السلام عليكم
الشكر الجزيل لدعمكم وتصويتكم وتشجيعكم
وشكرا لكل بيج و گروب و ناشرات
دعمكم هو الدافع الي يخلينا نستمر ونبحث عن القصص ونكتبها
وشكرا لك الي راح يستمر بالمتابعه والقراءه لنهاية القصه
المليئه بالاحداث
🌺🌺🌺🌺🌺🌺🌺🌺🌺🌺
ملاك
في حيرة من امرنا ....وارتباك
وقهر ...
نجلس في غرفه صغيره
لنستمع مايقرره غيرنا
وكاننا قطع شطرنج ....
يحركونها كما يشاؤون
: دتسمعين العرك بين. عمامنا
ماما
مااعرف ردت او لا فقط تستمع وايه تدعي عليهم
: عساهم بالعمى خليهم يتعاركون
سمعنا عمو وجدي يصيح
: ابو علاء انت تعرف بيت الاعظميه اخذوه بالحيله
يعني مو من حقك ولاحق علاء تاخذوه لوحدكم
ابو علاء : منو گالك احنا ماخذيه
...ملاك راح تتزوج علاء... وايه راح تتنازل عن حصتها.
: خوش يعني البيت يصير مناصفه علاء نص واني واولادي نص
علاء كان اكثر واحد يصرخ احسه منهار من يحجي
علاء : عمي . انت واولادك شنو صفتكم حتى يصير الكم نص ...
ملاك مرتي وتريد تنطيني وام ملاك وروان كلهن راح يتنازلن اليه ...
انت ا ولدك جاي بهالليل هاد شعندك
يحجي بشمخره وثقه كانما كلنا اصبحنا ملكه
انفتحت غرفتنا من قبل عمي وجدي
: وينها ملاك. ملاك
تعالي اهنا عمو
طلعت للصاله اجتي ماما ويايه
وروان لازمه بينا
اول مطلعت الباب
سحبني. علاء من ايدي بشده الالم حسيته بگلبي مو بيدي
( فوتي جوى )
ضربه عمي وجدي من شافه دفعني حيل
وظل يصيح
: لاتمشي كلمتك عليها اني اريد احجي وياها ...
تعالي بنتي ...اگعدي يمي
سحبني من ايدي وسط
دهشتي واستغراب ماما وايه
من الظلام الي بگلوبهم ... والغل الي شايليه كل هذي السنين
لدرجة هالحقد مضى بابنائهم واصبح يحركهم الطمع لاغير
گعدت يم عمي وبدون ماانظر لوجوهم الكريهه
وكاني في محاكمه اجاوب اسئلتهم
: عمو انتي تريدين تتزوجين علاء وتتنازلين ؟
نزلت دموعي على الذله والاهانه الي احنا بيها وجاوبته
: عمو الله يقبلها عشرين يوم على وفات والدي
وانتم حايرين ...
منو يتزوج... ومنو ياخذ البيت
ليش عمو ؟
ننضرب وننسب
بدون سبب
مابيكم واحد سال على روان ...وگال ناخذها نعالجها
حايرين بالورث
ياريت تاخذون كلشي ويرجع. بابا ساعه وحده ...
اذا عدكم مخافه الله اتركونا بحالنا ...وكافي
اليوم علاء وهو يضربني سب بابا
تمنيت. عندي مسدس وافرغه براسه
مااعرف الي حجيته حرك مشاعرهم او ايقظ ضمائرهم
وگام عمو وجدي باسني
وگلي روحي ارتاحي
مااعرف شنو الي حجوه بعد ذلك
دخلنا للغرفه وقفلناها
وماما وگفت خلف الباب تحمينه منهم
ونزلت بالارض وهيه تبجي ....
تجمعنا حولها نبوسها ونمسح دمعها
و دموعنا ... على حالنا
........................
الصبح اتصلت بصديقتي سما والدها. محامي مشهور وماعنده طمع
وخبرتها
اريد قسام شرعي بأسمائنا كلنا
والبنيه ماتاخرت وعدتني تمر عليه وتاخذ الاوراق المطلوبه
: اريده سر الله يخليج
: بسيطه لاتخافين
سديت التلفون ورحت على جنطة ماما احضر الاوراق
گعدت ايه شافت تلفونها
: هذي وفاء اخت طلال داگه عليه الفجر
: لاتخابريها. هسه اخاف نايمه
: لازم اخابرها داگه كم مره
اخاف صاير شي
: زين خابريها ومن تخلصين نطلع نشوف مكان ناجره
——————————
ايه
دگيت على وفاء يدك متجاوب
قلقت
دگيت على طلال ميجاوب
دگيت مره ثانيه گلبي نغزني
وتلاشى كلشي من امامي ... فقط شاشة التلفون واصابعي ترجف وصوت ملاك
: على كيفج لاتنخبصين يمكن التلفون مو يمه
دگيت تلث مرات ماكو جواب
: ليش ميجاوب
گلبي عصرني
تركت ملاك الي بايدها من اوراق
وهيه تترقب الي داسويه
اتصل كل ثانيه واضغط على اعادة الاتصال راسا
: خابري امه
اكيد تگعد من الصبح وتجاوب تلفون
دگيت مترد
: شلون ملاك ولا واحد يجاوب
يمه صخام طلال شصار بيه
من خوفي اجيت بحضن ماما والتلفون بيدي
: على كيفج يمه يجوز نايمين
: ماادري
گلبي احسه مو بمكانه
عفيه ملاك ناخذ سياره ونروح نشوفهم
: ماادري شگلج
يله نبدل يمكن يجاوبون فد شويه
گومي غير ملابسج
گمت اغير ملابسي
واحس عقلي مو يمي
وضربات گلبي .....
