رواية نوارس مهاجره الفصل الخامس 5 - بقلم zeanab_almusawi

#
اعتذر عن التاخير  لان ويك اند
وتاخرت بالنوم
#نوراس_مهاجره4
#زينب_الموسوي

ملاك
واصلت ضغطي على نفسي

واصتبرت ارد على مكالمات ثامر
الي بدل مترسيني على بر
تزيدني حيره وشتات
اتصل بيه
في فجر يوم جمعه والاذان يرفع ....
صوته   مليان حشرجه وحزن
اخافتني اكثر .....

: :  هلووو ثامر شبيك حبيبي ؟

: : اني مااستهل كلمة حبيبي

وحق هذا الاذان احبج
ومجبور على الي راح اگوله

: : شراح تگول ؟

:. ملاك هذا حدنا 
احنا  قسمتنا. مو سوى
انتي ماقصرتي ....
انتظرتي  ....و فيتي.... رفضتي  ياما فرص علمودي

: مااعرف ارد عليك
لان اني اعرفك كلش زين. مو نذل  وهذي دگت انذال

:. ملاك انتي تدرين ظروفي صار  ثمن سنين ماتحسنت
وخايف تمر ثمن سنين لاخ وانتي تنتظرين
عمرج هسه سته وعشرين ...عندج فرصه تتزوجين وتخلفين

ردي كان يجمع بين التوسل والخيبه

: : اعرف عندي فرصه
وردتها وياك مو غيرك

نزلت دموعي مرغمه

: اني مااستاهل دموعج ....
داحجي وياج بواقعيه
والي يحب يتجرد من الانانيه
كافي انانيتي ضيعت من عمرج ثمن سنين

ليش ساكته ملاك... احجي اغلطي... سبي... مستعد اسمع

تحولت الدموع ثوره بكاء لكرامه حب مطعونه وسطها صوتي يگله

:: ذكريات ٨ سنين
راح تكون مثل السيف يذبح
اي سعاده راح احاول اعيشها ويه غيرك

: : جربي. وراح تتعودين
ياملاك اني مثلج ٨ سنين احلم بيج عروستي
لحد گمت انام حتى احلم بيج واتمنى ماافز والگه
نفس الواقع اليفرض علينا ننتظر  بلا نهايه

اسمعه وافكر بشي اي شي يخليه يتراجع عن قراره حتى لو يگلي انتظري

: : انتظرك تسافر
صح اني اخر  مكالمه تعصبت
موقصدي اتركك ....
وهسه اگلك انتظرك

: : مااريدج تنتظرين... تزوجي
وافرحي... وعيشي عمرج

الله وياج

انقطع الاتصال وراح .....
شمرت التلفون من ايدي ....
سحبت جسمي تحت الغطاء

وبجيت لحد تبلل الغطاء.....
وماعرفت من الصار اطول الليل لو اهاتي
ابجي وخايفه اخواتي يسمعوني ويگعدون ....،

وبالدموع انكتبت نهايه حب في بلد اصبح
حتى الحب فيه طريد ..
ومنبوذ ..

(سنين العشرين ونيف
بكيتها ... واقمت عليها العزاء
مع اذان رب
ارحم الراحمين ...
ربي يامن ادخلته قلبي
اخرجه منه
بلطفك ...
قبل ان  تنتزع انفاسي من روحي )

الليل  ستر المجروحين ومع نهايته. كل الخوف ينكشف الستر ....

گعدت الصبح
جرت النفس عندي اصبع من
الموت ....
حاسبه حساب مواجهة عيون اهلي .
وهمه يشوفون عيوني
متقرحه حمراء ..،

دخلت للحمام اخذت شاور

سريع
ومن طلعت
كنت اجاوب اسالتهم
(من الشامبو عيوني حمره )
لكن ايه حست الي بيه واصرت تعرف شصار

: :هالحجي مو عليه
والغرفه زغيره
واني نايمه سمعت صوتج تبجين

::  اني وثامر افترقنا وكل واحد راح بطريق

: : صدوك تحجين
تعالي تعالي
گعدي  على الكرسي
احجيلي .....

ماگعدت وادعيت الانشغال بترتيب الصاله  ومامهتمه ...

:: ماكو شي ينحجي اصلا
گلي روحي لحالج

المشكله من صارت صدوك
صعب عليه هو. ..اكثر من نفسي
لان اعرف. يحبني وظروفه جبرته

:: الله يساعدكم اثنينكم
شوفي من هالحظه فكري بنفسج
واخذي اول فرصه
تجيج  وهسه تفاصيل الخطوبه والزواج تنسيج

: : صار سنين ادعي الله يجمعني بيه
هسه ادعيه انساه ..،

: : سوده عليه ملاك ياعمري

: يله  هذي نهايتنا  لا بيدي ولا بايدها نغيرها
گومي نحضر الغدى ايوته

: : ارتاحي انتي
راح اسوي شي خفيف
لان اليوم معزومين عشى
بيت طلال

: : يعني راح يشوفج اليوم

: : اكيد يشوفني

: :دطلعي لعد من المطبخ وروحي خلي ماسك لوجهج
سوي شي
يمعوده تريديه يبطل ونصير
اثنينا

: هههههه
يمعوده شايفني ايام الامتحانات
وبهذلتي
ومابطل

: : دروحي ياعيني
واني اسوي شي بسيط

——————————

ايه

مرت على عقدنا يومين
الاتصالات بينا زادت ......
كل ميسوون حاجه  او يشترون
يتصل بيه ......
مو فقط هو. احيانا امه
او اخواته
مابقى عندي وقت لنفسي كل شويه اتصال  ..... ومع  كل اتصال  انبه كافي تتصل ...

