نقيب قلبي الفصل الثاني 2 - بقلم شقراء

نقيب_قلبي

الجزء الثاني

اول مادخلت سمعت عياط اخويه وهو متعصب وامي تهدي بي!!

مازن..وين جنتي حضرتج لهسه لو باقيه لليل فد مرة.. جاوبته امي ..يمه خلصوا محاضرات متأخر ومالكت سيارة مو اكلك اجرلها خط الدنيا مو امان.. اندار عليه كال شون اجيتي؟!!!

زينة .. بعد مشيت لراس الشارع وصعدت كيات شسوي..ها صعدتي كيات بعد شنو شبيكم خابصين الدنيا.. لا عادي متعوده مابيها شي ..

حاجيت امي كتلها شصاير؟؟

يمة اختج متعاركة وي زوجها لان مايشتغل ومحتارة بالمصرف وتكله اطلع شوفلك شغلة ميقبل

هسه اجت تشتكي منه وعاط بيها مازن وكال بعدين ندز عليه ونحاجي..

زينة.. يمه هو هذا زوجها ارعن شنو مو عده عائلة..سكتي يمه سكتي ليسمعج اخوج..

خلي يسمع شنو حقها خطيه طكت روحها..

ولج يمه كلتله اتطلك يكلها احركج انت وجهالج ..اووف خل اروح ابدل وارتاح واشوفها خطية..

رحت شفتها تبجي وشعرها منفوش وجهالها وجههم اصفر وصافنين ويمها اخواتي الي تنصح والي ترزل والجو زادني احباط فوك حادثتي وضيمي..احجيلكم عن عائلتي..

احنا ٩ اولاد ..و٥ بنات امي مرة بسيطة شخصيتها ع كدها وفقيرة عكس شخصيه ابوي تماما جان قاسي ويخوف الى درجه بس بعيد عنا يعني من اشوف الاباء يعاملون بناتهم بحب ويدللوهم اتحسر ..جان موظف بسيط وتقاعد وحالتنا بسيطه يعني مو فقراء كلش بس عايشين حد الكفاف ..

اخواني الكبار توأم ثنين طالعين لاستراليا ..امجد واسعد واتصالنا بيهم قليل..طبعا امي ولاداتها كله توأم ثلائي وثنائي ..

وراهم اجو احمد ومازن..وهبة هم توأم الاولاد ثنينهم متزوجين وموظفين وهبة متزوجة وزوجها شخصيته متنعرف يمكن فقير يمكن ارعن يمكن مثالي زياده هو ماعنده شغل ثابت وهي هبه هم ثولة ومتعرف تتصرف....

بعدها صاروا محمد وسارة وعلي ..محمد هم متزوج وطالع وسارة ممتزوجة بعدها ..وعلي هم بعده ممتزوج بس هو احسن واحد باخواني مثااالي ويحب الكل .......

مواليد التسعين هم رانيا ورنين ..مخلصين كلية علوم رنين متزوجة ..ورانيا بعدها...

وراهم صارو بارق وياسر... بعدهم طلاب كلية عسكرية ..ثنينهم ومالهم اذية خطيه ملتهين بحياتهم شباب ...

نجي للكعدة اني وزيد ..اني حاسبات تربية وزيد ..ادارة واقتصاد..

اغلبنا طلاب ونحتاج مصرف الاولاد معليهم بأي شي بس علي ينطينا هو ممتوظف يشتغل وي نجار وسارة متوظفة هم تساعد بالمصرف ..

رانيا تشتغل بشركة اهلية وراتبها كلش قليل بس خطية هم تساعد ...

يعني الي عايشين بالبيت رانيا وسارة واني احنا البنات ..ممتزوجات.. النا غرفه ونفسها غرفة الكعدة ..

وزيد وبارق وياسر وعلي..بغرفة لان عزابية واحمد ومازن طبعا احمد غرفه ومازن غرفه هم وعوائلهم..وامي وابوي ينامون بالصالة لان ماعدهم غرفة بيتنا صغير بس محمد طلع لان مرته حالتهم زينة وماتحملت تبقى ويانا ..

عائلتنا جبيرة كلش واكيد نص الاسماء نسيتوها حكتبها للسهولة ..

امجد واسعد مسافرين..

احمد ومازن متزوجين وويانا بالبيت..

محمد متزوج وطالع..ورنين وهبة متزوجات..

علي وبارق وياسر وزيد ممتزوجين وويانا بالبيت..

واني وسارة ورانيا ممتزوجات..

حيكون هالبارت بس لتعريف العائلة .

للحكاية بقية..

بقلم الكاتبه شقراء(قمر كانون)