السلام عليكم
راقبت التفاعل في صفحتي وبيج قصص مروه وفي الوتباد
التفاعل ميشجع انشر يوميه
فاحتمال يصير بين يوم ويوم
الكتابه جهد وتعب اذا مافي تشجيع مااگدر لااني ولا غيري نكتب
يعني صفحتي الصديقات ٤الالاف التعليقات صار يوم كامل خمسين
اعتذر من الي يتابعون ...
بس هذا الغبن في قصصي ديشجع كاتبات على سرقه القصه واضافه افكار ويبنن عليها روايات
والقصه هذي لسه مابدت باحداثها. انتم تعرفون مااكتب شي مكرر ولحد الان ماوصلت ل احداث مهمه
فرجاء صوتوا للبارت وعلقوا
🌹🌹🌹🌹🌹🌹
#نوارس-مهاجره6
#زينب_الموسوي
ايه
انتظرت تصحى روان من البنج
تلث ساعات
مرت على خروجها من العمليه
وهيه على نفس النوم
اولاد عمي تركوا المستشفى
حتى يحضرون تجهيزات العزى
وطلال بقى ويايه
صار الفجر.... شفته تعب وامه اتصلت بيه تسال
جاوبها
( مااگدر اترك ايه لوحدها
وحضر التجوال هسه )
سده واجى يمي
واني على الارض
: ايه تعبتي حبيبتي
نامي يم روان
: ياريت اگدر انام
گلبي ياذيني
ماادري شلون متحمله
كعد يمي وحجى بصوت حنين هاديء وميخلو من الحزن
: تاذيني اليه ايه والله
ارحمي بنفسج وحاولي تنامين
: روح انت ارتاح شوف بالردهات الثانيه مكان ونام
: انام وانتي تبجين وحزينه
طلع جاب كرسي من برا
وانطاني ايده حتى اگوم
گمت گلي
اگعدي على السرير
گعدت وهو بجانبي على الكرسي
واستمر يواسيني بكلمات عزاء
: الله يرحمه عمي
هسه متاذي عليكم حيل
هذا البجي دياذيه
انتي تعرفين هو شهيد رجال ماله ذنب ...
والشهيد بالجنه تستقبله الملائكه والمؤمنين ...
اكيد غلط تاذين شخص بالجنه
: يعني شگدر اسوي
احبس دمعي والله موبيدي غصبن عليه يجري
اخذني بين اديه
ما وجدت امامي ملجأ غير احضانه
لجئت لها
احتضنني كاننا... جسد واحد
ونبض واحد ...
ودموع سالت على كتفه
وهو يردد
(لچ اني موجود )
(لاتخافين
اموت ولاتبجين ايوته )
في لحظتها
تحسرت داخلي وتسالت
ان كنت موجود لي
فما حال اخواتي وامي ؟
من لهن ؟
طلال : اتمددي يم روان
يله اسمعي الكلام
تمددت يمها واخذتها بحضني
مشى كم خطوه والتفت عليه وكلماته قبل ليطلع
انطتني الايعاز اغفى وهو يگلي
: اني واگف بالباب اطمئني ونامي
نمت تقريبا ساعه
وعت روان تون
گمت من السرير اخاف مضايقتها
فتحت عيونها لمستها باديه : روان حبيبتي شلونج
صرخت صرخه كل الموجودين
بالممر ركضوا على الغرفه
روان :
بابا بابا بابا
الدكتور والممرضات لزموها
طلال شبيها دكتور
الدكتور : انهيار عصبي
كانت تضرب براسها وتصرخ لزموا اديها بدا جسمها كله يرجف
عبالك انصرعت
طلع الدكتور ورقه
كتب بيها ابر
وانطاها لطلال
الدكتور : هذي الابره اشتريها من برا بسرعه
اخذ الورقه وركض
مرت نص ساعه روان تهتز كلها وتصرخ
الممرضات ضربوها
حتى تسكت
صيحت بوجهن
: لاتضربوها
كافي عوفوها
ضميتها اليه احاول اهديها
جاب طلال الابره
حاولت الممرضه تضربها هيه تصرخ
واني كامشتها حيل اخاف يضربنها ويتاذى مكان الطلقه
بقت بايدي لمست شعرها المليان زجاج ودم خصله خصله وحجيت وياها
: حبيبتي روان اهدي شويه مو زين عليج تصرخين اهدي
واني يمج
عيونها تحمل نظرات سوال تريد تساله وتخشى الاجابه
ظلت تدور بنظرها بين الواگفين
عن شخص اني وياها نعرف راح وبعد ميرجع ....