تتسارع
دك تلفوني
وفاء راسا جاوبت فتحت خط
سمعت صوت صريخ
وصوتها تبجي
: الوووو وفاء وينكم
: انتي وينج
ولج طلال راح مات بعبوة ناسفه
كانت مزروعه على الشارع العام للامريكان
مااستوعبت حجيها
: شتحجين... طلال ..مات ..،شنو
شتحجين طلال وين
ركضت عليه ملاك وماما
: شصاير ايه فهمينا
: تگلي طلال قتلوه الامريكان ماادري شنو
ملاك : ياامريكان وينه لگوه
ظلينا اثنينا نصيح بالتلفون
ماافتهمنا شي او يمكن مااستوعبنا الي دنسمعه
وهيه تصرخ واحنا نصرخ
ذبيت التلفون وطلعت ركض
وملاك ورايه
وماما ظلت تصرخ
مااعرف بيت عمي عرفوا او لا
طلعت بطرگ روحي بدون حتى فلوس
كل همي اوصل واشوف طلال
ركضنا اثنينا للشارع
وگفت گدام سياره ..... ابجي وارجف
السايق خاف من عندي
وملاك يمي
هيه حجت اني مگدرت
ملاك : فدوه لعينك. لحي الجهاد
على الشارع العام لاتدخل بالفروع
السايق : اني مو تكسي
بس اصعدن
.........
ملاك
صعدنا السياره
اثنينا بدون احذيه
ولاحجاب
ايه احسها ودها تطفر من السياره
ورغم كان الازدحام بعده مبادي بالشوارع
كنا مجرد توگف السياره نگله
استعجل الله عليك
: ولج ملاك اخاف صدوك ميت اموت وراه اذا صدك
لامامعقوله طلال شلون يموت
والامريكان شجابهم عليه
بدت تهذي وتبجي
وتتوسل بالسايق ..... وحتى الكرسي مگاعده عليه مجرد طاخه بيه .... تلوب عبالك مطعونه بسكين
لحد وصلنا گبال بيتهم
ضيعنا الامل ان الخبر ممكن يكون كذب ....
بابهم مفتوح والناس متجمعه
ركضت ايه وهيه تصرخ
طلال
دخلت لنص البيت واني وياها
شافت الرياجيل
راحت على اخوه ايوب ....نفس طوله من خلفه ....
لزمته وصاحت..... طلال
باوعها وظل يبجي ويصرخ
طلال ...راح ...راح
: لا مستحيل
طلال ميموت
ياموت اليگدر ياخذه
وين طلال احجوا
شفت امه شاكه ملابسها من الطول للطول وجهها صاير قطعه دم تجري
وابوه يبجي بالباب والناس لازمته ....
ايه: فهموني شلون مات
اخذتها اخته وفاء
كان واگف على الشارع العام
وفات رتل امريكي وزارعين عبوه على الطريق انفجرت بيه وج ايه
طلال راح.... اخويه راح
المدلل راح
: لا. ميموت ويعوفني
ميموت طلال ميسويها
ركضت على الدرج لغرفته
ايه
دخلت غرفته صورته وهو يضحك كافيه ان تعلن وفاتي
مستحيل اني عايشه ومتحمله حقيقة موته
اكيد ميته اني همين
مااگدر اقترب من مكان قميصه الي اخر مره شفته بيه
موجود على السرير
اويلي ربي
گلبي اذا اتحمل موته ...
اتبرى من گلبي...
مااريد اعيش مااريد
في غرفه عدت لعرسنا
جلست نادبه باكيه
اشتهي الموت
دعيت ان تغادر. روحي جسدي
اعاتب الموت قرب وسادتاً حملت راسه الحبيب
قرب قميصا احاط بجسده
كما تحيط بي الاحزان
عجبت من امر صبري
الا تنفذ
وياقلبي
اما أن لك ان تتوقف
الم يسكنك ....
وهاهو يغادر
فرحل معه ....
ايها الموت اتوسلك خذني اليه
...........،
ملاك
راح طلال وانطفت ايه
هو ارتاح بالموت ...واختي تعاني من الحياة بعده
تلث ايام عند اهله بالعزا
لا اكلت ...ولا بطلت بجي ...وصريخ
جسدها ماعرف افراش
حاولو عمامي ياخذوها ماقبلت
حاضنه صورته وتلطم
.......
ايه
الطم على صدري ....
واضرب حيل
اثاري الي يلطم مو قصده يضرب نفسه وبس
لا يضرب.... حتى گلبه يوگف ويرتاح ...
ادور على طريقه اوگف بيها الالم الي احس بيه كل مااسمع كلمة ......مات
كل ما امه تطلع ملابسه وتشتم بيهم
طلعت قاطه للعرس
ماتحملت اشوفه. وگعت بين النسوان واني اغيب عن الوعي شويه شويه
ناجيت ربي ( يارب تكون النهايه هذي وبعدها اشوف طلال يارب )
وعيت على نفسي بغرفة امه
على ميزها صور اولادها
وطلال صورته وهو طفل......
صرخت بلا وعي وكلي رجاء تكون صرختي الاخيره هذي واموت
بكل زاويه اشوفه خيال گدامي
مثل تمثال منصوب بساحة روحي
مرت ابالي كل ايامنا.... واحلامنا ...
