رواية نوارس مهاجره الفصل التاسع عشر 19 - بقلم zeanab_almusawi

#نوارس_مهاجره20
#زينب_الموسوي

ملاك

يمكن التعب بحياتنا... وروتينها ...
ودوامة الي بلا نهايه الي نعيشها ..
تخلينا نعكس هالشعور على ...اقرب الناس النه
ودائما نختار الاضعف ...
هذا الي سويته اني مع روان ..

عمري ديضيع بين شغل... وتعب ..
وتدبير عيشه.. ومستشفيات ...

وفجاءه اتصالات رعد اختفت. ...
والكلمات الي كنت اسمعها منه
كانت بمثابه غذاء روحي ...
تخليني اشعر مازلت على قيد الحياه هذي الكلمات تبخرت مع بدايه العطله عند روان ...
وبالضبط مجرد صار التلفون عدها ...

واني افتش بتلفون روان مثل كل يوم الصبح
وهيه واگفه يمي ...
استغرب كلشي ممسوح
يثير اسألتي وشكوكي ...
ويامن دتسهر الليل كله ؟
سالتها
عندج تلفون ثاني ؟
جاوبت بدون اي خوف
:لا ماعندي ... هذي جنطتي فتشيه
وغرفتي گدامج اصعدي دوري

جوابها زادني حيره ....
جاوبت بثقه... بس عيونها بيها سر
ركزت عليها
مامهتمه واني ابحث بالتلفون
وتاكدت في وسيله ثانيه
تتصل بيها بلا مندري
ولازم اعرف شنو هذي الوسيله

انطيتها التلفون ... خلته بجنطتها ... ورادت تطلع

: وين رايحه من الصبح المول يفتح بالعشره

وهيه واگفه امام المرايه الي. بالصاله تتفحص ملابسها ومكياجها. ردت
: رايحه لبيت مروه. ابقى يمها وبعدين نروح للشغل

: اشو مگلتي
اندارت عليه وخايفه لاارفض
: نسيت ..
(وكملت )

ماما تدري

: جاوبتها واني احمل جنطتي واستعد لشقاء يوم اخر

: مروه عدها اخ شاب بالبيت
متروحين

اعترضت بضرب الارض برجلها

طلعت وتركتها ... طول الطريق افكر بيها. ... وشكي محصور بين
رعد وتحسين
واحد منهم على علاقه بيها ....
رعد طول فترة مرضها مابطل اتصالات
وتحسين يتصل بيها باليوم عشر مرات واكثر
ضنون ... وشكوك حاصرت ذهني
وماطول ضني... وشكي
من رجعت الظهر للبيت
كانت موجوده... وزعلانه من ماما ..ومني

الشك عماني مافكرت بمشاعرها
وگفت على راسها وهيه متمدده على الارض امام التلفزيون
وطلبت منها تصعد ويايه لغرفتها

ردت مستغربه.. وهيه تترك وضع الاسترخاء الي هيه بيه

: ليش تريدن اصعد ..، اكو شي مضيعته بغرفتي

جوابها معناه في شي خايفه منه
الحيت عليها

:گومي داگلج

استنجدت بماما وهيه تصيح

ماما. ماما ... وتالي وياكم ترى راح اهج من البيت
شمسويه حتى تفتشين ورايه

اتدخلت. ...ماما وايه مفاد
صعدت لغرفتها واني وياها
ايه گعدت الدرج وغير راضيه على تصرفي
: شلون بهاي الحرب المتخلص شبيج ملاك تدورين وتفتشين وراها
عبرتها وصعدت الدرج واني اگلها
: معليج انتي

دخلت غرفتها انتبهت لاب موجود

باوعتها عينها عليه

: افتحي اللاب بسرعه وبلا نقاش
اريد اشوف تراسلين الليل كله
وتنطيني التلفون الصبح فارغ

راحت يم اللاب بلا متحجي تناقش
فتحته وهيه تگلي

هذا اللاب عندج شوفيه ....
دوريه زين ...
واني نازله

قبل لتتحرك جريتها حيل من ايدها
وگعدتها.
: طلعي المراسلات بينج وبين رعد
وبينج وبين تحسين

: طلعت مراسلاتها مع تحسين
ونكرت عدها مراسلات مع رعد

من ضمن مراسلاتها مع تحسين
ومروه يحجون عن صوره
وروان تتوسل بتحسين يدز الصوره الها تشوفها
وهو يرفض
بعدها الصوره دازتها مروه

