رواية نوارس مهاجره الفصل الخامس والعشرون 25 - بقلم zeanab_almusawi

#نوارس_مهاجره25
#زينب_الموسوي

رعد
واستمر الوضع  عشر  ليالي ....

كل الي صار هو ...تنام يمي بدون دبدوب

الصبح تگعد...  تنط حبل يم راسي ....وتگعدني

: اكعد. يله مو اليوم تاخذني للصالون

: الصبح الصالونات معزله
خليني انام وكافي تنطين حبل

سحبت الغطى مني وفتحت الشبابيك رغم الجو بارد
ورجعت صيحت باذاني

:  اگعد ...
بين منتريك...  ونفتر بالشوارع ...
والمحلات.. وتشتريلي تلفون جديد

: هم بعد وكت

:  يله  دگعد ترى ازعل

: هو انتي يوميه زعلانه
واني اغسل وجهي  اقترحت عليها اقتراح

:شنو رائيج اليوم نغير... واني ازعل ...وانتي تصالحيني

فكرت شويه ... وهيه تاخذ جنطتها
وتنتظرني  ابدل. ردت عليه

:روان ...: اوكي من نرجع من برى ...ازعل ..واصالحك

اخذت الجنطه من ايدها. وگعدتها. على كرسي
حتى ناكل
ولغيت الطلعه

: يابه كافي طلعات ...فلستيني ...
اليوم ناوي اعلمج  تعزفين عود  ...
خاصة ان اصابعج رشيقه... الاوتار. راح. تحبها

راحت جابت العود  ...وهيه متحمسه

وبعد ماخلصنا الريوگ
اخذت العود ... خليته بين اديها
ومسكته بصوره صحيحه
وانطيتها  الاشياء العامه للعزف

روان
ساعات مرت..، يعلمني عزف ...
وبيها  كان جدي ... وصارم اكثر من اللازم
لدرجه حسيت  متضايق مني
او من صدي اله

فلتت الريشه من ايدي
باوعته وهو يتأفف
: اعتذرت

: اسفه . ... ترى العزف بيه صعوبه.. وداشوفك عصبي  واني  دخت حتى احفظ  الاوتار

صار عصبي اكثر. وهو يعتبرني دادلل 

:  بلا  دلال   واحفظيهن عاد هنه خمسه ..
دو ...ري ...مي ...فا ...صو ..لا .....سي 
الوتر. الاخير. اسمه. دو
لمن ...تعزفين عليه باصبعج الوسطاني ...
النغمه. تكون. ري

واذا  بالاصبع  الرابع  النغمه  مي ...
يله .جربي. واسمعي .النغمه
الزمي الريشه. بخفه لاتضغطين زايد

اخذت الريشه .. وطبقت شرحه
وعزفت .اول نغمه  ...واني ممصدكه
وبعدها نغمه  ...
ومرت ساعتين
تعلمت على سلم الموسيقي

وقبل الغروب
تعلمت  اعزف مقطوعه بسيطه
لگيت بالعزف  متعه  والحان العود  تخليني احس بالحنين
ل ماما واخواتي

وهالحنين خلاني اطلب منه يغني على الام

افتهم الي بيه ... وحس بحنيني
اخذ العود مني
واخذني يمه وعزف  مقطوعه حزينه
على كلمات اغنيه تگول
( ياامي ..، ياام الوفى
ياطيب من الجنه )
حرارة دموعي الي نزلت خلتني
احس بحركة  گلب ماما  عليه
وتمنيت  ارجعلها.
وفي لحظات افتهم. رعد الي بيه
وخلاني  اتصل بيها
واحجي وياها
گلتلها ( مشتاقتلج  ماما )
وسالتني (ليش تبجين)
( لان مشتاقتلج )
جاوبتها وسالتها عن ملاك... وايه
بشرتني ان (ايه
بعد يومين زفتها )
وحملتها  سلامي. للبنات
وبخيالي تصورت  خبصتهن هسه  ... وارتباكهن ... وركضهن في اتمام كلشي على اتم وجه
صوت ماما واخبار زواج ايه
عادت اليه الفرحه
ورجعت يم رعد بعده لازم العود
ويدندن
شافني ابتسم  وعرف زالت الكابه عني
اخذت العود منه وطلبت
عود اليه

: لازم تشتريلي عود اليه

: هو بقى شي مااشتريته

: اي العود  مااشتريته

ضحك عليه وتذكر اتفاقنا

:اگلج صار الليل... شوكت ازعل

: هههههه على راحتك
ازعل ...بس اول اطلب العشى حباب

صار عنده حماس وهو يطلب العشى  ويأكد  عليه

: اطلب  صار..  وراها ازعل وتصالحيني ها

: اكيد اصالحك
اطلب بيتزا حباب

: تدللين باباتي

بليلتها ...  ازدادت برودة الجو ..،  ومطر قوي ...صوته من ينزل على الارض... ينسمع عن قرب
وفي زجاج مكسور  بشباك الممر ...جعل الصوت يبين اكثر ...
خفت من صوت المطر 

: ليش هيج صوت المطر... اشو بامريكا ميبن الصوت ..شگد متمطر

ظل يشرحلي بين الدول اهنا وهناك  ... وباسلوب تدريسي
وعلمي تعودت عليه ..، وماعدت اشوفه معلمي ...واستاذي ...
بتلك الليله شفته حبيبي
وهو مستمر  يشرحلي عن المطر

: باباتي اهناك في فتحات بالشوارع ...والارضي ..لتخزين المطر. حتى يستفادون منه ..
اما اهنا فيتجمع بدون فايده ...
لذلك تسمعين  الصوت اقوى

: يخوف الصوت

: لاتخافين بيبي مجرد صوت

طلب العشى ...واكلنا
ودخل للغرفه... على اساس زعلان

دخلت بعده... حاضن دولي  ...ونايم

: اشو انت حاضن دولي اليوم

: زعلان منج صالحيني يله اوخره

رعد

بقت واگفه الخجل يمنعها تقترب

: تعالي يمي مو تخافين من صوت المطر 

تحركت صوب الخزانه ...
واني اراقب تحركاتها ...
صوتها ضاع...  ومهما احجي وياها مترد

اخذت ثوب ابيض ...وطلعت تبدل ..

