رواية نوارس مهاجره الفصل الخامس والأربعون 45 - بقلم zeanab_almusawi

#هذي تعتبر تكمله للبارت السابق
رقمته ٤١ حتى ميضيع بالنسخ
وغدا بارت النهايه
اليوم مگدرت اكتب
اعتذر منكم

نوارس_مهاجره41
#زينب_الموسوي
في محاوله يأسه اخيره غمضت
عيوني وانتظرت شويه ..
فتحتهم النتيجه نفسها
اعمى

حسيت بدوار. وصداع قاتل على وشك يفجر راسي

توقفت الاسعاف . وعبثا حاولت. اندل طريقي
مگدرت .... انفتحت باب الاسعاف سمعت صوته
وشخص ناداني

: سيدي انطيني ايدك

الكلمه صعبت عليه ... وجربت اطلع لوحدي بدون مساعدة احد .. احرك اديه حتى تدليني الطريق ... بلا فايده

اخذ ايدي المسعف وهو يشرحلي الطريق

: امام امام : اعبر الدرجات
امامنا ابواب. توقف لاتصدم بيها

كل كلمه اسمعها تجعلني اشعر بصعوبه الوضع .... واتشبث بامل اخير هو انتظار الفحص وكلام الدكتور

الدكتور الي كان سابق وجودي للمستشفى .. مجرد دخلت غرفه فاجأني صوته

الدكتور : طلال اني دكتورك ....
تألمت للحادث ... وارجوك تهدأ ومتفقد صبرك
الحلول كثيره ومتاحه .... فقط تخضع حالا لفحص ونقرر العلاج ...
كن قوي

كلمات زادت شتاتي ...
الهاتف يرن ... اخذته وقدمته للامام.
الممرضه حسب مااعتقد هيه ممرضه گالتلي
اساعدك بالاجابه عن التلفون

: فقط اقري الاسم

: مكتوبه بالعربي اسفه مااعرفه
انقطع الاتصال .....

بعد قليل .
شخص تحدث عربي معي

: اخي تحب نتصل باهلك

: هذا تلفوني اخذه واتصل بشخص اسمه واثق
واني احجي وياه

:حاضر

خذت الهاتف مني ورجع خلاه بايدي

تفضل اتصلت

سمعت الهاتف يرن
جاوبني ملهوف وقلق

: الووو طلال وينك يااخي
شغلتنا عليك

: انت وين هسه

: بالمحكمه مع رعد منتظرين تخلص اجراءات اطلاق سراحه ....

: واثق اذا البنات يمك ابتعد شويه اريد احجي وياك ومااريدهم يسمعون

: البنات راحوا للبيت .. قلقتني شكو
: تعرضت لمحاولة سطو
وارتطم راسي بالباب وهسه بالمستشفى

: يعني متاذي راسك

: مو راسي انما فقدت البصر . مااشوف اي شي

: يمعود گول غيرها شنو متشوف

. واثق تعال عليه ومااريد ايه تعرف

: جايك بس مسافة الطريق
لاحول ولاقوة الا بالله
يعني ماصدكنا فرحنا شويه
اجاتنا هالمصيبه

: فعلا مصيبه

اغلقت الهاتف.
والممرضه طلبت مني تغيير ثيابي

: ممكن اتركيني اغير لوحدي

: ممكن راح اترك هذي الصدريه على يمينك
وبالجانب للصدريه في حزام تربطه
وبعدها ناخذك لغرفة الفحص

اختفى صوتها وسمعت صوت الباب نفتح وانسد

غيرت ثيابي ورتبتهم على السرير .. وخليت موبايل. ومفتاح السياره والمحفظه بالجيوب
وانتظرت .... بداخلي صرخه حابسها لحد اعرف نتبجة الفحص .... والالم من الهدوء والعتمه امامي يكاد يفطر گلبي
والسؤال الاكبر بداخلي هو ...
ليش اني ؟

انفتحت الباب .. تصورت الممرضات ...
سمعت صوت واثق .. ورعد

: ها طلال صدگ جذب

: سلامتك طلال شنو هالخبر

: ليكون ايه عرفت

: لا معرفوا شي

: اني اتصلت بملاك وخبرتها تلفونك عاطل. وعندك شغل لان ايه قلقت عليك

: احجيلنا شصار

حجيتلهم الحادث وكيف ارتطمت . . الكلام يطلع من لساني احسه نار تلهب جواي ..
كلمة عميت خلتني احس بالذل .. الي مااتخلصت منه الا بشق الانفس....

