجهج حتى .. لو ادري مَحبيتج وصار كل هذا

بنان : والقرآن ما خنتك والله العظيم ما خنتك لك بيش احلف اكثر من هيج

أخذ جنطته وطلع من الغرفه
روحي طلعت وراه .. مستحيل يروح وهو هيج مفتهم الموضوع والله اموت روحي

ركضت وراه بسرعه واني ابجي واصيح بأسمه بس جان يمشي ولا مهتم

لزمت ايده : ما خنتك فهد والله ماخنتك والله اني ما اجذب ..

نتر ايدي واندارلي بهدوء : ارجعي بنان مراح يفيدج بعد اي شي ومو هذا تريدي جنتي انو نطلك وره محرجع نطلك ومشكورة على كلشي سويتي بيه

هو نزل واني احس انتهيت ملخت روحي واني ابجي رجعت طبيت للغرفة وسديتها بجيت بجي وراه موطبيعي .. هو مو يكولي لتبجين دموعج تتعبني وينه هسه ما كلي اسكتي لتبجين ..

ياربي رح اموت ما اتحمل هيج يصير وياي ليش الدنيا ضدي دائما ..

........................................................

ريم
جنت گاعده بالمرجوحه برا وحدي والدنيا عصر
اباوع للسما صافيه .. اجا ع بالي مؤمل

هسه هذا شلون اني خاف يخطب ويعوفني ما اتحمل
تجمعت دموعي بعيوني واني اتذكره بالمستشفى من اجه وحجى وياي تذكرت كل مواقفنا سوا

معقولة بهيج سهوله راح يروح ويخطب ويعوفني !
حسيت ع خطوات احد ع الكاع التفتت لكيته فهد اشرلي بهدوء " تعالي "

رحتله متفاجأه من شكله .. لابس ملابس الدوام وشايل جنطه جبيرة ويا

ريم : هاي شنو فهد وين راح تروح

ابتسم بوجهي وگال : شوفي هسه حروح محد يدري بهل وقت راح اروح ماردت اخرب جمعتهم الحلوه وهمه كاعدين يسولفون .. اني عندي شغل بالبصرة فديري بالج علئ نفسج وبنان اذا متقبل تاكل خليها تاكل يلا حروح مؤمل ينتظرني راح اروح بسيارته .. ادعيلي

حسيته من حجى هذا الكلام بگلبه غصة واني جنت مقهوره انفجرت واني ابجي

_ خما هواي تعوفنا

ابتسملي وحضني : لا ما اطول هيه 10 ايام .. يلا مع السلامه انتبهي لدروسج خوش

ريم : تدلل الله وياك

طلع بس حسيت بي شي مو فهد الاعرفه
گلبي قبضني عليه واني اشوفه منزل راسه ويمشي على كيف .. الله يسهل أمره ويحفظه النا

__________________________

روان

ضليت حايرة اصعد لبنان لو خاف فهد يمها توترت حيل واني افكر بيها هي شلونها هسه نايمه لو لا ردت اصعد الها بس مكدرت

ضليت اتلفت ادور على ريم ماهيه هسه هاي ريم راح اكضي عمري ادور عليها مدري وين تضيع وين تختفي فجأه عني

صعدت فوك دورت رجعت نزلت لكيت ياسر واكف كبالي ومبتسم درت وجهي دا اريد ارجع اصعد جان يصيلحي

