رواية نوارس مهاجره الفصل الرابع عشر 14 - بقلم zeanab_almusawi

#نوارس_مهاجره١٣
#زينب-الموسوي

—————————
ايه

حياتنا مليئه بالاخطاء
رغم ادعائنا بكمالها
واحد من هذي الاخطاء على وشك ارتكبه

صار اتصالين بيني وبين موفق
طلبت منه يشتغل ويترك الاعتماد على المساعدات
ويحاول يتعلم انگليزي

: بسيطه  راح ادور على شغل
واتعلم انگليزي وبعد منتزوج انتي تساعديني

: بناتك اني شفتهم حبابات شتحب يكون دوري

: علميهن وصيري امهن

:ان شاء الله

وحبيت اعترفله بكلشي عني
يمكن محاوله مني  حتى اخليه يغير رائيه بالزواج مني

:بقت شغله مهمه لازم تعرفها
اني بالعراق كنت عاقده شيخ ومحكمه
لشاب ( تحسرت ) كان ويايه بالكليه
ومات الله يرحمه

الكلمه مهانت عليه اگول عنه مات

: يعني عندج علاقه وياه قبل ليعقد عليج

رغم طريقته السخيفه بالرد تحملت وجاوبته

: علاقتي وياه كانت محترمه ماغلطنا بحق بعض
لو شاف عليه شي ماتقدملي وارتبط بيه

: يعني جنتي تحبيه

(منين اجيب گلب يتحمل دمه الثگيل )

ودي اگله ومازلت احبه

: بلي احبه

: مدام هيج لازم اني افكر واردلج الجواب

: حبيت انطيك علم ليگدام
وشي ثاني لازم تعرفه ان سبب تاخري بالزواج هو حزني عليه

رفع صوته عليه

: لا هاي قصة عشق وغرام

: اني صريحه وياك وانت بكيفك

انهيت المكالمه
عاملته بكل صراحه

تقصدت يعرف علاقتي السابقه بطلال
وادري هدفي كان محاوله اخيره
انطيه  سبب يخليه يرفضني
وارجع لحزني على طلال
بقى فقط الحزن يربطني بيه

——————————-

ملاك

رجعت روان من المدرسه
شمرت الجنطه على الارض وگعدت على اقرب قنفه وهيه تنفخ
اجيت يممها اسالها

(شصاير )

بصوت عالي ودموع محبوسه عرفت  عدها امتحان

: معليه اليوم تشرحولي فيزيا ولازم اخذ B

ايه تنصلت من الشرح والتدريس

: والله اني ناسيته مااتذكر شي

: اني احاول اتذكر واشرحلج بس خلي ناكل

بعد الغدى كعدت  وياها بالغرفه وسدينا الباب
لزمت االكتابه
مااگدرت اوصللها الفكره ظلت تبجي

: لاتبجين
اتصل بمروه بلكي تجي تساعدج

:  مروه يشرحلها اخوها

اجى ابالي اتصل ب رعد

: شنو رائيج اتصل برعد يشرحلي واني احاول افهمج

ضمت راسها باديها وكملت بجي وحجي

: هو مدرس انگليزي مو فيزيا

: بس اكيد يتذكر شي يفهمني واني افهمج

مسحت دموعها ولمت دفترها وكتابها

: اتصلي بيه يجوز يساعدني

: راح اتصل بيه
رحت للغرفه وسديت الباب اخاف روان تسمعني اگول كلمه زايده
واتصلت جاوب

: ممكن تساعدني بامتحان
روان

بلا تردد رد

: ممكن ليش لا

: انطيك العنوان  لو تعرفه

: انطينياه

انطيته العنوان  وغيرت ملابسي
خبرت ايه  المتغطيه بالبطانيه
وعلى وشك تنام والساعه بعدها مصايره بالخمسه

: اگلج عيني البنيه اخاف تصقط وانتي محتاره بالحب

: لا شنو حب راح يشرحلي
واني اشرحلها

: والقران صقطت البنيه
اني اروح انام احسنلي
جرت البطانيه ونامت
وقبل لا اطلع صاحت طفي الضوى

———————————
رعد

وصلت البيت روان
اريد ادخل لبيتهم من زمان
واعرف تفاصيل عن هجرتهم وحياتهم
واريد اعرف شنو سبب العلاج الي تاخذه روان ويخليها
دايخه
اهتمامي بيها خرج عن حده
واجهل اسبابه
ويوميا انبه نفسي
( لازم انتبه
الطلاب اخاف يلاحظون
هذي طفله واني استاذها )
وغيرها من الاحاديث القيها على نفسي
وتابى الانصياع

استقبلتني ملاك ورحبت بيه دخلت للصاله
وتفقدت بنظري البيت
مرتب رغم اثاثه قديم
والبنات عدهن حس فني واضح باختيار اللوحات  والستائر
والاضاءه 
حسيت براحه داخل بيتهم

دخلت روان لابسه ببجاما وردي اديها بجيوبها
وشعرها رافعته كله
وشكلها  صاحيه من النوم

رعد تعالي روان اگعدي يمي
شنو الي مافاهمته

خجلت تكعد قريب
گعدت بالطرف البعيد عني
وخلت الدفتر قريب مني
وهيه تاشر على الماده

: هذا الفصل ولازم اخذ B
ودمعت عيونها
افهم دموعها الماده صعبه على طالبه متفهم انگليزي
حاولت اهديها

: بلا دموع وانتبهي عليه
مسحت دموعها وهيه تسمعني احجي بجديه وياها

:مستعد  اعيدلج مرتين وتلاثه
وعشره بس اسمعج تحجين انگليزي
انتي هسه طالبه تاسع  لازم تحجين ياباباتي
ميصير تظلين ساكته

