رواية نوارس مهاجره الفصل الثالث عشر 13 - بقلم zeanab_almusawi

السلام عليكم
احبابي ... القصه احداثها كثيره
وداحاول اختصر
ولان اشوف مستعجلين على لقاء ايه وطلال
بس في احداث لازم تنذكر
واحاول اليوم انزل بارت ثاني
مو اكيد احاول
وياريت متستعجلون
وتصوتون بالوتباد
حتى يكون دافع اليه وللابطال
وشكرا لصبركم وانتظاركم

💐💐💐💐💐💐💐💐💐💐💐💐💐
#نوارس_مهاجره12
#زينب_الموسوي

روان

اليوم الثاني للمدرسه  عندي موعد بالسبعه الصبح اخذ ابره بالمستشفى للعلاج
گلبي ينقبض من ادخل المستشفى واشوف حالات السرطان
اعرف بيوم  من الايام راح يتمكن مني ....

من ينادون اسمي  حتى اخذ الابره
يتوقف كل احساس داخلي
ويبقى بس الخوف
اخذت الابره ... ولازم انتظر عشر دقايق بلا حركه
بعدها طلعنا
وراسا وصلتني ملاك للاعداديه وهيه مستعجله

: متدخلين ويايه

ردت وهيه على وشك تحرك السياره قبل لا اطلع

: ماكو داعي تأخرت
ادخلي هذي مدرستج لازم تتعودين عليها

فتحت السياره ونزلت ....
الطلبه بدوا يدخلون ....
ونلقي التحيه على بعض
دخلت حسيت  بضعف واني امشي
وريحه الدوا تطلع ويه نفسي....
ودخت
دخلت للصف
وگعدت بمكاني....
وصل مستر رعد
  بدا  يسمعنا اغاني عربيه
الصوت اسمعه بلا تركيز

رعد : منو يگدر يترجم هذي الاغنيه للانگليزي حتى لو كلمه وحده 

زادت عندي الدوخه نمت على المقعد
ومااعرف شديصير بالصف
سالني مستر رعد

: باباتي روان خيرج

رفعت راسي عيوني تزغلل

: استاذ اگدر اطلع دايخه ....
ومريضه

: اوكي اطلعي روحي للممرضه تشوفج

طلعت مستعجله استفرغت بالحمام
وبقيت گاعده  شويه
غسلت وجهي 
وطلعت من جنطتي حمرة وعطر اخذتها من ايه وخبيتها بجنطتي

خليت لشفايفي وخدودي
وخليت عطر .... وفتحت شعري من التسريحه الازليه الي لامته للخلف ورافعته بقراصه
مااعرف غيرها 
نزلت گذلتي  على وجهي
باوعت على نفسي بالمرايا
وافتريت  اتفحص تقاسيم
ماحباني الله 
في شيء خطا .....
امممم الستايل لازم يتغير
لو القميص ضيق  اطلع احلى
يله باجر اغير
اني لازم اعيش .... واتمتع بعمري ومااخلي المرض يعيقني
لحد اموت ...
خبيت اغراضي بمكانهم
ورحت للممرضه
انطتني عصير. وكوكي
اكلتهم وبقيت يمها

بعد ماخلصت الدرس الاول انطرق باب الغرفه
دخل مستر. رعد سلم على الممرضه وسالني

: شلون صرتي باباتي

:روان الحمد لله زينه
باهتمام واضح جلس يمي وسواله بيه خوف وعطف عليه

: انتي مريضه باباتي

ماادري ليش نكرت المرض

: لا  مابيه شي بس مسويه  دايت وتعبت

تافاف  وتنرفز

: وتالي ويه هذا الدايت ...
بيبي انتي صغيره على الدايت ...
بعدين يصير عندج سوء تغذيه

ظل يسولف عن الدايت واضراره ....
وكل تركيزي كان اعد كم مره يگول
(بيبي وباباتي )

هالكلمتين خلوني مثل حمامه انهدم عشها.... امام عينها
وحطت اخيرا بعش امان ...