ردت اشوف الصوره
: طلعي الصوره اكيد حافظتها

تأتات وهيه تحاول تقنعني صوره عاديه

: طلعيها اشوفها صورة منو وليش تتوسلين حتى يدزوها الج

دردمت بعبارات
( هاي مو عيشه ... لو اموت احسن )
ماهتميت لحد شفت الصوره

صورة رعد بلا تشيرت

دنگت. وهيه تشوفني فاتحه حلگي وعيوني
والمفاجاءه عاگده لساني
والاسئله تضرب براسي
واحد من هاي الاسئله

: شتسووين بصوره استاذ رعد

گامت من يمي وهيه تگلي

: ملاك اقري المحادثه بينا اني وتحسين ومروه

استاذنا و ناصبين عليه. وطلبت الصوره شصار يعني

: شجابها عند مروه وليش انتي طلبتيها احجي بلا كذب

: وليش داكذب صوره دزتها مروه اليه
هيه تحب مستر رعد

كلامها كذب ...واضح المحادثه ...هيه تتوسل بمروه تدزها ...
وماسحه الصوره من المحادثه
وحافظتها بالصور

حاصرتها بالاسئله والالحاح ... وجوايه خوف ..لتكون روان تحب ...رعد وهو يحبها

: ليش مسحتي الصوره من المحادثه

: اي مسحتها لان اعرف راح تدورين وراي وتفتحين تحقيق متگليلي شتدورين بالصور والماسنجر
كافي ترى گمت اشك بروحي

علت صوتها تسمع ماما وايه وحتى تسكتني

واستعدت تنهزم مني
وگفت بطريقها

: تعالي اهنا الصوره شلون وصلت لمروه... كيف هو يدز صوره لتلميذته

بصوت اعلى واعلى ردت

؛ هذا الي يهمج تريدين تعرفين موقفه
اطمئني الصوره اخذتها اله بالجم..، باعي زين

: انتي شبيج تردين بشمخره فوك عملتج السوده محتفظه بصوره ل استاذج عاري متستحين
نزلت دموعها في محاوله اخيره ل اسكاتي

: يمعود ياعاري الف مره شايفته بالجم بلا تشيرت مو بس هوه الرياضين كلهم

انهزمت مني ...وهيه تركض ...وتصيح
(راح تخبلوني )

ودخلت ايه تتفلسف براسي

: ملاك ترى روان مراهقه وانتي دتضغطين عليها هوايه واحنا بامريكا ميصير هيج

: لج طول الليل سهرانه اريد اعرف تراسل منو
تعالي شوفي الصوره لرعد

جتي شافت الصوره وبكل برود اعصاب جاوبتني

: كافي تراقبيها ملاك ترى احنا اكبر منها بشويه... حبينا.. وتعلقنا.. ودزينا رسائل.. وطلعنا مواعيد ...وجيلهم يختلف

: لج اخاف تحب رعد

صفنت على كلامي واني كملت الها ضنوني

: ملاحظه اتصالاته اختفت
وجياته للبيت
اخاف يحبون بعض

على ميز اللاب وامام صورته خليت راسي وبجيت

: ايه مابيه حيل صدمه لاخ

: ان شاء الله ماكو صدمه
يمعوده تصدگين مدرس يحب طالبه عنده وچماله مريضه

كعدت تحلل ويايه ...
وتدخلني باوهام ثانيه

: اعتقد روان تحب تحسين

باي وسيله ردت اصدگها واقنع نفسي

: شلون عرفتي

اشرتلي على محادثاتهم
وهيه تراجع قراءتهم

: شوفي الميانه والشقى بينهم
وبعدين مافي محادثه بينها وبين رعد

وكملت كلامها
؛ افرضي تحب ...الافضل نعرف بعلاقتها... ونتعرف على الشاب ونكون صديقاتها... حتى متغلط ياملاك لاتفرضين عليها حياة متريدها

واني استمع لكلامها ومحتاره هل خوفي لتكون تحب ؟
او خوفي لتحب رعد ؟
: اريد اعرف منو الي تحبه

: هسه اتركيها السالفه واني احجي وياها ونشوف

: لو في شاب اگولها عادي بس تكون حذره واي نصيحه تعتبرنا صديقات
لازم وحده منا تقترب منها بدل منراقبها

: وتصدگين بسالفة مروه تحب رعد اخاف هيه

: ليش مااصدك هذي تصير بالمدارس طالبه تنعجب باستاذها الوسيم واخذت صوره اله ودزتها لصديقتها
يمعود نص الشعب الامريكي بالشارع بلا تشيرتات رياجيل ونسوان