باوعت على ملاك واضح تخاف منها هوايه
وردت

: اوكي احجي انت مستر  واني احجي بعدك

قاطعتها ملاك

: تحب اشارك معاكم واشرحلها بالعراقي

وحتى اخلص روان من الضغط النفسي لكون ملاك تراقبها
وبلباقه تامه طلعتها من الغرفه

: لاتخافين اني عراقيتي قويه
انتي عليج تسوين جاي

: مو تدلل

طلعت من الصاله

بديت اشرح لروان واصر تستخدم المصطلحات الانگليزي ....
تخاف تغلط... وتتردد بس بعدين تكولها  من اضغط عليها
واعلي صوتي

استغرق الامر ساعات

ملاك انشغلت بالمطبخ هيه والدتها دعوني للعشى
ومارفضت

منهمكه بحل مسائل
الي انطيها
راقبتها
وهيه تحل
وتجولت عيوني بملامحها العراقيه
مع  برائتها الممزوج بقليل من الاثاره
وسرحت في عالم خيالي

(اروع مافي الجمال
حين يكون مثيرا
ببساطته ...
اخاذا ببرائته ...
يقتلع الادراك ويجردك من الحذر ...
مثل رصاصه مقصوده
تبعثر  عقلك قبل ان تخطف روحك )

صحيت من استغراقي على صوتها

: مستر  صححلي

: اشوف بالله

شفت حلها صح
تعاريفها مضبوطه... واخطائها  الاملائيه  كثيره

: بس كم خطا املائي بالليل عيدي املاء كل كلمه راح اخلي عليها خط
وجيبي الورقه الي تدربين عليها اشوفها

: حاضر مستر

: عفيه ببنيتي الشاطره
اصلا باجر تاخذين A

: يارب 
والله شايله هم

مرات انتبه عليها تردد كلمات مو لعمرها.

: انتي صغيره على الهم بابا عيشي حياتج

دنگت وبجت

: على شنو تبجين يابابا
انتي بامان
  والله الي يحمي مو الانسان

گوليلي شنو تتذكرين عن بابا

رفعت عيونها للسمى وهيه تتذكر
: اتذكر البدلتين الي اشتراهم اليه اخر يوم من عمره ...
واتذكره من حضني حتى يحميني من الاصابه گال... روان بابا

: الله يرحمه
عادي اذا اگولج بابا لو تضوجين

: لا مااضوج

غيرت الموضوع لان عيونها صارت حمره. وجهها اصفر

: حفظتي القسم بالعلم

: حفظته اسمعك

: يله سمعيني

سمعتي القسم
لفظها بيه اخطاء ...
لكن حماسها بالالقاء
بعث. داخلي
امل بمستقبلها

——————————-
ملاك :
بعد العشى طلع رعد من البيت
وبقينا اني وماما بحديث عنه
واني امرغ رجليها بدهن الاعصاب بغرفتها

: مبين خوش انسان
متزوج لو لا

: مااعتقد متزوج. روان تگول سامعه من البنات عايش لوحده بشقه

: الله يوفقه زين من عنده يساعد روان  بدون مقابل

: اي هو يحب يساعد

ورا مسكتت فاجاتني بخبر غير متوقع

: موفق امه خابرت باجر تجي نتفق على العقد

: ها
اشو مگلتي

: نسيت اكول حتى ايه نامت بدون مااگلها

: خطيه ايه شگد تحاول تبتعد عن ذكرى طلال  وكل مره تفشل

جرت ماما حسره  ومن كلامها عرفت تريد اتمم  زواج  ايه لان مقهوره على حالها

: مرات افز بالليل
اسمعها تبجي  وهيه بفراشها انقهر  عليها. وج  هسه يمكن امه نسته  وهيه ابد  صاير  عدها مثل المرض اسمه طلال

: بلكي موفق يطلع خوش رجال ويسعدها

ا : ان شاء الله  يله انتي هم. روحي نامي  ....ارتاحي

تركت ماما...  ورحت لفراشي ...اطلق العنان ل احلامي

الصبح راحت روان للمدرسه
صحيت ايه وخبرتها على الخطوبه

سمعت الخبر  لبست وجهها بالمگلوب

: اشو اني ماادري

:اذا انتي بس نايمه طبعا متدرين

وگفت بنص الغرفه  وهيه تدور على حجج حتى تتراجع وتخلي شروط  وهيه تطوي الغرفه ...ومدنگه. وتفكر وتحجي
واني انظرلها  ومشفقه عليها

: مااريد مهر وحفله
ومااريد بدلة عرس

: ليش ياستار

: مااريد امحي ذكريات المهر  مع طلال .....
والبدله لبستها گباله
ماالبسها لغيره ...
اشتري فستان... كوستم ابيض ...اي شي

اخذت ايدها  وگعدتها  ... حتى تهديء

: ايه هذا زواج ....
وموفق هم بشر ....
عيشي ليلة عمرج.....وانسي المات
استسلمت للدموع والاوف
: اووووف
شگد تمنيت زفتي تكون اله
گلبي يعصرني ....
مااظن اگدر اتزوج غيره

: تلعبين على الناس انتي
گومي غسلي وبدلي
ماما اذا سمعتج  تزعل منج

بكل ضعف  وقلة حيله لجئت لصدري تبجي وتگلي
( شاسوي ملاك ....شاسوي)
اخذتها بحضني
وماتركتها لحد سكتت

وظلت الغصه ملازمتني طول اليوم عليها 
قصتها مع طلال اذتها حيل
وبداخلي خوف ليكون موفق نكبه جديده بحياتها

خلص دوام المدارس اجتي روان فرحانه وبيدها ورقة الامتحان تلوح بيها

: ها بشري

:روان +B

: فدوه لعمرج عفيه بالشطوره

خليني اتصل برعد واشكره

: عفيه وگوليله باجر يساعدني اكتب. (مقاله )