صرت اروح للمدرسه بس حتى اسمع هالكلمتين ...
انتظر يطلع الصبح ....وابدل ملابسي
وكلي لهفه للمدرسه

مثل كل يوم اصحى واغير واطلع
اجى ابالي ....
اغير من شكلي
لبست كعب عالي  ...وتشيرت مجسم ...
وخليت مكيب خفيف ...
وطلعت من غرفتي واعرف بانتظاري مواجهه مع ملاك الي اول مشافتني
لزمتني من ايدي وتريد تاخذني تغسل وجهي

: شنو هاي وين رايحه انتي

: للمدرسه غير

: مشفت طالبه وحده بالمدرسه لابسه حذاء عالي
كلها رياضي
هذا الحذاء عود من تكبرين البسيه واغسلي  المكيب گدامي

اعترضت بنفس الجمله كل مره اگولها

: ومن يضمن اني راح اكبر يجوز اموت
ولكون الجمله مكرره ماثارت عطفها

: روان بلا عناد فوتي غسلي المكياج  بدلي هالملابس
ترى مااوصلج

جاوبتها بكل اصرار

: لاتوصليني اني اروح

اخذت لفه من الميز.... و
طلعت
اول موصلت الباب الخارجي لحگتني ...
وگالت اصعدي

صعدت السياره ...گعدت استمع لمحاضرتها بملل ...
وبدا تلقيني الدروس والمحاضرات بالادب والاخلاق
واني ابالي احسب المسافه شوكت اوصل
........،،،،،،،،
بهذا اليوم دخلنا للمكتبه ويانا مستر رعد ..،

وگف امامنا  لابس قميص بيجي ...
وبيه  خطوط سوده...  ماشي مع
الساعه الي بايده  سيرها
بيجي.... وشاشتها سوده
امممم الطول  مايعتبر طويل بالنسبه للرجال 

شعره لونه فاتح  مااعرف اي لون  يمكن هذا اللون الي يسموه  اشقر غامق
وسرحت اكثر برمشه نفس لون شعره  ..وصلت للحذاء
وهو
يشرح  الواجب اليوم نسويه
ونبهني
(روان ويانا )
نزلت عيني
ورديت قبل لينتبه كنت صافنه عليه
:بلي مستر وياكم

شرح الواجب

:  اليوم تختارون شخص وتكتبون عنه... او تكتبون اله رساله.... او مقطع صغير

الكلمه الي متعرفوها بالانگليزي ...اكتبوها بالعربي
وانكتب الكلمات الي معرفتوها على الصبوره ونتعلمها بالانگليزي
وبعدها تحفظون الكلمه الي معرفتوها وهيج يصير عدكم رصيد كلمات جديده

جلسنا بالمكتبه.... وبعض من الطلاب
اخذ كتب تساعده مثل قاموس
اني كنت مااعرف اكتب عربي ...ولا انگليزي
العربيه عندي اندثرت بسبب تركت الدراسه والانگليزيه يادوب اعرف كم جمله
————————-
رعد
يوم دراسي جديد
اجمل مافيه

رؤية الطلبه صباحا  وهمه جايين للمدرسه
يمنحني الاحساس بالحياة واشوف بداخل كل واحد منهم نفسي
الطفل المهاجر الي حلم يكون حر

احرص اكون اول موجودين
واستمتع بكلمه
(صباح الخير مستر رعد )

وارد عليهم صباح الخير

واگف مثل كل يوم بالاوفس اساعد واترجم لحد تبدي الساعه الاولى

دخلت مس امجد  الانسانه الطيبه  بتعاملها رغم مشاكلها الزوجيه الي الاوفس كله يعرفها من اتصالاتها بصوت عالي
استقبلتها بجملتي اليوميه

: مس امجد
الله على هذا اللون فعلا مناسبج

ردت وهيه تدقق باللون

: كل يوم تگلي هذا الجمله بطل كذب

: انتي بطلي كل يوم تصيرين احلى
ردت وهيه طمعانه بجملة مدح اكثر

؛ اني متزوجه لاتنسى

: محظوظ زوجج
اخذت مكانها خلف الكاونتر وردت

: احلى مابي الصباح كلامك مستر رعد يعطيني  سعاده ...
ويخليني ثاني يوم افكر باللون الي البسه

