رواية نوارس مهاجره الفصل الرابع والعشرون 24 - بقلم zeanab_almusawi

متابعي بيج قصص مروه وزينب
تقبلوا اعتذاري 💐💐
مااگدر  ارد على تعليقاتكم
لكون البيج  ميفتح عندي
اشكر تفاعلكم. وتشجيعكم
زينب الموسوي
♥️🌺♥️🌺♥️🌺♥️🌺

#نوارس_مهاجره24
#زينب_الموسوي

رعد

وصلنا للفندق اني وروان
التعب والارهاق واضح عليها
وحب الاستطلاع يدفعها تسال على كلشي تشوفه سواء بالطريق او الفندق
وكوني زرت بيروت عدة مرات
صرت مرشد سياحي  الها
اول سوال كان عن اسم المنطقه الي بيها الفندق وجاوبتها

:هذي يسموها وسط المدينه
قريبه على ساحة الشهداء
وجامع محمد الامين
والسراي الحكومي
والفنادق كلها طراز اوربي
راح يعجبج
الانبهار واضح عليها والبهجه تملي عيونها. وهيه توصف شعورها واحنا بالمصعد والعامل يحمل الجنط

: عبالك حلم  .... مثل فنادق الافلام والمسلسلات 

: بس هذا مو حلم حقيقه
فرحت بردي 
وكف المصعد امام غرفه مزينه بالورد والانوار من الخارج
وهيه اخذت مكانها بين الورد
وبكل نشاط  تاخذ صور لنفسها
وتضحك
فتحت الباب ودخلت اول وحده هيه
:
و تتلفت ...وتتفقد ..كل زاويه الغرفه بنظراتها

وظلت واگفه بالباب  ..مع ان العامل حامل الجنط ...يريد يفوت

: بيبي  فوتي العامل يريد يفوت

انتبهت. وابتعدت عن الطريق ...اقتربت من جدار. مزيينيه بالورد
واخذت تداعب الورد بايدها حتى متبين القلق ...والخوف الي هيه بيه  ...والصور مستمره
لكل ...ركن ...وزاويه

ترك العامل الجنط  بالصاله ..
انطيته الاكراميه.. وطلع

سديت الباب ...
هيه بنفس المكان 
حبيت اطمنها...  من كثير  من تصورات بعقلها

: روان  ليش احسج قلقه  ومرتبكه
بحركة باكتافها ردت بسرعه

: ماادري 

بعدت نظراتها ...لسقف الغرفه وجدرانها  ...والورد الموجود ..
وارضيتها... كانما تبحث عن مهرب

: روان باباتي. هسه انتي تعبانه  ...واني تعبان ارتاحي اليوم ..ونامي.. واكلي
وباجر  اجي  عليج عندي موضوع مهم  وياج جدا مهم ...
وبعدها...  نتفق على تفاصيل الزواج

: اوكي بس وين تروح  انت

: اني حاجز بفندق ثاني مع بام

عگدت حواجبها. وخلت اديها على خصرها وهيه تسالني

: بام شتسووي اهنا

:اني  جبتها اهنا ....تعرفين  ليش ...حتى ابعد الشبهات عنا

: لا والله تروح عدها تبات ...
معليه  متروح عدها... وتطلگها
شنو هاي... مو تگول تحبني
اني مااريد ضره
تريدني تطلگها الها

تركت لرد. لدقايق استمتع بمنظرها وهيه غضبان وتضرب الارض برجلها  وبكلمات اقل ما اوصفها ... انها اخذتني لبوابة خيال طفولي شفت بيها
طفل ضاع مني  بسبب طمع اهل وتسلط اخوان

جاوبت  عيونها الزعلانه

: بيبي اني رافع قضية طلاك
وراح وتاخذ وقت 

شكول لصديقاتي... متزوج واني الثانيه... معليه اني بطلت مااتزوج

ضحكت على كلمة بطلت

: بطلت شنو دنلعب احنا

تمشت للزاويه فيها الشباك
ودارت وجهها عني
وهيه حزينه

: روان بيبي كل الي تريديه اسويه اطلگها عند الشيخ 

بس ترى بالقانون الامريكي تبقى زوجتي لحد تنظر الدعوه بالمحاكم

سمعت كلامي ابتسمت واندارت

: خلي يفيدها القانون مدام الشيخ يطلكها بعد متعتبر زوجتك

: اثاريج قويه واني الطلعت
غرگان بيج

وبدلال   اصبح من دواعي سروري  فرضت شرط ثاني

؛ وفي شرط ثاني

؛ گولي الي تريديه

: احتاج فترة خطوبه  مامستعده للزواج هسه

: فترة خطوبه مثل متريدين
بس لاتطول

: فترة خطوبه قصيره حتى لو اسبوع حباب
حتى انزل صور... واشعار عن خطيبي..  ونتراسل عفيه كل البنات هيج تسووي

بعز حماسها واحلامها نبهتها
على الصور  متنشرها هسه وردت

: صوري بس ماما رادت الناس تعرف
وانت لازم تطلع ويايه بكم صوره ادزها لماما على الخاص بلا شعر وبلا اغاني

:
اقتربت منها  وعيني بعينها
وگلتلها

اذا على الشعر ...والاغاني
اجيبلج شعراء... ومطربي ...بيروت.. كلهم يوكفون تحت ..شباكج
يلقون قصايد.. ويطربون اسماعج
الف ليله وليله
واني اقترب