الممرضات شافوها ساكنه ضربوها ابره...
ونامت وهيه تبجي وتتحسر
وتكررت حالتها
الدكتور فهمنا نطلعها للبيت
ونراجع دكتور نفسي على حالتها
طلعناها العصر لبيت عمو بدري ابو علاء
وصلنا على بيت عمو بدري العزا كان هناك
شفت ...ماما وملاك ...
مبين عليهن الكسر ...
صرخت بنص النسوان لحد وگعت بالارض ...
وعيت بالليل بغرفه مرت عمي ...
وملاك تقرا قران ...
وماما تصلي ..
وروان لازمه طرف دشداشة ماما
ومغمضه عيونها وهيه گاعده
استغربت وضعها
: شبيها روان ليش مغمضه
: تخاف تفتح
وتخاف تترك ماما
تگلها ( لاتركينا مثل بابا )
: اويلي علينا يابه
تعال شوف
ترضاها يابه
استمر بالعزاء تلث ايام ...
وعزاء الي بداخلنا مااضن ...يخلص للابد
——————————-
ملاك
نتوسد اليتم ....
ونلتحف الحزن ...
حياتنا هدت... وذبح من كان يسند وجودنا
لاسقف يحمينا ...ولا ظل يظللنا
ولا اب لنا
تركنا الالم محبوس بعيونا الباكيه
في كل وقت
ارتضينا بالقدر ورضخنا للواقع
بعد الفاتحه ل بابا انتقلنا للعيش مع بيت عمي بدري
بغرفه وحده
وعرضنا بيتنا للبيع بنص السعر لكون المنطقه مابيها امان
مرت عشر ايام علينا اصعب ايام عمرنا
مراجعات للاطباء لروان وكلهم يعيدون نفس الكلام علينا
ملاك :دكتور بس نريدها تفتح عيونها ومتضل ضامه راسها بحضن ماما
الدكتور: تحتاج وقت عدها صدمه نفسيه ومازالت تتذكر الحادث احجوا وياها طلعواها من الصدمه
ملاك :متقبل تحجي وعلى طول لازمه ايد ماما لو طرف ثوبها وتمشي وياها
حمام متروح لوحدها الا وحده منه وياها
الدكتور :كل الي اگدر اسويه الكم هو المهدئات وانتم دوركم تحسسوها بالامان
ملاك :وينه هو الامان احنا محاسين بيه
الدكتور: صحيح الامان ماموجود بالشارع لكن روان تفتقد الامان حتى بينكم الظاهر الوالد كان معنى الامان الها
ملاك :كان الامان النا كلنا
شكرا دكتور
تواصلت سلسله زيارات الاطباء بدون نتيجه
والخوف على صحتها من الشظيه الموجوده يزادد عدنا
وماما كل يوم تخليني اخذها لدكتور تطمئن عليها
ملاك : ماما البارحه اخذتها لدكتور
وگال مع الوقت تنسى وترجع لطبيعتها
ماما : شسوي من اشوفها اتخبل
صار. اسبوعين مفاتحه عيونها
ملاك : ميخالف نحجي وياها
لحد ميصير حل ياماما
حتى الفلوس العدنا راح تخلص
ماما : اخذي الذهب العندي بيعيه لحد ينباع البيت ونتصرف
اخذت الذهب وقررت العصر اخذه ابيعه
والحسره متكسره داخل صدري
الحسره مو على الذهب ...
وانما على ايام جايه حلكتها اكثر سوادا من الثياب اللابسيها ....
العمام ماخذين دور المتفرج مابيهم. واحد گال اني اشتري الدوى لروان او اخذها للدكتور
والغرفه الي گاعدين بيها
من اول يوم سكناها بلا افراش او بطانيات
جبنا افراشات واغطيه من بيتنا
واصعب شي هو دخول الحمام
ابيتهم حمام واحد ....
