رواية نوارس مهاجره الفصل السادس عشر 16 - بقلم zeanab_almusawi

متابعاتي ومتابعيني الغوالي
في اسئله عن ايه ليش انطت فلوس لموفق
اجاوبكم حسب منقلته هيه
ان مرادت مشاكل وسمعة سيئه بين الناس
وخاصة ان الناس دائما ويه الرجال
وبالنسبه لتصرف رعد
اكيد خطا ... لكن احنا بشر مافي ملائكه على الارض ... وهو لو يريد يظهر نفسه بالقصه ملاك
بس ذكر الموقف بارادته
فشويه خففواالسب والغلط
وشكرا الكم ولتعبكم بالتصويت
على كل بارت
ومبروك الكم لان وصلتوا القصه
للمركز الاول
بفضلكم وتشجيعكم
🌸🌸🌸🌸🌸🌸🌸🌸🌸🌸

# نوارس_مهاجره15و 16
#زينب_الموسوي

رعد

بعد دوام المدرسه. رجعت لشقتي صورتها وهيه مخبيه راسها ومدنگه بالسياره اداة تعذيب
لروحي. اهرب بمخيلتي عن صورة الانكسار والخوف السببته الها
واسال نفسي
( الهلدرجه انجنيت
لدرجه حولتني متحرش بنظرها
اذا احبها ليش اذيتها )
حاصرني الحزن والندم
طلعت من الشقه اسوق وافتر بالشوارع
محاوله مني اهدي عقلي الي يصورلي جريمتي بكل لحظه ويعيدها عليه
شنو الي خلاني افقد اتزاني
واغض النظر عن تصرفي الهمجي اتجاه طفله ....
هل يكفي تانيبي لنفسي ؟
هل الومها اذا كرهتني
وابتعدت عني ؟
صارعتني الافكار وحاصرتني بزاويه شفت نفسي بيها مذنب
ومارحمني الا اتصال ملاك بيه
وگفت السياره وجاوبت بسرعه

: الوووو ملاك

: شلونك استاذ اسفه اتصل بيك وقت راحتك

: لا عادي تفضلي گولي

: روان محتاجه مساعدتك

: هيه طلبت منج تتصلين

: لا هيه دتبجي وتگول مااعرف اكتب
واعرف قصدك اني مااتصل بيك الا لمساعده روان
اعذرني والله مشغوله

: معذوره الله يساعدج
شوكت اجي

: شنو رائيك تجي تتغدى ويانا
اليوم اني طابخه ومتاكده يعجبك

: اكيد يعجبني انتظرك اقصد
: ننتظرك

غيرت ملابسي وطلعت من البيت
اشتريت ورد وحلويات ورحت عليهم
وصلت البيت وگفت دقيقتين امام البيت خايف ادگ الباب

——————————-

ملاك

السرعه الي جاوب بيها اتصالي
انطاني احساس مهتم بيه
وسالني بصوره غير مباشره ليش مااتصل الا اذا روان محتاجته

: ايه مو بالله تحليلي صحيح

: يجوز بس هو هم ميتصل بيج

ملاك ؛ اني الي افتهمته ان زواجه الاول خطء
ولحد الان ديعاني منه لذلك يحاول يتريث بالاختيار هالمره

: وبعد كم سنه يله يقرر

ملاك : والله احجي ويه نفسج شوكت تطلعين من العزله
حتى صديقاتج يسالون عليج

: ماادري شبيه
لاتشغلين بالج بدلي الولد راح يوصل واني هم ابدل اسلم عليه

: اي عفيه واني من اروح للدوام انتي خليه بالصاله مع روان
وادخلي كل شويه شوفيه اخاف محتاج شي
: بلكي يطلع محتاجج ونخلص منج
: امين ربي
——————————-
روان

خايفه اطلع واشوفه ......
بالسياره حسيته ندمان
وسمعت كلمة احبج منه
ماسامعتها قبل ......
ولااعرف شنو المفروض ارد عليه ...
ظليت ساكته وخايفه ولحد الان خايفه ....
ملاك كل مااگلها عندي واجب
تتصل بيه
تصرفه شل تفكيري واحس الكل يدري بالصار ....
حتى الكتب افتحها واسدها ...
وشفايفي باوعتها الف مره بالمرايه اخاف مبين شي

الباب يندگ اكيد هوه

راقبت من خلف باب غرفتي دخلته ملاك وهيه ترتدي فستان طويل ازرق وكعب عالي
وتبدو مثل الاميرات
وسمعت صوته يحجي وياها
(هذا ورد لروان كانت مريضه اليوم )

: تسلم كلك ذوق
واكيد الحلويات اليه

: وتستاهلين اكثر

وبعدين ايه وماما سلموا عليه
بقيت اني
اعرف ملاك راح تجي طايره عليه حتى اسلم
وفعلا دخلت
وگفت گبال المرايه وهيه تحجي ويايه

: يله تعالي سلمي على استاذ رعد

: اگلج اني مااتغدى وياكم يوميه بعدين اسلم

: ميصير حبيبتي
وبعدين ايه مسويتلج سلطة دجاج
يله حبيبتي

: الزمي ايدي مو تعوفيني
ماانتبهت شنو كتلها طايره من الفرح
اني خليت ايدي بايدها

طلعت هو ظهره علينا
وگفت بعيد وسلمت

: هاي مستر رعد

: هاي انسه روان
شلون صرتي

: الحمد لله
دخلت للمطبخ اساعد اخواتي بالتقديم
وايه تراقبني وحاسه بيه شي غلط

: شبيج اليوم معقوجه

: مابيه شي تعبانه شويه

انفجرت غضب من جمله گالتها ملاك بكل ثقه وهيه تترك مهمه تقديم الاكل وتندار عليه

: گولي كسلانه واريد اتفرج تلفزيون بدل ماادرس

: واني شوكت متفرجه تلفزيون
غير علمود اللغه
احتاريت وياكم

مشت سريع وكفت گبالي تخوفني

: لج صوتج طالع بعدين احاسبج
جرتني بعيد عن الباب
واني رجعت لنفس مكاني تحديا بيها وعليت صوتي

: على شنو تحاسبيني
شنو مسويه غلط ها
احجي ردي

صوتي عالي كان سدت باب المطبخ
وضربتني على جتفي حيل

: منين تعلمتي تردين عليه
اخاف عبالج بامريكا ومااگدرلج ...قسم بالله تلفون صغير للدوله اذبج فوستر هوم تادبي والزمي حدودج

