نقيب قلبي الفصل الحادي والعشرون 21 - بقلم شقراء

الجزء الحادي والعشرين
#نقيب_قلبي

بعدين اخذت صقر وضرغام اخذه شاهين..
طلعت وسط دموعي وقهري..
قهرتني ام فهد حاضنه الولد وتشمهم وتنحب خفت يصير بيها شي،،،

وصلنا لبيتنا وفتنا استغربو!!
سلمت ورحت يم البنات جانت رنين عدنا...
شاهين بقى يم ابوي ومحمد واحمد ومازن كعدو يمه...
امي..يمه شعجب جيتي هيج وضعج مايطمن وعيونج حمر ؟
زينه ...يمه جابني يريد يطلكني...

امي..يبوووو ..ولج شتحجين الله يستر علينا من اخوانج بس ..
ليششش هيج ولج ليششش؟؟؟
_هو ميريدني يكول ماشتهي اشوفج يا امي قابل اتوسل بي..
سارة..يولي الله لا يرده كسحه ..
رانيا ورنين هم حاجو امي وامي عبالك جيتلها حامل بلقيط ما كتلها اتطلك....

شويه وسمعنا شاهين جاي يسلم يريد يطلع...
اجالي محمد كال جيبي اطفاله يريد يشوفهم بس جان غاضب ووجه يخوف..
انطيتهم اله بس كوة ماكدر اخاف ياخذهم...

ضلو يحاجوني البنات وصاح ابوي ورحت..

ابوي...تعاي كعدي وسمعيني عدل..
_قبل لا اكعد ولدي ويييين...
بس لا انطيتوهم اله؟؟؟
_احمد ..طبعا ننطيهم فاتحين ملجأ هنا ؟؟؟
لك حرام عليك حراااااام اريد اطفاليييي...
ضليت اعيط والطم ع وجهي وابجي ابوي كام طلع...
واستلموني محمد واحمد ومازن...
ضربني احمد ..
بصينيه الحاطين بيها العصير لشاهين..
بدخله علي للبيت وفكني من ايدهم كوة..
بعد الفشار والعياط يلا فكوني...
بس شفت الدم ينزل ع وجهي واني بعدني لابسه الحجاب..
فتحه علي وطلع راسي مشكوك ..
خطيه البنات يبجن وحاولن يوكفن النزيف ..
اخذني علي للمستشفى خيطو الي بس دخت كلششش..
ضليت اتوسل بعلي اريد اطفالي...
كال اني اجيبهم الج معليج ...
رجعت للبيت...

مازن...شوفي لو تحطين رجل بسما ورجل بأرض طلاك ماكو...
واحنا كلنا لرجلج خليها يمنا ترتاح اليوم وباجر تعال اخذها..
واذا مصرة تتطلكين خلي ببالج متشوفين ولدج لحد متموتين..
تسوين تنازل بالمحكمة...
وتعيشين هنا محبوسه حتى دوام ماكو..

علي...شنو من اخوة انتو ..
حرام عليكم دمرتوها..صدك عارات ..
معليكم بيها اني اتكفل مصرفها وولدها الحضانه من حقها بالمحكمة...

محمد..كافي لتطلع عينها هالسافلة هاي...
والحضانه ماخليها تصير الها وراسي يشم الهوا...
اتهمها وي واحد حتى لينطوها اطفالها...
تريدها تعوف العز والدلال والفلوس..
وترجع مطلكة ووياها نغولة ثنين..

باجر نرجعج اله او اختاري تعوفي ومتشوفين اطفالج..

ضل يصيح عليهم علي واني اغمى عليه..
تالي صحيت اني بحضن سارة وتبجي ويمها امي والبنات...

زينة..اريد ولدي...عفيه ولدي الله يخليكم..
ابوس ايدكم ارجع خدامه اله بس اريد ولدي..

اجه مازن واحمد كالو باجر نرجعج ومتجين زعلانه لو تجيبين سيرة الطلاك ابدد..
كتلهم بس هو ميريدني..
كالو حتى احنا منريدج..
ماعدنا طلاك احنا هو لو زواج لو موت...
كتلهم ودوني هسه ميخالف بس المهم اصير يم ولدي..
مانام بدونهم..
ماقبلو عافوني وطلعو....
ضليت بحضن ساره املخ بروحي وامي تبجي والبنات..

سارة..انت مو حافظه رقم صقر؟؟
_اييي انطيني خل اخابره هو اكيد حيجيبهم...

صقر ..جنت نايم كعدني صديقي ..
كال فونك يدك ..كعدت باوعت رقم غريب..
فركت عيوني راسي كلش مسطور...
كمت سبحت وشوي حسيت احسن..
طلعت لكيت ٩ مكالمات..
وهو بيدي دك..

صقر..الو نعم..اجاني صوت مخنوك..هذا صوت زينه!!!!

زينة..الو صقر حاجيني انت وين؟؟
_شبيج زينه شبي صوتج اني طالع وي جماعتي...
_صقر ابوس ايدك انطيك عمري بس جيبلي اطفالي..
اهدي وفهميني شبيج وينهم اطفالج ...
_اخذوووهم ..ماكدرت اكمل انهاريت ..
اخذته سارة وحاجته كلتله الي صار..
_اوكي جاي اني هسه اجيبهم واجي...
رحت لبيتنا بس احس راسي يريد ينفجر...
وزيده هالموضوع ..
دخلت دكيت الباب ع امي..فتحته نايمين يمها..
_ها حجية الصغار يمج..
_اي يا يمه جابهم شاهين ويا..
_شلون تقبليها يتفرقون عن امهم يا يمه ..ليش ماطيحتي حظه..
_شتعرف بيه يا بعد عيني انت..بس هم اخوانها ناطيهم اله ..
اني متعجبه من قساوه اهلها الله يساعدها..
يعني تدري شاهين شكد قاسي وجلد..
بس متعجب من اهلها..
يكلي متعجب شلون طلعو الصوج بيها وهانوها كدامي ...
كال اني ماكتلهم ماريدها لان زحمه..
كتلهم ممتفاهمين..
وهم انعفسوا وضلو يحجون عليها وسب وشتم ويتهددون..
ويكلولي معليك بيها تولي ماتفتهم..
اخير شي كايللهم خليها اليوم ترتاح يمكم وباجر يصير خير..
بعد متفشلين ماكدرو يحجون..
من رايد يطلع ناطي اخوها الجهال ..
واكيد هي متدري لو تدري جان اجت وياهم متعوفهم..

_اااه يا يمه خابرتني تتوسل وتبجي وصوتها مخنوك كوة تحجي تكلي جيبهم اريدهم...
اختها فهمتني كالت عبالها يشوفهم ويروح بس متدري ياخذهم ويا ..

_حضريهم خل اخذهم خطيه مدام بعده وكت ..
_انتظر البس واجي وياك نرجعها فد مرة..
ذول اهلها مو مال يتسمون اهل..
وهم رد اعتبار الها كدام نسوان اخوانك ..
من يشوفن اهلها يرجعوها يستصغرنها ..
_اروح فدوة لحنانج ربي يخليج خيمه النا وينطينا شوي من حلمج..

صقر..اخذنا الاطفال بالكاريكوت نايمين وطلعنا اني وامي ..
ام فهد..صقر انزل جيبلنا من هذا الماركت علبه حلويات اي شي عيب ندخل ايدنا فارغه..
_تدللين...

وصلنا لبيتهم واستقبلنا ابوها واخوها واجت امها وكعدنا..

للحكايه بقيه....