رواية نوارس مهاجره الفصل السادس 6 - بقلم zeanab_almusawi

السلام عليكم
وسنه دراسيه موفقه لجميع الطلاب
ان شاء الله

#نوارس_مهاجره5
#زينب_الموسوي

بعض الاحلام .....
تتحول كوابيس
ونتمنى لو نصحى منها ...
لكن اقدارنا تخلينا نعيشها

اخذت وقتي
فتحت رساله ثامر مكتوب
( مسافر باجر
اعذريني
الرقم راح يتغير )

تولد شك عندي او شبه يقين
هذي حجه لان يريد يغير الرقم
وميريدني اتصل
الي اعرفه هو مامجدد جوازه بعد السقوط
ومستحيل يكون اصدر جواز بيومين

ليش هالقسوه الي يستخدمها
لينهي حلمنا ....
اكيد عرف ها الحلم ماله نهايه ....

وحتى اترك لنفسي مجال تودع
حب تمنيته يبقى ل اخر العمر
قررت مااجاوب ....
علاء احتاج وقت

عدت عليه الليل عذاب وحيره
واعاده لترتيب كل الاحلام والتصورات الي عليه الان اشيل ثامر من كل تفاصيل حياتي واستبدله بعلاء
صعب جدا وان كان ممكن
ماصدگت طلع النهار وارتاح من التفكير

تركت افراشي
ورحت للمطبخ اسوي جاي
لان النعاس عندي سيطر عل كلشي بيه

وعقلي وگلبي داخلين
حرب مالها هواده

اخذت كوبي وطلعت للحديقه ....
گعدت بصف الورده الجوريه
اوراقها يغطيها قطرات ندى تنزل بهدوء ....
كانها تواسي دمعي على خدي
ظليت اراقب الورده ...
لحد لاح شعاع الشمس الها
فتحت. وامتد غصنها باتجاه الشمس
وكانها في عناق مع الامل والحياه ...

يمكن علاء يكون شعاع الضوء
بحياتي

يمكن ارجع افتح مثل هذي الورده ...

ارسمت على وجهي ابتسامه
رفعت راسي للسمى
وناجيت ربي
( شكرا. الالهي
لتكن مشيئتك وحكمك )
واني گاعده جتي روان تركض شافتني يم الورده كعدت بحضني
بستها بخدها
اعرف من تريد شي تجي بحضني

: كولي شتريدين

: اريد اگطع هذي الورده

: خطيه. ليش تگطعيها :افرضي انتي ورده تقبلين احد يگطعج وتموتين

: لا مااقبل.

: عفيه بروان الحبابه

ردت تلعب بالاغصان وتحجي ويايه

: صحيح انتي وايه راح تتزوجون واني ابقى لوحدي

: وانتي تريدين تبقين لوحدج

: لعد منو يقريني

حسيت دتفكر بنفسها وتتصور راح اتركها

: حتى لو اتزوج مااعوفج لاتخافين واني اقريج... واطبخلج ...
وامشط شعرج ...
تعالي اسويلج ريوگ ..
شتريدين . بيض لو جبن

: بيض وخلي عليه جبن

: ههههه مثل متريدين روان تدرين اني احبج

: واني هم احبج
گالتها وهيه مستسلمه لدغدغاتي تحت زنودها المدبدبه

: يله تعالي ويايه نسوي ريوگ

تركنا الحديقه وبدات عندي رغبه قويه للنوم

قدمتلها الريوگ
و عدت لفراشي ونمت

نمت ساعات لمن صحيت
كان قريب ....
منتصف النهار
فزيت ركض على الهول ...

ايه و. روان ديشتغلون

: ليش ماگعدتوني

: شفت مستمتعه بالنوم. عفتج نايمه

: وماما تريگت بعدها ؟

: ترگيت وكلشي تمام

فتحت الجدر وضاگته
وصاحتني

:تعالي شوفي طبخ. اختج
اليوم تاكلون اصابعكم

: وخري داشوف ....

تذوقت طبخها طيب ... بس ماحبيت اصرح ... لان تثبرنا اليوم كله

:شويه ملح يحتاج
ولاتخلين بهارات زايد
ماما عدها قرحه

: صار
بس كنتيجه نهائيه شلونه الطبخ ....

: ينجرع. يرادلج تطولين بالج بالطبخ

: وين اطول بالي وطلال كل شويه متصل

: ههههه خطيه
هو واهله ناس طيبين

ايه : مو بس طلال اتصل بيه

وسكتت تشوف ردة فعلي
باوعتها ... كملت

:علاء هم اتصل
وسالني ليش متجاوبين

تركت المطبخ وجاوبتها

: مابقت عندي طاقه بعد
لااتصالات. ...ومواعيد ...
وحجي مغازل

بلغت بابا موافقه
يريد يجي هلابيه ...
ميجي عادي ...
الراح اغلى واعز

تخصرت وهيه تسالني

: اتصل بيج ثامر

: غير الرقم وعلى اساس اليوم يسافر

خلت ايدها على حلگها من المفاجاءه وردت

: سافر. بهالسرعه

گعدت على الكرسي واني اهمس

: الله وياه

يله گومي نرتب ملابسج بالجنط
مابقى لعرسج شي

اتخذت الانشغال باي عمل وسيله
ل ارهاق نفسي وجسدي
وابتعد عن السهر والتفكير

لحد العصر شفت ماما طالعه من الغرفه مبدله

: ها ماما عندج موعد دكتور اليوم ؟

: لا ماعندي

بيت عمج ابو علاء وزوجته جايين عدنا
بدلي وجهزي عصاير وكيك واحتمال يظلون للعشى

: ان شاء الله

جهزت حاجات للتقديم. ودخلت لغرفتي بدلت
الغصة ماليه صدري ....
فتحت شعري ...ورديت رفعته
عندي احساس كلشي بيه يعود اله ...ومو من حقي اتصرف بيه