سمعت منهم كلمات تشجيع ومواساة زادتني حزن ....

بعدها دخلوا الممرضات والدكتور
طلبوا مني اكوم واگعد على كرسي متحرك ... كمشوا اديه
واثق ورعد وگعدت على الكرسي
وماعرفت منو دفعني لغرفة المفراس
ساعدوني الممرضات بالصعود
وتمددت ودخلوني للمفراس
افكر بحياتي وبالنتيجه ... بردة فعل ايه الي يادوب اخيرا ارتاحت من زواجنا ... راح ترجع للدموع والقهر ....
ضاق نفسي عبالك داخل قبر

خلص الفحص وانتظرت النتيجه بغرفه ثانيه ويايه رعد واثق

انفتح الباب والدكتور گعد قريب مني حسيت من كلامه هوه قريب وحجالي ااوضع

؛ طلال الضربه سببت اتلاف لمنطقه فيها اورده دقيقه
وماعدنا خيار غير الجراحه
وبسرعه

سكتت واثق الي ساله

: الجراحه. ناجحه دكتور

: هيه ناجحه لكن الاورده تحتاج وقت حتى تستعيد حملها للدم

سالته ( كم الوقت يعني )

: مااگدر احدد بالضبط لكن مو اقل من تلث اشهر

: واحتمال اكثر ها دكتور

ربت على ايدي وهو يكول

: مجرد وقت وتستعيد بعدها بصرك
الكل سكت من هول الامر
والدكتور الي بقى يشرح
ومن انتهى طلب احدد موعد عمليه

: دكتور زوجتي حامل مااريد ابني ينولد ومااشوفه

: اذا لابد نستعجل بالعمليه

: باجر. ممكن

طلب يدقق مواعيده ويرجع الخبر
طلع هوه ورعد واثق يشدون من عزمي

:خليك قوي ايه خطيه اذا شافتك مهزوز احتمال تفقد الطفل

: اكثر همي هيه. وامي الي راح توصل تلگاني اعمى

الدكتور حدد العمليه الساعه ١٢ الضهر باليوم التالي

اخذوني واثق ورعد للبيت
ورعد يسال

: شراح نگول
واثق اقترح ياخذوني للمزرعه ومنگللها لحد تخلص العمليه

: لا اروح يم ايه. متاكد هيه الي تقويني وتشجعني

اختاريت اللجوء ل ايه تخفف عني مثل كل مره
نزلوني امام البيت ورعد لازم ايدي
جتي نوارس تركض عليه
وبعدها سمعت صوت ايه

: طلال شبيك شصاير

وايدها لزمت وجهي وهيه تسالني
: طلال تشوفني

: ايه الي صار صار اذا بجيتي وانهاريتي راح تاذيني وتزيدين قهري الله يخليج ارحمي بينا اثنينا

اخذت ايدي وهيه تحبس رجفة صوتها

: ماعاش الي ياذيك
شده وتزول
احجيلي شصار

طلعت امها وملاك. وحجيتلهم شصار
وبجووا اسمعهم الا ايه
ماسمعت منها غير كلمات شجاعه

: سلامتك ابو ايوب ... عيوني گدامك اشلعهن الك والله
لاتهتم اصيرلك عيون
احنا بامريكا. العلاج متطور وشنو يعني تلث اشهر

: يعني ايوب ينولد مااشوفه مااشيله
يلگاني اعمى

زداد بجيهم وهيه وياهم هالمره
بجت وهيه تخبي راسها بصدري