دخلت للغرفه واتصلت بيه

جاوب راسا  .....تمددت على السرير ... واني اسمع جملته الاولى

: انسه ملاك  إأمريني ملاكي

سمعت الكلمه افتر عقلي

: اشكرك استاذ على مساعدتك روان

: مااقبل بالشكر  ولاكلمة استاذ
اني اعتبر نفسي صديقكم  والمساعده بين الاصدقاء واجب

مثل الغيبوبه تسيطر على عقلي وگلبي من اسمعه وارد عليه

: مدام اصدقاء لازم نقدملك شي بالمقابل

سكت وهو يگول اممممم
وبعدين جاوبني

: الجو بارد
وبالعراق بهيج جو يسوون لبلبي
اعزموني عليه

: تدلل من عيوني
احلى لبلبي اسويلك

: تسلم العيون وصاحبتهن

خلص الاتصال
الجدار الي امامي تغير لونه بعيني
شفت كلشي وردي
من يوم شفته
رجعت دواليبي تنملي فساتين ....
وعطور ...
وطلاء اظافر ...
غفت بروحي كلماته
وصحت الانثى داخلي

طلعت للمطبخ اسوي لبلبي
وايه تستعد لجية ام موفق
الي وصلت قبل الموعد بساعه

اني فتحتلها الباب ورحبت بيها
وصحت ماما  گعدت يمها

ودخلت اشوف ايه
اتصورت الگاها مبدله او مكيجه
لگيتها بنفس التراك وبيدها كتاب تقرا

: المره وصلت.... وانتي بعدج ممبدله

ردت ماكو داعي وطلعت بنفس الهيأه والكتاب بيدها
واني صافنه من تصرفاتها

ماما وام موفق گاعدات على قنفه  وايه سلمت وگعدت گبالهن

وبدت شروطنا... وشروطهم

ومن كلام امه تصورلي مستهينين ب ايه

: بصراحه ابني ماعنده امكانيه
لعرس وحفله .....
يگول عشى بسيط.... وكم شخص من طرفنا ومن طرفكم

تصورت ايه متقبل ردت قبل ماما

: افضل
واني مااريد لا حفلة مهر ولاحفله...ولابدله

سمعتها ام موفق كيفت

: الله يرضى عليج ابنيتي
على شنو المصاريف الزايده

ماما ساكته وايه تحجي بالتفاصيل الي لايمكن تكون تفاصيل عرس بل دفنه

: العقد يجيب الشيخ .....
وبعدين نعقد محكمه

ا: باجر العصر   يجي هو ....ومحمد... واني ....وتعقدون

بعد هالحجي امه اتصرفت شي ثار شكوكي حول هذي العائله
حسيت في حيله بالموضوع

طلعت من جنطتها

ذهب  وگالت مشتريه وانطته ل ايه

: هذا الذهب اشتريته قبل مده من وحده محتاجه ....
بعده جديد ....شوفيه وخلي عندج حتى تلبسيه باجر

بواعته ايه وانطته ل ماما

اخذته ماما وطلعته من كيس
الذهب مطعج. وهو عباره عن اسوار  وسلسله قصيره وخفيفه ومحبس
وهيه تباوعها

: بشگد صار عليكم حجيه  مبين قديم

تاخرت بالجواب

: تقريبا ٥٠٠٠دولار
والذهب دخر مايهم اذا قديم او جديد
انتقلنا بالحديث عن المهر

: والمهر حجيه شگد يكون

: اني اگول ٥٠٠٠دولار
ولموخر عشره
والغرفه موجوده

:  على بختج داده وين اكو مهر ٥٠٠٠ يمعوده كولي غيرها

صوتها مليان مسكنه وحيله
وهيه تتوسل ب ماما

: اني گتلج  ماعنده امكانيه  اعتبري ابنج شتكولين

انعقج وجه ماما وسالتها عن الغرفه

: الغرفه جديده لو مستعمله

: ياداده هو من يگدر على الجديده هسه
قابل احنا صارلنا عشر سنين اهنا
يمشوون حالهم بهذي وبعدين غيروها

: لا داده شنو بنتي تدخل على غرفه قديمه

بقت ماما مصره وايه اخيرا اعترضت

: اي اريد غرفه جديده اني ...مااحب البهذله وفي محلات تنطي اقساط وياها  فوائد بسيطه

: بسيطه الغرفه ناخذها على الاقساط

كنت انظر ل ايه
وافتهمت هذي اخر محاوله تقوم بيها ....
لذبح  احزانها ...
وبيع قلبها ...
بابخس الاثمان

طلعت ام موفق دخلت ايه للغرفه وسدت بابها

كملت اللبلبي

دزيت رساله لرعد

(وين انت )
اللبلبي جاهز

رد
(تعبتكم
وعاشت الايادي
اني جاي عليكم )

ركضت
اغير ملابسي وارتب نفسي
فزت ايه من نومها ويه فتحت الباب

: شكو شبيج تخبلتي

رديت عنها واني افتح الدولاب وانزع ملابسي

: رعد جاي علينا
ولج يگلي ملاكي
ثمن سنين ويه ثامر ماسمعت منه غير جمله ظروفي صعبه

: هههههه
صدوك ضحكتيني

: دگومي اختاريلي شي البسه
هو من النوع الي ينتبه على الملابس

گامت تمشي بملل
فتحت الدولاب

طلعت فستان احمر. وخلته عليه

: احمر البسي  واسكتي

ملاك : احمر احمر .....مثل متحبين
لبست.... وانتظرته
دك الباب
فتحت بسرعه حتى هو تفاجأ وابتسم

