رواية نوارس مهاجره الفصل الثاني عشر 12 - بقلم zeanab_almusawi

السلام عليكم
نكمل مشوارنا مع النوارس
بارت واحد اليوم
لان التصويت ضعيف جدا
ارفعولي التصويت رجاءا

#نوارس_مهاجره11
#زينب_الموسوي

طلال
مرت دقايق بيني وبين امي
وهيه تبجي وتصيح

:ولك انت يمه هذا طولك نفسه
ولك يمه ظلت حسره بگلبي اشمك
دفنتك محروگ  وگتلهم مو هوه مااصدگوني ... انطوني كيس لحم اسود وگالوا هذا ابنج

وظلت تصرخ لحد التمت الجيران ...علينا

الجيران كلها دخلت البيت
وكلها تسال شلون ؟
وين جان ؟
الشباب مامصدگه

وسط الهوسه والصلوات
سالت امي عن ابوي
جاوبت
بالمحل هسه اخابره

دخلتني لازمه بيه  من قميصي
خايفه تهدني
وتردد حلم ... علم
يمه طلال وين جنت بعد امك يمه
جوي  شباب المنطقه بعضهم اتذكره... وبعضهم لا

وظل بابنا مفتوح تدخل  العالم تتاكد وتروح وبعضها تبقى تريد تعرف التفاصيل

اتصلت امي بوالدي واختي وفاء واخواني محافظات
كلهم اتصوروا امي انجنت
ويطلبون يسمعون صوتي ....
وخاصة وفاء
بس گلت الووو
صرخت  ...وبعد دقايق وصلت تلهث من الركض رغم هيه حامل.... وگفت اگبالي  تخاف تقترب  يطلع وهم
وگفت ماتحملت. نزلت للگاع تبجي
وبعدها
وصل والدي ....
شفته يوخر الناس عني
لحد شافني
وباعلى صوت شهگ ابني
ذب نفسه عليه
وهو يتفقد ملامحي
وين جنت طلال ؟
منو اخذك ؟
ابني ليش ليش ؟

نزلت على رجليه ابوسها
ماقبل رفعني
لك اني اريد ابوسك  ...اريد اصدك
والله من قهري اتمنى الموت يوميه
احجيلي وين جنت وليش مااتصلت بينا كل هذي السنين

وصار وقت احجي بيه الصار

: اعتقلت عند الامريكان يابه

: شلون اعتقلوك الامريكان

يحجي ويرجف. وجهها شاحب

دگعد يابه ليصير بيك شي
اگعد احجيلك ...
مو بس والدي گعد كل الموجودين
كلها تريد تسمع الميت كيف رجع للحياة ؟

: ورى مارجعت من بيت عم ايه
كنت ...مخنوك ...وضايج

طلعت للشارع اتمشى وگفت على الشارع العام
فات رتل امريكي انفجرت عبوه عليهم
شخص كان قريب مني احترك عطب
واني عن الانفجار   مسافه ....
ركضت لان الامريكان بدوا يضربون واني اركض وگع التلفون قريب  من الانفجار ....
تصوروا اني الي كنت زارع العبوه  .....

ضربوني برجلي.... وگعت ...
سدوا الطريق ونزلوا
اعتقلوني
وبدوا تحقيق معاي
ماعندي اوراق رسميه لان طالع اتمشى بالتراك

وظليت بالسجن 
ماصدگوا اني بريء

لحد صار تسليم السجون للعراق راجعوا الملفات وعرفوا بريء طلعوني  بعدها

وكمل ابويه

: سمعنا صوت الانفجار و الاطلاقات ...
وامك گعدتني گالت طلال بالشارع ...وصوت ضرب وانفجار
گعدت باوعت من الباب هدوء وماكو بشر بالشارع

اتصل بينا شخص  من تلفونك گال ابنكم احترك بالانفجار وبقى تلفونه
رحنا ركض عل حادث
انطانا التلفون وگال شفته انصهر
ثاني يوم سلمونا الجثه
مشفنا منها اي شي واضعيها بكيس بلاستك عباره عن قطع لحم
امك شافت عيون گالت مو ابني
بس ماصدگنا
ورى وفاتك تركنا بغداد فتره
ورجعنا قبل اربع اشهر

: يمه اوليدي خمس سنين بالسجن تتعذب واني ماادري ....
يايمه ياطلال سوده عليه
يمه هم عذبوك

: يخسون. ...اني منو يگدر  لي 

: صدوك شنو هالعضلات صاير  بطل
عبالك مصارع .....

ضحكت ضحكه عاليه  كاذبه على كلام ابويه (بطل )

وضحكت امي  من شافتني اضحك
وسالتني بعتاب

:مااگدرت تخابرني ماسمحولك تتصل؟

: اصلا محد يعرف عن وجودنا احنا المعتقلين على الشبهه

اهنا سالني ابويه عن اسم السجن
وهو خايف لااكون بسجن ابو غريب

: ابني بس لاانت من ضمن الي عذبوهم بابو غريب

ارتبكت ارد.... وانكرت

: لا يابه كنت بسجن  عادي وحتى صرت مشهور  بالرياضه
وتعلمت المصارعه

تنفس ابويه براحه
: الحمد لله ابني والله يعين الناس الي اعتقلوها بابو غريب اتسربت صور بشعه عنهم

مكنت متوقع هالشي .... في صور ... واخبار

لابد من الهروب اذا ...

تلث ايام خلصت في استقبال ناس
واقارب. ابويه نصب جادر للناس
وذبايح  ونذور

تلث ايام اتهرب اصعد الغرفه ....
انام بالصاله
بالحاح من امي وفاء

صعدت الدرج .... الرهبه اوصل اهناك
اتصور موجوده ....
امي وفاء مجابوا سيرتها
اكيد يعرفون تزوجت  واحد من ولد عمها
كم جرح لازم اتحمل ...،
كم ذبح ؟
فتحت الباب جتي عيني على صورتها على الحايط   ....وهيه تبتسم
مثل الي تستقبلني

سديت الباب  ونزلت صورتها  لحضني وبجيت
گعدت بالارض 
(والله احسد الي يشوف ابتسامتج هسه ....
اسف ايه اسف
وعدتج للابد  ....وماگدرت
اني عار  اني مو رجال ...كلشي بيه مهان  .... مو اني  طلال الحبيتيه . اصبحت مدنس
اسف ايه )
ماسيطرت على دموعي وصوتي بالبجي