: حبيبي. طلال هذا ثالث اتصال اليوم

: : هههه والله حتى ابويه يگول شبيكم انت وامك  كل شويه متصلين
خبلتوا  البنيه

: : اي والله فدوه لحلگه عمي

: : لا بس هالمره الاتصال مو عنج

: : لعد على منو

::  مرت عمي  ام عامر
شافت ملاك بالعقد وتريدها ل ابنها عامر 

نزل الخبر على گلبي مثل الثلج

::  ماادري شگولك لازم اسالها. هيه

: : سأليها
وخلي اگلج معلومات كامله عنه
عامر  مطلگ  وعنده بنت عايشه مع امها

:: اف  مااعتقد توافق
ليش مطلگ

::  بصراحه عامر كان يحب بنت
ومرت عمي اصرت ياخذ بنت اختها
اخذها  وظل يعاني مااتفقوا والبنيه ماتحملت ...
طلبت الطلاك

: : وراح ينعاد نفس الشي مع ملاك
وهم امه الي اختارت

: : انتي احجيلها بصراحه
وردي خبر

: : اكيد. اگلها .... زين
هاي هيه بعد متتصل لو بعد في شي

: : صوجي اني اتصل بيج
زعلت وبعد مااتصل

: : يمعود ازعل
اريد ابدل ملابسي اهلي جهزوا
واني ايد  لابسه الفستان
وايد لا

: ههههه
داتخيل المنظر  بس سؤال شنو لون الفستان

: : وردي

: ها روحي بدلي لعد

جهزت نفسي على السريع ناديت ملاك للغرفه
في بالبيت غرف كثيره.......
لكن هذي الوحيده الي بيها مكيف انام بيها اني واخواتي

دخلت ملاك وشافتني بعد مجاهزه

:: ماخلصتي فضيها

::  تعالي ساعديني فدوه

هيه دائما من اريد اخلي مكياج اللمسات الاخيره تكون الها

كعدت وهيه ترسم عيوني وشفتها فرصه احجيلها عندالي گاله طلال

:تعالي داگلج ملوكه جايينچ خطابه

: ها شنو  . اخاف عرفوا بيه وثامر تركنا بعض

: هههه ترى جديات خلي احجيلج

حجيتلها عن عامر 
جاوبتني جواب كسر گلبي حسره عليها ......

: : تتوقعين ثامر. من يتزوج هم يظل يعاني .....
وميرتاح ويه زوجته
لو ينساني .....

: : حاولي تنسين ملاك وفكري بهذي الفرصه

تركت مكانها  وجاوبتني

: : لا. ايه مرفوض
لعدة اسباب ...
طليقته بت  خالته
يعني امه راح تحاول ترجعها اله
اذا مو لخاطرها لخاطر بنته

: : بس امه هيه الي اختارتج

: :وهذا السبب الثاني ....
دليل ماعنده كلمه ويه امه
ترك الاولى وتزوج اختيار امه ....
وهسه هم راح يتزوج اختيار امه
هيج شخص ميعجبني ....

: : يعني اگلهم لا

: اكيد لا

: : على راحتج

:يله گومي خلصتي

تعالي نقفل الابواب والشبابيك
ونطلع

طلعنا بسياره بابا ....
عندي خجل من اهله
اول مره ادخللهم .....
والدي اخذ وياه فواكه وحلويات

وصلنا لبيتهم ....
اني شايفته من برى
اكبر من بيتنا  واحدث
فتح الباب ابوه ...
وطلال معاه

يااهلا وسهلا تفضلوا
وظلوا يتباوسون
واحنا دخلنا
من باب المطبخ

والرياجيل من باب الصاله
المقدمه للبيت واسعه وكلها بلاط بلا حديقه وفيها حمام خارجي قريب من غرفة الخطار
والممر للمطبخ على الجانبين سنادين زرع  منسيه وبعضها ميت ..... اكيد لمن اصير ابيتهم راح اعتني بيها

رحبت بينا ام طلال واخته وفاء
واطفالها

:
ماما خلت الاكياس على الميز وتباوسن  ( وحده گالت للثانيه شلونكم شلونكم فد عشر مرات )
المطبخ بشباكه مبرده  صغير ه
ردت اگعد گباله لان خايفه المكياج يلاص سبقتني ام طلال وزعت الاماكن