امتحاناتنا بالكليه
كلام صديقاتي من كانوا يوصفوه ...
بهرقل العظيم
وتعارك وياهم واگلهم لاتحسدوه
ابالي ضحكته من اوصل للمحاضره متاخره
وهو عينه على الباب عباله مااداوم
ودائما يستقبلني بنفس الجمله
( عبالي متداومين جان زعلت منج )
قمصانه اتذكرهم واحد واحد وجاكيته الاسود
رغم ضخامته كان ابد ميتحمل البرد
واول واحد بالشعبه يشتي هو ....
واخر واحد يصيف
اغمض عيوني وافتحهم من كثر الدمع بيهم
بگلبي نار تحرگني ...ودموع عيني تغرگني
لا نار ترحمني بالموت ...ولادمع يغرگني وارتاح
مر اسبوع .....بيه اكتشفت الميت مو طلال انما اني
وقررت امارس هالموت. ماطول اني عايشه
وخلص عزانا اني وياه ....
هو بالجنه .... واني بنار دنيا انهدت اركانها ....
بودي ابقى ابيتهم ....
لكن امه كل متشوفني تتاذى وتظل تصرخ وتبجي ...،
وكم مره اخذوها للمستشفى بسبب انهيارها. ومن ترجع تنام شويه وتفز تصيح.... طلال
——————————
ملاك
رجعت ايه لبيت عمو
شبه ميته الفرق بس النفس
داير عيونها هاله سودا
عبالك محروكه
اديها الشراين بيها ظاهره خضره
من كثر الهزال بجسمها
رموش مباقيه عدها
والشقوق بشفتها تجرح
: ايه لازم تاكلين ترى راح تموتين تدرين لو لا
: ادعيلي اموت فدوه
شنو باقيه احسب ايام ل اربعينه
تصدگين طلال جوى التراب
طلال وك طلال
: كافي تخبلتي عمامي يسمعوج
: شسووي ملاك وج نار بگلبي والله
اتعرفين شنو نار
ظلت خمس ايام بعد السابع بدون اكل لحد نقلناها للمستشفى
خلوها على المغذي ومستشفيات تستقبل الجثث بالجمله
من يسمعون. خطيبها ميت
يضحكون عليها الاطباء .....والممرضات ويصفونها بالبطر ...
واصبح الموت شيء معتاد ...والحياة هي الي غير مالوفه
وفي دكتور من سبب وجودها حجى وياها
: انتي مو اول وحده يموت خطيبها ...وبعدين كلها كم شهر وتنسيه وتتزوجين غيره. ويجوز هم ينقتل
وهم تجيين. اهنا عدنا
يمعوده دگومي هيه مال نزاكه بالوضع هذا
الدكتور گال هذا الكلام وهو كله يأس من حالات الموت الي يشوفها.... ماعاد يحس بماسي الاحياء ...بگد مايحس بالموتى
جاوبته ايه وهيه تباوع حالة بنيه جايبيها من انفجار. نصها باقي فقط
: انطيني علاج يخليني اتحمل الالم انطيني شي يهديني وانام
: اكتبلج مهدئات
ولازم تاكلين
بدون اكل راح تعانين كأبه اكثر
كتب مهدئات ومشهيات ماموجوده بالمستشفى
رحت على الصيدليه
انطيته الوصفه. ... فتحت جنطتي اشوف الفلوس العندي تكفي لو لا
وايه خلفي
انطاني العلاج خلاه على الميز
والحساب ٢٣ الف
فلوسي متكفي
افتهمت ايه الوضع واعتذرت من الصيدلاني
: اسفين دكتور نسينا. الفلوس بالبيت
ومدت ايدها اليه تطلعني
: يله ملاك نرجع هيه مهدئات
ما احتاجها
نصيت صوتي
: خلي ناخذ نص الوصفه
: امشي امشي .... كافي عليج علاج ماما وروان
رجعنا للبيت وبدت تاكل نص صمونه قبل الحبوب تاخذها من ماما وتنام
وتصحى بعد ساعات تبجي
مااعرف شاسوي ...روان مريضه والجرح ياذيها الي بايدها
والشظيه بالسونار يطمنونا ماعادت تشكل خطر ...
لكن هيه تخاف تنام عبالها تتفجر بداخلها ...
الليل متنامه الا على ابره مهدئه سعرها غالي مااگدر اوفره
وماما تفتقد الدلال الي عاشته مع بابا
تفتقد بيتها وحريتها
وتخبي شوقها وحنينها ل بابا بداخلها. وتحاول تسند ايه
وتساعدها تتعايش مع الحزن الجديد
واعمامي مخططين لزواجي من علاء
ومضطره اسكت لحد اجد منفذ
—————————-
ايه
استنفذ الحزن قواي
ومابقى بيه حيل ....
فقدت اعز ناسي بعد بابا ...
والذكريات اصبحت مصدر للتعذيب ...
ماعندي وسيله غير النوم ...
اتمنى اگوم واعين ملاك الي اشوفها تكافح لوحدها على التقاعد
وعلى بيت ايجار النا
واحسها متحمله لخاطرنا
المصاريف عليها هوايه ....
ومابقى شي ثمين مباعته
لعلاج ماما... وروان الي متقبل تداوم مدرسه من الخوف
لجئت لرب العالمين هوه وحده ...
دعيته ينطيني القوه اتحمل ... لكن ماانساه
اصبح القران جليسي
والصلاة انيسي ....