تحركت بعيد عني
ومدت ايدها حاجز بينا

: حدك ل هنا

احنيت راسي تحيه الها

: حقج  انتي  مثل الجنه ميدخلها احد  الا باذن رباني

ماافتهمت الي گلته

: شتقصد باذن رباني

: يعني لازم نعقد 
باجر  نعقد اني وياج عند الشيخ

: اوكي

اتصلت بام...  واني تعبان من الرحله فصار وقت اودعها

:اروح  اني

اتجهت للباب وانداريت عليها

: كل الي تحتاجيه موجود بالغرفه
ارتاحي ونتخابر ان شاء الله

: باي

روان

السعاده...  هذا وصف مختصر ...
وكلمه بسيطه
ل ايامي الاربعه الاولى  الي عدت عليه  بيروت
اجهل  تفاصيل كثيره عن العقد
الي عقدناه باتصال مع ماما اخذ موافقتها 
كل الي اعرفه... سعيده وياه ..
سعيده.. واحنا نتمشى بالشوارع بلا خوف ينكشف امرنا ..
سعيده واني اقيس البدلات ..والفساتين.. وهو يشكي من التعب وكل مندخل محل
يردد نفس الجمله
( الي تريديه اخذيه ترى والله رجليه احسهم انهروا من الفره )

وكم كبير من التفاصيل البسيطه ..
خلتني ارفرف بجناح حرير في سماء  الحب.. والسعاده
نسيت حتى افكر بالمرض ... وفارقتني كوابيس الموت
رجع احساسي بالحياة
وطردت كل رعب عشته...  وشفته

حددنا الزواج الاسبوع القادم
وخططنا نعمل حفله بسيطه داخل الفندق

اتصل ب ماما يوميه

بعدها زعلانه مني  ...واعرف تجاوب  اتصالي بلا علم اخواتي

صورت الها مراسيم العقد فديو

وطلبت مني وهيه تبجي
ادز نسخه منه اثبات من سالتها ليش

:
: جاوبت

:يثبت حقج ..وميگدر ينكر الزواج

خفت من كلامها  يأذي رعد ويحمله مسووليه

وغيرت حديثنا
عن  كل الي اشتريه واسالها شنو احتاج بالعرس
ترد عليه(الله يهنيج )
واحس  بيها
تتمنى تشوف عرسي  ...
بس مااسمعتها گالت هالشي

رعد

بام مقيده تصرفاتي مااطلع الا بعد متسكر.. وتنام.. متدري شديصير

هيه فاهمه هذي عطله حتى نرجع اثنينا  ...
واتصورت. تغيير من تصرفاتها
وادمانها  ... لكن الادمان بمرور الوقت يتحول من عاده سيئه

الى عاده يحببها. الك عقلك 
وهذا الي ديصير مع بام
ماعادت حتى تحاول. تترك الشرب
ومع تحذير. الاطباء الها  بخطورة الوضع على حياتها
مستمره بتفريط بصحتها. ورافضه تفرط  باخر قطره شراب في گاسها
يوگع من ايدها فارغ  وتوگع يمه نايمه
او تصرخ من الم الكبد
منظرها مقرف مؤلم في نفس الوقت

بديت اصطنع الخلاف  معاها  حتى يكون عذر لترك الفندق نهائي   وحتى تعرف  ضرورةعودتها  ل امريكا
احتاجيتها حتى ابعد عني الشبهات

رجعت لغرفةالفندق بعد يوم طويل مليان تسوق... ومشي

فتحت الباب ... بام  كانت واعيه ومتهيئه ليله زوجيه  مميزه ...
فتت تحسرت على حظي  ( شراح يفضها الليله ...
هو اني من زمان مطايقها ...
مو هسه من حبيت... وعرفت شنو يعني الدلال...  والجمال  )

وحتى  انهي هالليله. بمشهد وداع ابدي واخلص من هالتشويه بحياتي ويحمل اسمي كزوجه  مفروضه  عليه
من. ١٤ سنه
استعديت. للمواجهه بصوت عالي

: اشو صاحيه اليوم

صوتها  مبين صاحيه

: منتظرتك  في مانع

: اي في مانع متفق معاج من اتركين السكر  نهائي  نرجع زوجين

بمحاوله لخداعي. ...مستخدمه فيها   كل ماتملك  من اسلحه بقايا انوثه ... ماعادت  تطلق الاثاره  ...بقدر ماثير  الشفقه  ردت

: تركته صار يومين
انت الي مموجود حتى تلاحظ هذا الشي

گعدت على القنفه وباوعت الساعه

: هاي اني موجود... ننتظر ساعتين اذا گدرتي بلا شرب ...
اوكي نسهر اني وياج

اتجهت تغير ملابسها بعد ماثارها  جوابي
واجهتني بعصبيه

: ليش جبتني اهنا...  شنو الهدف
اذا حتى مطعم مطلعنا سوا ...
اسواق مشفت... شوارع مامشيت ...

راحت لجيب جاكيتي طلعت فواتير

وهذي الفواتير الي ماليه جيوبك 
شنو اشتريت  بيها

فاجاتني بالفواتير. لكن لگيت حجه بسرعه

؛ دافتح بزنس اهنا.. وراح ابقى اهنا لمدة سنتين ..
وانتي براحتج تريدين ترجعين
تريدين تبقين ..
حاولت  وياج مفاد ..

غيرت ملابسها... ولمت شعرها الابيض  ..وقبل لتغادر الغرفه
اطلقت تهديد

؛ راح تدفع الثمن غالي.. واي بسنزز تفتحه  يكون النصف اليه بالقانون ..