دخلت مسزز توم  الحلوه البدينه 

مسزز توم  واو شنو هاللون
راهم لبشرتج

: كاذب دائما ههههه

جملتي نفسها وردها نفسه

انفتحت الباب دخلت 
ملاك مبتسمه مع اختها روان 
وصبحت

: صباح الخير

: اكيد. خير  ويه شوفتكم ملاكي

ردت بخجل واضح

: الله يخليك تسلم
انتبهت روان لابسه ملابس تختلف عن كل يوم  وتبدو   حزينه

: شلونج روان  الكسلانه

صوتها. ناصي  يادوب  سمعته

: الحمد لله مستر رعد

كلمه كسلانه  اثارت ملاك اختها

:مافي تحسن بمستواها

ماحبيت اثير قلقها اكثر على اختها

: في تحسن اكيد لكن متقبل تشاركنا الحديث
لاتشيلين هم اني وراها لحد تحجي

يله روان بدا
القسم للعلم اليومي

وگف الكل وضع الايد اليمنى  على الجهى اليسرى على القلب
للترديد القسم
روان بالممر وگفت بدون متحرك شفايفها

خلص القسم
اقتربت منها
: ليش مارددتي القسم

: ماحافضته

: تعالي احفظيه بالصف
مشيت گدامه وبشده طلبت منها تحفظ
صاحتني

: مستر
انداريت خلفي
كملت
ممكن. الله يخليك احفظه بالبيت مااريد الطلاب تضحك عليه

: منو الي يضحك
كلكم تغلطون وتنسون واساعدكم

: اني مااحب اغلط
اني احفظه واردده

صحيح اختها حجت عن حادث والدها وانعزالها بعده.... لكن مدللة زايد يراد شده وياها

وبكل جديه حجيت وياها

: باجر
تجيبن حافظته....  سمعتي

اطرقت براسه وهزته اي
ومشت
هالبنت امرها غريب ...
ماعدها اهتمام باي شي ....وحزينه على طول
وكلامها قليل

ومن مراقبتي كتاباتهم عن شخص تختاره

استغربت  متعرف تكتب حتى بالعربي
جلست على مقعد قريب منها بالمكتبه

: روان انتي بالعراق دارسه
لاي صف
انحرجت ونصت صوتها وهيه تجاوب

: رابع ابتدائي وتركت بسبب حادث والدي

: وبتركيا مدرستي

: لا بقيت بالبيت اخاف اطلع  واخواتي كانوا مشغولات بالعمل

: اوكي اني راح اساعدج
بالكتابه
تگدرين تعبرين بالعراقي

: اگدر  ولو الاملاء مضابطته

: يله اكتبي الي تعرفيه

اخذت القلم وكتبت راقبت من بعيد تكتب
وتمسح دموعها
بنهايه الدوام
اخذت اوراقهم وبالشقه
اول ورقه قريتها لروان
كاتبه

(رساله ل بابا

مشتاقه لعيونك بابا
اتمنى السنين ترجع.... وترجع الايام الي كنت اشوفك فيها تضحك من تشوفني
اسفه اذا دموعي تاذيك ....
بس ماعندي غيرها

بابا اعرف انت هم مشتاقلي ....
وعد مراح اتاخر عليك
ونجتمع اني وياك )

الرساله ذهلني كم الحزن الي فيها الطفله تتمنى الموت حتى تشوف والدها

رديت كتبتها بالانگليزي
وخليتها على  موقع المدرسه كافضل تعبير
حتى تاخذ عليه كردت

انتظرت الصبح حتى اخبرها

—————-
طلال
مرت شهريين بشيكاغو  ...
المدينه السياحيه الجميله
والمعروفه بناطحات السحاب في مركز  المدينه
وبشواطئها الرمليه الي تجذب السياح  بالصيف
وريحها البارد الي يجمد ملامح الوجه حين توصله
بهذي الشهريين  سعيت
لمركز المصارعه في شيكاغو 
وتعرفت على منظم مباريات عرضت عليه افلام فديو مصوريها اليه بالسجن اسمه عبد الرحمن امريكي افريقي اسود