ضحكتني حجايتها وتحليلها

: شگد سفيهه انتي هم

روان
طلعت للبراني اتصل بمروه وافهمها الصار

: شعندج تتصلين اني مو زعلانه وياج

: انتي هم بطرانه اني تلفوني مراقبيه انوب تريديني اروح سفره وياج

عرفت من ضوجتي في موضوع مهم. واهتمت للحديث

: اشو ضايجه شكو

لخاطر الله شوفيلي حل المخابرات كشفتني

: عزا تقصدين ملاك

: ملاك شافت الصوره
وهسه الكل مراقبني وماما متحجي ويايه
وايه تبوعني وتبتسم ابتسامه غريبه
على الغدا ماگدرت اكل وياهم وهسه ميته جوع واريد ابجي
شاسوي گوليلي

بعد ماعرضت عليه الغدا وتعالي يمنا ... فكرت بحل

: باعي راح ادز لج رسائل بيها كم كلمه عن رعد
على اساس اني احبه

: ميفيد لان تعرف تاريخ الرساله

: والله ماادري شگلج

مالگيت حل اقنع بيه ملاك تتركني بلا متراقب
والزاد قهري هو ماما الي بدت تشك بيه

هيه بالصاله گاعده مشغوله تبدل الورد بالمزهريات ...
وعينها عليه
واني الجوع عصر معدتي
وكرامتي متسمحلي اكل گدامهم
لان زعلانه
والعيون عليه
رحت لغرفتي
طلعت ملابسي والمنشفه
حتى ادخل للحمام
ونزلت الدرج
وبحركه خاطفه دخلت المطبخ
في دجاج مشوي
مبقينه اليه.
اخذته وغطيته بالمنشفه
واريد ادخل الحمام
ماما باوعتني من فوك ليجوى عرفت في شي
سألتني
: شنو مغطيته بالمنشفه
جاوبتها وكلي امل
متلح بالسوال وملاك تسمع وتفتشني
: ماكو شي اريد اسبح هم حرام

صيحت عليه
شيلي المنشفه اشو

جاوبتها ( ما )
وردت ادخل
جتي ملاك راسا وخطفت المنشفه مني
وگع الصحن والاكل بالارض
ضحكت ملاك
وماما سكتت وايه انقهرت عليه
الفشله والخجل ساعتها
خلاني احس اني مو من هذي العائله
ركضت اطلع للباب الخارجي
ايه تصيح ورايه
اوگفي روان اني اجي وياج
اوگفي
ركضت بالشارع بلا مااعرف وين رايحه
ملابسي كانت شورت قصير دائما البسه بالبيت
وجوعانه وماعندي فلوس
ولاتلفون
اقرب بيت اليه بيت مروه

مشيت واعرف اهلها مراح يقبلون على ملابسي

اقتربت الخجل يمنعني ادگ الباب الجوع يدفعني

—————————-
ايه
طلعت روان من البيت
بعد تصرف سخيف من ملاك الي
حولت البيت لسجن بالنسبه الها
بالبدايه كان بدافع الخوف
وبعدها تحول لشك ان رعد
فضل روان عليها

صار الوضع خارج عن المعقول
حجيت عليها ولمتها
وتركتها وطلعت ادور روان
اول بيت كان بيت مروه
وصلت البيت
دگيت الباب فتحت امها لمروه
رحبت بيه ودخلت
لغرفة الطعام لگيتها
لابسه ملابس مروه
وگاعده تاكل على الميز

سلمت عليها

: هلووو روان حبيتي
وهيه شافتني ظلت تبجي ودارت وجهها على الشباك

مروه طلعت وامها تركتنا لوحدنا

اقتربت منها وگعدت يمها
درت وجهها عليه غمضت عيونها

: حقج. روان مالومج
انطلقت بالبجي والحجي

:ملاك تخبلت. ودتشوفني بعين
الحقد والكره تتمنى اموت ادري بيها
ومن هسه اگلج بعد معليه بيه
ومتفتش ورايه
لا والله اتصل بالشرطه

هديتها بوسه ومسحت وجهها من الدموع وگتلها

: اني وياج من اليوم ورايح معليه بيج
بس ماحبيت كلمة الشرطه منج
ليش انتي ناسيه منو ملاك وشسوت علمودنا
سكتت ماردت
وبسكوتها. وجدت فرصه احجي وياها عن امور تخص حياتها