انتظرتها ترجع  ...
وگفت بنص الغرفه ...لان الكهرباء بدت  ترمش
خفت عليها  من الظلمه
دفعت الباب. باصابع مرتعشه برد ..، ورهبه
وماده ايدها للطريق المظلم
وتمشي على ضوء الموبايل فقط

  لابسه ثوب ابيض ...دانتيل

اعتبرته اشاره ...منها اليه
برفع .الرايه البيضه ...
والاشاره الثانيه وقوفها  امام. المراءه تتزين ...وعلى ضوء خافت
الي بعده دوري اخذتها بادييه حتى نكون في السرير

تلميذتي ...اما استاذتي ؟
لا اعرف  ايهما  انتي

اعلمكِ  ابجديه الحب ؟
ام تعلميني

ا تفهمين   مافعله العشق بي
اضنك تفهمين

وهاانتي
اجتهدتي  ...تفوقتي ...
تعلمتي ..
غلبتي  علمي... وكتبي
وكتبتي  ابجديه  حب  جديده
تبدا بكِ  ولاتنتهي  الا بكِ

طفلتي... وحيدتي
علمتني... افهمتني

اديت فروضي ...
واعلنت ضحكاتها... تفوقي
ختمنا ليلتنا... مثل مابدأنها بقبل ...
تحمل معنى الوعد
بان نبقى للابد عاشقيين
لايفرقنا  الزمن

———————————
ايه

لاح نجم سعدي ...
واثمر صبري.
انه صباح عرسي

تركت اي تصرورات ...وتساؤلات ابالي ...وتهويل  طلال وتخويفه اليه ... مازاخ من فرحتي ذره

وقررت اعيش اليوم بكل تفاصيله ...
اجرب السعاده...  الي عدتها بخيالي  مرات... ومرات. ..

اليوم  راح .يكون  يومي 

اول شي سويته دعيت الكل لعرسي  من البارحه
كل شخص اعرفه... صديقاتي ...
صاحب المطعم.. الي عملت فيه
اتفقت معاه  يهيء زفه ...
لان طلال ميعرف احد بالمدينه ..
وابو كوثر  حضر  كم رجال من الجاليه
و كم  سياره حتى يوصوني لمدخل  للهاي وي ويرجعون

ملاك طبخت  حتى الغدى يكون ابيتنا

اني وياها قررنا  يكون عرسي حدث تتكلم بيه الناس ...
وتنسى حدث ثاني

رجعت من الصالون ساعه ١٢ الظهر..،   لابسه بدلة برنسيسه محدده من الخصر  وتنسدل للاسفل بنفشه بسيطه
مع حجاب كامل ابيض
وصلت للبيت ..شفت سياره طلال بالباب ..،
دخلت البيتنا استقبلوني بالهلاهل ...
انداريت على الصاله اشوفه ...
لابس قاط  اسود  ...ورباط

جالس على الكرسي... وعينه عليه ...
اندار  ...وتحسر ...
بقت عيني عليه ..، والبنات ياخذوني من ايدي ويگعدوني بالصاله الثانيه.....انعزلنا عن صالة الرجال
گعدت بين المدعويين

حسرته ..، شغلتني ... اريده يفرح  ويايه
لازم يفرح ...

بدا  الرقص العراقي... والهلاهل ...  وشاركت ملاك وصديقاتي بالرقص ..والهلاهل
وماما تضحك عليه لان اهلهل لنفسي  ...
اخذت صور لكلشي حتى  للبالونات الموجوده امامي وخلفي
بهاللثناء اتصلت ..،
ام طلال
يادوب اسمعها من الصوت

: شلونج خالتي  شلون صحتج

بدت كلامها  بعتب

: هسه تسالين عليه انتي هم بذات مثل رجلج 

: والله حقج خاله اعذرينا ...مشغولين بالعرس وتحضيراته ..

بجت بالتلفون. وهيه تدعي وتتمنى

: اتمنى يمكم هسه  ..وارگص واهلهل ..

: اعتبري نفسج موجوده خالتي 
...عوفي الكاميرا مفتوحه
وشوفي الركص ...
  وخليت كاميرا تلفون مفتوح على الميز

خبرت ملاك... يجيبون طلال ...والشباب يمنا حتى نحتفل ...وامه تشوف

وملاك نفذت. دخل طلال ...ومعاه الشباب  همه يرگصون طلال مجرد متفرج مزعوج      ....
استمروا  يهووسون ...ويغنون
ودي جي اغاني صوته يهز الگاع جوى رجلينا  ...