گاعدين نتفرج اني وياه افلامي
وهو يكيل الثناء على لعبي

:اكيد اهنا راح تكون ورقه رهان رابحه
:المهم تحددلي موعد مباريات قريب
اني مااگدر بلا مصارعه ...انجن

اخذ تلفونه. بحث بالاسماء وگلي
انتظر اخي 

انتظرت  واستمع مكالمته
الي گال بيها كلمة  ال f 
عشر مرات
ترك الاتصال  على الانتظار وتوجه اليه بالكلام

: مستعد مباراه محليه. يوم الجمعه

بلا تردد جاوبت مستعد اكيد
حتى ماسالت عن الاجر
طلعت استعد بالجم

وبعد الجم تابعت اسلوب المصارعين اهنا بامريكا
وحفظت الحركات الي تثير الجمهور. وتاذي اكثر

........
وصارت الجمعه
توجهت للصاله الي بيها المباراه
تفرجتها قبل المباراه .....
وتدربت عليها
كم خطوه يمين .... كم خطوه يسار
عديتهم
ورجعت للغرفه استعد
لتغيير ثيابي والبس الشورت المكتوب عليه اسمي
قبل المباراه عرفت الرهانات اكثرها على خسارتي
لان ممعروف مثل المصارع الثاني
اذا فزت راح منظمين النزال تزيد ارباحهم ويتمسكون بيه

عند بدء النزال .....
دخلت بالوقت الي يعلن المعلق اسمائنا
ويصيح مستر تي
ااجمهور الي هتف قليل
( نشوف بعد قليل . اذا ماهتافكم يصعد للسمى )
انطلقت الصافره .....

بدا هو يضرب  وارد عليه بالضرب
انتهت الجوله الاولى اله
وبعدها جوله اليه
ازداد حماس الجمهور
بالثالثه
تقدمت عليه بضربه سريعه على الكلى شلت حركته
وهو في خضم الالم ضربته براسي على راسه
نزف دمه وگع
واني نزل دمي حار على وجهي .....
لمسته  وارتاحيت ....
وهمه يعلنون اسمي فائز ....
وتطايرت قصاصات الرهان في الهواء ....وحطت في كل مكان على الارض
وصوت وهتاف الجمهور   باسم مستر  تي  علا على كل صوت
وفلاش الكاميرات والموبايلات غطى كل  خطوه اليه على الحلبه

توالت مباريات المصارعه
كل اسبوعين مع شخص
واكثر مبارياتي في شيكاغو... او لاس فيگاس
انتقلت لشقه كبيره بحي راقي
واثاث ثمين
مع عدم حاجتي للاثاث... والشقه
هذي الاشياء فقدت قيمتها ومتعتها بحياتي
احاول ابتعد عن اهلي
ويفاجئني اتصال ..من والدي او والدتي... او اخواني ...مليان عتب
وابرر (مشغول
زين الحمد لله )
واسد الخط
ليبتدي تأنيب الضمير واجتياح ل حنين
الحنين لنفسي ل اهلي
لحبيبتي
ل اصدقائي ودراستي
اعيش حياة خاليه من اي معنى فقط اعيش

خسرت كل ذكرى جميله في حياتي
ومابقت غير ذكريات السجن والانتهاكات والقيود
وصرخات التعذيب

امتدت المعاناة ل احشائي استيقظ ليليه مرعوبه
وبسبب الخوف اتقيء
وافقد القدره على النوم ايام وليالي
هذي مو  حياتي ولاهذا طريقي
حتى الغربه. مو اختياري
انما احتجاج على احلامي الضايعه بلا عوده

————————————

روان

الصبح عرفت من ملاك موعد العلاج ... الي اصبحت اكرهه
واكره تاثيره عليه
ويشعرني باني مختلفه عن البنات الي بعمري
ومثل كل مره احتج