صوتها العالي ماخوفني اخذت تلفون ماما من الميز واني ارد
بانهيار اكثر من انهيارها

: انتي لزمي حدودج وبيج خير اتصلي بالفوستر هوم
لاتهدييني اني مو صغيره

نظرت الها عيونها كلها احتقان عليه
وگعت الماعون من ايدي
رادت تهجم عليه لزمتها ايه

: كافي اثنينجن في رجال غريب بالبيت لاتفرجنه علينه

بعدت ملاك عني
واجتي يمي تهديني واني مخنوگه بالبجي

: روان حبيبتي صح انتي كبرتي لكن ملاك اختج الكبيره ولازم تحترميها

: اسفه مو قصدي

: يله تعالي بوسي اختج

اخذتني ايه عليها
وهيه دفعتني من صدري وخرتني

: مااريدها ولااريد اشوف خلقتها
هاي مجازاتي وركضي سنين وياها للاطباء والمدرسه واتوسل برعد يدرسها

: لاتتوسلين برعد مره ثانيه
مااريد يجي لبيتنا

: واذا رسبيتي

: مابيها شي اعيد سنه ومستواي يتحسن

: ليش متريديه يدرسج سامعه منه شي

:لا مسامعه شي وخلص

: هاي هيه مدام متريده بعد لاتتصلين بيه ملاك اني وياج نحاول ندرسها

: هذي اخر مره

——————————

رعد

طلعت روان سلمت ولو مغثوثه وملاك لازمه ايدها يعني مجبوره على السلام
وبعدين دخلت للمطبخ وسمعت صوتهن عالي وانسدت الباب
واني ظليت اسولف مع ام ملاك وعرفت بايعين بيتهم الي بالعراق وتريد نصيحتي بشراء البيوت

: اني اگول للبنات نشتري بديترويت ارخص من ديربون

: صح ارخص لكن ديترويت مابيها امان.... ومخدرات منتشره ....و مدارس تعبانه ...
ديربون امان... وانظف
طلعت ملاك من المطبخ واشتركت بالمحادثه

: اني اكول اشتري بيت واسدده ...وبعدين اخذ عليه قرض وافتح ل ايه مطعم زغير ...
وشفت بيت قريب من البارك ...ويمه ست بيوت عراقيه
وغرفتين نوم و( اتك ) العليه
الاسبوع القادم انطوني موعد اروح اشوفه من داخل

: يمه اذا عندك وقت روح ويانا نشوفه
البنات ميعرفن بالبيوت

: بعيني خاله وبالمره واعزمكم بمطعم عراقي ....
ميصير انتم تعزموني واني لا

: يايمه هلا بيك بكل وكت قابل احنا شمسويلك
كافي مساعدتك لروان

اشاركهم بالحديث وبالي مو يمهم
وحتى
على الاكل البنات صاروا مقابيلي
...وام ملاك يمي
طبخ البنات كان شي يفوق الوصف ..،وعرفت منهم كانوا يعملون بمطاعم تركيه

بعد الاكل... دخلت اني وام ملاك الصاله... وروان جابت الجاي

حضرت اللاب حتى تكتب عليه ...
وكعدت قريب مني... وامها
گاعده بعيد على كرسي... وبيدها كتاب ادعيه

: هذي تلث كتب اختاري الي نكتب عنه

اختارت اصغر كتاب بيهم

: اوكي نكتب عن هذا
احجيلج شويه عنه هذا عن طفل معاق ...يحاول يثبت نفسه لعائلته ...
واخوه الرياضي المشهور

شنو رائيج تقرين اول فصل ونلخص اهم مابيه

ردت ( اوكي ) وهيه عاگده حواجبها
وعينها بالكتاب

تقرا واني اصححلها وبعض الكلمات متفهم معناها. اني اشرحها الها

:قراتج متحسنه بقى الاملاء

دتسمعيني ليش متردين

: داكتب غير

: من احجي وياج عوفي الكتابه وردي

شگد حجيت وياها مكانت ترد
واضح متحمله وجودي غصب
طلعت ملاك للعمل
وام ملاك طلعت تجاوب تلفون

بقينا اني وياها
بمحاوله اخيره حاولت ازيح غضبها مني

: روان لاتخافين مني
والصار اليوم مراح يتكرر وعد
ابتعدت للكرسي الثاني وهيه تنظر بعيون عقابها لا يحتمل

: وكم مره مكرره ومع منو كم طالبه
وباي عذر ها
تساعدهم يكتبون مقالات لو ...بالمعهد يتعلمون لغه.. لو يعزفون عود

: قسم بالله اول مره ارتكب هذي الغلطه

: تكول غلطه اشو بالسياره
گلت تحبني

:فعلا احبج. ادري حاله من الجنون صابتني
كل تفكيري انتي واعرف غلط واعرف ممنوع وحاولت ابعد تفكيري عنج
مااعرف شكول
: اسف مره ثانيه

: لا مره رابعه

: شنو مره رابعه

: اربع مرات اليوم گلت اسف

: ادري الكلمه مو كافيه اختاري الي يرضيج واسويه

وهيه تغيير مكانها للمره الثالثه
انطتني قرارها

: لاتجي لبيتنا علمودي
ومن تتصل بيك ملاك اعتذر

: مثل متريدين
تحبين نكمل لو اروح

: براحتك

: نكمل واعتبريها اخر مره

باوعت للورقه وبعد مشالت عينها
موقفها خلاني بنار اكبر
اكيد كرهتني وفسرت تصرفي على اساس استغل الطالبات بحجة المساعده

استاهل اني نفسي ماعندي مبرر للسويته

مر الوقت اني اقرا وهيه تكتب
والعكس
كملت المقاله عن الكتاب وبدت تتثاوب

: خلصنا الواجب
محتاجه شي ثاني
: لا

: اروح اني تصبحين على خير

گامت وتوجهت للباب بالصاله تفتحه
قبل لتفتحه
صارت مقابيلي دارت وجها راسا
خاطبته خطاب ياس يمكن تستجيب وتغفر

: روان اذا تتصورين اني استغل الطالبات واضحك عليهم فاحب اگلج عندج الاعداديه كلها واسالي عني ...
صار سبع سنين متطوع بيها
ماغلطت بحق شخص سواء طالب ...او مدرس

الي صار هو اندفاع من عندي مراح تفتهمين احساسي يمكن لان صغيره او يمكن لان ماعندج نفس الاحساس
اعتذر مره اخيره وصدگيني مراح تشوفين مني اي تصرف يضايقج
مع السلامه

طلعت گدامي ومااعتقد اثرت بيها كلمه من الگلته
امها موجوده بالصاله الثانيه سلمت عليها ومشت ويايه للباب وتدعيلي
( الله يرضى عليك اوليدي)
دعائها كانما حجارة سجيل ترميني بغضب الاهي