مشى خطوات وگعد يمي 
بلا كلام .. ولاسلام ...
وشايل اهموم الدنيا

خجلت من صديقاتي .،، واعرف راح  تبدي التاويلات... والحكايات

قربت راسي يمه حتى يسمعني

: خالتي دتشوفنا  بالكاميرا
اندار على الكاميرا  وهو مبتسم
ابتسامه عاجله مؤقته
: والله  خطيه هسه تخلص اليوم تبجي

: مااخذك الحماس بالموسيقى ....كوم نرگص
گمت قبله... صار مجبور يركص ويايه ...
وهو لازم ايدي. ...واني ادور بين اديه  وامامه

سعاده... حاطت كل دقيقة حزن مرت عليه بحياتي ...
ومحتها ...
غبطه  ملأت قلبي.. حد الشبع ..
سرور  امتلكني

امتلكني ...واني اودع ماما ...وملاك ...وصديقاتي
واصعد بسيارة الزفه... والعريس الي بجانبي طلال
١٢ سنه  احلم بهاليوم
وعشته  اخيرا

فتحت عيوني على الطريق ...امليها  من صور السيارات ...الي تدك هورنات ...
والسيارات الي تفسح الطريق لزفه عربيه ...
فتحت اذني لكل هلهوله... واغنيه ...
ونغمه ...
هوه يسوق ...واني ايدي على الهورن ... وحتى  اعتراضه ماهمني

: ترى فضحتينا شبيج ممصدكه

: لا ممصدكه ليش انت مصدك

ضحكت ...بگد البجي طول السنين
بگد الياس ...بگد  الخيبه ...

وصلنا للهاي وي ٩٤  الي يودي على شيكاغو
اشرت لبقيه السيارات حتى يرجعون .... اخذوا اقرب مخرج حتى يرجعون

   واحنا  كملنا  طريقنا  بالسياره

وانتبهت يسوق  اقل من السرعه المسموحه

: ليش  تسوق بطيء والطريق فارغ من الصبح

: وشعدنا مستعجلين

: صدوك ليش مستعجلين
هو احلى مابالعرس الزفه

: اذا تحتاجين تنزلين.. تاكلين ..تغسلين كولي في استراحات على الطريق

: هيه كلها خمس ساعات ونوصل

عندك سي ديات افتح لو تنزعج

: على راحتج

دورت كل الاغاني انگليزي واني مااحب اغانيهم
باوعت على طلال منزعج وفتح الرباط شمره للخلف
والسرعه الي يسوق بيها اقل من المسموح
وعبالك يسرح ويرجع يدوس بانزين

: شبيك تعبان شنو
تحب اسوق ابدالك

: لا انتي عروس ميصير

: لعد شنو الي مضوجك

: معدتي  شبت نار

: سلامتك  حبيبي

احيانا تنولد عندنا رغبات ...بتحقيق  اهداف  معينه
ولمن نوشك على الوصول للهدف ...نتغاضى عن كثير الصغائر... الي تحاول تحول وصولنا.. الى فشل
وكذلك اني تغاضيت عن  تصرفات طلال ...
الي حسستني هذا عرسي... وهذي فرحتي... فقط وهو مجرد متفرج

اتغلبت على خيبة املي... واني ادخل شقته  واكتشف نفسها ممنتقل مثل ماگال ...

وتغاضيت  عنه  وهو  يحمل جنطي  لغرفه  ثانيه  غير  غرفته
وعن  كلماته  الذبحتني  وهو يقبل  جبيني ابرود
ويگلي

: ايه اني فهمتج  كيف تكون علاقتنا..،  وانتي قبلتي

: قبلت ...مو معناها  تعزل نفسك عني،،. وكل واحد يعيش لوحده ..
وانت گلت مريض
اگدر اعرف مرضك... وفي علاج اكيد في ...بامريكا كولشي اله علاج

: ايه اسمعيني  لاتساليني عن مرضي ...ابد ...ابد
سمعتيني

صوته علا... ونبرته واضح عليها الجديه

: اوكي حبيبي ولايهمك

شنو رائيك تفرجني الشقه

گعد على القنفه ورد

(الشقه گدامج وشوفيها
ليش انتي مشايفتها )
وراح گعد بعيد

بحث  بقنوات  التلفزيون  طلع المصارعه
وبلا مينظرلي حتى
اشرلي على الغرفه بالرموت

: عندج تلفزيون بغرفتج ... حتى تتفرجين براحتج
سكت ... وكمل
في قنوات. عربيه.
 
بقيت متحجره بمكاني  وحاول افسر الي گاله
( يعني حتى تلفزيون  ميريد نتفرج سوا )

وبررت كلامه يجوز  ميقصد

وهو   يتفرج سمعته  يستخدم  كلمات   نابيه للتعليق على المصارعين

ولامره سمعت طلال يستخدم كلمه سيئه طول ماعرفته بالعراق
تركته ... وفرجت  نفسي على الشقه
وصممت بخيالي شكلها  الجديد من اضيف لمساتي الها
وازيح الوسخ الي بيها
تنهدت  استعدادا   للعمل المؤجل  لباجر
رحت  على  غرفتي
بابهامفتوح ..،.   وجنطي على الجانب ... وگفت بالوسط ...
بنظره  وحده  عرفت  كلشي بيها اختيار. وتصميم .طلال الي اعرفه
مو طلال الي گاعد برى وصوت افشاره يوصلني لهنا
متارك نقص بالغرفه من الستاير...  والتحف  ...والفرش...
واللوحات

الي ناقص الغرفه هوه ...