: مااروح شنو هاي يوميه اني رايحه للمدرسه ...دايخه... ولعبانه نفسي

ومثل كل مره ملاك تخوفني بالموت

: اذا متروحين تموتين
كلمة الموت ماعادت تخيفني بل انتظره

: عادي كلنا نموت ليش اتعذب لحد اموت
وكل مره تدخل ايه لفض النقاش

: روان حبيبتي ليش تعاندين
المرض اذا انتشر ينتشر بكل جسمج وبعد صعبه يسيطرون  عليه

: ماما روان لخاطري لاتشلعين گلبي مابيه حيل اتعذب بيج هالمره
استسلمت بشروط

: خلص اجلي الموعد الجمعه العصر من ارجع من المدرسه

: والله زين زعطوطه تمشي كلامها علينا

ايه هيه الي اتصلت واجلته
وطلبت من المستشفى يكون العلاج بعد العصر من ارجع من المدرسه

وصلت للمدرسه بالممرات
استقبلتني بابتسامة مستر رعد
وهو جاي عليه

: باباتي روان عندي سر  اريد اگوله

: سر شنو سر

حجى وياي بصوت ناصي حتى محد يسمعه

: حولت الكتابه الي كتبتيها للانگليزي
وخليتها على الموقع واتعمدت اترك اخطاء املائيه

خفض صوته اكثر  وهمس
الي يسألج  جاوبي اني كتبتها
هذا سر بينا

: شكرا مستر 
ردت اروح لصفي لكن هو اخذني  لغرفه بيها لاب

: تعالي شوفي التعليقات عليه

فتح اللاب وبديت اقرا
عدد الطلاب الي معلقين
ومسانديني

( الله يرحمه )
( بالجنه لاتبكين عليه)

( الاب سند )
وغيرها من التعليقات الي
اعطت لدموعي الاذن بالنزول
.......
اصبحت اربع جدران الصف
الي ادخله كل يوم بمثابه .:
زياره للجنه... ونعيمها

وكأن  السقف يمطر...  حنان ..،وابوه ....
واهتمام
وكأن  ابتسامة ابي تحيطني من كل جانب

وكأن  كلمة( بيبي)  نهر  عطف يراعني ويسقيني

ويجعلني.. اهيم بمعلمي
ويفتح امامي افاق عالم هجرته 

وارتضيت ان اسدل عليه ستار الظلام
وهاهو يمد يديه اليه
ليريني النور... ويدعوني ل اعيش
حتى ولو لوقت محدود ...
بحياة مهدده بمرض خبيث

انتظر ه كل صباح 
وفي داخلي شوق لرؤية  مايرتدي اليوم

فقميصه الابيض ،،ازاح كوابيس احلامي
والاسود..  جعلني اهجر حزني
وووووو
كم هو جميل مااشعر به كل صباح
وانا اتعقب خطواته في الممر
فاضع قدمي على ماحط قدمه
واقف حين يقف
———————————-

ملاك :
اصبح رؤية رعد كل يوم جمعه
اجمل حدث في اسبوعي
اسال عن روان كل جمعه وهو ينتظر جيتي ...

ولازم يگول حجايه حلوه يخليني الاسبوع كله افكر بيها

غيرت لبسي... ومكياجي ...
وكلشي بيه يوحي بعودة الحياه
ل اوردة شبابي ...
التي توقفت منذ زمن

دخلت مع روان الممر وهيه معترضه على العلاج الي راح تاخذه العصر

: شبيج ضايجه
لمت شعرها وظلت تدردم

: الجمعه الناس ترتاح تطلع تتونس مو تاخذ علاج

: اخذيه اليوم والسبت اطلعج

: كل مره تگولين وبعدين تروحين للشغل وتعوفيني

: هالمره وعد وين تحبين تروحين

فكرت شويه واستقرت  على مكان

: في معهد لتعليم الانگليزي
لمستر رعد خلي اسجل بيه

ضحكت من سمعت المكان ليش مااعرف
وجاوبتها 

؛ اجوره غاليه سالت عليه
اذا حصلت شغل ثاني اسجلج بيه

: اني اشتغل شغل جزئي وادفع

مدت ايدي  ل  ايدها  استعجلها تمشي   واني  منزعجه من طلبها تشتغل 

: بعد اخبالاتج وين توصل من الصبح
دفوتي  للصف واني اشوف حل

دخلت للصف  وباوعتني قبل لا ادخل الاوفس.  واسال
عنها .....وحتى اشوف رعد
بنفس الروح الفكهاهه والدعابه والكلمات الرقيقه استقبلني

