نقيب قلبي الفصل السابع عشر 17 - بقلم شقراء

الجزء السابع عشر
#نقيب_قلبي

كالو نزيف مجاي يتوقف..
وكفت الدنيا بعيني..
تذكرت بيوم الشفتها بالجامعه الظهر..
شلون انعجبت بيها رغم شفتها بوضع مو حلو..
ومن ضليت اتردد ع الكلية مالتها حتى اشوفها..
جنت اخاف عليها من كلشي..
اذا مااتبعها لبيتهم مارتاح..
ومن بستها ااااخ يازينة...

استغفر الله صقر هاي مرت اخوك..
خلي تفكيرك نظيف حرام عليك..

فززني صوت الوالدة تحاجيني..
ام فهد..يمه هذا الاعوج وين راح؟
صقر..ماعرف مانتبهت اله من راح يجوز طلع برا يدخن..
ضليت صافن ..شاهين مو مهتم بوضع زينه ..
ولا كأنه زوجته وام طفله بين الحياة والموت..
اني صح مكانة زينة عندي غير..
بس اي وحده من نسوان اخواني بمكانها وبوضعها اقلق واوكف وياها..
وهذا ما مهتم للموضوع كلش...

ورا فترة طلع الدكتور وكال سيطرنا ع الوضع ..
الحمدلله ارتاحيت..

تالي طلعوها لغرفه لوحدها..
وجابو الاطفال يخبلون..
حجمهم جبير وشكلهم حلو مميز..بس بيهم شبه مني هواي...!
اني شفت بنات اخواني من يصيرون ...
بس مو هيج دنفوشيين وكبار..

زينة..من شفت اطفالي هان علي كلشي...
صارو حياتي من لحظة شفتهم بيها..
عاونتني ام فهد ورضعتهم..
وصقر اشوفه يركض منا ومنا ...
بس شاهين ماكو..
ولا اني سألت عنه لأن اخر همي هو..
بس شفت الخوف بعيون صقر واضح..
دعيتله ربي يريح باله ويعوضه..
لان انسان داخله نظيف وطيب..
اكيد رح يلكى الانسانه التريحه..

ام فهد..زيونه اني ماخابرت اهلج..
كلت تكعدين وانت تبشريهم..
خطيه يقلقون عليج..
عاشت ايدج يمه انطيني اني اخابرهم..
بشرتهم وكالت امي هسه نجيج كتلها خلوها باجر اطلع خطيه ماقبلت..

سارة ..الحمدلله ع سلامتج انت وهالكتاكيت يخبلون فدوات..
امي..لج زيونه ذوله يشبهون عمهم ..
ام فهد..ها مو اكلج ماتصدكيني..
اني اتذكر شكل صقر وهو صغير..
حيل يشبهوه ..
ابتسمت كتلهم والنعم منه ياريت يشبهوه خلقة واخلاق..
علي ..بس لا رح تورثين الصلي مال الحجيه ولج..
ترى يرجعوج علينا هههه..
ام فهد..هيج احنا محظوظين ..متعرف فرحتنا بيهم شكبرها جدهم طاير من الفرح مايعرف شيسوي..
امي ...يتربون بعزكم ودلالكم وتشوفون عرسهم انشالله..ونعم الاهل الهم انتو...
_مشكورة خية ربي يفرحج بالاولاد ونشوف سارة عروس...

سارة..تسلمين خالة احنا نترخص بعد..
ورانيا صدفه خابرت خطية..
جنا نريد نطلع وكتلها..
كالت اني اخلي عمار يوديني..
ودزيت مسجات للبنات كالو نجيها لبيت عيالها..
_هلا بيها بكل وقت ..
سلمولي عليهم كلهم..
_لج زيد سمع وضل يكمز ممصدك خطيه راد يجي بس ماخلاه ابوي..
_هههه فديته هالمجنون هذا ..
ليجون ويدوخون راسهم هنا..باجر اني طالعه وتعالوا للبيت..
_ماشي يلا مع السلامة..
بوسوني امي وسارة وعلي وراحو تالي نمت ماحسيت بنفسي والعملية زين مو كلش واجعتني لان كلش اعتنو بيه وابر ومسكنات..