واني افتح جنطتي  واطلع
ملابس نوم  بيضه
أنبت نفسي  لان تدور. منغصات
وحذرتها من  فقدان  الصبر
بدلت ثيابي
وطلعت للحمام ... وهناك وجدت

الكارثه الكبرى بالحمام... المخزن الي بيه مليان ثياب وسخه... وقافل الباب عليها... بس فتحتها وگعت على وجهي
احترت.. شلون ..ارجعها.. لمكانها ..
تركتها  للصبح ...
شيجيب  باجر  وانظف

طلعت  للمطبخ ... كلشي بيه جديد
وفي نواقص اكيد هوه ميعرفها
والثلاجه مليانه  حاجات ...
بلا ترتيب

خليت  العشى على الطاوله ملاك  الي حضرته ...ودزته ويايه

ناديته للاكل
: الاكل جاهز. ..تجي تاكل

مدد  رجليه على الطبله  امامه
ونزع  الستره ...شمرها
وجاوبني

: تعشي انتي اني من اجوع  اكل
ومعدتي  ماذيتني هسه

عنده اصرار غريب على استفزازي... وتحويل  فرحتي لتعاسه
اكلت  وحدي ...وغسلت المواعين ...
شلت سترته من امامه ... من دنگت
سوى نفسه يكح ...
حتى يبعد وجهه... وميشوفني شنو لابسه 
اخذت الستره علگتها... واجيت بالعجل... گعدت بصفه

مركز باللعبه  ويتهدد  اللاعبين وهو يسمعني  قدرته على الفشار

: شوفي هذا ال F  الاسبوع الجاي عندي لعبه وياه ابن F

: ماشاء الله انگليزتك قويه بين كلمه والثانيه كلمة ال F

: عادي الكل يكولها

: مااحبك تكولها على الاقل مو گدامي وبعدين من يصير عدنا اطفال  يتعلمون الكلمه

مارد عليه الا اني سالته اشو سكتت
بلا اهتمام  لكلامي رد

: بسيطه اذا صار عدنا اطفال ابطل اگولها
دباعي  عليه شلون  متحلف  بيه الا  اخلي  دمه  بطوله

يحجي ..ويعصر القنفه.. بايده ويضربها ..
بحيث انشال من مكاني وارجع

: اعصابك طلال التوتر الزايد ياذي معدتك

ممنتبه شداحجي
طول مگاعدين سوى مااندار عليه وباوعني
اتمنى اعرف شنو الي غيره ...
اذا ماعنده علاقات... ماعنده اصدقاء...  شنو الي حوله بالبرود هذا
حبيبته... وعروسته.. يمه وهو منشغل برياضه كلها عنف ...وسب.. وغلط

وبمحاوله  لابد  منها  حبيت اذكره  بالماضي بينا يمكن بيها احيي الحاضر

: طلال تتذكر من كنت توصلني للبيت ..واحنا راجعين للكليه

جاوبني وهو مشغول يتفرج المصارعه ويفرك اديه  من الانفعال

: بلي ايوته اتذكر

: مجرد وجودنا سوى ...كان يثيرك
واظل ابعد اديك عني. وازعل منك 
شغيرك هسه

بلا ميباوع  لوجهي ... وبتجاهل تام  لمشاعري 
جاوب اسألتي

: اذا راح تقارنين حالي.. قبل ويه هسه..  اتعبين. واتعبيني
وياج 
الله يخليج فوتي  نامي  واتركيني اتفرج
بعد هذا الكلام

احتفظت بطشار كرامتي وجريت اذيال  خيبتي
دخلت  غرفتي  رتبت ملابسي ...
ومكياجي 
ومحيت  اول  دمعه  اليه بعد عرسي

   واويت لفراشي
قفلت تلفوني حتى يعرفون الاخرين  مشغوله  بتادية مراسيم  ليلة  عرسي  ويه حبيبي  الي  انتظرته ١٢ سنه من عمري
وحلمت  شراح  نگول  بهالليله
وشراح  نسووي

نمت  مغلوبه  على امري وحاولت اتغلب على دموعي
صحيت الفجر على صوته يتقيا بالحمام

فتحت  الضوى وركضت عليه بمناشف نظيفه عندي

دخلت للحمام گاعد بالارض ...ومرجع  راسه على زجاج البانيو ...والعرك مغطي وجهه ..
نصيت عليه

: سلامتك حبيبي

مسحت وجهه وغسلت اله
تسند على الجدران ...وعليه
وگام وصلته  للسرير

وفكرت ابقى يمه لحد اطمئن عليه
صوته منعني باوامر غاضبه

: غطيني  وروحي  نامي

غطيته وتوسلت

: خليني يمك يمكن تحتاجني

صيح عليه
: ل خاطر الله اطلعي مابيه شي

: حاضر  تصبح على خير

طلال
ارهقني التفكير  باول ليله لوجودها ويايه
وجودها اضاف الم جديد 
الالامي
كل خوفي  تفقد القدره على التحمل
وتطلع من هالمأزق الي  ماله نهايه
وخوفي الاكبر ان تبقى  (زوجه وقف )

عصفت بيه الافكار. والحيره ....
واكبر  همومي ...
عمرها يضيع ...
تطارد اشباح رجال عرفته من زمان
وماعاد اله وجود

محطم كل مافي ...
مسلوب كل كياني ...
ومازلت احملك معي
جزء من نقائي ...
واعز مااملكت يوما ...
واغلى مااملك  الان