روان
لحكتني لبيت مروه وعجبني اسلوبها من تحجي ويايه

هيه هم تشك بيه لكن اسلوبها يختلف...
ورادت نصير صديقات
سالفه نصير صديقات لازم تحجيلي ....صارت قديمه كولش ومعناها اني اشك بيج بس ماعندي وقت اراقبج ...
بس اني هم احتاج احد يسمعني

ودار الحديث بينا مو فقط تحجي انما تفهمني وتصدكني

: روان انتي تعرفين اني مو مثل ملاك ...اثق بيج ..ومااعتبر الحب غلط بالعكس ...المهم الشخص من يحب ميغلط ...ويطلب النصيحه من الاكبر وملاك خايفه عليج مو تكرهج

: ملاك تشك بيه. في فرق بين الخوف... والشك.. بعدين جيبيلي بنت وحده بعمري متسهر الليل على التلفون ترى مو اني بس

: اني وياج ولان احنا من جيل. يختلف ماسهر على التلفون ..نعتقد هذا خطا ونظل نحلل بكيفنا ..
هسه داسالج في شخص تحبيه ..
جاوبي وروح بابا... مااكول لملاك واتعرف على الولد ...واضمه للاصدقاء وعادي يتعرف على عائلتنا ...وعلاقتكم تصير گدام عيونا

: واذا گتلج ماعندي علاقه تصدگيني

: هاي هيه مصدگتج
وارجع اگلج اي علاقه مدام مابيها خطا ...
ومبنيه على الحب والاحترام لاتضميها... ترى العيب نخبي ونمارس حق من حقوق الحياه بالسر ..
الحب يكون علني اهلج يعرفون ...حتى الشاب ميعتبرج كذابه ...وحياله.. وتخبين على اهلج ويبدي يطلب طلبات سخيفه

: شنو يعني الطلبات

: مثل المحادثه تطلع عن اصول الحب ..ويبدي يحجي حجي اباحي.. بحجة انتي مرتي ..وانتي.. عرضي واريد اخطبج
وصور بلا ثياب وافتحي كاميرا. وغيرها

: وروح بابا كل هذي مامسويتها ..ولا اعرفها.. ولابيوم راح اسويها

: حياتي انتي روان اعرف انتي متسويها ..دانبهج فقط ..
تعالي اگلج اشو انتي نجحتي ومجبتلج هديه

: صدوك ليش مجبتي هديه

ايه : هسه نطلع اني وياج ونروح للمحل تشتغلين بيه اختاري هديتج واني ادفع

: عادي اذا اختار مكياج

: ليش لا ولو انتي متحتاجين مكياج اختي طالعه عليه من جنت بعمرج اخبل

: ولا زلتي تخبلين

والحديث اخذ ايه لقضيتها الرئيسيه. ...الي مخليتها بين موج... وجرف

: اووووف ياروان الزمن دار دورة ماحاسبتها. ...المفروض هسه متزوجه.. وعندي اطفال.. واشتغل.. وعندي بيت ..ورجال يحبني واحبه

روان : تزوجي هسه... وكافي تنتظرين طلال
اسفه اذا اتدخل.. بس اني اسمعكم تحجون عنه

: عادي حياتي احجي اسمعج

: خابريه وگليله يگولها بلسانه مااريدج ..

: گالها. بوجهي

: مااعتقد يعنيها. ليش ميطلگج لو ميريدج ليش هو باقي بلا زواج

: يكول مااريد ارتبط لا بيج ولاغيرج

: لعد تزوجي انتي.. حلوه ومحبوبه.. الف واحد يتقدملج
لو بس شويه.. تهتمين بنفسج وتغييرين الاستايل

: روان ماريد غير طلال مااگدر

: اوكي براحتج. وهم مايمنع تهتمين بنفسج
خلي اليوم بالمول نشتريلج كم قطعه مودرن... على گصة شعر صيفيه... ولون يلائمج ..وكم قطعة اكسسوار.. واظافر مصبوغه شتكولين

: اشوف الكردت كارد اذا يسمح

:يله عل مول

نبدي بشعرج واظافرج وبشرتج
شغل المطعم مأذيج واليوم اطلعج احلى بنت بديربون

معناها اليوم مااروح للشغل خلي اخابرهم

اخذنا الوقت بالتسوق والمكياج والصالونات.