بطريقي للعوده اخذت قرار مع نفسي ولو بعد فوات الاوان

ابد مااحاول افصح عن مشاعري الها او اتقرب منها

اتركلها القرار
وابتعد واحاول اختبر مشاعري
انتظرها تكبر ...
الي داحس بيه اتجاهها غلط وخطا كبير ....
مو طبيعتي هذي

بالعشره بالليل اتصلت ملاك
...جاوبت واني كلي حاجه لصوت انسان... اي كان

: نعم ملاك تفضلي

: اعتذر اذا نايم وصحيتك

: والله منايم كامش العود واحاول اتذكر اغنيه قديمه ناسيها

باهتمام واضح عرضت تساعدني اتذكر الاغنيه

: كولي مقطع منها يمكن اساعدك

: هيه لفواد سالم اتذكر الموال وناسي الاغنيه ...
اسمعج اللحن يمكن تعرفيها ...لان اذا تبقى ابالي اليوم ماانام

ضحكت وطلبت اسمعها
: سمعني اشو

سمعت اللحن

اتذكرتها من اللحن

: موبيدينا اسمها الاغنيه اتذكرها كلماتها حلوه

تحمست بسماع عنوان الاغنيه
؛ عفيه عليج صحيح
وبلا ماادري عزفت وغنيت كلماتها
(موبدينا نودع عيون الحبايب مو بدينا

وهيه كملت مقطع

: والعشك لحظة عمر وتمر علينا

وجاوبت اني المقطع الي بعده

: يلي طعم المستحى عل عيونكم

وماتاخرت هيه بالمقطع الي بعده

: ويلي شوگي يذوب بين رموشكم

ضحكنا اثنينا

: صوتج حلو ملاك

؛ لا صدوك

: والله صوتج حلو المفروض تغنين

: يله علمني اغني واني وياك نصير دوتو ونكسرعلى حسام الرسام الي حاجز فنادق ديترويت كل نهاية اسبوع

:لا خطيه نگطع رزقه مهما كان ابن بلدنا هذا

: شبيك صدگت داتشاقى
نسيتني على شنو اتصلت بيك

: مو مهم على شنو اتصلتي المهم اتصلتي كنت محتاج احجي ويه انسان

: اها محتاجه علمود الاغنيه

: موبس الاغنيه مرات تريد تهرب من الحديث مع نفسك تحتاج صوت تسمعه

: تذكرت سبب الاتصال
اولا شكرا على تعبك ويه روان
ثانيا اسفه لان طلعت للشغل وتركتك

؛ لاالشكر مقبول. ولا الاسف
سبق وگتلج اني معتبر نفسي صديق الكم كلكم
واني الي اشكرج على الغدى وعاشت ايدج

: تدلل ياريت تجي يوميه تتغدى تتعشى هلابيك

العرض مغري استغله افضل

: طيب شنو رائيج اجي الصبح عليكم وعلى شرط اجيب الريوك اني

: هلا بيك وبصراحه اني اتعاجز من الريوك

: خلص اني اجيب الريوك تحبين البان كيك

:اموت عليه خاصة من اي هوب
وعليه( سيرب )يجنن
سيرب ماده سائله حلوه مثل القطر

: بالسبعه الصبح اني واگف ابابكم

انتهت المكالمه
اتذكر. روان كالت مااجامل ملاك لان تضوج ويجوز تغار
بسيطه اشوفج الغيره باجر الصبح

روان

بعد ماخلصت دروسي وطلع مستر رعد
ظلت كلمات الاعتذار ابالي ومعاها اسئله تدور براسي
ياترى صدوك يحبني ؟
شنو الي يخليه يحب بنت عمرها ضعف عمره ومريضه
مهما تكون الاجابه تصرفه خوفني
حتى ارتاح من التفكير بقيت انتظر ملاك ترجع حتى اعتذر منها
اتصرفت غلط وياها ملاك مو بس اختي امي
اني هالايام اثور بلا سبب واريد اصيح
بالمدرسه شرحولنا هالشي طبيعي بسبب المراهقه
واختلاف هرمونات النمو
وملاك هوايه مقيدتني تخاف عليه ماادري ماعدها ثقه بيه

دخلت للبيت باين عليها التعب

بدت الهجوم راسا وهيه تنزع حذائها وتشيله

: ليش لحد الان گاعده اكيد اخذتي الموبايل من غرفتي وسهرتي تلعبين بيه

اخذت الحذاء منه اخليه بمكانه

: حللتي وحكمتي شبسرعه
گاعده انتظرج تجيين حتى اعتذر منج

: ها يعني حسيتي بغلطج

وكعدت على القنفه وفتحت حجابها

اقتربت منها وقربت الطبله حتى تخلي رجليها. هيه دائما هيج تسووي
وگعدت يمها اتفاهم

: ملاك ممسويه شي غلط انتي تتهميني وتقررين عني

: من خوفي عليج... روان احنا بامريكا الانسان يضيع بثانيه ...وتشوفين احنا نسوان لوحدنا... وفي ناس ماعدها شغل وعمل غير تجيب بسمعة الغير

: اعرف تخافين عليه بس انطيني شويه مجال اتحرك اطلع
اني ماعندي عمر كامل وقتي محدود اريد اعيشه اشتغل واطلع واسوق

: مااحب هذا الحجي انتي دتتعالجين ومابيج شي وضيم الشغل تلحكين عليه

: اوكي على راحتج
قبلتي اعتذاري لو بعدج

: اعتذار مقبول

اجى السوال الخايفه منه
گوليلي اشو فجاءه گلبتي على استاذ رعد

: ماكو شي ردت اعتمد على نفسي بلا مساعدته وحتى معهد بعد مااروح

؛ ليش؟

: الطريق بعيد وانتي متلحكين
وبعدين داسمع باليوتوب مسلسلات وافلام واتعلم

ملاك على راحتج
اگوم اشوف ايه شبيها الظهر كانت مكلوبه خلقتها

: اني اگلج تعاركت ويه شركة التامين مال السيارات
اجتي القائمه عاليه اتصلت بيهم وغلطت عليهم
وماما صيحت عليها

انتهى حديثنا دخلت هيه ترتاح بغرفتها
واني

دخلت لفراشي... واسمع صوت ايه ...
بالبجي اليومي تحت الغطاء ...وموبليلها ضواه مبين ...
اكيد صور طلال گبالها ...
مرات احس ايه فصلت عندالدنيا.... وماعادت عايشه

طلع الصبح غيرت ملابسي
وگعدت بغرفتي اراجع دروس بين ماملاك تجهز وتاخذني
اني عادة مااتريگ

الباب يندك

رحت افتح.. سبقتني ملاك ..
اني ظليت واگفه بالممر قريب من الباب

: ياهلا تفضل
منو هذا من الصبح
من ملابس ملاك وحمرتها خمنت رعد
وتخميني طلع صحيح سمعته يرد عليها

