#
هذا البارت الي وعدتكم بيه
وعد مني لو صعدت التصويتات
باجر انزل بارت ونص
او بارتين.
حسب وقتي
تصبحوون على خير
#نوارس_مهاجره10
#زينب_الموسوي
الوقت ٢٠١٠
المكان سجن كروبر في بغداد
للمعتقلين العراقيين من قبل القوات الامريكيه
مرت ساعتين انتظر مقابله مع الكابتن جيمي
اجلس على كرسي قديم
وحولي الحرس الي مااعرف شنو سبب وجودهم
في سجن حصين استحاله شخص يگدر ينهزم منه
شغلت نظري بتفحص
كل ركن بهذا المكان ....
السجن الي دخلته بلا تهمه ...
ومااعرف شوكت اغادره
كل مابالمكان يوحي ...
بالخوف......بالموت .... والعار
حتى لغتهم الي صرت اتقنها ....مفرداتها تشبهم بالقسوه والطغيان .... ومضطر استخدمها
اطلت النظر ....
وحفضت .كل .زاويا. بيه.....
بداخلي مااريد اطلع ....
بعد الي صار
كرهت البشر ونفسي وجودي
ياريت ابقى اهنا واموت ومحد يعرف بيه
ياريت متت قبل لاادخل السجن
ياريت
تحركوا الجنود بتادية التحيه
لوصول الكابتن جيمي
وهو يمشي بخطوات سريعه
مستقيمه
واختفت من وجهه اي معنى للحياة
تملي بزته العسكريه الاوسمه والنياشين
الماخوذه ثمنا لهدر دم الابرياء حول العالم
التفت اليه بنصف ابتسامه
خلف هذي الابتسامه اكيد في حقاره مثله مثل غيره من الموجودين اهنا
وگف امامي باوعني بعيونه الي اختلطت زرقتهم مع لون الشرايين الاحمر من شده الصرامه الي يحملها
ربت على كتفي وهو ينطق اسمي
(مستر T )
حان الوقت
واشارلي بالدخول لغرفته
دخلت وياه بخطوات محسوبه
هو اخذ مكانه على كرسي
واشارلي اجلس
گعدت وابعدت النظر عنه
مااريد اشوفه.... مااريد اشوف العالم كله
وتوجه اليه بالحوار وهو يضع اقدامه على الميز الي امامه
:اكيد تبلغت ان هذا السجن راح يتسلم للقوات العراقيه
رديت (عرفت )واني انتظر الجمله الي بعدها منه
تناول السيگار والولاعه من امامه اشعل السيكار
ونفث الدخان في انحاء الغرفه وهو يسالني عن قراري
: هل وصلت لقرار
وقاطعني قبل لا احجي
: قبل لا اعرف قرارك خليني اوضحلك شي ء مهم عرفته بحياتي العسكريه
اشرتله براسي ان يكمل
واكمل وهو يترك كرسيه
ويروح خطوات امام خارطة العراق المعلقه على الحائط ويضع ايده عليها
: الشيء المحزن في الحروب هيه الابرياء الي يدفعون الثمن
والمحزن اكثر هو مافي احد يهتم بيهم او يسمعهم
تحرك قليلا وجلس بالكرسي الي جنبي وكمل حديثه
: يمكن ينذكرون بمقاله بجريده
عدد قرائها ميتجاوز عدد الاصابع
او تقرير تلفزيوني
او قصه حزينه نبكي عليها وتخلص نرجع نمارس حياتنا الطبيعيه وننساهم
باوعني وهو يقرب راسه مني واصبح مقابيلي وعيونه بعيوني ونظراته حاده وبحديث اقرب للتهديد
( القصص الي صارت اهنا لازم تنتهي اهنا وتنطوي صفحتها
هذي حرب وبالحرب هناك جرائم قذره مسموح بيها )
رجع راسه للخلف وهو يطلب يسمع قراري
جاوبته
: في تحقيقات راح تنفتح.... وفي صحف ...وكالات عالميه ...راح تسمع اغرب القصص
: الي اعرفه عن المجتمعات العربيه
صعب احد يتكلم عن الي صار
خاصه انت اصبحت مشهور بفضلنا
وبعدين ورى متتكلم وتكتب الوكالات. ويتعاقب الي يتعاقب
انت شنو تكون حياتك بعد متخلص التقارير. والقصص
والكل يقبض اجره من قصصكم وهو يدعي الانسانيه والتاثر عليكم
اگولك اني شلون تكون حياتك ...،،
نظرة احتقار ...وكلمة مسكين
هذا الي تاخذه
: مستحيل اسكت
فهمتكم في طريقه وحده تخليني اسكت
هو قتلي
انتفض من مكانه وتحولت نبرة صوته للغضب والصياح وهو يضرب الميز بأيده
: الي ارتكبوا الخطا تحاكموا واخذوا عقوبتهم
فقدت اعصابي وهو يگول خطا ورفعت صوتي
: خطا ؟!
هذي جرائم
وبعدين شنو كان العقوبه
توبيخ ها
: في شباب معاك تعرضوا للتعرضت اله
وماعدهم استعداد يتكلمون
والعالم يتناقل صورهم كلامك راح يظرهم
اسمع T
التحقيق اثبت انك اعتقلت بدون سبب وبالنسبه لحكومتك واهلك انت ميت.... جثه ...
بجرة قلم انهي وجودك
ومافي شي يثبت انت كنت سجين اهنا
تنفس بعمق وجلس ينظر للارض
وهدات نبرة صوته وهو يقنعني
: اسمعني. انت هسه مستر تي
مباريتك الها الالاف المشاهدات
والمعجبين
انسان جديد اصبحت
احبس معاناتك داخلك واخذ الفرصه تعيش ....حياة جديده ...