—————————-
ملاك

بدوامي بالمستشفى. العصر
ومشغوله بالتحاليل
دخل ولد ابيضاني
شعره خفيف لابس نظارات طبيه
جسمه مليان نوع ما
شكله دكتور مرتب زايد والقميص ساده ل اخر دگمه بيه
ويبدو عليه الادب
من دخل لغرفة التحليل وسال عني
البنت الي جالسه بدايه الغرفه ...
اني بالخلف اشوف واسمع لكن
هو ميشوفني
بسبب حاجز زجاجي
شكله شايفته ومااتذكر وين

جتي البنت طرقت الباب وخبرتني بشخص يسال عليه
جاوبتها يتفضل

هو واگف على جانب واعتقد سمعني
تحرك وگف بالباب
: تفضل اخي ماادري ...وين شايفتك

: شفتيني يوم نقل الاثاث مع رعد وكل اثنين تجيين تاخذين توب من عند مركزنا وتطلعين

- بلي تذكرت اهلا وسهلا

تفضل اگعد

گعد وابد مانزل عينه
حبيت اختصر واعرف سبب وجوده
گعدت بمكاني امامه

:بشنو اساعدك

جالت عيونه بالغرفه وانتبهت لون عيونه نفس لون عيوني
جوزي فاتح
وظل يدور على الكلمات ونطق

: هو الموضوع مو مال احجي بيه بالعمل ...
والي اگدر اكوله حاب اتعرف ...عليج وتتعرفين عليه ..
شفت بيج انسانه خلوقه ..وسالت رعد عنج وتشجعت احجي وياج

( رعد بالموضوع ) الامر غريب
تغيرت صورة الترحيب المرسومه على وجهي وتحدثت بجديه

: تحجي وياي على شنو

عرگ وهو يشوفني اصعب الامر عليه

: على شنو يعني. اني ادور على زوجه من سنتين ..
واذا ماعندج مانع نتعرف على بعض

گمت من الميز اشاره مني الكلام انتهى

: اني مو مال تعارف وطبات وطلعات

وگف هوه ورد عليه
؛ ولا اني همين
مجرد تعرفين منو اني وشغلي واعرف انتي منو.
ونشوف اذا الله كاتب قسمه

: تفضل احجي وباختصار من فضلك

: اوكي نگعد على الاقل

گعدت واني اغلي وافكر برعد معقوله محاس بيه وداز صديقه عليه
گعد وحجى اسمع كلمه وكلمه لا
اسمي واثق عمري ٤٠ سنه
طلع اجازة السوق حتى اشوف المواليد

شفتها وكمل
اني اصلا من الموصل وبسبب العنف والطائفيه طلعت من العراق صار سبع سنين
والدي شيخ معروف اهناك وانتقتل بعد السقوط
اني دكتور بيطري بالعراق
اهنا ماحصلت اختصاصي
درست زراعه وكملت
واشتريت مزرعه تبعد ساعتين عن ديربون عايش بيها
واعمل يومين بالاسبوع بالمركز الي تعرفيه
حتى اغطي مصاريفي لحد المزرعه تنتج
مهاجر لوحديو اهلي بالموصل

ومامتزوج. انشغلت بالدراسه وتكوين الذات
المقدمه الي گالها كلها ماهمتني وبالي سوال واحد سالته

: رعد يعرف بجيتك اهنا حتى تخطبني

انزعج وهو يجاوب ونزع النظارات

: اكيد يعرف وصراحه هوايه مدح بيج.. وبتربيتج ..واخلاقج وشجعني

ماتحملت اكثر اريد اصرخ اريد اختفي من هالعالم الي مابيه غير صدمات
جاوبته وعيني للارض
: اوكي
مثل متشوف اني هسه بالعمل
مره ثانيه ان شاء الله نتعرف اكثر

؛ طيب تاخذين رقم تلفوني وشوفي الوقت الي يناسبج

: بعدين بعدين الله وياك

صرفته من گدامي طلع وعينه
عليه من خلف الزجاج

عقلي مد يستوعب رعد يدزه يخطبني
معقوله اني متوهمه وفاهمه اهتمامه غلط
اعتذرت عن الدوام وطلعت البيت ...
اسوق ..واسترجع ابالي.. المواقف بينا.. الاغاني... كلمة ملاكي.. كل ميشوفني وكلامه عن ملابسي والوانها ..
اني ممتوهمه مستحيل هو الي اوهمني بهذا الاهتمام
وصلت للبيت بدون تركيز ...
الدمعه واگفه على حد عيني ...
دمعه على امال بنيتها ..وانتظرتها تحملني ...بمحطة استقرار بعيدا عن الوقوف بنفس المكان
باوعت على البيت تصورت الجدران تضحك عليه. ..جلست على اقرب كرسي
اجتي ماما عليه... وگعدت يمي