: تفضل

: ويايه جماعه  اسف مااكدر
ادخل

: دقايق اجيب الحافظه

دخلت جبت الحافظه وانطيته

: عاشت الايادي
باوع الفستان  وكمل كلامه

:وذوقج بالملابس خارق
باوع مره ثانيه
وگال
:فوتي جوى لتبردين

انشلت قدرتي على الرد وهو يبتعد لسيارته
وتذكرت كلمتين

  : الله وياك
سديت الباب

وعرف الحب طريقي
مره اخرى
ظننته قد رحل للابد
افتقدت ذلك الشعور
الذي يزرع بداخلك
الف امنيه ....
ورغبه ...
افتقدت  الانتظار لروية وجه ملامحه تجعلني اعيش ...
واتشبث بانتظاري لرويته مره
اخرى واخرى واخرى

سديت الباب وانداريت روان ورايه تباوعني
انحرجت منها

: گلتيله على باجر يساعدني

: نسيت والله ...
يله انتي روحي نامي ...
واني بالليل اتصل بيه واطلب منه يساعدج

نظرت تتفحصني وراحت وهيه تگلي

: مو تنسين هالمره

بقيت سهرانه مع ان ثاني يوم عندي دوام 
وايه نايمه ومافي احد احجيله
——————————
رعد
يوم دراسي جديد
واثناء
وقت استراحه الغدى
توجهت للكفتريا
ادور على  روان
ملاك طلبت مني اساعدها تكتب  مقال
وجدتها جالسه مع مروه وتحسين  ... وهيه الوحيده متاكل
شافوني تلاثتهم تحسين وگف
تشاقيت وياه

: اگعد لك وين احنا بالعراق وتگوف للمعلم
ضحك وهو يگلي تفضل مستر
گعدت يمهم
سالتها( ليش متاكل )

انحرجت من السوال وجاوبت مع ذلك

: اني مااتغدى ...
اكلي خاص فاكهه وخضروات مشويه ..

الجواب ثار فضولي اكثر
: ليش

: الاطباء  نصحوني
من اجوبتها المقتضبه عرفت في شي متحب يعرفوه زملائها
ولازم اعرف

: لا تگولين دايت اني بنتي مااقبل تسووي دايت

باوعتنا تلاثتنا  تحاول تتهرب من الاجابه
لكن نظرات الفضول بعيونا تلاثتنا حاصرتها وخلتها تحجي

:روان الاطباء خايفين  من اصابتي بااسرطان

اني رديت (بشنو سرطان )
ومروه شهگت  وتحسين رد ( لا )

هزت راسها( اي )

كنت گاعد يم تحسين  سمعت الكلمه غيرت. مكاني يمها گعدت على مسطبه وحققت اكثر وياها

: منين اجاج السرطان عندج وراثه

: من هجموا على بابا وقتلوه بالرصاص
رصاصه اجتي بايدي اليسرى
وطلعوها ....
وشظيه كانت قريبه من القلب ...
تركوها لحد اكتشفوا الاطباء ...اهنا امكانية تتحول سرطان

: وين تتعالجين عند اي دكتور لازم اشوفه واحجي وياه
الاطباء هنا معظمهم يعرفوني من هالگد مااترجم للناس

: ملاك تعرف الاسم اسالها

: اوكي اسالها يله بابا تعالي ويايه للمكتبه اساعدج بالواجب
افضل من اهنا

ودعت الباقيين
مشت ويايه ...
وتفكيري بكلمة سرطان
هاللوحه الفنيه المعبره عن الجمال والبساطه ....
حرام يشوهها
مرض قبيح مثل... السرطان

وقت الغدى عادة المكتبه فارغه
انزوينا بكراسي بعيده في اخر المكتبه وامامنا طاوله

گلبي  احتضن صورتها ...
وهيه تجلس قربي
وتحاول ترفع خصل شعرها عن عيونه.... وترجع تتزل

حبيت اخفف عنها واداعبها
مع ان گلبي انملى الم عليها

: مااتذكر  شفتج فد يوم تضحكين

رفعت القلم عن الورقه بدون متباوعني
ردت

:ان شاء الله  منا وجاي اضحك

: اشو الا تضحكين

انتزعت الاوراق من امامها
وهيه رفعت شعرها
ومدت ايدها حتى انطيها الاوراق

: ضحكي  يله  انطيج الاوراق

ردت بطفوله... ودلال... وخجل

: مستر  الساعه راح تخلص

تركت الكرسي وكفت
رفعت الاوراق للاعلى
وهيه گامت تحاول توصل للاوراق
واني ابعدهم عنها
وجهها احمر وابد متضحك

: اضحكي داگولج

ابتسمت وهيه تحاول تاخذ الاوراق
خليتهم گدامها
ضحكت

بديت انطيها افكار عن بداية المقال وهيه تكتب
وترفع شعرها
اقتربت منها
ارسلت انفاسي على مهل على خصل شعرها عن عينها
طاروا
حست بأنفاسي 
ابتسمت وتوقفت عن الكتابه

: انتي كتبي واني اتكفل بهالخصل المزعجه

: لو ملاك تقبل جان كصيتهم

: لا حرام تگصيهم

نفخت مره ثانيه
ضحكت بصوت ناصي
وخنگت الضحكه بايدها

تجراءت
وصلت ايدي على خصل شعرها
وبعدتها عن عينها

باوعتني مبتسمه

: انتي حلوه تدرين

: لا ماادري

:  انتي احلى بنت بالكون

: شكرا  مستر

: بلا مستر. احنا هسه مو بالصف
وهذا سر بينا

: اوكي

: صاروا سرين  بينا صحيح

: صحيح

رعد : تحبين الاغاني

: ماادري ماانتبه عليها بس احب الموسيقى

: شنو رائيج تسجلين عندي بالمعهد العصر 
وبدون اجر.