: هذي الريوك الي طلبتيه

انتبه اني واگفه

: تفضل تريگ ويانا
دخل للبيت وبابتسامه اجهل سببها
سلم
: شلونج روان ان شاء الله بخير

بصوت يتسال جاوبته
( بخير )
اباوعله شجابه من الصبح
دخلت ملاك للمطبخ
اجيت يمه

: مستر مو البارحه اتفقنا متجي للبيت بعد

وهو يفتح جاكيته وياخذ راحته على الكرسي منتظر الريوگ يتقدم
جاوبني

: انتي گلتي لتجي علمودي واني جاي اتريگ مع ملاك
تعالي اكلي ويانا البان كيك طيب

استفزني بالجواب

: لا شكرا بيه سكر مو زين عليه

مشيت كم خطوه وحبيت اغثه

: مستر لاتاكل هوايه ترى بعمرك وعمر ملاك مو زين عليكم

بلا اهتمام رد
: شكرا على النصيحه
دفعت باب المطبخ برجلي

لحگت ملاك للمطبخ وماما موجوده

: اشو حتى الريوك صار عدنا شنو

: مابيها شي جاب ريوك يعني اطرده

: لاعيني ليش تطرديه
مره لبلبي... مره بان كيك ...
ماگال شيحب يتعشى

: وانتي ليش مغثوثه يايمه

: وليش انغث اني طالعه انتظر بالسياره
والافندي خلي يرجع الحافظه مال اللبلبي لو يريدنا نروح نغسلها اله

انطلقت ضحكات ماما وملاك

: ههههههه والله الااگله روان تريد الحافظه

: وانتي تكدرين تحجين وياه اخاف يزعل
اشو الابتسامه تارسه وجهج من الحد للحد

تركتهم گاعدين على الميز ملاك ورعد وماما وطلعت برى
دخلت السياره شغلتها علمود التدفئه لان الجو بارد

صدفه فات تحسين يمشي للمدرسه
بيتهم قريب من عدنا
اشرتله يجي يدخل السياره
واجى
دخل وهو ميت برد

: شنو انتي تسوقين

: لا منتظره ملاك تخلص ريوگ
نوصلك الجو بارد

: اي والله بابا اليوم تعبان مقبل يوصلني

: ماادري شوكت نتعلم سياقه ونخلص من هالمذله مال اهلنا

: لج اني اعرف اسوق احسن من بابا

انداريت عليه مجرد سمعت يكول اعرف

: تعال علمني الله عليك

: بسيطه اجي يمج واعلمج

گعد بمكان السايق واني يمه

: باعي هذا بريك وهذا بانزين
اول متشغلين رجلج على البريك
تحركين الگير على الدي
وبعدين تحركين بالاستيرن يله تدوسين بانزين خفيف

: زين يصير اخلي رجل على البريك ورجل على البانزين

: لا ربحنا تنگلب السياره بيج غير

باعي شلون راح اطلعها من الگراج للشارع

: سوق على الخفيف لا تدعم

طلعها ونزلت السياره على الشارع

وهو فخور بنفسه

: شفتي المهاره

اهنا قررت العب باعصاب الحبايب الي گاعدين يتريگون وصوت ضحكهم واصل للشارع

: تحسين تگدر توصلني لراس الشارع وترجعني بيها

خاف من المجازفه

: ماعندي اجازه واخاف اختج تزعل
شجعته اني

: ميخالف لخاطري حباب

: يله شكلنا اليوم مبسوطين

طلعنا بيها للشارع بعيد عن بيتنا شويه
لحد شفت ملاك طلعت تباوع علينا وياها رعد دگ تلفون على تحسين

: لاتجاوب خليه يدگ

: شيسووي عدكم مستر رعد

: هوه على طول يمنا صديق للعائله
يله نرجع

: نرجع بس شراح يخلصنا اليوم

اندار بالسياره واني مبتسمه ومخليه ايدي على الاستيرن وياه
وصلنا يمهم النظره بعين رعد ارضت غروري

وملاك نست اللباقه والكياسه امام رعد وهيه تتهجم علينا

: شنو هالاستهتار انتي وياه تسووقون بلا اجازه ومنو سمحلكم تاخذون سيارتي

: على كيفج راد يعلمني شصار يعني
: اسكتي انتي لسانج شطوله فوگاها

: ملاك مصار شي ومراحوا بعيد
اعصابج على كيفج

يله اخذيها للمدرسه لان تاخرت

انتبهت على عصبيتها واشرتلي

: امشي اصعدي
ام المصايب

: تحسين يجي ويانا ابوه ميكدر يوصله

رعد لزم ايد تحسين وفتح باب سيارته وهو يرد عليه

: تحسين يجي ويايه اني اوصله
انتم روحوا

مشى كل واحد باتجاه قبل ليصعدون السياره

صحت على تحسين

: تحسين شكرا على الدرس اشوفك بالمدرسه

؛ باي اشوفج

باوعت رعد بنظره انتصار ساحق
ودخلت السياره

—————————-

طلال

بعد اربع ايام بالتوقيف....
رجعتني لذكريات السجن المريره
اجى الشرطي صاح اسمي

وگال( افراج )
فتح الزنزانه وابتعد عن الطريق منتظر اطلع سالته
: كيف حصلت افراج
شرحلي وهو يمشي امامي بالممر للمكتب

:تنازل الوكيل عن اتهامك باستخدام القوه... والبنت جروحها كانت طفيفه
والمحقق اقتنع انت استخدمت حقك بالدفاع عن نفسك

وصلنا للمكتب گعد بمكانه
وامامه اوراق طلب اوقعهم وقعتهم
طلعت من التوقيف

ولحظة وصولي البيت
وجدت والدي متصل بيه ...
ويسال عني
اني منطيهم الرقم الارضي فقط
رقم الموبايل محد يعرفه
غير.... الوكيل المباريات

اتصلت بوالدي موبايل ....
والدي بدا بالعتب واللوم الي احاول اتجنب اسمعه او ياثر بيه بكل مكالمه ...

: ليش هيج ابني تمر اشهر ومااعرف اخبارك

: يابه فهمتك الف مره مشغول الحياة اهنا سريعه

: وشجابرك على هذي الحياة
اشو.عايف خير اهلك للغرب يديروه

: الله يخليك يابه راسي يوجعني ونعسان... اتركني عايش حياتي مثل مااريد
بعد مايأس من اقناعي وتلين گلبي استسلم
: بكيفك هذي امك تسلم عليك

اصعب اللحظات هو سماع صوت امي ...
واكثر انسان اريد ابتعد عنه هيه امي ...
عندي رهبه من گلبها يعلم بالصار بابنها ...
وهدم رجولته ...وحوله حيوان
بل وحش منزوع الاحساس

وصلني صوتها تبجي ...