اندكت الباب
رجعت الصوره ومسحت عيوني
وطلعت وفاء بالباب

: شبيك خويه طلال
: ماكو شي سدي باب الغرفه وبعد لاتفتحوها
راح انام بغرفه ثانيه

مشيت خطوتين وهيه تحجي

: منو گال تزوجت 
ريم مرة عادل صديقك شافتها ورى سنه من روحتك وهيه حزينه ومبهذله عليك
اتصلت بيه وگالتلي

رجعت عليها اسكتها
: اسمعي وفاء انتي اختي الجبيره واحترمج
لاتدخلين باموري   .... لا اريد اعرف ايه ... ولا عادل ولا مرته

ماسكتت وگلبها محروگ على ايه

: حرام البنيه مرتك ويجوز تنتظر

اقتربت عليها خنگتها وخليت راسها على حديد الدرج

: اني شگلت سمعتيني لو لا

ردت مخنوگه سمعتك سمعتك
خنگتني شبيك

تركتها ونزلت على الدرج
تلگتني امي وابويه

: هايمه شفت غرفتك مثل ماهيه
واليوم اروح لبيت عم ايه واسال عليها حتى لو متزوجه لازم تعرف

: قبل لا يدخل بالحديث والدي
حجيت اني

: يا ايه الخابصيني بيها
ها اصلا اني محظوظ وماتزوجت
وين كان عقلي عمري ٢٢ اتزوج واخسر حريتي

ماصدكوا الي اگوله والدي وكف على حيله يتاكد
: انت صدك تحجي

رديت بثقه مصطنعه

: طبعا صدك يابه اني ناوي اهاجر
والحگ على عمري اتونس افتر دول
ماافكر بالزواج لا ايه ولا غيرها

لزمني والدي من كتفي وهو غاضب ومستنكر.  برودي

: انت  شبيك شنو سالفتك
الليل متنام ... اصدقائك  متريد احد يعرف
وعادل صديقك الي ترك العراق بعدك من حزنه
متريدني  اخبر اهله

اول مره بحياتي ارفع صوتي على والدي
اخذتهم بالصوت العالي ... حتى اوقف تفكيرهم بوضعي
خاصة امي احسها تدور بعيوني
عن شي ضاع ....
وبكل جراءه. وخرت ايد والدي عن كتفي وانتفضت

: بشنو تخبرهم  بالخمس سنين الي ضاعت من عمري خلف قضبان ... بلا جرم
بشنو فرحانين. ...،واني عند الدوله ميت باوراق رسميه ...
يابه اني اجيت اطمنكم
واروح. ....اهنا اني ميت  طلال مات
اني مستر تي

دارت الارض بيه من الشد العصبي خلال هذي الايام  ....
واني اترقب وجوه الزائريين ....
خايف لا تدخل فجاءه هيه وتشوفني ...
خايف صديق يدخل ويسالني
عن سجني ...

الم معدتي ازداد  ... دخلت للحمام  اتقيء
واگف بالحمام ... مااريد اطلع واشوف امي الي احس تعرف
احس گلبها يعلم
اسمعها  من خلف الباب  ابتدت عركه ويه والدي

: شتريد منه تتناگر وياه خليه يسافر يتونس
المهم راحته

طلعت والدي  اتصور مغثوث منه
دنگ وسالني

:  تحب احجزلك لتركيا لبنان

بست راسه واعتذرت

: اسف يابه اعذرني
شويه نفسيتي تعبانه خليني ارتاح

: على راحتك ابني ....
اخذ هذي فلوس وروح سافر تونس

: اي يمه سافر. وتعالج  برى
شوف شنو سالفه هالقيء يوميه

: ان شاء الله

اخذت الفلوس وطلعت

طلعت من البيت 
لازم اغادر العراق باقرب وقت
قبل ليوصل الخبر ل اصدقاىي
ويعرفون وين كنت مسجون
وبعدها يوصل الخبر. ل ايه
واعرف حتى لو متزوجه تجي تشوفني
افتريت بالشوارع القريبه
في محل تجهيزات رياضيه
نزلت اشتري
كيس رمل( السند باج )
صار تلث ايام مضارب احد وممضروب
والدم داخلي يغلي
لازم اشوفه يسيل يله ارتاح

وبعدها اشتريت ملابس ....وموبايل مع شريحه  ...وحقيبه سفر
وقطعت تذاكر  لمدينة شيكاغو الامريكيه
اختاريت الاسم عشوائي اجى ابالي
رجعت للبيت
وسط دهشة اهلي

علگت الكيس الرملي بغرفة فوگ وبديت اضرب واضرب
اضرب
مااحس بالالم ..،
الالم الي تعودت عليه
وصار جزء مني

عجزت اضرب
ماشفت دم
اقتربت من الباب ضربته براسي
مرتين لحد طلع دم
لمسته بايدي وشفته
هدات ثورة الغضب داخلي تمددت على الارض ونمت

وعيت على صوت الجوامع تكبر

تركت مكاني  ...
جهزت جنطتي .....
وطلعت على غرفتي اخذت صورتها 
وطلعت اتسحب ...
نزلت الدرج  بالهول امي تصلي
وگفت انتظرها  تخلص
سلمت ...
گعدت يمها وبصوت  مخنوكه جواه  الاه
: يمه اني مسافر
الله وياج

: وين رايح يمه  الله وياك

: رايح لعدة دول ....

: يمه مانطيتني  رقمك حتى اتصل بيك

: اني اعرف رقمج واتصل بيج

: وعد

: وعد يمه ... ادعيلي الله يخليج
وگفت  بلا ماابوسها
انكسر خاطرها ادري  ودمعتها  جمدت على الرمش
بس ماعاتبت
ودعتلي
: روح يمه محروس بالله ومحمد وعلي

انهزمت من امامه واني اگول
:سلميلي على ابويه واخواني واخواتي

توجهت لفندق  لان السفر بعد تلث ايام
ظليت بيه حبيس الغرفه
الظاهر  تعودت على الحبسه
وصرت ادورها
مانزلت  ولاطلعت  الا للاكل
لحد صار موعد سفري .......
ل امريكا  مدينة شيكاغو

بالطائره حملت همي .... وخساراتي الي متنعد
واحلامي المقتوله
ل ارض غريبه ....
اداري بيها  حقيقتي
واضيع في زحامات الغرباء
مهاجر من الماضي
وبعيد عن الحاضر
واجهل المستقبل

————————
روان
اخر يوم  السنه الدراسيه
ورجعة  الصيف المدينه حلوه بالصيف
واكثر البنات بعد المدرسه ميرجعون للبيت
يطلعون للمول او مطعم
او بارك
الا اني محكومه بمواعيد اطباء
وعلاج وابر  تهد الحيل
ومحكومه بتعليمات ملاك 

اشياء اول مره اشوفها  وافرح بيها 
الطلاب تحتفل بتخرجنا من المتوسطه

واگفه بالباركنگ المدرسه ....
انتظر  ايه تجي تاخذني ...