بخطوات سريعه سحبتها داخل الغرفه. وهيه تحاول تثير ضجه بممرات الفندق
وتصيح  ( اي بسنزز  اليه نصفه افتهمت )
وجاوبتها بنفس الصياح

:  الا هذا البسنز  ملكي وحدي  بيه راح استعيد حياتي ...
وشبابي 
واعرف السعاده  الي ماعرفتها وياج ..
صدگين من اول سنه زواج... واني معتبرج طليقتي
طمع وشجع اخواني  خلى
اسمي واسمج سوى ليومنا  هذا

تحولت الليله لصراخ  مابيني وبينها
: وليش متگول طمعك انت والمنصب الي اخذته
والاسهم ...والممتلكات.. الي استفاديت منها... بارباح شركتي

: كل هذا كان مقابل تعبي ...وجهدي
مقابل تحملي منظر  زوجه سكيره ...الگاها نايمه وبحضنها بطل ...
او اتصال من بار  ...
الگاج بيه واگعه من السكر
او مصحه... تخبرني هروبج منها وافتر من مستشفى للثانيه ادورج بيها ...
عمري ضاع بين سكرج ..وطمع اخواني
وكلشي اله نهايه

كانما الكلمات محبوسه داخلي
ومره وحده انفجرت بيها
ارتاحيت مجرد گلتها وهيه سمعتها

شلت ايدي عن ذراعها
وگعدت على جانب القنفه
باوعتني وسالت سوال
متاگده من اجابته

: عندك علاقه بوحده ؟

: شي ميخصج وميخص اي انسان بالدنيا
وهسه اتركيني انام ...وارتاح

: نام...  لكن مراح اخليك ترتاح ...وتشوف

طلعت هيه  من الغرفه  اعرف وين تروح  تنزل.  لعمال الفندق تتطيهم فلوس حتى يشترولها شرب
القيت نفسي على الاريكه

فتحت .جهازي على. اجمل  رسائل وكلمات طفله. بريئه هويت  بقاع حبها...  من راسي
...الى اصابع قدمي

رسائلها  تحمل بين كلماتها البسيطه
براءه ..، تثير. حتى الحجر
واثاره... ترتدي طابع خجل

:( اريد اسالك سوال
بعد الزواج تبقى  تكولي باباتي
لو ميصير ...
احب هذي الكلمه
جاوب على السوال )

جاوبتها

( باباتي  ...وبيبي.. وعمري ..وكل حياتي انتي )

صححي الاجابه

كتبت
( صفر  )

( ليش  هيج نسيتي. من كنت اصحح اخطائج  ..وانطيج درجات عاليه )

( لامانسيت
وانطيتك صفر  لان مگلت
بيبي )

رعد (اوبس)  !اعيد كتابة الواجب

؛ عيده عشر مرات. ..،ولازم تسلمه قبل منتصف الليل ...
مثل مجنت تسووي ويانا بالصف ...
شمنتكب ميعجبك

: ههههه
اشو مااعيد الا يوم عرسنا

: تستاهل الصفر لعد
وين مرتك البومه

: هههههه حلوه بومه التصيرف  الثالث لبام

: شنو يعني التصريف الثالث

: لاتدوخين راسج بيها يراد اسبوع اشرحلج يله  تفتهمين

؛ مجاوبت وينها

؛ والله مو يمي
روحي نامي ...باجر انتي عروسي ..واخاف عليج من السهر

: مجايني نوم.. ودافكر بالشقه الي راح ننقللها باجر ..
اوصفها اليه حلوه

: احلى مابيها راح يكون انتي

: بديت انغر  هالگد اني حلوه

: شوفي الجمال يختلف ...
في جمال يكون بالشكل ...
وهذا مع التعود يفقد اهميته ...
وفي جمال الروح وهذا مثل الشعله.. كل متقترب منها تشع اكثر ..
وفي جمال ماله تبرير... او سبب
وهذا يسلب الگلب ..والتفكير

: واني منو بيهن

: انتي كلهن بيبي

: شگد احب هذي الكلمه يمكن احبها اكثر  مما احبك

؛ ها يعني متحبيني اليه

: شوف اني مااعرف احجي مثلك ...لا عربي.. ولا انگليزي ..
بس متاكده.. واعرف شي واحد ..
هو مااگدر اتصور حياتي بدونك ...
اتصور راح تكون بدونك حياة بلا الوان ..بلا ضحكه.. بلا بروح

  : واني مااتصور حياتي بدونج

كلمات بسيطه

خلتني الليل كله مبتسم  ويمكن غفيت واني مبتسم

روان :

نمت متاخره  ...وصحيت من وقت على اتصال رعد

: بيبي  اصحي ..
عدنا شغل ميخلص اليوم

: بعد وكت فدوه ...خليني انام

؛ اني جاي ..ويايه شباب.. ناخذ جنط للشقه نسيتي شنو

: منسيت
وكملت كلشي بالليل ..تعال اخذ الي تريده

: تحبين اجيب وحده تساعدج

:حجزت بالصالون الي بالفندق.
مااحتاج شي  ....فقط فرقه موسيقيه..  تعزف من نطلع من الفندق

: بسيطه هذي لاتقلقين عليها

بعد المكالمه... بدت تجهيزاتي
اخذت بدلتي وحذائي العالي
دانزل .. اتصلت ماما  توصيني
وصايا الامهات بيهج يوم
وسمعتها. وگلتلها حاضر
وطلبت منها احجي ويه ملاك ... وايه
ردت
: انتظر احجي وياهن  وبعدين اتصل بيج
انتظرت عشر دقايق اتصلت ايه
حسيت بالرهبه من سمعتها
تگلي