: اهلا ملاكي

مااعرف الجاوبه لساني لو گلبي

: شلونك استاذ

: الحمد لله بخير
وانتي

: الحمد لله

وكانه يعاتبني  وهو يطلب اجي كل يوم

: يعني منشوفج الا يوم الجمعه ...شيصير اذا اجيتي يوميه

ضاع صوتي  ويادوب عرفت كم كلمه

: تعرف الشغل اهنا

: الله يساعدج

باوعني وكمل

:تحبين  تسمعين كلمة مني كصديق

تمنيت اگله الف كلمه مو كلمه وحده

: اكيد تفضل

: انطي للحياة مجال
العمر مره وحده... والشباب عمره قصير
خلي يوم اجازه لملاك وبس

تعبيره مليان خوف عليه
واهتمام بحياتي 
ابتسمت وانتبهت المدرسات ديسمعون حديثنا
بس لازم ارد

: انشاالله استاذ

هو هم انتبه ان كلامنا مسموع والناس تدخل للاوفس
ومااهتم بل زاد حديثه ويايه
وتشبث بكل لحظه النا سوى

: شنو رائيج
بنزهه بارك العراقيين تندليه

؛اندله
ضحكنا على الاسم اثنينا

: انتظركم بكرا ومعاج العائله حتى اتعرف عليكم

؛ اكيد نجي
گلبي رفرف وطار. بلا جناح طار
من كلامه ونظراته وابتسامته
وجمله بعد الثانيه  حسيته
يريد نقترب اكثر من بعض ونعرف بعض اكثر
واني اطلع
ودعني للباب وصاني

:  مو  تنسين موعدنا
الاكل عليكم ...والاغاني عليه

: ههههه صار استاذ

طلعت من البنايه  الفرح يدفعني
مثل الريشه وسط ريح عالي
ودي اركض واغني  واكمز
واصيح بعالي الصوت فرحانه

گعدت بسيارتي واتصلت ب ايه
حتى نحلل الحديث... كلمه  كلمه ....وحرف حرف

اول تحليل الها

ايه : مدام گال اتعرف على العائله يعني قصده يصير نسيبنا

ملاك : ان شاء الله
باعي اني اتصلت بيج حتى تختاريلي ملابس حلوه

ايه : بسيطه هسه اختارلج على ذوقي
شوكت ترجعين انتي

: عندي مقابله عمل اجريها
وارجع للبيت

توجهت للمقابله عمل بمختبر تحليلات بعد مااقدمت شهادتي الهم

اجريت المقابله  وحصلت العمل
كمحلله ...
اخيرا راح  اشتغل بشهادتي ...
وعمل محترم ...
بلغت الاعانه الاجتماعيه عن عملي
ورجعت للبيت خبرت ايه الي
فقدت كل احساس بالحياة ....وتخلص يومها طبخ ..ونوم ...وامتحانات دراسه
وعرفت منها مغيره اختصاصها

ملاك :ليش غيرتي اختصاصج

ايه : ماعندي واهس بمجال الطب
غيرت على الرسم الهندسي
خلال ست اشهر اخذ الشهاده
واتوضف بمكتب هندسي اصمم خرائط

ردت اذكرها بقرارها من موفق
اشرتلي

: اشششش اختنگ من طاريه
وماما تلح عليه
اسكتي لاتذكريها

:
طلعنا نحضر اكل لسفره باجر
وماما بالمطبخ. تسمع برنامج بالراديو العربي مخليه الهيد فون حتى منزعجها