: يايمه على شنو البجي متگلليلي

: يايمه صارلك سنه حتى صوره ماوديت اشوفك ....
معقوله ماعندك موبايل

طلال : عندي موبايل هذا الي داتصل بيه هسه ادزلج صوري

: يمه طلال بعد مابيه حيل افراگك لو ترجع لو تسويلي فيزا اجيك
اشتريها اني بس خليني اشوفك

توسلاتها خلتني اكذب عليها بوعود مستحيل افكر بيها

: ان شاء الله اني اجيج

: شوكت اخاف اموت وانت مجاي

: اجي ..اجي ...بس لاتلحين

: ماتفكر تتزوج

: لا يمه هذا الموضوع ابد لاتفتحيه

مو فقط امي كنت اطلب منها متفتح موضوع ارتباطي ....
كثير ناس معاي بالمصارعه ...
صاحب معرض السيارات الي كل اسبوع ابدل سياره بثانيه
وانطيه الفرق ...
المتعهد الي كل نزال يعرض عليه وحده ...
صاحب المطعم الي يعرف طلبي ...
هذي دائره الناس الي تحيط بيه ...
بلا اصدقاء... او احباب
علاقات منفعه متبادله وبس ...

فسخ المتعهد العقد ويايه ...وفجاءه لكيت نفسي بلا عمل ...
وحتى اسكت رغبة العنف داخلي ...
اروح للجم ساعات اتدرب ...

بديت اراسل متعهدين ...ومعضمهم كان يطلبون شروط مثل :
النسبه من كل مباراة تكون كبيره ..
ويريدون اعلانات ...حتى يزداد عدد البطاقات.. والمراهنات عليه
واني مااحب الاعلانات وصوري توصل ل اهلي ...ومعارفي ...واصدقائي

لحد اجاني اتصال من متعهد بلاس فيگاس
واتفقت معاه على عقد جديد لسنتين
———————————

رعد

استمرت لعبه الغيره بيني.... وبين روان

بعد الي سوته بالسياره ملاك
بيومين...
صارت سفره بالمدرسه
للمتحف العربي الامريكي فقط للطلاب الضعيفين باللغه

بالباص الي اخذنا

صعدت اني اوزع المكانات

:تحسين اگعد يم جمال بالاخير
صعد وگال
: حاضر

: مروه و روان اگعدوا سوا بالامام

: اني اريد اگعد يم الشباك

: براحتج بس خليج بالامام

وزعتهم كلهم

و نزلت
حتى انادي المدرسه الجايه معاي( مس مون )

رجعت لگيت روان ومروه مغيرات مكانهم بحيث صايرات قريب من تحسين هو خلف وهنه امام
وديضحكون ويسولفون وروان تباوعني بتحدي

تحاول تستفزني....
مراح انولها مرادها

گعدنا اني والمس سوى
وانشغلت احجي وياها ومنداريت ابد

شغلوا الطلاب اغاني امريكيه
وظلوا يغنون سوا
وبعد كل اغنيه روان تسمعني ضحكها بصوت عالي
مس مون حبت تشاركهم
غيرت مكانها يمهم وطالب اخر جلس يمي
والصوت عالي ومس مون تعلمهم الكلمات ويغنون ويضحكون
طلعت موبايلي وانشغلت بيه

لحد وصلنا نزلت اول واحد
ورحت للمتحف انطيهم خبر بوصولنا

رحبوا بينا واجيت اوزعهم مجموعات ...

خليت روان مع مجموعه مس مون
وتحسين ومروه ويايه

وطول الجوله اشرح واضحك وياهم
وباوعها بالمجموعه الثانيه عينها علينا

وصلنا لرساله كاتبها مهاجر عربي بالفصحى لزوجته الي تنتظر ابلد ثاني
عارضيها بالمعرض
ومس مون متعرف تقراها العربي
اجتمعوا المجموعتين حتى اقراها
قريتها على مسامعهم
وبعضهم سال عن معاني الكلمات
وهيه من دون الكل سالتني اليه

: مستر اذا الرساله لزوجته كيف وصلت للمتحف
جاوبتها واني وجهي للرساله

؛ احفاد هذا الرجل سلموها للمتحف كوثيقه على وجود العرب قبل ١٠٠ سنه اهنا

هيه ومروه وحده باوعت للثانيه وضحكن وهيه تگلها

: الحمد لله يعني اجتمع بزوجته خطيه مبين يحبها

اني ضحكت عليهم
: ههههههه انسه روان شلون عرفتي يحبها

روان ؛ من كلماته بالرساله ....حسيته صادق الكلمه تاثر بالنفس

: كلامج صحيح انسه روان

ابتسمت ودنگت

ابتسامتها جدول ماء عذب تدفق في روحي ...

اعاد الحياة في قاع كياني
الذي انفطر. ندم ...
فقط ابتسامه منها تداويني

خلصت سفرتنا
ورجعنا للمدرسه
راقبتها وهيه تمر امامي بالممر بعدت نظرها ومثلت الانشغال مع صديقتها

ثاني يوم بالكفتريا
جالس هم اراقبها وهم اكل
هيه ومروه جالسه بوسط القاعه وبامكانها بالتفاته جانبيه تشوفني
وعديت كم مره اندارت ومن تحس شفتها
تعدل شعرها وتندار راسا

اجتي بنت اسمها انوار طالبه كانت عندي العام الماضي حبت تسلم عليه
واني شفتها فرصه اشعل گلب نوار غيره
دعيتها تجلس معاي بحجة اسال عنددرجاتها
استجابت وجلست معاي

...................
روان

ليش اغار من اي شخص يقترب
منه

وهوه ابد محاول يقترب مني ....حتى بالصف من اساله سوال... يجاوبني وهو مدنك... او داير وجهه

اجتي بنيه سلمت عليه وگعدت
نبهت مروه
: مروه هذي منين الي گاعده مع مستر رعد اليوم

اندارت شافتها

: طالبه بصف العاشر...اسمها انوار ... اكيد مدرسها ...
هو المدرسه كلها تحبه

بكل غضبي طلعت الكلمات مني معترضه عليها

: على شنو تحبه من حوره

: لا لج لاتحجين عليه ....كافي وگفته ويانا ويدرسنا بلا مقابل

اقتربت من اذنها ونصيت صوتي ل ادنى مستوى

: والله اذا اگلج شي متصدگين

: لا اصدك بس گولي

؛ احلفي بداعت امج وابوج متحجين

انتابها الفضول وهيه اقتربت اكثر وخلت ايدها خلف اذانها
وحلفت

: وداعت عشيرتي كلها مااحجي لج گولي شايفه عليه شي احجي هاي شبيج

: ههههه مره بالمكتبه باسني
ماصدگتني فتحت عيونها وهيه تباوعني

: منو الي باسج ؟وليش ؟وين باسج ؟

؛ مو گتلج متصدگين

: مستر رعد معقوله
وانتي شسويتي ؟وشحسيتي ؟
ضحكت على اسالتها وانطيتها المختصر

؛ انهزمت وبصراحه ملحكت احس شي
وبالليل اجى علينا للبيت وظل يعتذر بس مااصدگته
.:لج اخاف يحبج هذا