وبمكان جديد
وبقائك اهنا معناه راح تبقى مسجون عند العراقيين وتحقيق ومحاكم ومحامين منتدبين
اني اعرض عليك عرض افضل
باوعت عليه قريت افكاره وقرا افكاري
فعلا الخروج منا صعب والبقاء اصعب
سقطت قطرات عرگ من جبيني على الارض
وكانما تذكرني ماسقط مني من كرامه وانسانيه بهذا المكان
وتتوسل بيه بحفظ مابقى من ماء جبيني
بصوت مستسلم رديت
: شنو العرض
رجع جلس على كرسيه وهو يحدثني عن العرض
: خلال خدمتي بالجيش الامريكي
ماارتكبت مخالفه وحده
سجلي ابيض
واذا طلعت فضيحه ممكن تنهي مستقبلي العسكري
لذلك اقترح
تطلع من السجن قبل تسليمه
واعتبرك من المتعاونين مع القوات الامريكيه ......
اخذ يشرح تفاصيل خروجي واني ارد عليه باستفسارات
: كيف اطلع واني مااملك اوراق رسميه .... وميت في سجلات الدوله
: المساله تحلها السفاره الامريكيه
و بكتاب موقع من الجيش الامريكي
تقدمه للسفاره اهنا
وتسافر ل امريكا
تبدي حياة جديده
وخاصه انت نجم في (الرستلنگ الرسلنگ المصارعه الحره الامريكيه)
: واصدقائي : حميد ومؤمل
: عرضنا عليهم الخروج وافقوا
والصفقه مربحه.... اي طرف منكم يرفضها تلغي للباقين ...يعني لازم تلاثتكم توافقون ....
: اريد. اشوف اهلي
والسفر. ااجله كم يوم
: قرار صائب
ومع ذلك راح اعطيك كتاب للسفاره
اخرج اوراق ومد ايده اليه بقلم
وكمل
:في شي .مهم .لازم .توقع
على اوراق تثبت هذا الاتفاق مقابل السكوت للابد
: قصدك السكوت امام الصحافه والاعلام
هز راسه نعم
وضع ايده على كتفي وهو يسمعني كلماته
( مستر تي بطل المصارعه العملاق .....
خليك بطل بعيون الناس
لاتكسر صورتك
بنفس الخطوات المحسوبه الي دخلت بيها وقعت الاوراق
وغادرت مكتبه
رغبه مني اجرب اعيش من جديد
بعيدا عن هذا المكان وذله
وقرفه
رجعت لزنزاتني
المجاوره لزنزانه حميد
ومؤمل
وبدينا نجمع اشيائنا
دگ حميد على الزنزانه هو على يگح
: ها حميد .. بعدك مريض
: كلش مريض ... على بختك وقعت ....الاوراق
: وقعت وهسه خلال نص ساعه نطلع
سمعنا مؤمل وشارك بالحديث
: كنت خايف متوافق يمعود خلي نطلع وننسى
ونتغاضى والسر يموت جوانا
جاوبه حميد
: مستحيل ننسى بس گول نتغاضى ونحاول نعيش طبيعي
: اسمعوني حميد مؤمل بعد منطلع منا ....
كل واحد يروح بطريقه ...
هذا احسن حل
اذا نريد نحتفظ بسر ...
وبكرامتنا.... ونطم عارنا
: صحيح حجيك شتگول مومل ؟
: راح نبتعد بس اظل اذكركم بصلاتي
والله ينتقم منهم
انشغلت اجمع اغراضي الي هيه
لاشي يذكر ولازم اجمعها وارميها بالقمامه حتى ميبقى اثر
لوجودي
بعد نص ساعه اتقدم باتجاه زنزاتني جنديين ...
فتحوا الباب ...
انطوني ملابس
غيرت ملابسي
وخلوا الاصفاد بايدي
وبعدها مشوا ويايه ... اسمع كلمات الوداع من المعتقلين
الله وياك ....
لاتنسانا ....
يوم اللنا
وارد عليهم بعدم انتباهه
فالافكار بداخلي متزاحمه
ياما تمنيت هاليوم .....
ياما انتظرت هذي الخطوات تقترب وتفتح زنزانتي
وتسمحلي ارجع الحياتي
الضاعت
لحد الباب الرئيسي
في سياره برقم عراقي واگفه ....
فتحوا الاصفاد ...
وراحوا...للداخل
انتبهت السايق عراقي گال
الله بالخير
جاوبته الله بالخير وگعدت بالامام
:وين رايحين
جاوبني بلهجة عراقيه متخلو من لكنه امريكيه
:منتظر بعد في اشخاص ...
واخذكم لحد السفاره
وبعدين انتم حرين تدخلون
او لا
: السفاره عدها علم بجيتنا
(اكيد عدها علم
امريكا من ترتكب جريمه تحرص على عدم ترك دليل واحد )
جوابه ثار غضبي
: ياجريمه وانت شمدريك وتعرف السفر يمتى
(اكيد يحتاج وقت بس نصيحه
لاتبقى بالعراق ترى اول متتسرب اخبار يقتلوكم
يريدوكم تسافرون حتى يضمنون سكوتكم )
: ها ...حضرتك مع الجيش الامريكي افتهمت
(لا مجرد متعاقد معاهم وعايش بامريكا
سافر اهناك وابدي حياتك
افضل )
عرفت من كلامه همه موصيه يگول هذا الكلام... هم تهديد ...
وهم تاكيد
وصل... مؤمل وبعده حميد
نظرنا لبعض في صمت متفق عليه
تحركت السياره خارج السجن
نظرت للخلف واني ابتعد
ابد مااتوقعت في يوم اطلع من هالبؤره
حملت معاي ذكريات أليمه
وذل... وعار
وقررت ادفنها بصندوق عميق
واتركه في زاويه منسيه من عمري
وابدي محاوله التشبث بما بقى من رجولتي
(وصلنا للسفاره السايق اشارلنا
هذي السفاره ...
ادخلوا... واخذوا فيزا ...
مراح تخسرون شي
اذا معجبكم. ترجعون للعراق باي وقت )
نزلنا. نقدم خطوه ونأخرها
تقدمنا باتجاه التفتيش الدقيق
الي يشارك بيه حتى الكلاب البوليسيه
سالوا عن اسمائنا
ودققوا موجوده عدهم دخلنا
اجروا مقابله معانا
وطلبوا صور
حتى يستصدرون جوازات النا
استغرق الامر ساعه ونص
وبعدها
خرجنا... وتوادعنا ...وداع ابدي
وعدنا بعض منلتقي ابد
اخذت تكسي لحي الجهاد
المواجهه الاصعب احس گلبي
توقف بيه النبض الدم
اتسال ويه نفسي
راح يعرفوني ؟ يصدگوني ؟
والدي والدتي بعدهم عايشين ؟
واخبي
وسؤال متاكد من اجابته
:تزوجت ؟اكيد قابل تنتظر ميت
افضل مااريدها بحياتي
ضحكت من نفسي ( حياتي ههههه) على منو اضحك
اني متت بسجن ابو غريب
والعايش هسه بطل امام الناس
وحياتي انتهت بليلة سوده
طول الطريق اباوع على بغداد
الوضع ازداد سوء ...