صقر..صارت تقريبا بال١١ واجه شاهين..
_لك وين جنت انت اسكطك هسه؟؟
مرتك جوا تصارع الموت حتى تسويك ابو وانت دايح برة!!!
انتبهت لركبته بيها مصه بس واضحة لزمتها من ياخته وخنكته لك شوكت تنعدل؟؟
مو صرت ابو وثنين مو واحد ومرة بت اوادم ..
شتريد بعد شتريييييد؟؟؟
دفعته لان مستشفى وماريد اسوي بلبلة..

شاهين..صقر كافي اني مو طفل ترى..
ملاحظ نفسك انت مساند زينة اكثر مني؟؟؟
واني رجال والي رغباتي ..
وزينه بعد الها كومة يلا تطيب..
اروح اريح نفسي احسن من المشاكل..

كتله انجب وبلا عذر اقبح من فعل..
راح شاف اطفاله واجه شافها جانت نايمه لان طلع كال ..شبيك خبصتنا نايمه وكلشي مابيها..
ضليت صافن صدك هذا ميحس..
يعني خطيه هي مشكوكة بطنها وتعبانه والالم بكل جسمها..
وهذا يكول نايمه هه شلون دنيا...

صار يوم ثاني كملنا الاجراءات وطلعوها وذبحنا ٣ ذبايح..سلامتها هي والاطفال..
طبعا امي شرطت تسمي واحد منهم صقر لان تكول يشبهوك كلش..
وانت الي تكفلت بيها من جابت ووكفت وياها..
والثاني زينة رادته ضرغام ..

زينة...شاهين عجبو الاطفال ..بس كأنهم غربه..
يعني الاحظه فرحان..
بس ماعرف شلون..
لحد ماهو كال..

شاهين ..تدرين صح اني كارهج وكاره فكرة ارتبط بعائلة..
بس من خلفتي هالشي فرحني ..
حتى افتخر كدام الناس برجولتي ..
افتخر حبلتج وجبتي ولد ثنين بدل واحد..
تعرفين شلون النسوان هسه تنظرلي؟؟
بنظرهم اني فحل واعجب..

زينة ..فتحت حلكي ع تفكيره خرررب...
شنو من بشر هذا..كل يوم انصدم بشي بي..
شنو عقل متحجر عنده..
يعني ميفرح برزق ربه ويفكر ينعدل..
يفكر شلون تباوعله النسوان!!!

خلال هالفترة ضلت يمي ام فهد وكلهم فرحانين وسوو عزيمه ع سلامتنا عزمو بيها كل اقاربهم..
وعزموا اهلي كلهم وحتى رياجيل خواتي ..
كعدو وياي خواتي وسولفوا..
بس محد يعرف حقيقه حياتي مطلقاً..
غير سارة حجيتلها لان متحملت..
وهي ماجان بيدها شي..
غير صبري زينة انت قصتج اغرب من الافلام..
الله يساعدج..
راحو اهلي وبقو بيت عمتهم اهل جواد وهو هم باركلي..
صعدت اني لغرفتي وحيل انشغلت هالفتره باولادي..
مرت الايام نفس الشي..

بس جانت ايات مرت مقدام كلش متضايقه مني..
وكل متشوفني تذبلها كلمه..
بيوم جنت ارضع صقر وضرغام نايم بجربايته..
واني لابسه ثوب لجوا الركبة شوي وردنه كركش..
مخلية صقر بحضني وارضعه واباوع بوجهه وابتسم انفتحت الباب...

للحكاية بقية...
للكاتبه شقراء(قمر كانون)