: هم مراح تصدگين اذا گتلج گال احبج ...،مرتين

: هنيالج شگد محظوظه ...
مستر رعد في بنات ميتات عليه

: منو ذني يابنات

: كومه بنات اولهن مس مون راح تتخبل بس هو ممعبرها

: سبحان الله اگول ليش گلبي يكرهها زين هيه مو متزوجه

:مطلقه بالثلاثه

روان : هههههه حيل تستاهل
حبابه مروه مو يطلع الحجي

:لا مااحجي خطيه غير يروح بيها سجن

روان : اسم الله عليه هو يروح سجن واني ملاك تذبحج

شوفي اجتي هذي انوار
باعي شراح اسوي بيها

دتفوت من يمنا. مديت رجلي وگعت وبيدها كان حليب انملى وجهها حليب
والكفتريا ضحكوا

وگفت ضربتني جريتها من شعرها
وگفوا الطلاب يتفرجون ويصيحون ( قتال )

ملخت وجهي باظافرها ...
واستمر العركه لحد حسيت ...
الامن ورعد ديبعدونه وحده عن الثانيه
حجتلهم وهيه تتهجم عليه

: وگعتني متعمده

: اعرفج حتى اتعمد اوگعج
انتي عميه متشوفين

: كافي اثنينكم ويله على الاوفس
اخذونا للاوفس ويانا. رعد
مس صعب تعجبت اني متعاركه

: روان انتي طالبه خلوقه واختك ملاك كلنا نعرفها تعبانه بتربيتج

: مس مشفتها عثرت برجلي

: مس مدت رجلها متعمده

تدخل هوه يدافع عني

: انوار اكيد متوهمه روان متعرفج ...ولا معاج بنفس الصف ...ومابينكم عداوه مستحيل تعمدت
صاير بينكم موقف قبل اليوم

: اول مره اشوف جهرتها

نبهتها مس صعب على كلامها

: انتبهي على كلامج
اثنينكم غلطانين
يله اعتذروا من بعض ...
هالمره اعديها المره الجايه انطيكم فصل واتصل باهاليكم

:روان اعتذري من انوار

مس صعب جمعتنا بين اديها
وقربتنا من بعض

: اني اسفه انوار
: واني اسفه
اخذي هذا منديل لوجهج بيه دم

: اني اخذها للممرضه روحي انتي

طلعت ويه رعد للممرضه

واني امشي بالممر حسيت بحراره وجهي ...
واكثر شي افكر بيه ملاك... اذا شافت الاثر بوجهي... وعرفت متعاركه... تذبحني

سبقت رعد بالمشي وهو ينادي

: روان روان اوگفي

انداريت وعندي رغبه املخ وجهه باظافري

: شتريد ها

جاوبني بصياح

: شنو هالرد هذا اني استاذج تعلمي شلون تحترمين

انهاريت بالبجي والصياح

: استاذي! ميحاول يثير غيرتي بهاي... وغيرها من البنات ...ترى اعرف اسوي مثلك واكثر ...وكل يوم تشوفني مع شاب
اشرلي انصي صوتي وهو يرد عليه
: عفيه عليج ...وهذا فخر الج كل يوم شاب

: وانت فخر الك كل يوم وحده مره مس مون ...مره انوار

: وانتي شقاهرج

: مامقهوره يله روح اندل غرفه الممرضه
وجهي تشوه من وراك ...وبعد حساب ملاك ويايه ...

ركضت.. وعفته بالممر

رعد

في احلى من طفله غيوره ...
وغيرتها زادت عن حد العتاب ..
الكلمات تطلع من اجمل فم ...مثل النار تعكس صورة احتراق قلبها بالحب
عيونها غضب ...وتهجم ...ودموع ...
ثوره للغيره... والانهزام امام المشاعر
بداخلي ضحكه والم عليها
وجهها تاذى وملاك راح تحاسبها

كملت طريقي لحد غرفة الممرضه دگيت الباب
گاعده الممرضه تعقم الاثر وهيه تبجي

: هاي (كيت )اسم الممرضه

:كيت هاي مستر رعد البنت المسكينه وجهها متاذي

: والبنت الثانيه شعرها متاذي لو تشوفيها

: مساكين
حبيبتي كافي تبجين حتى اعرف اعقم وجههج

: اذا تحتاج اخذها لعياده

: لا مااريد مابيه شي

وكفت اتفرج عليها
عالجتها الممرضه وطلعت ركض لصفها

روان

رجعت للبيت اول مانصبت المحكمه ماما... وبعدها ملاك بس رجعت للدوام
گعدتني وجهي بين اديها تعقمه وتحقق واجاوب

: ليش البنت تهجمت عليج

: عثرت يمي واني ماده رجلي شسويلها

: وانتي متعرفين تگعدين مثل البشر

: ملاك لخاطر الله كافي

: غير افتهم شصار منو هذي البنت ...منو اهلها... نروح ونتفاهم معاهم شنو سبب العداء بينكم

بعدت ايدها عني لان تاذيني

: منو گال عداء بينا شي صار وانتهى

: لا الافضل اتصل برعد وافتهم منه

: هذا الحجي انتي تريدين تتصلين برعد لاتخليني حجه

: شلون بلسانج يرادله گص
صح ردت عليه بس مااهتمت لحجيي وطلعت التلفون

اتصلت برعد فهمه مكان قصدي ...وهو كان قريب والبنت الي بدت بالضرب ...
من سدت التلفون حجتلي
وبعدها گالتلي بدلي

: وين نروح
المستشفى اتصلوا بيه ...
زادوا. الجرعات عليج

: يعني صارت تلث جرعات بالاسبوع

: بلي
لاتخافين الدكتوره فهمتني
ماكو شي خطر

: هسه كملت اني ناقصه يله تغدي واخذيني بلكي اموت واخلص

:روحي بدلي
ولاتلبسين تشيرت قصير
ترى اخليج تبدلين مره ثانيه

مارديت عليه ولبست على ذوقها
————————————
رعد

اليوم الثاني... رحت مع ملاك وايه ...وام ملاك ...
نشوف البيت
احس ايه تراقبني وممرتاح لوجودي

ملاك كانت سعيده بالبيت... وتكرر السوال على امها كل ميدخلون غرفه

؛ ها. ماما شنو رائيج بالبيت ؟

: حلو ونظيف واهم شي البيسمنت كامل ...