والناس باين عليها التعب
محلات المواد الغذائيه زادت ...
والمعلبات انتشرت بالعراق
اسلاك الكهرباء صارت اكثر
ومافي بنايه... او جسر
جديد ...
انطوت المسافه الي تمنيت تطول
مشتاق الاهلي. وخايف من السؤال
خايف يقرون الذل بعيوني
وصلت منطقتي .... اباوع البيوت نفسها .... ياترى الجيران نفسهم
انتبهت على نفسي ملابسي
ممرتبه ...وشعري طويل
امي متحب تشوفني مبهذل
بس اكيد تحب تشوفني هسه
دگيت الباب ... الدگه امي تعرفها وهيه الي علمتني عليها
اكيد گلبها رجف من سمعتها
(يارب تكون عايشه )
صوت امي گال منو
خفت احجي تموت من الصدمه سكتت ...
فتحت الباب على كيفها
ورفعت عينها باوعتها وباوعتني بنفس الحنيه الي تعودت اشوفها ...
الحزن هاد حيلها
وبادي عليها... الكبر... والضعف
السواد لابسته من راسها... لحد رجليها
كانها شبح اسود
ماحجيت مديت اديه اثنينهن عليها
وحضنتها وصحت باعلى صوتي
يمه
وهيه عيونها مفتوحه وجامده
ماتحركت
هزيتها مرتين
اني طلال يمه ابنج يمه
باوعت بكل شوگها وحسرة گلبها
وصرخت طلال طلال
يمه انت طلال
وگعنا بالگاع اثنين ماسكين بعض ونبجي
—————————————————
ملاك
استغرقت الرحله للوصول الى مطار نيويورك ١٨ ساعه طيران
تعب ....وامال .... وخوف عبور المحيط ل أكثر من عشر ساعات
خلانا نحسب الوقت دقيقه دقيقه
ونفكر الطياره قوق محيط يعني اذ نوگع لو نكون وجبه طعام .....للقرش ....ل حوت
روان فقدت كل احساس .....فقط البكاء تمارسه بالخفاء
اثارت حالتها اهتمام المضيفات حاولو يطمنوها .ويحجون وياها
اللغه ماتفهمها ....
وحده منهم. ناولتها دفتر. رسم والوان
اخذتها من ايدها ..... وايه شجعتها تلون .... وانشغلت بالتلوين
ماما طول الرحله بيدها القران ...
وتصلي من مكانها بعد مااني سألت المضيفه عن وجهة السعوديه ... لان متعرف شنو قبله
واني وايه متلهفين للجاي ....تشدنا العزيمه .....والطموح بحياة افضل
حطت الطائره بمطار نيويورك
الي صار عدنا ذهول مجرد نزلنا بيه
الازدحام لايوصف .... خطوط جويه من كل انحاء العالم تحط طائراتها بيه .....
البشر من مختلف الثقافات واضح من لبسهم المختلف واللهجات الي نسمعه
ومن المطار تعرف جديه الحياة اهنا .....وسرعتها
الحقائب مااستلمناها تحملت بطائره ثانيه
جلسنا نتفرج من الزجاج حتى نخفف الذهول والتعجب عدنا
وجبرنا روان تتفرج ويانا
ماما گعدت على مصطبه وتمددت
ضحكنا اني وايه وهيه تگلي
( ماما اول وحده بينا بدت تمارس الحريه )
سمعتها ماما ابتسمت وحبت تتحدانا
(بيچن خير روحن شوفلنا اكل متنا جوع وبعد ورانا تلث ساعات انتظار )
قبلنا التحدي ....
وايضا قررنا نختبر لغتنا الانگليزيه
افترينا بالمطار. واحنا ماسكين ايد بايد
وكل شويه واحد فايت من نصنا وگايل( سوري )
رحنا يم استور( محل )
داخل المطار. يبيع نساتل
وگفنا گباله هيه تدفعني واني ادفعها
وبعد دفعات ودفعات
اقتربنا من الولد
ضاع كل الي درسناه وتعلمناه ....سنين حتى المحاورات الي كنا ندرخها. طارت .....
والشاب صافن علينا ومنتظر شوكت نحجي
اشرنا
على نساتل.... وببسي
وگلنا ( ذس ) ذس )
عدناها اربع مرات افتهم الولد
وانطانه
واخذ خمسه وعشرين دولار
طبعا اشر الارقام بايده
وايه من الفشله ظلت تسب بيه
: ابن الحرامي خمسه وعشرين دولار على اربع نساتل وقوطيه ببسي
ضحكنا على نفسنا
ونبهتها على كلمه سمعناه منه
: انتبهتي البيبسي يسموه پاپ
: يجوز هذا اسم الدلع هههههه
بعد مااكلنا صارت عدنا طاقه ... وشجاعه
نتجول بالمطار
وناخذ فكره عن اللفظ الامريكي
نسمع وايه تسجل بدفتر زغير كل كلمه تسمعها
اصابنا الياس من سمعنا لفظهم
: ملاك هذا ينراد سنه يله نفتهم اللفظ
: وداعتج هسه شهريين نصير احسن منهم
رجعنا لمكانا واكتفينا بالفرجه فقط
لحد
اجتي ممثله المنظمه وطلبت منا نتوجه للطائره
اخذنا حقائبنا الخفيفه الي بقت ويانا
باوعت على وجوهنا تحمل ابتسامه.... ورغبه... في الوصول لولايه مشيگان الي حبيناها قبل لنشوفها
توجهنا ....وصعدنا
في رحله لولاية مشيگان بطائره صغيره وعدد ركابها محدودين
وارتفاع الطيران منخفض سبب صداع.... ودوخه عدنا كلنا
وصلنا للمطار ديترويت القديم
والي ميقل اهميه بالفخامه والتنظيم من مطار نيويورك
في الطائره كانوا عرب
سالناهم عند النزول وين نروح
دلونا على بوابه الخروج
طلعنا
نباوع على الناس الي تنتظر القادمين
شفنا اسمائنا مكتوبه على لوحه يحملها رجال
ارتاحينا وحسينا بالامان
استقبلنا الرجال الي يعمل مع المنظمه
وعرفنا على نفسه
: اهلا وسهلا
اني ايمن عراقي ... عايش اهنا من خمسه وعشرين سنه
تقدمت ماما وردت عليه
لان احنا من سمعنا عراقي التهينا بفرحتنا
: هلا بيك يمه
طلع اوراق بظرف من حقيبته
: هذي اواقكم
هذا الرقم الاجتماعي اهم ورقه ....والرقم احفظوه وصوروه بمويلاتكم ...