تتعلمين  انگليزي واعلمج عزف عود  واغاني
تتطيج القدره على الانطلاق والتعبير

: ملاك قبلت اسجل الاسبوع جاي من تغيير جدول عملها
لان هيه توصلني وتجيبني

: انتي لازم تتعلمين سياقه
بمشيكان بعمرج مسموحلهم يتعلمون

: ان شاء الله
: ومسموحلج تشتغلين
شغل وقتي
والدوله متاخذ منج ضريبه

: بس ماعندي وقت دراستي اهم
: اني اساعدج

: احجي ويه ملاك اذا وافقت

رعد : اني هم بابا نسيتي لازم تسمعين كلامي

: اكيد اسمع كلامك
: يله لعد انتظرج الاسبوع الجاي

مع ابتسامتها
المخفيه خجلا
نسيت انها تلميذتي

نسيت انها طفله
نسيت في القانون جريمه

جريمه ان اترك قلبي يهفو لطفله
فالمحضور....  منشود
والممنوع ايقظ فوادي من سبات عميق
كمسكين انا  اقف على بابك
واسخر من مد يدي
لعطائك
فان منعتي او اعطيتي
تظل يدي ممدوده لك
—————————————
ايه
اعرف  الي اسويه خطا ومجرد محاوله  للهرب من ذكريات متشبثه بيها بكل قوتي .....
مااريد ابدل طيف طلال ...
فقط اريد ادخل بدوامة حياة ثانيه .
حتى لو كانت هذي الدوامه زواج من شخص لحد الان ممركزه بملامحه ...
بمرور الوقت اتعود عليه وانشغل مع بناته
ويمكن اصير  ام واغدق حبي ل اطفالي... بدل ما موقف كل حياتي لشخص مات ...وراح

(لاالوم قلبي فكل مابداخله اصبح رماد ) عباره قريتها الصبح في كتاب قديم 
لخصت كل مشاعري بهاليوم

العصر ساعه اربعه اتصل مو فق گال راح يجيب الشيخ ....
سديت التلفون. ومنعت نفسي من البجي
لو البجي يفيد كان رجعه واني صار ست سنين ابجي عليه

وصلوا  صديقاتي
حنان... وساره.. وجيرانا ام كوثر وام فاطمه...  ومياده

ملاك حضرت كيك
وحلويات واشترت فستان
اليه لونه بيج

: همزين جبتيه بيج حتى البسه بالعرس همين
تحسرت

: كافي تتحسرين
وگولي ياالله
ولو اني مرتاحيت ل امه ماحسهم عائله زينه

:ميهمني خلص اتزوج وهاي هيه
يعني الا حب  خلص هاي هيه

اقنع بنفسي ودموعي تنزل
واديه ترجف
فتحت الدولاب اخذ حاجه
شفت صور طلال ماموجوده

انجنيت

: وين صورة طلال اني مخليتها اهنا اول ماافتح الدولاب اشوفا

روان جانت گاعده خافت وكامت من مكانها وحجت بصوت ناصي

: ماما گالت شيليهم خلي تنساه

ضربت الدولاب برجلي حيل
اقتربت عليها
: الصور وين احجي لا هسه اخنكج

: هسه اجيبهم بغرفه ماما

طلعت ركض واني وراها
المدعويين كلهم شافوني ابجي

دخلت للغرفه وراها  انطتني الصور
خليتهم على صدري وگعدت على السرير ابجي

ملاك واگفه وتتفرج

: ماكو فايده ايه 
الصور مراح تنطق. ومراح تمسح دمعج
مراح تسندج بالغربه

تكورت بسرير ماما وبجيت بكل قهري

: على عيني والله 
والله من البارحه لليوم ادعي اموت قبل لااصير لرجال ثاني

: اسم الله عليج
والله هسه بس تتزوجين  تصير ذكريات... وتظلين تضحكين على نفسج من تتذكرين

: ياريت وج عيني ياريت

اقتربت روان مني
وباستني

: اني اسفه  ماما الي خلتني اضم الصور

: لاتعتذرين  مصار شي

دگ تلفون ملاك

(: اشششش هذا رعد يتصل

جاوبت
ملاك : هلووو رعد

اسم الدكتور ه
جي  بقسم  الامراض السرطانيه

اليوم عقد ايه انشاالله باجر اجيبها

اشكرك )

سدت التلفون واندارت على روان

: رعد يريد اسم الدكتور ليش
تلعثمت روان بالرد  ورادت تترك الغرفه وهيه ترد

: يريد يسال عن مرضي

: ويريد تداومين بالمعهد وياه

ماادري ليش صارت حمره  بالرد

: اي گال
بس اني اريد اشوف الخطوبه

؛ زين شنو سبب يريد يعلمج عزف

: يگول يعلمج  تنطلقين مااعرف شنو

: اوكي من باجر اوصلج
يله روحي بدلي وجهزي نفسج قبل لتوصل الناس

: حاضر

روان تتهرب من شي اعتقد. متضايقه من رعد وملاك  دتحاول تدخل رعد بحياتنا عن طريق تدريس روان

طلعت روان باوعت ملاك الابتسامه
على وجها ورايحه بغير عالم

: خير شگال خلاج دايخه مثل الذبانه راشيها مبيد

: شكد دمج ثگيل
گال يوم الالج ملاكي

: جان گتيله. ان شاء الله  اني وياك بنفس اليوم والساعه ونفس الشيخ

: فاتتني اگله
: ليش ميحجي لعد ويفضها

: ماادري يجوز ديتاكد من مشاعره. ويسال عليه

ايه : يجوز
اروح البس واستعد لمصيري المحتوم
.....

