نقيب قلبي الفصل الثامن 8 - بقلم شقراء

الجزء الثامن
#نقيب_قلبي

امي..ماما شيرادلج اشو الصالونات بكل مكان...
وفساتين اشكال ..
باجر كالت امه تجي وتاخذج ونطلع نكمل شغلنا...

اجت امه ووصلها اخو لان هو عنده شغل...
اشترت هواي اشياء وذهب اخذتلي طقم ع شكل نسيج كلش راقي صار ب٩ ملايين ..
بداخلي انقهر اكول كلفت صقر هوايه خطية...
ماقبل بس هي تكلي معليج...
انت صرتي بتنا...
واخذتلي حلقة عريضة ب٥٠٠..

واشترتلي فستان ماقبلت ايجار وكالت خالته طالعين سفرة لدبي وحتجي وتجيبلي ثنين هم ..هدية منها..

رجعنا ومر اليوم وصقر ماكو...
ماتحملت كلت اراسله احسن..

دزيتله مسج ...هلووو!!!صح مشغول بالتحضيرات..بس ضل بالي يمك...

انتظرت ماكو جواب!!!
ماكدر اخابر لان خاف يشوفوني اخابره ويخرب كلشي...
صار ثاني يوم وهو ماكو ممعقولة...
متحملت بعد خابرته فصله!!!
شبي صقر شنو يريد يخليها كلش لحد يوم المهر يلا نتشاوف..
اباوع اون لاين!!!
لعد شنو القصة شبييي؟؟؟
ضليت قلقة طول الليل ..نمت قريب الفجر وصار الصبح رحت للصالون..
تجهزت وكملت ...
لبست فستان بنفسجي طوخ وشعري بقه مفتوح ومبروم وهو طويل كلش وخلتلي تاج ناعم بي ورد بنفسجي واصفر ..
صار شكلي مبهر...
رجعنا للبيت ع اساس نعقد ونروح للقاعة...
اجيت لكيت البيت مزدحم ..
دخلنا وشوي وكالو يلا حيعقدون...
كعدت ورا الباب وخلو رجليه بماي وبي ياس وورد ...بس اني ارجف..
اسمع السيد من ورا الباب يحجي...
ماركزت الا من كال تقبلين بشاهين ريسان؟؟؟؟؟

هنا احس قنبله انفجرت يم اذني؟؟؟؟
ضل يردد بس انا جمدت...
حاجتني امي ودموعي تصب...كال الشيخ بنتي جاوبي...
اذا مغصوبه كولي!!!
باوعتلي امي كالت شبيج وتخرط بخدودها...
كتله اسفه شوي دخت..
رجع ردد وامي تباوعلي ومصدومه ...
كلت نعم...
ونهيت حياتي بيدي....
علت الهلاهل واني اريد اوكف دمعتي ماكو...

وراها لبست البرنص وكملو وطلعنا كبل للقاعة...
وصلنا وجان كلشي جاهز..
كعدوني..
شوي وكالو حيدخل...
دخل وياريته مادخل...
صدك تدمرت بذيج اللحظة..
تمنيت احد يجي يكعدني...
يكلي كعدي كافي نوم..
وافز واكول اففف..
شكد مزعج هالكابوس!!!

بس للأسف كله حقيقي ...
كعد يمي واندار علي...

شاهين..مبروك يا احلى عروس...

زينة..شكراً يا انذل واحقر عريس...
صارت عيونه تجدح بس ابتسم وتقرب لزم ايدي...
رفعها وباسها قوي ...
جابو الذهب بلش يلبسني...
لبسني الحلقة وباس اصبعي..
التراجي لبسني وباس اذني والسوار هم..
والكلادة ضل يلبسني ع كييييف ...
وباسني بركبتي ...
حسيت جسمي كله يرجف خجل وقرف...
احاسيس مختلطة...
والاحساس الطاغي هو الكره...
كعد يمي...
ضل يتغزل واني مثل الصنم...
سوينا الامور التقليدية ..
اكلنا الكيك ..
وكالوا كومو ركصوا..
كمت بس غوشت الدنيا...
رجعو كعدوني..
كالت امه عوفه امبينه تعبانه حقها طول اليوم ركضة........

مينا عيونها بعيوني وحابسة دمعتها گوة..
مينا..زينة اني السبب لان كلت لجواد وهو عرف...
زينة..لاا انت معليج بس هو نذل ولو من كلتي هيج ردة فعله استغربت..
توقعت هالسكته وراها قنبلة...
بس المخبلني صقر!!! لا اتصل لا حجه معقولة غدر بيه!!
_زينة صقر انسي حبيبتي ..
هسه بديتي حياة جديده...
وبعد ميصير تفكرين بصقر...
_لج بس اريد اعرف شبي من اراسلة ميجاوب !!!شبييييييي
_اول وتالي حتعرفين شبي زينة...
بس خلي ببالج هي قسمه..
وصقر ماباعج!!!
_لج شنو هالالغاز احجي تعرفين شي!!!
_ها لا لا تشغلين بالج عمري وخليها يم الله ..
راحت مينا وانا دايخة بالموضوع ..
صرت مثل الاطرش بالزفة...

مر اليوم ع اعصابي...

رجعت للبيت مصدومة يباركولي ابتسم بس كلبي يصرخ ..
كلبي احسه دامي...
فتت سبحت ورحت كتلهم هلكانه رح انام...
تغطيت وضليت ابجي بخنكة بس دموعي تصب ...
رادو يحاجوني كتلهم تعبانه عوفوني...
لزمت الفون دزيتله مسج...
الظاهر عرفت بيه انخطبت وسحبت نفسك...
ع العموم ...
فرصة سعيدة..
مع السلامة ..
انطيتة حظر ..
غلقت الفون ..
غطيت راسي نمت كعدت ب٩ الصبح ..

سارة..زينة شنو القصة فهميني؟؟مو كلتي اسمه صقر!!
زينة..ماعرف رح اتخبل شلون صار هيج ..
والمخبلني صقر ميجاوب..
اراسله ولا عبالك...
بس هذا صدك كال اندمج..
وفعلا ندمني..
فسرت تصرفه من سمع يوم الجمعة خطوبتي استبق الحدث واجه...
بس المصيبة صقر!!!
طول هالفترة مراسلني ولا حجه!!
معقوله جذب عليه ميخطبني؟؟؟
معقولة ملتقي بي شاهين وحاجي عليه!!!
اريد تبرير رح امووووت ....

_تعرفين شاهين انت!؟؟؟
يعني شاهين متقصد اجه يخطب قبل صقر وشمدري؟؟؟
_فهميني شلون تعرفي؟؟؟
زينة........،.............،،.،، حجيتلها كلشي..
وحتى شلون وصل خبر خطوبتي هم...

_لا صدك تحجين؟؟؟
_ولا مجذبه بحرف ...
وماكدر اكلهم افسخ يتخبلون غير...
_انتظري فترة وفسخي..
انا صح ماشجع ع هالشي ..
بس هذا مو مال عشره وزواج....

فتحت الفون لكيته حارك الجو بالاتصالات...
شوي واتصل..
اتصل ٣ مرات كالت سارة جاوبي ..
..الو؟
شاهين ...حيوانه من البارحة لليوم غالقة الجهاز اجي هسه ادوس ببطنج!!!

للحكاية بقية...
للكاتبه شقراء (قمر كانون)