بليله نايمه وحلمت حلم شفت بيه بابا...
بالحلم المسافه بينا كبيره جدا
وبابا يزرع اشجار ....
كلها خضار
شافني .... شكيتله من بعيد
من عمامي ....
وگتله طلال مات
اختفت ابتسامته.... ورد
عليه.... شدي حيلچ. ....وكافي تبچين
وأشرلي على الطريق
مشيت بيه. ومشيت تعبت
التفت عليه مالگيته
فزيت الهث وعطشانه
صحيت ملاك تطلع ويايه نجيب مي من المطبخ
ردت عليه
: المي يم روان حبيبتي
فتحت لايت الموبايل وشربت مي البطل كله كملته
وهيه تباوعني
: ايه اشو عرگانه وترجفين
رجعت لفراشي تغطيت
وحجيتلها الحلم
: حتى تصدگين من اگلج البچي يأذي الميت
: يعني متريدوني ابچي على طلال ....عمت عيني
: ايه الموت حق علينا كلنا
صح هو شاب وتحبيه وحلمتوا تتزوجون لكن الموت حال بينكم
ادعيله بالرحمه وكافي تعذبيه وانتبهي على صحتج واكلي واتركي الادويه
: ليش هو بيدي
تدرين اگعد الصبح اشوف التلفون يمكن متصل بيه
تدرين شگد صعب يكون كل املج رنه تلفون
وتعرفين هالرنه مراح تسمعيها
للابد مراح اسمع صوته يگلي
(ايوته )
: الله يساعد ج ويساعد اهله حيل متاذين
وتركوا بغداد وراحوا سكنوا عد اولادهم
: شلون عرفتي
ملاك : امه اتصلت تسال عليج
وگالت متاذيه مااگدر اشوف غرفته ومكان الحادث قريب من البيت متگدر تبقى بنفس البيت
: الصبح اتصل بيها واسال عليها
الله يعينها طلال صعب ينسي
اربع سنين عاشرته ....
عشرته حلوه
حتى من يزعل دقيقتين
يفور ويرجع يهدا
فدوه لعينه شگد احبه
الموت عباله يخليني انساه
مستحيل ابقى للموت مرته
________________________
ملاك
مر شهريين على وفاة
طلال
حصلت عمل بصالون .....
وبالواسطات طلع تقاعد بابا
وبدينا نفكر بترك بيت عمي
ولگيت غرفتين ايجار
واستعديت للمواجهه مع عمي وابنه علاء
وبدت المواجهه الصبح
لمينا اغراضنا البسيطه
وماما اتصلت بعمي وجدي حتى يجي
سالها (وين ناوين تروحون )
متصور. نسكن عنده
ردت عليه
: اجرنا بيت . لحد نبيع بيت الجهاد. ونشتري بفلوسه بيت
يم اخواني
صادف يوم جمعه. وكل الي بالبيت. موجودين
اني وايه نصفط الفراشات ونخلي بالهول
ونحجي بصوت عالي حركه استفزازيه
حتى ينتبهون ... والنايمين يگعدون
ونشوف النهايه
اول شخص واجهته عمي
الي گاعد يستمع الاخبار وهو منتجي على القنفه وامامه الريوگ
ودشداشته بيضه وكانه ملك زمانه
صاح
:
هاي وين من الصبح
صيحته كادت ترجعني لزاويه الخوف .....والرضوخ لل امر الواقع
والله ارسل معي اختي ايه لتشد من ازري .... وتقويني
وگفت گباله وجبينها عالي
وتجراءت تگله
:طالعين من البيت.... عندك مانع
باوعها باستصغار وهو يبث بنظراته الغضب ويحاول يخوفها. ويرد عليها بصوت عالي
: فوتي جوى واتچفي شري احسنلج
سمعته ومانهزت وخرت عنه
وهيه ترفع الاغراض
وتتوجه للباب تفتحه جاوبته
: شتريد تسوي تقتلني
قسما بالله اتمنى الموت
الصوت بينهم مرتفع. خلى بقية العصابه تلتم عليها
واني اشوفها وحيده وعلى وشك تنضرب
حملت مجموعه اغراض وحجيت بصوت عالي
: ماما اني رايحه اجيب سياره وارجع
انبرى علاء وهاشم. للمواجهه
وعلاء جوابه كان بارد
وهو يگعد على القنفه وياكل
رد
: خلي وحده تطلع من الباب وتشوف ...شيصير
وباوعني بنظره تحدي
وهو يگول
( يله لج فوتي جيبي الچاي )
ماما كل هذي الفتره ساكته ومتحمله الا هالموقف ماتحملته
ردت على علاء وهيه مگابلته
: ولك هيه خادمه عندك وتروح تجيبلك جاي
هيي معفن ولك فوگ قتلك ابوها ....
اشو نطلع. غصبن ماعليك
واليوم ابلغ عليك وعلى عصابتك القتلت محمد
دفع الطبله الي امامه وضرب ماما على وجهها
وصفها بكلمه( ساقطه )
ركضنا اني وايه
وروان تصرخ
وگفنا حميناها من ضربه الها
وصار الضرب علينا
ومرة عمي تصرخ
ايه دفعت هاشم الي كان يضرب بينه برجله
وطلعت تصرخ بالشارع لمت الجوارين
طلع وراها هشام دخلها يجر بيها من شعره
رجعنا للغرفه وسدوا الباب
والتهديد. والوعيد خلف الباب من الجانبين
ومابطلنا اتصالات بعمي
الي يجاوبنا( بالطريق جاي )
ولمن وصل
خلاهم يفتحون الباب حتى يفتهم شصاير
واقترح نروح عنده
السكوت اصبح لايجدي وكان لازم نحجي على المكشوف ومنسكت عن جريمة قتل بابا
وكنت اول وحده اطالب بدمه
: لا عمي منروح عندك ... احنا هسه بينا وبينكم دم ميصير نگعد عدكم
رايحين لخوالنا ...،
وهمه يتفاهمون وياكم
باوعت وجهه مستغرب قوتي ...