ياسر : وين عمي وين ؟

روان : تريدني اكابلك لازم

ياسر : ماعندي اشكالات

درت وجهي وصعدت حسيته وراي ديصعد رجعت انداريت عليه

_ شكوو جاي تلحكني متكولي شوكت اخلص منك هااا وين ما اروح انت وراية مثل خيالي

ابتسم وكال : ايييي اني خيالج عندج اعتراض

درت وجهي وهو يريد يرجع الميانه هاي مالتههه

ياسر : وين وين وين

روان : ولو اني زعلانه بس وين ريم حتى اخلص منك

ياسر : ماكول

روان : لا كول وينها

ياسر : ماااا اكووول

روان : خبيث مو بيدكك

ياسر : شبيها الخباثه اذا مني تجنن

اجتي بوجهي ريم ومادري شبيها

روان : شوف هي اجتني الله ليعوزني عليك

ياسر " يقلد " : الله ليعوزنيييي عليك اهمداج رحت خلصي مني

روان : واهمداك هم وانتي وينج

ريم : غير جنت برا بالحديقة وين اروح قابل

روان : لعد وين رزان

ريم : مادري خاف بالغرفه

روان : شنووو هاي اليوم البيت كله ضايع قبل شوية رحت للغرفه وما لكيتها

ريم : راح اروح لبنان

روان : لا خاف فهد يمها

ريم : فهد راح للشغل

روان : شنو هو مو رجع

ريم : مادري هو كال عندي شغل بالبصرة وراح هو ومؤمل قبل شوية واني جنت جوا كلت لأهلي حتى ليضل بالهم وجيت صعدت لكيتكم انتي وياسر مناكر انتوا شنو متملون

روان : اخوج متكدرين تحجين ويا كوليله خلي يعوف روان بحالها

ضحكت ريم : مو ديصالحج

روان : سدي الموضوع امشي

ريم : شبيج اريد اشوف بنان مو مريضه خطيه اليوم كله ما نزلت

روان : لا مو شفتها قبل شوية نايمه

ريم : اوك تمام

______________________________

رزان

جانت الدنيا ليل وحدي طالعه برا
ضليت اتمشى واني أبالي ماما الهام
متفاركني ذكرياتها كلها وياي دمعت عيوني وردت ابجي ضليت امشي والذكريات مثل شريط المسلسل تمُر علية

رحت گعدت بالمكان اللي هذيج المرة لعبوا بي بالليل
جنت كاعده وصافنه واني اتذكر ماما الهام كلش مدتفارك

بالي ابد وعيوني مدمعه
حسيت على أحد كعد بصفي بَس بعيد شوي اكو مسافه التفت لكيته ايهم هسه هذا هم وكته باوعت عليه وسكتت

وهو هم جان ساكت نفس الوقت ضلينا ساكتين ومحد حجى ردت اكوم حتى اطب جوا گال

_ اكعدي لتكومين عندي كلام وياج

رزان: شنو الكلام؟

ايهم : هواي

رجعت كعدت ودنكت راسي .. شيريد مني هذا الثاني

ايهم : تعرفين بية دكتور مو صح

رزان : اي اعرف

ايهم : تمام .. أنتِ راح تتعالجين عندي

رزان : شنو اتعالج ؟

ايهم : من الحالة اللي انتِ بيها

كمت وكفت بعصبية : شنو أي حالة شبيك انت ششايفني مخبلة وتريد تعالجني روح عالج نفسك

كام وكف بهدوء : رزان مو بس أنتِ امج ماتت كدامج اني عانيت فقدان الام من طفولتي ولحد ما كبرت بس لازم الإنسان يكمل ويشوف حياته ميصير يوكف على نفس النقطه

رزان : شنو انت شقصدك وشمدريك

هز راسه بهدوء : اني عرفت كلشي من منو لتهتمين .. بس جيت حتى اكلج باجر اول جلسة بعيادتي

رزان : اي عيادة اي جلسة انت شدتحجي لتخليني اتخبل منو كلك على كل هذا هااا

ايهم : اششش تمام تمام ماكو داعي لهاي العصبية فوتي جوا وبعدين نتفاهم بخصوص الموضوع هذا

رزان : ما اطب جوا الا اعرف شقصدك وليش منو كلك يا اخي منوو كلك

ابتسم بوجهي : هوب هوب انطي مجال لنفسج اعصاب متتحاجين ليش هيج ليش

رزان : لتضحكك ترى دا اسئلك انتوا ليش مستصغريني بنظركم مو صوج احد صوجي اني

عفته وطبيت جوا مقهورة وحازه بخاطري شنو يعالجني منو كايله .. ليش اني شبية حتى يعالجني