ايه

راجعت تفكيري  ...ويه نفسي

تأكدت  طلال مريض ...واكيد بعده يحبني
واكثر شي متاكده منه... محتاج مساعدتي
لاافكر فقط. بالعلاقه الزوجيه الي لابد. بيوم تكون بينا
وابدي اغير حياته الي محتاجه ترتيب... ونظافه... واهتمام
مو مهم اعرف مرضه ابدي بتغيير الي اعتقد سبب مرضه
طلال مو مجرد  شخص  عابر بحياتي...
  ولا قصه  حب  خايفه تفشل ...
طلال قلعه  يقين...  انبنت وسط روحي  ...شيدتها  بدموع... واخلاص... وشباب... وصبر

وهالقلعه تستحق احارب ل اجلها... واحميها.. واعيد ترميمها
حتى تظل تفيي عليه طول العمر

الصبح تركت تلفوني مقفول على اساس عروس ومازلت نايمه
الخطوه الي بعدها مثل اي زوجه  تفكر  بالنظافه  وكانها الحل  المتفق  عليه  للتخلص من  التفكير  بالمشاكل  الاخرى بحياتنا
دخلت للحمام... بيدي اكياس قمامه... واصفي ملابسه الوسخه  حسب درجة العفونيه بيها ...
الي معفنه... ومتاكسده ...ومخضره عليها طحالب...  تدخل الكيس

والي اقل  عفونه  ..وريحتها  تجيب شلل ...هذي راسا على فتحة القمامه بالبيسمنت البنايه ...
والي بيها امل.. غسلتها.. مرتين

بعدها الصاله... صفيت الجرايد ...واوراق ...البريد الماليه الارضيه
مسحت الجدران  ..
وغيرها... وغيرها... لحد اتسطرت عندي ١٤ كيس
لبست ملابسي... وحجابي ..وطلعت ذبيتهم بمجمع للقمامه قريب من البنايه ...
رجعت للشقه.

رجعت سبحت وغيرت ملابسي

وبديت اجوع ...
انشغلت  باعداد الاكل
وبنفس الوقت
استخدمت
المكناسه الكهربائيه حتى يگعد  على الصوت

فتح باب غرفته مستغرب سبب حملة التنظيف

: شكو من الصبح منو راح يجينا

: اني اجيتك  ومااتحمل هال وضع

: دسدي الستاير... البنايات الي گبالنا تشوفج

: حبيبي اليوم شمس ...بالنهار محد يشوف
خلي الشقه تتشمس

: جوعان  تحبين اروح اجيب اكل
بكل فخر  رديت واني اعرض  امامه الاكل الي حضرته

: تجيب اكل ومرتك اكبر شيف بديربون
من اليوم ممنوع الاكل من برى كله طبخي

: على راحتج افوت اغسل بين متحضرين السفره

: صار عمري

بين مطلع اني محضره الاكل
گعد ويايه على السفره

ماكو بينا نظرات متبادله  اني الي  اباوع  وبس
وهو حتى من يحجي ويايه عينه بماعونه

: هاي يوميه راح تسووين هيج لو بس اول ايام

: يوميه  وعيونك  يمعود كل هذا حلمت بيه وتمنيته
انت بس  گول  ودلل

: اخاف اتعود على الدلال
ومن تعوفيني شلون

: ليش اعوفك  منو عندي غيرك اذا على المرض  فالنبي ايوب مرضه كان لاشفاء منه وزوجته صبرت وياه والله شفاه لصبرها

: هذي زوجة نبي

: فعلا زوجة  نبي  لازم  ناخذها مثل  وقدوه

رفع عينه بنظره تحدي ان الي گلته مااعنيه ورديته نظرته بتاكيد

:اني .وياك .ومااعوفك

ومره  ثانيه  حاول يحذرني 

: اني خايف عليج
انتي تتصوريني طلال الي

قاطعته

: لاتكمل  لاتصورك  ولااتخيلك انت  رجلي  وحبيبي  الباقي على ربنا شكاتبلنا نصير

مارد عليه لكن حسرته ردت

:  طلال كل الي اريد اسمعه  منك شي واحد

: گولي

ايه : بعدك  تحبني  مثل اول ...ومامتزوجني   تخلص من ذنبي   ...بغض النظر عن  مرضك يعني لو كنت معافى تتزوجني

الي جاوبني شخص مااعرفه گلبه صخر

: مااعرف شي اسمه حب ...
لو اعرفه ... اتصلت بامي 
الي صارت  تتصل باصدقائي وتستعطفهم حتى. اسأل عليها

اكتفى من الاكل ... وكمل 

: انتي هنا  بارادتج  ... وشوكت متريدين الباب مفتوح 

قبل ليترك مكانه ذكرته بمكالمته الي گلي محتاجج

جاوبني

:  بوقتها   افتهمت منج  حاجتج تختلف عن حاجتي
اني رايد شخص يتحملني
ويدليني  على نفسي
بلا تردد جاوبته

: اني هالشخص طلال خلينا نتعارف  على بعض من جديد
شكو بيها

ضحك  وهو يترك الميز

: والله  اذا  تريدين  نتعارف من جديد  فاكيد  راح  اسبوع واتركيني

: هيج مأيس من روحك 

:وداعتج ماانجرع

تركت  مكاني وگفت  امامه

: اني اجرعك ... خلينا  اصدقاء حبيبي

وهو يبتسم نبهني على الگلته

: اصدقاء .... وحبيبي

مشى بعيد عني  مشيت  وراه
وگتله

: اصدقاء ... ومسموح  نحس بالحب من جديد
موافق

اندار عليه ورد
( انشوف ايوته )

اتفقنا نفتح تلفوناتنا... ونستقبل  اتصالات  المهنئيين...