وفي مجموعة شباب وبنات
بين السيارات فاتحين بتلفوناتهم اغاني
ويرگصون (البريك دانس )
وفي شاب فلسطيني ....
يصيحوه العربي
حركاته  جذبتني وبديت اقلده
بالحركات من مكاني ....
وهو انتبه....  وگف گبالي
وهو يعلمني الحركات
صار تشجيع وصفير ورقص مشترك
حسيت شي مختلف بحياتي اخذني اللحن من كل خوف   وكانما  مديت ايدي لطفله خايفه بداخلي
وازحت الستار الي تتخبه خلفه وسمحتلها تعيش  وتضحك من الگلب
بلا خوف من الموت ... والتفكير بالمرض

فزيت من هال خيال بايد ايه تسحبني
فتحت عيني  باوعتها عيونها تبعث حمم بركان  ثاير

دخلتني السياره  واول جمله سمعتها وهيه خلف الاستيرن بجسمها لكن اديها ماسكه بيه وتهزني

: احمدي ربج اني الي شفتج مو ملاك . .. والله تشحنج بصندوق للعراق
ولج تخبلتي  ترگصين ويه ذولي المكبسلين  تعرفيهم شنو

مانطقت كلمه انتظرتها تهدأ ...وافهمها
حركت السياره وهيه تتفخ قهر
وفاتحه الشباك وتصيح على اي واحد ياخذ دورها بالخروج

هيه الي طلبت مني احجي

: اشو ساكته متحجين

: شنو الفايده اذا حجيت مراح يغير من  رائيج شي وانتي ليگدام حكمتي مكبسلين

: لا احجي اشو

: ايه اني صار كم سنه حياتي متوقفه. .... عايشه وسط خوفي
وراضيه بيه ....
مكان اليه اي كلمه بقرار الهجره
اهنا ....
لاتتصورين اني مرتاحه 
المدرسه صعبه وانتم مشغولات بالعيشه
تفتهمين شبيه

جاوبت (لا )

رديت عليها

: اريد ابدي اعيش ومااعرف منين
كله ممنوع... ميصير... عيب ...
انتي كبرتي...  انتي مريضه ...

خفت عصبيتها وجاوبتني

:تريدين تعيشين مو بالرقص بالشارع ويه ذولي

اذا  تحبين ادرسي موسيقى  مابيها شي
وبعدين تعالي اگلج احنا من خوفنا عليج ترى مو نكرهج

: ادري متكرهوني بس اني وقتي محدود
المرض مراح يتركني 

: لاتبدين حديث الاستعطاف هذا ترى فاهمتج كلش زين

سكتت وخايفه لتگول لملاك

افتهمت خوفي وطمنتني وهيه تعلي الراديو تسمع اخبار

: لاتخافين مااكول لملاك بشرط متسويها مره ثانيه
دتشوفين اهنا الحياة مفتوحه صيري حذره

ماصدگت من گالت حلفتها

: احلفي بداعة طلال

ردت وهيه تشيح بنظرها عن الشارع وتباوع اليه وجاوبت

: وروح طلال مااكول

انقهرت عليها ردت اكسر الكأبه

غيرت موجه  الراديو. وطلعت اغاني هب هاب
وتمايلت مع الكلمات
وهيه تباوعني
اول شي مقبلت .....
عليت الموسيقى اعلى
واستمريت

:هاي شبيج غير ناجحه. وداحتفل
بداعتي  اتحركي ويايه

تحركت وتمايلت وهيه تدگ على الاستيرن

طلعت التلفون  وانطتنياه
وبدت تتمايل ويايه واني اصور

واحجي بصوت عالي

: عادي اذا اعزم صديقاتي الجمعه

ردت براسها ( اي )

(شكرا سس ) اختصار لكلمة سستر

ايه بمرور الايام  تحولت الى انسانه يائسه
وبس تبجي
وملاك عصبيه
وماما محتاره بينا

ملاك وايه حيل تعبانات من العمل ....والدراسه
واعتقد اثنينهن محتاجات يتزوجن... ويذبن حملهن  على رجال
على الاقل يساعدهن بهيج دنيا صعبه
خطيه ملاك المفروض هسه ام
وايه ....حلوه وطبخها طيب ...
حرامات متتزوج

نفتقد وجود رجل في حياتنا
اب يلمنا بحنان مثل ماكان بابا

——————————
ايه

من يوم انطيت رقمي ل ام موفق
اتصلت بيه
وزارتنا للبيت وتعرفت علينا وعلى  ماما

قدمت واجب الضيافه  وتركت المكان
وعيونها تقيس طولي وعرضي
بقيت خلف الباب استمع للحديث بين ماما وام موفق

: ابني موفق تزوج بنت عمه ...وخلف منها بنات اثنين
وصارت مشاكل بين العمام طلكوها منه

: ياداده. والبنات وين صارن

: عندي موجودات
بنين وحنين
مدللتهن

: وشلون و  صلتوا ل امريكا

: طلعنا لسوريا وقدمنا لجوء وقبلونا صار سنه من وصلنا اهنا
محمد ابني الجبير
يشتغل بالشاحنات بين الولايات .....
هو الجبير بس مامتزوج .،،موفق تزوج قبله
اكلج عيني وبناتج الله يسلمهن ليش ممتزوجات

: قسمه زينه مجايتهن

نصت صوتها وهيه تگل ل ماما

: متنطيني ايه لموفق ....
وملاك لمحمد ....والله يدللوهن دلال

: الامر مو بيدي اني عليه ابلغهن

: اي والله حاولي تقنعيهن
واخاف  عبالهن يربن البنات.... ابد البنات اني مربيتهن
ومعلمتهن حتى ملابس يغسلن

: شگد اعمارهن

: بنين سبعه وحنين سته

طلعت ام موفق

جتي ماما يمي

: ها  سمعتي الحجي ايه شتگولين

گلبي انقبض  ودي ابچي
لحت ماما بالسوال ( شتگولين )