<<<<<<<<<<<<<<<<<<<<<<<<<<

روان
بالليل جان مكان بنان خالي حيل وهي ماكو عمي وزوزو وخاله سألوا عليها كلتلهم صعدت عليها مريضه حيل ونايمه والأكل صعدته الها
ضلوا يحجون بخصوص موضوع فهد ولأن راح وما كاللهم ومقهورين

الكل جان ساكت .. رزان لكيتها فوك بالغرفه ما قبلت تنزل وبس تعيط طاكه فيوزاتها گضيت اليوم وحدي ويه ريم وهذا بس يلحكني وين ما اروح راح اتخبل
ورا العشا راحوا ياسر وهمام وية ايهم حتى يحظرون عيادته ويرتبوها واحنه ضلينا وحده صافنه بوجه الثانيه

كالت ريم : امشي روان نقرا

روان : اوي ماريد اقرا مابية حيل

ريم : حبابة يعني اضل وحدي اقرا غير انتي وياي

روان : ماريد عود بعدين اقرا

ريم : بكيفج اوك حروح اني

هزيت راسي ورحت لـ بنان

اباوع عليها نايمه .. شلون يا ربي خطيه والله ما اتحمل اشوف اختي هيج صح غلطت بس مو لازم فهد هيج يسوي ولو هو هم حقه .. الطرفين مادري شلونهم

خفت اعوفها وحدها ضليت اروح وارجع عليها
اخر شي رحت للغرفه كعدت يم ريم تمددت ونمت

__________________________

سيارة مؤمل /
جان فهد ساكت وبس يباوع ومؤمل هم نفس الشي

مؤمل : إلى متى راح تضل هيج استاذ فهد مو راح اتخبل

فهد : انت شعليك حير بدربك خل نوصل بسرعه هسه جماعتنا كلها وصلت واحنه طالعين متأخرين

مؤمل : لك لتذبها براسي ترى انت اللي تأخرت مو اني

فهد : ديلا يلا كافي انجب

مؤمل : راحت الهيبة ضابط شكبرني تكولي انجب

فهد : مؤمل لتحاول تلطف الجو وياي ترا صاير فد مرة لتحاول تلطف الاجواء وياي

مؤمل : هوه هم صوجيي

فهد : ايي انجب

مؤمل : هوه انت بس فالح تجبب بالاوادم

فهد : ايي

دك تليفون فهد ...

مؤمل : خير منو أن شاء الله ؟

فهد : اش اسكت

فتح خط وضل يحجي : هلا والله .. تمام وانت.. احجي شكو ؟ .. صدك والله ؟؟؟ خوش خوش ديربالكم زين عينكم عليه بس اخلص شغلي واجي .. 10 ايام .. الله وياك

مؤمل : هذا منو ؟

فهد : لكوا جمال

مؤمل : منوو ؟

فهد : عندي معارف ضباط ثانيين ببغداد وصيتهم وانطيتهم ملفات جمال ويكولون لكيناه و حبسوه

مؤمل : كول والله مرتين

فهد : خاب انجب

مؤمل : شلون لكوه

فهد : احنه مو جنه ندور همه هم وصيتهم يدورون ويانه واليوم لزموه

مؤمل : شبيك أحسك تعبان .. مهموم

فهد : مابية

مؤمل : جذاب

فهد : يابة مابية لتهتم الي انتبه لطريقك الدنيا ليل

مؤمل : خوش تدلل

فهد : صدك شصار ع سالفة خطبتك

مؤمل : اول شي كولي شبي وجهك هيج وليش مادري شلونك اليوم

فهد : شلزكت مؤمل عوفني مابية شي

مؤمل : لا لا الا تحجيلي

فهد : معلييييك

مؤمل : هيهييهيهي خاف متعارك وية ست البيت

فهد : هههههههه

مؤمل : كبر واني شكلت حتى تضحك

فهد : انجب كبر اليكبرك

مؤمل : كافي يلا تمام ، سالفة الخطبة الوالده مُصرة عليها واني اصلا روحي صايرة بخشمي سالفة البصرة همزين جتي