واني وايه نفكر بقائمة الطعام لباجر. وشنو اقترح ايه تعترض عليه

: اني اگول مشاوي افضل

هزت ايدها. وهيه تباوعلي صفح

:ها شبيج معاجبتج شنو

فتحت الثلاجه وطلعت اغراض الدولمه
وهيه تگلي

: رجال عازب يعني جزعان من مشاوي المطاعم ....
لازم نطبخله  بادينا حتى يحس بالاهتمام ..،
وختمت جملتها. بضحكه والمقطع الشهير
( يامتعلمه يابتاعت المدارس )

ضحكنا. وماما على الصامت تدعي تسمع البرنامج  بس متاكده دتراقب وتسمعنا
غيرنا الموضوع  للخطط. المستقبليه
واحنا نعد الدولمه

:تدرين ايه
دافكر بعمل  ثاني بمستشفى كبير

: وين تلگين وقت والمساعدات
شلون ترى يگطعوها عليج

: اشتغل بالمستشفى فترة الليل ...والنهار بالمختبر

واذا على المساعدات فهمه كل تلث اشهر يگطعون شويه منهم خلي يگطعوهن ويفضوني
وفي قرار ثاني

انطتني تنبيه  ( اشتغلي واحجي )
شنو القرار الثانيد

: نبيع البيت بالعراق ....
ونشتري بيت اهنا ....
واثاث جديد...  وحديقه مرتبه ...
وسيارات جديده

: هذا التفكير وراه شي مجاي من فراغ
نصت صوتها. وباوعت لماما وحجت

الضاهر  رعودي مسيطر على تفكيرج
واني هم نصيت ورديت

: فارس احلامي

ضحكت

: لج فارس احلامج هسه لازم متزوج وعنده اطفال اثنين

: لا تهبطين معنوياتي
خليني عايشه احلى حلم

ايه : هسه يموت ويتركج
لاانتي صاحيه ولا حلمانه

: لا اسم الله
انتي تريدين تگابيني وخلص
انشغلنا باحاديث وطبخ واحلام
وضحكات لحد

رجعت روان من المدرسه
الي جذبتها  ريحة الاكل للمطبخ

: الله ريحه الطبخ
هنيالكم تاكلون واني بس اتفرج

باست ماما وشالت الهيد فون منها وگالتلها
: ماما خليني اكل شويه

: سوده عليه يمه ملاك خليها تاكل شويه

: مسويتلها اكل خاص بيها
يله اكلي حتى اخذج للابره

: افففف

ملاك : لاتتاففين باجر رايحين سفره
استاذ رعد دعانا بارك العراقيين

: صدوك رعد
كلنا نروح
ميخالف اتصل بمروه وتحسين يجوون ويانا

: لا هو گال عائليه حتى يتعرف علينا

: لعد اروح اجهز ملابسي
اخاف ارجع من الابره تعبانه
وانام راسا

: عفيه بالحبابه

توجهت للغرفه بعدين رجعت وسالتنا

؛ هذا الاكل للسفره

بلي

:  ملاك لازم تسالين مستر رعد يشحب حتى تسووينه

گالت الجمله ودخلت غرفتها
اني وايه ضحكنا على خيبتنا

:ولج ملاك شوفي روان تفتهم احسن منا
وفكرت
روحي اتصلي بيه وهم حجه تفتحين موضوع

رفعت ماما الهيد فون وهيه تسمعنا

: ترى داسمع مو طرشه

: لاتخافين ماما بعدنابالبدايه
دنخطط
ادعي يصير عندج نسيب
وتخلصين من ملاك وبعدها اني 

: خلي اشوفه هالرعد المخبوصات بيه

————————-
روان

بعد العلاج وانقضاء ليله اصبح عذابها معتاد عليه

اشرقت الشمس ...وحان اللقاء
تهيأت كطفله تهيات للعيد
عيدي انا
  الذي صار كف  حنان مسح فوق راسي ....
وملأ قلبي ضحكات

طلعنا كلنا بسيارة ملاك
البارك حول بيوت معظمهم عرب
وسموها بارك العراقيين لكثرة تواجد العراقيين