: ها  روان شلونج ..، خو مماذيج
هذا الكلب

سكتت وهيه اعتذرت  راسا

: اسفه مو قصدي بس لان گلبي عليج
هم خايفه عليج وهم مراضيه عليج

اثنينا بجينا لحد اعتذرت منها

: اني اعتذر منكم ..، بس والله رعد يحبني  او لو ملاك موافقه  ماانهزمت

: الصار صار  واحنا الي تحملنا الناس وحجيها  وفعلا  لو موافقين. مصار كله  هذا 
عتبت وبجت وسالت

: ماما تگول اليوم تتزوجين صدوك

سوالها بيه خوف عليه
وطمنت خوفها

: اي راح اتزوج. فد شويه اروح للصالون
والبس البدله .. وادزلكم الصور

بجت بحركه. ودعتني بكلمه
(ربي يهنيج ويبعد عنج العين )

بعد المكالمه مسحت دموعي
ونزلت للصالون

فتحت الباب... في زبونات
اسالت عن بنت اتفقت معاها ...قبل يوم اسمها اريج

جاوبتني المسووله ( هلا بتجي)
كعدت انتظر. واخذت مجله من الميز امامي ... اتصفحت اوراقها
اوستوحيت منها التسريحه والمكياج الي اريده ....
كل ماارفع عيني... لازم اشوف  العيون  كل  الي بالصالون عليه ...وهنه يشوفن البدله بايدي ...
وسالني ( انتي عروس ) هزيت راسي اي
ردن ( صغيره... ماشاء الله.. يغزي العين )
المسووله عرفت متحمله ...الموقف على اعصابي بدت تحجي عن يوم عرسها ...
وكل متذكر شي ...تلتفت عليه وتگلي
( ماتخافي )  وتحول الحديث لجراءه  زايده. بكلام اول مره اسمعه. ونصفه ماافهمه
وحتى اقطع سلسلة ذكرياتهن الطويله... عن اعراسهن الاسطوريه ..
استاذنت منها البس البدله ...وبعدين تبدي تكسر شعري ...
بين متجي اريج  تعمل المكياج
وافقت  .. ولبست  البدله الي يكون شكلها مثل... حورية البحر ...
وتفرجت على نفسي بالمرايا
افتريت بيها

الفرحه  بالبدله. ... ذكرتني باخر فرحه فرحني بيها بابا
وهو يشترلي بدله ...
گعدت على طاوله موجوده بغرفة التبديل
وبجيت  عليه ...  وحسيته يشوفني ...  مثل ماحسيت بماما موجوده  وتشوفني
اخذني الحنين لشوفتهم ...
وتركت .نفسي  لهذا الحنين
بعض من الوقت  لحد اكتفيت
طلعت اواجه العيون  الي تنتظرني
وسمعت تعليقات حلوه
وبعض الموجودات صارن يساعدن  بالترتيب  وياخذلي صور بتلفوني

مرت ساعتين

بعدها جتي اريج ...وكملت المكياج
اتصلت ب رعد
رد عليه نص ساعه اكمل ال شقه  وابدل واجي ...
انتظرت لحد وصل

: بعد الشقه طلعت للفندق

روان تتصور اخذها راسا للشقه
بس اني رتبت حفله ...
بالفندق هيه متدري
زواجي من بام غلط. ...وعرسي اليوم
بمثابه البراءه من هذا الغلط
طلعت من الصالون

كانها اله ...حب ...وعطاء
او حوريه جنه  ...حطت على كوكبي في ليلة حظ  ...
او غجريه تعزف الحان على اوتار قلبي

انطيتها ايدي... ومدت ايدها  وهيه تنظر... بعيون مليانه فرح

مشينا سوا... طلعت الفرقه تعزف
... زماره واغنيه لبنانيه ( هلا بهالطليه اهلا
اهلا بالعين الكحلا )

من باب الصالون لحد
دخلنا الصاله

وبصوتها  المتفاجيء  سالتني
: وين رايحين
وبصوتي  المليان فرحه رديت
: لحفلة عرسنا بيبي

: مگتلي اشو

؛ مفاجاءه باباتي

دخلناالقاعه... ومعانا العاملين والعاملات... بالفندق 
والاغاني ...والزغاريد. اللبنانيه المميزه 
ومفرقعات الالعاب

والاستمتاع الاخرين معانا  باغاني الفرقه وركص الباقيين

صار  دوري اقدملها اغنيه
واعزفها بعودي

غنيتلها اغنية
(قولي احبك )
والبنات  الموجودات ساعدوني بالرد
وهيه تستمع وتبتسم وعندي يقين
نص الكلمات ماافتهمتها

قدمنا الطعام على الطاولات للكل

جلست مع روان على مقعد خلفه.. كوشه كبيره اضطر اغادرها مرات
حتى اخذلها صور 
حسب اوامرها
وصوره وحده الي كانت النا سوا
ارسلتها ل ام زهراء اختي
وبعد هالمراسيم  توجهنا بالسياره لشقتنا...ويحتضن فرحتنا ليل بيروت.الشاعري
وانوار  المطله على البحر تهديك
صوره مطابقه لنعيم الحب

الشقه  روان... مشايفتها قبل
ومن شافتها ردة فعلها   انحصرت بين... الاعجاب ...والاندهاش
تفتر بكل ركن  بيها.. وتصور... وتدز ل امها... ولمروه
وتگلي ..