سالتها عن طريقه الدفع
: كيف راح تدفعيه
عقد لو عن طريق بنك

: راح ادفع من سعره خمسين الف كاش
والباقي على ست سنين شهريا الف

: افضل من البنك
وتاكدي العقد يتصدق... بمكتب محامي.. وشهود

: ان شاء. الله

: اشو. روان. مو وياكم

: روان البارحه اخذتها العلاج المناعي بالمستشفى

: يعني هسه هيه بالمستشفى

لا طلعت للبيت العلاج يخليها تعبانه يومين

: مسكينه هالطفله

: اي والله مسكينه
وياريت يمه تاجل العزيمه اليوم لان نتاخر وهيه لوحدها

: على راحتج خاله. المهم صحتها

طلعنا من البيت
البنات راحوا بسياراتهم واني بسيارتي

احتاج وسيله اشوفها... واطمئن عليها ...
لا ابتعد افضل
مريضه.. وتعبانه.. اكيد مراح تداوم

الليل بطول ساعاته
افكر ...واسال ...الجدران عن حل
الجيران الي تحت شقتي
دگوا الارضيه بينا... من هالگد ما اتحرك رايح... جاي ...ومسببلهم ازعاج
جلست بسريري ...
واصارع الافكار
لحد طلع الصبح
بدلت واخذت الگهوه بايدي من المشين
وصلت للمدرسه واگف بالباب الرئيسيه... يوم الاثنين يمكن تداوم ...
يمكن تدخل ...
واباوع بوجوه الطلاب ...
يسلمون وارد... وبعضهم مااركز شيگولون ...
لحد شفت مروه... ناديتها

: مروه مروه تعالي
وصلت يمي
: نعم مستر

: شفتي روان اليوم

: البارحه مريت عليها... شويه تعبانه ..ومراح تداوم يومين

: يومين هوايه
انتبهت على الي گلته وسكتت

: الاوفس يعرف حالتها ونطوها اجازه ...والواحبات سلمتها على موقع المدرسه

: انتي تروحيلها اليوم

: اكيد اروح

: سلميلي عليها... واخذي رقمي اتصلي بيه من يمها... اريد اطمئن عليها

وسط استغراب مروه من حالة الاستاذ... الواگف يرتعد ويتحسر
وهو يسال عن طالبته
اخذت الرقم وراحت

( تركت الدوام ورجعت للبيت )
افكر اروح اشوفها هسه بيتهم مابيه غير امها البنات بالشغل

غصبن عليه وبامر من گلبي
اخذت سيارتي وصلت للبيت
دگيت على رقمها متجاوب
دگيت الباب فتحت امها

: هلا يمه رعد تفضل

: شلونج حجيه
حبيت اطمئن على روان ...صديقتها گالت تعبانه

: تفضل يمه هلابيك

فوتتني للصاله وسولفت ويايه
اعلي صوتي بلكي تسمع وتطلع

: من رخصتك يمه اشوفها گاعده نايمه
حتى تجي تسلم عليك

طلعت دگيت على رقمها مره ثانيه
جاوبت
سديته لان امها دخلت جابت مي

: لاتعبين حالج حجيه والله كلشي لاتسووين خمس دقايق اشوفها واروح
اقصد اطمئن عليها

: رايحه اگعدها

دقيقتين واجتي روان لوحدها

روان
دگ التلفون الصبح رقم رعد راسا سده ....
وبعدين سمعت صوته بالبيت ...بدلت... وطلعت اسلم

: هلووووو مستر شلونك
ترك الكرسي وگف حالته تقهر عبالك ديموت

گعدت على كرسي مقابيله

: روان سلامتج شبيج مريضه

: مابيه شي هذا العلاج من اخذه اتعب كل مره....
وهالمره مااعرف ليش بدل الابره انطوني اثنين ...
حسيت جسمي بمكان ...وروحي بمكان ثاني ...

: قلقت عليج ...وسالت مروه عليج... جاوبتني يومين يله تداومين
ماتحملت اجيت اشوفج

: شكرا على السؤال والجيه
مافي داعي تترك شغلك والبنات الي يحبوك علمودي خطيه تگطع بيهن

: هههههه بعدج غيرانه

: وعلى شنو اغار عرف ولف

:منين جايبه هالحجي هذا بدايه السنه كنتي متعرفين عربي ولا انگليزي

: اتفرج يوتوب عربي وانگليزي حتى مصري تعلمت

: لعد غير تعلميني مصري

: ليش انت فارغ اليه ....
اشو حتى السوال بالصف متجاوبني

: يابه كل الوقت الج بعد شتريدين

سكتت مارديت
وانتبه على وجهي

:زين الاثر بوجهج راح

: وين راح بعده متشوفه

:لا ماشوفه اقتربي داشوفه

اجيت يمه على القنفه
مرر اصابعه بخفه على وجهي

: لو ما الحجيه موجوده ابوسج حتى يروح الاثر

باوعت على الباب ايده مازالت على وجهي
وفزيت من مكاني واني اكول

: ماما ماما اجتي
فز والتفت شاف ماكو احد

ضحكت عليه

روان : ههههه خفت... حيل بيك
مثل ماخوفتني

: معاش الي يخوفج بيبي

: احلى كلمه احبها وماامل منها

: انتي( Mybaby ماي بيبي
طفلتي ) اذا تفتهمين المعنى

؛ افتهم... وخايفه... ومامصدكه

: ممصدكه احبج ؟

: شنو الي يخليك تحبني شنو بيه ؟

: اجمل مابي الحب ان يكون بلا تفسير وبدون سبب

؛ احلف يله اصدكك

: وعيون روان

: لا بالله احلف من صدوك

: ليش عيونج قليله متدرين اغلى مابالكون

: لاتتهرب من الحلف تريدني اصدكك احلف

قسم بالله احبج انتي وبس ....
وسواء كانت مشاعرج اتجاهي مراهقه ام حب اريدج

: لاتثير غيرتي مره ثانيه

: خلص مراح اسويها مره ثانيه

: اروح اشوف ماما تجي تكعد يمنا

: شنو خايفه مني

: لا بس ملاك من تعرف راح تشتغلي تحقيق فخلي تحقق مع ماما افضل

: على راحتج اني هم راح اطلع

:لا عفيه لاتطلع ابقى سولف مع ماما شويه واني اطلع

: قبل لتطلعين

وگفت واني اشوفه يطلع من جيبه ورقه وانطانياها

:بالمتحف قبل كم يوم عجبتج الرساله الي كاتبها الزوج لزوجته
واعتبرتيها دليل حبه الها