: : ام طلال داده  اهنا اگعدي گبال الهوى

وانتي يمه ملاك اگعدي اهنا
وايوته (وضحكت هيه وفاء)على كلمة ايوته

:شوفي شلون هذا طلال علمني ايوته وايوته

: : داده هيه صارت بتكم بعد شتصيحوها صيحوها

: : والله ياام ملاك  بنتي واعز
وداعتج جنايني كلهن دللتهن دلال ...
حتى ل اهلهن ميقبلن يروحن
وماطلعن الا برضاي وهذي وفاء حلفيها بجهالها

:  اي والله وداعة جهالي  ماطلعن لوما شغل اخواني صار محافظات
وانتقلوا ......حتى  غرفهن لحد الان مشايلاتها

: : خطيه
الحمد لله داده
هو الانسان شماخذ من دنياه غير الاخلاق الطيبه هيه الي تظل بين الناس
وانتم المنطقه كلكم تعرف اخلاقكم  وطيبتكم

ملاك حبت تستعرض شطارتها وعرضت نساعدهم

: : خالتي اني وايه نحب نساعدج

: : لايمه لا شلون يصير

واني هم فكرت اتلوگ لعمتي

: : خالتي عادي ترى احنا مو خطار

: : ياخطار هذا البيت كله الج ايوته

ضحكوا كلهم وظلوا كل متگول ايوته
يضحكون

ساعدنا بشويه شغل اني وملاك
واني افتر بانحاء المطبخ تكون عندي شعور بالارتياح ونوعا ما حسيت هذا مكاني وبيتي
زال الشعور  بالغربه   وخاصة من دخل طلال  وشارك بالحديث المتشعب

:: الله اكبر من هسه مشغلين مرتي وجماله اختها وياها
جاوبت ملاك

: : احنا الي ردنا  نشتغل وهذا بيتنا

: : يمه طلال ذني بناتي واعرفهن زين ميصبرن بلا  شغل ....
استلمن المسووليه بعدهن اطفال بعمر روان واصغر

وتذكرت . روان

: صدوك روان وين طلال مشفتها

: : يم ابوها گاعده بحضنه

: : ميفيد التعليم بيها ابد ملاك وصتها.  متتحرك من مكانها

تواصلت الاحاديث  بينا .....
ماما حجت قصة مرضها
وتضحيات  بابا لخاطرنا

وام طلال حجت عن اولادها وكفاحها مع زوجها .....وبساتينهم بديالى  وحنينها. لهناك

وغيرها وغيرها
ام طلال حجت مع ماما على ملاك  وعامر
وماما ردت عليها

( انطوها مجال تفكر ونرد عليكم )

تقدم الاكل والمشاريب كله طبخ وفاء 
الي يبدو على طول عدهم لان بيتها قريب  واطفالها متعلقين باجدادهم ....
بعد الاكل  اني سويت الجاي
وفاء ترشدني ( اهنا الصواني . والستكاين اهنا .... وغيرها )
واستمر وجودنا بالمطبخ بين
تنظيف ....وترتيب   ...وگعده وسوالف...

جتي وفاء گعدت يمي ونصت صوتها وهيه تحجي ويايه

: : ايوته. تصعدين تشوفين
غرفتج

: : ها لاماكو داعي
عرفت هذا تدبير طلال واني متشوقه اشوف الغرفه بس حبيت اثگل گدام  امه
الي مااعرف شلون سمعت. وانطت حكمها النهائي

:: لا  يمه ماكو داعي شلون شوفيها. يمكن متعجبج  يله ماما اصعدي

استنجدت بملاك

: : ملاك تجيين ويايه

همست ملاك اليه

: : ثوله انتي شبيج
اصعدي واسكتي

صعدت مع  وفاء  الباب  للغرفه مفتوح .....
اكيد طلال موجود
واعرف هذا تخطيطه

وفعلا كان موجود

استقبلنا  بابتسامه رسمت امامي صوره كاني اشوف كل بساتين ديالى. بتفاحها.... ورمانها.... وبرتقالها
كل جمالها موجود بوجهه
طلال من اشوفه... اتذكر الي قطعن اديهن بشوفه يوسف وانطيهن العذر 
ويمكن لان احبه. اشوفه اجمل خلق الله

( ماادري شلون انطس بنظره وحبني اليه )

: : ياهلا ب ايوته نورت الغرفه

بقيت واگفه فاتت وفاء قبلي وشجعتني افوت

: : فوتي ايوته ليش واگفه بالباب

فتت مااعرف شاسوي وهو  يوصفلي الغرفه

  : هذي اكبر غرفه بالبيت
والوحيده الي بيها بلكون ..،،،
وفاء كملت الشرح

: والاخشاب صديق ابويه سواها توصى

شوفيها اذا معجبتج. نبيعها ونجيب غيرها

:: لا حلوه. وموديلها  حديث
والمحلي الغرفه صورتي
هههههه
منين هذي الصوره مااتذكرها

:: هذي بداية السنه اخذناها
والبارحه سحبتها ...واطرتها ...وعلگتها

هوايه اشياء جذبت نظري بالغرفه ... صورنا.
البردات تنطي انطباع بالراحه لونها ابيض وحاشيه حمره تحاكي بالالوان والتناسق الفرشه على السرير الواسع اكثر من المعتاد. . لكون طلال طويل  ....