( اهنا اخلي كتبي.. والعابي ...
واهنا  نجيب زرع لبلاب... ونخليه ينزل من الشرفه  ..ونتفرج عليه واحنا نشرب جاي ...
شتكول لو نجيب بزونه هيج حلوه بيضه  )

: ابو الملك ميقبل حيوانات اليفه بالشقق

: لا حرامات 
طيب نجيب بلابل  يقبل

: ماادري اساله اگولج

بين عليه التعب وهيه بعدها تفتر  وتخطط

:متعبتي من الفره اني تعبت

: لا متعبانه.  خلي ارتب اغراضي.. والعابي.. وملابسي

: بعدين اتركي الترتيب هسه

: اوكي

باعوتني  على السريع
واستطردت

: لعد ناكل افضل

: قبل ساعه اكلنا ...
شبيج روان ...تعالي اگعدي

: اروح ابدل  ...وارجع الك.. هسه دقايق

والدقايق صارت ساعه ونص وباب الغرفه مقفول

دگيت الباب عليها
: روان شدتسوين جوى والباب مقفول

: دابدل لحظه الله يخليك

ومرت اللحظه وبعدها لحظات

استوعبت الوضع  ( خوف وقلق )
اتركها تختار وقتها المناسب

انتظرت على القنفه اتفرج تلفزيون  وكل شويه اغفى وافز
واخر شي غلبني النوم
فزيت
وهيه تصحيني
( شنو  نمت )

: شگد الساعه هسه

: بثمانيه ليش تسال

: بثمانيه وانتي دخلتي تبدلين الساعه اربعه

گعدت اخيرا  واستقرت على القنفه

: بصراحه الملابس كلها ماعندي جراءه البسها..  وظليت ادور

: لعد منو الي اشتراهن مو انتي

: اي اني شفتهم بالمحلات عجبوني  من لبستهم  خجلت

: اي لو لابسه ومراويتني واني انطيج راي ..بكل صراحه ..وشفافيه

: ههههه اذا البسهم وانت تشوفهم لعد منين اخجل

: اي صدوك منين تخجلين احنا صرنا واحد وتلاشت بينا كلمه اني وانت

ماردت  وبعدت اديه عنها واني احاول اضمها 
وملامحها  توحي برغبتها بالبكاء

: خايفه  مو

: اي خايفه. وگلبي ديدك سريع

امام  خوفها بهالليله صار دوري اخفف هالخوف  وازيله من تفكيرها

: بيبي روان  بعد زمن ...
من تمر سنين على زواجنا ...
وتبقى ذكريات ...ليالي وايام ..وسهرات ...وضحكات ..

هذي الذكريات ...تبقى بنفسنا مثل... صندوق مجوهرات ..او ارث ثمين.. كل منفتحه وننظر  لمحتوياته ..
راح نختار هذي الليله ...اجمل هذي الذكريات ...واحلها
سواء كان  عنوانها  الخجل ... او الخوف.. التوتر

وكل مابيها   نعيشه  مره  وحده ...
وتبقى  حلاوته  عالقه بالذهن ...طول العمر

هسه شتريدين الليله يكون عنوانها

: مااعرف بكيفك

: نگول ليلة حب

ابتسمت
ماعارضت اقترابي... وانعدام المسافه بينا
ولا اصابع ايدي ..وهيه تتفقد ملامح وجهها ..
سقطت اول دمعه منها  .،،ومحيتها باول قبله على وجهها ...
تبعتها ... قبل

اسمع انفاسها على وشك الصراخ
توقفت ..وضميتها اليه
وجهها... على صدري.. ودموعها على قميصي

: اجيبلج مي

؛ لا مااريد

طفيت الاضويه وبقى ضوى التلفزيون
الظلمه. خوفتها. اكثر
بعدت جسمها عني
وجذبتها.، اليه
واني اقبلها..  وازيد.. واقترب منها اكثر
سمعت جملتها بلا وعي منها

( مستر رعد )
وايدها دفعتني

: يامستر  روان بعدج متصورتني استاذج

جاوبت وهيه واگفه ومهزومه باخر متر بالغرفه

: اي
بس انطيني شويه وقت
طول علاقتنا سوى ..افكر باللحظه  هذي ودائما اتصور صعب اتزوج استاذي

: وهسه دتكولين
ترى انتي مو اول وحده تتزوج استاذها

صارت تبجي
واني التزمت  الصمت ...
وتماسكت اعصابي ...
وحتى  متكبر  المشكله  بينا ...
دخلت. للغرفه لفراشي... احاول انام ..
مااگدرت ...
منتظر تجي يمي
وبين.. دقيقه ودقيقه.. اشوف الوقت ..بالموبايل.. لحد مرت ساعه
نهضت من مكاني صحت  باب الغرفه
؛ متكومين تنامين

: جايه... جايه

دخلت للغرفه... تدور بالاغراض لحد طلعت ...دبدوب
واجتي تنام... وهو بيدها

: شنو هذا بالله

: هذا. دولي مااعرف انام بدونه

؛ لا بالله واني شنو اهنا اذا دولي بحضنج ....
خلته على السرير  حجمه اخذ نص السرير
شلته
شمرته بعيد