حتى اذا ضاع عدكم نسخه ....
الرقم هذا لاتنطيه لاي شخص
الا جهة حكوميه....
والزوج ....والاولاد
وزع علينا كل وحده الكارت الي يحمل الرقم وطلب منا نتاكد من املاء الاسم صحيح والمواليد
باوعنا الاسماء مضبوطه
وجاوبناه مضبوطه ماكو خطا
توجه للجنط وهو يطلب منه نساعده
اخذنا جنطنا
مشى امامنا فتح الباب النا وهو يستعجلنا
:يله السياره تنتظركم
طلعنا خارج المطار البرد ضرب وجوهنا وكان مفاجأه النا ... وكل وحده خلت اديها حول جسدها
....وركضنا للسياره
صعدنا السياره
جذبنا الثلج الي ينزل بكثره ....
والسيارات الكبيره ترش ملح حتى تساعد على اذابة الثلج ...وفتح الطرق
واخذ ايمن على عاتقه بشرح مفصل عن المدينه
: مشيگان تتميز بوجود خمس فصول بيها ....وتقلبات جوها ...
الاناقه بالشتى معدومه ...
هذي ملابسكم متفيد ... اهم شيء الدفء ... قفازات وكبوس تحت الحجاب او فوقه. ... احذيه الثلج حتى لو قبيحه لازم تلبسوها
سالته ماما (يمه البرد. هذا على طول )
: لاحجيه تقريبا سبع اشهر بالسنه
واسترسلت بالحديث عن مشيگان
:
عدد نفوسها ١٢ مليون
عدد العراقيين ١٠٠ الف مسلم عراقي
واكثر من ١٢٠الف مسيحي عراقي
وكذلك ١٠٠ الف لبناني
وجاليات عديده
سألته ملاك
: لعد وينهم
: عشر دقايق تبدي المناطق العربيه
بحيث الامريكان يسمون ديربون
باسم (ديربون المحتله )
كلها عرب.... الامريكان عددهم قليل وباقين لغرض عملهم او بسنزز عدهم عند العرب
اهنا الغربه معدومه ....
دخلنا مدينه ديربون ....
وظهرت ملامح العرب واسواقهم ولافتات المحلات
: اقري ملاك اسواق الرضا....
اسواق المصطفى... حلويات الحلاب ...
حلويات شاتيلا ...
الكباب العراقي ...
اسواق الرافدين ...
كباب ولبن اربيل ...
محلات عشتار ...
صيدلية النخيل ...
جامع كربلاء ...
افران النبا...
احنا نقرا وايمن يضحك علينا لان مستغربين ان مكان في امريكا
تتواجد فيه كل هذي الاسماء العربيه
: لاتعدون ترى اتعبون وهذي فقط المحلات اما الشركات والمحامين والاطباء والمهندسين فما الهم عدد
وهذا بشارع ورن فقط
بعد عندج شيفر ...
وفورد ...
وگرين فيلد ...
وجيس ...
كلها عرب
هذي المدينه كانت مهجوره
واحياها النشاط والمال العربي
وبعد ميخلص الثلج
راح تشوفين الناس
كلها عرب ملابس عربيه
والكلام عربي
هذي المدينه صعب تتعلم
اللغه الانگليزيه
حاولو تدرسون ويكون الكم اصدقاء امريكان
: ليش يقبلون يصادقونه
ايمن : الشعب الامريكي شعب طيب ويحترم تقاليد وعادات الناس
اهم شي عدهم متخالف القانون
واذا تريدين تكسبين صداقته
اعزميه على اكل عربي
يحبوه بشكل
افترينا بشوارع عديده وكل مابيها عربي
وصلنا لبيت
ونزلنا يمه وهو تمشى امامنا فتحه بالمفتاح واحنا نتبع خطواته
: هذا البيت ايجار مدفوع تلث اشهر
ادخلوا ارتاحوا
البيت فيه ثلاجه... وطباخ ...،
وغساله ونشافه
هذا من ضمن الايجار
انطى لماما المفتاح ...ودعنا
بكلمه ( هلا بيكم. بامريكا )
واكد على ماما باخر جمله
(والصبح اجي عليكم
اكمل اموركم
واي اسئله
اكتبوها واني اجاوبها )
دخلنا البيت يشبه البيوت المجاوره اله
راسا حديقه بدون سياج
وبعدها باب الرئيسي تفتح تدخل للبيت
بعده صاله كبيره والثانيه اصغر
وبعدها مطبخ زغير
وفي ممر ضيق يودي لغرفتين نوم وحمام
افترينا بالبيت نظيف
وفيه بعض الاغراض
شفنا في باب من المطبخ
فتحت ايه حتى نعرف وين يروح
خلفه درجتين امامهمن باب
للحديقه الخلفيه وعلى اليمين
للقبو (البيسمنت )
نزلنه للبيسمنت مثل الطابق كامل ودافي
مرت عشر دقايق النا بالبيت نستكشف
اندگت الباب ....