واني ايضا مستغربه من قوتي
يمكن القهر على بابا شد عزمي
وخلاهم همه بموقف خايف
وهذا الي تاكدت منه
وگف عمي ابو علاء يهددنا ويخوفنا وهو نفسه خايف
: بسيطه ياملاك اذا مخليت العشيره كلها تذبكم
وتتهمين علاء بالقتل شنو دليلج
هنا بجملته هذي نطق الحق على لسانه الي ميعرف غير الباطل بدون مينتبه
وهو يرجف ويباوع لعلاء
: عمو اني محددت علاء
انت گلت اسمه
وهسه صرت متاكده
لاتتصورون دم بابا ضاع ....
لان ماعنده ولد...، هسه تشوفون
هاشم اخو علاء موجود
هجم عليه من الخلف ضربني برجله
: لج تهددينا والله موتج مايكلفني خمسين الف
لاي مكبسل انطيه سلاح واخلص منج يابنت ال
راد يسب بابا
ضربه ابوه
وگلي( تريدين تطلعين منا انسي عندج عمام )
ردت عليه ايه الي تجهز الاغراض
: ياريت ماعدنا عمام
بهذي المناقشات افتهمت ان عمي وجدي ممشترك بالقتل
وجدفرصه مناسبه ان يتشفى بابو علاء واولاده الي مشاركوه بالغنيمه من ورث بابا
بنبرة كلها شماته وبسوال مليان شك
وجهه ل اخوه
: ابو علاء انت منين خايف
خليهن يطلعن
لو خايف من التبليغ
حجة ابو علاء كانت واهيه وكلمات استكانه ومسكنه مثل دور المظلوم
( لعد الله يرضى گدام الناس يتهموني اني ولدي بقتل اخويه )
وبدمعات التماسيح دنگ واخفى ملامح وجهه باديه ويردد
( الله يسامحجن ماگول غيرها .... تعال شوف بناتك مايريدنا ....،طلعن عمي اطلعن )
بعد هذا المشهد التمثيلي البارع من عمي
اطلق سراحنا.... طلعنا من البيت
خلفنا تهديدات وسباب من علاء وهاشم
وصعدنا تكسي
بالتكسي ماما تراجعت عن البلاغ بخوفها علينا من القتل
ورضخنا ل امرها
وصلنا للمنطقه الجديده والبيت الجديد
ويانا اغراضنا الي هيه فقط افراشات
اغراض بيت حي ااجهاد
بعناها خلال هذي الفتره بمساعده جوارينا
وصرفناها على... العلاج والمعيشه
البيت الايجار مو مثل البيت الي كنا عايشين بيه
وشفت خيبة الامل بعيون الكل من دخلناله
وحتى اشجعهم فتت اول وحده
: فوتوا ليش واگفين برى
هو صحيح بيت وصخ ..وصغير وقديم ...
بس على الاقل براحتنا
وتحفزت عند ايه الفكر الهندسي وباعتبارها مهندسه بدت ترسم خريطه جديده
: هسه انظفه ونعدله ونصبغه .....
وبالممر نخلي برده.... وميز طعام
لان المطبخ زغير .....
وهنا بين الغرف نخلي التلفزيون
حتى واحنا بغرفنا نگدر نباوع ....
اما هذي الباحه فعتبروها للضيوف لازم تبقى نضيفه
مو احسن من شوفة مرت عمنا يوميه الصبح
اطلقنا اول ضحكه بهذا البيت اني وياها
: هههه اي والله انوب المعاناة
الحمام الي نتسابق عليه
:كل هذا ااخير الي عدهم وميعرفون يسوون حمام ثاني
: ههههه ايه حبيبتي خلينا نشتغل ونگص بيهم
ايه : يله
بدينا بالغسل اخذنا صوندا من الجوارين
غسلنا البيت ....
ومسحنا الزجاج ...
ماما راحت على ابو المولد سحبنا امبيرين
وقررت انزل اجيب كم غرض للبيت
فتحت ايه جنطتها وطلعت فلوس
انطتنياهم. وعيونها تباوعهم كانما تودعهن للابد
:اخذي هذي الفلوس اشتري بيها العاب لروان يمكن تلعب وتحجي وتترك ايد ماما
: هذي هوايه منين
:هذي اخر مره شفت طلال عند الدكتور انطانياها سوده عليه
وضميتها لان. من عنده
: لعد خليهم عندج ذكرى
بعدت بخطواته. وهيه تاخذ الممسحه من الارض
وتداري دموعها بصوت مقطوع
: الذكريات هوايه. ومتزاحمه باب گلبي ... اخذيهم فدوه لعينج
حبست دمعتي لحد طلعت من البيت
واني اشوف كل شخص بعائلتي مهزوم ...ومجروح... ويعاني
واني الي عليه ابقى واگفه على حيلي ...