والي جذبني اكثر على ميز. المرايه
كرا تين زغيره اثارت انتباهي وحتى اهرب من الخجل والاحراج اختاريت الكراتين موضوع  احجي بيه ....

سالتهم

: شنو هذي الكراتين

جاوبني وهو مشغول بتفريغ الكراتين. من محتوياتها حتى اشوف  شنو بيها

: هذي تحف.... ودمى... تعجبني اشتريها واضمها

تعالي شوفيهم  اتذكر مره گلتي غرفتج مليانه تحف ودمى

اجيت  يمه اساعده واتفرج عليهم
شفت لعابه حلوه عجبتني
وتحفه شكل الفيل من فخار
اخذتها خليته خرطومه باتجاه الشباك
سالني ليش خليته باتجاه الشباك

: مره قريت بكتاب ان وضع خرطوم الفيل باتجاه الشباك يجيب الحظ السعيد

ضحك على اعتقاد وهو ينطيني السبب الي يعتقد يجيب الحظ السعيد

: ايوته. ماكو شي يجيب الحظ السعيد غيرج انتي

: يارب اكون مصدر سعاده الك مثل ماانت اليه

اخذت مزيد من الدمى
اخليهم على السرير
وهو اخذ وردتين  حمره تنور خلاها على الجانبين انتبهت
وفاء طلعت ....

:: وفاء نزلت
لازم انزل

: :تعالي وين رايحه

: : طلال هوايه دتحرجني
شوكت يخلص هالشهر  واجي عدكم
واخلص من هاي التصرفات

: باقي ٢٨ يوم
شدعوه هالگد مستعجله

: : ههههه
گولي الصراحه اشوكت بديت تشتري هالتحف

:بصراحه بالعطله الصيفيه الي كنا ناجحين من الثاني للثالث
والله اشتريتها لغرفتنا.

اعترافه هذا  عرفت بيه مفكر بيه زوجه بنفس الوقت الي فكرت بيه زوج

:: حلو. هذا يعني كنت تفكر بيه
من ذاك الوقت

ترك الاغراض من ايده وتوجه اليه
كنا قريبين من السرير 
وفجاءه. ماعدت احس بشي بالكون الا ايديه وصوته وهو يگلي

: : ليش متدرين اني افكر بيج
حتى هذي اللحظه فكرت بيها

تخيلتج واگفه
وخايفه. وتخفين الابتسامه
بخجل  ولابسه فستان احلى مابيه الي بداخله 
واديج محتاره  وين تخليها

شنو  رائيج تخليهم اهنا
( يقصد على اكتافه  وايديه صارت  على خصري )

واني اسمع صوته
دنگت واحسه يقترب مني

رغم بداخلي خوف وخجل
ايضا بداخلي شي يدعوني
اكون معاه مستسلمه طائعه

وافكر بداخلي

البنت تحب احيانا على الشكل
او الاناقه.... او الشخصيه ...،
او وظيفه
وعدة اسباب للحب
لكن وبالحظات الحميمه
البنت  تاخذ قرارها اذا كان هذا الحب للابد وهذا الرجل احضانه هيه الجنه
او انها تكتشف   كانت بوهم وراح تخلص باقي عمرها تؤدي واجب ليلي

هذا كان احساسي

والاستسلام  هو. اول ردة فعل
واشاره تعني
ياريت هذي اللحظات تدوم .....وتدوم

وهو ياخذني بين اديه
ونتبادل القبل
وانظر لملامح وجهه القريبه مني وكانها مطبوعه بگلبي
واختفت الخطوات بينا... واصبحنا نبض واحد.. وجسد متوحد ..
وروح هائمه ..
عرفت هذا حب حياتي
الي اريده  يبقى ويدوم .....

خلى راسه على صدري واني گاعده بالسرير وهو متمدد
عبالي نام

: : شنو غفيت

جاوبني وهو بحلفني بيه

:: احلفج بداعتي لا تصحيني

:  اهلنا شراح  يگولون

:: يگولون امنين بحضن بعض

سكتت ماحجيت
وبقينا سوا  ب لقاء  عشاق
واحيانا
نسولف ونضحك

لحد اخته دزت رساله

: : هذي وفاء لازم ننزل اهلج ديروحون

: : يله
اعتقد تاخرنا ولازم نروح

: : اروح وياكم. وابات عدكم .... لو ابقي انتي  عدنا واعتبرينا متزوجين

:ايه : ههههه  الزواج اشهار ياعيني لازم زفه وعرس وهورنات وبعدين
كلها كم يوم واجي عدكم
شصار عليك

تركنا ايدين بعض ولمسة  اصابعنا تتمنى نبقى .....
واني انزل الدرج
حسيت مااريد اطلع
ولا اريد اترك بيتهم ...
ولاغرفة طلال ولا حضنه
ونظراته ....وحسرته
واني اصعد سيارة بابا
حسيت تركت كلشي بيه... يمه

خليت راسي على الزجاج
وبالي هو  وبس
اسمع اهلي يحجون .....
ومااعرف شديگولون

غمضت عيني .....واني اقرب الحلقه من شفتي
وهمست بداخلي.......
احبك

وصلت للبيت اخذت الموبايل
واتصلت بيه
مجرد رغبه عندي اسمع صوته
وانصهر ويه كلماته
واشعر انه موجود
وميبعدنا عن بعض غير ايام معدوده .......