: اي صحيح كلامه لحد الان ابالي

: صورتها ونسختها الج
اعتبريها مني الج دليل حبي
وننتظر اللقاء من يصير عمرج ١٨ سنه نتزوج

: اذا بقيت عايشه ١٨
طلعت صحت ماما
تگعد يمه
: ها ماما وينج الرجال لوحده گاعد

: جنت احجي ويه ملاك گتلها رعد عدنا فرحت
خوش ولد وخطيه ملاك متعلقه بيه
بلكي الله يقسمه الها

سكتت ورحت لغرفتي
فتحت الرساله وبستها وقريتها من ساعة الي استلمتها منه لحد الليل الف مره

——————————
ايه :
مرت شهريين اشتغل ١٦ ساعه باليوم
بين محل التاتو.... والمطعم ...ارجع للبيت انام ...حتى اهلي واخواتي مااشوفهن سددت الدين
وبديت اوفر للسياره وحتى اگدر ارجع للدراسه الي تركتها باخر فصل

التعب اصبح عنوان حياتنا ...
اني وملاك نسينا حتى شي اسمه
ترفيه ...
سنتين صار من دخلنا امريكا ...منعرف شلون خلصت
ايامنا روتين ...
مايكسره الا مراجعه المستشفى مع روان
او موعد دكتور ماما

وصلت للبيت بليله مثلجه ...جمعه كانوا منتظريني

: ملاك اذا گاعده ليش مااجيتي عليه بالسياره

: عبالي يوصلوج مثل كل مره
تعالي اگعدي نسولف

: اغسل واجي

اجتمعنا كلنا والمتحدثه ملاك

: باجر اتعاقد على البيت ...
والقرار قرارنا كلنا ...
بيت العراق انباع ...يعني بعد مااعدنا وطن غير اهنا ..
الي تريد حصتها... تكول وانطيها ..
والي تريد تدفع ويايه مقدمه للبيت براحتكم ...

: البيت النا كلنا وميصير نسجله باسم ماما لان التقاعد يسالها منين الفلوس وكيف ودفعتي كاش
ومنگدر نخليه باسم روان لان يگطعون عليها التامين الصحي ومصاريف المستشفى منگدر عليها

:ملاك بقينا اني وياج ايه تحبين يتسجل باسمج انتي

: لا سجليه باسمج... انتي موظفه بعمل رسمي والدوله مراح تحاسبج ...
وهم يقوى الكردت عندج لفائدتنا كلنا ..
اندارت على ماما الي اتابع الاخبار وتسمعنا وسالتها
: ماما موافقه البيت يتسجل باسمي

ام ملاك : ليش مااوافق يايمه توكلي بالله

: وانتي روان حبيبتي موافقه

: اني عدكم خطار سنتين والله وياكم

: وين تروحين ليش

: اروح لبابا يوميه بالحلم اشوف مكاني يمه... وعدني ياخذني يمه

تعصبت ملاك من حجيها

: تخبلني من تحجي هيج
وماما اخذت روان بحضنها وهيه تمسح على شعرها

: يمه ابعدي هذي الافكار من راسج ليش تقهرينا عليج

: تحب تددلل روان خانم مو بالله روان

تركنا روان لگابتها وكملت ملاك حديثها

البيت انباع ٢٠٠ مليون
وبعد اتعاب المحامي وصلني ١٨٤ مليون صرفتهم دولار طلعوا بحدود ١٧٢ الف البيت الي اخذنا سعره. ٥ ١٢ الف دولار
ندفع ميه تبقى علينا عشرين تتقسط على سنتين

: اوكي لاتنسين تامين على البيت فد الفين سنويا

: مناسيه واني وياج نحتاج سيارات حديثه... خو مو نبقى يوميه نتوسل بالناس تصلح سياراتنا ..

: صحيح ونحتاج اثاث ونفتح بالبنك. حساب لروان بالبنك للجامعه
گامت روان واستاذنت منه

: روحي نامي

بعدها ناقشنا موضوع الاثاث اني وملاك كلش مهمه عدنا هالنقطه نحب الترتيب والبيوت الي بيها حيويه واثاثها مرتب ونظيف

:منين نشري اثاث

: اني اگول نشتري جديد كافي بهذله

: مثل متامرين ايه نروح ل ارت فان الجمعه ونشتري اثاث جديد

: ارت فان مره وحده
هذا القنفه الوحده بيه
بثلاثه الالاف

: يمعوده شماخذين من هالعمر... والمن نريد فلوس
حتى ورثه ماعدنا ...
لا زواج ولاخلفه

: والله صدوك
اگلج رعد ولاحجى ولا لمح

: ابد يتصل بيه على روان ويطمئن عليها

: انتي اذا تحبيه لمحي شراح يصير

؛ خلي انتظر نهايه السنه ....الدراسيه واشوف هم يتصل بالعطله الصيفيه
———————————-

شموع عمري .....
تحترق بين غربه .... وعمل
واثبات الذات وتحقيق الاحلام...
ارجع للبيت نفس الوحشه
والوحده .... هدوء الزوايا والجدران الي صارت كل مافي يومياتي
هدوء مزعج
احلم بزوجه .... وصديقه ... وشريكه لعمري الباقي
واحلامي البسيطه .....

في العمل ..... انتظر اشوفها مثل كل بدايه اسبوع
تجي تاخذ (التوب ) انابيب الفحص المختبري
تنطيني الطلب بلا متنظر اليه
واسلمها التوب
توقع على الوصل. وتگول
(شكرا ) وتروح
واظل انتظر جيتها الاسبوع القادم

حاولت افتح موضوع وياها
اسألها .... مااگدرت
نظرها دائما على الورقه والطلب
وتنظر للساعه
وهيه مستعجله ....
كلشي بيها يختلف عن الباقيات
قوتها .... وادبها
ونضوج عمر الثلاثين

انتهيت من سرحاني بيها
برنة تلفوني
ااا هذا رعد ....
الوووو رعد شلونك
:هاي وينك صار اسبوعين مجاي لديربون
: ان شاء الله الجمعه اني يمك
: لاتنسى تجيب العسل وياك
: ها يعني انت تريد اجي علمود العسل. يله ماكو مشكله
اگلك رعد بماان انت تعرف كل ديربون اريد اسالك عن بن

: ان شاء الله تدلل بس تعال مشتاقيلك
بس شنو اسمها البنيه
:ماادري فقط توقع بحرف m
وعراقيه

: دكتور هذي مو مواصفات هذي لغز
يله من تجي نتناقش واكيد اعرفها

الي يقرا يضغط النجمه بليززززز