: شبيج يمه مريضه شنو

انفجرت بجي بحضنها

: تعبانه ماما تعبانه

: سلامتج يمه شبيج

: ماادري شبيه اريد اموت ... اريد انام
اتركيني انام

: فوتي لغرفتج ونامي هسه البنات يجوون وبخبصوج

: عوفيني اهنا

تمددت على القنفه واطلقت العنان لدموعي وماما تسالني ماجاوب
ماريدها تعرف بخيباتي
كم خيبه وكم عثره
ساعات
لحد فتحوا الباب ايه وروان

فتحت عيني شافوني ابجي
شمروا الاكياس من ايدهم وركضوا باتجاهي
ايه شالت راسي وخلته على صدرها
وروان خايفه تقترب

: خير شصاير ملاك احجي
اختنگت احجي وتقطع الكلام بالدموع
: لج رعد داز صديقه عليه يخطبني

: شنو
: ماادري شنو كان يضحك عليه شافني ميته على زواج

: والاغاني وملاكي والبسي هذا اللون. وانزعي هذا شنو كان يمثل عليج وتالي صار شهم داز واحد يتزوجج

لج انتي هم صدگتي يتزوج جاي ينصب حاله حال القبله
بحجة ابويه شيخ واني دكتور و اخذي رقمي ونتعرف

: ياكلاب يا بلا غيره

: وج هذا. رعد لعب عليه وحتى اصدقائه يعرفون
صديقه صار فتره اخذ منه توب ماحجى وياي ابد حتى ميباوعلي
اليوم يگلي رعد شجعني

: انطيني تلفونه والله لا اطيح حظه ميگول بنات بلدي هالنذل الحقير

: وج سنه كامله يتغزل ويتصل وساكن بيتنا واغاني واكل وتالي يدز صديقه اليه

تركتني ايه وطلعت تلفوني
: بعد مااتحمل انطيني رقمه
قبل لتدگ التلفون
حجت روان الي وجهها صار اصفر

: ملاك اگلج شي بلا متزعلين
زمخت بيها
: احجي شعندج

رجعت كم خطوه والخوف مالي كلماته

: مستر رعد ويه المدرسات ويه الكل يعيد نفس المجاملات والحجي وهنه يعرفن طبعه ويردن عليه كذاب

: اسكتي انتي شفهمج ذني زميلات يجاملهن... اما اني فلا ...
لج مره اتصلت بيه گلي على اغنيه.. وغنينا سوه في وحده من المدرسات غنت وياه

: ماادري شگلج
يجوز الولد هذا صدوك راد يخطبج

: متسكتين الله يخليج

وماما حاولت تهديني وتقنعني بالوجه الجديد بحياتيد
والمكرر في صدماتي

: يايمه يجوز الولد رايدج من صدوك شوفيه واحجي وياه

: كافي عرفوني لوحدي كرهت حياتي وعيشتي

روان

رغم حبي لرعد بتلك اللحظه كرهته... واني اشوف دموع ملاك وحسرتها
والي زاد غضبي منه اكثر
هو حالةد ماما الي ارتفع ضغطها بالليل
من القهر على بناتها واخذتها ايه للمستشفى ...
ظلينا اني ...وملاك.. بقلق عليها
وابالي ...صور بابا
مااريد.. افقد ماما

بلا اراده مني اتصلت برعد
مجاوبني مااعرف ليش
نزلت للصاله انتظر دگة الباب
نعست واني انتظر رجعة ماما
شافتني ملاك اتثاوب

: فوتي نامي من تجي اني افتح الباب

: مااگدر انام لازم اطمئن عليها
جتي يمي حضنتني وبجينا اثنينا

: الله يساعدها ماما شگد تحملت قهر من ورانا

: الله يساعدها خايفه عليها منو النا اذا راحت

: اسم الله لاتحجين هيج روان
هسه تجي مابيها شي

: داتصل على ايه متجاوب

: يمكن قريبه من البيت
لذلك متجاوب

فعلا بعد دقايق اندگت الباب
ركضنا اثنينا شفنا ماما ...
بسنا راسها وايدها ماردت
علينا من سالنها شلون صرتي ...
اخذناها لغرفتها. ايه عيونها مورمه من البجي

ملاك طلبت نطلع وهيه تنام يم ماما
طلعنا سالت ايه

: شبيها ماما

: ضغطها صاعد ابرتين يله نزل
...والدكتور اخذ تخطيط للقلب محتاجه قسطره ابسرع وقت

: ياربي دخيلك والله خايفه عليها

ايه : الله كريم حبيبتي فوتي نامي والصبح يصير خير

صعدت الدرج وصلت لفراشي
دخلت بسريري دموعي توگع بلا سبب
وابالي سوال
لو گلت ال رعد ملاك تحبك يمكن يتزوجها وماما تصير زينه