فهد : احجي وياها

مؤمل : ميفيد وداعتك

فهد : مادري شكلك

مؤمل : لتكول شي

__________________

عيادة ايهم /

كاعد ياسر ع كرسي المكتب ويحجي : اي ايهم احجيلي حالتك بلكت اكدر اعالجك

ايهم : حالتي هي ياسر ابن عمي مخبلني حِيل

ياسر : ها لعد جيبلي ياسر اعالجه شكو انت جاي

ايهم : اكول كافي مسلته خليني انظف المكان

همام : جبت مي خلي نغسل الكاع

ايهم : الأرض

همام : الكاعععع

ايهم : تدلل يلا

كوم همام وچب المي على ياسر ونكعه

شهك ياسر بصدمه : خ** بيك هماااااممم

همام : اني شعلية يمعود هو من وحده انكب

ياسر : ننننننن ابو حلك هو انكب

كام ياسر بعصبية وكفش همام من شعره ويعيط : حيوان نعال جلبببببب اني اعلمك الا اطلع قهري بيك يا ** اني أعلمك عيب كدام ايهم هسه

ايهم " بصدمه " : ليش انتوا خليتوا عيب بالموضوع شو خو ياسر اجيبله ليفه فد مرة وخلي يسبح بالعيادة

تعصب ياسر وكع ضرب بهمام .. وهمام ما همه بس يضحك وفرحان وأيهم وكع بيها يفاكك بيهم

ياسر : هذا حقير يحب يتعارك وياي الحيوان

همام : ماكوو غيرك حيوان

ياسر : هماااااممم

همام : انجبببب يلا كافي دراما واكشن

ايهم : شبيكم ادري جايب جهال وياي اكمش هذا واكمش ذاك وكلسع تتعاركون شنو هاي كومو يلا حبابين اجيبلكم مصاصات تردون حتى تسكتون ؟

كام ياسر بعصبية وكال : انت اششش

همام : خوش رجلنا خضرة على عيادتك

ابتسم وكال : ترى راح اتخبل شلون اعالج المرضى بعد واني مخبل

ياسر : ميحتاج اني موجود واعالجهم

همام : لا اني اعالجهم

ياسر : انت انجب لا على كلشي وحاط خشمك وياي

همام : الله سبحانه وتعالى هو الي خلانه احنه فوك وانتوا تحت

ياسر : كام يمسلت المحامي

ايهم : كاااافي

ياسر : تمام سكتنا

همام : لا ما اسكت اني تففف عليك يالمهندس

ياسر : اصبرلي بالبيت اني أعلمك عيب من ايهم

ايهم : انت كلسع عيب وعيب انتوا حتى المستحه زحتو كملو سوالفكم واني انظف العياده لو اطلعكم برا وانظفها اني

ياسر : لا هاهيه يلا وانت همام مرة ثانية لتندك بية تعرف شسوي بيك

همام : ضحكتني والله

ايهم : ولكم سكتوااا راح اهج

ياسر : اي يلا كافي

______________________________

بنان
ضليت گاعده واني ابجي
ليش ما صدكني واني حلفتله
ياربي ساعدني والله تعبت ومدا اكدر اتحمل بعد
هِهيج .. تعبت واني افكر بي وابجي .. عيوني حسيتها راح تنقلع من البجي والتفكير جانت الساعه 12 بالليل

واني من الصبح لحد هسه ما سكتت
كلبي تعب كُلش منين الكاها .. من فراس .. موت ماما الهام .. مسؤولية خواتي .. مرضي .. وهسه چملها فهد فوك كلشي .. تعبت فهد وينك مو جنت تكلي

" كُل متحسين بضعف وخوف تذكري بظهرج فهد "

وينك فهد ليش هيج عفتني
نزلت راسي وبدت مسيرة البچي
بجيت بحركة كلب .. بجيت من تأنيب الضمير .. بجيت لان مفتهم كلشي غلط وبچيت لأن بسبب غبائيي مكلت اله جان مصار كُل هذا ..