دخلت ايه متعجبه وهيه تشوف لابسه قميص رصاصي ...وتنوره سوده ...وشعري مرفوع

: شنو هذا رايحه لعزا

: مالي خلگ ايه جوزي من حالي

ايه : والله مااجوز. شدعوه عليج
الي باعج لاتسالين بيه

انطيتيه ثمن سنين بعد شتنطين اكثر
لاتحبسين نفسج بدائره يإس وتكونين انتي سجان نفسج

بعدج شابه... وحلوه
وعلاء ميت عليج ...وراح يعوضج
وتعيشين وياه احلى مشاعر

استغربت ثقتها من الي تكوله

: شمدريج بلي راح يصير

: ملاك صح انتي اكبر مني
لكن متعرفين تفسرين البشر
البارحه بالسياره علاء كان يحس نفسه ملك هذي الدنيا لمجرد گعدتي يمه
عيونه تنظرلج نظره خوف
وياها امل مترفضيه

مد ايدج للجاي
ولاترديه ....

گعدت على طرف السرير دنگت راسي ورديت عليها ....

: تدرين كم مره تمنيت هذا الموقف مع ثامر

: واذا ربج كاتبلج غيره شتسووين

: ونعم بالله
وكفت يمها وگتلها

:اختاري فستان مناسب

وهيه تحمست وردت

: هذا الحجي

فتحت الكنتور وظلت تختار وترجع وتطلع وتشمر

ملاك فضيها شدتختارين رجل

: ههههه
يله هذا الفستان وردي مع شوية مكياج

: وردي
شنو طفله اني

: الوردي تلبسيه وتسكتين
وافتحي هالشعر صار سنين تطوليه
وخلي شويه مكياج

: انتي خليلي مكياج. ايدي متاخذ على شي ...

: ميفيد الحجي وياج
تحبين الكأبه

غيرت ملابسي بالفستان
وتركت ل ايه الحريه في وضع المساحيق على وجهي ....

اول ماكملت شعري ومكياجي
وطلعت اتصلت برقم ثامر

الرقم غير داخل بالخدمه

هذا الي سمعته سديت التلفون
واستسلمت للواقع ...

بعد ساعه وصلوا بيت عمو.

ورغم مراسيم المجاملات والمدح ...
وقصص الاقارب ...
ماگدرت احس نفسي وياهم وماثار همي موضوع الموخر والمقدم وكل هذا التفاصيل

مر الوقت اني اسمع وارد بابتسامه مااعرف غيرها رد

صاحني بابا للصاله عمامي اثنينهم موجودين وعرفت
( عمي يريد يحجي ويايه)

طلعت ادرك راح اسمع خطاب
عن فوائد الزواج من الاقارب وغيرها من المواعظ

دخلت غرفة الخطار كلهم موجودين
عمامي وزوجاتهم . .. علاء واخوه هاشم

سلمت وگعدت يم ماما
عمو صاحني

: تعالي يمي احجي وياج

تركت مكاني گعدت يمه على اليسار ....
لان علاء على اليمين ...،

خلا ايده على اجتافي
وسالني شلونج عمو
جاوبته الحمد لله
وبعدها استرسل بالحديث

: عمو ملاك. ميحتاج اگلج انتي بتنا ... ويمكن اعز
واني اليوم مجاي اخطبج لعلاء
لان ابني
لا جاي اخطبج لان انتي بنتي
وادري بعلاء خوش ولد ...ويستاهل بنيه مثلج ...

: الله يخليك عمو

: عمو ملاك هسه احنا بهذي الغرفه كلنا اهل. گولي شنو تردين
واني حاضر ...

: اني بلغت بابا
اذا هو موافق اني موافقه

ومن عندك طالبه شغلتين ....

: الوالد گلي الوظيفه ورعاية امج ...،

هذا حقج ومانمنعج. منه ابد

بعد اكو شي ثاني گولي لاتستحين ....

ملاك : لا. ماعندي شي

: على بركة الله نقرا الفاتحه

قروا الفاتحه
عمو باسني ومرت عمي
ماما رادت تگوم تقدم العصير

گمت من مكاني

: خليج ماما اني اروح

بخطوات سريعه طلعت
وبعدي ايه

: شكو ملاك شبيج ملوكه

: مخنوكه
احس نار جوايه

فتحت ايديها واخذتني بحظنها

: ملاك والله ماكو احسن من قسمه الله ارضي بنصيبج
ترى علاء. احسن من ثامر بالف مره ....

يله فوتي يمهم. وانطي لنفسج فرصه ....

انطيت نفسي فرصه ورضيت بطلب علاء نطلع اني وياه بالسياره
هو استاذن بابا واني مگلت لا

احتاج اكون صوره عنه
هو ابن عمي صح لكن احنا اقارب ممترابطين ...

دخلت السياره مشاعري الي جوايه مزدحمه
واريد اي تبرير لتصرفاتي وقبولي بعلاء
استمعت لكل كلمه يمكن اجد في تفسيرها

مواساة... وابدي فعلا رحلة نسيان الحب الاول ...
اول متحركت السياره
باوعته في محاوله لتفحص ملامحه او يمكن كنت اقارنه

بيه شبه من بابا وجدو الله يرحمه ..