: منا وجاي اكو رعد دولي طلع تقاعد

: ليش عصبي شبيك

: مو عصبي نامي.
ترى گوه متحمل

: اني اسفه  سويتك عصبي

: عادي اني غلطان  تسرعت

: قصدك تسرعت بزواجنا

وبجت

: ماقصدت زواجنا. قصدت مانطيتج  وقت
يله ياعيني اسكتي لاتبجين

: لاتگول عيني. گول بيبي

: بيبي. بعد شتريدين

مسحت دموعها  وبصوت متقطع

( اروح  اجيب دولي )

:  اوكي جيبيه امري ل الله

روان

ليلة زواجنا الاولى الخوف مسيطر عليه وماگدرت اتجاوز كونه.. مستر رعد
والصبح.. حاولت اخبي شعوري بالذنب
واكسب وقت... بين مااستوعب الزواج ومعناه الاخر  ..البعيد عن البدله.. والصالون

وجدته اول الصباح قبلي گاعد
وديبدل ملابسه

: صباح الخير وين رايح

: صباح الجمال بيبي
رايح اجيب ريوك شنو تحبين
اجيب

: انتظر  ابدل واجي وياك

: يله بدلي 
وگفت اتفرج. وهيه تاشرلي على الباب

:اطلع  اول يله ابدل

طبگت كفوف ايدي بوضع توسل
:  خليني حبابه 
حبابه  اشتريلج كل الي تريديه

جتي عليه بكل قوتها تدفع ...وتضحك ..طلعت وقفلت الباب

عشر دقايق مرت طلعت لابسه جينز وتشيرت وردي
خلت ايدها بايدي وگالت
( يله حبيبي ترى ميته جوع  )

طلعنا نتريگ ونتجول في مدينة بيروت

بيروت مدينه صغيره... بمساحتها ...
جميله في طبيعتها 
ارضها خضراء
تحتضن البحر... والجبل معا
ساحة الحمراء فيها اشهر ساحتها ...
وانت تمشي ممكن تشوف اثار الحرب... في جهه.. والاعمار والتمدن.. في جهه ثانيه
في احياء راقيه.. وفي احياء بسيطه
مدينه تختلف عن مدن الشرق ...بانها مفتوحه لكل الثقافات

وطبيعتها اخاذه.. ساحره  تجعلك تعشق المدينه وناسها
واكيد تجعل الانسان يحس بسعاده اكبر اذا كان يتمتع بالطبيعه مع انسان يحبه ...
واحنا... ماسكين ايد بعض
ونخطي... نفس الخطوات
وننظر  لبعض 
اشياء جعلتني اثمن الحياة اكثر ...
واعشق روان طفلتي الي تفتح عينها على كل الي تشوفه وتسالني واجاوبها
وكانما  الناس حولي تحيطني للتهنئه على حبنا

رجعنا اخر النهار  للشقه محملين اغراض واكياس

اول مدخلنا استخدمت التذمر من التعب وسيله للهروب

: متصدك شگد تعبانه

واني استخدمت الحيله

: اني هم تعبان ..،تروحين انام

: اوكي

دخلنا غرفة نومنا

بالسرير تكرر نفس الموقف ..،دولي جابته بالنص

اعترضت على وجود دولي الماخذ حقه اكثر مني وتمدد بوسطنا

: هسه حتى بالنهار ...
خليه هو باليل.. واني بالنهار

: مااكدر انام بدونه... والله حتى بالمستشفى.. كان ينام ويايه

: جربيني اني افضل
جربي... وهسه تتعودين عليه مثل دولي اعتبربني هوه
رضخت ل الحاحي وحتى اكسب ثقتها 

خليتها بحضني  واغنيلها
( گولي ياحلو منين الله جابك
خزن جرح گلبي من عذابك ) واغاني ..تتبعها.. اغاني حتى تنام
وماادري اذا نامت او ادعت النوم
المهم تخلصت من دولي

———————————

ايه

بديت بوظيفه جديده... في مكتب هندسي.. مع شباب اثنين مهندسين عراقيين كلدان... في منطقه تبعد عن ديربون ٢٠ دقيقه ...
مجرد مكان انهزم بيه من كلام الناس ...وحجيهم

وملاك كذلك تركت العمل بالمختبر  ...واختارت ساعات عمل اطول للعمل في المستشفى ...
بقت ماما هيه الي تتصدى لقصص الناس  ...
وكأن العالم فرغ من الاحاديث ....مابقى الا  الحديث عنا

المشاجرات اصبحت لغة حياتنا
بالبيت ...
الشجار بيني... وبين ملاك
بين  ملاك  وماما ...

وانداري الملامه الي بگلوبنا ...ونمنعها  تصير على اللسان
غلطنا وياريت وافقنا على زواجها
اول سوال ينطرح علينا من الناس وين منروح
( وين صارت روان )؟
ونجاوب باستحياء ...
راحت ( شهر عسل ابيروت ) (وبعدها تعيش بكليفورنيا مع رعد )

ومواجهة الناس خلتنا  نختار الانعزال عنهم ....
ماعدا.... ام كوثر وعائلتها بقت  تزورنا  وتسال علينا

وتفرجت ويانا  على صور
روان دزتها   لماما... مع رعد
سعيده بدلة العرس ..والتسريحه والمكياج ...