رغم اني هم مهزرمه ومجروحه واعاني
نزلت على سوك المستعمل
جبت حاجات للبيت واهم شي الطباخ... والثلاجه ...
والبردات
ورجعت براس الفرع وگفوا السياره الي بيها الاغراض شباب المنطقه الي متجمعين بشكل حمايه للمنطقه ويتاكدون من الغربه
وسالوا منو انتي ؟
فهمتهم سكان جدد
:اكيد تحتاجين مساعده ... نروح وياج انزل الاغراض
اشر للسايق فوت
هو يسوق بطء وهمه خلفه
كلهم ساعدوني
ومن عرفوا مالنا احد
دخلوا الاغراض وعلكوا البردات
بعدها جبت اللعابات خليتهم امام روان باوعت ورجعت غمضت بحضن ماما
: حبيبتي روان شوفي هذي اللعابات شگد. حلوات ....
تگدرين تمشطين شعرهم ...
ايه جابت المشط. وتمشطهم وتحجي وياها
: اني امشطهم اكلج ملاك شنو. اسامي اللعابات
: روان تعرف اساميهم روان شنو اسمهم
ماردت علينا ولا تجاوبت
تركناها واحنا نسمع الباب يندك ...
الجوارين نسوانهم مجتمعه
الي جايبه ثلج ...
الي جايبه مسواك... واغراض بيت ....بسيطه
المنطقه كانت شعبيه
وبيها الناس گلب واحد
وبعدها اجتي صينيه العشى من ام كاظم وياها شباب اثنين وگفوا بالباب
رحبت ماما بيهم
: تفضلوا خاله
:خاله اني احمد وهذا خضير احنا اهنا نحرس بالليل بالمنطقه
اي شي تحتاجوه احنا موجودين
اخذي ارقامنا
وذمه برگبتج اذا احتاجيتوا شي وما اتصلتي
اي شي دكتور.... مسواك ... تكسي
: الله يحميكم اولادي ويحفظكم لشبابكم
كلماتهم رغم بساطتها انطتنا احساس الامان
دخلت ام كاظم مع الصينيه وشاركتنا الاكل......
ومع صب الجاي تداولت ماما وام كاظم احاديث الحياة المتعبه
واستمرت لحد الساعه ثمانيه
ودعتنا
فرشنا حتى انام
وبنفس الوقت نسولف اني وايه
جنب نافذه... تطل على سماء مقمره... ونجوم لامعه
كانها تدعونا ل ليلة سمر بين اختين اعتادن السهر لوحدهن
: اگلج ملاك متحسين في شي غريب
: شگو لاتگولين صرصور اتخبل
: لج ياصرصور
عمامنا معقوله خافوا وقبلوا نطلع من ابيت
فكرت شويه بسؤالها مالكيت جواب منطقي
: يمكن عرفوا مراح نتنازل عن الورث .....ومراح ناخذ واحد من
اولادهم
جوابي ماقنع ايه ايضا
: معقوله هذا السبب
يمعوده ذولي بابا وگفوه بالمحاكم.... احنا يسكتون عنا
خايفه لايطبخون شي من ورانا
: بس ارتب وضعنا بالبيت اروح ل ابو سما اشوفه شسوه وابيع بيت ااجهاد ...
واجر بيت الاعظميه
ونفتح محل بيع ملابس ومكياج نعيش منه
اني لو ما موت
اتذكرت وسكتت
: كملي
لو ما موت طلال ....خايفه تذكريني
عبالج نسيته
لا والله بس حبست حزني بداخلي وارتضيت بالالم شريك حياتي ابداله
والحلم يوميه يذكرني بيه
: بعده نفس الحلم
خلت راسها على الحايط وتحسرت ماشفت دموعها لان ظلام حسيت بيهم من صوتها.
وهيه تذكر الحلم
: كل مره نفس الحلم وافز منه بضيق وحزن
وج لحد الان صوته باذني اخر مكالمه گلي .... احبج
وماگدرت ارد عليه
اووووف ياطلال
شلون سلمت للموت وهان عليك تتركني
ختمت ليلتنا بدمعه على خدها
....ودعاء مني
: الله يرحمه ويرحمج
————————-
ايه
اشتقت لعناقك ....
اتوق لممارسة طقوس عشقي
بمحرابك ....
وادخله طائعة
ل اضيع في سواحل صدرك الممتد كمدينه تحتضن الاحباب
فحضنك كان وطني .... كان !
مااصعب ان تصف حبك بكلمة كان
في نزاع مستمر
انهكني
اتصالات صديقاتي كل وحده تسمع بالخبر تتصل ....
وتريد تعرف التفاصيل
وكل وحده تذكرني بشي ....