فتحت اني
تلث نسوان الملامح عراقيه
رحبت بيهن
: اهلا وسهلا
: اهلا وسهلا بيكم عيوني
احنا جيرانكم
اني ام كوثر وهذي ام فاطمه وهذي مياده
كلنا عراقيات والشارع كله عراقيين ....ولبنانين
شلونكم اغاتي شمحتاجين
ماما جتي يمهن ورحبت اكثر
ا تفضلن داده هلا بيجن دخلن
شرفتونا اني ام ملاك
وذولي بناتي ملاك وايه وروان
وبدا حديث التعارف داخل بيت فارغ من الاثاث ولكن مملوء
بالحنيه... والغيره ...والطيبه العراقيه
علمونا هوايه اشياء منها ...الاسواق الرخيصه ....المناطق الامنه
....اهميه السياقه
لكون مشيكان متتوفر بيها الباصات الا قليل
وعرفنا فائدة البيسمنت
الي معظم العرب مستخدميه كغرفه للعائله ومطبخ
لكون البيوت صغيره والعرب عوائل كبيره
ويكون بارد بالصيف ودافي بالشتى يوفر اجور الغاز والكهرباء
ويستخدم. ملجأ بالكوارث الطبيعيه
وتحدث كل وحده من الجارات
بنبذه مختصره عن حياتها اهنا
ام كوثر : اني مااشتغل وزوجي ....يشتغل من الصبح لليل
عندي اطفال اثنين كوثر. وحسين بالابتدائيه اهلي كلهم اهنا ...
وسيارتي تحت امركم احذكم واجيبكم
ام فاطمه : واني هم مااشتغل احنا جيل ربات البيوت ....
ولا ما وگفتنا ويه زلمنا ضاعت ...الاطفال... والبيوت
عندي تلث بنات ولد واحد
واخر وحده كانت مياده
متزوجه جديد وتدرس وخجوله
لاحظت كلهم يسوقون
استفادينا من معلوماتها وسالت ايه مياده عن الدراسه
: افضل الكم تاخذون كورسات لغه... واطلعوا عن ديربون لغرض العمل مع الامريكان حتى تتعلمون لغه
ديربون فقط للسكن خلوها
وفي كليات محليه تنطيج .... شهاده بسبع اسابيع
مثلا مساعد طبي .... تحليلات مرضيه.... ليزر الا سنان
ملاك : سبع اسابيع بس
مياده : بلي وهذي شهادتها داخل الولايه فقط والدراسه على حسابج
ملاك : شگد تكلف
مياده كل كورس بالف دولار
ملاك هاي تفيدني اقدم عليها
مياده : اضبطي اللغه شويه اول مره
ايه : ودراسه الهندسه
مياده صعبه ويحتاجلج سبع سنين على الاقل
بعدها سالت ام كوثر عن روان
:وهذي الحلوه بيا صف
جاوبتها ماما
: هذي قصتها قصه
الحديث عن روان اخذنا لقصص اخرى سمعوها ودمعت عيونهم ويانا
اندكت الباب مره ثانيه
جوي نسوان لبنانيات ام وائل ....
وام رنا ...
وتعرفوا علينا
بعدها بدت صواني الاكل بالتعاقب تدخل لبيتنا
وكانا بالعراق
والاغراض الزايده ...
والالعاب ...
وغيرها
طلعوا الساعه تسعه بالليل
نمنا بدون مندري بنفسنا من التعب
............
اليوم الثاني
زارتنا ممثله المنظمه
واكدت ضرورة دوام روان
حجت ماما للمترجم حالتها
المترجم فهم الممثله حالتها جاوبته
:نعين الها مستشار نفسي بالمدرسه وتداوم باجر ...
قانون الولايه يمنع تسرب الطفل بهذا العمر ...
ولي امرها ملزم بالتنفيذ
ترجم الي گالته
ممثله المنظمه تبدو على ملامحها الصرامه وهيه من اصول افريقيه والتزمت بالقاء الحقوق والواجبات علينا
وفهمتنا ان الحكومه تنطينا جيك ب اربعميه وخمسين دولار
وتسعميه كارد لتسوق الطعام فقط
لمده تلث اشهر
وهيه تطلع سالتها عن الاثاث جاوبت
:الحكومه غير ملزمه بتوفير اثاث حاولو تتصرفون.... ولا تعملون بدون علم الدوله
وطلعت
انشغلنا باخراج مافي الحقائب
وترتيبها
ويقطع هالانشغال. المراقبه من النوافذ لكلشي ساكن ومتحرك
ام كوثر اجتي الضهر اخذتنا بالسياره دلتنا كم مكان... سجلنا صفوف لغه بكلية هنري فورد المسائيه
ورجعتنا بالطريق ايه استفسرت من ام كوثر عن العمل
: شنو ممنوع نعمل بلا علمهم
: هذي قوانين امريكا
ولكل قانون العرب وجدوله لوفه
: شلون يعني
فهمتني. اكثر
: شوفي تشتغلون مع العرب تتفقون وياه يسجل الساعات نصها وتقدموها للحكومه ....والنص ينطيكم مقطوع بلا علمهم ....
يعني تشتغلين اربعين ساعه بالاسبوع الحكومه تبلغيها بعشرين وعشرين هذي بينج وبين ابو العمل
حتى تبقى المساعدات ماشيه
لعد منين تشترين ...سياره واثاث ...
والكيبل العربي ...والنت
البانزين لوحده يراد تلاثين دولار يوميا
:الظاهر العرب كلهم هيج صحيح ام كوثر
: معظمها عيني تريدين
تلمين نفسج ....
لازم هيج تسووين
رجعنا البيت
متتعودين على بيت بدون اثاث
والظلمه عدهم من وقت تصير
متحس اكو عصر
ومياده جابت غدى جاهز
وظلت يمنا تسولف
طلعت نمنا من كثر الضجر بلا تلفزيون وبلا نت
حتى مواعين نتسلى بغسلهن ماكو
.........
واليوم الي بعده تسجلت روان بالمدرسه
قريبه
اخذتها صريخ وبجي
لازمه ايدي
دخلنا بناية المدرسه شفتها تحسرت على اطفال العراق وحال مدارسهم
وروان مستمره بالبجي ولازمه ايدي وتصيح
؛ لاتروحين. لاتروحين
: مااروح ياعيني
بس كافي تبجين... واتركي ايدي ...