صوته قطع رحله الاستكشاف بوجهه ..،

: ملاك احسج ضايجه
وممقتنعه بالصار ...

: لا غلطان
شويه احاول ارتب فكري بين وضع ماما ...والزواج

: اذا هذا شاغلج ابد لا تتصورين امنعج
واذا تحبين نتزوج عند اهلج
ماعندي مانع ...

ملاك : هههههه
واهلك يقبلون ...

: ليش. شنو الفرق بين اهلي ...واهلج

احنا اهل

: لا بس مترهم نتزوج ابيت اهلي ...

علاء : اعرف مترهم .قصدي اطمني..
مراح امنعج من اهلج

: ممكن اطلب طلب منك ..

: اكيد تفضلي ..

: المهر. ناجله لبعد زواج ايه
لان والله مخبوصه وياها
وماعندي وقت. اجهز... لمهر وحفله ثانيه

: زين هسه بس نلبس حلقات
يعني متاخذ دقيقتين

اكلج شلون هسه الصاغه فاتحين ...،
نروح نختار حلقات ونلبسهم ...
وبعد زواج ايه نعقد ونسوي الحفله

ملاك : نشتري الحلقات ميخالف ....
لكن مالبسهم بدون وجود اهلي...
نرجع للبيت ونلبسهم بوجودهم ...

: صحيح افضل
زين ممكن اني اطلب طلب

: تفضل

: طلبي تكونين صريحه ...
ليش كئيبه... والدمعه راح تفر من عينج ...
ويه كل جمله حسره
في واحد ثاني كنتي متأملته

تفاجات بالسوال وجاوبت بسرعه

: لا ماكو ابد

: وليش ارتبكتي

: ماارتبكت بس مااتوقعت السوال

: اعتذر اذا ضايقج السوال

تحبين ننزل لهذا المحل نشرب عصير

: ماعندي مانع
بس عفيه لا نتاخر

——————————-

ايه

شعور الفرح بخطوبة ملاك
لو اريد اوصفه ....
اكيد ميقل عن فرحي باقتراب زواجي ..

جزء مني كان في عذاب
لان راح اعيش الفرحه قبلها .،
لكن وجود الحلقه باديها
زال هالعذاب ..،
والي زادني غبطه اكثر
شوفتها وهي تضحك وتجاوب اتصالات علاء ...
وفرحها بهدايا علاء البسيطه ..والاغاني الي يدزها تسمعها .،،
وزياراته اليوميه النا

كانت تستعد تغير ملابسها لان علاء اتصل جاي عليها واني گاعده امشط لروان واباوعها

حبيت اتشاقى وياها

: حتى بهاي واسطات
مسكين ياطلال مامسموحله الزيازه لبيتنا ....وعلاء لان گرايب معسكر عدنا

جاوبتني وهي تختار. من الميز طلاء اظافر مناسب للحجاب والحقيبه اليدويه

: هو منو مانع طلال احنا لو
اهله ميقبلون يجي عدنا يگولوله. ....اصبر مابقى شي وتتزوجها

: باقي تسع ايام

: وشبيج تگوليها بخوف
مو هذا طلال حبيبي الگلب

: مااعرف صار يومين گلبي مقبوض ...وروحي لايبه

: ياستار شبيج
يجوز خايفه من العرس ...
توكلي بالله وطلال حباب وانتي تعرفيه واهله مامقصرين

: ان شاء الله خير

راح اتصل بيه اليوم مااتصل

: شعجب مااتصل

ايه : زعلان لان يريد يشوفني بالبدله گتله ميصير فال نحس گلبها گابه
و اليوم اصدقائه بالكليه عازمهم يمه وتعرفين الاصدقاء اذا اجتمعوا

: لعد من هاي گلبج... وروحج وماادري شنو گولي مااتصل بيه وفضيها

: دروحي روحي الباب يندگ اجى ابن العم

اخذت جنطتها وهيه تطلع اندارت عليه. وصوتها كله مرح وعيونها تنبض بالحياه وگالت

: خابري طلال وصالحيه ها
( معقوله نست ثامر ...يارب تنساه )

طلعت ملاك اتصلت بطلال

: شلونك ..

: مشتاقلج ...

: لو مشتاق اتصلت

: هسه يله طلعوا جماعتي ونسيتي زعلتيني البارحه منج

: ازعل روحي شلون يصير كول شلون اراضيك

: البسي البدله وراح اجي اني وامي عليكم
ولاتگليلي فال وماعرف شنو
هو باقي كم يوم ونتزوج مراح يصير اي شي

امام اصراره مناقشت
ورحت لغرفتي خليت البدله بالحمام
وجهزت لگعدة ماما وام طلال بالهول
لحد وگفت سيارته بالباب رمش عليه
انطيت خبرت لماما ...
وطلعت فتحت الباب ...
نزل امه سلمت عليه وعتبت ليش مااسال عليها ....
اعتذرت منها بحجة اجهز ومالحگ ...
باستني وفاتت وبعدها دخل طلال للصاله واول حجايه گالها.
( ليش ملابسه البدله )

:هسه اروح البسها وارجع

طلعت من باب الصاله الخارجي ....ل لبراني .. عبرت الحديقه ودخلت من باب المطبخ الخارجي
لغرفتي.....رفعت شعري وتركت بعض الخصل على وجهي ....
ودخلت بالحمام لبست البدله
لان اذا اطلع لابستها من غرفتي ماما وام طلال يشوفني ....
وطلعت للمطبخ بنفس الطريق
رافعه البدله الي كانت منفوشه وكبيره من الاسفل ...
وبلا ردن..... وفتحه الصدر. مربعه ...يحيط بالخصر ورد صغير ابيض