: ماادري الولد مااعرفه
وماادري شنو يشتغل
وصار سنه اهنا ميعرف لغه

: اي اساليه وتعرفي عليه
وبعدين قرري
مو انتي ذابحتنا كل يوميه تگولين متت من الشغل شوكت اتزوج واتستت
ها اجاج الي يستتج

الحوار. تحول الى البحث عن حجج من جانبي حتى ارفض
وايجاد اجابات من ماما حتى اقتنع

: وبناته  اني مااتحمل مزعطه

: گوليله من البدايه
ماعليه ابناتك

انهزمت للصاله جتي ورايه

: خليني افكر فد شهر  واسال ملاك اذا توافق على اخوه اوافق اني

: ملاك مراح توافق
ادري بيها شالت فكرة الزواج من بالها وظلت تفكر بيه وبروان

طلعت من الصاله  وهيه ورايه

ايه : يجوز اصغر مني  الولد

جاوبت راسا
: امه تگول ٣٠ سنه
بعد شنو حجتج

گعدت على كرسي بالمطبخ ....
وسلمت عقلي  ل كلامها.... وهيه ترسملي  صور  وتحاول تمحي الصور الي ابالي ...مستخدمه نبرة الامومه الحنون الگلبها علينا ...

: يايمه ايه اني گلبي عليج الي بحلج  اتزوجن وخلفن وبننا بيوت
يمه اتزوجي وانسي الماضي ... وانشغلي برجال  تلبسين  وتتمكجين اله
وتعرفين الحب وياه من جديد
اني اخذت ابوج  عن طريق جوارين ....لا اعرفه ولايعرفني
وحبيته وحبني... ودللني نساني
حتى اهلي
ها شگلتي....  يمه طلعي طلال من بالج...،  خليه يرتاح من همج

مااگول مااثرت بيه  بس حبيت اتهرب من تاثيرها  بندب حضي العاثر

: ماما انتي من خلفتينا صار مصيبه بالعالم.... مطرت حجار وتفشخت العالم ...،
صار زلزال
اي هيج حظ اسود... اظلم ..،حالك مشفت
حظي الاسود هسه ولد... راح ومات ...وصار عظام
غير انساه وارتاح ...
الا يوميه على بالي

لاشباب تركيا عجبوني
ولا ديربون مليانه عراقيين ...ولبنانين ....وسورين
واني مجلبه بطلال
اووووووف حظي

گمت ادخل لغرفتي ورجعني اعتراض ماما وهيه  ترجعني لمكاني

: انتي متريدين تنسينه.... لحد الان صوره بدولابج... تصبحين وتمسين بيهن

: هيه بقت بس الصور

بنفس الوقت واحنا بهذا النقاش رجعت ملاك من الدراسه
وتلگتها روان الي كانت تسمع الحوار بسكوت

: اجيتي بوگتج ماما راح تزوجكم زواج جماعي

انطت جنطتها لروان وسالت

: زواج جماعي شنو ؟
وضحتلها الصوره واني
مخليه راسي بالثلاجه ادور شي اثرمه واطلع كبتي بيه

: ام موفق تريدج لمحمد واني لموفق
ضحكت

: حلو  شيشتغل المحروس هو واخوه

: خيه  رجلك سايق شاحنه

:  خوش افلوس هم احسن مني
ورجلج المستقبلي

: صدوك اشو مگالت شيشتغل رجلي
باوعتنا ماما بنظره حارقه وهيه
تريد تنفجر

: بلا تصنيف اثنينجن
وفكرن

اعلنت ملاك رفضها وهيه تنتظر الغدى يتقدم

: اني مااحتاج افكر خارج قوس
الزواج طلعته من بالي ...
لحد الكه شخص يغير رائي

توجهت الانظار عليه حتى يسمعون قراري

: اما اني فمليت من حياتي
اذا اتصلت امه گوليلها يتصل بيه
وادرس بياناته واقرر

: هسه اكو غدى لو اروح للشغل جوعانه

: احلى غدى للعانس رقم واحد من ايدين العانس رقم اثنين
اگولج صدوك بامريكا مينطون مخصصات للعوانس

: والله ياريت ينطونا

واحنا نصنف الامر غاض  ماما
وسحبت الكرسي  وهيه تصيح عليه
: دصبيه للغدى  هسه عبالك طابخه باجه
شاطرات بالتصنيف  بس
عصبيتها خلتني اصب الاكل بثواني
وناكل بلا صوت

———————————

ملاك :

تحسنت لغتي .....
وشغلي ماشي بالفندق

وضع روان الصحي يتطلب مراقبه.... وعلاج تاخذه مره بالاسبوع بالمستشفى ...
وترجع مهدود حيلها
وخايفه.... وتبجي 
حالها خلاني احرص عليها اكثر من اللازم... واني اشوفها
مستعجله على كلشي
كانها في سباق مع الزمن

ابتعدت عن السكريات
وتعتمد على الفاكهه والخضروات الطبيعيه

گدرت اجمع مال وادخل كليه محليه حتى اخذ شهادة تحليلات
وباشرت بيها

في وتيرة حياتي وعجلتها السريعه ...
تناسيت نفسي ..،
وعمري
تجاهلت نداء الانثى داخلي
بل صراخها ...

(ان قفي ..،
الا تشتهين فستان ابيض ...
وتسريحه عروس ...
وزفه خجل ...
واحضان زوج حبيب.