صادفتنا زفه. لناس عرب ومدام الزفه الصبح يعني لغير ولايه رايحين وماخذين العروس
سيارات الزفه تمشي بانتظام
وفقط اغاني وهورنات

ايه تحمست زايد

فتحت  اغاني بالموبايل وطلعت من الزجاج تهلهل

: وج ملاك امشي وراهم الله عليج خلي نشوف الزفه

صارت سيارتنا مع الزفه

وهيه مستمره  تصفك وتهلهل

واحنا نضحك
وهيه تهلهل  وتگل ل ملاك دگي هورن

انداريت على ماما حتى تسكتها

: ماما ايه  اول وحده تتخبل رسمي بهذي العائله

سحبتها ماما من التشيرت حتى تدخلها 

: ولج كافي على شنو تهلهلين

دخلناها بالگوه

لحد وصلنا الضحك  الي ضحكناه صار سنين مضاحكيه
وصلنا
نزلوا اخواتي الگدوره والفراش
وماما نزلت كتبها
وگعدوا  بجانب شجره كبيره
ومصطبه قريبه
وعلى النار هادئه  حضروا  الجاي يخدر بطء

اني رحت للمراجيح

حتى اكون اول وحده تشوف رعد من يوصل

وصل شفته من بعيد
عينه على اخواتي وماما
وگفت حتى يشوفني اني اول

شافني واجى عليه

: ها بيبي وين البقيه

: گاعدين  ليش مشفتهم

مجاوب

:تحبين ادفعج حتى تمرجحين اعلى باباتي

: يله

اخذ الحبل ودفعه حيل بالعالي

تارجح قلبي اعلى واعلى
فما هدأت  ارجوحته ولا استكانت
وماعرفت من الذي يدفعني ....

هواه في قلبي...  ام يداه
تدفعني بقوه ل اعلى  واعلى
فيعلو صوت بهجتي
بعودة طفولتي

تعب وهو يدفعني
وطلب  نروح يم البنات

: يله تعالي نگعد واسلم على ماما

رحنا يم البنات  الي كانوا ينظروله بتمعن زايد
وسلم على ماما
حتى ماما دققت هوايه بيه
ومن نظراتهم اله سلم بخجل عليهم

: شلونج يمه

: هلا بيك يمه تفضل
اگعد يمي

: تامرين امر يمه

وهو يگعد سلم على البنات

رعد : شلونكم بنات

ردت ملاك  وهيه تقدمله.  وساده صغيره يجلس عليها

: شلونك استاذ
هذي ايه انت مشايفها

: شلونج ايه اتشرفت

وبدت المجاملات بينه وبينهن

:بطلي كلمه استاذ ملاك
صح لو لا يمه

: على راحتك هيه الناس مو بالالقاب
اهم شي نيتها وگلبها الصافي

: والله صحيح حجيج  يمه

ملاك :

دارت الاحاديث
وبعدها اطباق طعام ....
وجاء دور اغانيه
وصوته كتراتيل ملائكه في محراب دينه العشق
غنى لي
وغناه قلبي

تركنا المكان الساعه خمسه العصر
ودعناه بكلمة الله وياك

رعد : الله وياكم.
مشيت مسافه صاحني
رجعت
: ملاك اطلب طلب منج

: تفضل اكيد

: اني هسه صرت صديق للعائله ومن حقي اخذ قرار يخص روان

: طبعا

: روان محتاجه تتعلم انكليزيه بسرعه وانتي الله يعينج
متلحگين فخليني اني اقوم بهذا الدور واخذها بالمعهد عندي
هم انتي ترتاحين وهم هيه تستفاد
ولاتفكرين باجر اني معتبر نفسي واحد منكم

: والله يااستاذ مااعرف شلون اشكرك وشگلك

: اني اكولج شتگولين گولي رعد بلا استاذ
لايصير دمج ثگيل
وبعدين على شنو راح تشكريني كافي راح اكسب شوفتكم كل اسبوع

: انشالله مثل متحب