لحد باب الصاله وگفت ....
جريت نفس
وفتحت الباب ...
خطيت خطوتين واتسمرت بمكاني
واني اشوفه وكف من مكانه
واخذت عيونه. تتفقد كل جزء مني سواء. مكشوف ام مستور
وايده خطت حدود البدله

انتظرت يحجي واعرف احساسه
لكن ماحجى
واثنينا تركنا التعبير بلكلمات
واختارينا. التعبير بطرق ثانيه .....
ماانتهت الا بسماع هورن سيارة بابا برى
من الخوف ختلت خلف طلال
وهو يضحك
اعرف روان راح تفتح الباب حتى يدخل بابا سيارته

: منين اطلع طلال دبرني

:اطلعي من يم.الامهات افضل

: لاعفيه طلال والله عيب
اطلع انت افتح الباب بين مااني انهزم

طلع للباب الخارجي واني اركض مافتح الباب لبابا الا تاكد دخلت المطبخ
عدت سلامات
نزعت البدله واني اضحك من المغامره الي سويتها حتى ارضيه
..............................

صبح ثاني يوم اعتراني احساس غريب يدعوني للبكاء ..،،مع ان نمت سعيده
بالغزل الي سمعته من طلال باتصاله بيه
وهو يوصفني بالبدله ...،

بقيت بلا غدى... ولا تركت غرفتي
يمكن بسبب اقتراب زواجي وتركي لبيت اهلي

العصر زارنا كلمعتاد علاء
اتصلت بطلال

: شعندك هسه طلال

: ماعندي شي ليش

: اريد اروح للامام تجي تاخذني

: هوى ..ثواني اني يمج

: لحظه اتصل بابا واستاذنه

: اكو شي مااعرفه صوتج عبالك باجيه ...

: ماادري شبيه
وعندي رغبه بالبجي مااعرف ليش

: يجوز الاحساس راح اتركين اهلج وبيتكم وذكريات ...
وتجين لبيت جديد وناس جديده ..،

: يجوز

: حبيبتي اهلج مو بعيدين
وراح تجين عندي وتصيرين مرتي ...

والله الهوى لو يغثج مااخليه يهب على عيونج ...
وعيونج والقسم بيهن عندي مقدس ...
ويايه تعيشين بحب وكرامه مثل اهلج واكثر ...
وعيونج
الحب العرفته وياج ماافرط بيه للموت ...

: ياحبيبي نزلت دموعي

: دموعج غاليه
معقوله تبجين لان راح نكون سوا
البارحه كنا نحسب الايام

: لاتشغل بالك مجرد خوف

: يله ابدل بين متتصلين بالوالد

اتصلت بابا اخذ رائيه قبل لااطلع وجاوبني

:روحي باباتي ولاتتاخرين

: انشالله مااتاخر وادعيلك

: اخذي فلوس من ماما شگد متريدين

: لا بابا ميحتاج

بابا : لا بنتي متطلعين من البيت اذا ماتاخذين فلوس

: الله يخليك النا ولايحرمنا منك

بدلت وخبرت ماما واخذت فلوس ...
دخلت سلمت على علاء الي موجود جوى
ومااعرف ليش نظرلي وكانما ماقبل اطلع
وگفت بالحديقه انتظر طلال

دگ جرس الباب .....
فتحتله ...

اول ماافتحت الباب
دخل ونظراته تدور عليه ...
يريد يعرف ليش خايفه

لزم ايدي وهو يسد الباب ...

: تعالي ليش هيج ذبلانه تريدين ناجل
الزواج

: لا لا
لايظل بالك جنت شويه مخنوكه
يمكن لان مااتصلت بيه طول اليوم ...

تعال فوت علاء جوى ..
تحركت من يمه ...

ايده اعترضت طريقي ...

طلال : ماتحمل اشوفج هيج
اني اعرفج هذي مو ايه الي اعرفها ...

بجيت بصوت عالي

: گلبي مقبوض حاسه راح يصير شي

: اششش شنو هالتشاوم
تعلمين الغيب شنو
كولي ياالله
لاتبجين

مسحت دموعي

وانتظرني اهدء شويه
انتبه لابسه حجاب

: الحجاب لايگلج
بعد لاتذبيه

: صدوك يعجبك اتحجب
والله من زمان ودي بس مااعرف ليش اتردد

: والله وجهج طالع نور

: خلص بعد ماانزعه

دخلنا للصاله
علاء وگف يسلم عليه
همه متشاوفين بالعقد

واني وملاك طلعنا نقدم شي

وملاك القت عليه الوصايا المعتاده

: لاتتاخرين
واتصلي من توصلين
ترى يظل بالي عليج

:لا مااتاخر. ازور وارجع

سمعت روان طاري الزياره

: خلي اروح وياكم ازور

صاحت بيها ملاك

: وين تروحين انتي الثانيه
فوتي يم ماما

اخذت صينيه العصير وقدمتها
الهم اثنينهم
باوعتهم اثنينهم عبالك متناگرين وطلال ترك العصير
وهو يطلع : صاحني بعصبيه

: يله ايه لنتأخر ...
طلعت وراها وگعدت بالسياره
وهناك توضحلي سبب انزعاجه

: اكولج شي ويظل سر بينا

: احجي سر شنو

: حسيت علاء عنده طمع
ابيتكم وبيت الاعظميه الي حجيتيلي عليه

: مستحيل شلون عرفت

: اسمعي شگلي

: شگال

: دخلت سلمت عليه وباركتله
گتله شايف الف خير
انت وگعت على كنز. اقصد ملاك

جاوبني ....،

شكو بيها بنت عمي
وانت هم اخذت نص الكنز ...