وبصراحه اغبطها على  ضربها
عدة اعتبارات  ...وسعت لسعادتها

الصور اثارت حفيضة ملاك من رجعت للدوام.. وتفرجت الصور  وهددت... وهيه تشوف ماما استعادت جزء من اطمئنانها
على روان

اخذت موبايل ماما وتفرجت وهيه  تشكك بحقيقة الصور

: ومنو يكول اتزوجها يمكن
قشمرها. بدله.. بلا عقد.. وحتى مطالع وياها بالصور

واندلعت النقاشات الساخنه من جهة ماما وجهة ملاك

:  روان دزتلي فديو العقد والعرس و  الولد طلبها مني بلحلال انتي الي عارضتي واخذها غصبن ماعليج

: ها هسه صارت غصبن ماعليه مو   انهزمت  وتزوجته  غصبن ماعلينا كلنا

واني اتدخل  حتى انهي النقاش

: كافي  من  هالنقاش  العقيم
البنيه  تزوجت  وخلص  والناس حجت ونست
خلي نسوي  شير للصور خلي اصدقائنا يشوفون

كلامها  كان موجهه اليه

: اصدقائنا..  لو انسان معين ..
قافل تلفونه من يوم  العقد

صح الي گالته حقيقه بس تجرح

: شبيج ملاك  ليش هيج صايره متراعين مشاعري من تحجين ويايه

: لان انتي وماما... نسيتن الي سواه رعد بينا   وفرحانات بصور نسيبجن
وسبق وقسمت الا ادفعه الثمن غالي ...

تغيرت نبرة صوتها  وهيه تدوس على الكلمات باسنانها  وتهدد

اگدر هسه بهذي الصور اسوي القاء قبض عليه.. واجيبه مذلول.. وخلي يخلص شهر العسل بالسجن ..
بس .لا منتظره. انتقام .اكبر 
الخاتون روان.. ناسيه بعد سنه اذا مارجعت ل امريكا تلغي اقامتها ..
ورعد باشا.. يرجع لهنا.. ويعوفها تگدي   بيروت ..

ماردينا عليه. وماما صاحتني يمها  حتى تسالين على طلالد

:گوليلي  رجلج. ليش .ميتصل ..ومايسال

من قهري ضحكت

: رجلي!  لاتضحكيني. يمه. فدوه
شوفي الرساله الي كتبتها اله صار اسبوع ...ومافاتحها
انطيت ماما. الجهاز .تقرا الرساله

(  الله يخليك جاوبني
محتاجتك  ..ظروفنا بالبيت صعبه ..
روان تزوجت.. وتركتنا..  سافرت . ويه استاذها. لان. تحبه
والله. احسدها  وعفيه. عليها
جاوبني. انت
اني شوكت اخذ الي احبه
بس جاوبني اريد احد يسمعني
ويجاوب سوالي
شنو النهايه بينا ؟)

انطتني التلفون  واخذتني لحضنها  واحنا نتحدث

؛ انتي تعرفين عنوانه..

: اخر مره گال اريد انتقل لشقه جديده بس مااصدگ يمكن رادها حجه ياخر الزواج

:لعد هاي الجمعه  اذا مابين خبر منه  نروح اني وياج عليه
يجوز مريض.   يجوز صار  عليه قدر

: اسم الله بيا  اني ولابيه

ملاك سمعت حديثنا وحبت تزيد ناري حطب

: والله بطرانه وبعدها تصدگ بالحب ..
لج  هسه  طلال  ويه  وحده  شابه عمرها  ١٧  ١٨
جسمها  طري  رياضي  غض
تلگيه  بهاووي  او جزر  المالديف
وانتي  راكنج  احتياط

: هسه هاي شحجي وياها ..
يمعوده.. انتي احد دازج تغثيني ..
كافي مو موتينا

تركت الصاله ورحت لغرفتي
اتصل وادز رسائل  وابچي مثل المعتوهه

———————————-

طلال
فتحت.. موبايلي رسائل.. من ايه
تشتكيلي ..وتشكيني

اتصلت بيها..  الساعه تسعه بالليل ..
رن الموبايل.. ورن ..متجاوب
انتظرت.. ربع ساعه ..واتصلت مره ثانيه
جاوبت

: الساعه تسعه  وانتي نايمه

: شنو اليوم حلمان بيه حلم واتذكرت
قبل لتبدي بالعتاب اخترعت عذر

: اعرفي السبب وبعدين عاتبي

: السبب معروف ممقتنع بالزواج
گولها. ..ليش تتهرب

؛ وتلوميني من اتعصب واسد الخط بوجهج
شمدريج ..ممقتنع ..وشنو اني جبان.. واحد يجبرني على الزواج

: على كيفك  شدعوه

: خليني احجي  ولاتقاطعيني

: تفضل احجي

: خسرت مباراه  وتكسرت وجهي

شهگت وهيه تگلي
: يمه اسم الله عليك حبيبي

: خليني اكمل
وجهي وارم  ..وانضربت ضرب  بعمري..  مشايفه
اليوم يله شفت دربي واتصلت بيج

: طلال ليش متترك هالشغله هايه.. انت مهندس  وبعدك شاب تگدر بكم سنه تعادل شهادتك

: ايه اتركي هالموضوع ترى اسد التلفون

رجعت  تلح على نفس الموضوع
:اترك المصارعه

: ماعندي طولة بال ايه لاتلحين
ومااكدر بدون.. ضرب.. ودم
الا اذا تريديني امارس الضرب والعنف عليج من نتزوج

: ليش احنا راح نتزوج بيا قرن

:والله اذا ماعضيتي اصابعج كلها ندم  عاتبني... لج اني مو مال زواج ..
وراح اخذج حتى تعذريني ومتگولين عليه نذل وهاي داگلج اني ماانفع زوج