وعددهم ثمن اشخاص مع الاطفال .... والماده متوفره عدهم .... لكن في ناس تحب البهذله
ننتظر الليل يله ندخل الحمام من خجلنا
وجتي اللحظه الي
تكشفت الوجوه الحقيقيه
وسقطت الاقنعه وتحديدا الظهر
بالهول..... كان علاء يتغدى
صاحني اگعد يمه
ملاك : اني تغديت اكل انت بالعافيه
نداريت اريد ارجع لنفس الغرفه
صاح ورايه
: اشو متغيره عليه
وحتى الحلقه نازعتها
: نزعتها لان حزينه
: ايه هم حزينه
اشو منزعت حلقه طلال
: بسيطه هسه ارجع البسها
: تعالي دنسولف اني وياج بخصوص مستقبلنا
اجيت يمه واني ماطايقه نفسي ولا وجودي بهذا البيت
كعدت اگباله
على قنفه
غير مكانه وياه الطبله الي عليها الغدا
حتى يصير بصفي
: شوفي ملاك انتي وامج مالكم احد غيري
( كان ياكل ويحجي واني اتخبل من هذا الطبع )
واصل حديثه
ايه راح تتزوج غريب وتطلع ورجلها مامحتاج ...
روان طفله متفتهم
واحنا راح نربيها ونصرف ....عليها اني وياج والدتج مريضه وكلنا نموت ....
لذلك افكر
نبيع بيت الاعظميه
وبيت الجهاد
نفتح مشروع زغير ....
ونشتري بيت ينكتب.... باسمج ....واسمي
شتگولين
كانما الارض انهارت بيه وسقطت من عليين... واني اسمع تخطيطه وحتى اعرف خباياه اكثر... سايرته بالحديث
:واخواتي وماما قابل اخذ حصصهن
: ايه مستحيل نخليها تورث ....رجلها غريب وتاخذ ورث جدي شنو ازواج احنا
: قصدك ورث بابا مو جدك ......
مجرد حس تعصبت غير اسلوب كلامه
: هسه هاي مو مشكله ....
شوفي ملوكه اني وياج لازم نعقد ...وايه منخليها تتزوج اذا ماتتنازل ...
: ايه عاقده شيخ ومحكمه طلال رجلها محد يگدر يمنعه
: ياخذها بالعافيه بس توقع تنازل عن ورثها والله وياها
: اني اروح انام تعبانه
كمت من يمها .... ناري بگلبي
ايده لزمت طرف ثوبي وهو يگلي ( مو دنسولف حبيبتي )
ضربت ايده بكل قوتي ...
لزم ايده وسكت خاف اصرخ عليه ( حبيبتي... والله عمرك ماحبيتني وكل همك ورث بابا )
هذا ردي عليه وعيوني ودها تعمى ومااشوف ابتسامته الحقيره
تركته ورحت اخر جمله گالها
: روحي
وفكري بالحجي
ترى لمصلحتج هذي
دخلت للغرفه مااعرف بشنو افكر وكيف اگدر اواجه طمع عمامي بينا... خفت احجي ل ايه تتعارك وياهم... وخاصة هيه من الفاتحه متحوله ل انسانه عصبيه.. متتفاهم ...
ولان اعرف موقفنا ضعيف .... يعني ساكنين عدهم ونتعارك وياهم...، ميصير
بدون ماافزع ماما
وروان الي نايمين
طلبت من ايه تتصل بطلال
: ايه اتصلي بطلال
والعصر خلي ينتظرنا يم عياده الدكتور
: ليش اتصل بيه ...
هستوني جنت احجي وياه
: اتصلي وبعدين احجيلج
: هسه اتصل
اتصلت بيه وتواعدنا
العصر
بحجة اخذ روان للدكتور
بدلنالها العصر ... وهيه تصرخ ...( اتركوني ماما) ...
شلتها على كتفي وطلعنا تلاثتنا
اخذنا. تكسي من باب البيت ...،
وصاحب التكسي اثار فضوله ... تلث سيارات باب بيت عمي ...،
جاوبته ايه ( مو سيارتنا هذي )
وصلنا قرب عياده الدكتور. في مطعم
واتصلت ايه بطلال الي يدور مكان يوگف سيارته بيه
صعدت اني للعياده
اخذت رقم عند الدكتور. ....ولمن نزلت طلال موجود يم ايه ......وگعدنا نسولف
ملاك : طلال ايه اسمعوني علاء ناوي يعرقل عرسكم ....