اتصل رعد حاولت كل قوتي اكتم بگائي ماگدرت اسيطر عليها انسمعت ويه كلمة الووووو

: سلامتج بيبي ليش تبجين حبيبتي

: اريد اگلك السبب ومااگدر
افكاري مخربطه ومااعرف شسوي ودي احجيلك ومااريد احجي

؛ اذا متحجين اليه المن تحجين ها مو اتفقنا اني كل الي تريديه وتحتاجيه

حجيت كل الي ابالي وگلبي

: ليش وهمت ملاك بالحب ...
ليش تغزلت بيها.. وخليتها تحبك ..
دموعها اليوم خلتني مو بس اكرهك اكره نفسي همين

: ماوهمتها بشي
اتصال مااتصل بيها الا اذا اسال عليج

: ملاك تحبك وماما كانت متامله تخطب ملاك وتتزوجها وترتاح من التعب والشغل
تزوجها لخاطري

بدا يرفع صوته ويصيح بلا شعور

: واني مالي خاطر مو مهم منو احب. ومنو رايد اتزوج

واني كتمت غضبي احاول افهمه وضع ماما وملاك
: ماما مريضه وهسه جابوها من المستشفى من سمعت داز صديقك يخطب ملاك
ارتفع ضغطها ماتحملت

: وين الغلط اذا صديقي رايدها الولد محترم ومرتاح ماديا

: ملاك فسرته ان داز صديقك حتى يضحك عليها

رعد : تفكيرها غريب جدا
خليني اني اصلح الامور

بعقل وبجنون وقلة حيله جاوبته

: لاتتصل بيه واذا تحبني صدوك اتزوج ملاك. الله يخليك

كلامي وصله لحالة جنون

: لج بابا شنو هو مزاد يانصيب شنو فهميني اني رايح لكليفورنيا اسبوع القادم
اطلگ بام واخذج الج مو غيرج

روان : مااگدر

: روان اسمعيني. تتصورين اذا مجاوبتي اتصالاتي وقطعتي علاقتي بيج راح اتزوج ملاك دسمعي لعد قسم بالله
مااسويها
جربت زواج المجامله مره ومستحيل اكرره مره ثانيه

دموعي تنزل وتطلع مني الكلمات بلا وعي
: واني هذا قراري مااكسر گلب اختي

: اشگرج على كسرة گلبي ماقصرتي

: باي

احيانا الدمع بدل ميواسي يحرگ ...
وبدل ما ينزل على الوجه.. ينزل على ابواب القلب.. ويضربها بحرگه
لحد تكره دمعك

مرت ايام مااجاوب اتصالاته ولارسائله ...
ساعات اقفل تلفوني.. حتى ماحس بذله... وهو يتوسل بيه ارد عليه
ماعندي الجراءه احضره ...
بقايا امل عندي
تخليني اسهر الليل حاضنه ...رسائله وصوره بجهازي
اتراجع عن قراري لثواني ...
وارد اقرر من جديد من اشوف حالة ماما وتعبها او دمع ملاك

——————————

ايه
تركت الشغل
حتى ابقى اداري ماما ...
واراجع بيها الاطباء ...
الي كلهم اكدوا حاجتها لقسطره ...والمشكله ضغطها المرتفع
يتعارض مع البنج

وفضلوا الادويه لحد تخف ...ازمتها النفسيه

اگعد من الفجر اساعدها على الوضوء والصلاه
ابقى سهرانه لل ١ حتى انطيها العلاج واگعد الفجر اساعدها
على الوضوء والصلاه
وبسهري اكون بالصاله اتفرج يوتوب تصاميم البيوت الحديثه
تفيدني من احصل شغل بشهادتي
وبدوامة ياسي فاجاني اتصال طلال... الي صار اسبوعين على اخر اتصال بيه

: هلوووو طلال شلونك

: انتي شلونج... اتصلت لان شفتج فاتحه نت ...گلت اسولف وياج مدام سهرانه ...