انفتحت البَاب دخلت روان وراها رزان
جتي ركضت يمي وبدت تبجي حظنتها وصرنا نبجي سوية .. كعدت روان كبالنا و أيدها ع خدها
كلنا حايرين ومنعرف شنسوي صعبه كلش
حظنتني رزان وهي تبجي .. مسحت دموعها وحجت بجديه

_ بنان عمو محمد هسه حجه ويايه و ايهم هم حجه وياي صدك لازم اتعالج شايفني مخبلة قابل ؟

هزيت راسي ومسحت دموعي : الطبيب النفسي مو شرط الواحد مخبل حتى يروحله ليش انتوا ماخذه هيج فكرة .. انتي راح تروحين جلسات علاج تختلف عن البقية ولازم تحجيله كلشي بگلبج للطبيب حتئ يكدر يساعدج .. تقريباً انتي عايشة صدمه ماما لازم تصيرين زينه واحسن من قبل انتي حتى راحت عليج هاي السنه

رزان : يعني لازم اروح

بنان : اي لازم لخاطري رزان روحي

هزت راسها وسكتت باوعتلنا وطلعت من الغرفة ما طولت يمي كم دقيقه !

باوعتلي روان بحزن : بنان شوفي شكلج ما اتحمل هيج اشوفج والله العظيم كلش تعبانه .. انام يمج اليوم ؟

بنان : لا خاف ريم تجي هنا ومادري خليني وحدي احسن .. روحي اقري انتبهي لدروسج لتهتمين

هزت راسها روان : تمام يلا تصبحين على خير .. اشربي دواج خاف يصير بيج شي واني اخاف عليج يمعوده

ابتسمت الها : لتخافين يلا روحي نامي وراج مدرسه

روان : يلا باي

مكدرت انام .. كلسع افز واني حلمانه بفراس
تعبت نفسيتي حيل واني هم تعبت من البجي وعيوني ورمت كلش تعبت ..

_____________________________

ريم
جنت متمدده ع جربايتي ودموعي تنزل واني افكر بي اصلا ميروح من بالي شكد احاول انساه اطلعه من عقلي وگلبي بس ما اكدر ..

الحُب صعب هيج .. مدا اتحمل كلشي يعني هو اذا راح يخطب راح اتحمل الغصة واسكت هيج بسهوله .. بسهولة يروح مني وتضيع كل احلامي !

غلط ريم غلط .. بنيتي احلامج وية الشخص الغلط وبدون ميعرف انتي تحبي وهسه يمكن يخطب ويعوفج اكيد
راسي كام يوجعني واني كاعده اواسي نفسي

گمت طلعت دفتري مثل العادة وكتبت عبارة

" ليتنا نستطيع اعادة الماضي
ليتنا لم نتحدث
ليتنا لم نرَ بعضنا
الكثير من بيت في داخلي .. وكأننا نستطيع فعل ما بعد ليت "

دخلوا فجأه روان ورزان علية واني اكتب
باوعتلي روان وتغمزلي " خيرر "

ريم : شبيج تغمزين

روان : داشوف شدسوين

ريم : داركص

روان : ركصي ركصي

ورزان مجانت تضحك مثل كل مرة ساكته وراحت كعدت ع جربايتها
روان نفس الشي راحت مدققت بالموضوع بس عرفت من حركتي السريعه واني أضم الدفتر

______________________

بنان
ما نمت لحد ما صار الصبح رحت صليت الفجر وضليت ادعي وابجي قريت قرآن كلت بلكي ارتاح شوية