اول مفتح خط گتله

(احبك )
ضحك ....
ورد

(( واني احبج اكثر .وعد نكمل الي بدينا  الليله ))

———————————

ملاك

بين الامل واليأس ...
وخوفا من مواجهة

النهايه

اتصلت  ب ثامر
الفجر ..
يمكن يكون تندم على الگاله

دگيت تلث مرات مجاوب ..

كتبت رساله

ملاك : احتاجك .....
ضروري احجي وياك

بقت الرساله  بدون رد ايام وايام

بدينا نطلع اني وايه وانشغلت بتجهيز. زواجها ومرات متقبل تطلع هيه بحجة تصير سمره من الشمس وطلال ابيض منها (تعقدت ليگدام)
  تكتب الي تريده ومرات تتركلي حرية الاختيار ....
مره طالعين اثنينا نجهز  لزواجها ...
وكل مره نطلع يكون موضوع النقاش هو علاء ابن عمي .....

: : ملاحظه  نسولف بعلاء اكثر منسولف بعرسج

: اي شسويلج  انتي راسج يابس
وج  والله  احسن الج تنخطبين وتنشغلين عن التفكير بثامر وافضل مباقيه الليل تكتبين رسائل  وهو ميجاوب

: :  يعني شتريديني اتصل بعلاء  واگله تعال اخطبني هسه يگول غارت من اختها

:: لا  مو تخابرين  عندي اقتراح افضل

: : شنو. هوه  احجي

: : اگلج ماتعبتي من الفره

: تعبت وانتي

: : هلكت
شنو رائيج.  نمر على بيت عمي
بدري ابو علاء
بيتهم قريب من السوك
نشرب مي شويه

: : لج السوگ مليان مي
البطل بربع
شيگولون علينا

:  افتهميها عاد تعالي نتطقس الاخبار

: لا عفيه عيب
مااسويها

: : دمشي ياعيني  دقيقتين ونطلع
مو العلاليگ گطعت اديه

بقناعتي وبدونها طلعنا من السوك واخذنا شارع مختصر يوصل لبيتهم
وكفنا بمحل داخل فرع شربنا مي حتى نخفف البهذله الي احنا بيها
دخلت داخل المحل من شفت بيه ولد صغير
وطلعت مرايه رتبت شكلي شويه
وخليت حمره ....
وطلعنا نواصل المسير
  وصلنا يمهم ...
وايه تحاول تشد من عزيمتي
ادگ الباب ..
وقتها نهايه العصر ...
فتحت الباب مرت عمي

: هلا يمه  شجابجن تفضلن شعجب اليوم  ذاكراتنا
اظهرنا مظهر التعب علينا

: غير جهاز ايه
هلكتني افترينا السوك مرتين لحد وصلت اوگع بالسوگ .....
گلنا نرتاح يمكم شويه ونطلع

:: وين تطلعن  اليوم اهنا تباتن

صاحت جنتها  تماضر

:تعالي هذي ايه وملاك اجوي ....

اجتي تماضر بيدها طفل
سلمت ....

::  هلووو بيكم حبايب

اجيبلكم مي مبين عليكم التعب
وفتحت باب الصاله گعدنا 
ومرت عمي فتحت المكيف

وطلعت  بيدها التلفون

همستلي ايه

:: الظاهر راح تتصل بعلاء يجي

: : اگولج منگدر نبقى للعشى
ماما وروان وبابا  بدونه ميدبرون شي

:: انتي اسكتي وخلينا نشوف الوضع ونقرر

: : دضمي  العلايگ فضحتينا
كلها فضايح

: : هههههه يوم الالج ومنخلي فضيحه بالسوك منشتريها

وفعلا مثل مااتوقعنا
اتصلت بعلاء  وجتي يمنا  بسوالف ...ومجاملات ...وضحك
وتفرجوا  على مشتريات ايه الي صار وجهها  ترفك لايت  من الالوان  .....ومرت عمي اقترحت سوگ شلال او الطوبچي  يكون وجهتنا القادمه لان ارخص  ...

ونقطعت هذي الاحاديث الممتعه بدخول علاء
بيده اكياس .....