وراسم على البيتين
ياخذهن بعد ميتزوجني
مجرد سمع الجمله تحول كله لغضب ... واني كنت محتاجه انسان عاقل اخاطبه
اخذ ايد ايه يحاول ياخذها وهو يرد عليه
: ليش هو بكيفه هذي مرتي
اكعد طلال واسمعني الامور متجي هيج ... عنده شرط تتنازل عن ورثها
رد بكل قناعه :
: تتنازل ماعندي مانع
: طلال اذا ايه تنازلت راح يصفى الورث الهم... حتى اني وروان وامي يطردونا بالشارع
: اني مااتنازل
عمامي اعرف غايتهم كلش زين ...من اخذونا تحت جناحهم قصدهم الورث القديم... مو خايفين علينا
: اسمعني طلال انت لازم توگف ويه مرتك ...
وتطالب ورثها
: انتي منين خايفه ايه مرتي ترى علاء مو بكيفه يتصرف ....
العمام موجودين واكيد ...ميقبلون بهل حجي
: طلال احنا اعرف بعمامنا خمس سنين محاكم ويه بابا على البيت ....
هسه بابا راح وبقينا بس نسوان.... وعايشين عدهم
وانت تعرف احنا لا وظايف... ولا سند نريد وگفتك انت والدك
: انشاالله اوگف وياكم كلكم
باجر نجي اني والوالد نحدد يوم عرس
كمزت ايه من مكانها
ايه : ياعرس الله يخليك
بهدوء وعقلانيه فهمها
: مو هسه اقصد بعد اربعين المرحوم وبلا زفه وهوسه
وبحجة العرس تتحولون كلكم عدنا
: واذا عمو گلك تتنازل عن الورث
: شوفي ملاك اني المهم عندي انتم ...
الورث ميهمني ....
لكن هذا حقكم ...
تريدوني اتدخل ماعندي مانع
....وزراجنا اذا منعوه ...
اخذها منهم غصبا عليهم
: شلون يعني نتزوج عصبن عليهم
:
يعني ساعتها تجيين ويايه شيصير يصير
ترى انتي مرتي ايه
وعدنا طلال يوگف ويانا في حالة
عمامي طلبوا. تتنازل عن ورثها ايه
مااتصرفت كرها باعمامي بقدر حاجتي
لشخص يوگف ويانا ....
لوحدنا منكدر عليهم وخاصة احنا ساكنين عدهم
بطريق الرجعه للبيت في صايغ قريب .... دخلنا اني وايه للمحل
حتى نبيع ... طلعت العلبه وانطيته ..، والرجال اخذ يگلب بالقطع ويوزنهم ...، اثار الموقف شجوني ... في قطع اتذكر. بابا. من جابهم هدايا ل ماما والنا
خاصة من ننجح .... وهسه راحت لحاجتنا الشديده .... للمال ....
لكن حاجتنا للي جاب الذهب (بابا ) بشنو نعوضها
بعنا الذهب اني وايه
وبالطريق نوينا
نبدي نراجع على تقاعد والدي
ثاني يوم راجعنا على المعامله ..... ومافي احد من عمامي او ولدهم راجع ويانا على التقاعد.... حتى مسالونا نوصلكم بدل التكسيات والوضع المگلوب
وبدوا يلحوون على العقد بيني وبين. علاء...
وخاصة امه
جتي الغروب لغرفتنا احنا هالكين من المراجعات تريد احدد يوم العقد ....