: ليش. جاوبني

الفيوزات ضربت عندي كلها من الحاحها واسئلتها وردت انطيها نبذه مختصره عن مستقبلها ويايه
وصيحت بالتلفون حتى تسمع
:
:اني  مريض  زين  ارتاحيتي مريض 
حولوني حيوان  مااگدر اصير زوج  من هسه اگلج راح تتزوجيني وتبقين عازبه اوكي افتهمتي

ايه : افتهمت  وراضيه
المهم اعيش وياك. وابيتك
واشوفك  واطبخلك 
اغسل  ثيابك  وك حتى هاي حلمت  بيها  وتمنيتها

: لج طاوعيني  وخليني اطلگج  و
سمعت الكلمه سدت التلفون

فار دمي. ماادري ندمان على الكلمه لو من سدة التلفون
شلت ميز زجاجي وضربته الارض 
اريد اكعد  مااگدر احس نار  تصهر بيه
ومتاكد نفس النار صارت بيها
واگدر اتخيلها. تبجي

اخذت التلفون  ودگيت ماجاوبت
احس اعصابي الي كتبتلها رساله
مو اصابعي
( جاوبي هسه لا والله اسويها )

دگيت شالته

ماحجيت وهيه ماحجت
طولت السكته ثواني 
واختارت هيه العتاب
بكلمات  تشكي مني اليه

( هان عليك تگولها )
وشگيتلها

: تعبان ايوته شگد  متتصورين

: احجيلي شنو الي متعبك ياعيني 
: انتي من دون البشر مااگدر احجيلج
تعرفين اني وانتي مثل السما والگاع  واحد يشوف الثاني بس ميوصلون لبعض
حتى لو عشنا سوى راح نبقى بعيدين

: طلال انت حابس نفسك بزنزانة الالام زالت وراحت
صح اني مااعرف معاناتك الي عانيتها لكن الانسان ماطول عايش  لازم يحاول  جهده يكون سعيد. ويترك البكاء على ماصار
شمدريك الجاي شنو

: ماادري شگلج  بس لاتتفلسفين براسي
كلها كم يوم ونتزوج  وساعتها خلي فلسفتج تفيدج.

ماهمه الكلام الي گلته غير جملة نتزوج

: طيب  اخبر ماما
لان فكرنا نجي عليك نشوفك وماما حست انت مريض

: خبريها. من تخلص المكالمه
احجيلي على روان صدوك تزوجت

: بلي تزوجت استاذها... حبها وخطبها ..واحنا بوقتها... مصدكنا يحبها 

:اخذنا لحديث لفكره انتقل لديربون

:  ليش متجي لديربون وتعيش ويانا

: اعيش وياكم وليش مااشتري بيت شناقصني

: مناقصك شي حبيبي ان شاء الله اذا تزوجنا ننتقل اهنا واشتري البيت الي يعجبك

:  بعد مقرر هالقرار... ديربون مشاكلها هوايه ..، والعرب عدهم تفرقه بين بلد وبلد

: : يعني مو كل العرب بعضهم

استمر حديثنا. ساعات
الحديث.. مع ايه يشبه النظر لماء  الماء الصافي... وانت صايم
يعجبك منظره. وتتمنى يرويك

وتدرك مجرد اقترابك منه..  يعكر صفائه... ويحوله عدم  ويحملك ذنب

ياريتها  تنقذ نفسها وتاخذ المركب الابعد عني
وتبحر  بعيد بعيد
وترسي مرسى امان
وتختار الحياة بدل الشقاء
تختار زوج واطفال وبيت
ياريتها 

بيوم راح توگف بمواجهة نفسها
وتعرف اختارت سراب
وهذا اليوم لحد يجي عليه
اقرب قدومه وادخلها حياتي زوجه
لتكتشف اتزوجت ميت 
مات من ثمن سنين 
وهيه الي رافضه تصدگ حقيقة موته
منحتاج جنازه وقبر حتى نومت
يكفي قتل   الكرامه والانسانيه بينا

بعد اسبوع من اتصالي بيها
بديت اجهز  غرفه نوم ثانيه بشقتي

وتقدير للحرمان الي راح تشوفه بهذي الشقه  ... حرصت
  تكون غرفتها  مريحه... الوانها متتاسقه ..
فرشها جديد ..
مازلت اتذكر ذوقها  وشنو تحب وشنو تكره
متحب الاضاءه العاليه بغرفة النوم ...
و التحف الي على شكل حيوانات..  والساعه بغرفة النوم تزعجها
الوانها المفضله الفاتحه الابيض والبيج

تحب اللوحات الخاليه من الوجوه

بعد غرفة النوم جهزت المطبخ ايه شاطره بامور البيت والطبخ

وغيرها من التجهيزات الي انشغلت بيها حتى ااخر كم يوم
على امل تتصل بيه وترفضني

هالاتصال ماصار  والرفض ماسمعته منها

واخر اتصال اتصلت بيها قبل زواجنا
سمعت الفرحه بصوتها وهيه تحجي ويايه
وحسيت الامل واللهفه بداخلها
وهيه توعدني. متريد شي
فقط نكون سوا

وسمعت  مني اخر تحذير من   للي ينتظرها

  ؛اويلي عليج ايه بعدج تحلمين بطلال الشاب الي عرفتيه  بكليه الهندسه
لج مابقى منه شي لج والله مات

شگد حاولت اثنيها عن قرارها ماگدرت ومتفائله ل ابعد الحدود
: لاتحاول  تحرمني فرحتي
وگلي شلون تصير زفتنا

: اجي باجر  لديربون
ونتفق

: اوكي حبيبي انتظر  باجر
ومراح انام لحد يطلع الصبح