دگ تلفونه  هوه اول  وقبل ليجاوب
گلي بدلي دنطلع اراويج شيكاغو 

: دقايق اكون جاهزه

دخلت  ابدل اتصلت
بيه ملاك
وقبل ل اجاوب  ذكرت نفسي
استعير. فرحه  من اي مكان
واجاوب بفرح

: هلووو ملاك عمري

: لا المزاج عالي  مبين

: هههههه يوم اللج حياتي

: احجيلي انشالله سعيده

: يعني شتتوقعين مو كافي طلال يمي

: الحمد لله اروح اطمن ماما خطيه للفجر تدعيلج وتصلي

: فدوه لگلبها

: باجر نجي عليج اني وماما وام كوثر وحنان
وراح نجيب سيارتج ويانا

: هلا بيكم  اني مفولتها للسياره  ...عيب من ام كوثر  لاتخليها تفول بالطريق

: لاتخافين مااخليها
يله حبي روحي لرجلج اشوفج باجر

كملت تبديل... طلال ديجاوب اتصالات..، اهله  والشي الغريب هو   اجادته  لدور السعاده  بالاتصال  

: تعالي ايوته  اهلي ديسلمون عليج

سلمت ... وحجيت وياهم نص ساعه
يوصوني عليه ...
ويدعولنا

انهيت الاتصال  ... وطلعنا بسيارته
وشفت وقت مناسب اخبره بجيت اهلي

: باجر راح  يجوون  علينا  ماما وملاك وكم صديقه

: هلا بيهم. ...بس اني باجر مسافر  عندي مباراه

مااعرفت شنو  اگله  وبشنو احلفه ميسافر. ويحرجني. امام اهلي  وصديقاتي

وهو ياكدلي مابيده شي

: مااگدر. اعتذر عن المباراه  البطاقات مباعه ..، وشركة الرهانات تخسر

: خابرهم گلهم تزوجت 

: ميعذرون افتهمي عاد هذا شي موبيدي

مااگدرت اخبي  انزعاجي وبين على ملامح وجهي
وهو اخذها فرصه  يتحدى بيها صبري  ... ويسمعني كم كلمه تسم البدن

: اهوووو هاي من اول يوم گالبه وجههج عليه
دار السياره وگلي نرجع افضل
اني ناقص گابه
وكمل خطابه
اني من البارحه  لليوم اسال نفسي
شتسووين. عايفه اهلج  وشغلج
وجايه عندي
اذا. متصوره  نفسج اتزوجتي
فاحب اصحيج  من وهم عايشته
مراح يكون بينا  زواج
تعرفين  ليش

انتظر  اساله  ... وظل ينتظر  ... بلا  سؤال مني جاوب

: لان اني مااريد اتزوج  افتهمي

سكت وهو منفعل ونفسه عالي

تصرفاته وكلامه متتاقض
بنفس الدقيقه ...
يغضب ... يهدأ... يضحك
يصيح ...

انقطع الكلام  بينا ...

عبرنا. مسافه. ...واحنا  نقطعها انشغلت  اتفرج معالم المدينه ...
واقارنها بديربون
في اختلاف بطبيعة تقسيم الشوارع  ...وتصميم البيوت ..
ونهائيا  ماافتحت حديث وياه

هوه الي قطع الصمت  وحجى ويايه
: هسه  تريدين  نرجع  لو. نتفرج المدينه

: بكيفك

دار السياره مره ثانيه
وبدى ..يشرحلي على المدينه ...واجوائها

: راح اخذج ل نيفي بير  هذا ساحل  مطل  على البحر
ولو  بارده  لكن حلو

وبعدين  اخذج  لشارع  البحيره هذا  نفتره  بالسياره  وندخل بالاضواء
وبعدين  اخذج  لمحلات  عربيه
اتسوگي  منها  الي  تحتاجيه

ايه

مدينه  شيكاغو  مدينه  سياحيه
يقصدها  الناس  من كل انحاء العالم
ومركز  للسهر  ...والنوادي الليليه
وتمتاز  بالمطاعم  ...الي تمثل كل انحاء  العالم  ...واشتهرت بيها اكلة   بيتزا  ...تختلف  عن  باقي العالم  تكون  على شكل  صحن عميق  ...والجبن  بطبقات اكثر

هذا. الي  شرحليه طلال  طول مااحنا نفتر

وكمل شرحه
واهم مابيها هيه ناطحات السحاب
والريح العاليه... الي تمتاز بصوتها ليلا  كانه  بكاء او ونين

بعدها. اخذني لمحلات عربيه
حسيت من  سلامه عليهم
ان جاي فقط يفهمهم ( اتزوجت وينهي الحاحهم عليه ) او ينهي فضولهم  بعدم  زواجه... او انعدام العلاقات بحياته  وهوه الي يملك ...
الجمال ...والمال... والشهره
باختصار كان استعراض

رجعنا للبيت واني حاز بنفسي سفره
وحتى بنومتي كل شويه افز

من صوت الريح بالليل
الي صحاني خايفه.. تفقدت الشبابيك..: اتصورت مفتوحه
لگيتها. كلها مسدوده ...
والصوت مخيف ...خاصة من ينحصر .بين. بنايتين عاليه