: يا مسكينه ياملاك

: واثناء الحديث گال راح يسكن وياكم او ابيت الاعظميه
بعد الزواج ..

: واني اگول ليش گلبي مقبوض
جاي ينفذ خطه ابوه قبل كم سنه

: هو بيت الاعظميه حاليا
شنو وضعه

: باسم بابا
وبابا ديرممه حتى يبيعه
ويفتحله شغله يرتاح منها

وصاني وصوته متشنج

: ايه لاتدخليني طرف بالموضوع ونبهي ملاك تصير حذره

: اكيد. اوصيها
شنو من حظ عدها هذي البنيه

: اهم شي متستعجل خليها تطول بالخطوبه حتى تبين نواياه

: والله هيه مو هالگد راغبته بس اني قنعتها

: اكيد تريدين مصلحتها
وهو ابن عمها لو مثلا يطلب من والدج يساعده مابيها شي
بمثابه ابوه
لكن التخطيط واللف والدوران هذا يخوف

بقينا بالحديث هذا.... اعتصر گلبي
الاعتقاد بان علاء يعتقد اختي كنز ...ولازم يستولي عليه

دخلنا للامام ... النساء بمكان معزول عن الرجال

بلا وعي ظليت ادعي وابجي
والحسره ماليه گلبي.....
الازدحام داخل الحضره خلاني ابقى واگفه بعيد عن الشباك ...
كل الي دعيته من ربي هو الامان
احس گلبي مو بمكانه
وبجيت لحد دموعي جفت ...
العطر داخل الضريح مميز وتجعل المكان مليء بالاطمنأن
والعطر امتد لثيابي ...
مليت انفاسي منه بكل راحه وسلام ....
كانما غيوم الهم الي بداخلي انزاحت واشرقت شمس الامل ....

خلصنا زياره ومشينا للكراج الي بيه السياره ...
استوقفتنا نداءات الباعه او بضاعتهم
وطلال اخذني لمحل يبيع الشالات والحجاب ...
مكنت اعرف شي عن الحجاب او نوعياته
فسالت البنات الي بالمحل يشترون
وعلى اساس اجابتهم اختاريت اثنين ...
وطلال اختار اثنين ... وطلعنا
وصلنا للسياره ...قبل ليحل الظلام
وتجدد عرض طلال الي يعرضه عليه. بمناسبه وغير مناسبه

: تروحين ويايه لبيت اهلي
بين مترتاحين. شويه

: عيب ميصير
وبابا نبهني لاتتاخرين
وهذي ملاك تدگ عليه

: يله لعد نرجع
وكافي بجي وكابه

: خلص بعد ماكو بجي

: احجيلج عن اصدقائي البارحه من زاروني للبيت

: احجيلي منو اجى

طلال كل الولد الي بشعبتنا
واثاري كلهم كانوا يعرفون بينا نحب بعض ...
ومغلسين

: ههههههه نزول شلون يعرفون مع ان احنا كنا حذيرن ومنوگف سوا الا مجموعه
واصعد بسيارتك على اساس خط

: من صديقاتج وخاصة ريم تعرفين عادل صديقي خطيبها
ومتظم عليه شي
واصدقائي
لاكفينا كم مره نحجي بالحديقه

: هههههه بعد ولد قسمنا مينضم عليهم شي
شگد مشتاقتلهم

ويه حجايتي اندار عليه وصوته عله

: شنو مشتاقتلهم ...

: شبيك غير زملائي

: لا بالله واذا زملائج تقبلين اني اشتاق لبنات قسمنا
يله يابه مشتاق لهيفاء ورسل
واديان

: ههههههه هاي شبيك اقصد
مشتاقه للكليه واجوائها
ههههه

: هيج ياعيني اضحكي
الدنيا متسوى بدون ضحكتج

وتحول خوفي لضحكات مسموعه بداخل سيارته واحنا نتبادل الحديث وطلال يصنع المواقف في سبيل اضحك

وصلني للبيت. ومنزل لكون امه اتصلت خبرته عدهم ناس جايين من ديالى ...

بعد مرجعت البيت كان ملاك تحضر العشى بلا واهس
وضحكتها اختفت
الماعون تخليه على الميز كانما تريد تكسره
انتظرت ل مابعد انتهاء العشى وطلعة علاء حتى اسالها

وگفنا اني وياها نغسل مواعين ...

شفت حالها متغير حيل .... ولاحظت نازعه الحلقه...