سلم  علينا وهو. ممصدگ بينا موجودين
لان ولا مره مسويها وجايين عليهم بدون ماما او بابا
طلع للمطبخ ورجع سلم وگعد گبالي

:: ياهلا بنات عمي من زمان مازرتونا

: : تعبنا من السوك واجينا نرتاح يمكم  تعرف عرس اية مباقي شي عليه

: : لعد تعالوا يوميه للسوك
حتى نشوفكم

ايه داست ميانه وحماس زايد

: : شدعوه الي يسمعك يگول مگطع الطريق رايح جاي علينا

: : لو سامع مرحبا منكم اجي يوميه
مو صحيح ملاك
( خوش مسمار  )
ابتسمت وسكتت .....

استدرك ااموقف هو

: : اليوم تتعشون يمنا ملوكه

: والله ياريت
تدري وضع ماما وصحتها تعبانه

: : يابه هيه ساعه
تعتبركم  اتزوجتوا  بهاي الحاله شتسووي

:: حجيه  صدوك ملاك نبقى يمهم
وبعدين شلون نطلع بدون منشوف عمي ونسلم عليه

: : لعد اتصل بماما وافهمها
واگوم اساعد البنات

اتصلت بماما الي عدت عليها الجمله مرتين وممصدگه

: : ماما حبيبتي داگلج
احنا ابيت عمو ابو علاء

:شوداكم اهناك

:: تعبنا من السوك ولازم نبقى للعشى
مو تقلقين علينا

: :زين
راح اتصل ب بابا يجيب عشى وياه
ولاتتاخرن

سديت التلفون .....
ورحت للمطبخ  اعترض طريقي علاء

: هاي وين

: : اذا تريدونا نبقى
لازم نساعد
احنا لا غربه ولاخطار
هذا بيتنا

  : على راحتج

بيت عمو  رغم حالتهم الميسوره
ماعدهم حب التطور  والتقدم
يصرفون افلوسهم
باشياء غير مهمه
ومينتبهون على اشياء تنطي للحياة نوع من الجمال وتسر العين وتحول البيت مكان راحه
كاونترات المطبخ يعتليها درازن جدوره  گلاصات يعني اكثر من اللازم والبيت اظلم بسبب الاناره الي بيه كلها گلوبات صفره  على الدرج الي هوه بمنتصف الهول  ملابس معلگه
حديقتهم كبيره
عمو محولها. لمحلات تلاثه
وهو ممحتاج ل ايجار  المحلات
ومشوهه منظر بيتهم  وفي  كم طابوكه باقيه من البناء محتفظين بيها مااعرف ليش
عمي يملك اكبر. كراج سيارات في كربلاء
ويصعد سياره نصها يسحل بالشارع ....
واثاثهم قديم ....
برداتهم اثريه ...

وتبذير غير طبيعي على الاكل والملابس 

صار وقت العشى  انتبهت الگلاصات كل واحد يختلف عن الثاني  ( دليل ماكو تدبير عند النسوان بالبيت ولا يعرفون اصول تقديم الاكل ) يمكن معتبرينا. من اهل البيت
وصل عمو ...
سلمنا عليه
وفرح بوجودنا

كل الي بالبيت كانوا يراقبوني
واعتقد الكل عنده شك بسبب زيارتنا  ومن الاحراج ردت العشى يخلص حتى اطلع

بعد العشى صار لازم يوصلونا وعلاء عنده سياره

: :اني اوصلكم

: : اخاف تعب عليك
ناخذ تكسي

: : اذا اخذتوا تكسي هسه
الصبح نستلمكم من المشرحه
انتي متدرين شديصير
الدوله ساقطه ....
والمسلحين يحكمون ....

: : خوفتني يمعود

: لعد شنو شعبالج
وحتى طلعاتكم خففوها .....
والافضل خلي ام الولد هيه الي تجهز
انتم  صعب طلعتكم 

: لا خلص بعد ممحتاجين نطلع خلصت فلوسي وفلوس العريس

:علاء:  گدامج ايوته  گولي الي محتاجته رگبتي سداده

: حياك الله ابن عمي شايلتك للشدات

: ديله اصعدوا  اوصلكم

دخلنا السياره .....
كان لازم وحده منا تگعد يمه

گعدت اني .....

هو كان يتوقع ايه تگعد
من شافني اني
ابتسم ....
وعلق

: : بت عمي اليوم حيل متواضعه
تزورنا. وتگعد يمي

اعترضت على وصفه اليه متكبره

: : ليش اني متكبره منو گال

: اتصورتج متكبره واتضح غلطان

: : اكيد غلطان
اصلا مااحب المتكبرين

اتدخلت ايه حتى تنهي التوتر الصار بالحديث

: ممكن تكملون حديثكم والسياره تمشي
لان راح يصير حظر التجوال

:حاضر ياستي هسه اوصلكم. واني الممنون

سكتنا  كلنا  شويه ...
وبعدين علاء راد يسمعنا اغاني وسال( تحبون تسمعون الاغاني )

وجاوبته ايه

: عندك حاتم  افتحه غيره لا

:شمعنى حاتم

:  لاتسال هاي ذابحتنا بحاتم

: : ملاك الي تقرر. انتي روحي ادللي على خطيبج

وبدت ايه وعلاء يتبادلون الحديث  الي تجاوز العناوين ودخل للتفاصيل

:: يا  من هسه ذبيتوني من العشيره وبس ملاك بقت بت عمكم

؛ : لاتحجين بالعشيره
ترى زين علينا
ومانهينا عليج

: : فضل من عدكم
بس على الجايات  انهى براحتك

ثار فضوله الجمله  الاخيره ل ايه

واني ودي اندار   واخنگها ....
وكل الي ديصير ممقتنعه بيه واعتبرتها. مجرد اعلان رخيص لبضاعه  بارت بالاسواق .....