طلال  بغرفته
دخلت  الغرفه  ظلمه فتحت لايت  الموبايل  شفته  نايم ومرتاح  بنومته ...
ماحبيت  اصحيه 
واگله  خايفه   في قنفه  بغرفته
نمت  عليها...  لحد الفجر ...
تكررت  نفس  حالة  القيء عنده

مع  ان مااكل من برى كنت اتصور هذا السبب

غسل   ورجع لغرفته
حالته مينسكت عنها لازم يراجع دكتور

: طلال مراجع دكتور على حالة القيء هذي شنو سببها

: راجعت گالوا سببه اكل السجن

: ومافي علاج

: روحي نامي  لاتدوخيني  هسه اصير زين

: شنام يمعود حالك يصعب على الكافر

: اهوووو  رجعي نامي بغرفتج شعندج اهنا

: صوت الريح خوفني عبالك واحد  ينعى

ضحك باعلى صوته

: نعلى  على  ابليسج ...سويتي نواعي
دنامي ...نامي
شمر .عليه. المنشفه. الي بايده وهو. يضحك
طفى الضوى ونام بمكانه

راح يذبحني الفضول... شنو مرضه ...
والقيء اله علاقه
قلقي عليه... والحزن بدا يتسلل لداخلي.. ويتغلب على حماسي
وهالشي حاولت اخبيه... عن  ماما ...وملاك من وصلوا ثاني يوم

: وج البيت وحشه بدونج ايوته

گالتها ملاك  وهيه تفتح الجدر وتشوف شطابخه

:( الله ريحة طبخج
هنياله طلال )

وماما  گلبها حس بيه بدون  مااشكي

: شبيج يمه ايه اشو ضايجه

ام كوثر حبت تمازحني باعتباري عروس

؛ غير اجينا گعدنا على گلبها اكيد تضوج

: لا والله... هلا بيكم
بس طلال سافر   ..وهو  معدته حيل تاذيه   وليليه يتقيء

ماما. وملاك من سمعوا مسافر
ماحققوا. ويايه  لان ام كوثر موجوده. واهتمن بموضوع مرضه اكثر

: خلي يراجع دكتور يايمه

: يكول راجعت ومفاد

: عيني هذا من اكل المطاعم 
هسه  يتعود على طبخ البيت
والنظافه  شويه  شويه  ويصير
زين  .. لاتشغلين  بالج

؛ يمه انتي هم ديري بالج عليه ونضمي.  اكله

: اكيد

:  حرامات سافر ردنا نسلم عليه ابو ايوب

: منو ابو ايوب

: ماما سمته هالاسم هيه خلي تحجيلج

: خلي احجيلج ...
ليله  زفتج  ...حلمت بيج ...متزوجه  واحد  اسمه  ابو ايوب

: ابو ايوب منو. قصدج طلال

: مشفت طلال بالحلم
بس اكيد هوه
انتي  انذري  اذا صار  عندج  ولد سميه  ايوب

:ماما خوفتيني على رجلي

: معليج بحجي ماما
من هسه سميه ابو ايوب
لان انتي صبرتي هوايه

قبل الغدى بثواني اندگت الباب ...
رحت فتحتها ... هوه بالباب
حضنته بلا اراده مني
وماما  وملاك وام كوثر يضحكون عليه
وهو سد الباب
وگلي ( مااگدرت اسافر  واعوفج )  كلماته  شالت  عني هموم  نامت على گلبي
كل مااذكر  كلامه البارحه بالسياره
دخل سلم  ..وشاركنا  الغدى

ومع فرحتي موقفه  ظل بالي الحلم
مرعوبه من فكرة افقده مره ثانيه ...

طول وجودهم بالشقه ...وسوالفهم  ...وضحكهم  ..،ماشالت من بالي حلم ماما
شنو هالصدفه  ...البارحه اني حجيتله عن النبي ايوب ...وماما تحلم بيه متزوجه واحد اسمه ابو ايوب ...

طلعوا الضيوف  ... وهو طلع  لمعارض السيارات
مرجع الا  وقت العشى  اكل
ودخل يحضر  جنطته

شويه اجى يصيح

: وين جنطتي  ... ليش شلتيها من مكانها

اشرتله على وجودها بالمخزن
الي يبعد  نص متر عن الباب الرئيسي
واني اشوفه يفتح المخزن  ويطلعها. ويرگع الباب حيل

واديه لازمه الجنطه  وعيونه عليه
شمر الجنطه بالممر  وهو  يحذرني
بكل غضب وصوت  عالي

: هذا  مكانها ... والله اذا غيرتيه
الا  ابتلي بيج

رجفت من صوته  ونظرته اليه

دخل الغرفه  وبعد مطلع

اول شي سويته بعد  ماخلصت شغلي ...
بحثت عن تفسير الحلم ...
دورت ..وبحثت ..مالگيت شي مقنع

لكن  لگيت  دموع  تنزل  واني اجلس بالليل...  بجانب الشباك على الارض.   اتفرج الثلج ينزل ...وينشر البياض على الارض ..،

كأنها  تحية سلام من ربنا لكل الموجوعين..، واليائسين
او وعد  رحمه  لكل عطش الارض
ينزل ببطء  مثل الحب... من ينزل على گلوبنا.... قطره... قطره
بعدها  يكبر... يصير كتله...  تكبر  ...لدرجه منعرف شوكت ...كانت اول قطره