: ليش نازعه الحلقه

: بعلاء شي مخوفني

ركزت على كل كلمه تگولها

: تتذكرين من حجيتي وياه
يصبغ بيتهم ويسوي تعديلات

: اي اتذكر. وافق عليها

: العجيب اليوم يگلي ماكو داعي
نوفر فلوسنا لان اريد اطلع من اهلي

: مسالتيه ليش
وين ناوي يگعد

: سالته
جاوب احتمال نگعد يم اهلج مؤقت لحد نبني ليش ندفع ايجار

: وانتي شگلتي

: اكيد مقبلت
واذا يريد يطلع من اهله ياجر بيت
يم اهلي ونتزوج
حاسه هالزواج بيه غايه

: ملاك انتي ذكيه...
شنو الغايه تعتقدين

: ايه انتي تعرفين ان بابا ماعنده ولد ...
عمامي مااگدروا ياخذون منه الورث بالقانون ...
فكروا ياخذون بناته وبالتالي الورث يرجع الهم

: اسم الله على بابا ان شا الله عمره طويل
المهم انتي شراح تسووين ويه
علاء

سدت الحنفيه وگعدت على الكرسي بادي عليها التعب مو جسدي وانما تعب من التفكير والحظ العاثر
وردت عليه

: مااريد استبق الامور
انتظر واشوف ...
وهيه خطوبه
ميربطني بيه غير حلقه
اذا طلع هالشكل
والله العب بيه لعب گدام عمامي واولادهم

———————————-
ملاك

شكوك تحولت لشبه يقين
علاء هدفه البيتين ....

كل مكالماته عن البيتين
لحد بطلت اجاوب اتصالاته او اتحجج بانشغالي بعرس ايه
الي باقيله تلث ايام ....

هذي الايام مشفنا بيها النوم
ونگعد من الصبح ...
وام طلال هوايه تزورنا حتى تاخذ
اغراض ايه وكل مره تجي تظل تسولف وتاخرنا

اليوم قررنا منستقبل احد ومنجاوب تلفونات حتى نعرف نشتغل

الساعه تسعه الصبح تذكرت روان بعدها بلا بدله
وايه ناسيه الموضوع

:اكلج ايه مو على اساس تاخذين روان تشتريلها بدله

: بابا گلي هو يشتريلها اليوم
اروح اگعدها تتريك وتروح وياه

والدي بوقتها عنده اجازه حتى يساعد من نحتاج شي

وهو گاعد على الميز للريوك سالنا

: محتاجين شي قبل لا اطلع

: سلامتك بابا
اني وايه فد ساعه نطلع للصالون تميش شعرها

: منو يوصلكم

: طلال ياخذنا ويجيبنا

وهو يترك الميز وصاني

: انتظروني ارجع من السوك يله تطلعون
حتى ابقى يم امكم

: مثل متريد بابا ننتظرك

: يله بابا تي روان جاهزه

: تنتظرك بالحديقه
من الحماس

:ادري اليوم تشلع گلبي
يله تختار بدله

طلعت وراهم للحديقه .....
روان جلبت بايد بابا وتسحبه

: يله بابا تاخرنا

: روان مو تشلعين گلب بابا واختاري بدله بالعجل

: بابا ميخالف اشتري اثنين

: ههههه هاي بعدنا اهنا
صار بابا اختاري اثنين
يله ولايهمج

سدوا الباب ...نوارس

اخذ روان ....
باوعته وهو يطلع من الباب
ولازم ايدها ...

مصدر الضوء
والامان ...،
سقف حنان احتوى قلوبنا اليافعه

ملاذ امان ....
ابي حبيبي

سديت الباب
ورحت يم ماما احضرلها الريوك
وايه تحضر غدى اخاف نتاخر بالصالون

البيت مخيم عليه الوجوم
والخوف
اعتقدت ان سببه معرفتنا ان ايه راح تتركنا وتتزوج ...

حتى كلامنا قليل وحركتنا بدون حيويه

مرت ساعه ونص دك هورن سياره بابا ....
رحت اركض افتحله الباب
فتحته على النص ...
بالاثناء ...
جتي سياره بيضه سريعه ...،

وگفت بعرض الشارع نزلوا منها اشخاص ....
اثنين ملثمين لحد الان اذكر واحد منهم لابس تراك رصاصي
وبيدهم مسدسات ...
انحبس صوتي واني اشوف متوجهين على بابا ...

من خوفي صرخت ورديت الباب
وباوعت من خلفه ...
على صرختي والدي اندار على روان شبگها وهمه يملون جسمه رصاص من جهتين ...
ومن خلال زجاج السياره
وبقى لازمها بايده وهو ينهار بجسده على الكرسي الي هيه بيه وهيه بحضنه ....

انهزموا بالسياره بعد مافرغوا السلاح العدهم باغلى جسد بحياتنا كلنا ....

طلعوا الجوارين
وماما وايه صريخهم
كان مثل المذبوح وينازع الرمق الاخير ...
ماما مزقت ملابسها كانت بين موقفين بين تتاكد بتها الطفله ماماتت ...

وبين تصرخ على عمد بيتها الغارك بدمه بلا ذنب ...

بين صريخ وعويل ...
واصوات الشباب ... ومحاولتهم فتح ابواب السياره

وادين ماما تگلب بجثته
شالوا والدي عن روان ...
الي فاتحه نص عين ومصبوغه دم ... والزجاج حتى بحلگها
وانطلقت صيحات الشباب
عايشه عايشه تتنفس ....
وگعت ماما على الرصيف
واني يمها احاول اوعيها ...
فقدت الرشد
مااعرف شاتصرف ....
اشوف دم بابا بدى يقطر من السياره للارض ...
ظليت اجمع الدم ودي ارجعه اله ...
ودي اگله گوم يابه ....
شوف بناتك بالشارع يلطمن
اباوع على السمى يمكن اشوف روحه
واگلها ارجعي
لاتطلعين. من جسد بابا
واخذيني ابداله

——————————
ايه

مصيبه بابا ...

هدتنا كلنا ...