: : ليش  منو. راح تنخطب بعد

: ملاك متقدملها ابن عم طلال
شافوها بالعقد ومتخبلين عليها
وفاتحوا  ماما
سكت  وبعدها فتح الزجاج  وتحسر. وايه محاصرته بالاسئله

:اشو سكتت. جاوبني اذا  نخطبت ملاك تنهى  عليها لو لا

اتصور. جيتنا الهم خايفين لينهى هذا الي افتهمته من رده

:  اذا جايين علمود هذا الشي فاطمئنوا ملاك مااگدر  انهي عليها 
رفضتني  قبل شهر  وفهمتني الاسباب تريد وظيفه  اول
ولو اني مااشوف الزواج عائق امام الوظيفه

: اني مرفضتك  فهمتك اريد اتوضف وماما ماعدها غيري يرعاها

بقى يفهمني ماعنده مانع اتوظف واراعي ماما. وحلف رايدني من زمان بس تاخر لان الخلافات بين العمام

سمعت حجيه وقررت افكر ويه نفسي كم يوم
لكن ايه كانت الامر الناهي بالحديث

خلص اذا ماعندك مانع وظيفه  و  الزواج وهيه ماعدها اعتراض
انت اولى من الغريب

وميصير. اثنينا نروح للغرب
واولاد عمنا يسدون عين الشمس

: : هذا رائيج
لو راي ملاك

مااعرف منين اجتي هالجراءه ل ايه وكيف تحول الموضوع لمحاوله ل قناع علاء يخطبني

كرر عليه السوال

: : ملاك انتي ويانا دتسمعين

: : وياكم اكيد
بس الامور متجي هيج
ايه مندفعه زايد
اني ابن عمة طلال رافضته ليگدام
وانت فهمتك اريد وظيفه
لو سامعه منك رايك بالوظيفه
مااعتقد ارفض

: :انتي فهمتيني مااريد اتزوج هسه... وبصراحه تفسيري كان متريديني اني

: : وليش مسألتني عن قصدي  وافتهمت مني

: ليش انتي انطيتبني فرصه
راسا رفضتي

ومره لاخ اتدخلت ايه تحسم الامر

:: بصراحه احجيلك  ملاك تفكر بوضع ماما ..
وهوايه رفضت ...
لخاطرها

: : غلطانه
ميصير. توقفين حياتج
وانتي راح تتزوجين  ابن عمج
يعني اعرف وضع العائله ...
واكيد اقدره ...
اقصد اذا وافقتي

ردت ايه ابدالي لان بصراحه كنت خايفه. ومتردده

: موافقه  عيني موافقه

: : ترى مو انتي ايه اقصد ملاك ههههه

: :  اني داگولك اختي موافقه متشوفها ساكته ومدنكه
يعني موافقه
هاي شبيك

انداريت على ايه ودي اقتلها
وهيه تضحك

التفت عليه علاء يباوع

: : كافي تباوعون واحد على الثاني  ل نندعم  وبعدين  اني موجوده  لو نسيتوا

: : عمي الله يساعد طلال على لسانج اتوقع يرجعج علينا ورا يومين

: : ههههه  متشوف بابا طلب المؤخر  عشر ملايين.

الحديث استمر وهو وايه يتجادلون .....
وايه فد شويه تقرا الفاتحه وياه

لحد ماوصلنا اتفقوا حتى على العرس .....
گالتله تصبغ البيت
وتجهز اثاث لبيتكم
وتسووي حمام منفصل

وهو يناقشها ويريد
تنطيه وقت لكل هذي التغييرات

نبهت علاء. ان الحجي ويه بابا مو ايه الي تقرر
رد عليه وهو فرحان

:

: : خليها واسطه خير
اصلا بت عمي ايه سهلت هوايه امور

باوع بالمرايا ل ايه وهو يضحك ويسولف وياها

:بعد بت عمي ميصير تتزلين شهر من المده

: روح لخاطرك شهر نازل تجهز حالك باربع اشهر وتجي
تاخذ مرتك

: :ولخاطر. الاجاويد

: طايح شهر   لاخ  ولو همه وينهم  الاجاويد

:: هذا المذيع الي ديذيع الاخبار
هاي شبيج

ضحكنا كلنا ......
وصلنا للبيت
نزل علاء ويانا

حتى يسلم على بابا

اخذت ايه للمنور

:: شجاج شسويتي
افرضي ثامر اتصل

: : ويتصل شنو يعني انطيتيه ثمن سنين كافي
اسمعي ملاك علاء شاريج
وعندج تلث اشهر خطوبه اقتربي منه
وافهموا بعض
وبنفس الوقت مقدر وضع ماما الصحي ومراح يمنعج تجيين عدها او حتى تباتون اهنا لان ابن عمج منا وبينا ...
شوفي ربج دفع ثامر لسبب ...
وجابلج  علاء لسبب
فكري زين
ولا تخسرين مرتين