وكلشي يرجعني للحزن اكثر من قبل
اهملنا علاج روان
واكتفينا بالحجي وياها
ملاك تستخدم وياها الغصب حتى تفتح عيونها
: افتحي عينج
: مااريد
: لعد متاكلين
يله كومي من الاكل
صرخت وضربت الارض برجليها
: ماما تعالي ل ملاك
: دتكلج افتحي عيونج واكلي ليش مغمضتها ياماما
: حبيبتي روان مشتاقيتي النا متريدين تشوفينا
دفتحي عيونج حتى نرسم اني وياج رسمه حلوه
: اخاف يجون يضربوني
گامت من الاكل وگفت بالزاويا مثل الي اجى ابالها الحادث
راحت عليها ملاك خلتها بحضنها
: محد يضربج احنا يمج
واني لزمت ايدها
: روان هاي اني لازمه ايدج افتحي عيونج وتعالي اكلي وبعدين سديها
:
فتحت روان عيونها حتى تاكل
وبعد الاكل
نصبتلها مرجوحه
داخل البيت بين المطبخ والغرفه حتى تترك ايد ماما
گعدت بالمرجوحه وهيه لازمه ايدي
ادفعها بالمرجوحه ووتفتح عينها وتغمض
ومرات تنزل راسها
وهيه خايفه
فقدنا الامان ومحاولتنا البسيطه
في جعلها. تستعيده
تنجح مره .....وتفشل مرات
بداخلنا كلنا صرخه مكبوته
نحاول نتغاضاها
بشتى الوسائل
بحثت عن عمل
حتى اطلع من اطار الفقد
المحاوطني قدمت على عدة وظائف وتعيينات حالي حال بقية الخريجين
وفي كل خميس نخصص هاليوم لبابا وطلال نقرالهم قران ونصلي ونوزع ثواب
وقت الغروب
اندكت الباب
سالته منو
اجاني صوت وحده من جوارينه
:
:اني ام احمد
فتحت الباب بيدها الماعون
انطتنياه وهي تريد تحجي شي
: هذا الماعون احبيبه . واصل ان شاء الله
يمه شگد طبخكم طيب
: تسلمين. خاله بالعافيه
دخلت بالكراج خطوتين وهيه متردده توضح الي جايه عليه
لكن ماترددت هوايه
: اگلج يمه صح انتن خريجات وتريدن وظايف بس اني اريد
اعرض عليجن شغله يعني مو من مقامجن شويه
: خاله هو وينه الشغل ..، ياريت نحصله
: اني اشتغل ويه مقاول اطبخله للعمال
واريد وحده منكم تساعدني
والفلوس خير من الله
وافقت وصرت طباخه بشهاده جامعيه
الظروف كانت صعبه
والجو بارد
( النفط ازمه ونشتريه التنكه ب ١٦ الف ) متكفي يومين
مضطره اعمل
وانسى الشهاده الي سهرت وبجيت وتعبت حتى احصلها ....
تحولت طباخه.... بدل مهندسه
تخنگني الغصه كل مااستلم فلوس ...
ويه نفسي اگول الحمد لله
وعقلي يگلي هاي مو انتي
ابتعدت عن صديقاتي
واهل طلال خوفا من يكتشفون عملي ولان الاتصالات بينا صارت سبب للالم اليه والهم
ومع ذلك المصايب ظلت ملاحگتنا
———————————
ملاك
اتصل بيه مكتب عقار بابا كان عارض بيت الاعظميه للبيع عنده
وخبرني في شخص مقدم عرض للبيت ...
وطلب مني اجي العصر. للمكتب حتى نتفق على السعر
طلعنا اني وايه للمكتب بسياره
ولد من الجوارين
ومن وصلنا نزل ويانا للمكتب سلمنا وگعدنا ننتظر المشتري وتطرقنا لعدة احاديث
: حجي هو البيت شگد يسوى برائيك
: هو يسوى اكثر من ٥٠٠ مليون لو مكمل تعديلات وصبغ
ولكونكم مستعجلين
نزلت السعر ٤٨٠
والرجال حيدفع كاش
ها شگلتوا
: هاي هيه على بركة الله
انتظرنا يجي المشتري
وبقينا ننتظر
ايه : حجي اذا عندك رقمه اتصل بيه
تاخرنا والطريق ساعه منوصل
الدلال راح اتصل
سمعنا الاتصال
الدلال : مستحيل شنو هالحجي
متاكد
ذولي بناته گدامي ميدرون
سد التلفون ....
الدلال : عمو والدكم متصرف بالبيت وانتم متدرون ؟
ملاك : لا البيت كان باسمه
وطلعنا قسام شرعي يثبت الحصص
محادثته خلتني على وشك الانهيار ..، مابقى بيه سنتمر واحد يتحمل فاجعه جديده
الدلال : المشتري رايح يشوفه من الداخل
مجاوبيه ناس ساكنين بالبيت
ومشتريه من والدج
ومراويه السند والمكاتبه
ملاك : مستحيل. بابا لو بايعه وين الفلوس لعد
بابا كل افلوسه عندي
الدلال : اخاف منطي وكاله ل احد من اقاربكم عمامكم
ايه : ملاك گتلج سكتت عمامج مو خاليه
وعلاء موظف بالعقاري
الدلال : اذا تشكون باحد
روحوا قدموا بلاغ
وقفوا ارجاءات نقل الملكيه
ملاك : لا حجي اكيد غلطانين البيت باسمائنا وعندي القسام الشرعي
ايه : اخاف بيتنا بالجهاد هم بايعيه واحنا مندري
الشكوك هزت كل كياني وماعدت رجليه تحملني مااعرف اواصل الحديث مع الدلال او ارد. على السايق
او اسكت ايه الي بدت تغلط وتسب بعمامي والناس امام المحل تتفرج
انداريت على الولد وحجيت وياه
:تاخذنا للبيت بحي الجهاد احمد الله يخليك
احمد ( السايق ) اخذكم اكيد
سحبت ايه گوه وصعدتها بالسياره وهيه تبجي وتدعي
( الله لا يهنيكم دنيا واخره )
وظلت تصرخ حتى السايق ميعرف يسوق من وراها
ضربته بالجنطه على راسها يله سكتت
واني اتسال يمتى تخلص قدرتي على التحمل واتحول مثل ايه شبه مجنونه ؟ وهذي العائله منو الها ؟ شنو. مصيرها اذا البيتين راحوا ...واذا اني تخبلت
فكري مشوش كيف بيت ينباع بدون علمنا ؟
لحد ماوصلنا
وجدنا البيت مسكون
دگيت الباب حيل ويايه السايق
طلع ولد شاب سالته ودموعي تتزل
: انتم ساكنين بهذا البيت
ايجار لو ملك
ايجار صار شهر اهنا ليش ؟
: هذا بيتنا منو اجره الكم
اجره ولد. گال هذا بيت ابويه متوفي
وندفعله ٧٥٠ الف بالشهر
الله يخليك صيحلي احد اتفاهم وياه
راح صاح مره گصيره وسمينه
يمكن امه ....