اسكت صراخها ....
بحسره
لابدا يوم ملل اخر ....
واخر .....بعده اخر )

ولكن ....
لابد للمستحيل ان ينجلي  امامنا
ولابد ان نجد حب يغير  حياتنا ....
يزلزل الارض تحت اقدامنا ...
ويجعلنا نقفز فرحا في الفضاء الرحب

بدينا التقديم على الگرين كارد .....( وثيقه ل اثبات الاقامه الشرعيه  تتحصل بعد سنه من دخول امريكا)
ورحت لمكتب يساعد بالتقديم ..،،
المكتب خارج ديربون لان يكون ارخص ...
في منطقه سترلنگ هايتس
اكثر الي بيها عراقيين مسيح

دخلنا للمكتب للترجمه ....والمعاملات

الساني  بدا ياخذ على الانگليزيه
دخلت  داستفسر عن الاجراءات
في رجل  يجلس خلف المكتب وبيده موبايل يحجي

( حنطي البشره  .. صوته وهو يحجي  عالي ... لفظه الانگليزي
مضبوط ... ويفصل جمله ضحكات قصيره )
رغم يحجي بالتلفون وگف من شافني دخلت ....
سلمت ...
(هاي )....
رد (هاي) ....
واشرلي اگعدي

انتظرت شويه انهى مكالمته بعجل
والتفت اليه

: تفضلي انسه

( نسيت الحجي )  تأتات شويه وبعدين حجيت

: جاي اسال عن الگرين كارد شلون اقدم عليه

جاوبني وهو يبحث عن ورقه
اخذها من الدرج وانطانياها

: في استماره تمليها ونسخه من رقم الضمان الاجتماعي

حجى عراقي قاطعته

: حضرتك عراقي

ابتسم من سمعني احجي عراقي

: بلي عراقي.... ترى انتي الي بديتي بالانگليزي گلت اجاوب انگليزي
ضحكت ورديت

: بعد اللسان تعود

رد بضحكه من نوع تسطر بلا رحمه

: بعدج مشفتي شي كل ما تمر سنه عليج اهنا راح تنسين العربيه اكثر لدرجه يصير صعب عليج تعبرين بالعربي
والجمله الوحده تطلع وياها فد كلمتين انگليزي.... وحده لبناني ...وحده عراقي ...وحده يمني
ضحك واني تعالت ضحكتي لدرجه صار خمس سنين محاسه بيها

ملاك : هههههه صدوك والله

وگف وهو يتمشى للمشين الكهوه الي صايره خلفي
انداريت  راسا ركزت على طوله وزنه  وراسا انداريت قبل ليشوفني
صب كوب الكهوه البلاستك
وقدمه امامي

: اعتذر كهوتنا مره ماعندي شكر ولا كريمه
ورديت مجامله واني اتجرع الكهوه غصب والمراره  خلت عيوني تدمع

: عادي احبها مره

گعد بمكانه وشرب من الگهوه
وراسا بعدها عنه وهو  يعترف

: نعلى ولا تنرجرع ههه
وبادلت الاعتراف
: اي والله عبالك دبس محروك
ضحكنا وبعدها صار لازم نتعرف
وهو الي بدا

: اعرفج على نفسي اني رعد
تلگيني بكل مكان ...
اترجم... للمعاملات ...والمدارس
والاطباء..،

: واني ملاك

سمع اسمعي وقاطعني

: يعني لو گايله غير اسم  اعترضت  فعلا ملاك

دنگت خجل  وجاوبته

:  (شكرا ) وكملت باسئلتي

:بس ليش ترجم هالگد... ماكو غيرك ؟

: اكو غيري  يترجمون بفلوس
اني ابلاش
متطوع اخلص وقتي.... واحب اساعد

: وهذا المكتب
سالت السوال وتندمت عليه هسه شيگول 
جاوبني

: مكتب صديقي عنده معامله وخلاني بمكانه لحد يرجع

: لعد حظي عدل راح تسويلي المعامله ابلاش

: گلنا الترجمه ابلاش مو المعامله
ويابه ميخالف اسويلج خصم

بدينا نملي  الاوراق
وكل معلومه اگولها يسالني عنها
مثلا سبب لجوئنا ...
دراستي بالعراق ....
وهذا الشي مو من ضمن الاستماره..،
وعمري من كتبه  علق
( الفرق بينا شهريين )
دفعني الفضول اعرف قصده

: منو اكبر يعني

تركزالقلم وباوعني بتركيز وجاوب

: مااگول اليوم
المره الجايه من تجيين

: وشعندي جايه بعد
الطريق بعيد

: غير تجيبين البقيه من عائلتج  حتى يوقعون

: شوكت اجي

جاوب بالعربي والانگليزي حتى ياكد عليه
: يوم السبت واحاول اكون موجود

: اوكي  اني اترخص
وگفت اطلع وهو وگف

: هذا الكارد بيه رقمي اي شي تحتاجيه
ترجمه ابلاش  ترجمه بفلوس
اني حاضر

: هههه انشالله خير

طلعت  للسياره
مثل الي نسيت شي فتحت جنطتي اوراقي موجوده
(ها  يجوز نسيت گلبي
الله وياه )
واني اسوق بالسياره  وافكر

في ناس مجرد الحديث معاهم يخليك تحس بالسعاده

لدرجه تظل تتذكر حديثهم كل شويه وبداخلك انتشاء ذاتي
مجهول الاسباب

فكرت بكلامه
وسالت نفسي
( يگول متطوع لعد شلون عايش )
ممبين عليه معاق وياخذ تقاعد من الحكومه
والسياره مالته برى ماعليها رقم معاقين
يمكن من العراقيين القدماء اهنا وعنده املاك
او زوجه غنيه وعايشه على تعبها
لا لو من هذا النوع مااشتغل متطوع جان هسه عايش بفيگاس ....
بالكازينوهات ...والملاهي

وعمره واحد وتلاثين
وبلا زواج
يجوز مثل حظي

كان يوم جمعه وصلت البيت وقت الغدى
دخلت مستبشره  واول مره اضاءه البيت حلوه
وحتى ريحته حلوه

شاركتهم الغدا الاكل طعمه مميز
رفعت عيوني ل ايه وكتلها
عاشت ايدج الاكل طعمه يجنن
ردت بكل استغراب
: مال البارحه  .... تحسرت هيه ماما مطيتني مجال اشوف دربي

: ليش شكو شبيها ماما

: ام موفق تريد جواب هسه شگلها

تركت ايه الخاشوكه من ايدها ودنگت وحسرتها جاوبت قبلها

: اني متردده اريد اتعرف عليه
بس اشو يتهربون من التعارف ليش مااعرف

وماما فعلا محاصرتها راسا ردت عليها

: اليوم اتصل بيها واگلها يمر عليج للكليه

:  لا الكليه لا  البنات يشوفوه ويتصورون صديقي

: لعد وين يجي يشوفج

يمر للعمل وقت الغدى

شفت روان تعصر نفسها على الميز ومتاكل

: روان ليش متاكلين
وجهج اصفر

: مااشتهي
وعندي الم قوي بصدري

هبت اول وحده ايه
: ليش محجيتي
يله على المستشفى

: اروح وياكم باجر ماعندي دوام

طلعنا ب روان للمستشفى الي يبعد ست دقايق
ايه تسوق افضل مني واسرع
وصلنا
فتحت اني  باب السياره ...
كانت غايبه عن الوعي بالسياره....
حملتها بين اديه وركضت بيها ....
ايه گدامي  تتصل بالدكتوره مالتها وتفتح الباب اليه ادخل