واگفين بالشارع ومنعرف شنسوي
المصيبه والخوف افقدنا التركيز
نصرخ .... ونلطم بلا وعي
شفت طلال وامه يركضون علينا

منظرنا مينوصف ...
وبابا گاطع النفس
كلي الي اتذكره ...
شفت شباب اخذوا روان بالسياره ..،

بعدها خفت ليكون خطفوها
ركضت بالشارع
واصرخ
روان
روان
وسمعت صوت طلال

: فوتي جوى

منو الي دخلنا جوى ماادري
وگفنا بالحديقه
اني وماما وملاك ...
نضرب على صدورنا
ونصرخ ..،
جتي الشرطه ....
يسالونا منعرف نجاوب
طلعنا برى مره ثانيه
وبعيونا شفنا
شالوا بابا واخذوه
الصوره وهو يرفعوه وجسمه مليان رصاص ... قتلت الصبر جوانا ركضنا اني... وملاك خلف السياره الي اخذته
.... وصلنا لراس الشارع وگعنا من الصريخ باباز
طلال وشباب معاه رجعونا يجرون بينا

عيطنا عليهم

(بابا بابا
وخروا بابا راح
وين ماخذيه ...)

صحتنا صياح طلال علينا

طلال كافي .اثنينكم فوتوا جوى
ملاك اتصلي بعمامج
خلي يجوون

وانتي ايه تعالي ويايه نشوف روان ..،،

ملاك : اني اروح وياكم

: ابقي انتي يم امج
يله بسرعه

بقيت اباوع بوجوه الناس واسالهم
وين ماخذين بابا
وك بابا لاتعوفنا بابا
كل صريخنا وفرجة العالم علينا
للاسف ماخلته. يرجع ويرد علينا

اخذتني ام طلال من ايدي داخل البيت

لبستني صايه طلعتها من غرفتي
لان كنت بدشداشه قصيره

وبعدين اخذني طلال بتكسي
وهو گاعد يمي مااحس بالعالم

عيوني داخلها جمر وگلبي مجمور .....

اسمع طلال يحجي

: ايه دتسمعيني
احجي گولي شي

باوعته دموعه تنزل مثل دموعي

عندي رغبه اختفي من الدنيا
وماواجه الجاي ...
راح نعيش بلا اب
وللموت نبقى بدونه
اه ياحياة بدونه
ياريت ياخذنا وياه

وليش قتلوه
الجواب طائفيه
شنو يعني
مااعرفنا هذي الكلمه لا بقران
ولابحديث

هل هي ذنب ... تهمه ...
جريمه
قتلوا والدي بسبب
ان ماما من طائفه وبابا من طائفه تختلف
ماقريت ولاسمعت بالقران ولا بالسنه
ولا باحاديث الصحابه
والائمه
دليل يبيح قتل انسان بريء
—————————-

ملاك
امتلكت خوفي وحيرتي واصبح من الضروري
طرف من عدنا يتماسك ويلم شتاتنا ويكون قوي بهذا الموقف ...
اتصلت بعمي
بدري بيته بعيد عنا
جاوبني

خير ملاك شبيج

:مااكدر احجي تعال عمو
بابا مات وروان بالمستشفى وماما واگعه

شتدتگولين انتي اخويه مات شلون مات

ملاك عمو تعال فدوه

جاي حالا ...

وصلوا العمام واولادهم
واخذوا على عاتقهم امور الي تحصل بعد الفاجعه

(بدري ايه وملاك تجون ويانا للبيت اهنا مو امان واحتمال
ناويين يصفون العائله كلها )

عمو وروان تبقى بالمستشفى

جاوبني ( سمير وسلام.اولاد عمج وجدي راحوا للمستشفى يشوفوها )

:اريد اروح للمستشفى اشوفها يمكن تحتاج دم

الله يخليك عمو اخذني اشوفها

صرخت ماما وهيه تسمع حجيهم

: اخذوني يم محمد...
اخذوني اله لادفنونه .... اريد اشوفه

: عمو ملاك انتي ظلي يم امج تشوفين حالتها صعبه

—————————

ايه
ياريت املك كلمه اكبر من وفاة توصف حجم الفقد لبابا

الانسان الي كان جسر محني الظهر... حتى نعبر ونوصل

كان خنجر بگلب كل شخص يحاول يغيره على ماما بحجة ماعندك ولد ....
يرد عليه عندي الاحسن بناتي
رزق والله خصني بيه ...
هالكلمه من نسمعها تخلينا نعرف الله خلقنا... مو نقمه... او عار
بل رزق للمؤمن الشاكر لرزقه....
مكافح يكد ويتعب .
ومثل كل العراقيين ...

حلم بالحريه
للاسف ،الحريه الي اجتنا مغلفه ...بدماء... وطائفيه

وصلت للمستشفى يسحب بيه
طلال ويعرفني فاقده التركيز
لذلك يشد على ايدي حيل حتى انتبه
سأل بالاستعلامات
عرفنا مكانها بالطابق الثاني
مصعد مافي وكهرباء مافي
الدرج حسيت نفسي اتسلق جبل من هالگد ماحيلي مهدود

وصلنا للغرفه الي هيه بيه

واضعين روان على سرير
ويمها. ممرضه
دخلت يمها وبشوفتها اطلق العنان للبكاء ولعويل

سأل طلال الممرضه

: شنو وضعها الطفله

: وقفنا النزيف وننتظر

طلعت من الغرفه الممرضه

گعدت اني يم روان حاولت اخليها بحضني
وتراجعت اخاف أأذيها ...