ورجعت هم مكدرت انام .. النوم طار من عيوني وضليت بس ابجي للصبح .. اباوع لمكانه بالكاع هو ينام هناا بس اخر فتره صار ينام علئ الجربايه يمي .. كلشي بدماغي مديروح مادري شبية ضليت كاعده للصبح نزلت وية دوام البنات وياسر

لكيت الكل طالع ومحد موجود غير بس خالتي ومادري شبيها واكفه جاي تخابر

اندارت علية وابتسمت : تعاي ماما بنان

رحتلها كالت : بنان هذا فهد تعاي احجي ويا
اخذت التليفون من عدها بس انسد الخط بوجهي
معناتها ميريد يسمع صوتي .. جيت ابجي كدام خالتي

سبقتني وكالت : يااا خطيه يلا عادي هسه يدك عليج لعد اكيد صار عنده شغل بس حجى وياي وكال وصلت للبصرة من زمان وطمني عنه

هزيت راسي وسكتت

رحاب : بنان ليش هيج عيونج حمرة ومورمه

بنان : مريضة

رحاب : لا هاي عبالك باجية ؟ فهد مسويلج شي ؟؟

بنان : لا ممسوي شي

رحاب : دحجي يا امي

بنان : خاله مريضة متشوفيني جنت بالغرفة وتعبانه ونايمه اني نزلت حتى اشوف روان وينها طلعت رايحه للمدرسة

رحاب : اي قبل شوية اخذهن ياسر شسوه بية يمه لج عيني مخبلني هذا

بنان : ههههههَ ياسر نعمة موجود بحياتنا هو اللي محليها

رحاب : اوففف اي والله بس ساعات يشوطني .. يلا انتي ولج بعد الكل راحوا روحي ارتاحي وانتي منا مريضة

بنان : محتاجه شي ؟

رحاب : سلامتج يمه

رحت صعدت للغرفة .. ما ادري كلش الغرفة كرهتها ونفسي اشمئزت منها بعد ما راح فهد كلشي صار اظلم بعيوني بالذات جان مفتهم غلط كلشي

______________________

رزان
كعدت الصبح ع دكات بالباب .. كمت عبالي بنان لو خالة محد غيرهم يبقى هنا

فتحت الباب صار بوجهي ايهم .. ضليت مصدومه وتوني كاعده من النوم ساعه 10 الصبح رأسا صرت ورا الباب وكتله : ها ايهم شنو

ايهم : احممم .. اني هاي شسمه جيت اكلج تحظري حتى نروح للعياده

رزان : هسه؟

ايهم : اي لعد شوكت متشوفيني لابس ومبدل يلا اني انتظرج جوا

محجيت شي واني منا متوترة راح من يم الباب وسديتها ورا رحت كبل ع بنان وحجيت وياها كلتلها راح اروح ويه ايهم للعياده ..

رجعت للغرفه بدلت ملابسي ونزلت جوا لكيته كاعد اول ما شافني ابتسم وكام : ها خلصتي

رزان : اي لعد ليش نزلت

ايهم : يلا

رحت وصعدت بالسيارة ورحنا للعياده وهو طول الطريق عالك اغاني هادئه ومسوي أجواء بيرفكت

وصلنا للعياده
جانت حلوة و بمجمع بي مجموعة دكاترة

اول ما دخلت للعيادة مالته جان مكتوب اسمه عالباب
( الدكتور ايهم زياد
الاخصائي النفسي )

حسيت بخوف اول مرة ادخل هيج عيادة .. اجتني رجفه وتساؤلات هواي بلحظتها
اول ما دخلت .. ضحك وكال : نورتي عيادتي المتواضعة ...

نهاية البارت
يتبع ..

(لاتنسوا التصويت)

أن شاء الله يعجبكم البارت طركاتيي ♡.. + الي تكول البارت قصيررر اشكككككك هدووومييييي 🙃😭

إلى اللقاء يا أعز العابرين في قلبي ♡.

7.nldn حسابنا الانستا

الكاتبات دينا & نور