واني ابدل واقارن فرحتي بالماضي وحالي هسه
اذا ماتحملت  فقدي لصوره
كيف راح انطي حياتي لشخص ثاني

سمعت صوت هلاهل وروان دخلت راسها من الباب گالت وصلوا النسوان والرياجيل

واسمع صوت الاغاني  من البيسمنت
رجعتني لحي الجهاد وعقدنا اني وطلال
اخذت الصور. اخليهم وسط حقيبه
فتحت الحقيبه وخليتهم
وحده ورا الثانيه
اجتي اصابعي على عيونه اتصورلي
داخليه بقبر واغمض عيونه
وخرت اصابعي بسرعه
شفت عيونه تعاتبني. وسمعت صوته يصيح بيه
( انتي مرتي ) شي رباني دفعني اهتز كلي كانما تنبيه او حاجز يمنعني اكون لغيره
طلعت الصور رجعتهم للدولاب
واني عرگانه وارجف
الشيخ وصل والناس عرفت ومنتظرين اطلع
رجليه جمدت .....
صوتي ضاع . احاول اناديهم
مااكدر جربت مره واثنين مگدرت
مااعرف شلون وصلت للگاع
اخذت موبايلي وكتبت رساله ل ملاك
( تعالي انتي وماما بسرعه )
احس عجزت عن الحركه
انتظرت شويه واسمع خطواتهن باتجاه غرفتي
مااعرف اشافوا بيه
بحيث اثنينهن صرخن ولزمن ايدي ملاك تگلي
(ايه شبيج .... عيونج شبيها )
وماما تضرب بيه وتصيح ( ايه ردي .. وج ملاك اختج شبيها )

مااعرف شصار فجاءه انفصلت عن الحياة وماعدت سمعت ولاشفت احد

—————-/
ملاك
نقلنا  ايه للمستشفى  بيوم خطوبتها من موفق
بعد مااني وماما دخلنا عليها
لگيناها كل جسمها متشجنج ومنظر عيونها مفزع
لدرجه الي يشوفها يعتقد. انشلت
بعد فحوصات خبرونا الاطباء
صدمة نتيجة كبت نفسي
مااستغربت  هالشي ....
ايه انزرع  داخلها حب طلال ....وحتى هيه نفسها متعرف تتخلص من هالحب... او متريد  تتخلص
بقت حابسه نفسها داخله ....
وسمحت لكلشي بحياتها يتغير ....
الا حبها  لطلال... تركته مثل ماهوه
مثل شخص يعبد. صنم ...
مراح يفيده بشي... مراح يستجيب اله  ...مراح يغفرله
لكن تعود يعبده

بنفس الليله ماما اخذت قرار شجاع واتصلت بموفق واحنا بالمستشفى گاعدين ننتظر تصحى
وفهمته (ايه  مريضه .... وتحتاج دكتور نفسي ... ويمه سد موضوع الخطوبه  .... والله يرزقك بنت حلال  الي تعوضك )

تناقشت ماما وياه  وحسيتها انغثت من سدت التلفون
سالتها. شگال

: يگلي وفشلتي گدام الناس بشنو تعوضني 

: بشنو  نعوضه  اشو حتى بالجذب ما اجى ويانا للمستشفى
: عمت عيني يمه ايه  قسمتج سوده مصخمه

الحزن ملاني وملى ماما  خفت عليها. وروان نعست
اخذتهم ام كوثر.  لبيت وبقيت اني
افكر بحضنا الي دوم يجي بالعكس
مستغرقه بتفكيري 
رفعت عيني شفت رعد.
ياترى صدفه

اقترب  خطواته مني  .... تركت الجلوس  . واستعديت اوگف
وصل وگلي
(اخذي راحتج خليج مرتاحه )
گعد يمي وگال
( والله صدفه عرفت عن طريق ولد صديقي  يعرف موفق )

: شنسووي هذي البنيه حظها مو مثل البشر

واحنا  ننتظر خارج  غرفتها
حجيتله قصه ايه وطلال
واستغليت  وجودنا سوا
وهو يدعوني لوجبه خفيفه بالكفتريا
نزلنا اهناك
ولاحظت متاثر على ايه
واحنا ناكل  فنگر   وكجب
بديت الحديث اني

: استاذ رعد  انت عرفت حياتنا كلها
واني احب اعرف عنك اكثر

: اكيد  لازم تعرفين
وبدا يحجيلي واني اسمع ومرات اقطع  كلامه بسوال
:شوفي ملاكي اني من عائله مهاجره وعايشين بكليفورنيا كلهم ماعدا اخت وحده بكندا متزوجه . دخلت امريكا عمري ١٤

: تقريبا مثل روان
: بالضبط. بالمدارس عانيت التميز. والضرب من طلاب الجايين او مولدين اهنا
صممت ادرس واصير معلم حتى اغير واساعد غيري

وبالكليه صادفتني عثره

افتهمت قصده راسا

: صديقه  امريكيه

: بالبدايه صديقه بعدين صارت زوجه
وگف گلبي من الكلمه
: يعني انت متزوج

هز راسه واضاف
:منفصل بلا طلاك صار سبع سنين

: اذا سبع سنين ليش متطلگها لعد

جاوب سوالي بكلمات تطلع من لسانه والالم يعتصر گلبه

: من تعرفت عليها  عائلتي كانوا واصلين جديد. واخواني الاكبار يشتغلون بمهن بسيطه
وزوجاتهم بالعراق ماعدهم فلوس يجيبوهم
وبام

: بام زوجتك
هز راسه اي وكمل
: بام ابوها ثري جدا  ومن علاقتي معاها بدت تسحب عائلتي واحد واحد للعمل بشركة ابوها 
صاروا اخواني  كلهم يقدسون شي اسمه بام فتحوا بيوت  وصعدوا سيارات انجمعوا بعوائلهم
وصار الالحاح اتزوجها 
اتزوجتها  عمري عشرين واني اعرف هيه مدمنة  على ال كحول
يعني البطل تخبيه حتى بسيفون الحمام
واني طالب ابوها خلاني اشتغل وياه براتب يحلم اي مهاجر يقبضه
تخرجت. اهلي رفضوا مارس العمل معلم
صرت مدير  تتفيذي لشركاتها بعد. وفاة والدها

لحد حسيت نفسي تحولت اله
لجلب الفلوس الها
حتى تصرف على حفلاتها ورحلاتها وادمانها
الاطفال رافضتهم من حياتنا
اهلي صاروا يعبدوها ومو من حقي اعترض على اي تصرف
عرفت تشتريهم بالفلوس والسفرات والامتيازات