وامشي مع الطالبات شوفيهن شگد حلوات ...
ومرتبات ...
شوفي الملعب شگد كبير
وحلو وبعد اكو. مسبح
تعالي ندخل ويه البنات
: تعالي ويايه
دخلت وياها لرواق كبير
والصف الواحد اكبر من قاعه جامعه عدنا
ملاك تعالي نشوف الاوفس
حتى نعرف صفج وين
دخلنا في بنت عربيه والثانيه امريكيه
حجيت مع العربيه
: هذي روان اول يوم اهنا
وهيه مريضه متحب تبقى لوحدها
:اوكي ابقي معاها اليوم
ومن تدخل الصف اتركيها
:روان لا متتركني تبقى وياي
توجهت بابتسامه لروان سبقت ردها
:ياانسه هذي متوسطه راح تجعلين من نفسك اضحوكه للاولاد ....انت شابه
تعالي معاي
صعدنا الدرج وهيه ويانا
لصف بالطابق الثاني ودگت الباب على مدرسه عربيه
كبيره بالعمر وجهها مبتسم
وهيه الي بادرت بالكلام
: طالبه جديده
روان ساكته واني جاوبت
: نعم اسمها روان
تركت الميز واقتربت منها
: تفضلي انسه روان
هذا الصف (باي لانگول )
يعني للطلاب الذين لايتحدثون الانگليزيه
: يعني تدرس بالعربي
: لا. تدرس بالانگليزي
وبعدين نشرحلها بالعربي
ابتسامتها شجعت روان الي يبدو عليها الخوف
وگفت المدرسه بوسط الصف تبحث عن مكان جلوس مناسب لروان
واندارت على روان وهيه تحجي وياها
:تعالي اختاري مكانج شنو رائيج
جنب الانسه حلا او الانسه مروه
الاثنين شاطرات
تركت ايدي وسالتني
: ملاك ادخل
: ادخلي حبيبتي
يم هذي مروه
مشت روان وگعدت يم مروه الي رحبت بيها وراسا
بدت تبادلها الابتسامه
باوعتني طمنتها
: اني انتظرج برا لحد تخلصين
نزلت جوى
صاحتني البنت العربيه بالاوفس
وحجيتلها وضع روان
لاتهتمين عزيزتي... في مساعده نفسيه الها من المدرسه
في امامها عدد من المنشورات تريد تعلگهم بالممرات بمثابة اعلانات مهمه للطلاب
انتبهت اني واگفه
سالتني
: عندج عمل اليوم
: لا ماعندي
:تحبين تساعديني كمتطوعه
اليوم اول يوم الفصل الدراسي بعد الكرسمس
وعندي عمل كثير
: اكون سعيده بمساعدتج
اكيد
بقيت وياها
ازيل المنشور القديم
واخذ المنشور. الجديد واكبسه على الحايط
واستفاديت كم معلومه عن المدرسه.... والدرجات
من خلص اليوم ....روان جتي عليه
كانت عيونها مليانه دمع
ولزمت ايدي راسا ...بلا متحجي
شي
ردت اشوف انطباعها شنو
: ها عجبتج المدرسه
هزت راسها ( اي)
: الحمد لله
وشفتج بالغدى تاكلين
حجت بصوت فيه نوع من الحماس
: اي انطونا غدا بالمدرسه
: وعجبج
عجبني
واسترسلت بالحديث بلا مااسالها
(وهذي مروه حبابه
وبيتها قريب )
: شلون عرفتي بيتها قريب
:قرت العنوان مالتي گالت احنا قريبين
سكتت وگالت
تساعديني بالهوم ورك
ضحكت من فرحتي وهيه تلفظ اول كلمه انگليزيه
: ههههه والله لگفيتها
الهوم ورك من اول يوم ....
اساعدج تددلين
وطلبت منها تترك ايدي وتمشي
تركتها ... وكملت حجي
: وفي مس اسمها مس بازي لبنانيه اخذتني. وگالت اذا تحتاجين احد تحجيله تعالي عندي
ومس صعب علمتني الاحرف الانگليزي ومقاطع الحروف
: هذا كل بيوم واحد....
شوفي شلون مهتمين بيج
حبيبتي لازم تدرسين ....
وتدخلين اعداديه ....
شگد حلو تاخذين شهاده امريكيه تگدرين تشتغلين باي مكان بالعالم معترف بيها
شفت عدها حماس قوي للتعلم
: لازم تعلميني الارقام
الانگليزيه
حتى افتهم الرياضيات
: سهله اليوم نگعد نتعلم كولشي
خلص طريقنا وصلنا
للبيت
والساعه خمسه العصر طلعنا اني وايه للكليه
امتحنا وصرنا بالمستوى الثالث انگليزي
يعني يبقى تلث مستويات
كل مستوى ياخذ من شهرين الى ثلاثه اشهر
وام كوثر. وام فاطمه يتناوبون على توصلينا بالسياره
نشعر بالخجل من كثر افضالهن
علينا
: ايه اليوم نفول السياره على حسابنا ل ام كوثر وام فاطمه عيب منهن يوصلنا كل يوم ودتشوفين البانزين غالي
: صدوك عيب
واحنا لازم نشتري سياره
: لازم نتعلم سياقه بس دروسها غاليه
الساعه ٣٥ دولار
وسعر سياره بسيطه
الفين دولار
وتامينها شهريا ٣٠٠ دولار
: اهنا كلشي افلوس
لازم نشتغل ملاك
: اليوم اسال واشوف البنات الي ويانا
واحنا طالعين مع ام كوثر نزلت للمحطه البانزين تفول
نزلت وياها حتى ادفع
ومن عرفت رفضت هالشي
: عيب شنو هذا الحجي احنا عراقيين
احنا اهنا گلب واحد ماغيرتنا الغربه
اليوم تحتاجوني وباجر احتاجكم
ونزلت ايه تتوسل
: بس ميصير هيج يعني خطيه ابو كوثر شنو ذنبه
: فتره كلنا مرينا بيها
وقاسينا وتعبنا يله وصلنا
صعدنا السياره وهيه تسوق شافتني صافنه وسالتني شبيج
: داحس امريكا مو الصوره الي ماخذتها عنها
واحسها كلها تعب وجهد
؛ امريكا ينطبق عليها المثل اتعب والعب
يراد تعب وفلوس حتى الشارع الي نمشي عليه ياخذون فلوسه منه
بس الحلو بيها
مهما يكون عملج
مافي احتقار ونظره دنيا للعمل
تگدرين تشتغلين نادله وتصعدين احدث سياره
تشتغلين كاشيره
وتمتلكين اجمل بيت
مدام تجيبن فلوس البنوك تركض وراج تنطيج قروض ....وتسهيلات.... كردت ...