دخلنا  في تلث بنات ....وشاب

محضرين السديه
خليتها عليها
والبنات جردنها من ثيابها وهنه
يدفعن السديه بكل سرعه
اخذوها منه واسرعوا بيها

واحنا نركض وياهم لحد دخلوها. ....لغرفه الانعاش

وبعدها توالت الاطباء ....والممرضات ...
والابواب مسدوده  .... وعيونه تراقب ...، وحابسين النفس
گعدنا ننتظر
وندعي.... ونتوسل... بربنا يجنبنا مرارة الفقد مره اخرى ...
ولابد من الحديث حتى يمر الوقت...... بعد ماعرفنا من الدكتوره
ان هيه بحاله مستقره وينتظرون  الفحوصات فد ساعه...
تحدثنا حديث يأس بدته ايه الي حتى رمش عيونها اصبح يأس

: تدرين اليوم جمعه

: اعرف
والمفروض اليوم اجازتي. ارتاح بيها

: الي بعمرنا هسه
اما متزوجه وسهرانه مع زوجها....
واطفالها ...
او حبيبه ومتواعده مع حبيبها

: ماادري قرار الهجره كان صح او خطا

: حظنا الي خطأ
اني تعبت ملاك
وروران داخله على علاج طويل الامد ...
وتعب ...ومستشفيات

حتى صديقاتي ابتعدت عنهم ماعادت بينا شي مشترك
همه يحجون عن ازواج ... واطفال .... وعيال ...وظيفه

: من هاي غيرتي الوتساب ولغيتي القديم

: رحمت نفسي من حجي عادل عن طلال  كل يوميه جايبلي ذكرى جديده

ترددت تكمل وضمت شفايفها باصابعها وهيه تگول قرارها

:اسفه..... اذا راح اختار حياة بعيده عن هذي المعاناة ....
بعد مابيه حيل
عيوني كانت عليها  اتصورتها ماتت من گالتها

: راح تنهزمين بالزواج من موفق

: بلي
وكملت تشرح معاناتها

:انتم محاسين بيه  انتي مريتي بتجربه حب وطلع نذل.... ولهذا كان سهل عليج تتحدين  گلبج وتنسيه ...
اما اني فاخذنا  الموت اثنينا ...
الفرق اني فوك التراب ...وهو جواه
هو ميحس واني اتعذب ..،
تعبت والله

خليت ايدي على كتفها وضميتها اليه

: مااگلج لاتتزوجين
بس لاتتسرعين ....
ترى مو اي رجال راح ينسيج طلال.... راح تبقين تقارنين بينهم واتعبين

: مع الوقت اتعود ....
واخلي طلال بركن الحسرات بحياتي ....حاله. حال   الاب الي انحرمنا منه ...و الوطن ...والراحه ...
والشهاده

بقينا للتسعه بالليل لحد طلعت دكتوره  تشرح  حالة روان

:  حالة التصاق خلايا ....
وهذا اذا زاد عن حده يسبب انتشار سرطان

من ذكر السرطان حسيت سقف المستشفى انهار على راسي 
ورحت ادور بين كلماته عن حل

: والحل شنو دكتوره
اختي راح تموت

: بدينا معاه بعلاج اسمه
العلاج المناعي
يعني نحاول نمنع الخلايا تلتصق
وبنفس الوقت نمنع السرطان
عن طريق زرق كريات دم بيض بالجسم يزيد مناعتها للمرض

عجزت رجليه تحملني  رجعت للكرسي وكملت ايه الحديث مع الدكتوره

: والعلاج ياثر عليها

: راح يخليها  خامله نوع ما ....
وراح تلاحظون زياده في الوزن
والعلاج يطول ....وتاخذه
مرتين بالاسبوع

: دكتوره  مافي امكانيه ل استخراج الشظيه

: المشكله الشظيه كانت مسمومه ونتشر تاثير السموم بجسدها
واجبنا. نساعد جسمها يزيد امكانيه المقاومه او المناعه

وبدت روان تاخذ العلاج المناعي

——————————
ايه
واجهت  تعبي ...
وحياتي المنهاره ...
وعمري الضايع ...

وقررت افتح مجال للتغيير

اثناء عملي
دخل موفق
اني گاعده وامامي شاب عمره ١٦ او
بهالحدود
ارسمله على ايده  تاتو

شفته قارنت بينه وبين حب عمري الراح
النتيجه حتى لو  موفق ايه من الحسن
فطلال متفوق ...بنظري ..وگلبي وكياني

ابتسم وسلم

: السلام عليكم

: وعليكم السلام
انتظر شويه  اخلص شغلي

: عادي انتظر

واصلت شغلي
وهو جالس امامي  يراقب ساكت بعدين حجى

: شگد تاخذين على الرسمه

: اني مااحدد الاسعار صاحبة المحل تتفق وياهم
اني عليه ارسم

: شگد ينطوج على الساعه

ايه : شغلي. مو على الساعه في نسبه عموله

: ادري يعني شگد

تركت الرسم  رفعت راسي والاستفزاز. واضح عليه ورديت عليه

: مااحب احد يدخل بشغلي

: اسف

لعد اطلع بين متخلصين الحگيني

ثارتني الكلمه ( لحگيني )

كملت شغل الشاب
وطلعت استراحه الغدى
هو واگف يم سيارته

: يله تصعدين

: لا مااصعد
في كافييه قريب منا امشي  يوميه
اروح اخذ شوربه .... واشرب جاي
تحب تجي هلا بيك
متريد اني رايحه

مشيت
وحسيت خطواته ورايه

: انتظري اشو عصبيه

وگفت بنص المسافه  مو بس عصبيه انما  ودي اگله صير مثل طلال بس ما گدرت عبرت باسلوب ثاني

: شوف موفق
لازم تعرف طبيعة عندي ليگدام ....
ان الحجايه عندي اهم من اي شي ثاني بشخصية الرجال ...
مال توگف بنص المحل وتگول (الحگيني )
مااسمح بيه مره ثانيه
عاملني باحترام خاصة من تحجي ويايه

تفاجا ان الكلمه ضايقتني  وبرر
: ماقصدت شي ترى
بس ردج كان مستفز سالتج جاوبتي لاتدخل بشغلي

ورديت بعصبيه اكثر

: اي شنو گا عد تسال شكد ساعتج شكد تاخذين
اخاف من الضرائب انت واني ماادري

: هاي شنو انتي
ولاتتفاهمين

مشيت وعفته مشى ورايه. وصل بخطواته بجانبي

:وهسه شسوي اعتذر مره ثانيه؟

: ماكو داعي
فتح باب الكافيه حتى ادخل
دخلنا للكافيه
گعدت  بمكاني والبنات الي يقدمون يعرفوني
سلموا عليه
(هاي ايه)   جاوبت متنگه  مااعرف على منو.