: عمه بعد زواج ايه انشالله نعقد
: شنو السبب غير نفتهم ....يعني ايه تفرح وتتزوج الغريب
واحنا حرام علينا نفرح
: مو هيج الحجي
عمه دتشوفين وضع روان... وماما
تتزوج ايه وبعدين افكر اعقد
: تفكرين شنو بنتي هذا مو الاتفاق ويه المرحوم
من قرينا الفاتحه وياه
: هاي هيه على الاتفاق تتزوج ايه اول يله اعقد
طلعت من الغرفه اتدردم
———————————
ايه :
تغييرت حياتنا بعد الوالد
الحزن حط رحاله في كل جزء ....من حياتنا
بوجوده كنا ناكل... ونلبس ...ونطلع... ونصرف بدون منفكر منين تجي هذي الفلوس
مااتذكر بحياتي طلبت طلب وماانفذه اليه مو اني وبس كلنا
بعد عشرين يوم على وفاته
ظلينا نسمع غلط... وكلمات جارحه من تماضر زوجة اخو علاء
خاصة اذا روان صرخت راسا ترد عليها
( وجع فززتي الولد
متوتين وتخلصينا )
خبرت ماما وملاك نرجع لبيتنا ردت ماما
( وين نرجع الوضع صار بالمنطقه اصعب واكثر الجوارين شالوا . واني مالي گلب اشوف المكان الي انقتل بيه محمد . )
وظلينا متحملين الذل عدهم والي زاد هالذل
موضوع زواجنا اني وطلال ...
زارنا طلال وابوه وامه حتى يحجون بمسالتنا ....
استقبلهم عمو بدري بوجه ثكيل وكانما جايين يجدون منه
...دخلوا للصاله
فات من يمي علاء واني بالهول هز ايده ....
ويباوع من فوك ليجوى عليه
اكثر وقت تمنيت بابا موجود ويشوف ....
(اه يابابا)
——————————-
طلال
من وفاة والد ايه
عمامها تغيير موقفهم مني ....
الفاتحه كنت اسمعهم يتحدثون عن والدهن
ويرددون شحصل من ركضه علمود بناته ...
هسه يتزوجن ويروح ورثه للغربه
من اتصل ب ايه حتى نزورهم
تگلي ميقبلون ...
حتى والدتي ميقبلون تزورهم ...
اتصلت بعلاء واخذت منه موعد ازورهم .... من صوته عرفت هالزياره مراح تعدي على خير ....
جينا عدهم نستطلع النوايا الحقيقيه
سلمنا وگعدنا
بادر والدي بالحديث .... حتى يقطع الصمت ونظراتهم النا الي تگول ( شعدكم جايين )
ابو طلال : ابو علاء احنا مقدرين حزنكم والله يعلم شگد متاذين عليه للمرحوم
ابو علاء : والنعم منكم
اي شنسوي راح وترك الحمل ثگيل علينا بنات وزوجه مريضه
ابو طلال : الله يساعدكم
جايين نخفف عنكم الحمل ونحدد موعد لزواج طلال وايه...
تدري همه عاقدين يعني المرحوم انطاها بحياته ...
ومنريد... زفه.. وعرس.. وهوسه
ابو ملاك غالي علينا مثل ماهو غالي عليكم
ابو علاء : صعبه من الناس شتگول على الاقل تمر سنه
ابو طلال : لا ياابو علاء سنه شنو
علاء : صدك يابه سنه هوايه
خليهم يتزوجون حتى اني وملاك هم نتزوج بنفس اليوم
ابو علاء : اذا مصريين لعد بعد الاربعين زواجهن اثنينهن
تنفست وطلقت انفاسي الي حابسها وماصدگت الي گالوا
لحد
عمها كمل حديثه ....
بس ابو طلال عندي احجايه يمك
ابو طلال: تفضل عيوني كدامك
ابو علاء : انت تدري هنه الهن ورث
بيت الاعظميه لوحده سعره نص مليار... اذا مو اكثر
والي متعرفه انت هذا البيت عليه مشاكل ومحاكم ...
تقبل يتطشر حلالنا ويروح لغريب
ابو طلال : اذا قصدك ابني الغريب
فابني ممحتاج. وماعنده مانع تتنازل عن الورث اذا وافقت هيه
لان هذا حق الله وشرعه... والبنات يتيمات ...وحتى وظائف ماعدهن
ومن ناحية ابني مستعد يكتب تنازل بالمحكمه ماله اي علاقه بورث زوجته
علاء : ياورث يازوجته
عمي هذا حلالنا... مرت جدي ام المرحوم عمي
باگته.... قشمرت الرجال وهو يموت سجله باسمها
حقنا... ورثنا ...ابنك منو ايه منو
يابه. احجيله بالقلم العريض
ماالكم مره عدنا
تتنازل عن ورثها اخذها غير هالحجي ماكو ....