اكتفيت بالمسح على راسها والنظر الها ... روان الطفله المحبوبه الشاطره
المتفوقه ...
اصبحت تصارع الموت بالنفس الاخير .،،

وفاقده الاحساس بل حواليها
المستشفى شبه مهجور رغم

كثره الممرضات والاطباء ....

لكن ماعدهم علاج او اجهزه
ماادري الدموع الي كانت تتزل بلا كتمان
عليمن اوزعها ...
ل بابا الراح مقتول بلا سبب ...
لو ماما المريضه
او على روان الطفله المزروع بداخل جسدها النحيل طلقتين ....
ام على ثلاث بنات صارن

بغمضه عين يتيمات ابلد
كل دقيقه بيه يخضر يتيم ....
ادير العين بكل جهة مافي احد يساعد....
كل ماانظر الها شحوب وجهها
يزداد ...
وايدها تحولت خشب ...

توجه طلال يمي لزم ايدي

: ايه قضاء الله وقدره
مااگلج سهل الصار
فقد الاب صعب الله يساعدكم
بس واحد منكم. لازم يصير قوي
ويوگف ويشيل العائله
وهذا الواحد اني وياج
احنا واحد
مااگلج اعوضج عن الاب لان اطلع جذاب الاب ميتعوض

الي اگوله
اني عندج مو بس انتي
امج. واخواتج. امانه عندي
وعهد الله مابيچن وحده تنظام واني عايش

بجيت واني اسمع كلمات المواساة

: بابا راح راح لحد الان مامستوعبه ومامصدگه ومراح اصدگ
اريد بابا
وينك بابا

————————
طلال

اي حديث ينفع مثل هيج وضع
ان تصحو على حقيقه
قتل ابوك....
فقط. حتى يرحلون طائفه معينه
من هذا المكان ...
شگد حاولت اواسيها
ماگدرت ...
دموعها تعذبني
ومنظر الطفله روان يطحن القلب ....

طلعت للممر اريد اسال اي شخص عن حالتها ...
شفت شاب لابس صدريه بيضه

:دكتور والتالي الطفله راح تموت

:دننتظر الدكتور الاختصاص يوصل ويستخرج الطلقتين

: مافي دكتور ثاني

لا
هو هذا الدكتور الوحيد الي يگدر لان المكان الي بيه الطلقه
خطر وقريبه من شراين القلب

:وين صار الدكتور هذا بيش الساعه يداوم

:الدكتور متاخر بالازدحام

ظلينا ننتظر
خلصت وقتي دعاء

دگ تلفوني ملاك
كانت مثلنا حايره ومذهوله
رادت تحجي مع ايه
انطيتها التلفون

———————————
ايه جاوبت اتصال ملاك
الي عبالك لحد الان ممستوعبه موت بابا ولجئت اليه عدها امل اگلها ممات

:وج اية تصدگين بابا مات الصبح كان يحجي ويايه

:انشلت ايده الي قتله وحرمنا منه ...

: روان عايشه لو ماتت

ايه :لاعايشه ولاميته منتظرين الدكتور يطلع طلقتين من صدرها
اتگطع صوتها بالبجي وصوتي ايضا

: ياربي شنو هالقدر
وجماله ماما حالتها فد مره بس لاتموت هيه هم

:تدرين من الالم الداخلي هسه اتمنى اموت ومااحس بشي اتمنى اشوف بابا هسه واگله اشتاقيتلك ...

: ايه بابا اخذوه يدفنوه بعد منشوفه

ايه :لاتكولين منشوفه
صعبه والله صعبه

تعالت صرخاتنا
اخذ التلفون مني طلال
وطوقني باديه وهو يشوفني اضرب راسي بالجدار ...

نحبس اصواتي ورجليه عجزت تشيلني
گعدت على الارض

بعدها مر وقت عصيب لحد
اجوي على روان ...

طلعوها من الغرفه على السديه

صيحت : وين ماخذيها

الممرضه للعمليات الدكتور وصل

:عفيه ديروا بالكم عليها خطيه حتى دم مابقى عدها

الممرضه: روحي انطي دم احتمال نحتاجه

ايه :حاضر

نزلنا للطابق الاسفل ماقبل طلال انطي دم

: انتي بصدمه مو زين عليج تنطين دم
اني انطي
اخذوا منه الدم

ورجعنا بالقرب من غرفه العمليات

انتظرنا ساعات وساعات
ابجي واسكت
وادعي واسجد
لحد خارت قواي ...
وراح طلال جاب كرسي من الممرضات كعدت
وهو گعد على الارض ...
ابجي بلاصوت بعد ماالممرضات ظلوا يصيحون عليه وطلال حاول يسكتني

: كافي لخاطر الله راح تموتيني اليه هم

وصلوا ولد عمي
وسلموا على طلال
وشرحلهم الوضع

طلع الدكتور
سال

: انتي اختها

: بلي دكتور شصار

: طلقه وحده طلعناها
واما الاصابه الثانيه فشظيه من حديد السياره مستقره قريبه من القلب

:وطلعتوها
الدكتور بالوقت الحالي صعب نطلعها

بمرور الوقت راح تبني عليها اللحم والدم وتنمو الطفله وتصير جزء من جسمها

ايه :يعني متاثر عليها

:نراقبها ونشوف
اما الوقت الحالي فمافي دكتور بالعالم يخاطر باستخراجها
الشظيه بمكان قريب من شرايين القلب
الافضل نتركها بالوقت الحالي

- التصويت جدا ضعيف