صار الطلاك منها اكبر حلم عندي
مابينا حب
الحب الي ابحثه عنه وياما عزفت اغانيه

تحولت نبرته حزن  ورجفه دليل الاسى على حياته 
: اسمحلي اگلك المفروض تطلكها وتعيش حياتك

:الطلاك يعتبروه اهلي بمثابه اعلان حرب عليهم وعلى مصدر رزقهم
تركت العمل عدها  واشتريت عمري
واكتفيت بالارباح الشهريه
وفتحت بمشيگان معهد لتعليم اللغه العربيه والانگليزيه
واستخدم فيه الموسيقى  هذا شغفي من الطفوله الموسيقى
احب عشرة الناس
احب الابتسامه

امتلكت الجراءه  واني اساله
( متفكر تتزوج )
ابتسم ورد ( اكيد مفكر اتزوج واحنا بديربون القوانين الامريكيه  الها حل عند العرب دائما
حبيت اعرف قصده اكثر.
جاوبني
( يعني الي تحبني تقبل بضروفي
وترضى بعقد. شيخ لحد اشوف حل اليه والها )
ماادري اذا كانت كلماته تقصدني ام لا بس عيونه وابتسامته قصدتني اكيد
—————

طلال
في لاس فيگاس مباراه كبيره
وجمهور. اكبر.
وقبل المبارات صعد فريق التشجيع النسائي  شبه عاريات
صابني الغثيان مجرد رؤية اجسادهن 
وتركت الفرجه ورحت على غرفتي
اضرب بالكيس الرمل
واتصبب عرگ 
رجف جسمي كله  .....
مابقت الا ثواني وارتاح من غليان النار باحشائي
ظليت افتر. بالغرفه. انتظر اسمع اسمي واطلع افرغ غضبي

مرت دقايق الغليان وصار وقت تفريغ الغضب
هجمت على الخصم قبل صافره
وضربته براسي
ابطنه. وهو ضربني
والحكم حاول يوگفنا
مااگدر. وانصاع لحماس الجمهور
وتركنا نتضارب على الارض
وكعت اني وهو يحاول يدوس عليه
لويت رجله وگع على جسمي
نهضت واني اركل بيه
ونزلت عليه قريب يعلن الاستسلام
باضافري ملخت ضهره
وبقى اثر دمه بايدي
ودمي ينزل من فمي

الدم هذا المطلوب بهالليله
لاافكر بشهره ولا بالفلوس
الي اثنينهن
صارن موجودات عندي

طلعت  منتصر
ومطمئن باجر
عندي   عرض ثاني
اهنا المصارعه صح  نتفق على بعض الحركات
مع وجود الضرب الحقيقي والمؤذي الي نحس بيه بعد. المباراه

راجعت  للفندق مضروب ضرب اثاره على جسمي  واريد. بس اوصل للفراش  وانام
دخلت غرفتي في بنات اثنين
بالغرفه
اول ملمحتهم بقيت الباب مفتوح وصحت بيهن

: منو دخلكم اهنا

ردوا وهنه يضحكن

(  معجبات ونريد صور وياك )
ثيابهن مع وجودهن ميدل معجبات انما  بائعات هوى

بقيت بمكاني وصيحت مره ثانيه :برى برى
بسرعه منو الي فتح الباب الكم

ماانتظرت ردهن

اتصلت بالاستعلامات

جاوبني ولد.
بكل عصبيه  وصراخ بالممر حجيت وخليت النزلاء تتفرج

: كيف تنطون مفتاح غرفتي باي حق

الموظف جاوب مرتبك
: وكيل اعمالك خبرنا موافقتك بدخول البنات

: هسه اريد المدير للفندق
يعني اي واحد يكول موافق تنطوه مفتاح غرفتي

سديت التلفون وبقيت لازم االباب لحد
صعد موظف يشوف
الي من خوفه مني حاول يهديني
من بعد متر.

: ذولي معجبات عادي نسمح يدخلون ياخذون صور

: يعني هسه اذا اتهمكم بالسرقه انت وياهن  عادي

رد بهدوء

: مجرد صور

دخلت دفعتهن برى واني احذر الموظف من الي يقصده

؛ اني مو غبي  الصور. ناخذها بالممرات... بالشارع
اما  بغرف النوم تتحول.... دعوه وتحرش... وتعويضات ...اخذهن
واطلع برى يله

طلعوا سديت الباب ورميت نفسي على السرير. متعب بلا نهايه

اليوم الثاني تكرر نفس الحدث
والمره هذي جايب البنات متعاقد كبير ومنتظرني بالغرفه
اول مشفت وضعهن على سريري
بلا كلام
شلت وحده شمرتها بالارض
والمتعاقد دميت وجهه ضرب
وصار عياط بالفندق

وعبد. الرحمن   صديقي هو الي مدخلهم
ودخل على صوت العياط من البنات
توجهت اله بضربه وهو ضربني

: حقير اكيد متفق معاهن حتى تاخذ فلوس
خلي يكون بعلمك اكثر شي بالدنيا اكرهه.... الدعاره ....والسماسره  امثالك

اقترب مني خلاني على الحايط وهو يفهمني

:مجرد ترفيه... وصور تنزل بمجله ...وفضول يتكون عنك ...وتزداد شهرتك

: تريد فضول اني انطيك فضول
فقدت اعصابي دفعته على السرير  وضربته ضرب مخيف
وحده من البنات اختبت خلف الباب بالحمام
دفعت باب الحمام عليها
وگعت على حافة البانيو وجهها كله دم
رجعت لعقلي من شفت الدم