كل الي گاله وهو واگف وفتح باب الصاله حتى يسمع البنات
هنا اني هم وكفت گباله ورديت بصوت اعلى
طلال : ايه زوجتي بياحق تمنعها
اقترب اكثر ... استعديت اضربه
ابويه لزمني
علاء : بدون حق يله شتريد
روح اشتكي بالمحاكم ليش هيه اكو دوله
رد ابويه وهو لازمني
ابو طلال : حجي ترضى بهذا الحجي
ابو علاء : هذا الحق والحق مينزعل منه ....
ولد عمها سبعه تاخذ ايه حقهم وتنطيه ل ابنك حرام
طلال : والله انتم متعرفون الحلال وااحرام
علاء : اي منعرفه ديله تفضل برى
انت وابوك
طلال : بسيطه هسه تشوف اخذها وغصبن عليك
علاء : انت رجال سويها
ابو علاء : كافي علاء عيب
ابو طلال : انتم خليتوا بيها عيب
يله ابني
نطلع ايه عدها عم ثاني نتفاهم وياه
وصلنا المضارب اني وعلاء
مااعرف شلون تحملت حجيه وغطرسته
لو ما صوت امي تبجي وابويه لازمني ادوس بگلبه
صعدنا سيارتنا اني اسوق من حرگتي مااشوف الطريق
ابو طلال : نروح على عمها الثاني بيته قريب
طلال : نفس الحجي ذولي متفقين
واصلا اشك همه ورا قتل ابو ملاك
والله على شنو ينقتل رجال فقير ...وماعنده اذيه
ام طلال : والله نفس احساسي
هذوله ولد اخوه عبالك مشايفين ورث ممصدگين
وهسه تشوف ياخذون ملاك غصب وحتى ايه يجوز ...يتزوجها واحد منهم
طلال: والله مااطول عايش محد يتقرب منها ايه مرتي بكيفهم
هسه اروح اجيب عشيرتنا ونفضحهم
يريدوها دم خلي تصير دم
ضربت امي وجهها وهيه تصيح
( يمه ابني ... على شنو الدم يمه طلال ... )
والدي حاول يهديني
ابو طلال : انتظر نسمع من عمها الثاني وبعدين نتصرف
بالطريق لبيت عمها
اعصابي انهارت. اريد الزم الاستيرن واسوق مااگدر
ابو طلال : وخر. انت اني اسوق
نزلت من السياره وهو ساق
ابو طلال : على كيفك ابني الامور متجي بالعصبيه نتفاهم وياهم افضل
طلال : ليش همه خلوا مجال للتفاهم
عمها النذل حاسب قيمة البيت
والله العظيم حبيتها قبل لا اعرف قصه البيت والورث سنه ثالثه كليه يله حجتلي
ابو طلال : تحلفلي ليش مااعرفك اني شنو
يله ابني اهدا
ونشوف شيصير
وصلنا لعمها الثاني
الظاهر منطيه خبر
من استقباله البارد ورده علينا
وجدي : ابو طلال انت ماترضاها ....
يعني هم تاخذون بنتنا وهيه عدها سبعه ولد عم ...وهم تريدون حصه
قدر موقفنا من وافقنا على ابنك ومااعترضنا
ابو طلال : ياخويه احنا منريد الورث البنيه هيه الي تريده
وجدي : اي خلي ابنك يقنعها ويجي ياخذ مرته
طلال : انت نفسك دتگول مرتي بعد باي حق تمنعنا نتزوج
وجدي : استغفر الله ابني منو منعك تاخذ مرتك ...
بس الحق حق انت غريب
ميصير تاخذ البنيه وياها ملايين ....
ولد عمها شنو زعاطيط مو زلم
استمرينا نقاش وحجي وتهديد
قررنا نطلع
الحجي وياهم بدون فايده
رجعنا بالسياره وصلت لقناعه وحده
طلال يابه ماعندي غير ان . اتفق مع ايه باي مكان واخذها لبيتنا ونتزوج
ابو طلال : اخواتها يظلن بموقف صعب وامها خطيه مريضه
طلال : وشنو الحل
ابو طلال : اقنع ايه تتنازل
واخذها
طلال : متقبل اعرفها مع ذلك احاول وياها لان ماعدنا حل ثاني
ام طلال : اني هم احجي وياها
ابني يحبها وهيه تحبه
فلوس شنو الي تخليهم يفترقون
——————————
ايه
وصلت بين ولد عمي... وطلال حد العرك ...والمضارب
وبعد مطلعوا
دخل عمو... وعلاء
لغرفتنا بلا ميطرقون الباب ... عبالك هجوم
وصوتهم عالي
وروان تخاف من كلشي وصرخت من دخلتهم
كمزت بحضن ماما
ا : اسم الله يمه اسم الله
ابو علاء : ام ملاك بنتج ايه تريد طلال بالمقابل اليه شرطيين
ام ملاك : تفضل حجي شنو شروطك
ابو علاء : ملاك تتزوج علاء بنفس اليوم ....