: شتحبين تاكلين

: البنات  اهنا صديقاتي  ويعرفون طلبي
شوربه وبعدين جاي واطلع

طلبنا
وقدموا الاكل
نبهت نفسي ( اهدي خلي اشوف تاليها  ) واتذكرت ماما تعرف اليوم نلتقي 
خففت الاضطراب داخلي واني اسمع اسئلته الممله

: امي گالت انتي مخلصه هندسه
: صحيح وانت شمخلص؟

: اعداديه

: وهنا متفكر تدرس
ترى اهنا المجال مفتوح حتى طب بامكانك تدرس

: لا مامفكر ادرس

: على راحتك ستشتغل حاليا

: بلا شغل

صارن عيوني بالطول من گالها
وزاد وغطى قهري من كمل

:الدوله تنطي ل امي راتب
ولبناتي
وراتب اليه لان ارعاها
واني مقدم على علاج نفسي حتى يعفوني من العمل

: ليش انت شبيك حتى يعفوك من العمل

جاوب مفتخر بذكائه الخارق

: يمعوده كلاوات تمشي على الامريكان

: بس تدري هذا خطر على بناتك

انمحت الضحكه الغبيه من وجهه

: شلون خطر

حبيت ازرع الرعب بداخله

: اذا اعتبروك مريض نفسي
اي خطا يصير بالبيت
ياخذوهن منك باعتبارك مريض غير قادر على رعايتهن
: اشو المحامي مگلي

: المحامي كل همه ياخذ اتعابه
ويطلعك تقاعد

؛ لازم اسال بيها واشوف
ويه سخونه الشوربه. زيدت سخونه الحديث بالهجوم بلا هواده

: ممكن تحجيلي عن زواجك الاول وسبب الطلاق

: تزوجت بت عمي
وصارت خلافات بين العائلتين
وهيه الحياة وياي معاجبتها
صفت ويه اهلها
ورادت تطلگ

: ليش معجبتها الحياة وياك

: يعني مااحبت الظروف الصعبه .،،
والديون.،،   وماعندي وظيفه .،،
وكل يوم داگه اسطوانه شورطني وتزوجت ..،انتم فگر

تحسر بغضب وكمل

على اساس هيه بت وزير
كانت تعرف ضروفي وقبلت بيه

: ليش انت شتشتغل بالعراق

: ليش هو العراق بيه  شغل
المهم كان عندي محل صغير
بالبيت

خلصت الشوربه بسرعه حتى لساني احترك  حتى انهزم

: اني خلصت استراحتي
لازم اروح ارجع للعمل
من رخصتك

: الله وياج
بس ماگلتي  اودي امي لو لا

: خليني افكر

تركت الكافييه حتى بدون مااسمع جملته الاخيره

( شداسوي اني
الولد لا طموح لا هدف )
هذا راح ينسيني طلال
عليمن اضحك على نفسي

بدوامي  من رجعت  حجيت كل الحديث لصديقتي  حنان 

ماصفت ويايه ابد

: يمعوده تزوجي احسن ..،
اهنا فرص الزواج قليله
المولود  اهنا ياخذ وحده مولوده اهنا لو امريكيه
الي جاي جديد ميگدر على مصاريف العرس اهنا يجيب من العراق
الي يتزوجون مثلج بس العراقيين الشياب وياخذج زوجه ثانيه على مرته
: ليش تعدد الزوجات مسموح بيه

: طبعا لا
بس العرب يدستروها
يطلگ الاولى عند المحكمه بالاتفاق وياها
ويعقد على الثانيه
او يعقد على الثانيه شيخ ويفضها

: تدرين ديربون المفروض يفصلوها عن امريكا
كل القوانين لاعبين بيها

حنان : لعد ليش العرب مجلبين بيها
حتى لايطبقون القانون

: ماادري شگلج متردده

: بالبدايه تترددين بعدين تتعودين عليه وحثيه على ...الشغل ..،
والدراسه
وتتفاهمين وياه افضل متاخذين واحد عايش من زمان اهنا ويفيك عليج

ايه : هم حجيج صدوك

———————————-
ملاك

استمرت روان على العلاج
طول الصيف .....
وطلعت من المستشفى ....
وضعها زين
والسمنه لايگتللها
صار عمرها ١٥
وبدت تجذب الناس ...
رغم برائتها. المتمسكه بيها
لكونها انعزلت بالطفوله والمراهقه عن العالم الخارجي

اخذتها اول يوم دراسه في الاعداديه
ولابد ان اوصلها اول يوم واطمئن في احد يساعدها

نزلتها من السياره
ونزلت اني وهيه توصيني

: لازم تدخلين للاوفس
وتاخذين ساعات الحصص

: روان لازم تتعودين انتي
ميصير تظلين معتمده عليه وعلى مروه

:استحي ادخل الاوفس حبابه لخاطري

ملاك ً:يله تعالي فوتي ويايه

دخلنا للممر.
الوفس على اليمين تفاجأت اول مدخلت  رعد موجود خلف  كاونتر الاوفس ويستقبلدالطلاب العرب والامريكان الجدد

شافني ابتسم 

: انسه ملاك  ياهلا نورت الاعداديه
اشو مرجعتي علينا
لازم لگيتي مكتب ارخص

: اهلا استاذ
لا مرحت لغير مكتب
اجينا  وملگيناك وقدمنا عن طريق صديقك

: لا حرامات ردت اتعرف عليكم كلكم

باوع على روان

: هذي الانسه اختج مو

: بلي اختي روان
انگليزيتها ضعيفه والسنه الفاتت تمرضت مستفادت شي

: اني اهنا اساعد وخلال شهر اخليها تغني انگليزي
ضحكنا وروان وجهها احمر ونظرها على الگاع

