نقيب قلبي الفصل الثالث 3 - بقلم شقراء

اجه زوج اختي بالليل وحجو وياه وطبعاً هبة ترزلت كدامه رزالة ناشفة...يعني يطيحون حظنا كدام الناس ويقللون من قيمتنا عكس باقي الاهل..

تالي راحت وي زوجها وفضت السالفة..

يوم ثاني مداومت لان بين خايفه بين متضايقة صادف وراها جمعه وسبت ..

يوم الاحد داومت بس ماعرف شلون اتصرف شفت صديقتي مينا وحجيتلها وشوي حجت وياي غيرت نفسيتي ومر اليوم ع خير لحد ساعة ١٢ اجاني خبر يردوني برئاسة القسم...

هنا اجت ببالي كل الاحتمالات السيئةالمهم وصلت فتت لغرفة رئيس القسم سلمت وانصدمت!!!

شفت النقيب صقر كالعادة لابس اسود وهو بشرته صح اسمر بس سمارة نظييف يعني يلمع وعيونه حلو لونهم عسلي وشعره عالي وشوارب ثخان ومعتني بستايله يعني ملفت للنظر وعنده هيبة...

انصدمت من شفته حيلي باد وضليت ارجف بحيث بين عليه ..كال رئيس القسم زينة بابا حجالي النقيب صقر ع الي صار واني اعرفه مو من هسه من زمان وكال ميصير يفلت هذا المنحط من عقابه بس انتي متريدين تشتكين !!! كتله..

زينة ..دكتور اهلي مو مال هيج امور يعني ع كد حالنا واني جايه هنا ادرس واريد اخذ شهادتي وبس اخاف يبطلوني لو عرفوا لان ميتفاهمون ..رجاءاً عوفو السيرة..،

كال رئيس القسم اهلج مراح يوصل شي الهم اني رح امشي بهالقضيه لان انت بتنا وطالبتنا وهاذا متعاقب يتمادى ع غيرج اني انطيتج خبر بس مالج علاقه لا من بعيد ولا من قريب...

_اوكي استاذ اشكرك هواي...وشكراً لحضرتك نقيب صقر ..لا شكر ع واجب..

ترخصت وطلعت بس احس نااار وتغلي بيه خايفه حيل..

مشت الايام وماشفت لا الي تعرضلي ولا النقيب ..وضليت بين دراستي وبين اجواء البيت الي متوترة دوم مرات يخلص مصرفي واستحي احجي..مرات ماداوم لان ماعندي ومشت الايام..

بيوم كاعدين نسولف وشفنا هوسه يم قسم الفيزيا يصير قريب علينا...شوي واجت يمنا صديقتنا بالفيزيا ..كالت لو تشوفون شصاير اليوووم ...كلنا كمزنا شنوو ولج سولفي ..

منى..اليوم جايين امن الجامعة وكامشين ثنين بقسمنا بقاعة يسوون عيييب هههه... عيطنا يبووو ولج انجبي دومه قسمكم بي بلاوي يا يوم انكمشو؟؟

كالت صح بس الي شايفيهم ضباط!!! كتلها هااا هنا فلت وجهي..

مينا..لج ما شفنا اليوم بالكلية عساكر؟؟؟

منى ..لا ما شفناهم حتى احنا بس الولد كالو لابسين مدني محد يعرفهم!!كتلها...

لج منوش وتالي؟؟؟كالت ماخذهم مجلس تأديبي ومفصولين ومعاقبيهم وتشوفين قسمنا صاير سوك كلها ملتمه تريد تعرف..

كالت انتشر الخبر بالكلية وكلها ماخذة احتياط خاف تنصاد..هههه ...الله يبعدنا ويستر علينا شنسوي...

مرت ايام وبيوم شفته ويا ثنين هم امبين ضباط بس مدني كلت لمينا لج صقررر كالت يبووو وباوعت بالسما وييينه ..

هنا صدك ضحكت وصارت عيني بعينه خزرني ...بس اباوعله ارجف ماعرف ليش اصلا ولا اركز بعيونه ماكدر .. اجه كعد بالكافتريا وضل يباوع بس انا انذبح مابيه قطرة دم ...مينا تسأل شبييج انا اكلها اووش باعي بفونج بس ماكدرت احجي ضليت ادزلها مسجات كتلها النقيب هذا كدامنا مو ترفعين راسج وتفضحينا ترى ضحكت وخزرني ..

مينا...يبووو اريد اشوووف راح اروح اطلب شي ...لج اذا تكومين اموتج مابقى وحدي...لا كايمه...

كامت مينا اني هنا صفريت وحمريت..مشت شويه هو كام كعد بصف ميزنا كلششش...

عرفته مينا .. اجت كلتلي ها ام الزوز شنو اجيبلج...

ضليت امتمت كتلها ماريد ماشرب...

هنا مينا الفطيرة ضحكت كالت لا ادري بيج متشربين باوعتله ضحك الظاهر جفصت ومادري...

كتلها كابتشينو بس لتخلين شكر واريد ثنين بكوب واحد حتى يصير ثخين...راحت مينا دنكت بعد مرفعت راسي..بس احسه باله يمنا .. شوي واجت كعدت تسولف كالت اليوم استاذ مضر ماجاي يعني بعد ماكو محاضرات خل نرتاح نكعد نكص ونتونس ..

كتلها متأكده كالت اي كتلها بعد احسن بس تصير بالوحده اطلع حتى الى سيارة..

كالت لو ادري محاجيه تطلعين واضل وحدييي طلعت مينا عن النص..ههه نست صقر كاعد

مينا..اريد اشوف شبيهم ميحطولج خط مثل البشر تتأخرين براحتج تطلعين تدخلين بامان يعني تولين من هسه وين اروح اني ابقى وحدي وكآبة لو بيدي الزم غسان واخنكه لو اميزن هذا الفكررر ...

اني اعض شفه وااشر بعيوني بس تسكت تالي باوعتلي كالت ياااا ..زنزون انعلسنا كتلها اني رايحه ترحين؟؟

كمنا بس مينا خطيه تتعذر كتلها كافي ولج عادي مصار شي..

المهم رجعت من وكت للبيت ماردت اشوفه هم لان اعرف نفسي ومستواي واصلا عاجبني هو بصراحه...

وبالسيارة كاعدة افكر لمحت سيارة بصفنا ...مظللة سودة حديثة كلش..

للحكاية بقية...

بقلم الكاتبه..شقراء(قمر كانون)