تامين
واهم شي الشهاده
..............
بالكليه تعرفنا على بنات اثنين ساره من عمرنا
وحنان اصغر منا
في بين الدورس نص ساعه اخذونا على الكفتريا
نسولف ونشرب گهوه الي تقريبا اهنا اهم مشروب
سالناهم على عمل
حنان : منو بيكم شاطره بالرسم
ايه : اني ارسم خرائط واگدر ارسم
وجوه
حنان : في محل تاتو
يريد تصميم رسومات
واحرف عربيه
حنان : عبالي مكتب
تعبت من البهذله مطاعم ومحلات
شوكت اعمل بشهادتي
ساره : الطريق طويل
وهذا العمل راح ينطوج كاش
يعني الحكومه متعرف بيج
ترددت ايه في العمل
وبدينا نحس بخيبة الامل
اشتغلت اني منظفه
في فندق
لان بيها( تب ) عالي
وساعه تسع دولارات
وبديت اوفر حتى بعد مااخلص اللغه ادرس تحليل واشتغل شغل محترم وبعدني ايه تدرس مساعد طبي
بيوم راجعه من العمل
شفت قنفات جلد ...
وميز طعام... وست كراسي
وزوليه ...
وطبلتين ....
مشموره امام بيت
اباوع عليهن كولش نظيفات
وحلوات
وصلت للبيت
ايه مسويه اضراب عن الحياة
وداخله كابه ومتقبل حتى تحجي
ولازمه السجين وتثرم. كلشي حتى المثروم ترجع تثرمه
عبالك دتنتقم
وصوت السجين. يتوعد الخضروات بالويل ... والثبور
خفت احجي وياها
وبالي يم الاغراض. اخاف تنشال
اقتربت على كيفي وحجيت
: ماطلعتي من العزله هاي
ردت وهيه تثرم
: عوفيني بحالي
: شبيج متگليلي
ذبت السجين بالسنك واندارت عليه. تصيح
: شبيه صدوك ؟
اشو. الفرح وين مااروح ملاحكني
شغل مطاعم
الشهاده لازم سبع سنين يله احصلها
عمري صار ٢٧ وزواج ممتزوجه
البيت كرسي مابيه
وفلوس الدوله متكفي
وقائمة الكهرباء ٢٠٠ دولار
گعدت يمها
: واني مثلج ياعيني
عمري واحد وتلاثين
واشتغل منظفه
تعالي اگلج شي
لج واني راجعه شلون اثاث يخبل
جاوبت بيأس وتهكم
:وشگد سعره تلگيه هسه بخمسة الالف دولار
: لج ذابيه ميريدوه
وقريب منا
واصحاب البيت امريكان
اثار الموضوع اهتمامها وبدت تخطط ويايه
: الله عليج
وين
: تعالي نشوفه
غيرت ملابسها. وطلعنا
تمشينا لحد وصلنا
شافت الاثاث وافترت حوله
ولزمته بايدها
: صدوك هذا الاثاث ميريدوه
: باعي ننتظر يصير الليل ونشيله
: شيشيل هذي القنفات
: ماادري نگول ل ام كوثر تساعدنا
: اخاف عيب
: عيب عيب
هذي مرحله البهذله ولازم فد يوم نعبرها
: لج اخاف يشيلوها قبلنا
: يجوز هم صدوك....... شنو رائيج نبقى گاعدين عليهم لحد الليل
ضحكت لحد دنگت للگاع
واحنا دنحجي طلع رجال امريكي
سلم علينا وسال
:تحتاجون هذي الاغراض
احنا اللغه عدنا كلمه انگليزي وعشره متنعرف شنو
اتفق ويانا ناخذهن
ويساعدنا بنقل الاثاث بشرط هو ميحمل احنا نشيلهم نخليهم بالسياره
وبعدين اشرلنا ان عنده بعد اثاث جوى لان هو بايع البيت
وميگدر يشيل الاثاث معاه
:ادخلوا جوى واخذوا الي تريدوه توفرون عليه اشيل واطلعه برى البيت لان المشتري شرط عليه البيت فارغ
ترددنا ندخل واجى ابالنا كل مقاطع افلام الامريكيه الي بيها قتل.... واغتصاب
: شتگولين ندخل ايه
: لج اخاف هذا حرامي لو مغتصب
حجيت وياه
: اوك ناخذ هذي الوجبه
وبعدين نجيب ماما ويانا وتشوف شنو نحتاج
حملنا الاغراض كلها
ورجعنا مره ثانيه اخذنا سريرين من عنده ...
وتيبل لامب ...
ومزهريات ...
مبقينا شي بالبيت
وهو عليه فقط يوصلنا
ملينا البيت ....