: منريدها تغني بس تفتهم الي تقراه وتبدي تحجي
تحرك من خلف الكاونتر وناداها باجمل كلمه  نفتقد صاحبها ونفتقد نسمعها

: يله بابتي روان تعالي ويايه للصف

شفته وهو ياخذ روان ومدنك عليها بعطف ويحجي وياها
ويه بقية الطلاب
دمعت عيني الصوره رجعتني
لزمان  كان ياماكان
بابا حبيبي
ناديتهم

: الله يخليك اهتم بيها

اشر على عيونه
يقصد بعيوني

رديت عليه تسلم

ترك الطلاب ورجع قريب مني
ونطق سطر مجامله

اقترب خطوتين مني وهو مبتسم

: على طول البسي هذا اللون
اكيد هذا اللون هو لونج المفضل

ردت اوكع من طولي ومااعرف ردي كان غباء لو ثول

: لا والله ماعندي لون مفضل

حجى بكل ثقه  وعيونه عليه ترميني بشباك وتحتويني وتقيدني من راسي لرجليه

(: اخذيها مني واعتمدي هذا لونج المفضل
واو )
صاحته معلمه بالاوفس ان يجمع الطلاب يمها
رجع دخلهم واني وياهم

سولفنا بالاوفس ....
وهو يتكلم مع الكل
والكل يتشكرون منه لتطوعه بالترجمه للاولاد الي ميتحدثون الانگليزيه..،،
وبعدها اخذ روان للصف

انزرعت بمكاني انظرله وهو يجمع الاولاد حوله ويضحك معاهم

(حلما خالج قلبي
وخيال فارس حط امام
نافذة عمري المهشمه
ورعدٌ هز  حصون  كياني )

رجعت للبيت اخذ ايه معاي ....
عندي اختبار سحب دم ...ولازم اجيب شخص اسحبله دم امام المشرفه حتى اخذ شهادتي ....

بالسياره فتحت الراديو ...
دائما من نصعد اني وايه بالسياره نقسم الاغاني ....
اني الاغنيه  الاولى حضي ....
والثانيه حضها
طلعت اغنيه المطرب يكول
( الله يعوض علينا ....
بلي يفرح عنينا
ونلائي حبيب يگينا يداوينا ويطيب )

ايه :هاي هيه راح تعرسين

وگفنا بالاشاره الحمره مثل لون مشاعري المتوهجه حب وتفاول
انفتحت الاشاره الخضرة
والهورنات دگت
واني صافنه
وصوت ايه

: عيني الاشاره خضره فوتي
: ها صدوك  ولاادري

طلعت وسالت ايه الي الفضول راح يكتلها من صفنتي

: ايه اذا شخص انطاج رقمه
شنو معناها
نطت من الكرسي واندارت بكل جسمها عليه

: لج منو انطاج رقمه وليش وشوكت

؛ رجال عراقي صار شهرين تقريبا بس نسيته بسبب مرض. روان

: وليش ؟اقصد انطاه شگال

: راح احجيلج
حجيتلها عن رعد
فكرت وجاوبتني

: صعب احكم بس الجمله الي گالها اليوم عن الالوان تعني هواي اشياء...
وانتبه على العمر ...
وعلق الفرق شهريين ليش حسب الفرق

: خايفه ايه لايطلع حلم ....
عبالك اول مره احب

وكعدت ايه ترسم خطه للضفر بقلب رعد

: شوفي المفروض منا وجاي كل يوم تنطيله  بالاوفس بحجة تسالين على روان
وحاولي تعرفين تفاصيل اكثر
والبسي غير  هالخرگ الي صار سنتين مشتريتي غيرها
وشويه مكياج
من يشوف التغيير
راح يبدي  يسرح بيج

: يسرح بيج شنو

: اقصد يفضفض
بلكي نفتك منج
تحمست من كلامها

: بعد منخلص فحص
نروح نشتري ملابس
اريد اغير
علقت وهيه مستبشره

غيري عيوني
بلكي انتم السابقون ونحن اللاحقون
هههههه انعل ابو الضيم

انطلقت  داخل السياره ضحكه من گلوب اختين
دائما  يجدن الراحه في الحديث مع بعض
———————————
روان

في اول يوم دراسي في الاعداديه
انتابني الخوف  من اجواء الاعداديه ....
كبيره جدا عدد الطلاب بيها يقارب الالفين طالب ...
ومع الكادر والمشرفين والمساعدين يصير العدد قريب ٣٠٠٠شخص

والطلاب ( المين ستريم ) الي لغتهم انگليزيه ممتازه ينظرون النا احنا لغتنا ضعيفه باستصغار  يستخدمون العنف ضدنا

هذا الحجي نقلت مروه اليه سامعته من صديقاته الي دخلوا الاعداديه قبلها

بدت   الساعه الاولى
لمستر رعد ياخذنا ١٧طالبه
درس ....انگليزي... عربي ويساعدنا بشرح مواد منفهمها من مدرسين امريكان

دخل ويانا  للصف
وزع مكاناتنا
اخترت مكان بين مروه وتحسين
اعرفهم من السنه الفاتت ...
بعدها
طلب منا  نوگف ...ونعرف على نفسنا
حجوا الطلاب بالدور
يعرفون على نفسهم ومنهم مروه... وتحسين ...
واني انتظرت للاخير

: اسمي روان محمد من العراق

وسكتت مااريد اكمل
كان لازم اذكر عمل بابا

سكتت مجاوبت
سالني هو
: بابا شنو يشتغل
باوعت لمروه وهيه دنگت تعرفني راح ابجي

: بابا متوفي
نطقت الكلمه وگعدت مااگدرت اكمل
وگف يمي قريب مستر رعد
وكلمني بصوت حنين

: الله يرحمه
باباتي روان  دموعج تاذيه لبابا ....
واحنا اهنا كلنا عائلتج... وذولي اخوانج ...واخواتج ...

يله اشو رفعي راسج وامسحي دموعج

رفعت راسي  انطاني منديل
ورجع لمكانه
اقتربوا الطالبات ...والطلاب يمي
والبنات يحضنوني... والاولاد يسلمون بكلمه

(لاتهتمين احنا اصدقاء ...واخوان )

اني ناشره ١١ بارت
والتصويت الف  يعني تقبلوها 
رجاءا صوتوا  لان بدون تصويتكم
القصه تتعرض للسرقه وياخذون افكارها وحقائقها
بقصص ثانيه