فكرت بكلامها  هوايه واني انطي الادويه  ل ماما الي ناسيه تاخذ الادويه
وتفقدت .  المطبخ  صاير  عاليه واطيه
وبداخلي ترسخت فكره وحده ( ماما. اذا تزوجت منو الها  ..والبيت هذا ينهجم ... وروان منو يرعاها .... الظاهر ارادة ربنا. اتزوج علاء  )
وقطع هالتفكير. سوال ماما

: شصار اهناك اشوفج صافنه

گعدت يمها واعلنت رضوخي  لهذا  الزواج .....

: : مصار شي  بس علاء جدد موضوع الخطوبه

: :  وانتي شنو  رائيج يمه ؟

: اشوف راي بابا. اول

سمعت الباب الخارجي انسد وصوت بابا يگله

:دير بالك من  الطريق..... والله وياك

افتهمت طلع علاء ......ومن نظرات بابا اليه وابتسامته  عرفت علاء حاجي بالخطوبه

الاخوان بينهم خلافات ماديه
لكن موصلت للكره والسب
وعمي بدري وجدي رغم خسروا قضيه البيت لصالح بابا ....
مااحبوا يوصل الحقد للابناء ...... فقط العزله بينا كابناء. يعني المرات الي نزورهم ويزورنا  تنحسب على عدد الاصابع 
وماعندي اي فكره عن طبع علاء .....واحلامه ....وطموحاته

حتى ارتاح من التفكير  اتخذت التنظيف وسيله  .... واختاريت المكتبه الي الكتب بيها مكدسه
ربطت شعري وغطيته بشال خوفا من الغبار  وبديت انظف
وفجاني وجود بابا

: :  باباتي ملاك اذا خلصتي  اريد احجي وياج

عرفت راح يحجي ويايه على علاء  .. فالافضل ارتاح من الشد والقلق واسمع راي بابا

::  دقيقه وحده اغسل ايديه  بابا

رحت غسلت ايديه  وشلت الشال  وجيت للصاله بابا ديسمع اخبار ومن شافني نصه الصوت وترك الريموت على الميز 
گلي : سدي الباب باباتي

سديت الباب  كعدت يمه بالصاله .....
اندار عليه وحجى

:: ملاك باباتي اعتقد علاء يريد يتقدملج مره ثانيه

شتگولين ....

: : انت الي تگول بابا
ومن بعد حجايتك اليه شرطين

: : گولي بنتي

:ملاك : الاول  ميمنعني  اتوضف او اقدم على وظيفه
والثاني ميمنعني ارعى ماما
وكل اسبوع ابات يمها  يومين
ويأجر بيت قريب منكم اني مااعوف ماما وروان

ربت على كتفي  مرتين.... وعيونه كلها  فخر بيه

: بارك الله بيج
انشاالله ابلغه الشروط
وهو مو غريب ابنا  واني اشوف هسه تتزوجين بيت عمج لحد ماابيع البيت واشتري قريب من بيت عمج ...
مو افضل

: : ان شاء الله  خير  والي اريده تفهمه هالحجي واسمع جوابه گدامك وگدام اعمامي البقيه

: : صار. مثل متريدين

تحسر  ورجع راسه على القنفه

: : شبيك بابا

:  : النوارس راح تطير وتبتعد عني

: : النوارس  تربيتك. ربيتنا  على الحب والمحنه وشمنطير. نرجع نوكر بحضنك

بست اديه وهو
باسني براسي وطلع

رجعت كملت شغلي يم الكتب الي عناوينها ومغلفاتها واسماء مؤلفيها مابعدوني عن التفكير

القرار مو سهل....
وادري علاء مهرب
ومحاوله للانغماس
بتفاصيل ثانيه .....

رتبت المكتبه واستغنيت عن كم كتاب
اجى ابالي اتفرج تلفزيون  ...اخذت الريموت واختاريت فلم شايفته تلث مرات  ...مرات الفلم المعاد يملينا حسره على حياتنا ونتمنى نگدر نعيدها... مره واثنين... ونغير بعض التفاصيل ... ونتجنب الجروح ... ونختار طرق اخرى ...مثل هذا الفلم  ...لكن هيهات
تمددت على القنفه  واعلنتها ليلة ملل مكرره ....
والملل رفض البقاء ورحل بهذا الموقف ....

رن التلفون علاء ....
وصلت رساله ...
من ثامر ....
احتاريت اجاوب منو

ت