ايه تتنازل عن الورث
اصابني الخوف والخشيه واني اسمع بقية كلامهم الي يبدو سيناريو. مكتوب ومخطط اله ...
اي جواب اجاوبه الگه رده جاهز عدهم ....
ايه : اتنازل عن الورث ...
ل ماما ماعندي مانع
علاء : امج غريبه مالها حصه ....
تتنازل عن عن حصتها لروان
....وانتي تتنازلين لملاك
ابو علاء. وروان قاصر اني الوصي عليها
ترتيب متناهي متاركين اي ثغره
اباوع على ملاك الي واگفه امامهم ضعيفه وهمه واگفين بوجهها مثل الي يريدون ينتهشوها... وينتهشونا وياها
باوعتني هيه ايضا واثنينا
لاحول ولاقوه ....
نزلت راسها الكان عالي ...
وبجت ..،وخاطبت عمها المتجرد من الانسانيه ...
ملاك : عمو اني داسمع ومااصدك الي داسمعه ...
بيادين هذا بيا شرع
الام مالها حصه
واتزوج غصبن ماعليه ....
وايه تتنازل عن حصتها ...
افرض زوجها اختلف معاها وتطلكوا... او مات لا سامح الله ...شنو مصيرها
ابو علاء : لعد منو. گاللها تاخذ غريب ...
ذولي ولد عمها وتختار واحد
جاوبته حتى ابين اله منو ولد عمي
ايه : ليش همه ولد العم شسولنا
كل همهم الورث والله لو ماعدكم طمع بينا حتى بيتكم متلفونا ليله وحده
والله العظيم اشك ان قتل بابا تخطيط ولد عمي ....
انتفظ علاء وهو يرد عليه والارتباك واضح عليه ...
واديه يريد يخليها على حلگي
علاء : انتي تنجبين وتسكتين ...
اذا سمعت هالحجي مره ثانيه صدگيني تموتين
بعدت ايده عني واني اشوفه يرجف ومهزوز لكن مسكتت
: انت قتلت بابا ...عمو قتلت اخوك على بيت ... اقتلنا احنا همين
سمع الجمله باديه اثنينهن لزم راسي يريد يضربني بالحايط
ملاك دفعته وماما تعيط. وابوه لزمه
صار يم الباب وهو يلهث ....
وتوجه بكلامه لملاك
( اسمعي ولج اخاف معاجبج تتزوجيني ترى اني هم ميعجبني الزواج منج
بشنو احسن مني انتي
على الاقل اني عندي وظيفه
مو مثلج عاله
زواجنا رد دين ... حق اخذابوج بلا وجه حق .... وسكتنا لان كانت الدوله قويه : هسه شريعه غاب . )
ردت ملاك عليه رغم صوتها المخنوگ بالبجي وكرامتها المسحوگه
: والله انت اكبر عاله وتريد تعيش على ورثنا
تهجم عليها
دفعته اني
ضربنا اثنينا
ملاك : عمت عينك ولك بعمرنا مانضربنا لا من ام ولامن اب....
اه يابه خليتنا بولاية ظلام
....الله لاينطيكم
ابو علاء: ادبي بناتج ام ملاك لايشوفن شي مايسر عدو ولاحبيب
ضلت ملاك تصرخ
( اطلعوا برى قتله ذباحين )
طلعوا وظلينا بزاويه نبجي
وماما حاضنتنا
وروان ساده عيونها واذانها
وبدت خطابات مرت عمو وتماضر بالسب والشتم علينا
اخذت التلفون اتصلت بعمو وجدي
ايه : عمو. تقبل ننضرب وبابا مصار شهر من راح
وجدي : ليش منو ضربكم
ايه : عمو وعلاء
يريدون الورث كله الهم
وجدي : شلون يعني
ايه : يريد ماما تتتازل لروان
وروان هو يصير الوصي عليها
وملاك يتزوجها علاء
وجدي : ليش بكيفه بدري وابنه يلعبون شنو ....