واخذنا وقت نخطط كيف نرتبهن
ومسحنا الاثاث ونظفناه
وتغير شكل البيت
وتحسنت نفسيتنا
صادف بعدها بيومين
زياره مسووله الاعانه الاجتماعيه
شافت البيت مليان اثاث
فتحت تحقيق
المسووله منين هذا الاثاث عدكم وصولات بيه
: مشتريناه
كان مشمور بالشارع ونقلناه
: اريد وصولات الظاهر عدكم مصدر للدخل غير شغل الانسه ملاك
واذ متنطوني وصولات مضطره اوقف المساعدات عنكم
طلعت
: شنو هالحظ
فوك ما المساعدات يادوب تكفينا
وقفت المساعدات عنا
واحنا بامس الحاجه الها
نوفر حتى نشتري سياره
—————————-
ايه
يأس واحباط وخيبة امل
العناوين الرئيسيه لنشرة حياتي
وحياة ملاك
قبلت بالعمل
بمحل تاتو مع بنت عربيه
اسمها
زينه
اشتغل كاش حتى الحكومه متعرف
وندرس واصبح صعب نكلف الناس يوصلونا
كتبت ام كوثر وصولات بالاثاث وقدمناه
للمساعده الاجتماعيه
وبلغونا يدرسون الموضوع يله يفتحوه
بدينا ناخذ دروس السياقه
مع بنت عراقيه هيه وزوجها اسمها ام نور
وبدت تحجي ويانا عن الحال
اهنا
: كلنا مرينا بهذي الظروف
وبعدين صرنا
اني كنت اخبز للافران
وادرس ....وبعدين تزوجت. وتساعدنا اثنينا وصار عدنا... بيت
واثاث... وبسنزز
بس انتم تحتاجون رجال وياكم
: اني فعلا تعبت ومستعده اقبل باي شخص
على الاقل اشيل حملي عن ماما واختي
اريد اخذ واحد يستتني
يگعدني بالبيت واخلف وانجب واسكت
: تفكيرج غلط وراح يدفعج ل اختيار خطا
وخلي ابالج فرص الزواج بمشيكان كلش صعبه
: ليش
: الشاب اهنا هم تعبان يريد الي تعينه
وبعضهم يفضل يجيب من العراق
لان بنات اهنا تعلمن على الحريه
واهلها مراح يخلوه يتحكم بيها
العروس من العراق يستفرد بيها لا اهل ولا لغه ولا معرفه بالقانون
: لو باقيه بالعراق افضل
كلشي صعب
ومديتحصل بسهوله
——————————
——————————-
ايه
تخطينا عقبه
واخذنا اجازه السوق اني وملاك
وساعدنا ابو كوثر في شراء سياره
تعبانه بس تمشي الحال
ودخل اسمائنا وياه بالتامين
حتى ميصير غالي علينا
وبدينا نشتغل ساعات اكثر وندرس
ورجعت المساعدات الحكوميه
في يوم الفجر
گعدنا على صراخ
روان
ركضنا عليها
: خير روان شبيج
روان الم بصدري راح اموت
صراخها ارعبنا وهيه تشير لمكان الشظيه
طلعت شغلت السياره بين ماملاك تغييرلها ملابس
اخذناها للطواريء ....
اهناك صعب تلگه عرب
اكثر البنات العرب مياخذون خفارات
والي تاخذ خفاره هيه البنات الي م
دخلوها
ومليانه اوراق
ودخلت ملاك معاها
واني بقيت بغرفه الانتظار
ابجي من الخوف والياس وقلة الحيله
كان شاب واضح من ملامحه عراقي
وميعرف يحجي انگليزي
يتلفت يمين يسار
يريد احد يساعده
اجى عليه
: السلام عليكم اختي
: وعليكم السلام
: رحمه على والديج ممكن تجين اترجمين
والدتي مريضه مرتفع عدها السكر
: انشاالله... ولو اني لغتي مو قويه
توجهت يم الشباك الي يمه ...الممرضات واگفات
دخلوا المره
وانطوني اوراق امليها
دخلت وياها
وسالته
خاله شسمج حتى اكتبه
اسمي ام محمد يمه
:ههههه
لاخاله اسمج بالهويه شنو
:ها شمعه يمه
: الله خاله شنو هالاسم الحلو
: يحلي ايامج بنتي .. انتي شسمج
: ايه
يله خاله ... البسي هذي الروب
خلي اساعدج اني
ساعدتها ودخلت وفحصت وانطوها علاج
من رادت تطلع طلبت رقمي
انطيتها الرقم
صاحتني ملاك وهيه ترجف
: خير شصاير
ملاك : الاطباء يكولون الشظيه بجسمها
وسكتت وانهد حيلها على الكرسي وجهها شاحب
خوفتني حالتها
: احجي ملاك الشظيه شبيها
:يگولون ممكن تتحول لورم خبيث
: شتحجين روان عدها خبيث
: الدكتور يگول غلط هملتوها كل هذي الفتره
انهد حيلي مثلها وگعدت اندب حضنا العاثر
: ياربي شنو هالحظ شسوينا احنا
شسوينا
ارتفع صوتي والممرضات ميقبلون ...
شرحتلي ملاك وهيه تهديني الحاله اكثر
: على كيفج
راح تبقى على العلاج لحد يتاكدون منها ....
وكل فتره ياخذون عينه
: مسكينه ياروان
ورثتي سوء الحظ من اخواتج
——————————
روان
كانما كنت في غيبوبه وصحيت منها ....في عالم مختلف
مااعرف ليش احنا اهنا
وكل يوم بلد... وبيت... وشقه
من موت والدي احنا منعرف وطن ولا استقرار
ليش احنا اهنا
اهنا انفرضت عليه المدرسه
اني قراتي العربيه ضعيفه
والانگليزيه مدارستها
اخاف من المشي بالشوارع
من اروح للمدرسه
واخاف ملاك تعرف مستواي متدني بالمدرسه
تصير عصبيه عليه
بسبب عملها ودراستها
عصبيتها تصبها عليه
خاصة من تساعدني بالهوم ورك
لجئت ل اخفاء الهوم ورك عنها حتى لا تتعصب
ومروه تساعدني بالمكتبه
مرات الحل يطلع خطا اخذ درجه ضعيفه واخبيها
اراجع عند دكتوره نفسيه
تساعدني استعيد الثقه بالعالم الخارجي
المدرسه عالم كبير اهنا
الطالب المهاجر يسوي المستحيل حتى يكون بمستوى الطلاب الاصليين
واني حتى مااعتبر من الطلاب المهاجرين ...
لان حتى عربيتي ضعيفه
معتمده على مروه وكانما اني عميه وهيه تدليني
حياتي مهدده بمرض السرطان
بعد الفخوصات والعلاجات
قررا بابقى على علاج
لحد يجدون طريقه ل استاصال الورم
الي صاير قريب من القلب
تغيب عن الدراسه ١٥ يوم
وتراجع مستواي اكثر
وبدت الدكتوره النفسيه تعدني
نفسيا
لرحله علاج يمكن تطول مدى حياتي
- [ ]
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!