: شعجب ماعندك مباره

: لا البارحه رجعت من مباراه وفد اسبوع يله العب مره ثانيه
وبهل اسبوع صعب انام تعودت من السجن والخوف ان انام
نبقى واگفين يومين تلاثه
لحد نوگع من الاعياء وانام

:سوده عليه. الله يعينك علشفته
جوابه نبه ان ميريد يشكي غير الموضوع عليه

: مو عوايدج اليوم باين عليج الحزن

: مافي شي

: عليه لو مااني اعرفج واعرف شنو بيج بلا متحجين

وصار دوري اشكيله

: ماما مريضه حيل ولازم عمليه ...والاطباء يخافون عليها من البنج

: لا مو خوش خبر متستاهل خالتي سلامتها

: الله يسلمك

: هذا المسهرج

: اي والله انتظر انطيها العلاج وانام

: يعني تريدين تنامين هسه اسد التلفون لو نظل نسولف

: بكيفك

: اذا بكيفي نبقى نسولف
مشتاقلج
ماصدگت سمعت الكلمه
: مشتاقلي اني

: لعد اني

: وشراح تسووي بشوگك اليه

: ماادري

انتظر ثواني والكلمات الي بعدها گالها بصوت واطي

:عندي اجازه اسبوع افكر اجي اشوف خالتي... واشوفج

الكلمات سمعتها وحبيت اتاكد قبل لا اعلن نهاية الحداد بعمري

: طلال لاتنطيني امل بحلم احاول اصحى منه

طلال : ياريت اني هم اصحى منه
ياريت ايوته من انفتحت بوابة السجن وشفت اول ضوى
بدا الحلم بيج وتجدد كل دقيقه اشوف اسمج بتلفوني

: اگدر اعرف المانع يتحول الحلم الحقيقه وننهي هالمعاناه

نطق گلمة( محتاج ) وسكت
ورد گالها وسكت
بس اني وراه .... وراه

: حبيبي شمحتاج اني اكون لك

حجى بلا تردد
:
: اني محتاجج صديقه ... اعرف الكلمه صعبه عليج لان احنا كنا
اكثر من هذا
واعرف انتي محتاجه زوج
قاطعته

: اني محتاجتك انت. باي صفه كانت
صديق ... حبيب ... زوج
وخلينا هسه نبدي اصدقاء

بعدها گالت البشرى الاكبر الي خلت كل حزن عمري يتلاشى ويصبح رماد داسته كلماته
وانتشلتني حروفه من الغرق بحر نسيان
واخذني لقارب فرح واحلام

: ايوته محتاجج يمي

من الفرحه سديت حلگي بايدي لا اصرخ والناس نايمه
وكمل

: نعيش سوا ايه بعد مااگدر على الوحده والغربه خليج
ويايه وتحملي لخاطري

گلبي بعد ميتحمل اكثر
رديت عليه

: هسه اجي لشيكاغو اذا تريد
ضحك
وبدا يوضحلي الصوره

: حياتنا راح تختلف عن بقية الناس
المتزوجين وخايف متتحملين وتركيني
واذا تركتيني ماابقى عايش والله

ردت اساله كيف تختلف
بس هوه سبقني

: افتهمتي قصدي ايوته
مااگدر اكون زوج ولاتساليني ليش
نطيت بالجواب راسا

: حبيبي العمر بعد مايحمل افراگ ..، نعيش سوا والباقي على الله
مثل ماجمعنا سوا بگاع غريبه
راح يخلينا سوا للابد

اختفت الحسرات من كلامه
وطلب افتح كاميرا يشوفني

: مااگدر افتح كاميرا شعري صار يومين ممشطته كفشه

ضحك ضحكه طرشت اذاني
وقطعت هالضحكه تعليقه

: طول عمرج صريحه وعفويه واموت

سكت

: اسم الله عليك من الموت
ليش متكمل تموت على شنو

رد بروحه الحلوه المرحه
: مو گلنا اصدقاء

: اصدقاء ياعمري وحياتي

: كافي لا سد التلفون

كملت استفزه
عمري وحياتي ودنياي كله
جاوب
(لزگه انتي )
رديت عليه
(كولش )
: شوكت تجي

: هسه بالوحده وربع
اذا اطلع هسه احتمال اتريگ يمكم

: صدوك تحجي
ترى ماما مريضه ومتتحمل صدمه ثانيه

: ان شاء الله تشوفني تصير زينه
يله روحي نامي واشوفج الصبح

: مااعتقد اگدر انام بعد
راح ادزلك العنوان

دزيت العنوان گعدت ماما وملاك
وگتلهم
: طلال جاي الصبح ياخذني
ماما ضلت تدعيلنا
وملاك گامت وباستني

عشت الليله بالاحلام
واختيار ملابسي
والريوك الي راح اقدمه اله
وعيوني على الساعه