اني ولدي
خراعين خضره ...
اني جاي
سديت التلفون وحجيت مع ملاك
: طلع عمو بدري هم يريد ورث
وراح يجي وتعلك
: خليهم ابينهم
واحنا من باجر نترك البيت ...وناجر حتى لو فندق
ونخلي محامي ضدهم
واطلب فتح تحقيق بقتل بابا
: فلوس المحامي منين نجيبهم
ملاك : ابو سما صديقتي محامي واتفق وياه نبيع البيت ورا ميطلع حجج باسمنا كلنا
وانتي تاخذين طلال عناد بيهم
لاتبجين الايد الي ضربتنا اليوم
ماخليها تتكرر لو اعرف اجدي على الارصفه
رن موبايلي طلال
: هذا طلال يتصل شگله
: جاوبيه گوليله يجهز اهله وعمامه ويجي ياخذج
حتى ميگولون انهزمت
جاوبت تلفونه
: ايه اسمعيني صح الي اكوله صعب عليج
لكن مو اصعب من ننحرم من بعضنا
عمامج ناويين على الورث رحت لعمج وجدي حجى نفس مضمون عمج بدري
: ادري بيهم
: اذا تدرين تنازلي عن حصتج لخاطر الله واني اعوضج
ان شاء الله اشتغل مع والدي واشتري بيت اخليه باسمج
ايه : المشكله الشروط الجديده
لازم... ملاك تقبل بعلاء... ولازم ماما تتنازل لروان وياخذ الوصايه عمو
: ذولي عصابه مو عمام
منو ديبجي يمج
: ماما تبجي
ضربوا ملاك. وضربوني
: ياعديمي الغيره
بسيطه علاء باجر انتظره يم دائرته واصفي حسابي وياه اله اخليه جنازه
: لخاطر الله اهديء
احنا مناقصين
عمو وجدي راح يجي وتعلگ
: لج يضربج واسكت
اذا مافرجت العالم عليه
ضليت اصرخ
: كافي تخبلتوا كلكم
لخاطر الله خليك بعيد
اذا تحبني لاتزيد المصايب
: لج فهميني شسووي النار جوايه
اگلت گلبي
: باجر نطلع من البيت
وناجر وراح نخلي محامي
: بس تطلعين من البيت خابريني ...
...زين افتهمتي
ترى عقل مابقى عندي
ايه : اهدء
وخلي نشوف عمو من يجي شيسووي
سكت شويه وبعدين گال
: كافي تبجين لخاطر الله
شتريدين اني گدامج
هذا بيتنا فارغ تعالوا بيه
تريدين ااجر بيت الكم لوحدكم .وكل الي تريديه اسويه
: الي اريده تتصرف بهدوء
انحرمت من بابا مااريد انحرم منك همين بعد مابيه حيل
: بس الموت ياخذني منج
...وحتى لو متت
تظل روحي وگلبي الج ..
ايه : اسم الله عليك
هو اني ناقصه قهر
: لاتنقهرين لخاطري
سكت شويه وهو يحاول يغير الحزن والشد بحديثنا
(اگولج شي )
: گول
: احبج
: هه شكرا
: شنو شكرا رديها هسه
: مااگدر قدر الوضع
طلال : افتهمت
: مراح اكسر بخاطرك
واگلك اني بعد بابا عايشه علمودك وبس
: حبيبتي
واني عايش الج وبس
انشاالله تتسهل الامور ونتزوج
: جرس باب بيت عمو يدك
يمكن راح تعلگ بين العمام
: خليهم اذا دخل اكثر من طرف راح يختلفون
: انت وين اشو صوت هورنات
: واگف على الشارع العام
نفسي. ضاقت وداتفرج على الشارع
: لاتتاخر ارجع للبيت ترى مو امان بالليل
: فد شويه ارجع . افكر بعيد عن اهلي لان مااريدهم يقلقون عليه
: زين اني اروح اشوف شيصير
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!