گالت تفضلوا
منگدر. ندخل لان منهارين اثنينا
وايه راسا حجتلها كلشي
: حجيه هذا بيتنا والي اجرلكم واحد نصاب
هسه راح نروح نشتكي عليه
: والله ياعيني اني تعاقدت وياه سنه كامله ودفعت الايجار مال شهريين ليگدام ومااگدر اطلع وين اروح
دگيت الباب على جيران النا يعرفونه حتى يشهدون هذا بيتنا
طلعت جيرانا و فهمته هذا بيتنا وابونا نقتل وخفنا نرجع من الطائفيه
المره المأجره تفهمت واعتذرت
وتوسلت تبقى بالبيت
الام : على عيني وراسي
الايجار منا وجاي انطيكم اياه
بس مااگدر اطلع منه الله يخليكم وين اروح
اتفقت وياها مجبره تبقى وطلعت على مكتب المحامي
ابو سما الطريق منحجي من الصدمه وماما تتصل بينا
جاوبتها
: ماما ليظل بالج حتى لو راح البيت.... الي راح اعز منه المهم انتي والله نضيع من بعدج
ماما كل الي تملكه تبجي وتعيط وتدعي
واصلنا طريقنا للمكتب وصلنا لگيناه ديسد المكتب
وشرحتله الوضع على عجل
المحامي : باجر تجون ويايه
نروح للطابو نتاكد البيع مسجل
ام لا
اذا مسجل كل الي نسويه نطعن بالبيع
ونطالب بفحص التواقيع
اما المحاكم فض نزاع الملكيه متوقفه
والبيت يبقى باسم المشتري
لحد تنظر المحكمه
كلامه حيرني والي محيرني اكثر وضع هالبلد الي كلشي بيه غلط
: يعني شگد وتنفتح هذي المحاكم استاذ
المحامي : الدوله منهاره والالاف العراقيين رجعوا من الخارج لگوا بيوتهم متحوله بغير اسماء
ايه : البيت قبل تلث اشهر كان باسمائنا.
المحامي :التزوير بدوائر الطابو وصل لتزوير سند القصر الجمهوري
واحد ادعى ان الارض الي انبنه عليه القصر ملك جده والحكومه دفعتله مليار تعويض
عندج بيوت الكاظميه والاعظميه
كلها شكو بيت ورث حولوه وصار ملك فلان وافلانه
وانتم صرتوا ضحيه من ضحايا هذا التزوير
سالت سوال اخير حتى اعلن الياس
: يعني مافي محكمه ترجع البيت النا
المحامي ؛ بناتي اسمعوني الي تسووه ترفعون قضيه وتبقى لحد الدوله تشكل محكمه تفض النزاع وتاخذون حقكم
طلعنا خايبات للبيت
لااني اگدر. احجي ولا ايه
خايفين على ماما
ظلينا ليله كامله نبجي
ونتحسر ...
على اهل ...على اب ...
على بيت
طلعنا الصبح مع المحامي للطابو
اكتشفنا البيت مسجل
بتاريخ قديم اسبوع قبل وفاة بابا ..،
وبعدها بيوم مسجلينه ملك صرف ..،
رحنا للمركز قدمنا طعن بالبيع واتهام بتزوير التواقيع
والاختام
وقدمنا بلاغ ثاني على عمي وعلاء
بعدها رحنا لبيت الاعظميه دگينا الباب مجاوبنا احد
دگيت الباب على الجيران طلع رجال كبير بالعمر
ساله المحامي عن صاحب البيت جاوبه
: صاحبه رجال الله أمكنه عايش بالخارج اشتراه لزوجته الجديده وهسه هو مسافر وهيه عد اهلها
جرينا اذيال الخيبه
بقت بس الحركه تاكل بگلوبنا ودفعتني اتصل بعمي وجدي وخبرته الي سواه علاء
:متاكده علاء سواها
: منو غيره هو يشتغل بالطابو ويعرف هذي العصابات
: يجوز الوالد بايعه وانتم متدرون
: والفلوس وين راحت
: خليني اني اتفاهم وياه
واشوف
: بلغه قدمنا بلاغ عليه وعلى ابوه
القهر...بگلوبنا... وعيونا
انكتب علينا نتشرد
ونبقى نركض على عيشتنا
وياريت شغل بيه مستقبل
وياريت في امان
اسبوع بين المحاكم والطابو وعمامي
بلا نتيجه علاء مافي اي دليل ضده المكاتبه باسم بابا
واعمامي وصلت بيهم حد التهديد بالقتل بينهم
والبيت راح. مع ادراج الرياح
ماما ماتحملت كل هذي المصايب وگعت بالليل
ي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!