توقفت تعبان من حياتي ومن دنياي

اتصلت بالشرطه
النزلاء بالفندق اجتمعوا بالممرات
وياخذون صور
سديت الباب واني انتظر الشرطه
واحاول اهدي الغضب العارم داخلي 
اجتي الشرطه.... وطرقوا الباب
فتحت الباب
كمية العنف الي ابديته اصاب الشرطي بالدهشه ان شخص واحد سبب كل هالضرب والتكسير

: منو الي اعتدى بالضرب

المتعاقد كان واگع وجهه دم
اشرلهم عليه
واني على السرير الهث من التعب اقترب الشرطي وسالني
( انت فعلا )
جاوبته وكلي حيره من الي داسويه

: ناس غرباء بغرفه نومي
ودخلوا غرفتي بدون علمي
كان لازم اضربهم

اتلفت بالغرفه مستغرب
: يعني تريد تفهمني وحدك سويت كل هذا

: اسالهم  وتاكد بنفسك

افتر وصور  وطلب ان نروح للمركز

من كثر تعبي مااعترضت على الگاله

: اروح للمركز واطلب الدعوه ضد وكيل اعمالي... والمتعهد  ..،اتهمهم بالسرقه

نهايه الامر... اخذونا  للمركز كلنا
بعد ما سعفوا البنت ....والمتعهد

العنف عندي صار سجيه لازم اضرب وانضرب
وبعدها اهدء
واسال نفسي
الى متى هذا الالم. المحبوس داخلي
الى متى مااطيق العالم ونفسي
وحياتي
————————/———-
ايه

كنت على وشك اموت  بيوم الي
حاولت اقبل بانسان ثاني ياخذ مكان طلال
ربنا شوفني الموت واحياني باخر لحظه

طلعت من المستشفى
ولگيت مصيبه جديده امامي

جتي ام كوثر لزيارتنا بعد. ماطلعت
: هلا بام كوثر تفضلي
: هلا بيج ايه حمدالله على سلامتج
دخلت شافت ماما وعاتبتها
: هسه درينا شتى وثلج ومتبينين تلفون متعرفين تسالين  عليه

: والله يابه حقج
التهينا بسالفه ايه
گعدت وعلى لسانها حجي

: اني جايه على هذا الموضوع

: خير  انشالله

:  مااريد اتدخل  بس الله شاهد بناتج احبهم مثل اخواتي واكثر

: خير ام كوثر قلقتيني وماما متتحمل صحتها كولي فدوه

: حجت تفاصيل المصيبه الجديده

: بصراحه موفق اتصل بابو كوثر ويريد الذهب والمصاريف الي صرفه

اني وماما وحده باوعت بوجه الثانيه وماما الي حجت
: ام كوثر عيوني انتي.... الذهب صحيح موجود بس شنو قصده بالمصاريف

ام كوثر من شافت صدمتنا خافت تحجي لحينا عليها
تحجي

: الذهب يريد حقه ميريد ترجعوه يگول بعد ميجيب نص سعره

قاطعتها واني ودي املخ نفسي على المستوى الي نزلت نفسي اله وفكرت ارتبط بيه
غيرت مكاني يمها حتى افتهم

: ام كوثر  الذهب جابته امه قبل يوم ماستعملته ذاك هو على حطته

كررت نفس الحجي يكول اريد حقه ٥٠٠٠ دولار. والشيخ الي اجى ماخذ منه ١٠٠ دولار
وافلوس كيك وشغلات ثانيه توصل ٣٠٠ دولار  و٦٠٠ دولار فلوس الحلقه مشتريها

: يعني ذوله قفاصه لو شنو الله ليدري كم مره مسويها بنات العالم
الكيك حاسبه وهو قسما بالله ملاك سوته
والشيخ مياخذ فلوس الا بعد العقد
طلعت ام كوثر بعد نقاشات
وعلى اساس زوجها وشيخ الجامع يتوسطون بينا

انتظرت  رد ام كوثر   لحد الليل مافي جواب
قررت اطلع اشوفها

: ماما  اني رايحه اتمشى لبيت ام كوثر

: الجو بارد
اتصلي بيها افضل 

:  مكتئبه اريد اطلع

تركت البيت وطلعت امشي بالشارع 
البيت قريب  اگدر اوصل بدقيقتين ....
اريده يطول... اريد ابجي بعلو صوتي ...
واسكت نوح  روحي الي صار له سنين
اريد انهزم واهدم جبال الشوگ الراسيه بكل حياتي وماترضى  تنسى طلال
اريد. اطرد غيره من حياتي
وابقى  عايشه على صوره الي من يوم طلعت من دولابي احس فقدته مره ثانيه

(حتى وان لم تكن معي
فقد نبت  داخلي ....
شجرة عظيمه لا يقتلعها ريح ولا زمن
شجره  اسقيها دموعي ....
وارعاها  من شبابي
شبابي الذي اوشك ان يغادرني
هو الاخر ....
فلا يبقى سوى شهيق.... وزفير
يحرق داخلي  ويتركني
بلا حياه ....)

وصلت بيتهم فتحت الباب ام كوثر
استغربت دموعي وعيوني الوارمه

: ها ايه امج بيها شي

لا مابيها شي
اني الي متضايقه وبجيت بالطريق

: الله يساعدج
فوتي جوى للتمرضين من البرد
فتت  بيتهم دافي
والدفء  دفعني للحديث عن المي وتعبي ل ام كوثر
الي مالگت وسيله تواسيني بيها
غير بكلمه ( الله يجازيج  على گد صبرج )
وبعد ما سكتت حجت المضموم
ترى ابو كوثر اتصل بموفق
ويگول اشتكي عليها واخلي محامي وحتى فلوس المحامي هيه تدفعها

ماعرفت ارد  ....حيل مابيه مريضه ...
وتعبانه وكلشي بعيني هان عليه

رديت عليها
كوليله( يجراله )
لو اعرف اجدي وانطيه الفلوس

اضغطوا على النجمه للتصويت  بلا امر عليكم