فاجأني صوت طلال يطلع من غرفته

: اشو سهرانه

مسحت دموعي رغم هو لاحظها
وهو يفتح الضوى

: لاتفتح الضوى
اريد اتفرج الثلج... اني عل طول  اسهر..، اراقب ..اول ..نزوله

گعد يمي  وهو يكول

: اهوو   ،،هم  نزل شينظف السياره باجر

: ليش شنو عندك باجر

: احتمال اسافر بالليل

: عندك مباراه

نزل راسه وعرفت راح يعترف بشي

:  بصراحه اليوم مكان عندي سفر
حبيت انهزم من مواجهة اهلج ...
ومااشوف  فرحتهم بزواجنا

واني  وياج  نعرف  هالزواج ماله وجود

: وسفرك  باجر هم كذب

: لا والله اسافر ب ١١ بالليل
تگدرين تتفرجين على التلفزيون وتشوفيني

: منين اجيب گلب يشوفك تنضرب

خليت راسي على جتفه ...
بلا دعوه منه..  ورفعت طرف الغطى ...حتى يكون وياي ...ماتحرك
غير لسانه...

: ايوته اذا ندمانه..، ومتگدرين تتحملين... اني احلج من اي وعد بينا... وامضي في سبيلج

باوعته وتحسرت بكل همي  ورديت عليه

: تگدر تگولها بالعكس

ماافتهم. من ملامح وجهه

:يعني  تگلي  ايه  اتحملي لخاطري ...وابقي على وعدج ويايه... لان مااگدر اخليج تروحين لسبيلج

اخذ ايدي باسها
ورد (  لاتركيني ) ...
باوعته في خوف ..والم ..مااعرف مصدرهم
وطلبت منه
يبوسني

غمض عيونه حيل  وانصاع ل امري  ...
و باسني ...
وعبالك  فز   وگام

: اروح  انام  ورايه  سفر
وانتي  لاتسهرين  متاخر

: متعوده  اسهر  وحدي
تصبح  على  خير
خطوات كانت ريح  سريع
يريد  يدخل للغرفه ويسد الباب
راقبت الضوى بغرفته مفتوح يعني سهران

طلال

هيه سهرانه ...وتحلم بيه بالظلمه
واني سهران... احلم بيها بالضوى

اصابع اديه من هالگد ما عصرتهم من الحرگه
فقدت لونها... وصارت صفره بلا دم

مااگدر اتحمل هذا الوضع مستحيل
وهيه شجابرها تتحمل
ياريت باقي ميت بحساباتها ولايضيع عمرها بسببي
اطلع اواجهها بلي بيه
واخليها تلحك على حياتها

لا مااگدر هيه من دون البشر مااريدها  تعرف بالصار

صحت كل احساس داخلي... كل ذكرى.. كل امنيه جمعتني بيها ...
كل الي اجهدت نفسي في دفنه بزنزانه ظلمه...  وداستها اقدام غزاة  قذريين
اعطت ايه  قبله  للانعاش والعوده  للحياة

مر علينا الليل سهرانيين
كل واحد سهره شكل
والمنا واحد
وگلوبنا مليانه حسره... وقهر
اول مغفيت نفس الكوابيس تصحيني... ومااخلص منها الا بالقيء
والگاها  بجانبي محضره المنشفه وتگلي
( سوده عليه حبيبي )
———————————
ملاك

اكثر وقت حسيت بيه بالوحده
هو بعد زواج ايه
افتقدها. وافتقد سوالفنا وضحكنا وعركنا بالفتره الاخيره

ماما منعزله عني ...وماخذه موقف مني ...
وخاصة ان واثق ارسل ناس يحجوون ويايه بموضوع الخطوبه
وتعاركت  ويايه
وتتهمني   ان مااريد اتزوج

وكل ماارجع للبيت  تتلگاني

(ها ... فكرتي
...  ...شوكت تردين عليه

وحتى اخلص من هالاسطوانه  وعدتها  افكر مع اني كارهته مااعرف ليش ...
يمكن لان من طرف رعد

بالليله نايمه رن موبايلي

جاوبت

: السلام عليكم انسه ملاك

الصوت مااگدرت اميزه لان شبه نايمه

: منو حضرتك

: اعتذر اذا صحيتج
اني واثق تتذكريني

: منين اخذت رقمي

: مريت على المختبر وخبروني تاركه العمل
لان الوالده مريضه ..، سلامتها

: الله يسلمك ... وهسه شتريد

اخذ ميانه زايده وهو يشكي من الوحده

: ملاك ..، الوحده صعبه والغربه اصعب

واني لحد الان متامل كلمة البعدين. شوكت تصير

: يابعدين  اخويه تدري بيش الساعه

: والله ادري  ... وسهران  ...
وحتى مااعندي احد اشكيله
ممكن نسولف

: عندي دوام باجر  مو فارغه اسولف 

بين عليه الفشل من ردودي

واعتذر

: اسف لعد  : بس طلب اخير
ممكن ازور الوالده واطمئن عليها

فكرت قبل ل ارد. ورغم مااعندي رغبة  حاليا بدخول تجربه حتى لو كانت زواج
وجاوبت

: ممكن ... الجمعه العصر  تگدر تتفضل يمنا

يمكن گمز من الفرحه حسيت اكو صوت دبچه

:اشكرج ملاك ... ان شاء الله اشوفج
تصبحين على خير

وانتم هم تصبحوون على خير
واسفه على انتظاركم البارحه
وصبركم ويايه